مر شهر وساره أدور ع وظيفه ما خلت مكان الا وقدمت اوراقهـا..كل ما تذكرت هزاع يوم راغها من الشركه كانت اتحس..ان ها الموقف صار البارحه..

كرهت هزاع كثر ما كرهت نفسها لانها تعلقت به وايد..صادفتها أيام سوده..

الي ونسها من هاك اليوم ..ان طلع لهم بيت شعبي..و انتقلوا هناك ..وخلوا بيتهم الجديم إجار..

بس كانت اتعرف ان فلوس الاجار ما اتسوي شي..وفلوسها الي في البنك جربت اتخلص..

كل يوم ايمر اتحس ساره اسوأ من اليوم الي قبله..

احيانا كانت اتفكر اتصرف من 10 الاف الي عطاها هزاع ..عشان زهبت اخته..بس تتراجـع ..لانها ما تبا تثب له انها صج حراميه..

احتارت كيف اتوصل باجي المبلغ و الملابس الي شرتها لاخته..

لان ما باجي غير شهرين ع العرس..في البدايه كانت اتحاول تتصل لـ بو هزاع او الدريول بس كانت تتراجع عن قرارها باخر لحظه..قررت انها تبعد نفسها عن هاي العايله..

لانها من عرفت هزاع يابت لنفسها المشاكل و عوار الرأس..

كانت تبتسم وتتمصخر ع عمرهـا انا سرقت ربع مليون من الشركه...وينها لو عندي جان ما درت بالشوارع كل يوم ادور لي وظيفه..

اتنفست مضايجه من حر الشمس..ركبت سيارتها..وقررت انها ترجع البيت..لانها تعبت وايـد..

كانت كل ما اتقدم بمكان خاص ترفض شكت ان هزاع ..وزع اسمها بهـاي الاماكن عشان ..محد يشغـلها يسويها..هزاع..

و بطريجهـا للبيت رن موبايلهـا ..جافت رقم ما مر عليها من قبل..

فكرت اترد بس بعدين غيرت رايها يمكن يكون هزاع..
بس هي مغيره رقم موبايلها..هزاع من وين بييب رقمها

وصلها مسج "ردي ابا ارمسج بشي ضروري انا وحده اتعرفينها"

طالعت ساره المسج مستغربه امنو هـاي ..؟؟

و قبل لا تنزل من السياره رن موبايلهـا مره ثانيه و بنفس الرقم..

ساره: الـوو

إيمان: ايمان خطيبت هزاع وياج.

ساره"مستغربه" خـير.؟؟
ايمان: انا اعرف انتي الانسـانه الي متعلق فيها هزاع..صح.

ساره"تتنهد" لا مب انـــــــا..انتي غلطـانه.

ايمان:"اتهدد" احسن لج ابتعدي عن هزاع تراه خطيبي و انتي نزوه عابره..

ساره: سيري لااه ..

وصكرت التلفون بويه إيمان و نزلت من السياره..ع قد ما ضايجت ساره من هاي المكالمه ع قد ما كانت مستغربه شو الي خلي ايمان ادق لساره..


من وين يابت رقمها.. اصلا مر شهر و هي ما اتعرف شي عن هزاع ولا عن الشركه..شويه وصلها مسج.."انتي لو متربية ما سويتي علاقه مع واحد خاطب"

ساره بعد ما قرأت المسج "غربلج الله"

دشت حجرتها ..لحقتها امها..
ام ساره: بلاج اتغربيلين منو.

ساره: وحده فاضيه.

ام ساره: هـا لقيت وظيفه.
ساره"تتنهد" من ويـــــــن يا امايه انا تعبت خلاص.

ام ساره: و الله ما ادري شو اسوي لج..لو بايدي كنت ريحتج من زمان.
ساره"شويه وبتصيح" حسبي الله ع الي كان السبب.

ام ساره: تعالي تغدي.
ساره: ما اشتهي تعبانه.

ام ساره: يمه جوفي ويهج كيف صار وايد ضعفتي ..وين كنتي و كيف صرتي.

ساره: الظروف اتسوي كل شي امايه.

ام ساره: شو بتسوين يعني الحين.

ساره: ما ادري امـايه..

لاحظت ساره ان وصلها مسج ثاني..
" صدقيني بتندمين ع الي سويته يا بنت الفقر"

حرجت ساره يوم قرت ها المسج و من كثر ماهي معصبه فرت التلفون باليدار و اتكسر قطعه قطعه..

طاحت ع الشبريه و يلست اتصيح..مضايــــــجه من حالها..حست ان أبواب الدنيا امصكره بويهها..

ام ساره :-بلاج يمه بسم الله عليج..

ساره: "تصيح" لو لحقت باختي زين كنت ارتحت من الهم الي انا فيه..

ام ساره: "نزلت دموعها" ليش اتقولين جي تبين تذبحيني شرات ما ذبحتني اختج..الله معنا يمه..

ساره: تحضن امها" انا تعبت خلاص باجر اليهال يبون اشياء و اشياء من وين اييب لهم ..

ام ساره:"تمسح ع راس بنتها" الله يفرجها يمه بس لا تسوين بعمرج جـي..ربج موجود.

يلست ساره اتصيح بحضن امها لي ما رقدت..

تمت ساره مضايجه طول اليوم حابسه عمرها بحجرتها..

جافت الاكياس الي فيها الثياب الي شرتها لاخت هزاع..قامت وفتحت الجيس جافت فيه خمس الاف..

فكرت تصرفهم بس بعدين اتراجعت وفكرت انهـا اتردهـا لصاحبها..


في اليوم الثاني..بعد ما لفت ساره كم مكان عشان اتراجع اوراقهـا ..و اتقدم اوراقها اماكن يديده..

>>

جافت الساعه 12 الظهر قالت شي وقت اوصل هالاغراض بيت بو هزاع..

لانها اكيده ما بتجوف حد فـ البيت الكـل في الدوامات الا بو هزاع و الخدم..

اتحركت صوب بيت بو هزاع ..وقلبها ..يدق ابسرعه بمجرد ما جافت البيت..

نزلت من السياره ..وقفت دقايق اطالع البيت من برع..اتذكرت احلامها يوم انها اتعيش هني ..عضت ع شفايفها و قالت ها مب وقته..

بس خمنت ان هزاع الحين بالشركه..و أكيد الدريول اموصلنه ..خذت نفس ..اجدمت و قبل لا ادق الجرس

..سمعت صوت باب السياره يتصكر..طالعت ورا جافت هزاع نازل من سيارته..ومعاه وحده

حست بقلبها اتزيد دقاته و انها مب رايمه اتشيل ريولها من ع الارض فتمت واقفه مكانها

اطالع هزاع يجدم منها..بها اللحظه عرفت انها غلطانه لانها فكرت اتيي البيت..

سمعت هزاع يرمسها.
شحالج سـاره..عاش من جافج..

كانت ساره اطالع بعيد مب رايمه اتجوفه و لا قدرت اترد عليه..فتمت ساكته..

سمعته يقول..

هزاع: خـلود هاي ساره السكرتيره الي كانت تشتغل في الشركه.

مدت ايدها خلود اتسلم عليها و سلمت عليها ساره..
هزاع: "يكلم خلود" روحي داخـل ابا اجوف الضيفه شو عندها يايه.

خلود: استح ع ويهك دخلها البيت انزين.

ساره: لا ما يحتاي انــا بس يايه عشان....
هزاع:"مقاطعنها":- خـلود دشي داخل..

بعد ما دشت خلود البيت..حست ساره بالخوف من هزاع..اتذكرت الموقف الي صار لها اخر مره معاه..

هزاع: "بصوت هادي" انتي وين اختفيـــــتي جنه الارض انشقت و بلعتج.

ساره" طالعته مستغربه"

هزاع: وين ساكنه انتي..؟؟و ليش غيرتي رقم موبايلج..؟

ساره امبطله حلجها من اسلوب هزاع و نبرة صوته ..حتى نظراته جنه جايف مخلوق غريب..

هزاع:"يبتسم" زين صكري حلجج عن يدش لج ذباب ..

انتبهت ساره لكلام هزاع..فحست انها كانت متأثره بنظراته..الي كان متعمد يطالعها فيهـا عشان يأثر عليها.

ساره:"مرتبكه" انا قلت جرب عرس اختك و هاي الاغراض الي شريتها و باجي المبلغ في الكيس.و الفواتير موجوده.

هزاع: انتي وايد متفيجه.

ساره:اوكى انا اسفه لاني ييت هني اكيد انت ما تبا اتجوف رقعت ويهي بس لازم اوصل الامانه..

اجرب منها هزاع..ويرها من ايدها صوب سيارتها وفتح باب سيارتها ودزها داخل..

وسار الصوب الثاني فتح باب السياره و يلس حذالها..وخذ الكيس من ايدها وفره بالسيت الي ورا..

ساره يالسه اطالعه مستغربه مب مستوعبه الي يصير ..
هزاع: يالله اتحركي..

ساره: "تهمس" انـزل من سيارتي.
هزاع: مب كيفج.

ساره:"تطنز" كيف ترضى ع نفسك تركب مع حراميه.

هزاع: هي انتي حراميه..يالله اتحركي.

ساره"مضايجه" انـزل من سيارتي.
هزاع:- لا اتصارخين انا ما اشتغل عندج ..

ساره: ولا انـا ما اشتغل عندك..

هزاع: انزين ابا اتفاهم معاج ممكن تتحركين من هنـي.

ساره: وين تبا اتسير..
هزاع:أي مكان ..

اتحركت ساره مب عارفه وين اتسير ..اضايجت يوم جافت هزاع يتعبث بسيارتها,,يشغل الراديو ..ويطالع اشرطتها..

ساره"محرجه" لا اتمد ايدك ع شــــــي..؟

هزاع: "يبتسم:لا تخافين تراني مب حرامي..

عرفت ساره ان هزاع يقصدهـا ..وقفت سيارتها ابسرعه ع الرصيف ..ورفعت ايده عشان تصفعه بس مسك ايدهـا

هزاع: شنطتج للحين عندي ..و ايدج هاي بقطعها و بخليها بسده السياره داخل شنطتج..

ساره"اتصرخ عليه" انـزل من سيارتـــــــي.

هزاع: جب لا اتصرخين...يا الحراميه.

ساره: هي انزين انا حراميه و كل شي ..شو تبا بعد..

هزاع: "يهد ايدها" اباج اتحبيني .؟

ساره: "اطالعه مستغربه"
هزاع: ليش ما قلتي انج تحبينـــــــي ..

ساره:"ردت ابسرعه" انا ما احبك منو قـص عليك.

هزاع: احلفي.
ساره: شو احب فيــــــك .."تستفزه" انا احب بو هزاع بس هو الي ترس عيني.

هزاع تم يضحك بصوت عالي" ههههههههههااااااي
اضايجت ساره يوم حست ان هزاع مصخها بالضحك..

ساره"تصرخ عليه" انزل من سيـــــارتي.

هزاع: خيبه ذليتيني..بس ما عليه مقبوله منج.

ساره: شو تبا مني انا مشغوله الحينه.
هزاع: شو ادورين وظيفه.
ساره "اطالع برع الدريشه": ما يخصك.

هزاع: انتي بدال ما تكونين عنيده ولسانج طويل جي ما كنتي ذكيه يا الخديه.

طالعته ساره ابسرعه "شو قصدك.

هزاع:- انتي ما لحظتي بالاجتماع الي كان في هلتون ان محمد كان موجود معنا.

ساره: هيـــــه شو فيها.

هزاع: ليش انا كاتب اسم محمد بالورقه.
ساره:لا.

هزاع: وليش ما نبهتيني ع ها الشي.

ساره: ما ادري ليش.
هزاع"يسند راسه ع السيت" محمد ماخذ ربع المليـون.

ساره"تشهق"اونـــــــه.
هزاع"يطالعها": اسف ظلمتج.

ساره: بس ها الي الله قدرك عليه اسف بعد ما ذليتني ذل.

هزاع"يعتدل بيلسه" و الله دورت عليج فـ كل مكان جن الارض انشقت و بلعتج..بس باسبوع ..اختيفيتي جي وين سرتي.

ساره:طلع لنا بيت شعبي.واجرنا بيتنا الجديم.

هزاع: حتى رقم موبايلج غيرتيه ليش..؟عشان تنسيني.
ساره"طالعته "انت ما تعني لي شي.

هزاع: اتعرفين كنت بخطبج بس سالفه الربع مليون سوت حواجز من بينا.

ساره ما كانت امصدقه كل الي يصير لها معقوله هزاع يبا يخطبها ..عشان جي ايمان قامت اطرش لها مسجات..استانست ساره برمست هزاع..بس اتذكرت كيف هزاع خرب حياتها.

ساره: ما اظن الحاجز يزول ..
هزاع"يهمس"قولي و الله ..انا ما صدقت اجوفج ..و الله ع بالي يتهيأ لي يوم جفتج واقفه حذال بيتنا.

ساره ساكته ما اتعرف شو اتقـول ..

هزاع: بسوي كل الي تبينه بس وافقي .

ساره:"مرتبكه" دور لي وظيفه.
هزاع: وظيفتج موجوده.
ساره:ما ابا اشتغل عندك.

هزاع: ليش كرهتينـــــــي..؟؟

ساره"منفعله":لاني اصلا ما احبك عشان اكرهك..."بلعت ريجها بصعوبه" اذا كنت صاج معاي وظفني بمكان..

هزاع: بس ها الي تبينه.
سـاره: و اتغيب عن حياتي موليه.

تم هزاع يطالعها..ما قدرت ساره تتحمل نظراته ..فصدت عنه..

هزاع"يهمس" ساره انا و الله احبج..ما اروم اعيش من دونج..

تمت ساره ساكته ما اترد عليه..

عرف هزاع ان سكوت ساره معناته انه ما بتسامحه موليه..فتح باب السياره ونزل ..من غير ما يقول أي كلمه..

**
يتبع>>>>

الجزء العاشـر..


ما استفادت ساره شي من مشتها بيت بو هزاع ..رجع الكيس معها ..ما عرفت كيف نست سالفته ..

بعد ما نزل هزاع من سيارتها اتمنت ..تنزل و تزقره و اتقوله اني ميته فيك..

و انها ما تقدر اتعيش حياتها من دونه..بس كرامتها منعتها ..
بعد ما شوه صورتها حذال الموظفين ..عشان يعرف ان مشاعر الناس مب لعبه بايدنه..

احيانا كنت اتلوم نفسها ليش سارت بيت بو هزاع ..ومرات تتمنى انها لو منعته ينزل من سيارتها ..ومرات مرات وايد اشياء ادور في بالها..
**
بعد اسبوع يتها وظيفه طارت ساره من الوناسـه اخيرا لقت لها وظيفه..عرفت ان هزاع سهل عليها الامور..

بس يستاهل و جافت من حقها ان هزاع يدبر لها وظيفه تعويض عن وظيفتها الي راحت عليهـا..

مشت حياة ساره مثل قبل ..ارتاحت لوظيفتها اليديده..حست ان كل شي رجع شرات قبل إلا هزاع..كانت تفتقد هالانسان وايـد..

و في يوم كانت راده من برع هي و اليهال..استغربت ساره يوم جافت خالها ..يالس داخل..سلمت عليه..بعد ما تعشى ..راح بيتهم.

ساره: امايه شو يسوي خالي هني.

ام ساره"مستانسه" ياب لج خطيب.

ساره:-خطيــــب ..حق منو..؟
ام ساره:- حقي ..حقج حق منو بعد.

ساره:- لا اقصد منو هـا ...؟؟

ام ساره: ولد بو هزاع..

ساره"مب مصدقه" جذابه.

ام ساره اطالع بنتها بنظرة عتب...
ساره"تعتذر" سامحيني امايـه بس اقصد...ما اصدق .

أم ساره: ليش مب مصدقه كل شي قسمه و نصيب.هـا شو رايج..

ساره"واقفه" بفكر طبعا..يالله تصبحين ع خير..

سارت ساره حجرتها مصدومه كانت اترمس عمرها شرات الخبله..معقوله هزاع خطبني ..يعني صج يحبني و ايمااان..شو فيها

اويه هزاع يحبني..طاحت ع الشبريه تضحك بصوت عالي..انا حرمة هـزاع..ههههههههههاااااااايي


نشت ساره من الرقاد تعبانه لانها البارحه كانت اتفكر بهزاع..كانت محتاره اتوافق اولا..

الي سواه هزاع فيها مب شويه..بس هي تحبه...و بعد بيكون مستقبل عيال اختها وايد زين..

فكرت اطرش له مسج ..اتعاتبه..
فكرت شو تكتب اخيرا كتبت.."انا قلتلك اني ما ابا ارتبط فيك ليش اتقدمت لاهلي.."

ياها رد..من هزاع"كيفي"

ضحكت ساره ما توقعت ها الرد..فطرشت له.."برفضك بتجوف"

وصلها رد"بروغج من وظيفتج ..و ما بخليج تشتغلين موليه..يا الحراميه.."

عصبت ساره يوم جافت كلمة الحراميه..دقت له
هزاع: يعني هارقمج هـا..؟؟

ساره: ما يخصك.
هزاع: نعم ليش متصله.

ساره: استح ع ويهك انا مب حراميه.

هزاع"يضحك"ههههههههه سرقتي قلبي يا الخديه.

ساره: ليش خطبتني.؟؟
هزاع"يهمس" لاني احبج..

ساره: انا ابا اتزوج بو هزاع.

هزاع:"يضحك"هههههههه لا اتحاولين يوم خبرت الوالد بالسالفه زين ما كفخني.

ساره: هـا عشان جي اجوفك واثق من نفسك.
هزاع: ابا اجوفج..حبيبي

استحت ساره يوم سمعت هالكلام من هزاع.
ساره: عيب.
هزاع:خلصتي زهبت اختي.

ساره: باجي خمس الاف ما صرفتها..

هزاع: يعني ما شريتي شي هـا.
ساره: لا و الله شريت ..بس بعد السالفه الي صارت وقفت.

هزاع:و الله انا اسف حبيبي..
ساره"من بين اسنانها" لا اتقـول جي بعدين انا......

هزاع :انتي شو..؟
سكتت ساره..ضحك هزاع:..تستحين ..هههههههه فديت الي يستحون..
ساره"بصوت خفيف":- جب ما يضحك.

هزاع: متى تبين الملجه..؟
ساره: أي ملجه..؟

هزاع: تستهبلين..قولي و الله انج رافضه.

ساره"بدلع" بتسمع الرد عند خالي.
هزاع:تحرقين اعصابي..
ساره: فكر بالي تبا اتفكره..

هزاع: و الله سارونه ارمس جد اذا رفضتيني ببهدلج.
ساره: اتهددني.

هزاع:هي اهددج..ما يخصني اباج.

ساره: امممم اتعرف الساعه 6 ونص ..يالله بسير اتغسل ..بسير الدوام.

هزاع: مرتاحه بدوامج.
ساره"تتطنز" وايد مب انته الي مختارنه لي..
***********************
هزاع: انزين باجي نص ساعه سولفي شويه.
ساره: ما اروم يالله "بدلع" مديري بعصب علي.

هزاع"محرج" انزين ماعليه يالله باي

وصكر التلفون..قامت ساره من ع الشبريه تضحك ابصوت عالي..هههههههههاااااااييي

***
ايمان اتـرمس ربيعتها نوف.
ايمان: و الله اني بموت من القهر يعرف اني اشكثر احبه و اني ذايبه فيه و حتى حجرته يوميا انظفها له..صج ما فيه خير ..

نوف:ليش ساره بشو احسن عنج.

ايمان : وع تعالي جوفيها و الله انا احلى عنها..مدري شو جايف فيها..

نوف :- يمكن مسويه له سحر.
ايمان : اتقولين.

نوف: انتي للحين اتروحين بيت عمج.

ايمان : هـي

نوف: خلاص عيل ما يهمج يوم بتروحين اتنظفين حجرة هزاع ييبي ثوبه.

ايمان: وين الحين ما اروم ادش حجرته خلاص الريال خاطب وحده غيري ..و الملجه الاسبوع الياي.

نوف: حبيبتي دبري حالج جان اتبين هزاع يرد لج ييبي لي ثوب بنسوي له عمل بخليه يموت ع الارض الي تمشين عليهـا.

ايمان : خلاص حبيبتي ما يهمج..باجر بتكون الثوب عندج..

**
هزاع طالع من الشركه اتصلت به ساره..

هزاع:الــــــووووو

ساره: شحالك عمري.

هزاع: بخير..

ساره: شو فيك .

هزاع: مشغول.
ساره: ليش ترمس بهاي الطريقه.
هزاع:اوووووه انتي بلاج شو تبين .؟الحين.

ساره"مستغربه":- بغيت اتطمن عليك.
هزاع: قلنالج بخير يالله باي

هزاع يصكر التلفون اوف اذتني هاي ما صدقت عطيناها ويه..

ساره يالسه بحجرتها اتفكر..ليش هزاع اتغير عليها جي..
دشت امها حجرتها..

ام ساره: بلاج بسم الله عليج.
ساره"تصيح" احس هزاع وايد متغير اخافه ما يبا يملج علي.

ام ساره: يتهيأ لج يمه.

ساره: لا امايه قبل كان غير و الحين ما يطيق يسمع صوتي.
ام ساره: بعدكم بأول البر.

ساره: معقوله هزاع ما يحبني ..مستحيل..امايه.."تصيح"

**
استغربت ساره ان مر يومين و هزاع ما دق لها بالاول ما اتمر ربع ساعه الا و يدق..فكرت ادق اتعرف شو سالفته..

هزاع يطالع رقم ساره..
هزاع: اوه هاي شو تبا الحين داقه.."يرد ع الموبايل" الـو

ساره: هزاع شفيك ..
هزاع:- مصدع راسي يعورني.
ساره: عشان جي ما دقيت من يومين.
هزاع "يصرخ عليها" انتــــي بلاج جي اتحاسبيني ع كل شي .

ساره: انت وايد متغير علي.

هزاع: انتي مدري شو بلاج اوووه احس بضيجه بصكر عنج انا ..يالله باي باي

ساره"مضايجه" بــــــــااي.

شويه ورن موبايل هزاع..
هزاع :- الــــــــوو

ايمان"بدلع" شحالك هزاع.

هزاع: هلا و الله هـا هالصوت الي يبرد القلب و يرد الروح.

ايمان"تضحك" وحشتني..
هزاع: انا الي مشتاق لج موت ..الحين عرفت شو ناقصني فـي حياتي.

ايمان: اتحبني.
هزاع: بس اموت و اسمع ها الصوت..

و تم يسولف مع ايمان ..ساعات..

ساره ادق لـ هزاع كل مشغول..حست ساره ان هزاع يلعب من وراها ..فقررت تقاطعه ..ما اترد عليه لي ما اجوف شو اخرتها ..مع ها الشخـص.
**
بو هزاع و عياله ملاحظين ..ان زيارات ايمان كثرت ..و ان اسلوب هزاع وايد تغير مع ايمان..كان كل ايلس و يسولف معـاها..

حتى اتصالاتهم كثرت..و في مره قرر بو هزاع ايرمس هزاع ايجوف شو سالفته..

بو هزاع: جربت الملجه.
هزاع:ملجة منوووو؟؟

بو هزاع:ملجة منو بعد انت و ساره..؟؟

هزاع"مستغرب" اتصدق يا الوالد..اني ناسي الموضوع.
بوهزاع: لازم ايمان صارت ماخذه كل تفكيرك..

هزاع: هي و الله مدري ليش مرتاح لها البنيه وايد..
بوهزاع: وســـــاره.

هزاع: يبا انا افكـر اني افسخ خطوبتي مع ساره قبل لا يطيح الفاس بالراس.
بو هزاع"محرج" أي فاس و أي راس ليش انت ما كنت بتموت عشان تخطب هاي البنيه..وودرت بنت عمك ..شو بنات الناس لعبه.

هزاع"يحاول يهدي ابوه" زين يبه لا اتحرج..بس انا اتراجعت و عرفت اني غلطان.

بو هزاع"يرتجف من العصبيه" طـوف من ويهي لا بركه فيك بتزوج ساره غصبن عنك رضيت ولا لاء..عشان تتأدب و اتعرف تاخذ قرار شرات باجي الرياييل.

هزاع"خايف ع ابوه" انزين لا اتحرج ..بتزوج ساره خلاص..


يتبع >>> الجزء الاخير ..

الجزء الاخير ..
..

.

طلع هزاع من الصاله و سار حجرته ..يلس يشرب زقاير وحده ورا الثانيه مب حاس ابعمره..

اتصل لايمـان..
ايمان: هلا حبي..؟

هزاع: وينج انتي ...اشتقت لج..

ايمان:شفيك محرج.

هزاع: انا وايد مضايـج.
ايمان طفي الزقاير الي بايدك و رمسني عدل..

هزاع: انا ما اقدر اعيش من دونج .. "يتافف"و الوالد يبا يزوجني غصب ساره.

ايمان"محطيه ايدها ع السماعه"الظاهر عمي يبا له عمـل بعد..

هزاع: وينج حبي..؟؟

ايمان:موجوده غناتي ..انت اشعليك من عمي المهم انا و انت انحب بعض و خلاص..

بوقت هزاع ما بيرد ع ايمان ..سمع حصه و خلود يصارخون ..بصوت عالي..فر الزقاير و سماعة التلفون من ايده..

وركض برع ساير الصاله.. و جاف بو هزاع طايح ع الارض و حصه و خلود يصارخون..مب عارفين يتصرفون..

هزاع"يصرخ ع خواته" قـوووومـوا ..من حذاله..

و يلس يبطل فص ثياب بو هزاع.. و ابسرعه شله و خذه السياره..

وصل دقايق المستشفى..اتيمعوا الدكاتره حولين بو هزاع.. و ابسرعه خذوه العنـايه..

وقف هزاع بالممر يلوم نفســــــه..اكيد بو هزاع طاح بسببه لانه انفعل و حرج يوم قال انه ما يبا ساره..خطرت ساره ع باله..

"اووه ســـــارونه احس بعمري من زمان ما جفتها ولا رمستها بالتلفــــــــون..""

قام يدور ع موبايله يتصل لها..بس تذكر ان ما ياب معاه شي ..

يلس هزاع يحاوط عند باب الحجره يتريا الدكتور يطلع من عند بو هزاع عشان يطمنه عليه..

حس هزاع انه وحيد محد معاه..استغرب ان حصه و خلود ما يـوا ولا اتصلوا تلفون..

بعد نص ساعه طلع الدكتور من غرفه بو هزاع..
هزاع: عسى ما شر دكتور..؟؟

الدكتور: الحمدلله الازمه عدة ع خيـر..واضح انه كان مضايج من شي..؟؟

هزاع: ما ادري شو اقولك يا دكتور..

دكتور"يحطي ايده ع كتف الدكتور "ع العموم الحمدلله كل شي ماشي تمام..بنخليه اليوم يرتاح عنـدنا و اذا باجر تحسنت حالته ..بنطلعه من العنـايه..

هزاع"مرتاح":-مشـــــــكووور ما اتقصر يا دكتور.

دش هزاع لابـوه ..وجافه راقد ..باس راسه.. و يلس ع الكرسي الجريب منه..

بعد دقايق..فتح بو هزاع عيونه..

هزاع: "شويه و بيصيح" و اللـــــه احبك يا الشيخ و احب سارونه و اكيد بتزوجـــــــها..

بو هزاع يرفع ايده ..عشان يمسك ايد هزاع..

بو هزاع"يرمس بصعوبه" اتحمل فيهـا ها البنيه محد عندهـا في الدنـيا..

هزاع: ان شا الله بس انت قوم بالسلامه و انروح نملج.

بو هزاع"يبتسم" وين خواتــــــــك..

هزاع: في البيت اكيد ما حصلـوو حد اييبهم.
بو هزاع: روح عندهم ..و ان شا الله باجر اجوفكم هني.

هزاع"يبوس راس ابوه" ما تجوف شر الله يخليك لنا..

وطلع من الحجره..و في السياره..يلس هزاع يفكر كيف غاب عن سارونه هالايـام كلها .. كيف قدر اصلا ما يسمع حسهـا..

صج حس انه مفتقدنهـا..و جريب البيت اتفاجـا هـزاع من الناس الي متيمعه حذال بيتهم .. و من سياره المطافي..

نزل ابسرعه من السياره..
هزاع: شو صـــــــاير وين خواتي..؟؟

_ الاهل كلهم ابخير بس حجره وحده احترقت الي برع..

اتذكر هزاع انه فر الزقاره من ايده..يوم سمع صراخ خواته..

بعد ساعه..دش هزاع البيت.. وجاف كل شي بحجرته احترق ما بقى الا الرمـــــاد..

سمع صوت خلود من وراه..

_اشحاله الوالد.

هزاع: ابخير..الحمدلله ما فيه شي ليش ما اتصلتوا بي..
حصه: وين نتصل..ها كل من الزقاير الي تشربهـا..

هزاع: "محرج" من صراخـــــــكم..

دشت ايمان البيت..
ايمان:اجر و عــــــــافيه.
هزاع"يصد الصوب الثاني" هـاي شو يايبنها هنــــــي اووف.

حصه"تساسره" عيب عليك..

هزاع:يالله الحمدلله ماشي اوراق مهمه في الحجره كلها ثياب و افلام فيديو..

ايمان"في قلبها" احترق العـــــــــمل

خلود: خذنـا لابـوي.
هزاع: ان شالله باجر بيطلع ..عطيني تلفونج..

خلود: ليش.
هزاع:"محرج" شو ليش..تلفوني احترق..ابا ارمس القـلب.

ايمان: القـــــلب.

خلود: انزين شفيك محرج زين ما حرقت علينا البيت بكبره.

وسارت اتيب تلفونها..لحقتها حصه يوم سمعت صوت ولدها يصيح..

ايمان"تجدم من هزاع وبدلع" هـــــــزاع.

هزاع:-نعـــــــم

ايمان:ما اشتقت لي.
هزاع: شـــــــو........؟؟

ايمان:شفيك ..قبل ساعات كنا بنتفج ع الزواج.
هزاع"يطالعها بإشمئزاز" ما ادري ليش كارهنج..

وسار عنها داخل ..

اتصل بسـاره..بعد ما خلود عطته الموبايل..
ساره: "ناشه من الرقاد"الــــــــوووووو..

هزاع:بصوت المشتاق" فديت هالصـــــوت و اللـــــــه..
ساره"اتبطل عيونها" منـوووووو

هزاع: من حقج تنسين صوتي..استــــــااهـل حبيبي..

ساره"مستغربه" هـــــزاع..توك تذكر ساروونه.

هزاع: و الله اليوم بعد ما طاح ابوي و احترقت حجرتي...حسيت اني وايد وايد امقصر معاج.

ساره:"خايفه" بسم الله شو هالاخبـــــار باخر الليل..شو بلاه عمـي..؟؟

هزاع: يته نوبه ..بس الحمدلله عدت ع خير..

ساره: ليش الدكتور قال انه قلبه خلاص و الحمدلله.
هزاع: ترا قال محد يضايجه او يخليه ينفعل..

ساره:"اتلوم هزاع" اكيــــــــد انت ابو المشـاكل ضايجت به..صح..
هزاع"بصوت حزين"حرام عليج حبيبي كافي الي فيني ..لا اتلوميني اكثر..

سكتت ساره..تاخذ نفس..
ساره"تهمس"اسـفه حبيبي..بـس..
هزاع: شـو...؟؟

ساره: ترا الملجه نهاية هـا الاسبوع.
هزاع:"مستانس" هـــــي عيوني ..فديتج ..لا يكون غيرتي رايـج..

ساره: ع بالي انت الي غيرت رايك..نسيت كيف كنت اتكلمنـي الايام الي طافت..و تلفونك كل مشغول..عرفت ان حد خذك مني خلاص.

هزاع: بتصدقيني لو قلتلج اني بعدنـي احبج..و الله ما بخلي حد ياخذج مني حتى و لو كان بو هزاع..

ساره"تضحك" مينــــــوون..حبيبي.
هزاع: انا ما اعرف ليش الايام الي طافت كنت احس بضيجه يوم اسمع صوتج..ولوعت جبد.

ساره"اتعاتبـه" هــــــــــــززااااااااااع..

هزاع"يضحك" و الله..
ساره"تطنز"سحـروك .
هزاع: اشـك..حبيبي ما عندي ثياب باجر اداوم فيها كلها احترقت..

يلست ساره تضحك ابصوت عالي ههههههههااااااييييي
من طريقة كلام هزاع..

هزاع: انزين اتعيبين علي هـا ما عليـه.
ساره: ما قلت لي جان شريت لك شي ..مع زهبت اختك..

هزاع: أي زهبة اختي..؟؟
ساره: خلصتهـا كلهـا..بقت اشياء بسيطه.بس البيزات خلصت ..

هزاع"يسالها"كم تبين اطلبي عيوني..
ساره: ما اعرف..انزين خلي اختك اتجوف الاغراض يمكن ما يعيبهـا ذوقي.

هزاع: حبيبي ..هـاي لج مب لاختي..هاي زهبتج انتي..غبيه ..ما فهمتيني.

ساره..ساكته مصدومه..ما توقعت ان هزاع..يسوي جي خلها تزهب قبل لا يخطبهـاا..

هزاع: ويـن رحتي.
ساره: قد ما احبك اكره مفاجأأأتـك...

هزاع:خليني اجوفج باجـر اشتقت لج.

ساره: امايـــــــه اتقول ماشي لقاءاااات الا بعد الملجه و انا بعد ابا جي..

هزاع: انزين بنملج باجر او عقبه..
ساره: تضحك " كيــــــــفك.

هزاع: ما تبين.

ساره: اممممممم ما ادري.

هزاع: مديرج الشيبه مستعيل الي يقول هو بيملج مب انا..

ساره تضحك":_ بسالك جاوبني ابصراحه..؟؟
هزاع: عيوني لج.
ساره:ليش طنشتني الاسبوع الي طاف .. و كنت تشغل التلفون مع منوووووو

هزاع: قلتلج كنت احس بضيجه يوم ارمسج..

ساره: و منو كنت اترمس..؟؟؟ ليش كنت اتحس ابضيحه و شو تغير الحين..؟؟

هزاع: "معصب يتذكر ايمان" شــــــدراني.
ساره: ليش محرج..؟

هزاع:"يتافف" انتي لازم اتنكدين عليـنا..

ساره: شو يضمن لي ما اتعيد هالسالفه مره ثانيه..
هزاع: ما بسويـها انا للحين احبج..

ساره: زين كنت تشغل التلفون مع منوووووو؟؟

هزاع: واحد من الربع..
ساره"تحذره" هـزاع..؟

هزاع:اتحبينـي ساره..؟؟
ساره: كنت تشغل التلفون مع منوووو؟؟

هزاع:"مضاايج" إيــــــــمان..زين ارتحتي..

تمت ساره ساكته..مثل ما توقعت..
هزاع: و الله يا سارونه كنت احس بعمري مجبور..جن حد ايلس ع راسي و يقول لي اتصل بها..ما ادري ليش بس الحين خلاص..ما اهتم..

ساره: يالله بـــــــــااي.

هزاع:"يترجاها":- سارونه حبيبي ..

ساره: باي..

صكرت التلفون بويه هزاع و غلقته يلست اتصيح..ابصوت عالي..
كانت هي ما ترقد الليل اتفكر فيه.. وهو يسهر مع ايمان و غيرهـا...صج ما يستحي ع ويهه..

فـي اليوم الثاني..
ام ساره: يالله قومي تاخرتي عن الدوام.
ساره"اتغطي ويها" ما ابا اروح ابا ارقد..

ام ساره: يالله عـاد قومي لا اتسوين شرات اليهال..

ساره: تعبانه ما ابا اسير مب راقده البارحه..

ام ساره: ابرايج يمه..
قامت ساره من مكانها و سارت عندالتسريحه اتجوف كيف شكل ويهـا "ابيه جنه وحده طالعه من المقبره"

فتحت موبايلهـا..جافت مسجين..
فتحت الاول من هزاع" و اللـــــــه احبج و انا ما خنتج و غصبن عليج بملج عليج..رضيتي ولا لاء.."

ابتسمت يوم قرات المسج..اتذكرت كيف هزاع ..متسلط و يحسب الدنيا ع كيفه كل الي يباه يسويه..

فتحت المسج الثاني..جافت رقم.."احلمي تاخذين هزاع.."

عرفت ساره ان هاي ايمان..فردت عليهـا.."اشبعي فيه ..ما يهمني"

شويه و اتصلت لدوامها تعتذر انها ما بداوم اليوم لانها تعبانــــــه.

..



اتفقت ساره مع امها..انهم يروحون المستشفى زياره لـ بو هزاع..

و هاي ثاني مره امها تلتقى فـ بو هزاع ..مره في البيت..يوم خطوبتها لـ هزاع..و هاي المره الثانيه..

ارتاحت ساره يوم جافت بو هزاع..ابخير..يالس و يسولف..

بو هزاع "يسالها" عـيل وين هزاع..ما رمسج.

ساره: "اتجذب" امبلى رمسته اليوم الصبح..

بو هزاع: و انتي ليش ما داومتي.
ساره"تبتسم" ما استاهل اجازه يوم واحد يا الشيخ.

بوهزاع"يضحك" تستــــاهلين كل خير..يا بنتي.

ام ساره: ما اتجوف شر ان شا الله تطلع بالسلامه.. و نملج فيهم.

بو هزاع: شو رايكم باجر.

ساره ساكته مب عارفه للحين شو تتخذ قرار ..ما عرفت بشو تصرف..بعد اخر مكالمه لها مع هزاع..

ام ساره: الراي عند العريس و المعرس.
بو هزاع: لا ما عليج ..هزاع خاطره اليوم قبل باجر بس المهم ساره شو اتقول.

ساره" مستحيه" ع راحتكم..

اضايجت من ردهـا بس ما شي حل ثاني..لان بو هزاع صحته ما تسمح انها ..اتغلس عليه..

شويه ..دشت خلود و حصه..سلمـوا ..عليهم..
خلود: هلا العروووووس..

ساره: "تضحك" اشحالج خلود..؟؟

خلود: طيبه..بعد جوفت حرمة اخوي.
ساره: اونج.."وتضحك"

يلسوا يسولفون و يضحكون..ومرات خلود تضحك ابصوت عالي.. و حصه اتفاتن عليها.. اتخيلت ساره كيف علاقتهم في البيت اكيد.. جي خبال ..

طالعت ساره بو هزاع يوم هزاع دش الغـرفه..
هزاع"يبوس راس ابوه" و يسلم ع الموجودين..

يوم مد ايده ع ساره.. كانت ساره ناويه انها ما اتمد ايدهـا ..بس الكـل يطالعها.. فاضطرت اتمد ايدهـا..حست هزاع رص ع ايدهـا متعمد..رفعت راسه اطالعه..يوم قالها..

_اشحالج..

ساره"اتير ايدهـا" ابخــــــير..

هزاع: زين اسالي ع اخباري.

بو هزاع: متسحيه البنيه..


هزاع: مستحيه جدامكم بـــــس..

الكل يسولف و يضحك.. بس ساره كانت مب ماخذه راحتها لان هزاع يراقبهــا..و الكل ملاحظ هـا الشي..

طلعت ساره موبايلها من الشنطه..و جافت مسج من هـزاع..طالعته.فابتسم لها..استغربت متى كتب المسج..ما انتبهت له.."ابا ارمسج الحين"

ردت عليه"جـب"

يتها الضحكه..يوم جافت هزاع يقرا كلمة"جب" فعض شفايفه ..رجع يكتب لها" تأدبــــي ..لاضربج حذالهم كلهم.."

ساره كانت اتعرف ان خلود اتراقبهم.. عشان جي هي مسويه جو بالغرفه ..عشان تشغل الكـل و ما يلاحظ المسجات الي تطرش من بين ساره و هزاع..

ردت كتبت له"روح أدب ايمانوو الي يالس اتغازلها طول الليل "

حرجت ساره لان هزاع ابتسم يوم قرا مسجهـا..فرد عليهــا"احبــــــــج يا الحراميه"

بعد ما قرات المسج دورت ساره شي اتفره بويهه ..بس اتذكرت ان الكـل موجود بالغرفـه..فقررت انها اتروح ..مع ان اليلسه عايبتنها بس هزاع خرب عليهـا


ساره"واقفه" يالله اسمحولنـا ..
ام ساره: اسمحولنـا عاد

هزاع: تو النـاس.

ام ساره: من ساعه نحن يالسين هني..ان شا الله وقت ثاني..

سلموا و طلعـوا..اتعمدت ساره تجاهـل هزاع..حتى كلمة فمان الله ما قالتـه..

و في السياره..
ام ساره: شفيج.

ساره"مستغربه" شـــــــوو.

ام ساره: ما تبين الريال..
ساره مب عارفه شو اتـرد..

ساره: ليش فكرتي جـي.
ام ساره: احســـــــااس الام..

ساره: ما ادري يمه متردده ..اخاف ارفض و انهي كل شي بس خايفه ع بو هزاع..ترا ما يستوي اجازيه بهاي الطريقه.

ام ساره: و ليش اتغيرين رايج شو الي صار..في المستشفى ما شا الله عليه هزاع باين عليه عكس كل الي قلتيه لا تغير ولا شي..

ساره في قلبها"انتي ما تعرفين شي يمه" ..

ساره"تتنهد": مدري..

ام ساره فكري زيــــــن يمه قبل لا تتخذين أي قرار تندمين عليه.

ساره: ان شا الله.

**
نزلت امها .. وسارت اتيب عيال اختها من المدرسه..بعد ما ركبتهم..
عبادي: خالـووووه صديقي عنده لبست بات مان.
ساره: الزبـده..؟

حمودي: اشتري لنا مثله.

ساره: انتوا ما جوفون شي..لازم تبووووووونه..
حمودي:خالووووه عبادي ضرب واحد.

عبادي"شويه و بيصيح" جذاب

ساره: اووووووف اسكتـوا يوم بوصل البيت اضاربوا..
رن موبايلها ..جافت المتصل هزاع..

ساره: الو.
هزاع: شو هالحركات..؟
ساره: أي حركات..؟

هزاع: انتي وين سيارتج محد عند الكراج....؟؟

ساره: سايره اييب عيال اختي من المدرسه..
هزاع: متى بتوصلين..؟؟

ساره: ليش شو تـبا..؟

هزاع: ابا ارمسج.

ساره: الناس الحين تتغــــــدىىى

هزاع: تعالي تغدي معاي.
ساره: اســـــــفه..و بعدين منو الحرامـيه..؟؟

هزاع"يضحك" الي سرقت قلبي.

ساره: اونك...؟؟

وصلت البيت..جافت هزاع يترياها عند باب بيتهم..
ساره:شو اتسوي هناك..
هزاع: اترياج ادري بج عنيده ما تسمعين الكلام عشان جي واقفنج اشلج من هني..

ساره : انزين بصكر ..يلا باي..

نزلت من السياره و نزلت عيال اختها..

ساره:يلا دشـوا..

حمودي: وين بتروحين.

ساره: بشتري لكم باتمان يلالا دشو داخـل.

بعد ما دشوا
نزل هـزاع من سيارته و يا صوبها..اول مره اتحس ساره انها وايد قصيره..يوم واقفه حذال هزاع..

هزاع: تعالي اركبي سيارتي.

ساره: ما ابـــــــــاا..شو اتسوي هني انا قلتلك ماشي ملجه.؟

هـزاع: مب كيفج.

ساره: عيل كيف منو ايمــــــان..
هزاع: اوووووووه انتي ما تنفع معاج الرمسه..
مسكها من ذراعها وركبها سيارتها..

ساره"محرجه" انت شو تتحرا عمرك اشتغل عندك.
هزاع: لا اتخليني اروغج من دوامج نسيتي اني انا توسط لج.
ساره : غصبن عليك لانك انت ضيعت وظيفتي ..

هزاع:لا اتصارخين انزين بلعومج بيطيح..ما فيني اخذج المستشفى لاعت جبدي من المستشفيات.

ساره: محد قالك ..نزلنـي.

هزاع: وين انزلج ع الشارع.
ساره: انا مب طايقتنــــــك يا الخـــــــاايـــــــن..

هزاع: وقف سيارته "منو الخاين.

ساره"معانده:- انــــــــت منو غيرك.
هزاع: كيف اثبت لج ان ما بيني و بين ايمان شي.

ساره: ما يهمنـــــي انت اصلا واحد لعــــاب.
خافت ساره من نظرات هزاع لهــا ..حست شويه و بيضربهـا..
هزاع:"بصوت هادي" ليش وافقتي ع الخطوبه يوم جايفتني واحد لعـاب..

ساره:"اترد ابرود" الحين كشفتك..

هزاع "يصرخ عليها" لا ترمسيييين بها الطريقه ..ترا بجلع عينج.

كانت ساره بترد عليه بس خافت من صراخه..فكرت تفتح باب السياره و تنزل بس هزاع يودهـا من ذراعهـا..

هزاع: اعقلي انزيـــــن انا شو الي بلاني بهاي الخبله..

ساره:"تسحب ذراعهـا" محد ضربك ع ايدك..

هزاع:"يتطنز" امبلى حد ضربني ع ويهي.و بالشنطه بعد..حشى مب شنطه طابوقه.

طالعت ساره ..هزاع مستغربه ..لانه كان محرج و فجأه انجلب ..يتمصخر

ضحكت ساره بصوت عالي تذكر الموقف..

هزاع: من حقج..انتي تغارين مني ويهي جايفتني احلى عنج .

ساره: فديت ويهك..بس كنت تستاهل..

هزاع: و الحين استاهل بعد.

ساره: لا بس حد ثاني يستاهل.
هزاع"مستغرب" منووووو

ساره: ايمــــــــان.

هزاع: يعني ما انروم نرمس جملتين ع بعض الا طريتي ايمان..

ساره: ما احبها بتاخذك مني.

هزاع: اتهبي الا هـي

ساره: عيل ليش كنت اترمسها و مطنشني.

هزاع: انتي ما تفهمين قلتلج مب حاس بعمري.
ساره: اكييييد مسويه لك شي..عيل ليش كنت تضايج يوم تسمع صوتي.

هزاع: اتولي المهم انا معاج الحين..اتحبيني.

ساره:ردني البيت و بخبرك.

هزاع: باجر بنملج.
ساره: انزين..؟؟

هزاع: اتحبيني..

ساره: "تضحك" بعد الملجه بقولك.

هزاع: حرام عليج ما قد سمعتها منج..؟؟

ساره: بعد الملجـــــــه ..

هزاع: بتم طول عمري احبج و الله..

ساره: "تهمس" و عيال اختي.بتحبهم..
هزاع:شو جايفتني يهودي..
ساره"تضحك" انت عســـــل و اللـــــــه..

هزاع: و شو بعد.

ساره: ماشي.

هزاع: بخيله.

ساره: بعد الملجه بقولك كل شي..

هزاع: ما اصبر لـ باجر...
ساره:وين بنسكن:؟؟؟

هزاع: عندي فله ..اتكفيني و اتكفي امج و عيال اختج.. حتى اهلي اتكفيهم..

ساره"تضحك" ما بضايجون منهم.

هزاع: اذا قصدج خواتي حصه بيت ريلها و خلود خبله ..بتحب عيال اختج..وايد..
ساره: و انت..
هزاع: احبهم بس حبج انتي غير..يا عمري..

ساره"تضحك": يوعانه.
هزاع:بعزمج ع حسابي..شورايج.
ساره:موافقه ..تحرك هزاع بسيارته ..سايرين ع طريج يديد في حيــــاتهم كله حب و شوق .
طريج ماله نهايه ابد..
تمت..



هاي نهاية قصة (( ماتسوى حياتي بدوونج ))
انشاء الله تكون عيبتكمـ

رووووووووووووووووعة غلاااااااااااااااااااااي
و لاااااا طولين وين التكملة
نترياااااااااااج قلبووووووووو
فديييييييييتج
تقبلي مروووووووري