|
الزمان: 1-9-11 مــ المكان ساحة البيت.. المناسبة: العيد الحدث: خرشة يوم العيد، الكل اخترش، محدن سلم منا، ..! يبنا كل انواع الشلق، من الفراشة لين القنابل.. صيحنا اليهال وفزعنا الكبار .. أقوى شي.. HHH طبعا محد يقدر يمنعنا، لنه هاليوم اسبشل ، وغير عن كل الايام.. استجمام للروح.. والعقل، والقلب.. http://www.uaemusics.com/uploood/ima...0oi0fqlvmx.jpg شي رائع.. أنتظر المزيد من الخرشة .. :oi-o: |
الزمان: 13-10-11مــ المكان: بين دبي والعين( الشيشة).. الحدث:غبر الجو،بعدها غيم، طاح المطر، كنا واقفين في شيشة العين أنا والشلة، اشوي وانشوف الحبايب. http://www.uaemusics.com/uploood/ima...dhysaxx6nc.gif كنا جدامهم، بشكل ملحوظ ومتابَع ..! لاحظناهم بس محدن منا اهتم، وانسولف ونربش كالعادة..! يوم كنا انطالعهم، هم يصدون ويوم طالعونا حنا صدينا ( الكل يشغل نفسه ابشي، أو يطالع برع الجامة).! حسيت أنه في حالة ريكوغنيشن بينا وبينهم ..! السواق مول ما خوز عيونه( يحاول يعرف منو حنا، واتمنى أنه ما عرف)..! اربيعتي خذت لهم صورة تذكارية بس عالخطافي، والحمد الله أنهم ما سوو نفس الشي تجاهنا ..! ألحين كل ما تشوفها، تذكرنا فيها ونذكر هاليوم الحلو( طبعا ً في أحداث غير هالحدث صار ) ..! |
المكان: فندق راد بلو ( بني ياس) الزمان: يوم الثلاثا ( ما أذكر التاريخ بالضبط) http://www.uaemusics.com/uploood/ima...y2rlol9wpn.jpg الحدث: حضرت مؤتمر للتكنولوجيا( عن خاطري×_×)، في استراحة الغدا، رحت طلعت برع( الساحة الخلفية)، ويلست على الطاولة المجابلة للباب، ( كنت مع اربيعاتي)، كان في واحد اجنبي، طلع بعدنا و امر الخادم اييب الما.! يلسنا اشوي وسولفنا اشوي، وقمنا وارتبشنا، وتمشينا في الساحة اللي في الصورة، شفنا اخونا المحترم الأجنبي، قاعد شرات المحششين، و دايخن راسه..! ودرناه وبعدنا عنه، لما انهينا فسحتنا، ردينا داخل، وشفنا اخونا العزيز( مرةً أخرى) .. كان يشرب خمر، ويقول كلمة ( كوستاريكا أو كورباريكا ) بصوت عالي، والخادم شدهان واقف عداله...! اربيعتي، تروعت من صوته ( وايد رهيفة الابني) .. ووقفت دون حراك( ولانه خيالها واسع وايد تخيلت أشياء فظيعه).. جان اتقول A( اشمعنا ألحين يوم حنا يينا، قام يشرب وايهلوس) .! ردت عليها وحدة منا R ( شكله تذكر حبيبته)..! A ليكون وحدة منكن حبيبته ..! وانا ما مسكت عمري وقعدت أضحك ( طبعا ً بصوت خفيف)..! يلهوي، ربيعاتي يبالهن زرة ابلوط.. ( خربانات).. ^^ |
اليوم: 2-11-2011مــ الحدث: خلصت كل اللي علي، كانت الاسابيع الماضية، أسابيع مضنية وغير طبيعية..!!! الحمد لله، انزاح نص الهم وما بقى غير النص الثاني..! يوم انتهيت، اجتمعت أنا وربيعاتيــ، رحنا نتمشى ونتلفلف، وصلنا عند ملعب كرة السلة شفنا كم من ابني يلعبن كرة سلة، وقفنا على الحافة، انشوف كيف اللعب ماشي، لما لاحظونا من ابعيد يايين، زقرونا وقالوا احدن منكن يبي يلعب،،.!؟ كلنا بدون لا نقول شي، تسابقنا على صراخ و نقيز... لعبنا كرة سلة، واسميها كانت لعبة حامية، يابوا على فريقنا هدفين، وبعدها حنا سددنا غلبنا..! ما كملت خمس دقايق، وتعبت، لأني ما كنت راقدة من يومين، ومواصلة ..! تميت ربع ساعة تقريبا، لين ما استعدت العافية.! خذيت قبل الراحة هالصورة التذكارية، قلت بحطها في مدونتي المطبوعة والالكترونية..! http://www.uaemusics.com/uploood/ima...evqaohdzt3.jpg |
أيام حلوة مدخل :: تخيلن يا بنات تكون هذي رنة تلفونكم .. ! http://www.youtube.com/watch?v=pebsT...eature=related القصة: الزمان 6-12-2011مــ، يوم الثلاثا..! المكان : كلاسنا (في الكلية).. الحدث(قبل يوم الثلاثاء): استاذنا مرة من المرات كان يشرح، كان الدرس عن الانحراف المعياري ( الاستاندر ديفييشن)... ياب لنا مثال غريب اشوي ( ضرب لنا مثال على جلاندايزر، واشوي قام يرمس عن ساندي بل )..!!!! كانت فوق روسنا ميت علامة تعجب..!! جان أسأل الاستاذ: استاذ شو يخص جلاندايزر في الموضوع.. جاوبت اربيعتي عنه: الضربة القاضية ... ( هههه) ..! ومر اليوم وحنا امسكرين السالفة..! في نفس اليوم(سبحان الله) .. :03: دق جرس الانذار في الكلية، والاستاذ ما تحرك أبدا، طبعا ما قدرنا انكمل الدرس لأنه صوت الانذار جدا عالي..! اربيعتي جان اتقول: المفروض جلاندايزر، ينقذنا من هالمصيبة بصوت عالي وجدام الاستاذ ( ههه)..! في ليلة الثلاثاء : ليلة 6 من الشهر الماضي. انا واربيعتي كنا ندردش مع بعض، وياتها فكرة، مضمونها انا انسوي مقلب للاستاذ، ( ياااكبرها عند الله )..! المقلب: طلّعت اربيعتي اغنية جلاندايزر من اليوتيوب، وحولتها لي ثري دي .. وحطتها في الفون، وقالت لي حطيها في فونج وأنا بدق لج ( أخاف أضحك )..! طبعا ما رضيت بالأول، لأنه حرام أخاف ينكسر خاطره ( لأنه قاعدين نتمصخر عليه)..! بس آآخرتها أقنعتني .. رحت وحطيت النغمة في الفون، على أساس انها نغمة رنين.. وبالباجر: رحنا الكلاس أنا وياها، وكنا في قمممّة النشاط ..! يلسنا في الكلاس، والاستاذ يشرح .. (أنا كنت ناسية سالفة المقلب).. واشوي ادّق لي اربيعتي ( كانت يالسية صوبي بس ابعيد اشوي ).. وتنسمع النغمة... والبنات نصهن فوق الطاولة ونصهن تحتها من الضحك ( هههه)..! :38: و المصيبة أنه الفون كان في الشنطة، وانا قعدت ادوره ومااا حصلته لين ما خلصت النغمة ..! ويهي صار شرات الطماطة..! لا والسير شيقول :" جان حطيتهن اغنية ساندي بل أحلى، انتن بنات" ...! قلنا له : ( استاذ هذي اهداء لكل رجل عظيم )..! :191: الكل أنهى ضحكاته، على تغيّر وجه الاستاذ.!! بعدها ما أدري شو ياني،...! خلص الكلاس وأنا في حالة سيئة، حسيت أنه المقلب كان سخيف، واربيعتي اتقول عادي.. كنت متألمة وايد،..! :unsure: قلت لازم أعتذر له ( ولكن هالشي بين معاه عادي)..! وايد أفكار دارت في راسي..! ولكن في اليوم اللي بعده واللي بعده .. نسيت كل شي ..! ولكن حرّمت أني أسوي مقلب بواحد من الاساتذة مرة ٍ ثانية ..! يا الله سامحني .. :mornincoffee: الخاتمة: يمكن البعض ما يعرف أني اخريش، ولكن فعلا يوم اخترش العجايب تطلع ( وبشكل أنوثي ).. على فكرة: حنا للحين نسمي الاستاذ جلاندايزر ( منو قده ) :77: |
| الساعة الآن 08:04 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir