مرحبا بالجميع
عسى ما تاخرت عليكم
ادري ما تاخرت
الجزء الثالث
الفصل الاول يترياااكم ..

رن تليفون موزه .
موزه: الوه مرحبا الساع // بخير ربي يسلمج // هيه ظهرت لا مش اخويه اللي شلني // ولد عمي يالسوسه/// يالله مع السلامه .
سكرت وطالعت حمد : ما شاء الله الاخ مشهور في التقنيه ..
حمد يضحك: كيف هاي بعد !!!!!؟
موزه : وحده شافتني اركب سيارتك وعبالها اني وحده من ربيعاتك .
حمد :تخسي الا هي .. وبعدين انا ما عندي ربيعات ذاك اول ..
موزه : مادري عنك !!!
حمد : خلينا هالسوالف من زمان لخاطر عيونكم.
موزه سكتت وبخاطرها : لا هذا اللي ما ابغي واصل له .
حمد : موزه ,,, بغيت اقولج شي ؟؟
موزه مرتبكه وبخاطرها : شو بتقووول ..لا دخليك
حمد :انــــا هو !!!
موزه تتطالعه مستغربه : انته من!!!!!!!!!!!!!؟
حمد : رااااعي الرسايل .....
انصدمت موزه من حمد يوم قالها انه راعي الرسايل // يوميا يطرشلها // صباح الخير // مساء الخير ما يوقف رسايل الحب والشووووق // وهي حيرها هذا المجهول اللي مايلاقي رد منها ومع هذا بعده مصر ويكمل ..
حمد :يالقاسيه انزين مسج واااحد عبرينا ..
موزه منصدمه : بس هذا مش رقمك !!!!!!!!!!!!!!!!
حمد: هذا رقمي الثاني اللي ما فيه غير اسمج .
موزه ماعرفت شو تقول يلست سااكته من الصدمه !!
شافها حمد متوتره وحالتها مش طبيعيه سكت عنها ووصلها البيت وراح بيتهم ..
موزه راحت حجرتها سكرت الباب ويلست تصيح من الخاطر // وعقب ما سكتت : انا ليش اصيح ,,,, انا ما احب حمد ,, بس حمد هو رااعي الرسايل ,, وانا كنت امسح الرسااايل ,, ليش متضايقه على الساالفه !!!! // والله قهر حمد لييش ياحمد ؟؟؟؟؟؟؟
حمد من بعد السفره كل ما طرى على باله يسير بيت عمه بعذر بسلم على يدي ويدتي وهذ ا كله لشوف موزه // وموزه حست انها المقصوده بهالزيارات .
موزه قبل دوم تسير بيت عمها عند شجون ,,, وشجون تئ عندها بس من عرفت موزه ان حمد يكن لها مشاعر خاصه ما قامت تروح عندهم تلاشيا لاي موقف محرج معاه وشجون ما قطعت العاده بعدها بتروح عندها .
موزه بحاجه حد تكلمه,, تشكيله همها ,, بس شجون في هاي السالفه بالذات ماتنفع لانها اختهـ ...
......................

حمدان : الــوه // مرحبا السااع
مهره: الله حــيــه .
حمدان : اشحالج حيآآتي؟
مهره : طيبه طاب حالك يالغالي ومن صوبك؟
حمدان: احينه دامني سمعت صوتج انا بخير // آآه احس لي فتره ما رمستج
مهره تضحك: وين من فتره توك البارحه رمستني !!!
حمدان: ادري بس اشتقتلج .
مهره: صدق والله ؟؟؟
حمدان : هيه صدق حيآآتي تولهت عليج وااايد .
مهره : فديتك روحك .
حمدان : وشو بعد ؟؟
مهره : بعد متولهه عليك وااايد .
حمدان : و بعد ؟؟؟
مهره : ادري فيك وين تبغي توصل بس مآآشي لين هني وبس .
حمدان :آآه منج انتي حارمتني شوفتج لآآآ تحرميني من كلامج الحلو .
مهره : حمدان صح انا وخالي باكر بنسير بوظبي.
حمدان: قولي والله .. مــــتـــى وويــــــن؟؟؟؟
مهره : بنسير المارينا .
حمدان : والله خلاص عيل انا من الصبح بكون هناك .
مهره : لا شوو انته تبغي تفضحني عند خالي // لا فديتك لاتسير ولا شي.
حمدان: مهآآآآري تيين بوظبي وما اشوفج مستحيل انا من متى ابغي اشوفج كل ما اكون في العين ما تتطيعين بس بشوفج ما قتلج تظهرين معاي .
مهره : حمدان حبيبي افهمني خالي معااي .
حمدان: انزين من بعيد //مابيحس خالج .
مهره :وبعدين انا متغشيه كيف بتشوفني ؟؟
حمدان : مهره لا تسكرينها بويهي دخيلج ,, ارحمي حآآلي هذا اذا كنت هامنج ؟
مهره : والله حاسه فيك //وانا ودي بشوفتك بس تعرف فديتك اني خوااافه خصوصا ان خالي معاي برتبك وبنفضح .
حمدان : صح ليش يايه المارينا؟؟
مهره : خالي ياني وقالي باكر بوديج المارينا .
حمدان : بدون سبب!!!
مهره : هيه بدون سبب .
حمدان : انزين كيف شكل خالج //وأي خال من خوالج؟؟
مهره : انا شو خلاني اقولك اني سايره بوظبي ؟؟
حمدان عصب : خلاااص لا بسير ولا شي روحي انتي وخالج واستانسواا على راحتكم .
مهره : هدي ,,, هدي // مايسوى عليك تعصب وتصارخ .
حمدان : اكيد بتقولين ما يسوى عليك // اصلن انتي مش هامنج امري .
مهره : حمداني // حرآآآآم عليك لا تقول هاي الرمسه .
حمد يدخل عند خوه ....
حمدان : اقول // بسكر احينه يالله فمان الله .
مهره : لا اصبر حمدان ...
حمدان سكر الخط .
حمد : بلاااك معصب ؟؟؟
حمدان بعصبية : ماااشي ... شو فيك ؟؟؟ بغيت شي؟؟؟
حمد: خيبه هدي // لا خلاص ما بغيت شي وبخليك تكمل مكالمتك المصيريه .
حمدان : يكون احسن .
حمد: اف .. لا الريال صدق معصب وواصل حده اخلني اظهر احسلي عيل!!!!
حمدان معروف في العيايله انه انسان عصبي زياده عن اللزم ويوم يعصب محد يقرب منه.
عصب وااايد على مهره : برآآآيها تسير بوظبي ,, تسير المريخ كيييفهااااا.
مهره بخاطرها : اكيد زعل مني ياربي ,, انا شو خلاني اقوله اني سايره بوظبي ,, شو اسوي معاه ؟؟؟؟؟؟؟ // اف دام السالفه فيها زعل خلاص ما بسير بوظبي .
ام مهره : مهـــــره
مهره : هلا امايه يااايه
ام مهره: وينج ؟؟
مهره : موجوده ياطويلة العمر .
ام مهره : سيري لبسي عباتج بنسير عند خالج .
مهره : أي خااال؟؟
ام مهره : عند خالج منصور .
مهره :امايه احينه // خليه باكر .
ام مهره : يالله وعن العيازه .
مهره : اوكيه دقيقه وباييج .
................................

العمه فاطمه (ام راشد) : سلطان ارحم عمرك من هذا الكمبيوتر .
سلطان : عاادي ,, يامايه تعودنا .
ام راشد : شوف عيونك كيف صارن .
سلطان : آآآه ياعيوني /// خلاص مليت منه هذا .
ام راشد : انته تمل من الكمبيوتر ما ظني .,. وراحت عنه .
سلطان بخاطره : مليت منه ,, وكرهته بعد ما خلتني ... حتى الرد ما ردت عليه ,, تعآآتبني رااضي ,, تسبني والله راااضي ,,, تسوي اللي تسوي فيني راااااضي ,, بس تبعد بدون ماتقول أي كلمه اتعــــذب والله //// بطرشلها اخر ايميل ان ردت كان بها وان ما ردت بحااول اني انسى وحده عرفتها اسمهااا فاطمه .
سلطان : شو اكتب لهااا ؟؟؟؟ // بكتب كل اللي بخاطري :
السلام عليكم والرحمه
فطااااامي
ماتدرين كيف حالتي دخييلج ارحمي حاالي والله اني متعذب
ردي عليه
قوليلي اللي بخاطرج ادري اني غلطت بحقج
عاتبيني / قولي شي
لآآ تخليني على هذا الحال يرحم والديج
واتريا منج رد شووو ماكان
اتريااااااه
حبيبي كان ماتدري ترى حبك بدا يسري
في دمي وانته ياعمري سكنت بداخل الشريان..
// سلطان \\
.................................................. .....

حمد بعد ماشاف حال موزه يوم قالها انه راعي المسجات وقف مسجاته // تذكر قبل لاتنزل موزه من السياره شافته بنظره حسها تقوله : ليش ياحمد ؟؟!!
موزه كانت متعوده على راعي المسجات وعيبتها السالفه يصبح عليها ويمسي عليها ومسجات حب وشـــوق وحست انه حد تعرفه والا مابيسوي كل هذا بس حمد ماتوقعته!!!!
خالد يدق باب حجرة موزه ..
موزه : انزين دقيقه // قامت وفتحت الباب .
خالد :مشغوله ؟؟
موزه : لا مش مشغوله حيااك .
خالد : ها شو التقنيه معاج // ان شاء الله تمام ؟؟
موزه : الحمد الله بس تعب تعرف اول كورس وبروجكتات وحشره يعني .
خالد :واضح عليج ضاربه مخفي ما نشوفج واايد شرات قبل .
موزه : شو نسوي ياخوي ؟
خالد : الله يعينج .
موزه : ويعين الجميع .
ريم تدخل عندهم : خالد ,, شوف احمد ضربني .
خالد : انا برويج فيه هذا ما ييوز عن طبعه .
موزه : وانتوا دومكم ضرابه .
..................................

تنام مريح خالي مستريح وانا بايت مشجيني الغرام
عليه في الهوى غاذي شحيح وانا من دون حسك ما انام

وديمه حست ان راشد انقطت اخباره ,, بدا يبعد ..انشغلت واايد عليه وتيها مليون فكره في راسها يمكن ,, ويمكن ,, ويمكن ..
في ليله كانت راقده وعلى الساعه 2ونص بالليل نشت من حلم مزعج : اعووذ بالله راشد ,, راشد فيه شي ؟؟ حاسه انه فيه شي //// بدون تفاهم شلت تليفونها ودقت له تبغي تطمن عليه ...
راشد ما يرد عليها // خافت عليه اكثر ردت اتصلت مره ثانيه مارد عليها ..
وديمه : ياربي ليش مايرد دخيلك رد وطمني عليك .
راشد نش من الرقاد وقبض تليفونه بدون ما يشوف الرقم : الــــــوه
وديمه فرحت ان راشد رد عليها : رااااشد انته بخير ؟؟
راشد مش حاس بعمره : حمد شو تبغي احين تعبان فيه رقااد.
وديمه مستغربه شكله مسطل: خلاص كمل رقاادك وتصبح على خير .
راشد حتى ما رد عليها سكر التليفون وكمل رقاده .
واليوم الثاني بالصبح حمد وراشد في المعهد .
راشد : انا شفت ناس مزعجين بس شراتك مش شايف!!!
حمد مستغرب : أي ازعااج؟؟؟!!!!!!!
راشد : احين أي ازعاج ليش داق البارحه في عز الليل.
حمد: ما دقيت شكلك تحلم!!!!!!!!
راشد : عن الخرط عيل انا كلمت منوه ؟؟؟
حمد يضحك : قتلك شكلك تحلم.
راشد: بتجنني انته المكالمات هي اللي بتبين من الصادق .
حمد : ياخي تحلم يالله تاكد بعد .
راشد منصدم : ر .. رقم .. وديمـــــــه.
حمد : هااا شووو وديمه !!
رااشد : وديمه دقتلي البارحه وانا عبالي انته !!!!
حمد : وانته ما تفرق بالاصوات والا ما شفت الرقم.
راشد مستغرب : كنت راقد وتعبان وما حسيت بشي .
حمد : انزين شو قلت؟؟ //على بالك انا هااا!!
راشد : ما اذكر ولا شي بس اللي اذكره اني رديت وقلت تعبان فيه راقد.
حمد : ما لومك من نومك حشى نوم اصحاب الكهف.
راشد: وديمه داقه شو السالفه ؟؟؟// ومتى بالليل !!!!
حمد: غريبه !!
راشد :بدقلها بشوف شو السالفه ؟
حمد :هيه دقلها // يالذكي في المدرسه .
راشد: اوووه نسيت // احين شو بيصبرني ؟؟
حمد: امش اخرتناااا يالله ..
..........................................

وصل مسج لحمدان من مهره :
صباح الخير
حبيبي انا ما بسير بوظبي
دام السالفه زعلتك كنسلت الروحه عسب خاطرك بس ..

راشد طول فتره الدوام ما قدر يستوعب اي شي وفكره عند وديمه ,, ليش داقه شو السالفه ؟؟ شو قالتلي !!! وانا شورديت عليها؟؟
مليون سوال يدور في راس راشد بدون واي اجابه !!!!
وبعد ما خلص الداوم..
راشد: حمد شو اسوي ؟؟؟
حمد: في شوه ؟؟
راشد: في شوه بعد في سالفة وديمه الله يهديك .
حمد: هيييه // دقلها وشوف شو سالفتها.
راشد: بــــــس يابردوك!!!
حمد: عيل شو تبغيني اقولك مثلا ؟؟
راشد : ما شي سلمت .
حمد : حتى ان قتلك شي انته ما تسويه // ادريبك عنيد .
راشد :اوكيه فهمنا //يالله خلنا نروح .
............

بالعصر
موزه حست بفراااغ عااطفي ودها تكلم حد بالسالفه ودهااا تتطلع اللي بداخلهاا وتقول احب راشد وحمد يحبني شو اسوي متعذبه بين نارين ؟؟؟؟
موزه : مالي غير شجووون بدقلها وبخليها تييني ..

نهاية الفصل الاول من الجزء الثالث
سلطان بعده يتريا الرد من فاطمه..
راشد شو بيسوي بسالفة وديمه ؟؟؟
موزة بتخبر شجون عن سالفة حمد ؟؟
اسئلة تتريا اجابات منكم ..
ترقبوا احداث الفصل الثاني من الجزء الثالث