|
سر حبي للأفلام. من يوم ما كنت اصغيرة وأنا أطالع أفلام.. اللي كنت أشوفه على التيفي، ما كان من الريسيفر ..! كان من (ديفايز)، لأني ما كنت أعرف شسمه، كنت أسميه ( الفيديو)..! الريسيفر يصرخ ويقول اسألوا عني، وحنا فارينه و حتى يمكن ما استخدمناه أبدا ً..! طبعا ً الأفلام اللي كنت أطالعها ماكانت سيديهات ( كانت كاسيتات)..! قبل 17 سنة تقريبا..! من ضمن الأفلام: - حلقات سيمبا (أول أربع أجزاء).! -حلقات رعد العملاق( جزئين ) .! -حلقات عدنان ولينا(أربع أجزاء)..! - فيلم كومّاندوز.! -مسرحية البيت المسكون..! -فيلم تورنيدو..! (في قمة الروعه ).! -فيلم بيبيز دي آوت..! -فيلم اللعبة 2 (توي ستوري 2 )..! كنا ناخذ تكملة أجزاء الأفلام من بيت خوالي، كل بيت فيه أجزاء مختلفة ( ما أدري وش السبب للحين )..! :a040: أول الأفلام ما عدا بيبيز دي آوت و توي ستوري 2 ( طالعتهن من عام 1999) يوم كنت صف رابع، للحين المشاهد ثابتة في ذاكرتي ..! لما يابوا توي ستوري 2، أخوي الصغير تخبل عليه، وكان يعيده في اليوم عشر مرات، واذا كنا نبي نطلع مكان ( يقعد يصيح يبي ايشوفه ) .. ! كان اصغير وايد(عمره ما يتعدى الأربع )، ولكنه فطين بزيادة..! حفظ كل أسامي الشخصيات ..! وللحين يتابع أعمال بكسار ( لأنه توي ستوي من انتاج بكساآر )..! طبعا ً كنا نعطي أمي حقها من شوفة الحلقات الابدوية ( وضحة وبن عجلان ) ..! كانت اتحب اتشوفها ( وعلى فكرة ألحين تنعرض على قناة الظفرة) وامي لازالت تحبها واتابعها .. فديت الأصيلة أنا .. :7bteeen: ما كنا انطالع الأفلام، وايد ( أحيانا روحاتنا تغلب يياتنا ) ... ولكن فعلا ً هالشي أثّر فيني ألحين، صحيح أني موب مدمنة أفلام، ولكني أحب أتابعها .. وأتابع اللي يتابعها .. وأتابع الممثلين ( ولكن أحب اتابع اكثر اللي كنت أشوفهم من يوم كنت اصغيرة ) لما أطالعهم سواء كان على التيفي او في الحقيقة ( أحس أني أعرفهم من زمان، وأحس انه في داخلي شعور لازال طفولي )..! سويت لي موقع خاص في بكسار ( حطيت فيه كل شي عنها، طبعا كل شي من تصميمي ). ما عدا البوسترات والكلام (من الويكيبيديا )..! هذا الموقع .. http://pixarworld.weebly.com/ طبعا هو موب رسمي، لأنه في موقع رسمي خاص فيهم .. وهذي كل قصتي مع الأفلام.. حتى حياتي كلها أفلام، (أقصد المواقف اللي تصير وياي، أكشن + فانتازيا هاأه) ولازلنا نحب الأفلام. |
مواقف طريفة...! أحيانا ً تخطف على ذاكرتي مواقف، أتبسم لا من تذاكرت تفاصيلها .. حبيت أسرد بعضها في مدونتي: 1+ مرة كنا رايحيين صوب الشمالية، وشاله وياي اعيال خالتي و اخوي الصغير.. كنا مضطرين انا نوقف عند كارفور اللي في الشارجة، دخلوا الحلوين وخلصوا مشترى.. ولما راحوا عند الكاشيير، ولد خالتي الأوسط، خذ منبه الانذار( الابيض اللي ينحط على الملابس) . وحطه في مخباآ اخوي.. لما خلصوا من الكاشيير، واتجهوا صوب المخرج.. الانذار جان يزخ اخوي ( طبعا لأنه المنبه في جيبه ).. واستدعوا الكل، ويااااا ليتها العين ما شافتهم في ذاك الحين..:38: وربي انهم يضحكون.. أول شي فتشوهم، ثاني شي رفعوا اريولاتهم، وبعدها دوروهم..! طبعا ً محدٍ عرفهم أبدا ً ولا بان عليهم شي، وتصرفوا عادي ( وايد يحبون هالمواقف ).. اخوي ايطالع ولد خالتي من طرف عينه ويتوعد له .. :00: وولد خالتي هذي كانت حالته :a040: يعني أنا مالي دخل .. ! ولما طلعوا، ولد خالتي أول من دخل السيارة لجل يحتمي فيني .. وأكيد دافعت عنه، وضحكت عليهم ... حبيت الموقف .. :tooth: 2+ في يوم كنت قاعدة أمشي في ممر طالعة من الغرفة، وامروحة الجامعة..! طبعا ً على سالفة المصاعد ( اتعرفون انه لو ضغطنا على المصعد مرتين، يفتح المصعد للمرة الأولى، وبعدها يروح لوجهته الثانية، وبعدها لا مر بالطابق اللي انا فيه، يرد يفتح للمرة الثانية).. عن نفسي كنت في الطابق الثاني، جنب المصعد، كان فيه كراسي، وكان يالس عليها، تقريبا ً بنتين على الطرف وواحد في النص امجابل المصعد... الممر كان يحتوي على ليتات حساسة، لما تمر نص ساعه اطفي ولما احد يمر في الممر تضوي) يوم كنت طالعة، وامشي في الممر، كانت الليتات تضوي على كل خطوة ( جنه يني قاعد يمشي) :unsure: كنت وايد مستعيلة، تخيلوا ..، قبل خطوتين من المصعد، جاااان يفتح المصعد ابروحه.. لما دخلت المصعد، لا حظت أنه اللي كانوا قاعدين كلهم كانوا امبطلين احلوجهم( حسبوني ينية :70:)...! كان في خاطري ضحكة.. شكله في حد كان ضاغط المصعد مرتين، قبل لا أطلع... بس اللي يلفت النظر، أنه اشمعنى المصعد ما فتح إلا لما أنا ييت... طبعا ً أنا ما اهتميت لأني كنت مستعيلة...( موب ينية والله ) :191: 3+ في يوم كنت قاعدة في مطعم :) يلست تقريبا 10 دقايق، لين ما وصل الأكل، لما وصل: وبديت.. اشوي، اسمع صوت طير في المطعم ..! حبيت صوته كان اكيوت، :7bteeen: طبعا ً كان يشبه صوتي يعني يوم اغرّد :191: دقيقتين، واشوف فلبينية ياية وواقفة، جدام الطاولة اللي امجابلتني..! كانت من السكيوريتي وكانت ترمس بالانجليزي، واتقول حق اللي ترمسه ( بالفون) " فيه طائر في المطعم، وايحوم فوق الأشخاص، ويزعجهم )..! !!! أتوقعها كانت تقدم بلاغ... طبعا ً قعدت ترمس وايد ( وأنا في خاطري أقول، وربي انتي اللي أزعجتينا، ألحين يبالي أقدم بلاغ عليج )..! وما خطفت غير نص دقيقة، وأنا أشوف الطير الراااائع واقف ٍ جدامي، وربي كان تحفه ... قعدت اتأمل فيه، وابنتي أحلام وأماني ... :20.gif: ومااااريت، غير هالمتوحشه الفلبينية، وهي منقضة عليه.. كانت اللقمة في حلجي، وبعدها بين أسناني، واعيوني امبطلة، وقلبي شبه مجلوط..! روعتني حسبي الله..! طبعا ً ما قدرت تمسكه، طار الطير، وبعدها حط على ارتفاع اكبير..! والحبيبة إلا تمسكه ..! :a050: طبعا ً أنا ما قلت شي واستمريت في متابعة الأحداث ..! اشوي واشوفها يايبة كرسي من ابعيد وحطته على حافة العمود اللي كان واقف عليه الطير.. (تحسب نفسها طرزان )..! وياية تبي تمسكه، أول مرة ما قدرت ... وثاني مرة ما قدرت.. وثالث مرة جان تنقز نقزة، وبعدها طاحت على الارض ... ربي لا يراويكم المنظر، عن نفسي، ما تمالكت أعصابي، ويتني نوبة ضحك .. قوييية ما قدرت ما أطلعها ..! :297.gif: وطااار الطير..! المسكينة، راحت بعدها وطلعت برع ... شكلها توّبت ترجع تلاقيه ... :7bteeen: الحمد لله ..! سبحاأأن الله ..! هذا اللي حضرني من ذكريات، إن شاء الله بكمل الباجي بعدها في بارت ثاني ...! :tooth: |
حاليا ً أدور على سيرفس الــ ckserve ...! مهمة لتنزيل البرامج، هي اللي تكوّن السيريالز...! لكنها ما تشتغل عندي ..! لييش..! يوم أسوي لها استارت يقول لي سيرفرج ما ينفع ..! لابتوبات آآخر زمن .. :00: توه يديد الحبيب، والأولي في التصليح ( صناعية اللابتوبات ) :7bteeen: ما أريد أوديه لأاي مصلح أو خبير حواسيب، أو أي مبرمج.. شييم أون مي ..! تدرون ليش ..؟ لأني باختصار، أدرس تقنية المعلومات، في أعرق الجامعات، ويجب أن أحل المشكلة بنفسي :mornincoffee: على سالفة اللاب الأولى، تعرفون ليش اخترب ..؟! لأنه يا حبايب ألبي ( انجب عليه كوفي بالنسكافيه..! )..! الكوفي كله يآآ على الكيبورد وغطاه ( جنه تسونامي )..! لما قلبت اللاب ( اتبعت الحل الازدواجي السريع من نوعه :191:) وصار الكوفي يصب من اللاب، شرات الشلال ..! طبعاً دقيقتين وبنّد الحُب ..! وانا في حالة هستيرية...*! لأنه كل شغلي كان عليه ..! ( شغل 3 سنين متتابعه)..! هذا الجهاز كان عشرة عمر، وما جد مرة اخترب أو علّق، الا اذا حل عليه فايرس..! استفقدته، وقلت لاازم أرد اصلحه يمكن في أمل يشتغل،،!. لكني خذيت واحد يديد( بدل فاقد )..! وان شاء الله راح يكون اسبير فقط لا غير ..! :unsure: أتمنى ادعوا لــ لابي الأولاني ( ديلّي ) يرجع بالسلامة ..! المسكين من يوم ما عطيته النسكافي مااات .. :thumbdown: تعلمت أنه: اللابتوبات ما تحب تشرب نسكافيه ( يصيبها انفلونزا الكراش)..! |
في تاريخ 9-2-11مـ كنت أرتب جدولي الحلو، جدول الجامعة الرائع جدا جداً ..! هذي الصورة، للورقة اللي كنت أخطط عليها، ودار راسي، واتا قاعده أوازنه ( موازنة الجداول و توقيتها على الكيف مهمة صعبة ويبيلها ساعات من الجلوس المطول ).! فكرت وايد، ولما تعبت، بتني أفكار وهواجيس وتأملات وقمت أشخبط على الورقة..! http://uaemusics.com/uploood/images/...r8vi4sl9up.jpg طبعا ً في الصورة ما يحتاي أحط الحقوق ( لأنه الاسم مكتوب أوريدي ) XD كل ما أطالعها صرت أحس أنه الولد يطالع صوب السهم ( اللي يأشر على اسم الاستاذ) وايقول شوف ترى هذي الهامورة ( تهديد علني) XD سبب التعديل: معدلي (كان ) امتياز ولكنه الآن للأسف نزل (حبتين)، وانا صابتني جلطتين ..!! وصار مرتفع ( قهر لمّا يكون قليل وبنوصل الامتياز ) .. وانا قبل بداية الكورس الجديد متشجعة، وأريد أرتب الجدول بحيث انه أخدم نفسي، وأعطيها مجال لاتخاذ القرارات الصائبة قبل الاقدام على الدراسة واجهاد النفس..! أحيانا ً أحس أني قاعدة أجهد نفسي في الدراسة، وأحاول المستحيل لجل أحصل أعلى المعدلات... ولكن، في آخر المطاف ما ألاقي المعدل اللي كنت متوقعتنه ...! وبالتالي، قررت أغير خطتي الدراسية، زيادة على تغيير الجدول .. تذكرت أنه في الكورسات اللي كنت يايبة فيهن امتيازات، كنت رايقة في الدراسة.. وكنت كله أعطي نفسي حقها من الراحة، صح أني كنت أسهر وايد... ولكني كنت أحس براحة في الدراسة..!! إن شاء الله، أتوفق أكثر في الكورس الياي، و أييب كله امتيازات.. وطبعا ً لازم ما أنسى أنه رضى الوالدين من بعد رضى الله هو أهم عامل في النجاح الدنيوي والأخروي.. :) |
OMG OMG OMG أحب أتابع مدونات الاعضاء، رحت مدونة اسمحيلي يالغرام.! شفت شي غير طبيعي ..! شفت صورة صاحبها مألوف..!! هذا الانسان يشبه اخوي من الدرجة الأولى،..! لا لا السياحية لأأ لأأأ لأأأ درجة رجال الأعمال ..!! http://www.uaemusics.com/uploood/ima...oaze5ahdv1.jpg فظيع، حتى في حركة الكحل يشبهه...! أخافه هو وانا ما أدري ...! شكلي بسوي معاه تحقيق ..! __،^ الله يحفظه ..،* لكن فعلا ً انصدمت ..!! على العموم ( راق لي التصميم، وايد رائع.. ) ..! تسلم ايد اسمحيلي يالغرام. |
| الساعة الآن 12:04 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir