|
(الجزء 31) (اما في المطبخ .. زهور بشكارة شما ترمس هنود ) • زهور : هنود؟ تبين شي؟ (وهنود اتأشر لها تبا ثلج ) هاااه؟ شنو تبي انتي؟ • هنود فخاطرها : انا ليش أعوّر راسي وياها؟ (وتبطل الثلاجة واتطلع الثلج ..وتصد يمين ويسار اتدوّر على شي .. وتحط كم من قطعة ثلج في الجلاص .. وتشوف شيلة امها ميثاء ميّلسة عالكرسي وتشلها وطرتها على ينب وخذت قطعتين ثلج ولفتهن وربطتهن بالشيلة .. وشلّت الجلاص وياها .. وتربع داخل ..وقلبها يدق مال زياغ .. وهي اتدق الباب .. وهو عالغنفة متساند ومغمض عينه .. ودشت ..اتوقعته ظهر ... ) هو هنييه !! (وبتعجب ) راقد؟ لا يكون استوا له ارتجاج في المخ ؟ (وتربع له واتقرب شوي شوي .. حطت الجلاص عالطاولة ..وخذت اللي لافتنه بالشيلة واتقربت ) يالله بسم الله الرحمن الرحيم .. يالله ما يكون استوا به شي (ورفعت كم من شعره ولقت يرح خفيف على يبهته..وحطت الثلج على راسه ) • راشــد فخاطره : واااايه يعلني اسّد عووقج .. • هنود فخاطرها : ليش ما ينش؟ بس هو يتنفس !! (وما اتحس الا بإيد مرفوعة وماسكة ايدها ..وهي من الزياغ ردت على ورا ) راشد بطل عينه : زيغتج صح؟ (وهي تنتفض خايفة .. عمرها محد لمسها ايي اللي ما اتعرف اسمه يلمسها؟ وفلتت عمرها منه بالقوة وتطالعه باحتقار .. مع انه ما يبيّن منها شي لأنها متغشية ..) آآسف والله .. (ومن الغياظ حطت فإيده الثلج عشان يعالج عمره ودبّرت عنه ) صدق قمة !! .. (وما سوّت سالفة وهي تمشي عنه ) يقولج الشاعر .. هنود منصدمة وفخاطرها : شووووه؟ عواد؟ (وصدت صوبه ) راشد ومركز عليها وبدون ما يحس : من ذكرت قلبي ب خلن صافي النية لا ريم لا هو ب مها لا هي دمانيّـــــة لانرجس الشام لا جوري مغانيــــــــها ياويل قلبن متيم طاح في غـــــيــــــــــّه معزل العــود والشرتات زاغيـــــــــــــها عاينت براق صوبه لاظ لاظيـــــــــــــــــّة على دياره عسى السحاب ســــــاقيهــــا (وهو قام منحرج وهي أخسّين وكله من اللي قاله ..وروح موتره .وهي بندت الباب واتساندت عليه ) هنود فخاطرها : لا ريم لا هو ب مها ولا هي دمانيــــــّه ..ياويل حالي .. انا شو جايسني؟ ليش ابا ارد الميلس مرة ثانية؟ (ودشت ميلس الرياييل واتحاول تتناسى الموضوع ..و أشرق ويه الجود ..وسلمت عليهم ) الجود : تستاهلين السلامة فديتج .. هنود فخاطرها : ياربي محلاتها ..صدق عالطبيعة جميلة ... الجود : عيل مي اختج؟ هااه؟ (واتهز هنود راسها ) ههههه ما عرفتني اقول لها؟ مي : شنو؟ (الجود وتخبرها كل شي ..) الجود : هنود اقولج شي وما تزعلين؟ (وتبتسم هنود ) مي الفضول لعب بها : قولي قولي .. الجود : اختج هنود ماشاء الله عليها غواها مثل هل البدو .. وتاخذ من هاي اللي في القمة صدق شبه رهيب ..بس طبعا هنود احلى بعيونها الرصاصيات وشعرها الشليلي ..وانتي يا مي .. مي: انا شنو؟ الجود : وانتي احلى ما فيج يا مي عيونج ..وبعد كلمة ثانية مي احمر ويهها لأنه اول مرة حد يمدحها : شنو؟ الجود : ياعيوني .. (وهن يضحكن ) مي : لاحظتي هالشي يا عيوني؟ الجود: اكيد يا عيوني .. (وهنود اتأشر للجود تسألها منو يايبنهم ) ما فهمت .. مي: هنود بتروحين مكان؟ اووووووووه !! لالالا تقولج من يابكم؟ انا اقول احمد (وهي متشججة) ايش جمال ياناس !! الجود تضحك : احمد؟ لا مب احمد منو اتوقعين؟ مي: حمد؟ الجود: لا !! راشد اخويه .. مي: فضيحة ..دخلت الميلس وهو استحى ..كله من اميه نشبة !! نشبة : نشبج سكني في بلاد مالها دوا قولي آمين اسمعج تراني .. مي : الله اشتغل الرادار !! غريبة اتغير ويهها فجأة وتتكلم شوي شوي : اميه؟ اميه؟ ميثاء: عونج .. غريبة : تعالي .. (وتطلع من الميلس ) ميثاء: بلاج؟ غريبة تبتسم : اميه؟ شكلي برّبي !! ميثاء: وابويييه !! هذا وقته؟ يوم عندنا عرب؟ غريبة : لاتخافين بتصّل حق ميود .. (ميثاء اتلخبطت ودار راسها ) ميثاء: اتخبلطتي ؟ وأوّدرج؟ هم بيعذرونا من غير نشبة وشميم عندهن.. سيري انتي يلسي وانا بسوي حق ميود وأبوج (وتتصل ) محد يرد !!احينه وين ذلفوا؟ قومي لبسي عباتج واترييني برع بناخذ تكسي وامرنا لله ..شو نسوي بعد ..وبتعذّر للعرب .. غريبة : اميه لاتسوين جذيه بعمرج انا بتصرف اعنبوا اانا يبت4 ميثاء: اييه المدحوبة ..لبسي عباتج وعن الهذرة !! (وسارت ميثاء مال دهديه لبست عباتها ودشت الميلس ) سامحيني يا ام سالم بترخص عنج .. ام عيسى دق عليها الويّع وأحينه بتربي وبنوديها المستشفى .. اليدة الجود : بالبركة بالبركة..اتيسري وما عليج منا ... ومنو بيوديكم؟ ميثاء : بنركب تكسي .. محد الرياييل .. (وهنود ومي انفعلوا وسيده قاموا وطلعوا برع يدورون على امهم ) مي: وينها؟ (ودشوا داخل ) اميه؟ وينج؟ (وهنود زايغة ومتقبضة فأختها ) اليدة الجود : والله ما تركبن تكسي ..هاكوه ولدنا هنه خلوه يوديكم .. ميثاء : مشكووورة ..مشكوورة يعلني افداج ما تقصرين ... الجود قامت : انزين انا نيرس ...سيستر اعرف .. اليدة الجود : ساعديهم .. وسيري زجري على رشود ... الجود قامت وسارت على طول سوت حق راشد : وين انته؟ راشد: انا في الموتر .. الجود: انزين شغل الموتر حرمة بتربي وبنوديها المستشفى ... راشد : وابويه شو تقولين؟ (ومن الغلبة بندت فويهه ) الجود اتطالع غريبة وتكشف عليها في الحجرة : خالوه انتي بتربين بس يبالج وقت .. غريبة : يزاج الله خير يا بنتي ..بس والله ويّع رهيب ..انا كل عيالي يبتهم ما صحت جذيييه ..آآآآخ يالله تصبرني !! (وقاموا ... ) الجود: يالله خالوه .. مي: نحن بنسير وياكم ... الجود : ما فيها الا كل خير اعنبوا بس بتربي مي: ما يخصني بنسير يعني بنسير هاي اميه .... ميثاء: بس عن الحشرة انزين طوفن بنات شربت !! (والبنات كأنهن مزيّغات اول مرة يشوفهن امهن جذيه ..واول ما ظهرن بطل راشد السيت اللي ورا ويلس يتريا ..وعرف انه الطويلة هيييه اللي داوته والقصيرة اختها .. وهو متشجج ) راشد يرمس شوي شوي : حظ ياناس .. (وهي شافت حركة شفايفه وفهمت ..ومحد لاحظ هالشي ..وهي سيده احمر ويهها ..) هنود فخاطرها: ياربي انته كله فويهي ..مابا اتعلق فيك (وهو يبتسم ابتسامته الطرر وهي ابتسمت بس ما كانت تدري انه الغشوة طاحت عن ويهها والله كشفها لين نغزتها مي) مي: اتغشي وبسّج مغازل ..اميه بتربي !! (وفنفس الحزة قرصته الجود) الجود: انته ما اتيوز؟ بند السيت وخل بنت الناس فحالها !!.. (وهنود على طول من الاحراج اللي جاسها صدت الجهة الثانية ) راشد فخاطره : هااااااااااااااااايه يهالعيون ذبحتيني بها ولا ابتسامتج عمري ما شفت بسوم شرات بسومج الطر |
(الجزء 32) (واتحركوا ..وراشد صاخ الا مستانس ويحمد ربه ويشكره انه البنية يالسة ورا ويقدر يشوفها المهم انها موجودة ..) • غريبة تتويع وترمس شوي شوي : آآآي !! إلحقوا علية بمووت !! • مي تصاصر هنود : بلاها اميه اتحجى شوي شوي ؟ (وترمس بصوت واضح ) اميه فديتج اتحملي ..الله بيسّرها لج (وتمسك ايد امها من اليمين مع انهن يالسات ورا والام جدام بس في النص وتامة اتويّع بس بصوتواطي عشان راشد ما يسمع ..كان فيها حليها صبر وهنود مسكت ايدها الثانية ) • هنود فخاطرها : يالله يا اميه لاترصّين جذيه !!! • مي :آآآي امايا اتعوريني !! (وصد راشد يطالع منو هاي ..) • غريبة : جاب يالله جاب .. • ميثاء : سكتي يا ميوووه !! (وهي يالسة تدّعي ) • غريبة : آآآخ ..ابويه ؟ كم يبالنا وقت؟ • راشد : هاااه؟ (وصد ورا ) نص ساعة المستشفى بعيد • غريبة تتنهد : يالله !! يالله اتصبرني .. شكلي الا برّبي في الموتر .. (حزتها راشد زاغ ويزيد السرعة ) • راشد فخاطره : يالله اتعفوا عنها .. (وكانوا البنتين هنود ومي عايشين فمأساة بسبت غريبة لأنها راصة على ايدهم وذابحتنهم انحبس عندهم الدم خخخخخ كانن يتويعّن ومي اتوّن ونين والجود اتطالعهم وتضحك .. ومن وصلوا على طول مال بسرعة بسرعة نزلوا غريبة والجود وميثاء ) • ميثاء : يالله دهديييه (وبندوا الباب ...مي وهنود يطالعون بعض ) • احلى البنات = انزين والاوادم اللي داخل؟ نسيتوهم؟ • مي : مب جنهم نسونا؟ (واتدز هنود ) دقي عالدريشة اشوف !!(وقامن يدقن عالدريشة ..وراشد نساهم ..كان اييب الكرسي المتحرك حق غريبة ويوم يلست يطير بها داخل والجود وميثاء وراه) • راشد يعطي الكرسي حق النيرس : بسرعة الحرمة بترّبي !! (اما عند البنات ) • مي : الله يغربله نسانا .. هنود عفدي جدام !! (هنود صادة الجهة الثانية مب راضية واتأشر لها ) • هنود فخاطرها : انتي سير عفدي جان اترومين !! • مي : انتي الغرور يسري فدمج يابنت فاضل !! (وهنود اتطالعها بنظرة غرور وتبتسم) • سفرجل = انزيني الخبايل قابضات على بعض ..حاولن سوّن شي !! • مي : اوفييييييه !! انا بعفد وامري لله (وعفدت ونص جسمها يعني راسها جدام ..وريولها ورا ) دزيني هندوه يالسبالة !! • هنود تضحك وفخاطرها : لو تموتين !! حشا يابوج تمساحة !! (وفي المستشفى ) • ميثاء : اميه الجود؟ مب جنه نحن ناقصين؟ • راشد : الجود دشت اتطالع خالوه .. • ميثاء : وجيه ماخلوني ادش؟ • راشد : ما يستوي خالوه !! • ميثاء : تعال وينهن البنات؟ • راشد: اي بنات؟ • ميثاء: بنات فاضل !! مي وهنود !! • راشد: مادريبهن والله اذا نزلن ... • ميثاء : ويديه !! وين سارن؟ سر سر يابويه طالعهن !! (ورد حليله يربع يدورهن ) • راشد : اعنبوا وين سارن؟ لايكون نسيتهن في الموتر؟ (ويربع ووصل الموتر ..اول ما فج الباب بجج عيونه ) اشوووه هذا !!! شعنه عافدة جدام !!!(سارت مي بتتدل ما رامت .. وهنود مال غيظ مسكتها من ريولها ودزتها على جدام ) • مي : آآخ الله يغربلج ياهنوده يالسبالة !! • راشد حزتها ميت من الضحك : اختيه نزلي عن اتكسرين !! (واعتدلت ونزلت ..وبطل راشد السيت حق هنود ..ونزلت وهي عينها ما خوّزتها عنه .. كانت مأخوذة منه الا من سحره ووسامته ..وبند الباب ويدخلون المستشفى .. هو جدام والبنات يلحقنه ..لين وصلوا ..وبعد ساعتين بالكثير .. طلعت الجود وحليلها منهد حيلها ..) • الجود : مبرووووووووووووووك ياكم ولد .. وحليو بعد ...(وهم كلهم مستانسين وسارت الجود صوب اخوها االلي واقف بعيد ) يابت ولد ..راشد : بغيتج قولي تم .. • الجود : آمر .. • راشد : شو اسمها البنية المتغشية زريفة الطول ؟ • الجود تبتسم : هذي هند اللي يايين انزورها .. • راشد : هي اللي طاحت في المستشفى؟ • الجود : هييه ..بس .. • راشد : انزين ..ليش هالبس؟ • الجود : البنية تراها ما اتكلم ... • راشد انصدم وصد يطالعها : شو قصدج؟ (وصد نظره صوب الجود ) • الجود : نحن ليش زايرينها؟ لأنه كم من باكستانية عفدوا عليها هيي وبنت عمها ... • راشد : شوووه؟ (وكلهم صدوا على زعجته ) انزين ..وووو..ووو؟ • الجود : التحاليل اثبتت انها ما انلمست وبنت عمها حليلها حالتها النفسية مول ما اتسر ..وهي حليلها من اللي شافته اختفى صوتها .. (وراشد على طول اتذكر شي ) • راشد : اذا قلت لج شي بتسوينه ؟ • الجود : شوه؟ • راشد : انا ربيعي كان وايد يعاني وهو ياهل وما خلا مكان ما سار له عشان يتعالج ..وفي عيادة نفسية .. • الجود تقاطعه : راشد نحن مالنا خص .. • راشد : شومالنا خص؟ ماعليه هذا بس suggestion • الجود : ادري والله بس هم تفكيرهم بيتحرونا نتحراهم ميانين .. • راشد : انتي ما يخصج وارمسي ..ولا انا بسير لين البنية وبرمس .. • الجود زاغت : انزين انته ليش مشتط؟ • راشد احمر ويهه : هاه؟ • الجود تغمز له : عشقتها ؟ • راشد : سيري ..سيري سيري عني ..انا بروح الاستراحة ..ولا تنسين اترمسينها ..ولا اولله اسويها !! • الجود : بفكر وبرد عليك !! (وهي قاصدة تلعب بأعصابه ) • هنود فخاطرها : لالالالاتروح ما شبعت من ..أويييه يالفضيحة ..شو هالكلام؟ انا هنودة ..اقول هالكلام؟ وحق منو؟ اخو الجود؟ اخيييج علية ..صدق ما أخيّل • الجود : هنودة؟ تعالي شوي بقولج شي .. • مي : وانا؟ • الجود تبتسم : انتي بعد !! (وهم يمشون ) هنوده؟ شو رايج اتعالجين؟ (وهنوده مستغربة ) • هنود فخاطرها : عن شو؟ (واتأشر لها ليش ..) • الجود : عن اللي شفتيه انتي وبنت عمج عند دكتورة نفسية انا كنت اتعالج عندها .. • هنود فخاطرها : بس انا مب مينونة .. • مي : بس ياعيوني ..هنود ما تقدر اتحجي ..وشمايل صايرة حساسة زيادة عن اللزوم وعدوانية وانفعالية بعد !! • الجود : هنود زعلتي مني؟ (هنود تبتسم بس تحترق من الداخل) انا ابا مصلحتج ..يمكن انتي عرفتيني عن طريق القصة بس انا والله ما بغيلج المضرة ..(وعطتها الكرت اللي عطاها راشد ) • هنود فخاطرها : جيه يتحراني هبلة ولا غبية ما افتهم فهالسوالف؟(هنود اتأشرلهم بسير تشرب شي ..بس والله انها ناوية عليه ..وسارت عند الاستقبال وخذت ورقة وقلم .. وكتبت ..وهي معصبة واتفور ..واتسير وتبطل الباب اللي يوديها صوب الاستراحة وصدت يمين ويسار اتدوره وهو كان يالس وعاطي ظهره ..واتسير له وتوقف عند طاولته وهو يطالعها لأنه سيده عرفها ...) • راشد : هل ـــــــــــ(توة بيقول هلا ..واتفر الورقة عالطاولة بدفاشة .. والكلام المكتوب هو " انته ما اتعرفني ولا اتعرف الحالة اللي مريت فيها وانا لا بني مينونة ولا خبلة وجان عالعقل اوّزع عليك وعلى غيرك وافهم تراني بنت أيواد واعرف اعج الكلمة العدلة ويوم تباني تي من الباب هب الدريشة .. جان هذا تفكير امريكا سر خذلك وحدة على قد مستواك ..." وهو يطالعها ) بس انا ... (وما خلته يكمل ..واتطّر ورقة الدكتور النفسي واتفره ع راسه وتمشي عنه • هنود فخاطرها : هذا دواك ودوا غيرك من المغازلجية !!! |
(الجزء 33) (وهي مدبّرة مرّوحه .. وتوّها حاطة ايدها عالباب .. تحس بإيد تمسكها من ذراعها ..حزتها زاغت وارتعشت وصدت وهي ماسكة غشوتها عن اتطيح عن ويهها ..) • راشد محمر ويهه : مب انتي اطّرينا لورقة واتفرينها فويهي يا حلوة؟ تفهمين؟ انا مشيتها بمزاجي ..فهمتي يا هنودتي؟ (وفلتت ايدها بغصب ) • هنود فخاطرها : هنودتك؟ هدني !!! قليل الادب !! (وروحت وهي ميتة من الغياظ والغصة والقهر ..) الله يغربله صدق حقير !! ما يستحي ..انا جذيه يسّوي بي؟ (وعجت غشوتها ) • ميثاء : تقدرون تدخلون داخل .. • مي : بلاه ويهج؟ شو صار؟ (والجود على طول فهمت وسيده اتسير عند اخوها بترمسه ..وبدفاشة خذت ورقة وقلم ) • هنود تكتب : انا مب مينونة ..تفهمين ولا لأ؟ (ويوم دخلن ..امهن كانت راقدة وحذالها كائن بشري صغيرون ابيضاني راقد .. كل شي فيه صغير ...ويتحرك بالخفيف) وااايه فديييييته .. ياربي محلاته ... • مي : ياويلي انا مصغرونه .. (ميثاء اتشله ) • ميثاء : بسم الله الرحمن الرحيم .. (وتحبه ) امايا مي؟ خذي الموبايل من مخبايه واتصلي حق بوطبر ..شوفيه بلاه اتحيّر ؟ • مي : ان شاء الله .. (وتتصل .. وهنود شالة الياهل ..) ألووو .. ها وينك؟ امك ربّت !! • مايد : حلفي؟ شو يابت؟ • مي : 3 اولاد توائم.. • مايد منصدم : شو تقولين؟ • مي : ههههه اتمصخر وياك يابت ولد حليو شراتي .. انتوا وينكم؟ • مايد : غربلج الله روّعتيني !!! نحن في دبي انا و أبويه حمد مب طايعين نتفجج ..زحمة هلاك !! • مي: انزين ياعيوني .. دق لأبويه وخبره .. • مايد : ولا يهمج ... (ويصد صوب يده ) بالبركة بالبركة يابوغريبة .. (ويحبه على راسه ) • حمد: على شو ؟ فزنا بشي؟ • مايد : خخخخخخ بنتك ربت !! اتعرف شو معنات ربت؟ يابتلي سند اخو .. (واتكدر فجأة ) الله يغفر لك ويرحمك ياخويه .. وينك اتشوف اخونا الصغير .. (وعينه تدمع .. اما عند البنات في المستشفى ) • ميثاء : ياربي انا متوّحلة !! (يعني فنشبة ) منو بيأذن فأذنين الولد مب زين بعد يتم جذييه ..لازم يسمع ذكر الله .. • مي : انا بأذّن يستوي؟ (وكلهن يضحكن عليها ) • الجود : لازم يسمع صوت ابوه وهو يأذّن .. • مي : ابوه باجر بيي .. • ميثاء : هي والله صدقت ما بيي غير باجر آخر الناس ... اميه الجود؟ • الجود : آمري خالوه؟ • ميثاء : سيري سألي اخوج جان يقدر يأذّن عالولد .. • الجود : ان شاء الله (ووعوا غريبة ) • ميثاء : اميه غريبة؟ غريبة ؟ (وبطلت عينها ) • غريبة : همممم ولديّة وينه؟ • ميثاء : تستاهلين السلامة يا امايا .. ياج ولد ما تحصلين مثله من غواه .. • غريبة متلهفة وتمد ايدها : راويني اياه .. ( و يتها مي وفإيدها الولد ) • مي : تستاهلين السلامة يا اميه ... (وحبتها على راسها هي وهنود ) • ميثاء : امايا غريبة ..احينه بيدش راشد ..بيأذّن فأذنين الولد .. • غريبة مستغربة : ليش محد ياء ؟ • ميثاء : ميود وأبوج مصطكين في دبي .. وريلج ما يندرابه !! • غريبة بكآبة : ماعليه .. خله يدش .. • الجود : ادخل يا راشد .. (واتغشن غريبة وميثاء .. اما هنود ومي لا .. ناسيات عمارهن .. كانن يالسات بعيد عن السرير في الغنفة ..) • راشد : هود .. هود ... • ميثاء : اقرب .. اقرب .. (ودخل حليله بدون ما يرفع راسه ) • راشد: تستاهلين السلامة ويتربى فعزكم.. • غريبة : الله يسلمك يابويه .. • راشد : شو قررتوا اتسمون البطل؟ • غريبة : ما يندرى ..بس انا لي راي .. تافقون عليه؟ • ميثاء : الشور شورج وهذا ولدج .. • غريبة : بنسميه راشد على هالريال الطيب .. (سيده ملامح ويهه اتبدلن من الفرحة ..اول مرة حد يفكر جذييه ) • راشد : صدق خالوه؟ • غريبة : قول امايا .. انا شرات امك .. • راشد : هاتي سميّي راشد ... (الجود شلته ومن حطته فإيده ) بسم الله عليك ..ربي يحفظه (ويوم باسه على راسه .. كانت هنود اتطالعه مستانسة حدها وعيونها تدمع لأنها حسّت انها ظلمته .. ويوم حط شفايفه عند اذنين الياهل .. ) الله أكبر (ومسكت هنود ايد مي ..) • هنود فخاطرها : عشقته .. (وهو يكّبر .. وناولها الولد وروّح وثاني يوم زارها فاضل وإيده خالية .. ومايد اللي كان مستانس حده بأخوه من غير حصل شغل فنفس المكان اللي داوم فيه عواس وهو مركز مكافحة المخدرات .. ومرّت الايام وهنود كل ما ياها تكتئب اول شي لأنها بعيده عن عين امها ..وبعد بسبت عدم نطقها وبعد مانع اللي نسته وحّل مكانه راشد اللي خلته فارس بنظرها مافيه مثله .. كيف عشقته وهي ما شافته غير مرة؟ بس هي قارية عنه وكانت اصعب مأساة ..انه يشوف حبيبته اللي بياخذها ميتة جدامه ..وخذوا ثلاث شهور وراشدا لصغير يكبر يوم عن يوم انا عند هناء ..) • هناء : شمايل؟ هذي المرة الالف اللي اييج ميود واتحوشينه برع .. • شمايل : جاب يالله جاب ما يخصج .. فضل عنج جيييه تسالين تبينه؟ امبونج تبينه بالهني عليج ماباه !! (وروحت هناء حجرتها وقفلت الباب .. وطلعت من داخل المخدة الموبايل اللي بالدسّة عندها ..وكان ياينها رقم غريب..) • هناء بدلع : الوه؟ • هزاع : هنوه؟ • هناء مستغربة : انته منو؟ • هزاع : انا هزاع .. • هناء : انته وينك ياخي من زمان؟ • هزاع : اخويه عاجني فمصحة مال الادمان ..هنوه ابا منج شي .. • هناء : ماعندي فلوس ولا شي !! هزاع : فضّلت عنج ..ابارقم نصور الباكستاني يالله بسرعة .. • هناء بعناد : آسفة ما عندي !! • هزاع متغايظ : شوفي ياهنوه !! لاتخليني أفضحج جدام اهلج وأقول لهم انه التسجيل اللي راويته عواس هو صوتج انتي .. وانتي مصوّرة اخته مي .. وأصلا عمري ماعرفتها ..وكل الفيديوهات يبتهن منج والبنيةمول مالها خص .. • هناء عصبت : انته تبا اتخرب بيتي؟ • هزاع : وانتي عيل ما تبين تساعديني؟ انا اللي عطيتج وعطيتج وسويتج هب انتي !! انا اللي قلت لج صوّري اخته وطرشي لي وببيّن لعواس اني اكلم اخته .. وكل شي موجود عندي..خليني اوصلج وانا اروم اقبضج من رقبتج .. (وهناء تسمع صريخ) • شمايل يالسة عالارض ورافعة مال المرحاض وترجّع: اميه ماروم والله ماروم ... • شمسة : اميه لازم تاكلين !! • شمايل : اتشوفيني يالسة ازاوع ..اقولج لايعة جبدي وماداني الاكل !!دم؟ (واترّجع وتصيح من الويّع وعند هنوه) • هناء : انزين اتصل بي في الليل عالساعة 12 وبعطيك رقمه . • هزاع: ان خوّنتي فية الفضيحة بتوصلكم .. • هناء : لا ان شاء الله افا عليك ..فمان الله (وهو بند فويهها ) • شمسة تتصل :الو؟ ها ميود ؟ إلحق علينا ودنا الدختر شمايل ميهودة .. • مايد : شو بلاها؟ • شمسة : يالسة اتزوع ومن كم من يوم ما تاكل واحينه اشوفها اترجّع دم..هاي عندها اكيد سوء تغذية !! (ويسرع لين بيتهم ) • شمايل : مابا اشوفه ياناس والله مابا اشوفه !! شمسة : امايا ماعليه لاتكلمينه ..بس خلينا انوّديج الدختر وانا واعدج انه ما يكلمج انتي مريضة .. (وبعد ألف ياويلاه رضت ويلست ورا ويا امها وحالتها مولما اتسر كان ويهها مصفر ومن وصلوا ) • الدكتورة : خير ؟ خير؟ (وانسدحت شمايل عالفراش ومايد يتريا برع ) • شمسة : خير بويهج .. هذا يا اميه .. شمايل ما تاكل من فترة وشكله قابضنها هالفيروس منتشر وتزاوع .. • الدكتورة : خير ان شاء الله .. نحن بنفحصها وما يصير الا كل خير (وخذوا ساعة ونص وهم يكشفون .. والدكتورة يايبة نتيجة التحاليل للحجرة ومايد وقفها قبل ما تدخل ...) • مايد : خير دكتورة؟ شمايل شو فيها؟ • الدكتورة : من انته؟ • مايد : انا ولد عمها • الدكتورة تبتسم : مبروووك شمايل حامل .. • مايد منصدم : لالالالالا انتي غلطانة ... • الدكتورة : نتايج التحاليل اثبتت هالشي .. وشمايل حامل وهي في الشهر الثالث .. (احمر ويه مايد وحط ايده على راسه ..وهي دشت ) • شمسة وشمايل : شو تقولين؟ • الدكتورة : اقولكم مبرووووك بنتج حامل وفي الشهر الثالث (ويسمع مايد صريخ وحد يولول من المصيبة وهو داير راسه مب عارف شو اللي يحصل .. احمر ويهه وقام بيشّل عمره لكن انكسر .. هيه نعم انكسر؟ الا انفطر فؤاده وقام يصيح شرات اليهال .. مب مصدق انه حبيبته واللي بياخذها حامل من هالباكستانية الخياس ) |
(الجزء 34) • شمايل عينها اتخونها وتصارخ : ما جذبت ودّود ..هاهاهاهاي ..يوم قالت بحمّل!! (دش مايد وعيونه كله دموع بعد ) • مايد ماسك عمره : طوفي عالموتر .. • شمسة : خلونا انروّح ... احس عمري بنهار ..لاحول ولا قوة الا بالله .. • شمايل : تراني قلت لكم .. (واتحط ايدها على بطنها ) حامل !! وبعد توائم .. يمكن ؟ كل شي جايز .. وبيكونو سفاحين !! هههههههههه (وفجأة تصيح بحرقة ) وانا اللي اتريا اليوم اللي بتاخذني فيه؟؟ يا سبحان الله .. سبحان مغيّر الاحوال ... (مايد ما خلاها اتكمل وسحبها من ذراعها ) • مايد : طوفي جدامي !! (وهي اتطالعه مستغربة ) • شمايل : تصيح؟ وعلية؟ ليش؟ انا اصلا استاهل اللي إييني .. (وأول ما وصل وصلوا الموتر .. حط راسه عالسّكان ) • شمسة : ميود اسمعني عدل ... • مايد : شو اسمع ياخالتيّة؟ شو اسمع اكثر عن اللي سمعته؟ • شمايل : طبعا .. الغلط كله مني !! تراني انا قلت للباكستانية تعالوا عفدوا علية !! • مايد يصرخ : جاب لأصفعج طراق ع ويهج !! • شمسة : ان نطقتي ذبحتج تسمعين؟ • شمايل : ههههههههه ..ضربي !! ذبحي !! كل شي ما يفيد فية الحين !! • شمسة اتجاهلتها : ابويه؟ هالشي اللي استوا ماباك اتخبر به آدمي تسمع؟ • مايد : وانا بخبر منو؟ • شمايل : اذا هو ما خبّر؟ هههههههههههههههه والله وهذي حلفة انا اللي بخبر وبتكلم عن عمري !!! (مايد صد ورا ويصفعها هاييجي الصفعة عشان عقلها يرد لها ) • مايد : سمعيني خالوه .. انا اتخذت القرار .. يومين وبني بملج عليها .. • شمايل : ومنو قالك اني موافقة؟ جيه مالي شور؟ • مايد : عيالج بيغدون عيالي قطعة مني !! • شمايل : ههههههههه ضحككتني !! قطعة منك؟ أحيد اللي بييبه قطعة من الباكستانية مب منك !! • مايد فار دمه : انطبي ولا إييج شي مني !!! (شمايل صخّت وهي تسمعهم وحاطة ايدها على بطنها وتسمعهم يتفقون وهم في الموتر على كل شي ... وهي مشمئزة منهم .. ويوم وصلت البيت غدت عدوانية وايد .. اتكسّر اي شي جدامها .. مرات تبا تنتحر وتصيح فنفس الوقت ..وقبل ما يملجون فنفس اليوم اتصلت شمسة بحريم العايلة كلهن عشان يتيمعون فبيت ابوها حمد ..) • شمسة تقفل باب حجرة شمايل : شمايل انا بظهر بسير اكلمهم عن سيرة دبي ... • شمايل اتدق الباب : فجي عني !!! فجي !!! ليش اتدسّين عنهم ؟؟؟ والله اتفجين الباب .. • شمسة : من ارد ببطل الباب .. • شمايل : اميييه والله ان ما فجيتي الباب لأصارخ وبيسمعون صوتي وبأعلى صوتي بقول اني حامل !! • شمسة : انجبي !! ان سمعت حسّج بجتلج !! • هناء : اميه؟ شمايل شو تقول؟ • شمسة : خبيلة لا تسمعين كلامها .. من اللي استوابها ما تدريبها انتي؟ • هناء : والله انا اللي ادريبها ... • شمسة : ان خذتي السبير وفجيتي بابها جتلج تسمعين يا هنوه؟ • هناء : ان شاء الله .. ان شاء الله.. • شمايل : هنووه؟ انتي هنييييه؟ نسيت اخبرج يا وخيتي اني حامل بتوائم .... • هناء: والله انها خبيلة .... (وروحت شمسة .. وحصلت غريبة وولدها راشد ومي وفطيم ونشبة وشما وهنود وحمد ومايد وميثاء ..) • حمد: خير يا ماايا؟ • شمسة : انا قررت أيّوز شمايل لميود .. وباجر بيملجون ... وورا باجر بنسير انا وشمايل دبي .. • ميثاء : خير تسوون .. سيروا رفهوا عن عماركم ... • شمسة : امايا نحن مب سايرين يوم ويومين ورادين؟ • ميثاء : عيل؟ • شمسة : بنوّدي شمايل اتعالج ... امايا انتوا مب عايشين ويانا فنفس البيت .. لو تسمعين صريخها نص الليل ..وصياحها تقولين ذيبة .. أشوا انكم يراننا ولا لو حد غيركم جان اشتكوا علينا للشرطة .. وانا كبرت وماروم تعبت يامايا .. • ميثاء وحمد : مستشفى الميانين؟ • شمسة : لا حشا مب هالمستشفى ... • ميثاء : عيل؟ • شمسة : عند دكتور نفسي ... • ميثاء : ندري يعني وين بتيلس؟ • شمسة :تراه عنده مستشفى خاص ... • ميثاء تصارخ : ويديه بتعجين بنتنا فمستشفى مال الخبايل؟ • حمد: شموووس؟ اتخبلتي؟ اتفرين بنتج فهالمكان؟ • ميثاء : جانج ما تبينها وماترومين على تربيتها (واتدق على صدرها ) انا بربيها ..انا اللي بعلمها .. • شمسة : الحاية مب حاية تربية وتعليم...امايا البنية مب مرتاح بالها من السالفة ... كفاية الناس ماكلة ويوهنا ...وهذي الا فترة وبترد شمايل اللي نحن نعرفها ... • ميثاء : خافي الله فبنتج بتعجينها هناك؟ منو عندها هناك؟ • شمسة : انتوا ما يخصكم انا ياية ابلغكم بهالشي .. وبخلي هنوه عندكم لين أوديّها وأيي .. • مايد : بس ياخالوه ... محد عندها هناك في دبي ... • شمسة طالعته بنظرة : تامرون بشي؟ انا بروّح واتمنى باجر نشوفكم فملجتها ... تعال مايد ... (وكانت دوم بعجرفتها حتى على اهلها ..وطلعت ) • مايد : خير خالوه؟ ليش سويتي جذيه؟ • شمسة: عيل تبا يكبر بطن بنتي جدام خلق الله؟ سيده بيعرفون من منو... وبياكلون ويوهنا أزيّد ما هم ماكلينا !! • مايد : بس انا كيف بشوفها؟ • شمسة : انته تباها؟ • مايد : ما اتصورين يا خالوه يوم عن يوم اتعلق فيها ..بس بعد اتقطع .. لكن بستحمل كل شي منها ... (وروحت شمسة البيت وبطلت عنها الباب ..) • شمايل : توّة الناس؟ خبرتيهم انه ما بنملج؟ • شمسة : بتملجين غصب عنج ... تسمعين ولالأ؟ • شمايل : انا بسير بيت ابويه حمد بدال هالصدعة !!! • شمسة : سيري واعرفي انه باجر من نملج .. واليوم اللي عقبه بنسير دبي تسمعين ؟ • شمايل : شعنه؟ بتدورين عن الباكستانية اللي عفدوا علية ؟ • شمسة : اسميج قوية !! تردين السالفة علية يالسبالة ؟؟ • شمايل احمرت عيونها : طبعا لا بس انا الغلطانة ... انا تربيتي سمحت لي اني اطلب منهم هالشي يا بنت حمد !!! (وحطت ايدها على بطنها تضربه ) انا انا انا فهمتي؟ (وطلعت وهي معزمة الا اتخبر خويتها هنود ..بس ما حصلتها كانت سايرة اتوصل فطوم ونشبة ...) • ميثاء : اميه شمايل؟ بلاج غناتي؟ مول خفّت زياراتج وما اتين !!! • شمايل : شو تبيني اقول يا امايا؟ الحمل ملعوزني ولا جان كل يوم والثاني عافدة عندكم ... • ميثاء : شو تقولين ؟ اي حمل؟ • شمايل : تراني حامل !! • ميثاء : اامايا عن الخبال ... اي حمال اي خرابيطه؟ (وتتصل بشموس تسألها .. وطلعت شمايل وهي تضحك ..وسارت عند مي يمكن اتحصل عندها عزوة ..وواقفة عند الباب تسمع عمها فاضل يتكام على راحته ويضحك وصابه الفضول ) • مايد : بس يابويه انا ما عندي مهر لشمايل ... • فاضل : هههههه انته ما تفتهم؟ اقولك انا عمها وبخليها اتوّكلني .. وبحط المهر 500 • مايد : بس انا حتى 500 ما عندي .. وتوّني متوظف • فاضل : عيل شو فايدة ابوك؟ (ويدق على صدره ) بس يوم بتاخذها اباك اتردهن دبلات .. تسمعني؟ وخصوصا عقب ما خبرتني انها حامل .. ها معناته انه مستحيل يفرطون فيك .. لأنك بتستر عليها .. منوغيرك بينفعها؟ • مايد يمّشي وياه : هيييه صح منو غيري !!! • شمايل تتكلم شوي شوي وحرقتها فعيونها : قسما بالله بو طبيع ما ايوز عن طبعه !! عمري ما بسامحك عاللي سويته .. عمري يا ميود ياولد فضول ما سامحك .... |
(الجزء 35) (وتربع البيت وهي تصيح .. وما تشوف جدامها لين دعمت امها ) • شمسة : هوووه ...هووووه بلاج؟ • شمايل تصيح : اتعرفين يامايا اني رخيصة؟ وقمتي انتي حتى تبيعيني؟ • شمسة منصدمة : انا ابيعج؟ لاتفكرين جذيه يابنتي .. (وتصيح ) انا استر عليج .. شوفي انا بفهمج .. • شمايل : امايا ماباه والله قلبي عافه ..اتعرفين شو عافه؟ • شمسة : سمعيني .. اذا ربيتي ويبتي ولد ولا بنية .. بياخذ اسم منو؟ لازم اسم ريلج بس المهم من العايلة .. لو ابوج حي .. الله يغفر له ويرحمه جان سميناه وخليناه اخوكم ولا اختكم حتى .. بس بعد الله ما يرضى .. واختج عمرها محد بيي يخطبها .. والله بيقولون عيال حرام على شو انناسب؟ • شمايل : اميه سمعيني ولأول مرة .. انا هالمرة ما بجذب عليج وبعقل وكل اللي تبينه بيصير بس تسمعيني ..وبيييبلج المصحف وبحلف عليه .. • شمسة : ليش هذا كله؟ • شمايل : توّني رادة من بيت عمي فاضل وسمعته يكلم ميود .. وميود خبره عن حمالي ..وبيخليني أوكّله ومهري بيخلونه 500 درهم تسمعين؟ اونه نحن اللي عاجين عمارنا على ميود وبينهبون بيزاتنا عن طريق هالزواج .. والله يا امايا .. كل بيزات ابويه بتضيع وبتم في ذمتج .. • شمسة منصدمة : شو تقولين؟ اكيد انتي مخرفة !! • شمايل: والله ما اجذب عليج .. جد مرة جذبت عليج؟ • شمسة : خافي الله هذا ولد عمج .. • شمايل : ماعليه يامايا .. بسايرج .. لكن بقولج انه عمي فاضل من ينهب بيزاتنا بيرفسنا شرات الجلاب ... طاعيه احينه كيف يبا رضاج .. كله بسبت البيزات .. • شمسة يلست : شمايل؟ عيل ما تبين مايد؟ • شمايل مصرة : ماباه .. مابا واحد كرست عمري وانا ياهل بس عشان ارضيه وآخرتها بعد كل هذا الشي يباني عشان بيزاتي.. • شمسة : عيل اتزهبي .. زهبي اغراضج الليلة .. بنسير دبي .. • شمايل منصدمة : شو تقولين؟ • شمسة : زهبي اغراضج بسرعة .. • شمايل : امايا .. دخيلج لا توّديني عند الميانين .. • شمسة : بوّديج الدختر .. تيلسين هناك فترة .. • شمايل : امايا دخيلج ابا ايلس وياكم ... والله ما بسوي شي .. حبسيني في الحجرة .. قفلي الباب عليّة ما بصارخ والله .. والله ما بخبر حد اني حامل .. • شمسة يغرغرن عيونها : اباج اتعافين من داخل يعني نفسيتج .. اباج اتردين ليوا وانتي مرفوعة الراس ..سيري ..سيري .. (وسارت حجرتها وهي مكسورة الخاطر .. وتصيح من خاطرها .. وتشلشل اغراضها ) الو؟ فطوم؟ وينها عمتيّة؟ انزين .. (وبعد 5 دقايق عالخط ) الو؟ • نشبة : مرحبا .. • شمسة : عموه؟ طلبتج فديت راسج .. • نشبة : واعلية عليج بلاج؟ تم .. تم.. • شمسة : اباج تين احينه انتي وفطوم تباتون عندنا .. ابغي اكلمج ... • نشبة : تامرين يا بنت اخويه .. بس انتوا مستوي شي عندكم؟ • شمسة : شي جايد يا عمتيّة !! • نشبة : خلاص خلاص نحن يايين .. فمان الله .. (ورضت بالتيلفون ..اما عند شمايل ) • شمايل :آآآآآخ .. ياربي بزووع .. (وكان خشمها ينزف دم ..ويابت الكلينكس ومثته ) خذتي يالدنيا مني وايد أشياء رديلي شي ولو شي بسيط .. (وتصيح ) ومايد اللي صدقته وسامحته .. رد خوّن فية .. طلع كل هذا بسبت البيزات .. والله لو طلبهن مني ما رديته .. لكن بالحيلة ؟ أسميني هبلة واذا خذته بتعذب وبتطلق وبينشفطن بيزات ابويه .. شقى عمره .. شمسة تدخل عليها : اتكلمين منو؟ (وتمسح شمايل دموعها ) • شمايل : اكلم عمري .. اليوم بنسير دبي؟ • شمسة : لا باجر الصبح .. هبابنا لين انخلص .. • شمايل : اميه انا احبج .. • شمسة تصيح : وانا احبج يا غناتي .. • شمايل : اميه ؟ ابا فطوم ومي وهنود يرقدون عندنا اليوم .. تراني بنقطع عنهم .. • شمسة : تامرين امر .. اتصلي بس لا تبينين لهم انه بنسير مكان .. (واتصلت بهم وقرروا ايون .. وميثاء حاسة بشي مب طبيعي وسكتت ) • نشبة : سلامن عليكم ..شملوه وين امج؟ • شمسة : انا هنيه .. تعالي امايا اتفضلي .. • نشبة : خير؟ • فطيم حبت شمسة : شحالج خالوه؟ فديتج باخذ شمايل فوق .. تعالي شملووه ( وتسحبها ) • شمايل : اوكي .. • شمسة : هوووه !! هوووه!! شملوووه شوي شوي على عمرج ... • شمايل حست بالنغزة : فطوم وين الباجين؟ • فطيم : يايين .. يايين !! (وبعد ربع ساعو اتيمعوا البنات .. مي وفطيم وشمايل وهنود ونشبة ) • شمسة : انا ما رمت ارمس لين يتيّمعن البنات .. اسمعّني عدل والشي اللي بيستوي ما يظهر من هالبيت تسمعون؟ (والبنات يتصددن مب فاهمات ) • نشبة : شو السالفة يا شموس؟ • شمسة : هنود؟ مي؟ ترانا باجر ما بنملج ... (وهن مبججات عيونهن ) • هنود فخاطرها : لويش؟ • مي : شو السبب؟ • شمسة : تبوني أيوّز بنتي عشان ينسرقن بيزاتها؟ ولا عشان ابوكم؟ تراه ابوكم مول ما فيه خير .. دامنه يصّبح ويمسّي اختيه بكلامه السم الخايس ومعيفّكن العيشة .. و فّر بنته في الشارع واتهمها بالسروق !! (واحمر ويه هنود ) حتى اخوكم العود عواس الله يغفر له ويرحمه ما سلم منه ومن لسانه هئ واتفق ويا ميود انه ياخذ شملوه ... عشان ياخذ بيزاتها .. هذا ريال الحينه؟ هذا اللي بنأمنه على بنتنا؟ • نشبة : لا حول ولاقوة الا بالله .. يعني احينه كل هذا وميود يجذب على بنتنا؟ انزين هذيلا عيال عم !! • شمسة : ليش حد حس على دمه وقال اللحمة عظاظة ابدا !! • شمايل : طلع عمره ما حبني .. وكل كلامه لأنه ابوه يجرجه .. • شمسة : اباكم تمشّون في السالفة .. نحن عالساعة 10 بنسرح جدا دبي .. والله وهذي حلفة اللي بتخبر بزوالها .. خلوه يترياها لين نص الليل .. انا براويه هالهيس ... (والبنات ردن حجرة شمايل وساكتات على غير العادة .. ) • شمايل : اتكلمن ؟ بلاكن؟ • مي : شو نقول يا عيوني؟ الذلفة ذلفت ميود !! اهم شي انتي .. • فطيم : بس ميود من آخر مرة وايد اتغيّر .. من غير يشتغل ومعتمد على عمره .. ويصلّي .. • شمايل : كل هذا جدامكم .. لكن انا اليوم سمعته في الصالة يكلم عمي فاضل .. وأمنّته اميه على سر ومن شاف ابوه خر بكل شي .. (وتبتسم ) شخبار رشود؟ • هنود صدت يمين ويسار وفخاطرها : غربل الله مذهبج زيغتيني .. • مي : هههههههههه شفتوا اللي انا شفته؟ ابصم بالعشرة انج عاشقتنه ..لا تجذبين !! • هنود احمر ويهها واتطلع دفتر صغير دوم وياها وتكتب : انطبي .. • شمايل : ها معناته عاشقتنه .. • مي : هنود اذا ما تبينه فريه على اختج العودة ينفع؟ (وتعفد عليها هنود واتعظها وتصرخ هذيجي الصرخة ) آآآآي .. اتغربلتي يا هنود يالعظاظة العودة ... آآآي (وتمط مي شعرها ) • هنود فخاطرها : ملعونة الصير .. • شمايل : هدوا ... هدوا الوضع ... • فطيم : ملل يا ناس .. شو رايكم نرتبش شوية؟ • هنود تكتب ل مي : جبانة ولا تسوينها؟ • شمايل تصارخ : جبانة هههههههه • فطيم : تسوينها ... تسوينها .. (هنود تضحك وتطالعها بمكر ) • مي : طبعا ياعيوني انا قدها وأسويها ... • فطيم وشمايل يصفقون : عاشت .. عاشت .. (وشمايل نست همومها ) • هنود تكتب : اوكي قدها؟ • مي : قدها وقدود !! • هنود : عيل يا ام قدود .. اباج تلبسين كندورة رياييل مال ميود ولا ابويه حمد .. المهم كندورة .. وبنحط لج سما دبية .. وأباج تيولين بعصا وخلاف بسلاح .. • فطيم : اهبي !! اهبي !! • شمايل : هب هب هب هباج الله • مي : اوكي انا قدها !! بسير البيت بييب كندورةميود وبيي (والبنات قابضاتنها ضحك .. وبعد ربع ساعة دخلت مي ) بلبس وبييكم ..يالله نزلوا المسجل بنطّر الدنيا اليوم ... • فطيم :بسير أدق على هنوه بيفوتها ...هههههههههههه (ونزلوا تحت .. وهنوه طبعا عشان ما يفوتها يابت كيمرة فيديو ...) • شمايل : عاشت بنت ليوا ههههههههههه • فطيم : اوب اوب !! شحالك بو راشد ؟هههههههههههه • هناء: لالالا خطيرة !!! (ويلسوا البنات عالدجّة ومي واقفة ف حوي بيتهم ..لابسة كندورة رياييل بنية ومسوية بشعرها ذيل حصان ) • مي اتحذر : هنوه ما تصورين تسمعين ؟ • هناء : لا افا عليج ... (وشغلت هنوه الكيمرة عن قصد وسوّت زوم على مي وحطتها بعيد عنها ..وشغلوا المسجل ) • ميحد : شارك الغية في سما دبية جان تبغي • هناء وفطيم وشمايل : تشوف الناس في جنة !! (ويصفقن) • هناء : أووووب اووووب يابس يابس !!! • شمايل : أهأ أهاأ (اول شي ترزف بعصا وخلاف بسلاح .. وتسوي نفس حركات الشباب ..بس كانت متمكنة بالعصا وهنود ميتة من الضحك .. كانت مي مسوتلهم جو .. ويردون يعيدون الاغنية ) • فطيم : طاعي طاعي شو لابسة بو شوجة ...تيول في بوشوجة !! • شمايل: وابوييه عن اتطيحين !! • مي : أهاأ !! أهأ !! اسكتوا عني شالني الهوا يا عيوني !! (واتخرطفت وطاحت على ركبتها ) آآآي !! بس الحمدلله جت سليمة ....خخخخخخخخخخخ • شمايل وفطيم وهنوه :هههههههههههههههههههههههههاااااااااااااااااااااااي • فطيم : دواج يالناقة !! (واتكمل رزيف ... اما فحجرة شموس كانن ثنيناتهن رقود ) • نشبة نشت : شموس؟ يا شموس؟ واعية؟ • شمسة : لا بعدني .. • نشبة : تسمعين اللي انا اسمعه؟ • شمسة : امايا ها يمكن حد معرس !! • نشبة : الا امايا مب دق .. أسمع قرآن (وحطت ايدها على قلبها ) وابويه يمكن فضول اتوفى !! • شمسة : انزين امايا سيري وايجي من البلكونة وقوليلي .. (وقامت وسارت والفضول ماكلنها ) • نشبة تصارخ : وابووووييييييييييييييييه .. (وحطت ايدها على راسها ) إلحقي شمسوووه إلحقي !!! أخييييييييييج يامذهبكن الخايس .. أخيييييج .. غربلكن الله يالماصخات يالقوايا ... ميوووووه !! عنلات صيرج لابسة كندورة ميود هاااه؟ سيري بدلي العنت الله على هالويه ليلج .. قومي يا شمسووه !! قومي نشي طاعي الرزيف اللي يستوي برع .. (وصدن البنات ) • شمايل : منو هاي اللي توايج؟ • هنوه: يمكن ام الدويس شالنها الهوا ويانا هههههههههههههه • فطيم : كملي كملي امايا ... خخخخخخ (وكانوا مطنشينها ومستانسين وشالنهن الهوا ) |
| الساعة الآن 08:32 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir