|
[mark=CC3333]thnx 3laya Ntrya al tkmlah :) [/mark] |
مشكووورين وما قصرتوا اسميكم تفاعلتوا ويا رشود شوي شوي اعصابكم هع هع هع المهم اليوم ما في بارت ويوم الاحد بينزل البارت اليديد وبعطيكم نبذة بسيطة عنه عيسى هل بيسمع كلام سعيد ويتم في امريكا؟ وهنود بتسوي عملية خساس وما بتي بتخليهم كلهم يسيرون وهي بتم وهل راشد بيكون متواجد ولا بيعسكر عند ست الحسن؟ وشو بيستوي بالباكستاني اللي انضرب؟ |
مشكوووره خيتوو =] ويعطيج العافيه .... نتريا البارت الياي |
تسلمين الغاليه ولاتبطين علينا وايد |
مشكووووووووره خيتووو .... ولا تاخرين علينا نبا البارت اطول |
ثااااااانكس علااايه بس اتمنى ماتبطيين والباارت يكوون اطووول بليييز |
يسلمووووووووووووووووووووووووو |
وييين مب على اسااس اليم تحطيين البااارت عسى مااشر علاايه |
(الجزء 66) قراءة ممتعه (ونشوا الصبح الخلق اللي في المستشفى .. وعلى الساعة 10 نشت شمايل شبعانة رقاد ..والبسمة على ويهها ..اتسبحت وطلعت بتتريّق ..وتشوف ناس متيمعين صوب الحديقة وهي مستغربة شو السالفة؟.. كانوا الممرضين يوّدون كل واحد لحجرته .. وتموا الشرطة ) • شمايل اتغشت: شو السالفة؟ بسم الله.. (واتقربت زيادة من شرطي ..وكانت لأول مرة ) اخوي؟ شو السالفة؟ • الشرطي : واحد باكستاني منتحر .. ( من قال باكستاني قّف شعر ينبها .. ويوم اتقربت زيادة .. اتشوف واحد رابط حبل طويل ومعّلق عمره.. هذا هو نفسه اللي معتدي عليها .. ردت ايدها على ثمها منصدمة .. وتربع لغرفتها ..) • شمايل فخاطرها : انا شو سويت؟ يالله تغفر لي .. والله هب قصدي !! كنت اباه يتعلم من غلطه والله العظيم .. (وقبل ما توصل حجرتها اتحس حد يناديها ) • ....................: صبري !!! (وعند هنود ..) • فاضل : فجي الباب (ويدق الباب بقوة ) فجي الباب اقولج !! يعلج السقم !! صدق انج خام !! اعنبوا دارج تشّردين الريال .. خافي الله !! (نشوا هنود ومي منصدمين ) • هنود فخاطرها : لا إله الا الله .. ما بيفوّت اليوم على خير !! • مي قامت وهي معصبة بطلت الباب : شو تبا؟ • فاضل : ابا هاي السبالة !! اللي اتشرّد الرياييل !! اعنبوج شو هالنحاسة؟ (ودخل وسار مسكها من جتفها وهي مب مهتمة .. واتطالع الجهة الثانية ) • مي : هدّها !! اقولك هدّها !! • فاضل : ماشاء الله اتدافعين عنها اشوف ؟ • مي : مو اختي؟ • فاضل : والله وطلع لج لسان يا ميوه !! • مي : والله وطلع لك جيب يا بو عيسى (كأنها اتذكرها إنها هي اللي تدفع ) بعده ما نزل المعاش ولا تباني استقيل؟ • فاضل منصدم : هاااه؟ ولا اقولج؟ اهم شي البيزات .. بس والله يا السبالة اتسيرين اتعّذرين من ريلج ولا اعجج في مكان ما تتمنينه تفهمين ؟ • هنود فخاطرها : امييييه .. خفت تراني !! (وروّح عنها وهي تمت في الفراش تتذكر كيف كان لقاها ويا رشود .. وخلاف ردّت بها الحاسية ..) • هنود : كيف هذي تكون ميرة ؟ بس انا احيد الجود كاتبة انها ما تت جدامه .. كيف درّت ؟ ما يخصني ما يخصني !! ان يلست افكر فيه بينفجر راسي .. (ويصيح تيلفونها ..) هلا فطيم .. • فطيم : حد وياج؟ • هنود : لا محد .. • فطيم : وميوه؟ • هنود : تتسبح .. شوالسالفة؟ • فطيم : هندووووووه لحقي .. اميه نشبة توّها اتخبرني .. ألّف اغراضي حق كم من يوم .. • هنود : بسم الله .. شعنه؟ • فطيم : يدة رشود واميه ميثاء متفقين انه نسير جميع وبمن فيهم انتي اصلا اهم شي انتي .. ونسير مزرعة قوم رشود في الخوانيج .. • هنود هب مصدقة : جذااابة !! • فطيم : والله مب جذب !! • هنود : شو يتحرون اني بلا كرامة او عزة نفس؟ • فطيم : محشومة .. محشومة فديتج .. انزين انتي ليش ما تخبرينهم انج اتكلمين؟ • هنود : مابا ياختيه عنادا فيهم ما بتكلم وجانج بتخبرينهم محد بيصدقج !! • فطيم : هنيد انا مالي مصلحة اني اتضارب وياج .. انا انصحج !! • هنود : ومن متى وحدة قلبها صخر تحاتي وحدة قلبها مكسور؟ • فطيم عصبت : يالله فديتج فمان الله.. • هنود : فكاك !! (ومي توّها طالعة من الحمام ..) • مي تجفف راسها : والله لو مب التلفزيون جان بصمت لج مب بالخمس؟ الا بالعشر انج اتكلمين !! بس هالمخ خربان من كم من يوم ... (وتبتسم هنود بس كان مخها مب وياها .. كان تفكيرها في الرحلة واذا سارت شو بيستوي .. وشو بيستوي اذا ما سارت ..) حووووه !! حووووه !! وينج ؟ (وصدت هنود صوبها ) شو رايج هنود تتلبسين؟ ابا اعزمج عالغدا اليوم .. • هنود تكتب لها : شو المناسبة؟ • مي : في موضوع ابا اكلمج فيه .. • هنود تكتب : شو هو؟ • مي : لبسي وخلينا نطلع .. والعصر بوّديج شغلج .. (لبست هنود عباتها وركبت في موتر مي .. صدت اتطالع ثياب مي .. كانت لابسة تنورة ضيقة لينا لكربة بالضبط .. ولابسة هيل هوب لونه بني .. وفانيلة بحرية مايلة للأزرق والااخضر .. وفوقه جاكيته .. الكم لين الكوع باللون البني والذهبي وكانت هب متمكيجة ولافة شعرها بقباضة .. كان لباسها وايد أوفر ..) • هنود فخاطرها : أسكنت هالبنية !! والله اني استحي ألبس جذيه !! (ويوم وصلوا طلبوا اول شي كوفي عشان يعدل مخهم ..) • مي : أدري اني ما وصلت لمستواج .. صح انج احلى عني بوايد .. وحشيمة .. بس انا ابا اعيش حياتي .. منو بيتقدم لخطبتي؟ يمكن انتي ماتعرفين انه دوم مناجرتي وياج من يوم كنا يهال .. لأنج انتي اغوا عني وكنت اغار منج .. (وهنود منصدمة ) بس انا عمري ما طلبت منج شي خليني اعيش حياتي .. صح اني بيي يوم بندم على كل شي سويته .. بس خليني اجرب .. أغلط .. بس مب الغلط اللي في بالج .. ابا اتعلم .. لدرجة ابا اتعلم الغرور بس على شو دامنه ما فية جمال .. منو بيي بيخطب وحدة امها عراقية .. لا ورقاصة بعد !! بيقولون هذا النسب اللي يشّرف يا عيوني .. (وتدمع عيون مي ..) لدرجة اني خذت قرار من كثر ما انا احبج .. انتي اختيه .. وما ارضى عليج .. لدرجة اني ابا استوي شراتج .. • هنود فخاطرها : هاي شو تخربط؟ شو قصدها؟ • هنود تكتب : شو قصدج؟ • مي : انا قررت أسوي عملية تجميل .. (وهذيجي انصدمت ..) • هنود فخاطرها : والله اتخبلت !! • هنود تكتب وإيدها تنتفض : اتخبلتي؟ • مي :ههههه تبين الحلاه كلها لج؟ • هنود فخاطرها: غبية هاي؟ ف شو اتفكر؟ • مي : هذي حريتي .. بس اذا ما عندج مانع .. لي طلب .. (وهنود لين وقتها منصدمة ) اباهم يسوّون لي عملية تجميل وأستوي شراتج .. احم .. قصدي اشبهج !! (وهذيجي جنه انصب ع راسها ماي بارد..) • هنود تكتب : هذا الخبال بعينه !! • مي معصبة : أي خبال هااه؟ دامنه كل يوم في حياتي يعايروني بالخسافة .. طاعي عمرج !! طاعي عواس .. طاعي ميود !! كلكم من دم واحد والغوا طرنكم طر .. واستخسرتي فبنت العراقية تحصل على شوية جمال؟ هههههه خلاص ولا يهمج .. شوفي انا حبيت اشاورج .. لكن عرفت انج ما بتوافقين .. وانا جذيه ولا جذيه بسويها .. بشوف لي دكتور تجميل عدل .. ويغيّر شوي من ملامحي .. المهم أغّدي حلوة .. لا تخافين ما بقوله عنج وع اني ابا اشبهج .. حطي ايدجوريلج فماي بارد .. • هنود فخاطرها : ما اتوقعتها اتقول جذيه .. كسرت خاطري .. • مي : وعلى شان اثبت لج اني في صفج .. براويج شي ما شفتيه .. (وتعطيها التيلفون ) افتحي الاستوديو وبتحصلين فيديو طاعيه .. انا هب نذلة .. بس والله ما يستاهلج .. ( وفي المستشفى ) • هزاع: صبري !! • شمايل : مات الريال يا هزاع !! مات !! وكله بسبتي !! • هزاع : الباكستاني؟ جيه ؟ شو استوا به؟ • شمايل : تعال براويك .. (وتوّديه للمكان بس ما طاعت تتقرب .. وكانوا الشرطة ينزلون الجثة .. وشمايل قلبها يدق زايغة .. وأكيد يوم بيعرفون بيقبضون عليها ..) • الشرطي : please out (والريال يطلع له ال identification ) • مايد : وياكم الملازم مايد بن فاضل من المكافحة !! (وعج الخشم والاكستنشنز من شعره وشمايل اتطالع منصدمة .. والشرطة منصدمين .. وواحد من الشرطة يتّفل عالارض يتحراه بنية ..) • شمايل ترمس شوي شوي : ميود ؟ معقولة؟ والبارت الياي بكرة يا حلوين |
*·~-.¸¸,.-~*تسلمين ختيه ونرقب التكمله *·~-.¸¸,.-~* |
تسلمين عالبارت حبوبه ^_^ |
يسلموووو ع الباااااااااارت خيتووو |
روووعه الباارت تسلمين الغلا انتظر التكملة باجر .. ... السموحه |
يسلمووووووووووووووو حياتوووووووووووو |
يسلمووووووووو خيتووووووو |
(الجزء 67) • سعيد : حجزت ولا بعدك؟ • عيسى : لا بعدني .. العصر بسير .. • سعيد : خلاص انا راد وياك .. • عيسى : سعيد شو هالكلام؟ من قلت بروّح قلت يالله مع الخيل يا شقرا؟ • سعيد ميت من الضحك : حلوة هاي مع الخيل يا شقرا .. المهم .. انا اقدر اكمل دراستي في البلاد .. • عيسى : سعيد؟ شو سالفتك؟ احس انك متعلق فشخص اسمه عيسى؟ • سعيد : انا كان ربيعي الروح بالروح اسمه يوسف .. اتوفى من سنتين .. وكله من جرعة زايدة من المخدرات .. بس وين مات؟ مامات في بلاد ه .. بس مات فهالبلاد الوصخة !! ويوم اتعرفت عليك وعرفت حالتك .. حالتك كانت شبيهة بحالته بس الرب حفظك .. حسيت بك ربيعي اقرب للأخو .. • عيسى : يالله هاي شهادة اعتز بها .. عادي احطها وسام على صدري؟ • سعيد : خخخخخخخخ تقدر تقول جذيه .. • عيسى : انزين بسير اسحب من الصراف .. هذا اذا بقى شي بيزات .. وخلاف بحجز .. • سعيد مبتسم : انزين اترياك .. (وعند هنود ) • هنود فخاطرها : هذي الجلبة ميروووه!! يعلفها العوق !! آآخ لو هي جدامي بس !! (وتصيح .. ودميعاتها قامن ينذرفن عالكوفي ..) • مي : انزين ليش اتصيحين؟ انتي غاوية وما فيج أي عيب .. • هنود تكتب بعصبية : شو فايدة الجمال بليا روح؟ • مي : صدقيني بيركض وراج هالجلب .. • هنود فخاطرها : صدق حقير !! اكرهك يالجلب اكرهك !! يعلها هالبنية تحرم عليك دنيا وآخرة ان شاء الله (وبعد 10 دقايق كانت تتفكر في ملامح مي ....) • مي : بلاج مبججة عيونج علية؟ • هنود تكتب : استهدي بالله يا مي .. محد قال انج خسفة .. • مي : مب لازم بالقول .. النظرة بس تكفي .. • هنود تكتب : عشان خاطري ميووه اذا تحبيني لا تسوين هالشي .. • مي : انا خذت قراري .. وصدقيني روحج بتستانسين لي .. • هنود تكتب : انا خايفة عليج ميوه !! اخاف شي يستوي فيج .. عملياتهم هب مضمونة .. • مي : ما بيستوي الا كل خير .. صدقيني هذا كل مناية .. (وودتها لشغلها ..وسجلت حضورها .. وشافت وحدة من المثبتات كانت وايد وغدة ..) • سعاد : يا مرحبا الساع والله .. اشوفج ياية من وقت؟ • هنود : لاوالله عيل اترياج لين ما تين .. صدق بايخة !! • سعاد منصدمة : اوييييه اتكلمين؟ • هنود : لا شكلي اكلم عمريه .. ما عندي وقت لوحدة سخيفة .. (عطتها هنود نظرة وروحت ) • سعاد : الله اكبر والله وطلع لج لسان يا هندوه !! (وسارت لورشة شغلها وشافت وحدة في غرفة الملابس .. ويه يديد .. بس هالويه اتعرفه ..) • هنود : السلام عليكم .. مويز؟ • مويز : عليج السلام (والبنيات منصدمات انها اتكلم .. ومويز صدت ..) منو الحرمة؟ • هنود : مويز؟ انا هنيد .. ما تذكرين اختيه مي داعمة موتر اخوج .. (وهذيجي الصدمة عاقدة لسانها .. وسارت سلمت عليها..) • مويز : انتي اتكلمين؟ تستاهلين السلامة فديتج .. • هنود : الله يسلمج غناتي .. يعني من فترة .. • مويز : ونحن عيل بنشتغل سوا؟ • سعاد بكل لؤم داشة عرض امبينهم :لا بتشتغلين ويايه .. • هنود : لا بتشتغل ويايه .. عندج مانع؟ • سعاد : هيييه عندي مانع .. انتي ما تعرفين ترسمين .. • هنود : والله بتعلم .. يوم ابا بتعلم .. • مويز : ماعليه انا بعلمها .. • سعاد : وبعد اتدافعين عنها؟ • مويز : اقولج لسانج وايد طويل ويباله قص .. • هنود : شو رايج اقصه لها؟ • سعاد : يالله جانكن اترومن .. قصوركن بعد !! (وهنود اصلا واصلة حدها .. ياية من المطعم وشافت الاهوال وخصوصا فيديو راشد .. عادي اتعفد على سعاد مسوّدة الويه .. واتقربت منها .. ومسكتها من شعرها ..) • هنود : شو قلتي؟ عيدي كلامج !! (ومويز ميتة من الضحك ) • سعاد : قلت موزة بتي تشتغل عندي وهدّيني !! • هنود تضحك : صدقيني ما بهّدج !! (وتسحبها لين المغسلة ) مويز فتحي المغسلة !! • مويز : افا حاضرين حق الشطانة !! • هنود : شو رايج؟ جبانة ولا تسوينها؟ • مويز : اوووه!! انتي بعد تعرفينها ؟ نحن في المدرسة نلعبها .. بس والله اسويها !! حلاته هاليوم !! (ورفعت مويز شيلتها وعلّقتها .. وحسّرت عن ايدها عشان ما تخيس عباتها ..وبطلت المغسلة ) • هنود : اليوم شكله ويهج هب مغسول عدل .. من غير اشوف كم من قشرة في راسج مادري قملة !! • مويز : اعععع .. خوّزي ايدج عنها عن اتعاديج !! • هنود : لالالاتخافين .. امبوني نظيفة من ساسي لراسي !! • سعاد : جاب !! هدّيني يالحمارة !! (وقاموا يرّشون عليها ماي وصدق غسلوا شعرها .. والبنات يتضحكن عليها.. وكانوا مستانسين لأنه في حد قام يردع المثبتات لأنهن كانن دوم تصرفاتهن غلط .. وقاموا يتحذرون من مويز وهنود لأنه أي كلمة بتوّديهم في داهية .. ومن سارن الورشة مالهم ..) • مويز : شوفي هنيد .. خذي الاسفنجة وغطّيها بلون وحطيها على عيون الياهل .. • هنود : شو رايج نسوي دعاية لعمارنا؟ • مويز : قصدج كل وحدة ترمس على خد الثانية .. عشان اليهال اييّونا؟ • هنود : ماشاء الله عليج قريتي تفكيري.. شكلج متمرسة في الرسم .. (ومويز ماسكة فج هنود وترسم على خدها مدهش ..) • مويز : انا احب الرسم .. (وياهم صغيروني .. يالس يطالعهم ومبطّل حلجه ..) • هنود ترمس شوي شوي : اندوج طاعي الياهل .. الذبابة دشت وطلعت من حلجه وهو بعده مبطّل حلجه ههههه • مويز : هههههههههه حبيبي تباني ارسم لك؟ • الصغيروني : خالوه؟ (وأخيرا صك حلجه ) عادي ترسمين في ويهي؟ • مويز : افا عليك .. • الصغيروني : لا مب انتي .. انتي صغيرة ما تعرفين .. (وهن صدن يطالعن بعض ويضحكن ) • هنود : حبيبي انا ما اعرف .. هاي اتعرف ترسم .. • مويز : برسم لك مدهش .. • الصغيروني مستانس : صدق والله؟ انزين يوم بترسمينه مب على خدي شرات خالوه هذي !!! ابا على ويهي كله ومب اتحطين لي روج !! عيب هذا مال بنات !! (وهنود احمر ويهها من الضحك وكانت متوالفة ويا مويز .. لأنه الباجيات ما كانن ييّسرن يتقربن ..وبعد ما رسمن على كم من ياهل .. سارن يتعشن ..) • مويز : شو رايج جبانة ولا تسوينها؟ • هنود : صدق ؟ شو هو؟ • مويز : ولا اقولج خلي كل يوم بيومه احسن .. باجر بخبرج شو هو اللي بتسوينه .. • هنود : اتصدقين دشيتي خاطري .. انتي الوحيدة اللي اتوالفت وياها ولا انا من دخلت هالمكان ما رمست حد .. (وعند شمايل ..) • مايد : انا كنت متخفي بسبت هالبتّاني .. كنت اشوفه بعيد يتخّلى ويا واحد من المرضى .. بس ما عرفت شو يسوي .. تسمح لي افتش غرفته ؟ • الشرطي : اتفضل .. وخذ وياك كم من شرطي .. (ويوم هو يتحرك .. كان ينفض الاكستنشنز .. وتتلاقى عيونه فعيون شمايل اللي كانت واقفة حذا هزاع .. سوالها بنظرة ... معناتها ابتعدي عنه ولا بذبحج .. وهي سيده منهّدة صوب ميود .. اللي كانت خطواته سريعة .. ما يباها تتورط في السالفة ..) |
مشكوووره ختيه ع البارت الحلو وارقب التكمله |
تسلمين الغاليه وياريت طولين البارت المره اليايه |
كمليها بلييييييييييييييييز |
مشكووره اختي على هالبارت =] |
مشكوووووووره اختي واتمنى البارت الياي يكون اطول |
يسلموو ^_^ |
يسلمووووووووووو ع القصه |
Thnx 3laya ntrya al tkmlah =) |
ntrya altkmla |
(الجزء 68) (ويوم وصلوا حجرة الباكستاني ..) • شمايل : أوقف مكانك !! • مايد : انطبي .. وسيري مناك !! • شمايل تتقرب منه وتكفخه ع راسه : طب الله راسك يالحريموه !! • مايد يعطي اوامره للشرطة بشكل جدي : فتشوا غرفته .. (وسار جدا شمايل ..) اتخبلتي؟ وجدام الشرطة بعد؟ • شمايل محمر ويهها : أخخخ عليك يا ميود !!! شو اللي خلاك تستوي فلبيني وتجذب علية؟ وقابض لي مدام مكنير ومدام مكنير !! وانا مصّدقة اتحريت واحد فلبيني مسكين حاله !! الا مسكين حالك انته !! • مايد: شمايل سمعيني انا كل اللي سويته .. اني استحملت المذلة كلها عشان اوصلج .. يا ما اترجيت امج وأمي ومحد ياب طاريج غير اميه نشبة وزلّت بلسانها .. ولا انا كيف بعرف طريجج هاااه؟ ولا بتوارد الخواطر؟ • شمايل : انته تعرف اني كنت اعاني ونص المشكلة انته !! تعرف شو يعني انته؟ يتني وداد وقالت لي انها بتطلق من منّوع وبتاخذك .. • مايد يبتسم : أسميها مصخرة !! وانتي صدقتيها؟ • شمايل : أكيد لا .. • مايد : شكلج .. مبيّن انج مصدقتنها !!شمايل : ما بسامحك على جذبتك !! • مايد : صدقيني يا شمايل .. لو تحّسين بالمذّلة اللي انذليت فيها .. بتقولين حرام اللي يصير لك .. بس انا اقولج كل هذا يفداج .. لأني احبج .. ما يهمني .. لو يطالعوني الكل .. او حتى اتفنّش من الشغل .. انتي حبيبتي تعرفين شو معنى حبيبتي؟ يعني مالي .. من حقي .. ومالج حق توقفين حذا الخايس هزاعوه .. ولا حتى تتلفظين باسمه تسمعيني؟ • شمايل تهاجمه : من احينه بتتملكني؟ • مايد : مب تملك .. بس ما حيدج تعطين فرصة لحد وترمسينه؟ احيدج أثقل عن جذيه !! (شمايل احمر ويهها وتصفعه طراق ع ويهه ..) • شمايل : صدق قليل الادب !! انا كنت بروحي .. منو عندي في المستشفى يساندني هااااه؟ ويوم الباكستاني البارحة كان بيعفد علية في الحديقة .. كنت انته موجود؟ هه طبعا لا خامر كعادتك .. ( قصدها راقد ) • مايد منصدم : بيعفد عليج؟ شو تقولين انتي؟ • شمايل : هذا هو اللي عاد علية في ساحة ليوا .. تذكر ولا أذكرك في الاحداث • مايد : ماله داع .. • شمايل : شي يوصلك ويتعداك .. انته هب ريلي ولا خطيبي او حتى حبيبي عشان تحاسبني !! • مايد اتغير ويهه من القفطة : انزين دامنج قلتي جذيه .. هذا آخر كلام لي وياج .. وعمري ما بّذل عمري زيادة... تبيني ولا لأ؟ • شمايل بتكبر : لا يعني لا.. • مايد : أسميني مال مقصة !! صدقتج وقلت اتحبني .. لكن من عقب الحادثة صدق اتغيرتي .. والتعجرف قام يتملكج .. خلّج على عنادج ... انا ما بتم ألاحقج شرا الجلب .. ميود اللي يحبج بيتم طول عمره يحبج .. لكن ما بذّل نفسي زيادة .. الرب لج حافظ ياااااا شمايل .. (احمر ويهه .. وطاف عنها .. ودخل حجرة الباكستاني .. وهو يدوّر ويا الشرطة وكانت الدمعه في عينه .. وما حس بها .. اما شمايل .. تربع لحجرتها ..) • شمايل : صدقني روحك بتندم .. والله بتندم .. يوم وبترد وانته راكع تباني .. (وتمت تصيح .. وأثبتت التحريات انه الباكستاني هو اللي يضرب المرضى بإبر المخدرات .. ووصل مانع ووياه حسن ..) • مانع عيونه بتنطر من الزياغ : شو السالفة؟ • مايد : ماشي .. • مانع : وليش الشرطة هنه؟ • مايد : انا اعفوني استقالتي وبقدمها اوكي؟ يالله فمان الله .. • مانع : بلاه؟ • حسن : بسير اطالعه .. • مانع يزاعج : ميود رد هنيه • مايد : احينه انا هب على إمرتك !! خلني في حالي أبرك لك .. تبا تعرف شو السالفة اسأل الشرطة والسلام ختام .. • مانع : انا قلت اترد هنيه !! (ومانع كان يستفزه . ويرد ميود بسرعة بخطوات سريعة صوب مانع ويمسكه من ثيابه بكل قوته ) • مايد : انته شو بنغالي؟ ما تفهم؟ (ويضربه بوكس ع بطنه ) • مانع : آآخ !!! الله يغربلك !! (ويروّح عنه ) • حسن يمسك مانع : هد اللعب !! هد اللعب !! • مانع : آآخ الله يهده ان شاء الله .. (وعواس وصل عند الصراف الآلي وكان يطلع البطاقة ) • عواس يغني : صغيرهم يدري بقيمة غلاهم .. لا يمكن تحصله معروض للبيع !! (ويدّخل البطاقة والرقم السري ..) حووووه !! حوووه !! ويّدي بسم الله !! (شو هالأصفار؟ قام يحك عينه ..) كم ؟ 5 ملايين؟ ربي سترك يا ربي !! (وهو يتنفس بصعوبة ) بسم الله الرحمن الرحيم .. بسم الله .. بسم الله .. يالله شكلي احلم .. (ويقرص عمره ) لا هو الرقم اكيد !! (وسحب البطاقة ودخل المصرف وهو عرقان مع انه الجو بارد .. ويتكلم بالانجليزي وانا بترجم لكم ..) لو سمحتي أبغي كشف بحسابي .. • الحرمة : ممكن الجواز والبطاقة؟ • عيسى : اتفضلي .. (وبعد 5 دقايق ) • الحرمة : حسابك بالضبط فهالورقة .. • عيسى ك شكرا .. (ويشوف الورقة كاتبين ..) 5,011,000 درهم يالله ربي تستر .. لو سمحتي ممكن تقرين؟ • الحرمة : خمسة ملايين واحدى عشر ألف درهم إماراتي .. • عيسى معصب : احينه اتظّهرين لي من وين ينّي الخمسة ملايين ... أحينه روحي يالله ب ديني .. كل اللي عندي 11,000 درهم • الحرمة : انته لازم تكون مستانس • عيسى : استانس على بيزات هب بيزاتي؟ • الحرمة : اوكي لحظة .. (شرب القهوة .. وبعدها يابوا له كيكة .. امتعد الريال وهو يتريا .. وبعد 20 دقيقة ) آسفة عالتأخير .. اتفضل عند المدير وهو بيشرح لك • عيسى : ما تقصرين يا بنت الايواد .. (ودخل وسلّم عالمدير..) ممكن تفسر لي اللبس اللي صار؟ • المدير : عيسى هذي فلوسك .. • عيسى : انته بتطلع لي نخلة فراسي؟ انا من وين لي ؟لا احيدني اقامر ولا مرتشي!! • المدير: هذي الفلوس متحوّلة من حساب الشيخ سعيد .. • عيسى منصدم : سعيد؟ وييييييييييييه ما ياء على بالي .. • المدير : اتعرفه؟ • عيسى : ربيعي .. • المدير : خلاص انحلت المشكلة وما فيها أي لبس .. • عيسى : مشكور .. (وطلع وهو في حالة صدمة ..اول ما وصل الشقة ) سعّود ؟ وينك؟ • سعيد : أهّب الثياب برع !! (كان لابس بجامة مال الرياضة ولاف راسه بعصابة مال الاجانب عشان ما يخرّس شعره .. ) • عيسى : عاش عاش !!ليش اليوم دورك؟ • سعيد: صدقني !! يبالنا بشكارة ولا هالمعاناة !! • عيسى : لا بعدني .. استوالي توّة موقف .. والحمدلله ارتحت • سعيد مبتسم : خير؟ • عيسى : خير بويهك .. يتني حرمة عيوز طلابة .. تبا بيزات .. قلت لها ما عندي بس صبري بسحب وبعطيج .. وحوّلت البيزات على حسابها .. • سعيد : عطها فإيدها بعد شعنه العبالة كلها ؟ • عيسى : لأنه المبلغ عود هب صغير .. • سعيد : ليش كم؟ • عيسى : بس 5 ملايين .. حطوهن في حسابي .. مادري منو هالكريم اللي حاط لي .. وعشاني هب محتاي البيزات عطيت هالفقيّرة !! • سعيد منصدم : شوه ؟ اتخبلت؟ (وطاحن الثياب من ايده ) سويتها ؟ • عيسى يهز راسه وهو مستانس : هههههه سويتها ونص .. بلاك يا ريال؟ • سعيد : لاحول ولا قوة الا بالله العلي العظيم !! • عيسى : ههههههههههه دواك تستاهل !! باجر برد المصرف وبحوّلهن لك • سعيد : والله ما تردهن !! وهذي حلفة شيخ !! • عيسى : انا هب محتاي بيزات .. انا جد طلبت منك ؟ • سعيد : ابدا .. سمها مكرمة شيخ وخلاص !! وإبدأ فيها مشروع !! • عيسى : ليش كل هذا؟ لو قلت حق واحد من الشباب سلفني 1000 درهم جان شرد عني .. وأحينه يوم هب محتاي بيزات احصل هب مليون .. خممممسة ملاييين !! يالله بالستر !! ما اقدر ياخي ما اقدر !! • سعيد : تقدر ياخي تقدر ! وانا وياك فأي مشروع !! عواس؟ • عيسى : الله يخليك لي يا خويه !! اسميهم الاخوان قاموا يزيدون .. اول ميود والثاني رشود والثالث حسّون والرابع سعّود !! • سعيد : هيه والله شفت عادة ؟ يقولون اليوم عواس عازمني .. مغتني الريال . وين بتعزمني ؟ • عيسى : اممممم شو رايك ماكدونالد؟ • سعيد : انته بتموت اذا ما مريت على ماكدونالد؟ • عيسى : ياخي ادمان بلاك انته؟ • سعيد : انا كنت ادري انك بتنصدم من السالفة .. اتصلت احجز ومال لقوا حجز غير بعد اسبوع .. موافق؟ • عيسى : خلاص تم .. بيكون عندي وقت آخذ سفرة لأهلية .. • سعيد : احم احم .. في شي بعد !! • عيسى : شو؟ • سعيد : الاخت فطيم .. تركت لك رسالة عالمسن .. • عيسى :شو؟ • سعيد : سوري قريتها .. بسلأاني كنت يالس أخلص شغلي عاللابتوب وظهرت لي رسالة عالمسن وطلعت • عيسى : افا عليك .. انا اصلا كتاب مفتوح جدامك • سعيد : كاتبتلك انه اختك هند ملج عليها واحد راعي دبي .. وف ليلة ملجتها ودّرها .. (وعيسى منصدم ) • عيسى : هنيد؟ هنيد اختيه؟ لا يكون منّوع؟ لالالالا.. لحظة !! (ويتصل ب حسن ) • حسن : سلام عالقاطعين • عيسى : حسون؟ الله يخليك .. ابا اعرف هنود اختيه منو ماخذة؟ منّوع؟ • حسن : لالالا هب هو .. • عيسى: شدراك ؟ • حسن : بس ادري ... • عيسى : هو حذاك؟ • حسن : هيييه وبس جذيه السالفة • عيسى : خلاص بكلمك خلاف .. • حسن : اوكي فمان الله • مانع : حسون؟ ماحيدك اتكلم بنات .. منو علمك هالسوالف؟ • حسن : ربك بعد .. • مانع : اتحمل منهن ياخي ..طوف طوف خلنا انطالع سالفة المنتحر وهذا الهيس ميود !! (وهنود مرّت عليها مي ) • مي : سوري اتأخرت عليج .. بس كنت أتدرب .. (وكانت هنيد تشم ريحة خايسة .. فتشت فأغراض مي في الشنطة ) شو اتدورين؟ • هنود تراويها وفخاطرها : هذا !! يا مسوّدة الويه .. سيجارة؟ • مي : كلهم يدخنون !! السالفة يت علية ؟ وهاي حرية شخصية !! (ويوم وصلوا البيت .. نزلت هنيد وكانت يوعانة .. ما دخلت من جدام .. سارت من ورا صوب المطبخ الخارجي .. وتحس جنه شي يقرصها .. اقشّعر ينبها .. تتذكر يوم كانت ويا راشد في المطبخ .. كان يهّديها ويتفداها وانه كل شي يهون بس الا دمعتها .. اغتاظت ونست يوعها ..) • هنود : والله لأراويك .. (وتربع لحجرتها وتفر عباتها .. وشنطتها ..وطلعت ثوبها مال الملجة وذهبها .. ) • مي : بسم الله طلعن الزيارين !! (ونزلت هنود وسارت برع ورا البيت .. وحطت ثياب الملجة والشيلة المنقّدة حتى الذهب اللي يابه لها .. فرته داخل درام عود ) • هنود: أحينه بعرف اذا انتهيت من حياتي ولا لأ .. (وردت المطبخ ويابت جاز وكبريت وتصب الجاز كله من الغصة وعيونها تحرقها .. خلاف اتلبّق الضو .. وبقّت الضو العودة ..) احينه انتهيت ويا ليتك تنتهي من قلبي !! [COLOR="Black"]( وهي اتطالع الدرام وتصيح .. وزينة تتكلم في التيلفون ..) • زينة : لا يا عيوني توّها واصلة .. وين أنطيج اياها .. نسيتي انها ما اتحجى؟ (واتطالع صوب دريشتها شرا الليت .. وسارت اتوايج وهي اتكلم ويا اليدة الجود ..) أويلي ويلاه !! • اليدة: خير؟ خير؟ • زينة : البنية استخفت جالسة تبجي جنب الدرام .. لا وحارقة ثيابها !! • اليدة: هالله هالله فيها سيري طاعيها دخيل الله عن تسوي شي فعمرها !! • زينة : كاهي دخلت .. خلاص انا راح اكلمها ..وأرد لج خبر.. • اليدة : ردي سوي لي اليوم ..مفهوم؟ • زينة : اوكي.. (وتربع لهنود وتحضنها ) انجنيتي يا بنيتي؟ (وتصيح فحضنها لين هدت.. ويوم هدت..) في سالفة ابي رايج فيها .. (وهنود اتأشر لها مثل شو ) يدة راشد حاجتني من شوي وودها ومنى عينها انها تشوفج ..وودها تتأسف لج عن اللي صار .. حتى راشد نفسه ..وراح يسوون بكرة عزيمة جبيرة.. ..وراح تنامين عندهم في المزرعة كم من يوم مع نشبة وميثاء وشما وامج غريبة كلهم بيكونون موجودين .. • هنود تبتسم وتكتب : خلاص قوليلهم تم .. • زينة تنفرج اسارير ويهها : صدج؟ فرحتي قلبي الله يفرح قلبج .. وانا راح ارتب لج ثيابج .. • هنود فخاطرها : والله لأراويك (اما عند اليدة الجود ) • اليدة : شرات ما وصيتج .. • ندى : افا عليج .. • اليدة : مب يسير يقص عليج؟ انا موول اممرة ما يسمع كلامي .. • ندى : خلاص ولا يهمج .. (وهو توّة داش مستعيل وزايغ على امه ..) • راشد : اميه؟ بلاج؟ وين يعورج؟ • ندى: يابويه فؤداي يعورني .. (يالله بدينا بالفيلم المصري قلبي وقلبي ) • راشد : وايه فديت فوادج .. (ويمسك كرسيها المتحرك .. ويسحبها بيوّديها المستشفى ..) • ندى زايغة : وين ؟ وين موّدني؟ • راشد : الدختر بلاج امايا؟ • ندى : استهدى بالله .. وعيّن من الله خير وودني حجرتي .. • راشد : ان شاء الله .. (وشلاها ووداها غرفتها ..) ليش يا اميه كل هالمسرحية؟ انا ادري هاي يدوه جذيه تسوي .. • ندى تهزبه : ولا كلمة زيادة !! تفهم؟ خلني اتكلم .. احينه ريال يعري طول بعرض وبسمعتك .. تسوي ببنت العرب جذه؟ لو نحن غاصبينها عليك جان قلنا الغلط منا .. لكن انته مختارنها .. ولا وانته تدري بمرضها شو معناتها اذا البنية ما اتكلم ؟ نعمة من الله .. وبلى فنفس الوقت .. • راشد : اميييه ترا البنية ما يعيبها شي تراها اتكلم .. • ندى : يابويه قمت اتخربط الحينه .. أسميك اتهذي .. اسمعني كلمة وما بعيدها .. ان ما هديت هاييجي البنية ما تلوم الا نفسك .. صدقني برد لدار العجزة .. هناك أولم لي بدال مجابل ولدية اللي ما يسمع كلامي .. • راشد : يا اميه كيف بفهمج؟ كيف؟ • ندى : لا تفهمني ولا افهمك .. ورطتنا وورطت اهلها الخيرين والحينه اتحمل النتيجة .. باجر بنحمّل شلايلنا وبنسير المزرعة وانته بتكون هناك .. حرام ان دريت انك شايف ومقابل هذي الهرمة .. اعنبوا مهدود قيدها؟ اكيد كنت ترابع وراها !! • راشد : ان شاء الله على امرج .. • ندى : ان شاء الله شو؟ • راشد : ان شاء الله بسمع الكلام .. • ندى : ومن تشوف حرمتك تستحي على ويهك واتعذّر لها وتيب لها هدية .. • راشد : ان شاء الله • ندى : صدقني وانا امك نحن ما نبا غير سعادتك .. حتى البنية مكسور خاطرها والله اليوم تخبرني يدتك والله اتقطع فوادي عليها .. قامت اتحرق ثيابها وهذا كله منك انته .. • راشد : يا اميه قلبي محتار .. بينها .. هو رايدنها .. بس • ندى : عيل تبا هذيجي اللي تربع وراك؟ يمكن وصلت للبيت ونحن ما ندري؟ • راشد احمر ويهه : ما يصير خاطرج الا طيب.. (وعند بيت حمد ) • ميثاء : غرّوبة؟ شعنه ما بتين ويانا؟ • غريبة : عندي شغل في البنك باجر.. • نشبة : انزين أجّلي السيرة وتعالي بتتونّسين ويانا .. روحه ولدج ضايق .. طول اليوم وهو يصيح .. • غريبة : شو تبيني اسوي يا امايا؟ • ميثاء : طلعي سيري عراسات .. (قصدها اعراس ) • غريبة : وانا ويني ووين العراسات .. كفاية المصايب اللي تنهد عليّة من كل صوب .. • ميثاء : أي مصايب بعد؟ • غريبة : بعد شوه غير بناتي بعيد عني .. وميوه قامت اتفيرط .. شفتيها كيف غدت مكرفونة !! • ميثاء : ويدي غربل الله مذهبها الخايس !! • نشبة: هاي هب من .. ولا جان ما سوّت جذيه .. • غريبة : هاي بنتي .. لا تقولين عنها جذيه .. امايا خذوا رشود وياكم .. واذا في وقت بتصل بمحمد الدريول وبيي عندكم .. • ميثاء : زين يابوج .. عشان يلعبو ويا خواته أسميهم متولهين عليه .. وانتي يا شموس بتين ولا مثل كل مرة بتتعذرين؟ • شمسة : الا امايا بسير وياكم انا وبنتي ... • ميثاء: ويييين اشرقت الشمس !!! • شمسة : يا امايا متضيجين من يلسة البيت .. وكفاية الحفلة البارحية .. من غير بحط عيني على ولد اختييه.. • ميثاء : زين اتسوين .. • نشبة : كم كمّل الحينه؟ • غريبة : بعد يومين بيكمل 8 شهور .. • نشبة : طاعوا الايام كيف تربع .. • غريبة فخاطرها : الا باجر أسير له .. (وميود كان يالس في كوفي شوب في جميرا يطالع الكوب ..) • ....................: وقال مصدر عن امين عام الجامعة الدولية .. (وحس كأنه شي ياكله .. يبا ينبهه ..) • واحد من الشباب : مادري من وين يايبين هالخسيفة ؟ شفتها؟ احينه قلة حريم؟ • والثاني : هي والله صدقت .. اللي يشوفها بيعاف الاخبار .. الا ما بيبطل التلفزيون .. • مايد سمعهم: عن منو اتكلمون؟ • واحد ويأشر : هذي !! صد هني !! (ومايد يطالع التلفزيون .. انه يشوف اخته ميوه بكراعينها .. وتقدم في الاخبار ..) • مايد منصدم : ميوه؟ (ويركب موتر وبسرعة يسير بيت زينة ..) انا براويج يالطفسة يالماصخة يالحاسر !! ( وطلع الخيزرانة من الدبة ..ودخل البيت ) وينها .؟ (ويزاعج ) وينها ام السعف والليف؟ • زينة نازلة : خير؟ خير؟ شبغيت؟ • مايد : بغيت ام الكراعين اللي يطالعونها في التلفزيون !! • فاضل : اطلع من البيت لأزجر الشرطة .. • مايد : هاي عندك المريلة؟ انته ريال انته؟ اتخلي بنتك مكرفونة؟ • فاضل : وخير يا طير؟ لا هي اول وحدة ولا آخر وحدة !! شو حارنك ؟ • مايد : اقولك اختيه .. تقولي شو حارني؟ اعنبوا ما عندك غيرة على بناتك؟ (ويزاعج .. ويضرب بالخيزرانة على الدري ) والله والله تنزلين يالجلبة !! يا ام الرياييل !! والله اني يالس في الكوفي .. (وهي ورا الباب تسمعه وهنود كانت راقدة ..) والله وهذي حلفة انهم يقولون منو هاي العبرة اللي اتلوّع بالجبد .. ومخلنها بكراعينها بعد !! .. (ويخبرهم بالكلام كله اللي قالوه الشباب ومي طلعت بعصبية ) • مي : دامني عبرة وألوّع الجبد .. اصبر علية وانا أوّريك منو اللي بتكون عبرة .. واطلع من بيتي .. لأني لا اعرفك ولا تعرفني .. يوم هذي المخوة ماريدها !! خلها لأختك هنيد !! (وتزاعج ) برع !! • مايد : صدقيني بتندمين على قد شعر راسج !! والله بتندمين .. وان شفتج جدامي قسما بالله وانتي بهالشكل لأقبّض المحناية وأعلّمج التربية من أول ويديد .. محد بيمنعج عن شغلج .. لكن خليني اشوفج حاسر والله ثم والله ما بتسلمين مني.. (وروح ..) • مي : سيرة بلا ردة .. (دشت الحجرة وهي تصيح .. ) طبعا انا العبرة واللي ألوّع بالجبد .. انا خسيفة .. ويوم اقول حق هنود اتجذبني .. لكن من اليوم وساير ما بهتم ف راي حد .. عمري والله ما بهتم وهذي حلفة !!! |
تسلمين ختيه وارقب التكمله |
يسلموووو ع البااااارت الطويييل :) و نتريا البارت الياااي |
ثـــــانكس |
القصصصصهـ رووووووووووووعهـ .. ^^ بليييييييييييييييييز لاتتاخرييييين علينااا .. ^^ وخلي البارت يكون اطول عن جذهـ .. وكبري الخط شوي .. ^^ نتــــــــــريـــــــآآآآآآيج .. ^^ |
تسلميييييييين أختي ونتريا التكمله |
تسلمين غناتي |
تسلميين اختي =] ونتريا البارت الياي |
اختي .. البارت واااااااااااااااايد حيلوو يالله قولي متى بتنزلين اللي بعده ؟ |
الللله الاحدااث حلووه يالله نتريااا الباارت اليااااي متى بتحطييينه |
متى بتنزليــــــــــــنهـ .. ؟؟!! |
tslmeen 3laya ntrya altkmlah Bas bsr3a plz =) |
اختي وييييينج ؟ متى البارت |
اليوم الاحد وماشي بارت يدد ليش؟؟ |
وآآآآآآآآيــــــــــــــد ابطــــــــــــــــيتي .. ^^ نتـــــــــــــــــريآآآآآآآج .. ^^ |
| الساعة الآن 08:07 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir