|
يعطيــج العـآفيه ختيه ع البـآرت ونتــرقب البـآرت اللي بعـده |
مـرحبا غلقو القصة على ماالكاتبة تنزل الباارت والسمووحة |
تسلمين اختي على هالقصة بصراحة امبين عليها وااايد روعة ربي يعطيك ألف عافية نتريا البارت |
نتريااا البااارت لا تبطوون عليننا |
انــــــــــــــآآ هنـــــــــــآآ ^.^ ((الحلقــــــــــة التــ 9ـاسعـة و الـثـ 3ـ لاثوون .)) أنا وانت الهوى فينا زمان ولا تلاقينا رفضنا واقع الأيام خلاص معاد يمدينا تعبنا وحنا نتأمل نبي أحلامنا تكمل وضاع اللي نبيه يحصل وضاعت كل أمانينا علينا وضعنا مكتوب نعيش الوضع يالمحبوب حزن بالصدر منصوب وليال الحزن تطوينا يظل الكون له أسرار مخفيه عن الأنظار ولاندري عن الأقدار ورضينا بكل مايجينا بالاول ما صدقت انه بياخذني المحكمة بس يوم جفت نظرات الجديه بعيونه سكت و هديت ... ركبت معاه السياره ..كنا ساكتين ..كان بعالم ثاني ..و سرحان الغريب مثل هالمواقف اجوف يخلص علبه زقاير بس الحينه ما اجوف ولا علبه بسيارته اصلا سيارته ما فيها ريحة زقاير .. يمكن تاب!! حتى لو تغير ..حتى لو صار احسن واحد بالدنيا بس انا خلااص ما ابااه مب لاني اكرهه لاني احبه و قربه يعذبني .. و خليه يستقر بحياته مع ولده و حرمته ...ما اعرف شو طبيعة علاقته بعايشه بس ما عاد يهمني .. كل الي يهمني ادور راحتي ما تكلم ولا كلمة .. وصلنا المحكمة ..بديت اتراجع بس يوم تذكرت الي سواه فيني ..نزلت من السياره بكل جرأه دق قلبي بقوه يوم قريت "محاكم راس الخيمة" تميت واقفه الغريب انه مطر سبقني و اضطريت الحقهه و كانه هو الي يبا يطلقني .. و ما صدق يبته المحكمة ..بس خل يسوي الي يسويه انا اتخذت قراري و خلااص ... كنت يالسه في الانتظار .. حطيت ايدي ع بطني ..حتى انت لازم ما اتعيش علشان ما اتجوف الي انا جفته في حياتي ... مطر بنبره جاده : يالله قومي .. وقفت من غير ما ارمسه لحقته دشينا اللفت سالته : وين بنروح؟؟ مطر ابرود : لازم انمر العلاقات الاسريه عقب اندش ع القاضي قلته بسرعه : و ليش ما اندش ع القاضي الحينه سالني يتمصخر: مستعيله وايد قلته بعناد: هي وايد .. طالعني بنظرات و زخني من ايدي وييرني برع اللفت حسيت بالخشونه و قسوة معاملته بس بتحمل الين ما افتك من كل شي ..ددشينا عند الاستشاري .. كان قلبي يدق يقوه فضيعه .. حسيت للحظه انه بيوقف ... تم يطالعني مره يطالعني و مره يطالع مطر .. سال : خير ان شاء الله تم مطر ساكت و انا بعد ما عرفت شو اقول رجع و قال : ما اظن اتفكرون بالانفصال و انتوا بهاي الملامح و كانكم مجبورين رفعت راسي اطالع مطر حتى هو طالعني ... بس اجبرت نفسي اقول : لا انا ابا انفصل مطر كان ساكت ما تكلم ولا كلمه .. الاستشاري : بس امبين من نظراتكم قاطعته بغيض: ما عليك من نظراتنا ..انا ابا اتطلق ..؟؟ الاستشاري : زين هدي ... بس ممكن اعرف الاسباب .. صديت صوب مطر علشان يرمس يتكلم بس كان ساكت .. فقلت : اسباب وايد المهم انا ما اتفجنا و انا ابا اتطلق التفت الاستشاري صوب مطر و قال : ما سمعت رايك مطر بنبره جديه: انا ما ابا اتطلق انا احبها عصبت ع طول: جذاااب عمره ما حبني من عشت وياه و هو معذبني "سكت و عضيت ع شفايفي امنع دموعي تحدر " سكتنا فتره طويله حتى الاستشاري تم ساكت يطالعنا قلت : انا ما اتحمل اكثر ابا اتطلق .. الاستشاري يسال مطر : ليش هي اتقول معذبنها ؟؟ مطر :انا اعرف اني عذبتها بس انا ابااها ما اقدر اطلقها .. طالعت مطر بنظرات احتقار هذي لعبه من الاعيبه خبيث فاجأني يوم قال بكل صراحه : كانت لي علاقات مع حريم بس انا تركت كل شي علشانها ما قدرت ارمس لساني انربط حتى يوم قال : اعترف لك كنت اشرب و ادوخ بس ودرت كل ها الاشياء علشانها بس هي بعدها ما تباني قلته اذكره : و حرمتك و ام ولدك ؟؟ و عايشه حرمة اخوك صخ مطر ما اعرف شو يقول ساله الاستشاري : انت متزوج عليها ؟؟ تم ساكت متردد فقلت : هي متزوج و ماخذ بيت ابوي مسكنها فيه .. طلعت فضايح مطر كلها .. كنت ارمس و كاني ابا اطفي النار الي فيني ... مطر تم ساكت و ما يدافع عن نفسه حتى .. الاستشاري : يا بنتي انا قاعد اجوف ريال جدام اعيوني غير عن الي ترمسين عنه قلته بهجوم : انت ما تعرفه ع أي اساس تحكم بالشكل؟؟ الاستشاري : كيف ما اعرف الرائد مطر ولد ................!! شهقت كيف عرفه بس مطر طالعني بنظرات ما عرفت شو قصده منها ... الاستشاري : نحن دايما نتعامل مع الشرطه ... و اكيد بعرفه ..و الكل ملاحظ ان هالانسان تغير انا ما اعرف حياته الخاصه بس اعرف طبعه و اخلاقه ... قلته ابسرعه : انا ما يهمني ع كل الي سواه فيني و البهدله الي جفتها منه ما اقدر اعيش وياه قاطعني : ربج يسامح قلته بعناد: ما بسامحه ابا الطلاق .. رد الاستشاري لورا و كانه يأس و قال : طلقها اذا تبا تطلق طالعني مطر بنظرات و الله لو تميت اطالعه عادي اغير رايي علشان جي تجاهلت نظراته ...نزل راسه ع الارض و كانه ما يبا .. الاستشاري : اذا كان في حمل فكري بالاول قاطعته بسرعه : انا مب حامل .. مطر بنبره هاديه فاجاتني : وايد مستعيله ميثه !! الاستشاري : قال تعالى " ........ وَلَا يَحِلُّ لَهُنَّ أَنْ يَكْتُمْنَ مَا خَلَقَ اللَّهُ فِي أَرْحَامِهِنَّ إِنْ كُنَّ يُؤْمِنَّ بِاللَّهِ وَالْيَوْمِ الْآخِرِ وَبُعُولَتُهُنَّ أَحَقُّ بِرَدِّهِنَّ فِي ذَلِكَ إِنْ أَرَادُوا إِصْلَاحًا...."و الحينه طلقها كان بالي في الايه الي قراها الاستشاري حسيت بخوف و اني بكون ظالمه حق مطر وحق الولد الي في بطني مطر: ما اقدر .. الاستشاري : الظاهر بحولكم عند القاضي .. فهمست و قلت بصوت واطي و انا ميته بداخلي : لحظه ...انا حامل ! حطيت ايدي ع بطني و رصيت عليها اكرهه خرب علي كل شي كنت بفتك من مطر .. و من الحياه وياه بس مطر بطل اعيونه مب مصدق .. الاستشاري مستانس : تبارك الله .. مطر مب مصدق : انتي حامل ؟؟ وقفت و انا فاقده الامل اني افتك من مطر صار مصيري مرتبط فيه خلااص .. و طلعت من الحجره مب حاسه بروحي ...صحت بمراراه خسرت كل شي .. بسبب ها الي في بطني ..خسرت راحتي حريتي .. تعبت خلااص .. رحت صوب سياره مطر و ركبتها ..ركب سيارته ..تفاجات يوم زخ ايدي و قال جنه مستانس : ميثه ليش ما قلتي انج حامل.؟؟ حاولت ايير ايدي قلته : عندك غيره حق شو مستانس ؟ مطر ولا جنه به احساس : فديتج انتي غير وولدج غير "بااس ايدي " كرهته فسحبت ايدي بسرعه فقال : الله يسامحج تبين تطلقين و ما اتقولين انج حامل ..اصلا انا ما كنت بطلقج .. صرخت بويهه : ان شاء الله اموت و افتك منك مطر زخ ايدي بحراره: ميثه لا اتقولين هاي الرمسه انتي مينونه تبين تذبحيني .. قلته و انا مقهوره : انت اصلا ما اتحب الا روحك .. انا اكرهك ما ابا اعيش وياك بروح بيت خالوه حسيت كلامه له كان شرات السم جفت ملامح ويهه تغيرت قال : كافي فضحتيني و يبتني هني جدام الناس و الكل يعرف منو انا !!!و غير انج فضحتني البارحه و اهنتيني جدامهن كلهن بعد ما سدج ! صرخت عليه : تستاهلللللللللللللللل ها شويه عليك .. طالعني بنظرات و حرك سيارته ..كنت مفوله و محرجه من الخاطر .. حطيت ايدي ع بطني ودي ازغته خرب علي ..كنت بتطلق و افتك من هالعيشه .. تفاجات يوم قال ابرود : شوي شوي ع غيث "يا ام غيث" التفت صوبه و طالعته ابتسم يقهرني : بسميه غيث شو رايج يا ام غيث صديت عنه اطالع برع متفيج بعد يبا ينكت و يستخف دمه عقب الي صار من شويه ..تنهدت بعذاب ..وقنا عند اشاره زخ ايدي حسيت بحرارتها مطر : لو تحبيني صدق كنت عرفتي اني تغيرت وايد .. همست : بتتغير حق عمرك وولدك و حرمتك و انا ما بيفيدني شي .. رص ع ايدي : ميثه انا اباج انتي .. المشاعر الي احسه صوب هالانسان بتخبل فيني شسوي انا في نارين بس انا ما بسكت له ما اباه خلااص ..نقزنا يوم سمعنا صوت الهرن كانت الاشاره خضره و مطر مب منتبه كانه بعالم ثاني .. حرك سيارته ابسرعه ... قال باسف : ما توقعت توصليني للمحاكم قلته بنبره جاسيه : و انا ما توقعت اتكون حياتي تعيسه وياك "طالعني فقلته استفزه زياده " كنت ناوي اطيح حملي قال بسرعه و بخوف : يا ويلج انتي مينوووووووووونه ما بسوينها يا ويلج ميثه .. وقف السياره ع جنب و قال : ما بتجتلين ولدنا .. ييرت ايدي و صديت اطالع برع و انا فيني صيحه لان حالنا جي وصل ... تم ساكت يراقبني حسيت بضيج فقلت بسرعه : شو لي متى بتم واقف جي .. فاجاني يوم قال : افكر فيج .. و في الي سويته فيني ارتفعت ضغطي و هاجمته: انت و منيره دايما اتلوموني انا انت نسيت شوسويت فيني ..خاف ربك فيني ..علشان جي انا ابا اعق ولدي .. علشان ما يعيش شرات حياتي قال بسرعه : ما بخليه يتعذب .. قلته متعمده اجرحه : اذا انت ابوه انسى حسيت ويه تغير سكت ندمت اني قلته جي بس يستاهل عقب قال : انتي غيرانه من منال طالعته بنظرات غيض عفد صوبي و بطل السده الي صوبي رديت لورا علشان حسيت ان انفاسه جريبه مني .. ظهر اوراق من السده و قال : ها بيت ابوج .. مسجل باسمج ع طول هذاك اليوم اصلا غيرته و خليته باسمج لانه حقج طالعت الورقه جني باكلها بعيوني طالعته ما عرفت شو اقوله رن موبايله طالعه عقب حول لسايلنت تطنزت عليه : روح لها اكيد تبغيك .. طنش كلامي و قال : ميثه عضيت ع شفايفي لاني قاعده احسسه اني غيرانه عليه حدرت دموعي و قلته بصوت ضعيف : ليش اتحب تعذبني انا شو سويت فيك .. تجرب مني و زخ ايدي و باسها قال : ميثه اسمعيني حبيبي بس قبل اوعديني انج ما اتسوين شي في الي بطنج ماله ذنب حراااام طالعته اتامل نظراته لان نبره صوته لفتتني ترجاني : اوعديني صديت عنه و قلته متعمده اقهره: ما اقدر اوعدك .. سمعته يتنهد و عقب رجع لورا و سند راسه ع السيت و قال بنره هاديه : الحينه علشان قبلت بامانه اتبهدل بحياتي جي ...اووووووووووووف طالعته اعتدل بيلسته عقب قال : يا بنت الناس ترا منال .مب حرمتي هذي حرمة رفيجي زايد بطلت حلجي علشان اقوله جذاب و ان منال بروحها هي الي قالت انها حرمتك .. بس سبقني و قال : متزوجنها من دون شور اهله و هي بعد اتحبه و خذته غصبن عن اهلها بطلت حلجي : هاه ... مطر شكله اندمج : جفتها مره يايه العزبه كانت حامل بولدها ادور ع زايد و يوم جفتها زايد قص علي و قال انها اخته بس عقب ما ولدت و يتته دوره بامريكا توهق .. و خاصه هي ما عندها حد لان اهلها مب راضين عنها و غير ان اهله مب راضين عنه و متحلفين له لو جافوها بياخذون الولد اعتدلت بيلستي و سالته جني غبيه : انت ترمس عن الحرمه الي قاعده في بيت ابوي مطر عقدت حياته : احسج رديتي ميثه الغبيه الي اول ما عرفتها تجاهلت مصخرته و سالته : كيف كيف جي يعني الولد متعلق فيك !!وايد مطر : اقولج زايد امن لي حرمته وولده ..ولده من قام يتفطن الي حوليه ما يعرف غير امه و غيري ... عضيت ع شفايفي مطر يكمل: هو عنده مشاكل بصدره ووايد يتعب علشان جي كنت اخاف عليه و كل ما تتصل لانه زايد مأمني عليهم .. حسيت ا ني مب مستوعبه كلامه قلته بغيض: و ليش ماخذها ليش كل ها "و صحت " و انا شو ذنبي اعاني من كل هاه .. مطر متعاطف معاي : اسف فديتج .. قلته : احس مخي افتر مطر زخ ايدي و باسها : لعوزتيني قلته و انا اشفق عليه و ع روحي : ليش ما خبرتني مطر : وعدت زايد ..وايد خايف من ااهله انهم يعرفون شي عنها و يتصرفون و هو برع البلاد ممنوع ياخذها ..اتوهق و ما كان بساعده غيري ..علشان جي اضطريت اسكنه بيت ابوج لان اهله يعرفون أي بيت املكه بس ما يعرفون بيت ابوج .. حسيت قلبي يتقطع بس ها الشيء ما منعي اني اقوله: مره قالت لي انها حرمتك مطر : يمكن كانت مضطره خايفه ع ولدها .."سكت جنه متردد " قلته بسرعه : شو قول ؟؟ مطر : فهد مره راح لها البييت دش عليها هي كانت ع بالها انا مع انها تعرف اني ما اييها الا اذا اتصللت و محتاجه اتروح الطبيب علشان ولدها .و عمري ما دشيت داخل البيت كل اكون واقف برع عند الباب .. قلت بسرعه : شو سوا فهد مطر مقهور من فهد : يظن انها حرمتي و قعد يهددها و الفقيره خافت منه و هددها عقب ما خبرته انها حرمة زايد انه يخبر اهل زايد تضاربت وياه بغيت اجتله هذاك اليوم .. قلت ابسرعه : علشان جي فهد محد يجوفه و قاطع واايد يغار عليك .. "ابتسم مطر و قال :حتى انا كم مره جفت يظهر حرمه من شقته كنت اتضايج و اغار لانه ما يخبرني مره جن جنوني يوم جفت خاتم و ساعه حسيته يخوني و الله علاقتنا وايد كبيره و بس الملعون طلع راعي حريم ...بس تاب .. قلته بسرعه : الطيور ع اشكالها تقع مطر : ها ها عن الغلط .. سكت عنه و تميت ارتب افكاري و افكر كل الي قاله في بالي .. يالله اشكثر ظلمته ...معقوله .. سالته : يعني انت مب معرسه ؟؟ فتح اعيونه و طالعني و قال: امبلى وحده اسمه ميثه و بس فديتها حامل الحينه قلته بسرعه : انت الحينه تباني علشان حامل و لو ما قلتلك اني بعق ولدك جان ما خبرتني سالفه منال قاطعني : دووووووومج تحكمين علي بالظلم ... كنت ناوي اخبرج اليوم لان زايد وصل البارحه و الي كان متصل البارحه زاايد رفيجي مب حرمته ..سرت المطار و استقبلته ... كنت ابا اخبرج ..بس انتي حشرتيني محكمه و محكمه نزلت نظراتي بالارض وهمست : انت السبب حطيت ايدي ع بطني و حط ايده ع ايدي و همس : بضريه هزيت راسي بمعنى لا و انا مستانسسسسسسسسه بداخلي بس قلت متذكره : لا تظن بسامحك ع بالك نسيت سوالفك و ملجتك مع عايشه فجاه عدل بيلسته و طالعني بنظرات و قال بنبره جافه: حتى انا ما نسيت سالفه زواجج من طارق .. حرك سيارته ..حطيت ايدي ع بطني بس كنت بداخلي مستانسه و كان هم و نزااح و منال جنه كابوس و الحمدلله طلع شي ثاني ..طالعته كان يسوق يالله اشكثر قلبك كبير و عود ...تحملت و كانت حياتك بتتبهدل علشان بس تحفظ سر ربيعك ..ياني شعور اعفد عليه و احضنه و ابوووسه .. و اقوله اني احبك و سالفه عوااش ما بغيت اطريها الا اني اقهره ... بس طارت افكاري ..ضرب ابريك فجاه نقزت لجدام حتى كنت بضرب الجامه بس زخني رفعت راسي كنت بهزبه بس اشر لي و قال : طاعي هناك .. لفتتني نبره صوبه افتريت صوب ما يأشر شهقت هذي سيارة الشيبه واقفه عند باب بيت قوم مطر .. مطر محرج : بدوسه دق قلبي بقوه و همست : مطر اتريا جوف شو سالفته مطر محرج: ما عنده شي بس يحرس بيتنا ..كم مره رمسته همست : يتريا عزوه نقزت يوم طالعني بنظرات بلعت ريجي بخوف فكملت بسرعه : حتى كان لاحقنا لصلاله مطر مصدوم : شوووووو انتي جفتيه ؟؟ هزيت راسي بمعنى هي صرخ علي و نقزت من مكاني يوم قال : و ليش ما قلتي قبل قلت ادافع عن روحي و انا ميته من الخوف : انت ما تصدقني قلتلك قبل .. طالعني بنظرات قهر ..ورد يطالعه و قال جنه يرمس روحه : شو يتريا الحينه .. كنت بقول ما ادري بس خفت اتنطق باي كلمه .. بطلت اعيوني غصبن عني يوم حط مطر ايده ع ذراعي لا ارادي و كأنه ينبهني جوفي هناك .. دق قلبي بقوه خايفه من الي ممكن يصير و يستوي . مطر مصدوم و مب مصدق اعيونه : جوفي عزه !! حطيت ايدي ع حلجي و جني اول مره اجوف حركاتها ... كانت عزه ظاهره من البيت و بيدها شنطتها صغيره .. و الشيبه اول ما جافها ظاهره من البيت نزل من سيارته علشان يشل عنها الشنطه و كانه يشجعها .. صرخت بصوت عالي يوم مطر حرك سيارته بسرعه صوب عزه للحظه حسيت ان بدعمها .. صرخت احذره : مطر مطر ,,, زخيته من جتوفه اهززه ...وقفت عزوه بوسط الشارع مصدومه ..و كانها ما توقعت اتجوف مطر .. طاحت الشنطه من ايدها ... و تميت يابسه بمكانها ... نقزت لجدام يوم مطر ضرب بريك بقوه .. و فجاه ..دارت فيني الدنيا من قوة الضربه و جفت سواد تحت اعيوني ... سندت راسي ع السيت اتحسس ع يبهتي ..و انا ممب حاسه بروحي ... سمعت اصراخ من بعيد ...حاولت استوعب الموقف ...تذكرت ع طول ان مطر زخ عزوه الي كانت بتشرد ويا الشيبه ..فتحت اعيوني و انا أتالم ...حسيت بشي حار ينزل من راسي تحسست بيدي و بطلت اعيوني يوم جفت الدم ..خفت و حطيت ايدي ع طول ع بطني .. ما كنت احس بالالم عدا مكان الدم ينزف من يبهتي .. رديت للواقع يوم سمعت صراخ عزوه .. رفعت راسي اطالع برع .. شهقت مصدوم .. جفت مطر قاعد يسحب عزوه من شعرها و اييرها داخل البيت و هي شكلها تقاومه و كانها ما اتبا اترجع البيت بكل قوة عين . .ما تحملت الموقف يوم جفت الشيبه يعفد ع مطر اونه يبا ياخذ عزه وياه.. صحيح شيبه لكن بنيه جسمه بعدها قوية .. نزلت من السياره ابسرعه .. متناسيه جرحي الي ينزف ...ما عرفت شو اسوي و كيف اتصرف ... وقفت ابعيد اصارخ : مطر خلها عزوه اتصارخ باعلي صوت : هدني ما ابا اعيش وياكم .. بلعت ريجي كان خلاص بدخلها البيت ..لوما عفد عليه الشيبه ..من ورا و طيحه عالارض .. خفت عليه يوم طاح ....استغربت من وين له هالقوه ...حتى مطر تاثر بضربته و طاح عالارض ... جفت عزوه من جافت اخوها طاح عالارض .. ربعت صوب سياره الشيبه لحقتها علشان امسكها .. بس كانت اقوى مني و كانها شرسه .. دزتني بكل قوه لدرجه انها قامت اتشمخ ويهي انا ما تحملت فكانت الاقوى .. ربع الشيبه صوب السياره .. ما تحملت رديت لورا ما اقدر اسوي أي شي ..يوم جفت مطر نش من عالارض و ربع صوب سياره الشيبه صحت خايفه عليه : مطر خلها اتولي كان ويهي يحرقني من اثار ظفور عزوه ..فج باب السياره بسرعه قبل لا تصكره عزوه و رد نزلها ..شلها ع طول ماخذنها صوب البيت بكل دفاشه .. عزوه تصارعه : هدني هدني اقولك .. كنت اطالع الموقف بخوف كبير و ما بيدي شي اسويه ..بس اني اترجا مطر يهدها ... فكرت اتصل باي حد ربعت سياره مطر ادور ع موبايله .. جفته شليته و انا مرتبكه ... مب عارفه اتصل بمنو .. ضغطت ع زر الاتصال و انا اعيوني ع مطر و عزه الي كانت تصارعه بس صرخت يوم جفت الشيبه رد مره ثانيه و دز مطر عالارض بس مطر هالمره قام ع طول و عطااه بكس بويهه .. معقوله لها الدرجه متعلق بـ عزه ..صرخت يوم جفت الشيبه يطيح عالارض و يطشر الدم من حلجه .. ما انتبهت طارق معاي عالخط : ميثه شو فيج ؟؟؟؟؟؟ قلت بسرعه : الحق طارق الحق ع مطر و عزوه .. حسيت طارق جن جنونه : وين انتي ؟؟ ميثه وين انتي ..الو الو شو فيهم عزه و مطر ؟. فريت الموبايل من ايدي يوم جفت الشيبه شل الحديده الي طاح عليها ... قلت بصوت عالي : بتموته .. خفت ع مطر وايد ... كنت بصرخ انبهه مطر ان الشيبه بضربه بس انربط لساني ...يوم كفخ مطر ع الحديده ع ظهره و طاح مطر ع طول طحت ع طول يوم جفت مطر متمدد ع الارض ... و عزوه ال****ه جنها ما صدقت ربعت ويا الشيبه و ركبوا السياره حتى من غير ما تلتفت حق اخوها .. يلست احبي و انا اصيح بالم .. و اهمس مب رايمه اعلي صوتي : مطر مطر .. وصلت له صحت حسيت بحرقه بدموعي و انا اهزه : مطر مطر ... كان امبطل اعيونه و الدم يصب من تحت ايدي بسته ع يبهته كانت بارده حضنته و انا اصيح .. صرخت : ساعدوني .. سعود سعود .. توه بس الناس قامت تتيمع و كانهم مستمتعين بالموقف محد كان يساعدني اترجاهم يتصلون حق الاسعاف .. انقذني يوم ظهر سعود من البيت .. اتروع تم يطالع مستغرب .. ترجيته : سعود اتصل باي بحد مطر يموت .. سعود "خايف و مرتبك " طارق اتص اتصل اتصل بي ... وصلت سيارة الاسعاف بس انا حسيت ساعات و مطر ينزف تحت ايدي ركبت مع مطر سياره الاسعاف و انا ميته من الخوف عليه .. ترجيته : لا تموت دخيلك .. الممرضه : لو سمحتي اختي ..خلنا نسعفه مسحت دموعي ع طرف ايدي : بعيش ما ردت علي ..يوم جفتها ما ردت رديت صحت بحراره نزلت ورا الممرضه و انا ارتجف من الخوف .. تفاجأت يوم جفت طلال سابقني و معاه سعود و عبدالرحمن و شباب ما عرفتهم مسرع تبمعوا و انتشر الخبر... دارت فيني الدنيا من صعوبة الموقف .. مسكني سعود قال بخوف: ميثه بلعت ريجي و انا اقوله : احسه ما يتنفس و الله .. دشينا كلنا المستشفى ..نربع ورا مطر .. اول ما دخلوه غرفه الحوادث حطيت ايدي ع بطني مب متحمله خلااص .. يلست ع اقرب كرسي ... شويه حد مد ايده عطاني ماي ..شربته و جني اول مره اشربه ..بلعت ريجي ابصعوبه . يتني ممرضه و حطت لي مطهر ع يبهتي و لصقت لي اليبهه عقب ما طهرت مكان عزوه مشمختني ..رفعت راسي جفت طارق . . همست مره ثانيه : ما يتنفس و الله طارق بنبره قهر و الم: منو سوا فيه جي .."طالعني " و انتي ليش جي ويهج شو مستوي ؟؟ ع طول تذكرت الموقف عضيت ع شفايفي و انا متذكره حقارة عزه حطيت ايدي ع ويهي و صحت .. طارق و كانه فقد صبره : ميثه ارمسي منو سوا بمطر جي .. ما قدرت انطق ولا كلمه .. جفت ريال يزخه و يبعده عني .. عادي طارق يزخني من رقبتي علشان انطق بشي بس شو اقول جدام هالعالم اختك شردت ويا واحد ..!!!مستحيل .. وقفت ابسرعه ..و كلنا تجدمنا يوم ظهرت ممرضه من الغرفه بس قبل ما أي حد يسالها رفعت ايدها و قالت : للحينه فاقد وعيه .. فقدت الامل و الكل فقد الامل .. حسيت الانظار كلها لي يبون يعرفون شو صار بمطر .. صار الممر هدوء و محد يرمس ..حسيت مكاني غلط لو مطر عرف اني واقفه ويا هذيلا الشباب ما بيرضى .. تجدمت ادور مكان افضفض فيه مشاعري و احاسيسي ..يلست بعيد عنهم انا اتذكر الموقف..كيف كيف عادي عندها تجوف مطر جي ينضرب ما همها .. مطر اكثر وااحد كان مدلعنهاا ..ما فيها خير هاي السباله ..رفعت راسي يوم سمعت حس منيره اتصيح : ميثه حاولت اوقف بس ما قدرت ..حضنتني و صحنا بمراره .. منيره : شو فيه مطر طار عقلي يوم خبروني بالمستشفى ..!! هو البارحه كان يتشكى من صدره شو استوا به .. نزلت راسي مب عارفه شو ارد عليها ..اذا قام بالسلامه خليه بروحه يخبرهم عن سوايا اخته ووصاختها .. عقب ثلاث ساعات ظهروا مطر من غرفه الحوادث .. ربعنا وراهم .. قلبي كان يدق عليه من الخوف حسيت بدوار يوم قريت بلوحه (العنايه المركزه ) ليش شو فيه !! لها الدرجه تعبان ..!! زختني منيره من ايدي و قالت : الله كريم .. وقفنا كلنا يوم صكروا الباب و مننعوا أي حد يدش ..كنت اراقبهم من برع يوم يحطون الوايرات بجسمه بلعت ريجي بصعوبه كل مني لو ما سرنا المحكمة ..ما صار الي صار .. نقزت يوم جفت فهد يربع يصيح بصوت عالي يبا يدش الغرفه ..زخوا الشباب الموجودين رديت لورا خايفه من ها المنظر ..يلس ع االارض يصيح جنه حرمه !! فهد !! عبدالرحمن: بس فهد بس مطر ابخير .. استغربت يلست اطالعه باستغراب ..لها الدرجه يحب مطر !! طالعت طارق جفته منزل راسه بالارض متاثر التفتنا كلنا صوب الباب الي انفتح ..ظهروا الدكاتره من عنده وقفنا كلنا انطالعهم نتريا حد يقول شي ..الا فهد تم ابمكانه يصيح ... طارق : شو ؟؟ واحد من الشباب : طمنا واحد من الدكاتره ما سوا خير يوم قال : خلال 24 ساعه اذا ما تحرك "هز راسه " ما بنقدر انسوي له شي .. ما تحملت كلامه زياده اسودت الدنيا بعيني و طحت غشيانه ..ع طول .. فتحت اعيوني بصعوبه و انا اسمع الدكتوره تزقرني : ميثه ميثه افتحي اعيونج ميثه .. بطلت اعيوني و رجعت غمضتها بسرعه كنت احس بعمري تعبانه حيل .. اول ما سمعت حس منيره : شخبارها الحينه ؟ الدكتوره : الحمدلله زينه همست : منيره منيره زختني من ايدي : فديتج ميثه .. قلتها بنبره ضعيفه : اساليها عن الي في بطني ٍ منيره مصدومه : انتي حامل !! ما قدرت اقولها شي .. الدكتوره : كل شي تمام بس انتي ارتاحي علشان الي في بطنج .. بطلت اعيوني ..اطالع الغرفه و انا احس بضيجه منيره صاحت : انتي حامل ميثه من جفت دموعها تذكرت مطر و انا ليش هني سالتها بسرعه : شخبار مطر ؟؟ منيره : طارق يقول مثل حاله ..ميثه شو الي صار !! صديت الصوب الثاني متالمه وخايفه ان يصيبه شي ...و مطنشه سؤال منيره قلتها : كم مر من الوقت منيره : بعده العصر ...ليش ويهج جي ؟؟منو ضاربنج حطوا لي اكل ما طعت اكل حتى هددتني الدكتوره اتسوي لي مغذي ..فكلت غصبن عني ... كانت منيره واقفه معاي ..فاجاتني يوم قالت : ها الي ما تبينه الحينه بودرج و بتفتكين منه صدمني كلامها فصحت ع طول صحت و اهي اطالعني عقب حضنتني رفعت راسي و قلتها : تدرين اني احبه رغم كل الي صار .. منيره كانها متندمه : انا اسفه ... انفج باب الحجره تفاجات يوم جفت منال ويا ولدها ..ابتعدت عني منيره ... بلعت ريجي ..و عضيت شفايفي و نزلت دموعي مره ثانيه ..طالعتني منيره خايفه علي من ان يغمي علي مره ثانيه .. منال شكلها متأثر : السلام عليكم ... ردينا السلام منيره : اتفضلي قربي . . "خذت عنها الياهل " تجربت مني و سلمت علي قلتها ع طول: ليش قلتي انج حرمته منال منحرجه من منيره : انا اسفه .. صحت ع الايام الي ضاعت و انا اشك بمطر انه معرس علي و ان ها ولده .. منيره : عيل من تطلعين انتي ؟؟ "طالعت الياهل" جي ها مب ولد اخوي شسالفه !! منال بنبره اسف: انتي يوم ييتيني هذاك اليوم تساليني عن مطر كان ع بالي انج اخته هو ما قال انه معرس اصلا انا ما اعرف عنه شي...عقب عرفت انج حرمته .. منيره : عيل شو يسوي اخوي عندج و منو ها الياهل ما بغيت اتكلم و اعور راسي و مطر بهاي الحاله ..بس منيره كانت تبا ترضى فضولها ... منال: ما بينا شي ..زايد مخلني انا ولدي امانه عند مطر لي ما يرجع من امريكا و اليوم الفير رجع منيره بغيض: وين اهلج ووين اهله ..كنتوا بتخربون حياه اخوي و حرمته منال منزله راسها كانت شويه بتصيح : سامحيني ميثه بس كنت خايفه ع ولدي قلتها بصوت واطي: مطر قال لي كل شي "عضيت ع شفايفي" بعد ما ظهرنا من المحكمه و كنا بتطلق لولا سالفه حملي منيره شهقت : رحتوا المحكمة ..!! منال : كنت ناويه اخبرج عقب الي صار في بيت منيره ... منيره محرجه : نحن بمكان ما يسمح اني اعاتبج سكتت منيره يوم انفتح الباب و دشت سلمى وخالوه .. ع طول صحت لوت علي خالوه اتهديني ... و اتواسيني ..كان اتعس يوم في حياتي ... كنت ابا اطلع من ها القسم و اروح عند مطر بس الكل كان مصر اني ارجع البيت و ارتاح و خاصه عقب ما الكل عرف اني حامل ... رحت قسم العنايه مع منيره و سلمى و خالوه طالعت مطر كنت برع نفس الحال ما في شي تغير .. الشباب كل واحد بمكانه يالس يتريا رحمة ربه ...حتى فهد مثل حاله قاعد يصيح شرات اليهال ... تبون الصراحه فقدت الامل ..دومي منحوسه ..يوم عرفت ان مطر لي وحدي و اني ظلمته بسالفه زواجه ..و انه ترك عايشه للابد ..صارت الظروف ضدنا و شكلها بتفرق من بينا مرت 9 ساعات ع الحادثه و مطر ابد ما تحرك فيه شي مسحت دموعي زختني منيره من جتوفي و قالت حق سلمى : وديها البيت ترتاح .. كنت بقولها لا بس ما قدرت ارمس انا فعلا محتاجه اكون بروحي ... بس كيف اودر مطر ..اذا مات ما بسامح روحي ابد ... مدري كيف وصلت سياره سلمى ..كنت في عالم ثاني .. خالوه كانت لاصقه فيني وايد .. و خاصه عرفت اني حامل ..حسستني بانها امي ..وصلت بيت مطر .. طاحت اعيوني ع مكان الضرابه الي صارت بين الشيبه و بين مطر .. نزلت و انا ارتجف ساعدتني سلمى.. شهقت و يبست ابمكاني يوم جفت بقعة دم مطر صحت بحراره و ترجيت سلمى : دخيلج ما ابى ادش هالبيت و ديني بيتكم .. سلمووه سلمى : شو فيج بسم الله .. يلست ع الارض مب رايمه اتحرك ..ولا اشل اريولي ..صرخت خالوه متروعه : ميثه قومي يمه بسم الله قومي .. سحبتني هي و سلمى بالغصب لين ما ركبتني السياره ما سكت حتى يوم وصلت بيت خالوه و يلست بحجرة سلمى ... اتصلت سلمى بمنيره محتاره اترجعني المستشفى لانها خايفه علي و ع الي في بطني ... بس منيره جنه قالت لها تهديني و اذا أي شي في مطر بتخبرني ...هني سكت .. رقدت بحضن خالوه ..حسيت بالحنان و العطف ..و بنفس الللحظه حسيت ا ني مفتقده حضن مطر .. دفت ويهي بصدرها و صحت بمراره حتى رقدت ...كوابيس و احلام كنت اجوفها ..في منامي ..صورة الشيبه و هو يضرب مطر ما فارجت خيالي ... نقزت متروعه حسيت بالخوف نقزت ع موبايل سلمى اتصل بمنيره ..بس ما ردت علي .. رديت و اتصلت ع موبايل طارق كان الوقت متاخر بس انا اكيده انه ما بودر مطر بروحه ...رد علي قلته بخوف : طارق !! طارق : منوه ميثه رصيت ع الموبايل : هي انا ميثه شخبار مطر ..؟؟ صخ شويه قلبي بدا يرقع بالقو فقال : نفس الحال يلست يأأأسه قلته : يعني شو مطر بتم جي ع طول بس فاجاني بكلامه يوم قال : وين عزه ؟؟ صخيت .. رد سالني : وينها ؟؟ قلته: ما اعرف طارق بغيض: عيل منو يعرف ... يوم وصلت سعود البيت ما لقيتها .. قلته استهبل عليه : يمكن عند منيره قاطعني : محد انتي ما تعرفين وينها ؟؟ سكت محتاره اخبره ولا اتريا مطر يوم ربي بقومه بالسلامه يخبرهم شو اقوله اخته شردت ويا وااحد نقزت يوم قال : ميثه انا قاعد ارمسج قلته بعذااب و انا اصيح: ما اعرف وينها ..انا شو عرفني صخ شويه عقب قال : يعني شو وين اروح ادورها ولا اتم مع مطر شو اسوي بعمري انا .. غمضني طاارق فصحت اكثر من الغيض الي فيني من عزوه .. طارق: زين لا اتصيحين خلااص انا اسف .. ما رمت اسكت روحي فكمل: انا بعدني في المستشفى ..اذا صار أي شي بخبرج اوكى ..؟؟ قلته و انا امش ادموعي : بتريا اتصالك .. سعود وينه بروحه في البيت طارق: لا عند منيره .. قلته : زين خلااص مع السلامه .. قال : زين يالله مع السلامه !! حاولت ارقد ما رمت كنت خايفه ..نشيت و صليت ركعتين ادعي ربي ان يحقظ لي زوجي ....تميت اصلي حتى اذن الفير .. حسيت ا ني خلااص تعبت و انهرت من كثر الصياح ..مب رايمه اجوف شي ...اعيوني متورمه .. يالله قدرت اصلي الفير ..وطحت ع الشبريه و رقدت ع طول ... فتحت اعيوني بكسل تجلبت ع الفراش و انا احس الصداع بموتني زقرت : سلمى سلمى محد رد علي .. رفعت راسي انا و اون من الويع شهقت يوم جفت الساعه 10 و ثلث ..نقزت باجي ساعه و نص و مطر بيكمل الـ 24 ساعه و هو ما تحرك يا ويلي ... و طارق ما اتصل يعني تم ع حاله جتله الشيبه .. يلست اضرب براسي ابا الصداع يخوز عني ربعت برع اصارخ : خااالوه خااالوه يت تربع لي طحت ع ركبي اصيح حضنتني و هي متروعه اتهزني : شو فيج شوووو بلعت ريجي بصعوبه ..يت سلمى من الحجره الثاني : شو استوا !! يلست خالوه تضربني ع خدي و اتزاعج علي: لا اتصارخين جي شو فيج ؟؟ نقزت سلمى اتطالع موبايله الي كان موجود ع الطاوله ..نقزت و يريت عنها الموبايل اتطالع اذا حد اتصل يطمني ع مطر .. سلمى اتيير عني الموبايل : شو فيج ميثه ترجيتها : عطيني الموبايل ابا اجوف اذا حد اتصل فيني "صحت اترجاها" شكيت للحظه انها ممكن تفهم كلااامي ... سلمى اتطالع خالوه : انتي ما خبريتها ا نريلها فتح اعيونها صرخت مدري من الوناسه ولا من الصدمه : لا لا محد خبرني .. يلست اتناقز بمكاني جني خبله بس ما اعرف ليش قاعده اتناقز من الفرحه ولا جاسني خبال زختني خالوه ايودني : يا الخبله لا اتسوين جي .. حضنتني سلمى : ميثه فديتج شو صار فيج حضنت ويها : مطر تحرك هزت راسها بمعنى هي: الفيير ما صدقتها : جذاابه محد قال لي طارق ما اتصل خالوه : و انتي تعطينا فرصه انخبرج ناشه متخبله .علينا .. صحت من الونااسه و حضنت سلمى الي ضحكت و قالت : يا الخديه ..يا الغبيه ..امايه اتقومج من الصبح و انتي موليه ما عندج خبر جنج ميته .. ما رمت اوقف ع ريولي يلست ع الكنبه و همست : الحمدلله ..فديت ريلي .. خالوه اتهزني : ميثه رفعت راسي و قلتها : راسي يعورني احسه بنفجر ... خالوه : بيبيب لج شي تاكلينه مب زين لج الحبوب .. قلت سلمى : منو قالج مطر فتح اعيونه ... سلمى : انتي الحماره ع كيفج متصله ع تلفون طارق و الله استحيت يوم رمسني مستانس ع باله انتي ..عقب جنه اتلوم يوم قلته انا سلمى مش ميثه بس بخبر ميثه ابتسمت و دعيت من كل قلبي ان ربي يوفجهم في حياتهم .. قلتها : نشيت فليل متروعه فاتصلت له سامحيني انزين شخباره مطر ابا اروح له وديني سلمى : صبري بالاول كلي ..احس بتجلعين راسج من مكانه ! قلتها بعذاب: يعورني وايد ...سلمى تخيلي مطر ما تحرك شو بيكون حاله سلمى اتهز راسه : اتخبلتي انتي المهم ع طول ودوه يسون له اشعه و تحاليل .. تنهدت مرتاحه : فديت قلبه سلمى تطالعني بنظرات : يعني لازم يموت علشان تتفدينه حطيت ايدي ع قلبي: بسم الله عليه .. ما صدقت ..تريقت عدل و رحت المستشفى اربع .. وصلت صوب العنايه ... جفت طارق و كانت اعيونه محمره و شكله تعبااان و سعود بعد شكله حزين ...و منيره و عبدالرحمن موجودين بس من جافتني يت تحضني و تتحمد بسلامه مطر .. قلتهم :شو قالوا شو استوا ؟؟ طارق : نتريا النتايج .. رحت اجوفه من برع جفته راقد دق قلبي شكله شرات ما هديته البارحه .. سالت : متاكدين فج اعيونه كانوا يطالعوني بنظرات غريبه يلست اطالعهم مستغربه ..بلعت ريجي بصعوبه فاجاتني منيره : ميثه منو سوا بمطر جي ما عرفت شو ارد عليهم طارق : انتي كنتي معاه .. شو صار ؟؟ عطيتهم ظهري اطالع مطر و قلت : ابا ادش اجوف مطر ... بس نظراتهم ما تغيرت ... منيره مطنشه و قالت بخوف: و عزه وينها .. بلعت ريجي و طنشتهم يوم جفت الممرضه ياييه رحت صوبها ترجيتها : ابا ادش دخيلج ..ما بسوي أي شي .. الممرضه : لو سمحتوا كل الموبايلات تنغلق ما نبا أي جهاز ممكن يأثر ع المريض .. جفته تروح صوب ادراج و ظهرت ملابس لبستها و دخلتني وراها الحجره ..سبقتها صوب شبريه مطر .. همست : حبيبي .. صخيت لاني خفت من الاجهزه الي كانت حوليه ..جفت الممرضه تضربه ابره ففتح اعيونه ع طول عفدت عليه و قلته : مطر تسمعني الممرضه : ما اتفجنا جي .. طنشتها جفته يطالعني بنظرات صحت بمراره حضنته فزختني الممرضه تبعدني عنها حاولت اصارعها و اترجاها : دخيلج ثواني التفتنا صوب مطر يوم همس : عزه .. الممرضه فجت عني و ربعت برع بس انا رديت صوبه يلست امسح ع شعره بسته ع يبهته بس هو كان يطالعني قلته : احبك مطر ..فديتك كانت ملامح ويه جامده شكيت انه ممكن يسمعنى ..رفعت راسي يوم جفت الممرضه ردت ووراها دكاتره و ممرضات طالعتهم بخوف : شو مستوي .. يلس الدكتور يفحصه وقفت بزاويه الحجره ارتجف من الخوف و اطالع طارق و منيره و سعود من برع ,... الدكتور رمس بالانجليزي ما فهمت شو قال بس طرت من الوناسه يوم جفتهم يشيلون عنه الاجهزه .. راغوني برع ..حضنت منيره و صحنا ..شويه و ظهروا شبريه مطر لحقناهم ودوه غرفه ثانيه ..ما فيها اجهزه اتروع شرات الغرفه القبليه .. منيره : الحمدلله ... جفت طارق يتصل بربع مطر يخبرهم انهم شالوا الاجهزه عن مطر ...تضايجت يوم ضربوه ابره و رجع رقد . لحقنا الدكتور يوم ظهر من الغرفه ساله عبدالرحمن عن تحاليل مطر .. كان كلامه شرات الصفعه يوم قال : احتمال 90% مطر ما يروم يمشي لان الضربه يت ع الحبل الشوكي و ها الشيء اثر عليه وايد حطيت ايدي ع حلجي : شو يعني مطر تشلل الدكتور : للاسف للحينه ما نعرف اذا كان شلل نصفي او كامل .. عاد هني ما تحملت دارت الدنيا فيني طارق متروع :شو ماشي حل ..؟؟ الدكتور : ضروري انسوي له عمليه و من الحينه اقولكم نسبة نجاحها 50% عبدالرحمن : بنحوله بوظبي او بنسفره برع الدكتور يهز راسه : مستحيل حالته مش مستقره بس نحن بنستدعي دكتور من برع و اتمنى كل خير.. تميت اطالع الدكتور الي مشى حتى غاب عن نظري .. ما حسيتا لا منيره ادزني بقوه ع اليدار و اتصيح : منو سوا بمطر جي انطقي ؟؟ ما تحملت طحت غشيانه ..هربت من نظراتهم و اسالتهم ...ما بقولهم الا اذا سسمح لي مطر ...و خل الي يصير يصير ..!! |
| الساعة الآن 04:41 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir