|
شوي وتدخل عليها حصة: ساروه؟ بلاج حبيبتي منو مزعلنج؟ سارة وعيونها ممتزرات دموع: تعرفين سهول الخام شو سوا؟ وبعد ما خبرتهاسارة بالسالفة... نقعت حصة من الضحك.. حصة: ويا ويهج.. اتحرى شي الحينه.. سارة: يا سلام.. كل هذا وتقولين ولا شي حصة: وشفيها يعني إذا حضنتي حارب.. اعتقد أنه ريلج.. وغمزت حق سارة: والا يعني ما تحبين أحد يشوفكم.. تقاطعها سارة وهي تصارخ: حصــــــــــوه.. لا تخليني أزعل عليج.. اللي صار لي اليوم يكفيني.. حصة: والله انج سخيفة.. يعني لين متى بتستمرعلاقتج ويا حارب جذه.. ما تقولين لي؟؟؟؟ سارة: تستمر؟ لا حبيبتي منو قص عليج.. مرحلة وبتعدي إن شاء الله حصة وهي عاقدة حياتها شكلها ما فهمت: مرحلة وبتعدي؟ إنتي شو قاعدة تخربيطين؟ سارة: باجر بتعرفين شو أقصد حصة: لين ما ايي باجر يفرجها ربج.. ما أقول غير الله يهديج بس.. يلا تعالي ننزل تحت البنات يسألوني عنج ونزلوا سارة وحصة تحت.. وكملوا سوالفم.. .. في الصالة.. عليا وميسون وشيما قاعدات يصلن.. وحصة وسارة في الصالة الثانية.. خلصن عليا وميسون وظهروا وظلت شيما بعدها تصلي.. في هالوقت سهيل توه راد من المسيد و كان ساير صوب حجرته ، وعسب يمر كان لازم يدش الصالة.. لأنه ما شي طريج غيره.. سهيل وهو مار لمح وحدة قاعدة تصلي على باله أخته سارة فسار صوبها عسب يراضيها.. وأول ما خلصت شيما الصلاة.. ربع سهيل صوبها.. وعاد الحركة اللي سواها بسارة قبل شوي وحط ايده على عيون شيما.. أول ما حط ايده على شيما اللي تيبست وما عرفت منو اللي كان وراها.. بس عرفت أنه واحد من ريحة العطر الرجال اللي كان سهيل حاط منه.. عطر boss ... عطر سهيل المفضل سهيل هب راضي يرمس.. فكان يتحراها سارة والا شيما... اللي كان قلبها يدق بقو.... كل واحد يبي الثاني يبدى وفجأة.. |
دخلت سارة الصالة وفجت عيونها من الصدمة.. سارة وهي هب مستوعبة اللي قاعدة تشوفه: سهيـــــــــــــــــــــــل سهيل صد صوب سارة: ساروه؟؟؟؟؟؟؟ عيل هذي منــــــــــــــــــــــــــــــــو؟؟؟؟؟ سارة على طول مسكت سهيل وطلعته برع.. سهيل: لحظة.. لحظة.. منو اللي كانت تصلي؟ سارة: يا ربي فضحتنا.. هذي شيما.. أول ما سمع سهيل اسمها مــــــــات.. سهيل: قولي والله.. يا ربـــــــــــــــــــــــي.. جان خليتيني أكمل سارة وتضربه على جتفه: صج ما تستحي سهيل: وأنا كنت اتحراها انتي؟ سارة: لا والله.. يعني ما تعرف اليوم عندنا بنات.. شو اللي يابك داخل سهيل: أقولج ما ادري.. كنت ساير صوب حجرتيه ولمحت وحدة اتحريتها انتي.. فقلت بسير أراضيها سارة وتوها تذكرت أنها زعلانة منه: هي صح.. تعال أنا ما أرمسك سهيل: ساروه يلا عاد.. هب فايج لج الحينه.. المهم الحينه شيما.. سارة: هي والله ذكرتني.. بسير أشوفها.. |
وربعت صوب الصالة اللي كانت شيما تصلي فيها.. سارة: شيوم فديتج والله آسفة.. شيما وهي ميته من المستحى.. ما تعرف بشو ترد.. سارة: والله والله كان يتحراج أنا شيما وهي تبتسم: ما علي حصل خير... سارة: فديتج والله.. ونزلوا تحت... ظبية: يما سارة... سارة: لبيه ظبية: يما وينه حارب.. ؟ سارة: ما ادري.. يمكن في الميلس. أو ظهروا ما أعرف بصراحة.. ليش خالوه؟ ظبية: أبي أرد البيت يما.. أحس راسي مصدع سارة: ما تشوفين شر.. اييب لج أدول ظبية: لا يما مشكورة... بس بغيتج تدقين حق حارب عسب يوصلني.. توهقت سارة.. يا ربي من يوم ما عرست للحين وأنا عمري ما دقيت حقه.. بس كانت مجبورة.. ودقت عليه.. في هالوقت حارب كان ظاهر ويا سلطان .. حارب أول ما شاف الرقم ما صدق.. سارة داقة.. لا هب مصدق..وعلى طول رد حس أن في شي مستوي.. لأن سارة مستحيل تدق عليه حارب: هلا سارة.. ارتبكت سارة.. أول مرة تسمع صوته في التليفون.. سارة: وينك؟ حارب: برع.. ليش تسألين؟ سارة: لا بس.. خالوه تسأل عنك تبي ترد البيت حارب: خلاص.. دقايق وبييكم سارة: لأ.. حارب: شو لأ؟ سارة: أقصد يعني أنا بقعد ما برد الحينه.. ربعي للحين ما روحوا حارب : ومتى بتردين يعني؟ سارة: ما ادري.. بس ما عليك أنتوا سيروا وأنا بخلي أحمد والا سهيل يوصلوني عقب حارب: على كيفج تتحرين.. خلاص يعني بروحج قررتي .. سارة: وشو فيها يعني.. وبعدين أنا هب قاعدة في بيت غريب والا نسيت يعني ان هذا بيتي.. حارب: خمس دقايق وبكون عند الباب.. خليج انتي وأمايا جاهزت.. وما عطاها فرصة ترد عليه وسكر في ويهها.. |
قعدت سارة تتحرطم.. هذا شو يتحرى نفسه.. على باله بيفرض كلمته عليه.. بس والله ما ظهرت.. ظهرت سارة الصالة وخبرت ظبية أن حارب بعد شوي بيي.. وشوي يسمعون صوت سيارة برع.. شيما: هذا صوت دريولنا.. سارة: وين توه الناس قعدي.. شيما: لا وين توا الناس وايد تأخرت.. سارة: خلاص ما علي.. ومشكورة ع الزيارة.. عاد لا تقطعينا.. شيما وهي تبتسم: إن شاء الله أم سهيل: سلمي على أمج حبيبتي.. شيما: يبلغ إن شاء الله وعقب ما سلمت عليهم كلهم وعقب ظهرت وياها سارة عسب توصلها عند الباب.. |
وهم ظاهرات ظهر سهيل في ويههن.. شيما على طول تغشت.. بعد ما طاحت عيونها في عيون سهيل وقعدت ترجف سهيل: شحالكم؟؟ سارة:بخير سهيل: ومنو رمسج انتي؟ سارة: نعم؟ يعني ترمس منو؟ شيما اللي كانت في هاللحظة تتمنى تظهر بأسرع وقت ممكن سهيل ويصد صوب شيما: ارمسها هي.. آسف أختيه>>>>>>>>> قالها وفي قلبه يقول: تخسين تكونين أختي.. إن شاء الله بتكونين حليلتي شيما وبكل رقةوهي ميته من المستحى: لا ما عليك أخوي سهيل وفي خاطره.. أخوي فعينج.. سارة: يلا سهيل فارج.. الدريول واقف برع.. وساروا عنه قبل ما يرد عليهم.. وخلوا سهيل يتحرطم.... عقب ما روحت شيما دق حارب على موبايل سارة.. |
| الساعة الآن 03:35 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir