|
سهيل: لو امايه الله يرحمها عايشه... جان ماخفتي هالكثر..كانت بتكون هي عندج اطمنج وتكلمج... لكن هذا وضعنا الحين يامهرة... ومانعترض عليه.... وما اعتبر أي شخص في هالبيت كفو انه يكلمج كلام الام لبنتها... لكن انا مريت على خالوه اليوم الصبح..وقالت لي انها بتيج باجر مخصوص عشانج.. عسى الله يهدي بالج بعدها...! انملت عيوني دموع... هذا وقته يذكرني بامي وبحاجتي لها...!!.. نزلت راسي وانا عيوني ينزلن اربع اربع بدون توقف...اصلا هن من كم يوم محتاجات بس سبب عشان يطلقن العنان... حسيت بسهيل يمسح على راسي بايده...وبايده الثانيه حوالي كتوفي يضمني لصدره شوي شوي... انا ماقاومت...وخيست صدره بدموعي.. لكن هو بدل مايتعاطف معاي كان صدره يهتز بالضحك علي.... كانه يشوف موقفي موقف طفولي... مايدري بمصيبتي...!!.. سهيل: مهرة...!!..بسج عاد من الصياح.... ناصر ريال زين..صارلنا كم شهر الحين ونحن نمدحه لج متى بتقتنعين يعني..!!!.. ابتعدت عنه وانا امسح دموعي... قام سهيل من مكانه وقال بحماس... سهيل: العرب متيمعين تحت يتريون يشوفونج بالفستان...يالله جربيه وانزلي... رفعت راسي بسرعه اطالعه...في نفس الوقت دخلت الخدامه يايبه الستاند... مهرة: ماريد البسه... سهيل: بتلبسينه وبتراوينا....وشيخه بتساعدج...يالله يتريونج تحت...! وطلع سهيل بعدها من الغرفه وطلعت وراه الخدامه...وسكروا الباب... شيخه: يالله سمعتيه... تعالي نشوف الاغراض... تميت يالسه اطالع شيخه وانا امسح دموعي المتبقيه على ويهي.. وهي كانت تفتح العلبه واطلع منها الجوتي والمسكه والاكسسوار... قمت انا وبتردد كبير وبايد مرتجفه عقيت الكفر عن الفستان.... كنت فاهمه على حركه شيخه المتعمده انها تترك لي الفستان بنفسي اكتشفه... والا فضول شيخه معروف مستحيل تتخطى الفستان وتروح للاكسسوار... وانا مب عشان حد....عشان هذيلا اللي متجمعين تحت يتريون يشوفوني قمت وكشفت عنه... صحيح هم غلطوا في حقي...ظلموني..واغصبوني على العرس ....والتجهيز له...لكن مهما كان هذيلا اهلي... وانا احب اهلي... مهرة: شيخه صدقه سهيل الفستان ثقيل... نشت شيخه واطالعت فستاني... شيخه: واااااااااااااااااااو.... اغار انا جي...احلى عن فستاني... ابتسمت.. مهرة: اجاملين عشان ترفعين معنوياتي... شيخه: لا والله انه روعه...يالله انزين خلينا نجربه.... ويوم لبسته... فعلا كان ثقيل وحسيت نفسي بطيح... بس كان مضبوط...وبصراحه..كان حلوو.... شيخه: بسم الله تبارك الله... شو تشوفينه ثقيل؟ مهرة: هي ثقيل... مابروم امشي اروحي...جتوفي بتكسر.. شيخه: امايه بتمشيج.... مهرة: الله يستر.. وتنهدت مره ثانيه بخوف... لبست النعال اللي كان عالي شوي عشان يبين اني اطول عالستيج.... لفيت شعري أي كلام عشان تثبت شيخه الطرحه اللي كانت طويله... حسيت بشعور غريب....غريب جدا.... مش حلم أي بنت انها تلبس فستان العرس..!! ليش احس الرغبه تتنازعني..باني افرح بتحقق هالحلم الطفولي... وباني اصيح على خيبتي..!!.. ماتركت لي شيخه المجال للتفكر بهالموضوع... شيخه: يالله يالله ننزل... مهرة: استحي... شيخه: لا ماتستحين...مادري منو الخبله اللي كانت تشجعني بيوم عرسي... مهرة: هذاك غير.. شيخه: يالله مهرة لا اتعبيني معاج... خلينا نراويهم الفستان عشان تبدلينه وتتعشين وتاكلين بنادول وترقدين عشان تخوز عنج الحمى... يوم ذكرتني بالحمى حسيت بتعب... الصراحه انا شخصيا احس ان الحمى نفسيه...يعني سببها نفسي مب فيروس او شي...!!.. نزلنا... وانا متمسكه بايد شيخه بالقو عسب ماطيح... تحت كان ابويه...حمد وعفرا....عمتي وسهيل.. وبو هناد حبيبي..(سيف).. ابتسمت ...لكن مش لانهم ابتسمولي...ابتسمت لشوفتهم متيمعين.... من زمان ماشفتهم متيمعين جي... معقول متجمعين عشاني..!.. واني في النهاية طلعت مهمة في هالبيت...!! الحين عاد..يوم بسير عنكم بينتوا لي اهميتي..!!.... والا هذا تمثيل؟!..شخصيات يديده تقمصتوها لين ما اطلع وينتهي التمثيل..! مابعرف الاجابه عن هالشي ابدا... مافي داعي اقولكم ان العايله... كلهم..مدحوني....غرقوني بالكلام الحلو... فضحونا باصواتهم بالاصوات العاليه وظحكهم.... لين ظحكوني من قلب وياهم... ياسلام... ليتهم دايما جذي... احين طلعوا جانبهم الحلو...!!..شو عقبه عاد..! ------------------------------------- بعد ثلاث ايام... في يوم العرس.. ------------------------------------- اليوم: الخميس.. المكان: غرفة مهرة.. الوقت: الثالثه ظهرا.. ------------------------------------- (سهيل).... دقيت الباب قبل ما ادخل على مهرة.... المسكينه كاسره خاطري... لكني لاحظت عليها مؤخرا انها عالاقل قامت تضحك شوي...يمكن من بعد ماكلمتها خالوه شوي ارتاحت نفسيتها..! الصراحه خالتي ماكانت بتي تكلمها..على بالها ان عمتي قايمه بالواجب..ماتدري ان عمتي مب سائله في مهرة ذاك الزود... وانا اللي سرت وطلبت من خالوه تكلمها.... عشان شوي ترتاح... بس اليوم عرس مهرة...وبتروح عنا ....بصراحه بيفظى علينا البيت... صحيح ماكنا نحس بوجودها.. لكن بكل تاكيد بنحس بغيابها..! ودامها بتغادرنا..لازم تكون النفوس طيبه وصافيه... مهرة: تفضل..! دخلت الغرفه وحصلت شويخ وعفرا حرمة حمد موجودين عند مهرة... حلوه كانت مهرة .!! لابسه بجامة نوم بيظا ايدها قصيره...فاله شعرها الناعم الحيوي... والحنى اللي تحنته امس واضح وطالع حلو عليها لانها بيظا..!.. سهيل: احم احم لو سمحتن يعني ابا اتكلم ويا اختي على انفراد.. من غير مطرود... وابتسمت لهن... ظحكن وسمعنّي كم تعليق وطلعن... سكرت الباب وراهن ويلست عدال مهرة عالكرسي... سهيل: هااه شو النفسية؟!.. مهرة: الحمد لله... بس مب مبين على ويهها انها بخير... سهيل: متى بتسيرين الفندق؟! مهرة: بعد صلاة العصر...انا وشيخه بنروح مع عمووه... سهيل: من عقبها اظني مابشوفج الا اخر العرس... لو كنا بنزف ناصر جان شفناج لكن ابويه رافض هالفكره تدرين به انتي.. مهرة: احسن انزين.. ابتسمت... سهيل: مررره ماتبين تشوفينه انتي ناصر هذا..تراه رحيم..! مهرة: خل حلاته تنفعه عاد.... شو ابابه رحيم والا لا.. سهيل: هههههههههههههه... كيفج عاد انتي صرتي على ذمته الحين وحرمته باقي بس هالعرس... برطمت مهرة... فجاه تمسكت بايدي وقالت لي بترجي مهرة: كلم ابويه ...خله يقنع ناصر هذا اني ابات الليله هني..!! بطلت اناعيوني منصدم.. سهيل: خبله انتي؟!.. حرمنا ريلج من الدخله ومن شوفتج وقت الملجه ومن الكلام وياج بعد تبينا نحرمه من ليله العرس؟!! مهرة: ليله شو بتفرق عنده..!! سهيل: قولي هالكلام لعمرج...لين متى بتشردين؟!..وليله شو بتنفعج..!! لا مهرة عيب شللي هالفكره من بالج...! مهرة: اوووووف... سهيل: مهرة... ماريدج تطلعين من بيتنا وانتي حاطه بخاطرج علي..!! انتي زعلانه مني لاي سبب؟ خبريني من احين.. هزت مهرة راسها بالنفي... سهيل: بس انا اللي اشوفه غير... انا احس انج زعلانه مني لسبب معين... مهرة: انتوا اهلي...رغم عيوبكم....احبكم... مع انه كنت اتمنى تكونون مثاليين مثل اهل كل البنات... ! حسيت بزعل في نفسي... منو مابيزعل بالله ..! سهيل: افهم من كلامج اني مالعبت دور الاخ زين..!! ابتسمت مهرة.. مهرة: ماكان دور ياسهيل..انته اخويه ... لكنك ماحسيت بهالشي الا الفتره الاخيره... سهيل: يمكن لاني زعلان لانج بتسيرين عنا... مهرة: صدق والله؟! سهيل: اكيد صدق... انتي اختي ومهما شفتي مني من تصرفات..احبج واخاف عليج...وابا مصلحتج... ابتسمت مهرة..ابتسامه من قلب...وسيعه...نورت ويهها.... سهيل: شفيج؟! مهرة: بس خلاص سامحتك.... سهيل: هههههههههههههههه متاكده؟! مهرة: هي متاكده... كان مبين فعيونها الفرح....مادري شو اللي قلته فكلامي خلاها تفرح جي... بست مهرة على يبهتها وقمت... سهيل: الله يوفقج ان شاء الله مع ناصر.... ناصر طيب وان شاء الله بيسعدج....ماباج تحاتين شي... اليوم يومج ولازم تفرحين.... فاهمه؟! مهرة: ان شاء الله... سهيل: ومبرووك مقدما... مهرة: الله يبارك فيك... سهيل: تامرين بشي؟!..اذا احتجتي شي سيده اتصليبي عندج شويخ وعندها تيلفون... مهرة: ان شاء الله... سهيل: يالله فمان الله... طلعت عن مهرة وانا مرتاح نفسيا... عالاقل من صوبي انا بريت ذمتي واستسمحت منها قبل ماتروح عنا... رحت غرفتي هناك كانت شويخ مرتبشه تجهز اغراضها..دخلت انا الحمام اتسبح قبل لا اتلبس واطلع واسير لهم ...يمكن محتاجين شي واخاف محد من خواني عندهم... ------------------------------------- اليوم: الخميس... المكان: في عرس مهرة (رجال)... الوقت: الثامنة مساءا... ------------------------------------- (مبارك)... تمثيل..! كل فرحتي الي ابديتها اليوم تمثيل × تمثيل... الصراحه كنت احس بحرمان وزعل غريب... يتراوالي الموقف اللي صار بيني وبين مهرة..وبين لي حبها لي.. مرارا وتكرارا على قولتهم... مهرة كانت تحبني انا...او مازالت... كيف تاخذ احين ريال غيري..! I know ..تفكيري مب منطقي ابدا... انا اعدها مثل اختي...ليش احين مب طايق احضر عرسها...مب طايق اشوف ريلها..!!... ليش احس انه مايناسبها وانه بيتعسها...مع انه ماطلع منه أي تصرف يدل على هالشي..! انا ادري اني ماحبها وااكد لكم هالشي... لكن أي ريال... تعترف له بنت يعزها بحبها له...لازم بينشا بينه وبينها رابط معين مش رابط الحب لكن رابط الفه وتعاطف وامتنان على هالحب... وحتى لو ماكان يحبها...بيعوره قلبه على فقدان هالحب اللي كان يخصه...او تحول هالحب لشخص ثاني غريب.... يحس نفسه هو اولى بهالحب....وبرغم انه بعد مايحبها...لكن يحس انها خانته...!! هذا شي في نفسية الرجال صعب فهمه...!.. طمعهم في اقتناء اكثر من عاطفه...!!..واكثر من حب.... any ways... مثلت دوري لين الحين بشكل جيد... بالنسبه لهم مبارك مستانس بعرس بنت عمته.... هناك جدامي كان سيف ايول مع الشباب... طلب مني ايول معاه بس بصراحه بالمقارنه مع اليويله الموجودين اشوف نفسي اهبل وماعرف ...فاحسن لي اقر محلي...وما افضح عمري....سيف عالاقل كان يعرف... اما انا فمبتدئ جدا...! راشد وسهيل بعد كانوا مرتبشين.... حمد كان مايفارق ابوه تقريبا ملازمنه... بخصوص اهل المعرس... الابو كان ما يتحرك وايد من مكانه...محمد ويوسف يالسين فمكان معين لكن يوسف كل شوي يقوم يسير عند حد ثاني...ينوع على قولته...مر علي ووقف معاي ربع ساعه وسار عقب... اما المعرس نفسه فكان هادي بصراحه.... مبين عليه التوتر.... وكان بعد مايقر..يحوط ..بس خلف الكواليس..يتاكد انه مافي قصور من ناحية القهوة والتقديم وسوالف الضيافه هذي... حسيته مب مستانس بعرسه...او مادري...خايف يمكن.... او شي شاغل باله... يمكن مايبغيها..!!!... الصراحه في كل مره اشوفه في بيت عمتي من بعد ماخطب مهرة كنت الاحظ عليه التوتر وعدم الارتياح... لكن بعد التفكير في الموضوع...حتى قبل مايخطب مهرة كان يوم ايي بيت عموه ماكان يبين انه مرتاح ومستانس...اذكر يوم ياهم يوم العيد .. كان هو ويوسف يايين...وطلعت له انا...ماكان خاطب مهرة يومها لكني حسيته مب مرتاح بعد..!! قعدت افكر بموضوعه شوي...اخر شي اقتنعت بفكره انه هذي هي طبيعته في التجمعات..يمكن مايرتاح للمناسبات...!!..ويتوتر فيها... فيه ناس وايد جذي... خلص سيف يوالته وفجج راسه وعقب رجع لي... سيف: والله انه طماشه ذاك..تشوفه..!..مربوش مع اني ماعرفه بس اندمجت وياه والله.. مبارك: اظني هذا من صوب المعرس... سيف: يجوز... مسك سيف كوب ماي وفج غطاته الرقيقه وشرب منه.... سيف: خساره انه ما بندخل ومابنشوف مزاييين ,,آآآآآآآخ يالقهر....مت غصصصه يوم سمعت بقرار ابويه... مبارك: ههههههههههه يمكن مافيه العرس مزايين..! سيف: يا الله جان العرس مافييه مزايين... مبارك: انزين وايدات شكثرهن كم بتطالع عنبو... سيف: المهم اطاااااااااالع...يااه... مبارك: انته ابويه لاتشغل بالك بالبنات احينه وراك سفر... سيف: هناك شي بنات؟! مبارك: متروسه الجامعه...بس اغلبهن بنات الحمرا... سيف: مانباهن خسهن الله...يابنات البلاد يا فلااااااااا... مبارك: عاشووا...شي بنات البلاد هناك بس مب مثل اللي هني... سيف: شو قصدك.؟!.. مبارك: من هذيلا الفرييي... سيف: انزين شو ابابهن انابعرسبهن؟!..المهم يرمسن رمستنا والا؟! مبارك: هي يرمسن... سيف: خلاص عجيب ... مبارك: ههههههههه والله انك مينون... احين بدال ماتتخبرني عن الجامعه وامورها تخبرني اذا فيه بنات... سيف: صح انا مالي هوس عالبنات ذاك الزود....بس بصراحه حالي حال أي شاب..لازم اجحل عيوني بين فتره وفتره...!...اوهوو هذووه النسيب..قم قم نسير له.... وحست بوزي وانا امشي مع سيف تجاه ناصر.... ---------------------------------------------- اليوم: الخميس... المكان: غرفة مهرة في الفندق.. الوقت: التاسعه مساءا.. ---------------------------------------------- (كنه).... بصراحه...! عروسهم كانت حلوه ماتوقعت شكلها جي.... شو مكيااج...شو فستااااااان.... كانت فخمه...لكن على نعومه...!.. لكن شي واحد مخرب عليها... انها كانت خايفه...بالضبط مثل ماقالت منى عنها... خايفه من العرس..! كانت معانا بعد شيخه اخت راشد...لكنها كل شوي تنزل ... وترجع لنا مره ثانيه... مهرة: اعتقد اني شايفتنج في الجامعه...ويهج وايد مالوف... انتبهت ان مهرة توجه الكلام لي....فابتسمت.. كنه: والله..! وين تقعدون؟! مهرة: في الكافتيريا... كنه: نحن بعد... لكن مب دايما... منى: يابوج اكيد بتنتبهين لها من خراشها...! ابتسمت مهرة بتعاطف... شكلها ماكان لها بارض تضحك... ياربي هالكثر العرس يخوف يعني..!.. انا كنت متاكده اني بكون هادية ومابخاف يوم عرسي بيوسف...لاني انا اعرف يوسف واختاره قلبي من زمان... بس يمكن لانه مهرة وناصر مايتعارفون من قبل...عشان جي هي خايفه... هي اكيد هذا هو السبب.. كنه: متى بيزفونها؟! منى: تو الناس...يمكن بعد ساعه ونص جي... في هاللحظه دخلت عفرا حرمة اخو مهرة ومعاها المصوره الفلبينية ومساعدتها... كنه: زين عيل يوم ان المصوره يت قومي خليها تشوف شغلها مع مهرة ونحن بننزل فظيحه... منى: هممممممم قولي الا تبين اجابلين الشاشه... جان اروح اقرص منى... وصاصرتها...مهرة كانت لاهية عنا اصلا بالكلام مع عفرا... كنه: يا****ه هالسوالف بيني وبينج بس مب للكل... منى: هههههههه اوكي قومي... نشينا وطلعنا عن مهرة ونزلنا تحت... غير المعازيم اللي كانوا موجودين يوم ركبنا...بعدهم زادوا دبل....ماشاء الله...كل هذيلا معارفنا ومعارفهم..!! كنه: وييييييييييييه شوفي العيال شقايل عافدين بالكوشه...!!!! منى: نسير نروغهم... بيعفسونها لنا... كنه: يالله... ركبنا انا ومنى عالكوشه وبعدنا العيال عنها بظرابه... كنه: انتوا مب كاتبين على بطايقكم "جنه الاطفال بيوتهم".. قالت لي منى بياس.. منى: بلى... كنه: عيل هالشياطين شو يايبنهم..!! منى: شو دراني ياختي فيه من الناس ماعليه من بطاقه ولا غيره... الله يهدي...شوووفي...فهد ولد فاطمه خت راشد..هذاك اللي لابس كندوره سودا.... كنه: هههههه حليله ظارب صحبه ويا سلطان ولد محمد اخوج.... منى: ههههههههههههه هيه ... كنه: نسير...والله شكلنا يضحك ونحن واقفين هني... نزلنا تحت عند بقية المعازيم....وتمينا نحوط ونحوط ونوقف جدام الشاشه احيانا ادور حبيب القلب بس ماكان يحالفني الحظ وايد... ورحنا نتعشى ورجعنا... وقمنا بالواجب كله.... لين ما تسكرت الاضواء وبدت زفة مهرة..! ---------------------------------------- اليوم: الخميس... المكان: صالة الافراح... الوقت: الحادية عشره والربع مساءا... ---------------------------------------- (مهرة)... هذا ايقاع الزفه اللي يدق؟!... والا قلبي الي ماهدا...!.. يارب ان ماقدر على جذي بطيح ...بموووت... مسكت خالتي ايدي... ام راشد: يالله بنتي سمي بسم الله.... وانا من زود خوفي قلت بسرعه وبصوت مسموع... مهرة: بسم الله.... ابتسمت خالتي.. ام راشد: لا تخافين فديتج... ابتسمي شوي للناس..امشي بهدوء.وانا وياج مابخليج.. مهرة: خالووه بطيح... ام راشد: مابطيحين يالله... مشيت مع خالتي..وانكشفت للناس... اللي ماقدرت اطالع فويوهم...ذكرتني خالتي مره ثانيه بالابتسام فتصنعت ابتسامه وانا خايفه حدي.... كيف بمشي جدام هالناس كلهم... خيبه ان خلصت الزفة وانا بعدني ماوصلت الكرسي...فشله.. ياويلي ان طحت؟!!!.. كل هالافكار "السوداوية" ماساعدتني.... بان على ويهي الارتباك...ذكرتني خالتي مره ثالثه بالابتسام...ورجعت اتصنع ابتسامتي.... وهي ماسكه ايدي تمشيني بهدوء...توقفي احيانا عشان التفت يمين ويسار مادري ليش يمكن عشان الناس يشوفوني...! شو تشوفون من الخير...!!.. الاصوات كانت عاليه.... التيَـبّـيب "الزغاريط" كانت عاليه بعد.... لكن صوت الزفه على أي حال غطى على أي صوت ثاني.... رفعت عيني اشوف كرسي الكوشه كاني اشوف منصة الاعدام.... اللي تجتمع فيه الراحه مع العذاب... عذاب يلستي هناك وتسلط الانظار علي...وراحه القعده من بعد تهديد طويل بالطيحه والانهيار...! استمرت الزفه تقريبا اقل بشوي عن 15 دقيقه... لكني اعتبرها يوم كامل... الفستان ثقيل...وجوه الناس تخوف... وواقع اني عروس يملاني رعب عن رعب..... يلست اخيرا على الكرسي المنفرد... مايكفي الا لي...لانه "المعرس" مابيدش طبعا...وهذا افضل...كل ما اخرت شوفته كان احسن.... صحيح اني ما انكر ...نوعا ما استسلمت لواقعي...يوم ملجتي صحت صياح على توديعي لحريتي....لكني من بعدها تعبت من الظيق النفسي...وعزمت اني ماخلي حد يصيحني بعد اليوم حتى ناصر نفسه اذا تجرأ يعني انه يصيحني..! من بعد يوم الملجه مرت الايام كانها شريط سريع...وايد مشاوير..وايد اشياء لازم اسويها...كانوا يخبروني شو لازم اسوي وانا ما اناقش...انفذها بدون معارضه... وشو فايده الاعتراض انا خلاص تزوجت...! يلست عالكوشه وتذكرت نصايح شيخه باليلسه المعتدله ...فعدلت قعدتي وخليت ظهري مستقيم رغم التعب..ورفعت راسي شوي ....تاملت الناس.... كلهم يايين يشوفوني....! اكيد يبون يشوفون ويه مبتسم..... ابتسمت.... فرحت المصوره يوم شافت ابتسامتي فهاجمتني بالتصوير.. اضطريت بعدهااحافظ على هالابتسامه مغصوبه ... احب التصوير...واعرف كيف ممكن الابتسامه تعدل وايد عالصوره... عشان جي تميت ابتسم... شوي شوي استرخت اعصابي..ناس تسلم وناس تاشر ويهال يعطوني ورد ويبوسوني ....ماعرفت فيهم غير فهود ولد فاطمه.. شيخه ومنى وكنه ساير راد علي... يا يعدلن شي في فستاني او يكلمني عشان يريحني شوي عن اشياء تافهه... ويخبرني سوالف تضحك وانا يالله يالله اسمعهن ... حريم وايد سلمن علي وهن يتذكرن امي فيني..."ماخليتي عن المرحومه شي"... جمله سمعتها كم مره اليوم...! افرح بشكل يوم يشبهوني بامي....ياريتني اطلع مثلها بس... ياريت..! بعد ساعه ردوا قوموني وحطولي زفه خروج ثانيه...ياربي بمشي بعدني؟!!...مافيني.! الظاهر جذي خلص العرس... نقزت فكره فمخي...تم قلبي يدق عليها دق مب طبيعي... بعد شوي.... بشوف ناصر.! ------------------------------------- اليوم: الجمعه.. المكان: صالة الافراح... الوقت: الواحده صباحا....(بعد منتصف ليل الخميس)... -------------------------------------- (ناصر).... تلفظت في نفسي بيميع انواع الشهادة والاذكار..... كله من خوفي من المقابله المحتمه بيني وبين مهرة.... حاليا معاي اخوان مهرة...عمي...ابو مهرة.... خالها يابر...بالاضافه الى ابويه واخواني... يزفووني لمهرة... امايه وخواتي منى وشما سلمت عليهن قبل شوي... وصلنا لين غرفة مهرة...سوري...غرفتنا... بطني عورني... ماعرفت كيف اصرفها.....! محارم مهرة كلهم يبون يدشون معاي...الظاهر محد عطاهم خبر اني ابا ادش اروحي.... صديت صوب ابويه وخواني ..سلموا عليه وباركولي وهم مبتسمين... وعقب انصرفوا وردوا حق اللي باقي من المعازيم... التفت انا لاهل مهرة... ناصر: انتوا ماسلمتوا عليها؟! بو حمد: بنسلم عليها احين..يالله توكل على الله خلنا ندخل.. ناصر: عمي... بطلب منك طلب اتمنى ماتردني .. بو حمد: افااا يا ناصر...تــم...قول شو فخاطرك... ناصر: تسلم ياعمي ماتقصر....انا....ابا ادش على مهرة اروحي.... عقد عمي حياته.... ونفس الشي خوانها.... حمد وسهيل وسيف...لكن الخال يابر تم ويهه عادي... الظاهر استنكروا طلبي... ناصر: انتوا دخلوا سلموا عليها وعقب انا بدش... بو حمد: ليش عاد شو السبب... ناصر: جذي احسن ويكون الاحراج اقل لي ولها... فكر شوي عمي.... لكن سيف ماتريا دخل الغرفه وسكر الباب وراه... اما عمي وبعد التفكير... بو حمد: خلاص على راحتك ياناصر... اللي تباه بيصير.. ارتحت شوي من نجاح الخطه... ناصر: تسلم ياعمي ماتقصر... دخلوا على مهرة واحد ورا الثاني...وانا قلبي دخل معاهم.... يارب استرها يارب... ماعرف شو اقولها او شو اسوي.... كيف اخفف الصدمه عليها...!!.. اخاف بدل ما انا اصدمها تقوم هي تصدمني بانها تعرف اني انا اللي خاطبنها..!! يالله ماتم غير دقايق وكل شي بينكشف... تسترت على شخصيتي خمس شهور بس عشان ماتعرفني قبل العرس... مادري شو استفدت؟؟!!.. وبديت اتندم... لو عرفت من قبل جان تفاهمنا عالاقل .... لاحول ولا قوة الا بالله احين شو اسوي.!!.. |
شو اقولها..كيف ابرر لها موقفي...! كيف بنقضي الليله...!! ورجعت ارفع عيني للسقف استنجد بربي... انفتح الباب واول من طلع سيف..الظاهر البقية بعدهم داخل... سيف طلع وهو يظحك...ويطالعني...خلاني ابتسم معاه... سيف: ياويلك منها... هني انا انصدمت ....وقلبي طاح فبطني.... قلت له بخوف.. ناصر: ليش؟! كمل سيف ضحكه.. سيف: والله انها طماشه مهرة... يوم دخلت عليها من شوي مبونها واقفه ومنزله راسها مستحيه متوقعه الريل يدخل... ييتها ومسكتها من كتوفها (ومسكني انا من كتوفي عشان يطبق وعيشني جو وكمل)...وقلت لها ...حبيبتي...مبروك.... وهني نقع هو من الضحك.... الظاهر يتذكر شكل مهرة اللي ماقدرت اتخيله الحين....تظاهرت بالظحك معاه... الله يهديك ياسيف...ليش تسوي جي..!!... سيف: مسكينه يوم عرفت صوتي رفعت عينها منصدمه وسبتني...قتلها توقعتي الريل هااه؟ قالت وينه؟!..قتلها واقف برا مايبا يدش...قالت احسن لا يدش... ناصر: افاااااااااا....جي تخرب عليه من اول ليله عنلاتك...!!! سيف: افا عليك يالنسيب صلحت لك الوضع قلت لها منحرج مسكين ..جان اروحها هي تنزل راسها اونها مستحيه...عقب دشوا عاد شلة الانس مارمت اكمل وياها المقلب...المهم ناصر.. ومد ايدها وحطها بكفي ووايهني... سيف: مبروووووووك...منك المال ومنها العيال ان شاء الله.... ابتسمت... ناصر: الله يبارك فيك والفال لك ان شاء الله.... سيف: بعدنا كم سنه ورانا سفر.. ناصر: لااه..بتسافر؟ سيف: هي نعم بدرس في الخارج ان شاء الله ويا مبارك... ناصر: الله يوفقك يارب... سيف: بس والله....لا تقول في لندن ومايدري عن شي....حلفت...والله.... ان سمعت انك مزعل مهرة ياويلك مني... قالها بمزح.... لكني حسيته جاد.... هالصغيروني هذا يهددني انا والمشكله اني خفت...لاني فعلا بكون سبب في زعلها لفتره طويله من الزمن والله يستر كيف بنغطي على المشاكل اللي بتواجهنا...! ناصر: مهرة بعيوني بو هناد لا تحاتي... سيف: الله يوفقكم ان شاء الله... قلت له من خاطري.. ناصر: آآمين... بعدها طلعوا البقية من داخل وباركولي وانصرفوا.... تميت انا....والباب... مجابلنه مالي جرأه عليه افتحه.... لكن لازم....لازم ادخل... رجعت اتدعى واستنجد بربي انه يسترها...وفتحت الباب ودخلت... وانا روحي تسبقني للدخول... متشوق لها...وخايف عليها... سكرت الباب وراي وتساندت عليه وانا مافيني حيل اوقف... مهرة... كانت...كانت.... مادري شقول لكم... كانت آية في الجمال بصراحه اليوم....آية في الرقة والنعومه مثل ماعهدتها.... آية في البراءة... بفستانها الابيض... وطرحتها الطويله...شعرها الاسود...وبشرتها البيظا... بدون ماحس صدري بدا يرتفع وينزل بانفاس قوية .. خفت انها تكون مسموعه....! مهرة بعد...ماكانت في حاله احسن... عيونها لتحت...والارتباك واضح.... والخجل فاضح... مشيت صوبها...ماعرف انا شو قاعد اسوي....شو ناوي اقول... لكن عواطفي تحركني... مشيت صوبها بهدوء...ماوقفت جدامها مثل ماهو متوقع...وقفت وراها من خوفي للحظة المحتومه... لحظة شوفها لي.... كنت واقف وراها وانا انتبه على طولنا المتناسب ... مديت ايديني الثنتين...مسكت فيهن كتوفها.. حسيت بارتجاف مهرة ينتقل لي عن طريق هاللمسه البسيطه.. ماقدرت اتحمل.... اسندت راسي على راسها وانا مغمض عيني...احس بالياس.... ابا مساعده من حد....مب قادر اتصرف... كنت احس برغبه بالصياح.... طلع صوتي لها اعلى بشوي من الهمس.... ناصر: مهرة... فجاه حسيت ارتجافها وقف....وحسيتها ترفع راسها...ضغطت بايدي على كتوفها اكثر...خايف من ردة فعلها الوشيكه... ناصر: ذكري الله مهرة..دخيل والديج... صدرت عن مهرة تنهيده خوف وحيده....وبعدها حسيت انها نست تتنفس...!! خفت عالبنت...هذا صوتي سوا فيها جي...انتبهت....مستحيل تنسى صوتي انا.. ماكانت تدري مثل ما توقعت... فجيتها ومشيت لين جدامها اشوف ويهها ... كانت اطالع بجمود على مستوى نظرها...يعني صدري..ويهها احمر... ناصر: مهرة...شفيج؟! تلفت حوالي ادور ماي...لكن للاسف مافيه...او يمكن فيه بس من شدة ارتباكي ما انتبهت له... رجعت اطالع ويهها... ناصر: مهرة تنفسي... دخيلج مهرة انا مب هو الاولي... هنيه وببطء شديد رفعت مهره نظرها لي...حسيت بنفسي صغير جدام نظرها... اطالعتني بخوف...بصدمه...ياس وحزن كبير....ماقدرت اسوي شي غير السكوت... وويهها يحمر اكثر واكثر... لين مافي النهايه غمضت عينها وطاحت بحظني... حظنتها بقو... تشبثت فيها بقو جباره هيه مع فستانها الثقيل.... ضميتها لصدري بقو...اعوض عن الاغماءة الاولى اللي ماقدرت اتصرف فيها.... مستحيل اخلي مهرة اطيح عالارض مره ثانيه دامني موجود....! مهرة..كانت لاحول لها ولا قوة...معتمده على قوتي كليا... شليتها بين ايدي بصعوبه مب لثقل مهرة لاني اعرف انها مب ثقيله علي ابدا...لكن بسبب فستانها وطرحتها اللي تعبوني شوي... مددتها عالشبريه.... وانا اتنفس بقو...فكرت اييب ماي من الحمام اوعيها...لكني قررت اني اخليها... افضل لها ترتاح شوي...بخليها لين ماتقوم بروحها...! تاملت فويهها الملائكي لفتره.... مديت ايدي امسح على شعرها الناعم الاسود.. مهرة احين حلالي...زوجتي....محد يقدر يمنعني عنها ..وانا المسؤول عنها كليا.. وانا عارف انها صدمة مبدئية.... ردة الفعل الصدقية بتي بعدين...بعد ماتقوم مهرة... وصدق سيف..."ياويلي منها."... حسيت بالحزن عليها.... كرهت نفسي لفعلتي الشينه.... ليش انا ومهرة ماكنا مثل الازوج الطبيعيين... اللي يشوفون بعض اول مره في ليله العرس مع ذلك محد ينصدم من الثاني بالعكس يعيشون حياتهم بسعاده...! ليش كنت انا من النذاله بحيث جربت اعتدي على هالبريئه.... الله يجازيني ويواجهني بشر اعمالي... مهرة احين صارت زوجتي...والجرح اللي سببته لازم اني اشفيه بايدي... والا لا انا ولا مهرة بنعيش بسلام... تقربت منها وبستها بين عيونها....كل الاسف والرحمه والعواطف الثانيه المختلطه اللي احس بها تجاه مهرة حطيتها في هالبوسه.... لو هي واعيه جان حست بي وحست بكل اللي احس فيه... ابتعدت عنها اعلق سفرتي وفريت نعالي فزاويه من الغرفه...ورجعت لمهرة... شغلي الشاغل... بديت اعق عنها الذهب اللي لابستنه...مابترتاح جي... عقيته كله وحطيته عالطاوله عدالها... ورجعت افصخ عنها نعالها وحطيته عدال الشبريه... الطرحه ماروم لها...مثبته واخاف اقوم مهرة ان حاولت اني اعقها عنها... سحبت اللحاف ولحفتها...ورحت اييب كرسي وحطيته عدال الشبريه ويلست عليه... اتامل فيها... وبحنى يديها.. وبجمالها في فستان العرس هذا... للاسف ما تهنت فيه...! الاغماء هذا يا رحمة من الله...عطاني وقت شوي افكر فيه باللي لازم اسويه....وعطى مهرة بعد وقت تريح اعصابها ...وتبتعد شوي عن واقعها اللي فرضني عليها فرض... انا واثق انها بتقوم فوقت متاخر ..مابتكمل اغماء للصبح.... ولين ماتقوم... بيلس هني افكر باللي لازم اسويه....اللي ببدا بتنفيذه اول ماتقوم مهرة... رحت قفلت الباب وحطيت المفتاح فمخباي.. بندت الليت وشغلت الابجوره الصغيره عدالنا ورجعت اقعد.... انتظر..! ----------------------------------------- اليوم: الجمعه... المكان: غرفة الفندق... الوقت: الرابعه فجرا.... ----------------------------------------- (مهرة)... الظلام في كل مكان.... راسي ثقيل... جسمي كله ثقيل... فتحت عيني بصعوبه وانا احس بصداع فظيع... صدمتني شوفته... هو ماغيره... شهقت بخوف وتذكرت كل شي.... تذكرت محاولته الخبيثه... تذكرت كل اللي الاشياء اللي قالوها عنه لي... ناصر...محترم..محب...حنوون..وبيسعدني... لكن ولا واحد يعرف هالكريه كثري....! فزيت من رقدتي ويلست وتراجعت شوي بعيد عالشبريه ...بعيد عنه... مستحيل اللي قاعد يصير وياي.... اكيد انا فكابوس اكيد.... كل شي كان زين ومرتب وبديت شوي اتقبل الواقع لكن الحين يصير فيني جذيي؟ مستحيل اهلي يسوونهامستحيل.. كيف مايعرفون عنه انه يتحرش ببنات العرب كيف ؟ كيف ايوزوني اياه... كيف انا ماانتبهت انه هو نفسه كابوسي... ليتني طلبت شوفته من قبل ياريت .... بس حتى لو شفته شو كنت اقدر اسوي؟!..وهم غاصبيني على الزواج منه..!!.. طبعا ماقدر اقول لحد انه حاول يعتدي علي....اكثر بيغصبوني عليه للتستر عالفظيحه... انتبهت وانا اتامل فيه انه غافي....يالس عالكرسي ..مسند راسه على ورا وغافي... كنت انا مليانه رعب وخوف... واتسائل كيف اهلي عقوني للوحوش...!!.. مب غاليه عندكم انا..!!.. عيل كيف يسوون فيني جي...! اسئله لا نهاية لها مرت على بالي.... ليش انا بالذات مقروده بحياتي... ليش يصير وياي كل هذا..!! ماذكر اني غضبت رب العالمين فعمل كبير عشان اتعاقب جي...!! وصلت لحافة الشبرية من الصوب الثاني ...وقفت وحاولت اشرد..ركظت صوب الباب مب مهتمه اني بلا غطا للراس...المهم ابتعد عنه...ارجع لاهلي...مستحيل اللي يالس يصير اكيد فيه غلطه...! مسكت الباب وحاولت افتحه... بس ما طاوعني... مره ومرتين وثلاث لين صدر صوت مسموع وانا كنت احاول افتحه اكثر من مره بياس وخوف... سمعت صوته ...حسيت بلمسته على ايدي.... ناصر: مهرة..! سحبت ايدي منه وتراجعت ...لصقت بالايدار من كثر خوفي...اماهو كان يطالعني بحيات معقوده ووجه حزين...وماحاول انه يتقرب مني.. ناصر: مهرة وين بتروحين؟! مهرة: ................... ماقدرت اصدق اني مب في كابوس....اخاف اذا تكلمت يصدمني صوتي ويثبت لي اني في واقع فعلا... وان هالانسان اللي ابغضه هو ناصر زوجي...!! ناصر: مهرة كلمييني...وين تبين تروحين.؟! ياترى ليش صوته هادي جذي.... مب هذي هي النبره اللعوبه اللي اتذكرها..! مهرة: عند اهلي... هز راسه بالنفي... ناصر: هالشي مستحيل...عالاقل مش الحين..! تجمعت الدموع على طول في عيني.... بيمنعني..! بيحبسني عنده خلاص...! قلت له بترجي...وانا صوتي خالطه الصياح.. مهرة: الله يخليك... عقد حياته اكثر...وتنهد... ناصر: بعد اسبوع مهرة...بعد اسبوع...! تنفست بصعوبه وانا اصيح... اسبوع؟!. مهرة: ماقدر.... فعلا ماقدر اتم معاه اسبوع....ماقدر اتم معاه لحظة ثانيه... وبشكل جنوني رجعت للباب احاول افتحه ..محاولات يائسه... رجع ناصر مسكني... ناصر: مهرة..اذكري الله...خلينا نتفــــ... قاطعته وانا ابتعد عنه واتراجع بعيد واصارخ... مهرة: فجني....لا تلمسني...كيف تجرا تسوي فيني جي كيف.. ناصر: مهرة اهدي... مهرة: ابا اروح عند اهلي....ابا اروح عند اهلي... ناصر: بوديج بس اهدي... سكت عن الصياح... بيوديني..!... كيف اقدر اصدقه... لكني تشبثت بهالامل... مهرة: احلف... لو انا في حاله ثانيه جان ظحكت على نفسي....واحد مثل ناصر اطلب منه حلفه؟؟!...شو همّه هذا اذا كان يحلف على صدق او جذب...عادي عنده...انسان عاصي... ناصر: والله بوديج بس اهدي... بسبب تراجعي المستمر وصلت للشبريه مره ثانيه...يلست عليها... وانا امسح دموعي...ومازلت اطالع ناصر بنظرات رعب.. لين الحين مب مصدقه اللي يصير معاي... كيف من بد كل الرياييل يوزوني هذا..! وكيف من بد كل اللي يو يخطبوني..شافوا اخواني في هالنذل ..الرجل المناسب لي... كيف يكون هذا مناسب..!!.. صرفت التفكير عن الماضي وركزت عالحاضر بخوف شديد وانا اشوف ناصر يتقرب..ويرجع يقعد على الكرسي اللي كان قاعد فيه من قبل... حط راسه بين ايديه بشكل يائس ....ما اثر فيني...لكنه زاد في رعبي... في شو قاعد يفكر هالراس..!!!.. رفع راسه لي وقال... ناصر: مهرة..انا اباج تفهمين...اني مب هو اللي تعرفينه... كان واضح على ويهي عدم التصديق...ومادري بصراحه ليش ينكر هالموضوع... هو نفسه اللي ذاك الخبيث ليش يالس ينكر...ماقدرت افهم...لكنه كمل على حال... متجاهل صمتي... ناصر: انا من بعد الحادثه ذيج صرت انسان ثاني... قاطعته... مهرة: لا تحاول... اطالعني ناصر بحيره.... ناصر: احاول شو... هزيت راسي وقلت له مره ثانيه... مهرة: لا تحاول تبرر....مافي شي يبرر اللي سويته... نقز ناصر من كرسيه وقعد جدامي عالارض...مسك ايدي بالقو بينما انا اتراجع لكن ماقدرت اسحب ايدي من ايديه اللي ماسكتني بقو... ناصر: بلى مهرة...فيه شي يبرر كل اللي اباه منج انج تهدين وتسمعيني.... مهرة: فجني....ماريد اسمعك ماريد اشوفك ماريد اعرفك...ودني عند اهلي...انته وعدت... فج ناصر ايدي وقام وقف على ريوله وهو زام شفايفه بعصبية... ناصر: بدلي ثيابج...مابنطلع جي... مهرة: الحين بنروح؟! سالته بلهفة.... ناصر: هي..الحين بنطلع قومي بدلي ثيابج... عندج ساعه...انا بروح وبرجع لج بعد ساعه واتمنى تكونين جاهزه .... كان يكلمني بلهجة واحد معصب وزعلان...لكن ماهمني عله مايرضى...اول ماطلع من الغرفه قهرني يوم قفل الباب علي... لكنه وعد انه بيوديني احين...بس شو بقول لاهلي..!! بقولهم الصدق واللي يصير يصير... اهم شي ما اعيش معاه... عقيت فستاني وطرحتي... وفجيت التسريحه وركظت للحمام اتسبح واغسل المكياج... رجعت بعدها ادور شي البسه....ماكنت ادري شو حاطه لي عفرا في الشنطه...لكني ماحصلت غير مغربي وقميص نوم وشوية ملابس داعليه وعباه وشيله .... والمصيبه ملابسي الباقية كلها شلوها الخميس الصبح.... لكن في بيتنا شي ملابس بعد تامه...بستد بهن يوم برجع ببدل المغربي وبلبس أي شي.... لبست المغربي وخليت شعري مفتوح عشان يجف وجهزت اغراضي بالشنطه ماعدا الفستان فرشته عالشبريه هو والطرحه وبقية المستلزمات... انفتح الباب في هاللحظه..وعاودني الخوف من شوفته... تلفت حوالي ادور شيلتي عشان اغطي بها راسي عنه... دام فيه نية طلاق ..ليش اكشف نفسي جدام واحد خسيس شاء القدر انه يكون زوجي..!! لبست الشيله وتحجبت وصديت صوبه... اما هو كان يطالعني بنظرات غريبه...عقد حياته يوم شافني لابسه الشيله...لكنه ماعلق على شي.. ناصر: جاهزه؟! مهرة: هي... بس الفستان..! ناصر: خليه.. بوصي حد يشله عقب ... مهرة: ترانا سايرين البيت بنشله ويانا.... ناصر: مافينا عليه انتي احين مستعيله بعدين بنرجع له... طنشته لكن حواسي ما طنشته...تميت متنبهه لاي حركه تصدر منه... اخاف انه يهاجمني في أي لحظه... لبست عباتي والنعال...اما ناصر فشل شنطتي وطلعنا...غصبن عني انتبهت انه مب شال شنطه له... وكرهت انه نرجع مره ثانيه للغرفه الظاهر نسى..عشان جي ذكرته... مهرة: شنطتك وين؟! ناصر: اصلا مايبت شنطه... طريقته بالكلام معاي من طرف خشمه ماعجبتني ...عشتووو...ماتقولون هو اللي غلطان ..!! والله.. سكت عنه وماكلمته...ترييته لين يخلص نقاشه مع رسبشن الفندق وطلعت معاه... وصلنا لسيارته وكنت ابا اركب ورا لكني انصدمت بسيارته انها باب واحد وشي غير عملي اني ادز الكرسي واقعد ورا دام الكرسي الجدامي موجود....وانا ماريد افتح نقاش بيني وبين هذا..! ركبت جدام وحاولت الزق قد ماقدر عدال الباب وابتعد عنه... اما هو بكل بساطه ماكلمني... ويحلم اذا كان يتريا مني اكلمه..! آآخ ياربي كيف صار فيني جذي مادري....لكن علمي باني متوجهه لبيت اهلي خفف علي شوي الموضوع... --------------------------------------- اليوم: الجمعه... المكان: سيارة ناصر... الوقت: الخامسه والنصف صباحا... --------------------------------------- (ناصر)... تلومت اكثر اني قاعد اجذب عليها.... وبدال ما اوديها عند اهلها...شالنها بوظبي...! لكن كيف اقدر اوديها عند اهلها مينونه هذي.؟!..لكن ماتنلام بصراحه... انا توقعت ردة فعلها تكون اخس عن جي...توقعتها تجلب الدنيا والاثاث كله تكسره على راسي...لكن ادراكها لضعفها جدامي هو اللي ساعدنا شوي...وخلاها تستسلم لوعدي الكاذب وتسكت... انا حلفت بالله اني اوديها عند اهلها... بوديها فعلا لكن مب اليوم...بعد اسبوع... بيكون عندنا اسبوع...168 ساعه للتفاهم... وتهدئة الاوضاع... بصراحه انا كنت تعبان حدي...فيني رقاد وتعب جسمي ونفسي...واني امسك خط بوظبي في هالحاله هو الخبال بعينه..! لو سوينا حادث احين؟؟!..شو الفايده.!! الحين مهرة ساكته على بالها انا ساير بيتهم...لكن عاجلا ام آجلا بتكتشف ان الطريج طوّل زياده عن اللزوم..وبتستفر عن هالشي...!! وان درت بتسويلي زوبعه هني في السياره وانا بصراحه مالي مزاج...!!.. ومب بعيده تهاجمني جسديا من العصبية اللي اكيد بتحس فيها...! للاسف تعبت وانا افكر...ماشي طريقه سهلة لمعالجة الظرف اللي احنا فيه...! لا هي تبا تتفاهم او تسمع مني شي.. ولا انا اقدر اجبر نفسي على التخلي عنها من عقب ماحصلتها...! ماقدر اتركها... فكره الطلاق غير وارده ابدا... مهرة لي...وانا لها... لازم تفهم هالشي خلاص...! نص ساعه ثانيه وبدت مهرة تتحرك في السياره...تتلفت حواليها باستغراب...ليش الطريق تغيرت..!!.. بصراحه واقع ان طريق بوظبي مليان شير وبيوت ومزارع على اطراف الشارع ساعدني بكسب شوية وقت... لو اني ساير دبي بتلاحظ مهرة الرمل على الجهتين وبتدرك انه نحن طالعين برا العين... لكن بوظبي الوضع مختلف شوي... لكنها ادركت اخيرا على أي حال... عقت غشوتها تتاكد من اللي تشوفه وهي معقده حياتها....وانا تعقد حلجي مية تعقيده معاها...ورفض صوتي انه يطلع... شو بقول؟! مهرة: هذا مب طريج البيت..!! ناصر: ....................... مهرة: نحن وين سايرين؟!... ناصر: بوظبي... مهرة: شووووووووووه..!!..بوظبي ليش؟!...ردني...ردني انته حلفت حلفت... بدينا عاد بالصياح والحشره...! ناصر: ومابفيّر بحلفتي قلت لج بوديج الاسبوع الياي... مهرة: لاا لاااااا الحين الحين ودني حرام عليك ماقدر اعيش معاك ماقدر... ناصر: ليش مهرة.؟! بدينا بالصراخ الغالي... مهرة: شو هالسؤال اللي مثل ويهك انا كرهت الرياييل بسبتك وتباني ارضى اكون زوجتك..؟! تشبثت اكثر بالسكان.... مقرر اني اتجاهل كلامها كله واسكت ... ردي عليها بمثابه زياده الحطب عالنار...! حولت مهرة نبرة صوتها لنبرة الترجي مره ثانيه... مهرة: الله يخليك ناصر.. الله يخليك ودني عند اهلي ماقدر اعيش معاك.... ذكرها لاسمي سوى فيني سوايا..... وخلاني اغض "السمع"..عن كل شي بتقوله... حلو اسمي وهو طالع منها...له نبره مختلفه... لكنها يووم ماشافت أي تصرف مني ردت تصارخ عليه.. مهرة: لا تتوقع انك اذا وديتني شقتك فبوظبي على بالك اني بكون لك وبيكون من حقك تسوي اللي تباه...لا تحلم انا مستحيل اسلمك نفسي .... سكت... ماكانت هذي نيتي يامهرة...بس مع ذلك مالومها...خلها تنفس عن غضبها...نص ساعه ثانيه وبوصل بوظبي ان شاء الله... لكن مهرة يئست مني في النهاية.... صدت صوب الدريشه وغرقت في صياح لا له اول ولا تالي... قطعت قلبي... لكن ماقدر اسوي شي... في النهاية سكتت...ويوم صديت صوبها اكتشفت انها نايمه... اعصابها مرهقة مسكينه... خلها ترقد احسن... وصلت البناية الي فيها شقتي...ووقفت سيارتي بالموقف.. بندت السياره وتميت يالس... بيكون قلبي حجر اذا وعيت هالمسكينه من رقادها..خلها ترقد لين ماتشبع عقب بننزل... وبدل ما اتامل في أي شي ثاني قعدت اتامل فيها هيه... ما اشبع من شوفها....ياكثر المرات اللي ذبحني شوقي لها وماقدرت احصلها... آآخ يامهرة....كيف بنعيش الايام اليايه الله اعلم.... ربع ساعه وقامت مهرة.. تلفتت حواليها باستغراب... ناصر: صح النوم.. يوم سمعت صوتي فزت..واطالعتني برعب.... مهرة: كنت متامله تكون كابوس... آلمني كلامها... اختفت ابتسامتي لها على طول... ناصر: اذا شبعتي رقاد خلينا ننزل...لانه ظهري تكسر من القعده... مهرة: وين انا؟! ناصر: فبيتج.. نزلت من السياره وتوجهت للدبه انزل شنطتها... بعد ثواني نزلت مهرة وهي متغشيه... غصبن عنها..مالها قوة عالاعتراض وهي في مدينه غريبه بالنسبه لها بعيده عن أي شخص تعرفه...! ماعداي..! كانت تمشي بعدي بخطوات... فتحت المصعد وتميت اترياها داخل... دخلت هي بتردد...حسيت انها من تحت غشاتها رجعت تصيح... بس عاد... دموعج ماتخلص..!! سكت عنها ولا قلت شي... فتحت باب الشقه وتميت ماسكنه لها لين تدخل... حاس بالرعب اللي هي تحس فيه... ناصر: مهرة مابكلج صدقيني...ولا بغصبج على شي بس دخلي خلصينا... دخلت مهرة .. عقت غشاتها ومسحت دموعها ... وهي ادور بعينها عالشقة بحزن... ناصر: هذي الصاله... تعالي وياي... (مشينا شوي) هذا المطبخ... هذي غرفة فاظيه .. مادري شو اسوي فيها..وهذي غرفتي انا... وهذي غرفتج بتحصلين فيها الشنط مالتج... من قلت لها هالكلام اندفعت داخل الغرفه وسكرت الباب وراها ...وقفلته... يالله... هالكثر تبا تشرد عني...!! حطيت شنطتها عند بابها... ناصر: مهرة شنطتج عند الباب....ماتبين تاكلين شي؟! مهرة: ................... ناصر: اوكي اذا يعتي والا عطشتي المطبخ ادلينه اظن.... خليتها ورحت المطبخ سويت لي سندويشه جبن وجام وعصير... ورحت للصاله اطالع التلفزيون افكر بالوضع اللي انا فيه... ليش احس بجو البيت تغير مع علمي بوجود مهرة في غرفة من الغرف..! حتى لو كانت بعيده عني بس مع ذلك احس بالجو تغير... لازم بيتغير.. قبل كنت يوم يظربني الهوس عليها واشتاق لها...يكون جدامي خط من بوظبي للعين وبعدني مشوار ثاني لبيتهم وترصد الحركه ومايندرا فوق هذا اذا بشوفها او لا.. لكن الحين اذا بغيت اشوفها ماتفصلني عنها الا كم خطوه...وباب مقفول..! بينفتح في المستقبل ان شاء الله... خلصت اكلي وارسلت رساله لسهيل...اتصلت به قبل وحصلت تلفونه مغلق...الفجر منو يتصل بالناس..!!. قلت له ان انا ومهرة ما ارتحنا بالنوم في الفندق وقررنا نص الليل انه نروح لبوظبي ...وطلبت السموحه منهم...ومايشلون بخواطرهم... |
اما اهلي انا...فكنت مبلغ امايه من قبل اني مابرجع الصبح ومبلغ يوسف...بيعرفون اخر شي انه مابييهم ... سكرت التلفزيون...ورحت لمفتاح باب الشقة قفلته وخشيته فمخباي..اخافها تتخبل وتشرد...تسويها!... ورجعت لغرفة مهرة.. ناصر: مهرة..!! لا جواب.. ناصر: مهرة انا تعبان وبرقد...غرفتي عدال غرفتج شفتيها اذا احتجتي شي خبريني....ويكون احسن لو رقدتي انتي بعد وارتحتي...تمسين على خير... ابتعدت عن بابها ورحت لغرفتي..عقيت كندورتي وعلقتها...شغلت المكيف وبندت الليت ...خليت باب غرفتي مفتوح عشان تشوفني وماتتردد بالدخول اذا بغت... لكن من لامس راسي المخده كنت انا غارق فنومي ولا حاس بشي غير احساسي بالراحه لوجود مهرة فشقتي... ----------------------------------- اليوم: الجمعه.. المكان: غرفة يوسف.. الوقت: الحادية عشره صباحا.. ----------------------------------- (يوسف).... كنت احاتي ناصر...احاتيه بالقو... ابا اتصل عليه بس مستحي اخاف ازعجه...هو ما اتصل بي...بترياه هو يتصل اول...عشان استفسر شو صار بينه وبين مهرة..!! انا احس انه شي جايد صار...خيبه جان مانقعت الحرب...!!.. الله يستر... قوم امايه تحت طايحين بالمعاريس تعليقات...وانه ناصر ماصبر قبل مايشل حرمته لشقته عشان يستفرد بها.. ومايبا حد يزعجه...ومابيخلي الرسميات والواجبات العائلية تعيقه .... ماسوا لحد شور وشلها... مساكين .. مب فاهمين ان ناصر عايش بين نارين حاليا... خلهم على عماهم....ماشفت امي مستانسه جي بعرس محمد مثل مااشوفها احين مستانسه بعرس ناصر..!! مسكينه كان عرس ناصر هم عليها وتحاتيه....وخافت انه يظيع مستقبله برفضه للزواج والاستقرار...!! احين الاعين كلها بتتوجه علي... وانا بقبلها بترحيب... ليش لا دام عروسي هي حبيبة القلب.... آآخ فديتها محلاتها امس....ماتدري اني شفتها بس شفتها....وياريتني طولت بالشوفه بس قلت فخاطري حرام..ماتدريبي..!.. ومب زين ..اصلا عيب وحرام... خلني اصبر لين ماتستوي حلالي .... وتفكيري بها ولد الشوق في صدري... خليت اهلي تحت ورحت عالنت مع انه مووول مب وقته بس قلت عل وعسى احصلها... كنه من خطبتها وهي معاي باللسته....خلتني وماحذفتني...نتبادل الكلام احيانا.... لكنها ترفض رفض قاااااااااااطع اني ازودها ولو شوي...تلعن خيري...وتسويلي بلوك...لكن مب ديليت... كم مره حاولت استميلها معاي بالكلام...لكن ماشي فايده.... شو هالحب اللي مافيه غزل...!..تبانا كله انكت على بعض ونتظارب.!... فرحت فرح كبير يوم شفتها اون لاين... يوسف:" شو تسوين ياقمر.." كنه:" (مع ابتسامه شاقة الحلج)...هلا يووسف...صباح الخير" يوسف:" صباح النور والورد والياسمين... شحالج ياعمري" كنه:" اييه...!!" يوسف:" هااه شو؟!" كنه:" نحن شو قلنا عن هالكلام مابتيوز انته" يوسف:" وانا مايالس اقول شي غلط...تراج عمري وحياتي وحبيبتي" كنه:" يوسف..." يوسف:" عيونه" كنه:" سلامة عيونك يال**** بس لا تقولي هالكلام" يوسف:" اقوله لغيرج يعني؟!.." كنه:" (مع ويه معصب) ..جـــــــرّب اشوف..!!" ظحكت.... يوسف:" والله اني داخل مخصوص عشانج ...مشتاقلج موووت والحمد لله اني حصلتج" كنه:" ( مع ويه مستحي)... تشتاقلك العافيه..." يوسف:" بس العافيه؟!" كنه:" وانا بعد".. يوسف:" فديتج...كنوووه...انا شفتج امس" حطت لي كنه ويه مبطل عيونه ومنصدم.... يوسف:" شفتج بعد العرس....جنااااااااان فديت الاخضر عليج محلاه.."... كنه:" ليش ماقلت لي؟!" يوسف:" الحين اقولج" كنه: يوم شفتني ليش ماقلت لي" يوسف:" ماكنت بروحي يالغلا".. كنه:" هممم....انزين بس لاترمس عن شكلي استحي." يوسف:" اوكي...ماقلتيلي شحالج؟!" كنه:" الحمد لله بخير شحالك انته وشحال المعاريس" يوسف:" انا بخير وسهاله...المعاريس والله ماندري عنهم" كنه:" ليش مايوووكم؟!" يوسف: " هههههه...ناصر من امس شال حرمته وسايربها بوظبي".. كنه:" ليييييييييش؟!... شقايل جي مايصبحون على اهلهم؟" يوسف: " له اسبابه...ابا اتصلبه بس مستحي ..." كنه:" هههههههه لاتقطع عليه الجو خله متهني ويا العروس" يوسف:" ههههههههه بترياه هو لين يتصلبي وانابتهنى ويا عروسي".. كنه:" ياربييييييييييييه يووووسف..!!" يوسف:" ياااقلب يوووسف.".. كنه:" انته شو تبا بالضبط؟!" يوسف:" ابا اسمعها" كنه:" تسمعها والا تقراها". يوسف:" اسمعها واقراها" كنه:" شوف الطمع... تسمعها ماشي مستحيل...." يوسف:" انزين عيل كتبيها بردي فوادي عنبوج من خطيبه..!!" كنه: " ههههههههههههههههههههههههههههههههههه ظحكتني والله" يوسف:" فدييت ظحكتج والله...قولي عاد" كنه: " اذا قلتها بتودر هالحركات وبتسولف عدل؟!" يوسف:" هيه..." كنه:" احبك".. عظيت على شفايفي وانا مستانس من الخاطر وحسيت بجسم غريب يتحرك في احشائي وصدري.... ياربي بتخبلبي هاذي.... جان اسير واطرش لها بوسه... كنه:" طالع.!!..نحن ماقلنا بتودر الحركات".. يوسف:" ماروم والله...احبج كنووه".. طولت كنه وسكتت عني فتره.... ادركت انها مستحيه... وانها عرفت بشو ترد عليه...وانا اقدر فيها مستحاها وانه بعده فيها من الحشمه شوي.... شي اكيد اني ماريد حبيبتي وخطيبتي وحرمتي تكون قوية ويه...اقولها احبج وماتستحي..!!... عشان جي رجعت اكلمها عن امور ثانيه مايخصها بالعواطف..شوي شوي رجعت لي كنه الخبله اللي اعرفها تسولف وتظحك.. اما ناصر... فمازلت بانتظار اتصاله....طرشت له مسج اقوله بانه متى ماقدر يتصل عشان يطمني.... والله يعينه ويوفقه مع مهرة.. مادري ليش احس انها صعبه... ------------------------------------ اليوم: الجمعه.. المكان: بيت خلفان.. الوقت: الواحدة الا ربع.. ------------------------------------ (شيخه)... شيخه: ليييييييييييش؟!!... استغربت صراحه من اللي قاله سهيل لي...كيف ناصر يشل مهرة ويسير بوظبي..!! ونحن هني نترياهم ايوون ومجهزين كل شي..!! سهيل: لا تلحقين ابويه توه محتشر علينا لكن الصلاة هدته شوي... شيخه: صراحه مب حلوه منه..! سهيل: على كيفهم ياشيخه...وين مايرتاحون يسيرون.... شو علينا نحن من هالواجبات الاجتماعية..!! شيخه: عمي شو قال... سهيل: ابويه احتشر وقال ناصر هذا يتصرف تصريفات ماتعيبني..امس مايبا يدخل ويانا واليوم شل بنتنا ووداها بوظبي ماخلاهاحتى تسلم على اهلها قبل ماتسير..! تميت اضحك عليه قلت له ابويه انته ميوز بنتك عشان يردونها لك اخر شي والا ميوزنها وسلمت مسؤوليتها لريال ثاني...اصلا المفروض خلاص محد يتدخل... هم اتفقوا نص الليل وقرروا يسيرون نحن شو علينا؟! شيخه: خساره كنت ابا اشوف مهرة عقب العرس.. سهيل: عشان اطلعين منها العلوم هااه؟ شيخه: ههههههههههههههه.... سهيل: عيب...ولاتسئلينها أي شي حتى لو شفتيها... مهرة على نياتها وبتخرط لج كل شي صار... شيخه: لا عاد مب لهالدرجه سهيل..بس اللي ابا اعرفه... هل ارتاحت لناصر او لا...لانها وايد وايد وايد كانت خايفه قبل العرس...السالفه ومافيها اني ابا اتطمن لا اكثر ولا اقل... سهيل: لا تخافين ان شاء الله خير... ناصر عاقل... وبيعرف يتفاهم معاها... شيخه: تعال صح...ليش امس ماطاع يدخل وياكم شو السالفه؟! سهيل: اون ينحرج... ويقول انه اخف احراجا له ولها انه يدخل بروحه...دخلنا نحن نسلم عليها وخليناه اروحه يدخل... شهقت شيخه... شيخه: حرااااااااااااااااام...يعني محد منكم كان وياها يوم دخل ناصر؟! سهيل: لا... شيخه: ماشي دعم معنوي من أي صوب...حرام عليكم... سهيل: جي هي يالسه ويا سفاح...!!! والا آكل لحوم البشر...! يالسه ويا ريلها... شيخه: مسكييييييينه...لوعندها تيلفون جان اتصلت والله... سهيل: عيني خير..اروحها بتتصل يوم تبا ترمسكم...انا بنزل اتغدى... نزل سهيل عني تحت...وانا تميت يالسه مشغول بالي بمهرة وباللي صار معاها... ابا اتطمن..بس ماشي مجال غير ان مهرة تتصل بنفسها.... وانا اعرف مهرة...بتنحرج تطلب من ناصر التيلفون وتتصل بنا.... ومابتتصل الا اذا هو بنفسه عطااها التيلفون بدون ماتطلب منه... ياربي ابا اتطمن...بس كيف.. -------------------------------- اليوم: الجمعه... المكان: غرفة مهرة في شقة ناصر.. الوقت: الواحده ظهرا... -------------------------------- (مهرة)... عيزت من كثر ما امشي في الغرفه ساير راد.... كنت احس اني اسد محبوس في قفص... شوي وبتخبل... مب قادره اتخيل الوضع اللي انا فيه... مستحيل يكون صدق مب قادره اتخيل انه صدق... كنت واعية من ساعه... نفذت نصيحه ناصر ورقدت شوي ..لكن مب اطاعه لاوامره...لكن كان عندي امل اني ارقد وانش احصل نفسي في غرفتي فبيتنا... لكن للاسف...حصلت نفسي في الغرفه الغريبه هذي.... كنت مبدله ثيابي ...لاني فجيت وحده من الشنط وطلعت منها بجامه نوم... لكني مارتبت اغراضي في الكبت الخالي... كان عندي امل ثاني باني اسكر الشنط وارجع بيت اهلي... حاليا انا ميته يوع لكني مافكر بالاكل...افكر بطريقه للهروب.. كيف اطلع وناصر في الشقه... صحيح قال لي انه بيرقد لكن شو يضمني انه مانش... مافي مجال اعرف الا اذا طلعت وشفت بعيني... مسكت شيلتي ولفيتها بحجاب... ... شيلة سودا ملبوسه على بجامه نوم زرقا..؟!!!... صراحه انا كاشخه..!! فتحت الباب وقلبي يدق دق... بطلته شوي ووايجت...الشقه غارقه في صمت تام... انتبهت لشنطتي اللي مازالت جدام الباب...مسكتها ودخلتها..وطلعت من الغرفه... امشي على طراف صبوعي... بدرت مني التفاته بسيطه لليسار...وشفت باب الغرفه المفتوح...والغرفه المظلمه اللي يطلع منها براد المكيف... وبعد التركيز...شفت ناصر متلحف ونايم في سابع نومه...تنهدت بارتياح...زين يوم انه راقد...مافيني عليه... مشيت بتردد اتعرف عالشقة هذي.. مريت عالمطبخ...وقرصني اليوع مره ثانيه... دارت عيني عالمطبخ المرتب.. فتحت الثلاجه وحصلتها متروسه من اشياء وايده...انتبهت للعصير...صبيت لي كوب وشربته... وماكان لي مزاج اكل او اسوي شي الحين... شربت عصير..وبسني...! مثل ماتعرفون... انا فاشله في المطبخ...! طلعت من المطبخ ورحت للصاله... وتعرفت عليها هي الثانيه... كانت حلوه...عجبني التلفزيون الكبييييييييييييييييييييير.... اول مره اشوف بعيني تلفزيون هالكبر..اشوفهن في التلفزيون صح بس ماشفتهن جدامي مره.. دورت بشكل سريع تيلفون اتصل منه بسيف.... لكني انقهرت يوم ماحصلت... الخبيث... اكيد انه مابيحط تيلفون.... مايباني اتصل باهلي واخبر عليه..! طلعت من الصالة وواتجهت للباب جربت افتحه بس مثل ماتوقعت...مقفول..! آآآخ ياربي شواسوي..!.. انا هني اعاني وهو حضرته راقد... اكيد عنده تيلفون...!.. لو قدرت اتسلل لغرفته واشل التيلفون واطلع بدون ما اوعيه زين... وليش ماقدر..! انا خفيفه والباب مفتوح ان شاء الله مابيصدر أي صوت... وحلت لي الفكره ..حطيت كوب العصير في المطبخ ورحت لغرفة ناصر وقلبي يدق مثل الطبل..! دخلت باطراف صبوعي بدون ما اصدر أي صوت..مع ذلك كنت خايفه صوت قلبي العالي يفضحني ويوعيه...! لكني استمريت بالمحاوله.. وهو استمر بالرقاد... القيت عليه نظره... كانت ملامحه هادية... رقاده مثل رقاد اليهال... ذكرني بسيف...جذي يرقد بعد ..يلوي عالمخده ويخش ويهه فيها.. طنشته وتلفت حوالي ادور التيلفون...ماحصلته عالطاوله او على التواليت... طاح نظري على كندورته المعلقه... اتجهت لها بهدوء تام... خشيت ايدي فكندورته...وبغيت اصارخ من الوناسه يوم حصلت التيلفون...ومفاتيح..اكيد منها مفاتيح الشقه... ببطء سحبت كل هذا وطلعت برا الغرفه... ومن حماسي ماترييت لين ادخل غرفتي واتصل...وقف في الممر بين غرفتي وغرفته...مسكت التيلفون حاولت اشغله...ماطاع يشتغل... في النهاية اكتشفت وبقهر وغيظ كبير ان بطاريته مفضية... كنت بصيح... ليش كل شي ضدي...!! احين من وين بتصل... تذكرت ان تحت البناية شي دكاكين ..يمكن يخلوني اتصل..!! رجعت الغرفه وحطيت تيلفونه على اقرب طاوله ورجعت اطلع محتفظه بالمفاتيح... رحت غرفتي ولبست عباتي... بنزل تحت وبتصل..ويصير اللي يصير...!! لبست عباتي وطلعت من الغرفه ..وبدون قصد مني سحبت الباب وراي ...النتيجه انه اغلاق الباب اصدر صوت عالي وقفت بسببه وانا ميته من الخوف..اكيد بينش...اكيد بينش... استعجلت وطرت صوب الباب...بايد مرتجفه تفحصت المفاتيح اجربها واحد واحد... الله يخسسه هالناصر..هالكثر مفاتيح..!! فجاه حسيت بايد تمسك ايدي...صرخت من الخوف تركت المفاتيح وتراجعت وانا اطالع ويهه برعب... ناصر: وين بتسيرين؟! كانت نظرته معصبه ...خفت...انا بلا شي اخاف منه كيف لو يعصب..!! مهرة: متى قمت.!! ناصر: وين تبين تسيرين مهرة..!! مهرة: ما..مابسير مكان.....! حاس ناصر بوزه وهو يطالعني بظيج... بعد لحظات سحب المفاتيح تفحصهن... لين حصل مفتاح معين..خشه في الباب وفتح القفل... وعقب اطالعني بنظره معصبه وبنظره ثانيه كانه يلومني على شي... ناصر: تفضلي...الباب مفتوح... تركني وراح... مادري وين راح...غرفته... مادري الحمام...الخلاصه اني تميت واقفه جدام الباب المفتوح... مب متجراه على الطلعه... تميت متسانده عالايدار....حسيت بياس وبجنون.... من شوي احارب عشان اطلع...ويوم فتح لي سجاني الباب بنفسه رفضت الخروج...!!.. وين اروح بدونه...! كيف اطلع بدون ريال..!! الدنيا مليانه عيال حرام شو بسوي لو حد منهم تحرش بي..!!.. انملت عيوني دموع... وبالتدريج كنت انا اقعد عالارض مثل الفقيره...واغرق في صياح من اول ويديد... هذا انا اللي قلت مابخلي حد يصيحني مره ثانيه؟!... خلال 12 ساعه ذرفت من الدموع اللي ماذرفته فحياتي كلها....! حسيت به يوم رجع...سكر الباب بهدوء وقفله وخلى المفاتيح فيه... ناصر: قومي مهرة... مهرة:....ماريد... مد ايده ومسك ايدي وسحبني لين وقفت.... مهرة: فجني... لبسني وسحبني معاه للصاله ويلس.... كان ناصر لابس بجامة نوم رمادية...ومبين عليه انه توه متوضي... ويهه امس كان تعبان شوي لكن بعد الرقاد بين عليه الراحه شوي... يلسني عالكرسي غصب ويلس هو في كرسي ثاني..بعيد شوي... قعدت انا امش دموعي اللي رافضه انها توقف... ناصر: ليش ماطلعتي؟! مهرة:............... ناصر: جااوبي يوم اكلمج... مهرة: وين اطلع روحي...! ناصر: تراك كنتي بتطلعين روحج قبل ماقوم...!! سكت وماجاوبته... وهو بعد سكت...بعد دقيقه... ناصر: ليش ماوعيتيني لصلاة الجمعه.؟!.. زين جي فاتتني..!! رفعت عيني مستغربه ....صلاة.!!!... ناصر: شفيج..؟! مهرة: مستغربه...(ورجعت امسح دموعي الاخيره اللي الظاهر بتوقف خلاص)...ثرك تصلي وادل درب المسيد.؟!.. عقد ناصر حياته... ناصر: قلت لج مهرة انا غير الاولي...والسبب انتي...بس ماتطيعين تسمعين...!... انا بسير اصلي وبرد... تركني وراح يصلي على قولته.شو قصده انه غير الاولاني والسبب انا..!!.. انا يعني اللي خليته يصلي ويلتزم..!! اكيد انها محاوله منه لتحسين الاوضاع بينا بس يحلم...يحلم...... تركت انا الصاله ورحت المطبخ ورديت اخذ الكوب اللي خليته من شوي وكملت شرب..!.. يارب شو اللي يصير وياي ..!! استغفر الله...ناصر ذكرني بالصلاه...ماصليت لين احين...رحت الغرفه اللي مخصصه لي دورت السياده وصليت.... يوم لفيت السياده وبغيت اطلع من الغرفه حصلته بويهي.. خلاني اشهق...بلعت ريقي خايفه من شوفه....خايفه من نظراته المعصبه الحايره.... خايفه من الي بيصير في اللحظات اليايه....!! رغم انه مابدر منه أي هجوم عنيف لي...لكني احس انها مساله وقت....! ناصر: انا بسير اشتري غدا....مشتهية شي معين..!! نزلت عيني وابتعدت عنه اكثر لداخل غرفتي... مهرة: ماريد غدا... جذابه...انا ميته يوع اصلا...يكفي اني من غدا امس البسيط ماذقت شي... تبعني ناصر لداخل الغرفه مادري ليش... ناصر: تبين..غصبن عنج... خوفني... لا يكون كلامه له معنى مبطن؟ والا انا اللي متشككه زايده عن اللزوم..!! مهرة: ماريد مب غصب... ناصر: اعرف مطعم يسوي برياني على كيف كيفج اذا كنتي تحبين الصالونه الحاره..!! مهرة:..... ناصر: شو رايج؟! مهرة: اوووف كيفك انته اللي بتتغدا... هب انا.... ابتسم ناصر ابتسامه غريبه لي.... مش مثل ابتسامته اللي شفتها اول مره شفته...هذي غير ^^^^^^^^^ ابتسم ناصر ابتسامه غريبه لي.... مش مثل ابتسامته اللي شفتها اول مره شفته...هذي غير..رقيقه وناعمه لكني رفضت اني اتاثر بها.. هذا انسان خبيث.... مد ايده وقرصني في غزي كانه يلاعب ياهل بشكل خلاني اتظايق... ناصر: وانتي بعد بتتغدين... مديت ايدي وسحبت ايده عن غزي...قام ترك ويهي ومسك ايدي انا...تم فتره ماسكنه بقو وانااسحبها... بس مالي حيله جدام قوة ناصر... اخر شي تركني... ناصر: مابتاخر... مهرة: يكون احسن لو تسير ولا ترد.... ناصر: لكني برد.. وطلع من الشقه قافل الباب وراه... صرخت من وراه... مهرة: آآآآآخ اكرهك...اكرهك....!! اووفف..... ورجعت غرفتي اسكر على عمري الباب.... ياربي شوهالحياة..! هذا نموذج عن حياتي اليايه لين مااحصل حل... مستحيل اعيش معاه مستحيل.... ـــــــــــــــــــــــــــــــــ نهاية آلبآرت آلـ [ 44 ! |
ياويييلي ع مهره ... ماارييد حد من اهلها يعرف شي ><" يالله اتريا التكمله |
آلبآرت آلـ [ 45 ! ---------------------------- اليوم: الجمعه.. المكان: شقة ناصر.. الوقت: الواحده والنصف ظهرا.. ---------------------------- (ناصر).. سكرت باب الشقه وراي وانا اتنهد…استندت عالباب وقعدت اتنفس بصعوبه جني خايض جوله من جولات الحرب..! جوله اولى..طلعت منها سالم لين احين…! المرحلة الاولى خلصت…ومهرة الحين "تقريبا" مستقرة في شقتي… المرحلة الثانيه بتبدا يوم برجع بالغدا…. مرحلة العيش معاها… وادري سلف انها بترفض الاكل…!! كيف اغصبها؟!.. ماروم اغصبها عالعيشه…!.. بس اباها تاكل.. لاحول ولا قوة..خلني اييب الغدا وعقب نشوف شو نسوي وياها… ركبت سيارتي وانا اطالع تيلفوني… الله يخسه مفظي…وانا نسيت احطه بالجرج…!! خساره كنت بتصل بسهيل عشان اخبره عن فستان مهرة…ماعليه عقب بتصلبه يوم برجع… رحت اشتريت الغدا ..وانا داخل البنايه ..شفت البواب حاط شتلات ورد جوري وياسمين عدال البوابه..ووحده منهم مطلعه ورده بيظا توها مسكره مافتحت... التفت للبواب اللي اسمه احمد... ناصر: احمد منو يجيب هذا ورد..!!... احمد: هذا مال بابا خليفه طابق 4 هو في سافر ويجيب هذا ورد منيه مشان يعطي ماي..! ناصر: والله؟!..عادي اقص الورده هذي؟ هز احمد راسه.. احمد: آآآدي بابا انته يريد شييل بابا خليفه مافي معلوم...مشان أروس؟! التفت لاحمد مستغرب... ناصر: هااه؟! ظحك احمد.. احمد: انته في سوي أروس بابا سه؟! ناصر: هههههههه سلط الله عبليسك وشدراك انته... احمد: كلش في مالوم بابا... ناصر: المهم انا بقصها هذي وانته لا تقول لحد... وفعلا قصيت الورده البيظا..ورجعت للشقة… قبل مافتح بابها… خذت نفس طويل…اهدي فيه نفسي… فتحت الباب وسكرته وراي….وانا اتلفت بعيني في الشقة…. يووه..! انخشت فحجرتها مره ثانيه..!.. احين شو بيطلعها هذي..! رحت المطبخ وحطيت الغدا هناك هو والورده…. خطفت على غرفتي وحطيت التيلفون بالجرج… فكرت ابدل ثيابي… بس عقب اكتشفت اني يالس اأخر الوقت واماطل قبل ماسير وادق عليها الباب… لاني ادري انها بتفشلني وبترفض الغدا…وماعرف شو اقولها..!! طنشت تبديل الثياب ورحت لمهرة…جني واحد هـــدّااد. وساير اظاربلي حد..! بتقص عليه هالمفعوصه..!!! دقيت الباب …. لكن لا جواب… ناصر: مهرة… وصلتني صرخه.. مهرة: شو تبا..!!!.. صرختها خلتني ابتعد شوي عن الباب …!!.. يالعوفه..! لكني استهديت بالله… هذا نموذج بسيط… ناصر: غـدا… مهرة: ماااباااااا…. ناصر: بطلي الباب… مهرة: روح عني خلني فحالي.... مسكت المقبض انا بعصبية ابا افتح الباب…بس مقفول.. ناصر: بطلي الباب اقولج… مهرة: بشوف كيف بتغصبني بعد…!!.. خلني فحالي ماريد اجابلك… ابتعدت عن الباب وانا متظايق في نفسي... ياربي ادري انها ماتنلام لكن الواحد غصبن عنه بيشل فخاطره وبيتظايق من هالمعاملة..!! لكن ماخليها..!! يا انا ياهي... رحت المطبخ وحطيت لها غدا من كل شي مع عصير..وكوب صغير فيه ماي وحطيت فيه الورده..! عل وعسى يحن قلبها شوي... شليت الصينية ورجعت لغرفتها...حطيت الصينية عالارض واستعديت لخوض معركه ثانيه... دقيت الباب.... ناصر: مهرة بقولج شي... مهرة: اذلف عن ويهي ياخي متى بتفهم..!!! بطلت عيوني منصدم.... فحياتي كلها محد قال لي "اذلف"...!!!... حرقتني الكلمه لكني تنفست بقو اهدي نفسي قبل ما ارجع اكلمها...! ناصر: مهرة...ابا اخذ شي من الحجره دخيلج بطلي الباب... مهرة: مالك شي في الحجره دامني فيها... ناصر: انتي من شو زايغه انا ماباج انتي والله...ولا بايييج لاتخافين... مهرة: صدقتك..! ناصر: انزين دخلي الحمام وقفلي على عمرج لين ما اخذ الغرض اللي ابغيه عقب طلعي... مهرة: اول مافتح لك الباب بتبطله...! ناصر: والله العظيم وحلفت اني مابطل الباب الا يوم اسمع صوت باب الحمام تسكر...باخذ الغرض اللي ابغيه وبطلع.... مهرة: انته ماقلت الحجره حجرتي...شو تسوي اغراضك هني؟! ناصر: نسييييييييته عاد...فجي لا تغدين عنيده... بعد دقيقه...قالت لي مهرة وحسيت صوتها قريب من الباب... مهرة: احلف مره ثانيه... ناصر: وقسم بالله يعلني الموت اذا بطلت الباب قبل مااسمع باب الحمام يتسكر وينقفل بعد... وبعد تردد بسيط... مهرة: بفج احين... فتحت مهرة القفل....ومامرت ثانيتين الا وهي قافله باب الحمام بعد...ابتسمت على طفولية هالبنت... شليت الصينية وفتحت باب الغرفه... درت بعيوني فيها.... اغراض مهرة مازالت في الشنط... الظاهر انها ماتبا تفظيها..! حطيت الصينية عالطاوله اللي عدال الشبريه... ناصر: مشكوووره...بطلع وبسكر الباب الحين...والله اني بطلع صدق هب تقولين منخش في الحجره او يغشني... باي.. طلعت من الغرفه وسكرت الباب بقو شوي عشان تسمع الصوت...خليتها وشليت غداي ورحت اتغدا في الصالة بروحي..!! ------------------------------------- اليوم: الجمعه... المكان: غرفة مهرة في شقة ناصر.. الوقت: الثانية والربع ظهرا.. -------------------------------------- (مهرة)... بعد تردد كبير فجيت باب الحمام لاني فعلا سمعت الهدوء يلف الحجره...طلعت راسي بس وانا ادور بعيني عالحجره...!..محد... طلعت من الحمام بسرعه وطيران عالباب اقفله مره ثانيه...لفيت وتساندت عليه وانا اتنهد بظيج..كنت مغمضه عيني...لكن يوم بطلتها صدمني للي شفته...! يايبلي غدا...! ماكان يبا غرض او شي بس كان يبا يدخل الغدا غصب...وشو هذا....ورده..!! تقربت من الورده مسكتها...لكني رجعتها لمكانها بسرعه... وانا احس باحاسيس عنيفه داخلي باني اشل الصينية واجبها على راسه...عشان جي بعدت ايدي عنها بسرعه ولفيت ايديني حوالي جسمي...احس بالبرد....! طنشت الغدا...صحيح يوعانه لكن مالي نفس...احس حلجي ظيق من العبره اللي خانقتني ومابروم ابلع شي....! اتجهت للدريشه اللي ماخذه ايدار كامل من الغرفه تقريبا... كنت اتامل السيارات والناس تحت.... يالله كيف تقدرون تعيشون حياتكم طبيعي..!! كيف تقدرون تسيرون وتووون وانا هني بمصيبتي محبوسه مب قادره اتصل حتى باهلي..!! انا... المتعقده والكارهه للرياييل اقوم اتزوج الانسان اللي كان بيظيع حياتي وشرفي وكل شي مهم فحياتي... تزوجت الانسان اللي حاول يعتدي علي...!. تزوجت الانسان اللي غيرني عالكل 180 درجه.... تدريجيا اختفت الرؤية عن عيوني لتجمع الدموع... وبشكل تدريجي الدموع تحولت لصياح بصوت مسموح...قعدت عالارض...امسك راسي بين ايدي... غارقة في دموعي..وحزني... منو يقدر يساعدني وانا بهالوضع.... ماانكر اني فكرت...فكرت وايد ... صحيح اول شي تخبلت وبغيت اخبر اهلي عشان ينقذووني... لكن اهلي في وضع مثل هذا اقدر اعتبرهم اعدائي... لانهم ما اكتفوا بانهم يوزوني هالمجرم... لكنهم في حال اني خبرتهم عن هويته الصدقية...بينفرون مني...بيعتبروني نقطة سودا ...ملوثه...وبهالحال اكثر بيصروون على التستر عالفظيحه باني اقبل بناصر زوج وينتهي الوضع...! مستحيل يفكرون بطريقه مختلفه...مستحيل... انا سبق وتعاملت مع طريقه تفكيرهم...ظلموني وايد...كيف اروح اقولهم احين باللي صار لي مع هالحقير..!!.. بيظلموني اكثر واكثر وبحصل نفسي تحت رحمة ناصر..!! مافي الا حل وحيد... الطلاق.... لكن شو اللي بيغصب ناصر عالطلاق...وليش.؟!.. لازم اني اطلع له الشيب واخسس به... واعامله باسوا طريقه اقدر عليها واقلل من احترامه واعصيه في كل شي لين ما يطلع من طوره ويطلقني... ساعتها برجع لاهلي وبقولهم...ما اتفقنا...!..وهذي هي كل السالفه.. مافيه حل غير هذا.... ولازم ابدا بالتنفيذ... ومن الحين بعد... باصرار وتصميم مشيت دموعي بكم بجامة نومي....لبست شيلتي وتحجبت بها...شليت الغدا وطلعت من الغرفه... الغدا حرام اني اجبه لانه نعمه... لكن الورده...انا اراويك ياناصر... حطيت الغدا الغير ممسوس في المطبخ والورده شليتها...وفي الطريج للصاله قطعتها في ايدي بغيظ...وجلعت كل اوراقها البيظ بعنف... دخلت الصاله شفت ناصر مخلص غدا ويالس يطالع التلفزيون... اندهش من دخلتي مثل الاعصار... تقربت منه وقلبي يدق دق من الخوف لكن لازم اقوي نفسي جدامه.... فريت اوراق الوره والورده نفسها كلها فويهه... انصدم هو وتراجع وهو معقد حياته....وتم ساكت..معقود اللسان... مهرة: خل ورودك لك...واكل مب ماكله من فلوس واحد نذل وحقير..ولا تحاول تستميلني...لانه من سابع المستحيلات اني احس تجاهك بشعور غير شعور الكره والاحتقار والاشمئزاز.. فهمت؟!.. عقيت عليه هالكلام وهو مازال يطالعني مندهش...لفيت عنه ورحت غرفتي بسرعه...بصراحه..كنت اركض.. مادري هذا صوت قلبي يدق بسرعه والا صوت خطواته هو في الممر اللي يفصل بين الصالة والغرف... خفت انه يركظ وراي...لكني يوم وصلت غرفتي والتفت لورا ماكان حد في الطريج...فادركت انه قلبي يلعب بي... سكرت الباب وراي وقفلته... ومن كثر ارتجافي طلعت دموعي مره ثانيه... يارب هالدموع ماتجف..!!.. يلست عالشبريه احظن صورة امايه لقلبي... ليتج كنتي هني يا امايه...جان انتي طلعتيني من هالوضع اللي انا فيه... جان ماسمحتي لحد يظلمني... جان منعتي اشياء وايده.... لكن اللهم لا اعتراض... قعدت اراجع الاحداث...احاول استوعب اللي صار لي.. لكن صعب الاستيعاب فمثل هالامور.. احس اني مصدومه مب قادره اصدق الا يوم اعيش مع الوضع اكثر ويصير بالنسبه لي واقع فعلا...!! تذكرت بالشلل اللي حسيته يوم سمعت صوته.."مهرة".... على طول ذكرته يوم كان فبيتنا ويناديني...بنفس الصوت...نفس اللهجه.. كلمه بسيطه ملفوفه بترجّي واسف..!!.. مستحيل يغيب ذاك الصوت عن بالي....ذاك الصوت اللي سالني وين ابوي..وين اخواني...وين امي؟!.. ساعتها حسيت انها مزحه مثل مامزح معاي سيف يومها.... لكن قلبي نقز من صدري وخلاص...تشللت...حتى النفس ماقدرت اتنفس... ورجع لي صوته..."ذكري الله يامهرة..دخيل والديج.".. حسيت روحي بتطلع مع كل حرف يقوله...مع كل ضغطه من ايده اللي كانت ماسكه كتوفي... يالله كيف الموقف صعب... ماصدقت أي مزحه ثقيله يمزح بها القدر معاي.. كيف من كل الرياييل ماتم غير هذا ياخذني... ليش ياربي وانا اللي كنت كل مايتقرب موعد العرس كنت اجبر نفسي على تقبل الزواج...! ماكنت ادري انه هذا بيكون ريلي...! واجهت اسوا مخاوفي في ليله عرسي...ويوم رفعت نظري له...حسيت ان الهوا اختفى من الغرفه...ماقدرت اسوي أي حركه ماقدرت افكر باي فكره... تشللت من راسي لريولي... شفته يحرك حلجه بكلام لكني ماسمعت شي.... والاغماء ساعتها ساعدني والا كنت بموت فعلا وانا واقفه جدامه..! ليش كل الدعاوي اللي دعيتها على هالريل ما تحققت؟!... لو دريت ان ناصر اللي حاول يعتدي علي هوه نفسه ريلي جان كثفت الدعاوي..!.. عل وعسى يموت وافتك منه..! ليش اختارني انا بالذات عشان ياخذني.؟! لا يكون حظرته يبا يصلح غلطه عشان جي قال لاهله يخطبوني له...!.. انزين ماعليه... انا اراويك..! عاجلا ام آجلا بتدرك غلطتك بانك اخترتني انا مهرة زوجه لك ياناصر...!!! ---------------------------------------------------- اليوم: الجمعه... المكان: صالة شقة ناصر.. الوقت: الثالثه ظهرا.. ---------------------------------------------------- (ناصر).. لا اطالعوني.؟!... ماعندي كلام اقوله..! مازلت مصدوم من سوء معاملة مهرة لي...بس شو كنت اتوقع؟!.. تيني بنظره خجوله وتقول لي مشكور عالورده؟! لكن الصراحه توقعت منها التجاهل وانها تستسلم للعقل وتاكل غداها... مب انها تسوي جي؟!... ترد الغدا وتقطع الورده وتفرها فويهي وفوق هذا تسبني..!!.. العقل مخلني اسكت عنها والاانا ابدا ..ابدا...ماتعاملني أي حرمه بهالاسلوب..!!!.. لكن لانها مهرة... بستحمل قد ماقدر لين ما تتصلح علاقتنا.... الانفصال غير وارد... ادري انها تفكر فيه لكن تحلم اني اتخلى عنها...من بعد ماحصلتها..! من زمان ماكنت احلم حتى حلم اني اتزوجها .... لكن الله كتب لنا مصير ثاني...! ولازم نتعايش معاه..! ولازم افهم مهرة هالكلام....بس كيف؟! يوم هيه حابسه عمرها في الحجره وقافله ...تطلع تهزبني وترجع... وين اروم ايلس وياها وافهمها بالعقل بدون ما اغصبها على شي؟!.. كل اللي اطلبه هو العون من ربي... والباقي مقدور عليه ان شاء الله... بندت التلفزيون ورحت غرفتي... كلمت سهيل... وخبرته عن الفستان...وطمنته على اخته...ويوم قال لي انه يبا يكلمها تورطت...قلت له انها راقده...ويوم بتقوم بقولها تتصل ... سكرت عنه عقب اتصلت بعلي...وسالته اذا العصر وقت مناسب له عشان اشوف ميودي...قال لي ان البيت بيتي متى مابغيت ايي... وانا بصراحه متوله عليه ابا اشوفه ..وبالمره اعطي مهرة فرصه انها تطلع من غرفتها.. العصر وقبل ماطلع...مريت على غرفتها.. وقلت لها بسخرية... ناصر: يور هاينس...(صاحبة السمو).. مهرة: نــــعــــــــم؟! شو تبا؟! ناصر: انا بطلع لساعه او لساعتين تبين شي؟! مهرة: هيه... ابتسمت...الحمد لله فيه تجاوب...وبدت تطلب مني..زين والله.. قلت لها بحماس.. ناصر: آآآآآآآمري بنت خلفان...! مهرة: لا ترجع... تتصورون الالم؟!... اختفت ابتسامتي على طول وحسيت بالجرح.... خلال ساعات بسيطه سمعت من مهرة كلام محد يتجرأ يسمعني اياه ..!!.. ليش كل هالمذله..! ليش متحمل انا..!! كبحت عصبيتي وابتعدت عن الباب شوي...في النهاية قررت اني اتخلى عن محاولة الكلام معاها... صايره وقحه ماتحترم حد...! شليت عمري وطلعت من الشقه وقفلت الباب وخذت المفتاح معاي عن تتخبل وتشرد..!! صرت اتوقع أي شي منها عشان جي اخذ الحذر التام واحاول اني ما اترك فراغات ممكن انها تستغلها..! فبيت علي... لويت على ميودي لين بغيت افعصه متوله عليه بشكل...فديته احسه كبر فغيابي..غبت عنه اسبوعين وانا هب متعود... متعود اشوفه كل يوم واحيانا كان يبات عندي... بس كنت اغار شوي من علي لاني احس ميودي متعود عليه اكثر ...ماينلام هو طفل وبيتعود عاللي يشوفه اكثر من اللي يشوفه ساعه او ساعتين في اليوم..!!. مع اني احاول قد ماقدر..ما اترك وقت فراغ الا واستغليته مع مايد....هذا ولدي...ولدي وولد سعاد...يتيم الام... وما انسى ابدا اني قصرت فحق امه وايد ...عشان جي مستحيل اقصر فحق مايد دامني قادر.. وان شاء الله قريب...قريييب بينتقل ميود عندي بشكل دائم... بعد ما اتفاهم مع مهرة... اذا يبت لها ميود احين بتفرني انا والولد من الدريشه..!! دام ورده ماقبلتها بتقبل ياهل؟!.. الله يستر من هالمهرة بس... اخاف اني غلطان فمعرفتي بشخصيتها..! وفي النهاية ماتيوز لي ولا تعيبني وبدال ماحبها ابدا اكرهها... والله اذا تمت تعاملني جي...! الواحد مايقدر يمسك نفسه لازم اني بنفر منها... بس الله بيصبرني ان شاء الله وبقدر اصلح الامور بينا...! قعدت مع ميودي ساعه ونص تقريبا...وقلت لعلي اني بمر باجر الصبح اشل مايد واوديه المستشفى للفحص المعتاد... وبالمره بسال الدكتور عن الحبوب اللي في ريل ميود...علي يقول حساسية عادية وتصيب اليهال دايما.. بس لازم اطمن واسال الدكتور واخليه يعطيني دوا حقه..! خلصت زيارتي وصار لازم ارجع الشقه... فتحت باب الشقه...وعلى طول التفت للصاله على يساري...لاني لاحظت حركه هناك... كانت مهرة...يالسه اطالع التلفزيون...ومن شافتني ارتبشت وقامت ادور شي حواليها..بشكل سريع.. لين ماحصلت الشيله ولبستها سيده...!!! انقهرت.. شو تبا بالشيله الغبية انا ريلها..!! زين...عناد بعناد يامهروووه وبشوف منو يغلب..! سكرت الباب وراي وانا معقد حياتي وزام بوزي بحركة معصبه...! ويييت صوبها وهي اطالعني بعين خايفه وجسم كله متوتر ومتاهب للدفاع عن النفس...!!! وقفت جدامها وعقدت حياتي اكثر وانا اطالع قمة راسها...سويت عمري مركز على شي معين.. ناصر: شو هذا على راسج؟؟!!.. عقي عقي الشيله ..! بطلت مهرة عيونها... مهرة: شوووو عراسي؟!.. ناصر: وايد الصراصير في الشقه... صرخت مهرة وفرت الشيله عالارض وركظت بعيد... خلتني اموت من الضحك...مسكت بطني وانا اضحك ووخيت اشل الشيله... ناصر: صدقتي انتي؟ لو شي صراصير في الشقه جان تحولت عنها سيدا... شهقت مهرة وعقدت حياتها... مهرة: طول عمرك....سبال...!! ابتسمت بسخرية... ناصر: ماغيرج سباله.... مهرة: عطني شيلتي..! ناصر: تبين تشوفين شو بسوي بها؟! اوكيه... رحت للدريشه ..بطلتها..وفريت الشيله برا.... من الطابق اللي نحن فيه لين تحت والشيله اطير في الهوااا...تمتعت وانا اشوفها تبتعد عن راس مهرة قدر الامكان...تمتعت لدرجه اني ضحكت...! صرخت مهرة باستنكار... مهرة: شوووو سويت؟؟!!..ليش فريتها؟!... حسبي الله عليك شارتنها بــ.... مادري نسيت كم بس غاااااااليه..!!.. سكرت الدريشه والتفت لها.... ببرود... ناصر: هذا بيكون حال أي شيله اشوفها على راسج دامج وياي بروحنا.....انا ريلج والا نسيتي؟! مهرة: لا مانسيت حد ينسى مصيبته؟!..بس مابتم دايما ريلي واصلا انا ما اعتبرك جذي... بحركه سريعه مسكت ايد مهرة وسحبتها صوبي...وقلت لها بتهديد ...ويهي كان قريب من ويهها...وحسيت بالخوف يطفح من خلاياها... مهما تظاهرت بالقوة مهرة مازالت تخاف مني... ناصر: انا ريلج...وبتم ريلج...لين يفرقنا الموت...رظيتي والا مارظيتي...فكره الطلاق او الانفصال شليها عن بالج نهائيا لانها مستحيل تصير...فاهمه؟ مهرة كانت تحاول تسحب ايدها وتبتعد... لكني اقوى منها اضعاف...وماكانت تقدر علي... قربي منها اتاح لي الفرصه اني اشوف الدموع تتجمع بسرعه فعيونها... مهرة: ليش انزين؟ انا ماقدر اعيش وياك ....ليش تغصبني عليك انته مب ريال تغصب حرمه انها تعيش وياك... ناصر: باجر بتتعودين....والكره بيتحول لحب...وعقب بتحمدين ربج لاني من نصيبج..! ظحكت على نفسي ...هذي كلها امنيات...وقلتها بس عشان اغايظ مهرة شوي واجبرها عالكلام اكثر معاي... احسن من انها حابسه عمرها في الحجره وماتكلمني..! مهرة: تحلللللم والله....مستحيل هالشي يصير.....انا مب غبية..! ابتسمت... ناصر: بنشوف... حاولت تتراجع اكثر... مهرة: فجني...خلني اروح... اما انا...فكنت مستمتع بمنظر شعرها اللي بدا ينفلت من ربطته من زود ماهو ناعم..!! ناصر: لازم نتكلم... مهرة: انا ماريد اكلمك او اشوفك.... ناصر: انا خليتج فتره طويله عشان تهدا اعصابج ومانقدر ناجل الكلام اكثر... مهرة: كل اللي بتقوله مايهمني.... ناصر: اوكي عالاقل سمعيه... صرخت مهرة فويهي... مهرة: ماااااااااااااااااااااااااااااريد.....!! عصبت بي..... انا محد يصارخ فويهي..!! سحبتها من ايدها وفريتها عالكرسي..وانا اقول.. ناصر: بتسمعين يعني بتسمعين...!! يلست عدالها عالكرسي ورديت امسك ايدها عن تشرد عني... وهي تحاول قد ماتقدر تلز عني لطرف الكرسي واطالعني بنفور... لكن على أي حال المسافه بينا ماتتعدى الانش...! سكتت مهرة... وسكت انا.. الغريب اني ظعت في ملامح ويهها الناعمه وشعرها اللي انفتح يوم عقيتها عالكرسي وانتشر حوالي كتوفها وويهها...نساني كل الكلام المنمق والمحضر اللي كنت حافظنه عشان اقوله لها... ماعرفت من وين ابدا... ناصر: آآه.... اول شي..كلتي؟!.. مهرة: ................... مهرة كانت منزله عيونها ماتبا اطالعني...وكنت حاس ان دموعها تهدد بالنزول مره ثانيه...ياربي ماتشبع من المفاتن والصياح هالبنت..!! ناصر: كلتي شي والا تبيني اغصبج احين... مهرة: ......كلت... ناصر: ياحيج...آآآ.... الصراحه مهرة...انا.. انا اسف... عاللي سويته فيج.... ماكنت ناصر الي تشوفينه جدامج كنت واحد ثاني انا نفسي ماعرفه.... لاحظت ان ملامح مهرة تغيرت... عقدت حياتها وحمر ويهها ورجعت تحاول تسحب ايدها مره ثانيه...الظاهر الذكرى مؤلمة لها وايد....مب الظاهر الا اكيد ... ناصر: الله شاء انه اسوا حالاتي تطلع فحضورج...صدقيني عمري ماسويتها من قبل اني اتحرش ببنات الناس...ولا سويتها من عقبج بعد....الشيطان قص عليه ساعتها وبعد كنت في حاله بخبرج عنها عقب مب الحين...لكن اباج تعرفين اني ندمان اشد الندم.... مهرة: وعشان جي حظرتك خطبتني عشان تكفر عن جريمتك..!! ناصر: لا مهرة... انا ماخطبتج...هلي خطبوج لي...وانا يوم دريت كنت بفج الخطبه لكنهم اقنعوني اني اسكت واتقبل الموضوع.. شهقت مهرة... مهرة: خبرتهم باللي سويته فيني؟!!! ناصر: لالالالالالا محد يدري....اطمني.. بس هم كانوا يحاتون عرسي من متى ... وامايه شافتج وخطبتج....انا يوم دريت انصدمت..وكنت برفض الخطبه مب لاني انا ماباج.. لا والله اني اتمناج...بس كنت برفض عشانج لاني مابالج العذاب واعرف انج مابتتقبليني.... ابتسمت مهرة ابتسامه معصبه وساخره... مهرة: مع ذلك خذتني..... ناصر: نصيبي ونصيبج...ويوم توثقت العلاقه بين العايلتين والخطبه صارت رسمية...بديت اخطط بالمحاوله... مهرة: تحاول لشووو..؟! ناصر: احاول اني اعوضج... مهرة: لو تركتني فحال سبيلي بيكون احسن تعويض لي... ناصر: لكن هالشي ماصار وانتي حرمتي احين.... مهرة انا حاولت كم مره اني اعتذر منج..تذكرين يوم لحقتج لين الجامعه...تذكرين يوم شفتج في البيت...وعلى فكره شفتج بعد مره في المستشفى لكني مابغيتج تشوفيني كنت اكلم ابوج ساعتها فعطيتج ظهري بس عشان اريحج من شوفتي لاني اعرفج تكرهيني...!! اطالعتني مهرة بنظره ماعرفت افسرها.... وتمت ساكته.... ناصر: في النهاية عرفت ان محاولاتي كلها بتخيب...لانه الظروف الاجتماعية ماتسمح اني انفرد بج واكلمج واعتذر منج عاللي سويته فيج...والله يومها ماكنت واعي لتصرفاتي..حتى لو تذكرين فجيتج اخر شي وانا مصدوم لاني انتبهت على نفسي.. سحبت مهرة ايدها من ايدي ...ورفعت ايديها الثنتين تغطي اذنها وغمضت عينها...ودموعها على خدها تسيل..! مهرة: لا تذكرني...لا تذكرني كفاية الله يخليك... باندفاع ثاني مسكت يديها الثنتين ونزلتهن...مسكت يدينها بقو بين يديني... ناصر: صدقيني مهرة حلفت بربي ومابحلف بالجذب...والله العظيم اني ماكنت فوعيي... ودفعت ثمن غلطتي خلال السنه اللي طافت كلها...ماقدرت اتخلص من الاحساس بالذنب والمسؤوليه...صرت مهوووس فيج ... افكر فيج حتى في اصعب اللحظات على نفسي.... دايما دايما محتله افكاري.... مهرة: الكلام ببلاش....لكن منو اللي بيصدقك عاد...! ناصر: مهرة... انا اسف والله....دخيلج سامحيني وخلينا ننسى اللي صار ونعيش بهدوء.... شهقت مهرة وعقدت حياتها وهي اطالعني بعصبية واستغراب... مهرة: ولك عين تطلب مني انسى؟!!!...انته كنت بتدمر حياتي...!! ناصر: ادري ان اللي سويته مب بسيط.. مستعد ادفع عمري كله شرط تسامحيني.... مهرة: مستحيل اسامحك...مستحيل... تركت يديها وتراجعت شوي عنها.... مهرة مابتتفاهم بهالاسلوب.... لازم الواحد يجبرها عالتعايش مع هالوضع ..شوي شوي بتنسى... شكلي وايد متفائل..!!..لكن شو اسوي....اتمسك بهالخيط الرفيع من الامل...! تنهدت تنهيده طويله اهدي فيها اعصابي ومشاعري المتظاربه.... ومهرة تراقبني بحذر وكره... ناصر: اوكي...قومي بنطلع نحوط عقدت مهرة حياتها... مهرة: شووه؟! ناصر: قومي ..بدلي هالبجامه اللي مب طايعه تعقينها من الصبح...تعدلي شوي لبسي عباتج وشيلتج وقومي بنطلع.... مهرة: انا ..اطلع وياك انته؟!... وايد حظرتك مصدق نفسك.... عن اذنك...! صرخت بالكلمه الاخيره فويهي وقامت مهرة تمشي بسرعه واطراف شعرها اطير وراها....وطيرت عقلي انا بعد وياها...قمت نشيت وتبعتها... وصلت حجرتها وكانت بتسكر الباب لكني مسكته بسرعه...دخلت بالغصب...مديت ايدي وسحبت مفتاح الحجره.... مهرة: عطني المفتاح....! ناصر: يوم بشوفج تلبستي ووتجهزتي... بعطيج المفتاح...اعطيج اياه احين عشان تقفلين على عمرج؟ لا اسف..! نظرات مهرة وحركاتها وانفاسها كله دليل على انها شوي وبتتخبل من الياس...اكيد يائسه ماتقدر علي لانها وهي تعرف هالشي عدل..! مهرة: ماريد اطلع وياك ماريد... ناصر: ماكنتي تبين تاخذيني بس مع ذلك خذتيني.... يت على طلعه..!!.. مهرة: حظي النحس اللي يعقني على دربك دووووم... ناصر: وحظي الحلووو اللي خلاج من نصيبي....وبعدين ليش مارتبتي اغراضج للحين... مهرة: لاني برد بيت اهلي اخر الاسبوع.... ناصر: ههههههههههههههههه وايد متفائله...صح انا وعدتج ....بس مابتمين عندهم غير ساعات معدوده وعقبها بنرد هني... مهرة: خلني اوصل بيت اهلي وبتشوف شو بيصير... ناصر: انزين ولين نوصل بيت اهلج بعدنا سبع مادري ست ايام... لازم نقضيها بشي...يالله اشوف بدلي ثيابج.. صرخت مهرة بهستيريا...! مهرة: اطلع براا... ناصر: هممممممممم بعد صلاة المغرب بالضبط تكونين جاهزه....ان ماجهزتي حلفت بالله اني ياشلج ببجامه نومج وماعليه منج....تسمعين؟!.. مهرة:................... كانت اطالعني بقهر يائس... مقهوره ومب عايبنها الشور الود ودها مقطعه ويهي...لكن تعرف انه مابيدها حيله غير انها اجاريني... ناصر: بعد الصلاة على طول.... خليتها وسكرت الباب وراي... بعد مارجعت من المسيد....رحت لغرفتي وانا اتبسم...بدلت التسفيره بسفره وعقال...وتسبحت بالعطر...طالع ويا حرمتي لازم الناس تشوفني كاشخ... الله يستر بس من مهرة لا تقوم تعصب علي وتخرب علي الكشخه... رجعت لها...دقيت الباب وفتحته... حصلتها يالسه عالشبريه..تلبس نعال فيه ربطات...اطالعتني بعصبية وظيج يوم دخلت...وشافتني كاشخ... وانا بعد اطالعتها بظيج يوم شفت ويهها اجلح املح... ناصر: شوووو هذا مب حاطه شي عويهج...!! مهرة: وان شاء الله تباني اتعدل لك؟! كانت مهرة تتكلم وجنها جازّه شي...ولايعه جبدها منه... ناصر: شحقه عيل انا متعدل لج؟! مهرة: مالت....محد طلب منك والله... ناصر: اشوف شو لابسه.... مهرة: ناصر اتق ِ شري احسن لك وبلا هالحركات..!! رفعت سبابتها تهددني... وضع استفزني ...بعث التحدي في نفسي....خلاني اتقرب منها وعلى ويهي ملامح التكبر... ناصر: شو بتسوين هااه..راويني شو بتسوين يالله ... ابتعدت مهرة عني لكن كانت الشبريه وراها بالتالي يلست عليها غصب...ابتسمت...مديت ايدي وسحبتها عشان توقف... ناصر: انا قلت..راوييني شو لابسه... مهرة: شو هالحركات البايخه انا ماريد اطلع وياك وماريد اراويك شي خوز عني... ناصر: لا تخليني اعيد كلامي.... حاست مهرة بوزها وفتحت العباه تراويني....كانت لابسه كندوره فخمه مفصصه.... ناصر: هذا اللي قدرتي عليه؟ ليش مالبستي بدله..!! مهرة: هذا اول شي طاحت عليه ايدي محلاتني وانا اتنقا لك اللبس والله....قوم زييين... دزتني وراحت بعيد صوب التواليت... ابتسمت... ناصر: انزين يالله حطي شي عويهج...عنبو لو جحال بس... مهرة: مابا...مالي هوس...المكياج يباله بال رايق وانا لايعه جبدي منك...! ناصر:.. همممممم خلاص...حلوه مثل ماانتي... بس مابغيت الناس تقول ناصر احلى من حرمته كيفج..!! مهرة: لا عاد انا اهتميت..!!..انا اشوفك اشين الناس... ناصر: الغيره هذي ترمس...طوفي طوفي جدامي... كنت اقوي قلبي غصب واجبره انه مايتاثر بسوء المعامله...شوي شوي مهرة بتتقبل هالمعامله بتسكت..وبعدين بتبادلني اياها... كنت اتعمد ما ابين لها جرحي من كلامها...لانها اذا انتبهت على جرحي...بتكرره وبتفنن فيه... لكن اذا ادركت انه مايهمني.... بتتخلى عن المحاوله... لكن متى؟! كل شي يعتمد على عنادها وصلابتها...! اما وين بطلعها..!! والله مادري..! بشوف شو يطلع معاي... -------------------------------------- اليوم: الجمعه... المكان: سيارة يوسف.. الوقت: السابعه مساءا.. -------------------------------------- (يوسف)... طلعت من المسيد وركبت سيارتي...وشغلتها... كنت متواعد مع خالد نروح نلعب كوره في النادي... لكن بتكسر ان سرت العب كوره وبالي مشغول بناصر..! ليش مادق لي لين احين؟!.. ماينلام لاهي وياها...والله يستر شو صار بينهم... بعد تردد دام عشر دقايق مسكت تيلفوني واتصلت به... ناصر: آآلووه... يوسف: هلا نااااصر... ويييييييييييينك؟! ناصر: ههههههه هني...شحالك يوسف.. يوسف: بخير وسهاله...انته شحالك ؟ ليش مادقيت لي من الصبح اترياك ادق لي... ناصر: والله اني ارتبشت وياها.... يوسف: شو صار؟!.. سمعته يضحك بسخرية.. ناصر: شو صار؟... اخوك تهزأ.. فعمري محد سبني وعاملني بطريقه زفته مثل هذي... يوسف: ول...لهالدرجه؟!.. ناصر: وانا حاس انه المصايب يايه في الطريج.. يوسف: شو هالرمسه الفارطه خبرني بالتفصيل شو صار من اول ماشافتك؟... ناصر: مثل ماتوقعت ماكانت تعرف اني انا...من سمعت صوتي وشافتني اغمى عليها..نشت الفجر تربع شرق غرب في الحجره تبا تشرد عني... قتلها بوديج عند اهلج وهدت شويه..قصيت عليها وشليتها بوظبي.. يوم درت في الطريج وتمت تباغم وتصيح..ومن دخلنا الشقه حبست عمرها في الغرفه ...انا رقدت ونشيت الظهر حصلتها صارقه مفاتيحي وتبا تبطل باب الشقه وتشرد..! يوسف: خيبه..!!!... شفيها ينت هذي؟! ناصر: هي والله تخبلت عليه....عصبت انا فجيت لها الباب وقتلها طلعي الباب مفتوح وسرت اتوظى ويوم رديت حصلتها يالسه عدال الباب وتصيح..!!.. يعني مول الواحد مايتوقع تصرفاتها كيف بتي...قتلها ليش ماطلعتي قالت وين اطلع اروحي؟!... يوسف: هههههههههههههههه حليييييييييييلها يا ناصر طول بالك عليها... ناصر: تراني مطولنه واخاف اتخرطف به واطيح بعد على ويهي.... يوسف: هههههههه...الله يعينك...وشو صار عقب؟ ناصر: ماشي..سرت اييب غدا رديت حصلتها قافله على عمرها... تصرفت بطريقه عشان ادخل الغدا عندها في الغرفه عشان اتغدى لانها ماطاعت اتغدى وياي... مامرت دقايق الا وهي راده الغدا المطبخ...ويايبه الورده اللي يبتها لها قطعتها وفرتها فويهي وهزبتني هزاب وسبتني...وردت تنخش...! يوسف: وعقب شو صار؟! ناصر: العصر سرت انا اشوف ميود...يوم رديت قراب المغرب حصلتها في الصاله...مسكتها غصب حاولت اكلمها واعتذر لها لكن هي ميبسه راسها واللي صار بينا وايد محطمنها وماتبا تتذكره.... يوسف: شي اكيد ناصر شو كنت تتوقع....؟..اصبر عليها شويه... ناصر: والله اني صابر والا مافيه حرمه تعاملني وتسبني جي واسكت عنها.... يوسف: الله يعينك..وعقب شو صار؟ ناصر: الحين غصبتها عالطلعه... شهقت انا... يوسف: ياغبي...ترمس جدامها؟! ناصر: لااا....هيه في السياره وانا نزلت اطالع شو من الافلام المعروضه في السينما...ماحصلت افلام تستاهل وكنت برد السياره يوم انته اتصلت...وفضلت اني اتم بعيد عنها لين ماخلص... يوسف: يعني مابتحظرون فلم؟ ناصر: لا...ماحصلت فلم يتشاهد...! يوسف: ودها البحر... ناصر: شو نسوي في البحر..!! يوسف: ريحوا اعصابكم شوي... ناصر: اخافها تعق عمرها تبا تنتحر...! يوسف: ههههههههههههههههههههههههههههههههههه الله يغربل بليسك...لا تفاول عالبنت.. ناصر: والله يا يوسف اني احس نفسي خايض معارك... خلال هالفتره البسيطه....واحس حيلي منهد وابا ارتاح بس متى مادري!!... وضع مهرة جي مب مساعدني عالاستقرار ماحس نفسي مرتاح... يوسف: تحمل ياخويه وان شاء الله بتتصلح الامور... بس قول لي...يوم شفتها مره ثانيه شو شفت عمرك تحبها او لا.؟!.. ظحك ناصر.. |
| الساعة الآن 06:49 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir