منتدى استراحات زايد - 乂آآه يا ويـــله .. قلــــبٍ صويــبٍ بانــت أقداره乂

(الجزء 73 )

(اما عند العرب .. رقود طبعا بعد حفلة البارحة .. وما نشوا الا على أذان الظهر .. بس كانت ندى اتعابل عالغدا ..)

نشبة : لا إله إلا الله .. ويييه ثركم كلكم رقود ؟ (واتشوف ساعتها ..) حوووه !! قوموا !! قوموا !! أذّن الظهر .. الله يغربل الشيطان !!

ميثاء : يالله .. اعنبوا شو هالرقاد اللي رقدناه !!آآخ ظهري ..

هناء : انتوا خليتوا حد يرقد أمسات الا صريخ وزعيج !!

شما : لا لله ما استوا شي .. انتي الا مغفية !!

اليدة :هههههه هيه اكرم !! (ونشوا يصلون وبعد الصلاة .. يلسوا عند الضو .. والجدر محطاي .. وكانوا يالسية احمد وراشد وميثاء واليدة ..)

نشبة : وييييه نسينا انسوي هواية !!

ميثاء : وييييييييييييه .. جنه الله مب رايد !! خلاص باجر بنسوي ..

احمد: يستوي انزين العصر ..

شما : زين بعد هبابنا .. انا يبت جوازي .. عاد خلهم يصورونا صور عدلة !!

احمد: خالوه يصورون فوري

نشبة : وانا عيل يايبة صورتي !! ماعليه عيل بنتزجرت اليوم ..

شما : وانا ما يبت الصراي مالي (قصدها جحالها ..).. نشيبة عندج انتي ؟

نشبة : هيه امايا هيه !! (واتطالع راشد ينود ..) ابويه بوسنيدة !! جان فيك النودة .. سر داخل اتسدح !!

راشد عيونه محمرة : هاااه؟ لا امايا انا بخير ..

ندى اتدزها رحيل : بلاها ايدك؟

راشد : هاااه؟ لا ماشي فديتج احمدوه بند الباب على صبوعي !!

(واحمد يضربه على راسه )

احمد : جذاب واحد !! احينه بتمشكلني ؟؟ امايا امسات كان يبا يوايج عالحريم .. وحدة منهن بندت الدريشة على صبوعه !! هههههههههههههااااي دواك !!!

نشبة : ههههههههههه هاي محد غير شميم !!

شما : عاد يابويه سامحني مادريبك .. (وشوية وبتصيح ..)

راشد يحبها على راسها : يالله يا اميه انا ولدج !!

شما : هندوه؟ (وتزاعج ) تعالي يا مسوّدة الويه !!

هنود مستغربة وفخاطرها : بلاها هاي بعد مشتطة ؟

شما : عندج هالريال الشيخ وتفرطين فيه وتتعنطزين بعد !! (رشود اتشجج )

هنود فخاطرها : مالت !! قصوره شيخ بعد !!

(وابتسمت وصدت الجهة الثانية سايرة صوب العرقوب .. واحمد ينغز راشد ..)

راشد : آآخ !! بلاك؟

احمد يصاصره : سير لها .. وراضها !!

راشد : ياخي البنية ما تبا .. ليش اغصبها؟

احمد : ياخي مبردك !!

(وراشد يطالعها وفخاطره يسير لها .. يوم توّة بيقوم ..)

شما : عاد انا كاتبتلك هاكي القصيد ..

(واستراح مكانه ..)

راشد : لي انا؟

شما : هيه .. يالله اتسمع واتطمش !!

نشبة : إييييييييييييييييييييييييه يا حافظ عليج بتقصدين؟ وين طالعة الشمس؟

شما : وانتي شعليج؟ من كيسج أعد قصيد؟ احم احم سمعوا

حـــي جـيـلـك عـــد مـــا مـــزن نـشــا
واعـشـبـت أرض امحـيـلـه بلـمـطـور الكل = بلمطوووور

او عـــدد مـــا يـــورد الـبـيـر الــرشــا
او عــدد مــا يـوفــي المـسـلـم نـــذور الكل = نذور

رمــــز خــــط مــثــل دريــــز الــوشــا
يـقـمــش الــخـــوار دور فـــــوق دور الكل = دور

لـــك ابـحــال ومـــال جـنــد امـجـيـشـا
والزعيـم الخـضـر وابـشـر بالـسـرور الكل = بالسرور

جـان بــك مــن حــب مضـفـي الغـشـا
لا تـشـاكـي لا تـبـالــي كــــن صــبــور الكل = صبور

بـو جـعـود ايــدوس فيـهـن لــي مـشـا
الغضـيـض الأحــور الـظـبـي الـنـفـور الكل = النفور

مـن حسـدك ومــن ذلــك ومــن وشــا
ســر او يـاهـم والقـلـب خـلـه عـبــور الكل = عبور

لـو طـرو لـك وصـف خلـك قــل حـشـا
لا أحـبــه ولا أعـرفــه مـــن يــصــور الكل = يصور

هــم عـجـارب هــم أفـاعـي واحـنـشـا
لا تـولـيـهـم ولـــــو ولـــــوك شـــــور الكل =شوووور

طـيـع مــن تـهـواه وافـعـل مـــا يـشــا
لـي رضـى خلـك رضـت كلهـا الأمـور الكل = الامور

مـن ضـوى الأكـرام مـا حـاتـا العـشـا
ومـن ضـوا الأبـخـال خـلـوه امحـقـور الكل = امحقور

وسلامتكم ...

(وهم يصفقون لها مستانسين .. )

ندى : عاشت شميم ما قصرتي

اليدة : بيض الله ويهج ..

راشد : عاد يا اميه الله يهديج لوراشد الخضر يدريبج جان قاضاج ..

شما :وابويه شعنه؟

راشد : سرقة أدبية !!

شما : الله يحفظني في صورة ..

(اما عند هندوه كانت يالسة عالعرقوب .. وكان قارصنها سمسوم واتحج ريلها .. وتيها هناء ..)

هناء : شحالج هنيد؟

(وهنود اتأشر لها انها بخير ..)

هنود فخاطرها : أوفيييه !! شو تبا هالطحنه؟

هناء : اتصدقين انه ريلج طرر .. وهذا احمد بعد !! اوووف عليهم !!

هنود عصبت وفخاطرها : اتفدين ريلي بعد وجدامي؟ هب هب هبيتي من بنية !! (وقامت وسارت بعيد عنها ..)

هناء : ههههههههه يا حرمة بلاج زعلتي؟

هنود تتحرطم شوي شوي : جلبة وحدة !! قليلة الادب !!

(وكان راشد ياينها .. جان تمسك ايده توّديه بعيد ..)

راشد : هذا هو الحب ولا بلاش هههههههه

هنود : جاب جاب عنلات صيرك .. (وساروا ورا البيت ..) اسمعني راشد .. انا قلبي عافك !!

راشد : ادريبها الاسطوانة المشروخة !!

هنود : انطب واسكت !! جان تبا .. جدام الكل بتكلم وبقول اني ماباك !!

راشد وبكل جدية : هنيد هذي غلطة وما بعيدها بلاج؟

هنود : جدام الكل ببّين اني احبك .. لكن يوم كل واحد يسير بيته بتطلقني .. انا ما ابا اكسر بخواطر اهلي واهلك .. خلهم مستانسين جذيه ..

راشد احمر ويهه : ما تفهمين الكلام اللي قلته؟ (ومسكها من ذراعها ..) أقولج اباج !!

هنود: ياخي وانا بايعتنك !!

الجود : هنود؟ يا هنود؟

راشد : هنيه !! يالله سيري

(و يت الجود وويهها احمر .. اتوقعت انه شي يستوي من بينهم ..)

الجود تصاصر هنود : تعالي أباج !!

(وساروا بعيد عنه .. وهو تم متكدر ... بس مب طايع يبين لهم ..)

هنود : بلاج؟

الجود : خلينا نسير بعيد ..

(وهم يمشون .. سايرين صوب الهوش .. )

هنود : شو مستوي؟

الجود : حصلت كتاب بنّوتي عند رشود !!

هنود منصدمة : كتاب بنّوتي؟ أكيد مال بنية !! هذا ما يتوب ؟

الجود : هدّي !! هدّي !! السالفة هب جذيه ..

هنود : تعالي بسألج .. كيف كتبتي عن سالفة ميرة وإنها ماتت؟ شو من عقلج؟

الجود : لا والله هب من عقلي .. بس أذكر من كم من سنة كان يكلم عبود وهو يصيح .. وكانت اول مرة اشوفه يصيح ..

هنود : كل هذا؟ ويخبّر ربيعه؟

الجود : ولد عمه مب ربيعه بس.. انزين سمعي انا خشيت الكتاب فشنطتج .. ومن توصلين البيت اقريه !!

هنود :وشعنه هب هنيه؟ خليني اقرا عن سواد ويهه ..

الجود : لا يا هنيد .. بعد هذا مهما يكون اخويه .. وبعد هنيه البنات وبيرمسن !!

هنود تبتسم : خلاص ولا يهمج !!

ندى تزاعج : يالله اتفضلوا غدا .. وينها العروس؟ هنيد؟ يالله وراكم طلعة العصر ..

(اما في ليوا ..)

زهور تزاعج وتربع لبيت حمد :باباااااااااه !! باباااااه !! انا في موووت باباااه ... دااااو !! داااو !!

(وكان توّة ميود واصل البيت .. نزل يطلع ثيابه من الدوبي .. وصد فوق يشوف البيت يحترق .. هو زاغ وفر ثيابه عالارض ..)

مايد زايغ : امااااياااا !!! (وبطل الباب ودخل داخل .. وإنه الضو مستلبسة في البيت كله .. وعيال الفريج يترابعون ويبطلون الماي مال الزراعة .. ويطلبون المطافي .. وقاموا على قلب واحد يبون يطفّون الحريجة .. والعيايز والحريم كلهن يدّعون انه محد يكون في البيت .. واللي سار بيت حمد عشان الماي عندهم قوي .. ويضربون بالحصا على دريشة غريبة .. عشان اتكسّر الجامة .. ويرشون الماي .. ودخل مايد ...بس سعيد ولد يرانهم يوّده ..)

سعيد : رد يا ميود !!

مايد يصيح : امايا داخل !! انته شو ما تفهم؟ امييييه !! (ومايد يطرح سعيد عالارض .. ويدخل داخل .. وكان يدوّر مكان ما فيه ضو .. وكان يحاسب .. وبسرعة يمشي .. ) امايا؟ امايا؟ تسمعيني؟ ردي علية!! انا ميود ولدج !! ردي !!! (ويوم وصل لغرفتها بيبطل الباب حرقته قبضة الباب..) آآآخ حااار !! آآآخ !! (ورفع كندورته .. وقام يبطل بها الباب بسرعة عن تحترق ايده .. وكان زايغ .. وأول ما بطل الباب .. الصدمة وهو مبجج عيونه .. وبصوت متقطع مبحوح ..) اميــــ إيه ؟ (وكانت جثتها محترقة .. لكن فظيعة ما تنشاف.. كانت مشوهه وسودة وحمراء ومستلبسة فيها الضو .. وهو دموعه ينهمرن .. أمه تموت جدام عينه .. ) أممم ييييييييه !! (وحصّل مثل اللحاف بس ما جاسته الضو .. ويلحفها من راسها لريلها .. وهو يتنافض والدنيا اتدور به .. وطاحت احطبه من الكبت على ايده ..) آآآآآخ ...آآآآي إيدي !!! (ويطالع ايده .. طرت له ايده وكندورته ..والدمان ينزل منه ..وهو مب مهتم .. قام ولحّف امه .. ) أميييه !! ليش تموتين؟ ليش ودّرتينا؟ انا اباج !! امايا !!! (وشلاها وهي ملحفة وهو يصيح بحرقة .. ويطالع الضو .. اللي كلت امه وبيتهم ..) ليتج خذتي البيت وماخذتي اميه وياج !!! امييييه !!!

حمد: وينها؟ وينها؟ انا مخلنها بخير !! والله اني مخلنها بخير !!

سعيد : هد يابويه هد الوضع !! ترا مايد دخل وأكيد بييبها .. (ويزاعج ) يا جمال !! وين مال الاطفاء؟

جمال: بيتحيرون !! تراهم بعيد !!

مايد ظهر وكان شالنها ويصيح ويتمتم بأشياء هب مفهومة : اميه !! (ويوم ظهر كانوا كلهم يترابعون له ..)

حمد: أشوف !! ليش ملحفنها؟ لييش؟

مايد :لا يابويه !! لا !! لا تشوف !!

حمد : خلني أشوف بنتي !! خلني !! (وعيونه تدمع ويوم عج اللحاف عن راسها .. بجج عيونه وبصوت واطي .) غريبة؟

(وخنقته العبرة وطاح عالارض ..)

مايد : أبويه !! مب انته بعد !!! مب انته بعد ... يا سعيد ... إلحق !! آآآخ .. (وكان متشبث فأمه مب طايع يهدها .. كان ينبها حار .. والشباب يصيحون .. لأنه فهالاوقات ايحسّون الام غالية .. وخصوصا يوم واحد من ربعهم فقد أمه ولا وجدامهم .. كانت وفاتها تصيّح الصخر ..)

والبارت الياي يوم الاحد

(الجزء 74)

(والعصر عالساعة 4)

• ميثاء : لا إله الا الله .. يالله يا بنات ..

• اليدة : يعنيهب حالة .. يالله ما تسوى علينا هالسيرة ..

• احمد : والله اني بسير عنكم ..

• راشد :مب تعديل اتعدلونه !! (وكانن العيايز ميّلسات ..اليدة وميثاء وشما ونشبة عند احمد .. اما ندى ودانا وشمسة وهناء وفاطمة يلسوا عند اليهال ..)

• الجود: يايين يايين صبروا !!

• نشبة : انزين ليش كلهن بيسيرن؟ خلهن يتفيزرن انا محتاية الهوية هب هن !!

• اليدة : اسكنتي !! كلنا نبا شراتج .. (واحمد محمر ويهه من الضحك عالهزاز ..)

• شما : انا !! لو يايبه بشيكيرتي ويايه جان سويتلها هوية ..

• نشبة : اكملت !! اكملت !! قصورج بعد !! خلاص انا مابا أسوي هوية !!!

• ميثاء : يا حرمة استهدي بالله .. اتمصخر وياج !!

• نشبة : انا مابا أسوي هوية !! خلاص بطّلنا ما نبا !! (وتوّها نازلة )

• ميثاء : وين سايرة؟

• نشبة : ملتعنة عنكم !! (وهي تمشي بعيد ..) قصورها بعد .. بتيب بشكارتها .. جان يبتي على طريجج محمد الدريول !!

(والغريب فهالشي انه نشبة لو تتناجر وياهم .. ما كانت توصل انه تهدهم وتسير .)

• احمد : زين جذيه زعلتوها؟ بسير اراضيها .. (الاخ خايف على العيوز خخخ .. )

• ميثاء : استريح يابويه بسير اطالعها ..

• شما : بسير وياج .. هذي مب عادتها اتهدنا .. (وساروا لها .. وكانت صوب الهوش ..)

• ميثاء تزاعج : يا نشيبة !! نشيبة !! طلعي من زرب الهوش !!

• شما : الله يحفظها .. بلاها جذيه اليوم؟ (ودشوا عندها .. وهي يالسة اتأكل الهوش ..)

• ميثاء : اعنبوا يهالمذهب !!

• شما : بلاج مبوزمة؟

• نشبة : ابدا ما بلاية شي .. سيروا ارحلوا انتوا !!

• شما : ماحيدج تزعلين من سوالفي؟

• نشبة : مادري يا خويتي .. سوالفج عسل امبونها .. بس ..

• ميثاء : بس شو؟ أحسّج مب نشيبة اللي نعرفها .. بلاج؟

• نشبة : حلمت وحسيت ياثوم كاتم ع صدري بغيت أموت ..

• ميثاء : أعوذ بالله .. متى هذا؟

• نشبة : في الليل بعد .. يعني في النهار؟

• شما : والله مب منيه والدرب ياينج !! استغفري ربج .. تراج أمسات مقطعة الخلق .. لا خليتي حد فحاله ... الميت خليتيه حي !!

• نشبة : مب هذا !! مب هذا !! انا قلبي ناغزني اللهم اجعله خير ..

• ميثاء : اتعوذي من ابليس .. وطوفي !! غدت ريحتنا ريحة دبش ..

• الجود يايين صوبهم : شو تسووون صوب الدبش؟

• ميثاء : امايا الجودة عندج لوشن؟

(وهن ظاهرات يتخبطن ..)

• الجود : في الشنطة انتوا ركبوا ..

• هنود فخاطرها : هذا وقته؟ اتخمين عن الدبش؟

(وربّعت نشبه عباتها وحطتها على راسها .. وحسّت شي طاح ع راسها ..)

• نشبة : بسم الله ..

(أونها عادة اتضحكهم بهالحركة .. ونست السالفة ..وأول ما ركبن ..)

• احمد: يالله يا خالوه زعلتي؟

• نشبة : لا يابويه .. أسوي سوالف لين إييّن !!

• احمد يضرب هرن وينزل الجامة : إيييه جودوه !! تعالي أمايا هنه !!

• الجود : وات؟

• احمد : تعالي اقولج ..

• اليدة : خلني أنلز الجامة .. أهزبها ملعونة الصير .. تعالي منّه !! (ويايه صوب احمد مغفية .. وهنود سايرة صوب موتر راشد وتركب )

• الجود : بلاكم؟

• اليدة : سيري اركبي في الدبة سيري !!

• الجود : شعنه مرتصات؟ بسير أيلس عند اخويه وحرمته ..

(وأحمد يغمز لها عشان تفهم وتخليهم روحهم وهي لا حياة لمن تنادي ..)

• اليدة :أقولج سيري اركبي ورا لتحصلين هالعصا .. (ويايه توها بتظهرها العصا ..)

• احمد : هااه !! هاااه !! هاااه !! عيّني من الله خير !! يالله سيري !!

• الجود : ان شاء الله عمي ..

• احمد: غصب عنج !!

(الجود تسويله حركة مالت .. لا وبعد اتوعّد له وهي تبطل الدبة وتركب من ورا وهو يضحك ..)

• هنود : يعني قلة أماكن؟ وشعنه أختك ما يت عندنا؟

• راشد : هاي أوامر يدوتي ويدتج عندج مانع؟

(وهم في الطريج وراشد كأنه يتكلم ويا عمره .. وحتى يوم يسألها ما يحصل جواب ..)

• اليدة : اقولكن بنيات .. (احمد والجود يتصددون يدورون وين البنيات ..)

• احمد : وينهن؟

• ميثاء : عونج ..

(اليدة سوّت له طاف ..)

• اليدة : يبتن جوازاتكن؟

• نشبة تزاعج متحمسة : انا يبت !! شوفي شوفي !! عجوا عني البرقع بعد !!

(وتضحك الجود عليها ..)

• شما : انا عيل حايلتهم يوم جددوا جوازي .. يابويه عيب منقود !! قال جان ما تبين ماشي شؤون .. وسرت لله وفصخت برقعي ..

• احمد يضحك من قلة لا حيلة ..ههههههه

• اليدة : انطب انطب .. انزين عادة يا بنيات .. انا سرت تراني ويا الدريول .. وفي صندقة روحها حق الحريم .. وصندقة حق الرياييل ..

• الجود :أي صندقة الله يهديج !!

• اليدة : لكن بهدلوني .. وخيّسوا صبوعي .. ابصمي بصبيعاتج كلهن !!

• نشبة : وابويييه

• ميثاء : أسكنوا ..

• اليدة :والله ما خلوا صبع .. الله راد ما قالوا صبوع ريولج .. ولا كيف بتمسح !!

• شما : هههههه الله يحفظهن في صورة !!

• اليدة : هييييه شو اتحرن عبالة ..والله رديت البيت منهدة !!

• نشبة : نحن فاكين عمارنا يبنا جوازاتنا وخلاصةا لصدي ويانا ..

• الجود : هههههههه فديت اللي بيصيد غزلان ..

• احمد : غزلان ولا سبلان؟

• الجود : سبلان شراتك يالهرم ..

• احمد : انا افا !! احيدج سبالة جميلة هع هع هع

• الجود : مالت عليك جان هذا تشبيه ..

• نشبة : أي غزلان وأي سبلان؟

• اليدة : امايا لا يكون يايبين صوركم؟

• ميثاء وشما ونشبة : هيييه!!

• اليدة :اسمعوا المدحب ..يصورونكم فوري ..

• نشبة : ويدي ما اتجحلنا !! امايا جودة عندج جحال؟

• الجود : هيه اميه عندي مال ماك ..

• نشبة : امايا ابا جحال مابا ماك ..

• الجود : عندي ماك تبينه؟

• نشبة : يا امايا الله يهديج ماباه .. هاتي لي جحال صراي الله يهديج ..

• الجود : انزين هو جحال قلم !!

• نشبة : لا إله الا الله هاتيه هاتيه !!

(والجود اتدوره فشنطتها ..)

• اليدة : عادة ما راويتكن هويتي !! (أونها عادة بتتخجج عليهم طلعت أردى عنهم )

• ميثاء : أشوف؟ (وخذتها وبججت ميثاء عيونها ..) ويييييه!!

• نشبة :اندووووج !! عند الله عليج !! امايا وين الشيلة؟

• شما : أبوووووووووووووووه !!

• اليدة :امايا انا قالوا لي تبين تعجين الشيلة ماشي رياييل هنه على كيفج وعجيتها ..

• الجود ودرت اللي فإيدها ومنصدمة : شووووه؟ حاسر؟

• احمد انصدم وصد ورا ويشتغل عنده الفضول : أشوف !! أشوف ؟ (وعطوه ..) هههههههههههههههااااااااي آآي بطني آآآي ههههه آآخ آآخ !!

• الجود متحرقصة : والله احمدوه !! والله عطني بشوف !!! الله يخليك بشوف !!

• اليدة : مسوّد الويه ..

• نشبة : شو السالفة؟ شعنه عجيتي الشيلة؟

• اليدة: هم قالوا لي عجي الشيلة !!

• احمد: اقول يدووه !! عيل محد يدريبج مسوية هوية؟

• اليدة : كلهم يدرون بس ما راويتهم ..

(وقبضوها ضحك وتعليق .. والجود يوم حصلت الجحال )

• الجود : اميه نشبة هاوه الجحااااا (وما رامت اتكلم وقامت تسير جهة اليسار صوب شما .. وتدفر بشويش ميثاء ..)

• ميثاء: شو بلاج يا امايا؟ (وصدت ميثاء ورا ..) شو؟ (والجود اتأشر زايغة واحمد يطالع من المنظرة شو السالفة لقافة يا ناس .. وهي اتأشر على راس نشبة .. ميثاء قف شعر ينبها وقامت اتلز صوب شما ..)

• احمد: بلاكم صخيتوا؟ خلصن السوالف؟

• ميثاء على اعصابها : احمد وقف !!

• احمد: شعنه؟

• ميثاء : اقولك وقف !! (وضرب بريك والجود وميثاء حاطين عيونهم على راس نشيبة ..) أقولج نزلي ..

• نشبة : منو ؟ انا؟ ليش شو سويت؟ (واليدة واحمد صدوا ورا مستغربين )

• ميثاء ترمس بحزم : أقولج نزلي !! (يوم هي نازلة سيده تنزل وراها ميثاء وتيوّد عباة ميثاء وتفرها وترضها عالباب وتكفخه عالباب كم من مرة .. ) مووت !! مووت !! يعلك السم !! موووت !!!

• احمد سيده نزل : طيطار صح؟ أدريبه هاتي العياه !! عنلات صيره !!

• نشيبة : أعععييييييج !! (وتسير بعيد ويفصخ احمد نعاله والجود شغلت الفيديو .. وتم الطيطار متعلق في العباة واحمد يضربه لين مات وطاح عالارض ..)

• احمد : حشا تمساح هب طيطار من وين يايبتنه؟

• نشبة : الله سلم ما تفّل علية ولا جان جاسني اليرب !!

• احمد: يودي عباتج ..

• ميثاء تسوي بصبعها اتحذر : ولا هالطول !! عجيها كلها مرض !!

• نشبة : عادي اسير بدون عباة؟

• شما : وكلي الله ..تراج لابسة وجاية .. لو زهور هنه جان عطيناج عباتها ..

• نشبة : اعععع .. هبّت !! هبّت !! هبّت !! قصوري آخذها !!

• اليدة : الا من وين يايبتنه .. (يوم هي راكبة ويكملون طريجهم )

• نشبة : ظنتّية يوم سرت عند زرب الهوش .. حسيت شي طاح ع راسي..

• شما : انزين جان نفضتي عباتج المدحوبة !!

(وفي المستشفى .. كان مايد واقف وهو متساند ويصيح شرا اليهال وكان حاط في باله انه خلاص امه راحت وودرتهم .. طلع الدكتور بعد ساعة ونص ..)

• الدكتور : الله يرحمها .. الحرمة يايبينها وهي محترقة بالكامل ما في شي ننقذه ..

• مايد بانفعال : أدري انها ماتت أدري !! أحينه صدق غديت يتيم .. (وهو صياحه يعلى منقهر .. ليش أمه ) شمعنى اميه؟ شمعنى ما خذت أبويه؟ أبويه هو السم !!

• الدكتور : اذكر الله .. حرام تقول جذيه ... اذكر الله يا مايد ..

• مايد يزاعج : هذا الصدق .. عيل انا اجذب؟ محد كان يحّن علينا غيرها .. والله لو تنزل بدال دموعي دم ما يوفن حقها .. عمرها ما ذلتنا .. بالأصل ما شفنا منها الا كل شي زين ..

(والدريول حذاله يصيح .. وربعه كل واحد منهم صاد الجهة الثانية ما يبون يبينون انهم يصيحون بس المصيبة هدتهم .. واليد متنوّم مب حاس بالدنيا .. كان مايد مب راضي يدخل عليه ويزيد من همه ..)

• الدريول يمسح دموعه ويبا يبري ذمته : بابا انا في قول شي ماما سوي ..

• مايد وهو هادي وكاتم على عمره : شو (وكان مايد يطالع الارض )

• الدريول : انا في ودي ماما صبح دبي .. هيّة سوي جنجال واجد واجد ويا رجال وفري ماما برا ..

• مايد يطالعه : منو فراها برع؟

• الدريول : والله بابا هذا في رجال واجد سوا جرجر وجنجال وكلام مو زين

• مايد : وين بيته؟

• الدريول : هذا مكان في دبي صوب دكان

• مايد: فاضل؟

• الدريول : هيه بيت ماما زينة وبابا فادل

(قام وشياطين الدنيا على راسه لو جدامه آدمي جان جتله .. بس الله سلم ..)

• مايد ركب موتره ويتكلم ويا عمره : والله لأراويك يالجلب يالميّذع !! انته اللي جتلت اميه .. يالجلب!! لكن والله ما أخليك انته أبو انته !! (وكان يسوق فوق ال 200 وكانت دموعه ينزلن فلحظة ضعف ومر على كل الرادارات .. يإنه يخطف على كل رادار وكل مسبة تظهر منه لأبوه ) انته تجتل أميه !! انته الا ليلام وطلاب !! هي اللي عززتك وانته اللي بعتها .. أصلا لو تبيعك ما يبت شي !! يعمري ما سامحتك يا فضول يالجلب !!آآآخ يا امايا آآخ !! وغلاتج ماسامحه !! لأخليه شرا الخمام .. الله يرحمج يالغالية .. كنتي الوحيدة الخيّرة .. انتي اللي تحنين علينا ..هه عواس مات وأحينه انتي ودور فضول ياي !! والله ما اخليه حي !!

(وهو عنده جيج العصبية ضارب .. أول ما وصل كان فاضل توّة مبند باب الصالة بيظهر ..)

• فاضل: لا والله ولك عين تي بعد ؟ لا يكونبتبات؟ ولا مطرشتنك الخايسة امك؟ تراني بعت البيت خلاااا

(توّة ما كمل رمسته وكلمة خلاص يحصل ميود ميودّنه من رقبته ..)

• مايد منفعل ومحمر ويهه الا القهر في عيونه : انته اللي جاتلنها !! محد حرق قلبها غيرك !!

والبارت الياي ان شاء الله من أفضى شو رايكم أعجبكم صح هع هع هع

سلامي عليكم ^^