منتدى استراحات زايد - راح أختار عضو ويجيب ع الاسئله التاليه

1- عرف الاعضاء بنفسك؟؟

انا اسمي محمد .. هاوي تصوير واخراج افلام وتصميم على الفوتوشوب وايضا هاوي استعراض بالسيارات ولعب بليارد وبولنج ..^^ واشياء كثيره ..
احب اني اركز بالشي اللي انا ارتاح له واحافظ عليه
يتغلب علي طابع العصبيه قليل لكن ولله الحمد وعلى راي الكثير من الناس يقولون لي اني طيب وعلى نياتي ..^^
مزاجي من ناحية المخالطه فأحيانا احب اجلس مع جماعه واحيانا افضل الجلوس وحيدا ولما اجلس وحيد افضل اطالع باللي حولي .. يعني نظره تأمليه ... وافكر كيف اصور هني وكيف اصور من هاي الزاويه .... وهيك ..
الحمد لله محافظ على صلاتي الخمس وها فضل من ربي ..
واحاول قد ما اقدر اني ارضي امي لنها الوحيد عندي بحياتي بعد ما توفى ابوي الله يرحمه .....
امممممم شو بعد...
هيه عزوبي ..خخخخ
بس خلاص شو تبون تعرفوا اكثر ><...

2- اول مره صمت في رمضان كم كان عمرك ؟؟وهل افطرت خفيه؟؟
اممممم ما اذكر والله
بس اللي احيده اني كنت اصوم شوي وافطر شوي..
يعني مزاااج .. خخخ..
وهيه فطرت خفيه كذا مره هع ..
كنت انا واخوي نفطر ..>< ...
ومره اذكر موقف كل ما اذكره اضحك على عمري..
سمعت انه اللي ياكل وهو ناسي يكمل صيامه عادي ..
فمسكت خياره وكنت يوعان ..
رحت لاهلي وجدامهم كلت (جرييئ) .. عقب قلت اووووه نسييييت
قالوا لي عادي كمل صيامك .. قلت اوك .. رحت وكملت الخياره خخخخ

3 - لماذا الكل يجمع على أن رمضان قديما كان الاجمل؟؟
اكيد قبل أحسن ..
قبل الكل كان يصوم على فكره يعني ..الحينه في شباب الله يهديهم جدام عيني يفطروا ... ما ادري شو يسمونه ..لكن اللي اشوفه ها جهل وسفاهه ..
عموما ..
زمان اول .. كان الواحد لو ختم القرآن ... اهله يفروحوا به ويسوون عزييمه .. الواحد حزتها يحس انه سوى شي عظيم ويكون في تنافس على ختم القرآن ..
وكنا بعد صلاة التراويح نلعب ويا بعض شرطي وحرامي ... على كبر الشعبيه ..نلعب .. والله كان شي حلوو ولو ربعي قالوا بنلعب بلعب الصراحه شي مسلي ...
لكن الحينه الكل خذ له موتر ويتمشى فيه واللي يطلع برع وغيره ...
محد تم للأسف ><

4 - قدر استطاعتك .. ضع لنا برنامجك اليومي في رمضان .. ؟؟
اسهر ويا اخواني بالبيت نلعب بلايسيشن 3 نتحدى بالكوره .. خخ .واحيانا نلعب ويا بعض اون لاين كل واحد ماسك بلايستيشن 3 ويلعب .. وكلنا نجتمع بلعبة جيتي إي ..يعين جراند ثفتي اليدي ..
ونكون عصابات ونجتل الخلق .. هع ..
مب ها موضوعنا ><

عموما ..

ارقد الصبح .. ولو كان في دوام اداوم ولو ما كان في دوام ارقد
لو كان في دوام ارقد الظهر ..
عموما اكثر شي ماشي دوام ..^^

فأنام الصبح وبعد صلاة الظهر اتم فالمسيد اقرأ القرآن ..وبعد صلاة العصر ادش النت واحيانا اقرأ قرآن
واحيانا اعدل بالتصوير مالي واحيانا اصور ..

بعد التراويح .. اتمشى بموتري واحاول اصور شي لو حصلت لو ما حصلت اروح لأخواني ونلعب ..^^

5- ما الذي فقدته في رمضــــــان؟؟

امممم .. ما بفقد شي ..
ما ادري ..
؟؟..^^

6- أكلتك المفضله في رمضان ؟؟؟
هريس وفريد وعيش ودياي ..هع..
وبعد ها .. سويت طبعا ..^^

7- اذا سمحت لك الفرصه لدعوة أي شخص على الفطور اوالسحور
فمن تختار من اعضـــــــــــــــــــــــاء المنتدى؟؟

بدعوا الكل واللي بيي إيي ..
وطبعا ما يصير ادعوا البنات .. منقود ...
فبدعوا الشباب بالمنتدى .. يعني انت اولهم .. خخخ
بس منو بتفيج إيي على السحور.؟؟؟ههه

8- اختـــــــــــار ولا تحتـــــــار : في رمضــان تفضل .

..السهر او النوم مبكر ..نص نص
..التلفزيون او اللانترنت..نص نص
..الإجتماع معالأهل والأصحاب او الجلوس لوحدك ..الإجتماع مع الأهل والأصحاب
.. السمبوسه او الشوربـــة ..الشوربه ههه

9 - أجمل رسالة وصلتك للتهنئة في رمضان..كانت مِنمَن ؟؟

وايد وصلني دام عندي بلاك بيري كل اللي وصلني حلو وما اذكر من منو ... هع..

و هل ترى أنها كافية للتهنئة بقدوم شهر رمضان؟؟

لا طبعا ..
حلاته الواحد ندعوه يفطر ويانا بالبيت ويهنينا برمضان ..^^

10- رمضان شهر للعباده .. وللاسف الفضائيات تتسابق لجذب المشاهدين
فهل نجحت الفضائيات لجذبك لهـــــــــــــــا ؟؟ لا طبعا بس ما غير شعبية الكرتون فديتهم .. ههه وزمن طناف وطماشه ..وعجيب وغريب .. مب كنها جذبتني ؟...هه
وما المسلسل أو البرنامج الذي تحرص على متابعته في رمضان ؟
شعبية الكرتون...

11 - تقريباً من 3 سنوات مضت كنا في رمضان نصوم ونحن فيصفوف الدراسة
واما الان ومن سنتين تقريباً باذن الله نصوم رمضان بعيداً عن الدراسه
ماالفرق وهلالصيام في الدراسه يساعدنا اكثر على العبادة ام في الاجازة اكثر؟؟
الإجازه طبعا
ولا قبل متفيج انا اروح اجابل الإستاذ ويصارخ والربع نصهم يفطروا ونصهم حشره ... يأذون الواحد وما يخلونه يرتاح ..
ولا اللي يسحبني وراه ويفطر ههه

12 - المساحة الأخيرة لك لتقول ما تريد , تفضل.. ؟؟
اردت من الدنيا ما اردت وحصلت على لاشيء
فأيقنت انني سأحصله عليه بالنهايه
إن لم يكن بالدنيا.. فبالآخره بإذن الله

اتمنى ان الله يتقبل صلاتي وصيامي ويرحم ابوي ويدتي ويدي يارب آمين
ويارب يتقبل صيامكم وقيامكم وصلاتكم ودعائكم يارب آآمين ..^^

الله يارب تتسهل وتتيسر أموري ..^^ آمين يارب

أختار .... خوية الشقا ..

ولو اخترتوها .. اختار .. اممم راعية البورش كايين ..
ولو اخترتوها اختار الحمادي

ولو اخترتوه سكروا المنتدى ... ×_× ..هع