|
صباااح - مساء الخير ... ( هذي سوالفي ) من اسبوعين تقريباً رحت العمره , وايد حسيت براحة نفسيه هناك والحمدلله لك يارب ... بخبركم سالفة حرمة مصريه عند الكعبه ... كانت الساعه حول 2 قبل الفجر ..يت حرمه مصرية عند الحريم اللي كانوا ويانا .. تبغي صدقة .. عطوها المقسوم... دارت ويلست عدالهم المصريه .. تسولف وتهل لعلوم على الحريم .. تنشدوها انتي من متى في مكه ؟ قالت :انااا جيييت 13 رمضان .. وهـ روجع مصر تاني 13 شوال السنة الجايه .... قالولها كيف ووين بتاكلين وبترقدين ؟ أشرت على الحرم وقالت ( على الناس الطيبين زييكم ) - يعني بتاخذ الحرم مسكن ومنام وشحاته .. * بخبركم سالفة ثانية ... رحت مع واحد من الشباب ناخذ عشا في الابراج .. المهم وهو واقف يطلب .. وقف عداله واحد يقوله ( الوجبه رقم 1 مع كولا لو سمحت ) استغرب اللي ويايه ورد يطالعه ويقوله نعم ؟ قاله اطلب لي الوجبه وادفع عني ... رد عليه ما تبا بعد مفتاح غرفة الفندق ؟ هههههههههههه بصدق ياليت الحكومة السعودية تعيد التفكير في اعطاء أخوانا من أفريقيا فيزا ما تزيد عن 10 أيام ويكون في مبلغ مالي ينحسب عليهم في حال تأخرهم عن السفر .. بكل اسف ريحة الحرم من داخل غاديه هب شي , وبعد في ناس منهم ماخذين مكان الطواف منام أو للتسديح والسوالف ... هذا من غير الضرابه على ماي زمزم ( واقول البعض منهم ) __________________________________________________ _____________________ ونحن رادين من السعودية ... ابطت الطيارة لين طارت ... اتريينا حول الساعة ونص ... كنت اسولف مع نفس الريال ( راعي الوجبه رقم 1 ) هههههه .. ضبطة في راسي فكرة نروح ميونخ لو اسبوع ... هي زيارة لواحد يتعالج فيها وهي سياحة ... وما ردنا شي والحمدلله سافرنا ميونخ ... ونحن رايحين ميونخ تذكرت اني ما بتقهوي الا يوم برد الامارات , لكن والفضل لله تقند راسي بفنيال عجيب في المستشفى .. ضبط صوعة يومين في ألمانيا .. حديقة المستشفى ... هذا اضني ربيع هتلر هههههههه يعجبني الكلاسك .. .... كتبت من ايام في خط الاهداء اني في مكان اسمه المريين , وهو سوق فيه كوفيات ومحلات ماركات وكوشكات ( من غير الجو ) على فكره انا ما شفت الشمس غير اول يوم ... وباجي الايام امطار ورذاذ وبرد صور المريين .. ____________ في شارع الماركات دخلت محل جورج أرماني .. لقيت عندهم عطر مب موجود غير في بولندا ومخلص عندهم .. العطر سعره 2500درهم .. والصراحة يسوى سعره .. طلبته ولكن ما ردوا عليه .. وبحاول اطلبه من النت .. العطر رجالي ونسائي ومافيه حيله |
* لو دريت انه النطه يبالها خمس دقايق لين الارض !!! جان نقزت بشورت من الكبسوله :10: Good ya felix :861: |
صمتي ذهب ... *أحب اتواصل مع الناس الكبار اللي تربطنا وياهم ذكريات أول عن ماضينا أو كيف كانت طفولتنا واحب العقول الناضجه المتفهمه ... *حالياً اقرا كتاب قصص شعبيه .. واتابع مسلسلات اجنبيه على النت مثل World Without End http://youtu.be/qorLG24xTc0 عن المسلسل : اعشق الكلاسك واشوف الماضي وحياتهم اول احلى ومفهومه اكثر , اكره القصص والافلام العلميه الخياليه واعتبرهن شي ( غير طبيعي وما يتقبله عقلي ) *المنتدى تغير وهالشي طبيعي , جيل اليوم توجه للفيس والتويتر والمواقع الاجتماعيه , لكن يبقى المنتدى هو صاحب الفضل الكبير والمرجع الاول في البحوثات , القصص , البرامج , التواصل المحدود والفائده من المواضيع العامه والاخباريه .. *شخصياً يمكن مقصر مع وايدين .. قل اجتهادي في الرد على مواضيعهم , اسموحه من الجميع ان شاءالله بيكون لي حضور اكثر في الفتره اليايه |
* هالاسبوع بيتم طرح مسابقتين في المنتدى .. الأولى : مسابقة أفضل روايه .. وطبعاً الجوائز من نك سوبر إلى نك مميز وزيادة عدد المشاركات والتقييم + وسام الماسبقة الثانيه : افضل صورة طبيعيه .. والجوايز نفسها .. والمسابقات تنظمها الادارة وبتصويت من الاعضاء .. وشخصياً هالمره بدعم المسابقات وبشرف عليها بنفسي .. ( اللي عنده افكار لمسابقات ثانيه او اقتراحات او فكره لهذي المسابقات ) ما علييه غير انه يتواصل معايه او يكتب موضوع في استراحة الشكاوي والاقتراحات .. |
شارك الاعضاء مواضيعهم , بتكون عضو فعال شارك الاعضاء مواضيعهم , بتلقى من يبحث عن مشاركاتك شارك الاعضاء مواضيعهم , بترتقي بفكرك وثقافتك بقراءة مختلف المواضيع |
| الساعة الآن 06:20 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir