|
الجزء الـ 17 ( مانع بيلسته .. رد يتذكر ذكريات الطفولـة ويا هنّـود؛ لكن يرد له هم هزاع أخوه و عيسى خويـه .. و على ذا الحال لين ما غفى في مكانـه؛ وما وعى إلا لدوامـه .. في مكتبـه .. كان مغفـي و تـوه داشنـه ) مانع: السلام عليكم .. (كلهم ردوا السلام ..) عبيد ونظرته كله توتر : مانع ! .. ( همس له ) الشيخ فمكتبك .. (بجج مانع عيونه منصدم ..) مانع: إشووووه؟ متى رد من السفر ؟ عبيد : أخبرك مَب وقته .. من ساعة ونص وهو يترياك .. مانع: انزين انزين .. (ودش وألقى التحية ..) الشيخ : اتفضل ايلس .. مانع: ان شاء الله سيدي .. الشيخ : مانع ؟ هالتيلفون مول مافيه شي !! (وكان ماسك التيلفون اليديد اللي حطاه مانع على مكتبه ..) وانا عندي خبر انه في دليل .. مانع حاول بقد ما يقدر يخفي ارتباكه: سيدي . . انا بعد اتوقعت جذيه .. بس مافي أي دليل يديد .. حتى عن الملازم عيسى .. دوّرنا عليه ما خلينا مكان .. الشيخ : بس انا واصلني شي ثاني .. مانع: خير سيدي ؟ الشيخ : همممم ماعليه ماعليه .. بس انته متأكد؟ مانع: طبعا سيدي .. الشيخ : عيل ليش خشاه ورا التكية؟ مانع: علمي علمك سيدي .. الشيخ : شوف يا مانع بنزل رتبتك لرتبة ملازم وان حصلت الدليل الوافي بترد مكانك .. مانع: بس ياسيدي .. (وسكت وهو متغصص ..) الشيخ : ولحد الحين تغلق القضية لين اتحصل الدليل..وان حصلته بترد لرتبة ضابط ..وبييك خلاف واحد وبيعطيك شي عطه لأهل عايلة عيسى .. (وروح الشيخ ومانع ضرب بإيده عالطاولة من القهر .. ) مانع فخاطره : انته يا هزاع تنزل رتبتي بسواياك، سوّد الله ويهـك .. آآآخ يالقهر !! ( تم يفكـر بحل ) فخاطره : أنا ليش ماعتـرف .. بس، وين بودي ويههي من العرب، هلي بينفضحون .. و كل الناس بيتكلمون عنا .. وينك يا عواس؛ فقدت الأمل فيـك .. كيف بجابل اختـك يوم باخذهـا .. والله ما بعرف أرقد الليل؛ سامحني ياخويـه .. ( ورد اشتط بقهر من أخوه ) كله من هزاعـوه الجلب !!! ( ظهر مانع وسـار عن العقيـد ) العقيد : مانع بننقل اغراضك برع ويا ربعك يعني مشترك .. (مانع احمر ويهه) مانع: ان شاء الله سيدي .. العقيد : والله مب بإيدي ..الامر ياي من فوق .. مانع: ولا يهمك سيدي .. بس ياي اخذ امر بنداهم مكان .. سمعت من مصدر موثوق انه كمية مخدرات موجودة فهالمنطقة ............. (وتم القبض على هندي ما يخصه في السالفة كانوا طالبين منه المروجين انه يحرس المكان .. لأنه كان داخل المكان أجهزة كمبيوتر للبيع .. بس المافاجأة كما توقعوا كمية كبيرة من المخدرات .. خلاف ياه واحد عطاه شيك بمبلغ 150000 وسيارة .. لأنه الشيخ كان داري انه عايلة عيسى فقراء ما عندهم شي لدرجة ما عندهم موتر ... وودا مانع الموتر والفلوس عند اليدة ميثاء .. ) مانع: احم احم هووود هووود !! (وكان بالدريس) اليد حمد: هدا اقرب اقرب ...(وماكان حد وياهم ..غير ميثاء..سلم عليهم ويلس ..) مانع: انا عندي امانة لكم بس اباكم توصلونها لأميه ام عيسى .. ميثاء : خير ان شاء الله؟ اليد حمد : شو تقول؟ ميثاء: خلاف خلاف ..اول شي خله يتقهوي وانا بقولك..(وهي اتقهويه) مانع: اميه الشيخ آمر انه اعطي اهل عيسى هالشيك والموتر برع لكزس ستيشن .. وانا الصراحة مارمت اوديها عندهم البيت ..بسبب عمي فاضل .. ترومين تعطين خالوه غريبة والامانة فإيدج .. ميثاء: وييييه !! الله يطول فعمره ان شاء الله (ويلست ميثاء تدعي للشيخ .. و روح مانع وتتصل بغريبة .. ويتها ..ودشوا الميلس يتكلمون هي وميثاء وحمد ..عن البنات ايين ويسمعن..) اميه غرووبة ..هذي يقولج شيك حقج وحق عيالج من الشيخ .. عطية ..ومانع مارام ايي بيتكم من اللي شافه من لحافة فضووول اللحف اللي هب شايف خير ..ويابهن عندنا عسب نعطيج .. غريبة وعينها تدمع : يالله يامايا !! وااايد .. هذا كله حقنا؟ اميه حلفي انه هب منج !! ميثاء تضحك: مينونة اعطيكم هالمبلغ؟ ادريبه فضول بيلهطه عنج .. غريبة: الحمدلله والشكر ..الله يطول فعمره هالشيخ ..ويزيده ان شاء الله حمد: ميثوه بسج هذربان !! انا بكمل عنج ..وعاطنكم موتر بعد ..برع في الحوي .. (وغريبة مبججة عيونها ..) غريبة: ابويه !! لا تصدمني ما فية اعج اللي فبطني من الفرحة !!! ميثاء: غربلج الله وانا اقول من وين هندوه يايبة الخبال !! غريبة تضحك: صدق هالموتر حقنا؟ حمد: هيييه حقكم (ويحبها حمد على راسها ) بس عادة قولي حق مسوّد الويه ريلج اني انا عاطنكم ولا وهذي حلفتي لا ياخذها ولا بيردها عليكم .. خلي ميود يسوقها بعد هو أهوّن عن ابوه .. غريبة اتحبه على راسه : من عيوني يا بو غريبة هههههههههه احينه بتغار شموس (ام شمايل ) ( وقتها كانت مي يالسـة في غرفتهـا تلعب في تيلفون امها و تتطالع سجل الهاتف، مكالماتهـا الواردة و الصادرة.. و ماتوقعت كيف إنها يوم بتقرى رمـزه على شاشتهـا .. بتتأثر هالكثـر ) مي تقرا اسمـه: عوّاس .. ( غررت العيون، تحجهن ما تبغي تضعف ) أنـا أروح و إنته تبقى؛ فدوة تسـوى هلي كلهـم .. ( تمثل بأنه مُب هامنها ما كانت مستوعبـة السالفة بكبرهـا والحينـه بمرور هالأيـام ولا حد يعرف عنـه شي .. بدت تفتقده خصـة إنه محد غيره في هالعايلة من اخوانهـا مهتـم لها .. فرت مي تيلفونهـا؛ و إنخشت في فراشهـا و تمت تصيح وهي تتذكر سيراتهـا و رداتهـا و مواقفهـا ويـاه .. دخل مايـد عليهـا دون لا يدق الباب بلا هود ولا هـدا .. ) مايد : ميّـوه؛ نشـي ! مي من تحت لحافهـا، تعدل من نبرتها : وِجع ياخذك؛ عمى ما تعرف تدق الباب ! مايد : نشي أباج .. مي : شتريـد منـي من متى أباك وإلا تبغينـي في شي؛ لا بأنا اخوان ولا بأنا ربع ولا حتى معرفة؛ من عرفتكم و كلنا عداوة .. ( انكسر صوتهـا) إلا عواس .. ( بغت تكمل لكنها تمت تصيح هالمرة .. من خاطرهـا ) مايد مع إنها غمضتـه و ذكر أخوه رد : أخيـج هاي منو فج حنفيتهـا !!! ( ظهر من حيرتهـا و رض بالباب ما همتّه في النهايـة هي بنت العراقيـة .. لبسهـا ورد جدى كمبيوتـره وجابله .. نرد لعربانـا .. ) ميثاء: اميه هاي نعمة لكم .. بس اتحملي اتزلين واتقولين حق فضول!! غريبة: لالا افا عليج !! ميثاء: سيري بشريهم بهدية حمد هههههههه حمد: ما اسمع شو؟ ميثاء : خير خير .. (وغريبة يوم توها قايمة اييها اتصال من برع ..) غريبة : الو؟ الو؟ منو؟ لا يابويه ماعرفك .. (وزاغت) خير؟ (وتبتسم) الله يبشرك بالجنة ان شاء الله (وبندت عنه وبعد ربع ساعة انها تخبرهم بالخبر بانـه يتـم السيـارة من يدهـم حمد هديـه بس ماخبرتهم عن الفلوس .. بس خبرت هنود على ينب وقالت لها بعـد شي خلاها تفرح و ما سكتت إلا بعد ألف حلفة .. و ردت غريبة ترمس مايد عن الموتـر بأنـه هو بيقبضـه) مايد بفرحتـه : هالموتر حقي؟ غريبة: هيييه حقك عاد يوم نبا شي لا تقصر ! مايد يطالع ميـوّه اللي ظهرت من حجرتها على اليولـة .. كانت هاديـة .. قام وجان يدح مي: افا عليج !!! مي ردت بشرهـا وتسبه : كلب !! ( ردت حياتهـم لشبه طبيعيـة، عدى عن إختفـاء عيسـى .. غاب مانـع عن حياتهـم، إنـزوى لحالـه يصارع شي من تأنيب ضميـره؛ و أجبر أخـوه هزاع بأنـه يدخل مصـح عسب يتعالج من هالسمـوم اللي في جسمـه .. محد يدريبـه حتى أمـه لنه كان مغطي موضـوعه عدل، وخلال فتـرة الثلاث شهـور اللي طافن مـر عليـه .. ومن يوم الحادثـة تغيّـر اسلوبـه .. تغيّرت شخصيتـه مع أخـوه وجنّـه ما اييـه شي .. ) مانع : محتـاي لشي ؟ هزاع منزل راسـه: لا مشكـور .. مانع بفتين: ارفـع راسـك ! هزاع صد مَب رايـم يجابل أخـوه : مانع .. مانع : أقول لك ارفـع راسـك ! ( رد هزاع يتطالع أخوه .. وقف له مانـع .. ) مانع من طرف عينـه: أحيـدك تدانـي السـوالف المصخرة ( قالها له جنّه يعايـره ) لكن تعـرف شو أسخف سالفـة .. و أكبر مصخـرة عرفتهـا في حياتـيـه ؟! ( رد وهو ما يتريـا منه يـواب) إنتـه ! ( كان هزاع ينظر مانع .. حاس بأنـه يختنق .. بدى يستـوعب سوايـاه .. رد نزل راسـه وصد بويهه الصوب الثاني ) مانع رد؛ هداد : ارفع راسـك، لويش تنزله .. ارفعه شرا ما رفعت راسي .. ارفع راسـك لنك أدمنت .. ارفعه ضيعت شباب أعز ربعي .. اخويـه !!! ضيعت شبابه و ضيعـته .. ارفع راسـك فضحت هله و ضيعتهـم لويش تنزلـه .. ارفع راسـك .. ارفع راسـك رفعت راسي !!! هزاع رفعه ما رام ياخذ منه زود : مانع يسدنيـه بس دخيلك ! صفعه مانع و قال : أي شي بيظهر مني عمره ما بيكون كافي ! ( و ظهر عنه ..) ( خلال هالثلاث شهـور؛ وصلت غريبـة بحملهـا الشهر السادس .. بدت أمور عايلتها تستقـر نسبيًـا .. على غير العـادة بدت تصرفات الأبو تظهر مب طبيعيـة .. هادي و ودّر العصبيـة .. وفي يوم في بيـت ميثانـة ..) حمد: هنود يوزي عني !! هنود تلعب بصلعة يدها : ابويه؟ ليش هالجهة في شعر والثانية لا؟ نشبة : وراثة اللهم عافنا !! (وهنود تضحك) هنود: انزين ابويه !! اشعنه ما اتطوّل شعرك شرا هذيلا اللي ايويلون؟ حمد: هيييييهأأأ .. وين نروم انقلد الشباب هذيلا قوم بالكشيش !! هنود تضحك : ابويه خلني اصبغ لك شعرك .. والله بتطلع ازجرت !! حمد: هندوه !! يوزي ولا العصا فايدي !! (وهي ميتة من الضحك ..) هنود: انزين ..شو رايك اتراويني ترجيييييبتك؟ حمد على طول ضحك : هااااه يوّدي !! (وعج الترجيبة على ايد هنود) نشبة لايعة جبدها : وييييدييــــــــــــــــيه!! عفانا الله في التراب في التراب (وتوّدي الترجيبة صوب نشبة) اعععععععع !! بعيد بعيد !! فــــــــضّل !!! حمد: اييييييه البقرة!! يوم ريلج متوفي !! منو بيلبس ترجيبة فهالسن غيري ؟ نشبة : الله يغفر لك ويرحمك ..الله يغفر لك ويرحمك يا سعيد!! حمد: شو تقولين؟ نشبة تزاعج: ماقول شي .. هنود: شو تقولين؟ ماسمعج يانشيبة!! نشبة : جاب .. هنود: واذا هذربت؟ (ونشت نشبة اتحبي صوب اخوها) نشبة: مسوّدة الويه .. حمد: هذي هذي !! هب انا !! (وايأشر على هنود) نشبة : ادري ادري اتحراني عمياء وصمخة؟ (وشلت عصا حمد بتضرب هنود) هنود : لا خلاص التوبة !! حمد: المدحوبة يوزي.. مب كفاية جاتلة ريلج وبتجتلينها؟ نشبة : ويدي !! بسم الله علية !! بلاك كلتني بقشوري؟ حمد: هاااه عيل؟ جيه مسمين فريجنا فريج الارامل .. نشبة : حشا محد مسمنه !! حمد يتفلسف : بتخبرج انتي جاتلة واحد وشميم 3 الله أكبر عليها ....... (ويلس يعد لها يرانهم) نشبة : بس بس بس اعنبوا !!! حمد: فطيم؟ اميه بلاج موّيمة؟ فطيم: هاااه؟ لا ماشي .. نشبة : من يومين خاطبينها عرب ..وردتهم حمد: ليش فديتج؟ (وهنود قامت ولابهمه من كلام نشبة لأنها اتأثرت وايد بكلام فطيم يوم كانت اتذم عيسى) هنود: يالله ابويه عطني مفتاح موترك .. نشبة : وين بتسرحين؟ بيزخونج الشرطة !! حمد: وين تبين؟ هنود: بوّديك المسيد أحصّل اجر بدال هالرغيد ميود !! حمد: صدق ولا اتمصخرين؟ هنود: صدق والله .. (وكانت مسؤوليتها انها توّدي يدها على كل فرض.. كانت اتسوق بدون ليسن ..معلمنها عواس من هي عمرها 15 سنة .. وبعد اتوّدي يدها الصلاة كل فرض .. يعني على شطانتها اتكفر حليلها خخخ .. اما عند هناء وشمايل ..) شمايل : هنووه؟ شكلي بغّير تيلفوني ..(وكانت هنوه عالنت) هناء بمكر : ليش عاد؟ شمايل: والله أذّوني !!وايد ارقام غريبة تيني مادري شو السالفة .. هناء: مادري والله شمايل اترد : هلا هنود .. أوووه !! اوكي اوكي أي لون أصفر؟ ههههههههه أسميج فنتكة 10 دقايق وبنزل جهزي الدري .. هاااه؟ لا حبيبتي قدها وقدود !! (وروحت حجرتها وجلبت المكان كله وما حصلت ..سارت حجرة امها ..) ام شمايل : شو اتدورين امايا؟ شمايل : اميه؟ سروالج الاصفر هذاكي بو كريستال وينه؟ ام شمايل : يامنكرج شعنه؟ شمايل : بنعيد التراث انا وهنود .. وابا بعد هذيجي الجلابية الخضراء القصيرة لين الركبة !! ام شمايل : امايا هذا لباس هل عمان في المكسار قلنا بنلبسج شمايل: ما عليه بلبسه .. (وسارت وتعنتلت ولبسته وعقصت شعرها اللي لين ظهرها بس عقصته على ينب ...وحطت وردة صفراء على ينب ..ولفت شيلتها الصفرء ..وتتصل بهنود .. وكانت واقفة شمايل عند يدار بيتهم) هنود: انا هنيه فبيت اميه ميثاء .. (كانن بيوتهم كلها حذال بعض اول بيت فاضل وحذاله حمد وقوم شمايل وبعدين نشبة وشما ..) تسمعيني؟ حوّل !! شمايل : حوّلوج لإبليس .. أركب؟ هنود: هيه اركبي ..تراني يبت الدري الثاني .. (وواحد داخل بيت حمد ويطالع البنات من بعيد وماسك عمره من الضحك ..وشمايل ركبت ويلست عاليدار ) شمايل : هاااه شو رايج؟ نايس؟ ولا مو نايس؟ هنود اتهز راسها شرات الهنود : فيري نايس!! نشبة : حسبي الله عليكن!!! انزلي!! انزلي بتكسرين !! ميثوه !! ميثوه الحقي !! (وتدش داخل ) شمايل تضحك : عدلي لي الدري عن أطيح .. هنود : ولا يهمج ..(ونزلت ) يالله مغواتج يالسيلانية (اولما طلعن في الحوي العيايز.. وميثاء يايبة خيزرانة ) ميثاء : منو هذي اللي راكبة عالدري؟ (وقفن العيايز بهتّن في البنات) شما: اندوج انتي !! سيلانيات ماباجي غير يحطن بانيان .. شمايل : بركاتك يا أبله (ونشبة مارامت جان تضحك .. بس مايدرون انه الهم ياينهم) نشبة : لاحول ولا قوة الا بالله ...ياربي انتي ما توبي ؟ هنود اتأشر على عمرها: انا توبي؟ شو توبي؟ (وتضحك على نشبة ) نشبة : اثنيناتج !! هنود: درر درر ما شاء الله ..صيييييييييييييو طاخ !! شمايل : يالله شو نقع؟ هنود : المدافع نقعن !! شمايل : بس بعده شهر رمضان !! هنود : اتصدقين يا شوشو مع اني ما احب يوم شي ينقع لأنه السالفة يوم فيها نقيع الجيوب الانفية عندي ملتهبة (ويضحكن) نشبة : مسوّدة الويه انا اناقع؟ ميثوه هاتي العصا (ودشن العيايز داخل .. وتمن هن برع واللي يطالعهن طلع وكان ميود ..اما البنات سارن بيت فاضل .. وهن مارات) شمايل : ياختيه احس قلبي ناغزني هنود : من شو؟ شمايل: من مريت صوب الكمبيوتر .. هنود: يمكن كهربة اتشوطتي اتشوطتي !! شمايل : عادي ايلس عالكمبيوتر؟ هنود: فديتج يلسي .. انا بسير اطالع اميه وبيي.. (ويلست اتصفح وتحس قلبها يدق بطريقة غريبة كانت زايغة من شو ما اتعرف...جان اتشوف المسن مال ميود والفضول طبعا لعب دوره وفجته لأنه الباسوورد مسايف وكل شي ..شافت لسته طويلة عريضة ..وسيده اتبطلت نافذة صغيرة كاتبتله " انا زعلانة منك " جان اتسير اتبند) شمايل: هاي خصوصيات لازم ما افتش !! (بس رد الشيطان يوّزها .. ودشت عالجات لوج ماله .. وماكان ايرمس حد غير 3 .. 2 منهم شباب ووحدة ..) الا اطالع..( ويوم فجت...احمر ويهها ..) لالالالا ملعونة الصير !! الجلبة !! والله لأراويها !!! Cut ~ |
تسلمين فديت خشمج ع الطرح ياله ارقب البآقي |
(الجزء 18) (محادثة ميود وهنوه في الماسنجر :) • مايد :إيييييييييييه !! • هناء : الناس يسلمون .. • مايد : هههه اتعرفين السلام بعد؟ ماحيد!! • هناء : اعرفه وأروم أعلمك جان ما تعرفه .. • مايد : إييييييه جلبتي علومج؟ • هناء : محد جلب غيرك يالهيس !! • مايد : قصدج محد جلب غير اختج .. • هناء : خخخخ تستاهل .. • مايد: الا تستاهل وأزيد ام الرياييل .. • هناء : مايد عاد .. كله ترمس عنها اخافك الا تحبها ... • مايد : وعععععع ماعندي ذوق !! شو تبيني اجذب يعني؟ شو رايج اسوي فيها حركة نذالة؟ • هناء : لا لا ايييييه عن الخبال .. • مايد : انزين بنتأكد مرة ثانية .. كم من مرة ظهرت ويا شباب؟ • هناء : شدراني انا ماظهر وياها .. • مايد : جاوبي ولا ببند وانتي ادرى والله لأقطعها بطاقتي !! • هناء : لا خلاص بس 4 مرات .. • مايد : وكم واحد اتكلم ؟ • هناء : وايد .. ما ينعدون بس الليسته اتزيد ... • مايد : اسميج جذابة • هناء : والله العظيم ..يعل راس شملوه القص لو اجذب عليك .. • مايد : خخخخ اتحلفين براسها من غلاتها؟ • هناء : هذي اختيه !! • مايد : انزين يالاخت لحظة .. (وتم اوفلاين وبعد نص ساعة دخل ورد) باج باج .. (قصده باك باك) • هناء : هلا ولجم ولجم (ولكم ولكم) وين سرت عني؟ • مايد : سرت اتصل بربيعي .. • هناء : هذا وقته؟ • مايد : عيل اتم طول الوقت مجابلنج يالجلبة؟ • هناء : شو تبا منه؟ • مايد : بس ابتداءً من اليوم والساعة 12 بالتحديد بتي ارقام غريبة عند الاخت شمايل .. • هناء: ميود ويهّد!! نشرت رقمها ؟ • مايد : لالالالا بس عشان أأدبها ..نشرت رقمها في الجات عالعام .. وعند ربعي طرشت لهم مسجات انه هالبنية اتجنن.. • هناء: هههههههههههههه أجديت فيها أم الرياييل .. • مايد: غريبة ليش ما حن قلبج عليها.. • هناء: ليش يحن على وحدة مفضحة عمرها؟ • مايد : وبعد خذت هالشي عذر عشان اراوي اهلج ويزخونها وبينتهي كل شي .. • هناء : وانا؟ • مايد: انتي شوه؟ تبين عرس؟ • هناء : لا طبعا فديتك ..اللي بيننا بس friendship لاأزيد !! • مايد : قصدج حب بس من صوبج • هناء : يمكن خلط بين ال friendship وال love بس زواج لا !! • مايد : عاد منو قال اني اباج وميت فيج .. بس موّنستني !! • شمايل ماسكة راسها : يالله داير راسي ..لا إله الا الله ..إشوووه هذا اللي مستوي؟ حسبي الله عليهم .. حسبي الله عليهم ..وين أضرب براسي ...وين؟ (قامت واتلثمت وهي تصيح ويوم توها بتظهر من البيت تدعم فاضل ..) • فاضل : اميه بلاج؟ • شمايل : هلا ابويه لا مافية شي .. • فاضل : انتي هنوه ولا فطوم ولا شمايل؟ • شمايل : انا شمايل • فاضل : بلاج تصيحين اتضاربتي ويا حد من البنيات؟ • شمايل : لا يابويه بس .. بس.. طايحة وريولي ايعورنيييه يالله فمان الله (وتربع البيت..وسارت حجرة هنوه شرات المينونة ..وتتصل بها بس يرن عندها في الحجرة .. خلاف تتصل على رقم نشبة واترد هناء ..) هنوه وين انتي؟ • هناء: انا فبيت اميه ميثوه بتغدا عندهم !! بلاج؟ • شمايل: ليش يوم اتصل ما تردين؟ • هناء: ناسية موبايلي .. بلاج شوشو ؟ • شمايل : مابلاني شي يالله باي (وبندت .. ويلست عالنت وشافت الجات لوج مال هنوه ) نفس الشي تف عليها الخسيسة !! جلبة !! (وتصيح) اشعنه اتفضحوني انا شو سويت؟ (واتدور على رقم ميود اللي عمره ما طاح فتيلفونها وحصلته موجود..وطرشت له مسج وهي مغيضة " تعال ابا اشوفك فمساحة البنات " قصدها المكان اللي دوم ييلسون هناك ويلعبون ) وبنشوف يا انا يا انته !! (وطرش لها " بلاج" وطرشت له " بكلمك ضروري ..اترياك هناك "وقبضت الباب وطلعت يعني كالعادة الام اتحراها سايرة عند يدتها ولا البنات ..بس هي سارت مساحة البنات ويلست في الحفرة اللي دوم يحفرونها وهي تصيح) • مايد: هنوه بلاج؟ • شمايل عينها تخونها وتصيح وتصد صوبه : ياويل قلب سلب عقلي من داره .. (كانت متحجبة وماخذة النص من الشيلة على ويهها .. وهو منصدم لأنه هاي هب هنوه) • مايد يتمصخر عليها : هاااه انتي؟ شووه؟ اشوفج تقصدين ؟ خخخخ • شمايل فقدت اعصابها : انته شو من الاوادم ؟ انا ميتة فيك وانته مب حاس؟ • مايد: هههههه من متى يا حظي؟ • شمايل : من يوم كنا يهال !! وكبر قلبي على شوفتك كل يوم من حياتي .. • مايد : ياحظي المجرود ..احينه انتي من جمالج؟ خجاجة ببيزاتج بس!!! ورياييلج بعد.. • شمايل : انا جذيه؟ الله يسامحك ..بس بذكرك بشي !!! (والغصة تاكلها ..) • مايد: خلصي دهديييه ورايه شغل اهم منج !! • شمايل : طبعا !! الغدر والطعن في السمعة من اسلوبك .. (وبعصبية) ليش توزع رقمي؟؟ وانا احينه اكلم شباب؟ من متى؟ (وتدفره على صدره من الغياظ .. وهو مسكها ) شو من عيال العم انته؟؟ • مايد ولا مهتم : ماماتي !! اهلي غاصبيني عليج ولا انا ما اطالع هالاشكال السخيفة !! الله ياخذ هالشكل ان شاء الله !! (وهداها) (وشمايل من رهافة قلبها ...كأنه حد طعنها ) • شمايل : يال !!! (توها بتسبه) ما تستاهل اني اسبك ..بس ربي يسامحك لأنه عمري ما بسامحك .. • مايد : جهنم كلتج يا بنت الجلب !! (اتغشت وتمشي سايرة بيتهم ..كل خطوة تخطيها ..اتمنى فأي لحظة تبلعها الارض ..) • شمايل فخاطرها : والله اني حبيتك يا ميود ..قسمت برب الخالق اني عشقتك ..شوف قلبن حبك ووطيته.. شووو؟؟ اتخبلت؟ قمت افر بيت من القصيد كل ما اتذكر ميود؟؟ (وبعصبية) وهذي الخاينة !!! اقرب الناس لي !! جذيه تسوي!!! تدري اني احبه واموت على طوايف طوايفه .. وانتهى البارت بدون الكات خخخخ وانتظروا البارت اليديد مع سفرجل كيف بتكون ردة الاهل اذا دروا وشو بيكون تصرفها مع اختها الخاينة ... |
(الجزء 19) (ووقفت قريب من بيتهم واتساندت ..) • شمايل: هاي الحركة مسواية .. حركة نذالة بس عسب أبتعد عنه .. غدت قصتي شرات نواري وصالح ..بس بعدني حاطة امل انه يحبني .. والله قابضتني غبنة .. هم مستانسين وانا هموم الدنيا على راسي ..يعني لو خذته؟ بيرقدني عالارض؟ وبيعاملني شرات نواري؟ بس هذاكي اكتشف انه يحبها .. بس انا مش متينة ليش ما يدانين؟ ..الكل رايدني وانا رايدة هالمايد !! يالغبية !! منو بيسمعج؟ هو؟ كيف؟ دامنه فصف الخاينة الجلبة !! (ودشت البيت هادية كعادتها .. مارمست حد ..يلست في الصالة تفرفر فهالتلفزيون وتذكر كلامه وعيونها يغرغرن .. مي تتصل بها بس شمايل ما ترد .. لين يتها البيت هي وهنود .. فرت مي عباتها ..) • مي: جيه ما تردين ولا ما تنزلين ياعيوني؟ (قامت شمايل ومسحت دموعها ..) • شمايل : هاااه؟ مادري .. • مي : كنتي اتصيحين؟ • هنود : منو مزعل غرشوبة ليوا؟ • شمايل : لا ابدا .. (هنود ومي يطالعون بعض ) • هنود ومي: ميود!! • شمايل : لالالالا • مي: منو ماخذ قلبج غيره هاااه؟ ذالة عمرج عليه ياعيوني والله ما يستاهل !! • هنود: امبونه جلب !! • شمايل معصبة : يوم انتوا تدرون انه جلب وما يستاهل ..شعنه تبونه ياخذني هاااه؟ • مي: والله محد غصبج قولي لا وخلاص .. • شمايل وبكل جرأة : المحيّرة ما تقول لا لأهلها ولا شو رايج انتي يا هنود؟ • هنود: مي مب قصدها !! ميوووه جاب يالله !! • مي : لا قصدي ونص يوم ما تبينه قولي لا وفكينا من الصدعة !! • شمايل : واقفة في صفه طبعا اخوج .. بس لو تدرين شو سوا .. • مي : اوهووووه !! انا بسير فوق عند هنوه ولا الرمسة الفاضية ... (وعلى فكرة ترا هنوه وشمايل امهم اخت غريبة وابوهم اخو فاضل بس متوفي من سنين..) • هنود: شو استوا يا طبجتي؟ • شمايل : يالله يا هنود ..ليش اخوج ما يدانيني؟ • هنود : مب سالفة ما يدانيج ..بس انتوا محيّرين .. لو ما كنتوا محيرين جان روحه ياء وخطبج .. • شمايل : كله نفس الشي شو الفرق؟ انا ما لحقته بس من يوم نحن صغار وانا احبه واموت فيه ... • هنود: انزين خبريني شو صار؟ • شمايل: هنوه اختيه اتكلم ميود .. • هنود: شو اتقول؟ • شمايل: شو شو اتقول؟؟ اقولج اتكلمه ..يعني حبيب وحبيبة !! فهمتي !! (هنود انصدمت ) • هنود : اتخبلتي؟ • شمايل: احينه انا اللي اتخبلت ولا هي؟ انا اللي فعمري ماعرفت رقمه ..ويوم اشوفه يبدا العيد عندي .. واختيه تباه؟ من غير هي تفضحني وهو بعد؟ ليش ينشر رقمي ؟ انا شو سويت؟ لا وبعد هي اتجرجه شو من الخوات هذي هذي مريضة نفسية (واتصيح بهستيرية ..) • هنود: انتي الغلطانة .. • شمايل : لا هب غلطانة ..قاللي انه هو مغصوب ..تبيني اخذ واحد ما يباني؟ • هنود : لا حول ولا قوة الا بالله .. اشوف فيك يوم يا ميود ...الله بيراويك يالجلب !! (بس كانت هنود تدري بلسان ميود وتدري انه ما يباها .. وكانت ام شمايل تسمع ومتغايظة .. لبست عباتها من الغيظ وطلعت من الباب البراعي .. اما عند مي وهناء ..) • مي: عادي ادش؟ • هناء: هاااي مايو ..علومج دارلينج؟ • مي: فاين والله ..بلاها اختج عاجة الجيزري على اخويه؟ (وهنوه ماتدري شو السالفة) • هناء: جيه ؟ بلاها؟ مادريبها طفرة ياختيه هالبنية !! • مي: ليتج تاخذين ميود بدالها !! • هناء: صدق والله؟ • مي بمكر: ما صدقتي الله أكبر عليج ثرج الا تبينه؟ وينك يا ميود اتشوف المعجبات .. (وعلى طول شمسة ام شمايل اتطير بيت قوم فاضل من غير كانت علاقتها بأبوها وامها متوترة ماكانت اتزورهم ومنو مبطل الباب ) • شمسة نمسك ميود من أذنيه : يا مسوّد الويه يالجلب يالميذّع !!! • مايد : آآآآي خالوه بلاج؟ • شمسة: لعنت الله عليك !! انته تسوي ببني شمايل جذيه !! تعال جدامي عند امك يالحيري!! • مايد: آآي آآآي خالوه هدي !! • شمسة : جاب يالله جاب !! جان فيك خير ارمس والله لأجلع اذنيك يالهيس !!! (وتزاعج) غروب !! ياغروب !! تعالي !!! • غريبة : خير ؟ خير؟ خير؟ • فاضل : بسم الله شو مستوي يا ام شمايل؟ (وساروا الصالة وويهها محمر شمسة) • شمسة: والله ما عرفتوا اتربون ولدكم تف عليك وعلى ويهك .. (وهو يمث ويهه ومنزل راسه) • فاضل : خير يا ام شمايل؟ (طبعا علاقته بأم شمايل وايد زينة لأنه كل الحلال فايدها ولازم يرضيها ..واتخبرهم بكل شي ..) غريبة: ويدي غربلك الله يا مسوّد الويه شو سويت في البنية !! شمسة : هذي اشرف عنك يالهرم !! ومثل ما كسرت بخاطرها كل شي يوقف والعرس ينتهي وسير عند اللوث وخذهن وان شفتك جريب من بناتي واولهن هنوه والله ياويلك !! (فاضل قام وصفعه طراق على ويهه) فاضل: يالجلب يامسوّد الويه .. (ويوم روحت شمسة .. دش فاضل على ميود في الحجرة) ميود: شعنه تضربني؟ فاضل: لأنك مسوّد الويه !! تنشر رقمها لعنبوا دارك نحن نباكم اتعرسون وانته اتخرب كل شي !! اتسير واتصلح كل شي تفهم ولا لأ ..وان اتقربت من العقربة هنوه والله ما بتسلم مني تسمعني !!! ميود: زين انزين !! افففففف (وظهر فاضل من الحجرة ...وهو متضايج لأنه كل آماله بيتبخرن فلحظة وكله بسبت ميود ..) (اما في المستشفى عند هزاع ) • هزاع يصارع الادمان : دكتور الله يخليك طلعني .. انا بخير شوفني ..مافية شي !! • الدكتور : شو نطلعك؟ لازم ينظف جسمك من السم اول .. • هزاع: والله والله .. (ويمسح على جسمه) آآي ظهرني !! (وبهستيرية) اقولك ظهرني !! (ويعج ابرة الدوا وابرة المغذي ..) آآآخ!!! • الدكتور يمسكه : لا يا هزاع ... استهدى بالله .. (والدكتور ضربه بابرة اتهديه وهو يحاول يطلع من الحجرة وصل لين الباب ودوّخ .. وشلوه الممرضين وودوه فراشه .. كانن جفونه سود .. وينتفض ويهلوّس ..وردت به الذاكرة سنتين ورا ..يوم كان يوّدي غدا لبيت ام غريبة .. وكان حزتها ما يخصه في المخدرات ولا دربه .. ويدق الجرس عليهم وبعد 5 دقايق يسمع صوت حد ياي من النعال ..) • فطيم قبل ما تفتح الباب : والله يا هندوه ان طلعتي انتي بدوسج فبطنج !! • هزاع فخاطره: والخيبة !! (وفجت الباب .. ومسطاع مال الذباب فايدها ..عاد حزتها هو اتخبل ..شاف غزال مفنود ..وفرت النعال صوب الشيّرة .. وخشت مسطاعها وراها .. جان تبتسم..ومب عارفة شو اتقول حتى نست تتلثم) • فطيم : إإه !! إإه !! إإه!! آسفة !! (وتربع بعيد) • هزاع: ردي!! ردي خذي الغدا !! • فطيم محمر ويهها : أووه !! (وردت وهي منزلة راسها من الاحراج ) • هزاع: اتفضلي .. (وعطاها الطاسة الحرارة ) اتعرفين عاد بيت منو؟ • فطيم وهي مروحة: نعم؟ (صدت صوبه وهي مبتسمة ) • هزاع: بيت بومانع .. • فطيم : ان شاء الله (وتهز راسها) مشكوور .. • هزاع ميت ما يبا يروّح : ههههههههههه انزين تعالي بندي الباب عن القطاو .. (وهي حليلها ريل ورا وريل جدام .. وجان تشرد داخل .. وهو يضحك ..وبعد فترة رمس امه وهي ما قصرت ..رمست نشبة بس طبعا ردوه .. لأنها محيّرة ل عيسى .. من غير هو ما يشتغل .. ومن حزتها أهمل عمره .. نسى كل شي ما همه حد .. ورد وعى من بعد الدوخة .. ) • هزاع: دخيلكم ظهروني ..بسوي اللي تبونه .. ظهروني .. (وهو يصيح يمكن هب ندم .. يمكن يشفق على عمره ..) (وعند هناء ..دشت شمسة وقفلت الباب عليها .. ومحد وياهم ..وشمايل في الصالة..) • شمسة فإيدها خيزرانة: يا مسوّدة الويه !! انتي تشوهين سمعة اختج !!! • هناء ماسكة جسمها عشان ما تيها الضربة : لا اميه خلاص التوبة !!! (وشمسة تضربها ..) • شمسة : يالخايسة !! نزلتي سمعتنا في التراب وكله بسبتج !! وأختج الشريفة جذيه اتسوين بها .. انتي الا مينونة وخبلة !! (وهنوه تصارخ من الويع .. ووصلت عند الباب اتحاول اتبطله ما شي فايدة قافلتنه شمسة والمفتاح عندها ..) • هناء : لا خلاص اميه التوبة !! • شمسة : أي توبة؟ انتي فقلبج شي اسمه رحمة؟ فضحتي اختج وفضحتينا وياها لا بارك الله فيج !! جان في شاربج خير اطلعي من الحجرة !!! • شمايل: اميه ؟ بلاج؟ افتحي الباب فديتج !! • شمسة: شملوه ما يخصج !! (وانغسلت غسال ما خلت مكان فجسمها ما ضربتها ويوم بطلت الباب كانت شمايل اتصيح عند الباب ..وجلعت الكمبيوتر وشلته وفرته من دريشة هنوه ..) • شمايل: آآآخ يا اميييه !! • شمسة اترمس هنوه: جان في شاربج خير سوي شي ثاني .. ان طلعتي من الحجرة بذبحج يالسبالة !! • هناء: احسن لي اموت وانتحر !! • شمسة: فكاك بنفتك من مصايبج يا ام الرياييل !! انتي ايمان ما فيج ولا جان ما فكرتي حتى جذيه !! انا ياما حذرتني اميه.. كله بسبت هالكمبوتر والتيلفون ماصدقتها واتضاربت وياها بسبتج !! والله انها صدقت !! (وتمت محبوسة ومن درن العيايز سارن بيت شمسة وهدوا من أعصابها وحاولوا بكل طريقة ) • ميثاء: يا امايا الله يهديج ..خليها تي عندنا نحن بنرمسها واللي سوّته غلط وما بتعيده !! • شمسة : انا اللي بربيها من أول ويديد .. ياما حذرتوني وانا ماسمعت شو بتيب لنا بعد !! والله ما تظهر من الحجرة وان شبّت والله انه ما ترد وهذي حلفتي !! • نشبة : يامايا لا تحولفين !! • شما: لا إله الا الله .. • شمايل: اميه عادي اسير عند ابويه حمد؟ • شمسة : سيري يا اميه الرب حافظنج وهالله هالله بعمرج ..هذي هي البنية السنعة ولا الجلبة !! والله يا اميه انه الضغط ارتفع عندي حسيت دمي يفور مارمت !! اخت تسوي بأختها جذيه ؟ شو مصلحتها .. • ميثاء: يا امايا هذي الغيارة .. (وتمت هنوه حبيسة حجرتها ما تظهر وكان في راسها شي تسويه بس بعده مب وقته .. وشمايل صح انها حاطة فخاطرها منها لكن تي وتسولف وياها ..وبعد ما تطري لها أي شي عن اللي صار ولا حتى تسألها ..من غير محرّم عالبنات ايوونها بسبت حلفة شمسة ) (..وصلت كروت عرس.. وكانت الكروت فإيد هنود ..وفجت الكرت ..) • هنود تزاعج: اميييييييه ميثاء يايتنج كروووت عرس (نتشرف بدعوتكم لحضور حفل زفاف مانع سيف على وداد محمد .. وذلك يوم الجمعة 1-8-2007 في تمام الساعة الثامنة والنصف في قاعة الملتقى بمركز دبي التجاري .. ودامت دياركم عامرة بالافراح والمسرات .. وجنة الاطفال منازلهم .. ) • هنود: إشووووه هذا؟ وانا المحيّرة؟ انا شوه؟ لالالا شكلي احلم .. • ميثاء : بلاج مصطنة؟ منو مطرش هالكروت؟ اعنبوا ما وقفن العراسات؟ • هنود: مانع بيعرس .. • ميثاء : أي مانع؟ • هنود: مانع اللي محيريني له .. • ميثاء تولول : ويديه غربله الله ..شو هالمصخرة؟جيه بنات الناس لعبة فإيده؟ وااااي يالفضيحة !!! • هنود تنتفض : دخيلج يا امايا اتصلي واسألي .. يمكن مغلطين في الاسم ... • نشبة: خليني انا بتصل وبغسل شراعهم !! هذيلا ابدا ما يعرفون المذهب ..انا قايلتلكم الولد لعّاب ما صدقتوني !!! • شما : اصدقت نشيبة !! ولا حد يأمن يفر بنته على عيال سيفوه روحهم سم !! • ميثاء: غربلهم الله يعلهم ما يترقعون ان شاء الله !!! خليني انا بتصل بهم ...هندووه سيري ازجري امج !! • هنود: مابغي !! دخيلج يا امايا خليني اسمع !! (وتصيح) ليش ياربي !!! • شما لبست عباتها: انا بسير اعلمها .. باخذ بشكارتي ويايه ..... (وقلبها انفطر .. مع انها شافته مرة وحدة لكن عيونها تدمع ويدتها تتصل بأمه ..) • ميثاء : السلامن عليكم .. ام مانع؟ حياج الله .. • ام مانع : الله يحييج غناتي ... (وكانت قافطة الحرمة ..) • ميثاء نشت لها نشة وتبدا هجومها: انتوا السنع ما اتعرفونه ..ولا جان ما سويتوا هالشي !! • ام مانع: ياختييه انا مفتشلة منج بس ولدي غيّر رايه ويبا ياخذ وحدة غير.. بس هند تراها هب شينة وبتحصل ريل ان شاء الله.. • ام مانع فخاطرها: يالله يا منوع .. وين أوّدي ويهي من خوياتي .. • ميثاء : بسم الله عليها من الشين ..انتوا الا المذهب ما اتعرفونه ..ونسبكم اصلا ما يشرفنا !! (وبندت فويهها ) الله يغربلهم .. (وتصيح هنود) • هنود: بس انا ما سويت شي ..ليش هداني؟؟؟ (ميثاء بندت عنها بدون ما اتعرف السالفة كلها ..) • ميثاء : بييج شيخ شيخه !! انتي اختاري بس !!! • هنود: مابا حد !! عفت الزواج .. عفت كل شي ... (ومسكت هنود راسها) لا وأكبر مصيبة .. هذي وداد اللي أدرس وياها .. • نشبة : ربيعتج؟ • هنود: دوم اتمشى وياها وتتصل بي !! شفتي النذلة !! لا بركتن فيهم !! (وتصيح) • حمد: منو مصّيح بنتي؟ (ويوم يخبرونه ) اصلا هذيلا هب رياييل الملاعين !! اميييه فديتج ليش تصيحين؟ باجر بييج واحد أحسن عنهم وزين انها يت منهم الجلاب !! • هنود: بس يا يدي !! • نشبة : ياخوي تراها متربية وياه .. وين تباها ماتصيح !! ومن يوم هم يهال ونحن محيّرينهم .. • حمد: الله يغفر لك ويرحمك يا سيف لو كنت موجود .. جان ما سمحت لهذا يستوي .. • شما: يالله يالناس !! امايا انتي محشومة لكن هو اللي بيفتضح .. الهرم.. (وتمت ملازمة البيت .. وتسمع زعيج) • فاضل: طبعا شاف شي شين ولا ما جان عرس ولا خبرنا الا توّة !! • غريبة: يا فاضل لا تقول عن بنتك جذيه !! تراها من لحمك ودمك !! • فاضل: عيل شعنه هداها .. اكيد سامع شي !! ماشي غير املنا ف ميود !! • هنود فخاطرها: آآآخ يا مانع !! انته جذيه تسوي بي !! انته !! • مي: ليش تبجين يا عيوني .. تراج بتحصلين رجال احسن عنه.. • هنود: الله يخليج خليني !! • مي: بتسيرين عرسهم؟ هنود رفعت راسها وبقهر : ليش لا .. تراه عرس صديق الطفولة وربيعتي !!! (وويهها محمر ) • مي: مجنونة !! (وتمت صاخة وكاتمة كل شي وما فتحت الموضوع الا قبل العرس بيوم ..) • هنود: اميه ميثاء: • ميثاء: يالله بدون ما تقولين تم فديتج !! • هنود: ابا اسير عرس هذاكي !! (نشبة وميثاء وشما يتطالعن بعض مب مصدقات) • نشبة : اتخبلتي؟ • هنود: لا اتخبلت ولا شي (وجان تبتسم) • ميثاء: امايا انتي محمومة؟ • هنود: ابا اسير ابارك لهم .. • ميثاء: عن الخبال هندوه انا اعرف ينونج!! • هنود: صدق يا امايا ما بسوي شي ..بس ابغي اشوف العرس .. • ميثاء: ينّت وقعدت .. (وبعد ألف يا ويلاه شوفوا النتيجة) (اما بعد ايام فمركز دبي التجاري .. دشن العيايز الثلاث ..وهنود وياهم وكانن العيايز كاشخات يالله هذاكي الكريستال عالكندورة المخوّرة .. ولبس هنود اللي متسلفتنه من عند شمايل كان يجنن عليها .. وشعرها المنشول والمكياج اللي ممكيجتنها شمايل.. وهن يالسات يسلمن شافتهن ام مانع واتغير ويهها ..وسارت صوبهم ..) • ام مانع : يا هلا .. يا هلا .. يا مرحبا ..زارتنا البركة .. • ميثاء : مب من الله !! • ام مانع : خويتيه بعدج زعلانة افا عليج !! • ميثاء : كل شي نصيب يا اختيه ولا تفتحين الموضوع يايين انبارك لكم .. • ام مانع احمر ويهها : هلا .. هلا بالعروس .. (ضربتها في الوتر الحساس ..) شحالج امايا؟ • هنود : بخير .. (حتى ما طاعت اتكمل .. وقلبها يفور من الغصة .. كل شي من الزين والغالي وحق منو؟ حق ربيعتها اللي تدرس وياها .. اللي طعنتها في الظهر .. وكانوا الخلق يطالعون طاولة قوم هنود ..) • الحرمة ام كندورة حمراء : مب جنه هذي بنت غروبة اللي محيرينها له؟ • الحرمة ام كندورة صفراء : اندوج انتي !! شو تسوي هني؟ لا والعيايز وياها اكملت!! ويييه يالفضيحة !! • الحرمة ام كندورة حمراء : جان ما تستوي فضيحة عودة الله يستر !! • الحرمة ام كندورة صفراء : بس يقولون انه العروس اتكون ربيعتها في المدرسة ... • الحرمة ام كندورة حمراء : واعلية عليها .. ما تستاهل بنت غرووبة .. مع انها الله يحفظها اخلاق وجمال ... • الحرمة ام كندورة صفراء : اصلا عايلة بو مانع مافيهم خير .ولا نحن شو يايبنا عرسهم !! • الحرمة ام كندورة حمراء :عيل اقولج امايا اتلاحقي عليها عن ايحجزونها ..لو انهم فقراء ..لكنها بنية ما اتحصل !! • الحرمة ام كندورة صفراء : هي والله .. وجيه عيل ما شوف بنت العراقية وياهم؟ • الحرمة ام كندورة حمراء :ياختيه سامعة انهن ما يتقابسن !! من غير هذي شو يسمونها ميادة مادري مي !! قوية محد اقرا عنها .. مستقوية عليهم كلهم .. وسامعة انها راعية شباب.. • الحرمة ام كندورة صفراء : في التراب !! في التراب !! • الحرمة ام كندورة حمراء :وبعد عرب شايفينها اتدوخ قدّو !!والاهل غاطين عنها يامّج !! • الحرمة ام كندورة صفراء : الله واكبر عليها ..الله واكبر عليها !! (وفي الطاولة اللي يالسين يحشّون فيهم الحرمتين كانوا 3 حريم فنفس الطاولة يتسمعن ومبججات عيونهن ..) • وفاء تصاصر اليدة الجود : سمعتي؟ بل بل بل عليهن !! ولا اخبار الامارات (والجود انخشت من بينهن ) • الجود: شو تقولون؟ • احلى البنات : واللي يتابعني فقصتي الرابعة بيعرف منو الجود خخخخخ مب جني اليوم كريمة؟؟؟؟ خخخخخ |
(الجزء 20) • اليدة الجود : بعد هالحش كله وما عرفتي شو السالفة؟ • الجود: تصدقون هاييجي البنية صدق انها غاوية .. أحس بها مبأي شي يدخل راسها .. • وفاء : يمه عليج !! شو رايج تقعدين معها وتسولفين ؟ • الجود: صدق والله ؟ يالله انقوم !! • اليدة الجود : عيب امايا .. انخلي العرب وانسير مكان ثاني .. • الجود: بس نحن ما انعرفهم !! قوموا ولا بخبر عليكم زايد .. • وفاء : دامنه زايد لالالا ... يالله يمه .. (واتعذرن وسارن جدا طاولة الهند) • الجود: السلام عليكم .. • نشبة وشما وميثاء : وعليكم السلام والرحمة .. • الجود: هالكراسي لحد؟ • ميثاء : لا ابدا اقربن اقربن .. • الجود واليدة ووفاء : جريب جريب .. (الجود يلست حذال هنود والعيايز عند العيايز خخخ ..وكانت تتصل بأمها نداية) • الجود: مرحبا بالحلوة ..علومج؟ أدريبهم كلوا لج جبدج .. لا ما دخلوها ..لا لله كل شي غاوي .. لا بس متصلة اتطمن وزايد؟ الحمدلله وانتي تعشيتي؟ ..خلاص عيل الله يحفظج ... (وبندت) • نشبة تصاصر ميثاء : أسميها هالبنت غاوية .. جيه ما اتخطبونها حق ميود .. يمكن يثقل !! • ميثاء : يالمدحوبة !! وشمايل؟ (وشميم قابضة راس الدفة وسوالف ويا اليدة الجود .. كانوا متوالفات) • الجود: سامحيني الغالية ماعرفتج بعمري انا اسمي الجود ... • هنود كان منشغل بالها باللي يصير : عاشت الاسامي وانا هند .. • الجود مبتسمة : وهذي يدتي الجود وهذي بعد مرت عمي وفاء .. (حزتها هنود بججت عيونها هب مصدقة ) • هنود: ان ان انتي الجود؟ (وتنغز نشبة وتقرصها عشان تلتفت صوبها) ما أصدق لالالا !! • نشبة : غربل الله هالشيفة لج يا هندوه يالقراصة العودة !! آآآخ الله يغربلج بس !! • الجود تضحك : قصدج القصة قريتيها ؟ • هنود مب مصدقة وتهز راسها : هيييه !! ما اتوقعت اني اجابل بطلة قصة يالله يالصدفة !! • الجود تضحك من الخاطر : ليش فديتج عادي .. • هنود: لا هذا شي هب عادي .. (وهنود يلست تتأمل اليدة ووفاء والجود) • الجود: شكلج معجبة ؟ • هنود: ههههه والله معجبة ... • نشبة تصاصرها : اميه؟ اتعرفينها؟ • هنود: شو ما عرفها الا اعرفها .. (واتبادلوا ارقامهم ..) الجود.؟ انتوا منو اتعرفون هني؟ • الجود: هل المعرس ..يدوتي اتعرفهم .. (والجود اتسوي عمرها ما تعرف) وانتي؟ • هنود: هااه؟ من الجهتين (ووييهها احمر ..ويبندون الليتات ويسمعون المطربة " ألف الصلاة والسلام عليك يا حبيب الله محمد " عاد حزتها انقبض قلبها ..ومشت العروس بكشختها لين ركبت الدري اللي يوصل للكوشة ..وهنود لفت شعرها اللي لين آخر ظهرها ..واتلثمت بسبت التصوير ..) • هنود فخاطرها : مستحيل أسكت عن حقي والله لآخذه !! انتي !! انتي !! بس هي ما يخصها ...هي ماضربته على ايده وقالت له تعال خذني .. انزين بس كانت تدري انه محيريني له الخاينة .. لكن والله ما أفوّت هالليلة على خير .. • ميثاء : يالله امايا خلونا انروّح أحس رويلاتي جيّمن !! • شما : صبري خلينا انطالع مسوّد الويه .. (وكلهن صدن صوبها) • ميثاء : لاماروم رويلاتي ..يالله up up • نشبة: يالله هنود ..سامحونا بنروّح • اليدة : مسموحين ..ومشكووورين الغالية ونستونا !! • هنود اتسلم عالجود : تراني بتصل بج اتريييني .. • الجود: اليوم؟ • هنود: لا ..جريب ان شاء الله ..يالله فمان الله .. (ووايهتها وروحوا ويوم طلعوا يدورون وين ميود صاف الموتر ..) آآآخ بطني ..آآآخ آآآخ!! • ميثاء: بلاج؟ • هنود: بطني ابا اسير الحمام .. • ميثاء: لاحول ..احين وين الحمام عنا ..انا ماروم أوّديج ركّبي مووول وقفن!! • نشبة : انا بوديها وأمري لله ..شما : لو زهور موجودة جان ودتجّّ • ميثاء: طاعوا المتفيجة !! الا قولي هيازة.. يالله سيرن!! (واتروغهن بايدها ..وهن يمشن ..وتمن ميثاء وشما واقفات يتريّن الرغيد ميود) • نشبة : توّج تزاعجين بطنج يعوّرج ..يالمكارة شو في راسج؟ • هنود ببراءة : انا؟ ماشي ..يمكن زيارين هههههه • نشبة: الله وأكبر عليج !! (ووصلوا الحمام ..ويوم خلصت عدلت لثمتها وكانوا مدخلين المعرس واخوان العروس وبعد ما ظهروا اخوانها) • نشبة : يالله فديتج يتريونا • هنود: وانا ما بأخرهم بس لحظة بسير وبرد • نشبة قفطت: وين بتسيرين؟ امايا الله يهديج !! • هنود: ماشي بسير أسّلم عالعروس !! • نشبة : لا يا امايا الله يهديج عن الخبال ..تبين سيرتنا على كل لسان ..بيقولون بنتهم مب متربية !! • هنود: وعيل هذا !! اللي يخلي سمعتنا في التراب؟ والله ما أطوّف هالليلة على خير !! (وتمسكها نشبة ) • نشبة : لو انا غالية ما تسيرين .. (وفلتت ايدها غصب ) • هنود: انا من يوم كنت ياهل وزرعتوا هالشي فية !! مانع لهنود وهنو لمانع !! لين ما كبر ويايه والحينه بكل سهولة أوّدر كل شي؟ لازم أقهره .. (وكانت تمشي بكل غرور ..ما يبيّن منها غير عيونها .. ومرّت صوب ام مانع وماعرفتها ..وتتحراها انها بتسّلم عالمعرس والعروس ..ومانع كان مستانس ويضحك لين شافها وهي القهر لابسنها ..الا الغيرة .. وعرفها وكان بيقوم جان يتم مكانه ويوم وصلت تمت مجابلتنهم واحمر ويه مانع ..وهو كان بكل كشخته حتى كان يبين اصغر ..خاف الللحية موول وعيونه المجحلة ..وبياضه ..وهو ما نسى هالعيون الوساع ابدا ..) • وداد ترمس شوي شوي : اتعرفها؟ (ووخت هنود وكانت اونها تسلم على وداد بس كانت اتكلم ) • هنود: لازم يعرفني !! (وكان راسها عند راس وداد وشوي بتلصق وكانت مستقصدة عشان يسمع ) • وداد قفطت : هنوده؟ • هنود : هند لو سمحتي .. (واعتدلت فوقفتها ومانع نزل راسه لأنه عرفها وخصوصا من حدّة صوتها ) انتي مالج ذنب ..بس كنتي ربيعتي وتدرين بكل شي !! لكن انته !!! (واتطالعه باحتقار ) انته ... يعلك ما تشوف يوم خير فحياتك ..انته ريال انته !! (وعيونها كلها دموع .. ومانع قلبه يخفق بطريقة فظيعة ومب قادر يرد ..) • مانع بكل جرأة : مشكوورة .. (وهي منصدمة ..يوم توها بتتحرك اتعلقت عباتها بفستان وداد ما طاعت تنزل ..جان تمسك وداد الشك اللي بفستانها وبكل دفاشة واتطره بكل خساس جدام مانع وشلت هنود كرامتها و بغرورها تنزل من عالكوشة والكل يطالعها ..) • نشبة : مينونة !! خبلة طوفي جدامي !! (ويوم ركبن ..نشبة اتطالعها ) • ميثاء: بلاكن اتأخرتن؟ • نشبة : هذي هندوه .. ما حصلت هناكي كليلكس ( =كلينكس) (وسترت عليها ..وبتم هالليلة ما تتنسى وخصوصا عند العرب الللي شافوا كل شي..وميود طول الوقت ادي شو محضر من المفاجآت .. كان سرحان .. واول ما وصلوا المعاريس حجرتهم في الفندق ..) • وداد: لا تدقني !! • مانع: لويش شو مسوي؟ (وعج البشت اللي كان فذراعه والسفرة والعقال ..كانت وداد يالسة طاولة المكياج .. وهو عالكرسي اللي مجابلتنه طاولة ابعد شوي ) • وداد : شمعنى اخترتني انا بدال هنود ؟ • مانع: احينه هذا وقته؟ • وداد تصيح : طالع كيف الناس تناظرنا الحين !! ودني بيت اهلي !! • مانع : شوفي يا وداد عن الدلع .. هاي أول ليلة شو تبين الناس اتقول عنا ... • وداد: شوف ان ما وديتني بين اهلي روحي بسير !! • مانع: جان في شاربج خير اظهري والله ما ييتج !! • وداد : لا تتحداني !! من غير امك الهيزة واقفة سامانديجا على الاقل تسحبها من كشتها !! • مانع: هيييزة؟ وسامانديجا؟؟ |
| الساعة الآن 08:06 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir