الجزء السابع.

في السياره يلست ساره اتفكر بالموقف الي مر عليها مع هزاع..

اول مره فـ حياتي تحتك مع شخص ..وتسمح لانسان يجرب منها هالكثر..يمكن لانها تبا تكسبه و تثبت له ان ما بينها و بين بو هزاع أي شي..

بس اليوم لاحظت ع هزاع شخصيه يديده ما توقعت انه هالانسان يمكن عنده شعور بالحنيه..

ع العموم جافت نفسها تستاهل لتعب الي تعبته البارحه بكتابة الفايل....

يوم الخميس..طلعت مع اليهال و امها وساروا المركز يشرون..

كانوا يالسين فـ الاستراحه ع الكراسي ..
فتون "اتير ايد ساره" مامـا ابا اروح الحمام..

ساره: اوووووه الحمام في الطابق الثاني ما اروم اروح فوق تعبت..

ام ساره: خليها انا باخذهـا..

ساره: لا خلاص انا باخذهـا اتعب شويه ولا اتم مع هالخبال عبودي و حمودي.

عبودي: اصلا انا ما احبج.
ساره:انت شو اتعرف غير هالكلمتين يلي ما فيك خير شرات ابوك..

ام ساره "نبرة عتاب"اللــــــــه يرحمه.
ساره: الله يرحمه و يغفر له..يالله فتون حبيبي تعالي..

سارت ساره ومعها فتون ..و عند الدري المتحرك
فتون:"رافعه ايدها" شليني.

ساره"تتأففف" انتي عـذاب.

شلتها و فتون تضحك بصوت عالي ..كانت ساره تضحك لضحكت فتون..

ساره:"تضحك" شو عندج..

فتون: مرجحـانه..

بعد ما طلعت من الحمام..سارت صوب الدري المتحرك عشان تنزل..فتون اطالع تحت و تزقر عبادي و حمودي بصوت عالي..

حست ساره بالاحراج لان الناس الموجوده قامت اطالعهن بسبت صوت فتون.

ساره"تساسرها" اذا ما سكتي ما بشتري لج حلاوه.

فتون: بعد ما بتشترين حق حمودي و عبادي.

ساره: امبلى بشتري لهم انتي لا..
فتون "بتصيييح" انا ابـــــــاا

ساره: عيل اسكتــــــي اول فضحتينـا خلق الله ما خلق يطالعنــا..

صدت ساره لورا يوم سمعت صوت هزاع من وراها يقول..

شحالج ساره..؟؟

ساره"مبتسمه"ابخير..

هزاع: اول مره اجوفج برع الشركه و انتي مبتسمه لي.
ساره: ما توقعت اجوفك..

هزاع"يلاعب فتون" شحالهـم الاموريييين..

ردت فتون ورا ساره خايفه.
هزاع: مب طالعه ع خالتج قويه يا الخوافه.

فتون: ماما ما بتشتري لك حلاوه بس انا و عبادي وحمودي.

هزاع : "شل فتون" و انــــــا منو بشتري لي حلاوه..

فتون "مستحيه" انت كبير روح اشتري بروحك..

ضحكت ساره..و هزاع ابتسم ونزل فتون بالارض بعد ما باسها..اتخيلت ساره انها اتكون حرمت هزاع و فتون بنتهم..

قالت في خاطرها "ابيه عيب شو هالافكار"..

هزاع: زين جفتج هني.

ساره اطالعه مستغربه..

هزاع:- من ساعه يالس الف ادور ابا اشتري شي بس مب عارف يمكن انتي اتعرفين..

ساره: انزين يمكن اقدر اساعدك..

هزاع دش المحل الي مجابلنهم ودشت وراه ساره و فتون..

طالعته ساره محل مجوهرات..يلس هزاع يرويها العقود الي عيبته..اتمنت ساره اتعـرف لمنو ها العقد..بس هزاع ما قال شي..

أختارت ساره له عقد غير الي هو مختارنهم..و شكله عيبه وايـــــد ..كانت تبا تساله حق منو ..بس جافت مب حلوه..

شل فتون ..وطلعوا من المحل..
هزاع: اذا عندج عادي ادشين معاي ها المحل ابا اشتري ساعه اتناسب هالعقد.

ساره: خلاص ما يهمك دام موجوده ..

دشوا محل الساعات ..بعد عشر دقايق ..اختارت ساعه اتناسب العقد الي شراه هزاع..

هزاع: وابوي منكم يا الحريم..سنه.

ساره: "تبتسم" مب انت قايل من ساعه يالس اتلف و ادور..ع الاقل انا عشر دقايق..

هزاع: "يطالعها" تسلمين ساره.

حبت ساره اسمها يوم هزاع ينطقه اتحس ان اسمها وايد صار حـلو ..

ساره: العفـو ..تبا شي ثاني قبل لا اروح ترا الوالده تتريا تحت..

هزاع: لا خلاص اليوم اجازه مب كل الايام بشغلج فيها..

ساره: خلاص عيل فمان الله.."بالغلط" سلم ع بو هزاع.

هزاع"اتغيرت ملامح ويهه" الله يسلمج.


شلت ساره فتون ..ونزلت الدري المتحرك عرفت انها غلطت يوم قالت لـ هزاع سلم ع بو هزاع..بس هالمره عدت ع خير..

ام ساره: وينج تأخرتي..

ساره: جفت مديري هناك..مب عارف يشتري ..فساعدته.
فتون: ماما شفنا ريال كبير..

ام ساره:- بو هزاع مب تعبان شو يايبنه المركز..

ساره"تضحك" قصدها طويل مب كبير ها ولده هزاع..

ام ساره: ياالله انروح عيال اختج رقدوا..

كانت ساره تبا توصل البيت ابسرعه..عشان اتفكر ع راحتهـا ..وتسترجع كل الي صار اليوم مع هزاع في المركز..

كانت تتمنى اتعرف هالعقد و الساعه لمنو..يمكن لوحده يعرفها او لاخواته..بس هي الي تعرف مب معرس..

فكرت هزاع مب من النوع الي يركض ورا البنات ..لانه اصلا ما يعرف يغازل اعنده اسلوب ولسان دفش..

هاليوم كان واحد ثاني..اصلا اليوم اول مره يعاملها جي..
اتنهدت ساره و كانت تجلب فوق شبريتها..تتخيل انها وهزاع معرسين وفتون بنتهم ..

يلست تضحك جي بيكون منظرهـا هي تشتري حق البيت ولا هزاع يراكض ورا العيال من مكان لمكـان..

كانت تدري ان افكاره شبه مستحيله تتحقق..لان هزاع ماخذ عنها فكره انها تبا بو هزاع...و ثاني شي..هي وين وهزاع وين..

حاولت ترقد وتنسى هالافكـار لانها اتعرف.. اذا حطت هزاع فـ بالها وايد بتتعب لي ما تنساه..

كانت اتفكر اسلم طريقه .انها تبتعد عن كل ها انها اتقدم ع وظيفه ..بس وين واورقها ..كلها عند هزاع..

حتى شنطتها..ما اتعرف شو سوا فيهـا ...

اذا بغا يردها بتقوله ما اباهـا خلهـا لك..صارت موضتها جديمه..


بوقت ما كانت ساره اتفكر بهـزاع رقدت من غير ما اتحس..

و في اليوم الثاني...طلعت ساره من حجرتها ...جافت اليهـال محد ..يلست ادور عليهم..

ساره: نوفـا..

نوفا: نعم مدام.
ساره: وين امايه و اليهـال......؟؟

نوفـا: يطلع برع من تنين ساعه..

ساره: انزين ييبي لي كوب حليب..

سارت ساره حجرتها اطالع عمرها فـ المنظره..اتذكرت كلام هزاع يوم قالها..انها حلوه من غير مكياج..

اتنهدت ..ياليت ..ما عرفت هزاع ولا التقت فيه..كانت اتخاف انها اتخونها مشاعرهـا و يخونها قلبهـا..بس الظاهر ها الي صار..

كل احاسيسها اتميل لـ شي اسمه هـزاع..رغم كل المعامله الجافه الي جافته منه ..بس ها ما منعها انه صار جزء من حياتها..

بعد ما شربت حليبهـا ..طلعت برع الحجرعه ع صوت عيال اختها..وامها..

سارت يلست معاهم..و كانوا اليهال يسولفون لها عن طلعتهم لبيت عمهم..بس هي ما كانت معاهم موليه..


حست ساره ان يوم الجمعه كان يوم وايد طويل وممل ..عشان جي في اليوم الثاني الصبح..قامت من وقت ..اتغسلت .

كانت تتمكيج..بس قالت في خاطرها"هزاع يعيبه شكلي من غير مكياج.."

مسحت المكياج من ع ويهـا و طلعت ..وصلت الشركه..هالمره كان هزاع موجود ..استغربت ساره ..ان هزاع بعد هالمره ياي من وقت..

لاحظت ساره ان هزاع قام يعاملهـا غيـر عن قبل..كان يكلمها بهدوء ..ويضحك معاها و يسولف بس احيانا ينجلب عليهـا اذا طرت بو هزاع..

عرفت ان مهما تغير اسلوب هزاع معاها بس افكاره وحده ما بتتغير ..

مر ع ساره اسبوع كامل ما حست فيه لانها كانت مستانسه بالشغل..مع هـزاع..و حست ان هزاع نفس الشي..

و فـي يوم كانت ساره مشغوله ع الطباعه..فسمعت صوت بنوته..

البنيه:- هزاع موجود.

رفعت ساره راسهـا جافت جدامه وحده حلوه مب حلوه الا قمر ..مب عايبتنها خلقت ربها بعد تارسه ويها مكياج بس معطنها حلا و جمال..زياده.

البنيه:- اقولج هزاع موجود.

ساره: "واقفه" هـي موجوده بس عطيني اسمج عشان اخبره.

البنيه:-"اتحرك ايدها" مب لازم انا بروحي بدش له ابا افاجـاه..كانت ساره بترد عليها بس تحركت صوب باب هزاع ..وقبل لا تفتح الباب

التفت صوب ساره و قالت..:- تراني خطيبته."ودشت الحجره"

يلست ساره ابسرعه ع كرسيها قبل لا اطيح ..من الكلمات الي صدمتها..قالت في خاطرها "هزاع خاطب" ليش ما قال..

كانت شويه و بتصيح..عرفت ان هزاع كان يقص عليهـا ..كان يبين انه معجب ابـ ساره..اكيد عشان ينسيها بو هزاع..

بس هي ما اتحب بو هزاع..

كانت تتوقع انها بتتعب اذا حبت هزاع..عشان وايد اشياء بس عمرها ما اتخيلت انه بيطلــــــع خـــــاطب..كانت اتلاحظ الفرق بينها و بين هزاع وايد.

.لكن الحين وايد فرق بينها و بين خطيبته ..ابتسمت "تطنز ع عمرها" الحين هزاع بفكر فيني و بودر ها الحلوه.

سوت ساره نفسها مشغوله بالكتابه يوم انفتح باب مكتب هزاع..

رفعت راسها مغصوبه يوم سمعت هزاع يرمس.

هزاع:- انا طالع ..خبريني اذا حد سال عني...
ساره: "تهمس" انه شا الله..

هزاع: يالله إيمـــــان..

ايمان: "بدلع"مع السلامه..

بعد ما طلعوا ..ساره..درب اتسد ما اترد..و يلست ع كرسيها..

يعني اسمها ايمان..وين رايحين..و ليش طلع معها..هزاع عمره ما هد شغله الا اذا كان الوالد تعبان..

نزلت دموع من عيونهـا ..مصدومه من الي صار لها اليوم..يعني العقد و الساعه حق خطيبته ..ايمـانووووو

هاي شكلها وحده دلوعه ما تستاهل هزاع..بس بالاخير عرفت ساره انها مب من حقها ابد اتقرر عن هـزاع..

و خاصه ان هزاع ابد ما قال انه يحبهـا حق شو اتلومه كل اللـوم عليها الي عطت نفسها فرصه انها تجرب من هـزاع..

حاولت اتركز بشغلها بس ما قدرت تبا اتعرف هزاع وين سار مع ايمـان..

اضايجت ايوم اتصل بها هزاع و قال انه ما بيرجع الشركه..

واضايجت اكثر يوم ظنت ان هزاع هايم بايمـان و مستحيل يتركها دام انه صـارت
خطيبته..

يتبع >>>

الجزء الثامن..


و في البيت فكرت ساره ..اتغايض هزاع ..قالت في خاطرها" الحين انا يالسه من الصبح مضايجه عشانه و هو يالس مع ايمان.."

فكرت انها ادق لـ بوهزاع..و اكيد هزاع الي بيرد ع الموبايل ..و جي بضايج منها..

**
خلود"اتسكت عادل" حـصووووه تعالي خذي ولدج ذبحني صيـــــاح..

حصه"من داخل الحجره" اصبري يالسه ارمس بو عادل.

خلود: اوووووه ابسرعه وها ريلج خل يرجع من السفر عشان افتك منج و من ولدج الي 24 ساعه دموعه تنزل.

حصه"اتشل ولدها" الله اكبر عليج ..صلي ع النبي انزين..

دشـوا بو هزاع وهزاع.. بها اللحظه.
بو هزاع"يرمس خلود" اظن الفريــــج كلهم سمعوا صوتج.

خلود: معقوله و ما سمعوا صوت ها الحشره.

حصه: ابـــــــااه بتأكل ولدي هاي.
بو هزاع "يضحك" عيل باجر يوم هزاع بيأخذ بنت عمه و بيصير عنده جم ياهل شو بتسوين..؟؟

خلود: ويييين لي ما يعرس هزاع انا بروحي معرسه و عندي درزن عيال..

هزاع: منو قال اني بعرس..؟؟

حصه: لا بتعمر بيت ابـــــــووي.
هزاع: هي بعمر بيت ابوي .

بوهزاع: و ليش ما اتعرس اموقف نصيب البنيه.

هزاع"مضايج" انا ما خطبتها عشان اوقف نصيبها انا اصلا ما اباهـا ..

بو هزاع: البنيه تباك..و حليلها كل فتره اتنظف حجرتك و اترتبها ..شو تبا اكثر من جي دلع..حتى لو ما خطبتها الكل يدري ان ايمان لك و انت لـ ايمان.

خلود: انا بروحي ما ادانيها زين اتسوي و ما تاخذهـا
بو هزاع"يفتن ع خلود" بس انتي ام لســــــان.

هزاع: خلود الي فاهمتني.
حصه: عشان جي يبت لها طقم وساعه.

هزاع: تراني وعدتها اذا تخرجت من الدراسه بييب لها هديه.

خلود: فديتك اخويه..توني ادري ان ذوقك حلو..

رن موبايل بو هزاع..
بوهزاع: الــــــوو

ساره: شحالك بو هزاع.

بو هزاع: هلا و الله بنتي.شحالج يبه..
ساره: الحمدلله ربي يعافيك ترا الشركه ولهانه عليك وايـــــد..

بو هزاع"يضحك" و اصحاب الشركه ما ولهوا عليه..

عرف هزاع ان الوالد يرمس ساره..طلع من الصاله ..وسار حجرته محرج ..فتح علبة الزقاير و يلس يدووخ..

هزاع..الحين حق شو داقه له..عمرها ما دقت لي حتى يوم اتصل لها ما اترد..ما ادري شو اسوي بها ..

خاطري اجتلها..اتنهد يا ليت ارووووووم و الله هي الي جتلتني من يوم فتحت لي باب سيارتها..عند محل الفديو..ابتسم يوم تذكر الموقف ..

وبعدين شرات الساحره تطلع لي بكل مكان..لي ما انصدم انها السكرتيره ..الي ناوي يروغها من الشركه من كثر الوالد ما يرمس عنها..

طلعت هي سارونـــــــه ..وقف عند المنظره ياطالع ويهه..الناس اتقول اشبه ابوي نسخه منه..زين انا شباب و ابويه شيبه ليش اتحب ابوي..

بدال ما اتحبي كفختني بشنطتها زين ما شوهتني..
باجر بادبها بالشركه ..لانها اتصلت حق ابويي..

طلع مفتاح سيارته..وسار برع عند الكراج..وفتح السياره وطلع شنطت ساره بعد ما فتح السده..ما بغى يضمها في حجرتها لان ايمان دوم..تتعبث بحجرته اونها اتنظفها و اترتبهـا..

يلس يطالع الشنطه يحضنها و يبوسها..ضحك و قال جني مراهق مب جنه بعد جم سنه بصير في الثلاثين..

اخ لو اعرف هاي البنيه كيف تفكيرهـا ..كنت من زمان خليتها اتحبني ..و خذتها عن الشيبه..

**
و في اليوم الثاني.. يلست ساره ع مكتبها تعبانه لانها ما قدرت ترقد البارحه ..كان رقدهـا متقطع..عشان جي اضطرت اتحط مكياج..اتغطي التعب عن ويهـا

دش هزاع المكتب ..و من غير ما يطالعها..
هزاع: تعـالي.

وقفت ساره..يتها ضحكه اتعرف شو يبهـا ...اكيد عشان اتصالها البارحه لـ بو هزاع..

هزاع: "يطالعها" انا مب قايلنـج تقطعين علاقتج بـ الوالـد..

ساره:"اترد بـ ابرود" ما بينا علاقه عشان اقطعها..

هزاع: تستهبلــــــين...حق شو البارحه داقه للــــوالد شو تبين منه.

ساره: "ترفع كتفها" اتطمن ع صحته.
هزاع: وبـــــعد..

ساره: بس ولا شي..

هزاع"يجدم منها" الي في راسج ما بيصير.
ساره: قصدك الي في راسك انا ما افكر او اخطط لشي..

ساره اتعرف انها ترمس باسلوب يستفز هـزاع..قالت فـ خاطرها عشا تتأدب و ما تطلع مع الي اسمها ايمانووووو

هزاع: جم تبين و انا بعطيج المبلغ كـاش..و الحين.
ساره: كل الي اباه سلامت بو هزاع

شهقت يوم هزاع يرها من ذراعها في لحظت غضب..
ساره:"محرجه" انت شو اظن عمرك هدني..

وسحبت ذراعها من ايدها..ورجعت لوراا..

ساره"تكمل كلامها":- لا بو هزاع ولا بيزاته ولا انت اتهموني..كل الي اباه اشتغل و اعيش شرات باجي الناس ..وأعيل عايلتي..

وطلعت من مكتبه..منفعله و يلست ع الكرسي اتهدي عمرهـا..ويلست اتلوم نفسها هي سبب كل هـا لو طنشته من الاول ..هي اتعرف ان هزاع مستحيل يكون من نصيبهـا

دقايق وطلع هزاع من مكتبه ووقف جريب من مكتبهـا

هزاع: أبا منج خدمه.

ساره"من غير ما اطالعه" امــــر
هزاع: قولي و الله بو هزاع ما يهمج..؟

ساره"اطالعه محرجه" ترا دمك وايد ثجيـــــــل.

هزاع: ادري بس احلفي ان بو هزاع ما يهمج..

ساره: "متنرفزه" و الله العظيم لا بو هزاع ولا بيزاته اتهمني زيــن ارتحت.

هزاع"يبتسم" و انـــــــا..

ساره" اطالعه مستغربه" انت شو؟؟

هزاع: و انا شـو..؟

ساره: انت مديري اليديد الي مغلس علي في الشركه و برع الشركه..

هزاع"رد ورا":- ييبــــــي البريد..
ودش حجرته..

حطت ساره راسها ع المكتب ..تتنفس بصعوبه..بعد ما ركزت ع الموقف الي صار يلست تضحك بصوت عالي..

حاولت اتسكت عمرها و تنسى الموضوع..

دشت بالاوراق لـ هزاع.. و قبل لا تظهر..
هزاع: ابا منج شي.؟؟

ساره: شـو..

هزاع: اختي جريب اتعرس و ابا اشتري لها هديه شو ابرايج اخذ لها.

ساره: شرات الهديه الي قبلها.

هزاع: لا ما تناسب ..شورايج انا بعطيج بيزات ..و اباج تشترين لها كل شي..

ساره: كل شي ..مثل شو..

هزاع: يعني مثل ما تقولين ازهبهـا
ساره"مستغربه" اشمعنى انـــــــا,,,.؟

هزاع"يبتسم"تـرا المره الي طـافت وايد عيبهم العقد و الساعه..شو قلتي.

ساره"مستانس " خـلاص عيل ..بس انا ما اعرف المقاسات ..ولااعرف متى لازم اخلص.

هزاع:جوفي هي تقريبا مثلج جي نفس القياس ..و بالنسبه لموعد العرس بعد شهرين ..اظن عندج وقت كافي..

ساره: خلاص مب مشكله.

هزاع: هـا مب أي شي يصير من بينا اتهونين عن الشغله.
ساره"تبتسم":- صدقنـي ما اسويـها.

هزاع: خلاص عيل فـ نهايه الدوام بكتب لج شيك بعشرة الاف ..واذا ما كفت قولي لي...

ساره: ان شالله.

هزاع: يالله روحي جوفي شغلج..

هزاع بها الايام مشغول..يبا ايعرف شو شعور بو هزاع ناحية ساره بالضبط..بس كان محتار كيف الطريقه الي يسويها عشان يتأكد..

دش بو هزاع غرفة هزاع ..

بو هزاع :- يالله يبى ما تبى غدا ؟

هزاع :- لا يبى ما اشتهي .. بعدين بتغدى .

بو هزاع ( يلس حذال هزاع) الشركة ماشية أوكية .

هزاع ( مستغرب) هيه .. ليش؟؟

بو هزاع:-أجوف هالايام فكرك مشغول جن عندك مصيبة ..

هزاع :- بصراحة يبى ابا اقولك سالفة بس أخاف تتضايج .. وانا ما فيني على زعلك ..

بوهزاع:- أفا عليك يبى قول كل شي بخاطرك وما يردك الا السانك ..
هزاع :- ابصراحة (سارة ) داشة خاطري وابا اخطبها ..
سكت بوهزاع يفكر بكلام هزاع ..وهزاع يراقب ردة فعل ابوه ..
بو هزاع :- وبنت عمك ؟؟
هزاع (منفعل) أنا قلت ما اباها حتى لو ماخذت سارة ما بتزوج إيمان ..

بو هزاع :- الصراحة ما شي مقارنة بين سارة وإيمان واللي تباه سوه واتحمل زعل عمك ..

هزاع(مستانس) يعني انت ما تباها ..
بو هزاع يطالع هزاع مستغرب :- ابا منو؟؟!!

هزاع:- ليش انت مب ناوي تتزوج سارة ؟؟

بو هزاع يرفع ايده ناوي يضرب هزاع : سود الله ويهك هاي كبر اختك تبى اتزوجها لي ..

هزاع (يضحك) ويبوس راس ابوه ..فديتك يالغالي .

بو هزاع (واقف):- يالله قم اتغدى لأطير سارونة منك ..

هزاع (واقف) اتامر يالشيخ..بس طلب واحد.
بوهزاع: شو بعــــد لا يكون بتزوجني امها..

هزاع "يضحك":-..لا لا ..ما اريد حد يعرف السالفه..الحين.حتى ساره... نتريا شويه ..

بوهزاع: خلاص ع خير ..

**

بها الوقت كانت ساره ..مشغوله شو تشتري حق زهبت اخت هزاع..

كانت معظم اوقاتها اموزعه ما بين شغلها و بين الاسواق..

حتى عيال اختها ما قمت اطلعهم شرات قبل..

كانت ساره اتحس انها شغله متعبه و يديده عليها بس ابنفس الوقت كانت اتحس ابراحه لانها اتنسيهـا هزاع..


الا في فليل قبل لا ترقد..كانت تجلب بالفراش ..ساعات لي ما ترقد..تذكر لقاءاتها مع هزاع وضرابتهم ..

احيانا اتحس بشوق له ..واحيانا اتقول يا ليتني ما عرفته..

وخاصه بها الفتره صار انسان ثاني يعامله بكـل حب..بس ناقص يقولهـا احبج..

كانت ساره اتشك انه يلعب ع الحبلين..لانه خاطب..او احيانا اتقول انها تتوهم..لانها اتحبه..وتتوهم انه يحبهــا


بس كانت اتعرف ان المستقبل الجريب بيحدد كل شي او ينهي كل شي..

**
يتبع >>>

الجزء التاسع ..
.



و في المكتب كانت ساره مشغولـه في كتابة تلخيص لاجتماع الي صار قبل ساعه..سمعت هزاع يقولها بالسماعه..

هزاع: تعالي ابسرعه.

حست ساره ان نبرة صوته متغيره..قامت من مكانها ابسرعه و دشت مكتبه..

ساره: نعـم.

هزاع : "معصب"تعالي اقري هـا الملف..

ساره "اطالع الملف" ها الاتفاقيه الي سوينهـا في اجتماع الهلتون.محددين الميزانيه..

هزاع: "اوكى و عطاها ورقه ثانيه":- و هـا شو..؟؟

ساره: ها تسليم الميزانيه..الدفع..؟؟

هزاع: "محرج" شو الفرق الحين.
ساره: انا ما اعرف انت شو تقصد.

هزاع: ربع المبلغ محـــــد..صح.؟؟

ساره"رجعت اطالع الورقتين" هـي صح.

هزاع: ويـن.؟؟
ساره: شو ويــــــــن..؟؟

هزاع"من بين اسنانه" وين باجي المبلغ..
ساره"خايفه من افكار هزاع" اسـال موظف الحسابات انا شدراني..

هزاع: موظف الحسابات قال انتي الي موقعه..

ساره"شويه وبتصيح" انـــــت تتهمنــــي.

هزاع:- محد غيرج ما اثق فيه.

ساره: انا اشتغلت هني من ثلاث سنوات عمره بوهزاع ما اتهمني بشيء..

دار هزاع من ورا مكتبه..ودز ساره ع الكرسي ..فطاحت ع الكرسي خايفه اطالع هزاع بنظرات المظلومه.

هزاع: اول شي قلتلج لا تقارنيني بالوالد.. وبعدين انتي قبلها مديتي ايدج ع مفتاح البريد مالي..شو معناتها هـا.

ساره: "صاحت بعد ما سمعت كلام هزاع" انــــــا حتى البيزات ما جفتها.

هزاع"بصوت خفيف" ما اصدقج ساره..ع بالي انسانـه غير بس طلعتي حراميــــــه..مثل ما كنت اشك فيج.

ساره: "واقفه تمسح دموعها" تقدر اتسوي بالسالفه تحقيق.

هزاع" يصرخ عليها" مب ناقص انـا فضايح..روحي شلي اغراضج وطلعي برع ..

بدايه ما ييت كنت ادور لج زله عشان اروغج بس بعدين جفتج انسانه غير ..بس ضنوني في محلهـا

ساره: "رجعت اتصيح" و الله ما مديت ايدي ع شي حرام..

هزاع: "محرج" طلعي برع لاتصل بالشرطه..

ساره"تترجاه وتمسح الدموع من ع خدها" اللــــه يخليك لا تقطع رزقي..

حاول هزاع يتعاطف مع ساره ..غير رايه..
هزاع: اذا سامحتج الحين بتكررينها مره ثانيه..وثالثه و رابعه..

ساره"مب انــــــاl

هزاع:- حسافه تمنيتج اتكونين جريبه مني بس للاسف الله كشف نوايج قبل لا اتاخذ أي قرار.

ساره: "تجرب منه".هـزاع احلف لك مب انا ..من وين اصرف لعيال اختي ..

هزاع: "يصرخ عليها" بفلــــــوس حلال مب حرام يا السراقه ..ودزها بعيد عنه..

كانت ساره بطيح ع الارض بس مسكت عمرها..حست ان كرامتها طاحت بالارض ...خلاص انتهى كل شي ..انتهى شغلها ..وانتهى هزاع من حياتها ..ومن قلبها..

وقفت تمسح دموعها ..و جريب تطلع ..
هزاع: اصبري

استانست ساره لانها ظنت ان هزاع بغير رايـه ..بس هزاع فتح السده وطلع اوراقهـا ..وفرها بويهاا..

نزلت ساره اتشل اوراقها..

هزاع:- حسني اخلاقج بالوظيفه اليديده...وحلال عليج ربع المليون.

كانت ساره بترد عليه بس عرفت ان ماشي فايده من اقناعه..

شلت اورقها و شنطتها وطلعت من مكتبها من غير ما تلتفت لـورا..

**