منى: هاااااااي شو هذا من متى انته تبطل علي الباب جي....!!
يوسف: سوري ماكنت ادري ان كنه هني... (ابتسمت بتوتر) شحالج كنووه؟!..
ابتسمت كنه لي ...
كنه: بخير الحمد لله..شحالك انته يوسف؟!
يوسف: بخير وسهاله...عشان جي طالبات غداكن فوق...
منى: هي نعم...تغدينا وخلصنا..
تقربت منهن اطالع الي في ايدهن..
يوسف: شو تسون؟!..
منى: نرتب بحث قاعدين...
سحبت كرسي التواليت وقعدت...مجابل كنه ومنى...
منى: اشوفك قعدت..!!
يوسف: هي اباج فسالفه..!!
منى: آآآه لا...امي رمستني امس بليز لا تبدا انته بعد...!!
يوسف: شو قالت لج امايه.؟!..
كنة: احم..عن اذنكم بروح اقعد عن عمي شوي...
اطالعت كنه بنظرة سخرية..عاد اونها تبانا نتكلم براحه...
يوسف: يلسي يلسي وين تبين؟!. عمج رقد..
كنه: انزين بسير وبرجع بعد شوي...
يوسف: يعني اللي بقوله كله بينقل لج بعدين...وفري وقتج ويلسي الاجان مب طايقه القعده وياي...
رفعت كنه حواجبها متفاجئه ويلست بدون كلام...
ابتسمت وصديت لمنى...
يوسف: فكرتي بالموضوع؟!.
منى: لا..
يوسف: ليش؟!
منى: لاني ماريد افكر..
يوسف: لا تظيعين نصيبج...راشد ماينعاب..ريال والنعم ومن عايله محترمه...
منى: مابظيع نصيبي ان شاء الله لاني بعدني صغيره وفاول شبابي...!!
يوسف: لا تقفلين مخج يابنت الناس... عطيني سبب واحد للرفض...
منى: انا مب مستعده يوسف...
يوسف: ليش..؟!.. كل حد يقول جي في البدايه بس من تنخطبين بتندمجين بسرعه...
منى: انا مب مثلك اتاقلم بسرعه...!!
يوسف: ماحاولتي.. امي شو قالت لج عن راشد؟!
منى: ماخليتها تتكلم عنه اصلا...
يوسف: عيل انا بخبرج عنه..واباج تكبرين عقلج يامنى ترا السالفه مب لعب...
تاففت منى..
جان تظربها كنه..
كنه: بلا دلع..سمعي اخوج شو يبا يقولج .... عيب عليج تتاففين جي... هلج يبون مصلحتج..يزاهم يعني..!!
منى اطالعت كنه وهي معقده حياتها معصبه...اما انا فابتسمت لكنه بشكر...
يوسف: شكرا..سمعي منى.. راشد..مثل ماتعرفين عمره خمس وعشرين سنه...يشتغل في الاتصالات..خريج جامعه طبعا... من عايله صغيره ..محد غيره ولدهم يعني بيبزونج اخر بزا... وماحد بينافسج في البيت من حريم خوان ثانيات فاطمني من هالناحيه...عنده خوات ثنتين وحده معرسه وساكنه في دبي واللي اصغر عنه قالولي انها مخطوبه وبتعرس قريب...يعني البيت بيخلى لج..والريال تراه حشيم ومحترم...وماكد حد شاف منه شي شين... بار بوالدينه ويحن عليهم... ومب راعي حركات بنات...لا يدوخ ولا يشرب الحمد لله.. عارف ربه ويدل درب المسيد...اذا بغيتي رايي انا مرتاح له.. وما احس انج بتحصلين احسن منه... انا مابغصبج لكن كل اللي اطلبه منج تفكرين..!! ..
والتفت لكنه اللي كانت اطالعني من الصبح بنظرات حالمه من دون ماتحس.. وقلت لها بسرعه..
يوسف: شو اطالعين....!
انصدمت كنه وحولت عينها عين بسرعه ... ظحكت انا وظحكت منى بهدوء..
منى: هممم... ماقلت لي شو سيئاته...اكيد عنده سيئات مب ملاك ..!
يوسف: سيئاته الله يسلمج..هممم...والله ماعرفت عنه سيئات هالشي ينعرف بالعشره..
منى: ياسلام بتورطوني فيه...!!
يوسف: اطالعي الجوانب الحلوه اللي فيه بدل ما تدورين جوانب سيئه..!!..
تدخلت كنه بحماس..
كنه: كيف شكله..؟!!..
يوسف: شتبينه انتي كيف شكله.؟!...
عقدت حياتي لها...احاول اخوفها... لكن منو اخوف هذي كنه..!!.
كنه: طالع... يعني تبون تيوزونها شين.؟!..
يوسف: وشلج انتي اذا حلو والا شين...المفروض هي تتخبر...


كنه: انا اسال بالنيابه عنها والا شو ابغي فيه يعني..؟!..
يوسف:.. ويا هاللسان اللي عليج.... همممم... راشد وسيم.. طوله مناسب.اقصر مني بشوي..يمكن طول ناصر... عريض..مب متين ولا ظعيف وايد يعني جسمه متناسق..لحيته جي مرتبه بس خفيفه شوي.. اسمراني...لكن مب وايد..يميل للبياض اكثر.. اذا وافقت بييبلها صورته تشوفه...من حقها...
التفتت كنه لمنى بحماس.. شكله راشد نال موافقه كنه....اما منى حاست بوزها متردده..
كنه: منى شكله فنان هالراشد....!!
يوسف: كنوه...
كنه: هااه؟!
يوسف: جـــــــب...
تمت كنه تظحك وادركت غيرتي عليها...واحمر ويهها حيا...
منى: بفكر..
يوسف: فكري..وصلي استخاره... عالاقل من حقه انج تاخذينه بعين الاعتبار وتفكرين مب ترفضين منيه والدرب..!! بدون سبب مقنع..!
منى: ان شاء الله...
يوسف: ومتى بتردين علينا؟!
منى: اوهوو عاد لا تضغطون علي..!!
يوسف: خلاص خلاص... يالله بخليكن تكملن شغلكن...
منى: يوسف..
يوسف: هااه؟
منى: خبرتوا ناصر.؟
يوسف: هي وقال رايي من رايكم..
منى: بايي هو اليوم؟!.
يوسف: لا قال انه بايي باجرعنده شغل اليوم...
منى: اهااا..
يوسف: يالله برايكن...
قمت ورديت الكرسي مكانه...ويوم خطفت عدال الشبرية مسكت المخده الصغيره وفريتها على راس كنه وطلعت... وانا اسمع ظحكتها في اذني... ويتردد صداها فقلبي...!!.


--------------------------------
اليوم: الاربعاء..
المكان: سيارة سهيل..
الوقت: الثالثه والنصف ظهرا..
---------------------------------
(سهيل)...

سهيل: ان ماسكتن بوقف وبنزلكن ترا....
سكتن شيخه ومهرة بشكل مؤقت... قبل مايبدن يهذربن مره ثانيه...
انا شو اللي بلاني واقنعت خالوه بانه قوم راشد ايون معانا بوظبي..؟!..
لو شال مهرة بروحها مب احسن لي..؟!.
شيخه بصراحه يوم اتلاقى مع مهرة مادري شو يصير فيها...تهذرب وماتسكت..!!
المصيبه في اشياء تااااااااااااااااااااافهه..وانا وراشد من الصبح انتفخت روسنا ونحن نسمع خريطهن..!!
راشد: مايحتاي احين نزلهن..
مهرة: هي عاد ماتصدق انته..!!..
راشد: تصدقين..من الصبح ادور سبب..!!
مهرة: ليتني مابدلت ثيابي..كنت شاله لولو وشعرها لاصق فكندورتي.. لو تميت لابستنها جان انته رحت وطي...
راشد: شفتي شويخ.. لا تحايزين عنها بروحها بنت خالتج عوفه ...عافان الله مادري على منو طالعه..!
سهيل: راشد بقعدك ورا عندهن...ومهروه لمي ثمج..تحملن نص ساعه لين مانوصل بوظبي بس نص ساعه عيشونا في هدوء...اوف..
سكتوا..
وحسبت لهم دقيقه بالضبط قبل مايردون يرمسون...وفعلا...
نطت شويخ تقول لمهرة اونها بصوت واطي..
شيخه: ماتخافين لولو تشرد.؟!..منو بيطالع عليها..
غمضت عيوني منقهر.. يعل مامن قطوه يارب...تتخبرن عنها كل حين..!
سهيل: شويييييييييييييييخ....!!
شيخه: شووووو انزين نسوووولف..!
سهيل: لا تسولفين..
شيخه: ارمس بصوت واطي ما ازعجتك..
سهيل: لي يسمعج يقول انا فحجره وانتي فحجره..ترانا الا فسياره وحده حتى لو تتنفسين بسمعج..
شيخه: احين ماتباني اتنفس بعد..
سهيل: لا..
شيخه: اموت يعني.؟!..
سكت... الله لا قاله يالسباله... عقب عمر طويل... شفيها هذي تعق رمسات بايخه وماتحاسب...!!..
سمعت مهرة تظحك...
مهرة: هههههههههههههههه سكت...معناته لا لا تموتين..!
شيخه: متاكده؟...اخافه الا السكوت علامه الرضا يامهرة...
تحرك راشد بيشغل الاذاعه... اطالعته بنص عين...شو بعد يبايزيد ازعاج السياره..!!..ناقصين نحن؟!.. بروحه عندنا شيخه اف ام....ومهرة اف ام... يكفن وزود..!
سهيل: حطلهن حديث جان ينطمن ويسكتن...
راشد: والله فكره زينه...
شغلنا لهن شريط حديث...سكتن شوي...يسمعن...لكن ماطولن بالسكوت..هالمره بدن يناقشن القضايا اللي يطرحها الحديث.!!!!!
انا وراشد اطالعنا بعض والظحك فعيوننا...
حد يحاول يسكت حريم سايرات رحله للسوق مخصوص؟!...من سابع المستحيلات..!! هتلر بنفسه مايروم يسويها..!
وصلنا بوظبي..ورحنا احد المراكز المعروفه..حسيت بحد يمسك كم ايدي..التفت حصلت مهرة..
مهرة: سهيييل..
سهيل: شفيج.؟!..
مهرة: عطشانه..!
سهيل: ليش ماقلتي في الدرب الدكاكين مكوده..
مهرة: توني عطشت..
سهيل: شو تبغين؟!
مهرة ماي..
التفت للبقية..
سهيل: حد بعد عطشان...؟!.
راشد: هي انا عطشان...
سهيل: خلاص عيل بييبلنا كلنا.. وين بتسيرون انتوا..
راشد: بندش هالمحل وانته لا تبطي ..
سهيل: خلاص اوكي..
سرت عند المطاعم وخذت اربع غراش ماي صغيره ورجعت...
مهرة كان مشوارها بسيط..كانت بس تبا تاخذ قطعه للفستان.. وبتفصلها فوقت ثاني لانه اليوم ماشي وقت... اما شيخه فكانت صعبه شوي..تباتاخذ كذا قطعه لفساتين السهرة على قولتها.. وذوقها صعب..بطلوع الروح تقتنع بقطعه وتاخذها..
راشد: هلكتينا تراج..هذا سابع محل ندخله...
شيخه: انتوا يايبينا مخصوص عشان نتشرى لا تقعدون تذلونا...
سهيل: بتاكلك بلسانها لا ترمس..
راشد: اعرف اعطي طراق سنع والله..
مهرة: خيبه كله عندكم بالظرب..خلوا البنت تتشرى براحتها...
شيخه: والله..!!..سيروا قعدوا انتوا ونحن بنحوط..
ظحكت انا بسخرية على الاقتراح...
سهيل: كل المقّلع هني وتبنا نروح ونخليكن رواحكن.؟!..المهم يالله خلصن ...شوفي شويخ هذي حلوه..
شيخه: اععع....
ظحكت... والله عادي عندها تفشلني جدامهم...ماترفض بادب.. اععع مره وحده.!!..امحق خطيبه وزوجه مستقبل..!!
سهيل: مب منج من اللي ينقيلج...
شيخه: خلني انقي بروحي...مشكور.. من شوي تقولي موتي..
سهيل: هههههههههههههههههههههههههه....ماقلت انتي بروحج قلتي... المهم..انا ابا اسير اشتري ساعه..راشد بتقعد وياهن؟!
راشد: وين بتسير؟!
سهيل: بسير اشتري ساعه وبرد ..ماظني اطول...
راشد: وبتخليني ويا هذيلا !!
قلت لراشد بغياظ..
سهيل: هيي..اختار لك قطعه وياهن انته بعد...
اطالعني راشد بقهر..
راشد: عنبو هالويه لك...
سهيل: ههههههههههههه يالله كيف انته وختك ماتتحملون...يالله بسير انا..
راشد: روح...
طلعت من المحل وسرت لواحد من محلات السيع..وبعد ثلث ساعه اتصلت براشد اشوفهم وين..
حصلته ميلسنهم في واحد من المطاعم المفتوحه..
ييت عندهم ويلست..
سهيل: هاااه اشوفكم يالسين..
راشد: واخيرا تعبت شيخه ورحمتنا...
التفت لشيخه مستفسر..
شيخه: خذت اربع قطع..وباقي قطعتين..
سهيل: يعني بعدنا بنرد نكمل؟ ياجماعه بياذن المغرب علينا...
شيخه: لا بنسير..باخذهن من العين...
سهيل: احين انتي قطعتين باقياتلج بس.! وفي العين بكبرها مابتحصلين هالقطعتين؟!.
شيخه: بلى بحصل..بس...هني احلى...
سهيل: بطرانه انتي..
راشد: المهم يالله خلونا نسير...
مهرة: صبروا خلونا نكمل عصيرنا ونرتاح شوي..!
راشد: كمليه في السياره...
مهرة: تباني اشل عصير وياي؟!..شو قالولك؟!
تجاهلها راشد وصد صوبي..
راشد: شريت؟!..اشوفها ؟!
عطيته ساعتي يشوفها...
راشد: وايد حلوه...مبروووكه..
سهيل: الله يبارك فيك..
شيخه: اشوف اشوف.. وااااااااو...بكم؟!
سهيل: شو يخصج انتي بكم...!!
راشد: بس لا تبدون..خلونا نسير والله ياني صداع من الزحمه والحشره..
قمنا كلنا...
سهيل: مهرة انتي خلصتي؟ اشتريتي.؟!..
مهرة: بسم الله عليك اخويه....ناسي انك دافع عن قطعتي...الخضرا..!!
سهيل: هي صح...نسيت...
وصلنا السياره.. حطينا الاكياس في الدبه وركبنا..وتوني بشغل السياره الاوبمهرة تنط..
مهرة: لحظه لحظه.. وين شنطتي..؟!


سهيل: وين ذلفتيها..!!
شيخه: يمكن فواحد من الاكياس.؟!..
نزلت مهرة تشوف االاكياس في الدبه..ونزلت انا معاها..فتشنا..وماحصلنا..
سهيل: احين شوو؟!..
انضم لنا راشد..
راشد: حصلتوها؟!..
مهرة: لا..
راشد: نسيتيها في المطعم يمكن...
مهرة: يا في المطعم يا في ذاك المحل... اللي انزحم رياييل..تذكره؟!.
رصص راشد عيونه يحاول يتذكر..
راشد: اي واحد..
مهرة: هذاااااااااك...اوهووو احين شو بسوي..
سهيل: انا ريلي تكسرت منكن مافيني ارد ادخل..
راشد: انا بسير اشوفها في المطعم..
مهرة: واذاطلعت في المطعم...
راشد: تعالي انزين شوفيها وين..
ترددت مهرة واطالعتني بتوتر...
سهيل: سيري خلصينا بياذن المغرب..
مهرة: انزين..
راحت مهرة مع راشد يدورون الشنطه..اما انا فرجعت للسياره...
شيخه: وين راحوا...
سهيل: بيدورون شنطه مهرة...
سكتت شيخه...وسكت انا...ابتسمت..
سهيل: هاااه مدام سهيل... واخيرا بروحنا...!
شيخه: والشيطان ويانا..
سهيل: عوذ بالله...يعني لازم تخربين اللحظه..
شيخه: ماشي لحظه عشان اخربها..
سهيل: الا قولي زايغه...
شيخه: من الشيطان..
سهيل: منّي...
شيخه: ليش في فرق بينك وبين الشيطان.؟!
سهيل: هههههههههههههه عنلاتج زاد... اييه شويخ..شريت لج شي..
شيخه: والله..؟!!..شووو!!
مديت ايدي للكيس عدالي..وطلعت منه العلبه الصغيره اللي فيها الساعه اللي خذتها لشويخ...وعطيتها اياها..
سهيل: ان شاء الله تعيبج..
فتحت شيخه العلبه الصغيره ..
شيخه: يااااااااااااااااي..وايد حلوه ....سهييل شكرا..ليش عبلت علىعمرك.؟!..
سهيل: كيفي..
شيخه: هههههههههه مشكوور..وايد حلوه والله...
استانست يوم شيخه حبت الساعه اللي اخترتها...
كان خاطري من زمان اهديها شي بس ماعرفت باي طريقه...والحمد لله يت من نفسها...
سهيل: العفو...

اليوم: الاربعاء..
المكان: احد مراكز ابوظبي..
الوقت: السابعه مساءا..
----------------------------------------
(مهرة)...

دخلت مع راشد المركز مره ثانيه وانامتوتره..في نفس الوقت مستغربه من نفسي..
ليش من بعد ماعرفت ان راشد تقدم لبنت ماعرفها..صرت اكثر ارتياحا معاه.؟!.. ما اكرهه مثل قبل..!!
هل لانه من قبل كان يشكل تهديد لي.؟! كنت خايفه بانه يتقرب مني... وانا كنوع من الحماية الذاتية قمت اكرهه وانفره مني..!!..
وبعد ماراح هالتهديد صرت مطمنه اكثر..!!
امري غريب..!
عدلت غشوتي ومشيت بسرعه...
اطالعت راشد بقهر..يتعمد يمشي بسرعه..!!
مهرة: ايييييه...تباني اتخرطف واطيح وافشلك والا شو؟!
وقف راشد واطالعني باستغراب..
راشد: ليش؟! شو سويتبج بعد الحين..!!
مهرة: اونك عاد... ماتشوف عمرك تمشي جنه الشيطان يركظ وراك...
راشد: ترا انتي الشيطان وانتي تركظين وراي..
مشيت عنه ولبسته...اما هو مشى عدالي وهو ساكت..وهالمره خطواته كانت ابطأ..
راشد: ابا افهم بس ليش ماطيقيني والله مب ماكل حلالج انا..!!
قلت له ببرود من دون ما التفت له..
مهرة: انا ما اكرهك..
راشد: قصدج الكره شي بسيط..وشعورج تجاهي اخس من جي..
مهرة: هههههههههههههه يمكن..وانته ليش مهتم...
راشد: لانج بنت خالتي عشان جي اهتم...ماذكر اني غلطت عليج فشي..
مهرة: انسى السالفه ... خلنا نبدا من اول..
قلت جملتي بتهور... لدرجه ان راشد وقف واطالعني باستغراب واضح..
راشد: شو قصدج نبدا من اول..
وقفت انا بعد وواجهته.. مرتاحه جزئيا لانه مايقدر يشوف ويهي من الغشاة..
مهرة: اقصد اني اسفه على تصرفاتي من قبل كانت لي اسبابي واحين زالت.. انسى وخلنا نبدا من اول..
راشد: يعني...يعني انتي ماتكرهيني.؟!..
مهرة: لا ما اكرهك راشد..انته ولد خالتي..ماقدر اكرهك..
رصص عيونه راشد واطالعني بتشكك..هز صبعه السبابه فويهي وهو يقول..
راشد: ماصدقج انتي تحت راسج شي تبين تسوين مقلب فيني اعرفج...
ومشى عني..وقعدت انا اضحك عليك..مسكين!!..حالته صعبه..
راشد: وصلنا...
وقفنا جدام المطعم المفتوح اللي كنا قاعدين فيه..
مهرة: شوف نحن هناك كنا قاعدين...بس رياييل يلسوا مكانا...
راشد: وقفي انتي هني وانا بروح اسالهم جان شافوا شنطه...
تميت واقفه مكاني اتلفت...خايفه لا يتحرش فيني حد من هالشباب.. لكن راشد سال ورد بسرعه لي..
راشد: ماشافوا شنطه.. يمكن عاملات التنظيف شلنها؟!..
مهرة: يمكن..
راشد: صبري بسال عند الكاونتر... والا اقولج تعالي لا اتمين واقفه هني..
مشيت مع راشد عند الكاونتر..وسال... ونفس الجواب...
شنطتي مب موجوده هني..
مهرة: راشد يمكن في اخر محل دشيناه..!!
راشد: دخلنا وايد محلات نسيت اي واحد..
مهرة: انا اذكره... من هالصوب..
مشينا انا وراشد عند المحل الاخير اللي دخلناه...
مهرة: هذا هو...
دخلت..وعلى طول رحت عند الهندي اللي يبيع وسالته عن شنطتي..
ابتسم.. نزل تحت الطاوله ويابها لي...
تنهدت بارتياح يوم شفتها...
مسكتها وحظنتها كانها كنز عزيز..
مهرة: ثانكيووو..
هز الهندي راسه وقال لي "ولكم"..وبعدها طلعنا انا وراشد من المحل..
ويوم كنا ننزل الدري المتحرك.. من دون قصد التفت للجانب الثاني من الدري..اللي كان صاعد..
حسيت الدم كله يشرد من ويهي...ارتفعت انفاسي ودقات قلبي زادت...
هذا هو... هذا الريال.... لابس سفره وعقال لكني اعرفه باي حال..
حسيت بالخوف الفظيع...
ليش كل ما اقرب انساه يطلع لي... مب كافي الكوابيس..!!!..
من دون قصد تقربت من راشد وتمسكت في ايده..عمليا..انخشيت وراه.. مع اني اعرف انه مابيقدر يشوفني ولا بيعرفني بسبب غشوتي بس ماريد اشوفه ماريد..!!
حسيت بايد راشد ترتجف.. التفت لي مستغرب.. في نفس الوقت اللي كنا فيه نتقاطع مع ذاك الريال..هو راكب ونحن نازلين..
راشد: شفيج؟!..شو بلاج مهرة؟!..
واظن انه بدون حاسيه..مسك ايدي اللي ماسكتنه هو بعد..
حسيت بايده البارده...انتفضت..وابتعدت عنه.. انا شو قاعده اسوي؟!...
اطالعني راشد باستغراب واضح...
راشد: شفيج؟!..
مهرة: لا ماشي..ماشي ..بس...بس كنت خايفه لا اطيح عالدري..
راشد: انزين تمسكي عدل..
قصده مايباني اتمسك فيه..!!..اوكي اسفين ازعجناك...!..من دون قصد..ماشي يصير معاك من دون قصد يعني؟!...
ماعليه جان مادخلت عليك قطوتي يوم بتدخل بيتنا...!!
تمسكت عدل لاني حسيت اني فعلا بطيح..كل شوي التفت وراي اشوف اذا الريال بعده موجود..لكنه ركب وراح في حال سبيله ..مب داري عن الاعصار اللي خلفه وراه...في نفسي..!!
ليش دايما يطلع فحياتي..!!.. مب كفايه اللي صار..!!
خلص الدري ومشيت بارتجاف صوب السياره... ركبنا.. وتحركنا لخارج بوظبي..وبعد دقايق وقف سهيل وراشد عشان نصلي المغرب عالطريج...
وبعدها كملنا طريقنا...ولين مادخلت حجرتي وسكرت على نفسي الباب..كانت ايدي بعدها ترتجف من الموقف...!
ارتحت شوي على شبريتي وصليت العشا.. حطيت الكيسه اللي فيها قطعه فستاني في الكبت.. عطيت سمجتي اكل..ونزلت تحت...
مهرة: عمووه ماشفتي لولو..!!
آمنه: منوو لولو بعد.!!..
مهرة: قطوتي لولو...
آمنه: شفتها في الحوش المغرب..
شهقت..
مهرة: لا يكون شردت؟!
آمنه: ابركها من ساعه شعرها يتطاير في كل مكان..
مهرة: حرام عليج عموووه...!!
مشيت عن عمتي وانا متظايقه من كلامها... حرام كله ولا لولو... حبووبه.. طلعت الحوش وقعدت ازقرها..وادورها ورا الشير..
ماحد..سرت المطبخ...
مهرة: كوري..ماشفتي ماي كات؟!..
اشرت لي البشكاره صوب الحوش مره ثانيه...
مهرة: محد في الحوش..
كوري: آي دونت نو...
خليتها ورديت اطلع للحوش... عقب افتكرت بالميلس..يمكن في الميلس...هي تحب تروح هناك دوم..
مشيت صوب الميلس وشفت نعلان جدام الباب.. وبعد التدقيق..عرفت نعال مبارك ونعال سيف اخويه...بس عشان اتاكد تميت واقفه عند الباب اتسمع.. سمعت صوت سيف يشاتم ومتحمس..بس ماشي حس لمبارك..
مهرة: سييييييييف..!!
سيف: هااااااااه..!!
مهرة: حد عندكم غريب..!
سيف: لا تعالي..
تحجبت ودخلت الميلس.. سيف كان يلعب بلاي ستيشن ومندمج فيها..اما مبارك يالس وماسك واير صغير.. يسحبه عالارض وهو مبتسم على شكل لولو وهي تلعب بالخيط وتتبعه...
ابتسمت... مادري ليش خطر فبالي راشد..وحساسيته من لولو..
فرق بين مبارك وراشد ياناس... ظحكت وانا اشوف مبارك يمسك لولو ويرفعها فوق متخبل عليها..
مبارك: she is so cuuuuuuuuuuuuute…!!
مهرة: هههههههه راشد يقول عنها ساحره....
مبارك: بالعكس..اجنن..مثل اللي نشوفها في الصور..تسدج عيونها...
وقد مبارك يهزها مستانس فيها....عقب يلسها في ثبانه وقعد يمسحها...ييت انا وقعدت..
مهرة: من متىعندكم لولو..؟!
سيف: من المغرب وهو حاشرني بها..شليها عنه...
مهرة: هههههههههه هاتها مبارك بعطيها اكل..
مبارك: توني عاطنها جبن...
مهرة: ههههههههههههههههههههههه والله انك متعبل..لا لولو اكلها غير هاتها...
حطها مبارك عالارض..ورجعت لولو تتمسح فيه..وبعد ثواني ركبن في ثبانه ويلست مطمئنه...
شكلها عشقته....
مثلي..
سبحان الله ..
مهرة: لولو تعااااااالييييي...
مبارك: ماتباج...
مهرة: يالله عاد عطني اياها عن حد اييكم الميلس وانا هني..
مسكها مبارك وحطها عالارض.. شليتها انا ورجعت المطبخ...
وحيطت حقها اكل..لكن الخبيثه من خلصت اكل شردت عني ورجعت الميلس..
لاحظان مبارك..!
---------------------------------
اليوم: الاربعاء..
المكان: شقة ناصر..
الوقت: التاسعه والنصف مساءا..
-----------------------------------
(ناصر)...

نزلت من سيارتي وفتحت الدبه... طلعت فراش الشبرية اللي خذته من شوي.. هالفراش يكمل الغرفه اللي اثثناها من يومين..
صارت عندنا غرفة ضيوف.. شي طيب..!!..
ركبت المبنى ودخلت الشقة...
سعاد كانت تقرا كتاب في الصالة... يوم دخلت رفعت راسها لي وابتسمت..
سعاد: رجعت..!!.. لك اهلين وسهلين..
ناصر: بالمهلي يام مايد...
هي نعم..قررت اسمي ولدي (اذا طلع ولد)..مايد..على يدي...مب على مايد ولد عمي.. لانه محمد اخويه سما سلطان علىابويه ..فماحبيت اكرر ...
اما اذا طلعت بنت.. بسميها حمده على امايه...
سعاد: شو جايييب معك؟!
ناصر: يبتلج فراش للشبريه..بس شو فراااااااااش... تعالي وياي براويج..
سكرت سعاد الكتاب فرحانه وتبعتني...
وفعلا الفراش طلع وايد حلو عالشبريه..الحجرة حاليا كامله وجاهزه.. استانسنا فيها انا وسعاد...
ورجعنا الصاله ..
ناصر: يالله عاد احين عزمي اهلج عشان يباتون عندنا...ههههههه..
سعاد: ليه مابتعزم اهلك انته؟!.. نفسي شوووفن ناصر..
حسيت بحرقه فقلبي وبتوتر..
ناصر: بيييبلج صورهم ..والا اقولج بييبلج افلام مصورينها..بتشوفينها وبتستانسين...
سعاد: هلأ هاد اللي ادرت عليه..!! صور وافلام..؟..ليه مابشوفن عالطبيعه مافكرت بهالشي.؟!..
استغربت..اول مره سعاد تناقشني بهالموضوع...!!
ناصر: بصفتج شوو تشوفينهم ياسعاد.؟!
سعاد: بصفتي مرتك شوو يعني؟!.
ناصر: سعاد اهلي مايدرون اني متزوج...
سعاد: ايمتا بدّك تئيلون؟!..
ناصر: قريب ان شاء الله..
سعاد: ايلتيلي هالكلام من تلات شهور وماصار شي...
ناصر: سعاد امي واهلي مايتحملون يسمعون خبر مثل هذا...تبيني اذبح امي انتي.؟!..وابويه يتبرا مني..
سعاد: لكن ليه تزوجتني؟!
ناصر: لانج عيبتيني..
سعاد: مو كافي اساس للزواج هاد... ناصر انا حامل.. ابنك بدوا ينولد واهلك مو عرفانين فيه؟!
ناصر: لا ان شاء الله بخبرهم قبل ماتربين...
تنهدت سعاد.. وهي اطالعني بعيونها الخبيره...
اما انا فماقدرت اطالع فيها...لاني ادري بنفسي مقصر...
سعاد: عندي احساس انك مابدك تئيلون ناصر..حتى بعد ما اولد..!


ناصر: ليش تقولين جذي..
سعاد: بعرفك... فتره بسيطه لي عرفتك فيها بس بعرفك ناصر..مارح تئيلون...!
ناصر: احين انتي اظاربيني على شي ما استوا... اصبري عليه شوي...
سعاد: لإيمتا..؟!!... بئلك الصراحه لو كنت بعرف اني رح عيش زواج مابيختلف عن زواج السر شي..ماكنت تزوجتك..!!
انصدمت...التفت لها بسرعه وعيوني اطلع شرار... لكن مع ذلك ماهز شعره من راس سعاد...
ناصر: هذا كلام تقولينه لي..!!
سعاد: لكن هيك بدّك تعيشني طول العمر..!!!..
ناصر: سعاد..افهمي.. يوم بشوف الوقت مناسب بقولهم..
سعاد: وليه ماعم تئيلون هلأ..!!
ناصر: وين اقولهم...الكل مسلط الاضواء علي يتريوني اعرس..امي من تشوفني كلمتني بهالموضوع... اخويه اللي اصغر مني يترياني انا اعرس بس عشان يخطب بنت عمي ويخلص.. كيف تبيني اقولهم انا معرس وخلاص.. بتنجلط امي..!
سعاد: ... بسوريا..إلت لبابا انك رجال...وبتعمل اللي براسك... واقنعتوا فيك..وصار اللي صار....هلأ لما رجعنا مابدك تتحمل نتيجة تصرفاتك..!!!..
ناصر: شو قصدج من هالكلام.؟!..
قالت لي سعاد باندفاع... وقهر..
سعاد: لو كنت رجال كفاييي كنت التيلون ما اهتميت لشي...
ناصر: ســــعـــــــــاااااااد..!!!..
ينوني بغت تطلع..!!.. اول مره حد يقولي هالكلمه...انا مب ريال..!!...
لو مب ريال جان مديت ايدي عليها الحين وظربتها عشان تتادب...
اطالعتني سعاد كانها تلوومني على كل شي... في خلال ثواني انملت عينها كلها دموع... قامت وراحت لغرفة النوم..وسمعت رقعة الباب...وفوق هذا القفل اللي بالباب..!!!
تنهدت بغضب ..وقهر...
محد قالي...حسدت الحرمه..!!..امبوني اتحسبها ماتظارب وعايشه حياتها بسلام طلعت مخبيه وايد فخاطرها والحين انفجرت..!!
والنتيجه اني ببات في الغرفة اللي جهزتها من يومين...
محد قالي اجهز الغرفه...
احين سعاد مابتفج الباب عقابا لي...
لكنها هي بعد غلطت..المفروض ماتقولي كلام مثل هذا...يجرح أي ريال...
هي مب فاهمه الظروف... ماقدر اقولهم...اخاف على امي..وابوي... حتى يدوه بتطيح من الصدمه...انا اعرفهم اهلي وايد يكبرون المسائل وبيشوفونها مصيبة من المصايب الكبرى...
اذا شفتهم نسوا سالفه عرسي...ويئسوا منها...بقولهم...
مش قبل...
لاني امي حاطه آمال كبيره علي وانا اتريا هالآمال تتلاشى...وبعدها امي بترضى باي شي حتى بسوريه...وبتتعود عليها وبتتقبلها...وفوق هذا بتحبها..خصوصا انها ام عيالي..!!
صح كلامي والا انا قاعد اخدع نفسي؟!!..
اليوم: الخميس..
المكان: غرفة منى.
الوقت: الحادية عشره صباحا...
------------------------------
(منى)....

سرت صوب الكمبيوتر وقعدت..شغلته..ودخلت النت ادور كنه... انا بحاجه اني اتكلم معاها ظرووري...
بس للاسف ماحصلتها...
وانا ماريد اطلع من الغرفه...اخاف امي تشوفني وتمسكني..وتسالني عن رايي في السالفه..!!..
خليت الكمبيوتر شغال وقمت عنه.. قمت اذرع الغرفه ساير ياي..
بتخبل.. احس انه حد لازم اييني ويقولي شو اسوي بالضبط...من دون تفكير..
ماريد افكر في السالفه... ما اظمن المستقبل...ما اظمن شي..كيف اتخذ قرار..؟!! بيغير حياتي كليا..!
النجاح بالزواج وتوافق الازواج احس انها ظربه حظ... حد يتوفق فيها وحد لا..
شو يعرفني انا اني بكون بين اللي بيتوفقون..!!!!...
وقفت عند الدريشه ..اطالع حوش بيتنا كاني ماشوفه...
بالرغم من صلاة الاستخاره.. اللي صليتها امس...
الا اني ماحس بشي...وفوق هذا خايفه...خايفه لاني احس نفسي بوافق...!!..احس نفسي مجبره باني اوافق...
ليش؟!..
تنهدت بتعب من التفكير .... ماقدرت ارقد امس...واليوم ناشه من الصبح ولين احين ماطلعت... اخاف تشوفني امي..تسالني..واقولها موافقه..!!
ساعتها بتورط...هل انا فعلا مستعده للالتزام ..!!...
اووففف بس لو كنت اعرفه جان تسهل علي الموضوع وبقدر اني اعطي قراري بسهوله...بناءا على معرفتي الشخصية به...
بس انا ماعرف شي عنه...صح اعرف معلومات عامه بس هذا مايعد شي ابدا...انا بحاجه لمعرفه شخصية..!!..
تذكرت كلام ابويه امس...
راشد مب الاول ولا الوحيد اللي يا يخطبني...لكنه الوحيد اللي طلع مناسب...
البقية اللي يوني ماكانوا مناسبين..عشان جي ماشاوروني فيهم... ولا خبروني عنهم...
السالفه عند اهلي مثل التحدي...
وراشد هو الوحيد اللي تاهل للنهائيات...
ياربي بموت من التفكير..!!..
انتبهت لحركه في حوش بيتنا...سياره داخله... ويوسف واقف عند الميلس...
شهقت..هذي سيارة خالد..!!!!...
تم قلبي يدق بالقو وانا اشوف طلته المميزه..ينزل من السياره وهو يبتسم...ولابس نظارات..وايه يوسف..تكلموا شوي..عقب رجعوا للسياره وراحوا...
صابني الحزن...
ليش ماكان خالد من نصيبي وهو داخل قلبي...ليش كان لوحده غيري..!!!...
النصيب...!!
وراشد..؟!..معقوله يكون هو نصيبي؟!..
سمعت بذهن شارد صوت الماسنجر يعلن عن دخول شخص من قائمتي...!
ركظت اشوف منووه..وفرحت يوم شفتها كنه...
فديت روحها تحس فيني..!!
كلمتها على طول...
منى: كنوووووووه...
كنه: هلا صباح الخير ياويه الخير انتي...
منى: صباح النور..
كنه: شحالج حبي؟!
منى: بخير شحالج انتي..
كنه: الحمد لله....حصلتي الكتاب اللي ظاع؟!..في معلومات نبغيها للبحث..ومب مالنا بعد مال مكتبه زايد ياويلنا ان ظاع...
منى: مادورته..
كنه: ليش؟!
منى: كنووه انا بتخبل من كثر ماهوويس.. من الجمعه اللي طاف وانا لا ليلي ليل ولا نهاري نهار..بتخبل..!!
كنة: انا ماقلت لج خلي هالامور يفكرون فيها اهلج وانتي ارتاحي..
منى: اهلي موافقين كنووه ويتريووني اقرر...وانا ماعرف شو الاحسن لي ولمصلحتي...!
كنه: قوم عمي وعيال عمي لو مايدرون ان راشد هذا يناسبج جان ماجدموه لج... وهم ما اظني انهم يبون لج اللعواااز...
منى: ادري.. بس ورغبتي الشخصية..؟!..ذوقي انا بالناس...
كنه: كيف بتحكمين عليه وانتي ماتعرفينه....خوانج واهلج يعرفووون الريال ويمدحون فيه...
منى: ادري ياكنه بس والله ماعرف..
كنه: صليتي استخاره؟!
منى: هي صليت...اقولج احس نفسي ملزمه اني اوافق من كثر ماهم يمدحون فيه... لكن بيني وبينج خايفه بموت من الزياغ...!
كنه: تبين نصيحتي؟!
منى: انا من الصبح اترياج عشان اطلب نصيحتج...محد كثرج يفهمني واكيد بتحسين اللي انا احس فيه...
كنه: فديتج والله اني احس فيج...بس تبين الصدق..لو كنت انا ما اعرف يوسف... وياني هالخطيب الفلته...جان وافقت بعد ماشفت اهلي موافقين ومتشجعين... في النهاية هم اخبر وادرى منج بهالامور.. تراهم يوزوا شما اختج واكيه مستانسه بزواجها ومتوفقه الحمد لله...
منى: ما اظمن انه حياتي بتكون مثل حياتها...
كنه: توكلي على الله... في فتره الخطوبه بتعرفينه اكثر.. اكيد انه بيتردد على بيتكم وبيزوركم..وبتشوفينه... وترا في ناس تفهمينهم بمجرد ما انج تشوفين ويووههم...
منى: انا ماوافقت عشات تستوي فتره خطوبه...
كنه: بس ان شاء الله بتوافقين وبتستوي فتره خطوبه..وبتشوفين هالراشد... وبتنغرمين فيه، وكولولولوليش.!
ظحكت غصبن عني من حركات كنه...وتفائلها الكبير...
منى: ههههههههه خبله..ياريتني متفائله مثلج...
كنه: متى انا نصحتج بشي وندمتي..؟!
منى: ابدا..
كنه: عيل وافقي منى... والله انا احس انه فنان...واحساسي نادر مايخيب..
منى: بتلحقين يوسف.. نفس الكلام قاله لي..
كنه: واي فديت هالطاري انا...!! شخباره ؟!
منى: توه طالع مع خالد....
كنه: وانتي شفتي خالد؟!
منى: هي توني من الدريشه...!
كنه: عشان جي متنكده ويا هالراس...شوفي..خالد بالنسبه لج ربيع اخوج وبس... وبعدين الريال خاطب ومخلص مافي داعي تفكرين فيه..فاهمه..
منى: ان شاء الله عمتي..
كنه: هي توج... المهم خبريني شو كان لابس يسوفي..؟!
قعدت اظحك مره ثانيه على هالخبله... صدق انها تاخذ كل الامور بسهاله...وماعندها هالتعقيدات...
تنهدت وانا اجاوب كنه ...بوصف شامل ليوسف اليوم...كالعاده..
لكن بالي كان بالخطوه اليايه اللي بتخذها...
ياترى اسمع كلام كنه واوافق.؟!..
----------------------------
اليوم: الخميس..
المكان: شقة ناصر..
الوقت: الحادية عشرة والنصف..
---------------------------
(ناصر)...

قمت من رقادي متكسر... مب متعود ارقد في شبرية غير شبريتي...!!.. بالاضافه لاني كنت متظايق من حالنا اللي انجلب خلال دقايق...!!..طلعت من الغرفه وانا ادور بعيني سعاد.. اسمع صوت تحركها بالبيت...!
دخلت غرفة النوم ومنها للحمام..تسبحت وطلعت اتلبس والم شوية ملابس في شنطة صغيره..
تسفرت ..وتعطرت..خذت اغراضي وطلعت من الغرفه للمطبخ...
حصلتها هناك... تجهز اغراض الغدا...
ناصر: صباح الخير..
سعاد: ............ !
حست بوزي..متظايق.. تقربت منها وهي عاطتني ظهرها...بستها على راسها..
ناصر: بعدج زعلانه مني؟!..
سعاد:..........
ناصر: ترا حتى انتي كلامج يزعل ...بس انا ماروم ازعل عليج مدة طويله...
ونفس الشي ساكته ولا ردت علي...
عنيده..!
ناصر: سعاد عاااد... لا اتمين جي...
تاففت سعاد ..مسكت فوطه نشفت فيها ايدها وطلعت من المطبخ...
لحقتها وانا بعدني مصر عالمحاوله...ولو انها ماتشجع الواحد يراضيها..لابستني..!
ناصر: سعاد انتي عقلج اكبر من جي... لا تسوين هالحركات كلميني..!
يلست عالكرسي مال الصاله ومسكت الروموت وقعدت تبدل ...وهي لين الحين ما اطالعتني بنظره..
انقهرت... في تاريخي الفاسد كله...ماكد طنشتني بنت ابدا مثل ما سعاد مطنشتني...
وهالشي يجرح كرامتي وكبريائي... وعقابا لها تخليت عن المحاوله..
ناصر: خلاص...كيفج...بس لا تقولين اني ماحاولت...انا بسير العين...شي فخاطرج؟!
سعاد: ............
ناصر: خلاص عيل فمان الله...
وقفت اترياها ترد علي ... كنت بطلع..بس ماهانت علي..وخّيت عليها وبستها على راسها مره ثانيه...ليتها بس تتخلى عن لعناد...مب زين الزعل لها ...ولا للياهل...
بس شو اسوي فيها ..بخليها تهدا لين باجر...
شليت شنطتي وانا اتنهد وطلعت من الشقه...
في السياره... زحمة الطريج كانت غير شكل اليوم...والاشاير في بوظبي بلا قياس... تمشي خطوتين واشاره...!!
كنت افكر بخطبه منى... معقول تكون عطت ردها قبل ما انا اوصل؟!..
ياترى شو بتقرر..!!.. هلا فعلا بتتقرب العايلتين؟!.. والا بنرجع مثل قبل..!
من دون حاسيه مديت ايدي وفتحت سدة السياره..وطلعت الدفتر الاصفر...
بمجرد اني امسكه...ترجع بي الذاكره لورا..واشوفها واقفه جدامي متنقبه.. وانا من التهور لدرجه اني كنت بروح اكلمها اذا وقفت اكثر..!!..
ساعتها كنت حاس ان روحي تندفع لها قبلي...
بس الخوف هو اللي يبعدها عني...
ابتسمت..
لو تدري بمشاعري العنيفة تجاهها جان صدق خافت..!!..
حركت سيارتي وطلعت خارج بوظبي... والدفتر الاصفر عالسيت اللي عدالي...
اطالعته بطرف عيني وابتسمت..عقب ظحكت...
اتخيلها قاعده عدالي في السياره....
تخيلتها حرمتي... وسايرين لاهلي عشان نقضي عندهم اخر الاسبوع..!! وبعدين نرجع للشقه..
ارتجفت...بمجرد التفكير انها زوجتي صابتني بروده باطرافي...!
لو صدق حصلتها...جان حطيتها على عرش عالي...ممنوع حد يمسها... ولا حتى انا..!
اطالعت ساعتي وبعدها وقفت عدال مسيد قريب... عشان اصلي الظهر..
وبعدها استأنفت المسير...
مسكت تيلفوني واتصلت بامي...
ام محمد: مرحبا..
ناصر: هلا امايه...السلام عليج
ام محمد: وعليك السلااااام والرحمه ياهلا وغلا ..شحالك فديتك؟!
ناصر: بخير الغاليه شحالج انتي؟!
ام محمد: الحمد لله بخير وسهاله..وينك فديتك ماييتنا...!
ناصر: ياينكم احين في الدرب...عن اتغدون عني...
ام محمد: ان شاء الله الغالي بنترياك...
ناصر: شخبارها منى؟!
ام محمد: والله اختك حالتها حاله..لا تاكل..لا ترقد..لا تكلمنا...ولين احين مانزلت من حجرتها بالعاده تنزل واجابلني...
ناصر: بعدها ماقررت؟!
ام محمد: لا والله ياولديه بعدها ماعطتني رد..وانا مستحيه من الجماعه تاخرنا عليهم....
ناصر: ماعليه شو عليهم هم ان صبروا شوي؟ جي هذا زواج مب لعبه الواحد يتسرع فيه...
ام محمد: الله يجدم اللي فيه الخير...
ناصر: المهم انتي لا تسالين منى عن رايها الا يوم اوصل انا واكلمها...
ام محمد: ليش فديتك شو صاير؟!
ناصر: ماشي صاير انا اخوها حرام اعطيها رايي واكلها وانصحها..!
ام محمد: هيي جان جذي برايك ..تحسبتك تعرف شي مانعرفه...
ناصر: الي اعرفه كله تعرفونه.. وماشي خطير يعني بس ابا اكلمها قبل ماتتخذ قرارها...
ام محمد: على خير غناتي.. لاتسرع فديتك...
ناصر: ولا يهمج..يالله فمان الله..
ام محمد: فمان الكريم..
سكرت التيلفون وحطيته عالمسند ماله..التفت للدفتر... ابتسمت..
ناصر: شفتي يامهرة..!!.. انصح قوم امي بانهم مايستعيلون في العرس..مادري ليش مانصحت عمري يوم خذت سعاد...
مادري شفيني...لاتلوموني ...تخبّلت...!...
فعلا تخايلت لي مهرة قاعده وتطنز علي..وعلى هالحال اللي وصلت له..!
التفت للدفتر معصب شوي..
ناصر: كله منج... لو مب خوفج مني جان خذتج بس ادري مافي مجال..!
سكت شوي..ورديت اقول وانا احرك ايدي اشرح..
ناصر: يعني لاتفهمين غلط مب اني ندمان...سعاد فنانه...بس...بس لو خيروني...باخذج انتي..!
تنهدت...وبعد دقايق شكيت فيها بسلامه عقلي..مسكت الدفتر ورجعته للسده وسكرت عليه وانا اقول..
ناصر: انخشي داخل..بتخبلين بي ان تميتي هني...!

في البيت.. نزلت وماسك الشنطه بايدي...دخلت بيتنا..حزه غدا..وحصلتهم كلهم متيامعيين...كل افراد الاسره الكريمه..
حتى منى..!
ناصر: السلام عليكم ورحمة الله....
نشوا كلهم يوم دخلت عليهم...حتى شوابي مع انه المفروض ماينشون...
سلمت عليهم كلهم...ويلست...
التفت لمنى وابتسمت لها..وهي ويهها مصبوغ احمر..
ناصر: هااااااااااااه منى...!!..شحالج؟!
منى: بخير..
ناصر: قالولي منخشه فحجرتج شياج؟!
منى: ماشي..
ناصر: قومي ودي شنطتي فوق..
نشت منى شلت شنطتي وسارت بها فوق...حسيتها ماصدقت تحصل سبب عشان تختفي عن الانظار...
التفت لشماس اللي خلت حظن امها ويتني تحبي وهي تظحك لي..والظرسين الصغار توهن طالعات...
ياربي ياغلاة هالبنت..
ناصر: هلاا والله وغلا باللي متعني ويايني....تعالي فديتج..
مسكتها ويلستها فثباني..بستها...وانا افكر...ليتني يبت ولد اكبر منها جان خذتها لولدي...


ظحكت على نفسي... من احين افكر بتزويج ولدي؟!..
عيل ماتنلام ثرها امي..!!
خمس وعشرين سنه وهي تخطط بتزويجي..
ناصر: احين ابويه شو قررتوا بخصوص راشد؟!
بو محمد: والله ياناصر الريال ماينعاب..ومناسب..ومن عايله زينه ومحترمه... ليش نرده.؟!
ناصر: لا يكون ضغطتوا على منى؟!
ام محمد: وين ظغطنا عليها؟!..صارلها يومين وهي تفكر وبتكمل الثالث بعدها ...محد ظغط عليها ولا شي...
سكت عنهم..
الظاهر انهم متفقين وخالصين... ويتريون كلمه من منى عشان يقربون بالريال...!!..
وبالعايله كلها معاه...!!
آآآآآآآآه الله يستر...
بعد الغدا.. سرت لمنى في غرفتها.. حصلتها يالسه عالشبريه تكتب في اوراق..
سكرت الباب وراي وتقربت منها..
ناصر: شو تسوين؟!..
منى: اكتب البحث..استريح ناصر...
يلست عالشبريه مجابلنها..وابتسمت لها بتعاطف.. مقدر الضغط اللي تحس فيه...
ضغط انا احس فيه من كملت 22 سنه...
ابتسمت منى ونزلت عينها..
-- -- -- -- -- -- -- --

و السسسسموحه ادري بطيت عليكن ,, اتريا ردودكن الطيبه ^^

روووووووووووووووعه

يالله نتريا اللي عقبه ^^

يعطييج العافيه

يالله خيتووو من متى اترياااج ><"

منى: انته بعد ياي تكلمني.؟!
ناصر: ليش انا زد عن محمد ويوسف وابويه وامي..؟!
رفعت منى صبوعها تعد عليهن..
منى: وكنه وميثا وشما بعد اتصلت وعطتني محاضره.. ناقص بس جوليتا تي وترمسني...!
ناصر: ههههههههههههههههههههه فرحانين فيج...
هزت منى راسها وقالت..
منى: والله مادري..انته شرايك؟!..
ناصر: تدرين شو... انتي تحسين بنفسج صغيره عالعرس صح؟!
منى: صح..
ناصر: فكري من الناحية الثانيه...انا كريال.. مستعد اعرس بوحده عمرها 19 سنه يعني اصغر عنج..وبعتبرها كبيره وعاقله وقد المسؤوليه ..مابعتبرها صغيره ابدا...
قلت هالكلام والتفكير بمهرة مسيطر علي...
منى: وانته حاط فبالك وحده عمرها 19 سنه؟!
ناصر: هههههههههههه لا.. بس اقولج بشعور راشد تجاه هالزواج..مابيعتبرج صغيره او ياهل لاتخافين..!
منى: مب هذا اللي انا خايفه منه...اخافه مايكون مناسب لي..
ناصر: قوليلي شي...شو قالولج عنه..راشد يصلي؟!
منى: هي..
ناصر: اخلاقه عاليه..!
منى: يقولون..
ناصر: تبين اثبات على هالكلام؟!..
منى: ياريت..
ناصر: تذكرين ذاك اليوم يوم وديتج العين مول...
عقدت منى حياتها..
منى: هي..
ناصر: تذكرين يوم ركبنا الطابق الثاني وكنا سايرين محل العبايا... يوم زقروني شباب اثنينه...خليتج وسرت..تذكرين؟!
منى: هي...
ناصر: واحد منهم كان راشد... والثاني سهيل ولد خالته... يوم كنت اكلمه..كنت الاحظه كل شوي ويطالع وراي كانه يطالعج انتي...ساعتها انقهرت... بس تعرفين شو قالي عقب؟!
قالت لي منى بدهشة من هالمعلومات اليديده...
منى: شوو؟!
ناصر: قال ناصر هذيلا اهلك اللي واقفين هناك؟ قتله هي...قال اسمحلنا ان شغلناك عنهم بس الاحسن تروح لانه الشباب كل شوي يخطفون عدالها ومب زين...!!
فجت منى حلجها متفاجئه... شكلها ماتوقعت انها صادفت هالراشد فيوم من الايام ولو بطريق غير مباشر..!!


منى: ماصدق..
ابتسمت..
ناصر: صدقي..كبر فعيني من يومها..ماتصورت اني بصادف شخص يهتم جي بناس مايعرفهم... يعني لو كنت مصادف واحد ثاني مابيفتكر بيقول هو حر باهله..بس راشد لا..نبهني لج فوقت كنت غافل فيه عنج..لكن هو منتبه..
وسكت شوي اخليها تستوعب هالكلام....
ناصر: انا مب اني اضغط عليج عشان توافقين..انا عادي عندي ان وافقتي او رفضتي هذي حياتج... بس فكرت انج بحاجه لمعلومات اضافية... وهالموقف بالذات رغم انه صغير ويمكن ماينذكر.. لكني احسه بياثر على قرارج مهما كان...
رفعت منى عينها لي..ابتسمت شاكره... وبادلتها انا الابتسام...
ناصر: فكري..محد بيضغط عليج ابدا

قمت عنها.. وطلعت من الغرفه وسكرت الباب وراي...
-----------------------------------------
اليوم: الجمعه..
المكان: بيت بو راشد..
الوقت: السادسه مساءا..
----------------------------------------
(راشد)....

اليوم بطوله ماطلعت من البيت... مالي بارظ... ياني سيف ومبارك من شوي..صدعولي راسي وراحوا...
حالتي مب طبيعية من يوم الاربعاء....
من يوم مالصقت فيني مهرة..وغرزت صبوعها في ايدي بقو...معقوله كل هذا عشان كانت بطيح...
ياريتها كل ماتمشي عدالي اطيح عيل جان جي بتتمسك فيني كاني المنقذ الوحيد لها...
كلامها..وتصرفاتها كلها مختلفه من ذاك اليوم...
صارت اكثر انفتاح...صحيح ماتعاملني مثل مبارك ...لكن ماتعاملني مثل قبل بعد..!!..
شو صار وخلاها تغير رايها؟؟...
قالت عندي اسباب واحين راحت... قالت خلنا نبدا من يديد...!!
شو تقصد بتخبل..!!!
حاولت اشلها من بالي واناافكر بشي ثاني...تدريجيا حصلت نفسي افكر بالخطيبه المحتمله منى..
تاخروا بالرد...اسبوع كامل عنبو.!!
يمكن رفضوا..!.
بيني وبينكم..ارتحت لهالفكره لاول مره...من قبل كنت خايف انهم يرفضون احين ابغيهم يرفضون...
عشان تسمح لي الفرص باني اتقرب من مهرة اكثر وفي النهاية اخطبها مثل ماهو في خاطري من زمان...!!..
دامها بدت تعاملني زين..وعقلت...ليش مااعطي علاقتنا هذي فرصه..!!..
تميت يالس في الميلس وابدل في هالقنوات ... وتاخذني الافكار وتيبني...
فجاه قررت اترك كل شي للنصيب...
اذا وافقوا ترا مصيري اخذ هالبنت...واذا رفضوا... بخطب مهرة ..
سمعت اذان المغرب ياذن..قمت وبندت التلفزيون وطلعت من البيت وسرت المسيد اصلي...
وبعد مارجعت من الصلاة دخلت البيت.. كانت امي وشيخه يالسات والابتسامه على ويوههن...!
اول مادخلت نشت شيخه ولوت عليه شوي وفجتني...استغربت..
شيخه: واي فديت اخويه انا...
ام راشد: هههههههههههه قومي عنه خليه يقعد ..من وصل نشبتي فحلجه عنبو..!!
شيخه: مستانسه..
راشد: شفيكم...؟!..شو مستوي امايه؟!
ام راشد: مبرووك غناتي...
تنهدت...وعرفت سلف شو تبغي تقولي... شعور غريب..حسيت اني زعلان..منحبط...
راشد: ردوا عليكم؟!
ام راشد: هي قبل الصلاة..البنت واهلها وافقوا والحمد لله...
اغتصبت ابتسامه ... طلعت جافه ومب من الخاطر..


ييت ويلست اخذ التفاصيل...
شيخه: شفيك مب مستانس..
راشد: مب اني مب مستانس..بس... وايد تاخروا لين ماردوا علينا..!
ام راشد: من حقهم فديتك يتخبرون عنك وينشدون.. واحيانا هالامور تاخذ اكثر من اسبوع...
راشد: يالله على خير..
تبخر الامل اللي تكون من يومين..خلال ثواني بسيطه...
مافي امل لي مع مهرة.. مع اني استلطفها..تعجبني..والوحيده اللي اطلع اسوأ اطباعي...!!.. لكن هذا النصيب وانكتب...
صار لازم امحي اسم مهرة واحط بداله منى...
منى..!!.. لفظة غريب على لساني...!!!..
شيخه: والله انه مب طبيعي ولدج...راشد شفيك ماتبغيها؟!
راشد: شو عرفني انا بها عشان ابغيها والا لا...
شيخه: عيل تفائل ويا هالويه ليش جي..!!
راشد:هههههههه خلاص بس يبالي فتره اتعود... المهم امايه متى بنخطب رسمي؟!
ام راشد: بومحمد عازمنكم الخميس الياي عالعشا...منها خطبه رسمية..ومنها تعارف للعايله.. بتسير انته وابوك وعيال خالتك وخلفان...وان شاء الله كل شي بيعدي على خير..
راشد: على خير...خبرتوا ابويه؟
ام راشد: يوم بايي بنخبره...!!
هزيت راسي بالموافقه...وقمت عنهم وسرت فوق حجرتي..
كنت ببدل ثيابي وبطلع اغير جو....لكني يلست عالشبريه افكر وماتحركت ....
خلاص خطبت...لحقت سهيل..
بس سهيل خذ وحده طالما تمناها...
انا خذت وحده ماعرفها!!..
سمعت دق عالباب...
راشد: تفضل..
دخلت شيخه وهي اطالعني بفضول..يلست عدالي عالشبريه..
شيخه: راشد..
راشد: هاااه..
شيخه: انته ماتباها هالبنت؟!
راشد: رديتي تساليني..!
شيخه: راشد اشوفك مول مب متشجع لها...
راشد: مب هذي هي السالفه..
شيخه: عيل شو هي السالفه؟!..
راشد: كنت حاط فبالي انهم بيرفضون...
شيخه: انته كنت تباهم يرفضون؟!..
سكت.. مادري شو شافت على ويهي وفهمته باني فعلا كنت اباهم يرفضون...
شيخه: راشد..تخبلت انته...انا اول مره اشوف واحد يروح يخطب عشان الناس ترفضه..!!
راشد: انا كنت اباهم يوافقون قبل...بس بعد ..بعد ماردينا من بوظبي اول امس..!! مادري..
شيخه: راشد..انته تفكر بمهرة صح؟!
رفعت نظري لها..وسكت...
ابتسمت شيخه بتسامح...

شيخه: راشد... مهرة عمرها مابتفكر فيك كزوج..مهرة ماتصلح لك..
راشد: ليش يعني...
شيخه: ماقدر اقولك ليش..بس انا اعرف مهرة زين... مهرة تكره الرياييل...


راشد: بس هي قالت لي يوم الاربعاء يوم دخلنا المركز ندور الشنطه...قالت انا ما اكرهك وخلنا نبدا من يديد...
هزت شيخه راسها وهي مبتسمه..
شيخه: هذا لاني خبرتها انك بتخطب غيرها وماتفكر فيها كبنت بتتزوجها...!!
عقدت حياتي متفاجئ...هالكلام يغير اللي كنت افكر فيه 180 درجه... احين مهرة صارت تعاملني زين بس لاني خطبت؟!...
راشد: شو تقولين انتي.؟!
شيخه: اقولك الصدق عشان ما تم حاط امل عليها..رغم حبي لمهرة..ورغم اني كنت اتمنى انها تكون لك..بس والله مابتسعدك.. مهرة ماتصلح لك..
تميت ساكت...مب عارف بشو افكر...
كيف خدعت نفسي بهالطريقه...؟!.. عنبوا ماصدقت اشوف منها معامله زين الا وفكرت فيها من اول ويديد..!!!.. متى بتوب يعني..؟!..
انقهرت من نفسي اكثر من اي شي ثاني...
خليت شيخه في الحجره بروحها وطلعت من البيت بكبره... ظايج صدري ومب عارف شو اسوي..
-------------------------------------
اليوم: السبت..
المكان: بيت خلفان..
الوقت: الرابعه مساءا..
------------------------------------
(مبارك)...

وقفت سيارتي عدال بيت بو حمد.. نزلت من السياره وانااشوف سياره سهيل داخله البيت.. دخلت وراها .. وشفت يوقف السياره وتنزل منها مهرة..ويرجع هو يريوس ويطلع من البيت بعد ماسلم علي عالماشي بدون ماينزل من السياره...
التفت لمهرة اللي كانت بنقابها كالمعتاد...
مبارك: شحالج زورو.؟!
مهرة: ويا هالويه..!!
نقعت من الظحك...شكل مهرة وهي متنقبه..اطالعني بعيون معصبه..ومب مبين غير هالعيون..وصوت الشتيمه.. يعني شي ينقع من الظحك بصراحه...
مهرة: ظحكت بلا ظروووس..شحال خالي؟!
مشيت عدالها وانا الاحظ فرق الطول بيني وبينها...!!
مسكينه ضئيله..!!
مبارك: في المستشفى..!!
شهقت مهرة..
مهرة: شفيه؟!
رفعت حاجب واحد ونزلت الثاني مستغرب...
قلت لها ببرود..
مبارك: working…!!
مهرة: اوووف.روعتني..
مدت ايدها وعقت النقاب.. وتحجبت...
مبارك: احم احم..سويلي درب...
مهرة: لحظه..
دخلت مهرة البيت وبد ثواني طلعت تاشر لي...
مهرة: ساير عند سيفوو.؟!..
مبارك: هي نعم...قال لي تعال مادري شو يبغيني..!
مهرة: بليز قول له يدرس شوي ماشي باقي غير شهر عن امتحاناته مال المنتصف..
مبارك: ولا يهمج...برص عليه رصصصصصصصه...
تاثرت باهتمام مهرة باخوها...بصراحه هي تتصرف على اساس انهاامه ومسؤوله عنه..بينماهو مهمل ومب مفتكر ذاك الزود...!!
ركبنا الدري مع بعض ونحن نسولف عن اشياء تافهه... وبعدها افترقنا يوم وصلنا للغرف..
دخلت هي غرفتها وانا غرفة سيف...
لكني ماتعديت عتبة الباب من صدمتي من اللي شفته..!!
مبارك: منو اللي مسوي جي..؟!
قام سيف عن الشبرية متظايج.. وهو يطالع العود المكسور عالارض..بشكل عنيف...
سيف: منو غيره..ابويه اكيد...
سكرت الباب وراي ..
مبارك: ابوك شدراه..!
سيف: شكله كان يفتش بشكل دوري على غرفنا..ومب غافل عنا مثل ماكنت اتصور..!!.. انا مايبت العود غرفتي الا من فتره بسيطه ونادر ما اخليه يبات هني..!! ويوم تجرأت وخليته شوف شو صار..!!
مبارك: ماكلمت ابوك؟
هز سيف راسه بالنفي..
سيف: ييت من المدرسه شوي متاخر وكان ابويه راقد ساعتها.. وماطلعت لين احين...
مبارك: ظنك شو بيسوي؟!
سيف: بينازعني...بيظربني... عادي عنده ابويه بيسوي اي شي المهم يعاقبني...يعتمد على مدى عصبيته وظيجته..!
توترت...حسيت بمشكله يايه بالدرب...
مبارك: this is not good
ابتسم سيف بسخرية كانه مب مهتم باللي يصيرله كثر ماهو هامنه العود الغالي اللي فقده...
وبعد نص ساعه من مواساة سيف.. ياني اتصال من ابويه يطلب مني اروح له المستشفى لانه سيارته اختربت وهو مضطر يطلع مشوار...ويبا سيارتي..
طلعت من غرفة سيف..ابتسمت يوم شفت لولو تركظ ..ومهرة تركظ وراها...
مهرة: لوولووو...!!


وقفت مهرة يوم شافتني واقف..اما انا فابتسمت وانا اطالع لولو تتمسح في ريلي... نزلت وشليتها بين ايديه وقعدت احججها عند اذنيها وهي تخرخر مستانسه...
اطالعتني مهرة بقهر واضح ..
مهرة: ليش تحبك ماتحبني انا؟!..دوم تشرد عني الخايسه..!!..
ظحكت..
مبارك: خليني اعطيج دروس عن القطاو...اولا... القطوة الانثى تحب تقعد عن الرياييل...والقطو الذكر يحب يقعد عن الحريم...ماكنتي تدرين بهالشي؟! هذي حقيقه علمية بس غير مسجله ههههههاي..
مهرة: احلف..!!
مبارك: والله..لو كنتي تعرفين للقطاو كفاية جان لاحظتي عليهن.. الاناث يحبن الرياييل والعكس بالعكس..نفس الشي القرود...الدرس الثاني...هو انج دوم تربعين وراها ..والقطاو مايحبن حد يربع وراهن ...يتغلن عليج ويشردن.. جربي انتي تجاهليها..تلقينها بروحها تيج تطلب منج حنان واهتمام...
ابتسمت مهرة معجبه بهالمعلومات..
مهرة: ماشاء الله عليك شدراك؟!.. كانت عندك قطوه؟!
مبارك: قطوه وجلب..ودوم يتظاربون.. في النهاية جلبي مات...وقطوتي عطيتها بنت يارتنا الصغيره تربيها...
مهرة: اهااااااااا.... زادنك تعرف لهن عدل... بس مسكين شو اللي ذبحه الجلب؟!
نزلت لولو عالارض..
مبارك: كبير في السن.. عندي من انا صغير..المهم انا بسير ابويه طالبني...نزلي سويلي درب...
مهرة: هههههه اوكي..تعالي لولو..
قعدت تزقرها وهي تمشي جدامي...والقطوه تبعتنا... ظحكت وانا احس ان لولو تتبعني انا ماتتبع مهرة...لكن مهرة مستانسه تتحسب لولو تتبعها هي..!!

ــــــــــــــــــــــــــــــــــــــــــــــــــ
نهاية البآرت الـ33

البآرت الـ34
---------------------------
اليوم: السبت..
المكان: شقة ناصر...
الوقت: الرابعه والنصف مساءا..
---------------------------
(ناصر)....

عقدت حياتي وانا راقد..كنت اسمع وبشكل مزعج صوت منبه..!!!...لاول مره من عرست اسمع صوت منبه..!..
بطلت عيوني ادور مصدر هالازعاج عشان اكسره... ومنو حطه لي هالوقح...!!.. ماداني المنبهات...
التفت ليساري حصلت المنبه عالطاوله..مديت ايدي وبندته.. وقبل ما اسحب ايدي حصلت ورقة صغيره مساندة عالمنبه...
استغربت..شليتها وفتحتها..

" صلاة العصر.."..

حست بوزي متظايج..سعادووه محد غيرها...بعدها زعلانه علي... ولا وعتني لا لصلاة الفير ولا للدوام..زين اني بروحي نشيت يوم سمعت صوتها قايمه...وصلاة الظهر تراني في الدوام...
بغيت اراضيها امس.. لكنها ماتعطيني مجال مب مسوتلي سالفه... وانا ماداني ارمس حد مايطالع فويهي.. !!..او مايخليلي مجال ومايعطيني كامل انتباهه..!!


وهالشي خلاني اطنشها بزعلها...
بس عاد لين متى؟!..الزعل اكثر عن ثلاث ايام مب زيييين..!!!
فريت الورقه وقمت دخلت الحمام..توضيت..لبست ملابسي وشليت اغراضي وطلعت من الغرفه..
التفاته بسيطه مني عرفت ان سعاد في غرفة الغسيل جنها قاعدة تكوي الملابس...!
خليتها وطلعت برا الشقه للمسيد...
ويوم رجعت..حصلتها مازالت فمكانها تكوي..تساندت عالباب اطالعها بحيره..
شو اسوي فيها هذي؟!.. اما هي...ولا كاني موجود...!
ناصر: سعاد... اذا كنتي الحرمه السنعة اللي انا تزوجتها..بتكبرين عقلج وبتين الصالة عشان نتفاهم...
وبهالجملة خليتها ورحت للصالة...فريت سفرتي على واحد من الكراسي ويلست اترياها تي...
كنت شاك بانها بطنشني كالمعتاد...
لكن الظاهر انها كبرت عقلها فعلا ولحقتني للصالة...
يلست على كرسي منفرد واطالع الارض بنظرات حزينه..
كسرت خاطري... ادري انه الغلط مني انا... خيبت ظنها واملها بهالزواج... ماكملنا ثلاث شهور الا وهي تعيسه..!!!..
قمت من مكاني ويلست عدالها...مسكت ايدها بايديني الثنتين عشان ماتسحب ايدها مني...
مابخليها هالمره الا وهي راضيه..!!..
ناصر: اطالعيني سعاد... انا مب شين لهالدرجه...!!..
النكته ماحصلت صدى...!!..تنهدت...
حاولت مره ثانيه..
ناصر: سعاد..مب انتي حرمتي؟..ماتبين مصلحتي ومصلحتج ومصلحة اهلي ..وولدنا..!!!
رفعت سعاد نظرها لي بنظرة عتاب...كانها تقولي اكيد اني ابا هالشي كله..!
كملت..
ناصر: كيف تفكرين اني ماريد اعيش حياة طبيعية معاج...كيف تفكرين اني ماريد اخبر اهلي لاني ابا احتفظ فيج كزوجه بالسر..!!..يعني انا ماريد ولدي يعيش بين اهله وعمامه ويدوده..!!.. انا فخور فيج والله ولا تفكرين للحظة عكس هالكلام... انا بس اطلب منج شوية وقت..!!
سعاد: صارلنا تلات شهور ناصر..!!..
ناصر: ادري... انا بخبرهم والله...عاجلا ام آجلا بقولهم... بس مش الحين..اذا قلت لامي والا ابويه الحين هالخبر... امي بتنجلط وابويه بيموت قهر...لا سمح الله يعني... بس كلهم عيونهم مسلطه علي حاليا... وحاطين فيني كبير الامل...!!..
سعاد: وشو اللي راح يتغير طيب؟!...
ناصر: انا بس اترياهم يفقدون الامل مني باني اعرس..تدريجيا بيلتفتون ليوسف اخويه وبيخطبون له وبيفرحون فيه... لين مايفقدون الامل..ساعتها بيتقبلون أي شي اقوله المهم اني في النهاية استقر... لكن مش وهم حاطين امل.. والله اني مابالغ لكن اادري انه الخبر بيكون وقع الصاعقه عليهم...

سكتت سعاد وحسيت انها مب مقتنعه....
ناصر: تذكرين يوم يانا يوسف ذاك اليوم؟
سعاد: أي..
ناصر: تدرين شو كان يبغيني؟ قبلها بكم يوم راحت امي من دون موافقتي بيت عمي ناويه تخطب لي البنت اللي طالما تمنتها لي.. .. وربج ستر وطلعت البنت مخطوبه من ايام... قامت يوم رجعت البيت خطرت في بالها تيوزني بنت عمي الثانيه اللي كانت تتمناها من قبل ليوسف... ويوسف يباها ... تخيلي ..يعني لهالدرجه ..كانت بتحرم ولدها الثاني من سعادته بس عشان تيوزني انا....
عضت سعاد على شفايفها متاثره بالسالفه..حسيتها تفكر بيوسف وكاسر خاطرها لانها على قولتها.." استلطفته"...
سعاد: وشو صار؟
ناصر: يوسف يا تراه هني وخبرني..وظربني مثل ماتدرين..والخلاصه رحت وكلمت امايه واقنعتها تشل الفكره هاي من بالها عشان يوسف...!...وعدت علي خير... لكن صدقيني.. انا متاكد انها بتبدا من اول ويديد اول ماتحصل بنت تدخل مزاجها... لكن انا واقف فحلجها مابخليها تكمل مشاريعها..
وابتسمت لها...عشان اطمنها وما اخوفها من مشاريع امي الاجرامية...!
وابتسمت هي بعد.. فرحت بشوفه هالابتسامه اللي كانت ماتفارقها...حرمتني منها ثلاث ايام تقريبا...
سعاد: يعني ماراح تتزوج غيري؟!..
ظحكت بصوت عالي... وسعاد اطالعني بعين معجبه... وبعدها قلت بصوت واطي...
ناصر: مستحيل... انتي مدام ناصر ومحد غيرج...
ظحكت سعاد بعد تعبيرا عن رضاها... حطت ايديها حوالي كتوفي...
سعاد: لك يؤبرني شو وسيم...!
حظنتني سعاد بشكل ماسوته من زمان... استانست...
حسستني بانه المياه رجعت لمجاريها...!
واخيرا...
---------------------------
اليوم: السبت...
المكان: غرفة سيف..
الوقت: الخامسة عصرا..
---------------------------
(سيف)...

تنهدت باسف عالعود المكسور جدامي..اللي لين الحين ما تجرأت اني اقوم واجمع بقاياه...خفت اني اذا لمسته انفجر من غيظي وقهري...
حتى الصلاة صليت بعيد عنه وفي الغرفه ماطلعت للمسيد...
ليش ابويه يسوي جي.؟!..شوفيها يعني اذا كنت ادق واغني؟؟..هوايه لا غير...
ماكفرت انا...
ولا لحقت الشباب باللي يسوونه من اشياء محرمه كبيره...
انا بس غنيت...شو فيها؟!..صوتي حلو واتمتع به...!!!
تاففت..واستجمعت شجاعتي وقمت عشان اجمع بقايا العود...لكني ماوصلت نص الطريج الا واسمع دق عالباب...
رحت صوبه وفتحته....كانت مهرة.. وعلى ويهها ملامح القلق...
سيف: شفيج؟
مهرة: انته شفيك..؟!..ماطلعت من غرفتك اليوم...
سيف: تعبان شويه..
مهرة: انزين...همم...ابويه يباك في الميلس...!!
سكت انا...ومهرة اطالع فويهي بخوف...
مهرة: سيف شو مسوي؟!..
سيف: ماسويت شي..في نظري انا..بس ابويه درا اني اغني... وكسر العود...
فتحت الباب عشان تشوف العود المكسور..شهقت مهرة بخوف..
مهرة: ليش دخلت العود البيت قلت لي مابدخله البيت انته...
سيف: اضطريت اني اييبه...!!..
مهرة: سيف اخافه يظربك...
سيف: خليه يظرب لين بسّه...صراحه ابويه مادري كيف يفكر..
مهرة: ياويلي...بقول له سيف طلع..
عطتني ظهرها ومشت عشان ادبر لي حجه عشان ناخر العقاب..لكن..
سيف: تعالي...شو اتحسبيني زايغ..!!.. اذا على سالفه الظرب برايه يظرب...اظني مابحس بظربه لانه شويبه الحين مايروم يظرب قو...
ابتسمت عشان شوي اطمن مهرة...لكنها برطمت زياده... على حالتي انا لاني اكابر وبروح اواجه ابوي والظرب المتوقع... وبعد لانه ابويه صار شيبه ومايروم يظرب قو...!!.
لين متى هالبنت بتم رقيقة المشاعر جي...عيزت وانا احاول اخليها اقوى...ماشي فايده بسرعه تتاثر...!!
سيف: لا تهتمين...ماظني بيسويبي شي..لانه فج غيظه بالعود وخلاص...
مهرة: بسير وياك...
سيف: لا...وقفي عند الباب تسمعي بس لا ادشين...
مشيت جدامها ساير صوب الدري عشان انزل واروح للميلس..وين كان ابويه يترياني... لكن مهرة رجعت تلحقني وقالت بخوف..
مهرة: لا تلاسنه سيف بليز...أي شي يقوله لك قوله ان شاء الله انزين... لا اتعصب به زياده ترا ابويه مايتفاهم....
سيف: لا تخافين مهرووووه...
مع ذلك قعدت تقرقر على راسي لين ماوصلت الميلس.. وقفت هي عند الباب ..اما انا فدخلت...
شفت ابويه يالس تحت عالارض ومتساند عالكرسي وراه... التفت لي...بنظره حااره...
بصراحه ماقدرت اطالع فيه ونزلت عيوني..
سيف: السلام عليكم...
تقربت منه..عشان اوايهه..واستغربت انه وقف لي ووايهني.. بالعاده ابويه عادي يخليني اوخي عليه...
استغربت الصراحه وماعرفت كيف افسر هالشي...
سيف: شو امسيت ابويه..؟!..
يلست معاه عالارض..وقلبي يدق دق...ماكد صارت مواجهه بيني وبين ابويه غير مره يوم انطردت من المدرسه في ثالث اعدادي...كنت متظارب مع الاولاد..وفصلونا لثلاث ايام...ماظربني يومها لكنه سمعني كلام سم... ومن يومها وانا اخاف ادخل فمشاكل...لاني مثل ابويه ما اسيطر على اعصابي... وهالسنه ماسك عمري بالقو عن حركات منصور وفارس اللي دايما يتحرشون فيني...بس عشان ما اخيب ظن ابويه فيني ...وعشان ما اسمع كلام ثاني يسم البدن منه...
لكني على وشك اني اسمع حاليا...
بو حمد: الحمد لله...
سيف: قالولي تباني...!.. خير؟
بو حمد: انته تعرف زين شو الموضوع...
سكت..ومارديت عليه...حتى ما اطالعت فويهه.. الزولية كانت بالنسبه لي مكان آمن حاليا اني اطالع فيه...بعيد عن عيون ابويه...
بو حمد: يمكن اني قصرت بتربيتك ياسيف.. من بعد وفاة امك الله يرحمها...لكني ابدا ابدا ماتوقعت انك بتطلع غير خوانك.. نسيت انه المتابعه والارشاد ظروري..وان النشأة في عايلة محافظه مايعني بالضروره انك تطلع مثل خوانك بالفطره.... خوانك انا ربيتهم مع امك بكل حرص... لكني اعترف اني قصرت فيك...
سكت.. حسيت بحزن انه فكر بهالطريقه...بس لاني غنيت يعتبره تقصير بالتربية..!!.. اوكي انا ادري ان اهلي مقصرين بتربيتي لكني ماسويت ذاك الشي الجايد يعني..!!
ماقلت شي لاني حسيت انه في خاطره رمسه ثانيه...
وفعلا...
بو حمد: اقولك شي.. ليش انا ما اباك تغني.... لاني انا كنت اغني فشبابي... وادق عود وكل شي مثلك جي.. كنت اعتبره هوايه لكن اعجاب الجماعه زاد فيني ...كنت احس انهم مايصبرون عني في أي تجمع او عزيمه لازم انا موجود...ومايصير غنا بدون وجودي..لكن يوم سرت اخطب امك..حتى ماخذوا خطبتي لها بعين الاعتبار.. قالوا عني لااااه هذا صايع يغني ويطقطق...اتظايقت وايد يومها ...ودرت الغنا..والتحقت بالجيش...وبعد ثلاث سنين اقتنعوا باني ريال والنعم بسبب انجازاتي...خطبت امك مره ثانيه وهالمره وافقوا.. لا تحط فبالك ياسيف ان نظررة الناس تغيرت...ماتغير شي بين اول والحين..لكن الفرق انهم صاروا اكثر... واللي يشجعون على هالشي اكثر عن قبل...لكن مازالوا الناس ينقدون على الريال اللي يسوي اشياء تقلل من رجولته... وانا ماباك تعيش نفس الظروف..ماريد ولدي يوم يسير يخطب عند الناس يفكرون بطلبه مرتين ويترددون...شوف ماشاء الله حمد...شوف سهيل... من يخطبون يتوفقون ماشاء الله لانهم رياييل... انا ماقول انك مب ريال لكنك بحاجة لشوية نصح...وارشاد...حتى لو كان متاخر...
بعد كلام ابويه شي كلام..؟!... سكت... ماعرفت بشو ارد عليه... اقول له مثلا انه كان تسلية لا غير...؟!.. لا ماكان تسلية... كنت افكر جديا بالغنا...
بو حمد: انا ماقولك لا تغني... غن بين خوانك..ربعك...لكن لا تحطه فبالك كمستقبل لك او كمهنه...ولا تخلي الناس كلها تعرف انك تغني وادق...لا تحط فبالك اني ماعرف وين تروح وشو الحفلات اللي تسوونها ومنو الناس اللي يحظروونها... انا اعرف لكن بغيتك ترتد من نفسك...لكني شفتك تكثر سيراتك...وكل ماييك تزيد... وقام مبارك يروح وياك الله يهديه...
استغربت...
سيف: كيف عرفت؟!..
بو حمد: اخاف اقولك تقوم تسويلك مشكله مع الريال..
سيف: لالا والله مابسوي بس قولي.. منو كان يدري.؟!..
بوحمد: راشد ولد خالتك...خبّر سهيل مره بالموضوع عن سيراتك لدبي بس سهيل مافتكر يسال او يتحقق من الموضوع.. قام خبرني انا...
سيف: وراشد شو عرفه..؟!..
بو حمد: عمر اخو نسيبهم عبدالله ساكن في دبي.... ويعرف كل هالسوالف اللي تسووونها وكم مره شايفنك...

مليت صدري بالهوا عشان اهدي شوي اعصابي... كل هذا يصير من وراي؟!.. كانوا يتجسسون علي...؟!..باي صفه ان شاء الله... ماعندهم احترام للخصوصيات..!!!...
قهر والله...
بو حمد: المهم...ماريد اسمع انك سرت حفلات مثل هذي...تسمع؟..انته ريال الحين وعيب امد ايدي عليك..لو كنت اصغر جان تصرفت معاك تصرف ثاني... لكن دامني حاشمنك وعادنك ريال...خلك قدها وكون صدق ريال... لا تخيب ظني فيك ياسيف...لا تخلي الناس يظحكون على ابوك ويقولون عنه ماعرف يربي عياله...!!
وبعد هالكلام...نش ابويه وطلع من الميلس...سمعته يركب سيارته ويطلع...
بالعاده هو يطلع من وقت للمزرعه...لكن اليوم اخر سيرته عشاني الظاهر...
ماعرفت بعدها شو اقرر...مامرت خمس دقايق الا ومهرة داخله الميلس...
يلست عندي وهي تقول...
مهرة: ان غنيت ثاني مره انا اللي بظربك...تسمع...!!!..
ابتسمت..مهرة تخاف علي اكثر من نفسي..وتخاف ابويه المره الثانيه اللي اغني فيها مايتفاهم ويقوم يمد ايده...
بس بيني وبينكم..مابقول اني عفت الغنا بعد كلام ابوي لانه هالشي مب صحيح..بعدني اتشوق للغنا...
لكن قل حماسي للنص...!!..

بعد اربع ايام..
-----------------------------------
اليوم: الخميس...
المكان: بيت ام سلطان..
الوقت: السادسة والنصف مساءا..
----------------------------------
(كنه)...

طلعت من المطبخ وانا شاله المدخن بين ايدي... مايد يالس في الصالة يتريا المدخن عشان يتدخن ويروح بيت عمي سلطان... ويدوه بتروح معاه..كل هذا عشان خطبة منى الرسمية..
كنت فرحانه حدي بهالظروف.... فرحانه لانه منى حصلت لها شخص بيكون سند لها في الايام اليايه...شخص تشغل به تفكيرها... تتفائل بحياتها معاه...
وراشد من الكلام اللي سمعته واضح انه ريال والنعم...
وان شاء الله يكون يستاهل منى بكل رقتها وثقل عقلها وحشمتها...
دخلت البيت حصلت مايد واقف جدام المرايه المعلقه عالايدار... ويعدل الغتره والعقال بجدية تامه..ابتسمت... مساكين الرياييل..كشختهم هالسفره والعقال بس...
التفت لي مايد...
مايد: يبتييه..زين.. هاتي..
كنه: صبر بحط عوده من عند يدوه...
مايد: وزقريها بطريقج ..تاخرت..
دخلت غرفة يدووه حصلتها ادور شيلة زينه تلبسها...
كنه: يدوووه عطيني عووده بدخن مايد..
خلت يدوه اللي في ايدها وطلعت لي عود...حطيته انا في المدخن وقعدت انفخ فيه..
كنه: يدووه... بتتعشون هناك؟
ام سلطان: هي .شو فخاطرج..
كنه: يدووه العروس بنت عمي وربيعتي وحبيبتي...ودوني وياكم..
ام سلطان: ماعندي مانع انا بس شاوري امج...
كنه: لازم...؟ بقولها شاورت يدووه..
ام سلطان: انا يدتج وامج تراها امج...سيري شاوريها والا ترا والله ماتزررييين بلا شورها...
كنه: انزين انزين..
طلعت من غرفة يدووه ودخلت غرفة امايه..حصلتها تتكلم في التيلفون...
كنه: اماايه...
اشرت لي امي بايدها عشان اسكت...
بس انا مستعيله مابقعد اترياها لين تخلص سوالف....
كنه: امايه..بسير عندهم انزين..؟!
اشرت امي بايدها مره ثانيه كانها تقولي رووحي..وكانت هي مندمجه تسمع الطرف الثاني عالخط...
ابتسمت..تعمدت اظللها واقولها بسير عندهم...بتتحسبني احين اقولها بسير عندهم في الصاله..شكلها ماتدري اني اقصد بسير عندهم يعني معاهم...
ظحكت وطلعت..
رحت عند مايد...وقف هو ثابت عشان ادخن كندورته....
كنه: شاورت امايه وبسير وياكم عند قوم منى..
مايد: اوهووووووو وين تبين؟!..
كنه: بسير عند العروس...بشوف نفسيتها.. عيل انته ليش تسير؟
مايد: واغمي عليج... انا عمي طالبني..وبعدين انا لمنى بمثابة عمها... ولد عمها الوحيد ماتبيني اسير خطبتها؟..وبعدين هي بمثابه تعارف للعايله مب بس خطبه لازم اكون موجود...
عطيته المدخن عشان يدخن سفرته بروحه...
كنه: هب تروحون عني بلبس عباتي وباييي...مابطول..
خليته ورحت البس عباتي...ورحت معاهم لبيت عمي...



يوم وصلنا بيت عمي..نزلت من السياره وانا اعق غشوتي واتحجب..بطرف عيني شفت ناصر لابس سفره وعقال ومتكشخ مثل مايد..وتوه يطلع من الباب الرئيسي للبيت...
لبسته لاني صرت ماحب اشوفه..وفتحت باب يدووه ومسكت ايدها على تنزل بسهوله..
ناصر: مرحبااااا الساع...
مايد: اهلييييييييييين بولد العم.... (وتوايهوا)... شحالك؟؟
ناصر: بخير وسهاله شحالك انته ميوود..
مايد: جي اصغر عيالك انا تزقرني ميود..!!
ناصر: اوص اوص خلنا نسير نسلم على عيوزنا...
اخيرا نزلت يدوه بسلامه من السياره...استغرقت عملية نزولها اكثر مما اتصور...لكن طاحت عباتها..نزلت انا اييبها ومن طرف عيني اشوف ناصر يتقرب ويحب يدوه على راسها ويسلم عليها...شليت عباة يدوه وقعدت انظفها عن الغبار...
ووصلني صوت مايد يرحب مره ثانيه...
مايد: حيــــاللـــــــــــــه الخرّيـــــج..!!..
بطلت عيوني..!! وبردة فعل مباشره رفعت نظري...ادور على احلى خريج عرفته...كتمت ابتسامتي وانا اشوفه يتوايه مع مايد...
يوسف: الله يحييييييييك يالمعرس..شحالك؟
مايد: بخير وسهاله شحالك انته....؟!..
صحيح كان صوت ناصر وهو يسولف مع يدوه اقرب واعلى بالنسبه لي... لكن كاني ما اسمعه...كانه مب موجود اصلا...
اذني كانت تستقبل صوت يوسف وبس..!
يوسف: بخير وعافيه الحمد لله...
التفت يوسف صوبنا...تلاقت عيوني بعيونه...حسيت ان الوقت وقف....بالرغم من انها ثواني حسيت بها اطول من جذي...بوايد...
ابتسم يوسف وسار صوب يدووه...... اما ناصر فانسحب وسار عند مايد...
تقرب يوسف ومد ايده يمسك راس يدووه عشان يبوسه... في نفس الوقت اللي كنت انا احط عباة يدوه على راسها...
وحط ايده على ايدي بشكل مب مقصود...
حسيت انه مب مقصود...يوسف حشيم ومايسوي هالحركات ... خصوصا علنيا جذي... وبحضور يدوه اللي عصاها دوم في ايدها..
شهقت وسحبت ايدي... حسيت برجفه في كل جسمي...
مسك يوسف العباة اللي كانت بطيح بسرعه.. في نفس الوقت رفع نظره لي وهو يبوس راس يدوه ..بنظره ماكره جدا استغربتها على عيون يسوف....
لدرجه انه شككني بنوايااه...
يوسف: شحالج يدوووه..عساج طيبه..
وبظحكه حلوه عدل عباة يدوه فوق راسها وخلى يدوه تمسكها عدل...
ام سلطان: بخير غناتي شحالك انته؟
يوسف: بخير دام شفناكم... حياج امايه يالسه في الصاله ويا شما اختي وميثا والعيال...
ام سلطان: ماشاء الله شما عندكم؟
يوسف: هي نعم يت هي وريلها ...
ام سلطان: عيل وين العروس..؟
يوسف: منخشه فحجرتها...ههههه..
ام سلطان: ماشاء الله بالمبارك بالمبارك... وانتوا وين بتسيرون؟
يوسف: الله يبارك فيج.. بنسير المسيد الغاليه ماشي باقي عن الصلاة...
ابتعد يوسف عن طريج يدوه وهي تمشي..اضطريت انا اني امشي عدالها عشان اساعدها تركب الدري الامامي..
ابتسم لي يوسف يوم خطفت عداله... لا انا سلمت ولا هو سلم...مادري ليش.؟
انا عني كنت مستحيه صراحه...اما هو مادري شو عذره..
لكن بالنسبه للسلام بالعيون...ترانا سلمنا ونص...
ساعدت يدوه على ركوب الدري ودخلنا البيت....

في البيت حصلنا الحريم متيمعات والوناسه على ويووههن..شو عليهن خطبه منى اليوم..
نشن كلهن يوم شافن يدوه داخله.. وانا معاها...
وبعد السلامات..
كنة: منّوووه فوق؟..
ام محمد: هي نعم فوق جان بترومين تنزلينها زين...
حركت شما ايدها بعصبية...
شما: وهي ليش منخشه تراها وافقت محد ظربها على ايدها...
ام محمد: تستحي يمكن...
كنه: انا بحاول انزلها لكن ان نزلتها لا تقعدن تغلسن عليها...
شما: هههههههههه العروس ماتحس نفسها عروس الا اذا تعرضت للتغليسات...انتي بس نزليها ونحن بنستلمها..
كنه: ههههههههههههه لا عيل ازبن عندها فوق احسن...
خليتهن وركبت فوق..دقيت على منى الباب...
منى: منوووووه؟؟؟
كنه: عمتج...
منى: كنوووووه...اللـــه...
ظحكت وانا اسمع صرخه الفرح والمفاجئه على صوتها...بطلت الباب وهي تظحك...
لوت عليه وباستني..
منى: فديتج والله ييتي بالوقت المناسب...
كنه: عشان تعرفين انج غاليه ...
دخلنا وسكرنا الباب ورانا..وبديت انا افصخ عباتي...
كنه: شحالج يالعروس...
احمر ويه منى ونزلت عيونها وابتسمت...
منى: زينه...
علقت انا عباتي وشيلتي بالكبت..وطلعت لي من كبت منى شيلة بيت...
كنه: شحقه منخشه هني؟؟؟ ليش ماتنزلين كلهن متيمعات تحت...
منى: ما اتحمل نظراتهم..تعرفينهم انتي... نزلت عالغدا اتغدى وعفت حياتي ...
ظحكت..
كنه: ليش شو سووبج..
يلست منى عالشبريه وحايسه بوزها مع ابتسامه خفيفه..
منى: محمد وناصر طاحوبي طيحه...تعليقاتهم مب مباشره كله من بعيد لبعيد بس انا فاهمه عليهم..
يلست انا عدالها وانا اظحك..
كنه: كيف يعني من بعيد لبعيد شو يقولون...
منى: محمد مسوي عمره ريال مستعيل عالعرس...وناصر حرمه ماخلصت تجهيزها لعرسها..!!..وعاد مسوين حوار بينهم... اونه انا وراشد...
كنه: هههههههههههههههاي..وكل هذا مب مباشر.؟؟
منى: لا ترا هم مالفضوا اسمي..ما اطالعوا فيني..ولا جنهم يتكلمون عني..لابسيني...والجماعه يتكركرون وانا ويهي منتفخ من الغيظ...
كنه: ليش تنقهرين هم يبونج تتعودين عالفكره وتستوين عادي مايبونج اتمين مستحيه جي لانه ماصار شي لين احين..
منى: ادري بس بعد...احس باحراج...
كنه: المهم انتي سمعي... تعالي بنوايج عليهم يوم بيووون...بنشوف هالراشد هذا...
بطلت منى عيونها وهزت راسها بالرفض...
كنه: شفييييج؟!
منى: لالا...مب مستعده لشوفته بعدني...
كنه: قسم بالله يبالج طراق..الا مره مب مستعده للعرس ومره مب مستعده للشوفه..عيل متى تبين تشوفينه بالله؟!..
منى: مصيري بشوفه .. بس ماريد حد يقول عني ملقوفه ماصدقت..
كنه: منو بيقول ماحد غيري عندج...
منى: ماريد انتي وايجي وخبريني رايج فيه..
كنه: مب الحين...قومي بنصلي اول.... اكيد هم بعد بيصلون المغرب وبيطلعون..
وبعد الصلاة...بندت ليت الغرفه عشان مايشوفوني يوم اوايج عليهم...وبعد تقريبا ربع ساعه من الوقفه شفت سيايير وايد تدخل البيت..تم قلبي يدق بالقو.. مع انه مالي خص ابدا بس مادري ليش تحمست..
كنه: تعالي تعالي يالبقره لا يفوتج...
منى: هههههههههههههه مابا...
كنه: والله انج غبية كيف تفوتين لقطه مثل هذي..
منى: شوو شفتيه؟
كنه: بعدهم مانزلوا سياييرهم وصلت بس..
منى: مالت عليج ومحتشره على شوو...
سكت وانا اشوف رياييل وايد ينزلون من السياير...ثلاثه كبار في السن شوي.. وخمسه شباب كل واحد اكشخ من الثاني وبصراحه ماعرفت منو منهم المعرس...!!...
كنه: اخ يالقهر يا منّوووه كل الشباب كاشخين ماعرفت أي واحد فيهم المعرس...
منى: احسن.. بس شو عرفج عنبوا نحن فوق ماتشوفين ويوههم..
كنه: ما اطري ويوههم انا اطري لبسهم ..تسفيرتهم..المشيه..الشكل العام...وااي فدييييييييييييييت هالشوف ياربي...
ظحكت منى لانها عرفت اني شفت يوسف تحت...تذكرت ملامسته لايدي من شوي وحسيت بويهي احترق...
شفته يسلم هو وناصر ومايد وعمي ومحمد ..حتى جاسم ريل شما بنت عمي طالع لهم... ياسلاااااام وناسه والله...
كنه: اخر لحظه هذي...تعاااااااالي...
منى: برايهم..
بعد لحظات سكرت الستاره وولعت الليت...
يلست عدال منى..
كنه: والله انج غبية..المهم قومي ننزل...
منى: يدوه تحت...وتبيني اقعد عندها؟...من وين تتحسبين الاهل يايبين اللسان الطويل عيل..لو اقعد عندها بتستلمني صدق..
كنه: هههههههههه انتي تعطينهم فرصه لانج تستحين بس لو بينتيلهم انج ماتستحين ما بيغلسون عليج مره ثانيه... قومي...
مسكت منى من ايدها ونزلنا تحت نقعد عند باقي الحريم...
اليوم: الخميس..
المكان:. ميلس بيت سلطان...
الوقت: الثامنه والنصف مساءا...
---------------------------------
(راشد)....

كنت يالس مع كل توتر اعصابي... على يميني ابوي.. وعلى يساري يوسف.. مجابلني ناصر مع محمد ووياهم حمد ولد خالوه وسهيل...
بحكم اني المعرس..كان مفروض علي اندمج مع عم المستقبل... اللي قاعد عدال ابوي وعلى يمينه خالي خلفان و خالي يابر.. اما يوسف اللي قاعد على يميني فالتهى عني بسيف ومبارك اللي كانوا على يساره يسولفون بطريقه مينونه...
كان موجود بعد واحد اسمه مايد يصير ولد عمهم الوحيد...وجاسم ريل اختهم...
باختصار الميلس كان متروس رغم انه كبير... لكن حسيتهم مرتبشين ومستانسين...
بصراحه.. الواحد سهل يندمج معاهم والدليل ان حتى سهيل نفسه اندمج بسرعه...لكن انا ولاني متوتر حدي ماقدرت اسولف عدل بدون ما انشغل بافكاري الخاصه...
تكلمنا بالامور الرسمية وكل حد عطا كلمته للثاني وتمت الخطوبه رسمي...
البنت مازالت تدرس وفي بداية طريجها لكني قلت انه ماعندي مانع ابدا انها تكمل ومابوقف بطريجها....
بخصوص موعد العرس...حطوا في بالهم انه يكون في بداية الصيف...وانا بالنسبه لي شفته موعد مناسب..
تجاهلت طلب شويخ باني اطلب الملجه ..مب وقته..تو الناس.... ورانا شهور لاحقين عالملجه... وماباهم يقولون مب شايف خير مستقطع عالعرس..!!..
لكن في النهاية شفت عمي ريال طيب ومحترم وشخصية... عياله وايد مسويله قدر..يوم ينش نشوا..اذا بيقعد قعدوا..وابدا ابدا مايسوون شي قبله...وخلال كل كلامنا..ماشفت واحد منهم نطق بشي.. بو محمد كان يتولى كل الكلام الا اذا التفت لهم وطلب رايهم ولو بنظره..ساعتها يرمسون...
بو محمد: سمعت انك خاطب يا سهيل...
التفت سهيل لعمي سلطان وهو مبتسم...
سهيل: هي نعم خاطب..
بو محمد: متى بتعرس ماشا ءالله.؟!
سهيل: شهر اربعه ان شاء الله... بس بعدنا ماحددنا أي تاريخ...
بو محمد: بالبركه ان شاء الله... يعني عرسك قبل عرسنا ...
سهيل: ان شاء الله..اذا كنتوا بتعرسون في الصيف.. على خمسه او سته...
وبعد نص ساعه ....
بو محمد: يالله يا جماعه قربوا عالعشا...

سرنا غرفة الطعام وين كان العشا محطوط..بصراحه ماقصروا.. مب مخلين شي مب مسوينه... وبديت اتسائل اذاكانت منى شاركت بتجهيز العشا او لا..!!..
بعد العشا ماتاخرنا وايد عندهم لانه ماحبينا نكون ثقال... فانتقلوا كل اللي في الميلس للحوش..
وقبل مانسلم..حسيت بحد يحط ايده حوالي كتوفي.. التفت حصلته يوسف مبتسم..
يوسف: تعال نسيبي شويه ابغيك...
راشد: هههههههه وليش السرّية....
يوسف: لانه سرّي...
راشد: سرّك مادفنته لين الحين؟... شووو هذا روح ادفنه تحت المسيد..
يوسف: ههههههههههههههه لا والله ينكت بعد..تعال تعال...
سحبني لمكان بعيد شوي عن تجمع الرياييل...
وقال لي بصوت واطي..
يوسف:.. بطلب منك طلب...بس لا تقول عني ملقوف ولا ما استحي لانه مايخصني..بس تقدر تعتبره وعد ولازم انفذه...
رفعت حواجبي لاني مافهمت كلمه من اللي قاله...شو يخربط هذا..
راشد: كيف.؟!..شو تقول؟
ابتسم يوسف وتحنحن...
يوسف: احم... اذا عندك صوره جاهزه اباها..واذا ماعندك ياريت تصور وحده يديده معتبره لاختي...
ماقدرت اكتم ابتسامتي... مامرت ثواني الا وانا اضحك...
يوسف: ليش تضحك..؟!..ههههههههه صدق والله اكلمك..
راشد: لازم صوره؟ بصراحه انا ماحب التصوير...قولها توايج احين من الدريشه وتشوفني..
يوسف: لا...ماتوايج اختي عالرياييل عـــــيــــــــــب... تبا صوره تشوفها بروحها على رواق...بدون ماحد يحرجها...لانها تستحي وايد...وانا وعدتها اني اييبلها صوره بعد مايصير الموضوع رسمي...
ابتسمت..
راشد: فاااااااااااالك وفالها هي بعد طيب... اقرب فرصه ان شاء الله تكون الصوره عندك... تامر بشي ثاني؟
يوسف: تكشخ... لا تتسفر تسفيره بداو جنك ياي من العزبه تكشخ عدل...
وظحك علي... اليوم انا مب متسفر...لابس سفره وعقال...تذكرت عقب انه شافني في عزيمه حمد..وكنت يومها متسفر...!!
راشد: هههههههههههه والله عاد مثل ما انا بصور...مابغش حد... وبعدين انا اتسفر اي كلام يوم اكون مستعيل والا اعرف اتسفر عدل مب اهبل ..
يوسف: افاااااا...محشوووم ماقلت عنك اهبل انا...بس اتحسبك بديوي تتسفر شرات الشواب..
راشد: انا بديوي لكن اعرف اتكشخ بعد ...وين ماتحطني بركب عادي..
يوسف: هههههههههههههههههاي هي جي اباك...
وبعد تبادل السوالف مع الجميع..ركبنا انا وسهيل وابويه سيارتي وتحركنا ..والبقية كل حد في سياره ...
راشد: هااه سهيل شو شفتهم؟
بو راشد: شو بعد ثرك بتتشاور فيهم...؟


راشد: لا انا عيبوني..
سهيل: والله ناس طيبين ياراشد ..الله يوفقك...
راشد: آمين..
سهيل: عمي شحقه مارمستهم عشان الملجه..!
راشد: لالالالالا تو الناس..
سهيل: شو تو الناس ماتبا تعرف اللي بتاخذها.؟!..
بو راشد: ماطلب مني ارمسهم عشان الملجه...!!!
راشد: ماريد الحين عقب شهر ..شهر ونص...شهرين...
سهيل: والله انك خبل....
بو راشد: على راحته..
راشد: كل ماقربت الملجه من موعد العرس كان احسن بنظري..
سهيل: احسن لو كنت تعرفها...بس انته ماتعرف شي عنها ولا حتى شكلها...
راشد: وايدين عرسوا جذي قبلي ومتوفقين الحمد لله..
سهيل: كيفك والله.. مع اني انصحك تملج بسرعه عشان تعرفها عدل...
بو راشد: انا من رايي انه يملج بعد شهر... او شهرين... مب زين كل الامور تمشي بسرعه... طبخوا على نار هادية..
راشد: كلام ابويه صح...خلنا نعيش فتره خطوبه اول..عقب ملجه..عقب عرس..
سهيل: تاخذ نصيبك من كل شي يعني؟
راشد: هي نعم...
سهيل: عيل شمعنى انا مابملج الا قبل العرس باسبوعين.؟!...انا بعد ابا اخذ نصيبي..
تناقعنا انا وابويه من الظحك على سهيل.... اللي شويخ مطفرتبه ماتبا الملجه...
بو راشد: هههههههههههههههه والله يابويه نحن ماعندنا مانع لكن شويخ انته تعرفها زين راسها يابس..
سهيل: رمسووها عمي مب زين عليها جي..
راشد: ولا بتسمع لحد .. بعدين مثل ماتقول انته الملجه قريبه من العرس احسن في حاله انك تعرف حرمتك...وانته مب الا تعرفها الا خابزنها وعايننها عدل ...
سهيل: شو قصدك يعني ماله داعي.؟!
راشد: ماله داعي..
سهيل: سوق سوق...سوق وانته ساكت لا انش لك احين...
راشد: بعدين تعال... ليش تقلدني ولابس سفره وعقال...احين لو شافونا داخل مابيعرفون اي واحد المعرس فينا..
سهيل: طالع...طاحت علي انايعني؟.. حمد لابس سفره وعقال...
راشد: حمد ينشاف انه اكبر واحد فينا...وينعرف انه عمره مب 25... اما مبارك وسيف ينشافون صغار...
سهيل: عمي ولدك مستقطع...
راشد: لا والله...
سهيل: عيل من احين تحاتي شافتك والا لا ..واذا عرفتك والا لا...
سكت يوم ادركت اني فعلا كنت متوتر اكثر شي يوم طلعت من الميلس..ويوم دخلت... كنت خايف انها توايج وتراقب...بعيبها او لا...؟!..
بس ما انتبهت ساعتها لاني كنت متوتر...
راشد: ما احاتي..بس خلاص اسكت..محد يطيح فلسانك حشى...!!!..
سهيل: ياحليييييلك يالمعرس...
ظحكت ... استانست علىهالكلمه... فعلا الواحد يوم يحس نفسه على وشك الاستقرار يحس بشعور غريب احلى عنه مافيه...
الاعاد جان كان مغصوب...
وانا مب مغصوب..رغم اني يتني فرررة راس من مهرة...لكني تخطيتها من بعد كلام شيخه ذاك اليوم....
خل مهرة لنصيبها..لانها مب نصيبي...ولا بتكون نصيبي...
-------------------------------------
اليوم: الخميس...
المكان: بيت سلطان..
الوقت: العاشرة مساءا...
-------------------------------------
(يوسف)...

صديت لمايد بعد مازقر اسمي...
مايد: بالله عليك يوسف..ماعليك امر ازقرلي يدوه... تاخر الوقت بنسير..
يوسف: يمكن بعدهن يتعشن..؟!..
مايد: المهم اول مايخلصن يطلعن تاخرنا..
يوسف: شو عايلنك انزين انته.؟!
مايد: تعبان والله..
يوسف: هممم..خلاص بسير ازقرهم...
نشيت عنهم وخليتهم يالسين في الميلس...دخلت الصاله حصلت الحريم كلهن متيمعات..مااعدى منى... كنه كانت توها ناشه عن العشا...نزلت عيونها يوم شافتني وراحت صوب المغاسل...
يوسف: يدووه.. مايد مستعيل.. اقوله بتباتين عندنا؟!..
ام سلطان: لالالا فديتك بروح..ما اعرف انا ارقد على غير فراشي..
يوسف: بعطيج شبريتي..ارقدي عليها يوم واحد عقب بتروغيني من الحجره...
ام سلطان: ههههههههه لا غناتي خل شبريتك لك انا بسير بيتي ما اصبر..
يوسف: صدق عيوز..
ام سلطان: شوو قلت.؟!..
ام محمد: عيب يوسف ..
يوسف: اقول صدق غزال شفيكم انتوا...!!
طلعت كنه من عند المغاسل والكلينكس في يديها وهي تبتسم..شكلها سمعت كلامي وتظحك عليه حالها حال الجميع..
ام سلطان: كنه..يالله امايه سيري لبسي عباتج بنسير البيت...
كنه: ان شاء الله يدوه..احين بايي..
مشت كنه من عدالي وركبت الدري وانا اطالعها بطرف عيني...
ورجعت اسال امايه
يوسف: وين العروس عيل؟!
ام محمد: اختك ماصخه مابغت عشا...
يوسف: جي شو سويتوبها..؟
ظحكت شما وميثا...
شما: نحن طفرنابها...
يوسف: حرام عليكم...لا هنيتوا عليها بغدا ولا بعشا...يابوي منى هب مثلكم قوية ويه...
شما: اييه ..عنلاااتك شو قصدك انا قوية ويه..
يوسف: مب جي بس انتوا تتحملون المزح ..هي ماتتحمل ..بتكره ريلها قبل ماتاخذه...
شما: خلاص حشى يابوك محد بيرمسها...مايسوى عليها...
يوسف: ان سمعت انكم غايظتوها ياويلكم...
صدق عصبت... حشى الواحد كم يتحمل..!!؟؟ عطيتهم ظهري ومشيت صوب الدري..مسكت تيلفوني وطلبت لمنى وجبه من كوخ الدجاج..وخليتهم يوصلونها البيت وبسرعه...
كسرت خاطري الصراحه مايسوى عليها هالعرس...!!!..
ركبت الدري وسرت صوب حجرة منى..توني بفتح الباب الا وكنه بويهي لابسه عباتها والشيله...
ابتسمت انا اما هي شهقت متفاجئه...
وتراجعت..بينما انا تجدمت ودخلت الحجره وسكرت الباب وراي...
يوسف: باركتي لبنت عمج..؟!
كنه: من زمان...
كانت منى تسمع كل كلامنا وتراقبنا...بس ما اهتميت..تراها تعرف كل شي...!!..
ابتسمت بكنه بخبث وهي اطالعني باستغراب..
يوسف: عقبالج...الله يرزقج بواحد يسعدج...

مادري كيف فهمت كلامي انسه كنه..لكن ابتسامتها اختفت وحل محلها تعبير غريب...صدمه على احراج على عصبية...وفازت العصبية...عقدت حياتها وقالت لي..
كنه: وعقبالك.. وان شاء الله الله يحط بدربك وحده تيننك...واطلع لك الشيب...!!
ظحكت منى...اما انا انصدمت...
يوسف: بسم الله شو قلت لج انا..؟!

كنه: ماشي..ماقلت شي ابدا...
يوسف: يزاي قاعد ادعيلج...
كنه: مب بحاجه لدعواتك انا خلها لعمرك...لازم تحاتي نفسك وادور لك بنت ترضى فيك...!..
ومن زود العصبية اللي انفجرت فيها...دزتني عن الباب ..فتحته وطلعت ورقعته وراها..اما انا وقفت مصدوم...
اول مره اشوفها معصبه جي....
واللي قهرني ان منى قاعده تتكركر...
يوسف: شوفيها هذي.؟!... شو قلتلها انا..؟!..
قعدت منى تظحك وتظحك...
يوسف: اييييه...قولي شو قلت لها انا..؟ شفيها؟!..
منى: ههههههههههههههه..آآآآآآخ بطني يعورني...تتحسبك تدعي انها تحصل واحد غيرك يعني ياخذها...انقهرت...!!..
يوسف: والله ماقصدت جي...
سرت وبطلت الباب اوايج بالممر.. كان فاظي..!!
راحت مابتقعد تترياني ...!!
رديت ارقع بالباب..
يوسف: قهر... راحت... غبية انا ماقصدت جي... عقبالج كلمه يقولونها بهالظروف...شو تباني اقولها يعني..
منى: بتفهمك صح وبشكل احلى بوايد لو قلت لها "عقبالنا ياكنه"...
ظحكت.. تقربت من منى ويلست عدالها عالشبرية..
يوسف: اخافها ماتتحمل هالجمله ..كبيره عليها...يمكن اطيح بحظني...
منى: ههههههههههههههه بعدك ماعرفت كنه...صح تموت فيك لكن مب ظعيفه لهالدرجه...
يوسف: عنلاااتها متى ماتبا تفهم غلط هذي وتسوي مشكله...المهم... ليش ماتعشيتي.؟!..
نزلت منى عيونها