|
ناصر: ههههههههههه ويا راسك ليش هي واحت لي احس بشي؟!...ماسكتني هزاب وتشتّييير وصدمات...! يوسف: خل عنك نااااااااصر....اعترف... ناصر: يوم بيكون شي يستاهل اني اعترف به بقووولك لا تضغط عليه انا احين مب في مزاج حب ان افي مزاج تصليح الوضع... يوسف: بيتصلح ان شاء الله....روح روح لاطعنها من الصبح في السياره... ناصر: والله مادري منو يالس يسولف..! يوسف: جان ماتحصلها شردت..!! شهق ناصر...وسكت.... كانه توه افتكر في امكانية حدوث هالشي... ناصر: برايك برايك... هني انا ماتحملت بغيت اموووووووووت من الضحك....حتى ناصر ماترياني لين ما اسلم عليه بشكل زين لاني كنت اضحك بشكل .. وهو مستعيل سكر فويهي عشان يشوف مهرة شردت او لا...! حليلك ياناصر.. الله يعينه صراحه على هالحرب... صعب الواحد يتصور ان نااااااصر...بكل فخره بنفسه وكبرياءه وشخصيته يوقف عاجز جدام انسانه ضئيله مثل مهرة..!!... قعدت افكر شوي بحالهم وانا بالي مشغول عليه...فكرت اتدخل في المووضوع واحاول اكلم مهرة يمكن تستحي مني وتسمع..!! لكن على طول صرفت هالفكره من بالي.. ناصر بنفسه بيتصرف معاها... ومابتغلبه بنت.. حسب ماقال لي...عنده تاريخ حافل في جذب البنات..لكن اللي صاير هني ان مهرة مب مثل باقي البنات...وغيره..مهرة هي البنت اللي غلط معاها وكان بيدمر حياتها..!!..اكيد الوضع بيكون مختلف... بعد شوي رديت اضحك على ردة فعله في اخر المكالمه... ياترى شردت؟! مسكت تيلفوني وطرشت له مسج..." هااه حصلتها؟!"... رد علي بعد شويه.... " الله ستر يابوك".. ضحكت وحطيت تيلفوني عالمسند ماله وحركت سيارتي لبيت خالد... -------------------------------------- اليوم: الجمعه.. المكان: سيارة ناصر.. الوقت: السابعه والنصف مساءا.. -------------------------------------- (مهرة)... من الارهاق النفسي والفكري كنت مسنده راسي على ورا ومغمضه عيني .... شبه راقده... مستانسه بهاللحظات اللي ناصر كان فيها بعيد عني .... اففف ياربي كيف ماطيق قربه...ماطيق حركاته....ماطيق صوته ولا نظراته لي...ولا حتى ريحه عطره اللي دوم فايحه....اففففففففف... متى بتخلص من هالشي؟!.. ليش ما اخبر اهلي بالي صار؟... معقوله مابيساندون بنتهم؟!..معقوله بيرضون لي هالعذاب؟!... ياربي شو اسوي.؟!.. معقوله اسكت واتحمل لين مايطلقني ناصر؟!... لكنه قال ماشي طلاق..!! شو بسوي اذا ماطاع يطلقني صدق..؟!.. لا.. غصبن عنه بيطلق...غصبن عنه... انفتح الباب فجاه ودخل حظرته مثل العاصفه..وسكر الباب بالقو وهو يطالعني ويتنفس بعمق... اطالعته انا باحتقار.. مهرة: ماتروم تسكر الباب شوي شوي ..!!.. التفت ناصر عني وشغل السياره..وريوس بها....ابتعدت عنه قدر الامكان لانه حط ايده ورا ظهر الكرسي اللي انا قاعده عليه في الوقت اللي كان فيه ملتفت عشان يشوف الطريق وراه و يتراجع بالسياره..!!.. ويوم دخلنا الشارع رجع ليلسته الاوليه.. ناصر: ماحصلت فلم زين نطالعه... مهرة: ادري... التفت لي ناصر مستغرب.. ناصر: شو دراج؟ مهرة: كل الافلام اللي بشوفها وياك تلوع بالجبد... صد عني ناصر كانه مب مفتكر باللي اقوله ولا مبين عليه العصبية او شي... قهرني..يابروده...كم الواحد بيقول يعني عشان هالناصر هذا يطلع من طوره؟! ناصر: وين تبينا نسير؟ مهرة: جهنم..! صدر من ناصر صوت تافف...وسكت عني..لكني سمعته يقول بصوت واطي "استغفر الله"... تم ساكت عني دقايق.... وانا اطالع الناس من الدريشه.... كلن لاهي بحياته...ياحظهم.. بادلووني... حتى لو صرت بتاني اشتغل في الشارع والشمس تحرقني.. برضى بحياتي ولا اني اعيش مع ناصر... لكن للاسف كلها تمنيات مستحيله... خلاص علقت مع ناصر... اصلا انا عالقه معاه من يوم فتحت له الباب فبيتنا وصار اللي صار..... والله يعيني على حياتي اللي بعيشها معاه لين يطفر مني ويطلقني... مشكلتي اني مب شاطره في خلق المشاكل...تعودت دايما اني اسكت... وخوافه وجبانه... لازم اتغير...لازم على كل شي اسوي مشكله..لازم... وقف ناصر في مكان معين ...انا من انشغال افكاري ما اهتميت اطالع وين وقف...وليش؟.. ناصر: تبين شي معين؟!.. وماصدقته يسالني هالسؤال... مهرة: ابا الطلاق... ناصر: طلاق؟؟.. ماسمعت ان باسكن روبنز يبيع ايسكريم اسمه طلاق...!!..عالعموم بييبلج على ذوقي... نزل ناصر من السياره تتبعه نظراتي الحقوده.... ياكرهك....!.. ينكت بعد..! دخل محل الايسكريم...وانا ماقدرت الا اني انتبه ان ناصر نسى تيلفونه في السياره... تميت اطالعه بتردد...ورغبه كبيره اني امسكه واتصل باي رقم اعرفه لاهلي... وفعلا... مسكت التيلفون... ايدي ترجف... تناقزت الارقام جدام عيني...رقم سيف...رقم مبارك...رقم سهيل..رقم عمووه.. بمنو اتصل اول؟.. لكني نقزت هب نقزه يوم صاح تيلفونه وهو في ايدي... ومن خوفي طاح التيلفون عند ريولي... وتم يصيح يصيح لين ماحصلت التيلفون وشليته لكنه سكت... لاحظت ان مكتوب عالشاشه" الغاليه" يتصل بك... وعقب ماسكت التيلفون اختفى الاسم وحل مكانه مكالمة لم يرد عليها ومادري اشوو.. ياترى منو الغاليه..!!!. اكيد وحده من ربيعاته.... منو هالاهبل عاد اللي يصدق ان واحد مثل هذا يتغير؟!.. فزيت مره ثانيه يوم انفتح الباب ودخل ناصر... صرخت فويهه من قهري عليه ومن حبيبته اللي اتصلت وماخلت لي فرصه اتصل باهلي...!! مهرة: ماتعرف تفج الباب شوي شوي كل ساعه تفززني... اطالعني ناصر مستغرب... ناصر: اذيتينا تراج...افج الباب عادي انا الا انتي مادري وين عقلج... حط في ثباني كيسه الاسكريم...وعقب رفع عينه يطالع تيلفونه في ايدي... واللي خلاني اندهش صدق.. انه ماسوا شي.. توقعته يسحب التيلفون مني... يسالني ليش ماسكتنه...أي شي... لكنه ماقال شي من هذا كله... انقهرت...كان لازم يقول شي...ليش سكت؟!.. بديت انا بالهجوم عشان اسوي لي مشكله... مهرة: حد اتصل بك... ناصر: منوه؟ مهرة: مكتوب الغاليه.... قلتها بسخرية...وانا اراقب ملامح ويهه الكريهه على نفسي... اللي شفته هي ابتسامه خفيفه عادية... ناصر: جان رديتي عليها... مهرة: تباني اسولف ويا حبيباتك بعد... ناصر: عاد هذي مب أي حبيبه...هذي اللي مالي غنا عنها لو اشوو.. ارتفع القهر في نفسي.... ياشينه هو وربيعاته.... يعله النفاد هو وهن وياه... مهرة: وليش ماخذتها دامك متعلق بها لهالدرجه ليش بليتني فيك؟ ضحك ناصر... ناصر: "الغاليه" هذي امي ... (والتفت لي بنظره تحمل معنى وكمل)...يالغاليه...! حسيت ببركان يغلي في داخلي على وشك انه ينفجر... فريت عليه التيلفون بقهر..والاسكريم حطيته عدالي...حرام نعمه...!...والتفت صوب الدريشه... ناصر كان يمشي في الشوارع وانا ماعرفه وين ساير ولا سالته ولا همني.. الحال الزفت هو واحد دامني معاه... بعد شوي وقفنا فمكان مظلم تقريبا...تلفت حواليه...ماكان سيايير عدالنا والانوار الخاصه بالبنايات بعيده شوي... مهرة: وين نحن؟ ناصر: البحر... هذا مكان منعزل عدال الجسر وحلوو...انزلي.. نزلت بدون حاسية.... مب طاعة لاوامره...لكني من زمان ماشفت البحر.....واشتقت له...وانا بحاجه لمهدئ... ناقص بس هذا السبال يخوز عن دربي وبستوي بخير... عقيت نعالي في السياره ونزلت وانا اشل عباتي فووق... واتقدم مثل المسحوره تجاه البحر... توني بغط ريولي الا وبصوت ناصر... ناصر: هاااه هاااه....عيني خير لا تغططين... مهرة: افففف شو بعد ...مالك خص فيني مابخيس سيارتك... ناصر: تفداج السياره وراعيها يامهرة لكن مابغيتج تخيسين ثيابج لانه عقبها بنسير المطعم نتعشى... مهرة: لاازم.؟؟.. نفدني الشقة والا أي مكان وانته روح تعشى بروحك... تقرب مني ناصر وفي ايده كوب الاسكريم مالي... ناصر: كلي اسكريمج احلى يوم بارد... مسكته بدون حاسيه وانااراقبه مقهوره...ناصر ابتعد عني وراح قعد بعيد.... فكني من وجوده.... اما انا تراجعت بحزن عن البحر....كان خاطري العب فيه مثل يوم كنت صغيره...مثل هذيج الرحلة اللي سرناها فحياة امايه.... وايد كانت حلوه الرحلة هذيج رغم اني صغيره وايد كنت لكني اذكر... يلست عالتراب...اكل الاسكريم...واراقب البحر بحزن... برودة الاسكريم ساعدتني شوي اني اهدا....بالاضافه على بعد ناصر عني ... بعد ثلث ساعه يمكن رجع لي... ناصر: يالله نسير... خلاني وركب السياره يترياني هناك.... كنت افضل اعق عمري بحر...ولا اركب معاه... لكن الجبن لاحقني لاحقني...وماقدر اسوي جي... قمت ونفظت كندورتي وعباتي عن التراب...ورجعت بتكاسل صوب السياره اودع بعيني البحر اللي ماتهنيت فيه... ركبت وانا اتنهد... ناصر: بردج عقب مانتعشى جان في خاطرج تتغططين... مهرة: هيه ابااا.... قلتها باندفاع انا الهبله..لكني بسرعه تراجعت.. وصديت عنه الصوب الثاني.. مهرة: والا اقول لا...ماريد اسير وياك مكان ...ابا ارد البيت... طولنا عالسكوت....ناصر ماحرك السياره...ماعرف شو يتريا... الفضول خلاني اصد صوبه اشوفه شوييسوي... لكني حصلته مبتسم بوناسه...ويطالعني... ناصر: شكرا مهره... عقدت حياتي... شفيه هذا بعد..!! مهرة: على شو؟ شغل ناصر السياره ورد صد صوبي..وقال ببساطه... ناصر: على كلمة "البيت".... غمضت عيني بحزن وصديت الصوب الثاني..مجبوره اعتبره بيتي لو بشكل مؤقت...لين ماتنتهي هالازمه... --------------------------------- اليوم: الجمعه.. المكان: بيت بو راشد.. الوقت: الثامنة والنصف مسااء.. --------------------------------- (راشد)... ركبت قسمي الفوقي وانا قافط ويهي...ماكنت ادري انه شي حريم عند امايه تحت...ومنى ماخبرتني بالعاده تخبرني اذا شي حريم... يمكن هي اروحها ماتدري... ركبت فوق حصلت منى مبوزه..ويالسه اطالع التلفزيون في الصاله... شعور البهجة اللي يتملكني كل ماشوف منى صار شعور ملازم لي واعتبره جزء مني... ابتسمت على شكلها.. شفيها مبرطمه جي...!!! راشد: السلام عليهم الحلوين.. ييت ويلست عدالنا اطالع فويهها..اما هي اعتدلت في قعدتها شوي وردت السلام علي وسكتت.. راشد: شفيج منى.؟ طنشتني منى وسالتني سؤال ماله خص... منى: صلحت سيارتك؟!..شو كان خربان فيها؟!.. راشد: منى..!! التفتت لي اطالعني بكسل... راشد: شفيج غناتي ؟..حد مزعلنج... منى: لا بس احس بخمول وكسل... وللاثبات انسدحت اكثر عالكرسي... راشد: من شو انزين...؟ منى: مادري راشد.. شو رايك اوقف هالكورس..؟! مديت ايدي وفريت سفرتي عالكرسي...وعدلت قعدتي والتفت بكبري لمنى... راشد: شو السبب؟..المواد صعبه؟ منى: لا ...بس من بدت الجامعه وانا احس بتعب بس ابا ارقد ..ماريد اسوي شي احس بخمول... راشد: منى تراج بديتي تخوفيني.. تصنعت منى ابتسامه وحطت ايدها على ايدي وضغطت عليها... منى: انا بخير بس دلوعه بزياده ماعليك مني... راشد: اكيد..؟!.. منى: اكيد ... رديت لها ابتسامتها وقمت دخلت مطبخنا الصغير وصبيت لعمري عصير....ورديت اطلع عندها...تساندت عباب المطبخ وعيني عندها اراقبها..... منى يوم اكون عندها تكون زينه...لكن يوم اسير عنها تيها هالحاله... وفعلاامايه خبرتني انه منى ماتنزل وايد عندها.. وهالشي ظايقني... لانه منى (من بعد امايه) صارت صاحبة البيت...ولازم تنزل وتقعد مع امي وتقوم بالواجب... ليش يعني يوم تسير عند اهلها زياره تكون بخير..ويوم ترد بيتنا تيها حالة الخمول هذي..!!!! الشي الوحيد اللي مخلني ساكت ومب مفاتحنها بالموضوع هذا هو اني اظن انها بعدها ما تاقلمت... تقربت منها وانا اقول... راشد: امايه عندها حريم تحت...!! حاست منى بوزها.. وسوت حركه بايدها ماعيبتني... منى: هذيلا دوم اين... عقدت انا حياتي... راشد: مايعيبنج.؟!.. منى: مب جي السالفه... لكنهن كل يومين ثلاثه اين الصبح..واين حزة ما انا اطلع للجامعه اسلم عليهن واروح... يتمن يطالعني بنظرات ماتريحني... يلست عالكرسي المجابل وانا اتنهد... راشد: منى هذيلا مثل خالاتي... كلهن ياراتنا..وعيالهن ربعي... صح بعدني استحي منهن لكنهن مب غريبات عنا .... منى: يمكن كانن يبنك تاخذ بنت وحده منهن عشان جي مب عايبتنهن انا... راشد: لاحول ولا قوة الا بالله...احين شو هالرمسه منى...انتي بس حساسه زياده عن اللزوم... منى: احين ليش هالحشره راشد؟؟؟؟ راشد: الحشره هذي لانه مب زين عليج الحريم متيمعات تحت وانتي منخشه فوق... منى: ماحب اجابل الحريم... من استويت انا متعوده اسلم واروح ... راشد: هذاك وانتي بنت...بس منى انتي حرمه الحين..وراعية بيت...وانا ماحب حد يرمس عليج بشي... اذا امي محد شو بتسوين بتسلمين عليهن وبتردين تنخشين وبتخلينهن رواحهن؟... منى: واحين عموووه عندهن وين المشكله..!!. راشد: افففف كيفج لا تقولين مانصحتج... منى: احين انته يعني ماتباني اقعد وياك؟ اوكي خلاص اللي تباه... فزت منى من كرسيها ودخلت الحجره بسرعه...دقيقتين وهي طالعه لابسه شيلتها وشكلها معصبه.. وانا اراقبها باستغراب... ياربي كيف تفهم غلط..!! احين انا انصحها واخر شي تتحسبني ابا استفرد بالقسم اروحي؟!... اتم اروحي شو اسوي بالله؟ ارقص؟؟! راشد: منى...!!.. منىىىىى..!! ولا عبرتني... نزلت تحت ورقعت بالباب وراها....وخلتني اروحي... احين بويهها المعصب هذا وين بتروح اجابل الناس...!!!... وانا اصلا شو قلت لها عشان تعصب جذي... منى صايره وايد حساسه.... من يوم ملجنا وهي تحسس من دفاشتي شوي... انا قلت بتتعود بس ماشي منّه... حطيت عصيري عالطاوله وسكرت التلفزيون...دخلت الحمام اتسبح لاني ماناوي اطلع من البيت الليله...! خلصت سبوحي ورديت الصاله.... من دون شعور مني وبدون ماعرف السبب...بديت افكر بناصر ومهرة... ابتسمت.. احسهم مايتناسبون...لكن محد يعلم.... اللي ابا اعرفه.... كيف مهرة بتتعامل مع ناصر؟!. لين احين محد يدري بالكلام اللي سمعتني اياه مهرة عشان تبعدني عنها... صرخت فويهي وقالت لي انها تكره الرياييل...! كيف بتتعامل ويا ناصر عيل؟ وشيفه ناصر مب هيّن..... ومنى ماقالت لي شي عنهم...شكلها ماوصلها خبر او محد اتصلبهم....عقب الخيانه اللي نقعها ناصر اليوم... عيل الجماعه مزهبين غدياتهم وهو يشل مهرة الفجر ويشلها بوظبي؟!...ويعطيهم اكبر طااااف... مب زين عليه..عيب اصلا... طنشت التفكير فيهم... شو ابغي فيهم انا .... خلهم يولوون...! يلست نص ساعه اطالع التلفزيون... عقبها انفتح الباب ودخلت منى.... مشت سييييييييييييييدا سايره صوب الحجره ولابستني... راشد: هاااي انتي...! وقفت منى وتاففت...ولا التفتت لي... راشد: تعالي هني... منى: شو راشد؟ بروح ابدل ثيابي وبرقد... راشد: قلت لج تعالي هني... يت منى من دون خاطر ويلست عالكرسي اللي عدالي.... راشد: انتي ماتخبريني شو سالفتج؟... في حرمه سنعه يزقرها ريلها اطنشه وتروح وترقع بالباب وراها؟ زعيجي وصل تحت عنبوو.... منى: بعد انا احين استويت حرمه مب سنعه...قول بعد قول اني مب مربايه... سكت... استهديت بالله فنفسي... راشد: منى انا واحد ماحب المشاكل اوكي...لكن طريقه تعاملج ويانا هاليومين مب عاجبتني...اذا شايفه شي علينا قوليلي من احين... منى: راشد؟ انته شو قاعد تقوول..شو بشوف فيكم يعني..!!... راشد: ماتشوفين عمرج منى... لا تقعدين عند اهلي..ولا تحبين اللي يزورونا....ودومج متنكده...لكن سبحان الله يوم تسيرين عند اهلج كيف ينجلب حالج... منى: شو قصدك يعني... راشد: قصدي واضح... منى ..انتي مب مرتاحه عندنا؟؟؟ منى: حرام عليك راشد... ليش تقول هالرمسه... انا ماينجلب حالي مثل ماتقول يوم اسير عند اهلي..انا اتظاهر عندهم بس باني مستانسه... عشان مايسوون لي تحقيق... كلامها صدمني.... لدرجه اني بدون ماحس قمت من كرسيه وتميت واقف... راشد: منى...يعني انتي.... انتي مب مستانسه وياي؟؟؟ تنهدت منى... منى: لا راشد مب جي السالفه...والله انا مستانسه وياكم واعدكم اهلي ...بس مادري شوفيني دايما كسلانه دايما مالي مزاج وهذا مايخصه فيكم....انا احس بضعف... لكني ماصدقت....تميت اطالعها بتشكك... تقربت منها ومسكتها من كتوفها... راشد: منى قولي الصدق.... منى: اقول شو.. راشد: انتي مرتاحه معاي؟.. تمت منى اطالعني بتمعن واستغراب... منى: راشد... انا احبك....شو هالافكار اللي فراسك عني..اكيد اني مستانسه وياك ومرتاحه... تنهدت براحه وفجيتها ويلست عالكرسي... راشد: زيغتيني يامنى... عيل شووو فيج جذي؟!!... يلست منى عدالي... منى: مافيني شي راشد...كل السالفه اني مالي مزاج...خلني اوقف دراسه... راشد: احين كل هذا من الدراسه...؟!! منى: لا... بس بهالنفسية ماقدر ادرس.. راشد: عادي توقفين كورسين ورا بعض صح؟ منى: هي عادي انا سالت.... راشد: ان وقفتي بتوقف بنت عمج بعد... منى: لا انا اقنعتها انها ماتوقف..كنه لازم تخلص دراستها عشان تتفرغ لعرسها عقب... راشد: منى حالتج مااطمن... انا باجر باخذ اجازه وبوديج المستشفى.... منى: لالالالا ماله داعي عنبووو... راشد: اووص... ولا تناقشيني في السالفه... الحريم بعدهن تحت؟ منى: لا..سارن... راشد: عيل يالله بننزل نتعشى انا يوعان.. منى: ماشتهي... راشد: حلفي انتي بس؟؟!!... قومي قومي... مسكت منى من ايدها وسحبتها وراي ونزلنا تحت... ال****ه شكلها الا من قل الاكل صحتها مب شي جذي....باجر بوديها وبنطمن عليها... لكن اهم شي اني اطمنت انها مستانسه معاي... ------------------------------------------ اليوم: الجمعه.. المكان: بحر ابوظبي.... الوقت: العاشرة مساءا... ------------------------------------------ (ناصر)... كنت يالس عالرمل واتبسم بسعاده وانا اراقب مهرة.. تركظ شرق غرب في البحر والماي يطاير حواليها... وكل ماتيها مويه كبيره صرخت وظحكت... كانت بالضبط...ناسيه وجودي تماما... وهالشي ساعدها انها تظحك وتخفف عن نفسها شوي... صارلنا نص ساعه هني وبعدها ماتعبت من اللعب.... ياربي كيف استاثمت في هالياهل؟!... شو من القلب عندي انا... قعدت اتذكر كيف وقف قلبي يوم شفت مهرة ماسكه تيلفوني....لكني حبيت امي بشكل يوم عرفت انها هي كانت متصله.... مساله وقت بس لين ماتتشجع مهرة وتسرق تيلفوني مره ثانيه... عندي هالاسبوع بس اقنعها بالمحاوله انها تعيش معاي وتنسى...هالاسبوع بس... احسه وقت ظيق وايد.. رفعت راسي اطالع مهرة... كانت تفحص شي من الحصى او المحار..مادري..ماشوفها في الليل عدل...ولا هي تشوفني زين... وهالشي احسن.... احسن لها طبعا... نشيت ورحت صوب السياره وتوجهت صوب الدبة...شنطتي الخاصه بالرياضه مموجوده هناك وفيها فوطه... طلعتها ويبتها معاي... الوقت تاخر ولازم نرد الشقة...البيت على قولتها... يالله شكثر استانست يوم قالتها بدون احساس.... دام قالتها بدون قصد معناته هالشي موجود فعلا في نفسها.. وبانها فعلا تعتبر الشقة بيتها الحين.... معقول؟!.. والا انا اونس عمري عالفاظي..!!! بغيت ازقرها ... لكني عرفت اني بهالتصرف بنهي وناستها.... بس عنبو بسها تخرست بكبرها.... والعباة مفروره عالسياره من جدام...لكن كندورتها خاست كامله لين خصرها... كيف بتنزل هذي؟...ناسيه انه نحن ساكنين في شقة ولازم انه نخطف على ناس لين مانوصل شقتنا؟... ناصر: مهرة..!!.. التفتت لي مهرة والابتسامه على ويهها لكنها اختفت على طول بعدها... ماعليه..هالشي متوقع... ناصر: يالله مهرة بسج... مهرة: خلني وسير عني... ناصر: بيسرقونج الشباب .... سمعت شهقة مهرة من هني...وهي اطالعني بعيون مفتوحه... اخفيت ابتسامتي... تخويفها دايما ينفع...!.. خوافه البنت.. طلعت مهرة من البحر....وهي شاله كندورتها فوق.. ريولها كلها خايسه تراب... مجرد تخيلي ان مهرة بتركب بهالشكل فسيارتي الحبيبه وبتخيسها يخليني اتنهد باسف على سيارتي...لكن ماعليه المغسله موجوده... ناصر: اندوج... فريت عليها الفوطه...وبدال ماقعد اراقبها ركبت السياره اترياها تخلص وتركب... لاني ان تميت اراقبها بطيش فويهي... وبتصارخ...وانا ماريد اخرب مزاجها المستانس باللعب... يالله كيف حسيتها ياهل لاهيه عن الدنيا...!!.. اذا كانت تحب البحر هالكثر كل يوم بيييبها هني عيل... طولت مهرة وهي تنشف كندورتها وريوولها...اخر شي لبست عباتها وشلت الفوطه ونفظتها.... فتحت باب السياره وفرشت الفوطه عالكرسي.. في داخلي شكرتها على هالتصرف جذي خياس السياره بيكون اقل.... ركبت مهرة وسكرت الباب... مهرة: عشان مانخيس سيارتك وتحشرنا بعد... ناصر: مافجيت حلجي بكلمه انا.... حركت السياره وسرنا للشقة...... اول مادخلنا راقبت مهرة وهي تمشي تضحك بسبب كندورتها الخرسانه...وقعدت اضحك عليها... واتذكر تصرفاتها في المطعم... كنت مصرر انه نتعشى في المطعم عشان تاكل...لو يبت لها الاكل هني بترفض الاكل... لكن هناك عالاقل استحت تسوي فظيحه وكلت الحمد لله... الظاهر الماكولات البحرية عيبتها... على طول مهرة طارت لغرفتها وقفلت الباب وراها... سرت الغرفه وراها.... ناصر: بترقدين؟؟... صرخت مهرة من ورا الباب... مهرة: هيه بردانه عندك مانع؟! ناصر: تصبحين على خير... ابتعدت عن الباب ورحت غرفتي... بردانه..!!.. لازم بتبردين متغططه في البحر لين ماقلتي بس.... ولا حتى قالت شكرا عالطلعه.... دخلت حجرتي وتذكرت فجاه امايه اللي اتصلت... قمت اتصلت بها وكلمتها..والفت لها علوم عني وعن مهرة على اساس انه مستانسين... عقب سكرت عنها ورقدت انا بعد... ------------------------------------------ اليوم: الجمعه... المكان: بيت خلفان.. الوقت: الحادية عشره مساءا.. ------------------------------------------ (سهيل)... هذي ثالث مره اشيك فيها على تيلفوني... ولا اتصال من ناصر غير اتصاله الظهر.... متى حظرة العروس بتقرر تتصلبنا واطمنا؟؟؟ نزلت تحت شفت عمتي يالسه مع عفرا وشيخه... سهيل: عمووه ما اتصلت بكم مهرة؟ آمنه: لا والله ما اتصلت... يمكن اتصلت بسيف..سالته؟ سهيل: من العايله كلها بتتصل بسيف؟؟؟ شيخه: سيف اقرب واحد لها يا سهيل... وهالشي ظايقني... كلنا خوانها... شو بعد اقرب وابعد..!!... طلعت من البيت وسرت صوب الميلس... سيف ومبارك كانوا هناك... سهيل: سيف... ما اتصلت بك مهرة.؟!.. عقد سيف حياته.. سيف: لا والله ما اتصلت... سهيل: شو هالحاله... والله لو مب المستحى جان اتصلت بناصر مره ثانيه...بس الوقت متاخر وانا موصنه يخلي مهرة تتصل بي... وقال بقولها... عقيت بعمري عالكرسي وقعدت اتافف... سيف: لو عندها تيلفون بعد جان اتصلنا بها.... مبارك: اتصلت بي انا.... التفتنا كلنا لمبارك وعيوننا مبطله..اطالعنا مبارك شوي وزاغ... عقب ظحك.. مبارك: im just jocking guys.. سيف: اوهو بروك متفيج...عالعموم ماعليك باجر بتصلبه انا وبقوله يخليني اكلمها... سهيل: صدقه ابويه تصرفات ناصر ماتسر الواحد... مبارك: ليش يعني؟... ظنك مابترتاح وياه؟ سهيل: مادريبهم انا ابا اكلمها عشان اشوف نفسيتها كيف.. سيف: ماعليك انا محذرنه بالويل مني ان زعل مهرة... التفت صوب سيف وانا مستغرب.. سهيل: شو قلت ؟ |
سيف: هي بعد شوو... سهيل: متى صار هالكلام؟ سيف: امس..عقب ما طلعت من غرفة مهرة ... سهيل: زادنه الريال شل مهرة وشرد....!!!!... مبارك: هههههههههههههههههههههههههه عنبوووك بو هناد تخوف ثرك... سيف: ههههههههه هي هي انا اخوف...بس تعال سهيل لحظه شو قصدك يعني ؟..زعلها ظنك؟! سهيل: هي نفسيتها ماكانت اوكي....واخاف انه صار شي... سيف: تبالغ تراك...معاريس خلهم عراحتهم مايبون يكلمون حد... سهيل: انا هب مطمن... سيف: شوف...ان تميت تزيغني والله ياطيرله لين بوظبي...بس عاد سهيل... مبارك: هاي ...هدوا اللعب شوي...احين الوقت متاخر عالاتصال..باجر اكيد بتتصل بكم او انتوا اتصلوا..وبتطمنون عليها... سيف: صدقه مبارك.. الصباح رباح...باجر بنتطمن عليها.... ريلاكس... ظحكت بسخرية واطالعت سيف ومبارك... رفعت صبعي السبابه وهزيته جدام ويوههم..وانا بعدني اضحك.. سهيل: هذا تاثيرك يامبارك.... اخونا نص رمسته انغليزي صارت... سيف: ههههههههههههههههههه خلني اتعود باجر بسافر عنكم....بنسى اللغه.. سهيل: قصورك والله... وعلى هالشله تميت يالس وياهم ساعه ثانيه.... وعقب رديت البيت انخمد...ورانا دوام... ------------------------------------------ اليوم: السبت... المكان: شقة ناصر.. الوقت: التاسعه صباحا.. ------------------------------------------ (مهرة).... تجلبت في شبريتي اكثر منزعجه من دق ناصر المتكرر... احين هذا شو يبا ليش مايخليني ارقد... يلست عالشبريه وانا احس بعظامي متكسره... وصوته يوصل لاذني بشكل مزعج.. ناصر: مهرة بطلي الباب تكسر ايدي من كثر مادق....بطلي الباب.. مهرة: اووفففف اوووفففف..شو تبا انا تعبااانه ابا ارقد... ناصر: بطلي الباب.... مهرة: ماااااااااااااارييييييييييييد.... ناصر: قسم بالله ياكسر الباب ترا.... ولاني اعرف انه يسويها بسهوله.... قمت وانااحس بكل عظمه فجسمي تنفصل عن الثانيه... ما اهتميت ساعتها لشكلي.... ما اهتميت لشعري المنتشر حوالي ويهي... ما اهتميت ببجامة نومي اللي لابستنها اللي هي بنطلون وقميص ابيض لها خطوط حمرا لكنها وسيعه وحرير... بس كان همي افتك من دقة المزعج اللي سبب لي الصداع... بطلت الباب واطالعته واقف لي ببجامته البيج...معقد حياته ويطالعني بفضول.من فوق لتحت... مهرة: شفيك؟...بتطيح العماره ولازم نطلع بسرعه؟!.. تنهد ناصر... ناصر: مهرة شفيج؟.. صارلي ساعه ادق عليج ماتسمعين... مهرة: اسمعك بس مطنشه ابا ارقد.. واثباتا على كلامي لفيت ورا ورديت انخش بفراشي وتلحفت لين اذني.. ناصر شاف سكوتي دعوه لدخوله... لكن ملامح ويهه القلقة خلتني اسكت.. ناصر: مهرة شي يعورج؟.. مهرة: عظامي تعورني.... ناصر: وويهج محمر... وبعد ثواني مد ايده...شهقت وفزيت حاولت ابتعد لكن ايده وصلتني على أي حال... لكنها كانت محطوطه على يبهتي بشكل طبيعي... حسيت بايده حاااااره على راسي... حراره بعثت الدفا.... لاني فعلا كنت بردانه... شوي وخوز ناصر ايده عني... ناصر: مهرة...عندي خبر... مهرة: شوو؟ ناصر: انتي محمومه عيوني... مهرة: يعل عيونك الــ.... قاطعني ناصر.. ناصر: هاه هاه...لا تدعين علي عالصبح...قومي كلي شي عشان اعطيج حبة بنادول... مهرة: ماريد..ماريد..مااااااريد... ناصر: بتسمعين الكلام والا اسحبج من قميصج احين..!!..لا اطلعيني عن طوري مهرة... مهرة: انا ماحس بحمى.... ناصر: انا حسيت بها... عنبو شابه ظو بعدج ماتحسين...كل ها من تغطيط امس... ودقتج الهوا ومرضتي زين جذي؟!!.. قومي قومي... تراجع ناصر وسار مكان مادريبه وين سار لاني غمضت عيني ورديت ارقد مستمتعه بالدفا... كل ماتحرك احس بعظامي تنقع... شوي وغطيت برقادي... ولا تهنيت فيه... ناصر: مهرة... شو رقدج قووومي... مهرة: اووفففف بصيح تراني خلني فحالي.... ناصر: صيحي بعدين...قومي... مادريت بعمري الا وانا مسحوبه من ايدي...وطلعني من الدفا اللي كنت متنعمه فيه للبراد المفاجئ... مهرة: ايييييييييييييه فجني.... ناصر: يوم اقولج شي ماتناقشيني فيه... تغسلي... سحبني للحمام وانا حافيه...وحسيت بالبلاط يلسعني ببرودته...تراجعت سيده برا.. مهرة: بارد بارد بارد.... ناصر: ههههههههههه لبسي النعال انزين... مسكني ناصر غصب عشان البس نعال الحمام...لبسته غصبن عني.... وانا فهالحاله ماروم اقاوم شي..او حد.. رغم اني كارهه وجوده ولمسة ايده... بس شو اسوي... تغسلت بالماي الحار...وكان ناصر واقف عند الباب... نشفت ويهي بالفوطه وطلعت وانا اطالع ناصر بنظره حقوده... مهرة: شو بيصيرلك ان خليتني ارقد كنت مرتاحه... ناصر: انتي مريضه...مب مرتاحه... لو تميتي راقده لين باجر بعدج بتمين بعدج تعبانه... يالله جدامي... مهرة: وين بعد؟! ناصر: الريوق يترياج... ودزني جدامه بخفه عشان امشي... ومشيت.... شوي الا وناصر ماسكني من شعري... مهرة: آآآآي شفيك... لكن ناصر خفف مسكته لشعري... ناصر: ليش شعرج وايد حلو جي....من شفته وانا ابا امسكه...سوري عورتج... مهرة: فقدتك يالخسف.... ناصر: هههههههههه حرام عليج انا حلو... مهرة: وع... ناصر: طوفي طوفي... وع اون... مشيت جدامه وانا اتافف ودخلت الصاله.... ومثل كل شي فحياتي كان بالغصب.... تريقت بعد بالغصب... وكلت البنادول بالغصب... مهرة: اقدر اروح ارقد احين؟... ناصر: هيه...نوم العوافي... حست بوزي بظيج... ونشيت عنه.... ناصر: يقولون الله يعافيك...والا ماتعرفين؟. مهرة: انته مانعني من الدعاوي عليك ..والا نسيت؟!.. عن اذنك.. تركته بنظراته المتظايجه ورجعت غرفتي...قفلت الباب ورديت ارقد... تعبانه تعب... ولازم ارتاح...! _ _ _ _ _ _ _ _ _ _ _ _ _ _ اليوم: السبت.. المكان: بيت ام سلطان... الوقت: الثانية عشره ظهرا.. ------------------------------------ (كنه)... ابتسمت بفرح يوم شفت احمد ولد خالووه ياي يسلم على امي... الحمد لله الظاهر احمد يبا يصلح الامور بينه وبين نوره.... نوره اللي في ليله عرس ناصر قفلت على عمرها وقعدت تصيح...صياح مسموع... هذي ماتستحي على ويهها..!.. معرسه وريلها من احسن الرياييل...يشتري رضاها بماي عيونه... تقوم تصيح على واحد غيره؟!.. عالعموم... الظاهر ان نوره ردت لعقلها بعد ماكلمتها امي امس كلام مطول روحهم في غرفة نوره... والحين احمد ياي يشلها... عل وعسى ماترجع نوره لهالخبال وتتظارب ويا احمد مره ثانيه... ترا احمد حشيم لكن الغلط راكب نوره ..هيه اللي ماتنطاق... انا كنت قاعده معاهم في الصالة... يدووه كانت ترتاح بغرفتها..وامايه يالسه.. خواتي يالسات.. حتى مايد يالس.. يتظاهرون بانه ماشي مشاكل صايره بين احمد ونوره... مايد: كنه...سيري زقري اختج خليها تسلم على ريلها.. كنه: ان شاء الله... ركبت فوق ودقيت على نوره الباب...مع اني كارهه اكلمها لكن اوامر مايد لازم تتنفذ... فتحت نوره الباب وهي مش مخلصه مكياج ويهها... نوره: شو تبين؟! تغاضيت عن سوء الاستقبال هذا... كنه: مايد يقولج انزلي سلمي على ريلج... حاست نوره بوزها بسخرية وبانت على ويهها ملامح الغرور مره ثانيه... نوره: هه..!.. ياحليله... ماصدق سوت له امي تيلفون الا ويا ركظ عشان يشلني..؟!.. انقهرت من كلامها عن احمد.... بصراحه...مايرضيني فيه.... كنه: والله ريلج عاقل وحشيم....تزوج عشان يستقر...ماتزوج عشان يلعب شراتج...! بهالكلام... خليتها ورحت عنها.... ورجعت انزل تحت... اراقب احمد وابتسامته الهادية...مسكين... مايستاهل نوره..لكن هذا نصيبه..ومصيبته... مصيبته انه يحبها وماتهون عليه... لكن اخرته بيعرف معدنها البايخ... قعدت مكاني.. ام مايد: وينها اختج؟ كنه: تتعدل حق ريلها ...يه..! بعد ماتبونها تتعدل...؟! ابتسم احمد ونزل راسه... مسكين...هذا اللي يفرحه يكسب فيه اجر...عشان جي بغيت ازيد العيار.. كنه: ترا احمد يستاهل... احمد: هههههههههه يعني؟!!... سكتي لا اخبر عليج ولد عمج... مايد: هي والله لمي ثمج ترا كل شي يوصل لولد العم... فقط ويهي وظحكت.... كنه: يعني الوحده من تنخطب خلاص..!! مايد: هي خلاص تشطبين عالباقي وتخلينه هو بس... كنه: عوذ بالله احمد ريل اختيه حشششى.... ظحك مايد .. مايد: انزين سيري زقريها.. نوره: ماله داعي... نوره وصلت...! التفتنا كلنا لمصدر الصوت... كانت نوره متكشخه ومتعدله وتنزل الدري بدلع واضح... بطرف عيني شفت احمد يقوم وهو يطالعها مشدوه من جمالها... مسكين ياولد خالتي... سلمت نوره على ريلها وقعدت عدال امي... وبعد شوية سوالف... احمد: يالله نوره؟ جاهزه نسير؟ نوره: مابنتغدى هني؟ مايد: اسميكم الا بتغدون...عنبوو يا احمد على شو مستعيل؟! احمد: مب غرب نحن يا مايد ... مايد: والله ماتسيرون بلا غدا لا اله الا الله شو عايلنك.....اخبرك شي قم نسير الميلس.. احمد: شو نسوي في الميلس...؟! مايد: تبا تقعد هني هاااه؟ يالله ماشي ماشي قوووم.... ضحك احمد وقام مع مايد وطلعوا.. توهم واصلين عند الباب الا ونسمع اصوات عايله عند الباب اخر شي اكتشفنا انه خليفه... طب علينا خليفه وسلم على امايه... عقب التفت لي... خليفه: هااااااااااه العروس... كنه: ههههههه تو الناس... خليفه: بتمين عروس لين ماتعرسين وتكملين بعدج سنه بعد العرس... كنه: انته على شو تقردن احين شو تبا... خليفه: افاااااااا..يزايه مسودة الويه...خالوه تشوفينها بنتج تراها ماحد يطيح فحلجها... كنه: ليش حلجي حفره ثره عشان حد يطيح فيه.؟!.. عقد خليفه حياته ومسك مخده فرني بها بقهر وانا اضحك.. خليفه: انا احين مستعيل بروح الميلس والا بقعد الاسنج... خلانا خليفه وطلع من البيت يلحق قوم احمد... رفعت ايدي انا اطالع الساعه... اوفففف...توها 12 ونص... متى بتي 3 ..!.. متواعده مع يوسف نتلاقى عالنت..!.. ------------------------------------ اليوم: السبت... المكان: شقة ناصر.. الوقت: الواحده ظهرا.. ------------------------------------ (ناصر)... فتحت باب الشقة ودخلت وانا شال بايدي كيسه الغدا... كنت اتسائل عن مووضوعين اثنين في بالي...! اولهم واهمهم.. كيف حال مهرة الحين من الحمى... وثانيهم... متى بفتك من مشاوير مشترى الغدا والعشا وتبدا مهرة تتصرف كحرمة بيت وتطبخ هالوجبات؟!!!.. لكن الثاني مب لهالدرجه مستعجل... حاله مهرة اهم بالنسبه لي من بطني... دخلت المطبخ وحطيت الاكل هناك ورديت اطلع منه ساير صوب غرفتها.. عاد والله عيبها دقـّــي او ماعيبها... بتطمن يعني بتطمن... ناصر: مهرة..... (ودقيت اكثر..)...مهرة بطلي الباب... ومثل ماتصورت ...لا جواب.. وتميت واقف عند بابها ادق عليها وازقرها لين ماتوايبت... حشى..نومها ثقيل هالبنت..!!!.. ناصر: مهرة بطلي الباااب... مهرة: ياربي كل شوي ودقيت علي انته مابتخليني ارتاح يعني؟! ناصر: شوووه كل شوي صارلي كم ساعه...(وقعدت احسب الساعات من خليتها لين احين)..اربع ساعاات وانتي راقده وماييتج..!! مهرة: شووووو اربع ساعات مارقدت غير خمس دقايق... ناصر: الحمد لله والشكر...خرفت....بطلي الباب اقولج.... مهرة: مافيني ناصر تعبانه... ناصر: محد قالج تقفلين الباب...فجي... صح كان قلبي يعورني عليها...بس عنادها متعب...على كل شي تقعد تعاندني..وماتعرف تنفذ شي من اول قوول... بعد دقيقه فجت مهرة الباب...ويهها كان تعبان اكثر من قبل... ما اهتمت لوجودي..بطلت الباب وتراجعت على طول لشبريتها وانخشت... تقربت منها وحطيت ايدي على راسها... مافزت مني مثل قبل...باختصار لانها كانت تعبانه من الخاطر..ومغمضه عينها....واذا ماكنت غلطان... الحراره ارتفعت...!!! لا حول ولا قوة الا بالله... يلست عالارض عشان يكون راسي بمستوى نظرها.. وماتحس بالخوف مني يوم تشوفني واقف على راسها... ناصر: مهرة... بطلت مهرة عينها بتعب وهي اطالعني بكسل... ناصر: اوديج العياده؟!.. مهرة: ليش؟ ناصر: مهرة انتي وايد تعبانه... مهرة: في الليل بستوي بخير... ناصر: شو دراج...؟ مهرة: ماريد اطلع مكان اباارقد بس... سكت شوي... ماحبيت اضايقها اكثر... ناصر: على راحتج..ماتشوفين شر...برد بعد شوي... وقفت...ويوم كنت بطلع من الحجره... مهرة: ناصر.. التفت... ناصر: عيونه..! طلعت مني بدون ماحس ومن خاطري... كنت وايد زعلان على حالتها...وايد كاسره خاطري..هي بدون شي تكسر خاطري كيف يوم اشوفها مريضه جي..وتحت رحمة انسان تكرهه..!!! حتى لو كان هالانسان انا... مهرة: هذا اللحاف مايدفيني.. عندك برنوص؟!... ناصر: ماطلبتي شي يامهرة...دقيقه بييبه لج... . وبسرعه طلعت من الحجره ودخلت حجرتي...سحبت برنوصي اللي متعود عليه ومارقد بلاه من شبريتي ووديته لمهرة... راقبتها وهي تتلحف به متنعمه بدفاه...وابتسمت.. ياحظه..! لو تدري انه لحافي شو بتسوي؟!... تراجعت...ومن دون ماتحس مهرة سحبت مفتاح حجرتها من الباب عشان ماتقفل عني..وحطيته بمخباي... ورحت لحجرتي مره ثانيه واتصلت بامايه... وبعد السلامات... ناصر: امايه... مهرة مريضه ومب طايعه تسير العياده... ام محمد: ويدي..!!!..شفييييها بسم الله؟! ناصر: حمى...حرارتها مرتفعه عطيتها الصبح بندول وخليتها ترقد بس الحراره زادت... ام محمد: من شو يتها الحمى؟! ناصر: آآه....امس سرنا البحر...وهي تخرست.. ودقتها الهوا...اصبحت مريضه... ام محمد: لاحول ولا قوة الا بالله تنشاف البنت مافيها صحه...ودها العياده فديتك... ناصر: ماطاعت امايه..مافيها حيل توقف مول....شو اسويبها؟!... ام محمد: خلها تاكل شي... وعقب عطها بعدك بندول وخلها ترقد.... وانته حط لها كمادات بارده تمتص الحراره بتمسي بخير ان شاء الله....ماعليها شر...لا تحاتي... ناصر: احط لها كمادات؟...يمكن ماتخليني..!! ام محمد: شووله ماتخليك انته ريلها وابوي؟!!.. ناصر: هااه؟..لا ماقصد جي...اقصد انها....آآه...هي ماتحب البروده...مابطيع.. ام محمد: ماعليك منها....لمصلحتها هذا... وتم كل شوي قيس حرارتها... عندك انته ميزان حراره؟... بصراحه عندي....لاني شارنه لمايد يوم يكون عندي... لكني تظاهرت بانه ماعندي واحد جدام امايه.... ناصر: لا ماعندي بشتري من الصيدلية واحد يوم بسير اخذ غدا....مشكوره امايه...وان شاء الله تغدي بخير.. ام محمد: ان شاء الله...انا بتصلبك العصر اطمن عليها.. ناصر: تمام..فمان الله امايه... سكرت عن امايه وانا مهموم.... احين كيف اخليها تاكل....وكيف بقدر احط كمادات على راسها بتشوووتني بريلها..!!!.. لاحول ولا قوة... رديت لغرفتها واستندت عالباب اتامل فويهها المحمر.. وشعرها المنثور عالمخده...شوي منه نازل على ويهها... يدينها اللي ماسكه اللحاف ومظمومه لصدرها....مثل اليهال... صديت صوب الجهاز للتحكم بالمكيف المركزي...خليته عالتدفئة بدل التبريد وشغلته عالهادي... الظاهر انها ماعرفت للمكيف عشان جي بردانه وايد.... تقربت من مهرة ويلست عالارض مره ثانيه.... مالي جرأه اقعد عدالها عالشبريه بتتظايق... ناصر: مهرة.... فتحت مهرة عيونها شوي وردت غمضتهن بكسل... ناصر: مهرة...قومي كلي شي.... مهرة: مافيني حيل.. ناصر: عيل بييبلج اياه هني... مهرة: ماشتهي اكل شي ماريد.. ناصر: دخيلج يامهرة انا اللي مافيني حيل اغصبج على شي بعدني...لا تعارضيني هذا كله عشانج..كلي عشان اعطيج بندول وترقدين مره ثانيه... صدرت من مهرة حركه تافف... ناصر: قووومي الله يهديج... قامت مهرة بتعب واضح ودخلت الحمام وهي تترنح وتستند عاليدران...تغسلت...وردت للحجره..سحبت البرنوص وياها ولفته حوالي جسمها ... لو كانت علاقتي بمهرة طبيعيه... جان ظميتها لصدري .... وخففت عنها مافيها... لكن للاسف.... هالمشاعر لازم تصبر شوي... في الصاله حطيت الاكل جدام مهرة وقعدت اشجعها باني اكل معاها.. انا ماكنت مشتهي دامها بهالحال... وهي ماكانت مشتهية بعد بسبب المرض... مهرة: بسني... ناصر: مهرة ماكلتي شي.. مهرة: ماروم ابلع شي... ناصر: انزين صبري... رحت للمكتبه وطلعت حبة بندول وعطيتها مهرة تسرطها... ولدهشتي...مهرة بعد ماسرطت الحبه..بكل بساطه انسدحت عالكرسي اللي قاعده فيه... وهي متلفلفه بلحافي... حطت راسها على مخده صغيره ورفعت ريولها فوق...ورقدت... فديتج ياربي...ليته فيني ولا فيها..... انا غبي بعد شحقه خليتها تتسبح..!! بس كنت ابا وناستها... شفتها مستانسه باللعب وخليتها تلعب... احين هذا كله بسببي... بس ان شاء الله انها بتستوي بخير... قمت وبندت المكيف في الصاله..ورديت اكمل غداي...اكل وجني ما اكل... مااحس بطعم اللي اكله عيني كله على مهرة... اخر شي تخليت عن محاولة الاكل... شليت الاكل ووديته المطبخ... فكرت احط لها كمادات...مثل ماقالت امايه... لكن ادريبها بتظايق مني وبتروح حجرتها.. وانا فرحان باستقرارها هني... برايها مب لازم كمادات ان شاء الله انها بتكون بخير العصر.. فزيت من مكاني يوم سمعت تيلفوني يصيح... على طول طلعته من مخباي ورديت عليه... كان شخص ماتوقعته...."سيف".. طلعت في الممر عشان مازعج مهرة بصوتي.. _________________ ناصر: مرحباا... سيف: هلا والله بالنسيب... ناصر: مرحبتيين سيف...شحالك؟ سيف: بخير وسهاله شحالك انته وشحال بنتنا..؟! ناصر: هههه الحمد لله بخير... احترت..ماعرفت اقوله عن مرض مهرة او لا... بيقولون هذا ويه نحس من خذ بنتنا مرضت عنده...!!! سيف: نحن عاد مابنتشره وايد عليكم لكن متشرهين على مهرة مادقت لنا اطمنا وتسلم علينا....!! ناصر: لا تلومها انشغلت... سيف: مشغوله فيك هااه... ناصر: تباها تنشغل بغيري يعني؟!..اكيد مشغوله وياي.. سيف: هههههههههه انزين..ممكن اكلمها والا ممنوع؟ ناصر: ياريت لو تقدر تكلمها جان والله عطيتك ترمسها...بس بصراحه ياسيف...ان مهرة مريضه ... سيف: شوووووووووووه..؟! بغا يطرر اذني.. يالله مب خوف هذا هالكثر.. سيف: شفيييها؟!!..شو يعورها مهرة؟! ناصر: الله يسلمك امس سرنا البحر...والحبيبه تغططت فيه ودقتها المهب...ومرضت يتها حمى اليوم..واحين تغدت وكلت بندول وانسدحت في الصاله من التعب والله...حتى تعايزت تروح حجرتها... سيف: افااااااااااا..والله زعلتني بهالخبر.... ناصر: ان شاء الله انها بتكون بخير... سيف: انا بييكم...! صدمني.... سيف بايينا هني؟!... الله يستر.. زين مسكت لساني عن انبهه اني انصدمت... ناصر: حياك الله يا سيف متى مابغيت تعال...البيت بيتك.. سيف: والله صدق ناصر مافيها ازعاج؟ انا بطمن على مهرة بس وبرد بيتنا عقب.. ناصر: افا عليك لو تبا تبات بعد بااات قلنالك البيت بيتك... ارمس من باب الواجب مناك انا منصدم... احين شو الراي؟؟!!... اغراضي بغرفه واغراض مهرة بغرفه...!!.. وينشاف انه نحن مانقعد بغرفه وحده... مهرة نفسها مارتبت اغراضها مازالت اغراضها في الشنط..!!! شو الحل؟!.. سيف: عيل خلاص انا بتغدى وبطلع ان شاء الله...والعصر باذن الله بكون واصل... لا تخبر مهرة خلها تتفاجئ.. ضحكت... اكيد بتتفاجئ...بتموت وناسه وبتتشبص فيه وبتخرط كل شي جدام سيف..!!! ناصر: ان شاء الله مابقولها... سيف: تمام...تامرون على شي من هني؟ ناصر: لا سلامتك وسلم عليهم .... سيف: الله يسلمك...فمان الله... سكر سيف من صوب...وانا بعدني من الصدمه حاط التيلفون على اذني... ياريت لو كنت اتخيل كل هذا... آآخ يالقهر... كنت اظن انه عندي عالاقل خمس ايام اتفاهم فيها مع مهرة ونتفق على وضع معين مريح نعيش فيه... لكن الظاهر انه تقلصت هالمده لين يومين وبس... واحين مهرة بتكشف كل شي... مهرة مريضه وماتفكر زين الحين.... بتقول له كل شي... وبشكل سريع... خشيت تيلفوني في مخباي وطيران لحجرة مهرة... صفيت شنطها في مكان معين...وطلعت بعض الملابس وبعض الاغراض نثرتهم عالتواليت بحيث يطلع الوضع طبيعي... ويبت شي من ثيابي وحطيت شي منهن عالكرسي...شي عالشبريه... بوكي والجرج وتيلفوني حطيتهن عطاوله في الحجره... ولعوزت الفراش شوي... ورحت لغرفتي ورتبت اغراضها بحيث تبين انها غرفة ظيوف وبس... كله في وقت قياسي... هذا كله مب مهم... المهم تصرف مهرة جدام سيف.. على أي حال احتمال سيف اصلا مايطلب يشوف الشقه ومايهتم الا بحالة مهرة... كيف بتفاهم مع مهرة؟!.. كيف بطلب منها انها تتظاهر بانها عروس مستانسه..!!... بتخبل من التفكير... بخلي كل شي على الله... في غرفتي طلعت ميزان الحراره مال الاذن...ورحت للصاله... اقيس حراره مهرة... 38... بعدها مرتفعه.... بس اظن انها اهون عن قبل... رتبت الصاله ببطئ وهدوء وانا بالي مشغول... ياربي شو بيصير الله يستر بس...! عند صلاة العصر..صليت في المسيد...وتوني طالع من المسيد اتصل بي سيف... وانا قلبي يدق دق...بس مفوض امري لله... ناصر: مرحبا سيف... سيف: هلا والله ناصر..وين انته؟ ناصر: توني طالع من المسيد...وانته؟ سيف: انا واقف تحت عمارتكم بس ماعرف رقم الشقه... ناصر: احين باييك.. سيف: اترياك.. سكرت عن سيف وانا اتنفس بقوو...وصلت عنده وحصلته مثل ماقال واقف تحت العماره.. سلمت عليه... وبعد السوالف.. سيف: يالله نسير... ماخفت الحراره عنها؟ ناصر: يمكن نزلت درجه وحده...احين بقيس حرارتها بعدني وبنشوف.. ركبنا المصعد.. سيف: هذي حد يخليها تلعب في الماي... ناصر ترا مهرووه مول عالدقه...حد بيعطس عدالها بتلقط المرض...بتتخرس شوي بتيها حمى..موول اقل شي يعورها..انا من سنه الا امزح وياها وسويت لها جذي..(ودزني شوي على ايدي)...هالدزه الخفيفه دربحتها من الدري وانكسرت ايدها..من عقبها ماصحت تمت كل شوي تعورها ايدها وترد تربطها...! ابتسمت وانا اتذكر ذاك الكسر..... يعني سيف المسؤول عنه..؟!... ناصر: الله يعين يابوك مادريتبها انها بتمرض..شفتها مستانسه باللعب خليتها تلعب... سيف: جي ياهل هي تخليها تلعب.. ناصر: يالله اسكت عن تسمع صوتك... حسيت ان قلبي بيطلع من ظلوعي من كثر ماكان يدق... فتحت باب الشقه...ودخلت.. ناصر: حياك تعال...مهرة راقده مثل ماخليتها... دخل سيف الصاله وهو يطالع مهرة بعين حنوونه ...ابتسم.... يلس عدالها عالكرسي وتم يطالعها...حسدته لانه قادر يقعد عدالها بحرية... حط ايده على راسها... واطالعني.. سيف: بعدها حاره ناصر...ياويلي عليها قم بنوديها العياده.. ناصر: ماطاعت...مول ماطاعت مافيها حيل تمشي.. فجاه بطلت مهرة عيونها...يوم سمعت الاصوات وحست بقرب شخص منها... انا هني نسيت حتى اتنفس... ماقدرت اتخيل ردة فعل مهرة... بطلت مهرة عيونها وتاملت فاخوها.. ويوم استوعبت...ابتسمت ابتسامه وسيعه ومدت ايدها... مدت ايدها لسيف..!!!.. مهرة: ســــيــــــف....!!! سيف: هلا والله بالغاليه.. تمسكت مهرة بكتوف سيف.... لوت عليه... هو تم يضحك عليها.... وهي تصيح..!! الله يستر.... الله يستر..!!! بتقوله..ادريبها بتقوله احين بتنبق بالسالفه كلها.... ياربي... استر دخيلك.. ------------------------------- نهاية آلبآرت آلـ [ 45 ! |
البآرت آلـ [ 46 ! ---------------------------- اليوم: السبت.. المكان: شقة ناصر.. الوقت: الرابعه والنصف مساءا.. ----------------------------- (سيف)… ردة فعلي الاولية على احتظان مهرة لي وصياحها كانت الضحك…. لكن بعد مامرت دقيقتين وهي على هالحال ..متشبصه فيني وتصيح… بديت احس انه فيها شي… في النهاية هذي اختي… امي الثانيه… اقرب لي من روحي… واعرفها زين.!.. ماحاولت ابعدها عني دامها شافت حظني مريح لها وماتبا تفج… عقدت حياتي…وصاصرتها… سيف: مهرووه شفيج؟!.. لكن مهرة استمرت بالصياح… التفت لناصر…شفت ويهه غريب… معقد حياته ويطالع مهرة.. ومتظايق… ليش متظايق؟ لايكون يغار الاخ؟!… مادري وانا اشوفه احين حسيت به "متملك"… لكني استهديت بالله وابتسمت لويهه…اشرت له بايدي.. سيف: شفيها؟!… ابتسم ناصر ابتسامه مب صادقة… ناصر: متولهه عليك اكيد.. ابتسمت انا بوناسه…وهالمره ابعدت مهرة عني عشان اطالع فويهها… مهرة كان ويهها محمر… وتعبان..عيونها ذبلانه…يمكن من الحمى…! مسحت دموعها بكم قميصها…. سيف: صدق مهرة متولهه عليه؟!… رفعت مهرة نظرها لي…تاملت فيني وابتسمت… مهرة: ولهانه عليك وايد والله… متى يييت؟! سيف: توني.. خبرني ناصر انج مريضه..وييت اطمن عليج… التفتت مهرة لناصر اطالعه…. وطولت وهي اطالعه… سيف: اييه… التفتت مهرة بسرعه.. مهرة: ها حبيبي… سيف: شفيج تـنـّــحتي بويه ريلج جي..!! مهرة: ماشي… شحاله ابويه..وشحالهم كلهم؟!.. بطرف عيني لاحظت ان ناصر قعد عالكرسي بعد ماكان واقف…وقعد يراقبنا بهدوء.. سيف: كلهم بخير وسهاله ويتخبرون عنج..سهيل امس سوالنا حشره لانج ما اتصلتي… هني ادخل ناصر وقال… ناصر: لاتزيدها سيف قلنالك انشغلت لازم تحرجها يعني..!! ناصر كان مبتسم…لكن يوم التفتت له مهرة مره ثانيه اطالعه… اطالعها هو بعد ..اختفت ابتسامته وعظ على شفايفه وسكت… حسيت ان التوتر والع بينهم….اوكي قلنا معاريس بس مب جي عاد المفروض تكون بينهم شويه الفه… تنهدت مهرة وردت تلتفت لي… حاولت تبتسم …لكني اعرفها زين… ابتسامتها مب من الخاطر…. مهرة: ماعليه السموحه.. ان شاء الله مابقطعكم بتصل كل يوم ..بس مثل ماقال…ناصر..شوي انشغلت… هني ابتسم ناصر وقام…حط ايده على مسند الكرسي ورا ظهر مهرة واطالعني.. ناصر: شو تشرب سيف؟! سيف: لا مشكور ماشي… ناصر: لازم عاد….اييبلك عصير؟ سيف: زين..مشكور.. التفت ناصر لمهرة وقال.. ناصر: اييبلج شي عيوني؟!.. مهرة هني ما التفتت لناصر… لكنها نزلت عيونها لحظنها وهزت راسها بالنفي… انصرف ناصر للمطبخ… اما انا التفت لمهرة..وحطيت ايدي على يبهتها مره ثانيه.. سيف: تبيني اظربج؟…غبية انتي تتسبحين؟!.. ابتسمت مهرة… مهرة: والله لو شفت المكان يا سيف محلاه…من زمان ماشفت البحر..تذكر يوم يودوونا ابويه وامايه؟!!… رجع لي الالم القديم مره ثانيه …كالعاده كل مايذكرون امايه اتالم من ذكراها…. سيف: ما اتذكر… المهم انتي خلي عنج هالسوالف..وقوليلي… رجعت مهرة تنسدح وتسند راسها على مسند الكرسي وراها بتعب… مهرة: شو اقولك؟! سيف: شو شفتي ناصر؟..ارتحتيله؟!… فجاه سمعت صوت ناصر وراي داخل الصاله.. ناصر: تحقق من وراي؟!!.. سيف: هههههههههه مارمت تطول اكثر من جي؟!.. عطاني ناصر العصير وضحك… ناصر: لا ماروم اتوله على حرمتي…. سيف: يالله يالله يا انته…. يلس ناصر عالطاوله اللي جدام الكرسي اللي يالسين عليه انا ومهرة.. واطالعها وابتسم… ناصر: جاوبيه..! اطالعته مهرة بتوتر وردت تطالعني…. سيف: سمعتيه…يالله جاوبي ماعليج منه… مهرة: اوهووو خوزوا عني لاه… وتلحفت اكثر… سيف: هههههه تستحي اونها….المهم… ليش ماطعتي تروحين العياده وياه؟! مهرة: لانه مافيني شي؟ سيف: عيل ليش منسدحه هني؟ تدلعين؟!.. مهرة:………….. سيف: مابتسيرين؟! مهرة: لاا… سيف..اقعد عندنا…دخيلك.. سيف: وييين ابات انتي بعد خبله.. ناصر: صدقها…البيت بيتك وغرفة الضيوف موجوده…جان تبا حجرتنا بعد بنعطيك اياها… ردت مهرة تلتفت لناصر باستغراب.. شفيها هذي كل مايقول كلمه صدت صوبه اطالعه؟..جنها مب مصدقه وجوده لين احين..!!.. اختي مع هالريل امرها غريب..!!… جنهم داسين شي مايبون حد يعرفه… كل اللي اتمناه ان مهرة تكون فعلا مرتاحه مع هالناصر..!… --------------------------------- اليوم: السبت.. المكان: شقة ناصر. الوقت: الخامسة الا خمس دقايق مساءا.. --------------------------------- (مهرة)…. كانت الكلمتين " غرفة الضيوف" وكلمة "حجرتنا"…رسالة واضحه من ناصر لي… باني اذا خليت اخويه يبات عندنا… بيغصبني اتحمله هو في غرفتي ونتظاهر بانه علاقتنا طبيعه..! شوف الخسيس..!!.. نكد علي وناستي بشوفه اخوي… شكثر فرحت يوم شفته….كيف حسيت بانه انقذني… لكن يوم تدخل ناصر وقال اني متولهه عليه لا اكثر ولا اقل..خرب علي كل شي ورجعني من عالم الاحلام اللي طرت صوبه… وطحت في عالم الواقع اللي يفرض علي التمثيل باني مستانسه مع ناصر وماشي صاير بينا..عشان انقذ نفسي من ورطه مستقبليه مثل انهم يغصبوني عليه للتستر عالفظيحه ..!.. عشان جي بس جاريته بكلامه… مع انه صعب علي التمثيل على سيف… لكن اللي خلاني استغرب…انه هو ناصر اللي خبر سيف بمرضي…!!.. كيف يخاطر؟!… ماخاف اني اخبر؟!.. والا واثق لهالدرجه مني؟!… مهما كان بكل تصرفاته كريييه كرييييييييييييه…. اما الحين..لازم انقذ نفسي…مستحيل اخلي ناصر يبات عندي… بالتالي…سيف لازم مايبات عندنا بعد… التفت له وقلت.. مهرة: انته ماتبا تبات؟ سيف: لا بصراحه مب مخطط لهالشي…ولا يايب ثياب…واهم شي ماريد ازعجكم انا بس ييت اشوفج واتطمن عليج…وارد البيت عقب... لا مبيت ولا غيره.. ابتسمت.. مهرة: فديتك والله… انا بخير لا تحاتيني…شوية حراره وبتخوز عالمسا… سيف: وايد واثقه…! ابتسمت له من ورا خاطري..والتفت بعيوني تجاه "زوجي"…. مهرة: ناصر مب مقصر… يعتني بي زين.. ويوم فكرت باللي قلته….ولدهشتي…كان كلامي صحيح…. ناصر سوا اللي يقدر عليه عشان استوي بخير..! بس انا ماريد اهتمامه..افضل المرض والموت على اني اعيش معاه… استغفر الله ياربي…. بس انا طحت فمصيبه ماعرف كيف اطلع منها..!! سيف: ندريبه ناصر مابيقصر…المهم انتي تهتمين بنفسج لانج تعرفين عمرج انج ماتتحملين ومناعتج ظعيفه… اما هو مايدري عنج… مهرة: ان شاء الله بهتم بنفسي… التفت سيف تجاه ناصر.. سيف: لاني ادري انهم بيسالوني عن كل شي بالتفصيل...واعرف انهم بيسالوني كيف شقه ناصر وغيره وغيره.... افضل اني اشوفها احين اذا ماعندك مانع... هني انا توترت.... لكن ابتسامه ناصر الواثقه اكدت لي انه عالج الموضوع بطريقته...وبكتشف بعدين شو سوا.. ناصر: افا عليك ...قم وياي... حط ناصر ايده على كتوف اخوي وشله معاه وهم يتصاصرون بكلام ماسمعته.... اما انا.. انسدحت اكثر وانا احس بتعب... غمضت عيني شوي ورديت فتحتها...على مد بصري..في المكتبه... كان هناك ميزان حراره... غرشة ماي..وكوب وعداله بندول محطوطين...! تنهدت.... ناصر فعلا يحاول يهتم فيني.... ياترى شو وراه.؟ شو يبا مني.؟ الادهى...شو اللي يترياه مني اصلا..!! ليش يهتم فيني وهو يعرف اني ماريد اهتمامه...! ليش مصر اني اتم معاه وهو يعرف زين اني ماريده.. ليش يغصبني؟.. شو يتوقع؟..انه الامور تتصلح بمجرد انه خذني؟!.. هالشي مستحيل يصير مستحييييل.... ما اتخيل نفسي معاه وعلاقتنا عادية... مثل سهيل وشيخه...مثل حمد وعفرا..مثل راشد ومنى... مثل امايه وابويه قبل..!! مستحيل مستحيل....لازم اشل هالفكره من راسي نهائيا...ومهما بين لي اهتمامه...ارفضه... واعامله اسوا معامله اقدر عليها... اللي سواه فيني مب شوي...هالخسيس كان بيظيع شرفي... والبنت بدون شرفها ماتسوى فلس..!!.. بعد دقيقه رجعوا مره ثانيه وهم يتظاحكون...وقف سيف في نص الصاله... سيف: فضحتييينا ياختيه....شو بيقول الريال...ليش مخليه حجرتج جي لايثه؟!!.. تميت ساكته مب عارفه شو اقول... ناصر: برايها ....لا تقول لها شي... سيف: جي ماقولها....ماتعودت هي جي.. حجرتها دوم مرتبه في البيت..... مهرة: يوم بستوي بخير وبقوم.. برتبها ان شاء الله.... يلس سيف عند ريولي... سيف: هيه...خلج حرمه وقد المسؤوليه... مهرة: هاللي قاصر بعد انته توصيينيي...اشرب عصيرك... ظحك سيف وابتسمت انا لمجرد شوفتي له مبتسم.... يالله شكثر احبه هالسيف...لو يصيربه شي بموت... اتمناه دايما يكون تحت نظري واراقبه...لكن هالشي مستحيل مع سيف الهــوّام...! وبطرف عيني شفت ناصر يقعد على كرسي ثاني وحسيت انه يراقبني... لكني طنشته... مهرة: سيف لا تقولهم في البيت انه غرفتي لايثه...تستر عليه... سيف: هههههههههه ولا يهمج.. مهرة: منو يعرف انك ياي عندي؟ سيف: مبارك بس... مبارك..!!... تنهدت للذكرى...ليش ماكان مبارك هو ريلي...؟!...يالله كيف الفرق الواضح بين مبارك وناصر... لو خذت مبارك بكون مستانسه....مب هالعذاب مع ناصر... لكن مب غصبن على مبارك انه يحبني... مبارك تربى في مجتمع غربي...وشي طبيعي انه يشوف قريباته مثل خواته....جذي نظامهم الانجليز... ومحد يقدر يلوم مبارك على طريقه تفكيره وتوجيهه لمشاعره... لكن ناصر..!!.. وبدون ماحس اتجهت عيوني له...كان هو يطالعني بحذر...ويوم شافني اطالعته ابتسم لي... لكني صديت عنه بسرعه وقلت لسيف... مهرة: شو اخباره مبارك؟! سيف: بخير...صح يسلم عليج وايد... مهرة: الله يسلمك وياه من الشر..وخالي؟! سيف: خالج بعد بخير... مهرة: سلم عليهم وايد.. سيف: يوصل... خلص سيف عصير وحطه عالطاوله...وقام.... حسيت انه قلبي قام وياه.. وين ساير؟!.. بيخليني اروحي مره ثانيه؟! المصيبه ماروم اقول له بات.... بضطر اني اتحمل ناصر عندي اذا بات سيف..!! ناصر: ويين بها؟!..تو الناس..!! سيف: والله ماروم اطول عندي كم شغله بخصوص التجهيز للسفر وغيره...وانا من قبل مب مخطط ايي لكن تدري عشان مهرة ييت... مهرة: عنبوو سيف... تعشى ويانا انزين..!! سيف: ويييييييييينج انتي ووين العشا...توها خمس وربع... مهرة: بنجدمه انزين بنخليه فطور بدال عشى... ناصر: هههههههههههههههههههه....اقعد يابوك بتتخبل اختك... سيف: لا اتخبل ولا شي ..ترتاح وتعين خير ..واخر الاسبوع بنشوفها ان شاء الله....والا غيرتوا الترتيب؟ ناصر: لالا بنيكم ان شاء الله ماغيرنا الترتيب... سيف: تمام عيل....تامرينا بشي مهرووه.؟! مهرة: سلامتك....عاد تعالنا دووم مب الا هالمره..!! سيف: من عيوووني توقعيني افاجئج في أي لحظه... مهرة: ياريت والله... سيف: يالله فمان الله... ناصر: بنزل وياك لين تحت... بهالكلام...تميت بروحي في الشقة... لكني ماطولت على هالحال وايد...فريت الفراش بعيد وقمت اترنح لغرفتي...ابا اشوف شو الشي اللي مسونه ناصر وخلى سيف يقتنع بانه نحن ساكنين فغرفه وحده..! ويوم دخلت غرفتي عرفت السالفه... كانت اغراض ناصر منتشره في غرفتي... حسيت باحساس غريب بالخوف والقهر... اغراضه اقتحمت غرفتي...مثل ماهو اقتحم حياتي... من دون علم مني... وغصبن علي...وما اكتشف الا بالنهاية..!!!.. كنت واقفه عدال الشبريه...شفت قميصه الاصفر السبورت..له خطوط كحلية عالجوانب ...! مسكته ورفعته عن شبريتي... كنت بعدني ماسكتنه يوم فاجئني صوت ناصر... كان متساند على بابي...متكتف بكبرياء...ويبتسم... ناصر: واصل جانه عايبنج....مريح في اللبس.. زمّــيت انا شفايفي بغيظ..وعقيت القميص عالارض... مهرة: شل اغراضك من غرفتي.. اعتدل ناصر فوقفته..وتقرب مني... ناصر: تدرين...هذي اصلا غرفتي... ابتسم ناصر لويهي ورفع حواجبه وهو يتريا مني ردة الفعل... رفعت حواجبي انا بعد بقهر... مهرة: so..! قلتها واكتشفت توني بس اني متاثره بمبارك..!!... حتى سيف الفتره الاخيره كان يخلط بالكلام بعد مثل مبارك..! آآآخ يامبارك... رجعني صوت ناصر الحار من المكان العالي اللي كنت فيه.... ناصر: ولا شي....بس اباج تقدرين شوي...انا تنازلت عن غرفتي... وعن دوشقي المفضل...وبادلته بذاك اليابس في غرفة الضيوف اللي ماروم ارقد عليه....نقلت اغراضي كلهن لذاك الكبت الصغير...وكناديري كلهن يحتاجن لكوي لانه الكبت صغير ويتجسفن من تحت... حتى برنوصي عطيتج اياه عسب تدفين به... وفي اشياء وايد ماذكرتها.... ماطلب منج شي غير شويه تقدير عاللي اسويه عشانج... خوفني مظهره المعصب....وطوله اللي يشرف علي.... لكني قويت نفسي.... مهرة: انته احين شو تبا.؟؟! ناصر: تعامليني باحترام عالاقل...مب بهالمعامله الزفته... ابتسمت له بسخرية... لكني من داخلي زايغه منه...واللي يدقق في عيوني يعرف هالشي بسهوله.. مهرة: بعدك ماشفت شي... لكن ابتسامتي اختفت سيده يوم شفت ناصر يرصص عيونه بتهديد...حتى مارمت اسحب نفس... قال لي بهدوء.. ناصر: مهرووه... لا تتحديني... تراني مكبر عقلي وموسع صدري ومتحمل تصرفاتج..لكني مستعد اصغر عقلي واحطه بعقلج .... مهرة: شو يعني بتسوي؟!!.. سالته هالسؤال بخوف وانا اتراجع... ياويلي...شو سويت..تحرشت بوحش..! احين شو بيسوي فيني ^^^^^^^^^^^ اليوم: السبت.. المكان: شقة ناصر.. الوقت:الخامسة واربعون دقيقه... ------------------------------------ (ناصر).... صحيح كنت مقهور من تصرفات مهرة الدلوعه.... وصحيح خالجني بعض الشعور بالفرح والارتياح لتكتمها جدام سيف ومجاراتها لي... لكن اللي حسيت به الحين هو الاستمتاع... كنت مستمتع بتلاعبي بمشاعرها... مستمتع اني اقدر اخوفها متى مابغيت لكن بارادتي ساكت عنها... لاني عرفت الاسلوب اللي المفروض امشيها عليه... البنت هذي يوم تخاف...تسوي أي شي ابغيه... فكل اللي علي اني اخوفها... لكن هل فعلا الخوف اساس جيد لعلاقتنا اللي اطمح لها؟!.. بهالشك البسيط...تراجعت عن افكاري... غلط...تخويف مهرة غلط... صحيح هي بالتخويف تسوي اللي ابغيه... لكن انا اباها تطمن لي انا اكثر من الناس...مب تخاف مني اكثر من الناس..!!!!.. وعشان جي... غيرت ملامحي وابتسمت لها... وشفتها وهي تعقد حياتها مستغربه من تغير مزاجي... مسكت ايد مهرة..حاولت تسحبها لكن كالعاده كنت انا اقوى منها... ناصر: مابسوي شي.... لاني ادريبج ماتقصدين تصرفاتج حاليا... وانج مب من النوع اللي مايحترم الغير...لكن بسبب اللي صار بينا مب عارفه كيف تعامليني... عشان جي تعامليني بجفاف... مهرة: فج ايدي... انا اصلا اكرهك واعني كل كلمه اقولها لك وكل تصرف اتصرفه طالع من خاطري... والود ودي اذبحك... شديت على ايدها اكثر...مثل ماكلامها كان يعور قلبي اضعاف واضعاف... ناصر: ذبحيني انزين مهرة...شو تتريين؟! ذبحيني...ريحيني وارتاحي مني.... مادري شو اللي شافته مهرة فويهي....وفعيوني... لكن ويهها اكتسى ملامح الحزن...وبرطمت وسكتت...حتى ايدها ماقامت تسحبها من ايدي...!! شفت فرده فعلها هذي فرصه... |
تميت ماسك ايدها..ويلست عالشبريه ومهرة كانت واقفه جدامي... ناصر: مهرة انا ادري ان اللي سويته فيج مب شوي.... يوم تهدين...بقولج شو كان فيني يومها وخلاني اسوي جي...انا ماكنت فحالتي... ماكنت افكر...ماكنت احس.... صعب جدا اذا ماكان مستحيل وحده تنسى هالتحرش وتسامح...ادري...لكن يمكن اذا عرفتي الظروف يخف ثقل المشكله هذي شوي... هذا غير اني ريلج احين مهرة... تعرفين شو يعني ريلج؟... يعني انا بالنسبه لج الاهم الحين قبل ابوج قبل خوانج قبل كل اهلج....وانتي بالنسبه لي نفس الشي اذا ماكان اكثر... وبما انج تسترتي على مشكلتنا جدام سيف اليوم.. افهم من هالشي بانج بتتسترين عالمشكله على طول... الطلاق غير وارد مهرة...ماقدر اتخلى عنج خلاص.... وبتم احاول وياج واصبر على كل اللي تسوينه لين ماتتصلح علاقتنا...لو ان شاء الله عشر سنين ...بصبر... مهرة...اطالعيني يوم اكلمج... طول الوقت كانت مهرة منزله عيونها...ويهها حزين ومشرفه عالصياح.... لكن يوم طلبت منها ترفع عينها...نفذت اوامري...لكن ظهر فعيونها لوم لي ماقدرت اتحمله...حسيت اني نذل وحقير.... تغير صوتي من الهدوء للترجي... ونفس الشي عيوني بدت تترجاها عشان تتفهمني شوي.. ناصر: ماطلب منج غير فرصه وحده.... مهرة: انته ماعطيتني أي فرصه... عورني قلبي اكثر من كلامها... ناصر: مهرة... انا فجيتج بالاخير... مهرة: بعد شو؟!... انته لمستني...وحظنتني...كشفت ويهي..وشعري....وفبيتنا..!!!!!... غمضت عيوني وتنهدت... ناصر: انا آسف....آسف مهرة والله اني آسف.... مهرة: شو تفيدني اسف هذي..!!!.. ناصر: خليني اعوضج مهرة...عطيني فرصه... مهرة: اعطيك الفرصه الحين...طلقني...بتعوضني.... وقفت بسرعه وانا ارفض طلبها هذا باصرار.. ناصر: لا.... قلت لج الطلاق غير وارد.... مهرة: عيل تحمل اللي اييك مني... ناصر: بتحمل.. انا مابتعب من الصبر....انتي اللي بتتعبين من المقاومه مهرة... مهرة: مقاومه؟!... ( وظحكت بسخرية)... مقاومه شو..؟!.. ناصر: مقاومه الاهتمام والرعايه والحب اللي اعطيج اياه... هذي مشاعر محد يقدر يرفضها او يقاومها لوقت طويل...مصيرج بترضخين... مهرة: انا ماريد منك شي لا اهتمام ولا رعايه ولا حب...اباك تبتعد عني... باندفاع مفاجئ مديت ايديني ومسكت بهم ويه مهرة.... صحيح خافت وحاولت تبتعد... لكن مب لوقت طويل...لانه كلامي هو اللي خلاها تسكت وتهدا... ناصر: ماقدر ابتعد عنج...ماقدر..خلاص...روحي تعلقت فيج...وكل شي فييني تعلق بج... اذا رحتي عني...بيكون الموت هو مصيري...تفهمين؟... بموت ان خليتيني...مش الحين يامهرة..مش من عقب ماحصلتج مثل ماكنت اتمنى...!.. مرت يمكن دقيقتين...وانا ومهرة نتبادل النظرات على هالحال... حسيتهم جنهم ساعه..... ذبحتني مهرة هذي...غرقتني...وحسيت انها هي بعد ماقدرت تقاوم التامل بعيوني..عشان تعرف اذا انا صادق بكلامي او لا... وانا فعلا كنت صادق... مهرة خلاص انزرعت فيني.... اذا جلعنا هالنبته...تصير التربه بدون فايده...والنبته بعد بدون فايده... ماقدر اخليها....ولا هي تقدر تخليني....حتى لو كانت تقول عكس هالكلام.... لكنها ماتعرف مصلحتها...وباييها يوم وبتعرف.. تركت ويهها ..وتراجعت شوي.. وانا اراقب الصراع الداير على ويهها... فجاه تذكرت ميود...وحسيت اني احتاجه الحين... احتاج لمسكه ايدي على صبعي... والاصوات اللي يصدرها... ابا احس باحتياج شخص لي... ناصر: انا....انا بسير لساعه او ساعه ونص ...مشوار صغير..وعقبها بسير الصاله العب رياضه...بعدها بشتري عشا وبرجع....تامرين بشي؟ تراجعت مهرة لين ماتساندت عالكبت واخر شي هزت راسها بالنفي...كل هذا وعيونها عالارض...مب طايعه ترفعهن واطالع فويهي... ياترى شو يدور فبالها؟!!.... تنهدت.... ناصر: تعالي وياي الصاله عشان افحصج... رفعت مهرة نظرها لي هالمره وهي معصبه...ومستغربه فنفس الوقت... ناصر: افحص حرارتج....حرارتج مب انتي... مهرة: بروحي بفحصها... ناصر: ماتعرفين... يالله جدامي... مهرة: افففففففففففف... بالتافف هذا مشت مهرة جدامي للصاله... هناك فحصت درجه حرارتها... وحصلتها 37,5... نزلت نص درجه.... ناصر: مرت اربع ساعات من خذتي بندول اخر مره؟!.. تاففت مهرة وراحت تنسدح مره ثانيه على كرسيها وتلحفت... مهرة: ماريد بندول لاعت جبدي منه.. ناصر: انزين مابعطيج بندول...بس ارتاحي...الراحه بتنفعج...يوم رقدتي نزلت درجه الحراره ..وان شاء الله باجر بتكونين بخير... طنشتني وماردت علي... حطيت ميزان الحراره في المكتبه وشغلت التلفزيون لمهرة... وحطيت عدالها اجهزة التحكم ... يلست عالطاوله جدام كرسيها وقلت لها... ناصر: مهرة... انا مابقفل الباب عليج ولا بشل المفتاح وراي.... ابا اتعلم اني اثق فيج... مثل ما اباج تتعلمين الثقة فيني... كنت قبل اقفل عليج واروح عشان اظمن انج ماتشردين او شي...لكني هالمره مابقفل.... بس انتي قفلي من بعدي.... ولا تفتحين لحد ماعداي طبعا...وانا واثق من انج عاقل ومابتخلينا نسوي فظيحه مثل اني اكسر الباب مثلا...!! اوكي؟ مهرة:...................... كانت نظراتها لا مباليه....كانها مش مهتمه بكلامي كله ولا تبا تهتم... ناصر: فمان الله... وبعد لا جواب... ياربي متى بتخلص هالحاله....!!! فتحت باب الشقه ولاول مره..ما اقفله من بعدي...ورحت عند مايد...اريح نفسي التعبانه معاه...! ------------------------------------------ اليوم: السبت.. المكان: غرفة يوسف.. الوقت: السادسه والنصف مساءا.. ----------------------------------------- (يوسف).... كنت في سابع نووومه يوم وعاني صياح التيلفون... قلت فخاطري هذا اكيد خالد... مديت ومسكت تيلفوني ورديت عليه من دون ماشوفه.. يوسف: هااااه..!! كان صوتي مليان رقاد...ومالي بارظ... وصلني صوته... ملهوف...ذايب...سايح على بعضه يعني...بكلمه وحده" احــبــــها.."... بطلت عيوني سيده منصدم...شو هالكلام.!! خوزت تيلفوني عن اذني واطالعت الشاشه...ابتسمت ورديت احط التيلفون على اذني.. يوسف: ناصر..!!..شفيك... ناصر: احبها يوسف احبها... يوسف: هههههههههههههه ادري انزين...شو طاري عليك..! ناصر: بتخبلبي.... يوسف: هد اعصابك..قالت لي امي انها مريضه اليوم...شو حالها احين؟ تنهد ناصر... ناصر: اهون شوي...خفت حرارتها... يوسف: سلامتها ماتشوف شر.. ناصر: الله يسلمك... يوسف: واحين خبرني شو صار؟! ـــــــــــــــــــــــــــــــــــــــــــــــــ ناصر: خوها سيف يانا اليوم...عشان يطمن عليها اون..وانا تميت حاط ايدي على قلبي... لكنها ماقالت شي جدامه ياسيف...ماقالت شي... ماتتصور شكثر استانست....صح يطلع منها كلام سممم... بس احسها بدت تتقبلني... عالاقل تسمعني الحين وتنفذ اوامري... يوسف: الحمد لله... اخبار زينه والله...الله يهديها يابوك وتنسى.. ناصر: هيه مستحيل تنسى... اليوم كنت اكلمها بعد ماسار سيف.. قعدت اتعذر لها مره ثانيه واحاول اني اتفاهم وياها.. قلت لها عطيني فرصه اعوضج قالت لي طلقني بتعوضني...بغيت اموت.... ماتخيل انها بعيد عني عقب ماحصلتها... يوسف: لاان شا ءالله الله لا يقوله ..ماعليك بتهدا وبتتفاهم ان شاء الله... انته احين وين؟ ناصر: انا توني طالع عن بيت علي كنت عند ميود... يوسف: هذي ماتسالك وين تسير كل يوم العصر؟! ناصر: ليييييييييييييتها تسال.... ولا مفتكره... يوسف: المهم شحاله ميود؟ ناصر: بخير فديته... باجر بوديه المستشفى عشان يفحصون الحساسية اللي فيه... يوسف: اهااا زين... بس تراك تبالغ بالخوف عالولد... ناصر: لا تلومني يوسف...مايد طايح قاصر....واخاف عليه من أي شي.... بعدين مابيظره اهتمامي... يوسف: واحين انته وين ساير؟ ناصر: بصلي المغرب ماباقي شي عن الاذان...وعقب بسير الصالة العب حديد ورياضه...وعقب برد لها... يوسف: بس ماجنك خليتها وقت طويل بروحها؟!.. ناصر: ماعليها شر..بترقد وبترتاح من صدعتي...الراحه بتفيدها...آآخ بس والله اني احبها يا يوسف... يوسف: قلنالك من زمان انك تحبها... ناصر: شو دراك انته انا مادريت الا اليوم يوم قالت لي ابتعد عني بغيت اتخبل.. يوسف: انته ماتشوف شكلك كيف يكون يوم ترمس عنها... كنت مهووس فيها... تم ناصر ساكت... يوسف: الوو.. ناصر: هاه..وياك.. يوسف: فشو تفكر؟ ناصر: ماشي... يوسف: تفكر فيها؟ ناصر: تصدق... جان مارد البيت... يوسف: ههههههههههههههههههههههههههه شووووه...تولهت عليها عنبووو يا ناصر.. ناصر: مريضه يوسف ماريد اطول عليها وايد... يوسف: لاخلها شويه ترتاح من ويهك وتفكر بروحها بكل اللي صار بينكم...وانته روح فرررغ شحناتك السالبه والموجبه في الرياضه ماوصيك في البوكسنغ... وعقب ارجع لها هادي... ناصر: صدقك والله... بروح اصلي عقب بسير اظارب هناك.. يوسف: هههههههههه اوكي... ناصر: خلاص بخليك احين وانته قم صل هب تنخمد مره ثانيه..... يوسف: بقوم بقوم... خليت فينا رقاد ثرك...! ناصر: احسن...يالله فمان الله.. يوسف: فمان الكريم... سكرت عن ناصر وانا اضحك عليه...مسكين اخويه...حالته عجيبه عقب هالعرس... الله يسخر له مهرة بس ... ويهدي بالها ويصلح مابينهم...مسكين ناصر مايستاهل.... نشيت عن شبريتي ودخلت اتسبح... ويوم طلعت وطاحت عيني عالكمبيوتر....ابتسمت وتذكرت كلامي مع كنوه اليوم.. كيف قهرتني وطلعتني عن طوري وهي تسولف عن فلان وعلان...يالله يالله مسكت نفسي من اني اقولها "حبيت من قبل"... بس عشان اقهرها.... لكن يوم فكرت فيها...صحيح انا حبيت وضحه...بس وضحه ماحشمت هالحب والعشره اللي كان بينا...وصلت لدرجه انها دعت على كنه...وصار اللي صار وسوت كنه حادث...ادري قضاء ومقدر ومكتوب لكن هيه الي دعت عليها....واناعمري مابسامحها على هالشي.. عمري مادعيت على خطيبها.... ليش هي تدعي على خطيبتي؟!... المهم ان وضحه صفحه وانطوت.... وانا اختبرت غيره كنه من قبل علي.... وقالولي انها تمت تصيح بس لمجرد فكره اني اكلم بنت غيرها... وتمت متنكده وزعلانه ومالها مزاج لاي شي... كيف لواغايظها الحين.؟!.. واناخطيبها..!...بتموت عليه بتيها الجلطه...بسم الله عليها..! بصراحه ماتهون عليه...العوزها بالغيره... لكن هي تتفنن معاي بهالسوالف... واللي يساعدني طبيعتي البارده... لكن البارد ان عصب تراه عصب.... ويبالها كنه تعرف هالشي زين... وان كثرت الجرعه تراني بكشر عن انيابي... صليت المغرب... وبدلت ثيابي ونزلت تحت...حصلت ابويه محتشر على امايه... بو محمد: وشحقه اطرشينه انتي؟!! ام محمد: يا سلطان الله يهديك مادريت انك تباه ماخبرتني... بو محمد: احين منو بيودي الدوا... ام محمد: اصبر شويه واحين بايي ..بيخلص شغله وبايي لا تاكلنا.. يوسف: شو فيكم؟!.. صدوا صوبي كلهم وتموا يطالعوني..عقبها قالت امي.. ام محمد: هذووها ولدك طرشه... يوسف: وين وين..؟!. بو محمد: سير ود هالدوا ليدتك...خلص عنها دوا السكر... وامبوني سايرلها الحين...لكن اتصلبي ريال وبيتعشى عندي... ويدتك اليوم ما كلت الدوا وبتتعب... مسكت الكيس واطالعت ابويه... مب عارف شعوري بالضبط... يوسف: هاه؟!.. عقد ابويه حياته وعصب... بو محمد:.. يااه ترا ابوي مايحب الهباله والاستهبال...!!.. يوسف: اودي الدوا الحين؟ ام محمد: يقولك يدتك اليوم ماكلت دوا السكري ... لازم توديلها الدوا تباها تتعب علينا..!! يوسف: همممممممم ان شاء الله... تبون شي بعد؟! ام محمد: سلامتك فديتك وسلم عليهم... يوسف: يوصل... شليت الكيسه وطلعت... احين كيف... متواعد ويا خالد انا... اوهووو... بس ان سرت يمكن اشوف كنوووه.... وافاجئها... وضحكت... لا حلو....بنسير بيت اليدة شو ورانا..واذا على خلوود... خله يكلم حرمته في التيلفون... اللي لين احين ماعرس عليها ومادري متى بيعرس الحبيب... المهم يتسلى عني شوي... في بيت عمي.... شفت عنهم سيارتين مب من سيايير البيت.... افففف..مافييني اخطف عالميلس بسير سيده البيت.. اذا سرت الميلس بيمسكوني... نزلت من السياره ودخلت البيت... يوسف: هووووووووووووود... سمعت صوت ريال يقرب بي...بس هذا مش صوت مايد...!!!... عيل منوه؟!.. توني بدش الا وبخليفه ولد خالتهم فويهي..ومبتسم لي.. هذا شو يسوي هني..؟!... خليفه: مرحبا الساع... يوسف: السلام عليكم.. خليفه: وعليكم السلام والرحمه هلا يوسف... توايهت وياه وتبادلنا السلامات... خليفه: اقــــــــرب.... رفعت حاجب واحد مستنكر تصرفات خليفه...وايد ماخذ راحته....صحيح خالته ساكنه هنيه ...لكن هذا اصلا بيت يدوه... !! يوسف: جريب.. منو داخل.. خليفه: محد غريب...تعال.. تبعت خليفه داخل البيت ...ويوم وصلت الصاله شفت حرمه عمي... عويش ولطوف... وكنه..!!!... شو تسوي حظرتها يالسه وياه؟!!..لا والضحكه مرسومه على ويهها الظاهر كانوا يسولفون ويظحكون... حسيت بنيران تشب في صدري... لكني تصنعت الابتسام... يوسف: السلام عليكم... الكل: وعليكم السلام والرحمه... ام مايد: مرحبتين الساع بيوسف... يوسف: الله يرحب بج على فضله عمتي شحالج؟ كنت واقف بنص الصاله وخليفه وحرمه عمي بعدهم واقفين وياي اما البنات ..وكنه..قعدن... ام مايد: بخير وسهاله شحالك انته وشحال اهل البيت..!! يوسف: كلهم بخير وسهاله ويسلمون عليكم... (والتفت صوب البنات وتجاهلت كنه).. شحالكن يابنات؟ عايشه ولطيفه: بخير وسهاله الحمد لله.... يوسف: يدوه وين؟ ماشوفها وياكم.. ام مايد: منسدحه داخل في حجرتها... عقدت انا حياتي... يوسف: شي يعورها؟! ام مايد: لا الا التعب العادي.. يوسف: انا بسير عندها... ام مايد: البيت بيتك يا يوسف حياك... يوسف: الله يحييج...استريحوا خذوا راحتكم..(والتفتت عيوني صوب كنه وقلت)...جني ما ييتكم..! خليتهم ورحت عند يدوووه وانا مقهور من الخاطر من كنه... احين هذي تصرفات وحده مخطوبه..!!.. تقعد ويا ولد خالتها جنه محد وراها مسؤول... وهي تعرف انه مايرضيني جذي... وقايلها من قبل هالكلام..بس ماعليه ياكنه... خلي خليفه ينفعج احين... دخلت على يدوه وابتسمت يوم شفتها منسدحه ومتلحفه... تقربت وبستها على راسها.... انتبهت يدووه.. ام سلطان: منووه..؟!.. يوسف: يوسف يدووه.... ام سلطان: هلا فديتك...هلا الغالي...حيالله يوسف... اعتدلت يدوه وقعدت في شبريتها ومدت ايدها ادور برقعها... انا شليت البرقع من الطاوله ودسيته... يوسف: الله يحييج يالغاليه...شو تبين بالبرقع انا ولدج... ظحكت يدوه وعدلت شيلتها... ام سلطان: ادريبك الغالي ولديه لكن ماتعودت اجابل بويهي... يوسف: ماشي برقع يالله.... المهم انتي شحالج؟ ليش منسدحه هني شي يعورج..؟! ام سلطان: ظاربتني دوره فراسي فديتك ...خلص عني الدوا ومادريت به الا خلاف قلت لابوك.... حزت فخاطري شوي حالة يدوه... ام مايد المفروض تشيك على دوا يدوه..او عالاقل وحده من هالبنات... عنبو كلهن مامنهن فايده..!!.. ولا وحده منهن همها انها تتاكد اذا دوا يدوه خلص والا بعده.؟! يوسف: ابويه امبونه بييبه لج لكن اتصلبه ريال ومارام ايي..عشان جي طرشني انا... وعطيتها كيسه الادويه مالت السكر... ام سلطان: الله يطول بعمره وبعمرك ماتقصرون... يوسف: افا عليج يدووه انتي عرووسنا...يدووه ليش ماتين تقعدين فبيتنا .؟! ام سلطان: ماروم اخلي بيتي فديتك... يوسف: انزين شهر بس... ام سلطان: وايد شهر... يوسف: اسبوع...يالله عاد يدوه... والله انه نتوله عليج ونبا نشوفج دوم بس نستحي ني هني عسب البنات نحس بعمارنا غرب وثجال... ام سلطان: يصير خير ان شاء الله... يوسف: يدوه شو رايج اشلج باجر... وتقعدين عندنا لين الجمعه... عروس ناصر بتي اخر هالاسبوع ماتبين تسمعينها كم ملاحظه؟! ام سلطان: ههههههههههههههههههه سلط الله عبليسك.... وقعدت يدوه تظحك عالملاحظه...لانها تحيد عمرها لسانها طويل وحشريه...!!!.. واكيد اذا تجابلت هي ومهرة بتستوي سوالف وعلووم...ونحن جاهزين للطماشه... يوسف: صدق والله يدوه...خلاص قولي تم ... ام سلطان: تم ياولد الشيبه... يوسف: حلووو...عيل بمر عليج باجر وبشلج انتي قولي لوحده من هالبنات تجهز اغراضج...وترا حجرتج في بيتنا موجوده ومسكره ناقصه بس تنورينها انتي... مسكت ويهي يدوه وحبتني على راسي.... ابتسمت وانا مستغرب من حركتها...بس تاثرت...لاني حسيتها طالعه من خاطرها.... ام سلطان: انته طول عمرك غير عن خوانك.... الله يوفقك ياولدي... ابتسمت اكثر ومسكت ايد يدوه وحبيتها... يوسف: ويطول بعمرج ويخليج لنا يا يدووه... تامريني على شي؟ انا تراني متواعد ويا ربيعي وبسير له... ام سلطان: سلامتك الغالي... سلم على ابوك وامك وخوانك.. يوسف: يوصل ان شاء الله.... فمان الله يدوه... ام سلطان: الله يحفظك فديتك... طلعت عن يدووه ...ويوم توني بدخل الصاله تحنحنت.... يوم دخلت كان مازال "العله" موجود... ومازالت كنه موجوده وياهم....يالسه ولا سوت لي حشمه ولا شي.... يوسف: انا بسير عموه تامرون على شي؟ خليفه: وين ماقعدت..!! يوسف: انته شو اللي مقعدنك..؟!.. طلعت بدون ماروم امسكها... |
خليفه: انا اتريا مايد يوصل... يوسف: ومنو في الميلس؟! خليفه: محد في الميلس... يوسف: عيل شفت سيارتين ماعرفهن... خليفه: البي ام سيارتي...النيسان سياره ربيع مايد ماخذنها عنه لانه ناوي يسير البر هاليومين... تذكرت ان سيارة مايد صالون وماتصلح للبرور... يوسف: هييه....زين سلم على مايد...انا بسير مواعد ربيعي بس ييت اوصل ليدوه دواها وبسير...يالله فمان الله... سلموا علي وبعدها طلعت... طلعت وانا مقهور ...الا محترق من غيظي... ماجني اليوم موصنها عن الطلعه جدامهم.... بعد تخالف شووري...انزين ياكنه انزين.... انا اراويج..! ----------------------------------- اليوم: السبت... المكان: بيت خلفان.. الوقت: التاسعه مساءا.. ----------------------------------- (شيخه)... كنا يالسين نتعشى انا وعفرا و آمنه... لانه عمي تعشى من قبل ورقد...وسهيل طالع...اما حمد معزوم...وسيف مب موجود في البيت... باختصار البيت فاظي علينا نحن الثلاث... انا نفسي كنت شوي متظايقه وكئيبه ... واحس الشيطان قاعد يوسوس لي بامور... انا في غنى عنها.... لكني تنهدت وتناسين الوضع اللي انا فيه مع سهيل... سمعت صوت سياره وكان سيف... دخل علينا البيت.... سيف: السلام عليكم... ردينا عليه السلام... سيف: ماشي عشا لي؟.. آمنه : بلى شي مخلين لكم في المطبخ انته وسهيل... سيف: ووين سهيل؟!.. شيخه: سهيل طالع بس بيرد يمكن بعد ساعه... سيف: انزين انا يوعان... شيخه: بخلي البشكاره تحط لك عشا... سيف: لالا اقولج...بسير اتسبح اول وابدل ثيابي ويوم بنزل بتعشى... راح سيف فوق....وخلانا ..ونحن ردينا نتعشى ونسولف ونخطط متى بنروح الخيمه..!!.. يوم رجع سيف وقعد يتعشى.... سيف: تسلم عليكم مهرة...! التفتنا كلنا صوبه منصدمين... شيخه: كلمت مهرة وماقلت لنا..!! سيف: انا رحت لها بوظبي... آمنه: بعــــــــــد..!!!... متى سرت وليش؟ عنبو فضيحه.... سيف: ماطولت عندهم....سرت اتطمن على مهروه مريضه... عفرا: مريضه..؟!...متى مرضت وشو فيها...؟! سيف: اوهووووووووووووووووووو صدق انكن حريم خلني اتعشا... شيخه: انته اللي ماصخ ماتقول لنا شي بالتفصيل.. سيف: اتصلت بناصر اتطمن على مهرة...وقال لي انها مريضه فيها حمى لانهم ساروا البحر امس والحبيبه تغططت في الماي ودقتها الهوا ومرضت.... سرت اشوفها وييت وتسلم عليكم كلكم... شيخه: وليش ماخبرتنا قبل ماتسير؟ سيف: وليش اخبركن؟!.. عفرا: المهم شحالها مهرة..؟! سيف: قلنالكن مريضه.. شيخه: علومها الثانيه تقصد... سيف: قصدكن بينها هي وريلها؟! شيخه+عفرا: هيييييييييييييه...... سيف: عنادا فيكن مب قايل.... عفرا: حرام عليك سيف...شو شفتها مستانسه ويا ريلها..! سيف: هي مستحيه منه وهو مستحي منها والله يعينهم على بعض..ممكن اتعشى احين؟ شيخه: تعشى انزين محد ماسكنك... فرحتني علوم مهرة رغم اني زعلن لانها مريضه... لكن دام سيف اقرب الناس لمهرة ماقل انها مب مستانسه او متظايقه او شي..هذا معناته انها فعلا ماشيه امورها مع ناصر.. الحمد لله...لاني ادعيلها في كل صلاه انه الله يهديها وتتقبل هالريل وتعيش معاه حياة طبيعية... شيخه: حلوه شقتهم؟!.. تافف سيف... سيف: انا عرفت انكن بتسالن.... شقتهم حلوه ووسيعه... غرفة رئيسية بحمام...وغرفتين ثانيات بينهن حمام واحد وحده مخلينها للضيوف ووحده فاظيه مخلينها للكوي والغسيل وغيره وفيها بلكونه لنشر الثياب...وعندهم مطبخ وصالة وسيعه ومودرن... بس خلاص؟!... شيخه: ماشاء الله عوده عيل... سيف: هي نعم وسيعه وحلوه ومرتبه...خلني اتعشى... ضحكت انا على سيف وردينا نتابع المسلسل...بعد ماراح سيف... وركب فوق لغرفته..دخل سهيل... كانت الساعه حوالي 11 ساعتها...يوم دخل سهيل.. وكنا انا وعفرا بس سهرانين بما ان حمد بعده ماوصل... دخل سهيل وسلم علينا... شيخه: احط لك عشا؟ سهيل: لا ماشتهي بروح ارقد....تصبحون على خير... راح سهيل وركب فوق.... بدوني..!!!!... هالحال تكرر الفتره الاخيره كثير... وانا مب عارفه شو السبب... لكني حاولت اتجاهل الموضوع... عفرا: روحي شيخه عند ريلج برايج... شيخه: واله ريلي مازقرني لو يباني بيزقرني... عفرا: عاد شافج يالسه وياي يستحي يزقرج... شيخه: خليه برايه ..هو يبا يرقد شو بسير اسويله انا..!! عفرا: رقدييييييييه... شيخه: هههههههههههههه طبيه عنج... علوم الحمل انتي وياج... عفرا: والله الحمد لله...صح صايره مزاجية بزياده لكن الحمد لله... الاسبوع الياي عندي موعد... وانتي شيخه مافحصتي؟! شيخه: لا...انا بعدني ماحس انه فيه حمل الحين... وشو علاقتج انتي بحمد الحين ان شاء الله احسن؟ عفرا: احسن بوايد... الحمل ساعدنا شوي بانه نرجع مثل قبل... شيخه: الحمد لله انا ملاحظه عليكم بعد انكم تحسنتوا وايد ..الله يديم المحبه يابوج... عفرا: آآمين... مثل مااني لاحظتي انا بعد لاحظت تغيير بينج انتي وسهيل.... عسى ماشر شيخه؟ _________________ |
| الساعة الآن 11:39 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir