|
اممممممممم وين التكمله انا بعد تحريت القصه كاامله موجودة ابا اعرف شوة بيصير شكلها ساالفه طويله |
[align=center] الجزء السابع الفصل الأول =-=-=-=عبيد: لحظة لحظة.. أحمد انت مركز فالرمسة الي قاعد تقولها؟؟ أحمد: ياخي هاي ثالث مره اعيد لك السالفه .. نش خل نسير نبلغ.. حور وهي تصيح وحالتها حاله وعبيد لاوي بإيده على جتفها.. : بس عاد .. يقولج مانتشر الشريط .. احمد الي شافه بس بينحل الموضوع .. أحمد: هيه يا حور اطمني اول نسخة عندي وخل نلحق نبلغ عشان ناخذ النسخة الأصلية .. الحمد لله ان الشريط وصل لي.. حور: والله هاي كلها من دعوات امي عبيد: امج ولا امي.. ماتفرق احين خليني اقدر اروح بس .. حور: شو تتريا روح الله يخليك فكنا من الفضيحة هاي عبيد: كيف تبيني اروح واشوف حالتج جي.. انتي جي بتخلين الكل يعرف باللي صاير.. ونحن مانبا نزيد الرمسه فالموضوع حور: خلاص سيروا الله يحفظكم.. بس طمنوني الله يخليكم أحمد: جي سايرين حرب نحن.. عبيد خاطره يضحك بس يحس الموضوع موول مايتحمل مصخره .. يود احمد وسحبه وياه برع وركبوا الموتر بسرعه وراحوا صوب المركز الجنائي يبلغونهم عن اللي صاير.. .. .. فالمركز الشرطي: وين الشريط.. أحمد وهو يمد إيده بالشريط: هذو سيدي.. الله يخليك سيدي بسرعه خل نحل الموضوع مايتحمل تأجيل نبا نحصل النسخة الأصلية.. الشرطي: خلاص انتوا وقعوا على البلاغ هني.. واحين بنجهز دورية وبنسير الصالون.. عبيد: بس بوعبدالرحمن (لأنه ربيعه) مب لازم يكونن وياكن شرطيات؟ الشرطي وهو يضحك: بتعلمني شغلي يا عبيد.. عنلاتك .. ضحك عبيد ووقع هو وأحمد على الأوراق وقعدوا يتريون الشرطي يخلص كل الإجرائات اللازمه.. وبعدها بربع ساعه وكانت الساعه وقتها 8:00 فليل .. جهزوا فريق من الشرطة وتوجهوا صوب الصالون.. وفهالوقت رن تليفون احمد كانت مجد الي متصلة.. أحمد: هلا.. مجد وهي تحاول تخفي صوتها المبحوح.. أحمد طمني شو صار وياكم؟ أحمد: كل خير نحن احين سايرين صوب الصالون وان شاء الله خير لا تحاتين.. شخبار خلود؟ مجد: نشت ومن وقتها وهي تصيح.. أحمد: عنبوكم من بنات بتفضحونا.. عبيد: فضحونا وخلصوا... عنبوكم ماشي مكان تسون فيه شغلاتكم الا هالصوالين.. ماقول غير لاحول ولا قوة إلا بالله.. يوم اني امنع حور تحرطمت علي وبوزت.. واحين فهمتوا ليش انا ازاعق واقول صوالين لا لا لا .. مجد: الله يخليك قول لعبيد مو وقته الي فينا كافينا.. أحمد وهو يأشر لعبيد إسكت.. عبيد: هيه الواحد لا قال كلمة الحق سكتوه... انتوا الحريم ماشي يرضيكن.. عفاني الله.. أحمد : لاحوووووول عبيد وبعدين يعني.. مجد تمت تصيح.. : ها ليش جي حاط علي.. انزين انا شو دراني ان الصالون ها جي.. وملايين الحريم يسيرن صالونات .. كيف بنقدر نمنعهم.. أحمد: المسأله مب مسأله ملايين ولا غيرهن.. كلن عليه من اهله.. وانا علي منج لأنج عرضي وشرفي وسمعة هالعايله مرتبطة فيج.. فاهمه عبيد: فهمها خديه ماتفهم تراها.. شرات اختها .. ابتلشت فيها..ههههه مجد: ها متفيج اخوك والله نحن وين وهو وين يضحك ويسولف.. أحمد: لأن الموضوع دقايق وبينتهي.. من جي ارتحنا.. والي مريحنا اكثر ان الشريط ماوصل غير عندي انا.. بس ناقص النسخة الأصلية وينتهي الموضوع.. مجد: ابا افهم شي واحد بس.. أحمد: خير؟ مجد: انت ربعك كلهم جي لوث؟ صخ احمد وفهم قصد مجد اكيد تنغزه عن سالفة المزرعه.. واحين سالفة الشريط كملت.. : لا مب كلهم لوث.. وهذا عليه هالسوالف ونحن ماندري... واليوم بس الي دريت به.. مجد: عفاني الله.. حد يرابع هالأشكال.. يسترزق من ورا نسخ الأشرطة.. أحمد: يابنت الناس الريال مب مواطن.. وافد كان وياي فالمعهد الي كنت ادرس فيه.. عزمني اليوم عنده الا اشوف الي شفته وبلغت عليه ومسكوه ماخليته في حاله.. واحين سايرين نمسك الصالون.. خلود: انتي ايييييييه ياسه داقة سوالف وياه.. والله متفيجة أحمد كان مستانس وهو يسمع صوت مجد .. حاس نفسه ناسي الموضوع باللي فيه .. وده العلاقة تستمر جي ولا تغير في لحظة.. : انزين انا بخليج لأن وصلنا الصالون مجد: خبرني شو يصير أول بأول.. بندت مجد وتمت سرحانه شوي وهي مبتسمه.. خلود وهي تفرها بالمخدة: والله متفيجة تدرين.. نحن ويييييين وانتي وين.. مجد: هبله انتي هبله .. قالج خلاص انهت المشكلة ليش المناحة بعد.. خلود: توووووبه بعد اطب الصالون.. مجد: هيه والله توبه.. .. نزلت الشرطية ودخلت ومعاها أمر اخلاء الصالون والقبض على الفلبينيه .. من شافتها صاحبة الصالون وهي لابسه الدريس وداشه الصالون خافت.. صاحبة الصالون: خير اختي في شي؟؟ الشرطية: عندي امر بإخلاء الصالون.. ممكن الحريم الي هنا يظهرن من الصالون حالا.. صاحبة الصالون: انتي شو عم بتقولي.. بدك تقطعي رزقنا.. مابتشوفي الزباين مشغولين كيف بدك اياهن يطلعو. الشرطية اطالعتها بنظرة وطنشتها ودخلت صوب غرف التنظيف المخصصه.. ودخلت وكانت الفلبينيه تأدي شغلها مع احدى الزباين.. الفلبينيه: شو هادا مدااااااام .. ماتشوف في كستمر داخل.. الشرطية: اسكتي لا اصمج كف تنسين روحج.. ولو سمحتي اختي لو تظهرين من الغرفه وتكملين شغلج فالبيت لأن هالصالون ماينفعج.. الزبونه: نعم.. شو هالرمسه بعد.. احين ماتبين تتريين فالدور تبين تاخذين دوري.. سيري صالون ثاني جان مستعيله.. الشرطية كانت مطنشة رمسة الحرمه وقاعده تتطالع كل اطراف الغرفة اتدور على الكامرا.. وحصلتها فالمكيف.. لاحظت عدسة الكيمرا من المكيف.. راحت وبندت المكيف وسحبت الكاميرا بقوة وجلعت وايراتها بالقوة.. : عرفتي احين ليش اقولج اظهري الزبونه وهي تمشي صوب الفلبينيه وتيودها من شعرها وتضربها: عنلاتج شو ها بعد الي اشوفه.. يا سواد ويهي.. تصوريني غربلج الله.. يودتها الشرطية وسحبت الفلبينيه منها: شو هاا؟؟ هاا تقولين كستمر بعد هااا الفلبينيه تمت تصيح وخايفه لأنها انكشفت. .. وسحبتها الشرطية وياها وطلعتها من الصالون وطلعت باقي العاملات كلهن وقف على ذمة التحقيق.. وأولهن صاحبة الصالون عشان يعرفن هل لها علاقة بكل هذا.. والزباين طلعن من الصالون مذهولات من الي قاعد يصير.. صالون صارلهن اكثر من 4 سنين بعضهن يتعاملن وياه ويظهر هاي سواتهم.. كانن مصدومات .. وكل وحده توجهت للشرطية تسأل اذا في شريط عنها او لا.. الشرطية: هدن خواتي .. عشان تتعلمن مره ثانيه اشيا بهالخصوصيه لا تسونها فالصوالين لأن مامنهن امان.. خلكن فبيوتكن استر.. وعن الأفلام راح يتم التحقيق ويا العاملة وبنضبط كل الأشرطة ماعليكن.. دام ان الموضوع عندنا تطمنوا. وحده: الله يعطيكم العافيه ويجازيكم ألف خير الشرطية وهي تبتسم لها: افا عليج.. ترا ها واجبنا.. .. عبيد مشى صوب الشرطي: ها بوعبدالرحمن.. شي مطلوب منا.. عبدالرحمن: الموضوع عندنا .. وانتوا اختصرتوا كل شي ويبتوا لنا الدليل القاطع والشرطية شافت الدليل فمكان الجريمة.. فمانبا منكم غير سلامتكم.. وتنصحون اهاليكم لا يوثقون فالصوالين ترا مامنهن امان.. وايد من هالجرايم يتنا عبيد: بس منو يعتبر ياخوي.. عبدالرحمن: مجتمعنا يحتاج توعيه .. والدور عليكم أحمد: يزاكم الله ألف خير على تعبكم .. عبدالرحمن: هذا مب جميل الي سويناه عشان تشكرنا.. بس هذا واجب مهني لا غير.. هالفساد ندوره دواره عشان نحاربه.. ونحد عنه.. يكفي ان ولد عمتك سلطان ماقصر من فتره ودلانا على بيت دلاله والقينا القبض عليها ومازال البحث مستمر.. عبيد وهو عاقد حياته: سلطان؟؟ ليش شو سوى؟ عبدالرحمن: ها ماعندكم خبر عيل.. ماشي بلغنا عن بيت وحده دلاله وقبضنا عليها أحمد يعرف ان سلطان له تعامل مع حريم من هالنوع بس ماعرف انه بلغ عليها ... استانس في قرارة نفسه واكتفى انه يبتسم.. الله يجازيك خير يا سلطان... الحمد لله الله هداك.. وراح عنهم الشرطي وغلقوا الصالون وراح يتم اغلاقه بالشمع الأحمر نهائيا.. هذا هو جزاء كل صالون يكون له مثل هالأمور .. وان كانت راعيه الصالون ماتدري إلا ان سمعة الصالون انتهت... بالتالي الصالون ينتهي.. وبهذا انتهينا من احدى هالصالونات المدمرة فالبلاد.. عقبال الباقي.. وتم القضاء والقبض عليهم والتحقيق واحالة الأمر للمحكمة للحكم عليهم .. .. اتصل احمد في مجد.. مجد: ها طمني.. أحمد: قبضوا عليهم.. وراح يتم التحقيق وبيظهرون كل شي وبينغلق الصالون.. مجد: الحمد لله ... ريحت قلبي الله يريح قلبك.. فهالوقت كان عبيد داخل عند حور فالبيت وأحمد يتمشى فالحوي وهو يرمسها.. ابتسم: قلبي.. تدرين عن حاله .. مجد وهي مصدومه من اسلوب احمد وياها: نعم؟ انتبه لنفسه احمد وصخ وابتسم..: ها .. ماشي ماشي.. استحت مجد وصكت التليفون بلا حاسيه.. احمد مالقى عمره الا هو فالشارع من كثر مايمشي وهو ولا حاس.. ضحك على شكله وهو يشوف العيايز الي مجابل بيتهم يطالعنه ويتصاصرن .. افتشل.. احمد: السلام عليكم خالاتي.. (1) : عليكم السلام اميييه.. اشبلاك تمشي ولا حاس بعمرك.. خير امي شي بلاك مستهم؟؟ أحمد ابتسم لهم: ها لا سلامتكم.. (ويأشر على قلبه) (2) : ام عبدالله اشبلاج الله يهديج.. الولد عاشق.. هاييل هم عيال احين كله يفكرون فالحب.. تم احمد يحج براسه ويضحك.. (1): هييييه والله .. ياولدي خل عنك هالسوالف وفكر في مستقبلك.. ترا هالقلب يتعب وبس ماعنده شغله ثانيه ابتسم احمد وسلم ودخل البيت.. وتم يالس فالحوي وهو يفكر ويطالع القمر كان ليلتها مكتمل والجو كان رووووعه صدق.. الرياح هاديه.. فكر يطرش لها مسج على الأقل يمكن تفهمه من كلام الي فالمسج.. قعد يكتب الكلمات بنفسه (طبعا المسج منقول ماعرف من تأليف منو .. بس اونه احمدوو الي كاتبه خخخخ).. وطرشه لمجد .. الجهة الثانية.. مجد فهالوقت بعد ماهدت خلود وارتاحت وتطمنت عليها .. طلبت من ابوها يردها البيت.. رجعت بيتهم وتوها بتدخل البيت سمعت صوت المسج.. فتحت صفحة صندوق الوارد وكان مكتوب إسم أحمد.. خافت تفتح المسج شو بتشوف فيه.. ياترى شو مطرش لي؟؟ شو كاتب.. كانت متردده تفتح المسج وتقراه.. يلست على المنصه وفتحت المسج صكت عيونها ورفعت راسها وردت فتحت عيونها شافت القمر مكتمل يدامها.. ابتسمت.. واطالعت شاشة التليفون وشافت هالمسج منه.. علامك صرت متغلي ولا تسالني (وشحالك) انا اشهد كلمةٍ منك عن احوالي تريحني لحالي كيف تتركني وتبخل عني بسؤالك وش الي اجبرك (خلي) تصد عني وتجرحني رخيصٍ صرت في قلبك ولا اطري على بالك اذا اني دون قصد اخطيت (رجاك القلب) سامحني ! قرت المسج وابتسمت.. فديته ياربي احبه.. وانا اقدر اصلا.. كنت خايفه اخسره لكن احين.. نو نو مستحيل افرط فيه لطيفه: امييه مجد شو مقعدنج برع ارتبكت مجد: ها.. لا ماشي بس الجو حلو والقمر مكتمل.. قلت ايلس برع اتهوى شوي لطيفه: هيه والله.. الا يدتج اتصلت وتسأل عنج.. قلت لها انج في بيت خلود سلمتج عليج وايد وتقول دوم تدعي لج مجد ابتسمت: الله يحفظها يارب.. انزين امي انا بدخل وبصعد غرفتي.. شي تامريني لطيفه: سلامتج اميه.. دشت مجد بسرعه وهي تربع صوب غرفتها.. ودشت وطلعت عباتها وشيلتها .. وفتحت الأبجورة الي حذال السرير وبندت الليت وفتحت شعرها وطاحت على الفراش وفرشت شعرها الطويل حذالها وقعدت تقرا المسج مره وثنتين وثلاث.. ودورت بين المسجات وطرشت له هالمسج دق الجهاز وخاافق القلب له فـــز فــزّة فرح ماهي مثل كــل فـــزه ،، حي الرساااله وحـــــــي منهو لها دز حي الكلااام الزين واللي يـــدزه ،، اهلا هلا بك ياعزيز معزز ومعتـــــــز واللي يعزّك لازمنّــــــك تعــــــزه استانس أحمد واااايد يوم قرى المسج.. حس ان الأمور بينه وبين مجد قامت تستوي طبيعيه.. وانها بدت ترضى عليه.. رد طرش لها هالمسج من خاطره صوتـــــــــك .. أسرني وصرت بجد "احتـــــــاجه" .. في كل لحظه احسّه مايفاااارقني ..؟ أمــــــــــوت .. ((بجرأته)) وأمــــوت ((بإحراجه)) لك صــوت والله ماغيـــره يروقنــي ..؟ وقبل النهايـــــه .. "طلبتــــــــك" بس هالحاجـــــه .. ياليت ,,هالصــوت,, ليله مايفارقني ..!! .. ابتسمت مجد واعتدلت في يلستها وكتبت له هالمسج لاصــار لك شخص تودّه وتغليــــــــه وحالت ظروف الوقت ((بينك .. وبينه)) حاول وحاول قدر الامكان ترضيـــــــه ومن لايخونـــــك لاتحاااول تخونــــــه .. والحب لامــ، مااات وشلووون تحييـه ؟؟ تقدر على الدنيــا .. تفتح عيونه ؟؟ دوك العبث ينهي حياته وانا انهيــه مثل الشجر لامااات يبست غصووووونه ..! . . فهم مجد انها تقصد الموضوع .. اكتفى انه يكتب لها هالمسج (( خلي ثقتج بولد عمج واعرفي ان تربيته لايمكن تسمح له ينزل نفسه للمستوى ذاك.. وان الموضوع فيه سوء تفاهم.. )) .. من قرت المسج اتصلت في خلود .. بس كان مغلق تليفونها لأنها قبل لا ترقد غلقته.. تأففت وحطت التليفون على الكنبة عندها وبندت الأبجورة وقعدت تتطالع النجوم الفسفوريه الي في سقف غرفتها.. وتتذكر أحمد كيف كان خايف عليها ويكلمها بكل حنان عن المشكلة.. ابتسمت وغمضت عينها الا بالتليفون يرن.. فزت .. تتطالع الرقم شافت ان الي متصل احمد.. ردت وتمت ساكته أحمد: راقدة ازعجتج؟ مجد وهي تعتدل وتفتح الأبجورة: ها.. لا لا .. واعيه.. أحمد تم ساكت وهي ساكته.. كأن كل واحد فيهم يتريا الثاني يتكلم.. أحمد: تبيني ابند ابعدت مجد التليفون عنها وضحكت عالخفيف وتتطالع التليفون وهي مغطيه على السماعه: يعني يا أهبل لو اباك تبند بقول ارمس وخلصني.. احبك.. أحمد: الووووووه مجد: هلا هلا وياك أحمد: وين وياي وانا من ساعه ازقرج وماتردين رقدتي؟ مجد:.. ها لا لا.. أحمد: انزين بغيت اقولج لا تفكرين فالموضوع ولا تحاتين لأنه انتهى .. ومحد درى غير حور وعبيد.. مجد: ادري اتصلت وهزبتني لين ماشبعت.. أحمد: تستاهلين دواج عشان ماتروحين مجد: خلااااااااااص توبنا انا وخلود نروح.. أحمد: بغيت اقولج شي ثاني مجد وهي فاجة عيونها وفي خاطرها تقول.. اكيد بيقول انه يموت فيني ويحبني وبيخطبني ومايروم يعيش بدوني وانه يعشقني وانه يتمناني اكون مرته .. اممم بعد شو.. اوووه خل اصبر واسمع أحمد: ترا انا ماشفت الشريط كله .. بس شفت ويهج انتي وخلود وبندت الشريط على طول.. نفسي مارضت اني اشوف شي.. انتو عرضي وشرفي والي يمسكم يمسني.. فلا تستحين وتحريني شفت شي.. محشومه بنت عمي ماعاش من يشوف شي منج وانا راسي يشم الهوا.. والشريط حرقته بنفسي.. مجد مستانسه انه ماشاف .. ولو انها ماكانت عاريه او شي.. مجرد ايديها كانن مكشوفات وشعرها.. بس كان خاطرها تسمع شي ثاني.. : اهاا لا ادريبك ولد عم ينشد الظهر فيك..تراك فالنهايه شرات اخويه الي مايابته امي.. أحمد وهو يبعد السماعه ويغطيها: شرات اخوج في عينج.. هذا الي قدرتي عليه.. مالت عليج انزين مالت علييييييييييييج افففففف مجد: ألوووووه؟ أحمد: وياج مجد: احين انا الي من ساعه ازقرك وانت ساكت أحمد: لا بس كنت افكر في كلمة اخويه.. مجد: هيه ليش ماعيبتك أحمد في خاطره.. لا ماعيبتني ويا هالويه تتغلين انا براويج.. : خلاص اوكي عيل بخليج عندي خط.. مجد وهي منفعله: ها .. خط؟؟ شوف الساعه كم؟؟ ساعه 12:30.. منو الي بيتصل هالوقت.. أحمد: ربيعي.. مجد: ربيعك.. شو يبا منك هالوقت المتأخر.. مفروض يرقد أحمد: مادري يمكن اشتاق لي وحب يسولف وياي.. مجد كانت ميته من الغيض وقتها ومب عارفه شو تسوي ودها تدخل التليفون وتذبحه : اهااا مشتاق لك.. خلاص اوكي عيل مابعطلك عشان ترمس ربيعك (وهي تركز على الكلمة) المشتااااااق لك.. أحمد كان مبتسم وقتها .. تحبني والله انها تحبني .. والدليل رمستها ولا بعد تكابر ويا ويهها.. شرات اخويه اونه.. : لا مب مشكلة عادي بدق له عقب مجد وهي تغتاض زود وتنش من مكانها وتسير من قهرها تتعبث بالأغراض فالدرج وتسوي حشرة (إزعاج) .. : لا لا يعني بدق له عقب بتقعد ترمسه للصبح .. ربيعك ها... هيه اوكي لا لا انا ببند لأني ابا ارمس ربييييييعتي مطرشة لي مسج توها تقول مشتاقه لي تبا تسولف وياي أحمد فهم انها تبا تغايضه.. وهو زاد هالشي: وحليلها.. خلاص اوكي انتي رمسي ربيعتج وانا برمس ربيعي.. مجد وهي تعض شفايفها ومقهورة.. أحمد: اقول شو هالحشرة.. مجد: ماشي ادور على شي مادري وين حطيته أحمد: هيه خلاص عيل يلا تصبحين على خير.. مجد بربكة.. : بتبند.. أحمد: ترا ربيعتج تباج وانا ربيعي يباني حرام نتأخر عليهم.. مجد: ها لا عادي ربيعتي عادي باجر فالكلية برمسها أحمد: اها اوكي وتموا ساكتين حوالي الدقيقه .. ومجد كل شوي تسوي حركة بويهها وهي تشوف عمرها فالمرايه .. مره تبتسم ومره تحايس بشفايفها ومره تلعب بشعرها ومره تحج راسها.. أحمد: بتمين ساكته مجد: تمللت أحمد: لا بس اشوفج ساكته مجد: لا بس جي أحمد بعفويه ودون إدراك: تغارين علي؟ مجد انصعقت بسؤاله حست ببرودة تسري في كل عروقها .. ابتسمت بخجل وبندت الخط في ويهه واغلقت التليفون وقعدت تتطالع الشاشه: ماحبك انزين.. يقهر ياربي أحمد كان مستانس بالفعل.. حس بحبها وعفويتها وغيرتها.. الله لا يغير علينا .. احمدك يارب .. صح ان المشكلة الي كنا فيها كانت كبيره .. بس مب اكبر من الحب الي بدا ينولد من بينا .. الحمد لله .. رب ضارّة نافعة.. وحط راسه ورقد وهو مرتاح.. ونفس الشي مجد لأول مره تحس عمرها راقده وهي مرتاحه وبالها مرتاح.. .. .. ]] .. .. فطوم: دعيت لنا؟ فيصل: وانا من لي غيرج ادعي له.. نحن في حاجة هالدعاء اكثر من اي ناس على هالأرض.. نبا الله يرضى علينا فطوم بصوت مبحوح: خايفه فيصل.. فيصل: خير من شو حبيبي.. فطوم وهي تمسح الدمعه الي نزلت من على عينها: خايفه فالمستقبل الله يعاقبني ببنتي وتستوي شراتي وتحرق قلبي شرات ماحرقت قلب اخوي وامي.. فيصل سكت.. فعلا هالشي غفل عنه .. وهو بعد ياله نفس شعور الخوف.. ماوده هالشي يصير.. رضا على نفسه لكن مستحيل يرضى على عرضه وشرفه وبنته لا سمح الله فالمستقبل.. : لا يا فاطمة.. الله بيقبل توبتنا ان شاء الله والدعاء اهم شي ادعي في كل صلاة تصلينها وانا نفس الشي بسوي.. صح غلطتج كبيرة.. وغلطتي انا اكبر منج .. لكن الله اكبر من هذا كله فطوم: جاسم احسه كارهني فيصل: على الأقل جاسم اخوج لو زعل منج مستحيل يكرهج .. دمج ودمه واحد.. انا شو اقول.. احسه مب طايق يشوف رقعة ويهي ولا يرمسني .. مادري هالحساسيه الي بيني وبينه لين متى بتم.. .. فطوم: الله يصفي نفسه علينا يارب.. فهالوقت كان جاسم مار من عند غرفة الضيوف الموجودة تحت فالطابق الأرضي.. وسمع همس.. تقرب من الباب وقعد يسمع.. وسمع فطوم وهي ترمس فيصل فطوم: هذا مب اخوي.. هذا ابوي وعمي واخوي وسندي بهالدنيا.. مارضى شي يزعله.. فكيف اكون انا سبب ضيجه وزعله.. فيصل: فطوم حبيبتي هدي عمرج.. سلطان رمسته فهالموضوع.. وقالي ان جاسم اطيب قلب عرفه في حياته وانه يحبج انتي واختج اكثر من نفسه.. مستحيل يكرهج.. هاي فتره تحمليها بسبب غلطتج مثل ما انا اتحمل ثمن غلطتي .. وكل شي بيرد طبيعي فطوم: تباني ارمس جاسم عنك.. فيصل: لا .. انا بإسلوبي بتقرب منه وبخلي النفوس تصفى مابينا فطوم: خايفه ان الحساسيه الي بينكم اتم .. والله مابتحمل اشوف اخوي مايحب ريلي.. اباك تكون اخوه الي مايابته امي.. فيصل: لا تحاتين .. افا يا فطوم توصيني على واجبي فطوم: الله يسهل ويطيب خاطر اخوي علي وعليك.. فيصل : امين يارب.. بخليج احين بس انتي هدي عمرج .. لأني بسير الحرم بس رجعت عشان ارمسج.. فطوم: فديتك والله.. سلم على يدوو وعلى سلطان فيصل: يبلغ ان شاء الله.. مع السلامه فطوم: مع السلامه .. جاسم تأثر من كلام فطوم.. حس ان فعلا هو مصخها في زعله.. اخته تحتاج للعلاقة الحلوة الي بينهم ترجع.. حتى فيصل ريال والنعم فيه بغض النظر عن الي سواه.. تذكر لحظتها شي مهم .. هو انه بعد غلط ولعب على وايد بنات كانن في منتهى الإحترام من أرقى العايلات.. إلا ان طيش الشباب كان مسيطر على تفكيره.. وماحس بعمره الا الباب ينفتح وتظهر فطوم في ويهه الي تيمدت ونزلت راسها ورصت على التليفون كأنها خايفه انه سمع وبيصرخ عليها.. مامرت ثواني الا وتحس بحضن كانت مفتقدتنه من زمان.. دفوة كانت تحس بها منذ ايام نعومه اظافرها.. دفوة انسان حنون وصدر يسع كل حرمانها من الأبو.. ماحست الا انها تصيح بحرقة كبيرة.. قعد جاسم ويلّس فطوم وياه عالأرض وتساند على اليدار وضمها على صدره.. وقعدت تصيح بحرقة جاسم: احبج وربي احبج .. لاتحسبين في لحظة ان اخوج يكرهج.. لو كنت اكرهج كنت يوزتج الشيبة.. وكنت سويت وايد اشيا.. لكن من حبي وخوفي حميتج .. اباج دوم تكونين الأحسن .. ابا الكل يقتدي فيج.. فطوم: جاسم الله يخليك انسى الي سويته خلنا نفتح صفحة يديدة.. خلك طبيعي ويا فيصل انسى انه كان السبب .. ترا اختك بعد لها دور وكانت سبب جاسم ابتسم لها وحب راسها: ان شاء الله .. هاي بوسه ثانيه على راسج بس هدي انتي وكل الي تبينه بيصير.. فطوم: انت اخوي. .وابوي.. وعمي.. وخالي.. وحبيبي.. وكل غالي.. جاسم: الله لا يخليني منج .. الا يسمعون حشرة من صوب الدري... يصدون صوب الدري يشوفون منى نازله وهي تركض.. اعتدلت فطوم في قعدتها ويلست تمسح دموعها.. منى: هيييييييه زين اني لقيتكم هني.. جاسم: ليش في شي؟ منى: هيه .. قصيدة يديدة بديت اكتبها .. عطوني رايكم في بدايتها.. فطوم: ياربيييييي احين لازم نسمعها وهي تقصد انا بسير ارقد عندي مدرسة باجر منى: اوهوووو انتي دوم جي تحبطين معنوياتي الشعرية... ماعندج حس فني مرهف للأسف.. فطوم: مابا لا مرهف ولا شي.. خلني جي احسن.. منى: ااااااااااه يا قيس بن الملوح.. كأنك لم تسمع شي.. ضحكوا عليها وابتسموا لها.. منى: يلا اسمعوا.. صرت ماتسأل عليّه صرت حتى ماتبيني او عسب ما أظلمك اسكت احسن م الكلام .. صرت ماتسأل ودمعي حايرٍ في وسط عيني قلي بالله ودخيلك صاحي حبك والا نام ؟؟ قلي بالله وطلبتك شاللي صاير ياضنيني ؟؟ هو صحيح انك تحبني والا حبك بس كلام ؟؟ هو صحيح انه غلايه لي في قلبك من سنيني ؟؟ والا صارت هالسنه خلاص هي مسك الختام ؟؟ والا يعني غيروك ؟؟ وغيروا خافق يبيني !! والا قلبي والا حبي صاروا مب قد المقام !! (احم احم .. كلمات الغاليه.. جرناسه ) منى: هااااا شو رايكم؟ فطوم يودت الورقة وسحبتها وقعدت تقرا.. منى: عفان الله حتى وهي تسحب الورقه مافيها رقه في الإحساس .. جاسم: ماشاء الله عليج وايد حلو .. متى كتبتيه.. منى: اليوم .. جاسم تقرب منها ويودها من اذنها: هيه ومودرة الكتب والواجبات ومجابلة هالشعر.. مب قايلج تخلين الشعر للويك اند منى: آي آي آي اذني.. انزين لحظة خل اوضح.. وين الدميقراطيه فهالبيت وين.. أمااااااااااه إلحقيني.. جاسم: أمج راقدة لا تزاعجين.. منى: عاد انا يوم اييني الإلهام الشعري ماقدر امنعه .. وان منعته انفجر.. ولا اقدر اركز فالدراسة.. وبعدين.. قاطعها جاسم: بس بس.. رويتر عطتني تقرير كامل حشى.. فطوم: والله عيبتني الكلمات وااااايد اول مره احس فعلا انج مرهفة الحس.. منى: طاعو هذي.. تقول أول مره.. عيل منو الي كل.. ماقدرت تكمل كلامها لأن جاسم غطا ثمها بإيده وتم يضحك عليها ويا فطوم لأنها مع ذلك كانت تحرطم.. وشلاها لين وصلها غرفتها ودر ثمها: يلا نامي منى: افففففف احباط عالمي.. سامحهم ياقيس بن الملوح عشاني.. فطوم وهي تضربها على راسها من ورا.. : سيري ولي انتي وقيس مالج.. ضحكت وصدت صوب فطوم تثاوبت في ويهها: فيه رقاد لا ترمسين ريلج احين رجاء ولا طلعي برع فطوم: اعوذ بالله تثاوبي مناك .. شو ها.. اععععع عليج.. منى: كيفي .. هاي يسمونها حرية شخصيه تابعه للنظام الديمقراطي.. الي سنـ.. فطوم تقاطعها: جب جب.. لوعتي جبدي 100 مره فاليوم اسمع هالإسطوانة.. رقدي وفكيني .. .. .. .. خلود: ههههههههههههه.. يحليلها شيطانه ماشاء الله عليها جاسم: هيه والله .. دومها جي.. بس سوالفها حلوة.. احسها ماليه علينا البيت كله.. خلود: تدري يا جاسم.. دايما كان ودي ان نوره ماتعرس عشان تكون وياي فالبيت .. علاوي صغير وايد وغير جي ولد.. ونوره من خلصت الثانويه عرست.. وسلطان.. دومه ساهي ولاهي.. وخالد .. لا تسأل.. من مشروع للثاني لا يكل ولا يتعب.. جاسم: وجاسم؟؟ خلود: حب الطفولة والله.. كنت متعلقة فيك ليش مادري.. من ايام ماكنا في فرنسا ويا ابوي وانت كنت اتيينا كل صيف.. كنت استانس لمجرد وجودك ويانا.. جاسم: صدق.. يعني انا شي مهم في حياتج؟ خلود: انت كل حياتي.. جاسم: الا تعالي ليش كان مغلق تليفونج كذا مره دقيت.. خلود ارتبكت: ها... ماشي بس ياني رقاد كنت تعبانه وايد .. وخلص الجارج وتبند روحه جاسم: اهااا .. واحين نشيتي متى بترقدين وراج جامعه... خلود: هيه ادري بس قلت لازم ارمس ريلي.. ولا ريلي مل مني ومايبا يرمسني.. جاسم: افاااااا انا امل منج.. انزين تعالي بغيت ارمسج في موضوع.. خلود: خير ان شاء الله جاسم: كل خير.. شو صار بالنسبه للحجوزات عشان اخلص كل شي.. خلود: خلاص فندق ماريوت اوكي موافقه جاسم: يعني باجر الصبح اسير اتوكل على الله.. خلود: هيه توكل على الله.. جاسم: خلاص تم.. وانتي خلصتي زهبتج خلود: والله انا توني بادية.. هالإسبوع الي كنا نتشرا فيه عشان ملجة فطوم.. كنت اتشرى لعمري بعد.. الا تعال على طاري فطوم متى بيكون عرسها؟؟ جاسم: فطوم تقول تبا تكمل سنه فالجامعه عشان تتثبت.. عقب تعرس.. يعني قولي مب هالصيف الي بعده خلود: هيه احسن بتكون كبرت شوي ونضجت اكثر وتقدر على المسؤوليه جاسم: صدقج.. يالله عسى ربي يوفقها ويوفقنا.. خلود: أمين يارب.. جاسم: خلود.. أحبج خلود: لا والله صدق.. ماكنت ادري.. جاسم: ههههههههه يالسخيفه .. خلود: وانا امووووووووت فيك.. جاسم: كيف برقد الليله خلود: وانت مغمض ومرتاح؟ جاسم: ها.. نو نو نو.. مستحيل وانتي بعيدة.. ماقدر.. خلود: اونك عاد... طول عمرك رقدت بعيد عني.. جاسم: بس احين غير.. انتي مرتي.. اتريا الصيف على احر من الجمر.. خلود: لا تنسى تحجز على بداية شهر 7 .. او نهايه 6 .. عشان يكون في فرصة لغايه ماتخلص فطوم من امتحاناتها الثانويه .. جاسم: هيه اكيد ان شاء الله.. خلود: انزين اقول .. هاي بنت البلاد لين متى بتخلي الكاميرا علينا.. ابا اقول كلام ماينقال يدام الناس جاسم: لحظة بسحب فيشة الكاميرا شششششششششششششششششششششششششششششششششششششششششششششششششش شششششششششش انقطع الإرسال عنهم.. .. .. .. في مكه اليده كانت قاعده في ساحة الحرم وتقرا قرآن (بتقولون كيف حرمه عيوز بعمرها تعرف تقرا.. ماعليكم ترا جلثم عيوز فل ابشن.. على ايام قبل كانت تدرس دروس القرآن من شيخ الفريج الي كان يدرسهم.. من يومها وهي ماتركت القرآن في يوم وعشان جي قرائتها تحسنت يوم عن يوم).. تقرب منها ناصر ويلس حذالها ناصر: يدوو ماتبين اييب لج ماي زمزم.. جلثم خلصت الآيه الي كانت تقراها وصدت صوب ناصر: هيه ياولدي تسوي خير الصراحة.. جلثم: ربي يطول بعمرك.. الا وينهم اخوانك.. ناصر: فيصل سار يتصل فالأهل من الفندق وسلطان سار يسأل واحد من المشايخ هناك عن شي .. جلثم: هيه بارك الله فيكم .. لا تضيعون دقيقه من وقتكم هني.. ناصر: إن شاء الله على أمرج.. ونش ناصر يروح صوب ماي زمزم عشان ياخذ له كوب ماي لجلثم.. وهو يعبي الكوب بالماي.. حد دعمه من ظهره وانصب الماي على الأرض صد وراه شاف وحده.. كانت أعوذ بالله مب منظر وحده يايه الحرم المكي الشريف.. : اعوذ بالله من الشيطان الرجيم صدت صوبه الحرمه كانت أفريقيه توها مسلمة شكلها.. وتمت ترمس بلغتها وتخربط وناصر ولا يفهم لها.. وعبا الكوب ماي وسار عند جلثم.. جلثم: مشكور يما.. ناصر: العفوو.. جلثم: شو بلاها كندورتك حد صاب عليك ماي.. ؟ ناصر: هيه وحده افريقيه الله يهديها دعمتني.. يدوو لو تشوفينها شو لابسه بس.. جلثم: هيه يمي من الصبح ماخليت وحده الا وهزبتها ولا يفهمن لرمستيه .. عنبوهن يايات الحرم وكاشفات ريولهن وشعورهن.. يتحرن اعمارهن فالبيت.. ناصر: ترا مشكلتهم يدخلون الإسلام بس ماشي حد يعلمهم الصح من الغلط.. يتحرون الإسلام بس صلاة وصوم وحج وعمره بس.. جلثم: هيه والله.. انزين امي سير شف اخوانك وين استهميت عليهم ناصر: يدووه الله يهديج تراهم مب يهال.. كل واحد ريال شو طوله وشعرضه.. جلثم: هيييه يا ناصر.. بتستوي ابو وبتحس فيه.. الضنا غالي وبيتم صغير في عيني وان كبر وشيب.. اخاف عليكم من ابسط شي والله تقرب منها ناصر وحب راسها: ربي يطول بعمرج ان شاء الله جلثم وهي تشل عصاها وتضربه: مسود الويه ضيعت علي الوقت وماكملت قرايه ولا انت تقرا.. نش يلا قبل لا اعطيك من الزين.. ناصر وهو يضحك.. هههه على امرج.. ونش وتوه بيروح ياخذ له مصحف شاف فيصل ياي من بعيد.. : ها رمست الأهل.. فيصل ابتسم: الحمد لله.. وينه سلطان؟؟ ناصر: سار يسأل واحد من المشايخ عن حكم شي.. فيصل: هيه.. ويدووه؟؟ ناصر يأشر صوبها وفجأة فجوا ثمهم ويربعون صوبها بسرعه.. ناصر وهو يهز اليده ويحركها .. بس ماشي فايده.. بدت تنزل دموعه غصبن عنه..: توها ترمسني توها.. والله ترمسني.. فيصل حس ان مخه مب قادره يستوعب.. وقف عن التفكير.. قعد يطالع بصمت.. الا سلطان يقرب صوبهم ويشوف الحريم ملتمين فهالمكان والي تصيح وتدعي الرحمن.. وناصر شال جلثم على ايده ويساعده فيصل.. ربع سلطان صوبهم.. سلطان: شو السالفه .. بلاها يدووه؟؟ ناصر بصوت متقطع والدموع مغطيه عيونه: مادريبها.. توني ارمسها وسرت شوي عشان اخذ مصحف وارد عنها الا اصد اشوفها طايحة على الأرض والحريم حواليها.. سلطان: نش نش بسرعه خل نوديها.. وبسرعه بلغوا الشرطه هناك .. ويابو سياره من سيارات الإسعاف المتوفره برع .. وركبوا اليده فالسياره .. ولحقوها.. لأقرب مستشفى .. سلطان ماقدر ايود عمره قعد يصيح.. وفيصل افتر راسه.. مايعرف يهدي نفسه ولا يهديهم هم.. فيصل: يا جماعه الصياح بشو بيفيد.. ادعوا ان الله يقومها بالسلامه بس .. ترحموا عليها.. انقض عليه سلطان: انت اييييه تفاول على يدتي بالموت شو.. فيصل: هدي ياريال.. ياخي الرحمه تنقال للحي والميت.. شفيك انت .. ناصر: اخبركم انتوا وايد متفيجين ترا.. يلا دخلو وصلنا المستشفى.. __________________ وبسرعه دخلوا اليده غرفه الإنعاش وقعدوا يتريون الدكاتره برع عشان يطمنونهم.. طلع سلطان المصحف الصغير الي في جيبه وقعد يقرا قرآن.. وناصر راح مسيد المستشفى وقعد يصلي ويدعي.. وفيصل واقف عند باب غرفة الطوارئ وهو يدعي من قلبه.. صح انهم مايعرفونها .. بس يكفي انهم حسوا بإحساس الأم معاها.. كانت تهتم بهم طول هالثلاث ايام الي كانن فيها في مكه ... وشوي يطلع الطبيب.. ربع سلطان صوبه وياه فيصل: ها طمنا دكتور.. الدكتور: والله يا جماعه صابتها سكته خفيفه نتيجة الإرهاق.. وهاي الحاله تصير لكثير من كبار السن الي يجون عندنا فالحرم.. بسبب الزحمه والطواف والتعب .. تصير كثير عنا.. حاطينها تحت العنايه وراح نخليها لمدة 24 ساعه .. فيصل: يعني شو زال الخطر؟ الدكتور: الحمد لله انتوا وصلتوها الوقت المناسب.. وزال الخطر لله الحمد.. وكانت السكته خفيفه.. ما أثرت كثير.. لكن لو كنتوا تأخرتوا كانت بتأثر.. سلطان وهو يتنهد: الحمد لله يارب.. فيصل: بسير ابشر ناصر.. تسلم دكتور وماتقصر الدكتور: افا عليكم انتوا اخوانا وهذا واجبي.. طبطب سلطان على جتف الدكتور: فيك الخير.. الا نقدر ندخل عندها.. الدكتور: تقدرون بس انا افضل ماتدخلون .. لأنها اذا شافتكم راح تتأثر أكيد.. خلوها ترتاح وبعدين.. سلطان: على أمرك دكتور.. ويزاك الله ألف خير.. الدكتور: مأجورة إن شاء الله.. وراح عنهم الدكتور وياهم ناصر.. ناصر: الحمد لله على سلامتها سلطان: الله يسلمك.. ياريال قلبي طاح... هاي امي تدرون يعني شو اميي.. فيصل: وربي الشاهد يا سلطان اني حاس بذات الشي.. ناصر: حتى انا.. سلطان: يالله عيل خل نسير نقعد فالمسيد نصلي وندعي ونقرا قرآن لغايه مايسمحون لنا بشوفتها.. فيصل: يلا سرينا.. وراحوا الثلاثه صوب المسيد الي فالمستشفى وقعدوا فيه.. .. .. .. .. حور: عبيد الله يخليك قول الصدق مانتشر الشريط.. عبيد: يالله عليكم انتوا الحريم اشكثر ترمسون.. وتحرطمون.. ياحرمه قلت لج لا لا لا .. حور: الحمد لله .. وبعدين ليش اتحرج علي.. ماتدري اني حامل واتعب .. عبيد: فدييييتها انا زعلتي.. حور: هيه حتى الياهل الي في بطني يصيح.. عبيد وهو يحط راسه على بطنها: انا اسف بابا ماكان قصدي.. حور وهي تضحك: الله لا يحرمني منك.. عبيد: ولا منج .. شو قالت الدكتوره عن السفر؟ حور: مسموح لي اسافر لأني وقتها بكون في شهري السابع فماشي مشكلة.. عبيد: زين عيل.. لأن بيني وبينج ماكان ودي اضيع الطلعه الجماعيه هاي.. احس اول مره بنتلم.. حور: هيه والله حتى انا نفس الشي.. احس ان زواجنا غير وايد اشيا .. عبيد: واهم شي انج صرتي ملكي.. حور: هههههه لا تذكرني كل ماتذكر موقف زواجنا كيف كان اموت من الضحك.. عبيد: هههههه.. هيه والله كنت عايش في كابوس وحياتج.. حور: لا مب كابوس.. عبيد وهو يسوي حركه جادة بحياته..: اقول حور شو ها الي على ايدج.. حور تنزل راسها وتتطالع ايدها ويستغل عبيد الموقف ويحب راسها.. لأن دوم حور ماتخليه.. تقوله محشوم من انك تحب راسي انت اكبر عن جي.. حور: سويتها ها.. ماعليه احين صدق صدق زعلانه.. عبيد وهو ينسدح على الفراش ويطالعها: ههههه عادي المهم سويت الي في خاطري.. حور وهي تضحك له وتنش عنه.. عبيد: وين سايره.. حور: بسير افتح شعري تعبت وانا رافعتنه.. عبيد: هيه احلى عليج.. حور: عيل مابفتحه عبيد: ياربي هالحرمه اشكثر اتحب اتغايضني.. حور: ههههههههه عبيد: يعلني ماخلا من هالضحكة يارب .. .. .. . فالكلية مجد: يختي انا هالإنسانه مادانيها واحين تنحط وياي فالوورك بليسمنت (التدريب العملي الخارجي).. هند: ههههه .. انا الحمد لله طحت ويا عنود .. احلى من جي ماشي مجد: جب جب .. لا تقهريني .. الله يعيني على ام السعف جواهر.. احس عمري بتضارب وياها طول الوقت.. العنود: انتي ايييه ينيتي.. تبين يحطون لج اف فالتقييم.. مجد: مادري صخي عني.. هند: اقول عنوودوو ماتحلاظين شي.. مجد اليوم نشاطها زايد مجد وهي تشل فايلها وتطلع.. اعوذ بالله حاسدين الميت على موته العنود وهند: هههههههه نهايه البارت.. توقعاتكم.. أحمد ومجد العلاقة إلى أين؟؟ مجد والتدريب العملي.. شو راح يصير؟؟ جلثم فديتها ياربي.. شو الحال عليها؟؟ فيصل وجاسم وفطوم.. هل راح تكون الأمور مستقره من ناحية جاسم.. ام لازالت الحساسيه موجودة؟ شما.. وينها اختفت.. ماذكرناها.. ؟؟ تحياتي MiSs MrMr[/align] |
[align=center] الجزء السابع الفصل الثاني =-=-=-=-= دش سلطان بهدوء الغرفه عن تنش جلثم وتحس به ويزعجها.. بس شافها واعيه.. سلطان: الحمد لله عالسلامه أميييه (تقرب منها وتوه بيحب راسها جان اتدزه) جلثم: قول الله لا يسلم فيك ولا ضلع ان شاااااء الله.. سلطان وعلامات الإستفهام مب فاهم ليش يدته جي تسوي.. : ويديه .. ليش عاد؟؟ جلثم: فقدت شيفتك قل آمين.. ( يعلني ماشوفك) سلطان: لاحول ولا قوة إلا بالله .. يدوووه إشفيج انا سلطان حفيدج جلثم: اشعنه تشلوني من بقعتي فالحرم واتييبوني هنه.. جان خليتوني اموت .. حد اييه الموت فهالأرض ويرده.. سلطان يته ضحكة يود عمره تقرب منها وقاومها هي تحاول تبعده ولوى عليها: افا يعني هالكثر مليتي من شوفتنا.. لج طولة العمر ان شاء الله.. وترا محد يموت قبل يومه ليش تفاولين على عمرج.. انهون عليج تخلينا نتعذب جلثم: لا والله ماتهونون.. عل العذاب فيه ولا فيكم ياعيالي بس والله مناي اني اموت بهالأرض سلطان: الكل يتمنى هالشي .. بس كل شي بإرادة رب العالمين.. جلثم: والنعم بالله.. الا وينهم اخوانك عنك.. سلطان: برع يتريون اسويلهم درب عشان يدخلون.. جلثم وهي تعدل شيلتها: عطني البرقع البسه.. نش سلطان وياب لها برقعها الي كان محطوط على الدرج الي حذالها لبسته.. وطلع سلطان يزقر ناصر وفيصل عشان يدخلون.. سلطان: تعالو.. ناصر من دخل حس كأنه فعلا هالإنسانه يدته.. كان صدق متضايق على طيحتها.. ربع صوبها وحب راسها: ماتشوفين شر يالغاليه.. جلثم: علني افداك ياربي.. الشر ماييك ياولدي.. فيصل: سلامات يدوو(حب راسها) ماتشوفين شر والله ماتستاهلين.. جلثم: الشر ماييكم.. اخبرك سلطان عن تكون بس خبرت هلك اني فالمستشفى.. سلطان: لا افا عليج امي.. ادريبهم بيحاتون وبيتمون يفكرون .. ماقلت لهم شي.. جلثم: هيه ادريبك ساعات بغام تسوي شي بدون تفكير.. (بغام= لا تفهم) سلطان: الله يسامحج يدو ثرج من اول مادشيت وانتي حاطه علي وانا ساكت وناصر وفيصل من دخلو رحبتيبهم.. جلثم: اندوووكم زعل.. يالتوح خل عنك هالرمسه .. (التوح= الجميل) ناصر: اشعلييييييه مدحوه.. بعد شو تبا اكثر عن جي.. شهادة من اليدة تحطها وسام على صدرك.. ابتسم سلطان.. صدت جلثم صوب فيصل شافته سرحان ويفكر ويطالع من الجامه.. جلثم: ثرها البزيه خذت عقلك يا فيصل.. (البزيه= الدلوعه) انتبه فيصل لجلثم واستحى نزل راسه وابتسم.. ناصر: تراه معرس يديد .. ماوحى له من ملج ويبناه هني بعيد عنها وعن دارها.. جلثم: ايييييييه ثرهم العرب ماخذينك عنا.. وانا حليلي ميهوده هني ولا تفكر فيه.. فيصل: محشومه يدووه.. افا عليج.. جلثم ابتسمت له..: تختال عيني جملة أريام ما بين غرس وعاضد الموز وايلا عجيد الريم جدّام لي في الغوى والحسن مفروز (منقول طبعا) صد سلطان صوبها وفج عيونه: أميييييييه من متى وانتي تشعرين جلثم: هييييييييه من ايام المرحوم يدك الله يرحمه.. ومن عقبه ماقمت اعرف اشعر.. ناصر : هييييييه حب الشياب غير بعد جلثم: معلوم حبنا غير يابوي.. عيل شو تحرى شراتكم .. القلب دكان وكل واحد له مكان الكل: ههههههههه.. .. .. نشت شما بكل نشاطها لهاليوم لأن من بعد المقابلة الي اجرتها ووافقوا عليها... قالو لها تباشر بالشغل متى مابغت... وهي من الحماس الي فيها ماتريت اليوم الثاني قررت تباشر الشغل..نشت الصبح بكل نشاط تغسلت وتلبست وظهرت من الغرفه.. شافت عمّار اخوها :. صباح الخير.. ماتباني اوصلك؟ عمّار: لا مشكورة اختي.. بسير بتاكسي عن تتأخرين عن دوامج شما: هيه والله متحمسه.. دعواتك ياخوي.. عمّار: ربي يحفظج دوم يارب.. شما: ويحفظك ياخوي.. مر عمار على امه وسلم عليها وظهر من البيت يروح المدرسة.. وشما سارت عند امها خذت لها كوب حليب وشربته وكلت لها شي خفيف وحبت راس امها وطلعت.. وركبت الموتر.. وهي تبا تحرك الموتر تتطالع من الجامه شافت واحد واقف ورا الموتر اعتفس ويهها وتعوذت من الشيطان.. لاحول ولا قوة إلا بالله.. اللهم طولك ياروح.. ها شو يايبنه عالصبح .. هاي اشكال تتشاهد اصلا.. نزلت من الموتر وقفت مجابلتنه.. : ممكن اعرف شو تبا ؟ هزاع: ياي اصبح بويهج.. شما وهي رافعه حياتها: نعم.. ماسمعت.. تصبح بويهي.. من متى ماحيدك تحبنا ولا تعبرنا.. هزاع: هههههههه لازم احبكم عشان اصبح عليكم.. والله ومغتره بعمرج يا بنت الهندية.. شما: شوف ياولد عمي.. لا تييب طاري امي على لسانك لو سمحت هزاع رافع حياته يطالعها من تحت النظاره الشمسية: انزين وبعدين شو بتسوين؟؟ شما: مابسوي شي بس اطلب منك انك ماتطري امي.. مايخصك فيها.. هزاع تقرب منها وكان موايهها.. وهذا كله كان في حوي بيت شما طبعا.. لأن من فتحت باب الكاراج وهو كان واقف ورا ودخل الحوي.. كان هزاع فهاللحظة جريب من شما ويحس برجفتها قعد يطالع عيونها ومايدري شو يستوي به.. كان يسرح فيهن بشكل غير طبيعي.. : مشكلتج يوم ان امج هنديه تحملي.. شما: يشرفني اصلها شو ماكان.. يكفي انها يابتني وربتني احسن تربية.. وماخلتني احتاج لكم .. هزاع وهو يضحك بإستهزاء: هنديه تروم تدبر أمورها .. معلوم.. هههههه وماقدر يكمل ضحكته الا واتييه صفعه من شما..: قلت لك لا تطري امي .. وراحت ركبت موترها وهزاع واقف مكانه مصدوم.. كأن هالصفعة صحته... ركبت الموتر وتحركت وطلع هزاع من البيت وصكت باب الكاراج بالريموت وراحت.. وركب هزاع موتره وهو بعده على نفس الحاله مصدوم.. تصفعيني يالـ... المشكلة حتى سب ماروم اسبها.. بس انا اراويج بخليج اتيين عندي تترجيني يا بنت الهنديه .. وضرب على سكان الموتر بالقور وهو مغيض.. وحرك الموتر. وصيح ويل فالفريج.. اذى الجيران كلهم سعيد: وذى هالريال.. عنبو لا مذهب ولا أدب ولا أخلاق.. ام سعيد: شو تبابه خله يزول... مأذي الخلق.. ومب مخلي عيال عمه في حالهم الله يعينهم بس.. اركب خل نروح .. سعيد ولد جيران شما.. .. .. وصلت شما الدوام وكانت ربيعتها تترياها... أميره: انتي ايه وينج؟ شما: ليش تأخرت.. أميره: لا مو وايد.. بس وين كنتي؟ شما: يختي ولد عمي الأذيه ياني فالويه أميره: لايكون عرف انج بتشتغلين.. وبيخرب عليج شما: لا مايعرف .. شو يعرفه.. وليش يخرب علي.. ولي امري ولا وصي علي؟؟ الحمد لله كبرت واقدر اشل مسؤوليتي بنفسي.. الوصاية تنازل عنها عمي من زمان.. أميره: يالله الحمد لله.. خل نسير عند المدير عشان يقولج اي قسم حاطينج.. شما: يلا .. تصدقين مرتبكه بس في نفس الوقت متشجعه للشغل ومتحمسة.. أميره: ربي يوفقج صعدت أميره من الدري الكهربائي وتوجهوا صوب مكتب المودير .. وخلال هالمسافه خطفت على عدة مكاتب.. ومعظم الموظفين المتواجدين كانو رياييل.. ابراهيم: اخبرك بوسعود.. منو هاي الي ويا أميره؟ بوسعود: والله علمي علمك.. بس ظني هاي الموظفة اليديدة الي توظفت عنا فالقسم.. ابراهيم: هيه .. الي بتحل مكان عليه .. بوسعود: اظني مب متأكد.. عليه موظفة قدمت استقالتها.. وشما توظفت بدالها.. بوسعود: ابراهيم .. ابراهيموووووو خل عنك هالسوالف وغض البصر عيب عليك.. طفرت عليه لين ما البنت طفرت وطلعت من الدوام.. والدور على بنت الناس.. يوز يا ريال ابراهيم: لاحووووول دومك سيئ الظن فيه.. انا شوي سويت بس اشوف وين سارت.. وبعدين عليه روحها كانت عليها حركات وكل شباب القسم يشهدون بهالشي.. احين موظفة اتييك كل يوم كنها سايره عرس.. والعطر فواح والصوت اعلى منه ماشي.. تتريا الحركة عاد ماتصدق هيه.. بوسعود: ياريال الله يهديها بس انت بعد ماقصرت فيها.. ابراهيم وهو يشغل عمره بالأوراق عشان يتهرب من رمسة بوسعود.. ويغير الموضوع: اخبرك الا معاملة سيف الفلاني.. عندك؟؟ بوسعود يطالعه ويضحك يدريبه يتهرب من الموضوع.. : لا مب عندي.. عند أسامة.. إبراهيم: خلاص بسير اييبه من عنده عيل.. نش ابراهيم من على مكتبه وسار عند اسامه وخذا من عنده الأوراق : هههههههه ياريال خل عنك هالسوالف.. وتوه بيصد عسب يروح صوب مكتبه حس عمره دعم شي.. أميره يودت شما عن اتطيح يوم دعمت ابراهيم: بسم الله عليج.. (من شافت اميره الي الي دعمها ابراهيم تنهدت لأنها تدري بسوالفه).. برهوم ماتشوف.. بالعادة احيدك تركب عيون ورا غير عيونك .. ابراهيم صد وراه شاف شما تيبس تم يطالعها وهي منزله راسها مستحيه.. فيها جمال غريب هالبنت.. العربي والــ .. اممم مادري بس جمالها حلو.. غير.. : ها شو.. اسف ماشفت.. الا منو الي وياج ماعرفتينا عليها صدت شما وتمت تتطالع بنص عين.. أميره وهي تتنهد: اعرفكم على بعض.. هذا ابراهيم.. وهاي شما.. الي راح تحل مكان عليه.. ابراهيم: توقعت سبحان الله.. يالله عيل بتكون فالمكتب الي عندي انتي سيري كملي شغلج وانا بوصلها مكتبها.. اسامه تم يطالع ابراهيم ويقول في خاطره.. والله انك مو سهل يا ابراهيم.. لك بتعرف كيف تدبر أمورك يازلمه.. وينك يا نور لك انا بتمنى شوفك بس مابقدر.. (الأخ سوري ) اميره تتطالعه بعصبيه: مايحتاي.. تعالي شما.. ومشت شما ورا اميره وابراهيم يلس عالكرسي الي عند اسامه: شفت شو سوت.. انا اقول هاي الي اسمها اميره ماحبها.. اسامه: ياخي انت الي بديت وتحمل.. كل باب الو جواب.. ابراهيم يطالعه بنقمه: سير انت الثاني بعد.. بس بذمتك مو حلوة.. اسامه: بتعرفني مابتكلم في اعراض الناس ابراهيم: هذا الي بيجلطني وانا شو قلت.. خلفان: ياريال خلك منه هاي نور مسويه له ازمه.. ابراهيم وهو مهتم: منو نور .. حلوة.. اتداوم عنا؟؟ في اي قسم؟؟ اسامه بدأ يعصب شوي: يا زلمه حل عنا ياااااااه.. شو هاد.. وانت شو دخلك تعرف من نور.. ابراهيم: الشرهه مب عليك.. علي انا الي معطنك ويه.. اسامه: روح كمل شغلك ياه.. مشى عنه ابراهيم وتم يطالع اميره وهي واقفه عند شما وتشرح لها .. يترياها تروح عشان يروح لمكتبه.. الأخ يباله يخلا له الجو.. .. أميره: شوفي شموو.. لا تعطينه ويه ها ماينعطى ويه.. من يشوف بنت يختبص حاله فوق تحت.. شما: لا ماعليج خويتج تروم اتدبر أمورها.. أميره: ادريبج.. يالله عيل شرحت لج شو تسوين وشو شغلتج.. وعند اي سؤال .. للأسف بتنجبرين تسألين ابراهيم لأنه بنفس شغلتج بس طبعا للكستمر الرياييل شما: مب مشكلة لا تحاتين .. وراحت اميره وهي تتطالع شما وتبتسم لها .. غمزت لها وسارت.. وابراهيم ماصدق بسرعه راح صوب شما.. ويلس على مكتبه الي حذال شما بينهم بس حاجز زجاجي عشان يفصل بينهم..وكان الحاجز هذا على طول الطاوله الخاصه فيهم.. يعني تقدر تشوفه ويشوفها لو خوزو الكرسي على ورا شوي.. تعمد ابراهيم يمشي من صوبها عشان يوصل لمكتبه.. ويلس وحرك كرسيه على ورا عشان يكون مجابلها.. : ماتبين اساعدج بما انج يديده؟ شما وهي منهمكه فالأوراق الي يدامها.. : لا شكرا اميره شرحت لي.. ابراهيم: بس اميره ماتعرف كثري .. انا صار لي 3 سنين ونص اداوم فهالقسم فأعرف الشغل عدل.. صدت شما وتعطيه ابتسامه عبيطه..: مشكور.. اذا احتجت شي بسألك ابراهيم: الا شما شو من شهايد عندج.. شما: دبلوم عالي .. ابراهيم: هيه وين درستي شما: التقنية.. ابراهيم: معظم خريجات التقنية يداومن عندنا.. شما: هيه ادري.. ابراهيم: عندج حد من رباعتج هني.. شما: اميره ربيعتي.. ابراهيم: بل.. رئيسة قسمنا عاد.. شما: اخوي انت تداوم هني من قبلي صح.. يعني اكيد عندك شغلات تخلصها للمراجعين.. ابراهيم ويهه انصبغ من الفشلة ورد لمكتبه بهدوء.. قوية هالبنت الظاهر بياخذ مني وقت.. وحس بهمس وراه صد شاف بوسعود: خرعتني ياريال شو عندك.. بوسعود: مبين عن البنت رزينه لاتلعوزها ابراهيم: انتوا منو مشيشنكم علي.. ولا شكلها امي داعيه علي.. ياريال مالعوزتها .. بس عرضت عليها مساعدتي بوسعود: شوف انا قبل لا اكون زميل عمل ترا انا ربيعك واعرفك عدل.. حياتك وموتك بنات وطاريهن.. ضحك ابراهيم وسكت وتم يعابل بالأوراق بوسعود: هذا انت من تسمع الصدق تقفط وتتهرب. .. وبدت شما تتأقلم وتحاول كثر ماتقدر تتعلم الشغل بروحها عشان ماتلجأ لإبراهيم.. وكانت شغلتها بسيطه وهي ذكية تتعلم بسرعه.. .. .. .. .. .. .. . دخل المكتب وحالته يرثى لها.. وتعبان من خاطره .. فيه ضيجة الدنيا كلها.. حط الورقه على مكتب المدير... ورفع راسه المدير يطالعه مستغرب اول مره مايبتسم هالريال.. المدير: دكتور محمد شفيك.. الدكتور: ياحضرة المدير دخيلك لا ترفض لي الإجازة.. صدق متضايق ومنسدة الدنيا فويهي .. محتاج لإجازة. المدير: خير شو صاير قولي؟؟ حد ضايقك فالمستشفى.. الدكتور: لا والله.. عندي سالفه فالبيت ابا احلها.. المدير: الله يعينك ان شاء الله.. بس كم يوم.. الدكتور: خلها اسبوعين المدير: اسبوعين وايد دكتور محمد.. الدكتور: دخيلك هذا اذا ماكان شوي.. المدير: الله يعينك .. خلاص وهاي الإجازة وقعت عليها وطمنا عليك .. الدكتور: تسلم ماتقصر.. مع السلامه المدير وهي ينزل راسه ويهزه: مع السلامه.. وتنهد.. الله يعينك.. طلع الدكتور وهو حاس بضيجة غير طبيعيه.. رن تليفونه ..كان عبيد الي متصل فيه.. رد وهو صدق حاس انه محتاج شخص ثقة يرمسه..: هلا والله بوفهد عبيد: ياريال اسمي بومنصور كم مره اقول لك.. الدكتور (محمد): شدراني عنك كل يوم لك راي.. وتعودنا على بوفهد.. عبيد: لا خلاص تعود على بومنصور.. محمد: ماعلينا كله واحد.. اشحالك؟ عبيد: بخير عساك بخير.. محمد: وين اشوف الخير .. ياخي من يوم ماتوفت يدتي الله يرحمها وانا مب مترقع.. عبيد: خير ان شاء الله شو مستوي.. محمد: الدنيا تغيرت يا عبيد.. الدنيا تخوف عبيد: ياخي فهمني شو صاير خليتني استهم.. محمد: متضايق ياخوي.. عبيد: اخبرك انت وين؟ محمد: ليش؟؟ عبيد: بييك .. محمد: توني طالع من الدوام ماخذ اجازة.. عبيد: خلاص عيل خلك فالكوفي الي دوم نيلس فيه وانا ياينك احين.. محمد: ياريال انت فالدوام عبيد: باخذ اذن ماعليك.. ياينك يلا خل عنك هالسوالف.. مع السلامه محمد: مع السلامه (بند عن عبيد) والله فيه الخير من بين كل ربعي هالإنسان غير.. بقوله مشكلتي يمكن يلقى لي حل.. راح عبيد صوب حور عشان يخبرها انه بيظهر كانت الساعه وقتها 10.. حور: وين بتسير؟ عبيد: واحد من ربعي طالع من الدوام ومتضايق مادري شبلاه.. الدكتور جان تذكرينه حور: هيييييه.. زين تسوي روح له.. عبيد: يلا عيل برجع ان شاء الله نهاية الدوام امر عليج.. (يتصدد وراه اذا في حد وبصوت واطي ) احبج حور ابتسمت له: روح ربي يحفظك.. وطلع عبيد وسار خذ الإذن من عند المدير وخلال ربع ساعه وصل الكوفي.. عبيد: ها بوجاسم تأخرت عليك؟ محمد صد صوبه يضحك من وراه خاطره: لا ياريال ماتأخرت.. بس والله طالع من دوامك .. قاطعه عبيد: ياريال خل عنك هالرمسه وقولي انطق شو فيك.. سكت محمد وتنهد عشان يبدأ يقول الموضوع .. صعب عليه يرمس عن هالموضوع الحساس بالنسبة له.. : اسمعني وانت احكم لو مكاني شو بتسوي.. انا خاطب وحده وعساس بعد ماتخلص هالسنه نملج.. هيه عمرها 23 بس متأخرة فالدراسه واحين تكمل باقي لها سنة ونص تقريبا.. المهم البنت اختي تعرف اهلها اكثر منها.. اختي تيلس ويا اختها الي اصغر وهاي ساعات تيلس وياهم فعيبتها بنت طيبه وزينه وماشافت عليها اي شي.. وقالت لي اخطبها وراوتني صورتها ووافقت (رن تليفونه حطه على الصامت وجلب التليفون) عبيد: رد بلاك محمد: مابا.. المهم.. ورمسنا اهل البنت ووافقوا وكل شي وحددوا يوم الملجة.. المهم انا طلبت من اختي اني ابا ايلس ويا البنت لو ساعه بس اشوفها اذا موافقه ومقتنعه فيه.. يوم الجمعه طلعت ويا اختي والبنت واختها سرنا مطعم تعشينا ويلست وياها .. والأمور كانت تمام وكل شي.. رديت البيت صليت استخاره ياريال من عقبها وانا احس بضيج فضيع في صدري ماعرفت سببه.. لغايه ماصار الي صار يدام عيني عبيد كان مندمج ويسمعه ..: شو الي صار.. ليش سكت.. محمد تنهد: امس دق لي واحد من الربع قالي موتره خربان ويبا حد يوصله مكان دوامه (واحد يداوم فالأمن ومكان دوامه عباره عن بنايه ومافي عليها اي علامه اتدل ان هذا هو أمن الدوله) وعاد انت تدري الأمن وين يداومون.. المهم سرت اوصله وكان شي على بعد بنايتين كافتريا قلت باخذ لي عصير اشربه وانا ساير الدوام .. وعاد سلمك الله كان مسكر وانا تدريبي اذا شي في راسي لازم اسويه.. سرت صوب الكافتريا الي على درب المستشفى.. وقفت اتريا طلبيتي انتبه للسياره الي حذالي تركبها وحده متغشيه وقبل لا تركب الله راد وغشوتها طارت من على ويهها وانا ماكان قصدي اطالع الا كنت صاد ذاك الصوب.. اشوف لك البنت الي كنت ناوي املج عليها .. انصدمت يا عبيد . اشوف الريال لا هو اخوها ولا حد من اهلها مارمت ايود عمري نزلت من الموتر وفتحت باب الموتر عليها لأن السايق نزل سار اييب شي من البنايه الي طلع منها ومن شافتني البنت تصنمت.. قلت لها شو تسوين هني سكتت واسألها عن الي وياها صاخة ولا ترد.. عبيد طلع الريال لا هو من اهلها ولا شي.. و من وقتها احس راسي بينفجر وتوه يوم رن تليفوني تراه هيه الي متصله.. اثق في منو قولي.. يوم ان البنت معروفه بين الي تعرفهم بأخلاقها واخرتها اشوفها طالعه من شقة واحد غريب .. يعني طول الليل كانت عنده فهمني شو معناته ان حرمه تكون عند ريال غريب طول الليل. سكت عبيد ونزل راسه تم يطالع كوب الكابتشينو الي يدامه مب عارف شو يقول لمحمد.. فعلا الموقف صعب.. انسانه كان بيرتبط فيها بس طلعت جيه.. صعب جدا.. : الله يستر بس من هالزمان.. ياريال ربك كشفها قبل لا ترتبط فيها زين سويت يوم استخرت.. محمد: ماعلي من هذا كله احين شو اسوي.. انا مابا افضح سر البنت الله يستر عليها وعلى اهلها.. بس كيف ارجع في كلمتي واطلع انا الغلطان عبيد: ياريال انت انسان لك حق وكلم البنت قولها خل تقول لأهلها انها هيه الي ماتباك وخلاص ينتهي كل شي وقول لإختك تبعد عن اختها يوم الكبيره طلعت جي.. محمد: هيه والله عفان الله.. تهقى هذا الحل.. عبيد:هيه واذا حاولت البنت تماطل وياك تدريبهن البنات كيف.. قولها اي كلمة ثانيه بتقول لأهلها وهي بتجبر تسوي الي انت تباه وخلاص دور لك بنت الحلال الثانيه هاي الله يحبك فكك منها محمد: شو اعرس.. لا لا لا دخيلك.. يوم خطبت اول مره اهلها ردوني (فهم عبيد انه يطري مجد) وهاي الثانيه.. شكله الله مب رايد اعرس عبيد: وليش ماتقول الله رايد لك الأحسن.. عسى ان تكرهوا شيئا وهو خير لكم محمد: والنعم بالله بس تخيل موقفي .. فقدت ثقتي بالبنات يا عبيد والله ماقدر اوثق في اي وحده يوم هاي سمعتها زينه وتطلع هاي سواتها شو تم عبيد: تباني ارمس لك الحرمه تدور لك وحده.. اختك بنت صغيره جاهله ماتقدر تعرف طينة الناس.. خلني اقول للحرمه تدور لك محمد نزل راسه: ياعبيد انا مابا اعرس حاليا شال الفكرة من بالي.. عبيد: خل عنك هالرمسه ياخوي انت مب ياهل .. لاتنسى ان عمرك 26.. ياخي ابا عيالي يتربون ويا عيالك.. وخل عنك .. انت امك الله يرحمها ويدتك متوفيه .. وماعندك حد غير اختك واخوك .. وانا اخوك افا عليك بس.. بخلي امي ولا الحرمه يدورن لك وبلاها هالرمسه الي ماحبها .. ابتسم محمد حس بتفائل شوي: والله ماتدري اشكثر ارتحت.. تدري كنت افكر اخذ البنت واستر عليها عبيد: ياريال اشلك بالمصايب.. البنت الي تقريبا صارت على ذمتك دامك خاطبنها ماحشمتك هذا وانت يالس وياها يعني عرفت انك جاد.. كيف تباها تفتح بيت واتديره.. محمد: هيه والله.. ورن تليفونه مره ثانيه ورد عليها وماعطاها مجال ترمس.. : سمعي يا بنت الناس.. انتي فدرب وانا فدرب.. لا انتي من ثوبي ولا انا من ثوبج.. والي شفته يسدني اني اعرف عنج الي يكفيني... واليوم ترمسين هلج تقولين لهم ماتبيني مابا اطلع انا الغلطان .. ولا ترا والله اعلم هلج.. خليني ساتر عليج .. واختج ماترمس اختيه فاهمه.. يلعن هالأشكال.. وبند الخط في ويهها.. ونزل راسه حاس بهم على قلبه تذكر مجد لحظتها.. ربي يوفقج ويرزقج بولد الحلال الي يقدرج... طبطب عبيد على جتفه: ياريال ماتستاهل انك تزعل عمرك عشانها واحمد الله ان مافات الفوت ولا صار ملجة.. وبس خطوبة.. وعادي ياما ناس خطبو وفسخوا.. هز راسه محمد وهدا شوي.. ونشوا سوا تم يتمشون شوي.. عبيد: ياريال انا اليوم بعتمد على ذوقك محمد: عبيد صدقني بتكرهك الحرمه انا موول ماعرف فهالسوالف.. عبيد: خل عنك يالله عاد.. نسيت يوم كنا في استراليا ماخليت شي ماخذته لإختك وكل الأشيا كانت غاويه.. محمد: ههههه ماتنسى شي.. عبيد: يالله خل ندخل. دخلوا سوا عند داماس وتم يطالع محمد فالأطقم.. هو طبعه يحب الديزانات الكلاسيكيه البسيطة.. وشاف طقم بسيط وحلو.. : شو رايك في ها.. صد عبيد صوب الطقم وفج عيونه: ايا اللوتي وتقول ماعرف.. وماسوا سالفه على طول طلب الطقم وخذاه.. كان رووووعه بالفعل.. .. . . . . .. محمد: مبين عليك وايد تحب مرتك.. عبيد: هيه والله يا محمد.. الحمد لله الله عطاني على قد نيتي وخذت الإنسانه الي كنت اتمناها.. يوم اقولك عسى ان تكرهوا شيئا وهو خير لكم.. تحيد حالتي وانا متضايج بسبب هالزواج الغريب... لكن شوف الصدف الإنسانه الي حبيتها طلعت بنت عمي الي مادريت عنها الا يوم عرسي.. محمد ابتسم له: تستاهل يابوفهد.. عبيد وهو عاقد حياته: انا شوقلت لك.. بومنصووور ياخي افهم.. محمد: اوه اسمحلنا نسينا ياخي لا تلومنا.. عبيد: ههههه.. رن تليفون محمد فهالوقت وكانت الساعه 1:00 الظهر.. عبيد: خل نسير نصلي فالمسيد قبل لا تفوتنا الصلاة وخلاف بسير ارد الحرمة من الدوام.. محمد يأشر له اوكي ويرد على التليفون كانت اخته دانه.. دانه: محمد.. شو هالخبر الي اسمعه.. صدق.. معقولة؟ محمد: لحظة لحظة شو السالفه؟؟ اي خبر؟ دانه: توها متصلة فيه جواهر وتقولي انها ماتباك صدق هالكلام؟ محمد: هيه تفاهمت وياي اليوم وقالت لي.. وانا ريال ماجبر البنت علي.. برايها الله يوفقها دانه: بس كانت وايد تمدحك عقب ماشفتوا بعض ورمستوا بعض.. محمد: يابنت الحلال يمكن غيرت رايها تصير.. دانه: اي تصير يا محمد.. شو هالرمسه اقولك البنت كانت تمدح فيك تعرف يعني شو تمدح فيك محمد: سمعيني.. البنت ماتباني شفيج.. خلاص كيفها.. دانه: لاحول ولا قوة الا بالله.. حتى توها امها رمستني قالت لي يابنتي ماشي نصيب بنتي من الصبح تصيح وتقول ماتبا اخوج وتعتذر وحالتها حاله.. محمد: الله يوفقها.. وسمعيني تنسين علاقتج بإختها دانه: شووووو.. احين البنت ماتباك شو ذنبها لطووف اودرها؟؟ محمد: دانه سمعي كلامي وبس لا تناقشين قلت لج هالبنت ماتماشينها ولا ترمسينها خلاص.. الي مايبانا مره مانباه ألف.. واذا نفس اخوج رخيصه عندج رمسيها وفضليها علي.. دانه: محشوم.. تعرف ان مالي غيرك فالدنيا من بعد وفاة امي ويدتي.. محمد: الله يطول بعمر ابويه بعده عايش لنا.. دانه: امين يارب.. خلاص عيل ترد البيت بنتفاهم محمد: هاي الي يبيلها ضرب شو نتفاهم عليه انتهى كل شي.. دانه: اوكي اوكي.. المهم الغدا بيجهز تأخرت باكل عنك محمد: ترومين انتي بس .. دانه: انا وابوي وحمد يوعانين مافينا نتريا وايد.. محمد: انزين انزين حشرتينا.. ياي فالدرب.. وبند سار المسيد يلحق على عبيد عشان يصلي الا عبيد كان مخلص صلاته.. عبيد: تو الناس.. محمد: شو اسوي اختيه وصل لها خبر الخطيبه ومحتشره.. عبيد: هههه الله يعينك المهم انا بسير عن اتأخر على الحرمة.. وين الجيس.. محمد يمد له بإيده الجيس: .. يالله مع السلامه واسمحلنا عطلناك عبيد: لا افا عليك من زمان ماقعدنا هالقعدة ولا تحوطنا.. استانست بالعكس.. محمد: تسلم والله فيك الخير.. ونعم الأخو والله.. وسار عنه عبيد عشان يمر على حور ويردها البيت.. من وصل الوزاره نزلت له حور وركبت الموتر.. حور: السلام عليكم .. عبيد: وعليكم السلام.. اشحالج حبي؟ حور: بخير دامك بخير.. عبيد وهو يحط ايده على بطنها: والبيبي.؟ حور: بخير فديتك.. صدت تحت عند ريولها شافت كيس داماس.. شو ها عبيد؟ عبيد يبا يسوي فيها مقلب.. ويسوي عمره مرتبك: ها.. لا هذا مال.. مال ربيعي.. وشله بسرعه وفره ورا.. تمت تتطالعه حور بنص عين وهي عاقدة حياتها ..: انزين ليش تقولها بهالطريقة جنك خايف من شي.. عبيد: ها.. خايف.. من شو يعني بخاف مثلا.. حور: متأكد.. انزين خلني اشوف لأن البكس مب مغلف.. عبيد: عيب الريال ناسيه فموتري تبين تشوفينه عيب عليج .. حور وهي معنده: مايخصني ابا اشوف.. وعبيد مامنعها شلت الجيس وطلعت البكس .. البكس لونه اسود مغطى بالمخمل الأسود من الداخل.. لازم تشيل القطعه المخمل عشان تشوف تحته الطقم.. وكان فوق هالقطعه بطاقة من شافتها حور تمت تتطالع عبيد من طرف عينها اذا هو يطالعها بس عبيد تعمد يسوي عمره مايطالعها وقف شيشة بترول وتعمد انه ينزل على اساس انه بيشتري شي.. وهي استغلت الفرصة.. .. .. وفتحت البطاقة بسرعه عشان تقرا إلي فيها.. ومن فتحته قرت الكلام الي فيه فجت عيونها متفاجئة وتصد صوب الماركت الي فالشيشه وهي تشوف عبيد والدموع ماليه عيونها.. وهو يبتسم للريال الي يشتغل داخل ويعطيه بيزات .. .. طلع عبيد وهو يضحك في خاطره يتخيل موقف حور .. ركب الموتر وصد صوبها شافها منزله راسها وهي تتطالع البطاقة وتنزل دمعه منها على البطاقة وشافها.. مسك ويهها وصده صوبه: ليش هالدموع حبي.. حور: ندمانه.. عبيد فج عيونه مصدوم.. لا يكون مافهمت ان البطاقة لها وطلعت غبيه؟؟ : ندمااااانه!!!.. على شو؟؟ حور: اني في لحظة حسيت بالغيره وشكيت فيك.. حب عبيد ايده وحطه على خدها.. فديتها انا الي تصيح.. : انا كنت ابا هالشي اصلا.. شوية تغيير لازم كله حب مايستوي.. حور ضحكت غصبن عنها.. وصدت صوبه وبعيون محمره وكلها حب..: والله اني احبك.. والله.. ومشكور الطقم واااااااااااايد روعه عبيد: تعرفين متى بيستوي روعه؟ حور: متى؟ عبيد: يوم تلبسه أحلى وردة بهالكون.. والي هي انتي.. نزلت راسها وردت البكس فالجيس ويا البطاقة.. .. .. .. . لطيفه: مجـــــــــــــــــــد.. مجووووووود مجد كانت فغرفتها فوق وماتسمع صوت امها.. عبدالعزيز: شفيج ياحرمة تزعقين.. صوتج وصل عند الييران لطيفه: بنتك ماتيي بحط الغدا عبدالعزيز: يحليلها اميه كانت دوم تزقرها .. لطيفه: هيه والله محد يروم عليها غير أميه عبدالعزيز: بسير ازقرها.. صعد عبدالعزيز فوق وسار صوب غرفه مجد.. وكانت ترمس فالتليفون.. : يا هند افهميني ماتحمل هالبنت.. هند: انزين انتي طنشيها مجد: الله يستر ولو اني مب مرتاحة.. هند: متى بتبدين.. مجد: ورا باجر.. ترا باجر اليوم المفتوح للكلية.. ان شاء الله.. هند: هيه ويانا يعني.. وفهاللحظة دق ابوها الباب.. : مجد حبيبتي مجد : اقول هندوو اخليج احين اهلي يبوني هند: خلاص اوكي. باي.. مجد: مع السلامه .. شو باي بعد.. هند: ههههههه ان شاء الله يدوو.. وبندت الخط وفتحت الباب لأبوها وحبت راسه..: فديتك ابويه ياي لهني ومتعني جان قلت لي بنزل لك.. عبدالعزيز: ليش ياي لغريب.. انتي بنتي قطعه مني.. ماعلي من هذا كله.. نزلي غدا.. امج من متى وهي تزقرج.. مجد: والله ماسمعتها.. عبدالعزيز: تراج تهذربين فالتليفون لازم مابتسمعينها.. مجد: هههههههه اقول انا بعد.. وطلع ابوها قبلها .. وهي سارت صوب المنظرة ترتب كشتها .. ااقصد شعرها.. وتوها بتظهر سمعت صوت المسج .. راحت تشوف المسج.. كان أحمد مطرشه لها ليتك تمر اليوم عندي واحاكيــكـ واقولك من كثر شوقي علومــي حتى القمر لو تطلبه قال لبيــــكـ يخضع وتخضع من وراه النجومــي ماسرق قلبي غير حبك وطاريـــكـ اشتاق لك حتى وانا في حلومــي .. عاد مجد مايحتاي استانست من المسج وايد.. ردت عليه بمسج (( اليوم بنيي بيتكم )) .. استانس احمد من الخاطر يوم قرا المسج.. واتصل في ربيعه الي كان متفق يروح وياه السينما.. أحمد: اخبرك بوعابد.. اسمح لي عاد اليوم ماروم اخاويك.. بوعابد: خير ان شاء الله شو المانع؟ أحمد: ماشي شوي الأهل يبوني فشغلة ضروريه .. فماقدر.. بوعابد: ماعليك.. السينما موجودة هههههه مابطير.. خلاص نأجلها ليوم ثاني.. أحمد: اسمحلنا ياخوي عاد بوعابد: افا عليك بس.. نزل احمد من غرفته وسار عند امه.. يحاول يسحب منها الرمسه ويتأكد من الخبر.. أحمد: حد بيينا اليوم؟ ميثا: ليش اميييه هالسؤال؟ أحمد: ماشي بس اسأل.. اشوفج تعابلين فالمطبخ.. ميثا: هيه عمك ومرت عمك بيونا.. أحمد: هيه حياهم الله.. زين انا ساير حجرتي شي تامريني.. ميثا: سلامتك اميه بس لا وصل عمك انزل.. أحمد: اكيد ان شاء الله.. وصعد احمد غرفته وهو مستانس حده.. وتم يرتب لحيته بنفسه ويكشخ تقول معرس..ماصدق صفا له الجو ويا مجد شوي.. ورن تليفونه فهالوقت كان جاسم متصل فيه.. جاسم: اشحالك بوشهاب؟ أحمد: بخير يعلك بخير.. شو هالإتصال الغريب... جاسم: ياخي جي تستقبل ضيوفك.. انف عليك.. صار لي ربع ساعه وانا فبيتكم ولا تنزل تسلم علي.. أحمد: صدق.. والله ياريال محد قالي.. جاسم: يالله اندوك عرفت احين.. أحمد: خلاص نازل احين ان شاء الله.. بند عن جاسم وتم يطالع عمره فالمنظرة.. تذكر مجد.. ليش ماخطبها وتصير خطيبتي رسمي.. بس انا بعدني ادرس.. مابا اكون صغير في عينها.. وهي دامها تباني بتصبر اكيد.. لا لا مابستعيل تو الناس علي.. الا هاي اخر سنه بخلصها وبشتغل وقتها بخطبها.. وبسرعه شل تليفونه وتعطر وظهر من الغرفه ونزل الميلس.. كان ريل عمته شيخه موجود وجاسم.. وسلم عليهم.. وخلاف سار الصاله عشان يسلم على عمته لأنه من نزل شاف حريم مادقق منو الي موجود استحى وطلع على طول.. احمد: السلام عليج عموو.. شيخه: خوز عني .. مسود الويه تخطف من يدامنا ولا تسلم.. أحمد: حقج علي عموو والله ماكنت منتبه منو بالضبط خفت لا يكونن الحريم الي يعرفن امي .. شيخه: عنلاتك ماروم ازعل عليك.. اشحالك؟؟ أحمد: بخير يسرج حالي عمتيه.. اشحالج عموو ام جاسم.. ام جاسم: بخير يعلك بخير.. أحمد: تسلمين.. ها العروس اشحالج.. ؟؟ ( يقصد خلود) .. خلود: انا عروس؟.. بعده يدامي شهرين.. أحمد: بتغدين عروس تراج.. حور: احم احم... نسيتني .. أحمد: اوه مرت اخوي هني اسمحي لي مانتبهت.. حور: معلوم ابويه مابتشوفنا خلاص صرنا مال اول.. أحمد: افا .. افا والله افا.. انتي نور المكان كله كيف ماشوفج.. ميثا وهي تضربه على جتفه: استح عويهك تغازل الحريم .. يالله سر عند الرياييل وخل عنك الرمسه الماصخه هاي.. الكل ضحك على احمد ومشى صوب الباب واول مافتحه الا مجد بويهه نزلت راسها.. وهو تم مبهت يطالعها.. يعلني افدا هالويه لا خليت منه يارب.. احبج يابنت الناس.. لطيفه: يعني مابتخلينا نخطف ولا شو؟؟ ميثا: ادخلي ام حور ادخلي.. هالولد مادري بلاه من الصبح وهو حالته مب طبيعيه.. لطيفه: هههههه هاييل هم شباب هالأيام.. أحمد: اشحالج عموو؟؟ لطيفه: بخير ربي يعافيك.. أحمد: ماعليه زعلان منكم ماتحبوني ادري.. من اول مادخلت عليكم وقابضيني بشراع وميداف.. مجد: من شطانتك اكيد.. أحمد من سمع صوتها تم يدور على مصدر الصوت ويطالعها بإبتسامه: مب اقل عن بعض الناس.. لطيفه: هيه والله مطلعتلي قرون هالبنت.. أحمد وهو طالع: ويييييييو حطو عليها.. يالله استلموها بدالي انا بروح.. وطلع قبل لا يسمع تعليق اي احد.. والكل تم يضحك.. ومجد صح تغضيت بس ماتقدر تنكر انها تحبه.. وسارت قعدت عند خلود.. : انتي جب.. ماترمسين.. خلود فاجة عيونها تتطالعها: انا نطقت اصلا عشان تقولين هالرمسه.. ولا لا يكون ترمسين السكنيين الي وياج.. مجد: هي هي هي.. سخيفه.. ماحبج.. اتصل فيج ماتردين ويا هالويه.. خلود وهي تتدلع: ارمس ريلي مب فاضيه .. مجد وهي تسوي لها حركة بإيدها: مالت عليج مصدقة عمرج.. خلود: الا تعالي.. (تيودها من اذنها ومجد تتعور وتصكر عين من العوار).. شو هالنظرات الي بينج وبين احمدوو؟؟ شو صاير.. مجد وهي تضحك .. : طاعوو هاي الشيطانه تدقق مايفوتها شي.. خلود: لا فديتج مايفوتني لأني اعرف نظراتج قبل كيف واحين كيف.. فرق 180 درجة.. مجد قعدت تقول لها سالفة المكالمة .. واستانست خلود لها من الخاطر.. وطلعوا تموا يتمشون فالحوي ويسولفون.. ومن عقب دخلو بيت حور قعدوا يطالعون الصاله وجي عشان ياخذون راحتهم فالرمسه والسوالف.. وشافت مزهريه محطوط فيها ورود طبيعيه.. سارت صوبهم.. ويودت ليها وردة تحاول اتطلعها من المزهرية .. . .. . وطلعت الوردة.. خلود: انتي ايه جنج ماشايفه ورد في حياتج شو تبين فيها الوردة.. مجد وهي تتطالع الورده وتحايس بثمها: بعطيها عرب .. خلود وهي تهز راسها: هيييييييييييه احين عرفت.. وكيف بتعطينهم ان شاء الله.. مجد: انتي بتساعديني طبعا.. خلود: وكيف ان شاء الله لاتقولين ازقره واعطيه اقوله هاي من طرف مجد.. شرات مرسول الغرام مجد: لا لا افا عليج مب لهالدرجة.. خلود: ها عيل لأي درجة؟؟ مجد وهي تضحك وتتطالعها: جاسم.. خلود: نعــــــــــــــم.. شو قلتي .. عيدي ماسمعت.. مجد: جاسم ريلج.. خلود: لا لا لادخيلج مايحب هالسوالف .. تبينه يحرج علي.. لا دخيلج.. سيري روحج وعطيه مجد: اففففففف بنت عمه مامنها فايدة.. خلود: وانتي بنت خال ماوراج الا المشاكل.. مجد: دبه.. خلود: دبه انتي.. مجد: انتي.. خلود: قلت انتي وجب.. مجد: ان شاء الله .. ويلست تفكر وتفكر.. لغايه ماقررت انها تغامر وتحطها فغرفته.. خشت الوردة في مخباتها.. ودخلت البيت وشافت الكل يالس فالصالة ومنشغل فالسوالف.. صعدت الدري بروحها لأن خلود ماطاعت تروح وياها.. وتمت تتطالع الحجر.. شافت وايد بيبان.. احتارت ايهن غرفة أحمد.. شافت ممر يوصل لغرفة.. قررت تروح له.. ومشت وفتحت الباب شوي شوي.. وشافت صورة كبيره معلقة على اليدار لأحمد.. وكتب واغراض على المكتب واللابتوب.. عرفت انها غرفته.. سبحان الله قلبي دليلي دليت غرفته بالضبط.. ومشت صوب المكتب وطلعت الوردة وحطتها له.. وتمت تتطالع خطه واوراقه.. حليله الله يعينه.. وشافت تليفونه.. فهاللحظة الشيطان لعب براسها.. وماشي تبا تشوف التليفون.. ويلست على كرسي المكتب وناسيه ان في أي لحظة احمد ممكن يدخل.. وفتحت صفحة المسجات وقعدت تقرا وتشوف كلهن مسجات شبابيه نكت.. على سوالف.. على رمسة هن كاتبينها.. وتمت تتطالع الأرقام.. وكلهن ارقام مسجلة بأسامي رياييل.. ودورت على رقمها لقته مخزن بإسم.. عديل الروح.. ابتسمت وهي تقرا الإسم الي مخزن رقمها به.. وعقب دشت على الإستديو تشوف الصور.. شافت صورة فجت عيونها.. واحمرت من العصبية.. وغيضت من الخاطر.. وشوي الا تسمع صوت باب وراها ينفتح (باب الحمام اكرمكم الله) من الزيغه طاح التليفون من ايدها.. وصدت وراها شافت احمد الي تم مبهت .. معقوله هاي هيه ولا انا يتراوالي (يتهيأ لي).. : شو تسوين هني. مجد رفعت حياتها وتتطالعه بغيض: ممكن اعرف متى مصورني هالصورة؟؟ احمد كان معصب كيف تدخل غرفته وتفتش فتليفونه بصفتها منو؟؟ لو بنت عمه.. لو يحبها بس بعد مالها حق.. : اولا مالج حق تمسكين تليفوني .. بصفتج منو ؟؟ تمت مجد فاجة عيونها مستغربه من اسلوبه: وانت بأي حق تصورني وانا ماعرف.. أحمد: عاد منو قالج انا مصورنج انتي.. كنت اصور علوو ولد عمو شيخه وانتي كنتي وراه ويوم وقفت الصورة كنتي مسويه هالحركة بويهج.. مجد وهي رافعه حياتها: يعني مدقق فالصورة بعد.. أحمد يود التليفون وسحبه من ايدها: تبين التليفون ماعندي مانع اعطيج اياه بس استئذني.. لكن هاي الحركة ماحبها.. مجد عرفت انها غلطانه فعلا مالي حق انا اشلي اصلا داشه احط الوردة بعد شو هالحركة البايخة.. : انا اسفه بس ياني فضول.. سامحني ممكن أحمد يطالعها ووده يضحك: مسموحه.. وطلعت مجد على طول دون لا تنطق.. سخيف .. بس احبه..بندت الباب وراها.. أحمد صد صوب الطاوله ولاحظ الوردة.. عرف ان من صوبها استانس وايد.. بسرعه ياب كوب وعباه ماي وحط الوردة فيه.. وصور الوردة وطرشها لمجد وكتبت تحتها (( عشان ماتذبل الوردة )) استانست وااااااايد مجد من شافت الصورة.. ربي لا يحرمني منك .. .. أم جواهر: أميه انتي مقتنعه من الرمسة الي تقولينها؟؟ جواهر وهي حاسه بغصه: هيه مقتنعه امييه.. مارتحت له ماباه .. لا تغصبوني دخيلكم أم جواهر: عراحتج امييه نحن مخلينج عراحتج ومحد بيغصبج.. بس أميه الريال ماينعاب دكتور ماشاء الله عليه جواهر: يعني لو دكتور لازم اخذه.. ماباه امييييييييييه ماباااااااااااااااااااااااه ام جواهر تمت تتطالعها مستغربه.. شو بلاها هالبنت.. : خلاص اميه هدي عمرج.. ونشي كلي لج لقمة من رديتي من الكلية وانتي ماتبين تاكلين.. جواهر: مب يوعانه اميه دخيلج خليني روحي.. وترا من يوم الثلاث ببدأ تدريب العملي ام جواهر: ربي يوفقج يابنتي ويرزقج بولد الحلال الي يستاهلج.. ابتسمت جواهر لأمها .. وطلعت من غرفتها .. تمت ساكته وهي قاعده على سريرها.. افففففف يقهر يعني احين مايباني لأنه شافني طلعت ويا واحد شو مسويه جي.. تحريت عقله متفتح.. اووووووه وانا الغبيه ليش ماتغشيت عدل.. خله يزول شو ابابه.. يحكرني في بيت شرات ماحاكر الهبله دانوو.. خلني اعيش حياتي .. شو رايكم بهالمفاجئة...!!! مجد وأحمد بيستمرون على هالحال.. دوم يتضاربون ويتصالحون؟؟ ولا الحب سيد الموقف؟ جواهر عرفتوا سالفتها.. كيف بتأثر على مجد؟؟ عبيد وحور كناري القصة؟؟ شما وشغلها اليديد.. وتصرفات هزاع؟؟ محمد كيف تتوقعون تكون حياته .. هل موقف جواهر بيأثر عليه؟؟ .. [/align] [align=center] تحياتي MiSs MrMr[/align] |
[align=center] لجزء الثامن الفصل الأول =-=-=-=-=-=-=-=-= مجد: هههههههه.. هندووو خوزي عني والله اني بموت من سوالفج.. هند: جي انا شو قلت.. انتي على الدقة ضحكتج.. مجد: هههههه شو اسويبج.. هند: اقول ونحن هالبازار مسوينه لمنو ان شاء الله؟؟ مجد: انا قلت لكم فكرتنا بايخه .. شو رسم على الأيادي ومادري شو العنود: هاتي ايدج برسم عليها. مجد: ماحصلتي حد غيري يعني.. وليش ماقلتي العنود.. العنود: مادري جي خاطري ارسم على ايدج هاتي.. مجد وهي تمد بوزها أونها تتدلع : مابا تسحب موزه ايدها بالغصب واتييبه صوب العنود.. : انتي ماتيين الا جي مجد: موزووو شوي شوي على ايدي.. هند: عدال مادري عاد ايدين منو مجد: يكفي انها ايدين مجد.. العنود: شو تبيني ارسم.. مجد سكتت يلست تفكر وتفكر.... ابتسمت وتتطالع عنود : اكتبي حرف A هني (تأشر على ظهر إيدها) .. وهني حرف .M فهاللحظة تموا مواز وهند يحيون : اوووووووووووووووووه.. شو السالفه منو A مجد تمت تضحك وهي ساكته.. هند: اونج تستحين.. مجد: اصصص خل عنودوو تركز عن تخرب ايدي.. موزه: لا الا تقولين لنا منووو مجد: بعد ربكم .. ربيعتكم عاشقة.. ههههه هند وموزه يببون ويصفقون :عاشوووووووو.. العنود: ماعليكم اكيد ولد عمها .. مجد وهي رافعه حياتها وانتي شو دراج العنود: يختي انا اعرف قوانين بيتكم البنت لولد عمها .. بعد مايبالها.. مجد وهي تضحك: يعني انتوا ماروم اخش عنكم شي.. كلهم مره وحده: لااااااااا مجد: بل بل كلتوني.. العنود: ها خلصت شو رايج.. مجد حطت ايدها على الفايل: ها بنات شو رايكم حلو صح.. . ][/ . هند: رووووووووعه موزه: انا ماحب هالسوالف.. بس حلوو . وطرشت الصورة بإم إم اس لخلود.. الي من استلمتها اتصلت.. خلود: طلعتي مب هينه .. مسرع ماحبيتوا بعض.. مجد: لا ماحبه بس جي اسوي اكشن يدام رباعتي خلود: هاي الي ترفع الضغط.. حوووووووه.. انتي... ترا انا خلوووووود مجد: مصييييييبه ماروم اخش عنها شي هالبنت خلود: هههه مفضوحة يدامي انا بالذات مجد: مشكلة.. انزين خلودوو انا صدق صدق متملله من الخاطر شو رايج نظهر اليوم.. لا تقولين بظهر ويا ريلي بدوسج فبطنج.. خلود: بل بل دفشه عفان الله.. لا ريلي اليوم معزوم على عرس ربيعه.. خلاص بستأذن منه وبنظهر مجد وهي تضحك: اوب اوب .. هههههه بتستأذن بعد.. انزين المهم الساعه 5 تجهزين فاهمه.. خلود: ان شاء الله عمووو.. يالله خل الحق بسير الكلاس مجد: ويييييو نحن عندنا يوم مفتوح خلود: اسمع الحشرة .. انتوا ناس بلا هدف عايشين مجد: عدااااااال يا أم الأهداف انتي خلود: هيه باقي لي سنه وبخلص ان شاء الله.. وبوصل لهدفي مجد: اخبرج ترا انا بعد باقي لي سنه .. خلود: ههههههه افف ياربي ماروم اغايض هالبنت الا والرد زاهب مجد: ههههههه يالله مع السلامه خلود: مع السلامه. .. بندت مجد عن خلود وخشت التليفون عن يشوفها واحد من المدرسين ويسحبونه عنها.. واندمجت بالسوالف ويا البنات سمعت صوت وراها يزقرها.. توها بتصد .. قبضت العنود ايدها: خشي ايدج ماباها تشوف مجد رافعه حياتها: ليش منو؟ العنود: جواهر مجد:وععععع.. مابصد جواهر: ماتسمعيني شو.. العنود: مشغوله تبا ترسم على ايدي.. ماتشوفين الإعلان الي معلق.. نرسم على الأيادي.. جواهر: ماشي شغل اشوه ايدي الحلوة.. ماعليه باجر بنتلاقى فالتدريب اوكيك.. يلا بااااااااي مجد وهي تصد وتشوفها وهي تمشي : مالت عليج.. (تقلدها) باجر بنتلاقى فالتدريب اوكيك.. موزه: ماعليج منها تولي.. مجد: ماعندي سالفة اهتم فيها.. خلني استانس.. اقول اسحبوا من ازابيل .. خخخ ابا العوزها شوي وقعدوا البنات يستانسون في يومهم الحلو فالكلية.. .... .. . خوله: اخبرج حور انا عندي موعد فالمستشفى عشان الحمل.. بسير وبرجع اذا حد سأل عني قولي له سايره وبترجع حور وهي تبتسم لها: ان شاء الله.. خوله توها بتطلع جان تذكر شي وتصد صوب حور: قبل لا انسى.. بنت عمي ميرووو عازمتنج على عرس اخوها وليد.. حور: متى العرس؟ خوله: اعتقد الخميس الياي.. حور: يصير خير للخميس.. يلا سيري عن تتأخرين. طلعت خوله ودخل وراها خليفه المكتب ومعاه اوراق..: السلام عليج حور وهي منزله راسها: وعليكم السلام.. خليفه: اشحالج؟؟ وشو الشغل اليوم وياج؟ حور وهي تصد تتطالعه بإبتسامه خفيفه: انا بخير الحمد لله.. وشكلك تبا تعطيني شغل.. هات لأن ماعندي وايد اوراق خليفه: لا ترا لازم اراعيكن انتي والحرمه.. بعد حوامل مافينا.. حور تضحك: عاد حامل بس مب اني ماروم اشتغل.. عطني وماعليك.. خليفه: حور بغيت ارمسج في موضوع اذا ممكن.. حور: تفضل اقعد وقول خير ان شاء الله ... خليفه: والله مادري كيف ارمس فالموضوع بس صار لي فتره وانا متضايق من هالسالفة.. وماعرفت ارمس ويا منو.. تدرين ماعندي اخت ولا اخو.. وحيد امي وابوي.. حور: هيه نعم.. بس خير اشغلت بالي ارمس.. خليفه: امي.. حور: بلاها خالوو عشبه؟ خليفه منزل راسه ويتنهد كأنه هم كبير مب قادر يطلعه بسهولة.. : امي تباني اخذ حرمه على خوله.. حور تفج عيونها عالآخر.. : شوووووووو.. وليش بلاها خوله ضايقت خالو بشي؟ خليفه: لا حشى وانتي تدرين كيف خوله ويا امي.. وحتى امي تحبها وايد.. بس تباني اخذ بنت عمي لأن ريلها متوفي في حادث وماعندها حد لا ابو ولا اخو.. فتباني اخذها.. حور: وانت شو رايك.. خليفه: انا بين نارين يا حور.. نار رضا امي علي.. ونار خوله ومشاعرها.. مب عارف كيف اتصرف فهاللحظة دخل عبيد .. شاف خليفه قاعد مجابل حور وهي منزله راسها وتسمعه وهو يطالع يدامه وهو يرمس.. الله يزيد من امثالك يا خليفه .. ويزيد من امثالج يا احلى وردة في حياتي.. : هااا شو السالفه بتفنش حرمتي؟ صد خليفه صوبه منصدم لوجوده .. ولوهله سكت بعدها ابتسم: خرعتني ياريال.. ماشي كنت ارمس ويا حور فالموضوع الي قلت لك عنه.. قلت هيه حرمه ويمكن يكون عندها حل.. عبيد: يا ريال سو الي قلت لك عليه.. انت علاقتك ويا خوله مش زوج وزوجته بس.. انتوا اقرب من الإخوان لبعض.. ودومكم على تفاهم ماشاء الله.. وشوف هي شو بتشور عليك.. لأن هالأمور لا انا ولا حور ولا اي انسان ثاني يقدر يقولك شو تسوي فيه.. ابتسمت حور: كنت بقولك نفس الرمسه ياخوي.. شرات ماقالك بوعيالي.. شاور خوله .. وهي انسانه عاجل وفاهمه.. خليفه: بس خايف من ردة فعلها.. حور: قلت لك انسانه عاجل وفاهمه.. يعني مب ياهل بتقبض شنطتها وبترد بيت ابوها من تسمع السالفة.. ابتسم خليفه: الله يريح قلبكم شرات ماريحتوا قلبي.. استئذن ومابعطلج زود عن شغلج حور: لا افا عليك.. طلع خليفه من مكتب حور وتقرب عبيد وقت مجابلها: اشحالها ام عيالي.. حور وهي تبتسم له وتمسك القلم وتتطالعه: بخير يا بوعيالي.. عبيد: هههههه يوم اسمع كلمه بوعيالي احس عمري 40 ولا 50 حور: هههههههه.. ربي يخلينا لهاليوم ونشوف عيال عيالنا ان شاء الله.. عبيد: آمين يارب.. يالله عيل بخليج قلت اطل على مرتي وغناتي وارجع مكتبي.. حور: انا خاطري اتصل يدوو اتطمن عليها.. عبيد: اتصلي في سلطان .. حور: ماعرف رقمه.. عبيد: بطرش لج اياه بمسج واتصلي.. حور ابتسمت له : مشكور.. عبيد: كله ولا يكون شي في خاطر قلبي.. وطلع عبيد وثواني الا المسج واصل عند حور الي على طول اتصلت على رقم سلطان.. وقالت بتلعوزه شوي.. رن اول مره محد رد.. اتصلت مره ثانيه رد عليها.. سلطان: ألووو.. حور وهي ترقق صوتها: ألووو.. سلطان رفع حياته ونش من عالكرسي عن تسمع يدته شي وتهزبه.. صد فيصل صوبه مستغرب.. واطالع ناصر الي كان راقد عالكنبة.. سلطان: نعم اختي بغيتي منو.. حور: اونك جدي .. اباك انت.. سلطان: استحي على ويهج متصله على تليفون ريال غريب وتقولين هالرمسه.. حور: وليش ماقول هالرمسه.. تراني اباك انت.. وانت مب غريب.. سلطان: اخبرج اذا انتي فاضيه وما وراج اهل ولا عندج مذهب فإسمحي لي.. قاطعته حور بضحكتها: انا حور بنت خالك ههههههههههههههه.. سلطان وهو قافط.. : اويه اسمحي لي بنت خالي ماعرفتج.. حور: ههههههه والله ضحكتني .. ومعصب بعد.. سلطان: قلت يمكن وحده من الفاضيات.. حور: افا عليك انت بس.. اشحالك ربك بخير ان شاء الله؟ سلطان: بخير ربي يعافيج .. اشحال خالي ومرت خالي؟؟ وعبيد؟ حور: كلهم بخير يسلمون عليك.. سلطان: الله يسلمهم.. حور: ها متى الردة ان شاء الله.. سلطان: ان شاء الله الجمعة فليل.. حور: عيل بتكملون اسبوع مب 10 أيام.. سلطان: هيه ان شاء الله ترا متصلين فيه من الدوام طالبيني والحمد لله حصلت حجزت وجدمت كم يوم.. << طبعا سلطان جذب عليها .. هم جدموا الرحلة عشان يدتهم ماتتعب زود.. حور: يالله بالسلامه ان شاء الله.. الا وين يدوو متصله اسلم عليها .. سلطان: خلاص عيل بلغي سلامي للأهل حايه اماره من هني؟ حور: هيه دخيلك ودي في ماي زمزم.. سلطان: تامرين افا عليج.. واختج ماتبا شي حور: بقولها تتصل روحها سلطان: لا دخيلج .. ههههههههه .. حور: وافضيحتاه الكل يعرف شطانتها.. سلطان: ههههه مع السلامه حور: مع السلامه مد سلطان إيده بالتليفون ليدته.. جلثم: منو امي؟ سلطان: حور.. جلثم: ويه عطني عطني ارمسها.. علني افداها اشتقت لها ولإختها حور: السلام عليج أمايه.. جلثم: وعليج السلام.. هلا والله مرحبا بهالصوت.. ربي لا خلاني منه يارب.. حور: فديييييييتج والله اسميني ولهانه عليج جلثم: انا اكثر والله.. حور: أمايه دعيتي لي؟؟ جلثم: دعيت لج وللكل .. ربي لا يخليني منكم كلكم.. حور: الله يخليج لنا ويعطيج طولة العمر يارب.. وتموا يرمسون شوي ومن عقب بندوا الخط.. فيصل حس إنه مشتاق لها.. وده يدق بس الساعه كانت 12 الظهر .. يعني فطوم بعدها مارجعت من المدرسة.. مشتاق لها هالبنت.. طرش لها مسج ماهو بخل لو ماجاك مكتوب وماهو ثقل لو الصوت ماجاك ولوتاه الشوق لا تقول ملعوب صدقني كلي انا فدى رضاك لكن وقتي غالب وأنا المغلوب وأنا ظرفي على حبك تحداك ومنى وعد من عشقك ما أتوب ومستحيل قلبي في لحظة ينساك .. بس ماوصل له التقرير لأن تليفونها كان مغلق.. . ------------ شما: بوسعود لو سمحت عندك قلم لأن قلمي كان عالطاوله مادري وين سار.. ابراهيم رز ويهه: انا عندي.. بوسعود عطى ابراهيم نظره سكته .. بوز ورد مكتبه.. : هيه عندي تفضلي.. ومد ايده بالقلم وخذته شما.. : مشكور. ابراهيم يبا يدور سالفه يفتحها مع شما بس مب لاقي.. يخاف تقفطه وعاد الي حواليه يتريون هالمواقف عشان يضحكون على إبراهيم.. كانت شما منهمكة ومنزله راسها.. سمعت صوت من صوب ابراهيم مب غريب عليها.. صدت شافت هزاع .. فجت عيونها .. : ياربي هذا شو يايبنه هني.. بوسعود كان وراها سمعها ترمس..: خير شما بغيتي شي.. شما وهي تصد صوبه بسرعه خايفه ان يكون هزاع سمعها بعد..: ها لا ماشي.. استغرب بوسعود بس سكت ورد مكتبه.. . هزاع: ياخي مذله انتوا كل ها عشان رقم مرتب.. ابراهيم: انا قائمه الأرقام الي عندي هذي.. تبا ارقام مميزه ادخل عند المدير وايد احسن.. هزاع: يعني لازم شغل مذله ادخل عند المدير وغيره.. ابراهيم وهو طفران وماله خلق يرمسه .. يحس به دمه ثجيل هالإنسان .. : شو نسوي مابيدنا شي.. هزاع: احسن لي بسير عند الي حذالك اكيد الحريم مستعدات يساعدن اكثر عنكم .. هني غيض ابراهيم بس يود عمره لأن مافيه ع حشرة الدوام بيطلع هو الغلطان لأنه اساء المعاملة مع المعاملين.. واما شما من سمعت رمسته شلت لها اي ورقة وكانت مساكتهم بالجلب ونشت من عالطاوله وسارت صوب مكتب أميره بسرعه من الزيغه.. مافيها عالفضايح فالدوام وتوه صار لها ثاني يوم.. هزاع: صد صوب ابراهيم وهو يطالع ظهر شما الي تمشي بسرعه: وين سارت هاي.. ابراهيم استانس يوم شما نشت .. حس بها تشردت.. بس استانس يوم انها قفطت هزاع.. : ماتشوفها سايره صوب مكتب المسؤوله.. اكيد عندها شغل وبعدين هاي يديده ثاني يوم لها ماتعرف للشغل هني وايد.. هزاع: اصلا الحريم شو يعرفن عشان يعرفن هالشغلات.. لو يقعدن فالبيت ابرك.. يلا عيل مشكور ماقصرت.. ابراهيم وهو يطالع شاشة الكمبيوتر الي حذاله: حياك الله.. أسامه صد صوب ابراهيم: شو هاد خيوو.. لك بيحكي كتير هالزلمة.. ابراهيم: صخ عني زين يوم نش والله اني شوي وبتهازب وياه اسامه : ولو يا زلمه روق أعصابك مابيسوى هيك.. ابراهيم: تكفى لا تلومني .. هالنوع من المتعاملين مادانيهم.. وفي هالوقت صد صوب مكتب أميره شاف شما وهي اتطل من المكتب كأنها تجيك اذا في حد او لا.. وخايفه من شي.. هالبنت شو وراها.. ليش من قال هالريال يبا يروح صوبها شردت.. ههههه مسويه عمرها شريفة مكه ومن ذاك الصوب تعرف الريال تخاف تنفضح يدامنا.. هاي هيه السالفه اكيد.. يلست شما عالمكتب تتنهد.. وصدت صوب بوسعود: بوسعود ياخوي هالريال الي توه كان عند ابراهيم روح ولا بعده.. بوسعود: اظني لمحته روح.. ليش في شي؟؟ شما: ها ماشي.. بس اخاف منه.. بوسعود عقد حياته: وليش ضايقج بشي؟؟ شما بصوت واطي وكأنها خايفه انه يكون موجود ويسمعها: ها ولد عمي وعلاقتنا وياهم مب طيبه ان شافني هني مابيمشي السالفة ع خير.. بوسعود: لاحول ولا قوة إلا بالله.. ماعليج ان ياج مابيروم يسوي شي .. اطلبي السيكيوريتي وماعليج.. شما ارتاحت لبو سعود.. مبين عليه ريال عود وعاقل وحشيم.. من جي كانت مرتاحه شوي وهي ترمس وياه.. : تسلم .. ابراهيم كان وده يسمع شي بس ماقدر لأن شما كانت مخفضة صوتها.. .. هزاع نزل وهو كان يمشي صوب موتره مر صوب مواتر الموظفين .. لمح موتر مب غريب عليه.. تم يدقق عليه وعالرقم عرف راعي السياره.. فارت اعصابه.. حس كأنه دمه يفور وده يدخل الإتصالات ويجلبها فوق تحت ويطلعها بس يود عمره وسار صوب موتره وقرر العصر يروح لها البيت ويشوف شو الموضوع.. ركب الموتر بس حس نفسه مو قادر يتحرك من المكان دون مايشوفها.. صد صوب الساعه وشافها الساعه 2:30.. قرر انه يتم يترياها تطلع مهما كان الثمن.. وهي الساعه 3 تخلص من الشغل وترد البيت.. ومرن هالنص ساعه كنهم دهر على هزاع.. اتصل فيه اخوه حمدان.. × حمدان اخو هزاع الكبير.. عمره 32 سنه.. انسان طيب ومسالم ومايخصه في اي شي .. ماخذ من طبع عمه بو شما.. وكان يحب عمه وايد ودوم يروح بيتهم يوم صغير من ورا ابوه .. لأن مرت عمه كانت وايد ادلعه.. اسلوبه غير عن ابوه وهزاع انسان دين وقمة فالأخلاق.. ويحترم الكل وعمره مانظر لمرت عمه انها اقل عنهم او شي.. دوم يوم يشوفها يحبها على راسها ويحترمها× حمدان: هلا والله بالقاطع.. هزاع: اهلين.. حمدان: شوفيك ترد بهالطريقه مب من عادتك.. هزاع: اسكت عني مفوّل حدي.. حمدان: خير بعد شو من مشكلة صايرة لك؟ هزاع: مب الا لي.. لنا كلنا.. حمدان: لا احين بديت احاتي.. شو السالفه فهمني؟ هزاع: بنت عمك المصون.. حمدان: اي بنت عم؟ هزاع: ياربي .. كم عم عندك عشان تسأل.. شما بنت الهندية.. حمدان: عيب عليك هالرمسه .. بنت عمك هاي هزاع: ماعلي المهم.. سودت ويهنا.. حمدان بدا ياخذ الموضوع جد: كيف فهمني؟ هزاع: اتداوم في اتصالات.. حمدان: انزين وشو سوت هناك؟ هزاع: هذا الي بيرفع ضغطي.. مايفهم.. ياخي اقولك اتداوم .. يعني تشتغل ونحن ماعنا بنات يشتغلن.. حمدان: لا انت ولي امرها ولا وصي عليها البنت بالغه وراشدة مالك شور عليها.. وخير لو اشتغلت ترا وايدات يشتغلن مابلاهن شي هزاع: ماعلي من الباقي .. المهم هاي بنت عمنا يعني اسم عايلتنا فهمت.. حمدان: يا هزاع مالك شغل فالبنت .. انت تدري ان ابوي تنازل عن وصيته عليهن.. ولا نحن لنا علاقة وياهن ذاك الزود عسب نتحكم فيهم خلها هزاع: انت اصلا دومك جي بارد مايهمك الا نفسك.. ماعلي منك .. الشرهه علي انا الي اخبرك اتحرا قلبك يحترق على اسم عايلتنا شراتي حمدان: حشرتنا ترا.. البنت ماسوت شي غلط انت مكبر الموضوع.. وانا حرمتي تشتغل مافيها شي هزاع: اه اه .. وقف هني .. حرمتك شو تشتغل؟؟ مدرسة يعني وسط حريم.. مب في وسط رياييل في شركة مثل اتصالات.. حمدان: اخبرك الكلام ضايع وياك.. بس نصيحة لا تسوي لعمرك مشاكل انت مالك حق عليهن عشان تمنعهن.. هزاع: اخبرك بند هذي يت بأدبها وبند الخط قبل لا يسمع رمسة اخوه.. ونزل من موتره بسرعه مشى صوبها .. وقبضها من ايدها قبل لا تفتح باب السياره.. : تعالي هني وين سايره.. شما من شافته بهتت.. وكان ابراهيم توه طالع من باب مبنى الإتصالات وصد صوب الباركنات شاف شما وهي ترمس هزاع.. وهزاع قابضنها من ايدها ويسحبها.. وهي ترمس بصوت عالي شوي.. شما: ودر ايدي .. مالك شغل فيني .. ايييي ايدي.. هزاع ماسوالها سالفه وغصبها تدخل سيارته.. وكان ابراهيم يطالع الموقف ويضحك.. والله البنات حركات مسويات اعمارهن شريفات مكة بس الله يفضحهن.. ولع الصلب وسار صوب موتره وهو يضحك.. .. فالسياره عند هزاع: والله ان تحركتي من مكانج ولا طلعتي من هالباب ادعمج بسيارتي ولا يهمني شي.. خافت شما ويلست وهي تمسح دموعها ومنزله راسها.. وخطر على بالها سلطان.. المره الأولى فالمزرعه هو الي حماها منه .. بس هالمره مب موجود.. حاسه نفسها وحيدة.. ولازم تحاربه بروحها.. شما وهي تمسح دمعتها.. : ممكن اعرف شو فيك تسحبني جي؟؟ شو مستوي؟ هزاع: منو سمح لج تشتغلين؟؟ شما من سمعت هالرمسه حست بحرارة جسمها ترتفع.. وغيضت ولا اراديا علا صوتها: ليش اشتغل؟؟ ترا من كثر ما انتوا ماشاء الله مب مقصرين علينا.. كافي خذتوا نصيبنا من الشركة الي كنا بنسترزق من وراها.. والبيت الشعبي الجديم الي يدي وصاه لأبويه كنا ناكل من ورا اجاره.. لكن احين شو عنا؟؟ امي ليل ونهار تسهر تسوي هالبخور وهالعطور وتبيعهم عشان تقدر تعيشنا بدون لا نحتاج لحد.. خذت لي هالسياره بالكم فلس الي ابوي ورثهم امي.. وتقولي ليش اشتغل؟؟ لا اخو كبير ولا عم ولا عيال عمومه ينشد الظهر فيهم.. عرفت انا ليش اشتغل احين؟؟ هزاع ماعرف ليش هو سوى كل هذا .. هو نفسه مب لاقي تفسير لتصرفه.. الكلام الي قاله لـ حمدان روحه مب مقتنع فيه.. وهالشي الي خلاه يسمع رمسة شما كلها.. : وانتي تهقين انه مسموح لعايلتنا ان البنت تشتغل وسط الرياييل.. منقود يا بنت الناس.. منقووووووووووود.. شما صدت صوب هزاع الي كان موقف صوب الإشاره الحمرا.. ويطالعها وهي رافعه حياتها: لا والله؟؟ والي انتوا سويتوه مب منقود؟؟ اونك مهتم ومسوي عمرك فيها شهم .. جان يبت حقنا من ابوك .. هزاع : لو سمحتي لا تيبين طاري ابوي على لسانج بهالطريقة.. تراه عمج يعني لو ناسية اذكرج شما: مانسيت .. بس هو نسى ان له بنت اخو.. بس لأنه مايحب امي.. شو سوت بكم امي.. الله الشاهد تحبكم واتداريكم وتحترمكم من كبيركم لصغيركم.. هزاع كان يطالع عيونها المحمره من الدموع .. والحزن العميق والتعب الي فيهن.. وماوعى الا على صوت هرن السياره الي وراه لأن الإشارة اخضرت ومشى السياره.. شما: رجاء هزاع ابتعد عن حياتنا.. نحن نسينا ان لنا عم وعيال عم.. انا وامي وعمار عايشين لنفسنا وبس.. امي ماعندها اهل هني.. نحن كل مالها فهالدنيا.. واحب امي لأنها يابتني.. أرجوك (صدت يدامها وهي منزله راسها وتتنهد وبصوت مبحوح وعيون تدمع) ابتعد عنا كافينا الي يينا منك.. ابوك شل ايده من علينا وتخلا عن كل شي.. وانت الي ييت من عقبه كل يوم صوب بيتنا وانت.. سكتت بهاللحظة ماحبت تقول له كلمة سكران .. هزاع مهما يكون فيه خصلة طيبه .. ويمكن الي سواه نابع من غيرته .. هو نفسه مب لاقي تفسير لهالشي.. ويمكن الكره الي ابوه وامه زرعوه في قلبه.. حس نفسه دنيه وايد يدامها.. بكل كلمة رمست فيها ماغلطت عليه رغم انه فضحها يدام مقر شغلها.. شما: هزاع ردني عند سيارتي.. امي بدت تتصل وتحاتيني... وقتها هزاع حس بنغزه في قلبه.. عمره امه ماتصلت فيه اذا تأخر ولا سألت انت وين .. كل الي تسويه تعطيه بيزات واتدلعه .. لكن عمرها ماحسسته بوجودها... ويمكن هالشي الي كان يخليه يروح صوب بيت عمه .. يحس بشي موجود في هالبيت يفقده في بيتهم.. حراره البيت والأسرة.. رغم انهم عايشين بلا ابو.. بس عمرها شما ما غلطت بشي ولا حتى عامر.. وهو الي عايش تحت كنف امه وابوه.. ماتم شي ماسواه.. مشى صوب اتصالات ونزلها وهو ساكت دون مايرمس ولا ينطق بأي كلمة. نزلت من سيارته وقبل لا تبند الباب صدت صوبه واطالعته: ابتعد عن حياتنا وانسانا ارجوووك.. هزاع تم ساكت وماتكلم.. حس راسه مفتر من الأفكار المتضاربه فيه.. ومن بندت باب السياره مشى السياره وراح والا يرن تليفونه كانت الي متصله امه.. هزاع استغرب اول مره امه تتصل فيه.. : الووو ام حمدان: امييييييه هزاع وينك اميه الحق علينا.. هزاع خاف من سمع صوت امه تصيح.. هزاع: خير امي شو صاير؟ ام حمدان: ابوك يا هزاع ابوووووك.. طايح فالمستشفى.. تعال ودني له ماعندي حد.. هزاع: ها.. شو بلاه ابويه.. ام حمدان: مادري اتصلوا فيه توه بلغوني انه نقلوه المستشفى.. شي صابه وهو فالشغل.. هزاع ماعرف كيف يوصل عمره المستشفى وبسرعه سار صوب الحوادث كان توه ابوه مطلعينه من غرفه الطوارئ ينقلونه لقسم العناية المركزة.. ربع صوب سرير ابوه وتم يطالع ابوه الي كانو حاطين عليه اكسجين وموصلين له وايرات وايد مايعرف هزاع شو سالفتها.. كان وده يصيح وهو يشوف شكل ابوه بهالحاله.. هزاع: ابويه انا هزاع ولدك شو فيك؟؟ ابويه رد علي.. فتح بوحمدان عيونه شوي شوي من شاف هزاع انفعل بطريقة غير طبيعيه.. واستائت حالته.. اضطروا الممرضين يبعدون عنه هزاع ويسرعون به صوب غرفه العناية المركزة.. وتم هزاع يتريا برع وصل له ربيع ابوه .. زايد.. وحمدان اخوه.. حمدان: ها وينه ابوي؟ هزاع: توه ودوه العناية المركزة .. منو الي ياب ابويه المستشفى؟ زايد ربيع ابوهم من زمان ويداوم وياه: انا الي يبته .. طاح علينا فالدوام زين مامات ( وكان يوجه نظراته لهزاع بغضب كأنه يقول له انت السبب).. هزاع: حمدان مادري بلاه ابويه من شافني حسيت بنظراته مادري شي غريب اول مره اشوفه.. زايد اطالع هزاع بطرف عينه .. وروح بعيد عنهم كأن متنفر منه.. حمدان: والله.. مادري.. بس انت ادعي له احين.. يقوم بالسلامه ان شاء الله هزاع استغرب من نظرات ربيع ابوه له بعد.. حس ان الموضوع متعلق فيه بس كيف مب عارف؟؟ .. جاسم: ويا منو بتسيرون؟ خلود: مادري والله.. تصدق ماسألتها.. جاسم: ههههههه .. ماعليه وين ماتسيرون حطي بالج على عمرج .. لا تنسين ان في ناس يخافون عليج خلود: وايد؟ جاسم: وايد وايد بعد.. خلود: هههههههه .. فديت هالناس عيل.. جاسم : ماتستحين تتفدينهم يدامي.. خلود: اوه اسفه نسيت انك وياي عالخط جاسم: ههههه سخيفة.. خلود: جاسم ماتحس وايد بسرعه زواجنا فالصيف جاسم: ليش ان شاء الله متى تبينه يكون؟ خلود: اممم يعني الصيف الياي او الي بعده .. بكون تخرجت وخلصت جاسم: اتهبين.. ما أجله يوم واحد.. ماتصورين ياعمري اشكثر مشتاق وانتي تقولين نأجل.. خلود: ههههههه أحب ألعوزك وارفع ضغطك جاسم: ادريبج ماتحبيني تبين تغايضيني وبس خلود: الله يسامحك.. انا من يومي احبك بس انت ماكنت حاس جاسم: كنت عمي ماشوف خلود: ههههههه واحين نورت يعني جاسم: نورج الي نورني.. خلود: لا خليت منك.. .. . نزلت مجد من عالدري بسرعه تربع ورا ابوها قبل لا يظهر.. مجد: باباتي.. ابويه.. بوحور. صد عبدالعزيز صوب بنته وهو يضحك: تم شي مازقرتيني فيه.. خير مجد: ابويه ابا اظهر ويا خلود نسير إمارات مول.. منها اتحوط ومنها اتشرى لي لبس للكلية.. تم يطالعها عبدالعزيز متلوم: بس انا اليوم مواعد رياييل فالميلس ماروم.. مجد وهي مبوزه وتيلس على الكنبة الي وراها وترفع ريولها على الكنبة وتربعهم.. : ومنو بيودينا عيل؟ عبدالعزيز: جاسم ريل خلود.. مجد: بس هو معزوم على عرس ربيعه.. عبدالعزيز: ولد عمج أحمد شوفيه اذا فاضي يوديكم.. دامج مب بروحج ماعليه برايه يوديكم.. مجد وهي تتطالع وتحايس بثمها يوم سمعت طاري أحمد.. تحس مابتقدر تاخذ راحتها ويا خلود عدل.. بس المهم عندها تطلع.. : ابويه لو كانت حور ولد جان احين بلا مذلة حد.. عبدالعزيز: الله عوضني بأحلى بنتين ربيتهن وكبرتهن ورافعات راسي الحمد لله.. وترا احمد اخوكن مجد وهي تحب راس ابوها: ربي لا يخليني منك يابوي.. عبدالعزيز: ويخليكم يارب.. المهم خبريني وطمنيني عليكم من توصلون وتكونون ويا احمد.. مجد: حاضر سي دي (وهي ترسل له تحية عسكرية) ضحك لها ابوها وطلع من البيت مستعيل.. وصعدت مجد الدري شوي شوي .. خطوة خطوة وهي تفكر كيف تطلب من أحمد.. و دخلت غرفتها وشلت التليفون وكتبت له مسج (( السلام عليكم.. اذا طلبت منك شي بتردني؟)) أحمد كان توه راد البيت من الكلية.. وسمع صوت المسج.. افففففف احين اكيد واحد من الربع يبا شي مالي بارض والله.. فتح المسج يقراه ومن شاف اسم مجد عليه .. استانس.. نسى التعب كله ورد عليها (( حي المسج وراعيه.. افا عليج.. تم بس شو الطلب)) قرت المسج مجد وقالت بتلعوزه.. (( امسح رقمي ولا تعود تذكرني ابد)) انصدم أحمد من قرى الكلام.. وانسدح على الفراش تم يطالع الشاشه ورد التليفون حطه ع صدره.. هاي البنت شو تحت راسها.. اشك ان هالبنت مستلبسه.. طرش لها مسج (( ممكن اعرف السبب)) تمت تتطالع مجوود المسج وهي تضحك.. وردت عليه (( لأني لو طلبت منك اتودينا امارات مول اليوم بتقول لا)) اسميه ضحك أحمد يوم قرا هالرمسه.. والله ان هالبنت شيطانه.. واتصل فيها.. مجد: نعم مو قلت لك تمسح رقمي ولا تذكرني أحمد: انا قلتي لي متى؟؟ مجد: لا تستهبل توني طرشت لك مسج .. أحمد: ماشفت شي.. مجد: لا والله وتليفونك روحه ماشاء الله يرد علي أحمد: تليفوني رد عليج؟؟ متى.. أحمد وده ينقع من الضحك يحس بها متغاااااايضه.. مجد: احمدووو عن الإستهبال انزين.. أحمد حس ان الجو تكهرب عند مجد وهو عاد كله ولا زعلها.. : هههههههههه اسولف وياج.. ومنو قالج اني مابوديكم لو طلبتي مني؟ مجد: الكتاب مبين من عنوانه أحمد: وشو عنوان كتابي؟ مجد هني توهقت ماعرفت شو ترد عليه.. فغيرت الموضوع: انزين ممكن الساعه 5 تمر بيتنا وتاخذني انا وخلود .. اذا انت بتودينا شرات ماتقول أحمد ضحك لأنها غيرت الموضوع: خلاص اوكي.. الساعه 4:55 بكون عند الباب اذا تأخرتو بروح روحي.. مجد: لا لا لا لابنكون عند الباب أحمد: ههههه خلاص ان شاء الله .. مجد: مشكور.. مع السلامه أحمد: مع السلامه.. .. .. .. كانت الساعه 4:30 تجهز أحمد وقعد يطالع عمره فالمرايه.. لبس نظارته وكشخ.. ولبس الكاب .. حب يكون رياضي الأخ اونه.. وطلع وطرش مسج لمجد يقولها انه فالدرب .. خلود: يلا انا جاهزه مجد: انا بعد بس بلبس عباتي وبتصل في ابوي يوم بركب السياره.. بعض الناس لازم اقولج شي.. خلود: شي مثل شو؟ مجد: ترا بعد كم يوم.. تقاطعها خلود. عرفنا .. يوم ميلادج.. مايسوى علي يوم ميلاد الي بتذليني عليه.. عيل بنشوف شو بتسوين يوم ميلادي مجد: حفلة لا صارت ولا استوت.. خلود: احين مر يوم ميلادي.. باقي له 10 شهور.. بعده يعني وقت.. مجد: بجهز لج كل شهر شي اونه خخخ خلود: مابقول لا مجد: عيب عيب الطمع مب زين وايد.. خلود: اخبرج عن الهذرة الزايدة.. ترا احمد بيوصل .. مجد: انزين بسير غرفه امي شوي وبيي.. طلعت مجد فهالوقت وخلود شلت تليفون مجد وسجلت رقم احمد فتليفونها.. وكلها دقايق وصل احمد ونزلوا كلهم تحت بسرعه وركبوا الموتر.. مجد +خلود: السلام عليكم أحمد : وعليكم السلام ورحمه الله.. خلود: اشحالك أحمد؟؟ احمد: بخير الحمد لله.. مجد: شخبار عموو وعمي وحور فديتها الي ماشوفها الا فالإسبوع مره.. احمد: اشوفج سألتي عن الكل الا عني.. مجد: لا ترا خلود سألت عنك ..وانا دوري اسأل عن الباقي.. مايستوي نكرر السؤال أحمد: لا يستوي يستوي.. مجد: خلاص انزين.. اشحالك احمد.. احمد يبتسم : الحمد لله بخير.. مجد: انزين لا تنسى امارات مول مب مكان ثاني احمد يصد وراه ويطالعهم: اخبركم لا يكون تحرون اعماركم راكبين ويا راجو راعي التاكسي.. مجد وخلود تموا يضحكون.. خلود: افا ولد خالي.. ياسين نسولف وياك.. أحمد: هيه اقول انا بعد.. وتموا ساكتين فالدرب شوي وكانت مجد تساسر خلود وتضحك وياها.. واحمد يراقبها من الجامه .. يعلني افدى هالضحكة .. احبها ياربي وفي لحظة التقت العيون.. .. .. استحت مجد.. ونزلت راسها.. دقايق الا هم واصلين المول.. نزلوا سوا.. مجد وخلود كانن يمشن يدام احمد وهو وراهن.. وماخلت محل مادخلته.. وياريت لو يعيبها شي.. أحمد: انتي يايه بس تتفرجين عالبضاعة هني.. مجد: ليش تعبت؟ أحمد: لا ماتعبت.. بس ماشوف شي يعيبكن.. خلود: ترا الشي الحلو مايتحصل بسرعه.. أحمد: اهااا اقول انا بعد.. ترا الحلو حصلته بعد تعب.. قرصت خلود مجد من سمعت هالرمسه.. وضربت خلود عالخفيف: سخيفه انزين.. خلود: ههههه مايخصني هو الي قالها.. ودخلت عقب باريس جاليري (حسب معلوماتي ماشي باريس جاليري في مول الإمارات..بس في ناس قالو لي شي.. فسامحوني ان كانت المعلومة غلط )... وتمت تتطالع الساعات .. وأحمد كان يطالع صوب السوع الرجاليه بس يصد كل شوي صوب مجد ويشوف شو بتختار.. وشلت لها ساعه وايد حلوة .. وجربتها .. مجد: شو رايج.. ايدي الأحلى ولا الساعه؟؟ خلود: ههههههههه... الساعه مجد: ماحبج.. وحطت الساعه.. خلود: ماتبينها.. مجد: نو حاليا ماباها.. بفكر عقب اخذها يوم باخذ لبس يليق عليها خلود: اهااا.. وعقب ظهروا من المحل وقعدوا يدورون فالسنتر لين ماهلكت ريول أحمد المسكين.. هههههه يغمض.. ومن خلصوا كل شي.. نزل احمد وحط الأجياس فالسياره وقال انه بيدخلهم القسم الثلجي في المول.. استانسوا.. وتريوا فالدور نص ساعه ودخلوا .. استانسوا ثلاثتهم من الخاطر وقعدوا يتصورون.. ويحاولون يسوون رجل الثلج ثلاثتهم.. وأحمد كان حاس بفرحة ماتوصف.. يحس عمره عايش بحلم ويا الإنسانه الي يحبها.. مجد: ياليت حور والكل موجود.. والله وناسه أحمد: المره اليايه يبانا دخله جماعيه خلود: هيه والله لو اليوم جاسم ماسار العرس بس.. مجد: يالله ماعليه اليايات اكثر .. . . .. ومن بعدها تعشوا كلهم في جيليز.. ومن عقبها ردوا البيت.. كان الوقت متأخر وقتها .. الساعه 11 فليل.. كانو ميهودين صدق.. خلود قالت انها بتبات عند مجد لأن اليوم الثاني ماعندها جامعه.. ومجد بتبدأ التدريب العملي .. نزل احمد وسلم على عمه ومرت عمه وعقبها رد البيت وهو حاس براحة نفسيه وكأنه سوى شي كان وده يسويه من زمان.. حتى مجد .. حست بإحساس ثاني بالمره.. الدنيا كلها ضحكت في ويهها.. استانست في كل لحظة كانت وياه.. وحست بوناسته .. مايسكت من كثر مايسولف.. .. وتمنت ان الله لا يغير عليهم ويجعله من نصيبها هزاع بيترك شما في حالها؟؟ ابراهيم بعد الموقف الي شافه شو بيسوي؟؟ ليش انفعل ابو هزاع من شاف هزاع وسائت حالته؟؟ ياترى شو تبا خلود في رقم أحمد؟؟ خليفه شو بيسوي مع خوله.. شو موقفها لا عرفت بسالفة ام خليفه؟؟ .. ملاحظة: لا تقولون البارت قصير لأن والله بكل صراحة أقولها ضغط على عمري وكتبتها.. وبس وقفت ماقدرت اكتب زود.. بس عشان ماتأخر اكثر.. سامحوني MiSs MrMr[/align] |
[align=center] الجزء الثامن الفصل الثاني =-=-=-=-=اليوم الثاني الصبح.. فالمستشفى هزاع: ها دكتور بشر نقدر ندخل عنده أحين؟؟ الدكتور: هيه الحمدلله حالته استقرت.. ولله الحمد انه وصل بسرعه لأن النكسة ماكانت قوية عليه.. حمدان: الحمد لله.. مشكور دكتور وماقصرت.. الدكتور: العفو واجبنا.. حمدان: امي وين.. هزاع: محتشره تبا اتيي ماخليتها .. عيب ياريال حريم يتيمعون هني فالمرر.. خل ابوي يستقر ويروح الجناح فوق خلاف بنييبهم.. حمدان: الا وين عمي زايد (ربيع ابوهم).. هزاع: مادريبه كان واقف هناك.. حمدان: سير ازقره.. هزاع: اوكي.. حمدان سار دخل عند ابوه.. وهزاع راح صوب الباب الي يودي لبرع القسم وشاف زايد يالس عالكراسي الي برع يتريا.. : عمي .. عمي.. زايد مسح ايده على ويهه كأنه كان يدعي ولا يقرا شي قبلها.. ورفع راسه شاف هزاع عقد حياته: نعم؟؟ هزاع: الدكتور طلع من عند ابوي ويقول انه بخير احين.. تعال حياك خل ندخل عنده.. زايد: وانت ان شاء الله تبا تدخل عند ابوك؟؟ هزاع استغرب..: هيه .. شي أكيد.. زايد: انت مايسدك الي سويته والي يبته لأبوك من تحت راسك ياي تذبحه مول وتخلص عليه؟ هزاع: اسمعني تراني من الصبح سكت عنك وانت تغلط علي لأن نحن في مستشفى.. شو مسوي انا فهمني.. زايد: والله عيال هالزمن ويهم لوح وعينهم قوية.. هزاع: لا حول ولا قوة إلا بالله.. فهالوقت سمع زايد صوت من الصوب الثاني كان عدنان ولده.. عدنان: ها ابويه بشر شحاله عمي بوحمدان.. (عدنان هذا خاطب إخت هزاع .. مها.. << بعض الناس يبت اسمج فالقصه .. شو رايج خخخخ ) زايد: اقولك عدنان دخيلك خل هزاع يشوف سواد ويهه الي سواه والي بسبته ابوه صابه الي صابه.. خله يعرف شو السبب مسوي عمره بهيمه مب فاهم شي.. هزاع كان طول الوقت ساكت وميود عمره عن يغلط ويقول شي يندم عليه.. صد عدنان صوب هزاع وهو يهز راسه كأنه يقوله يا حسافه انك اخو حرمتي.. هزاع: شو السالفه ؟؟ طلع عدنان تليفونه.. وهو يتنهد .. وزايد وقف شوي.. وراح عنهم يطمن على بوحمدان (الي هو بوهزاع).. عدنان تم يتعبث فالتليفون وطلع الفيديو ومد ايده لهزاع وربع ايده وقف يدامه يترياه يرمس..: شوف وعطني تفسير.. هزاع سحب التليفون بقوة وكأنه واثق انه ماسوى شي في حياته.. بس من شاف اللقطه... فج ثمه متفاجئ.. وشوي يشوف الكاميرا تتقرب صوبه وهو في وضع مخجل مع البنت فالحوض.. وسكران .. حس بحراره تسري في كل عرج من عروجه.. حس كأن الدنيا تدور فيه.. كأنه في هاللحظة فقط ادرك انه طووووول هالمدة كان يسوي شي غلط.. كان يسوي ولا همه انه في غلط.. كأنه شي عادي.. لكن هالفيديو ياه مثل الصفعه.. صد صوب عدنان وعيونه محمره..: من وين يايبنه؟ عدنان: شرات ماوصلني وصل عشره غيري.. شرات اي فيديو تتبادله ويا ربعك وانت يالس فالكوفي.. فشلتنا الله يفشلك دنيا وآخره.. وين اودي ويهي من ربعي .. ومن اهلي.. ومن الي فالدوام وياي.. اقولهم هذا نسيبي الي اتشرف فيه؟؟ يكفي انك لا شغلة ولا مشغله وهايت.. وهالدور ايينا هالفيديو الـ... (سكت).. استغفر الله العظيم.. لو امك درت بتموت وبتندم على اليوم الي يابتك فيه شرات ما ابوك درا والله ستر ماراح فيها .. خوز من يدامي اجابل ابوك واشوف حالته وايد احسن.. ودزه عدنان بإيده من الحره الي فيه .. ودعم هزاع اليدار الي وراه وهو على حاله مصدوم.. ومشى عنه عدنان وراح.. وهو تم يطالع حواليه شاف عايله يايه كأنهم يايين يزورون حد.. صد ويهه صوب اليدار لا يكون شايفين الفيديو.. بيعرفوني وبيأشرون علي.. ومشى بسرعه صوب الباب عشان يطلع.. تم يمشي وكل مايشوف شخص يطالع صوبه ولا يصد عليه وهو يمشي .. ينزل راسه زود... كأنه يتهرب من الناس.. مايباهم يشوفونه لا بيعرفوني.. بيقولون هو الي .. لا .. وين اودي عمري.. وين اروح.. في اي ارض انخش.. أمي.. أمي شو بيستوي بها.. ياربي يكفي الي صاب ابويه .. هالدور على امي لا يارب .. وفي لحظة طرت شما على باله .. وتذكر الي كانت تقوله له.. .. شما: أرجوك ابتعد عنا كافينا الي يينا منك.. ابوك شل ايده من علينا وتخلا عن كل شي.. وانت الي ييت من عقبه كل يوم صوب بيتنا وانت.. .. آآآآآآآآآآه.. يعني شافتني وانا بهالحاله.. ركب موتره وتم يمشي فيه مايدري وين ساير.. كل مايشوف موتر يمر حذاله واذا شاف السايق صاد صوب موتره يشك.. اكيد يعرفني من موتري .. وين اودي بعمري.. وين ماروح يعرفوني .. ااااااه ياربي ليش سويت فيني جييييه.. لييييييش؟؟؟ ومنو الي سوى هذا فيني؟؟ .. منوووو.. في لحظة تذكر الموقف كله.. وتذكر يوم شاف طارق وهو واقف برع معارض انه يسبح وياهم.. طارق.. هيه اكيد هو..محد غيره الخسيس مصورنا .. ليييييش انا شو سويت له؟؟ يكفيه اني يبته عندي وعززته وكرمته ويبت له البنات الي يباهن على حسابي.. جي يرد الحركة فيني الخسيس بس انا أراويه.. ... أحمد: ياريال خل عنك هالكلام.. المهم متى رديت بالسلامه سيف( تذكير.. سيف كان اسمه سابقا هزاع لكن غيرت الإسم عشان ماتستوي لخبطة اسامي.. هو صديق احمد الروح بالروح.. ساعد احمد مع زوجته أسما انه يترك سوالف البنات.. زوجته حملت بعد سنتين زواج) سيف: والله صار لي اسبوع من رديت.. أحمد: ايا الخاين من اسبوع وتوك بس ذكرت ربيع الطفولة.. سيف: ههههههه شونسوي مشاغل البيت خذتنا.. وغير تعرف الحرمه حامل من بعد فتره طويلة.. أحمد: هيه والله ياني فرحت لك يوم قلت.. ربي يكتب لك الذرية الصالحة.. اتخبرك سيف عندي خط رقم غريب برد بشوف منو وخلاف راح ادق لك سيف: على خير ان شاء الله .. في امان الله أحمد: في امان الله .. رد على الخط الثاني: ألووو خلود: السلام عليكم.. أحمد مستغرب: وعليكم السلام.. منو معاي؟ خلود: وياك خلود بنت عمتك.. أحمد: هييييه هلا والله خلود اشحالج؟؟ عساج بخير؟؟ خلود: بخير يسرك حالي انت اشحالك؟ أحمد: بخير.. اسمحي لي والله ماعرفتج.. رقمج كان غريب علي.. خلود: لا افا عليك .. شحالها مرت خالي ومروه .. والحور.. أحمد: كلهم بخير يسرج حالهم.. شو هالإتصال الغريب.. شي صاير؟؟ الصراحه يالس ارمسج وانا احاتي.. خلود: لا مب مستوي شي.. هههه بس متصله اخبرك شي.. مادري جان محتاج تعرف هالشي او لا.. أحمد: شو هالشي؟ خلود: اليوم الإثنين صح.. أحمد: هيه صح.. خلود: يوم الأربعا ان شاء الله يوم ميلاد مجد.. بتكمل الـ 20 وبتدخل 21.. (( خطأ مطبعي فالقصه فالبداية كنت كاتبه ان عمرها 18 .. كنت ذكية بزياده يعني خخخ)) .. أحمد: والله.. زين يوم خبرتيني.. هههه خلود: بس عن تقول لها اني قلت لك بتجتلني .. أحمد: هههههه لا ماعليج .. خلود: اباك تفاجئها.. أحمد: ههههه لاتوصين بهالسوالف .. انتي وين اسمع حشرة عندج خلود: فالجامعه وين بكون هالحزة.. أحمد: الله يوفقج شخبار جاسم ؟ خلود: بخير الحمد لله أحمد: وسلطان متى ناوي يرجع؟ خلود: يقول بالجمعه لأن الدوام طالبينه شي جي أحمد: يوصلون بالسلامه ان شاء الله خلود: ان شاءالله .. يلا عيل احمد اخليك بس حبيت ابلغك هالشي والسموحه أحمد: مسموحه اختيه.. في امان الله وبند عنها ويلس احمد يطالع الأوراق الي يدامه ويبتسم.. عيل عيد ميلادها.. شو اسوي؟؟ امممم يبالي افكر قطع افكاره صوت ربيعه سعيد يزقره عشان يلحقون على الكلاس.. ونش بسرعه شل اوراقه وسار وياه.. .. . فالشركة .. كانت ياسه عالكرسي الي مجابل مكتب المدير وهي حاطه ريل على ريل وتتطالع مجد الي قاعدها على الكرسي الي مجابلنها بنظره متعاليه ووتحايس بثمها.. ومن سمعت صوت الباب عدلت شيلتها ووقفت.. ومجد طول الوقت تراقب حركاتها وساكته.. وفي خاطرها تقول.. انا شو فرني ويا هاي مادري.. ونشت بهدوء وقفت وهي منزله راسها بعكس جواهر الي كانت تتطالع المسؤول عنهم وهو داخل في عينه وتعلج اللبان يدامه.. سلمان: السلام عليكم.. مجد وجواهر : وعليكم السلام.. سلمان: يلسوا ارتاحو.. يلست مجد الا جواهر تمت واقفه صدت مجد تتطالعها مستغربه.. جواهر: لا مايستوي انت مديرنا وتبانا نيلس.. سلمان ماعيبته جواهر من الوهله الأولى الي شافها فيها.. في خاطره يقول.. شو هالوقاحه والجرأة.. : انا مدير مؤقت لمدة 3 أسابيع.. وقلت لكم استريحو وقعدوا .. يعني مافيها شي لو قعدتي الا جان تحبين اتمين واقفه ع كيفج.. مجد استانست على رمسة المدير ودها تضحك بس ميودة عمرها.. سلمان صد صوب مجد الي كانت منزله راسها وماتتطالعه بالمره... تم يطالع الورقه الي يدامه وصد صوبهم: منو فيكم مجد عبدالعزيز ومنو جواهر محمد؟ جواهر وهي تحط كوع ايدها على الطاولة وكف ايدها تحت خدها وتتطالع المدير وترقق صوتها: انا جواهر.. ومجد تتطالعها ورافعه حياتها.. هاي الي بصفعها بالنعال احيييين سلمان ماحب تصرفها .. وماحب يسكت عنها وتتمادى..: يعني مديرج تحطين ايدج على طاولته بهالطريقة.. نزلت جواهر ايدها بهدوء .. وتنعمت: اسفه ماكنت منتبهه سلمان: طبعا مكاتبكم راح تكون متفرقه .. كل وحده راح تنحط قسم.. مجد عبدالعزيز .. انتي مسؤولج الي بيعطيج الشغل اسمه كمال.. وانتي يا جواهر مسؤولتج الي بتعطيج الشغل اسمها لارا.. جواهر تمت تحايس ببوزها لأن كان يرمس ويطالع صوب مجد وهي منزله راسها ولا تسمعه شو يقول.. احين هالشيفه يطالعها وانا الي كاشخه يدامه ولا كأنه يشوفني.. عفاني الله .. صدق ماعنده ذوق.. سلمان: تعالو وياي أوديكم لأقسامكم.. مشى سلمان يدام وجواهر وراه.. والمسكينه مجد تمشي وراهم شوي بعيده لأنها مستحيه..وصل جواهر لقسمها ووصى المسؤوله تعطيها شغل وهي تتطالع سلمان وهي تبتسم .. بس هو مطنشها.. ومشى صد وراه شاف مجد تتطالع اللوحات الي فالممر.. يته ضحكه وهو يشوف شكلها كيف مندمجه.. تقرب شوي صوبها سلمان: الإخت مجد .. ماتبين تروحين قسمج؟ مجد: ها .. انتبهت لعمرها ونزلت راسها وهي تضحك على شكلها وهي قافطه.. بلا بلا بروح.. سلمان مشى وكان لازم ينزلون الطابق الأول وهم كانو فالثاني.. سلمان: انتي انزلي بالمصعد للطابق الأول.. وانا بنزل بالدري.. مجد استانست .. الله يكثر من امثاله والله انه ريال والنعم فيه لو واحد غيره بيرز ويهه وياي فاللفت.. دخلت مجد اللفت ونزلت.. وسلمان نزل بالمصعد وصلوا تقريبا في نفس الوقت.. لأن سلمان سريع بحركته.. سلمان توه من فتح باب الدري.. شاف في ويهه كمال مسؤول مجد.. يوده: كمال.. كمال: نعم استاذ.. سلمان: ياريال كم مره قلت لك ازقرني بإسمي.. وعن هالرسميات.. كمال: تسلم والله دوم رايتك بيضا.. سلمان: الله يسلمك.. المهم هاي مجد (يأشر عليها) الي بتتدرب عندكم فالقسم وانت المسؤول عن حضورها وغيابها وشغلها.. كمال: حياج اخت مجد .. بنهلكها من الشغل عيل.. رفعت مجد حياتها وهي ساكته .. سلمان: هههه ماعليج يسولف وياج.. بيعطيج شغل بحيث يكفي لتقييمج.. مجد تهز راسها وساكته.. كمال استغرب هالبنت بلاها ماتنطق شو بلما.. ابتسم لها سلمان واستأذن وراح.. كمال: تعالي وياي اراويج مكتبج.. عاد اسمحي لنا كل شي فالقسم هني مختبص تدرين الديزاينز وهالسوالف دوم حشره.. مجد: لا ماعليه.. كمال من سمعها ترمس ضحك ولاحظت مجد ضحكته.. مجد اطالعت وراها تحرت شي وراها وهو يضحك شافت مافي شي... : في شي يضحك.. كمال: لا لأني شفتج من اول ماييتي ساكته واحين فجأة رمستي .. والعادة المتدربات متعودين عليهم لسانهم طويل.. مجد وهي تتطالعه بنص عين: اهااا .. كمال: اتفضلي هذا مكتبج.. واي شي بغيتيه حاضرين.. مجد هزت راسها وسكتت.. وسلم لها كمال الشغل الي عليها تسويه وبدا يشرح لها وهي مركز على كل كلمة يقولها عشان تفهم .. كانت متشجعه للشغل وايد.. نرجع لأول ما وصلت شما دوامها.. استغربت يوم شافت الباركن الي دوم توقف فيه هالمره سياره ابراهيم واقفه .. راحت ودورت لها مكان ثاني وقفت فيه.. ونزلت من السياره وبندت الباب وصدت تفاجئت بإبراهيم واقف في ويهها.. شما: السلام عليكم.. ابراهيم وهو يطالعها بخبث: وعليكم السلام.. زين تعلمتي تسلمين؟؟ علموج البارحة الظاهر.. شما استغربت.. بس طنشته.. ومشت.. ابراهيم مشى وراها: اخبرج يوم ارمس وياج توقفين وتسمعين.. مب وحده شرواج اطنشت رمستيه.. شما صدت صوبه وكانت الشمس بويهها فكانت مغمضه عين وفاتحه الثانيه وهي تشوفه: انت شو فيك من صباح الله.. شي بلاك.. ابراهيم: سلامتج.. بس اعلمج كيف ترمسين شما سوت له حركه براسها كأنها تستهزأ فيه ومشت ولا عليها منه.. ودخلت الشركة وسجلت حضورها ومشت صوب مكتبها.. وابراهيم مغيض منها.. ويلست شما على مكتبها وصبحت على بوسعود.. ويلس ابراهيم على مكتبه وياب كرسيه صوبها.. بس هالمره قربه منها وايد .. كان شوي وبيلصق فيها.. بوسعود تم يطالعه مستغرب من حركاته.. ونفس الشي شما.. شما: لو سمحت رد مكتبك.. وين تتحرى عمرك.. إبراهيم: ما اتحرى عمري مكان.. حرام يعني اجرب منج ابا ارمسج.. شما: عندك شي قوله وانت على مكتبك لو سمحت.. ابراهيم: واذا قلت لا.. شو بتسوين؟ وماحس الا في بوسعود ايي صوبه ويسحب كرسيه صوب مكتب ابراهيم ويوقف مجابلنه: انت شبلاك تخبلت.. ابراهيم: روح زين.. شو سويت انا الحين.. بوسعود: مايخصك في بنت الناس عيب عليك.. لا تحرى كل البنات شرات بعض.. ابراهيم وهو يطالع بوسعود نظرة المسكين الي مايعرف شي: طلعت شاطرة تقص عليك وعلى الي فالدوام وتسوي عمرها شريفه مكة.. قالها بصوت عالي بحيث سمعت شما الرمسه وغيضت من الخاطر وقفت له ولا حست بعمرها ان صوتها شوي عالي: اخبرك .. انا اشرف منك .. فاهم.. ابراهيم: واااااااضح انج اشرف واااااضح.. ردي مكانج بالزين وخليني ساكت.. بوسعود عصب..: ابراهييييييم.. شو هالرمسه بعد.. ابراهيم: ياريال هدي وايلس وبقولك كل شي.. تم بوسعود واقف لإبراهيم يطالعه بغضب.. وشما من الصوب الثاني واقفه تطالعه.. وشوي الا أميره طالعه من مكتبها يوم زقرها واحد من الموظفين وقالها عن الي صار.. اميره: شو الي صاير يا جماعه.. ابراهيم: اميره .. شو هالأشكال الي توظفينهم عنا؟؟ رجاء ييبي ناس محترمين وخليهم وسطنا.. مب.. (هز راسه) استغفر الله.. شما: انت بتسكت وتحترم نفسك ولا شو.. ابراهيم : شو بتسوين راويني.. قمتي تستقوين اشوفج.. اميره: تعالو المكتب عندي بلا فضايح.. ومشى كل من ابراهيم وشما وبوسعود صوب مكتب اميره ودخلو المكتب وصكوا الباب .. اميره: ممكن افهم السالفه بكل هدوء.. ابراهيم: خل ست الحسن والدلال تقولج عن سواد ويهها ... انا ماعندي شي.. شما تنهدت ونزلت راسها: لحوووووول شو هاليوم الي مابيمر على خير.. ابراهيم: اي خير نشوفه من ورا اشكالج.. استغفر الله.. بوسعود: ابراهيم.. شو هالرمسه الي تقولها.. البنت ماشفنا عليها شي غلط.. وليش هالرمسه.. اميره: بوسعود اظني انت وانا.. وكل الموظفين عارفين ابراهيم زين ومن اي نوعيه.. ومب هو بيي يعلمني اوظف منو ولا وين.. وانا شما اعرفها شرات ماعرف نفسي.. ابراهيم ضحك بإستهزاء: شووو.. تعرفينها شرات ماتعرفين نفسج.. ههههههه عيل على الدنيا السلام.. هههههههه اميره عصبت وقفت وضربت بإيديها على المكتب: بس.. يكفي لهالحد.. قول الي عندك ولا التفاهم مع المدير العام.. ابراهيم: اييييييييه انتي..مب انتي ولا عشرة من اشكالج ويا ربيعتج هاي تهددوني وتخوفوني فاهمه.. وانا اذا برمس برمس بمزااااااجي.. شما: ارمس وشو الي مانعنك يوم تقول ماتخاف.. ابراهيم: اسكتي اسكتي.. شايفنج بعيني هاي ولج ويه تنطقين .. عفان الله بس.. شما: شو شايف قول.. ابراهيم: لا عيب استر على الناس احسن.. شما: لا قول.. واذا عن بوسعود.. مب مشكلة شرات اخويه العود .. قول يدامه انا واثقه من نفسي.. ابراهيم: هههه اصلا مايشرفه يكون له اخت شرواج يوم بيدري.. شرات اخويه اونه.. انتي اتعرفين اخو.. قاطعه بوسعود: بس يا ابراهيم احشمني انا على الأقل.. وعندك شي ارمس بلا مقدمات.. ابراهيم وهو يطالع بوسعود بنص عين.. : برمس.. لا تحاتي.. ممكن تسألون الإخت الشريييييفه العفيفه.. منو هذا الي كان يسحبها وايرها صوب السياره وركبها سيارته ؟؟ تذكرت شما هزاع.. ضحكت من خاطرها.. الكل استغرب من ضحكتها.. ابراهيم: تضحكين على سواد ويهج صدق انج وقحة و.. ماقدر يكمل رمسته الا يته صفعه من شما.. وماحس بعمره ابراهيم الا وهو ماسك ايد شما.. ويمشي بوسعود صوبه بسرعه ويسحبه: انتو ايييه.. نسيتوا اعماركم وين انتوا؟؟ هذا مكان عمل.. ؟ اميره ساكته ومصدومه.. تحس عمرها ضايعه.. شما صدت صوب بوسعود وهي ميته قهر ومغيضه .. ومتغصصه وتبا تصيح من القهر وتدعي على هزاع في خاطرها.. : تذكر يوم قلت لك عن المراجع الي كان عند ابراهيم امس وقلت لك انه ولد عمي.. بوسعود يهز راسه: هيه.. بلاه؟ شما صدت تتطالع ابراهيم بثقه: هذا ولد عمي هزاع الفلاني.. في خلافات بين عوايلنا.. وهو معارض اني اشتغل فهالمكان وهذا الي خلاه اييني ويسحبني يوم عرف اني اداوم هني.. عرفت احين يا اخ ابراهيم.. ابراهيم سكت.. حس بحراره في جسمه.. نسى الصفعه والغضب الي هو فيه.. حس نفسه عايش موقف ماينحسد عليه ابد.. بوسعود دز ابراهيم صوب اليدار: اعوذ بالله منك ومن شرك.. وطلع من المكتب ولحقته شما وشلت اغراضها .. بوسعود: وين سايره.. شما كانت تصيح فهاللحظة ومتضايقه من الخاطر.. : بس يكفيني عالصبح اشوف الي شفته ارد البيت اشرف لي.. صدقه ولد عمي يوم قالي ماعنا بنات يشتغلون.. الله يلعن الحاجه.. بوسعود لحقها ماهانت عليه تروح بهالحاله.. : هدي عمرج الي لازم يطلع هوه مب انتي.. وبعدين انتي في بداية شغلج وخروج هذا مب لصالحج.. شما وقفت مكانها وتصيح بحرقه وتشهق: الله لا يسامحك يا هزاع على اللي سويته فيني.. لا سلمت منك ومن شرك وانا فالبيت ولا بسلم منك وانا هني فالدوام .. بوسعود: سيري تغسلي وصلي ركعتين الضحى يمكن تهدين شوي .. بس لا تروحين البيت وانتي بهالحاله شما تنهدت :ان شاء الله وراحت صوب الحمامات .. ورد بوسعود صوب مكتبه .. وهو مقهور من ابراهيم.. وشاف ابراهيم توه طالع من مكتب اميره.. شل سويج موتره من على طاولته بدون لا يرمس ويقول اي كلمة لبوسعود ونزل يطلع من الدوام.. وعقبها بخمس دقايق ردت شما الي من شافت مكتب ابراهيم فاضي ارتاحت وقال لها بوسعود انه طلع... يلست على مكتبها وتنهدت وبدت تشغل عمرها بالأوراق والمعاملات عشان تنسى الي صار .. .. مجد بصوت واطي: الله ياخذ ابليسج ماتذكرتيني الا اليوم.. انا فالدوام ماروم ارمس حور: ههههه شو اسوي اشتقت لج يا اختي .. الي ماتسألين عني مجد: جب امسات شفتج بس كم مره اسأل .. حور: هههههه انا اراويج يالدبه.. مجد: ماعليه راضيه دبه متينه .. كل شي.. بس بندي والله انا فالدوام.. حور: ههههه بعد اشعليها دوام كبرت البنت مجد: من يومي كبيره بس انتي ماتصدقين.. حور: انزين احبج.. مجد: انتي حبج مانزل الا هالوقت عالصبح.. حور: شو اسوي حسيت بشوق غير طبيعي .. قلت لازم اطلعه ماقدر احبسه تدرين بعد حامل.. مجد: هيه اوكي اوكي.. يالله عاااااد حور: هههه كشخه وانتي مغيضه.. مجد: سخيفه ماحبج اكرهج.. حور: ماعليه راضيه المهم انا احبج.. مجد غيضت من الخاطر: ببند في ويهج حور: هههه خلاص خلاص.. يالله عيل مع السلامه.. مجد: مع السلامه .. وما وحى لها بندت الا رن تليفونها مره ثانيه كانت مروه بنت عمها.. مجد وهي مغيضه: انتي ومرت اخوج متفقين علي ولا شو السالفه؟ مروه: بل بل .. كلتيني سلمي بالأول.. مجد : وعليكم السلام .. مروه: ههههه انزين انا ماسلمت .. وبعدين نسيتي ان مرت اخوي هيه اختج.. مجد: هيه نسيت كل شي.. انا فالدواااااااااام مروه: اي دوام؟ مجد: لحوووول اداوم وورك بليسمنت للكلية.. مروه: اهااا .. انزين انا متصله بس اقولج اليوم نوره وخلود وحور بنتيمع في بيت عمتي شيخه.. تعالي.. منها نستانس ومنها نرمس عن مشروعج انتي وخلود مجد: اوكي اوكي.. يالله باي.. مروه: هههه باي.. بندت الخط وصل لها مسج وهي كانت ترمس ويا مروه.. تمت تتحرطم من الخاطر .. شو ياهم مب متذكريني الا عالصبح واليوم.. مسج من أحمد (( صباح الشوق متجمع وباقه ورد ماتذبل صباح من قلب يدعيلك براحة بال ماترحل)) مجد من غيضها ماردت عليه.. متفيج وايد الصراحة .. خخخ البنت معصبه لحد يرمسها .. . .. مر الوقت عليه وهو يدور فهالشوارع بلا هدف وفي لحظة شاف نفسه قريب من منطقة بيت شما.. استغرب شو الي يابه هني انا كيف ييت .. ومنو الي يابني.. والله اني فاقد كل حاسيتي.. انتبه لضرابه شباب صايره على طرف الشارع.. وانتبه لـ عمّار ولد عمه ( أخو شما).. وقف موتره يشوف شو الي صاير ونزل من السياره ومشى صوبهم.. تم يسمع عمار وهو يفاتن (يصرخ بأعلى صوته).. عمّار: اخبرك انت اييييييييه .. والله ان يبت طاري ولد عمي على لساني اقصه لك فاهم.. اشرف منك ومن انك تقول عنه هالرمسه... وهالفيديو خلني اشوفه في تليفون واحد منكم والله اني اجلب الدنيا ع راسكم.. واحد من الشباب... : عمّار صدق ماعندك سالفة تدافع عن ولد عمك.. انا اكثر واحد اعرف عن سواياه فيكم.. الله يهديك بس (وهو يحاول يسحب قبضة إيد عمار من على كندورة الولد الي قاعد يضربه)... اتعوذ من ابليس.. ولد عمك فاضحنكم وانت تسبه.. عمّار: لو فاضحنا.. انتو تساعدون في نشر الفضيحة.. انا مب مهتم لأنه ولد عمي.. مهتم عشان عمي ومرته .. ولدهم خسيس هم شو ذنبهم.. انسى ان ولد عمي فالفيديو.. ترا بنات الناس فالفيديو.. هن برايهن بايعات اعمارهن.. بس امهاتهن .. واهاليهن شو ذنبهم ؟؟ .. عيب عليك ياي تتفاخر بين الشباب وتوزع.. ... : ياريال استهدي بالله .. ياهل تراه.. عاد اليهال ياحبهم يحصلون من هالسوالف.. مب كل شي بالضرب الله يهديك.. .. : اقولك انا مب ياهل انزين.. والله لا أبلغ عليك الشرطه .. تضربني انا اراويك.. عمّار: والله بلغت الشرطة انت الي بتتوهق.. تنشر فيديو.. سكت الولد .. عمره 16 سنه.. ومراهق.. وبكلمة يخاف.. ويعرف فعلا انه بيتوهق.. لكن الأخ حب يتفاخر ان عنده فيديو حصري ماعرف انه بينضرب من ورا هالفيديو.. هزاع من سمع عمّار كيف يدافع عنه بهالطريقة رغم كل الي يسويه بهم والي سواه ابوه.. تضايق.. كان قريب من الشلة وايد.. بس يوم حس ان محد شافه فضل انه يبتعد ويرد لسيارته.. عمار وربعه كانو معطين هزاع ظهرهم من جي ماحسو بوجوده.. الا واحد كان واقف بعيد وشاف هزاع وتم يراقب الي بيستوي ومن شافه رد سيارته تقرب.. .. : عمار عمار.. ولد عمك كان وراك .. مشى شوي صوبكم وعقب رد موتره.. صد عمار وراه بسرعه وفعلا شاف موتر هزاع يتحرك بسرعه صوب الشارع.. سكت وسحب ايد ربيعه الي كان ميودنه .. وسار صوب الولد الثاني.. عمار: هالمره كسرت تليفونك.. والشباب انقذوك من قبضة إيدي .. المره اليايه اكسرك انت قبل التليفون.. ومشى عنهم راد صوب بيته.. عمار بين ربعه فالفريج معروف بطيبته وهدوئه.. وهم مازعلوا منه لأنهم مدركين ان سببه قوي ومن حقه.. وصل اخو الولد الي انضرب يعرف شو السالفه .. ويوم فهموه الشباب السالفه.. وعرف ان الي ضاربنه عمار مازعل.. لأنه يدري عمار واخلاقياته كيف.. ولام اخوه على سواته .. وسحبه البيت.. هزاع من الي حاس فيه كان وقتها المغرب.. سمع الأذان وكأنه لأول مره في حياته يسمع اذان.. ماحس بنفسه الا وهو واقف عند المسيد ونزل وسار يتوضأ.. بس توهق لأنه ناسي كيف يتوضأ.. تم واقف يطالع الجماعه الي يتوضون.. ماحس الا بإيد تضربه على جتفه .. صد شاف ريال ملتحي ومبين عليه فالأربعين من عمره.. جمعه: اشبلاك واقف هني.. ليش ماتروح تتوضا.. هزاع توهق استحى يقوله ماعرف اتوضا.. ابتسم له: لا انت روح قبلي انا بطول فالوضوء.. جمعه وهو كان يسمع هزاع وهو يرمس كان يطالع ملامح ويهه وكأنه مشبه عليه.. سكت.. : قول الصدق.. بطول فالوضوء؟؟ مادري حاس ان في شي ثاني.. هزاع حس بدمعه حاره في عينه مايقدر يمنعها .. نزلت منه غصبن عنه.. والي دهش الريال تم مستغرب: شبلاك ياخوي.. هزاع: تبا الصراحة ماعرف كيف يتوضون.. اندهش يمعه (تنقال لإسم جمعه بالعاميه).. ريال بعمر هزاع وطوله .. مايعرف يتوضأ.. سكت ماحب يفشله وقاله بصوت واطي: افا عليك.. تعال وياي وانوي نيه الوضوء واتبع الي انا اسويه وبتتعلم.. وفعلا راح وياه هزاع وقفوا حذال بعض وتم يراقب هزاع يمعه وهو يتوضا وتعلم منه.. هزاع: يزاك الله خير.. يمعه: تعرف تصلي؟ هزاع سكت شوي كأنه يحاول يتذكر متى اخر مره صلى فيها.. : اعرف بس يمكن اغلط.. يمعه تم يشرح لها الأساسيات الي لازم يعرفها فالصلاة وهو ماشي وياه صوب باب المسيد لأن الإمام كان يقيم الصلاة.. وبسرعه دخلوا واعتدلوا في وقفتهم في وسط الصفوف.. ورفع ايده هزاع يكبر بإسم الله عشان يصلي.. مجرد هالحركة حسسته بإحساس ثاااااااني.. نسى العالم باللي فيه.. نسى الدنيا ومافيها نسى ان له ابو طايح فالمستشفى.. نسى ان له فيديو في تليفونات الخلق.. ويمكن الي معاه في هالحرم الي يصلون فيه يملكون هالفيديو وشافوه.. وخلص 3 ركعات الفريضه وحس ان وده يصلي للصبح ومايوقف صلاة.. وصلا ركعتين وسلم وصد صوب يمعه الي كان واقف شوي بعيد يرمس الإمام يسأله عن شي.. ومن عقبها رد صوب هزاع .. هزاع: يزاك الله خير.. ماقصرت.. يمعه: افا عليك .. نحن اخوان وهذا واجبي.. الا ماقلت لي شسمك؟ هزاع: وياك هزاع الفلاني.. يمعه وهو يمد له إيده يسلم: والنعم والله وياك يمعه الفلاني.. هزاع: ياحي الله يمعه.. يمعه: تسمح لي اعزمك اليوم بيتي عالعشا.. ترا بيتي مره حذال المسيد.. هزاع: لا تسلم مانبي نتعبك.. يمعه: عيب يا ريال ترد عزيمتي.. لزمت عليك الا انك اتيي.. افتشل هزاع وماقدر يرد الريال وراح وياه ومشوا صوب بيت يمعه الي كان على بعد خطوات من المسيد.. .. .. فيصل: انتي وينج من يومين ؟؟ مغلق تليفونج عنبوو فطوم: آسفه والله بس انشغلت بالدراسه واييني استاذ فالبيت يدرسني وعقبها اذاكر روحي وارقد فيصل تم ساكت وكأنه مب مصدقنها: اهااا فطوم: شخبارك انت وشخبار يدوو.. والكل؟ فيصل: وانتي اشلج تسألين عن الباقي.. عليج مني ومن يدتج فطوم مستغربه من اسلوبه تحسه قاسي شوي.. : اسفه .. اشحالها يدوو؟ فيصل: بخير.. نحن الجمعه رادين فطوم وهي مستانسه: صدق.. والله؟؟.. يااااااي وناسه.. تردون بالسلامه فيصل: اونج مستانسه احين؟ فطوم مستغربه من اسلوبه.. : هيه ليش يعني ماتباني استانس؟ فيصل: بلا بس اقول يعني.. المهم سمعيني .. ماتغلقين تليفونج بعد خير شر.. فطوم: ان شاء الله اسفه.. فيصل: شوفي لا ترمسيني بهالأسلوب اونج تاخذيني على قد عقلي.. ارمسي عدل .. فطوم تمت صاخه ودها تصيح.. ليش يرمسها بهالطريقة: ان شاء الله.. فيصل: يلا سلمي على الكل.. مع السلامه فطوم: مع السلامه بندت عنه وهي متضايقه مب من عادته يرمسني بهالطريقة.. ليش جي وياي؟؟ انا شو سويت ؟؟ كل ها عشان غلقت تليفوني... مايسوى علي.. لا مابغلق تليفوني بعد مافيني.. .. .. في بيت خلود نوره: هههههههه .. بس ذبحتوني والله .. مهاري تعالي يلسي هني ماما .. لا تروحين صوب الكهربا مب زين.. خلود: ويييييه مشكلة المعرسات .. ماما.. وبابا.. مجد: عدااااااال الي يسمعج يقول عانس عمرها 30 .. ولا جنج بعد كم شهر بتستوين حرمه.. مروه: هيه ومحد بيتم عانس غيرج يا مجووود.. مجد: هههههه اصلا انا ألف من يتمناني بس انا مابا اعرس .. خلود: هيه والدليل الخطاطيب الي صافين عند باب بيتكم.. مجد: اسكتي امسات يايينا الدورية من كثر الشكاوي.. يقولون الشارع الي يدام بيتنا مسدود والسبه انا الكل: هههههههههههه خلود: مروه .. إيمان كم كملت احين؟ مروه: فديتها سنتين وشوي.. خلود: ربي يحفظها.. نوره: اقول انا بسير اشوف العنود بلاها تصيح.. ونشت نوره روحت عنهم وقعدت مروه ترمسهم عن سالفه المشروع الي يبون يفتحونه مجد وخلود.. مروه : انتوا احين تبون تفتحون المشروع بدون راس مال مايستوي؟ خلود: لا عندنا راس مال.. انا ابوي قال بيعطيني 20 ألف.. ومجد بعد نفس المبلغ ابوها قال بيعطيها.. ومشروعنا صغير هالمبلغ يكفيه.. مجد: اللي بنسويه نحن عباره عن ديزاينات كموديل يعني.. عشان الناس ياخذون فكرة عن شغلنا.. والغرفة الخارجيه الي في بيتنا مب مستفيدين منها.. فقلت لأبوي بسويه معمل المشروع ووافق خلود: وعاد شوفي الغرفه الصغيره هاي بنجلبها كيف.. بنخليها تطلع شي راهي.. عشان الي يدخل المعمل ينغر بشكل المكان اكثر من البضاعه مروه: طلعتوا داهيه وانا مادري.. خلود ومجد : ههههههههههههه مجد: واللي نباه منج تساعدينا أو تشاركينا لو بغيتي.. دشت نوره وهي شاله العنود في حضنها: شو السالفه؟؟ ابا اعرف؟ مروه تمت تشرح لنوره السالفه.. نوره: ماعليه خلودوو انا اختج ماتقولين لي.. خلود: قلت لج من فتره بس انتي عيالج مايخلونج تسمعين عدل وتفهمين السالفة. نوره: ههههههه صدقج.. انزين انا عندي ديزاينات سويتهم ايام ماكنا في فرنسا.. تحيدين خلود؟ خلود: هيه والله صدق.. انا نسيت ان عندج خلفيه بهالسوالف وكنتي تسوين قبل.. مجد: تمام عيل شاركينا.. مروه: وانا بعد بشارككم.. عشان نبدأ صح لازم يكون الشغل مرتب .. خلود: ياي تحمست.. وقعدوا البنات يرمسون ويتفقون شو يسوون للمشروع .. مروه خذت شغلة تزيين شغلات الأعراس وتغليف الهدايا وهالسوالف لأنها تحبهم.. ونوره وخلود .. خذوا شغلة تصميم الشنط بأنواعها المختلفه من جلد وقماش واشكال مختلفه.. ومجد خذت تصميم العبايات والشيل.. اسميهم البنات متحمسات.. .. .. فالحرم.. جلثم: وهاي سالفتنا كلها انا ويدك الله يرحمه.. سلطان: الله يرحمه.. حليله يدي طلع زقرت ايام شبابه ونحن ماندري.. جلثم والدمعه تنزل من على خدها: عشره عمر .. على الحلوة والمره.. كان يعامل عمك عبدالعزيز شرا واحد من عياله ويعزه اكثر من حميد وشيخه.. سلطان وهو يلوي على يدته: ترحمي عليه أميييه.. كان ودي اشوفه بس الله ماكتب.. جلثم: توفى قبل عرس امك وابوك بسنه .. صد وراه سلطان شاف فيصل يزقره. فيصل: هاا مابتخاوينا ناوين نروح نحب الحجر الأسود.. سلطان: ياريال الصبح ساير.. مافيه شده .. يهلكونك الأفارقه الي هناك.. فيصل: كنت بقول شي بس بسكت انا فالحرم ومايوز هالكلام.. عيل تروح روحك ولا تقول.. سلطان: انتوا كل واحد حصل له زاويه ورقد .. ناصر: مب انا .. ها فيصل الي رقد وانا من شفته يناخر مارمت ايود عمري عن الرقده الي يتني.. جلثم وهي تضحك عليهم.. : عنلاتكم هب ويه تيون العمره.. سلطان: هيه امييه زيدي عليهم يستاهلون.. .. .. .. . يمعه: ياريال شو هالرمسه.. افا عليك بس.. البيت بيتك.. هزاع: تسلم.. يمعه: الا ماقلت لي شو يابك هالصوب.. مار صوب أحد تعرفه فهالحاره.. هزاع: لا والله ماعرف حد هني.. بس كنت مار سمعت الأذان قلت انزل اصلي.. تم يطالعه ساكت وده يسأله اسأله وايده بس في خاطره يقول .. اتريا شوي احسن.. : زين سويت.. الا في سؤال يقرقع في راسي من شفتك وتلاقيت وياك.. استغربت يوم انك ماتعرف توضأ وناسي صلاتك وانت بهالعمر؟؟ هزاع: تعرف بشو احس.. كأني انسان توني أسلمت ولا اعرف شي فديني.. لا تضحك والله ان هالإحساس الي يراودني فهاللحظة.. الي شفته من مشاكل خلتني اصحى وانش من الغفلة الي انا كنت فيها.. يمعه: الله يهديك ويهدي كل ضال ان شاء الله.. بس من شفتك تراوالي (تهيأ لي) إني شايفك من قبل بس مادري وين؟ وقتها تذكر هزاع الفيديو.. وده الأرض تنشق وتبلعه بس مب قادر من فشلته.. نزل راسه وتم ساكت.. دخل الخادم الي عندهم فالبيت وحط لهم الأكل عالسفره.. يمعه: اقرب .. حياك هزاع رفع راسه: الله يحييك تسلم.. ليش هالعباله كلها والله ان مايحتاي؟ يمعه: افا عليك يا هزاع.. انت ضيف .. والضيف حبيب الله.. ابتسم له هزاع وتوه بيقرب من السفره الا سمع الباب ينفتح بالقوة.. كان مبارك ولد يمعه.. عمره 17 سنه.. يرابع (يركض) ورا اخوه هادف عمره 10 سنين.. مبارك: تعال أقولك.. تعال.. والله ان مايبت التليفون.. هادف: مابا ابا اشوف.. تتحراني ياهل.. انا كبرت خلاص.. مبارك: ابويه شل عنه التليفون.. يمعه: لا حول ولا قوة إلا بالله.. انتوا وبعدين وياكم عيب عليكم فشلتوني يدام الريال الغريب.. كان فهالوقت هادف واقف مجابل هزاع ويطالع التليفون.. فجأة صرخ : ابويه ابويه.. هذا هو نفسه الي في تليفون هزاع.. شوف شوف.. هزاع من سمع رمسة هادف كان في هالوقت توه بيمد إيده على الأكل.. بس من فشلته ماعرف كيف يشل عمره وينش يطلع من المكان.. مبارك بحكم عمره ومراهقته وفضوله.. ربع بسرعه وسحب التليفون عن هادف اخوه وتم يطالع: هيه والله ابويه هو نفسه الي فالفيديو الي راويتك اياه.. ههههههههههههههههه .. اتييب هالأشكال بيتنا.. يمعه افتشل من عياله .. نش يلحق هزاع بس صد على عياله قبل لا يظهر: حسابي وياكم بعدين .. فشلتوني يدام الريال.. بسرعه لحق هزاع فالشارع لأنه ساير صوب سيارته الي وقفها عند المسيد.. : هزاع.. يا ريال ماعليك منهم يهال هاييل مايعرفون شو يقولون.. قدر يمعه يوصل لهزاع وقبضه من ايده وسحبه بس انصدم يوم شاف عيونه محمره ويصيح..: افا .. شو بلاك؟ هزاع: دخيلك خلني اروح .. انفضحت يدام خلق الله كلهم.. ماعرف وين اخش ويهي من الناس .. وصل هزاع صوب موتره وفتح الباب.. وسار يمعه الصوب الثاني وركب الموتر.. يمعه: انا من شفتك فالمسيد .. شكيت اني شايفنك.. مع اني والله مسحته من تليفون مبارك بس هالعيال ماينقدر عليهم رد ياب الفيديو.. هدي عمرك بس وفهمني شو الموضوع قعد هزاع يرمس ويقول ليمعه كل الي في خاطره.. كأنه كان يدور على شخص يقدر يقول له الي في خاطره.. يبا يفضفض بس مب قادر.. قاله عن ولد عمه الي دافع عنه رغم انه دوم يروح لهم ويغلط عليهم.. يمعه: ربك كريم يا هزاع.. وربك يسامح عبده ويعطيه فرص وايده.. ربك رحوم بعباده.. الي سويته يمكن وايد غيرك سووها وسوو الي اكبر منها.. بس تابو لله ولا ردوا لهالسوالف أبد وربكم وفقهم في حياتهم.. هذا كان درس لك.. شفت الضرر الي ياك انت..وابوك الله يشافيه ان شاء الله.. وكل من يرتبط إسمه بإسمك.. هزاع انسى الفيديو وكل اللي فيه.. وافتح صفحة يديده في حياتك .. انسى.. قاطعه هزاع: شو انسى.. شو تقول؟؟ .. شفت عيالك شافوني كيف ضحكو.. والناس الي فالشارع شو بيسكتهم؟؟ كل من بيشوفني شو بيقول.. انت مب مستوعب كيف الموقف صعب يمعه:والله يا اخوي حاس بالموقف كيف صعب وكبير على ان الواحد يتحمله.. بس احين انت فكر كيف تتسامح ويا ابوك.. كيف تصلح أمورك وياه.. هزاع حط راسه على السكان وكأنه يحس ان في ثجل كبير على ظهره مب قادر يشيله ولا مب عارف كيف يشيله.. بس الي طرى على باله طارق.. هو السبب في كل الي صاير .. والله اني مابسكت له .. بخليه يندم على اللحظة الي عرفني فيها.. يمعه حط ايده على جتف هزاع: تسمح لي اقولك شي؟؟ هزاع: تفضل قول.. يمعه: المكان الي فالفيديو.. بعده على حاله؟؟ ولمنو هالمكان؟؟ رفع راسه هزاع كأنه يفهم الي يبا يوصل له يمعه: هالمكان بإسم ابويه.. مزرعتنا هاي.. يمعه: من هني خطوتك الأولى.. تسد كل شي كان يستوي هناك وتقطع الشر من جذوره.. وعقب تصحح الفروع.. ابتسم له هزاع وربت على جتفه: يزاك الله خير ذكرتني.. يمعه: افا عليك اخوان نحن.. احين انزل وياي نروح نتعشى.. هزاع: لا اسمح لي مره يايه ان شاء الله انا دليت بيتك.. وان شاء الله اليايات اكثر.. بس خلني اسير المزرعه وألحق عليها قبل لا يبدأون سهرتهم.. يمعه: ماتباني أخاويك؟ هزاع: لا ماعليك.. بدبر أموري.. يمعه شل تليفون هزاع.. : بتصل على تليفوني عشان اخزن رقمك.. وانت خزن رقمي.. واي وقت بغيت شي امانه عليك تلجأ لي.. هزاع: ان شاء الله.. ونزل يمعه من موتر هزاع.. الي طلع من باركن المسيد بسرعه واتجه بأقصى سرعته صوب المزرعه.. الي تبعد عن المكان الي هو فيه ساعه ونص.. بس وصل للمكان خلال 45 دقيقه.. وهو يحس بالشراره تطلع من عيونه.. وده يكسر كل شي في ذاك المكان.. المكان الي دمره.. ووصل ابوه للمستشفى.. ابوه الي دلعه وعطاه الحابل بالنابل.. ولعب بالمزرعه ع كيفه.. وجلبه لمرقص ودار خرابه.. وقف موتره وكانو مواتر الباقي صافين فالمزرعه.. نزل من سيارته وهو معصب على الآخر.. ودخل الفيلا.. شاف الشباب قاعدين يطالعون تلفزيون.. والي يجهز للحفلة.. والي يرمس تليفون.. كانت عينه بالأول تدور على طارق بس للأسف ماشافه.. الشباب: هلاااااااااااااااااااااااا هزاع.. وينك ياريال نترياك من متى ؟؟ دومك تكون مبرز هني.. هزاع اطالعه والغضب مبين في عيونه: طارق وينه؟؟ خلفان: والله هذا صار له يومين مختفي مايينا.. هزاع وبصوت عالي وبكل غضب: اتصلو فيه هاتوووه.. واحد من الشباب اسمه فلاح كان فالمطبخ وهو يدري عن سالفه الفيديو ويوم سمع صوت هزاع جي عرف ان هزاع درا بسالفة الفيديو.. والي يعرفه ان طارق هو السبب.. خلفان: ياريال شو بلاك معصب.. هدي .. شو تبابه ؟؟ هزاع تقرب من خلفان ويطالعه بنظرة حاده: قلت لك اتصلو فيه وهاتووووووووووووووووه ماسمعتني... خلفان نش لهزاع معصب: ياخي لا تعلي صوتك علي.. لا خادمك ولا اصغر عيالك عشان ترمسني بهالطريقة.. هزاع: جــــــــــــــــــــــــــــب.. اطلع برع.. خلفان توه ياي يضرب هزاع .. الا ايوده واحد من الشباب ويسحبه برع الميلس: كلنا بنطلع .. مايسوى عليكم تتضاربون وتتذابحون.. هزاع: ولا ابا اشوفكم هني فاهمين.. وسوالف سهراتكم هااااي دورو لكم مكان ثاني تسوونها.. اما مزرعه ابويه تنسوووونها.. وتنسون ان لكم ربيع اسمه هزاع.. نش واحد من الشباب تم يتقرب من هزاع مستغرب: شو بلاك هدي عمرك.. شي صاير؟؟ هزاع وهو يدز ربيعه صوب اليدار: إطلع بررررررررررررع .. ماسمعتني؟؟ .. : عنلاتك.. علك الموت بعد.. ياي اسأل شو بلاك وانت ترد علي جي.. ماتستاهل حد يتنشد عن حالك.. الشرهه علي انا الي اسألك .. طلع فلاح وسحب ربيعهم وهمس له في اذنه يخبره السالفه.. وهو طلع ينفد بروحه لأنه يدري هزاع بهالحاله مايرحم حد.. كان يالس على الكنبه وحاط ايده على ريوله ويهزهم من الحاله العصبيه الي هو فيها.. تقرب ربيعه ضاعن منه .. ويلس حذاله: افا عليك بس.. انا ربيعك من أيام المدرسة وتبا تقنعني ان مافيك شي وانت داش ماخليت واحد ماغلطت عليه ولا بتمد ايدك عليه.. هزاع انهار فهاللحظة.. : شو اقولك.. اقولك ان ابويه بسبتيه طايح فالإسبيتار (مستشفى) مايندرابه حي ولا ميت؟؟ .. اقولك ان كل من يعرفني يفتشل لأنه يعرفني؟؟ .. أقولك ان هالمزرعه الي بإسم ابويه تشوه اسمها والسبة سواتي.. ااااااااااه خلني دخيلك.. عيب علي أصيح.. بس من الي انا فيه مب قادر ايود عمري خلاص.. ضاعن تم مصدوم وهو يسمع هزاع .. كأنه تخيل نفسه في موقف هزاع الي ماينحسد عليه.. وتحمد ربه ان فـ اليوم الي تصور فيه الفيديو ماكان متواجد .. ولا حالته بتكون شرات هزاع وألعن.. والباقي بعده ماوصل لهم الفيديو.. هزاع: ضاعن العمر كم بقى منه عشان نضمن ان نحن بنعيش وبنقدر انتوب على سواتنا.. هذا سلطان وفيصل وناصر .. كلن ربك هداه ودروا عنهم كل سوالفهم ولا عاد طبوا هالمكان من اليوم الي ودروا فيه سواتهم..لكن خويك الي هو انا لا اعتبرت منهم ولا تعلمت.. وتميت على سوالفي لين ماطاحت على راسي.. (صد صوبه وحط ايده على جتف ضاعن الي كان منزل راسه يسمع ويحس بحرقه في قلبه) تخيل نفسك تطلع من هالمكان وانت راد البيت سكران تدعم لك واحد ولا تدعم لك شي وتموت.. كيف نجابل ربنا ونحن سكارى؟؟ الواحد يحشر على الحاله الي كان فيها يوم مماته.. (تساند على الكنبه وتنهد) دخيلك انت ربيعي واحب لك الخير.. مابا الي صابني يصيبك في يوم من الأيام.. ودر عنك هالشله الخايسه الي خربتني وخربتك.. وخلنا نتوب ونعرس يمكن الله يهدينا ويرضى علينا.. ضاعن ابتسم له: طول عمري احس ان فيك ذرة خير.. بس انت الله يهديك ماتبا تبينها لنا.. ابتسم له هزاع: متفيج.. ضاعن: نش تغسل خل نصلي العشا.. هزاع: تعرف انت احسن عني بشي واحد.. رغم انك اتيينا وتسوي الي تسويه.. الا ان صلاتك عمري ماشفتك سهيت عنها.. ضاعن: يمكن عشان جي في مني أمل اني اهتدي.. وانت لأنك نسيت ربك فنساك وعلمك درس عشان تحس انه موجود.. هزاع: يلا عيل نش .. ونشوا سوا سارو يتوضون .. وصلو من عقبها سار يدور له شي ياكله لأنه يوعان.. ومن دش المطبخ شاف غراش الخمر.. ضاعن على رغم سوالفه بس ماكان يشرب.. ولا يدخن.. نش هزاع ويا ضاعن وشلو الغراش وكسروها صوب الرملة.. ومن عقبها قعدوا ينظفون المكان يرتبونه انشغل هزاع بالسوالف ويا ضاعن ونسى السالفه شوي وهدا.. حس ان راسه يعوره من يشوف الغراش.. حس ان وده في غرشة بس يود عمره .. لأنه عاهد نفسه يتوب لله .. ويودر عنه سوالفه.. لكن ماقدر ينسى شي واحد.. الي من يتذكره يغلي من داخله من الغضب.. طــــــــــــــــــارق.. .. .. .. الأربعا الصبح رن تليفون شما الساعه 10 الصبح.. استغربت.. كانت وحده من رباعتها الي صار لها فتره طويله ما اتصلت فيها.. شما: ألووو.. عهود: هلا والله بهالصووووووت.. شما: ههههه اهلين.. اشحالج؟ عهود: بخير ربي يسلمج.. انتي اشحالج؟؟ شما: بخير .. ها القاطعه شو مذكرنج فيه من صباح الله خير.. اكيد في شي؟؟ عهود: هههههه مب قاطعه والله مشغوله تدرين على مشارف الزواج .. شما: ربي يبارك لج ان شاء الله .. عهود: تسلمين والله.. شما: الله يسلمج.. عهود: المهم متصله أسألج.. انتي عمج اسمه حمد فلان الفلاني.. ؟؟ شما فجت عيونها: هيه شوبلاه؟ عهود: هذا مرقد عندنا فالمستشفى .. من قريت اسمه تذكرتج .. قلت بسألج.. شما: احلفي من متى مرقد؟؟ عهود : لحظة بشوف ... اممم.. مرقد من يوم الإثنين.. شما: ليش شو بلاه؟؟ عهود: أزمه قلبيه.. شما وقفت في مكانها : شوووووووووو.. خلاص خلاص احين يايه.. وبندت الخط عن عهود .. صد صوبها بوسعود.. بوسعود: خير شما شو صاير؟ شما والدموع في عيونها: عمي فالمستشفى يته أزمه قلبيه.. بروح اشوفه بوسعود: مايشوف شر ان شاء الله.. شما: الشر ماييك.. وبسرعه خذت اغراضها.. وسارت تاخذ اذن من المدير بالخروج عشان تزور عمها.. طبعا فهاليوم إبراهيم ما داوم .. ولا حد اهتم ان كان موجود أو لا.. كانو معتبرين غيابه عيد.. خخخخ .. .. .. شو تتوقعون سر تغيير فيصل.. هل هو فعلا متغير ولا فقط كان معصب؟؟ أحمد ومجد إلى أين بهذا الحب؟؟ هزاع هذا التغيير راح يغير نظرة شما له؟؟ إبراهيم شو بيصير عليه؟؟ جواهر ومجد بدأوا شغلهم .. شو بيصييييير؟؟ هزاع بينتقم من طارق على اللي سواه؟؟ بعد الي سمعه من عمّار وهو يدافع عنه.. شو موقفه مع عيال عمه؟؟ شما من سمعت ان عمها فالمستشفى راحت له.. هل زيارة شما بتغير شي في نفس عمها؟؟ تحياتي بنت البلاد الملخص: تغير فيصل.. توبه هزاع واكتشافه موضوع الفيديو.. ورغبته في الإنتقام.. بدء مجد العمل والتدريب.. ضرابه عمّار عشان ولد عمه.. موقف شما مع ابراهيم.. تخطيط أحمد لمفاجئة مجد... MiSs MrMr [/align] |
[align=center] الجزء التاسع الفصل الأول =-=-=-=-=-=-=-=-= أم عمّار: شو تقولين انتي؟؟ شما: امي ماشي وقت يلا بسرعه لبسي عباتج خلينا نروح.. أم عمّار: مسكين والله مايستاهل.. وبدت تذرف دموعها وهي سايره غرفتها عشان تشل عباتها وتروح مع شما المستشفى.. مهما يكون عم عيالها.. انسانه طيبه ماتعرف الحقد .. نست في لحظة ان هالإنسان المريض تعبها وعذبها وخلاها تشتغل وتكد عشان تعيش عيالها في خير ولا يحتاجون لحد.. وتوها بتظهر ويا شما.. إلا عمّار ينزل من الدري ويشوفهم.. : وين سايرين؟ شما: انت ماسرت المدرسة ؟ عمّار: لا تعبان شوي.. أم عمّار: هذا اخوش مادري شو بلاه.. من أمس وهو فالغرفه ماله مايكلم حد.. شما تصد صوبه مستغربه: وليش اخويه شو بلاك؟ عمّار: مابلاني شي بس تعبان شوي.. انزين وين سايرين؟ شما: اليوم وحده من رباعتي دقت لي وقالت لي ان عمي حمد فالمستشفى مريض.. عمّار من سمع بالسالفه .. حس ان فيديو هزاع له دخل فالموضوع.. سكت وهز راسه.. : الله يشافيه ان شاء الله شما: مابتيي ويانا عيب؟ عمّار رفع حياته يطالعها مستغرب: هيه تبيني اروح له عشان يروغني شرات ماراغني انا وياج من مكتبه.. الله وياكم سلمو عليه وقولو له اني فالمدرسة اي شي تعلثوا.. واذا راغكم عاد لموا ويهكم يدام الناس.. أم عمّار: شو هالكلام.. عيب عليك.. هذا عمك .. شما: خلج منه اميييييه ها عنيد .. خلنا نسير تأخرنا.. وطلعوا من البيت وركبت شما موترها وبسرعه سارت صوب المستشفى.. ومن وصلت سألت عن المريض ودلوها على رقم غرفته وقفت عند باب الغرفه.. وخايفه انها تدخل .. أم عمّار: يلا دقي الباب وادخل.. شما تبتسم لأمها: ادخلي اميييييه.. مب ادخل.. أم عمّار: انتي وايد فايقه.. يلا ادخلي شما: اماه شو رايج انتي تدخلين .. أم عمار وهي تتهرب: لا لا انتي .. ابتسمت شما وخذت لها نفس عميق توها بتدق الباب الا ينفتح الباب وتفز هي زايغه.. ترفع عينها تشوف مجابلها حمدان ولد عمها.. ابتسمت له.. ماعرفها بس عرف مرت عمه.. حمدان: هلا عموو اشحالج؟ بوحمدان يوم سمع حمدان يقول عموو تحراها وحده من خواته.. ام عمّار: الحمد لله.. حمدلله على سلامة أبوك.. مايشوف شر.. حمدان: الشر ماييج.. الا منو انتي شما؟ شما: هيه انا شما.. اشحالك ولد عمي.. عساك بخير وعافيه؟ حمدان: بخير ربي يعافيج.. الا كيف دريتوا؟ شما: وحده من رباعتيه اتداوم هني.. خبرتني وقلت اقوم بالواجب.. حمدان: ماتقصرين.. رايتج بيضا.. شما: تسمح لي اشوف عمي واسلم عليه.. حمدان: حياج.. دخلت شما وهي ترتعد من الخوف.. وراها امها الي خايفه اكثر منها.. ومن تقربت من سرير عمها الي صد صوبها وشافها انصدم.. : انتي شو يابج هني؟ شما: الحمد لله ع السلامه عمي.. (توها بتحب راسه جان يلف بويهه يمنعها).. بوحمدان: مايحتاي تعبين عمرج.. مارمتي اتيين روحج بليا هالهنديه؟؟ قلتي تكملين الحفلة وتتشمتون فيه سوا.. ماتنلامين العرج دساس.. طالعه على الحية أمج.. أم عمّار ادمعت عينها وطلعت م الغرفه.. ونفس الشي شما.. الي تغصصت من الخاطر .. ماقدرت تنطق.. تحس العبره خانقتها.. طلعت من الغرفه ودموعها على خدها وهي ساكته.. حمدان تلوم من تصرف ابوه بس مايقدر يقوله شي او يجادله لأن حالة أبوه مب زينه لأي انفعالات.. بوحمدان: وانت يالهيس كيف سمحت لهم يدخلون عندي؟؟ حمدان: تراها بنت عمي اروغها.. بوحمدان: عمت عينك قول آمين.. اسمعني .. تنسى ان لك عيال عم.. انا تنازلت عنهم كوصي عليهم.. وانتوا تنسون ان لكم عيال عم.. الا وينه الهرم اخوك من امس مازارني.. ولا ربعه اهم من ابوه.. حمدان مايعرف بسالفة الفيديو للحين .. محد قاله عنه .. ولا يدري بسبب غياب هزاع.. يتصل فيه بس تليفونه مغلق.. أو مايرد.. : والله مادريبه يابوي.. اتصل فيه مغلق او مايرد.. حتى سألت ربعه يقولون مايدرون به.. بوحمدان: نفاد ينفده.. اصلا انا ماعندي ولد بإسم هزاع... متبري منه ليوم الدين.. حمدان فاج ثمه مستغرب..: افا يابوي ليش شو مستوي.. حتى عمي زايد (بوعدنان) كان يفاتن عليه ويهزبه مادري بلاه.. بوحمدان: ثرك ماتدري عن سواد ويه اخوك.. سير اسأل عدنان وبيخبرك.. حمدان: شو السالفه ابويه والله اني مب فاهم للحين.. بوحمدان: خلك غشيم ولا تعرف.. اخاف لا عرفت اييك اللي ياني.. حمدان: ابوي شو الي صاير.. دخيلك لا تخرعني .. من كلامك احس ان الموضوع كبير.. بوحمدان تنهد وغمض عيونه .. تم حمدان يطالع ابوه غامضنه حاله .. وطلع من الغرفه بهدوء تم واقف فالممر شوي سرحان يفكر.. قاطعته اخته مها.. مها: حمدان.. شو تسوي هني؟؟ حمدان: ماشي كنت عند ابوي وقلت اوقف برع شوي.. ضجت من الغرفة.. مها: اهااا.. اشحاله ابويه اليوم شو قال الدكتور عن حاله؟ حمدان: الحمد لله .. مستقره حالته.. (ونزل راسه ساكت) مها وتتقرب من اخوها اكثر: شو بلاك حمدان.. ليش جي ضايج.. تراني بديت اوسوس.. حمدان يتنهد.. : شو اقول لج يا مها.. لو شفتي الموقف الي صار يدامي .. موقف يعور القلب.. مها فاجه عيونها: شو مستوي.. ابوي شي بلاه.. حمدان: الله يهديك يابوي.. لا ابوي مافيه شي.. اليوم يتنا شما بنت عمي ومعاها امها.. ابوي راغهم وقالهم رمسة تعور القلب.. نزلت مها راسها.. طبعها نفس طبع اخوها.. ماتحب الظلم الي قاعدين عيال عمها ينظلمون من ورا ابوهم.. وخصوصا احين بعد الي صار فيه.. ابوهم مايحنن قلبه عليهم.. .. .. .. أحمد: انزين وكيف بوصله غرفتها يا أم الأفكار.. جاسم : بدأ يغلط الريال على حرمتي.. خلود: هههههههه .. مايروم يغلط لأن الأمر كله بإيدي.. خخخخ هوالي بيضيع بخططه جاسم: صدقج.. ( كان احمد متصل في جاسم ويقوله عن سالفة مجد وانه يبا ياخذ لها هديه فإذا ممكن خلود اتيي وياه.. فقرر انه ياخذ اذن من الدوام ويمر على خلود الجامعه بعد ماخلصت حصصها.. وأحمد بعد كان مخلص حصصه وبيبدأ السبت تدريبه لنهاية الكورس.. الأخ خريج منو قده .. ) أحمد: تهقين بيعيبها.. خلود: الا مايعيبها .. اقولك ذاك اليوم بغت تتخبل من شافت الساعه.. أحمد: الساعه كم بترد من دوامها.. ؟ خلود: هيه بترد بتروح عند حور قالت لي.. لأن حور تعبانه شوي.. فأمها وهيه وخالي بيسيرون عند حور.. أحمد: هيه .. وانا ساكن ويا حور ولا ادريبها تعبانه حليلها.. بزورها.. خلود: لاااااااااااااا بتخرب كل شي.. أحمد: بل شو بلاج؟ جاسم: هههه حسيت فيني يوم تصدمني ساعات جي .. خلود وهي تتطالع جاسم بطرف عينها وتبتسم.. وصدت صوب أحمد: ماعلينا .. ترا اذا انت سرت هناك يمكن تشوف مجد.. ونحن متفقين ان نخليها زعلانه لأنك ماتذكرت يوم ميلادها أحمد: ليش انا كنت اعرفه اصلا عشان ازعل؟ خلود: مجوود واعرفها.. بتقولك ليش ماسألت وليش وليش.. ههههههه بتاكلك يعني بإختصار جاسم: هيه متى يوم ميلادج خلود؟؟ خلود: ههههههه قول بعد ما قلت لك.. ؟ جاسم: بلا بلا.. ههههههه بس استهبل أحمد: انزين .. يعني انتي بتسوين كل شي.. مايستوي انزين انا صاحب الفكرة.. جاسم: أهبل انت تبا عمي عبدالعزيز ينفدك ولا تحلم تاخذ بنته عقب.. ؟؟!!.. خلود بتسوي الفكرة عساس انها حابه تفاجأ ربيعتها الي هيه مجد.. بس بتقول لمجد الصدق انك انت راعي الفكرة وجي.. خلود: ههههه يدرس هندسه وفهمه بطئ.. لاحول ولا قوة إلا بالله.. وعقبها نشوا يركبون السياره وشالين وياهم الأغراض الهديه وكل شي.. عشان يوصلون خلود بيت مجد وتسوي الترتيبات كلها.. وأحمد اتفق مع Roches عشان يجهزون الكيك عالساعه 7 المغرب ويكون واصل عند باب بيتهم.. ومن وصلت خلود نزلت من الموتر وطلت على جاسم: شوي شوي سوق انزين؟؟ جاسم يبتسم لها.. ان شاء الله.. أحمد: اقول يلا فارجي .. تتوصى في ريلها ونست ولد خالها.. خلود: ههههههههه كيفي.. ودخلت عقبها خلود البيت وماكان فيه حد غير الخدامه سارت فوق صوب غرفة مجد وقفلت الباب عشان اذا وصلت ماتدخل.. رن تليفونها شافته كان رقم مجد.. خلود: عمرج طويل .. اشحالج فديتج؟؟ مجد: بخير.. شو السالفه أكيد تحشين فيني.. خلود: ههههههه ... اشحالج مرت احمد؟؟ مجد: خخخ.. ويا ويهج.. اي ريل الي مايذكر يوم ميلاد مرته.. غيرج انتي فديت روحج وهلي تذكرتوني من امس الساعه 12.. خلود: ماعليه هونيها وتهون ولاحقة بيذكر لين ماتشبعين.. مجد: ماعلينا.. مابتيين تزورين حور؟؟ خلود: هيه شو بلاها حور؟؟ مجد: ماشي بس الحمل متعبنها شوي.. وحضرتها شوي منفعله فالدوام فأثر عليها.. خلود: الله يهيدها وين ريلها عنها فالدوام .. مجد: تقولج خلود وين ريلج عنج (وهي تتطالع عبيد بنص عين) فالدوام.. حور: حليله ريلي يلحق على شو ولا شو.. عبيد: انتي ايه يالسوسه.. لا تسوين الي تبينه ماترومين تخربين من بينا.. مجد وهي تحد بنظرتها: اوكي .. خل ابند يصير خير.. وكل الي اعرف عن سوابقك بقوله لإختي.. عبيد: عااااادي قولي لها مايهمني.. لأنها تعرف كل شي.. مجد: اصلا المفروض اطالبكم بحفلة عودة بمناسبة يوم ميلادي.. بس عفيت هالسنه عنكم هالحفلة عشان حالة حور.. حور: اسكتي والله متلومه كان ودي اسوي لج حفلة هالسنه.. مجد: السنه ايايه ويا عيالج حفلة جماعيه؟؟ خلود: جنج نقعتيني عالخط؟؟ مجد: هههههه فديتج سوري.. خلاص عيل بخليج برايج بكمل تفاهمي ويا هالإثنين.. خلود: شوي شوي عالجماعه .. هههههه مجد: لا توصين.. مع السلامه خلود: مع السلامه بندت مجد عن خلود وصدت صوب عبيد.. : انزين شو كنت اقول؟ عبيد: خرابيط.. مجد: حورو دافعي عن اختج شوفي ريلج كيف يحط علي احين كلامي خرابيط عبيد: هيه بعد شو.. عيل سويتيها عياااااالج.. وهم ياهل واحد.. مجد: لا يعني انا قصدي مب بس السنه اليايه.. حتى السنين الي بعدها.. ولا انتوا ناوين بس على ياهل واستوب.. عبيد: لا لا لا.. انا قايل لحور ابا 12.. حور: ههههههه حرام عليك انا هالياهل وشوف كيف هاد حيلي.. عبيد: الله يقومج بالسلامه يا أم منصور حور: الله يسلمك.. فهالوقت حست مجد ان قعدتها فالغرفه وياهم مالها معنى.. طلعت من الغرفه قعدت تتمشى فالممر لين ماطلعت من صوب غرفتهم وكانت فالصالة الي فوق.. وكانت واقفه مجابلة غرفه احمد.. تذكرت موقفها وياه يوم كانت تتطالع في تليفونه.. وعقب تمت تتطالع شاشة تليفونها شافت ان مافي اي مسد كول ولا مسج.. قلبها عورها.. يعني حتى مافتكر يسأل .. يعني معقولة ماسمع ان اليوم يوم ميلادي.. طرت على بالها يدتها.. اتصلت على تليفون سلطان عشان ترمسها بس كان مغلق.. ردت اتصلت .. بعد كان مغلق.. تنهدت.. اففففف شو هالحظ.. .. .. .. هزاع نش من الرقاد.. ونش من بعد ماخذ له دوش بارد.. شرب له كوب جاهي وكل له خبزة.. دور على ضاعن بس ماكان موجود.. فتح تليفونه يا كثر المسجات من عند اخوه حمدان.. بس مارد عليهم.. واتصل في ضاعن.. قاله انه رد البيت لأن ملتزم وياهم .. تم هزاع يالس يتأمل فالحاله الي هو فيها نزل راسه وتنهد.. يفكر كيف يحل الموضوع.. شوي يشوف باب الصاله ينفتح بقوة.. كان حمدان اخوه العود داش.. بس شكله متغير ولا كأنه حمدان الطيب الي يعرفه.. عيونه تنصب منها نظرات الغضب.. : انت هني ونحن جالبين الدنيا برع؟؟ ماسدك سواد ويهك والي صار في ابوي بعد رديت لهالمكان.. انت شو من بشر فهمني.. رفع راسه هزاع يطالعه وهو ساكت مايرد عليه.. تقرب حمدان ويوده من كندورته ورفعه خلاه يوقف مجابلنه: ماتعرف الأدب يوم يرمسك اخوك الي اكبر منك توقف له.. هزاع طول الوقت ساكت يطالع عيون اخوه ولا يقدر ينطق بشي.. حمدان يود أخوه وفره على الكنبه ورفسه بريوله وعقبها صد عنه غطا ويهه بإيده .. مب متحمل الموقف.. حمدان الهادي الي عمره مايعلا صوته .. اليوم علا صوته ويضرب اخوه بهالطريقة.. هزاع كان مستغرب من اخوه وفي نفس الوقت عارف حجم غلطته وكبرها.. الي ماتغتفر.. حمدان ماقدر ايود عمره نزلت دمعته ويلس على الكنبة حذال هزاع.. : فضحتنا يا هزاع.. فضحتنا.. انا من شفت الفيديو انصكت الدنيا في ويهي.. راسي وقف ماعاد يفكر.. دخيلك قولي الي شفته جذب.. قولي اللي شفته ماله اساس.. دخيلك.. هزاع انهار صياح.. : دخيلك حمدان الي فيني يكفيني.. يكفييييييني.. والله يكفي.. حمدان: واللي سويته لعايلتنا مايكفي؟.. اختك وين تودي ويهها من ريلها.. وانا وين اودي ريلي من كل ربع ابوي وربعي واللي وياي فالدوام .. هزاع صد صوب اخوه يطالعه في عيونه.. كانه يترجااااااه يسامحه على زلته.. : سامحني.. وربي ندمان وقررت اتغير.. اللي صار فادني اتكثر من انه ضرني.. لأنه صحاني على الي اسويه.. يوم شفت عمري فالفيديو تقززت من الي كنت اسويه.. رغم اني يوم كنت اسويه اتحسب عمري مستانس.. بس ظهر انها وناسه ماتدوم.. يكفي ان الله غاضب علي عشان الفرحة تنجلب هالجلبة كلها.. اللي اباه الكل يوثق ان هزاع بيتغير والله بتغير.. والشي الثاني الي اباه ابوي يسامحني .. ومستعد لأي عقاب.. وبيت عمي يسامحوني على اذيتي لهم.. حمدان: شو الي غير رايك عن بيت عمك.. تم يقوله هزاع سالفة عمار واللي سواه.. حمدان: معقولة.. هزاع: لو ماشفت الموضوع بعيني كان يمكن ما اصدق.. بس كل شي صار يدامي.. حمدان: طول عمري اعرف ان فيهم خير هالناس.. وقاله سالفه ابوه كيف عامل شما وامها اليوم.. هزاع: الله يهديه ابوي.. احس الي صار فيه من دعواتها علي.. يومها شو سويت فيها فضحتها بطريقتي الهمجية.. حمدان احس اني احب بنت عمي.. اغار عليها.. مادري احس اني اباها تكون ملكي.. يمكن هالشي الي خلاني اسوي الي سوته.. بس بعد الي طلع عني اكيد درت به من عمار... عمرها مابتغفر لي وبطيح من عينها زود.. حمدان: حتى لو انت بغيتها تعرف راي ابوي.. هزاع: لين متى الحقد ؟؟ والله مايفيد.. حمدان: انا بعد اقول نفس الكلام.. بس ماتتجرأ تفتحه على الوالد لأنه بيجلب الدنيا ع راسنا.. هزاع: انزين حمدان بغيت اشاورك انا اعرف منو الي نشر الفيديو.. شو رايك نشتكي عليه؟؟ حمدان: انت مينون تشتكي.. تبا تسويها فضيحة عالميه.. لا دخيلك يسد.. ترا لو اشتكيت انت واللي فالفيديو كلكم يمكن تنسحبون على عمايلكم وشي ثاني الفيديو ماتروم تمسحه من تليفون كل واحد.. بيتمون عليه لين مايلقون شي ايدد يتسلون به وشوي دخل عليهم الناطور (حارس المزرعة) مالك: أرباب في نفرات برع يقول يريد يشوف مزرعه.. هزاع مستغرب: يشوفون المزرعه شو يشوفون فيها؟؟ حمدان: نش خلنا نسير لهم نشوف.. هزاع: لا مابا حد يشوفني.. حمدان: انت واثق من توبتك؟ هزاع : أكيد.. حمدان: شرات ماربنا قدر يهديك.. بيقدر يحميك من لسان الناس وبيساعدك.. J هزاع استانس على كلام اخوه.. ونش وياه متشجع.. طلعوا شافو اثنين برع واقفين.. يايين من صوب زايد.. لأن بوحمدان طلب منه يدور على شرايين للمزرعه يبا يبيعها .. هزاع نزل راسه حس ان كل هذا صار بسببه .. هالمزرعه الي تعز على ابوه وايد.. او بالأحرى كانت حق من حقوق شما واخوها.. الجماعه الي شافو المزرعه عيبتهم وقعدوا يتفاهمون على السعر .. طلب منهم حمدان يكلمون زايد لأن هو ماعنده خبر عن هالموضوع.. حمدان: أول مره ابوي يقرر شي زين.. هزاع: بس حمدان.. ترا بيزات المزرعه مب كلها لنا؟ حمدان: كيف؟ هزاع: نسيت ان من حق شما وعمار فيه؟ حمدان: هيه صدق.. بس انت تعرف ابويه.. هزاع: الله كريم.. المهم انا ناوي اروح لطارق الي ناشر الفيديو.. حمدان: شو بتسوي له؟ هزاع: بضاربه.. فيه حره دخيلك ابا اطلعها .. لا تقولي لا.. حمدان: مابقولك لا.. لأني انا بعد بساعدك.. يكفي ان ابويه كان بيروح فيها بسببه.. هزاع: الأساس بسببي.. وهو ساعد .. حمدان: هو دوره اكبر.. وركبوا الموتر وبسرعه ساق هزاع صوب دبي عشان يقابلون طارق ويتفاهمون معاه بطريقتهم.. أم خليفه: انزين يا خليفه شو سويت عن الموضوع الي كلمتك فيه؟؟ خليفه ارتبك من سمع رمسة امه .. تم يطالع مرته ومرتبك.. وهي مستغربه شو السالفه الي بين خليفه وأمه وهي ماتدري عنها.. : ها كل خير كل خير .. أم خليفه: عاد انا مستعيله وانت تحيرت علي .. خوله: شو السالفه ؟؟ .. أم خليفه: ليش انت مارمست مع مرتك فالسالفه؟؟ خوله زاد استغرابها: اي سالفه.. فهموني.. خليفه تم يطالع امه: ماعليه بقولها عقب ليش مستعيله.. أم خليفه: لا إله إلا الله وليش هالعباله كلها.. شوفي يا بنتي.. تعرفين سوسن بنت عم خليفه.. خوله وهيه تبستم لعمتها.. وخليفه يطالعها وهو خايف من ردة فعلها.. ومرتبك.. : هيه الي توفى ريلها من فتره الله يرحمه.. ام خليفه: هييييه عليج نور.. تدرين بها حرمه مكسورة مجاديفها .. لا ابو ولا اخو ولا ام ع راسها.. وعندها هالولد وهالبنت تربيهم.. وانا قلت اخطبها لخليفه يستر عليها وياخذها ويكون لها عون فالدنيا.. خولة من سمعت اسم خليفه كأنها مب مصدقه الي تسمعه .. والي مشوش افكارها .. تصدق اذنها ولا تجذب عمرها ... : عمتي اي خليفه؟ خليفه يود ايدها: نشي نسير الحجرة.. اطالعته خوله وكأنها تترجاه يفهمها شو الموضوع.. ويقولها انه مب هو المقصود.. ام خليفه: وين شو بلاك مستعيل.. خوله هب ياهل عشان تصيح ولا ترفض.. سمعيني يا خولة.. خليفه الي اطريه.. ولدي.. اللي هو ريلج.. خليفه انحبست الدمعه في عينها وتمت ساكته.. ام خليفه: شو رايج موافقه؟ خوله نشت وهي تحس بألم في ظهرها .. : بالبركه عليهم.. سوسن تستاهل كل خير.. وراحت لغرفتها.. ومشى خليفه يلحق مرته الا تزقره امه: تعال وين ساير.. هاي حركات دلع الحريم ماعليك منها.. وخلنا اليوم نسير عند سوسن ونرمسها.. خليفه: امييه تعرفين ان خولة حامل ومب زين لها هالرمسه .. اتعب اعصابها.. ام خليفه: شو هالكلام .. هب ياهل تراها.. حرمه عاجل وها حملها الثاني الحمد لله.. خليفه: لو ابوي كان يبا يتزوج عليج شو كنتي بتسوين؟.. اي حرمه ثانيه مابتسوي شرات خوله وبتقول بالبركة.. ام خليفه: لا بسوي جي.. الحرمه السنعه تسوي جي.. وانا ادري ان خولة والنعم فيها .. حرمه وكل السنع فيها.. خليفه تنهد ومشى صوب غرفته.. حاول يفتح الباب بس شافه مقفول.. دق الباب.. خوله: نعم منو؟ خليفه: انا .. فتحي الباب برمسج.. خوله: دخيلك خلني روحي شوي .. عقب تعال.. خليفه يطالع وراه عن تكون امه وراه وتسمع: والله يا خوله انا مب مقتنع ومابا اسوي هالشي حتى اسألي حور وعبيد يدرون .. قلت لهم اني مب قادر اسوي هالشي.. مابا شي يمس علاقتي وياج.. خوله وهي تصيح ورا الباب: ليش انت بالذات.. خليفه ليييييش انت.. مافي غيرك فالعايله.. ليش ريلي انا.. مالي احساس مب حرمة.. خليفه تم ساكت مب عارف شو يرد عليها.. ومشى ونزل من الدري طلع برع البيت وهو ضايج.. ويلس في موتره يفكر وين يروح.. .. .. .. نزل من موتره ودق الجرس يتريا حد يفتح الباب.. كان توه مأذن المغرب.. طلعت لهم ياهل صغيره.. عزّه: الثلام عليكم.. ابتسم لها هزاع وتذكر بنت اخته (سلامه) الكبيره.. عندها بنت في عمر عزّة اسمها نوف.. : شو اسمج انتي؟ عزّة: عيب منقود.. ماتثتحي.. ضحك هزاع على رمستها.. : انزين وين طارق؟ عزّة: كلهم ثارو يثلون (يصلون) .. انت ماتثلي (تصلي) ياي هني؟ حمدان تقرب منهم وسمع رمستها وضحك.. : حليلج والله.. صدقها نحن مانصلي؟ هزاع: انا اسف عموو بسير اصلي احين.. عزّة: هيه ذين.. وبندت الباب في ويهم ولا عطتهم مجال ترمس وسمعوا صوت نعالها (اكرمكم الله) وهي تركض.. حمدان: يحليلها والله .. تشبه نوف.. هزاع: هيه من شفتها تذكرت نوف.. (وسكت عقبها هزاع .. تذكر سواته.. لو كانت نوف احين كبيره وعاقله وشافت ان خالها هاي سواته بيشرفها ان لها خال جي؟؟ وشو بيكون ردة فعلها.. ووايد اشيا يت في باله).. وتموا واقفين عند باب سيارتهم يتريونهم يرجعون من المسيد.. وشوي الا يشوف طارق واخوه بدر وأبوه يايين من صوب المسيد.. تيبس هزاع في مكانه .. وهو يشوفهم وده ينقض عليهم ويضاربهم بس ميود عمره.. تقرب منهم شوي وياه اخوه حمدان.. طارق من شاف هزاع تخرع.. لأنه يدري ان الفيديو انتشر.. اما بدر ولا كأنه فالدنيا.. سلموا على ابو طارق ومن عقب مادخل هو البيت .. يود هزاع طارق من كندورته ودزه على اليدار وسانده عليه.. : ليش سويت فيه جي؟؟ في شو ضريتك عشان جي تسوي بي؟؟ طارق كان يحس بخنقه لأنه راص بقبضته على رقبته ... تم يكح وبدر تم يحاول يفج هزاع من اخوه بس ماقدر.. لآنه دزه بكل قوته على الصوب الثاني .. وضرب طارق بكس في ويهه كسر له خشمه ونزف.. وحاول بدر يضارب.. الا ايوده حمدان وايود ايده ويلفها.. طارق: مب انا الي سويت جي.. يوده هزاع مره ثانيه ودزه على السياره.. والناس بدوا يتيمعون.. ودقوا جرس بيت طارق وطلع ابو طارق وشاف الضرابه.. وكان يحاول يفج طارق من ايد هزاع.. المسكين اندز ويوده حمدان عن يطيح احترامه لكبر سنه.. بوطارق: يالخسيس ياي لعند باب بيتني عشان تضرب ولدي.. هزاع وهو يطالع بوطارق وعيونه محمره من الغضب وكندورته وايده متوصخة من الدم : بذبحه بعد.. لأنه كان بسواته بيتسبب في موت ابويه.. اللي سواه فيه طارق مب شوي.. مب شي يغتفر عليه.. بوطارق رغم حبه لعياله إلا انه مايحب يدافع عنهم لا عرف انهم غلطانين... انسان حقاني بمعنى الكلمة.. ومتفاهم: انزين خل عنكم الضرب والإنتقام .. وتعالو وياي الميلس وفهموني الي صاير دخلوا كلهم بيت بوطارق وقعدوا فالميلس وبدأ هزاع يرمس فالسالفه ويشرح كل الموضوع لبوطارق.. طارق كان منزل راسه ومفتشل.. وبدر عرف ان هو السبب لأنه حط الفيديو في الجات.. توه بيظهر من الميلس.. يوده طارق ورده طارق: وين ساير ساس البلا.. بدر: أأأأنا مايخصني.. انت الي عطيتني الفيديو .. بوطارق نش معصب: بس.. سودتوا ويهي الله يسود ويهكم دنيا وآخره.. هاي نهاية تربيتي؟؟ ريال حشيم اخاف الله .. وعمري مافضحت حد جي تسوون فيه.. وايد مشرفنكم الي سويتوه.. عنلاتكم.. يود قلبه ومب قادر يتحمل الصدمه.. تمت ايده ترجف وطاح.. الكل ربع صوبه.. وبسرعه سار طارق يزقر امه اتييب الحبه الي تنحط تحت اللسان تمنع تجلط الدم عشان يودونه المستشفى.. هزاع نزل راسه وتلوم زود.. تذكر ابوه انه دخل المستشفى بسببه واحين بسبب طارق ابوه يمكن يروح فيها.. ادرك وايقن ان الدرب الي كانو ماشين فيه اكبر غلط.. راح وياهم المستشفى عشان بالمره يمر على ابوه.. حمدان: شفت الي صار بسبب لعبكم الي مامنه اي فايدة.. هزاع: دخيلك.. لا تزيدني الي فيني يسدني.. حمدان: الله يقوم بوطارق بالسلامه.. شو بتسوي عن الفيديو احين؟ هزاع: انت شو بلاك مب صاحي.. توه ابوه داخل المستشفى .. كان بيموت علينا بعد الي سمعه.. يكفيه عذاب الضمير الي عايشنه احين إنه خذل ابوه وكان ابوه بيروح فيها.. هذا يكفيه طول عمره.. مافي درس اكبر من ها.. نحن ضربناه وهلكناه.. بس الضرب مابيغير شي.. سكت حمدان ومشى مع هزاع صوب غرفه ابوهم.. دق الباب.. ودخل.. كانت حالة بوحمدان مستقره ويالس عالكرسي.. شاف فالبداية حمدان.. بوحمدان: وينك من الصبح ظهرت ولا رديت.. حمدان سكت واطالع وراه شاف هزاع يمشي وهو متردد.. : تعال.. بوحمدان: منو الي وياك؟؟ هزاع: انا هزاع ابويه.. فج بوحمدان عيونه وعقد حياته وصد الصوب الثاني: اطلع من الغرفه مابا اشوف رقعه ويهك.. هزاع ربع صوب ابوه ونزل عالأرض ويود إيد أبوه: سامحني ابويه .. غلطت .. سامحني.. سحب بوحمدان ايده ودز هزاع: إطلع برع مابا اشوفك .. الله لا يسامحك اطلع.. هزاع توه كان بيبوس ريل ابوه.. الا يدزه ابوه بريله .. افتشل هزاع يدام زايد وعدنان.. وحمدان.. نش واطالع ابوه توه بيرمس.. سبقه ابوه ورمس: اسمعني.. من اليوم وساير تنسى ان لك ابو .. ولا عاد اشوفك فالبيت يوم برجع .. والله ان شفتك فالبيت لا احرق البيت باللي فيه.. روح غاضب عليك ليوم الدين.. لاانت ولدي ولا انا اعرفك.. هزاع وعيونه مليانه دموع: ابويه وين اسير.. مالي غنى عنك.. انت ابويه وتاج راسي .. ورضاك من رضا رب العالمين.. بوحمدان: جـــــــــــــــــــــــــــــــــــــــــــــــب. . مابا اسمع حسك.. قلت لك لا انت ولدي ولا اعرفك ولا ابا اسمعك تزقرني ابويه.. هزاع: دومك قاسي.. قسيت على عيال اخوك.. شي عادي تقسى على ولدك بعد.. الكل يغلط وانت بشبابك اكيد غلطت.. بس الله كريم ويسامح.. لكن انت طول عمرك جي ماتسامح.. مات عمي ولا سامحته.. قاطعه بوحمدان: حمدان طلع اخوك بسرعه قبل لا انش له.. يود حمدان ايد اخوه وسحبه وطلعه من الغرفه: انت شو بلاك مينون ترمس هالرمسات .. ماتدري ان ابوي يمكن يروح فيها بسبب هالكلام.. هزاع: انا الي عرفته واكتشفته ابوي مب زعلان لأن ولده سوى هالشي.. ابوي زعلان على سمعته وخايف على مصلحته ويا الناس الي يتعامل وياهم.. ولا هو ولا يحبني ولاشي.. تخلا عني لغلطه غلطتها.. قلبه اسود ابوك.. حمدان: تعال وين ساير.. هزاع: خلني اسير.. بسير اي جهنم بترغد فيه.. بس اكون بعيد عن هالظالم.. حمدان: انزين خلك على اتصال وياي وطمني عليك.. واحتجت اي شي كلمني.. هزاع طبطب على جتف اخوه وابتسم: رايتك بيضا ياخوي.. مع السلامه حمدان بحزن : مع السلامه ومشى هزاع ولا هو حاط في باله مكان معين يوصل له.. ولا اي هدف.. مب عارف وين بيوديه هالدرب الي يمشي فيه احين.. .. .. خلود رتبت كل شي فالغرفه شرات ما اتفقت ويا أحمد.. وحطت الهديه على الكرسي الي فالغرفه.. وشوي الا سمعت حد يحاول يفتح الباب.. مجد: أمييييييييييييييه.. منو قافل غرفتي.. خلود وقفت عند الباب وهي تضحك: يالدبه انا فغرفتج.. مجد: بسم الله الرحمن الرحيم.. شو وصلج غرفتي انتي؟ خلود: هههههه بعد ربج.. اتريي شوي وبفتح الباب.. مجد: شو تسوين انزين؟ خلود: لا تستعيلين بتعرفين كل شي .. اتريي انتي بس.. مجد: افففففف يلا مافيني صبر.. خلود: ههههه زين زين عشان تتعلمين الصبر.. بندت خلود الليت.. وفتحت الأبجورات اليديدة الي كان شارنها أحمد.. والشموع اشعلتهم.. ورتبت السرير على الفرش اليديد الي كان ماخذنه أحمد بعد.. فتحت شوي من الباب خلود: غمضي عينج .. مجد: شو السالفه تراني مب فاهمه شي.. خلود: احسن .. انتي بس غمضي عيونج.. مجد وهي تغمض: يلا غمضت.. سحبتها خلود للغرفه وقفت وراها: يلا فتحي. فتحت مجد عيونها وصرخت.. .. .. مجد: خلوووووووووود شو ها.. خلود وهي تبتسم لها: مفاجئة صح.. عيبج؟؟ مجد: فديتج والله مشكورة.. واااااااايد حلو .. الا روعه.. لا لا لا .. فانتاستك.. اووووووه ماعرف شو اقول والله.. خلود: احم احم .. لا تشكريني انا .. انا بس نسقت لكن الي ماخذنه شخص ثاني.. مجد وهي رافعه حياتها: ماخذنه!!!!!!!.. يعني مب ماخذتنه!!! .. اكيد ابوي.. فديته وينه.. ؟؟ خلود وهي تيود بوزها: اصصصصص.. لا مب ابوج.. انا قايله لأمج اني انا مسويه كل ها.. هاتي اذنج بقولج منو.. قربت مجد اذنها وتقربت خلود لها وقالت لها اسم احمد في اذنها.. فجت مجد عيونها: لا لا لا لامستحيييييييييل.. خلود: والله حتى هديتج هناك شوفي.. مجد صدت صوب المكان الي أشرت عليه خلود.. شافت كيس باريس جاليري.. بسرعه سارت صوبه وطلعت الهديه الي فيه.. .. .. .. .. وبسرعه مافيها صبر البنت .. شلت الغلاف عشان تشوف الهديه.. تفاجئت من الخاطر.. مجد: أويييييييه خلود.. هاي الساعه الي بغيتها.. خلود وهي تتطالعها مستانسه لأن مجد فرحت لهالمفاجئة.. وماندمت لأنها اتصلت في احمد وقالت له عن موعد ميلاد مجد.. : هيه تراه يوم عرف انها عايبتنج خذاها.. مجد: انزين وليش كلف على عمره على هدايا الغرفه هاي.. خلود: بعد.. الحب ومايسوي.. ابتسمت مجد بخجل ويلست تتطالع الساعه وتلمس كل طرف فيها.. .. .. .. .. خلود: انزين .. وماتبين تشوفين هديتي.. ؟؟ مجد ابتسمت: فديتج والله ماقصرتي.. ليش متعبه عمرج.. خلود: افا عليج انتي بس.. انتي مجد مب اي حد.. مجد استانست وراحت صوب البكس.. .. .. .. .. مجد ربعت صوب خلود وحضنتها: فديتج والله .. غصبن عنها ادمعت عينها.. خلود: شوفييييييييج؟ مجد: مستانسه .. والله في عمري محد اهتم فيه بهالطريقه .. صح ان حور ماكانت تقصر في يوم ميلادي .. هالمره بس عطتني بيزات.. وابوي بعد.. بس هالمره غير مميز.. خلود: أحم احم لازم ترا انا موجوده.. واهم شي.. أحمد.. مجد وهي تتطالع وراها وتأشر بصبعها: اصصصصصص.. خلود: ههههههه.. وسمعت صوت الجرس فهالوقت.. ربعت صوب الدريشه تشوف منو الي ياي.. شافت سياره غريبه كأنها من مطعم او شي جي.. وابوها يتفاهم ويا الريال.. وعقب استلم من عند الريال بكس كبير كأنه علبه كيك او شي جي.. ويدخل البيت. تربع مجد تحت تشوف شو السالفه وخلود وراها.. مجد: شو ها بابا؟ عبدالعزيز: استحي ع ويهج لو يدتج هني هزبتج.. قولي ابويه.. مجد: كيفي ادلع ابويه .. فيها شي.. عبدالعزيز يضحك لها ويهز راسه: ها كيك من عند خلود.. مجد صدت صوب خلود وفاجة عيونها: خلودووووووو والله مفتشله منج.. جان تغمز لها خلود وتأشر لها على ان الكيك مب منها.. بسرعه سارت مجد شلت الكيك من عند ابوها وحطته على طاوله الطعام وطلعته.. شافت الكيك كان شكله رووووووووووووعه .. الكل تقرب منها وبارك لها بيوم ميلادها .. وتلموا حواليها.. ويابو لها السكين عشان تقطعه جان تهمس في إذن خلود.. مجد: كيف اقطع الكيك وراعيه مب موجود.. خلود ضحكت وقرصتها: لا اتيي لأنه بيي قال.. مجد استانست: احلفي.. خلود هزت راسها.. مجد: ابويه حرام قلبي يعورني اقطع الكيك.. شكله وايد رووووعه.. عبدالعزيز: لا يكون ناويه بس تتطالعينه؟ مجد: اقول شو رايك اسير البس لبس حلو جي .. واتكشخ عشان اتصور.. عاد الكيك شكله مايتوفت للتصوير.. لطيفه: يحليلج.. سيري بسرعه لأن امج يوعانه ربعت مجد وراها خلود .. ودخلت الغرفه طلعت لها 3 مغربيات عندها.. مجد: اي البس.. الفوشي.. ولا الأخضر.. ولا الأسود والفضي.. خلود يلست مجابلتنها تتأملها: اول مره اشوفج بهالوناسه.. مجد يودت المغربيه الي في ايدها ولمتها وقعدت على السرير.. : تدرين يا خلود.. اول مره احس اني مهمه لإنسان في هالدنيا.. هالشي الي مفرحني.. (يودت ايد خلود وترص عليها) دخيلج ادعي الله ان يجمعني فيه ولا يحرمني منه.. خلود: امين يارب.. بعد لحظة صمت.. مجد: اقووووووووول شقايل عرف عن يوم ميلادي.. خلود وهي تحاول ماتكشف عمرها: مادري يمكن سأل .. او سمع من اختج.. مجد: هيه يجوز.. مب مهم المهم اهتمامه بيوم ميلادي الواضح.. دخلت عليهم لطيفه: امييه مجد البسي شي ساتر وانزلي بشيلتج.. مجد: ليش اميييه؟ لطيفه: أحمد ولد عمج يايب اوراق لأبوج ويالس فالصاله تحت.. وابوج ماخلاه ينزل الا ويتذوق من الكيك.. مجد صدت صوب خلود رفعت حياتها وغمزت لها..: خلاص ان شاء الله امي.. وطلعت لطيفه ولا هي فاهمه شي من حركاتهم.. مجد: بسرعه شو البس.. خلود: الفوشي وايد حلو.. مجد اوكي.. وبسرعه تلبست وجحلت بجحال كحلي.. وحطت لها جلوز وردي فاتح.... لفت شعرها الطويل بمقبض وردي.. ولبست شيلتها.. وعدلت المغربيه بحيث ماتكون ضيجة وايد وترص على جسمها.. وشلت الكاميرا من كبتها ونزلت مع خلود.. مجد: لحظه تعالي.. خلود: وين سايره مابتنزلين؟ مجد: بلا بس خلني اشوفه شوي من فوق.. تدرين مابقدر اشوفه تحت.. خلود: هههههههه شيطانه.. استرقت النظر مجد ع السريع وابتسمت.. ونزلت .. عبدالعزيز: يلا يابنت الحلال .. يعنا ونحن نشوف الكيك يدامنا.. مجد: هالكثر شكله لذيذ.. ؟ عبدالعزيز: هيه والله .. مجد: امممممم.. لازم ترا صاحبته (وهي تتطالع صوب احمد وتنزل من اخر 3 دريات) حلوة.. نزل احمد راسه.. وتقربت احمد من صوبهم شوي: اشحالك ولد عمي؟ أحمد: بخير يسرج حالي.. مجد: حياك احضر ويانا حفل قطع الكيك أحمد: لا ماعليه بستأذن انا.. عبدالعزيز ايود ايد احمد: لا والله ماتروح الا وانت ماكل من الكيك افا بس.. ابتسم احمد.. وسارو كلهم صوب الطاوله وقفوا حوالينها.. وخلود واقفه مجابلتنهم عشان تصور.. كانت مجد مابين امها وابوها.. وأحمد حذال ابوها.. وفاللحظة الي صورت فيها خلود كان احمد صاد يستغل الفرصه ويطالع مجد وناسي ان خلود تصور.. وقطعوا الكيك وزعوه على الكل وكلو منه.. ومجد ماطاعت تاكل الا قبل ما تأكل امها وابوها.. ومن ثم كلت لقمه من عند امها والثانيه من ابوها.. كانت طول الوقت البسمة مب مفارقها شفتها.. استانس احمد لفرحتها ووناستها.. فهالوقت رن تليفون عبدالعزيز واستأذن منهم لأنه مواعد ربيعه فالمطار.. وطلع من البيت.. ولطيفه سارت المطبخ تزهب العشا.. كانت الصاله فاضيه ومافيها غير خلود ومجد قاعدين على كراسي طاوله الطعام.. واحمد صوب الجلسة أونه يقرا المجلة الي كانت طايحه بس هو يطالع مجد.. مجد وهي تتطالع خلود: تدرين خلود ذوقج وايد حلو .. الكيك طلع حلوو وايد... عيبني.. جان زين كل يوم عيد ميلادي.. ابتسمت خلود : لازم ترا الحلو للحلو.. مجد صدت صوب احمد شافته اونه مندمج فالمجلة ويقراها.. همست لخلود: شوفي الأهبل شو مسوي.. ضحكت خلود واشرت لها مجد انها تسكت.. نشت مجد من على الكرسي وتقربت صوب أحمد: إحم إحم.. أحمد وهو يطالع المجله: نعم.. مجد مسكت المجلة وعدلتها لأنها كانت مجلوبه: مايقرون المجلة جي.. وراحت عنه وصعدت فوق.. افتشل احمد وضحك.. وهز راسه.. ولحقت خلود مجد .. ودخلوا الغرفه وهم يضحكون على شكل احمد وهو قافط.. .. .. عمّار: قلت لكم ماصدقتوني.. شما: دخيلك عمار لا تزيدني الي فيه يكفيني.. أم عمّار: ماعليه هذا عمش ولازم تتحملينه.. شما: الله يقومه بالسلامه .. هذا كل الي اقدر اقوله.. عمّار: المهم غيري السالفه .. وقولي لي.. شو الدوام وياج.. شما من سمعت طاري الدوام تذكرت ابراهيم انعفس ويها : الحمد لله.. عمّار: ليش تقولينها من ورا خاطر؟؟ شو مستوي؟ شما: ماشي.. بس تدري اول ايام تعب لين ماتعلم الشغل.. أم عمّار: الله يوفقج يا بنتي يارب.. شما: هيه يمي كثري من هالدعوات.. كانت الساعه 11 فليل.. رن جرس البيت.. الكل استغرب.. شما: منو ياينا هالحزة؟ عمّار: مادري يمكن حد من ربعي.. أم عمّار: لا ماعتقد.. انت ربيعاتك مايون هالحزة.. ضحكت شما: اميييييه .. شو ربيعاتك.. هاي تنقال للبنت.. ربعك.. أم عمّار: اووووووه.. ونشت عنها وهي تحرطم وشما تضحك.. وسارت غرفتها.. عمّار سار يفتح الباب.. منو الي ياي هالوقت .. من فتح الباب انصدم من الي شافه.. وتم يطالعه من طرف خشمه.. : خير بعد شو عندك؟ هزاع وعيونه ورمانه من الصياح.. وحالته حاله.. ماحس الا عمره دايخ ويطيح على الأرض.. شهقت شما الي كانت واقفه عند باب الصاله تراقب منو الي ياي.. وربعت صوب الباب ناسيه انها مب مغطيه شعرها.. عمّار: هبله انتي طالعه جي.. انتبهت شما لعمرها: اوووووه .. ساعدني انت احين خل اندخله البيت.. عمّار: اكيد سكران وياينا.. شما وهي تهزب اخوها: عمّار.. شل ولد عمك.. عمّار يساعد شما وهو يتحرطم: اي عم الي راغكم اليوم.. واي ولد عم.. الي فاضحنا عند الي يسوى والي مايسوى.. سحبوه ودخلوه الصاله.. وسارت شما قالت لأمها ان هزاع مغمى عليه وفالميلس وهي سارت اتييب شيلتها.. ربعت ام عمّار بسرعه صوب الميلس وسارت عند هزاع وصبت على ويهه ماي ويابت له ثوم وبصل عند خشمه.. ومن شمهم بدا ينش شوي شوي.. وهي تقرا عليه وتمسح على راسه.. وعمّار واقف على راسه يطالعه بحقد كأنه يتمنى موته.. وعقب طنش وسار صوب غرفته ولا هو مهتم.. ولا كأنه كان يدافع عنه اليوم الي قبله.. ام عمّار: شما امي ييبي ماي.. بسرعه يابت شما الماي وسارت عند امها.. وشربوا هزاع الي نش ويلس : انا اسف اذا زيارتي ازعجتكم.. ام عمّار: شو هالكلام يا عمّار.. البيت بيتك.. بس شو مستوي فيك؟؟ ليش جي؟ هزاع ماقدر ايود عمره .. صاح وقال لهم عن سالفته مع ابوه .. وسالفه الفيديو.. كأنه كان محتاج يفضفض الي في خاطره لأي شخص يفهمه.. ام عمّار: ماعليه ابوك معصب احين .. كلها يومين وبيهدأ.. محد يفر ولده برع.. هزاع: بس ابوي راغني وداسني يدام الكل.. شما: لا تنسى انت غلطان.. يعني لازم تعذره.. هزاع: انا مادري شو الي يابني هني.. بس حسيت ماعندي مكان ثاني.. شما: افا عليك.. البيت بيتك.. طلع عمّار من الغرفه: لا .. مب بيته.. يهبي واحد شراته يبات في بيتنا يوم واحد.. نشت له شما تصرخ عليه: عمّار.. شو هالرمسه..؟ عمّار: يا مسرع مانسيتوا اذيته لنا.. واذيه أبوه.. ماقدر انسى شكل امي وهي تسهر للصبح تشتغل وتكد عشان تصرف علينا.. لغايه مااعتدل حالنا شوي.. هزاع تم منزل راسه ومفتشل.. ماقدر يتحمل اكثر.. نش بيطلع من البيت.. يودته مرت عمه: على وين.. هزاع: انا ما استاهل اتم اي مكان.. شما وهي تتطالع اخوها ومعصبه سارت غرفتها.. لحقها عمّار..: شوفيج؟ شما: عمري ماتوقعت انك حقود بهالطريقه.. نزل عمار راسه: غصبن عني يا شما.. الي سواه مب شوي.. شما: بس هذا مايثبت انه مب من لحمنا ودمنا.. انت وانا وغيرنا معرض للغلط.. وهو اتدلع وعطوه الحريه .. ولا خلوه يكد ويغدي ريال عشان يحس بالمسؤولية.. تم هايت وهذا مصير كل واحد شراته.. احين يوم يانا يطلب العون انت توقف بويهه.. عمار نزل راسه .. يعرف ان رمسة اخته صح.. بس قهره اكبر..: ادري.. وانا مارضيت عليه رمسة يوم ان ربعي رمسوا عليه يوم شافو الفيديو.. تدافنت وياهم عشانه.. بس يوم شفته ماقدرت ايود عمري.. تقربت شما من اخوه تتطالعه: انت اخوي الي مالي غناة عنك.. عمّار خلنا نكون الأحسن.. اذا هوه وابوه ماكانو غير عون لنا في حايتنا لهم.. خلنا نكون نحن العون له في حايته.. ابتسم عمّار لإخته وسار الصاله شاف امه قاعده حذال هزاع.. ويلس حذال هزاع عمّار: البيت بيتك ياخوي.. من سمع هالرمسه هزاع استانس : سامحوني.. عمّار: بلا هالرمسه.. وتراك بتشاركني الغرفه .. لأن ماعندنا فرش فالغرفه الثانيه.. هزاع: تسلم والله ماتقصر.. ومابا اكون ثقيل عليكم.. ام عمار: شو هالكلام.. انت مثل ولدي.. والبيت بيتك استعد هزاع ثقته شوي باللي حواليه وإن الدنيا لازال فيها الخير.. .. . خليفه وحاله مع خوله..؟؟ سكن هزاع في بيت شما.. هل له تأثير في حياة شما؟؟ اذا عرف بو حمدان (اللي هو بو هزاع) بإن هزاع راح يسكن بيت عمه .. شو موقفه؟؟ مجد وفرحتها بعيد ميلادها.. وعلاقتها مع احمد؟ هل هذا العقاب يكفي لطارق وبدر.. تتوقعون هزاع يرجع ينتقم ولا كلامه مع اخوه يعني نهاية الموضوع؟؟ ___ هذا البارت عن التأخير بس سامحوني إذا فاقد لبعض الشخصيات والأحداث.. حبيت اركز على هذا الكم في هذا الجزء عشان ماتستوي شوشرة في راسكم ___ تحياتي MiSs MrMr[/align] |
ام صح هذي القصة وايـــــــــــــــــــــــــــــــــــــــــــــــ ــــــــــــــــــــد حلــــــــــــــــــــــــــــــــــــــــــــوة وانصحكم تقراونها انا بالنسبة لي قريتها وتأثرت فيهل وغير عن كل القصص تسلمين ع الموووووضوع خيتيي |
ام صح هذي القصه وايـــــــــــــــــــــــــــــــــــــد حلــــــــــــــــــــــــــــــــــــــــــــــــ ـو وانصحكم تقراونها انا بالنسبة لي قريتها وتاثرت بها وهذي القصة غير عن كل القصص يسلمووووووووو خيتو ع الموووضوع |
الله يسلمج .. فديتج ورااح أكمــل وأنزل البارت اليااي ان شالله .. بس لاني داشة من لاب أختي مو من لابي ما قدرت أنزل الحيـن .. |
ان شاء الله رااح انـز التكمــله عن قـريب واطلب السمـوحـه منكـم ع التأخيـر |
الصراحة القصة واااااو هب حلوة بس.... حسيت انها تناقش كثير من قضايا المجتمع ... و فيها كثير من التوعيه ... يمكن بعضنا كانوا غافلين عنه مشكوووووووووووووووووووووووووووووورة الغلا صدق ما تقصرين ... و نتريـــــــــــــــــــــــــــا البارت بفارغ الصبر... |
روووعهـــــــ تسلمين خيتووو ع القصه الطررررر نتريا الزود منج |
ان شاء الله يالغلااا . . البــااات راح أنــزله قــريب .. مشكووورين ع مروركم .؟ . |
7loo albart.....kmleeee bs3aaa plz |
ويييييييييييييييييييييييييييين البارت؟؟؟؟؟؟؟ |
تسلميين حبيبتي لانج كملتي القصه عني لاني ماكنت اقدر احدر المنتدى وايد بسبب وقت دواامي |
[align=center][align=center] الجزء التاسع الجزء الثاني =========== الملخص = (( معرفة خوله بسالفه خليفه وبنت عمه.. لجوء هزاع لعيال عمه بعد طرد أبوه له.. فرحة مجد بيوم ميلادها.. ودخول ابو طارق المستشفى بعد صدمته من موقف ولده طارق مع هزاع.. )) =-=-=-=-=-=-=-= نش من الساعه 10 الصبح وحاس بنشاط غير طبيعي.. لأول مره يحس نفسه رقد وباله مرتاح..صح انه مصدع لأنه من زمان ماشرب السم الي ادمن عليه.. بس ع قولته الله يخلي المسكنات.. صد حوالين الغرفه شافها فاضيه.. سار الحمام سبح وتغسل.. وطلع من الغرفه .. شاف الصالة فاضيه مافيها غير أم عمّار.. هزاع: صباح الخير عموو.. ام عمّار وهي تحط كوب الجاهي على الصينيه: صباح النور.. عساك رقدت زين.. هزاع: هيه الحمد لله.. وينهم محد فالبيت؟ أم عمّار: شما راقدة.. تعرف بعد خميس.. وعمّار راح يزور قبر أبوه .. كل خميس يروح هناك.. هزاع سكت شوي وهو يتذكر عمه المتوفي.. وتنهد: انزين تسمحين لي اصب لي شاهي.. أم عمّار: عيب عليك.. انا بصب لك.. هزاع ابتسم وصبت له مرت عمه الشاهي وشرب له شاي وكلا له شي.. هزاع: عموو ماشي جريدة؟ أم عمّار: عمّار وهو راد بييب وياه.. هزاع: ليش عمّار يسوق؟ أم عمّار: لا ماعنده ليسن وين يسوق.. يروح مع ولد جيرانهم .. ذاك يزور قبر يده.. وعمّار يزور قبر عمّك.. مره ثانيه سرح هزاع.. كان لفتره ناسي ان له عم .. بس هم الي مانسوه في حاجته لهم.. وماصار الا وشوي يسمعون صوت صريخ شما.. شما: لحقووووووووو علي.. لحقو علي بموووووت .. لحقو عليييييي.. أمااااه.. عمّار.. تعالو بسرعه .. ربع هزاع ماعرف كيف يوصل عمره للطابق الثاني يشوف شو الي صاير.. شاف باب غرفه شما مفتوحة وهي واقفه فالصاله ولابسه وقايه الصلاة .. وصلت أم عمّار وقفت عند الدري تشوف شو الي صاير. هزاع: شوفيج.. شما وهي قافطه وفي نفس الوقت خايفه: طيــطار في غرفتي ( سحليه ).. هزاع وهو يضحك عليها: وينه خل اذبحه.. كل هالصريخ قلت البنت داش عليها حرامي.. شما: تطنز علي.. والله مب حاس فيه اشكثر اكره هالحيوان.. هزاع: انزين تعالي راويني وينه خل اذبحه.. شما: مابا ادخل روحك دور عليه .. كان صوب التسريحة.. هزاع: بسير.. مشكله انتو البنات.. دخل هزاع وقعد يطالع حوالين الغرفه شافه فوق باب الغرفه.. أم عمّار: والله انا حسيت السالفه فيها حشرة.. شما: يخوف ماما والله يخوف.. عمّار وهو يصعد الدري: منو الي يخوف؟ شما: الطيطار.. عمّار: هبله الحمد لله والشكر.. قلت اسد .. ولا تمساح.. تقول طيطار هزاع وهو يصد صوب الباب من داخل غرفه شما يشوف عمّار: تعال دخيلك هالطيطار خبل بي.. اييه من صوب يشرد الصوب الثاني.. عمّار وهو يطالع شما بنقمة: بنات اخر زمن.. وايد مدلعة بنتج ترا أم عمّار وهي تلوي على شما.. : فديتها بنتي الوحيدة.. عمّار وهو داخل غرفه شما: وانا بعد ولدج الوحيد ولا نسيتي.. هزاع: لا لا غلطان.. الكل صد صوبه مستغرب: نسيت ييت وشاركتك الأخوة.. يعني ماعدت الوحيد.. عمّار: لحوووووول .. راح الدلع عيل.. تمت تضحك شما وتتطالعهم.. وهزاع وعمّار يحاولون المستحيل لغايه ماذبحوا الطيطار.. بس بعد ما خربوا كل شي في غرفه شما.. اغراض التسريحة كلهن على الأرض.. والتسريحة حركوها شوي عشان يقدرون يوصلون وراها.. هزاع: وأخيرا ذبحنا..تقدرين تدخلين الغرفه.. شما وهي تمشي صوب غرفتها: تسلم ماتقصر.. عمّار وهو خاطف حذال شما وهي صادة صوب هزاع.. ياها من وراها.. عشان يخوفها: اووووووه هذو ع جتفج.. فزت شما وصرخت.. والكل ضحك عليها.. شما: براويك ماعليه.. وراحت غرفتها عشان تصلي الضحى وتنزل .. .. جلثم: عنلاتج ولا تقولين يدتي وينها وشخبارها.. خلني ارد البلاد .. براويج نيوم القايله.. مجود: ادري كل ها من الشوق بس مستحيه تقولين.. جلثم: ههههههه عنلاتج والله انج عسل لو شو ماتسوين.. مجود: يدوو اسمع حشرة وين انتي.. جلثم: فالسوق ويا ولد عمتج وربعه مجود وهي توطي صوتها عن تسمعها امها: يدوو حلوين ربعه .. جلثم وهي تضحك: هيه غاويه ماشاء الله عليهم.. خصوصا ها اللي اسمه نصوور.. غاوي.. مجود: خلاص اخطبي لي اياه.. جلثم: هههههه عنلاتج صدق ماتستحين .. يبالج هالعصا اصلخ يلدج به .. مجود: افا اهون عليج.. جلثم: ماتهونين والله.. اشحالها الحور.. شو علومها.. شو حملها؟. مجود: اجاوب على اي سؤال.. انتي سألتي 3 اسأله..اشحالها.. وشو علومها.. شو حملها.. اي واحد فيهم اجاوب.. جلثم: عنلاتج ههههههههه.. صدق ولهت عليج وع سوالفج مجود: قلت لكم تريو اخلص ونروح سوا.. الا انتي عييتي تروحين الا ويا سلطان وربعه .. ادريبج تبين ترافقين العرب الغاوين.. جلثم: ويديييه.. لطيفه: بسج عاد خلني ارمس امي .. ولهت عليها.. مجود: تقول فالسوق تتشرى لي هدايا.. انتو لا.. لطيفه: هيه انتي هذا الي تفكرين فيه.. هاتي التليفون يلا.. وعطت التليفون امها عشان ترمس يدتها وهي سارت غرفتها وهي تضحك على سوالف يدتها.. صدق البيت من غير يدوو مب شي.. فديتها بترجع باجر ان شاء الله .. ربي يردها بالسلامه.. ...... ... .. حمدان: أبوي والله ان هزاع ندمان . وانت خلاص بعت المزرعه .. والفيديو تراه مانتشر وايد .. أكثر شي وصل للي نعرفهم وغطينا على السالفه.. وهزاع تراه ولدك بتتخلى عنه.. بو حمدان: لا حول ولا قوة إلا بالله.. انت ماتفهم الرمسة.. ولا شكلك تبا تلحق أخوك .. قلت له يدامك لا هو ولدي ولا انا اعرفه.. ماباه ولا لي حاية فيه .. ولا تعود تييب طاريه لأني اتنرفز.. حمدان: بس أبويه.. قاطعه ابوه: جب.. واطلع برع خلني اتريق وانا مرتاح شوي بدون ما اسمع طاري هالخام.. تضايق حمدان وطلع وجابل اخته سلامه وريلها سلامه: شو بلاك حمدان؟ حمدان: ابويه مايبا يسامح هزاع.. سلامه وهي ترفع حياتها بتكبر: يزول.. بعد الي سواه يستاهل.. سود ويهنا.. وانت مزعل عمرك عشانه صدق ماعندك سالفه حمدان: سلامه شو هالرمسه تراه اخونا.. سلامه: نسيت ان لي اخو بإسم هزاع.. وخر خل ادخل عند ابويه.. حد عنده؟ حمدان: لا محد عنده.. دخلت سلامه مع ريلها وبنتها نوف.. شل حمدان تليفونه قعد يتصل في هزاع بس مغلق.. طرش له مسج يطلب منه يطمنه عليه.. وسار صوب الباركات عشان يرد البيت.. .. .. . نزل من سيارته وتنهد وهو يطالع المستشفى.. ومشى صوبها وهو يحس بقلبه شوي وبيوقف من النبض والتعب.. وتوه بيدخل المستشفى.. دعم بجتف واحد صد صوبه تفاجأ انه حمدان اخوه.. تقرب وتوايه وياه وسلم عليه.. حمدان: وينك ياريال اتصل فيك مغلق.. هزاع: شو ابابه هالتليفون.. كل الي يعرفون رقمه مابا ارجع لهم ودمروني.. حمدان ابتسم له ابتسامه خفيفه: زين تسوي.. خطوة جيدة.. انزين اذا ابا اكلمك كيف؟ هزاع: ماشي السبت بقول لشما اتظهر لي رقم من اتصالات.. حمدان: شمـــا.. على ماعتقد ماتقصد شما بنت عمنا؟ هزاع ابتسم له: بلا اقصد بنت عمي.. حمدان: على اساس انك مب راضي بشغلها؟ هزاع: لا مايخصني دام البنت حاشمه عمرها تشتغل وين ماتبا.. حمدان زين يوم انك فكرت واخيرا.. هزاع: وعلى فكرة .. (ابتسم له) تراني ساكن عندهم حاليا لفتره لغايه ما اعتمد على نفسي.. حمدان فج عيونه مب مصدق.. هزاع: تامرني على شي؟بسير ازور بوطارق واطمن عليه... ويمكن امر على ابويه واسلم عليه.. حمدان: لحظه وين ساير.. فهمني بالأول شو السالفه.. هزاع: السالفه.. اني كنت غبي.. وتافه.. وبإيدي ضيعت بنت عمي من ايدي.. لو تنطبق السما ع الأرض ماظني بترضا إنها ترتبط فيني بعد سواتي.. لكن يكفي انهم ضموني في بيتهم في عز حاجتي لهم.. حمدان طبطب على جتف اخوه: قلت لك انهم طيبين.. دوم اقولك.. بس ماكنت تصدقني.. هزاع: لا صدقت وايقنت بعد.. حمدان: خلاص عيل بيي وياك اسلم على بوطارق.. ومشوا سوا داخل المستشفى سايرين صوب غرفه بوطارق يسلمون عليه ويطمنون على صحته.. ومن عقبها قرر انه يروح عند ابوه الغرفه.. بوطارق استقبل هزاع بكل رحابه صدر.. رغم الي صار لكنه يقدر ان هزاع قرر يرجع عن كل اعماله.. طلب من هزاع شي واحد.. وهزاع ماقدر يرفضه له.. ومن عقبها طلع من عنده .. حمدان: شو لك تبلش عمرك في طارق وغيره .. ماعليك منهم وخلك في نفسك يكفيك.. هزاع: حمدان عطيت الريال كلمة.. إني ماودر ولده وأخليه يودر عنه هالسوالف ويرجع يكمل دراسته.. الي بسبتيه وبسبب الشلة الفاشلة خليناه يودر.. حمدان: كيفك.. وانت احين مصر تدخل عند ابوي؟ هزاع: بأدي الواجب وبيتم ابويه لو يدوس علي.. حمدان: انا بتم برع مافيه على لسان ابوي.. هزاع وهو يطالع حمدان بنص عين: دومك جبان.. حمدان: ادخل يالجرئ خل اشوف كيف بتطلع .. هزاع: هههههه دخيلك قول للممرضين يجهزون ترولي يودوني فيه الحوادث ماظنتي اطلع صاحي ضحك حمدان غصبن عنه وقف برع يتريا هزاع يطلع.. وماصاروا خمس دقايق الا هزاع طالع من الغرفه وعقاله في ايده .. وهو يعدل فالغتره.. حمدان: ها ماتبا ترولي.. هزاع وهو مغيض: اسكت الله يخليك اكرمني بسكوتك.. حمدان: هههههههه.. شوف شكلك يغمض الواحد الصراحة.. هزاع: من شاف رقعه ويهي ما اشوف الا صحن الحلاو ينفر علي.. زين مسكته ولا كنت رايح فيها.. حمدان: ههههههه .. ولا يكون قلت له انك ساكن بيت عمي.. هزاع: لا خليت هالمهمه السهله عليك.. حمدان يوقف فجأة ويسحب هزاع: نعم نعم.. سهله هاا.. هزاع: ههههههه وايد سهله مابيسوي شي.. يمكن بس ينكسر راسك ولا خشمك.. (تقرب منه يشوف) هو خشمك يحتاج تعديل لو انكسر قولهم يسوون عمليه تجميل وبيطلع كشخه.. حمدان وهو رافع حياته: تدري انك سخيف.. هزاع: ههههههه .. احاول اطري الجو شو بلاك.. حمدان: عنلاتك.. ومشو صوب السيارات وهم يرمسون ويتفقون كيف يوصلون لأبوهم خبر ان هزاع في بيت عمه.. .. .. .. .. .. .. . . ( موقف نوره حقيقي .. صار لبنت خالتي ) نوره: العنود ماما هاتي التليفون.. العنود: مابا بكلم باباتي.. الو بابا ييب لي حلاوة واااااايد انذين.. فيصل: بييب لك كل الي في خاطرج .. انتي بس تامرين .. وبعد شو تبين؟؟ العنود: بعد ييب حق مهروو.. فيصل: ان شاء الله.. نوره وهي تسحب التليفون من ايد العنود الي فرت عمرها على الأرض ويلست تصيح.. : اوووه بس عاد.. هلا حبيبي.. فيصل: هههههه حرام عليج .. جان خليتيني ارمس بنتي ع راحتي. نوره: ليش مب مشتاق لأمها.. يكفي طول الإسبوع ماشفتك.. فيصل: تدرين بعد دوام حبيبتي.. طول الإسبوع في بوظبي.. ويادوب الويك اند ارجع.. نوره: بس هالمره حتى الخميس تميت في بوظبي.. بالعادة الأربعا انت هني.. فيصل: والله شغل حبي غصبن عني.. ولا انا مشتاق لج ولعيالي اكثر.. نوره: ربي يخليك لنا .. ويعطيك العافيه.. العنود: ابا اكلم باباااااااااا.. نوره: اسكتي انزين بخلص كلامي وبعطيج.. فيصل: انزين حبي اسمعي انا كلها نص ساعه وبكون فالبيت.. حطي لي الغدا لأني ميت يووووع.. طالع من بوظبي ومب متريق.. نوره: من عيوني.. وترا انا الي مسويه الأكل بإيدي.. فيصل: اوووب عيل لا يقاوم.. بدلع عيل انا اليوم.. نوره: وكل يوم يالغالي.. فيصل: الله يخليج لي يارب.. نوره: ويخليك.. فيصل: خلاص عيل .. مع السلامه نوره: مع السلامه.. وبندت نوره التليفون.. والعنود يلست تصارخ العنود: ليش ماعطيتيني بابا .. أبا اقوله شي.. نوره: احين بابا بيوصل وقولي له الي تبين.. العنود وهي تضرب بريولها على الأرض.. : مابا كنت ابا اقوله بابا انا احبك واااااااااايد.. ماخليتيني.. نوره: انزين احين بتصل فيه وقولي له.. بس لا تصيحين.. اتصلت نوره على تليفون فيصل بس كان مغلق.. استغربت.. ردت اتصلت مره وثنتين .. لكن بعده مغلق.. : ليش مغلق توني كلمته.. يمكن ماشي ارسال ولا جرج.. خلني اسير اجهز صحن الأكل قبل لا يوصل.. العنود: وين بابا؟ نوره: مغلق تليفونه.. العنود: كيف مغلق.. ابا اكلم بابااااااااااااااااااااااااااااااا دخلت عليهم ام فيصل من حشرة العنود.. ام فيصل: اشفيها بنتج شايله الدنيا ع راسها.. نوره: تبا تكلم ابوها فالتليفون وهو يسوق مايروم يرمس وايد.. أم فيصل: لا ماما مب زين.. بابا يسوق سياره.. بيرجع البيت وكلميه.. هو وينه احين؟ نوره: قالي نص ساعه وبيوصل.. أم فيصل: ان شاء الله وطلعت ام فيصل من الغرفه.. وشلت نوره مهره بنتها الصغيره.. والعنود تلحق امها للمطبخ.. قعدت تحضر الأكل في صينيه لأن الكل كان متغدي .. إلا نوره تريت فيصل عشان تتغدى معاه مره وحده.. ... ... ... .. .. .. دخل خليفه البيت شاف امه وبنت عمه يالسين استغرب من وجودها.. وهو كان طول الليل برع البيت .. ماقدر يرجع البيت.. أم خليفه: وين سلامك.. خليفه: السموحة.. السلام عليكم.. سوسن وأم خليفه: وعليكم السلام.. ودخلت عليهم خوله وفي إيدها صينيه العصير.. من شافت خليفه ابتسمت له: حمد لله ع السلامه.. خليفه مستغرب من هالإبتسامه: الله يسلمج.. (بصوت واطي) ممكن افهم شو الي قاعد يصير.. خوله وهي تمشي صوب عمتها وسوسن .. : ماشي اتصلت في سوسن وطلبت منها تتغدى عندنا فيها شي؟ خليفه وهو عاقد حياته مستغرب: لا مافيها شي.. تعالي الغرفه اباج شوي.. خوله وهي تبتسم لعمتها وسوسن: عن إذنكم.. ولحقت خليفه للغرفه وهي تحس بقلبها مقبوض ودها تنفجر صياح.. ودخلت الغرفه وصكت الباب وراها.. وتقرب منها خليفه وحضنها وقعد يصير شرات اليهال: سامحيني يالغاليه .. سامحيني .. خوله تمت جامدة مكانها .. أول مره تشوف خليفه بهالضعف يصيح ومتكدر.. وفي لحظه لفت ايديها على ظهره وتمت اطبطب عليه.. والا يسمعون صوت وراهم.. محمد وهو حاط ايديه على خصره: عيب شو هالحركات.. ماتستحون.. انتوا كبرتوا .. افتشلت خوله من شافت محمد ولدها.. وخليفه تم يمسح دموعه عن يشوفه ولده بهالحاله وصد صوبه: وانت شو تسوي هني.. هااا.. محمد وهو يحاول يغطي سواته .. : ها ماسويت شي.. بس كنت داخل انتوا ماشفتوني.. تقرب منه خليفه ويوده من ا ذنه ومطه: فهمني شو تسوي هني.. محمد وهو صاك عيونه: يعور .. بقولك بقولك.. خليفه وهو يودر اذن محمد.. : يلا قول.. محمد: كنت العب بالكمبيوتر.. خليفه: ومنو عطاك التصريح.. محمد يطالع امه يترياها تنقذه.. خوله وهي تضحك: لا تتطالعني مابجذب.. انا ماعطيتك اي تصريح خليفه : يلا برع سامحتك.. محمد بسرعه فل من الغرفه وطلع.. وقعدوا خليفه وخوله يضحكون على حركات ولدهم شيطان رغم صغر سنه ملسون.. تم خليفه يطالع خوله الي كانت تضحك ومبتسمه.. : علني ماخلا من هالضحكة.. خوله: اعتبر هالشي مجاملة.. ولا غزل؟ خليفه: اممم تقولين حب.. هيام.. عشق.. خوله : ابتسمت له لكنها تذكرت سوسن انها بتكون دخيله على حياتهم.. وتلاشت هالإتبسامة.. خليفه استغرب وتم يطالعها: شوفيج؟ خولة: ها ماشي.. انزين شو بغيت مني سحبتني للغرفه؟ خليفه: ابا افهم ليش عازمتنها؟ خوله: اتعرف على عديلتي اكثر.. خليفه: انتي مينونه اكيد مب صاحية.. خوله: انت شو تقول.. اصحى منك بعد.. خليفه: انتي تعرفين شو قاعده تقولين متأكدة.. خوله: هيه .. تراها بتكون شرات ربيعتي ان شاء الله.. واليوم عمتي خطبتها لك.. وانا بعد خطبتها.. قالت بتفكر .. خليفه يطالع خوله مستغرب.. مسكت دموعها الي كانن شوي وبيفضحنها.. وتحركت صوب الباب: انا سايره ايلس عندهم عيب.. وانت بعد تعال ايلس ويا خطيبتك.. وطلعت من الغرفه بسرعه سارت صوب الحمام الي فالصاله وقفلت الباب على عمرها وقعدت تصيح بحرقه وتتطالع عمرها في المنظرة.. آآآآآآآه ياربي صبرك.. وغسلت ويهها وطلعت.. خليفه تم واقف مكانه يطالع صوب الباب بعده مب قادر يستوعب الي قاعد يصير.. خوله اكيد ينت مب صاحية.. ورن تليفونه في هالوقت.. شاف رقم من برع البلاد.. رد على التليفون خليفه: ألوو.. ----: السلام عليكم.. خليفه: وعليكم السلام.. ----: خليفه الفلاني؟ خليفه: هيه نعم معاك خليفه.. منو الأخو.. ماحس الا بصوت الريال بدا يتغير.. كأنه يصيح .. : ماعرفتني؟ خليفه: لا منو الريال ماعرفتك؟ ----: نسيتوني ولا فكرتوا تسألون عني وتنشدون عن حالي.. 5 سنين مافكرتوا تعرفون انا وين؟؟ خليفه تم مبهت .. رجعت له الذاكرة وبدأ يعرف الصوت..: عيسى؟ عيسى: هيه .. عيسى الي نسيتوه .. الي قلتو عنه ميت.. ولا فكرتوا تعرفون انا وين بالضبط.. 5 سنين .. خليفه حس ان لسانه ثجيل من الصدمة * تعريف عن عيسى .. هذا أخو خليفه التوأم.. على أيام حادثه 11 سبتمبر 2001 كان في أمريكا .. مسكوه الأمريكان على أساس إنه إرهابي.. خليفه كلم السفاره الإماراتيه هناك وعطاهم اسم عيسى أخوه .. لكن ماقدروا يحصلون أي معلومه عنه.. اتصلوا في كل ربعه ..كلهم رجعوا البلاد وقالو ان عيسى مسكوه السلطان هناك لأنه مره شارك في الإحتجاج ومسكوه.. لكن السلطات تحفظت بكل المعلومات الي عندها وماطاعو يقولون شي عن عيسى للسفارة الإماراتيه.. وتم خليفه على هالحال قريب السنة ونص.. لكن مافي اي اخبار عن عيسى.. وقتها تحسبوا انه ميت.. لأن مر سنه ونص وماشي اي خبر عنه.. انشغل خليفه بعلاج أمه في ألمانيا لأنها تعبت نفسيا وايد وقلبها تأثر من الصدمه على ولدها عيسى وتوفى أبوه من الصدمة .. ومرت السنين والكل حاط في باله عيسى ميت* عيسى: أنا مامت.. إنسجنت 5 سنين وأحين صار لي يومين أطلقوا سراحي وسرت للسفاره على طول وماقصروا وفرولي سكن وبيزات وتليفون.. وماقصروا الصراحة خليفه نزلت دموعه .. حس ان مشتاق لأخوه وافتقده هالسنين الي طافت وايد.. : الحمد لله .. والله يا عيسى احس الكلام ضايع ماعرف شو اقول لك.. عيسى: انا راجع البلاد ان شاء الله باجر.. شخبار امي.. وابوي.. طمني؟ خليفه سكت ماعرف شو يقول لعيسى.. إن ابوه توفى.. كيف بيستقبل الخبر عيسى.. عيسى: شو فيك سكت.. شي صايبهم.. قولي.. خليفه.. لا تسكت.. فهمني خليفه: ابوي تحت رحمة ربك ألحين.. وأمي الله يطول بعمرها بخير.. عيسى تم مصدوم ساكت.. خليفه: اذكر الله .. ترا الأعمار بإيد الله.. عيسى: لا إله إلا الله.. وانت شخبارك.. وشخبار خوله؟ خليفه: بخير الحمدلله.. ومحمد كبر ماشاء الله عليه.. عيسى: والله اني مشتاق لكم ياخوي.. خليفه: والله نحن اكثر.. الله العالم كم تعذبنا من سمعنا خبر ان ماسكينك السلطات هناك.. ماخلينا حد ما لجئنا له .. لكن ماشي فايدة محد ياب لنا اي خبر عنك.. وآخر شي فقدنا الأمل .. والكل تحسبك ميت.. عيسى: أدري .. سفير الإمارات كلمني وقالي عن كل شي سويتوه.. والله يا خليفه اني عشت أصعب ايام حياتي فالسجن.. صلاة ماكنت اقدر اصلي إلا فالليل وفالظلمة يوم الكل راقد بالدسة أصلي.. وكانو شي 2 عرب وياي.. وواحد ذبحوه.. نحن الثلاثه الله كان حافظنا زين ماذبحونا.. خليفه : احمد الله يا عيسى.. وأنا أحمد الله مليووون مره انه رد لي أخوي الغالي.. عيسى: ودي اطلع من التليفون واييكم والله.. خليفه: ياخي انا الي مستعيل احس ودي اسافر عندك واييبك.. عيسى: لا دخيلك انا يومين وراجع ان شاء الله .. وبييكم .. خليفه: بتنور الدار من عقبك.. وبترد النور لأمي والبيت كله.. عيسى: لا تقول لها شي.. ابا افاجئها.. خليفه: الله يعينها يبالي يومها اراقب حالتها عشان تكون مستعدة للصدمة.. عيسى: واشحال الي في بالي؟؟ خليفه وقتها حس ببرود في جسمه.. شو يرد عليه.. يقوله انه بيتزوجها.. وانها تزوجت خلال هال5 سنين وعندها ولد وبنت وتوفى ريلها.. عيسى: ألووو خليفه.. انت وياي عالخط ولا قطع.. ألووو.. ألووو.. خليفه: ها وياك وياك.. عيسى: وينك ياريال سكت فجأة.. شي صاير قولي ؟ خليفه: يوم بترد البلاد بفهمك كل شي.. عيسى تم ساكت شوي: لا دخيلك.. ابا ارد البلاد وانا عارف كل شي مابا انصدم.. اصدمني احين عشان يوم ارجع تكون الصدمة راحت خلاص.. خليفه: سوسن تزوجت.. وعندها ولد وبنت.. قاطعه عيسى: شوووووووووووووو.. بس هيه قالت بتترياني كيف تعرس.. خليفه: عيسى هدي نفسك.. ياريال انت اختفيت والكل تحسبك ميت.. محد لها هالبنت وانت عارف بهالشي.. يدتي الي كانت ع راسها توفت حليلها بعد وفاة أبوه بسنة.. ويوزتها قبل لا تموت لواحد من الأهل.. كيف تباها تترياك وانت ماندريبك حي ولا ميت سكت عيسى واستوعب رمسة خليفه.. ويعرف ان الي يقوله صح.. ولازم هذا الي يصير.. : الله يوفقها يارب.. خلاص عيل بخليك.. خليفه : بس لحظة.. ماكملت لك السالفه عيسى: لا تكمل ولا شي تحرق قلبي وبس.. والله اني من طلعت من السجن ومافي بالي غير سوسن.. قلت وأخيرا برجع لها وباخذها وأكيد تترياني.. خليفه: اتعوذ من ابليس واسمع.. سوسن توفى ريلها .. هو طيار فالجيش.. وتوفى أثناء التدريب كان في خلل فالطياره وطاحت.. وتوفى الله يرحمه عيسى كأنه تأمل بشي من رمسة اخوه.. وحزن في نفس الوقت على ريلها الي توفى بهالطريقة: الله يرحمه يارب.. ويصبرها.. خليفه: يوم قلت لك يوم ترد البلاد بفهمك السالفه ماطعت.. لأن السالفه ماخلصت.. عيسى: لحووووووول.. بعد شو .. خليفه: ههههه اعصابك هدي.. عيسى: هدينا.. كمل يلا.. خليفه: طلعت من عدتها من شهر تقريبا.. وأمي أحين محتشره علي تباني اخذها على خوله.. عشان ماتكــ... قاطعه عيسى: تهبي .. هاللي ناقص .. وليش انت.. انا موجود .. ويكفي اني احب هالإنسانه وطول عمري اتمناها..صح ان كان ودي اكون أول من خذاها.. بس الله كتب والحمد لله على كل حال.. وماتاخذها .. تترياني أرجع البلاد وانا الي باخذها.. خليفه استانس من ناحية انه مابيتزوج على خوله ويجرحها.. وفي نفس الوقت انحلت مشكلته بإن بنت عمه في انسان راح يراعيها ويصونها ويحبها.. لأنه عارف نفسه ماكان بيحبها وبياخذها غصبن عنه.. وفي نفس الوقت أمه بتستانس لأن طول عمرها كان ودها سوسن تكون جنتها.. وتتزوج عيسى.. بس من بعد الي صار الكل تحسبه ميت واغصبو سوسن تاخذ الثاني رغم معارضتها .. بند خليفه عن اخوه وكان مستانس ومرتااااااح عالآخر.. وطلع من الغرفه ويلس وياهم يسولف ويضحك ويمزح.. الي يشوفه مايقول هو نفسه الي دخل البيت ونفسه في خشمه..خوله نفسها استغربت من تصرفات خليفه حست به مب صاحي.. ريلي مستلبس اكيد.. شي بلاه.. لا لا لا لاماصدق هذا خليفه ريلي.. معقوله.. يعني الزواج خلاه يفرح بهالطريقة.. ليش ياربي.. تضايقت خولة وقعدت ساكته وهي مضايجة.. وكاتمه عبرتها تخاف حد يحس بضيجها.. خوله: عمتي بسير الغرفه بحط راسي شوي احس نفسي تعبانه شوي.. ام خليفه: روحي أميه ارتاحي.. ألزم ماعليج راحتج .. خصوصا وانتي حامل والوحام.. الله يعينج ..روحي امي.. خوله: عن اذنكم.. خليفه: اذنج معاج.. صدت خوله صوب خليفه .. استغربت.. كأنه كان وده فاللحظة الي خوله تروح فيها الغرفه ويخلا له الجو.. راحت الغرفه بسرعه وصكت الباب عليها ويلست تصيح ومتغصصه من الخاطر.. اااااه ليش ريلي انا لييييييش.. .. خليفه: أميه تسمحين لي ايلس ويا سوسن روحنا ونرمس.. ام خليفه: هيه امي.. أكيد .. ولا تنسى انها خطيبتك.. لا تستحين منه اميه.. تراه خطيبج.. خليفه: وين عيالج؟ سوسن: بيت يدهم ويدتهم.. خليفه: هيه .. تعالي نسير فالحوي نرمس احسن.. أم خليفه: وين تودي الحرمه فالحوي حر.. سيرو الميلس.. خليفه: لا لا مابا ايلس معاها مكان مغلق رواحنا مايجوز وانتي عارفه بهالشي.. بنت عمي وخطيبتي على العين والراس.. بس مايجوز.. أم خليفه: برايكم انا بنش بسير الغرفه اتمدد شوي.. ونشت ام خليفه ونش خليفه وصد صوب سوسن: تعالي برع.. سوسن مستغربه من تصرفات خليفه.. وهيه بالأساس مب حابه فكرة إنها ترتبط بـ خليفه.. بس يوم واجهتها مرت عمها بالموضوع ارتبكت وماعرفت شو تقول وتمت ساكته.. وخذت أم خليفه هالسكوت عساس موافقه.. خليفه: تعالي يلا شو تترين؟؟ سوسن: خليفه انأ ابا ارمسك في موضوع.. خليفه: انزين وانا بعد ابا ارمسج في موضوع.. تعالي فالحديقه برع خل نرمس.. طلعوا برع وساروا صوب الحديقه ويلس على الكراسي الي تحت المظله.. وسوسن يلست مجابلتنه ومنزله راسها.. وخليفه يرمس والضحكة شاقه الويه.. : سمعي يا بنت عمي.. انا .. تقاطعه سوسن: انا الي اباك تسمعني.. خليفه: لحوووول.. انتوا الحريم مافيكم صبر.. يلا ارمسي بس بسرعه لو سمحتي.. سوسن وهي ترفع حياتها وفي خاطرها تقول لا هالريال اكيد مب في وعيه.. : خليفه انا ماقدر ارتبط فيك.. واعتقد انت عارف السبب.. بس ماقدرت اقول شي لأمك فاجئتني بالطلب.. قاطعها خليفه: خلاص وصلنا خيييييير.. وانا منو قال باخذج ماعندي سالفه.. سوسن تفتح عيونها على وسعهن .. اعوذ بالله دفش.. الله يرحمك يا عيسى.. مع انه توأمك بس كيف فرق.. .. في هالوقت خوله كانت واقفه عند دريشة غرفتها.. وشافت خليفه كيف يرمس سوسن ويبتسم ومستانس.. حست بطعنه في قلبها .. سكرت الستاره بقوة وسارت على سريرها ويلست تصيح بحرقة.. .. سوسن فاجة ثمها مب مصدقه وتدمع عينها غصب عنها: خليفه انت تجذب أكيد تجذب علي .. وفي هالوقت وصل خليفه مسج.. فتح المسج شاف انه من عيسى يقوله على رقمه لأنه ماظهر يوم اتصل.. خليفه: هذوه طرش لي رقمه .. والله يا سوسن من سمعت صوته ادمعت عيني ماصدقت.. بس لأنه اخوي ومن امي وابوي والتوأم .. غير والله حسيت به اخوي يوم ركزت على صوته.. حسيت قلبي كيف نبض بسرعه .. سوسن والفرحة مب شايلتها: وهو متى بيرد.. خليفه: قالي هاليومين بيرجع ان شاء الله. سوسن: يحليلك يا عيسى.. خليفه: انا الي مستانس له اكثر اني افتكيت منج ماباخذج.. سوسن: ههههههه فراقك عيد.. خليفه: بس مب تقولين شي لأمي.. قال يبا يفاجئها.. سوسن : وخوله.. خليفه: هههه افكر اخليها تحترق غيره هالكم يوم .. سوسن: حرام عليك خوله حامل.. خليفه: ههههه بقولها اكيد ماروم ايود لساني سوسن: ههههههههه.. انزين وقلت له اني ارمله خليفه: قلت له كل شي.. هزبني يوم قلت له باخذج.. قالي تهبي.. شفتي عاد اهون يقولي جي.. سوسن: صدقه.. تهبي.. والله مشتاقه اشوفه 5 سنين ونحن نتحراه ميت.. خليفه: شفتي كيف.. سوسن: والله ماكنت ابا اعرس.. الله يسامحها يدتي غصبتني.. خليفه: يلا ماعليه .. كل شي مقدر ومكتوب.. وخلني اسير عند خوله.. مع السلامه سوسن: عطني رقمه وين ساير.. خليفه: لااااااااا قايل لي ماخبر حد.. عساس انج ماتعرفين.. سوسن: ماقدر اصبر.. خليفه: الله عالحب.. اصبري.. واستحي شوي توج طالعه من العدة.. سوسن وهي تنزل راسها: الله يرحمه ويغمد روحه الجنه.. بس عمري ماحبيته يا خليفه .. كان زوجي بس.. لكن عمري ماحسيت بأي حب ناحية هالإنسان.. ويوم توفى.. حزنت على عيالي لأنهم تيتموا.. ماحزنت على نفسي ولا عليه .. لأن كل إنسان بييه يومه.. والصراحة كنت مرتاحه لأني مابنجبر أعيش مع انسان ما احبه اكثر من جي.. خليفه: الله يوفقج يابنت عمي.. يلا خلني اسير لأم محمد.. سوسن: مع السلامه وسار خليفه مستانس ودخل البيت يربع صوب غرفه خوله.. دق عليها الباب لأنها كانت قافلته.. خوله: سير لها فالحديقه ليش ياي.. خليفه ضحك: افتحي الباب يا حرمة الله يهديج.. خلني بقولج شي مهم.. خوله: شو بتبشرني انها موافقه؟.. مبرووووك خليفه: ياحرمه لا تستعيلين افتحي الباب .. بتنش امي وبتحس ان في شي.. فتحت خوله الباب ودخل خليفه وقفل الباب.. تقرب من خوله وحب راسها ويلسها على السرير.. خوله: شو تبا تقص علي بكلمتين؟ خليفه : سمعيني بقولج شي بتتفاجئين وبتنصدمين مستعدة.. خوله: عادي اتقبل كل شي من بعد هالصدمه.. ويلس خليفه يقولها السالفه .. وهي مبهته مب قادره تستوعب الي يصير.. والي تسمعه.. .. .. . أم فيصل: انتي متأكدة قالج نص ساعه.. نوره: هيه عموو.. قالي نص ساعه وهو جريب قالي مب بعيد.. أم فيصل: احين مرت اكثر من ساعه ونص.. نوره: والله اني خايفه عليه .. واتصل ع تليفونه مغلق.. أم فيصل: عساه خير لا تحاتين.. .. هنادي اخت فيصل كانت في هالوقت بيت ربيعتها .. جيرانهم.. ورن تليفونها فجأة هنادي: ألوو --- : السلام عليكم.. هنادي: وعليكم السلام --- : لو سمحتي اختي هذا تليفون محمد فلان الفلاني (إسم أبو فيصل) هنادي: هيه نعم تليفونه.. بس انا بنته وهو مب موجود وياي.. خير اخوي شو السالفه؟ --- : اختي انا متصل من أمن المستشفى.. أخوج فيصل مسوي حادث وهو عندنا حالته تعبانه شوي.. لو تخبرين حد من الأهل هنادي مصدومه: انت شو تقول.. اخوي انا شو بلاه؟ --- : هدي نفسج مافيه شي الحمد لله .. بس نحن يوم طلعنا على ارقام تخصكم شفنا هالرقم إلي بإسم ابوج وكلمانكم.. السموحه مع السلامه بند عنها الشرطي وتمت هنادي مصدومه مب قادره تصدق او تستوعب شي.. عبير: شو بلاج؟؟ ليش جي شكلج.. شو مستوي؟ هنادي: شرطي متصل فيه ويقولي فيصل مسوي حادث.. عبير: شوووووووو.. اتصلي في اخوانج يتأكدون يمكن واحد يخرط.. هنادي: مادري الله يستر.. عبير: سيري بيتكم تأكدي تحركي سوي شي.. هنادي: اوكي.. نشت بسرعه لبست عباتها وشيلتها وظهرت من بيت جيرانهم واتصلت في عادل أخوها.. عادل: شو بلاج تصيحين.. فهميني؟؟ وقالت له هنادي الموضوع.. وعلى طول عادل ركب موتره وسار المستشفى.. وانصعق باللي سمعه.. مب قادر يشل ريوله.. قعد يدور فالمستشفى وايود ممرض ولا ممرضه يشوفهم ويسحبهم صوب الغرفه الي فيها فيصل.. ويصيح: دخيلك شوفه .. مامات صح.. أدري مامات.. يقعدون يهدون فيه شوي.. ويرد يسوي نفس الحركة.. وآخر شي سار عند الدكتور ويود ايده كان بيبوسها بس سحب ايده الدكتور: شو اقول لنوره.. وعياله.. اقولهم ابوكم مات؟؟ .. العنود متعوده تتريا ابوها عند الباب اييب لها جيس الحلاوة.. اقولها خلاص ابوكم مابيرد البيت موول.. أمي .. أمي شو اقولها.. فيصل مات.. آآآآآه الله يسامحج هنادي ليش خليتيني انا فهالموقف.. وصل خالد في هالوقت وشاف عادل يالس فالممر عالأرض يصيح .. تم واقف بعيد خايف يجرب ويسمع شي يصدمه.. وقف شوي تقرب منه الشرطي.. الشرطي: اي خدمه اخوي.. خالد أخو فيصل : نعم.. لا مشكور.. توه بيروح الشرطي.. يوده خاله وسحبه: اقول.. كان عندكم واحد اسمه فيصل محمد الفلاني؟ الشرطي : هيه نعم.. منو الريال.. تقرب له.. خالد وهو يطالع عادل وقلبه يتقطع.. : انا اخوه العود.. الشرطي: عظم الله أجرك.. وربي يصبركم جميعا.. خالد صد صوب الشرطي ويوده من رقبته: انت شووووووووو تقول.. شو تفاول.. تقرب شرطي ثاني ابعد خالد عن الشرطي.. وتم يهديه.. مقدرين الصدمة الي هو فيها .. صعب على الواحد يستوعبها.. وخالد بسرعه سار عند عادل.. : عادل قولي الي سمعته جذب.. قول.. عادل من شاف خالد لوى عليه: راح اخوك راااااااح.. واستوينا ولدين بس فالعايله.. راح ويتم عياله.. اااااااااه مب قادر اصدق.. فيصل الي الكل يحبه ويمدحه.. خالد: اذكر الله يا عادل.. ونش خل نفكر كيف نخبر ابويه والباقي فالبيت.. عادل: مابا سير روحك.. انا بتم عند فيصل.. يمكن ينش.. خالد وده يصيح بس ميود عمره عشان يقوي قلب اخوه عادل.. : اتعوذ من الشيطان ونش خلنا نسير نييب ابوي.. لازم ندفنه بعد صلاة المغرب.. مب زين نخليه وايد برع.. عادل: لاااااااااا مابدفن اخوي. ماقدر.. ماقدر والله ماقدر.. خالد: لازم يا عادل.. ان نحن ماشلينا كفن اخونا منو بيشله.. عادل سكت شوي وفجأة صرخ في ويه خالد: انت دومك تجرحه دومك تهينه يدام الكل وتفشله ويحترمك ولا يرد عليك.. خاف الله في عيالك.. خالد: دخيلك عادل بس يكفيني.. انا عارف مقدار غلطتي.. يكفيني هم .. ولدي الثاني مريض عنده تقرحات شديده فالمعدة وأمس وديته المستشفى الأمريكي عشان يعالجونه.. احس الله يعاقبني من كل صوب.. دخيلك لا تعور قلبي زود.. نش عادل ومشى ويا خالد وردوا البيت... من دخلوا شافو الكل متيمع فالصاله.. خصوصا نوره.. يالسه وفي حضنها بناتها الثنتين.. من شافو خالد وعادل.. الكل ربع صوبهم.. نوره تمت ياسه مكانها مصدومه ليش دخلوا بروحهم.. وليش فيصل مب معاهم.. حضنت بناتها اقوى وضمتهم لها.. وخايفه .. أم فيصل: وينه ولدي وينه؟ هنادي: شو مستوي ؟؟ بو فيصل: بلاكم ياعيال .. شو الي صاير.. عادل ماقدر يمسك نفسه انهار صياح في حضن ابوه..: رااااااااااح فيصل رااااااااح ابويه .. ماراح نشوفه بعد .. نوره انصدمت : انت شو قاعد تقوووووووول.. مينون .. انا رمسته وقالي انه ياي بيتغدى.. ودرت عيالها وسارت صوب المطبخ ويابت صحن العيش..: ها صحنه سويته له وزهبته وحطيته فالفرن.. وتقولي راح.. جذاب لا تصدقونه.. والله كلمني والله .. ام فيصل انهارت صياح.. وكل الي فالبيت تم يصيح.. وانتشر الخبر بين العايله كلهم.. والحريم كلهم سارو العزا والرياييل بعد . خالد أخو نوره.. وأحمد وعبيد.. وبوعبيد وبومجد وبوخالد.. كلهم تلموا في ميلس الرياييل للعزا وبعد صلاة المغرب بيسيرون يدفنونه.. ونوره فغرفتها قافله على نفسها ماتبا تجابل أي احد.. ولا طاعت تجابل امها ولا خلود إختها.. تمت قاعده هيه وبناتها .. العنود ومهره مايعرفون شو يعني موت.. فمب فاهمين شي من الي قاعد يصير شيخه (أم نوره) : اميه نوره انا امج افتحي الباب.. العنود: ماما يدو تناديج.. افتح.. نوره من الصدمه مادمعت عينها بالمره .. ولا صاحت.. قاعده تتطالع مبهته ومب قادره تستوعب شي.. : لا شيخه وهي تصيح: دخيلج مب زين الي تسوينه .. افتحي الباب على الأقل انا امج.. نوره: يوم بيرد فيصل بفتح الباب.. شيخه انصدمت من كلام نوره وصدت صوب خلود ويلست تصيح: ينت بنتي ينت.. ااااااااااااااااااه.. نوره دخيلج لا تذبحيني انا امج .. افتحي الباب نوووووووووووره.. تمت على هالحال بس ماشي فايدة.. لا طاعت تفتح الباب ولا ترد على حد.. .. الرياييل كلهم سارو المسيد و صلّو على جنازته .. ومن عقب سارو يدفنونه.. عادل وخالد وأبوهم شلو جنازته ومشوا صوب قبره.. عادل طول الوقت يصيح.. الموقف صعب عليه يدفن اخوه بإيده.. والباقي يمشون وراهم.. عبيد: الله يصبرهم يارب.. خالد: ويصبر اختي على مابلاها.. أحمد: موقف صعب وايد.. الله لا اييبه لحد فينا.. خالد+ عبيد: امين يارب.. عبيد: حد منكم خبر سلطان؟ أحمد: لا خلهم يردون على راحتهم وبنقولهم مافينا نصدمهم وهم بعدهم برع البلاد.. عبيد: هيه والله .. الله يعينا ويصبرنا.. خالد: مروه تقول نوره مب طايعه تشوف حد ولا تفتح له الباب.. وساكته ولا ترمس حد.. أحمد: اعذروها الموقف صعب.. مهما يكون زوجها .. وابو عيالها.. عبيد: الله المستعان.. وكلهم سارو بيت بوفيصل من بعد الدفن.. .. .. نوره فتحت الباب وخلت العنود تطلع برع وردت قفلت الباب .. ولا طاعت تفتح ولا ترد على حد.. على حالها مصدومه وساكته.. يبون يدخلون عندها يخلونها تصيح لأن مب زين عليها الصمت هذا يتعب اكثر .. .. .. يوم الجمعه.. بعد صلاة الجمعه وصلت الطياره من السعوديه.. وراح لهم خالد وعبيد يستقبلونهم.. تقرب عبيد وحب راس يدته: تو مانورت البلاد.. حي الله شيختنا.. جلثم: بس بس.. كلام شبعت منه.. وينها مسودة الويه حرمتك.. ابتسم عبيد: فالبيت .. منقود ماعندنا حريم اين المطار.. خالد تقرب من يدته حب راسها: السلام عليج امييه.. جلثم: عنلاتك زعلانه منك يالخام.. ماتقول يدتي اشحالها تسلم عليها.. خالد: حقج علي ماعليه.. وركبوا الموتر كلهم وعلى طول سايرين صوب بيت بوفيصل.. جلثم: ماحيد هذا الدرب يودي البيت ولا شو تقول سلطان؟ سلطان: هذا درب بيت فيصل نسيبي.. خالد: هيه ترا بنسير هناك.. سلطان قلبه نغزه ان شي صاير.. : شو صاير؟ خالد تم ساكت شوي ووقف عند باب بيت بوفيصل.. الي كان مزحوم بالسيايير.. : ترحموا على فيصل توفى البارحة.. جلثم وهي ترفع عصاتها وتضرب خالد على راسه: عنلاتك الخام هاي سالفه تسولف بها.. عيب عليك.. صد خالد وعيونه محمره من الدموع: للأسف أمييه ليتها كانت اشاعه.. بس هذا الصدق.. سلطان بسرعه نزل من السياره ومشى بسرعه صوب البيت.. ولا حس بعمره انه داخل ميلس الحريم.. ويلس يصرخ وعيونه محمره .. ومتغصص: وينننننننننها نوره.. وينها.. تقربت منه ام فيصل وهي تصيح... : فوق في غرفتها.. بسرعه راح فوق وشاف خلود يالسه عند باب وحده من الغرف.. من شافت سلطان ربعت صوبه وحضنته .. وكانت مجد ياسه شوي بعيد ومعاها هنادي لاويه مجد عليها تهديها.. خلود: سلطاااااااااان فيصل ماااااات.. تيتمت العنود وتيتمت مهاري.. تميتمو الصغاريه .. مااااااااااااات.. ااااه.. وماحس الا بباب غرفه نوره يفتح وتطلع نوره وأخيرا وتربع في حضن اخوها : دخيلك سلطان قولي ان السالفه جذب.. حلم.. قول اي شي دخيلك.. سلطان: نوره انا توني ياي من السفر حالي من حالج مصدوم من كل شي.. نوره انهارت من الصياح الي كانت حابسته طول اليوم الي قبله ويلست تصارخ وتمط شعرها وتكفخ عمرها.. يود سلطان ايديها وحضنها.. وجلثم مع شيخه وميثا ( أم عبيد) ولطيفه صاعدين الدري.. تقربوا كلهم حوالين نوره.. من شافت نوره يدتها حطت راسها على ريولها: أمييييييه راح وخلاني الخاين.. خلاني بروووووحي راااااااح مابيرجع .. حطت خلود راسها على صدر سلطان اخوها ويلست تصيح وسلطان يطالعهم بحزن.. والحريم كلهم يصيحون.. .. .. ومر اليوم واستمر العزا.. ونوره شلت عيالها وسارت بيت امها ماقدرت اتم وتشوف الحريم يدامها .. مب قادره تيود عمرها.. رغم ان يدتها قالت لها ان من الواجب اتم هناك تجابل الحريم عشان يعزونها لأنها مرته.. بس هي رفضت.. وقدروا طلبها.. وسارت البيت .. وخلود كانت طول الوقت وياها.. وقالت انها بتغيب عن الجامعه هالفتره .. وفاطمة ومنى وامهم وجاسم ... دوم في بيتهم.. الكل حوالين نوره مايبون يحسسونها انها بروحها.. حور تعبت وايد من اللي صار.. عبيد منعها تروح العزا مره ثانيه عشان حالتها الصحية.. وايد تعبت.. لأنها بتشوف الكل يصيح بتشوف حاله نوره وبتتكدر.. وهالشي مب زين لها لأن بعدها تعبانه شوي.. .. مجد رجعت البيت لأنها مجبوره تروح التدريب ماتقدر تتغيب.. تضايقت من الي صار.. هاليومين الي مرن كنهن كابوس.. محد قادر يستوعبه.. اتصل فيها أحمد.. أحمد: اشحالج؟؟ مجد: حالتي حاله والله غامضتني نوره.. أحمد: هيه والله حتى انا.. الله يصبرها بس.. مجد: لو تشوف عيالها.. صغااااار بعدهم.. وحده 3 سنين والثانيه سنه ونص.. تيتموا المساكين.. أحمد: الله يصبرهم.. مجد يلست تصيح: أحمد الموت صعب.. صعب وااااايد.. أحمد: الله لا اييبه لحد.. مجد: هيه والله .. الله لا يحرمني من كل الي احبهم.. أحمد: امين يارب.. صح ان كل شي مقدر ومكتوب..بس صعب الفراق وايد صعب.. مجد: النعم بالله ماقلنا شي.. بس ع قولتك وايد صعب ان الواحد يستوعب فكرة الموت.. أحمد: ماعليه انتي اذكري الله احين.. ترحمي على موتانا ونامي عشان تنشين باجر.. مجد: ان شاء الله.. أحمد ممكن طلب؟ أحمد: آمري.. مجد: دخيلك حاسب فالسواقه.. والله اخاف.. أحمد: لا تحاتين.. مجد: كيف صار حادث فيصل بالضبط؟ أحمد: حسب تقرير الشرطة.. انه غفى وانحرفت السياره ودخلت تحت تريلي الي كان واقف على جنب الشارع.. مجد: بس بس.. والله موقف صعب.. احمد دخيلك سوق بحذر اترجااااااااك أحمد: تخافين علي.. مجد: احمد شو هالرمسه انت ولد عمي وليش ماخاف عليك.. تضايق احمد يوم سمع كلمة ولد عمي.. كان وده يسمع شي ثاني بس .. تنهد وسكت: تصبحين على خير مجد: وانت من اهله وبندت الخط عنه ويلست تصيح لغايه مارقدت.. .. .. السبت الصبح.. الدكتور محمد: تفضلي يلسي. عيل اول قسم بتبدين به هو عندي ان شاء الله.. طيف : هيه حسب ماقالي المسؤول.. محمد: هيه ان شاء الله.. توج توظفتي عندنا يعني.. طيف: لا انا طلع اسمي فالتوظيف من 3 شهور.. بس ظروف خاصه منعتني اداوم وقتها .. وتوني باشرت الدوام.. محمد: ذكرتيني بسنة الإمتياز لي.. داومت في كل الأقسام.. وكل قسم كنت اتم فيه شهر.. وعقب ماخلصت على طول سافرت وخذت الماجيستير في الجراحة.. طيف: ماتفكر تكمل دراستك وتاخذ الدكتوراه؟ محمد: اكيد.. بس اخلص شوية أشيا في بالي ان شاء الله طيف: ان شاء الله.. واحين ممكن اعرف شو بتكون شغلتي.. محمد: اليوم تكتبين ملاحظات فقط.. وتشوفين شو اسوي مع المرضى الي ايوني.. وعقب بتساعديني في التشخيص وهالأمور وبمتحنج استعدي لأي سؤال اييج.. طيف ابتسمت ونزلت راسها: ان شاء الله * طيف خريجة طب جديدة.. وتوها توظفت.. عندها تدريب في أقسام المستشفى.. وبدأت اول شهر لها بيكون مع الدكتور محمد.. جميله جدا.. لكن متنقبه.. صوتها ناعم وايد ورقيق.. متدينه وملتزمه.. من عايله مرموقه وغنيه.. ومعروف عنهم الحشمة والأخلاق العاليه* .. .. مجد كانت متضايقه فالدوام.. ماكانت قادرة تركز أبدا.. دخل عليها المدير المسؤول وشافها سرحانه وهي تتطالع التصميم الي يدامها.. سليمان: السلام عليج مجد.. مجد وهي منزله راسها: وعليكم السلام.. سليمان: أقول اليوم جواهر مب مداومه ماتعرفين ليش؟ تنهدت مجد وانا لي خاطر اسمع هالإسم ع الصبح: لا مادريبها.. تباني اتصل فيها؟؟ سليمان: ياريت.. لأن لازم استلم تقييمكم اليوم.. مجد: ان شاء الله.. تمت اتدور في تليفونها على رقم جواهر.. كانت مخزنتنه في يوم من الأيام.. فاللي كان موجود رقم بيتها وموبايلها.. اتصلت على الموبايل مغلق.. اتصلت على البيت تم يرن بعدين ردت عليه أم جواهر.. مجد: السلام عليكم.. أم جواهر: وعليكم السلام.. مجد: خالوو اشحالج؟ أم جواهر: الحمد لله انتي اشحالج؟ مجد: بخير ربي يعافيج.. خالو وين جواهر؟ أم جواهر: راحت التدريب مادري الشغل هذا الي مطرشينها لها الكليه ليش امييه بغيتيها في شي..؟؟ مجد انصدمت وتمت ساكته.. أم جواهر: ألوو اميه تسمعيني.. مجد:ها .. هيه اوكي.. خلاص مشكوره مع السلامه ام جواهر: لحظة امي شي بغيتيها فيه.. مجد: لا خلاص مب مشكلة.. أم جواهر: ع راحتج مع السلامه سليمان: ها وينها.. مجد وهي تبلع ريجها:ها.. امها تقول انها مريضه.. هيه مريضه.. سليمان استغرب حس ان الموضوع شي وراه.. : مريضه.. ها سلامتها عيل.. ان كلمتيها قولي لها باجر ضروري اتداوم وتمر علي المكتب ابا اتفاهم وياها.. مجد: ان شاء الله راح عنها سليمان وتنهدت.. شو هالوهقه.. هاي وين سارت.. قاصه على امها اونها يايه الدوام وهي من ذاك الصوب مب مداومه اصلا.. اللهم لا تبلينا.. عفاني الله عيسى.. شو تتوقعون موقف امه يوم بتشوفها.. بيصيبها شي من الصدمه؟؟ بعد 5 سنين وهي تتحراه ميت؟؟ نوره .. بعد وفاة فيصل.. شو الي بيصير في حالها؟؟ شما وهزاع.. بيسود الحب من بينهم؟؟ بوهزاع إن عرف شو بيسوي؟ الدكتور محمد.. طيف بتدخل باله؟؟ ابراهيم رجع للدوام .. بيسوي شي بعد ذاك الموقف ؟؟ جواهر ليش غايبه ؟؟وين سارت؟؟ (( لا تزعلون مني.. انا قلت لكم بدايات القصه ان القصه تحمل نوع من الحزن.. بيستمر الحزن شوي فالأجزاء اليايه.. اباكم تتأقلمون معاها شوي.. لأن هذا واقع .. مافي حياة كاملة وكلها أفراح.. الحزن لا بد منه.. الحزن الي عشناه فالقصه على فيصل.. كلنا عشناه في عايلتنا في يوم من الأيام يوم وفاة زوج بنت خالتي.. لا توجد حياة مثاليه.. تقبلوا مني هالمواقف الحزينه .. لأنها واقعيه ))[/align][/align] |
[align=center]السمووحه منكم لان تأخـرت عليكم بـس انشغلت بعرس أخوي وعقب أختـي . . وعقب سـافرت ومن يومين واصله وقلت أفرحكم وانزل لكم بهالجم باارت . . غااايـــه / العفوو ولووو شفتج ما اتحدرين والجرووب متشووق وقلت أكمــل عنــج . . !! واسمحيلي لان استعرت موضوعج . . وهااي البااارت[/align] ------------------- [align=center]الجزء العاشر الفصل الأول =-=-=-=-=-=-= الملخص= وفاة فيصل جراء حادث سياره.. عودة المعتمرين بالسلامه.. غياب جواهر عن العمل.. ظهور عيسى الأخ التوأم لخليفه... ............. شما: أقول بوسعود... ياسه احاول ادخل هالبيانات الي عندي بس مادري الكمبيوتر بلاه .. بوسعود صد صوبها وشاف ابراهيم قاعد يرمس واحد من العملاء.. : ان شاء الله احين بيي بشوفه لج.. نش بوسعود وقعد يحاول ويا شما وعدل لها الكمبيوتر وسار صوب ابراهيم وترياه يخلص ويا العميل الي عنده ويلس حذاله.. بوسعود: يا ريال شوفيك داش ماد البوز من الصبح ولا تسلم .. إبراهيم: دخيلك ياي تتشمت فيني رد مكانك.. لأن مالي بارض.. بوسعود تضايق من رمسة إبراهيم: تحريت هالموقف غيرك.. بس أشوفك نفس ماكنت قبل.. وماهقيت اني طايح من عينك لهالدرجة .. او تحيد ان طبع الشماته فيني إبراهيم: يا ريال شو هالرمسه.. والله اني مفتشل منكم كلكم.. بوسعود يقاطعه: وليش كلنا.. صد يطالع صوب شما ورد صوب إبراهيم.. شخص واحد بس هو محور الي صار كله.. والي عليك تعتذر لهالشخص.. صد ابراهيم يطالع بوسعود بنص عين: يصير خير.. رد مكتبك.. وشوي الا اييه واحد : السلام عليكم.. رفع ابراهيم عينه من شاف الريال تيمد مكانه ماقدر يحرك حتى رمش عينه من الصدمه.. وفي نفس الوقت مايقدر ينكر انه خايف.. صد صوب مكتب شما شافه فاضي.. ابراهيم: خير اخوي اي خدمه.. هزاع: هيه لو سمحت بغيت اقدم طلب على رقم يديد قالو لي ايي عندك لأن عندك لسته الأرقام اليديدة.. ابراهيم تم يطالع هزاع ولا يحرك عينه .. وحرك ايده صوب الدرج وطلع الورقه الي فيها وعطاها لهزاع: شوف واختار من بينهن.. هزاع: ابا رقم غاوي.. وشوي الا تيي شما تشوف هزاع .. خافت للحظة.. بس تمالكت نفسها: يا حي الله ولد عمي.. شو يايبنك هني؟ هزاع ابتسم لها وشافها ونزل راسه: ماشي ياي اختار لي رقم حلو.. شما: جان قلت لي .. كنت بتنقى لك رقم وبييبه لك هزاع: كنت ناوي اخبرج بس استحيت تبين الصدق.. شما: ماعليك اخوي ابراهيم بيساعدك اكيد عنده لستة أرقام حلوة.. ابراهيم من سمع رمسة شما يوم قالت اخوي.. صدق افتشل من اللي سواه وتلوم أكثر.. كان وده الأرض تنشق وتبلعه من فشلته.. لكن بوسعود يوم سمع شما صدق كبرت في عينه هالبنت.. اخلاق وادب واحترام وكل شي.. وخلص هزاع أموره بسرعه من بعد ما اختار الرقم وتوه بيظهر زقرته شما.. شما: هزاع تعال بغيت ارمسك في موضوع.. هزاع: هلا بنت عمي خير.. شما: الصراحة مادري شو بتكون ردة فعلك .. ولا اخاف تفهمني غلط.. بس انت قلت لي تبا تتغير صح ولا لا.. هزاع: صح.. شما: انزين .. وانا اباك تتغير واساعدك لهالتغيير.. واللي اباه منك ماتنفعل من الي سويته .. هزاع عقد حياته: خير .. شغلتي بالي.. شما وهي تلعب بالقلم الي في إيدها.. وتوطي صوتها عشان ابراهيم مايسمع: انا رمست ربيعتي الي فالدوام.. وقالت لي شي شواغر فالإتصالات.. ويقبلون اذا كان عندك شهادة ثانويه عامه .. فإذا بغيت .. ييب لي اوراقك وشهادتك وكل شي وبقدم لك.. وان شاء الله خير.. ابتسم هزاع وفعلا حس ان هاي خطوة حلوة تساعده على التغيير.. ولكن للحظة تذكر الفيديو ونزل راسه متضايق: بس اذا شافو الـ.. قاطعته شما: شو يضمنك ان كل الي قاعدين حواليك ماعندهم شرات سوالفك.. أو انت الي كنت تسهر وياهم ماكان فيهم واحد يداوم في مكان ما.. ابتسم هزاع كأنه متفائل من كلام شما.. فعلا شجعه كلامها.. : خلاص ان شاء الله بيمع اوراقي وكل شي لازم وبييبه لج.. وماتقصرين والله جميل ما انساه لج.. شما: هذا واجب .. انت بحسبة اخوي.. وانا ماسويت شي اكثر من واجبي هزاع: الله الشاهد انج سويتي زود وزود.. شما تقاطعه: اخبرك نكمل رمستنا فالبيت.. مافيني يتحرون شي ثاني هالموظفين.. هزاع: الناس فاضيه للرمسه بس.. انتي بس أشري قولي لي منو لعوزج وصدقيني لأراويه نجوم الظهر.. شما وهي تتطالع صوب إبراهيم الي كان يسمع رمسة هزاع وخايف ان شما ترمس عنه: محد الحمد لله مرتاحه والكل هني يحترمني (وهي تشد على الرمسه وتقولها بصوت عالي تقصد ابراهيم) ويقدرني.. هزاع: يالله عيل بسير اساعد عموو فالمطبخ.. اتعلم لي شي بدال هالبطالية شما: هههههههه وراح هزاع وشما فتحت شنطتها طلعت تليفونها شافت 10 مسد كولات.. و3 مسجات.. وحده من هالمسجات كانت من سلطان ( رجعت من العمره بالسلامه) ومن بين المسد كولات .. كان رقم خلود.. استغربت.. مسج من سلطان واتصال من خلود.. لا اكيد في شي صاير.. اتصلت في خلود على طول.. وبعد عدة رنات ردت عليها.. خلود: السلام عليكم شما حست بالتغيير في صوت خلود.. : خلود .. شو فيج؟ خلود بدت تصيح .. : شما ريل اختي مااااااااات.. نوره اختي ترملت.. شما: شوووووو.. انتي شو تقولين؟ خلود: الي سمعتيه.. نوره ترملت وبناتها تيتموا.. آآآآآآآه يا شما حالتنا حاله فالبيت .. شما: لا حول ولا قوة إلا بالله.. عظّم الله أجركم وصبركم على مابلاكم.. خلود: اجرنا واجرج .. وربي يصبر اليميع يارب.. شما: خلاص انا فالدوام احين ماروم ارمس وايد من اظهر بمر عليكم البيت.. خلود: حياج الله.. بندت شما الخط ويلست سرحانه وهي تفكر في نوره رغم انها ماتعرفها ولا شافتها.. وتذكرت سلطان.. يحليلك يا سلطان.. وانت ناقص.. صارت لك مشاكل ورا بعض.. الله يعينك .. .. .. .. خلصو الدوامات كلهم وطلعوا البنات من صفوفهم مستانسين لأنهم بيردون البيت عذاري: يالله عيل نتلاقى باجر.. لا تنسين اتييبين الصور.. ابا اشوفهم.. فاطمه وهي تضحك: بستأذن من ريلي أول عقب بييبهم.. عذاري: اوننننننه من متى هالأدب.. خلاص عيل عالأقل هاتي صورتج انتي اشوف كيف كان شكلج.. فاطمه: اوكي اليوم بسير استلمهم من الإستيديو.. ومشت فاطمه وهي شاله شنطتها .. ولابسه مريول المدرسة.. وقفت تتريا جاسم .. وتمت اتدور بين السيايير وتتطالع مالقت سيارته.. استغربت.. طلعت من البوابه قعدت تشوف برع فالباركنات وين السيايير موقفه عن تشوف سياره جاسم.. بس ماشي فايدة ماشافت سيارته.. وتوها بترجع صوب بوابه المدرسة سمعت صوت واحد يزقرها..صدت شافت فيصل.. ماعرفت شو تسوي من فرحتها بشوفته.. تزاعج ولا تصرخ.. ولا شو تسوي.. تمت واقفه مصدومه .. وماحست إلا بهرن سياره خلاها تصحى من السرحان ومشت بسرعه صوب سياره فيصل وركبت حذاله.. فاطمه: السلام عليكم.. فيصل يطالعها بنص عين وغضب: وعليكم السلام.. من ساعه اشوفج اتدورين بين السيايير.. ممكن اعرف على شو اتدورين بالضبط؟ فاطمة وهي مستغربه منه: سياره جاسم.. فيصل: ليش ماتعرفين سيارته عشان توقفين من داخل المدرسة تشوفينها.. فاطمة: بلا اعرف.. بس بالعادة يوقف قريب الباب.. واحين مرت اكثر من 10 دقايق ماشفت سيارته .. قلت يمكن واقف بعيد طلعت عشان اشوف.. فيصل: آهاا.. فاطمة وهي حاسه بغصه: بعد هالفتره الي ماشفتني فيها تستقبلني بهالطريقة.. فيصل تلوم يوم شاف الحزن في عيونها .. اااااه من هالعيون ماقدر اشوفها زعلانه.. : اسف بس مادري حسيت بغيره غير طبيعيه يوم شفتي اتدورين بين السيايير بمريول المدرسة فاطمة تمت ساكته ومتضايقه من فيصل وتصرفه.. لكن ماحبت انها تبين ضيجها وتضايجه زود: انزين ماقلت لك .. امتحنا تجريبي فالفيزيا .. جان اييب درجة كاملة.. شفت مرتك شاطرة فيصل ابتسم لها مستانس: والله .. مبروووك.. عقبال ماتييبين نسبه عاليه وترفعين راس ريلج.. فطوم: انزين فيصل بالنسبه لموضوع زواجنا فالصيف ماتحسه بسرعه؟ فيصل: لا ليش؟؟ انتي تبين تأجلين العرس؟ فطوم: احس لو تتريا اني اثبت عمري فالدراسه شوي عقب .. فيصل: لا انا اقول لو نعرس فالصيف احسن.. فطوم: بس انا موووول ماجهزت شي مابيمديني الوقت فيصل: بنعرس على بداية 8.. بيكون عندج شهر تقريباً تجهزين فيه للعرس مايكفيج.. فطوم وهي تفكر: بيكفيني لو بضغط على عمري هالشهر.. فيصل: خلاص اضغطي على عمرج وفالنهايه بنستانس لأن بنكون سوى تحت سقف واحد سرحت فاطمة في تفكيرها شوي.. وهي تتذكر ان فعلا هالحلم الي تمنته طول عمرها انها تجتمع ويا فيصل تحت سقف واحد.. وتعيش باقي حياتها وياه.. .. .. .. نزلت تحت تتريا ابوها يمر عليها عشان ترد البيت .. طلعت من البوابه توايج اذا ابوها وصل أو لا.. تنصدم من الي تشوفه .. وتهز راسها وتوها بتدخل البنايه مره ثانيه تتجابل ويا سليمان نزلت راسها: السموحه منك.. سليمان يمشي عنها : لا ماعليج.. انتبهت مجد ان سليمان بيظهر وبيشوف الي شافته.. زقرته بسرعه: استاذ سليمان.. صد صوبها: نعم.. مجد وهي تدور على سالفه ترمس فيها بس مب عارفه.. سليمان: نعم مجد زقرتيني؟ مجد: هيه بغيت اسألك عن التقييم اليوم ان شاء الله حطيت لي تقييم اوكي.. سليمان: كل واحد ياخذ على مستوى جهده.. مجد: هيه زين يعني.. وعن الشغل ترا مايعطوني شغل وايد احس عمري بطالية.. سليمان: خلاص بقولهم من باجر يكرفونج كرف... مجد: هيه زين عشان اتعلم.. امم وايد ارمس.. انزين شي ثاني.. ممكن اغيب باجر .. لأن بصراحة بغيت اغيب اليوم بس تذكرت ان شي تقييم فحضرت.. لأن عندنا عزا وقلت اغيب (هيه مابغت اتغيب بس البنت مب محصله سالفه ترمس فيها عشان تشغل سليمان ومايشوف جواهر وهي تتريا اهلها عند باب المبنى) ممكن يعني .. سليمان: عظم الله اجركم.. افا والله جان غبتي اليوم كنت بعذرج.. ماعليج معذورة.. والدوام لله.. مجد: تسلم استاذ.. سليمان: تامرين بشي ثاني.. مجد : لا سلامتك.. فتح سليمان باب المبنى شاف ابو مجد واقف.. يعرفه لأنه دوم يشوفه. : مجد ابوج برع.. مجد: ها .. شكرا.. ومشت بسرعه وراه وركبت السياره وراحت.. ياربي انا شو الي خلاني استر على جواهر.. جان خليته يشوفها عشان يفكها مني.. لا لا لا .. عن يتحراني شراتها عقب لأنها ربيعتي .. مافيني .. تزول استر عليها ولا اني افضحها.. الله يعين اهلها لا دروا بينجلطون اظني.. عبدالعزيز: مجد في شو سرحانه؟ مجد: ها ابويه.. لا ماشي كنت افكر في نوره ابا اروح لها.. عبدالعزيز: الله يصبرها المسكينه.. ترا احين بنسير لها لأن امج ويدتج هناك بعد.. مجد: هيه زين تسوي ابا اكون بقرب هالبنت المسكينة.. غامضيني عيالها.. عبدالعزيز: هيه اليوم العنود طول الوقت تصيح تقول ابا بابا.. ماحبكم احب بابا بس.. مجد وهي متأثره: مهره صغيره على انها تستوعب فراق ابوها وتحس بغيابه..اما العنود فوايد تحب ابوها كنت ملاحظة.. كل ماتشوفه تربع في حضنه.. عبدالعزيز: شو تقولين كانت تدخل ميلس الرياييل غصب عشان تيلس في حضن فيصل.. الله يرحمه ويغمد روحه الجنه وصلوا بيت شيخه ( أم خلود) ونزلت مجد عشان تدخل البيت.. جابلت سلطان في دربها وكانت متغشية.. مجد: اشحالك سلطان؟ سلطان صد صوبها ابتسم لها من ورا خاطر: الحمد لله.. انتي اشحالج؟ مجد: بخير الحمد لله.. اسمح لي ماتحمدت لك بالسلامه بس انت عارف كيف صارت الأمور.. سلطان: ماعليج بنت خالي معذورة.. مجد: كلهم داخل.. سلطان: هيه ادخلي حياج.. توها بتدخل سمعت صوت سياره تدعم شي فزت وصدت وراها.. وسلطان ربع يوايج برع بيتهم يشوف شو الي صاير.. شاف سياره داعمه درام الزباله .. لكن ماصار شي قوي فالسياره.. ابتسم غصبن عنه .. نزلت صاحبة السياره وهي مصدومه وخايفه.. وانصدم سلطان يوم شافها.. تذكر هالويه .. لأنه في عمره ماغاب عن باله ولا نساه.. وابتسم من كل خاطره وتقرب شوي صوبها سلطان: سلامات سلامات.. صدت شما صوبه من شافته استحت وحجت راسها: مادري شو بلاني نسيت عمري دست على البترول بدال البريك ودعمتها.. سلطان: يفداج.. شما تمت تتطالعه نص عين: درام زباله يفداني ها.. ماعليه.. اوه سوري.. عظم الله اجرك .. سلطان تنهد وهو يتذكر حال اخته: اجرنا واجرج .. كيف عرفتي؟ شما: اليوم خلود خبرتني وقلت لها لازم ازوركم وعطتني العنوان ماشاء الله سهل.. سلطان: انزين حياج ادخلي.. وعن موترج خليني انا بتصل فالشرطة عشان التقرير وبسميه بإسمي .. لأن على ماعتقد انتي اقل من 25 سنه .. وبيدفعونج التأمين 10% من قيمة التصليح.. فبخليه بإسمي احسن.. شما: لا ماعليه لا تعب روحك.. سلطان: عطيني السويج .. والملكية فالسياره ؟ شما وهي مفتشله: هيه فالسدة بتلقاها في ظرف. سلطان: خلاص خير ان شاء الله.. ودخلت شما البيت واتصلت في خلود.. نزلت خلود واستقبلت شما.. خلود: حياج الغاليه.. شما: عظم الله اجركم .. خلود: الدوام لله.. ادخلي.. دخلت شما وشافت الصاله ممزوره حريم من الأهل.. ودتها خلود عند امها عشان تسلم عليها.. خلود: أميه هاي شما ربيعتي الي رمستها عنج.. شيخه ماكانت مركزه فالبداية وعقبها تذكرت انها شما الي سلطان ناوي يتزوجها..: هيه حياج بنتي .. تفضلي.. شما: عظم الله اجركم خأالو.. والله يصبركم يارب.. شيخه: اجرنا واجرج الغاليه.. تقربت مجد من خلود ويودتها: منو هاي.. خلود: يوزي عن لقافتج الوضع مايسمح.. هاي شما. مجد وهي تحايس بثمها تحاول تعرف منو شما.. بس ماعرفت.. : اي شما.. خلود: لحووووول.. انتي فضيحة والله.. هاي الي يباها سلطان.. مجد : هيييييييه (قالتها بصوت عالي مب منتبه على عمرها .. يودتها خلود من ثمها) خلود: اسكتي فضحتينا.. جلثم: انتي ايه وين تتحرين عمرج ياسه.. استحي وشوفي الوضع كيف مايسمح.. صدق انكن بنات خريشات مامنكن فايدة.. مجد قفطت يدام الحريم من رمسة يدتها .. وعطتها خلود نظره انج تستاهلين الي ياج.. وبعدها بنص ساعه استأذنت شما وظهرت من البيت عشان ترد بيتها.. ظهرت وياها خلود.. وتوها مجد بتلحقهم.. ضربت جلثم ريل مجد بعصاها.. مجد: أي.. شو ها.. جلثم: تعالي وين سايره.. مجد: بسير ويا البنت اوصلها عيب.. جلثم: ماعليج انتي .. انثبري يلا.. يلست مجد وهي تحرطم.. : افففف.. وفي لحظة غفلت يدتها وظهرت بسرعه.. شافتها لطيفه وهزت راسها واخفت ابتسامتها.. ربي يحفظج يا بنتي.. طلعت مجد تلبس نعالها (اكرمكم الله) بسرعه ومانتبهت انها لابسه كل فرد مختلف.. بس اثنينهم للبيت.. لكن كل واحد لون.. عدلت شيلتها .. وغطت نص ويهها.. وشافت خلود واقفه ترمس سلطان.. وهي تبا ترز بويهها بس تستحي.. في بيت شيخه الحوي كله عباره عن زرع.. ماشاء الله حويهم كبير وايد.. يقدرون يبنون فيه فيلا من مساحته.. ومساحه صغيره خلوها للسيايير.. كانت مجد واقفه مكانها متحرقصه تبا تروح وتسمع الي يدور بين سلطان وخلود بس مستحيه.. تمت واقفه تتطالع من بعيد .. الا وتحس بأن في شخص وراها يطالعها.. صدت شافت أحمد واقف يبتسم لها وهو لابس نظارته عن الشمس.. وواقف تحت وحده من الشير الي فالحديقة.. قفطت مجد من الموقف وابتسمت من فشلتها.. مجد: هو انا كنت ابا ادخل البيت بس قلت اشم هوا شوي قبل لا ادخل لأن الجو حلو.. أحمد ابتسم لها.. ونزل نظارته : هيه صح وايد حلو الجو اليوم.. حتى من حلاوته قمتي تشكلين فالألوان.. فرد أحمر وفرد أصفر.. استغربت مجد ماعرفت أحمد شو يقصد.. : كيف يعني مافهمت؟ أحمد يأشر بنظارته صوب نعالها.. نزلت راسها مجد وشافت النعال افتشلت صدق.. لأن شكله كان يضحك وايد.. هههه كل زنوبه شكل ولون... صدق اني خديه ولا حسيت اني لابسه فرق.. من لقافتي استاهل.. بسرعه دخلت البيت وأحمد يضحك عليها.. خطفت خلود وهي متغشيه .. ووياها سلطان مستغربين من احمد يضحك ويا منو.. سلطان: شو بلاك تضحك؟ أحمد: ها.. لا ماشي.. بس تذكرت شي.. خلود: تدرون .. ودي اشوف الإبتسامه في ويه نوره.. أحمد: الا اشحالها نوره؟ خلود: لا تذكرني دخيلك.. قلبي يعورني عليها.. كله تصيح وتصرخ تقول انتو جذابين.. وماتهدأ الا عقب مانقرا عليها قرآن تيسلي وتيود المصحف وتقراه.. أحمد: ربي يصبرها الموقف صعب وايد.. سلطان: هيه الله يعينج يختي.. أحمد: الا صدق شو سالفه الشرطة ؟؟ سلطان: ماشي ربيعة شما كانت داعمه وقلت خل الدعمه بإسمي لأن عمرها اقل عن 25 وتعرف قوانين التأمين كيف.. أحمد وخلود مستغربين.. لكن خلود فاهمه كل شي بس ضحكت.. : اقول الظاهر خذوا عقلك وايد لدرجة ان اسم اختك بعد صار على اسمهم.. سلطان: اوه انا قلت شما.. اقصد ربيعه خلود.. أحمد: اهااا جي السالفه عيل.. ماخذين عقله.. الله يعينك عيل.. اسألني وانا اقولك عن الحب وسواياه.. سلطان: تدرون .. انتوا متفيجين.. نحن في عزا وانتوا في عالم ثاني.. خلود وهي تدخل البيت: اسأل روحك بالأول .. أحمد مشى صوب سلطان: امش خل ندخل ميلس الرياييل واسكت الله يخليك عن تسمعك يدو تحشرنا.. .. .. .. .. عبيد: انتي شو فيج من طلعنا من المستشفى وانتي تتحرطمين.. حور: أقولك مافيني شي وانت مصر الا توديني من هالمستشفى للثاني.. غصب اتطلع ان فيني شي.. عبيد: مب اني ابا اطلع فيج شي.. ياحبي يا قلبي.. افهميني.. كل الي اباه اطمن عليج وبس.. صار لج فتره تتعبين وماندري شو السبب حور: ارهاق وبس عبيد: انزين انا انسان ابا اطمن على مرتي وولدي .. عندج مانع.. حور تبتسم له: لا ماعندي مانع... عبيد: انزين وين تبا تتغدى مرتي حبيبتي اليوم؟ حور: بيت عمتي شيخه عبيد تم يطالعها وهو ماد بوزه: حريم مو ويه خير.. نعزمهم يقولون مانبا.. واذا ماعزمناهم يحتشرون.. حور: هههههه لا ماقلت مابا بس تدري من واجبي اكون قرب بنت عمتي هالأيام .. هيه محتاجة لنا عبيد: هيه والله يحليلها غامضتني.. حور: عبيد .. الله يخليك اترجاك لا تسرع .. عبيد يبتسم لها: خايفه علي؟ حور: اخاف عليك من نسمة الهوا.. انت اقرب الناس لي من بعد امي وابوي كيف ما اخاف عليك عبيد: ربي يحفظج لي.. بعدني اتذكر موقف شهر العسل يوم كنتي في نص الشارع.. لوهله حسيت اني بفقدج والله يا حور كنت حاس الدنيا دايره في راسي .. مب متخيل هالموقف.. كيف نورة تتحمل موقف فراق ريلها صعب والله صعب.. حور: هيه والله .. ربي يعينها ويصبرها عبيد: آمين يارب.. .. .. .. .. .. الساعه 6 المغرب.. خوله وهي تتقرب من خليفه: انزين يعني بيوصل الساعه 1 فليل.. وشو بتقول لعمتي؟ خليفه: مادري انا بسير احين برمسها والله يعين.. خوله: تدري احس السالفه كلها معجزة من رب العالمين.. خليفه: صدقج.. يعني مشكلتي انحلت بطريقة موووووول ماتخطر على بالي.. خوله: احس من دعوة محمد ولدي.. خليفه: كيف يعني.. ومحمد شو دراه.. خوله: سلمك الله ذاك اليوم كنت اصيح.. دخل عندي محمد يقولي ماما انا سمعت كلام يدو.. تصيحين عشان بابا بيتزوج... يلست اتطالعه مارمت ايود عمري صحت زود.. جان يتقرب مني ولوى علي.. قالي .. انتي قلتي ان الله يحبني صح لأني اسمع كلامج.. قلت له هيه.. قالي انا اسمع كلامج .. يعني الله يحبني... بقول حق الله ان مايخليج اتصيحين .. والمسكين مب عارف شو يعني انك بتتزوج وحده ثانيه .. بس عشان دموعي قال هالكلمتين.. وربك يستجيب دعوة الطفل.. ابتسم خليفه: الحمد لله رب العالمين ان المشكلة انحلت.. وان الله ظهر لي اخوي الي صدق مشتاق له.. خوله: انزين خل نسير نقول لعمتي على الأقل نمهد لها الموضوع.. خليفه: يلا .. نشوا الثنينه وراحو الميلس شافو ام خليفه ياسه ويا محمد وتسولف وياه.. قعدوا حذالها.. وتموا يشاركونهم السوالف.. وبعد لحظة صمت .. اشرت له خوله بأن يبدأ.. خليفه: امييه .. تذكرين اخوي عيسى الله يرحمه.. تنهدت أم خليفه .. ونزلت راسها وحست بغصه : اااااه ضناي الي مادريبه في أي ديار هو أحين.. خوله: ترحمي عليه عمتي.. هو عند رب العالمين.. أم خليفه: خمس سنين والكل يقول نفس الرمسة.. وتوفى ابوك وهو يقول ان عيسى مات... بس قلبي يقول غير جي.. احس بقلب ولدي بعده ينبض بس مايندرابه بأي ديار.. هالإنجليز مايرحون أحد ولا يخلون رحمة ربنا تنزل.. ماتشوف العراقيين والفلسطينيين والأفغان ينجتلون من تحت ايدين هاليهود الخياس.. خليفه: بس اميه السفاره ماقصرت ودورت عليه .. ولكن ماشي اي اخبار عنه .. انحبس ومن عقبها اختفت اخباره.. أم خليفه وعيونها تدمع: انت وابوك .. منعتوني وماخليتوني اسير هناك ادور على ولدي.. احساسي يقول غير الي تقولونه كلكم.. خليفه: يعني تتوقعين ان عيسى في أي لحظة يدخل من هالباب .. تصد ام خليفه صوب باب البيت.. وتمسح دمعتها.. : انا غرفة اخوك ماهبشتها من اليوم الي سمعت انه ضايع.. لأني عارفه انه بيرجع لها.. وكل يوم ابخر واعطر الغرفه .. اقول اليوم بيرد .. واذا مب اليوم باجر.. تأثرت خوله .. حست ان ودها تفرح قلب هالمسكينة وتقول لها ان ولدج اليوم بيوصل وبيدخل من هالباب.. نشي وعطري له غرفته وزهبي له كل الي يحبه.. راجع لج وهو كله شوق للقياج.. بس مب قادره وخليفه نفس الشي وده .. بس عيسى موصنه مايقول.. وغيروا السالفه عشان مايضايقون ام خليفه زود.. ومرت الساعه وعالساعه 12:30 .. خليفه: اميه وين سايره؟ ام خليفه: بسير احط راسي .. تأخر الوقت.. خليفه: لا امي ممكن تلبسين عباتج وتيين وياي؟ ام خليفه تتطالعه مستغربه: ايي وياك؟ وين؟ خليفه: تعالي وبتعرفين.. ام خليفه: لا مب يايه لين ماتقولي... وين بتوديني هالحزة.. خليفه: بلاج امي زايغه جي.. تراني ولدج ههههههه وين بوديج يعني.. أم خليفه تصد صوب خوله الي كانت لابسه عباتها وميوده ايد ولدها محمد: يلا عمتي نشي خل نسير.. وبتعرفين فالدرب.. أم خليفه مستغربه منهم..: انزين بييب برقعي وعباتي وبيي.. وعقبها يتهم ام خليفه وهي لابسه برقها وعباتها وطلعوا من البيت وركبوا السياره ام خليفه: وين توديني؟ خليفه: المطار.. أم خليفه: ويدي.. بتسفر أمك؟ خليفه: ههههههه بشكاره انتي الله يهداج عشان اسفرج.. لا سايرين نستقبل ضيوف.. ام خليفه: ماحيد عندنا حد مسافر وبيرجع.. خوله: عمتي لا تستعيلين بنوصل وبتشوفين ع زحمه درب المطار.. وصلوا شوي متأخر.. عيسى لأن ماكان عنده وايد اغراض وصل بسرعه.. وكان يترياهم برع.. واتصل على تليفون خليفه الي كان توه يبركن السياره.. عيسى: وينك ياخوي.. انا وصلت؟ خليفه: خلاص ثواني بس ابركن الموتر.. ام خليفه صدت صوب خليفه لأنها كانت يالسه حذاله وصوت التليفون عالي.. حست ان الصوت الي سمعته مب غريب عليها.. هالصوت حرك قلبها بطريقة غريبه.. تعوذت من ابليس وصدت الصوب الثاني.. نزلوا من السياره ومشوا صوب بوابه القادمون.. عيسى تم يطالع حواليه.. ياسبحان الله كيف تغيرت البلاد .. 5 سنين بس واشوف هالتغيير كله.. مشتاق لهالأرض.. لهالدار.. لريحتها وكل شي فيها.. دار بوخليفه الله يرحمه.. نزل راسه.. كنا بعاد عنك يوم اغمضت عينك يا أبوي زايد.. خليفه لأنه طويل كان قادر يشوف عدل.. شافه واقف على طرف عدال الترولي ومعاه شنطه سودا.. ولابس بدله... حس ان وده يصرخ ويربع في حضن اخوه.. ادمعت عينه غصبن عنه.. اخوي بعد هالغيبه الطويله اشوفه.. ياشوقي لك ياخوي.. أم خليفه: خليفه ممكن تفهمني شو الي قاعد يصير.. ويايين نستقبل منو نحن؟ خليفه يصد صوب امه يتبسم لها: ويأشر صوب عيسى: يايين نستقبل الغالي.. من شافته ام خليفه حست ان قلبها بيوقف من الفرحة والصدمه.. وصرخت وادمعت عينها غصبن عنها: قلت لك قلبي مايخيب.. قلت لك ولدي عايش وينبض ماصدقتني.. من شافهم عيسى وشاف امه .. انقبض قلبه. ااااااااه مشتاق لديرتي واهلي وناسي وكل شي فيها.. ودر كل شي عنه وربع صوب امه .. وماحس بعمره الا ينزل يحب ريلها والناس كلهم يطالعونهم مستغربين.. ويتهامسون.. وحضن امه وضم ويها بإيده وتم يحب كل قطعه في ويه امه.. وحب راسها.. وهي قعدت تحضن ولدها وتلمس كل قطعه من جسمه.. تحس ان تبا تتأكد انه ولدها .. ضناها الي تريته هالسنين كلها.. وهي عارفه انه حي والكل معارضها.. خوله تأثرت وايد من الموقف يلست تتطالعهم ولوت صوب خليفه الي كان يصيح... نزل نظارته الطبيه وقعد يمسح دموعه.. محمد الصغير يطالع ولا فاهم شي.. ام خليفه: وينك يا ولدي.. وينك مادريت عن حال امك من عقبك.. والله اني عارفه وحاسه انك حي والكل يجذبني.. ويقول انك مت.. عيسى وهو يصيح ويحضن امه بكل قوته .. الود وده يشلها على راسه ويمشي فيها الأرض كلها.. : فديتج الغاليه ربي لا يحرمني منج.. والله غصبن عني هالغيبه مب بيدي.. والحمد لله اليوم انا بينكم وفي بلادي.. خليفه: وانا ماتبا تسلم علي.. صد عيسى صوب اخوه وحضنه وقعدوا يصيحون في حضن بعض.. صدق كان مشتاق لأخوه ومفتقده.. وسلم عيسى على خوله وشل محمد في حضنه ولوى بإيده الثانيه على امه ومشوا صوب الموتر.. عيسى: لحظة.. اغراضي يا ريال نسيتهم.. خليفه: شو تبا فيهم .. أغراض من ديار خايسه ابعدتك عنا.. عيسى: ههههه.. الحمد لله على كل حال.. وسار خليفه ياب الأغراض.. ام خليفه وهي تلوي على ولدها: ربي لا يذوقني حزنك يا عيسى.. ويخليك لي.. ماشي سفر من اليوم وساير.. وين ماتروح ريلي على ريلك.. عيسى ضحك.. ومشوا كلهم رادين البيت.. ورن تليفون خليفه.. كانت سوسن.. رد عليها ورمسها عساس انها واحد.. خليفه: حي الله بو الشباب هلا.. سوسن: وصل.. خليفه: هيه الحمد لله.. سوسن: عطني اياه ابا اسمع صوته.. ابا اسمع حسه دخيلك.. خليفه: استح ياريال شوهالرمسه بعد.. متصل نص الليل وتقولي هالرمسه.. خل عنك بس.. خلاص عيل نتلاقى باجر ان شاء الله سوسن: من صغرك نذل.. ماعليه انا اراويك باجر.. مع السلامه خليفه: مع السلامه خوله تقربت من خليفه: منو؟ خليفه: سوسن تبا ترمس عيسى.. خوله: حليلها والله .. ماتنلام مشتاقه.. خليفه : حتى انا مشتاق لج.. خوله: بس انا وياك.. خليفه: ماعليه اشتاق لج حتى وانتي وياي.. نزل عيسى الجامعه: انتوا مب ناوين تردونا البيت.. مشتاق له ابا اشوف غرفتي.. ام خليفه: غرفتك ماهبشتها ( لمستها ) من اليوم الي سمعت فيه خبر انك اختفيت.. وكل يوم اعطرها وابخرها .. ولله اني حاسه انك بترجع وماخاب احساسي.. عيسى: ربي يحفظج لي.. اليوم برقد في حضنج .. صدق مشتاق له.. صدت صوبه امه وتمت تتطالعه: وحليلك يا ولدي .. ضعفان وايد.. يبالي أكلك ذاك الأكل الزين عشان ترد صحتك عيسى: هيه دخيلج امي خاطري في كل اكلاتج.. وحاس اني مفتقد كل شي فالبلاد .. خليفه: شوف الشوارع.. دبي تغيرت وايد في هال5 سنين.. عيسى: هيه والله صدقك.. احلوت وايد ماشاء الله.. خليفه: بس الإمارات فقدت شي غالي وايد عليها.. عيسى: دخيلك لا تذكرني.. خسارة كبيره للإمارات.. أم خليفه: خسرنا قايد .. وولي .. وأبو .. وكل شي.. عيسى: الخير في عياله ان شاء الله.. خليفه: ان شاء الله .. .... . ومرت الأيام على هذا الحال.. الكل عند نوره يواسيها عشان تقدر تتقبل الوضع اليديد في حياتها.. مجد ترجع من الدوام على طول صوب بيت عمتها شيخه .. وجاسم وباقي الرياييل كلهم يتيمعون في ميلس الرياييل في هالأيام.. يواسون ابو نوره .. لأنه صدق حزين على حال بنته.. وشما يومياً كانت تزورهم.. ودخلت وتعرفت على نوره وتمت ترمس وياها.. ارتاحت لها نوره وايد .. وارتاحت لرمسة شما.. كان لها اسلوب حلو يقعنها ويعطيها أمل فالحياة.. سلطان كان مرتاح لشوفة شما في بيتهم.. وخصوصاً يوم امه قالت له انها فعلا معجبة بشخصية شما وأدبها.. مرن هال4 أيام على الكل والحزن يعم على الكل فالبيت.. فطوم ماكانت قادرة تكون وياهم فالعزا وهذا بسبب انشغالها بدراستها وتحضيرها للإمتحانات .. لأن مابقى غير شهر ونص وتبدأ امتحاناتهم.. نتايج فحوصات حور بتطلع يوم الأربعا.. .. .. .. .. .. .. . الأربعا الصبح سار عبيد ويا حور المستشفى.. ودخلوا عند الدكتورة .. من شافت حور ارتبكت.. الدكتوره: تسمح لي أخي تنطر برع شوي بدي إفحص المريضه شوي.. حور ابتسمت لعبيد: اترياني برع.. نش عبيد وطلع من الغرفه.. ونشت حور سارت صوب سرير الفحص عشان تفحصها الدكتور.. الدكتورة: ايه انا رايحه جيب لي شي من المختبر لأن ناسين يجيبوه لي وجايه.. لحظة بس حور: خذي راحتج دكتورة.. طلعت الدكتورة وشافت عبيد ومشت صوبه.. الدكتوره: استاذ ممكن اكلمك شوي على انفراد.. حس عبيد من اسلوبها ان الموضوع خطير.. لدرجة انها طلعت من الغرفه عشان ترمسه اكيد في شي.. : دكتورة لا تخرعيني .. حور فيها شي؟ الدكتور: والله ماني عارفه كيف بدي قلك.. بس لازم حدا يعرف من أهل المريضه مشان يوصلو لها المعلومه بطريقتهم.. عبيد زادت دقات قلبه وهو يتريا الدكتورة ترمس وتقول شو الي صاير.. : قولي دكتورة .. دخيلج بلاها هالمقدمات.. الدكتورة وهي منزله راسها: مرتك فيها أورام سرطانيه في.. مالحقت تكمل قاطعها عبيد وهو معصب: جب . لا تفاولين على حرمتي.. حور مافيها شي.. انا ادري مافيها شي.. هيه بعد تقولي مافيها شي.. الدكتوره وهي تحاول تهديه: استاز عبيد ماراح اقدر اكمل هيك وانت منفعل.. عبيد دخيلج قولي لي الي سمعته جذب.. دخيلج قولي.. الدكتوره: كنت أتمنى يكون كذب .. لكن للأسف انو هاي الحقيقه الي لازم تتقبلها.. الأشعة والفحوصات أثبتت هالشي ومابنقدر نعمل أي شي لأن مرحلته متأخره ان شاء الله تولد بالسلامه.. عبيد: والجنين؟ الدكتوره: مشان هيك انا بدي كلمك.. نحن لازم نولد مرتك من تدخل السابع.. مشان نتطمن على الجنين ونقدر نعمل علاج كيميائي لمرتك.. عبيد حس بغصه .. رفع راسه وشاف حور واقفه ورا الدكتوره وهي تسمع الكلام الي تقوله الدكتوره وهي مصدومه.. انصدم عبيد ونش واستغربت وين رايح عبيد .. صدت وراها الدكتورة شافت حور تلومت.. عبيد تقرب من حور: لا مافيج شي الدكتورة ترمس عن وحده ثانيه.. انتي مافيج شي انا اعرف.. حور صدت صوب الدكتورة متجاهله عبيد الي مجابلنها: يعني انا مابعيش اربي بنتي؟؟ .. توني اقرا التقارير الي فالغرفه ماصدقت.. وقريت ان الجنين بنت.. قلت اسمع منج واتأكد .. قولي اني بقدر اعيش اربي بنتي وبعدين بموت.. دخيلج قولي .. عبيد يود حور وقعدها على الكراسي.. : هدي .. انتي ماعليج منها .. اصلا مافيج شي انا بوديج برع البلاد تتعالجين .. الجنين مانباه المهم انتي.. والجنين الله يعوضه.. انفعلت حور وهي تحط ايدها على بطنها: جريب ال5 شهور وانا تعبانه على هالجنين واخر شي تقول مانباه.. لاااااااا.. بنتي اباها.. ولا مستعدة اخسرها.. بتم بنتي في بطني لا تحرمني من احساس الحمل والأمومه قبل لا أموت الله يخليك عبيد.. ادمعت عيون عبيد غصبن عنه وهو يتخيل انه حور بتروح عنه ومابيشوفها .. وبيعيش وحيد شرات نوره.. : بتعيشين وبتييبين هالبنت و10 غيرهم.. انا اعرف.. نشي بنطلع من هالمستشفى .. جذابين مايعرفون شي.. نشت حور ويا عبيد وهي منهاره ... اتصل عبيد في الدكتور محمد (ربيعه) ... وقعد فالموتر وحذاله حور الي حاطه راسها على جتف عبيد وساكته شرات المصدومه.. عبيد: اشحالك محمد؟ محمد: بخير ربي يعافيك انت اشحالك؟ عبيد: اقول محمد .. ابا اييب مرتي عندكم المستشفى تسوون لها فحوصات.. محمد: خير ان شاء الله .. بس عندها موعد؟ عبيد: ماعندها شي واباك انت تساعدني وتسوي كل شي.. ونسوي لها فحوصات... لأني توني طالع من مستشفى الزهرا ويقولون لي .. (سكت) .. ماعليك المهم تقدر تخدمني هالخدمه.. محمد: خلاص من عيوني برمس قسم الملفات والمواعيد يضبطون كل شي.. عبيد: تسلم والله ماتقصر.. محمد: افا عليك.. اخوي انت واخدمك بعيوني.. عبيد: خلاص عيل نحن فالدرب يايي.. وتحرك عبيد صوب المستشفى الي يشتغل فيه محمد.. وبعد نص ساعه وصل المستشفى .. ونزلوا .. وفهم محمد كل السالفه.. وطبعا بواسطة محمد سوو لها كل الفحوصات المطلوبه عشان يتأكد من الي سمعه من مستشفى الزهرا .. الدكتور محمد: طيف.. هاتي الأوراق الي على الرف هناك.. مشت طيف ويابت للدكتور الأوراق وعطته.. ويلست تتطالع حور .. غمضتها.. كيف كانت منهاره وطول الوقت ماتشل ايدها من على بطنها وتحس بجنينها.. عبيد: متى بتظهر النتايج دكتور؟ الدكتور:انا رمستهم وقلت لهم ارجنت.. يعني بياخذ له 4 ايام.. عبيد: دخيلك مايستوي اسرع من جي.. الدكتور: ماعليك انا برمسهم .. وبييب لك النتايج لعند بيتكم .. وان شاء الله يطلع كل شي عكس الي سمعتوه.. عبيد: والله اتمنى يا دكتور.. ونش عبيد وهو قابض ايد حور وطالع من الغرفه.. الدكتور وهو يهز راسه: الله يعينه.. تدرين ماخذ مرته عن حب .. ويحبها حب ماتصورينه.. بنت عمه .. وماصار لهم 5 شهور من تزوجو.. وهي حامل بأول طفل لهم.. واليوم يسمع خبر ان مرته ممكن تموت.. طيف: الله يعينهم.. غامضتني وايد .. طول الوقت حاطه ايدها على بطنها.. الدكتور: خايفه على الجنين اكثر من خوفها على نفسها.. طيف تحسست من الموضوع وايد.. ادمعت عينها.. صدت الصوب الثاني عشان مايحس بها الدكتور ويلاحظ دمعتها.. وتضايق لأنه مب قادر يساعد محمد في شي.. لكنه من خلال الأشعه الي شافها شك ان فعلا الفحوصات صحيحة.. بس ماقال شي لعبيد لغايه مايتأكد من باقي الفحوصات الي سووها.. وعقب يحكم.. ... ... ... .. .. .. . مجد: سمعي يا بنت الناس.. كفي شرج عني احسن لج.. انا ان انفج لساني انتي الي بتخسرين.. جواهر: اخبرج انتي لا تقعدين تهددين تراج ماتعرفين جواهر منو.. مجد: ليش منو تكون جواهر... بنت ضايعه ماتعرف الله وين فارنها.. فجت جواهر عيونها منغاضه من رمسة مجد: اسكتي .. ماسمح لج ترمسيني بهالطريقة.. مجد: انتي الي خليتي عمرج فهالموقف.. الي ماينحسد عليه الصراحة.. جواهر: بخليج تندمين على هالرمسه.. مجد: اوه اوه .. خوفتيني تصدقين.. سليمان كان نازل من الدري فهالوقت وسمع حشرتهم.. جواهر: اخبرج مب وحده شراتج تمثل علي دور شريفة مكة.. انا اراويج.. مجد: احمدي ربج مافضحتج يدام المدير يوم اتصلت البيت وقالت لي امج انج فالدوام وانتي اصلا من ذاك الصوب ولا فالدوام ولا شي.. ولا الظهر شفتج نازله من سياره واحد عفان الله .. وعقب تميتي تتريين ابوج.. تتحرين الناس اغبيا مايفهمون هالحركات.. اعقلي يا بنت الناس وخافي على سمعتج وسمعة هلج.. هاي فرصة مني لج تعيدين النظر فيها في سواياج.. جواهر: جب لااااااااااه.. هاللي ناقص انتي على اخر زمن تنصحيني.. نست عمرها راسمه حروف على ايدها وعاشقه اونها.. نسيتي سواياج؟ مجد: انا ان حطيت حرف على ايدي مب دليل اني احب او عاشقه.. مجرد حركات ويا رباعتي ومزح.. الحمد لله عمري ماسويت سواياج.. جواهر: وهي تمشي صوب الباب عشان تطلع: ترا دايما تطلعاتج للأعلى من جي.. معذورة.. انغاضت مجد من رمستها.. ويودت عمرها وضربت بريلها بالقو على الأرض.. انا شو الي يخليني اسكت عن هالأشكال.. والله ماعندي سالفه.. مب ويه حد يستر عليها .. سمع سليمان الموضوع كله .. كان شاك في جواهر من البداية .. لكن هالمره تأكد بعد الي سمعه عن حركات جواهر وسواد ويهها.. وقرر انه مايسكت .. نزل من الدري وكمل دربه.. مجد ماعرفت منو الي نزل لأنها كانت معطه ظهرها له.. وهو خطف بسرعه وطلع.. .. .. . شما: السلام عليج امايه.. ام عمّار: وعليكم السلام .. بسرعه بدلي ونزلي عشان احط الغدا.. شما: اسميني يوعانه اليوم.. هزاع: حتى أنا يوعان.. اليوم أول يوم داوم لي واحس ماكلت من سنه.. عمّار: بل .. خريط .. من سنة.. ههههههههه هزاع: تشبيه بليغ ياريال لا تفشلنا عاد.. ام عمّار: الله يوفقك يا ولدي.. الا هزاع ماسرت عند ابوك.. هزاع: ناوي ازوه اليوم ان شاء الله وابشره اني قمت اشتغل وبسجل فالجامعه عشان اكمل دراستي.. أم عمّار: الله يصلح الي بينكم ان شاء الله هزاع: هيه دخيلج كثري من هالدعوات احتاجها.. توقعاتكم.. الفحوصات الأخيره بتطلع مشابهه للي قبلها .. ولا بتكون غير؟؟ وإن كانت الفحوصات صحيحة.. كيف بيكون الخبر على العايله؟؟ مجد شو بيكون حالها اذا عرفت ان اختها بتموت بعد فتره؟؟ نوره شو الحال عليها؟؟ شما وتقربها من بيت أهل سلطان؟؟ هزاع وشغله في إتصالات بداية لحياة جديدة.. ؟؟ فيصل ومعاملته لفاطمة؟؟ سليمان شو بيسوي؟؟ =-=-=-=-=-=[/align] |
يسلمووووووووووووووو روعه |
[align=center]thanks fdooooo .. .. [/align] |
رووووووووعه |
[align=center] جزء الثاني عشر الفصل الأول =-=-=-=-=-= الملخص : انتشار خبر مرض حور بين العايلة.. طلب حور من مجد.. موافقة شما على الزواج وتأجيل الموضوع لحين استقرار امور حور في العايله.. بدء إمتحانات الثانويه العامة.. تعرف مها على عيال عمها.. الحاله العصبية لجواهر.. كلام الدكتور لأخو جواهر.. .. نشت وهي معصبه: ضحكت من سرّك بلا قول آمين خلود وهي تضحك على حالهم وتصد صوب مجد: شو بلاج ياحرمه تحرطمين مجد: طاعيه ويا هالضروس يضحك علي اونه.. مادري شو فاكر عمره.. اتمناااااه يطيح في الماي خلود: هههههه حرام عليج يسولف وياج وبعدين صدق اشكالنا تضحك.. تعالي يودت مجد من جتفها ومشت صوب الموتر وقفتها يدام الجامه: شوفي شكلج الله يخليج مجد تمت تتطالع يودت عمرها في البداية بس ماقدرت يلست تضحك على شكلها.. وعلى جامه الموتر شافته.. يالس يتمشى ويرمس تليفون .. سرحت شوي مجد وتداركت دمعتها بسرعه وصدت عالصوب الثاني ومشت صوب الحريم وهي تبتسم لهم.. شافت عيون حور كيف طايره من الفرحة وتضحك وتسولف.. مجد في خاطرها.. ليتني اتعلم كيف اكون قوية مثلج يا اختي.. الله يطول بعمرج يارب.. .. .. خليفه دش البيت وهو متضايق على الآخر.. استغربت خوله من ملامحه.. الي موول ماتريح القلب مبين ان هالإنسان مهموم في شي بس الله العالم شو هو.. تقربت منه.. خوله: خليفه شو بلاك.. خليفه: اليوم سمعت خبر كدرني وايد.. خوله: خير شو السالفه؟ خليفه: ماعرف شو بتكون ردة فعلج يا خولة لو دريتي.. خوله: الله يخليك خليفه لا تسوي لي هالحركات ترا الي فيني كافيني ارجوج ترا قلبي مايتحمل .. قوووووول بسرعه لا تم تتطالعني بهالطريقة؟؟ شو صاير.. خليفه: حور.. ربيعتج.. فيها الخبيث.. خوله تمت تتطالع خليفه ساكته.. ومن عقبها ضحكت: اقولك خليفه مره ثانيه يوم تبا تسولف دخيلك لا تسولف بهالسوالف.. تفاول على الحرمه امس كلمتها مابلاها شي.. خليفه: انتي شو فييييج ماتفهمين.. اقولج حور فيها الخبيث وهذا شي يتسولف به؟؟ يلست خوله تصيح ومب مصدقه وخليفه يهديها.. : ابا اشوفها الله يخليك.. خليفه: ان شاء الله بوديج لها .. بس مب الحين لأنهم مب موجودين.. خوله: الله يعينج على مابلاج يا حور.. ويعينك ياعبيد.. .. .. . . .. عبيد رمس ويا جاسم عن موضوع العرس.. وجاسم ماعارض أبداً بالعكس من الله يباها ان عرسه يتجدم وخلود من لها اغلى من بنت خالها حور.. مارفضت فكرة الزواج الجماعي.. وسلطان رمس ربيعه فيصل وفهمه بالظروف.. فيصل كانت المشكلة ويا أهله ماودهم ان ولدهم يتزوج زواج جماعي خصوصاً انه اخوهم العود.. واول عرس بيكون في بيتهم وودهم يفرحون به بروحه.. رمس سلطان عبيد بهالموضوع وعبيد تفهم الموضوع وماجبرهم طبعاً.. كان الباقي بس سلطان وشما.. سلطان: اشحالك عمي عساك بخير؟ بوهزاع: بخير عساك طيب ان شاء الله.. الا اشحالها الي من اهلك شو صحتها؟ سلطان: والله يا عمي تغمضنا تحاول ماتبين الي فيها .. والأهل كلهم حالتهم مختبصه بوهزاع: الله يعينكم ويسهل عليكم ياولدي.. الله وياكم يارب.. سلطان: عمي انا بغيت ارمسك في موضوع والصراحة ماعرف شو بتكون ردة فعلك.. بوهزاع: خير يا سلطان قول ارمس يا ولدي ولا تستحي وانا عمك.. افا عليك سلطان فهم بوهزاع الموضوع كله الي تم ساكت وهو يسمع السالفه.. بوهزاع: شوف يا سلطان يا ولدي. الموضوع هذا انا ماعندي مانع فيه.. بالعكس حلو يوم نجمع فرحتين في ليلة وحدة.. وبعدين العروس الثانيه اختك يعني هب غريبه عن شما.. بس الراي راي البنت.. تعرف كل بنت ودها بعرس ويمكن شما يكون لها راي ثاني.. خلني ارمس البنت واشاورها واشوف.. وبعدين لا تنسى البنت ماجهزت شي.. وانتو تبون كل شي خلال هالشهرين.. يعني تعرف الحريم وسوالفهن.. سلطان: عمي حتى لو حفلة ملجة بس.. مب شرط عرس ادريبها بعدها مب جاهزة للعرس لكن الملجة على الأقل.. بوهزاع: خلاص مره لا تحاتي ان شاء الله باجر برد عليك خبر بس ارمس البنت.. سلطان: يزاك الله خير عمي وطول الله بعمرك ماتقصر والله.. بوهزاع: افا عليك نحن اهل وانت ولدي وشما بنتي.. ربي يوفقكم يارب سلطان: آمين يارب العالمين.. بند سلطان عن بوهزاع وهو مستانس.. سلطان كان بإمكانه يرمس شما نفسها لأن يعرف رقمها لكنه معاهد نفسه مايرمسها الا يوم تكون هالبنت حليلته... .. .. تقربت منها شافتها سرحانه وهي تتطالع الوادي ومتضايقه.. لوت عليها وتقربت منها.. حور: مجد انتي متضايقه من الطلب الي طلبته منج؟ مجد: ها .. شو متضايقه؟.. هههههه تمصخرين انتي.. ماشي شغل اتضايق من ولا شي حور: مجد انا بسألج سؤال.. وجاوبيني بصراحة؟؟ انتي تحبين أحمد؟؟ انا الي حسيته انج تعتبرينه شرات اخوج بس ماتفكرين ترتبطين فيه شرات ماكنتي دوم تقولين لي.. مجد ودها تصرخ وتقولها احبه.. رفعت عينها شافته وهو مبتسم ويشوي ويا سلطان وعبيد.. قلبها عورها.. بس حور اختها الي ماعندها اغلى عنها.. ودها ان حور تكون مرتاحة لآخر لحظة: لا شو ماشي شغل احب احمدوو الياهل.. هههههههههههه والله انتي اليوم مستخفة يختي حور تبتسم لها: ريحتيني الله يريح قلبج.. تدرين ليش اخترتج انتي بالذات؟؟ كان بإمكاني اختار نوره مثلا ولا اي وحده من الأهل.. مجد انا عارفه محد بيكون حنون على عيالي اكثر منج.. وابا اخوان عيالي يكونون منج.. لأن الحرمه الثانيه من بتييب عيال ثانين.. بتنسى ولدي ولا بنتي.. اما انتي لا متأكدة انج مابتسوينها مجد في خاطرها ااااه يختي يعني بعيش طول عمري بعذاب.. بس كله عشان هالدمعه الي في عينج تهون والله كل شي يهون.. حضنت اختها ويلست تصيح.. حور: لا لا نحن ماتفقنى على صياح.. مجد انتي تحبيني وان شاء الله ربي بيلقانا ببعض في الجنه .. انا مب زعلانه للمرض لأن كل دقيقه تمر اكسب اجر فيها تعرفين؟؟ كل ألم احس به يطيح خطا من خطاياي.. مجد اختي حبيبتي خليني ارقد في قبري وانا مرتاحة.. كم يسوى الواحد يرقد في قبره مرتاح.. كل ماتقول حور هالرمسه كل ما مجد ترص على اختها زود وتحضنها بقوة.. وتصيح بحرقة أكثر.. الكل تم يطالعهم وماقدر.. خصوصا لطيفه بسرعه سارت صوب السياره ويلست تصيح وتصارخ عشان محد يسمعها.. ومر الوقت على الكل بصعوبة.. =-=-=-=-=-=-=-= يلست تتطالع الغرفه حواليها وتحس بصوت أمها في كل زاوية من البيت.... تحس بقطرات من الماي على ايدها.. كأنهن دموع أمها نازله على ايدها.. تصيح وتصرخ بس محد يسمعها.. اااااااااااه يمي وييينج .. وينج اباج تسامحيني انا السبب.. اناااا.. يلست تضرب عمرها وتكسر كل شي يدامها.. مابا اعييييييييييش والله مابا اعييييش ياربي.. من بعد عين امي مابا اعييييييييش.. انا ليش جي استويييت لييييييييش .. ليش دمرت حياتي بهالطريقة... ااااااااااه ياربي.. كان سهيل واقف ورا الباب يسمعها وقلبه معورنه عليها .. ومتضايق واااايد بس مابيده يسوي شي... مووووتي اخير لنا موووتي ... فحياة امي ماهمتيتي فيها وسويتي سواتج.. وألحين من عقب عينها تبين تهتمين... الله يرحمج يا أمي همسة: أم جواهر توفت إثر جلطة دماغية صابتها في المستشفى ماسمع الا صريخ في الغرفه ... خاف .. قلبه نغزه... أكيد شي صاير.. لا اكيد في شي... سهيل: جواهر.. جواهر افتحي الباب جواهر.. جواهر وهي تصرخ: مابااااااااااااااااا.. مابا اعيييييش مابااااا.. ماودي اتم بعد الي صااااار.. انا السبب انا .. تم يحاول وياها سهيل بس ماشي فايدة.. دز الباب بقوة وكسره وقدر يدخل .. شاف الغرفة فاضيه .. مشى صوب الحمام وشاف الي ماكان يتمناه.. مهما كان تبقى جواهر اخته مايبالها الضرر.. .. .. يودها وشلها بإيديه وداها بسرعه اقرب مستشفى.. وطبعاً أمن المستشفى ماراح يمشون السالفة بهالطريقة.. لأنها حالة إنتحار.. جواهر طول الوقت تصيح جواهر: ليش خليتني اعيييييش لييييش؟؟؟ حرام عليك مابا اعيش بعد الي صاااار مابا.. سهيل: اسكتي .. جب... الحين بس فكرتي انج السبب في موت امج.. خلج عايشه جييي طول عمرج حاسه بالذنب هذا احسن شي يستوي لج.. يلست تصارخ وتحاول تشل الجلوكوز الي مركبينه لها والدم الي ينقلونه لها.. لكن الممرضات ربطوا ايدها وريولها بالسرير وعطوها إبره مهدئة تهديها.. الشرطية دخلت عشان تحقق مع جواهر بس الممرضات منعوها.. وطلع سهيل يرمسهم.. الشرطي: ممكن تشرح لنا ياخوي كيف استوى الموضوع يلس يقولهم سهيل عن كل الي صار.. من اول يوم لقى اخته فيه فالشقة لليوم الشرطي: بس ياخوي كان لازم تبلغنا بهالشي عشان نتخذ الإجرائات مع هذا الريال.. هالأمور فيها قضية شرف.. سهيل: شو تباني اسوي ياخوي من واول يوم صار هالموضوع وامي طاحت المستشفى وانشل انا تفكيري.. سمعتنا بين الناس وحالة امي ومليون شي في راسي مب قادر افكر في شي.. لين ما امي توفت الله يرحمها بسبب هالخايسه.. الشرطي: ماعليه ياخوي بس انا مجبور اني احول القضية للجنائيات لأنها حالة إنتحار.. سهيل: ياخوي حاول الله يخليك مانبا فضايح الشرطي: بس ياخوي هذا الي يمليه علي الواجب وماقدر اخالف القوانين اسمح لي... وبالعكس انت بهالطريقة بتستر على الموضوع بزواج اختك بهالإنسان.. مرت علينا مثل هالحالات وايد وحليناها.. أحسن طريقة تحصنون نفسكم فيها من رمسة الناس تزوجون البنت لنفس الشاب.. وكلن يتحمل غلطته.. وانتوا عاد بطريقتكم حاولو تسترون الموضوع بين معارفكم فكر فيها سهيل وشاف رمسة الشرطي صح.. وهذا الي لازم يسويه.. ابتسم وطبطب على جتف الشرطي : يزاك الله خير ياخوي.. خلاص عيل موافق.. الشرطي: عيل عطني معلومات هالريال وانا ان شاء الله بتكفل بالباقي ومايصير خاطرك الا طيب.. وكمل الإجرائات مع الشرطي.. وفي هالأثناء شاف الدكتور محمد سهيل في مكتب الشرطي في قسم الحوادث.. تردد انه يروح له.. وفضل انه يسأل الباقي عن سالفته .. وعرف منهم انها عملية انتحار جواهر.. هز راسه.. هاي نهاية الإستهتار.. تقربت منه نوف.. : دكتور محمد بلاك مستهم.. محمد يبتسم لها: ماشي بس شفت واحد من الربع ومسكين عنده حد من اهله تعبان نوف : يحليله الله يشافيه يارب... انزين عيل انا سايره لأنهم يزقروني اكيد حالة نسائيه.. محمد : الله يعينج ,, =-=-=-=-= همسة: محمد خطب نوف رسمياً وهم على وشك الإرتباط الرسمي والزواج =-=-=-=-= __________________ وافقت شما على القرار طبعاً وماقدرت تردهم في شي.. وبدت تحضر للملجة.. وفي كل يوم تظهر فيه عشان تتشرى هزاع يحس بطعنه في قلبه.. يهون على نفسه بدعائه لها ان الله يوفقها .. ويسهل عليها.. شما: وينه؟؟ مها: منوو؟؟ شما: اخوج بعد منو غيره.. مها: واقف برع شو تبين فيه؟؟ شما: ابا اخذ رايه في هالساعه .. مها: اخوي ماعنده ذوق خليني اشوف انا بقولج رايي.. شما: اوهووو مهوووي عاد ابا اخذ ذوق ريال فيها لأنه لـ سلطان وعادة الرياييل بعرفون ذوق بعض.. مها: اانا الي ماعندي سالفة ويايه وياج.. شما: ههههههه مب من قلبج ادري. طلعت مها من المحل وراحت عند هزاع الي كان سرحان ولا حاس بنفسه.. حطت ايدها على جتفه تزقره فز.. وفزت مها..: عنلاتك لو حامل جان طيحت الياهل من الخوف.. زيغتني وين وصلت بأفكارك؟؟ هزاع: انجعمي.. ماوصلت مكان شو عندج؟ مها: شما تزقرك.. هزاع من سمع طاري شما طنش مها ومشى صوب المحل.. تغصصت مها.. : اوكيييي التطنيش.. انا اراويك.. هزاع.. : شما قالت لي مها انج تزقريني خير؟؟ شما: تعال هزاع ساعدني.. شوف هالساعة شو رايك فيها؟؟ كانت حاطة صبعها على الفترين ومأشرة على الساعه .. وهزاع كل تفكيره في صبعها.. هالإنسانه بتخبل بي.. وراح تصير لغيري ياناااس ظلم شو هالحاله.. شما: هزاااااااع.. هزاع: هلا.. شما: شو بلاك.. انت واختك مامنكم فايدة والله لو عمّار ماعنده امتحانات جان ظهرت وياه.. هزاع: افا عليج والله .. وين الساعه اشوفها.. يلس يطالع الساعه.. : وايد حلوة .. بتعيبه اكيد .. طلعتي ذويقة بنت عمي.. شما ابتسمت له .. وراح هزاع عند مها الي كانت الصوب الثاني تتطالع الساعات النسائية.. مها: هزاع عايبتني هالساعه مابتاخذ لي اياها؟ هزاع يطالع مها بنص عين.. : واشعنه ريلج الدب ماياخذها لج.. مها: ريلي مب مقصر علي.. بس غير يوم تطلع منك.. هزاع: لا والله عملية نصب واحتيال يعني مها: لحوووووول هالإنسان طالع كنجوس (بخيل) على منو مادري.. هزاع: انا كنجوس.. ماعليه.. لو سمحت اخوي بغينا هالساعه.. مها تتطالعه وتضحك بخبث.. فديتني والله وقصيت عليك هزاع: نعم مها: ها .. لا ماشي اقول ربي لا يحرمني منك يارب.. وكملوا شرواتهم وطلعوا من المركز هلكانين تعب.. وصلوا شما بيتهم وراح هزاع ومها لبيتهم.. عمّار: هييييه يعني ماترومين تتريين اخلص دراستي وعقب تتشرين .. شما: فديتك ياخوي..وين بلحق الله يهديك.. ماهو الملجة بتكون بعد امتحاناتك بإسبوع عمّار : ماعليه سامحتج.. بس تعالي اقري علي عشان ارقد وانا مرتاح واستعد لإمتحان باجر.. شما: تعال فديتك يلست شما تقرا على اخوها وتدعي له ... وسار غرفته وراحت هيه غرفتها.. .. .. .. =-=--=-=-=-=-= تحولت القضية للجنائيات وطلبوا جابر ويابوه المركز.. وواجه سهيل الي كان ميود عمره من الغيض الود وده ينقض عليه ويذبحه يدام الكل.. جابر واقف ويطالع الضابط: نعم يقولون طالبيني خير شو مستوي.. صد يطالع سهيل بنص عين كأنه واثق ان سهيل مابيقدر يسوي له شي يدام الأمن العام .. الشرطي ماعيبه اسلوب جابر .. لأن جابر بعد غلطان وبيتعاقب.. : اخبرك انت عدّل رمستك تراك في المركز.. جابر: اسمح لي الحشيمة لك سيدي.. بس ممكن اعرف ليش يايبيني الضابط: اظني انت عندك فكرة ليش يايبينك.. الموضوع يا أخ جابر من لعب لعبته واستمتعت به.. دفعت ثمه موت أم.. وحالة انتحار بنت.. جابر بلع ريجه من سمع هالخبر بس تم صامد: اوكي وانا شو يخصني.. الله يرحم الأم ويهدي بنات اليوم.. سهيل ماقدر يمسك نفسه اكثر من جي.. توه تقرب بيضربه مسكه الشرطي ومنعه الضابط: هدي يا سهيل .. مايجوز هالتصرف.. نحن جامعينكم هني عشان نلقى حل للقضية بشكل ودي.. جابر: تعالو تعالو اي ودي اي خرابيط.. شوف الموضوع خالص.. البنت يتني برضاها واعتقد انها كبيره كفايه عشان تعرف الصح من الغلط.. وانا ريال ماقدرت ايود نفسي يدام اغرائات بنت.. مشكلتهم يوم ماعرفوا يربــــ--- توه ماكمله رمسته الا يته صفعه قوية من الضابط: احترم نفسك واحترم المكان الي انت فيه.. ولا تقعد تغلط لأن مب لصالحك.. ع قولتك البنت كبيره كفايه.. اعتقد انت كبير كفاية اكثر عنها عشان تقدر تفرق بين الصح والغلط.. والزنا وسواد الويه الي سويته غلط اكبر يدام ربك.. اشوفك ماقدرت تمنع نفسك؟؟ جابر سكت لأن ماعنده شي يقوله ويعرف ان الموضوع اذا وصل لأبوه بينحره.. أبوه في هالسوالف شديد وايد وماعنده تفاهم ويخاف من ابوه بشكل كبير.. جابر: انزين ممكن نختصر الوقت والكلام هذا كله ونعرف المطلوب.. الضابط: هذا هو الحل الي اقترحناه على سهيل ووافق.. وانت ماعندك خيار ثاني غير هالحل.. لأن قاضي المحكمة الشرعية بيطالب بنفس الحكم بعد لو القضية تحولت للمحكمة.. الي هو تتزوج هالإنسانه.. جابر اشتعل من الغيض: شووووووووو.. انت شو تقول.. تباني اخذ وحده بايعه نفسها.. دخيلك هاي وين مال زواج.. وين الواحد يأمنها على بيت وعيال.. تعرف يعني شو زوااااج.. مب لعب هذا.. سهيل: وانت يوم انك قدرت تفرق بين اللعب والزواج.. شلك تقص على بنات الخلق وتسحبهن في شقق وتسوي مشاكل.. تتوقع كل مره الله بيسترها عليك ومابتنفضح ويا البنت.. احمد ربك اني انا كنت اخو البنت الي انفضحت.. لو واحد ثاني جان ذبحك انت ووياها.. واتخسي تنطق وتمنعني.. القضية فيها شرف وماكنت بفكر لا في عواقب السجن ولا غيره.. بس الناس الي وقفوا وياي وماقصرو قدروا يهدوني .. ورضيت بحل يرضي ربنا والطرفين.. جابر ساكت لأن فعلاً كان الفترة الي طافت خايف يطلع من بيته يلقى سهيل يترياه.. كان كل يوم يطل من غرفته ويشوف برع اذا سهيل واقف برع يترياه او شي.. ماينسى قبضة سهيل القوية الي ماقدر يفلت عنها بسهولة في الشقة لولا محمد سحبه.. جابر: خلوني افكر وبرد عليكم الضابط: اقولك .. تتحرانا ياييين خاطبينك البيت ونترجاك عشان تقول بفكر.. عندك شي قوله في هاللحظة.. وكون ريال قد كلمتك.. جان موافق على الزواج .. خلنا نحل القضية بشكل ودي ومحد يدري بالموضوع.. ونستر على الأطراف كلها.. تبا القضية تكبر وترفض الزواج.. بتتحول السالفة للمحكمة وقتها عاد بنشوف المحكمة شو بتقضي وبتحكم عليكم جابر: بس مابا هلي يدرون ليش انا بتزوج هالإنسانه الضابط: محد بيقول لهلك.. الي فهمته انك موافق وبتخطب البنت عساس اي خطبة طبيعيه ثانيه.. لكن هلك مايدرون بحقيقة الزواج هذا جابر: هيه نعم سهيل: اسمح لي حضرة الضابط انا شو يضمني ان الريال فعلاً يملج عليها ومايشرد.. الضابط: سمعت رمسة الريال شو ردك.. جابر حس بمسؤولية كل كلمة يقولها... وان الموضوع جاد فعلاً.. صد صوب سهيل ويطالع بنظرة جادة: كلمة رياييل.. فرح سهيل في داخله ان هم وبينزاح عنه قريب.. : خلاص انا اعتمدها.. الضابط: حط في بالك يا جابر.. كل كلمة قلتها ان مسؤول عنها.. وهني مكان رسمي يعني ماتقدر تلف وتدور.. وراح اتواجد يوم الخطبة الرسمي عشان اتأكد من سير الأمور.. سهيل: بس مانقدر الفترة الحالية عشان وفاة الوالدة الله يغفر لها ويرحمها.. الكل: آمين سهيل: فيعني الموضوع خلوه يتأجل شهر تقريباً لين ماتهدأ اوضاع البيت من وفاة الوالدة.. جابر: وانا في هالفتره بكون قدرت افهم هلي الضابط: خلاص .. حلاته يوم تطلع القضية من عندنا وهي محلولة بهالطريقة الودية.. نعتمد ورجاء وقعوا على هالأوراق تقربوا من مكتب الضابط ووقعوا على الأوراق المطلوبة وكلن طلع من المكتب في باله اشيا مب عارف شو نهايتها =-=-=-=-= في بيت بوعبيد مجد: انتي هبله ولا تستهبلين.. اقولج ابا جاهي بالنعناع تييبين لي جاهي خالي.. البشكاره: سوري مدام والله نسيت.. سوري.. مجد مشت صوب البشكارة ويودتها من شعرها ويلست تير شعرها: انتي غبيه ولا تستغبين علي.. اقولج ابا جاااااهي بالنعناع.. كم بنيلس نعلم فيج.. غبية انتي غبيه.. يلست البشكارة تصيح وتصارخ في المطبخ.. سمعها أحمد وربع صوب المطبخ ويود مجد من ايدها وسحبها: مينونه انتي.. مجد من شافت مجد كأنها شافت يني يدامها.. نشن زيارينها كلهم.. : انت كيف تتجرأ وتمسك إيدي؟ أحمد: وانتي كيف تتجرأين وتمدين ايدج على البشكارة.. مب حرام عليج.. مينونه انتي.. مجد: بخبرك إنت شو فاكر عمرك؟؟ شو تتحرى عمرك عشان تمد ايدك علي وتصارخ ؟؟ مايخصك فيه فاهم.. شي بيني وبين الخدامة انت اشلك تدخل عصّك بشي ما يخصّك.. أحمد: اقولج انتي على شو شايفة عمرج علي؟؟ هااا خبريني؟؟ شو هالمعاملة الي تعامليني فيها؟؟ تحريني خادم عندج ولا بشكار؟؟ اقولج اصحي انا ولد عمج فاهمه.. وحسني رمستج لا اييج شي ماترضينه.. مجد: واااااااااااي خوفتني تدري.. دخلت عليهم مروه وهي تشوف هالحاله استغربت.. : أحمد اطلع برع شوي.. أحمد احترم رمسة اخته وطلع .. وهو مقهور حدّه.. هاااااي اكيد استخفت.. مروه: مجد شو بلاج؟؟ شو هالحشرة الي اسمعها منج؟؟ اول مره اشوفج جي.. مجد من شافت مروه مالقت عمرها الا طايحة في حضنها ويالسه تصيح.. : مروه مادري بلاني مستوية عصبيه والله احس اني بختنق بمووووت.. تمت تمسح مروه على راس مجد وتخفف عليها.. صدت مجد صوب الخدامه: سوري حبيبتي والله ماكان قصدي .. البشكارة: ماعليه انا اعرف انتي وايد زييين وايد حبي مشان أنا.. بس مشان مدام هوور انتي في شوي تعبان.. مروه: صدقها .. انتي حالة حور مأثرة فيج وايد.. قومي ندخل داخل البيت وريحي شوي عشان تهدأ أعصابج.. دخلت مجد البيت وهي منهارة حدها.. وعلى طول فرت عمرها على سرير مروه ومن التعب رقدت.. وطلعت مروه من عندها وسارت غرفة أحمد.. مروه: أحمد ممكن ادخل.. اطالعها احمد ونزل راسه: ادخلي اختي.. مروه: احمد لا تزعل من بنت عمك اعذرها على الحاله الي هيه فيها.. تعرف موضوع حور مأثر علينا كلها ومجد أكثر وحده متأثرة فينا.. أحمد: ماعليه ماقلنا شي.. بس شوي تثمن رمستها.. نحن كلنا زعلانين عشان حور مب بس هيه.. مروه: ماعليه اخويه اعذرها أحمد ابتسم لها وطلعت مروه من عنده مرتاحة ومتضايقة في نفس الوقت من الأحداث الي صايره عندهم في البيت =-=-=-=-=-=-= همسة: اسمحوا لي ماراح اوصف حالات البقية في القصة عشان مايسود الحزن على القصة وتستوي كئيبة.. بس اكيد انتو متصورين حالة الكل شو بتكون عشان حور.. راح تمضي الأيام ليوم قبل حفلة ملجة سلطان وشما -=-=-=-=-=-=-=-=-=-=- واقفه تتطالع عمرها في المنظرة.. واقف وراها ويطالعها ومبتسم.. حور: عبيد احس تحت عيوني وايد اسودن.. وغير اثار الأدوية مخلية شعري مستوي خفيف... ومصفرة.. عبيد: وين انا ماشوف غير احلى ويه مورد شفته في حياتي.. حور: عبيد لاتيلس اتجامل وايد.. وين ويه مورد انت شوف قرب.. تقربت منه حور : شوف تحت عيني كيف مسود.. وشوف عظمة ويهي ظاهرة.. ضعفانه .. عبيد: لا تيلسين تتوهمين انتي احلى وارق انسانه في قلبي بعد شو فيج.. حور تتطالع: افففففففف انت كله اتجامل.. انزين ماراويتك الفستان الي بلبسه باجر للملجة.. عبيد: وينه خل اشوفه.. طلعت حور الفستان من الكبت .. لونه اخضر غامج.. فيه تطريز بسيط بالفضي.. وكريستالات متوزعه.. كان شكلة أنيق وايد وحلو... خذته جاهز من محل في وافي.. عبيد: احسج بتظهرين عروس بهالفستان حور: بس تعرف بطني الي بيخرب.. عبيد: بالعكس احسج محلوة وااااايد بهالكرووشه. حور: هههههههه قص علي انت .. عبيد: اوووووووه شو فيج انتي كل ما قلت شي تقولين قص علي.. حور: فديييت هالبوز يوم يزعل... عبيد كان وده يصيح بس ميود حزنه يدامها.. الكل كان يستعد بس مو من خاطره.. كل شخص في قلبه هم مب قادر يحكيه للثاني.. كلن حزين على حاله.. ومب عارف الأيام شو تخبي له.. كلن يرقد على فراشه ويفكر ياترى باجر بيكون شرات اليوم.. او احسن من اليوم... ... ... ... ... يوم الحفلة .. مجد: اخبرج انتي متأكده ان اليوم ملجة شما وسلطان؟ حور: هههه ليش؟ مجد: اشوفج مستويه عروس.. حور: فديتني دوم في عين ريلي عروس.. مجد ابتسمت بس من ورا خاطرها.. وانا شو بكون في عين عبيد.. اااه ليش افكر في هالشي اصلا.. ومشوا عسب يروحون صوب الصاله الي حجزوها للحفلة.. .. هزاع كان متضايق حده اليوم.. يكفي انه من يومين بس فقد شما نهائياً يوم ملجوبهم في المحكمة.. واليوم حفلتهم.. تم يتمشى صوب البحر وهو يفكر في نفسه وفي حياته وفي كل شي صار له الفتره الي طافت.. شاف نفسه كيف تغير خلال هالفتره الي سكن فيها عند البيت الي استقبله في عز حاجته.. ---- : تعرف انت شو مشكلتك بالضبط.؟؟ تنسى الناس الي يهتمون بك.. وأخر شي تلقى نفسك وحيد.. استغرب هزاع من الصوت الي سمعه.. صد وراه شاف وحده واقفه على الحاجز الي عند الكورنيش ومجابلة البحر.. كانت حرمة متغطية من راسها.. مايبين غير عيونها.. هزاع: انتي الي رمستيني توه.. مشت عنه ولا عطته مجال.. وراحت صوب عايلة يالسة وانتبه لياهل صغيره من شافت هالحرمه ربعت صوبها .. كأن هالياهل امها.. ماقدر يستوعب.. يبا يفهم منو هاي.. وشو الي صاير.. غمض عيونه ورفع راسه وتنهد ورد فتحن وفز.. : الله يغربك ابليسج زيغتيني.. مها: هههههه اعتقد ألحين لازم نكون في الصالة مب هني.. هزاع: انتي الي توج رمستيني.. مها: تعال ويايه ماشي وقت.. ترجيت زايد اييبني البحر عشان ايرك واييبك العرس.. لأني اعرف انك مب ناوي تحضر.. وهزاع: وانتي ليش قلتي الرمسة الي قلتيها توه شو تقصدين.. مها: انت فاهم قصدي بالضبط شو اطري.. تحيد منال.. هزاع استغرب.. شو الي صاير.. منال.. شو ياب طاريها في هاللحظة: شو بلاها منال.. مها: منال رابع واحد يخطبها وترفضه.. وتعال امشي ويياي مب وقته هالكلام.. مشى هزاع وراها وهو يحاول يجمع افكاره.. ويسترجع منال .. هاي بنت عمه الي خطبها وفي ايام الخطوبة فسخ الخطبة قبل الملجة.. بدون سبب.. انهارت منال وتعرضت لصدمة نفسية على اثرها تمت تتعالج.. كانت صغيره في العمر 18 سنه بس.. لكن للحين متعلقه فيه.. مرت على هالسالفه جريب ال4 سنين.. معقولة منال بعدها تفكر فيني؟؟ وركب الموتر ونسى حتى انه مبركن موتره عند الكورنيش.. زايد: شو يايبنك هني؟ هزاع: اشم هوى.. زايد: هههههه والله انك حركات .. وراحوا صوب الصاله الي كانت زحمه .. حريم داخلات الصاله ويلسمن .. ودخلت وراهن مها.. الي كل من يشوفها يتحسبها ياهل.. شكلها كيوووت وصغيره.. كانت منال موجودة في الحفلة.. (بنت خالتهم).. مها من شافت منال بسرعه راحت صوبها.. : هلا والله بهالويه وينج يالقاطعه منال: جب انا قاطعه ولا انتي من ملجتي تخققتي علي ونسيتيني مها: افا والله ماعاش من ينساج .. مرت الليله حلوة وهادية على الكل.. كانت العروس طالعه جميله ببساطة فستانها الوردي ومكياجها الهادي.. كانت مسويه تسريحة شنيون.. وطالعه جدا أنيقه.. دخل سلطان ومعاه عمّار وبوهزاع.. داخل وهو مبتسم ومطمّن لحياته .. الله رزقه ببنت مؤمنه وتخاف الله .. ويقدر يأمنها على بيته وعياله.. انسانه شرات شما يقدر الواحد يسلمها حياته وهو مطمن عليها.. الكل ارتبش.. خصوصاً خلود.. كان الود ودها تقضي الوقت كله ترقص لأخوها .. بس ماخلتها أمها لأن عقب العرس ب5 أيام راح يكون عرسها.. خلود: شو صاير حرقت تليفوني؟؟ جاسم: خلوودوو مستعيل ماصدق ان باقي 5 ايام معقوله.. خلود: هههههه ليش مب معقولة.. جاسم: مادري جي احساس حلو.. خلود: بس تعرف جاسم انا خايفه.. شكل حور اليوم أبد ماطمني.. كل شوي اشوفها تروح الحمام وترد وويها مصفر .. خايفه وايد جاسم: لا لا ان شاء الله مايكون فيها الا العافيه .. خلوها ترتاح لا تتعب وايد خلود: هذا الي بوصي عليه.. ... ... ... من تفرغ الكل من ملجة سلطان.. تفرغ الكل لتحضيرات عرس خلود وجاسم.. الكل متملكنه خوف لأن حالة حور مب طبيعيه.. قاعد يزيد التعب عليها ويبين على ويهها.. نوره: تعرفين خلود .. خلود: هلا.. نوره: حاسه في عبيد والله.. فراق احد الزوجين لبعض وايد صعب.. خلود: دخيلج نوره دخيلج.. خلينا نفرح شوي.. يكفينا.. عرسي بعد يومين.. وانتو كل رمستكم حور وحور.. نسيتوني انا.. انا العروس الي لازم تستانسون لي.. هالفتره الي مضت كله مشاكل وحزن وكآبه خلاص مو قادرين نتحمل.. خلونا ننسى شوي ونعيش اليوم بيومه.. نوره تقربت من اختها وحبتها وشلت الطرحة وحطتها على راسها: تدرين محد محلي الطرحة غيرج... خلود حضنت اختها ويلست تصيح.. نوره: لا احين الطرحة أحلى منج.. ابتسمت خلود ودش عليهم علاوي مشتط علي: وانتي ليش ماتاخذين لي بشت على قياسي مايخصني ابا البس بشت خلود: انا هالولد بييب لي جلطة في يوم من الأيام.. انت دووم جي دفش لا احم ولا دستور.. تدخل جي عرض علي: اختصر وقت.. انزين شو قلتي عن البشت نوره: افا عليك انت بس.. شيخ الرياييل ناخذ لك ليش لا.. علي: هيه جي اباكم وفجأة سمعوا صوت واحد صغير ثاني على عمر علي.. ----: تعال يلا خلنا نلعب دور ثاني سوا.. علي: اوكيي.. خلود ونوره اطالعو بعض ويلسوا يضحكون.. خلود: توه سامت ومسوي عمره والحين يبا يلعب نوره: الله يحفظه ويبلغنا فيه معرس.. خلود: أمين يارب.. انزين نشي خل نسير عشان الحنايات بيوصلن ونتحنى.. وصلت الحناية من صالون قمر.. وحنت العروس والبنات كلهم.. ماكنو متحنيات على ملجة سلطان.. حور بعد يت وتحنت وياهم.. بس ماكانت قادره اتم يالسه زود .. بسرعه غسلت ايدها.. مجد: ليييييش بعده مانشف؟ حور: أدري بس ظهري يعورني ماروم.. مجد: قلت لج انتي حامل ومب زين لج القعدة وايد قلتي لا لازم اتحنى حور ابتسمت لها وتحس بآلام في بطنها.. بس يودت عمرها عشان ماتخرب الفرحة وهي تشوف الكل يتحنى ويسولف ويضحك.. وهي الي تتألم.. بس فرحة العرس كانت مهونتنها عن الألم .. جاسم كان مشغول يودي خواته الصوالين والتوصيلات والإتصالات.. مليون شي على راسه وهو المعرس مسكين.. أحمد: ههههه شو بلاك يا ريال مهدود حيلك.. جاسم: لو الله معطني اخو جان ساندني في هالأيام.. اما انا الي قايم بأشغال البيت كله.. مب عرس هذا هد حيلي.. اقولك شي لا تعرس.. أحمد: ههههه لا بويه انا بعرس مابتريا شورك جاسم: طاع.. ماعليه احين مب فايج ارد عليك.. أحمد: هههههههه هيه والله يبا يستانس بالعرس ونحن مايبانا نستانس شو هالناس الأنانيه ابتسم له جاسم وسار يسلم على الرياييل الي داشين الصاله .. وماشاء الله الكل مرتبش وكانو ياييبين فرقة الحربيه عسب يرزفون .. .. همسة: الصورة مو واضحة أدري وذلك لأسباب خاصه شوي لعبت في الصورة .. اما عند الحريم جو الصالة كان ربشه صدق.. الإضائة .. وألوان الفساتين.. والكريستالات.. والصالة والكوشه كااااان رووووعه المكان.. كل من دخل ينبهر بجمال وترتيب المكان.. دخلت خلود وكانت رووووعه بالفستان الأبيض وحناها الرقيق.. على انغام موسيقى كلاسيكيه.. الكل يطالعها ويقرا عليها عن العين .. لأنها كانت طالعه مختلفه تماما عن ملجة سلطان الي يشوفها مايقول هي نفسها الي شافوها في ملجة سلطان يوم أقبلت أحلى عروس صابت الصاله سكون عم الهدوء كل المكان والكل يناظر زينها الناس من كثر الجمال ماهي مصدقه العيون يحسبون أنها ملاك يوم رمشت فيعينها لولا خوفها على الحضور يصيبهم عشق الجنون كآن ضحكت بشفاتها أوأشرت بيدينها منى: الله رووووووعه كلمات القصيدة الي قالوها مع الموسيقى فطوم يلست تتطالع منى بنص عين: انتي بس هذا الي همج في العرس كله.. انتي شوفي مرت اخونا اشحلاتها منى: ادري انها حلوة بس انتي سمعتي شو قال.. قال.. يوم أقبلت أحلى عروس صابـ... سكتتها فطوم وامهم تتطالعهم وتضحك.. ام جاسم: متى ربي يبلغني فيج عروس يارب.. فطوم وهي تبتسم بخجل.. وفي خاطرها.. بس يغير طابعه وياي ويصير شرات ما اتمناه.. الله يهديه.. وارتبش الكل في العرس لحين دخلة المعرس.. حور كانت تحس بتعب اكثر من قبل في هاليوم والسبب انها مارقدت عدل وكل تشتغل وياهم لتجهيزات العرس الي خذ من جهدها اكثر.. ........ .. بعد يومين من عرس خلود وجاسم . مجد: وانت ليش ماتقولنا؟؟ عبيد: شو اقولكم؟؟ مادري شو صار فيها فجأة.. انجلبت حالتها وطاحت علينا وانا ماعرفت كيف اوصلها المستشفى.. مجد: والله ان صار في اختي شي واقسم بالله.. يودها عبد العزيز ويلسها: بس عاد .. شو هالرمسه.. دخلت خلود المستشفى شرات المينونه اتدور عليهم.. من شافت مجد ربعت صوبها: ها شو الأخبار.. مجد وهي تصارخ: ماااادري مااادري.. دخلوها غرفة العمليات.. يقولون ولادة مبكرة.. خلود صدت تتطالع جاسم وودها تصيح.. تقرب منها: هدي نفسج حبيبتي ان شاء الله كل خير.. قولي يارب انتي بس.. خلود: الله يعينج يابنت عمي ويسهل عليج جلثم كانت اكثر مره في حياتها هادية وساكته... ميودة المسباح وتسبح وتدعي.. ولطيفة لاويه على عبدالعزيز وتصيح وحالتها حالها.. ومجد واقفه عند باب غرفة العمليات ومتساندة على اليدار وتدعي.. وعبيد رايح راد صوب الفتحة الزجاجية يتريا حد يمر او يخطف عشان يسأل عن مرته.. بس ماشي فايدة.. الكل في حالة توتر.. وساير راد صوب الغرفه والي يهدي الثاني ويهون عليه.. ومر الوقت على الكل شرات السم... بس الي يكون تأثيره بطيئ على الجسم .. كلن يحس بألم ومب قادر يقول آه.... طلعت الدكتوره وهي تبتسم.. كانت اول بشارة خير يشوفونها بس بعده الخوف موجود الكل تقرب وتيمع حوالين الدكتوره يبون يسمعونها شو بتقول.. عبيد: شو .. قاطعته مجد: وينها اختي؟؟ الدكتوره: الحمد لله على سلامة المدام.. الله رزقها ببنت زي القمر بس لأنها ولدت في السابع راح نخلي البيبي كمان اسبوعين او ثلاثه في الغرفة الزجاجية مشان النمو.. مجد: انتي بلاج تستهبلين.. انقولج اختي.. يعني مدام حووور الدكتورة سكتت يوم سمعت اسم حور... مجد تقربت من الدكتورة ويودتها: وبعدين يعني مابتنطقين تقربت خلود وسحبت مجد شوي بعيد.. الدكتوره: المريضه بخير بس المرض متعبنها وايد .. خلوها ترتاح كمان ساعتين في الملاحظة عندنا وبعدين راح ننقلها للجناح فوق الكل سكت ... كأن الدكتورة تقولهم ان حور خلاص بدأ المرض ينفيها من الوجود.. حور مابقى لها وايد... عبيد: والجنين وينه نبا نشوفه؟؟ الدكتورة: راح يطلعونها ألحين ويودونها الحضانه فوق.. ومشت عنهم الدكتورة وراحت .. والكل يتريا باب الغرفة ينفتح تطلع فيه الملاك الصغير.. وانفتح الباب وطلعت الممرضه وهي تجر معاها سرير الصغيرونه والكل يطالعها ويبتسم .. سبحان الله النور طالع من هالبنت وروعه.. مجد نزلت دمعتها يوم شافت البيبي من فرحتها.. الكل تم يمشي مع السرير ويروحون صوب الحضانه كانو مغطين عيون البنوته عشان بوصفار الي فيها وحطوها تحت الجهاز الخاص بهالشي .. .. .. .. .. . جابر وهو يعقّم (أي انه يسكر فصم كندورته) كندورته.. تقربت منه جواهر جواهر وهي تبتسم: خلني انا بعقمهن لك.. جابر مسك ايدها ودزها بعيد: لا تتقربين مني كم مره اقولج جواهر والدمعه في عينها: جابر بس انا مرتك ألحين.. جابر: عمرج ماكنتي ولا بتكونين.. مرتي بالإسم بس.. وانتي تعرفين اتفاقنا ما اقرب منج لحين ماتمر فتره ونطلق وينتهي الموضوع جواهر: بس .. جابر يقاطعها: لا بس ولا شي.. تحملي الي ييج لأنج تستاهلين جواهر: عبيد انا صح الي سويته غلط .. بس الله الشاهد ماغلطت هالغلطة مع غيرك من يومي وكنت معاك انـ.. طلع جابر من الغرفه وبند الباب وراه.. انقهرت جواهر ويلست تصيح.. دخلت عليها عمتها: شو بلاج امييه.. ليش طلع جابر معصّب من الغرفة جواهر مسحت دموعها: ها لا ماشي .. خلاف بسيط.. وتذكرت امايه من جي صحت ام جابر: افا عليج وانا وين سرت مب انا امج.. جواهر حضنت ام جابر وتمت تصيح من الخاطر.. ليتج امي جان رمت اقولج الي انا فيه .. اشاورج فيه.. لا اخو يسمع لي..ولا ابو.. ولا ريل.. من لي غير ربي في هالدنيا.. يااااااارب .. .. ركب جابر موتر ربيعه وتحركوا.. حسن: شو بلاك ياريال شايل هموم الدنيا ع راسك وياي.. جابر: حسن الله يخليك الي فيني كافيني لا تزيدني.. قم حرك صوب المزرعه ابا اسير استانس شوي حسن: انت ماكفتك المصيبة الي صارت لك وبعدك تبا تروح هالأماكن جابر: اسمع انت منو يرمس.. حسوووون نسيت انت الي كنت تشجعنا حسن: هيه مانسيت.. بس من يوم ما الله رزقني بهالبنت والله اني قمت اخاف عليها.. وكل شي كنت اسويه في بنات الناس قمت اتخيله فيها.. والحمدلله ودرت عني طلعات المزارع هاي جابر: انت ودرت برايك ابويه .. انا ماودرت وصلني وخلاف سير وين ماتبا.. حسن: جابر انت ريال معرس وكلها فتره والله بيرزقك في ياهل ان شاء الله جابر: هههههههههههه ثرك يا ريال ماتعرف شي .. اسكت الله يخليك حسن: لا حول ولا قوة إلا بالله .. شو السالفة؟ جابر: ياخي من يوم ماخذتها ماهبشتها (مسكتها او لمستها) كيف بتييب عيال .. حسن: وليش ان شاء الله هب حرمتك هاي؟؟ اما انت امرك عجيب.. يوم كان بالحرام كنت كل يوم تراكض لها عشان اتييك ويوم يتك مابغيتها جابر: للعب منو مايباها حتى انت يمكن كنت تباها.. فتح حسن عيونه وهو يسمع رمسة جابر وماحس بعمره الا ريله على البريك فجأة يوقف.. جابر: شو بلاك بتموتنا وياك حسن: انت سمعت الرمسة الي قلتها.. تراك ترمس عن عرضك حرمتك.. جابر: حرمت عيشتها يارب.. حسن دخيلك بلا فلسفة زايدة.. انت تدري بالظروف الي خلتني اخذها.. لو ما اني واثق فيك جان ماخليتك انت الي تشهد على زواجي لأني اعرفك مابتقول لحد حسن: جابر انتوا الإثنين غلطتوا وتحملو قيمة غلطتكم خلاص.. هاي حرمتك وصدقني يمكن هالزواج فيه خير انت ماتعلم به.. كل شي صار بإرادة ربك.. ياما بنات ظهرت وياهن..ليش هاي بالذات من بين الكل صارت لك المشكلة وياها.. اكيد في شي ربك رايدنه انت ماتعرف به جابر: اخبرك زين انك وقفت بنزل من الموتر ابرك لي.. نزل من الموتر ولا عطى مجال لحسن انه يرمس.. وحسن كان محرج وايد من رمسة ربيعه وتصرفه.. رد البيت والضيجة فيه من الي صار.. وجابر تم يمشي صوب بيتهم.. وصد وراه شاف موتر حسن مو موجود.. تضايق.. حسن ربيعه من ايام المدارس .. وعمرهم ماتفارقوا وفي كل شي كانو سوى.. واليوم.. صار الي صار وراح عنه زعلان.. دومه اذا زعل منه حسن ماتمضي دقايق الا وهم يتراضون.. يعرف ان محد يخاف عليه كثر ما حسن يخاف عليه.. تلوم من عمره.. كانت رمسة حسن في اذنه طول ماهو ماشي صوب البيت.. ودخل البيت امه استغربت ام جابر: ماشاء الله رديت من وقت جابر: لا بس حسيت عمري تعبان قلت لحسن ردني البيت ام جابر: شو بلاكم اليوم.. انت وحرمتك شي فيكم جابر: اوهوووووووو مافينا شي.. ومشى صوب غرفته .. ام جابر استغربت.. لا اكيد في شي خاشينه علي .. بس مصيره بينكشف جابر دخل الغرفه وشاف جواهر ترمس في التليفون.. سحب عنها التليفون..: ترمسين منو.. جواهر تتطالعه: ارمس اختي.. جابر شل التليفون: الووو.. الوووو اخت جواهر: الوو جابر: منو انتي.. همسة : نسيت اسم اخت جواهر ولضيق الوقت ماقدرت اراجع جميلة: انا اخت جواهر.. جمووول.. جابر: اشحالج؟؟ جميلة بخوف: بخير الحمد لله.. جابر: يالله مع السلامه وفر التليفون على جواهر ودخل الحمام.. جواهر: برمسج عقب باي باي جميله: ريلج هذا الله يعينج عليه.. جواهر: شو بتقولين كل يوم على هالحاله.. جميله: ربج بيفرجها ان شاء الله .. كل يوم ادعي لج ياختي.. جواهر: الله يسمع منج ..مع السلامه .. سلمي على سهيل وابويه جميله: يبلغ حطي بالج ع عمرج .. مع السلامه بندت جواهر الخط وتنهدت.. : يااااارب محد يسمعني غيرك.. غلطت وعزتك وجلالك ياربي اني ندمانه واستاهل كل الي يصيرلي.. احمدك واشكرك يارب على كل حال.. نشت من مكانها وسارت طلعت ثياب ريلها وحطتهن على السرير وعطرتهن بعطره الي يحبه. وطلعت من الغرفه.. طلع جابر من الحمام استغرب يوم شافها محد.. صد يطالع وين تليفونها .. شافه على الطاوله.. ليش اهتم يوم اني ماباها ولا اعتبرها زوجة.. ماعندي سالفه.. توه بيمشي صوب الكبت انتبه على ثيابه على السرير شلهن ولبسهن.. وحس بريحة العطر فرش.. يعني توه معطرين ثيابه.. ابتسم وسرح شوي.. وبسرعه تدارك احساسه وطلع من الغرفه وراح صوب غرفة اخوه.. كانت جواهر قاعدة في الصالة.. مانتبه عليها جابر.. كانت تتوقع يقولها مشكورة او شي.. تنهدت.. : صبرك يارب.. .. .. .. .. اليوم الثاني من الصبح الكل في غرفة حور.. متيمعين حواليها.. الأجهزة مركبة عليها.. كان لونها متغير والتعب ظاهر عليها.. الدكتور رمس عبيد وقاله ان حالته صعبه وايد.. لأن المرض مبين متمكن منها.. وفي اي وقت ممكن انها تموت.. تضايق عبيد لكنه كان يعرف ان هالواقع الي كان الكل جازم عليه من عرفوا بحالتها .. يمكن هالشي الي مخلنه يصبر شي.. وجود بنته سليمة عطاه دافع اكبر انه يرتاح شوي.. فتحت عيونها وتدور حوالينها .. كأنها تبا تشوف شخص مب فالغرفه.. الكل تقرب منها لكن بعدها تدور على شي مفقود.. مجد وهي ميودة عمرها: اكيد تبا تشوف البنت.. بسرعه راح عبيد وطلب من الممرضات اييبون البنت الصغيره .. من يابو البنت ابتسمت حور لكن بألم.. قربوها وحضنت البنت ودمعت عينها ويلست تصيح.. الكل تأثر وماتحمل الموقف والي طلع من الغرفة.. الا عبيد ومجد ولطيفه وجلثم.. حور كان لسانها ثجيل ماتقدر ترمس عدل.. بس بطريقة ما أشرت لعبيد ومجد انهم يتقربون منها على جهة وحده من السرير واشرت لهم يشلون البنت.. شلت مجد البنت..وتمت تتطالعهم حور كأنها تقول هاي بنتكم من اليوم.. جلثم فهمت الي صاير.. مهما كان لها خبره في الحياة وهالامور تقدر تفهمها بسرعه.. ولطيفه تفاجئت.. حركت حور صبوعها تدور على ايد عبيد .. وعبيد بسرعه قرب ايده وضمها.. متضايق من خاطره وحرقه في صدره بس مب قادر يقول او يسوي شي.. وابتسمت لهم حور.. ومحد حس انها كانت اخر ابتسامه لها.. من بعد هالإبتسامه بوقت قصير بدت اتيي تشجنات غير طبيعيه لحور.. الكل فز.. ومجد صرخت.. ان البنوته يلست تصيح من الزيغه.. دخلت الممرضه وشلت الياهل وطلبوا الدكاتره.. كانت حركة الممرضات والدكاترة صوب غرفة حور سريعه.. الكل حس ان في شي صاير.. مجد: حووور.. حور لا تروحين.. حور لالالااااا.. يالخاييييييييييييييييينه لا تسوين هالحركات.. ادريبج تقصين علينا قولي شييي.. انطقي.. ولطيفه تصارخ وتكفخ عمرها.. راح عبيد صوب عمته ويودها وطلعها من الغرفه.. وجلثم تقربت من مجد ويودتها وطلعت وياها.. جلثم انسانه قوية.. شافت من قبل وفاة زوجها يدامها وصمدت.. صح ان اليوم حفيدتها تموت يدام عينها بس ايمانها بربها قوي.. وهالشي الي مصبرنها .. همسة: ماراح أوصف اكثر.. اعتقد بهالطريقة يكفي وصلت لكم فكرة وفاة حور... لأن الحزن شي صعب على الفرد انه يتحمله او حتى يتخيله.. ربي يجعل حياتكم كلها أفراح يارب .. .. .. .. .. بعد 3 أيام من العزا.. كانت مجد يومياً تروح المستشفى عند البيبي.. في يوم سارت فيه هناك.. شافت أحمد واقف يطالع البيبي من خلف زجاج الحضانه قلبها يودها بس تمالكت شعورها ومشت ودخلت الحضانه.. استغرب أحمد كيف مجد تشوفه ولا تسلم ولا تقول شي.. ودخل وراها أحمد: اشحالج مجد؟ مجد بدون نفس: بخير.. أحمد: شو قررتوا تسمونها؟ مجد: اتريا ابوها بعدهم ماسموها.. أحمد: وانتي خالتها يعني لج راي بعد في تسميتها.. مجد صدت تتطالعه بعين مليانه دموع ومحمره: انا أمها مب خالتها.. وعبيد أبوها.. وحطت البنت مكانها وطلعت من الغرفه.. كانت هالرمسه شرات الصدمة لأحمد الي ماقدر يستوعبها.. معقولة الكلام الي سمعته.. او الي قاعد افكر فيه الحين معقوله يكون صح.. لا لا.. أكيد هي بعدها مصدومه من وفاة اختها انا متأكد.. لا متأكد مجد ماتقصد شي.. أكيد بتكون ام البنت اصلا.. شي طبيعي.. تراها .. انا بلاني صاير جي مادري كيف.. وتوه بيطلع وايه عبيد يدامه.. أحمد: شفت مجد في دربك.. عبيد: مجد يالسه برع.. أحمد: هيه انا سألتها شو بتسمون البنت ماردت علي.. ماقلت شو بتسميها بإسم مرتك الله يرحمها ولا؟ عبيد: لا بسمها ريم.. أحمد: حلو اسمها.. عبيد شو ناوي تسوي ألحين بتخلي البنت عند منو.. عبيد: عند حرمتي.. استغرب أحمد: شو تقول انت .. اي حرمه.. ؟؟ عبيد: مجد. وقتها استوعب أحمد رمسة مجد وفهم شو كانت تقصد.. بس .. أنا.. والحب.. كل الأمور متخربطة في راسي.. أحمد: بتتزوج مجد؟؟ عبيد: هيه بتزوج مجد.. بس يمر فتره على العزا وراح أرمس ابويه.. عشان يرمس عمي.. أحمد بعده مب مستوعب: ومجد تدري؟ عبيد: هيه متفقين ومجد موافقه ماعندها مانع.. احمد تغصص وطلع من المكان معصب.. ومشى صوب غرفة الإنتظار كانت مجد ترمس تليفون وقتها.. : انتي يوم انج مب قد الحب ولا كلام الحب ولا قد رمستج لا ترمسين وتلعبين بمشاعر غيرج.. اذا انتي عديمة احساس لا تحرين الكل عديم إحساس شراتج.. انسانه بوقاحتج ماشفت في عمري.. كانت غرفة الإنتظار فاضيه ومافيها غير مجد.. الي وقفت تتطالعه متصنمه .. وخلود على الخط تسمع.. أحمد: سمعيني.. هذا اخر يوم تشوفيني فيه.. لأن المكان الي انتي تكونين فيه مابا اجتمع وياج فيه فااااااهمه.. عنلاتج من بنت لا بركتن فييييييج ولا فالساعه الي شفتج فيها.. وطلع من المكان ومجد يلست مكانها تصيح.. خلود: مجد هدي نفسج تلقينه معصب .. مجد: انا استاهل كل الي اييني.. قلت لج خلود مابا احبه.. قلتي لي هذا ولد عمج الي مابتاخذين غيره.. وصار اني باخذ غيره.. باخذ اخوووه فاهمه هالموقف اخوووووه يا خلود اخوووه.. خلود: ماعليج احين تلقينه معصب.. وبعدين مب شرط تاخذين عبيد انتي شو بلاج كم مره افهمج. مجد: وحور.. ووصيتها شووو.. خلود سكتت ماعرفت شو ترد على مجد.. مجد: تبيني اخلي اختي مب مرتاحة في قبرها.. خلود: وانتي شو؟؟ ماترتاحين في حياتج.. تخيلي كيف بتكون حياتج مع عبيد تتصورين هالشي انتي ولا لا؟؟ مجد: بس دخيلج خلود.. .. .. خليفه: بس يا خلود مب حاله هذي.. وانتي متضايقه.. الله يرحمها ترحمي عليها.. خلود: انا باقي لي شهرين لين ما أربي... كان مفروض نربي سوى لأن مواعيدنا تقريباً متقاربة.. خليفه: ترحمي على الحرمة انتي الحين.. خلود : انش احط لك الغدا خليفه: لا اليوم معزومين على الغدا برع خلود: منو الي عازمنا؟ خليفه: عيسى .. بمناسبة حمال سوسن.. خلود: ماشاء الله شو هالأخبار الحلوة.. سوسن حامل ماشاء الله خليفه: انتي شوفي فرحة عيسى بس.. تقولين هو الي حامل مب مرته خلود: هههههههههههه خليفه: هيه جي اباج تضحكين فديت هالويه.. خليفه: فديت روحك والله.. .. .. .. .. .. فطوم: فيصل بس لين متى بتم على هالحاله ويايه.. فيصل: سيري زييييين اي حاله الي ترمسين عنها.. فطوم: فيصل مليت من معاملتك لي.. كل يوم نتضارب.. خلصت الثانويه وقلت بتفرغ لك بس انت ولا تتفرغ لي.. ويوم ترمسني كله تضاربني.. فيصل: شو بلاج انتي ماتفهمين الرمسة.. تعرفين شي.. أنا.. أكــــــــــرهج.. ماحبج يابنت الناس.. فطوم سمعت هالرمسه من الصدمه ماتحملت وطاحت مغمى عليها.. تم فيصل يرمس بس ماترد عليه فطوم.. ماحس إلا بصوت منى تصرخ.. منى: أمييييييييييييه فطوم طاحت .. فيصل بند الخط على طول.. وراح صوب بيت فطوم عشان يشوف شو بلاها.. ركب موتره مسرع بس يوم وصل كانو مودين فطوم المستشفى.. قرر يروح المستشفى.. .. .. فالمستشفى.. جاسم: هالخسيس انا براويه.. شو فاكر نفسه.. ام فطوم ساكته وتتطالع بنتها مب قادره تقول شي لأن منى وياهم وماتعرف شي.. ودها تقول لبنتها هاي نهاية الي مايسمع النصيحة ويركض ورا اللعب والخرابيط.. تحملي يابنتي وتصبري.. جاسم: سمعيني من اليوم وساير تقطعين علاقتج فيه ماترمسينه لين مانشوف لنا صرفه وياه خلود: جاسم.. مب بهالطريقة تنحل الأمور.. جاسم بعصبيه: انتي اسكتي وخليني اتصرف مع هالوغد.. وصل فيصل ودخل الغرفه.. من فتح الباب وشافه جاسم دزه على برع .. يت خلود تلحقهم بس ام جاسم منعته: خليه رياييل يعرفون يتفاهمون ولا تخافين على جاسم مب مال ضرايب ولدي واعرفه .. جاسم: انت وبعدين وياك.. شو الي تباه بالضبط.. ييتنا اونك من خاطرك وجاد ومقتنع انك تباها.. واليوم تقول اكرهج.. ليش يابوي منو الي غصبك تاخذ اختي؟؟ .. ولا منو قالك اختي طايح حظها.. بالنسبه للي صار نسيناه.. كانت مراهقه وعقلت وثمنت غلطتها.. ليش لا يكون انت الله عشان تحاسبها؟؟ ترا ان هي غلطت .. انت غلطت غلطة أكبر.. لعبت بعقل قاصر.. تعرف يعني شو قاصر.. فيصل: انت هدي وخلينا نتفاهم جاسم: شو نتفاهم عليه قولي. في شي نتفاهم فيه؟ فيصل: جاسم افهمني انت ريال وتقدر تفهم.. انا الشك ذابحني.. كله يتهيأ لي انها ترمس غيري.. وانها وانها.. ماحس الا بإيد جاسم تقرب صوب ويهه تصفعه يود فيصل ايده: شوف يا جاسم لو ماعديتك ريال جان ماتعنيت وييت عشان اتفاهم وياك.. جاسم: اسمعني جانك ماتبا اختي ومب واثق فيها .. طلقها ابرك لنا ولها من شرك.. اختي غلطت انا وامي سامحناها.. جانك ماتبا تسامح اختي برايك انا مب بايع اختي لواحد شرواك.. فيصل مشى عنه وراح.. جاسم بصوت عالي: تذكر .. طلقها .. ماعنا غير هالرمسة.. صد اطالعه فيصل وكمل دربه ومليون فكرة في راسه.. كان وده يطمن على فطوم غامضتنه بس منعه جاسم ويحترم رمسة جاسم لأنه لو كان مكانه جان سوى شراته.. .. .. .. .. ميثا: على وين امي.. أحمد: واحد من ربعي في البحرين متصل بي وملزّم علي أييه.. وعاد انا تخرجت الحمد لله وماعندي شي.. ميثا: كم بتم هناك؟ أحمد: مابتأخر وايد .. ليش هالكثر بتشتاقون لي.. ميثا: من بعد الي صار.. قمت اشتاق لكل صغير وكبير ماتحمل بعد حد.. أحمد: أمييه اشحالها عمتي لطيفه؟ ميثا: لطيفه الله يصبرها يارب.. صاكه الباب على عمرها ماتشوف حد ولا ترمس حد.. أحمد: اميي لا تودرونها خلكم وياها.. ويدوو جلثم ميثا: الله يعطينه قوة قلبها.. احسها متضايقه يمكن اكثر عنا كلنا بس قوة قلبها تهون علينا كلنا أحمد: دوم اليدة قلبها على الكل وحنانها يلم الكل.. ميثا: لا تنسى تسلم عليها قبل لا تروح.. أحمد: افا عليج .. وخطف احمد عند ابوه وسلم عليه .. حميد: ماتحتاي بيزات؟ أحمد: لا ابوي انت الخير والبركة.. الخير موجود حميد: احتجت شي قولي بطرش لك.. أحمد: لا ماعليك.. يالله في امان الله وحب راس ابوه وسلم عليه وراح عند يدته في بيت عمه عبدالعزيز.. جلثم: ماعليه يالغاوي بتودرني وبتروح أحمد ابتسم لها: افا بس افا.. وين ساير من بعد الديار.. إلا هي البحرين فرة حصى.. جلثم: ماعليه.. بس تراني يدتك ماتروم تخش علي.. عيونك تقولي انت شارد من شي ماودك تواجهه.. أحمد ارتبك شوي: شارد من شو الله يهديج يدتي.. ساير اتكشت ويا ربعي.. (يتقرب منها يهمس لها) اشوف المزايين جلثم: عنلاتك .. ماعليه انا اراويك.. هنف عليك من ريال.. أحمد: هههههههه افا عليج انتي هني(ويأشر على قلبه) .. جلثم تضحك له: فديتك والله محد يبرد على قلبي الي فيه غيرك.. واليوم بتروح عني.. أحمد: ماعليه احسن عشان اسير هناك واشتاق لج وارجع بسرعه.. جلثم: يعل ربي يحفظك ويييين ماسرت .. صلاتك يا ولدي ماوصيك عليها أحمد: افا عليج.. لا توصين حريص.. انا ساير شي ثاني تامرين به؟؟ بييب لج حلوى ومتاي والي في خاطرج جلثم: وين تو الناس أحمد: امييه باقي على الطياره ساعتين.. خل الحق .. جلثم: سير ربي يحفظك طلع أحمد من غرفة يدته وسلم على عمه عبدالعزيز.. وطلب عمته لطيفه بس عيت انها تطلع له.. ظهر من البيت شافها يالسه في الحديقة.. ركب موتره ولا سوالفها سالفه.. استغربت منه مجد شو يايبنه عندهم.. بس في خاطرها متضايقه من كل شي بس مو عارفه شو تسوي.. دخلت البيت تسأل عن سبب وجود أحمد جلثم: ماشي فديته بيسافر الله يرده بالسلامه.. مجد بصدمة: شووووووو.. وين بيسير.. عبدالعزيز: يقول عند ربعه في البحرين.. مجد ميته قهر .. حتى ماسلم علي.. جلثم تحس بعيالها وتعرف كل شي بنظراتهم اكثر من امهاتهم.. حست ان في شي بين مجد وأحمد.. وفي ضيج صاير ألحين لكنها بعدها مب فاهمه السالفه عدل.. .. توقعاتكم جابر تتوقعون يسمع رمسة ربيعه؟؟ تتوقعون فيصل يطلق فطوم وينفذ رمسة جاسم؟؟ تتوقعون أحمد يرجع؟؟ شو موقف العايلة من زواج عبيد ومجد؟؟ همسة أخيرة: قصة منال بنت خالة هزاع حقيقيه.. مع بعض التغييرات اللازمه فيها[/align] |
[align=right] الجزء الثاني عشر الفصل الثاني =-=-=-=-=-=-=-= مخلص الجزء السابق: (( وفاة حور.. زواج خلود وجاسم.. ملجة سلطان وشما.. زواج جواهر وجابر بأمر من الشرطة لحل الخلاف.. وفاة أم جواهر إثر الصدمة.. سفر أحمد بعد معرفته خبر نية عبيد بالزواج من مجد.. الخلاف بين فطوم وزوجها (فيصل) .. )) =-=-=-=-=-=-= .. مجد: حتى ماسلّم علي تخيلي.. خلود: الله يخليج خلج ساكتة وايد أحسن.. تبينه يسلم عليج وهو يعرف انج بتصيرين مرت اخوه وكان هو في يوم من الأيام يتمناج له.. كبري عقلج يابنت الناس.. مجد: حتى لو عالأقل يسلم... خلود: بس تدرين مادري ليش احس انه مابيرجع.. مجد : كيف يعني مابيرجع.. خلود: تذكرين شو قالج في المستشفى.. هذا اخر يوم تشوفيني فيه.. مجد: بس.. خلود: مادري خلي الأيام تثبت.. انزين وانتي بعدج على رايج بتضحين بنفسج وتاخذين عبيد.. مجد: خلود قلت لج هاي وصية حور ولا يمكن اخذل وصيتها خلود: بس والله حرام.. عبيد اكبر منج بوايد.. وغير جي كان ريل اختج كيف تتخيلين حياتج مع ريل اختج مجد: ماعليه بتعود على هالفكرة صدقيني خلود: والـ.. توها بتكمل رمستها سمعت صرخة .. مجد: شو صار.. خلود بخوف: مادري بسير اشوف شو السالفه.. بدق لج عقب طلعت خلود وسارت الصالة شافت نوره تصيح... تقربت منها : شو بلاج؟؟ نوره: ذبحووووني هالناس.. ليش مايحسون بي .. أنا أم يا ناااااس أم.. ماقدر اصبر عن عيالي.. من امس عيالي عندهم يقولون لي ماشي خليهم عندنا لنهاية الإسبوع ماشبعنا منهم.. خذوا عيالي يومياً قلت ماعليه من حقهم.. بس عاد يخلون عيالي كم يوم وماشوفهم هذا الي مايوز.. خلود تمت ساكتة مب عارفة شو تقول.. دخلت عليهم شيخة.. شيخه: شفيج اميييه.؟؟ شو صاير؟ وقالت خلود السالفة لشيخة.. : لا حول ولا قوة إلا بالله .. ماعليه انا برمس أم فيصل وبتفاهم وياها.. خلود بعصبية: والله شو هالأوادم مايحسون ولا يحشمون .. شيخه: ماعليه انتو هدوا اعماركم انا بتصل فيها وبتفاهم وياها.. ورن تليفون خلود كانت مجد متصله.. مجد: هااا شو السالفه طمنيني.. خلود: ماشي اهل فيصل الله يرحمه.. يلعوزون اختي.. مجد: لا حول ولا قوة إلا بالله.. ونورة شو حالتها ألحين خلود: بخير ياسة امي تهديها.. انزين اقولج جاسم متصل على الخط الثاني شكله وصل لازم اروح مجد: انزين عيل سلمي عليه.. مع السلامه خلود: مع السلامه بندت خلود عن مجد وردت على جاسم الي كان عند الباب يترياها عشان يروحون .. .. .. نزل الجامه يلس يتطالع الشارع برع وهو يسمع هالمقطع من غلاك اتخيلــك دوم ف عيونــي شوف حالي كيف عقبــك مخطــرا لك غلا لك حبفي دمــي مخــزوني يا لزيمــي حتى في نومــي ترا وتبندت الإغنيه .. صد صوب السايق محرج أحمد: وانت ليش تبند الإغنيه ماتشوفني يالس اسمع؟ فواز: شو فيك؟؟ اشوفك ملتهي وماتسمعني قلت اسكر الإغنيه احسن.. أحمد تندم من تصرفه وطبطب على جتف ربيعه يستسمح منه.. فواز: والله يا أحمد لو اني ماعرفك عدل واعرف طبايعك زين مازين.. جان شفتني ماسامحتك بس لأني اعرف ان بالك مو معاي غصبن عنك مو بيدك .. بس صدقني بخليك تنساها.. ياخي خلاص عيش حياتك.. الي مايبانا .. مانباه.. أحمد صد يطالعه وهو سرحان في شي: بس تعرف فواز.. انا قلبي يقولي ان السالفه فيها شي.. ياخي قبل وفاة اختها بشهور قالت لي انها تباني وتحبني كيف مو معقوووول هالتغيير في يوم وليله فواز: ياخي انت ليش مو راضي تقتنع البنت ماتباك خلاص أحمد: شوف يا فواز انا ممكن اصدق لو انها كانت بتاخذ اي واحد ثاني غير عبيد.. اخووووووي.. تعرف يعني شو اخوي.. فواز وقف موتره ونزل وفتح الباب لأحمد: تعال ياريال وخل عنك هذا الكلام.. الشباب يتريونا فالشاليه .. نزل احمد وهو يمشي وسرحان.. ومن شاف الشباب ابتسم لهم وتقرب منهم يسلم.. .. .. .. مجد وهي ماسكه ريم الصغيره وتلاعبها.. جلثم: شوي شوي عالبنت .. هاييل انتوا بنات هاليوم ماتعرفن في اليهال.. مجد: ههههه يدوو اشبلاج عليه من يبت البنت وانتي على كل شي تسوينه اتعلقين.. خليني اتدرب شوي شوي بتعلم كيف اعابل لليهال.. وينها امي بوديلها البنت جلثم: امج بعد تطلع من غرفتها عشان تشوف شي.. سيريلها.. مجد: لا هالمره اكيد غير وبتفتح الباب.. يوم بتسمع صوت هالصغيرونه مابتيود عمرها وبتطلع نشت مجد ومعاها البيبي .. وتمت اليدة يالسه في الصالة مع عبيد وميثا أمه.. عبيد: زين انكم متيمعين هني.. ابا ارمسكم في موضوع.. ميثا: خير امييه شو فيك؟ عبيد: طبعاً ألحين مره على وفاة حور اسبوعين.. وفي شي حور وصتني عليه وانا مستعيل انفذ وصيتها عشان تنام وهي مرتاحة في قبرها.. جلثم: بشو وصتك؟ ميثا منزله راسها وتدمع عينها من تذكرت حور.. عبيد: حور وصتني انا ومجد ان نتزوج من عقبها عشان نربي البنت.. واعتقد اخر يوم لها فالمستشفى لاحظتوا هالشي.. جلثم: عبيد انت تخبلت ولا شو.. انت مثمن الرمسة الي تقولها.. كيف تبا البنت توافق تاخذ ريل اختها ؟؟ ميثا: عبيد انت مقتنع تاخذ مجد؟ عبيد: هيه يا أمي.. انا طول هالفتره افكر فالموضوع بجدية.. ولو ماكنت مقتنع ماشفتوني بستعيل هالكثر.. جلثم: لا يا عبيد هالرمسه ماتيوز.. ميثا: عمتي .. وليش ماتيوز؟؟ تراها بنت عمه واخت مرته الله يرحمها.. هي اولى انها تكون حرمة لولدي وتربي الياهل من اي وحده ثانية غريبة.. جلثم نشت وهي معصبة وشلت برقعها وتساندت على عصاتها: سمعوني هالزواج انا مب موافقه عليه وانتوا بكيفكم.. ومشت صوب غرفتها وهي تهاذي ولا هم فاهمين عليها شو تقول.. ودشت غرفتها ورقعت الباب بقوة.. نزلت لطيفه وفي حضنها ريم الصغيرة ومجد وراها.. لطيفه: شو بلاها أمييه؟ ميثا: خرفت وإقعدت.. اسمعني عبيد ماعليك منها انت شاور اولياء الأمور وتوكل على الله.. عبيد: بس أمي.. ميثا: لا بس ولا شي.. وهاي البنت يدامنا خلنا نسألها.. مجد حست ان الموضوع عن الزواج.. وتضايقت يوم حست ان يدتها معارضة لطيفه: شو الي صاير ممكن افهم؟ ميثا: لطيفه انتي لو دريتي بوصية بنتج الله يغفر لها يارب.. بتنفذينها ولا؟ لطيفه: مايبالها رمسه بنفذها اكيد مجد تمت تتطالع امها ودها تقولها دخيلج اميه لا .. ميثا: عبيد يقول ان حور موصيتنه ومجد انهم يعرسون من عقبها عشان يربون البنت .. لطيفه: وبنتي وين بتلقى واحد احسن من عبيد.. ميثا: قلت لك ماعليك من يدتك وخلك على اولياء امرك.. عيل باجر اتييب لي وحده من هاييل الي ماينعرف لهم راس ولا ريل يربون حفيدتي .. مجد توها بتروح زقرتها ميثا.. ميثا: ماسمعنا رايج يا مجد.. اطالعتهم بنظرة ونزلت راسها: ليش انتوا خليتو الموضوع فيه راي وغيره .. مابقى الا اتييبون المليج ويملج بنا.. وطلعت فوق غرفتها وهي روحها مب عارفة كيف عقت هالرمسة.. وكيف قالتها.. وصعدت وهي تصيح.. عبيد كأنه حس بنغزة إني انا ماباك ولو خذتك تراني باخذك غصبن عني.. وهو ماوده في هالشي لأنه بيعيش مع انسانه العمر كله.. لطيفه: ماعليكم منها تلاقونها زعلانه لأن احرجناها ورمسنا بالموضوع يدامها.. خلوها عليه انا برمسها.. ميثا: خلاص عيل نحن بنترخص وبنخلي البنت عند امها.. (ابتسمت لها) .. وسايره البيت لأني من الصبح في المستشفى يلا اميه عبيد نش خلنا نروح نش عبيد وحب راس لطيفه وسار ولا نطق بأي كلمة .. طول الدرب وهو ساكت مايرمس.. عبيد: اميه اذا البنت مب موافقه لا تجبرونها علي.. ميثا: قالت لك عمتك هذا دلع بناتة وماعليك منها.. رد سكت عبيد ونزل ميثا البيت وراح .. ومايدري وين يدق براسه.. ولا وين يروح.. يحس كل الأمور مشوشة يدامه.. تم يمشي ومالقى نفسه الا فالقصباء.. نزل يتمشى ويرفه عن نفسه شوي.. هناك شاف خلود وجاسم يتمشون.. جاسم: ها شو يايبنك هني؟ عبيد: مادري حسيت نفسي مخنوق قلت اتمشى شوي.. خلود: جاسم يبتوا البنت من المستشفى ولا بعدها؟ عبيد: هيه البنت عند مجد .. خلود تنهدت واطالعت جاسم بنظرة وحس فيها جاسم لأن خلود شرحت له السالفه.. جاسم: تشبه منو؟ عبيد: ماتبين ملامحها بعدها صغيرة.. جاسم: يلا عقبالنا.. خلود ابتسمت.. ومن عقبها توادعوا وراحوا.. خلود: يحليلج يا مجد.. جاسم: وليش انتو ماقلتوا لأحمد عن الوصية.. خلود: هاي العنيدة مجد ماتباه يعرف.. وهو بعد مايعطي الواحد فرصة على طول شرد.. جاسم: من حقه.. تخيلي انتي الموقف.. خلود: اسكت الله يخليك لا ابا اتخيل ولا شي.. انت بس قلت عقبالنا انا يودت قلبي.. جي حسيت بخوف.. جاسم: لا تقولين هالرمسه يا خلود دخيلج.. خلود: انزين خلنا من هالموضوع.. شو الي بتسويه في موضوع فطوم.. جاسم: قلت لج مايبالها رمسه.. تطلق منه يعني تطلق.. خلود: انا بعد اقول جي.. لأن هذا بيتم يشك فيها.. علاقتهم غلط من البداية.. وتبا الصراحة حبيبي ماكان لازم توافق على زواجهم أصلا.. جاسم يلس يطالع خلود بطرف عينه: دخيلج لا تذكريني انا متلوم بإختي أكثر.. خلود: بس .. جاسم: لا بس ولا شي.. قلت لج يطلقون وانتهى الموضوع.. ويكون درس لها ماتنساه طول عمرها.. وفطوم بعدها صغيره والحياة يدامها.. خلود سكتت وكملت دربها صدت وراها شافت عبيد يالس على وحده من الكراسي وسرحان.. : معور قلبي والله بس حتى مجد معورة قلبي.. الله يعينهم.. جاسم: لا تصورين الموضوع يكون سهل على عبيد .. ترا الصعوبة على اثنينهم.. خلود: الله يعين.. .. .. .. لطيفه: يا أميه ليش انتي مب راضية تقتنعين.؟؟ جلثم: انتو ولا حد فيكم فاهم عياله كثر ما انا افهم عيالكم؟؟ حور ماتت الله يرحمها.. ليش اتموتون مجد وياها؟؟ حالها حال اي بنت.. انتي تعرفين انها مابتقدر تسوي حفلة شرات اي بنت في عمرها وتفرح بعرسها .. قلبها مابيطاوعها.. لطيفه: ووصية حور.. جلثم: لطيفه انتي بنتي واقرب وحده لي.. يوم توفى أبو عبدالعزيز .. انتي وقتها كنتي وايد صغيرة فماظني تذكرين.. بغوا ايوزوني أخوه عشان عبدالعزيز مايتربى بعيد عن عينهم.. وكنت وقتها 18 سنه وهالرضيع في حضني.. ماخليتهم يمج ايوزوني اخوه لأني ماقدرت وياهم عمي وقف بيوهم وقال لهم البنت ماتاخذ غير ولدي.. وخذت ابو حميد .. وشوفة عينج بوحميد عامل حميد شرا باقي عياله .. ولا في عمره قصر عليه بشي.. لطيفه: بس أميه هاي وصاة بنتي.. الميت مايرتاح لين ماتنفذ وصيته كيف تبيني اخلي بنتي هب مرتاحة.. جلثم: والله انتو الرمسة ضايعة معاكم.. نشت ومشت وماعطت مجال للطيفه ترمس.. دخل عبدالعزيز البيت ميهود.. سمع صوت الياهل وهي تصيح فز قلبه.. تذكر حور يوم صغيره كيف كانت تصيح.. قلبه انقبض.. : وينها بنتي وينها؟ لطيفه وهي تنادي على ريلها: هني تعال انا فالميلس.. مشى عبدالعزيز صوب الميلس وشاف لطيفه تهز المنز الي حاطين فيه الياهل .. وشل البنت وقعد يبوسها ويحبها ويحضنها.. ولطيفه ادمعت عينها.. وكانت مجد توها يايه وفي إيدها مرضعتها.. هي بعد ادمعت من شافت المنظر هذا يدامها: ابويه عطني اياها خل اشربها الحليب عبدالعزيز: شوي شوي عليها وشلت مجد الياهل ويلست ع صوب وقعدت ترضعها.. يلست لطيفه تتطالع مجد وكيف مهتمه فالبنت.. وصدت صوب عبدالعزيز: تعال اباك في كلمة راس .. عبدالعزيز نش وراها: خير .. لطيفه: كل خير رفعت مجد اطالعتهم بنظرة وردت نزلت راسها.. كأنها عارفة كل شي يدور في هالبيت عنها.. دخلت عليها يدتها الميلس.. وقعدت حذالها.. جلثم: زين انج بروحج بروم ارمسج ع راحتي مجد: خير يدو شو السالفه؟ جلثم: مجد انتي من خاطرج مقتنعه من الي بيسوونه مجد وهي تحاول تهرب من نظرات يدتها لأن عيونها بتفضحها أكيد.. : هيه يدو وليش ماقتنع ترا في النهاية انا لازم اخذ حد من عيال عمومتي... وعبيد ريال ماينعاب بشي .. جلثم: وأحمد بعد ولد عمج واخير لج مجد: يدو احمد بعده صغير مايعرف للحياة عدل .. اما عبيد فاهم ماشاء الله عليه جلثم تطالعها بنص عين وتهز راسها.. : مجد انتي تحريني بنت 18 سنه تقصين علي؟؟ خوزي من يدامي عنلاتج انتي وامج وابوج .. نشت من مكانها معصبة وسارت صوب غرفتها.. حست مجد ان يدتها معارضه وكأنها عارفه باللي بينها وبين أحمد.. بس مابيدها تسوي شي.. لازم ترضى بالواقع المر الي انحطت فيه.. .. .. عبدالعزيز: شوفي يا لطيفه.. لا رايي ولا راي اي حد بيأثر في هالموضوع كثر راي البنت نفسها.. اذا مجد موافقه بطيب خاطر ماعندي مانع.. وان ما وافقت فـ والله محد يقدر يجبر بنتي على شي ماتباه دامي حي.. لطيفه ابتسمت.. : يعني اللي علينا نحن بس نشاور البنت ألحين؟ عبدالعزيز: انا بسير ارمس بنتي بروحي واسمع رايها بإذني عشان اصدق.. لطيفه: زين تسوي نش عبدالعزيز وسار عند مجد الي كانت يالسه عالنت .. عبدالعزيز: أقدر ادخل وأرمس بنتي؟؟ صدت مجد صوب أبوها مبتسمه: هيه أكيد تروم.. بس اششش شوي شوي.. ريم راقدة.. عبدالعزيز: عيل تعالي برع خليني ارمسج براحتي.. مجد نشت وطلعت من الغرفه وقعدوا فالصاله.. وخلت باب الغرفة شوي مفتوح عشان تسمع صوت ريم اذا نشت وصاحت.. عبدالعزيز: مجد حبيبتي انتي بنتي الغاليه الي ماشوف غيرها في هالدنيا.. واليوم امج كلمتني عن موضوع عبيد.. وقلت لها لازم أسمع شور بنتي بإذني واصدق.. اهم شي عندي بنتي تكون موافقه ومقتنعه سرحت مجد للحظة وهي تتذكر أحمد.. وفي هالوقت قطع صوت ريم أفكارها.. ماقدرت وقتها غير انها تقول : ابوي انا مقتنعه .. وعبيد ريال ماينعاب بشي .. يكفي انه ولد عمي.. ونشت سارت الغرفه تشل ريم.. بس عبدالعزيز يحس ببنته ويعرفها.. كانت ترمسه وماتحط عينها بعينه.. كأنها تبا تتهرب من عيون ابوها عشان لا يشوف شي ماتبا حد يعرفه في عيونها.. قلبه يقوله ان هالبنت مو موافقه .. ما ارتاح لردها.. ونزل سار صوب غرفة أمه يشوفها.. عبدالعزيز: ام عبدالعزيز زعلانه يقولون؟ جلثم تتطالعه وعاقده حياتها.. وهي اتطلع برقعها وتحط على الكنبة.. عبدالعزيز تقرب من امه وحب راسها.. جلثم: تحب الكعبة ان شاء الله.. عبدالعزيز: شو بلاج امي.. مب عايبني شكلج اليوم؟ جلثم: عبدالعزيز يا ولدي انت اكثر واحد يخاف على بنته في هالبيت واعرف اشكثر انت تحبها.. ماتعتقد ان الي تسوونه تظلمون البنت به.. ريم مابتربى غير في هالبيت.. ماعلي من عبيد يعرس منو مايبا بس الريم تتربى في بيت يدها .. لكن مانظلم مجد عشان شي حله بإيدنا.. فكّر في بنتك.. كيف بتعيش ويا ريال كان في يوم من الأيام زوج اختها.. عبدالعزيز: بس انا رمستها وتقول انها مقتنعه جلثم: اقولك لو تيلس تقول لكم كلكم مقتنعه وتحلف انا مابصدقها.. بنتي وانا اعرفها اكثر منكم.. برايكم يابوي جانكم تبون تظلمونها بكيفكم.. روح خلني اريح.. عبدالعزيز تلّوم وفي نفس الوقت محتار.. يحس كلام امه صح .. ونظرات مجد تثبت هالكلام.. بس مايبا ان الريم تعيش بعيد عن ابوها.. وده يكون لها اسره وحياة وام وابو.. احتار عبدالعزيز.. وطلع من الغرفه ومليون فكرة في راسه.. .. .. .. .. فطوم: منى عاد عن العبط.. نشي خليني اشوف.. منى: اووووووه خليني الحين ياسه انزل اشعار بعدين بعدين فطوم: لا إله إلا الله.. يا بنت الناس نشي شوي بس بجيك على موقع الوزارة وبشوف متى بتطلع النتايج .. منى: مادري الحين يقول من اوائل الدولة بتطلع هالكثر مستعيله.. فطوم: دبه انزين.. منى: كيفي دبه عندج مانع خليني ايلس عاد.. دشت خلود عليهم وهي تضحك..: ههههههههه والله انتو بعدكم جنكم يهال.. فطوم: محد ياهل غيرها ذبحتنا بهالأشعار.. بنت المتنبي وانا ماعرف.. منى: هع.. فطوم: اسمع انت.. نشي عطيتج ويه وايد انا الصراحة خلود: شو السالفه انزين فطوم: ابا اجيك على تاريخ النتايج متى بيكون.. لأن ربعي متصلين بي يقولون بيكون باجر ابا اتأكد خلود: منى شوي بس.. افتشلت منى ماقدرت ترد خلود.. بس صدت صوب فطوم تتطالعها بنص عين: شوفي انا بنش بس مو عشانج.. عشان هالقمر مرت اخوي.. خلود: احم احم.. اشكر ذوقج الصراحة.. فطوم: جب.. على طول يلست فطوم على الكرسي ويلست تتعبث على الكمبيوتر وخلود تسولف ويا منى.. وفعلاً النتايج بتطلع اليوم الثاني الصبح.. فطوم: شكلي مابرقد اليوم.. خلود: ماينخاف عليج شاطرة.. منى: هههههههههههههه.. منو شاطرة.. فطوم؟؟ اشك.. فطوم فرت منى بـكرتون الكلينكس ويلسوا يضحكون.. دخل جاسم عليهم مستانس.. جاسم: ماشاء الله شو هالضحكة الحلوة.. خلود: تعال ايلس ويانا.. جاسم: بيلس ليش لا.. خبروني شو السالفه؟ فطوم: جاسم باجر النتايج الصبح جاسم: والله.. عيل ماشي رقاد اليوم منى: اصلا هاي من اول يوم خلصت فيه الإمتحانات لليوم ماترقد .. طول الليل تحشرني.. تعتقدين اني بنجح.. تتوقعين اني بييب نسبة عاليه.. افففف تعور راسي.. بس تكسر خاطري اسايرها.. هالمره فطوم روحها نشت وضربتها على راسها وتموا يضحكون .. .. .. .. شما: سلطان اليوم كنت ارمس خلود وقالت لي شي ضايقني.. قرب سلطان ايده من ايدها: اول شي ممكن اضم ايدج بإيدي؟؟ ولا ممنوع.. استحت شما واحمرت.. وسلطان استغل الفرصة ويود ايدها.. : احين قولي لي شو الي ضايقج؟ شما: سمعت ان مجد وعبيد بيتزوجون صدق؟ سلطان: هيه حتى انا سمعت هالشي واستغربت.. شما: بس انا احس مجد تحب احمد؟ سلطان: كيف عرفتي هالشي؟ شما: اصلا هالشي باين من غير لا أحد يقولي.. تحيد يوم العزيمة الي سووها بعد ملجتي .. كانت مجد في كل فرصة تستغلها وتتطالع احمد.. وغير نظرات احمد لها.. احس شي بينهم .. سلطان: بس انا الي اعرفه ان أحمد يباها ويحبها.. وحاط في باله يرتبط فيها.. شما: ماتحس ان ظلم لو خذت عبيد سلطان: يقولون وصية حور الله يرحمها.. شما: سلطان انا مب مفتيه بس الي اعرفه الوصية في شي له مضرة ماتجوز .. قال تعالى : ( غَيْرَ مُضَارٍّ وَصِيَّةً مِنَ اللهِ وَاللهُ عَلِيمٌ حَلِيمٌ) (النساء:12).. وبعد شي ثاني الزواج اذا كان احد الطرفين مب راضي من كل خاطره وشي غاصبنه عليه بعد ما يجوز.. والله أعلم .. بس حسب معلوماتي الشخصية سلطان: وانا وياج بهالشي.. لكن ماعتقد خالي ومرته يوافقون معقولة.. شما: شو اقولك ترا انهم موافقين هالشي الي خلاني اتضايق اكثر يوم سمعت السالفه من خلود سلطان: عيل احمد عشان جي سافر شما: تخيل انت تباني وانا اخذ اخوك.. شو بيكون موقفك سلطان: صعب وايد شما: الله يعينهم الصراحة .. بس تعـ.. سلطان: اشششش.. استغربت شما ليش سلطان يسكتها.. سلطان: ممكن نرمس عني وعنج وننسى الي حوالينا شوي.. استحت شما .. سلطان: ياربي من هالبنت على كل شي تستحي.. شما: ههههه خلني امثل دور البنت الخجولة انزين سلطان: هااا يعني هذا كله تمثيل شما: اممممم تقريباً سلطان: عنلاتج.. شما: ههههههههههه =--=--=--=--=--= اليوم الثاني اليوم الي كان عمّار يترياه .. وفطوم.. يوم الي بيحصدون فيه مقدار تعبهم الي تعبوه ايام الإمتحانات.. عمّار: يالله بلاه الموقع مايشتغل شما: ههههه هدي اعصابك بلاك.. هزاع: تريا شوي ضغط على الموقع شما: انزين واتصالات متى بيطرشون المسج عمّار: بيتأخرون ماعتقد الحين.. هزاع: الله يعينك ياريال حالتك صعبه شما: الا مب صعبة شوف ويهه كيف مستوي.. وعيونه كيف مسودة تحتهن عمّار: احس عمري تعبت وايد هالسنه واذا يبت اقل من 85.. مادري شو بيستوي بي.. شما: لا احساسي يقول انك بتييب اكثر بعد ان شاء الله عمّار : هذووه فتح الموقع ويلس يكتب رقم جلوسه وعلى اعصابه شوي بيصيح من الخوف.. وضغط على الإنتر.. وقعد يتريا الصفحة تفتح شما: ها بشر عمّار: انتي شو بلاج بعده مافتح هزاع: هههههه احين شما الي مستعيله وشوي فتح الموقع وعمّار من فرحته تمت عينه تدمع مستانس مب مصدق العلامة الي يشوفها.. وشما مستانسه حضتنه على طول .. والكل مستانس في البيت.. وهزاع نش ايول ويرقص.. وام عمّار اكثر وحده فرحت في هالبيت.. ياب 92 .. ام عمّار : هذا ولدي الي صدق افتخر به شما: ماقلت لك ماينخاف عليك عمّار: قولي ماشاء الله هزاع: ههههههههه بنت عمي لو سمحت عينها مب حاره.. شما: عاش ولد العم المحامي.. رن تليفون شما في هالوقت عشان يسأل عن نسبة عمّار.. : ها بشري.. اييكم اليوم عشان اكل الحلاوه؟ شما بصوت واطي وهي تضحك.. : انت اتدور على العلثة عشان اتيي بيتنا.. سلطان: جكتني.. انزين خبريني كم ياب؟ شما: 92 ماشاء الله.. سلطان: اووووب طلع النسيب مب هين.. عيل ان شاء الله عيالي يطلعون عليه.. مبروووك تستاهلون فرحته.. شما: الله يبارك فيك.. الا قولي تعرف شي عن فطوم كم يابت؟ سلطان: يابت 89.. شما: ماشاء الله .. زين النسبة بتأهلها تدخل صيدلة عيل.. شرات ماكان ودها.. سلطان: ان شاء الله يارب.. وربي يبارك لنا في حياتنا يارب.. شما: انت لازم كل شي اتدخل فيه حياتنا سلطان: ههههههه انزين عطيني اخوج خليني اسلم عليه.. شما: يرمس في التليفون اتصل به عقب انت.. سلطان: خلاص تمام عيل.. بس اقول.. تراني اليوم ياينكم مالي خص لازم اسلم على النسيب وأدي الواجب.. شما: قول الا لواته منك.. سلطان: هههههههه عندج مانع؟ شما: عندي سلطان.. سلطان: بعد تعرف تنكت والله.. شما: احم احم عيل شو تتحرى.. =-=-=-=-=-=-=-= الريم كانت في ايد جلثم وترقدها.. مجد توها يايه من المطبخ وفي إيدها المرضعه.. : ويه فديتها رقدت.. جلثم: هيه انتوا ماتعرفون لليهال.. غنيتها لها أغاني اول ورقدت مجد: ياربي محلاتها.. خليني اصورها.. .. .. .. مجد: بذمتج يدووه .. هالبنت ماتستاهل الواحد يفديها بعمره.. جلثم صدت صوب مجد تتطالعها وتضحك.. ومجد مستغربة من نظرات يدتها.. : شبلاج تتطالعيني جي؟ جلثم: وتبين تقصين علينا اونج مقتنعه.. ومن خاطرج.. تراني شايفه الدنيا وعارفتها وخابزتها وتبين انتي بنت اليوم تقصين علي انا العيوز.. مجد سكتت بس مارامت تيود عمرها يلست تضحك.. وقتها جلثم تأكدت ان فعلا مجد ماتبا عبيد.. فهالوقت رن تليفون البيت.. نشت مجد بسرعه ترد على التليفون قبل لا تسمع الريم الحشره وتنش.. مجد: ألووو.. ألووو.. (محد يرمس) ألوووو.. جلثم: منو عالتليفون امي مجد: مايردون.. ألووو.. أحمد: الوو السلام عليكم.. مجد عرفته على طول.. حاولت تيود عمرها خصوصا ان يدتها يالسه تتطالعها: وعليكم السلام منو؟ أحمد: عطيني يدوو.. مجد شلت التليفون وعطته ليدتها وهي معصبه.. وشلت الريم شوي شوي من حضن يدتها وصعدت فوق.. : عفاني الله.. شو هالإنسان.. عنبو هالكثر كارهني.. حتى ماسلم علي ولا سأل عني.. عنلاته .. يتحراني ميته عليه.. ولا ميته على سلامه .. .. جلثم: هلا بشيخ الشباب.. الي من سافر ماسأل عن امه.. أحمد: افا .. تاج راسي انتي.. وانا اروم اصلا ما أسأل عنج.. جلثم: هيه قص علي بكلمتين.. انت وينك الحين ممكن اعرف؟؟ ومتى بترجع.. أحمد: اناا فالبحرين عند واحد من الربع.. وشو تبين بي ارجع.. مستانس هني وسط هالمزايين.. جلثم: عنلاتك.. بند مابا اسمع حسك.. أحمد: افا افا.. تبين تحرميني من حسج الغاوي الي ماروم على فراقه.. جلثم: هاي سوالفك دومك اتسكتني أحمد: يعني ينفع اقردن.. جلثم: ههههههه... المهم زين انك اتصلت لأن كنت ابا ارمسك في موضوع أحمد: خير يدو.. امي وابوي شي بلاهم؟؟ توني رمستهم.. شي صاير خبريني.. جلثم: يوم انك هالكثر تحاتينا اشله مسافر ومودرنا.. أحمد افتشل ويلس يضحك على عمره.. لكن تذكر السبب الي خلاه يسافر وتغيرت ملامح ويهه: بعد تغيير.. المهم شو الي صاير حيرتيني قولي لي أمييه.. جلثم: أحمد انت مسافر عشان مجد.. توه احمد بيرمس قاطعته يدته.. جلثم: اسكت وخلني اكمل رمستيه للأخر وبعدين ارمس.. انت مسافر لأن مجد بترتبط بعبيد وهذا الي عرفته ألحين.. لو كنت اعرف به قبل لا تسافر جان ماخليتك تشبر برع البلاد.. بس اسمعني.. مجد ماتبا عبيد لكنها غاصبة نفسها اونه شو.. حور موصتنهم.. الله يسامحها فكرت في نفسها بس والياهل ونست سعادة اختها.. أحمد انت اقرب لمجد من عبيد.. انا متأكدة انهم مابيستمرون .. اعرف عبيد عدل واعرف مجد عدل.. حتى لو ماكان عبيد ماخذ حور قبل.. ماكنت بخليه ياخذ مجد.. اعرف بنتي ومربتنها بنفسي اعرف انها تناسبك أكثر.. أحمد انت لازم ترد البلاد وتوقف هالمهزلة الي قاعدة تستوي.. الكل قاعد يتحجج بالوصية الي مادري على اي اساس يمشون عليها.. على حساب تعاسة انسان وسعادة ميت؟؟ اي عقب يتقبل هالشي.. وعمرها الوصية ماتكون بمضرة.. اذا اتحبني وتعتبرني امك صدق.. بتيي البلاد و... بس ماعندي شي ثاني اقوله أحمد: بس اميه عبيد يباها.. جلثم: اسكت الله يخليك.. شو يباها بعد.... وانت شو نسيت عمرك؟؟ أحمد: وعمي وعمتي موافقين؟ جلثم: عمتك موافقه لأنها ماتبا الريم تتربى بعيد عن عينها وتخاف عبيد ياخذ حرمه ثانيه ويشل البنت.. وهذا الي انا مابخليه يصير.. بنتي تربى تحت عيني .. ومحد يقدر يمنعني.. ولا تيلس تهذرب وايد.. وبلاها هالرمسه الماصخة أحمد حس بأمل واستانس وقتها بس استوعب كل نظرة كانت من مجد صوبه.. وكل كلمة كانت تقولها له.. تفهم حبها لإختها وتعلقها الكبير فيها يخليها انها تضحي بأي شي عندها.. صح ضايقه انها تخلت عنه لكن يظل حبه لها اقوى.. أحمد: يعني توقعين اذا رديت في شي بيتغير.. جلثم: انت ارجع بس وماعليك من شي انا بتصرف أحمد: على اول طيارة .. جلثم: علني ماخليت منك يارب.. وربي يبلغني فيك انت ومجد معاريس ان شاء الله نهاية البارت أترك التوقعات عليكم بدون أسئلة طبعاً هذا البارت هو تمهيد للبارت الأخير.. السموحة منكم[/align] |
[align=center] الجزء الثالث عشر النهاية =-=-=-=-=-=-=-= دخلت شيخه البيت نفسها في خشمها.. خلاص يا قاتل ما مقتول في هالسالفه .. أم فيصل: مرحبا بأم خالد (خالد الي هو زوج مروه والإبن الأكبر لشيخة) تو مانور البيت.. وينج يا حرمه ماتنشافين ؟ شيخه: موجودة فديتج.. بس تدرين هالفتره شوي صارت لنا ظروف صعبة شوي.. أم فيصل: محشومة فديتج.. الا بنتج وينها؟؟ شيخه: نوره فالبيت تعبانه شوي أم فيصل وهي تتطالع شيخه بنظرة تشكيك: تعبانة ولا إنها ماتبا تشوفني؟ شيخه: ياحرمه شو هالرمسة بعد.. الا وينهم عيال نوره أم فيصل: فوق يلعبن فديتهن.. وايد مستانسين عندي فالبيت شيخه حست بالنغزة.. بس يودت نفسها.. : الله يسعدهم يارب.. أم فيصل: آمين يارب شيخه: عالعموم انا عندي رمسة اقولها لج.. ويايتنج اتفاهم وياج فيها.. عايشه.. انا وانتي أمهات ونفهم شو معناة ان الوحدة فينا اذا ابتعد ضناها عنها شو يصير فيها.. ونعرف جيمة الضنا أكثر.. مثل ما انتي لج حق تشوفين عيال فيصل الله يرحمه.. هم مايوز انج تحرمين امهم من عيالها اسبوع عشان خاطر يتمن العيال عندج.. دام العيال عندهم أم بعدها ماعرست اعتقد قانونياً من حقهم يتمون عند الأم.. وكل يومين ترا انييبهم عندكم.. لكن حرام عليكم تشلون اليهال اسبوع وتخلونهم عندكم.. وتدرون ان نوره ماتقدر اتييكم البيت .. تمت ام فيصل تسمع الرمسة كأن مب عايبنها كلام شيخه.. وفي هاللحظة دخل بوفيصل عليهم.. وهو سامع نص رمسة شيخه تقريباً بوفيصل: حي الله ام خالد.. شيخه وهي تعدل برقعها.. : الله يحييك ويبجيك.. بوفيصل: سمحيلنا عاد على اللي سويناه.. وكلامج صح 100%.. والعيال ألزم ماعليهم يكونون عند أمهم.. خذيهم وماعليج من هالعيوز.. حبها الزايد لهم خلاها ماتفكر عدل.. وانا ياما ياحرمة اقولج بس انتي عنيدة ام فيصل مفتشله.. وفي نفس الوقت مقهورة: ليش انا مب امهم بعد؟ شيخه بإسلوب حلو وابتسامه: انتي تاج راسهم غصبن عن اللي مايرضى.. افا عليج يا ام فيصل شو هالرمسة.. بس شرات ماقلت لج.. نوره روحها نفسيتها تعبانه من وفاة فيصل.. واتشلون عنها العيال اسبوع كامل وايد صعب عليها تحمل بعدهم.. أم فيصل: ماعرف شو اقولج.. بس اباج تعذريني على تصرفي.. (ادمعت عينها) من غاب ضناي وانا مب عارفة شو اسوي.. ابا أي شي من ريحته وعياله هم ضي عيني.. بوفيصل وهو يولع السيجاره: مثل ماقلت لج يا أم خالد.. ماعليج من العيوز.. أم فيصل: إنت وبعدين يعني مابتبطل هالسم الي في ايدك.. استح شيبت.. احفادك كبار.. وانت بعدك على هالموال.. ارتاحت شيخه.. وحست ان فعلاً مافي شي احسن من التفاهم يحل أي سوء خلاف.. وبهالطريقة قدرت تساعد نوره .. =-=-=-=-=-=-= مطار البحرين فواز: ابا افهم انت هالكثر زهقان مني يعني.. ما قعدت كم يوم وألحين بتروح أحمد: انت ماتعرف شو يعني ينشعل نور الأمل في قلبي مره ثانيه.. اااااااااه يا فواز.. لو تحس بربع هالمحبة الي في قلبي جانك حسيت.. ابتسم فواز: ياااااااارب انه مايلقى حجز.. أحمد صد صوب فواز وشوي وبيكفخه.. : وربي الي خلقني.. اني بروح بسيارة وانت الي بتوصلني جان ماشي حجز.. فواز: أحسن بعد.. منها كشته ومنها نوصلك أحمد: عيل اييك شور.. قم نطلع من المطار وانت وصلني.. فواز: عيل خلني اتصل في الشله عشان اييون ويانا.. بالمره نحضر عرسك أحمد: الله يسمع منك.. استانس أحمد زود.. والشله (البطالية طبعاً) كلهم تيمعوا عالساعه 5 العصر عشان يظهرون بموترين.. وصدق كان الجو ربشه في هالسيارتين.. شوي يتسابقون.. وشوي يوقفون في إستراحة ويتشرون ويعقدون سوالف وربشة .. أحمد على الهدوء الي كان فيه فالبداية يوم شافهم.. انجلب حاله 180 درجة.. صار مايقعد مكان.. وأكثر واحد مرتبش.. والوحيد الي مول ماغفت عينه طول الدرب.. عادل بصوت واطي لفواز: ياخي هالإنسان غريب الأطوار.. فواز: ههههه هذا عسل عادل: اللي يشوفه اول يومين كان يالس ويانا مايقول هو نفسه الي يدامنا ألحين.. فرق كبير.. فواز: مثل مايقولون.. أزمة وعدت على خير عادل: الله لا يعودها عيل من بعد هالإستراحة كملوا طريجهم .. لأن كان باقي لهم 7 ساعات ثانيه وبيوصلون فيها البلاد.. أحمد: اقول فواز انت تعبان خلني انا بسوق عنك.. فواز: لا انا بخير عادي ماعليك انت الي مارقدت بالمره. انا على الأقل رقدت ساعه في خلال استراحتنا.. أحمد: ياريال قوم بسوق عنك انا بخير.. فواز: مشكوووووور وسكتوا.. .. وكل واحد فيهم سرحان بهمه.. أحمد يفكر شو بيسوي يوم بيرجع.. يكلم منو.. يبدأ بمنو.. كيف يحل أموره.. ويخطط.. غمض عينه شوي... مانش الا بصوت هرن قوي ودعمه قوية.. فتح عينه مصدوووووم من المنظر الي يشوفه.. كانت الجامه كلها دم.. ومتكسره.. مب قادر ينطق بشي.. فتح حزام الأمان الي عليه ونزل من السياره.. =-=-=-=-=-=-=-= في بيت بوهزاع مها: هزاع البنت تباك بعدها انا متأكدة.. عيل شو الي يخلي وحده مثل منال ترفض كل الي يخطبونها.. هزاع: بس انا الي سويته فيها مب شوي.. تخيلي ان ريلج قبل ملجتج وانتي مجهزة كل شي يقولج اكرهج وماباج ويودرج.. تخيلي الموقف بس.. انا نفسي مب عارف كيف سويت هالشي مها وهي رافعه حياتها: لو سمحت لا اتييب مثال علي انا .. ممكن .. هزاع: اووه انتي متفيجة.. انا وين وانتي وين.. مها: شوبلاك اسوي سوالف.. هزاع: تدرين.. مالت عليج وعلى سوالفج.. مها: عيل انا بنش.. هزاع يود ايدها وسحبها: تعال عاااد.. اسووووولف.. وانا لي غنى عنج اصلا.. دخل عليهم حمدان: شو ها.. اجتماع مغلق مها تستهبل تتقرب من هزاع وتيود ايد حمدان تسحبه صوبهم.. : تعال خل نسويه مغلق.. ماحست الا بإيد حمدان وهزاع على راسها يضربونها.. نشت وحطت ايديها على خصرها وهي تحرطم: تعرفون شو.. مالت عليكم وعلى الي يسوي لكم سالفه.. تموا يضحكون عليها وهي منغاضه زود منهم.. : اووووووكي ماعلي.. بخبر عليكم.. هزاع: بتخبرين منو ان شاء الله؟؟ حمدان: هاي منو عندها غير زيوود ريلها تهددنا فيه.. هزاع: ويه شعر يمي وقف من الخوف.. حمدان: ههههههههههه ويييو سوولها.. مها: لا هالمره مابخبر زايد.. تعرفون بخبر منو؟؟ هزاع & حمدان: منوووو.. مها وهي تلعب بحياتها: احم احم.. ابووووووووويه.. حمدان: يا ريال السالفه فيها قطع رقاب.. قوم خل نراضيها.. هزاع: لا ماصدقت ابويه يرضى علي... نراضيها ليش مانراضيها.. نشوا اثنينهم واقفين مجابلها: ساااامحينا مانعيدها خلاص.. انتي اختنا حبيبتنا.. رفعت مها ايديها واحد صوب هزاع والإيد الثانيه صوب حمدان: حبو ايدي .. عقب بفكر اخبر ابوي ولا لا.. كل واحد ضربها على ايدها.. هزاع: مصختها اختك.. حمدان: بالقو بعد مصختها مها حست ان بيصير تآمر عليها .. توها بتشرد جان ايودونها ويسحبونها.. والكل تم يضحك.. طلع بوحمدان من غرفته يوم سمع هالحشرة.. ويوم شافهم يضحكون استانس.. بوحمدان: ماشاء الله الضحكة واصلة لين فوق.. شو السالفة؟ مها: ماشي بس.. حمدان وقف يدامها: يالسين نلعب غميضة.. مها تتطالعه بنص عين .. وسايرته: هيه نلعب نـلـــــــــــــــعب.. بوحمدان: انزين انا ساير المسيد أصلي العشا.. بتنزلون وياي.. هزاع : هيه ويوم بنرجع ان شاء الله في موضوع أبا أرمسك فيه بوحمدان: يالله عيل انا بسبقكم.. مها وهي تتطالع هزاع مستغربه: شو الموضوع .. هزاع: اقول حمدان نش خل نروح.. مها: اييييييه ارمسك انا.. هزاع: توج تبين تفتنين علينا.. وتبيني اقولج شو الموضوع.. .. مها: خلاص .. اتصال واحد مني بينفنقش الموضوع كله.. هزاع رافع حياته: شو الموضوع؟ مها: مايخصك يلا سير الحق على الصلاة.. حمدان: ههههه حريم ماين الا بالعين الحمرا هزاع وهو ماشي: الخضرا وانت الصاج.. مها: حشاكم مب اخواني.. ههههههه عين خضرا وعين حمرا.. ينانوه حمدان: ههههههههه =-=-=-=-=-=-=-= أحمد: اقول عاد هالمره صدق حاسبو.. مروان: والله زين ما انجلب فينا الموتر.. انا من شفت الحادث ماعرفت كيف انحرف عن الدرب عشان ما ادعمهم.. فواز: انا الي تميت مصدوم ايدي مافارقت الهرن من الخوف.. ووقفت الموتر.. أحمد: انزين اتصلتوا في الشرطة.. فواز: هيه وهم يايين في الدرب.. أحمد: ياخي انا من شفت هالموتر خفت على موتر مروان والشله.. بس عقب مانزلت من السياره استوعبت ان هالسياره مب تابعه لنا... فواز: شباب اسمع صوت من الموتر.. يمكن في حد حي.. مروان: ياريال اشلك انت .. مانعرف نحن.. بتوصل سياره الشرطة مع الإسعاف.. أحمد: مينون.. يمكن الريال محتاي شي.. تقربوا من السياره.. كانت متهشمه.. والهوش الي داعمينه طايح ع طرف الشارع .. كان المنظر فضيع جداً .. والكل متخوف.. تقربوا من الموتر اكثر.. كان مبين ان 3 اشخاص في الموتر.. السايق وواحد حذاله.. وواحد ورا.. أحمد: فواز .. مروان.. عدنان.. تعالو ساعدوني نطلعهم.. والباقي اركبوا الموتر وشغلو دبل إشاير عشان السيارات اليايه في الدرب تنتبه ان هني مستوي حادث.. وانا وفواز بنطلع الشباب من الموتر.. السايق كان نص فاقد وعي ونص واعي.. لأن المخدة الهوائية ساعدته شوي.. وحمته.. وفتح الباب.. وهو مع فواز طلعوا الريال من الموتر.. وربع فواز ياب صندوق الإسعافات الأوليه الي في موتره عشان يسعف بعض جروحه.. وساعدوا بعض طلعوا الإثنين.. بس للأسف كانو متوفين.. ماكان لهم أي نبض.. -----: ربعي.. ربعي وينهم؟؟ احمد : لا تحاتي هم بخير.. والإسعاف قريب.. عدنان: شباب الشرطة وصلوا.. أحمد: سمعت الشرطة وصلو.. لا تحاتي الكل بخير.. أحمد توصخت كندورته بالدم.. وفواز ووصلت سيارة الإساف ونقلت الشباب الثلاث.. وراحوا يودونهم لأقرب مستشفى.. الشباب ماكانو قادرين يكملون دربهم من المنظر الي شافوه.. كل حد يتذكر وقلبه معورنه.. وقفوا مواترهم على جانب ونزلوا الحصير وتيلسوا كلهم سوا .. أحمد: يا جماعه هالمنظر اعتقد بيكون عبره لنا.. فواز: أحمد تبا الصدق... اني في لحظة غفت عيني.. ويوم نشيت حصلت عمري برع الطريق شوي.. تبا الصدق.. خلني ارقد.. وانت كمل عني أحمد: شفت قلت لك انك تعبان.. عدنان: الواحد يوصل متأخر ولا يستعيل ويفقد نفسه أحمد: الله يحفظنا جميعاً.. قومو نصلي ركعتين شكر على ان نحن ماصار فينا شي.. مروان: شباب احس الجو ماينفع نكمل دربنا فيه.. لأن ضباب.. أحمد: خلاص عيل بنبات الليله هني.. وكلنا نرقد ونرتاح.. نكمل على طلعة الشمس ان شاء الله فواز: ان شاء الله =-=-=-=-=-=-=-= اليوم الثاني الصبح خوله: خليفه اليوم ماروم اداوم.. خليفه: ليش حبيبي شي بلاج؟؟ خوله: مادري احس بعوار.. خليفه: لا يكون موعد الولادة.. خوله: لا ماعتقد لأن الألم مب ذاك الشدة.. خليفه: تستهبلين .. ماشي نشي خلينا نسير المستشفى.. خوله: خايفه خليفه.. خليفه: لحوووول انتي من دشيتي التاسع وانتي حاشرتني خايفه وخايفه.. مابيصير الا كل خير.. افا عليج انتي بس.. اذكري الله خوله: لا إله إلا الله.. خليفه: نشي فديتج.. خوله: انت عندك اجتماع مهم اليوم سير الداوم واذا شد العوار بتصل فيك خليفه: خولــ.. تقاطعه: عشاني ترا بزعل خليفه: لا كله ولا زعل الحلا كله خوله تبتسم له وتنش تروح صوب الحمام.. بس ماكانت رايمه تمشي تحس الألم يشتد عليها.. خليفه يودها بسرعه قبل لا اتطيح وزقر على امه الي دخلت الغرفة.. ام خليفه: شو صاير؟ خليفه: اظن خوله موعدها الحين ام خليفه: لا والله وتقولها وانت جي بارد.. شو تتريا روح شغل الموتر ونحن يايين.. طلع عبود الصغير من غرفته : ماما شو فيج؟ خوله: تعبانه ماما.. عبود: بتييبين لي اخت صغيره خوله: هيه ان شاء الله.. عمتي الألم يشتد .. وبسرعه راحوا ركبوا الموتر وخليفه مسرع بموتره صوب المستشفى ام خليفه: شوي شوي بلاك جي مسرع.. تبي تنفدنا.. وماحس بعمره الا انه معدي الإشارة الحمرا.. وصوت الدورية وراه.. خوله: قالت لك عمتي لا تسرع زين جي.. خليفه: لحووووول وقته هذا.. وقفه الشرطي ونزل له الجامه.. توه الشرطي بيهزبه وبيمرس.. خليفه سبقه: شوف انا مرتي بتربي.. وتعبانه.. وابا الحق على المستشفى قبل لا اتربي في الموتر.. الشرطي سكت.. : انزين أي مستشفى تبون توصلون؟ خليفه: مستشفى الوصل.. الشرطي: عيل بعدك يبالك درب.. عيل تموا وراي وانا بشغل الدوريه عشان افسح المجال لكم.. زين جي همسة: هالسالفه حقيقيه صارت لأحد من أقاربي.. تخيلو.. جان زين كل الشرطيين جي لول .. استانس خليفه: يزاك الله خير.. وراح عنه الشرطي ركب موتره .. خليفه: شفتي أمي ولدج مو أي شي.. ام خليفه: اسكت راونا همتك ألحين وخلنا نوصل لأن خوله تعبانه خليفه: ان شاء الله خلال نص ساعه تقريباً وصلوا المستشفى وبسرعه نقلوها لغرفة الولادة.. خليفه تم يتريا برع الغرفة ومتحرقص.. رن تليفونه.. كان ربيعه الي فالدوام سعيد: ياريال وينك المدير يسأل عنك.. خليفه: مابداوم اليوم سعيد دخيلك قول للمدير.. الحرمة بتربي ماروم اودر المستشفى سعيد: خوله بتربي.. يالله بالبركة ان شاء الله وتقوم بالسلامه خليفه: الله يسمع منك.. وبند سعيد عن خليفه ورمس المدير وطبعاً عذر خليفه.. وخصوصاً ان خوله زميلة لهم في الدوام بعد.. .. خليفه من شاف ممرضة طالعه من الغرفه.. : ها طمنيني.. شو صار؟ الممرضه: انت شنو في.. صبر شوي.. كلو يريد سرعه سرعه مايستوي بابا خليفه: بلاها هاي شوي وبتكفخني.. خلاص على امرج.. بسكت ومايريد بسرعه بسرعه .. خل تاخذ راحتها.. الممرضه تضحك على خليفه .. ومشت راحت.. وبعد شوي وهي رادة بتدخل الغرفه وقفها خليفه خليفه: انزين طمنيني عليها.. ممكن انا ادخل؟ الممرضه وهي محرجة: انت شو فيييييك.. مافي صبر سوي.. كلووو حرمه في داخل انتي يريد روح داخل.. واللهي مجنووووون خليفه: طاعو هاي انتو.. قالت عني مينون اخبرج.. دشي قبل لا اشتكي عند المدير الممرضه: سنو يعني قول حق مانيجر.. قوووول انا مافي كووف.. انت سوي قرقر وايد خلي راس انا كووووولو عور .. وعطته ظهره ودخلت.. خليفه: والله وقوة عين.. اسميكم ماكلين البلاد أكال انتو ماخليتو لنا شي.. لازم بتقولين جي.. اكيد مديرج من ثوبج وبعد 3 ساعات ونص.. وصل له خبر ولادة خوله ببنوته صغيره.. تخبل خليفه من سمع الخبر مب عارف كيف يترجاهم عشان يدخل عندها.. طبعاً ماخلوه الا بعد نص ساعه تقريباً.. دخل خليفه عند خوله وهي حاضنه البنت.. خوله: خليفه شوف حور اشحلاتها؟؟ خليفه: سمتها بدون شوري.. حريم آخر زمن.. خوله: ليش مب حلو هالإسم؟ خليفه: حور الله يرحمها تستاهل ان ناخذ اسمها.. خوله: فديتك والله ام خليفه: كلمت اخوك.. خليفه: هيه امي.. هو وسوسن يايين في الدرب.. والربع كلهم يسلمون عليج ويباركون لج فديتج.. خوله: الله يبارك فيهم جميعاً يارب =-=-=-=-=-=-= __________________ وصلوا الشباب دبي وهم هلكانين من التعب.. أحمد : يلا مابقى شي بنوصل بيتنا ان شاء الله الشباب: ياريال نحن بنحجز لنا فندق قريب وبنسكن فيه.. أحمد: افا والله افا.. فندق وبيت اخوك موجود.. ماشي اتيون البيت عندي.. عيب عليك اتقول هالرمسه اصلا.. فواز: مادري شو رايكم شباب؟ عدنان: لا الصراحة انا ابا اروح الفندق اريح لي مروه: وانا بعد جان تبون الصدق.. فواز: عيل خلها فرصة ثانيه أحمد: عالأقل تعالو الغدا عندنا مايصير توكم واصلين البلاد وأودركم واروح مروان: بس .. أحمد: لا بس ولا شي.. جانكم تبوني ازعل منكم برايكم روحوا.. كلهم تموا يطالعون بعض وعقبها ابتسموا له بحيث انهم راضين ايون عنده.. اتصل احمد في أمه.. أحمد: مرررررررحبا بميثاني.. ميثا: عنلاتك.. انا امك تزقرني بإسمي أحمد: أدلعج .. ماتبيني ادلعج.. ميثا: آخ منك لوتي أحمد: طالع على ابوي ادري.. المهم امايه تراني في البلاد.. عدي لين العشره انا عندج.. ميثا والفرحة مب شايلتها: من صدق.. والله؟ أحمد: تحريني اجذب.. هيه والله صدق.. ميثا: فديتك تربيتي اعرفك ماتعرف تجذب.. انزين وينك ومتى بتوصل؟ أحمد: كلها ربع ساعه انا وشلة ربعي بنوصل.. ميثا: يا حياهم الله.. خلاص اترياك اميه لا تحير وشوي شوي فالدرب أحمد: ان شاء الله.. بند عن أمه وسار عند ربعه عشان يتحركون صوب بيت أحمد.. طبعاً هم مايدلون مكانه... أحمد كان يسوق موتر فواز .. والشلة وراه.. سايرين صوب بيت أحمد.. =--=-=-=-=-=-= مجد وهي نازله من الدري تيبب وتغني.. ومرتبشه.. مجد: أمييييييييه.. يدووووووه.. أبوووووووويه تعالووو بقولكم شي يونس وااااااااايد.. الكل تم يطالعها مستغرب .. مجد: خوله ربت بالسلامه ويابت بنت سمتها حور.. لطيفه: يحليلها.. حمد لله ع سلامتها.. جلثم: واعليه.. وين هي الحين ابا ازورها.. مجد: هيه ان شاء الله العصر بنمر عليها .. لطيفه: تستاهل حليلها حرمه فقيرة وطيبه.. عبدالعزيز: منو هاي ؟ لطيفه: كنت ربيعه حور الله يرحمها.. هيه الي توسطت لحور عشان توظف.. عبدالعزيز: هييييه ذكرتها.. ماشاء الله يابت بنت.. مجد: هيه .. ابا اشوفها اكيد حلوة لطيفه: بس مب احلى عن ريماني مجد: بنتي مافي حد احلى عنها جلثم تتطالع مجد بخبث وتضحك.. مجد: وعندي خبر ثاني حلو لطيفه: عل فرحتج دوم يابنتي.. ودوم هالأخبار الحلوة.. قولي شو الخبر الحلو الي عندج.. مجد: خلود حامل.. لطيفه: والله.. ربي يسهل عليها يارب.. جلثم: مادري بلاهن هالحريم مستعيلات على الحمل.. يتحرن الحمال والربى سهل.. عبدالعزيز: بس احسن لهن عشان يتعلمن اصول التربية من هن صغار ويحسن بالمسؤولية.. لطيفه: صدقه عبدالعزيز.. جلثم: بنات اليوم مايتعلمن لو يابن درزن عيال.. مجد: ههههههههه خيبه فاقدة الأمل فينا يدووه.. جلثم: انجعمي انتي اصلا زعلانة منج.. مجد: ويديه ليش؟ جلثم: يبالج حد يمرغج بالخيزرانه يعلمج السنع وان الجذب يودي للنار عبدالعزيز: أمي بنتي ماتجذب جلثم: انت بتخبرني عن بنتك.. اسكت الله يخليك.. تراها ان طلعت جذابه طالعه عليك.. مجد وهي ناقعه ضحك: ههههههههه اوووب حطو على الوالد.. لطيفه: خل انش قبل لا ايي دوري جلثم: دورج ياي مالج شردة منه.. مجد مستغربه بلاها يدتهم حاقدة عليهم هالكثر.. سمعت مجد صياح الصغيرونه وسارت فوق.. جلثم: الا اتخبركم شو صار على موضوع عبيد ومجد لطيفه: اتريا عبدالعزيز يقرر.. عبدالعزيز: مادري ليش انا مب مقتنع ولا مرتاح جلثم: يوم اقولك البنت ماتباه تمثل لكم وانت مصدقين.. لطيفه: منو قال.. انا سمعتها بإذني وهي تقول موافقه جلثم: يالخدية.. (وتضربها بالعصا عالخفيف) .. تقول هالرمسه يدامكم عشان ترضيكم.. بنتي وانا اعرف الي في قلبها اكثر عنكم.. عندي رمسة ابا اقولها لكم.. عبدالعزيز: خير امي شو السالفه قولي؟ جلثم: انتو تعرفون ليش أحمد سافر البحرين؟ لطيفه: يزور ربعه.. وشو يخص احمد في موضوع عبيد ومجد.. جلثم: انتي الخدية انجعمي وخليني اكمل رمستي.. ضحكت لطيفه وسكتت يودت عمرها عن تنضرب بالعصا بعد مره.. جلثم: يا جماعه أحمد قايل لي من زمان (في خاطرها تقول.. حسبي الله عليج يا مجد خليتيني اجذب على اخر عمري عشانج ولا هو متى قالي اصلا).. ان وده في مجد وبس يخلص دراسته يبا يخطبها.. واعتقد ان مجد انسب لأحمد من عبيد.. مو حرام عليكم تظلمون اثنين عشان خاطر ميت.. تضايق زود عبدالعزيز.. والحين تذكر يوم بنته كانت معصبه عن سفر أحمد.. كيف انفعلت.. وفعلاً حس نفسه بيظلم البنت.. لطيفه: بس أحمد عمره مارمس ولا لمح لنا.. جلثم: الريال حاط في باله ان بنت عمه له .. شرات عادة العايله.. ماتوقع ان الظروف تنجلب بهالطريقة.. لطيفه: لا لا لا .. وصية حور لازم تنفذ.. عبدالعزيز صد صوبها معصب: انتي ياحرمه ليش جي انانية.. تفكرين ببنتج الميته.. ونسيتي ان لج بنت حية قلبها ينبض وتحس تبين تعيشينها عمر بعذاب.. بنتج طلعت انانية وانتي تبين تكملين مشوارها.. لطيفه سكتت.. فعلاً ماودها تشوف بنتها متضايقه.. يكفي انها شافت عذاب حور بعينها.. وفي نفس الوقت ماودها ترفض وصية بنتها.. بين نارين.. بس نار عذاب انسانه يدامها .. اقوى .. مهما يكون قلب الأم على عياله.. عبدالعزيز: سمعي زواج مجد من عبيد إنسي.. واذا تبون تسوون هالشي من غير رضاي كيفكج انتي وبنتج.. بس انا مب راضي من ألحين اقولكم.. وأحمد يرجع البلاد.. وجانه يبا بنتي تفداه بنتي.. أحمد ريال والنعم فيه.. افتخر به يكون ريل بنتي.. وحلاته يكون عندي بدال النسيب نفسه .. نسيبين وكلهم عيال حميد اخويه.. جلثم: هيه هذا ولدي الي يحب عياله ويفكر فيهم.. لطيفه: شورك يابو حور.. وانا مالي رمسة فوق رمستك عبدالعزيز: هذا العشم فيج جلثم استانست من الوضع.. عالأقل هيئت كل شي لأحمد يوم يوصل كل شي جاهز مايبقى غير يخطب.. بس مجد شو بيكون رايها في الموضوع؟ ........................ =-=-=-=-=-= في بيت شيخه نوره: أميه عمتي كيف رضت انج اتييبين اليهال؟ شيخه: كل شي بالتفاهم والزين ينحل .. وعمتج حرمة عاجل وفاهمه.. قعدت اتفاهم وياها.. وعمج أيد رمستي.. واقتنعت.. نوره: ربي لا يحرمني منج.. شيخه: ويخليج لعيالج نوره: آمين يارب... إلا امي وينها خلود اليوم ما مرت صوبنا؟ شيخه: ليش ماعرفتي الخبر؟ نوره:أي خبر .. شو السالفة!! شيخه: فديتها اليوم الصبح كلمتني وقالت لي انها حامل نوره: ماشاء الله.. بس مو جنه امي استعيلو .. توهم ماكملو عالأقل 6 شهور.. توهم مكملين شهر وشوي. شيخه: بعد إرادة ربج ماترومين تمنعينها.. الله يبارك لها بس وتقوم بالسلامه ان شاء الله نوره: على قولتج. والنعم بالله.. نشت نوره تروح عند مهره لأنها كانت تصيح.. ورن تليفون البيت سارت شيخه ترد عليه. شيخه: السلام عليكم جلثم: وعليج السلام والرحمه.. ها يقولون زامه خشمج هاليومين .. عنبوج لا تسألين عن أمج ولا تنشدين عن حالها؟ شيخه: لا امييه مب جذا الموضوع.. جلثم تقاطعها: عيل شو .. خبريني شو الي بيخلي بنت ما تسأل عن امها.. الا جانج هب معتبرتني أمج بعد شيخه: افا والله انتي تاج راسي مب بس أمي.. وحقج علي لأني مقصره بحقج جلثم: هيه جي اباج.. الا اتخبرج شواخ.. (في هاللحظة انعفس ويه شيخه.. عنبو حرمه شو كبري عيوز.. بعدها تزقرني شواخ .. زين انه فالتليفون ومحد يسمع).. شيخه: هلا امي جلثم: بلاج ساعه لين ماتردين شيخه: لا وياج قولي اميه شو السالفه؟ جلثم: انتي سمعتي عن سالفه وصية حور صح؟ شيخه: هيه وتضايقت الصراحة.. كيف حور توصي مثل هالوصية جلثم: شفتي انتي.. اول وحده في العايله توافقني الراي.. لأن الكل ضدي شيخه: أميه هم مب ضدج بس هم كل تفكيرهم بمشاعرهم ناحية الريم.. مع ان الريم بتم عندنا وبتربونها سواء عبيد عرس ولا ماعرس جلثم: سمعي امي.. عبيد من حقه الشرعي انه يعرس ... بس هب انه ياخذ مجد.. لو على سالفة الزواج.. من باجر بدور له حرمة سنعه .. تناسب له... والبنت بتم عندنا.. شيخه: ليش شو صار فالموضوع هالأيام.. لأني انشغلت ومانشدت عن السالفة جلثم: انزين خليني اخبرج سر.. مجد وأحمد يبون بعض.. شيخه: أحمد ولد حميد؟ جلثم: شواااااااخ وويع ابليس ان شاء الله.. بلاج انتي كم أحمد عندنا يعني.. هيه ولد حميد اخوج شيخه: سامحيني عاد أميه بداية الخرف جلثم: انا الي اكبر عنكم وأعقل عنكم.. شيخه: الله يحفظج يارب ويخليج لنا.. وعن طاري أحمد ومجد.. عيل أحمد أولى بها.. عيل من جي احمد سافر جلثم: هيه واعليه حماده فديته.. من سمع الخبر ماقدر يتم في البلاد.. شيخه: علني افدااااه .. طلع الولد يحب.. جلثم: انا رمسته وقلت له السالفة.. وقالي انه ماكان يعرف بموضوع الوصية .. وقال بيرجع عشان يرمسهم.. شيخه: الله يوفقه يستاهل.. جلثم: انزين نشف ريجي.. خل اسير أقيّل لي ساعه .. وانتي انشدي عن أمج.. شيخه: هههههه ان شاء الله .. وانا منو لي غيرج اصلا.. جلثم: الله يخليج.. =-=-=-=-=-= وصل أحمد البيت ودخل ربعه الميلس.. وأول مادخل البيت جابل مروه.. أحمد: السلام عليكم مروه: وا فديييييييت هالويه كم أفداه.. وولهت عليه أحمد: احم احم كل ها شوق لي مروه: يالدب تولهنا عليك والله.. وانت ليش تسافر.. هب عايبتنك بلادنا شو أحمد: عايبتني ومالي غنى عنها.. عشان جي رديت لها بسرعة.. مروه: تعال سولف لي شو سويت هناك.. أحمد: بعدين بعدين.. ألحين مو فاضي.. بسير لأن ربعي في الميلس.. بمر على أمي أسلم عليها.. ولهت عليها ميثا وهي داشه: علني ما خلا من هالصوت وطاريه.. احمد ابتسم لأمه وتقرب منها وحب راسها وحضنها.. ميثا: لا خليت منك يارب.. وتحب الكعبة.. هالمره سامحناك.. المره الياية ماشي سفر.. أحمد: عاد انتو وقراركم بيتحتم عليه اتم ولا اسافر.. المهم خلهم يحطون الغدا لربعي في الميلس ميثا: وينهم خل اسلم عليهم .. أحمد: فالميلس.. ميثا: خلاص شوي وانا بكون عندكم.. راح أحمد صوب الميلس الخارجي.. شاف عبيد فدربه.. عبيد: اووووووب.. بو شهاب.. حي الله هالشوف.. أحمد: الله يحييك بو الريم.. اشحالك؟ عبيد: بخير بشوفتك.. ياخي لك وحشه.. أحمد يطالع عبيد ويشوفه كيف ضعفان وعيونه مسوده تحتهن.. وكيف كئيب .. تضايق من الحالة الي وصل لها أخوه.. عبيد: بلاك سرحت أحمد: ها لا ماشي.. الا تعال سلّم على ربعي من البحرين.. فالميلس.. عبيد: يلا .. وتوهم داخلين الميلس.. ضحك أحمد من المنظر الي شافه.. كل واحد فيهم مستاند على الكنبه وراقد.. عبيد: حليلهم ميهود حيلهم من الدرب أحمد: شو تقول يا ريال لو تشوف المنظر الي شفناه خلانا طول الوقت فاتحين عيونا مانرقد.. لين ماوصلنا واستقرينا الحين حسينا بالتعب عبيد: السفر بالسيارة متعب.. أحمد: بس وناسه.. خصوصاً يوم نوقف في الإستراحات وننزل .. ربشه شباب عبيد: هيه والله ذكرتني بأيام أحمد: إلا وينها الريم؟ عبيد: بيت عمي عبدالعزيز عند مجد.. أحمد: هيه وشو صار على موضوعكم؟ عبيد: الزواج قصدك.. أحمد: هيه.. عبيد: رمسنا عمتي وعمي ونتريا ردهم .. أحمد: امي شو رايها؟ عبيد: موافقه.. أحمد: أبوي.. عبيد: مادري بس يوم قلت له ماقال شي تم ساكت.. أحمد: قم نسير داخل برمسك شوي. عبيد: خير ان شاء الله وطلعوا من الميلس وقال أحمد لأمه ان ربعه رقود فخلهم على راحتهم يريحون.. وسار فوق غرفته .. وعبيد وياه.. عبيد: قولي شو الي بترمسني فيه؟ أحمد: عبيد انت من خاطرك مقتنع في مجد وتباها عبيد: تبا الصدق.. انا باخذها بس عشان البنت ووصية حور.. ولا احسها ياهل مو للزواج وماتناسبني أحمد: يعني عادي ماتقرب منها حتى.. عبيد سكت كأن يأيد كلام أحمد بسكوته.. عصب أحمد بس تمالك نفسه .. وقرر انه يقول واللي فيها فيها.. هو راجع عشان هالشي.. ومستعد انه يحارب عشان هالحب لآخر لحظة.. أحمد: عبيد انا قبل سكت عن الموضوع لأن كنت حاط في بالي ان مجد مقتنعه بنفسها وانت بعد.. بس يوم عرفت السالفه انها مجرد تنفيذ وصية ماتصح أصلا لأن فيها مضرة.. فقلت بقول ومابسكت عبيد: أحمد شو السالفه.. احس بعيونك كلام وايد .. شو الي صاير؟ أحمد: عبيد.. واذا قلت لك ان انا ومجد نبا بعض من زمان.. ؟؟ عبيد اسودت الدنيا في عينه.. وتم مصدوم.. استغرب من نفسه كيف ماطرى على باله إن أحمد ومجد يكون بينهم شي خصوصاً الفتره الي كان يلاحظ قعداتهم وسوالفهم.. كيف ماطرى على باله ان اخوه اولى انه ياخذ مجد .. حس نفسه في لحظة كان أناني.. يدمر حياة إثنين .. مجد و أخوه.. عشان ينفذ وصية انسانة تملكتها الأنانية والغيره لآخر لحظة من عمرها.. هي عارفه اني مابقرب من إختها.. عارفه ان مجد مابتقدر حتى تقرب مني لأني في يوم من الأيام كنت زوج إختها.. أنا كيف مافكرت في هالشي.. الله يرحمج ويغفر لج يا حور.. أحمد تم يطالع عبيد ودقات قلبه تزيد من الخوف.. يتريا ردة فعل عبيد في أي لحظة.. : عبيد؟ عبيد انتبه لنفسه .. وكل الي سواه ابتسم لأخوه.. : مبروك عليك.. سامحني لأني مافكرت فيك ولا فيها.. استانس أحمد حس الدنيا ماشلته من الفرحة كل الي سواه حضن أخوه من الفرحة: ربي يخليك لي ياخوي.. عبيد: يا ريال الدنيا كلها يومين مايسوى ان نعيش فيها ونحن بهم وغم ومشاكل.. وانا منو لي اقرب من اخوي وبنت عمي اشوف فرحتهم.. دخلت ميثا الغرفه عليهم مستغربه.. ميثا: شبلاكم فرحوني وياكم؟ ومروه كانت واقفه ورا ميثا.. عبيد: أميه.. أحمد قرر يعرس ميثا بفرحة: والله.. هذي ساعة المنى والفرح.. مروه تجدمت عن أمها: يافرحتي انا .. اخوي بيعرس.. والله وكبرت يا أحمد ميثا: انزين من اليوم بندور لك بنت الناس الأصيلة الي تناسبك.. انت تأشر بس أحمد صد صوب عبيد وعبيد هز راسه كأنه فاهم نظرات أحمد: بس امي البنت موجودة ماله حاية إتدورين .. ميثا: افا من ورانا يا أحمد.. مروه كانت حاسه قبل بعلاقة مجد وأحمد.. وهاللي مخلنها مستغربة شوي منو ممكن تكون هالبنت.. عبيد: امي أحمد يبا يخطب مجد.. مروه تنهدت .. وابتسمت.. بس ميثا تغيرت ملامح ويهها.. ميثا: لا والله.. وانت يا عبيد؟ عبيد: امي.. أحمد أولى بمجد فيه انا.. وبعدين لا تنسين انا بس بغيت اخذها عشان الوصية ولا انا ما ودي أرتبط بإخت زوجتي الله يرحمها.. ميثا بعدها مب مستوعبة: انت ماتفهم شو معناة نخطب البنت لواحد وعقب انيي نغير راينا ونقول نباها للثاني؟؟ أحمد: أمي انتي دومج كنتي تقولين لي اخطب لك بنت عمك.. ميثا: أميه أحمد فرحتك هيه فرحتي.. ومجد شرا بنتي.. اتمناها تكون كنتي.. وبالعكس محلاها من فرحة تكون حرمة ولدي الثاني.. وعبيد امره هين ندور له وحدة ثانيه.. بس انا احاتي لطيفه وعبدالعزيز.. بيزعلون مني.. أحمد: اميه انتي رمستيهم عساس الوصية.. واللي بيصير ألحين نثبت لهم ان مثل هالوصايا ماتيوز.. والله مايرضى بها.. وغير هذا كله.. الشخصين مالهم رغبة في بعض.. موافقين بس عشان هالوصية الي مغربلتنهم ومغربلتني.. ميثا تتقرب منه تضربه عالخفيف: ايا اللوتي.. طلعت تحب.. أحمد استحى ويلس يحج راسه والكل يضحك.. عبيد: ياريال وينك عن البيت من زمان ماضحكنا مروه: هيه والله أحمد: المهم .. موضوع عمي ومرته خلوه علي.. انا برمسهم.. وعمي عبدالعزيز يعزني وايد.. ماعتقد بيعارض اذا طلبت بنته.. وغير ان يدتي .. الراس العود في العايلة.. هيه الي اتصلت فيه وخبرتني.. ولا انا ماكنت ناوي ارجع عبيد صد صوب احمد: يعني اللي افهمه انت سافرت لأني كنت مقرر اتزوج مجد أحمد: هيه عبيد يطالع بإستحقار.. : تدري انك سخيف.. الكل ضحك.. =-=-=-=-=-= في بيت جاسم كان يالس ويا خلود في الغرفه.. ورن تليفونه.. جاسم: هلا والله .. حمد لله عالسلامه.. ياريال اختفيت فجأة لا حس ولا خبر.. ولا جنه عندك أهل هني تنشد عنهم أحمد: شو نسوي عاد هناك قعدة ووناسه.. وشفت ربعي الي من زمان ماكنت شايفنهم.. تعرف تغيير جاسم: زين سويت غيرت جو عالأقل.. بس ياخي جان قلت لنا بترجع نستقبلك شي نسوي لك أحمد: انا ياي ويا ربعي عن طريق البر.. جاسم: يا ريال جان زين مب معرس .. جان لقيتني وياكم ألحين ماحس الا بقرصه وضحك.. أحمد: ههههههههه عن يسمعونك بس.. جاسم: ههههههههه.. انزين خل اخبرك الخبر السار والسعيد أحمد: شو قولي .. جاسم: الحرمه حامل أحمد: ماشاء الله شو هالأخبار الحلوة.. مبروووووك ألف ألف مبروووك.. تستاهل.. يالله ربي يسهل عليها يارب.. والله وكبرت خلودووو.. جاسم: ههههههه شفت عاد.. يالله دورك ألحين أحمد : جريب ان شاء الله .. بتوصلك الأخبار جاسم استغرب من رمسة أحمد.. شو يقول اي جريب. يعني ناوي يعرس؟؟ بياخذ منو ؟؟ أحمد: الووو وياي جاسم: هيه وياك.. خلاص عيل بوشهاب خلني اليوم بمرك البيت ان شاء الله بشوفك أحمد: على خير.. سلم على الأهل جاسم: يبلغ ان شاء الله وبند عن احمد صد صوب خلود.. يطالعها وعلامات التعجب تارسه ويهه خلود: شو بلاك بسم الله.. جاسم: تعرفين كنت ارمس منو؟ خلود: منو؟ جاسم: أحمد ولد خالج خلود: له له .. أحمد ولد خالي حميد .. سمعتك تقوله حمد لله عالسلامه.. يعني رد من السفر جاسم: هيه .. ويوم قلت له عقبالك قالي.. جريب بتوصلك الأخبار.. يعني ناوي يعرس خلود وهي تعقد حياتها: بيعرس!!!!!! جاسم: انا روحي شراتج مستغرب خلود: لا يكون يبا يسوي حركة يقهر بها مجد جاسم: مايندرى الصراحة خلود: الله يستر.. جاسم: انزين انا اليوم بسير عند أحمد .. مابتزورين بيت خالج؟ خلود: تعال انت تقوله بتسير عنده نسيت اليوم فيصل واهله بيون عشان يتفاهمون على الموضوع جاسم: اووووووه تعالي والله راح عن بالي.. سالفة أحمد خلتني انسى هالموضوع.. خلاص مابروح له اليوم .. بمر عليه يوم ثاني.. ونشوف الأخ فيصل هذا شو يبا.. خلود: انت شاورت فطوم.. جاسم: هيه البارحة يلست وياها وقعدت ارمس وياها قريب الساعتين.. والبنت من نفسها مقتنعه انها تبا تطلّق منه.. لأنها تعبتر علاقتهم منتهيه .. خلود: غامضتني هالبنت.. صغيره وحرام جي يصير فيها جاسم في خاطره.. غلطتي يا فطوم وتحملي ثمن غلطتج.. تنهد وطلع من الغرفة خلود: جاسم.. الله يخليك يوم تشوف فيصل وهله تمالك أعصابك وماباك تعصب ولا تتنرفز.. عشان خاطري اوكي؟ جاسم: اوكي .. .. ومرت ساعتين وصلوا أهل فيصل وفيصل وياهم.. واستقبلهم جاسم.. وكان طالب من سلطان وأبوه وخالد بعد يكونون موجودين بما إنهم عيال عمومته.. بوفيصل: يا جماعة نحن يايين هني نطلب منكم ان تنسون موضوع الطلاق.. ترا مايستوي ان ابغض الحلال عند الله الطلاق.. بوسلطان: والله يا بوفيصل محد فينا مستانس من الي بيصير ولا عمره الطلاق كان حل.. فيصل: عمي تسمح لي أرمس.. بوسلطان: تفضل فيصل: انا يوم خطبت فاطمة.. خطبتها وأنا مقتنع فيها ولازت مقتنع ومتمسك فيها.. واذا عن المشاكل الي صارت ترا لازم بين أي اثنين مايعرفون بعض تصير مشاكل وخلافات.. مايصير على أي خلاف نطلب الطلاق هذا مب حل جاسم كان يطالع فيصل والود وده يقطعه.. بس ميود نفسه: بس في حالة فاطمة هذا هو الحل.. بوفيصل: جاسم يا ولدي نحن ناس شارينكم لآخر لحظة ومايصير الكلام الي تقوله فيصل: جاسم تسمح لي ايلس ويا فاطمة شوي واتفاهم وياها واسمع رايها .. بوسلطان: صدقه فيصل يا جاسم.. أهم شي راي البنت.. جاسم: خلاص مب مشكلة.. بزقرها وطلع جاسم من الميلس ودخل الفيلا.. خلود: ها شو صار.. جاسم: ازقري فطوم.. خلود: ليش؟ جاسم: انتي ازقريها ولا تيلسين تسألين وايد.. بخبرج عقب خلود برطمت من اسلوب جاسم.. اففف مب حلو يوم يعصب.. وزقرت فطوم الي كانت ترتعش من الخوف.. فطوم: خير جاسم جاسم: فيصل يبا يقعد يتفاهم وياج موافقة فطوم فاجة ثمها مب عارفه شو تقول جاسم: حوو ارمسج انا ردي علي.. شو قلتي؟؟ فطوم: انت شو رايك؟ جاسم: انتي وبعدين يعني اقولج انتي شو تبين .. لا تسأليني عن رايي.. لو عني ابا اجتل فيصل فطوم بلعت ريجها.. : هيه اوكي موافقه جاسم: خلود انتي دخلي داخل لأن فيصل بيدخل وراح جاسم زقر فيصل ويابه الصالة ودخل قعدوا الثلاثه سوا فيصل: فطوم أنا احبج وشاريج .. وسامحيني على كل شي صار.. وماودي نتطلق.. ابا اعرف انتي شو رايج انتي بنفسج بدون تأثير من أي شخص جاسم: شو تقصد ان نحن مأثرين عليها.. ياخي اعترف عن سواياتك عقب قول هالرمسة فيصل: محشوم بس ابا اسمعها فطوم شريط ذكرياتها مع فيصل يدام عينها.. من اول يوم رمسته فيه.. لليوم الي صار فيه الي صار.. عارفه ان مهما تسوي له ماراح يقدر يوثق فيها.. هيه غلطت ولازم تحمل نتايج غلطها.. ويكون درس انها ماتعيد هالتجربة في عمرها.. فيصل كان شي من مراهقتها ولازم تنساه للأبد.. الحمد لله ماصار شي كبير يفقدها سمعتها.. لكن الدرس الي تعلمته يكفيها للباقي من عمرها .. حاولت معاه كل الطرق.. تحول تليفونها عليه.. وساعات كان يبدل البطايق وياها بس عشان يشوف منو يتصل ومنو مايتصل بها.. في كل شي تسويه تخبره.. ماتخش عنه أي شي .. لكنه ماتغير.. ويوم عن يوم يزيد.. فطوم: فيصل .. انا غلطت غلطة عمري يوم اني تعرفت عليك.. مابا اذكر الي صار.. لكن يكفي انه يكون درس لي اني عمري ما اطيح في نفس الفخ لو شو ماصار.. حاولت وياك وايد ان ترجع ثقتك فيه.. لكن ماشي فايدة.. كان ودي نعيش شرات أي اثنين يحبون بعض ومرتبطين في بعض.. لكن الي اكتشفته ان نحن مانصلح لبعض... فيصل طلب أخير مني.. طلقني أرجوك تضايق فيصل وايد.. وكل الي سواه وقف وهو منزل راسه.. : فاطمه.. إنتي طالق.. انهارت فطوم من صدمتها وصعدت لغرفتها.. وطلع فيصل وجاسم يطالع الموقف مذهول.. كأنه ندم انه طلب هالشي.. لكن هذا الواقع الي كان بيصير سواء ألحين ولا بعد الزواج.. فيصل: ابوي.. خلاص طلقت فاطمة الكل في الميلس وقف من الصدمة.. ويلس يطالع فيصل.. فيصل: السموحة منكم يا جماعه.. سامحوني.. وربي يوفق بنتكم.. وطلع من الميلس وابو فيصل يطالع فيصل ويهز راسه.. بوفيصل: حسبي الله عليك ونعم الوكيل جانك فشلتني يدام العرب.. لا بركتن فيك من ولد.. استستمح من ابو سلطان وطلع.,.. دخل عليهم جاسم سلطان: جاسم صدق الي سمعناه؟؟ جاسم: هيه طلقها بعد ماسمع رايها بوسلطان: لا حول ولا قوة إلا بالله =-=-=-=-=-= خلود: بس عاد فطوم هدي نفسج مب هذا الي كنتي تبينه.. فطوم: صح اني كنت ابا هالشي بس مادري حسيت وايد صعب اني .. خلود تقاطعها: حبيبتي مب زين الي تسوينه بعمرج.. وخلاص لازم تفتحين لنفسج حياة يديدة وتنسين الي مضى فطوم: خليني اسير الغرفه ارتاح شوي.. خلود: بس توعديني ماتفكرين وايد وتنزلين للعشا فطوم تبتسم من ورا خاطرها: ان شاء الله وتوها منى نازله كانت تصيح لأنها سمعت كل الي صار وربعت لحضن خلود.. منى: خلود انا خايفه خلود وهي تمسح على راسها..: منايه من شو خايفه؟ منى وهي تبتسم: الله اول وحده تقولي منايه خلود: هههههههه.. هيه جي اباج.. ليش كنتي تصيحين منى وهي تستهبل: مادري نسيت خلود تضربها على راسها: وايد شيطانة تراج.. منى: هيه خلاص تذكرت.. بس أول قولي لي منايه مره ثانيه خلود وهي تضحك على هبالة منى.. : مصختيها منى: خلاص خلاص.. خايفه من الزواج.. خلاص انا مابا اعرس.. وبعتزل الشعر وعالم الرومانسيه للأبد خلود: أقولج سيري جابلي قيس بن الملوح وايد احسن من مجابلي لأنج بتنهزبين نشت منى وهي تضحك.. عالأقل اخليهم ينسون السالفه.. وانا الي مو لاقيه انسي عمري.. اوووه بألف قصيدة يديدة.. بسرعه بسرعه قبل لا انسى.. منى بطفوليتها عايشه حياتها .. تزعل في دقايق وتنسى كل شي.. .. .. تمت يالسه خلود وهي تهز ريولها.. وفجأة وقفت تذكرت سالفة أحمد.. ابتسمت بخبث ونشت راحت صوب الغرفه تشل تليفونها.. وخذت تليفونها.. واتصلت على طول.. مجد: حي الله هالصوت خلود: ماسمعج .. ريم مسويه حشرة .. مجد: لا تغلطين على صوت بنتي.. جنها كناري فديتها خلود: هههههههههه .. اقول اسكتي الله يخليج مجد: اصلا لو شو ماتسوين مابيوز بنتي لولدج خلود: عداااال ولدي الي بيموت على بنتج ألحين مجد: بتشوفين وبذكرج.. خلود: ههههههه ماعلينا خليني اقولج الخبر التالي مجد: شو السالفه؟؟ أي خبر اليوم انتي مصبحة علي بخبر والحين بتمسين بخبر ثاني شو السالفة خلود: أحمد مجد: لا تيبين طاري هالإسم أرجوج خلود: اسكتي وخليني ارمس يالمزعجة.. أحمد رجع من السفر مجد: شوووووووووو.. متى وكيف وليش ماطرش لي مسج يخبرني خلود: مسودة الويه .. بعد الي صار متوقعه منه يقولج.. مجد: يعني على الأقل يقدر خلود: اسكتي الله يخليج يقدر وحده ماقدرته مجد: خلود انتي اكثر وحدة عالمة بالظروف خلود: مالت عليج انتي وظروفج زين جي مجد: خلووووووووووووووود بس عاااد.. خلود: صه صه.. بتخرعين البنت بصوتج.. والظروف انتي الي تبينها تكون جي مجد: جب سخيفه خلود: عالأقل مب اكثر عنج... خذت الي احبه.. ماضحيت عشان شخص اناني يحكم علي بالإعدام وانا حية عشان شي ماله اساس مجد وكانت خلاص معصبة من خاطرها من اسلوب خلود.. : ترا هالإنسانه اللي ترمسين عنها تكون إختي فاهمة خلود: لا مب فاهمة .. لأن اختج الله يرحمها توفت.. وانتي الي عايشة.. وانتي تفلسفتي وقلتي لإختج لا ما احب أحمد.. وخليتيها تقنعج بالوصية الي مادري على أي اساس تقبلين فيها.. مجد: اقول لمي ثمج قبل الا اييج البيت واصفعج خلود: كيفج امي كيفج.. عيشي حياتج عشان هالوصية زوجة بالإسم بتكونين وبتذكرين كلامي.. وعمرج مابتعيشين حياة عادية ويا عبيد .. لأن لا نفسج ولا نفسه بترضى هالشي مجد تمت ساكته فعلا كلام خلود صح.. بس الي ضدها هم يدتها وخلود.. اما الباقي كلهم موافقين.. خصوصا عبيد نفسه ما افتكر ان هالشي ممكن يأثر في مجد وافق وبينفذ وبس.. ماقعد ويا مجد قعدة صريحة يعطيها مجال ترمس يمكن تغير رايها.. شرات مايقولون مب لاقيه من يدعمها.. تنهدت: خلود بخليج الحين وقت رضاعة الريم.. خلود: خلاص حبيبتي بس فكري دخيلج.. مجد: ان شاء الله بندت خلود عن مجد وهي متضايقه.. مب عارف هالبنت وين راح يكون مصيرها المحتوم .. =-=-=-=-=-= =-=-=-= هزاع صاد وراه يطالع مها وبصوت واطي: هبله انتي هبله.. مها تضحك : لا استهبل ادخل يلا شو تتريا هزاع: الله يعينك يا زايد على أم البلاوي هاي مها: بلاوي منو.. سير يابوي بلا رمسة زايدة يضحك هزاع ويهز راسه فتح باب الميلس : هود.. منال رافعه راسها مصدومه بسرعه تغشت.: هدا .. هزاع: اشحالج منال منال تتطالع من تحت الغشوة ومصدومه.. منال تميزها عيونها الواسعه .. الي فعلاً يجذبن كل من يطالعهن... كانت غشوتها خفيفه شوي.. بياض عينها كانن مبينين .. وهزاع يطالع فيها مب طايع ينزل عينها .. في خاطره يقول كم احلوت هالبنت.. منال بدون نفس: بخير هزاع سكت شوي يترياها تسأل عنه.. بس ماشي فايدة.. : انا الحمد لله بخير منال ميودة ضحكتها غصب.. : انزين انا ماسألتك عن حالك.. هزاع صد الصوب الثاني قافط ويتحرطم.. هاي ويهها لوح شرات مهووي الدعله... منال: انا استأذن.. هزاع: ها لا خلج شوي في موضوع ابا اكلمج فيه منال: موضوع.. ماعتقد ان بيني وبينك أي مواضيع هزاع: لا في موضوع وايد مهم بالنسبة لي.. منال: قول لأني مستعيله.. غريب أخويه بيوصل ألحين عشان ياخذني.. هزاع: لا تخرطين.. أصلا غريب ومها متفقين عشان اني ارمسج.. يلسي وإنتي مطمنه.. منال: الله اكبر.. من وراي.. ماعليه يا غروووب أنا أراويك.. هزاع يبتسم لها: منال سؤال واحد بسألج اياه.. وردي علي فيه بس بإجابة صريحة.. وإذا تحسين نفسج تبين وقت عشان تجاوبين انا ماعندي أي مشكلة.. منال: قول بسرعه .. هزاع: منال لو انا خطبتج مره ثانيه وطلبت اردج.. شو بيكون ردج؟؟ .. بس قبل لا تردين عندي شي اباج تحطينه في بالج.. هزاع الأولي الي عرفتيه مات.. والي يدامج انسان شاريج وهو عارف انه مابيلقى انسان احسن منج.. منال تمت مذهولة تتطالعه.. كل الي سوته شلت عمرها وطلعت من الميلس.. وأول مافتحت الباب شافت مها كانت متسانده عالباب وكانت بطيح.. منال تتطالعها : احسن علج الكسر بعد. . مها تربع صوب منال وتيودها من شطنتها: عنبوووووووج بنت خالتج انا تدعين علي.. تعالي تبين تتضاربين انا ماعندي مانع.. منال: لا انتي مب منال بنت خالي الي اعرفها.. وين الرقة وين الدلع.. مها: رقتي ودلعي بس حق ريلي.. يالله ها قولي لي شو رايج .. الريال يتريا.. منال رافعه حياتها: حلاوة هيه يلا شو رايج.. مها: اقولج ترا انا اعرف رايج لا تخليني اقوله منال: أيه اصطلبي.. خليني اتغلا واسوي عمري ثقيلة.. مها: لوووووتيه طالعه علي منال: جب .. انا سايره وين غريب خل اجتله.. مها: منال لا تحاولين.. انا مرمسه الكل.. وغريب بعد وياي .. والكل موافق.. باقي بس انتي.. منال: يعني مزهبين كل شي من وراي مها: حشا منو قال.. كل شي من يدامج.. والدليل اني قلت لج منال: قلت لج اونه.. متى قلتي بعد ما خلصتي كل شي.. دبه وحده مها: اووووكي حسابج عسير.. وصل غريب في هالوقت ماحس الا بفلعه على راسه بـ بوك منال.. غريب: عنبووج دفشه.. هزااااااااع.. هزاااع وينك .. طلع هزاع من الميلس يطالع منو الي يزقره.. : مرحبا والله بولد الخاله.. غريب يتقرب من هزاع: اووه ماي كازن.. لوك يور فيوووونسييه وايد شريره .. (اوه ولد الخاله شوف خطيبتك وايد شريرة) منال وهي قافطة وفي نفس الوقت معصبه وتتوعد لغريب.. وهزاع مبتسم يطالعهم.. : اصلا انت تسكت .. ماي فيونسيه حره باللي تسويه اطالعته منال ورفعت له حياتها.. وشوي تسمع صوت بو هزاع.. جان تمد بوزها وفي خاطرها: لا بالله كملت الحفلة.. اليوم شكلي برد بيتنا معرسة بوهزاع: انا اقول من وين هالنور.. اثاري منال هني.. منال: احم احم.. عمي شوف هاييل كلهم متفقين علي.. مها: لا انا صح منال: انتي اولهم مها: لا عيل اليوم مابتعشى في بيتنا بتعاقب بوهزاع: تستاهلين . في حد يلعوز هالقمر هزاع: انا بعد اقول جي في حد يلعوز هالقمر بوهزاع: ايا اللي ماتستحي يدامي هالرمسه .. يلا انجلع من يدامي لا اييك شي مايرضيك تم يتحايس هزاع بثمه من فشلته.. لأن الكل ناقع من الضحك عليه.. : اوكي يابوي ماعليه.. يوم بتغدين حرمتي براويج منال: عمي شوف شو يقولي بوهزاع: يهبي.. جانه ريال خله يقرب .. وبيشوف شو بييه هزاع: اقول مهووي قومي انتي وغريب نسوي حزب المعارضه.. مها: يلا ماعندي مانع منال: طع طع .. اتحريتج وياي.. مالت عليج حد يودر هالويه السمح (تأشر على بوهزاع) ويروح لل.. اسكت احسن هزاع يطالعها بغيض وفي خاطره.. عنلاتج خبله شرات اختي.. بس حسابج عسير مالج شردة عني.. بوهزاع: منال يا بنتي تعالي ابا ارمسج شوي.. منال: ان شاء الله وساروا سوا الميلس.. تقرب هزاع من مها ويودها من جتفها: انا اراويج يالهرمه.. ابوي شو يبا من منال؟ مها: شو تتحراني عالمة بالغيب استغفر الله.. يارجل إتقي الله في أختك هزاع يدزها: سيري لا انتي الواحد لا ياخذ حق ولا باطل منج مها طول الوقت تضحك.. ماعندها شي الا تضحك.. جان اتييها الخدامه Housemaid: Madam.. your phone is keep ringing many times please come and answer I got a headache from it مها: طاعو هذي تهزبني بعد.. هاتي التليفون وانتي ساكته هزاع: احسن تستاهلين انتي محد يروم لج غير ديانا مها: هي هي هي.. مايضحك غريب يطالعهم ويضحك على هبالهم.. وراحت مها ترمس تليفون.. هزاع: حي الله غريب.. ها خلصت الثانويه غريب: معلوم مابتعرف شي عني.. خلصت وادرس في المعهد البترولي حالياً هزاع: زييين يالله ربي يوفقك.. الا صدق خالوو وريلها يدرون عن سالفتي غريب: انا رمستهم وقلت لهم كل شي.. وامي ماعندها مانع ولا ابوي عنده مانع. يتريون راي منالووو هزاع: لو سمحت اسمها منال غريب: عاشووو.. من ألحين محامي الدفاع مستوي هزاع: شي از ماي فيونسي اوكي.. غريب: عدال .. خلاص يابوي بنسكت اسفين ابتسم له هزاع..: نش ندخل البيت ونرمس حر برع.. الدنيا صيف =-=-=-=-= فالميلس بوهزاع: ها منال بنتي شو قلتي منال: عمي انا لو ادور الدنيا مابلقى واحد شرات ولد خالتي يستر علي ويحشمني.. بوهزاع: هذا العشم فيج يا بنتي.. على بركة الله منال ابتسمت له : تسمح لي اروح ألحين بوهزاع: سيري ابويه الله يحفظج منال: مع السلامه وطلعت منال من الميلس واتصلت على غريب وردوا البيت مها من سمعت كلام ابوها وهي تيبب ماتسكت.. مها: يافرحتي يااااااااااااااافرحتي حمدان: شو السالفه؟؟ شو هالحشرة.. ام هزاع: انتي اييه يالخبله شو بلاج شالة الدنيا ع راسج مها: من حقي اخوي بيعرس حمدان: اسكتي الله يغربل ابليسج .. منو قال اني بعرس عن تسمعج حرمتي تسوي لنا سالفة مها: اقول هذا يوم موتك الي بتفكر فيه انك تعرس مابيبب لك ويا هالويه.. هزاع الي بيعرس مب انت.. ام هزاع تتطالعهم مستغربة: لحظة لحظة.. فهموني وانا شو هني فالبيت.. مب أم؟؟ مو لازم اعرف كل شي يصير هزاع يطالع امه ويهز راسه ويتنهد..: تعرفين عن كل شي؟؟ ماشفتج تعرفين عني متى ارد البيت ومتى اطلع.. متى اكل ومتى ارقد... متى امرض ومتى انجح ايام المدرسة.. شو تعرفين انتي؟؟ بس الصوالين وأعراس وعزايم حريم أم هزاع: هزاع اسكت.. انت ترمس امك حشم شوي بو هزاع: صدقه ولدج .. انتي متى افتكرتي فيهم. جان ماكان حال عيالج اليوم.. المهم مابخرب فرحتنا بهزاع برمسة وياج مالها معنى لأنج عمرج مابتفهمين شو يعني تكونين ام.. سيري عند الي تعيبين على انها هندية خليها تعلمج اصول الأمومه ام هزاع: نعم.. الحين انت تقارني بذيج الهندية بوهزاع: هالهنديه الي ترمسين عنها.. عيالها لو ما السجود لغير الله شرك.. جان سجدوا لها.. ضحت وعطت لعيالها اكثر مما خذت.. اسكتي الله يخليج ام هزاع سكتت .. لآن فعلا ماعندها شي تقوله حمدان: انزين ومنو الي بتاخذها هزاع يصد صوب امه: مارحت مكان بعيد يا أميه.. باخذ منال بنت خالتي ام هزاع: ومنال شو رايها؟ اعتقد عقب سواد الويه الي سويته مابترضى ترجع لك بوهزاع: استريحي انتي سيري الصالون لا يبند عنج.. رمسنا البنت ورمست انا ابوها.. وماعندهم أي مانع.. أم هزاع محرجة: انتو لغيتو وجودي خلاص.. مالي اهميه عندكم تخطبون وتخططون .. ماباقي الا يملج واييني ويا حرمته يقولي هاي مرتي.. يعد طرش لي بطاقة العرس امييه انزين تقرب هزاع وحبها على راسها: اصلا عرسي ماله معنى بدون وجود امي.. امي انتي عمرج ماحسستينا بالأمومه بس تعطينا بيزات كل يوم وتظهرين من غرفتنا.. عمرج ماطليتي علي تشوفين هل انا متلحف وانا راقد عن البرد.. عمرج ماسألتي عني فالمدرسة شو سويت وكم يبت .. عمرج ما اتصلتي تقولين لي وينك حبيبي تأخرت.. عمرج ماطبختي لي بإيدج وتأكلينا.. كل الي نعرفهم يقولون طباخ امنا كم يسوى وانتي.. ام هزاع ماخلتهم يكملون رمستهم وطلعت غرفتها وهي تصيح.. الكل تم يطالع المنظر متأثر.. اختفت ابتسامة الكل.. خصوصا مها وحمدان.. تنهد هزاع وصعد لغرفته متضايق.. =-=-=-=-=-=-=-=-=-=[/align] |
[align=center] الجــزء الأخيــــر =-=-=-=-=-=-= =-=-=-= =-= = اليوم الثاني في بيت عبدالعزيز عبدالعزيز في الميلس وكان وياه أحمد .. يسلم عليه وبالمره يرمسه في الموضوع .. أحمد راد كل هالمسافة عشان هالإنسانه مب قادر يأجل الموضوع يوم واحد.. ودر ربعه في فندق من الفنادق وعلى طول سار بيت عمه عبدالعزيز: ههههههههه يحليلك يا أحمد .. عيل هاي سوالفك في البحرين أحمد: عمي الصراحة يبالك تسير هناك مره.. عبدالعزيز: هالعيوز تخليني اروح مكان.. دشت جلثم: اي عيوز فينا؟ أحمد نش بسرعه صوب يدته وحبها على راسها: حي الحيا .. حي غرشوبتي.. جلثم: جب عنلاتك الخام خوز عني.. ماباك ريحتك ريحة غرشوبة بحرينيه.. أحمد: أفااا يا امي هاي رمسة .. انا ولدج تربيتج.. جلثم: عيل هاي سواة تسويها تسافر وتودرنا تخليني اشتاق لك أحمد: شو اسوي ابا اشوف غلاتي عندكم عبدالعزيز: يا أحمد غلاتك عندي غلاة ولدي الي الله ماكتب اني اييبه أحمد: سلمت عمي عساك ذخر يارب عبدالعزيز: والله يا إحمد لو كنت ادري بالموضوع من البداية لا حرمت بنتي تكون لغيرك أحمد انصدم.. وصد صوب يدته: مافيج صبر لين ما انا ارمس يعني جلثم: انت ماتدريبي مابات الليل وانا افكر فيك وفي هالفقيره الي فوق.. أحمد: محد فقير غيري.. ومجد درت بالموضوع عبدالعزيز: لا بعدنا مارمسناها جلثم: بعد مايباله تشاورونها البنت موافقه من عيونها تبان أحمد: يدوو ماحيدج تعرفين تجذبين وانتي شدراج جلثم: جب .. جب يلا لم ثمك بلا رمسة ماصخه.. قالي اشدراج.. انت والباقي لو تروحون السما وتنزلون انا يدتكم ماترومون تخشون علي شي .. عبدالعزيز: في هاي صدقتي امي.. جلثم: قم يلا من يدامي .. يالصخام أحمد: امي بلاج اليوم علي .. ماخذتني بشراع وميداف.. جلثم: قم ماعنا بنت انيوزك اياها .. لسانك غادي طويل يباله قص أحمد تقرب من يدته : افا والله .. لا لا كله ولا انكم ماتيوزوني اياها.. عبدالعزيز ضحك على عفوية احمد إلي نفسه من انتبه لكلامه استحى يدام عمه.. بس عبدالعزيز مازعل منه.. تذكر نفسه يوم كان يحب لطيفه وكيف امه تهزبه لأنه كان دوم يطفر بها لين ماوافقت عليه.. دخلت لطيفه مستانسه تسلم على أحمد وترحب به لطيفه: عيل هاي سواة تسويها يا أحمد .. تسافر وانت زعلان علينا.. أحمد: ماعاش الي يزعل منج عمتي لطيفه: يعني جان ييت ورمستني وقلت لي.. وانا من لي اغلى منك يا ولدي أحمد: عساج ذخر عمتي.. لطيفه: سلمت يا ولد ميثا.. الا وينهم الخدم مانجبو الغدا.. جلثم: خدمج هاييل كلهن لازم ينراغن.. ولا خليني اصلخهن بهالعصا في الحوي.. عشان يتأدبن لطيفه: لا أميه حرام عليج فقاره هاييل مساكين جلثم: محد فقير فهالبيت غيرج يا لطوف.. لطيفه: ههههه.. مجد كانت فوق في غرفتها طول الوقت ماتطلع اصلا.. تعابل الصغيره.. لأن مقرر في هاليوم يودونها بيت عبيد .. واتم هناك اسبوع ويردونها.. مجد تتضايق بس في النهايه ماتقدر تحرم البنت من ابوها.. سمعت صوت أمها تزقر عليها.. مجد: امي خفي صوتج ريم راقدة.. لطيفه: انزين البسي المخورة .. وشيلتج ونزلي نتغدى ولد عمج هني.. مجد برطمت ومشت صوب الغرفه.. ها بعد ليش مستعيل .. بنييب له بنته اليوم .. الا ايي من الحين ياخذها .. عالأقل يتريا القايله خلاف ايي ولبست لها مخورة كحليه.. عليها تطريز خوص بالفضي.. ولبست لها شيلة ونزلت.. لطيفه: الله شو هالزين شو هالحلاة كلها.. ربي يبلغني فيج عروس افرح بج واشوف عيالج يارب قولي امين مجد تبتسم لأمها: امين يا أحلى ام.. مشت ويا أمها ودخلت الميلس.. شافت أحمد بس من ظهره فماقدرت تعرف منو ها.. او بالأحرى مب مستوعبة.. معقولة عبيد ضعف جي.. (لأن عبيد مليان شوي .. وعريض).. مجد: السلام عليكم.. وقفت اللقمة في بلعوم أحمد الي من سمع صوتها رفع راسه طاحت عيونه في عيون يدته الي تمت تلعب له بحياتها.. عبدالعزيز: حياج تعالي.. عليج السلام مجد استغربت ليش مارد عليها السلام عبيد.. اول ماتقربت صوب السفرة وقعدت وشافت ويهه... ردت وقفت من الصدمة.. الكل انتبه لها.. وهالشي الي أكد لأمها وابوها ان مجد فعلاً في مشاعر تكنها صوب أحمد وانتبهت لنفسها وردت قعدت تمثل انها طبيعيه.. مجد: حمد لله عالسلامه ولد عمي.. أحمد: الله يسلمج.. مجد تقرب من يدتها: العادة منقود الحرمة تيلس ويا اخو خطيبها او بالأحرى ريلها.. واشعنه زاقريني جلثم: انجعمي.. تقول منقود اونه.. انتي تعرفين المنقود اصلا.. استريحي وكلي انتي بس.. فكينا الله يخليج.. وبعدين منو الي اخو خطيبج..؟ مجد فاجه عيونها مستغربه من رمسة يدتها.. : شو منو .. يدو لا تخبلين بي.. جلثم: محد غيرج الخبل في هالبيت كله.. ومن عقبه امج ضحكت مجد يوم سمعت طاري امها.. لطيفه: شبلاكم تصاصرون.. خلونا نضحك وياكم مجد: لا ماشي.. مجد تمت تلعب بالعيش الي غرفته ومب قادرة تاكل.. ولا أحمد قادر يركز في أكله وياكل عدل.. نش أحمد: تسلم إيديج مرت عمي.. لطيفه: هني وعافية.. بس ماكلت شي أحمد: لا تسلمين شبعت.. ونش احمد وسار الحمام.. ومجد بعد نشت لطيفه: مجد أمي ماكلتي.. مجد: لا بسني شبعت امي.. جلثم: هههههههههه لواتة بنات.. سيري فديتج سيري.. مشت مجد بدون لا ترد على يدتها ولا بالعادة لسانها طويل.. وصدت جلثم صوب لطيفة وعبدالعزيز: يوم اقولكم ماتصدقوني لطيفه: اششششش البنت ماتعرف شي جلثم: مصيرها بتعرف كل شي.. =-=-=-=-=-=-= طبعاً شرات ماعرفنا ان الدكتور محمد وطيف ملجوا.. محمد: يلا عاد حبيبي ماجهزتي.. محلات المفروشات كلهم بيبندون وانتي بعدج طيف: انزين يايه والله نازله دقيقة بس.. محمد: اترياج في الموتر طيف: اوكي.. وطلعت طيف من بيتها وركبت موتر محمد محمد: مابغيتي العروس تتجهزين طيف: انت ماخبرتني الا ساعه قبل يادوب وحالي اتزهب.. محمد: مره ثانيه بتصل بج 8 ساعات قبل زين طيف وهي تبتسم له: هيه زين محمد : وافديت هالإبتسامه.. يالله مابقى شي نفرش الشقة ان شاء الله ونعرس واجابلج 24 ساعه طيف: خيبه بمل منك جي.. محمد: شو ماسمعت عيديها مره ثانيه.. طيف: ها ماشي سلامتك .. محمد: اتحرى بعد اني سمعت شي.. تبتسم له طيف ويتحركون صوب محلات المفروشات عشان يكملون فرش الشقة ويستعدون للزواج.. =-=-=-=-=-= مجد تمت يالسه تتطالع من الجامه.. تذكرت اليوم الي كانت تشوف فيه أحمد على اول ايام زواج حور.. كانت هيه وخلود في نفس هالموقف وهن يشوفن أحمد تحت.. ابتسمت وهي تتذكر الي صار =-=-=-=-= (نرحع بذاكرتنا للبارت الثاني من القصة) مجد وخلود كانو جريب الدريشه ويسولفون.. فتحت مجد الستاره شوي عشان تشوف برع.. شافت احمد.. وتمت تتطالعه..أحمد مغرور شوي لجماله.. حنطاوي وخشمه طويل شرات اخوهعبيدشرات ماقلت قبل .. هذي علامة العايلة.. أحمد طبعه يخفلحيته شوي واما شواربه شوي تكون أغلض.. الكل يحط عليه.. بس هو ولا مهتم.. من طبعهلا اطالع وحده وركز فيها يرفع حاجبه اليسار عيونه عيون بدويه وسيعه وخامله شوي عندهشامه صغيره شوي في رقبته ومطول شعره شوي على حد اذنه وشوي اطول ... تقربت منها خلودواطالعت احمد وتساندت على الدريشه وجابلت مجد: هيه انتي وين سرحتي.. مجد: ههههههه.. لا بس اشوفولد عمي فيها شي.. خلود: ابد مافيها شي.. وماعليج منه يغازل اكيد احين.. مجد: اشووو؟؟ خلود: يحليلج نسيت انج ماتدرين عنه شي.. هذا الي تشوفينهمامخلي بنت لحالها.. ياما اكتشفت ان بنات اعرفهن يرمسهن.. من جي اقول لج مادانيه.. مجد: لو درت به يدتي تدرينشو بتسوي.. خلود: هههههه.. لا ماتخيل شو بتسوي فيه.. مجد تمت تتطالعه وتحس قلبها يعورها.. ماترضى ان ولد عمهايكون جيه.. تذكرت اسلوبه وهو يرمسها امس .. قبل لا يعرف انها بنت عمه كان عاقالكلفة شوي.. صكت الستاره بقهر ومسكت ايد خلود .. =-=-=-=-= تنهدت وفتحت عينها شافته مره ثانيه في نفس المكان.. وهو يتعبث بتليفونه.. مجد: بوطبيع مايوز عن طبعه.. وشوي تسمع صوت التليفون.. يوصل لها مسج وصدت صوب الجامه تشوف أحمد إختفى.. راحت صوب التليفون تشوف المسج من منو < تغازلين منو اعترفي شفتج.. الظاهر خطيبج ماصلبج عدل> يلست مجد تتطالع المسج .. هذا من صدقه ألحين ولا يستهبل.. ردت عليه < يوم بتكون ولي أمري وقتها تعال إتأمر > قرا أحمد المسج ويلس يضحك... ولي أمرج غصبن عنج الدبه .. انا براويج ماعليه.. لسانها طويل بنت عبدالعزيز.. < لسانج يباله قص > تقرا مجد المسج وهي مغيضه.. < دخيلك تعال قص لي إياه > أحمد مايعرف يغيض ولا يضحك على رمستها.. صدق هالإنسانه تعني له أشيا وايدة ويتم يحبها لو شو ماتسوي.. < بييج يوم وبتفهمين كل شي > مجد لا إرادياً رفعت حياتها مستغربه.. هذا شو قاعد يخربط.. لا اليوم محد صاحي.. ورن تليفونها فزت من مكانها. كان عبيد الي متصل فيها.. عبيد: اقولج انتي اييه... هاتي البنت تحت اترياج؟ مجد تبا تستوعب.. هذا عبيد ليش يرمسها بالإسلوب.. لا بالله اليوم الكل مينون رسمي.. : شو ايه ماعندي اسم.. عبيد: اقولج بلا طولة لسان ورمسة مالها معنى.. يلا هاتي الريم اتريا مجد: لا والله.. السالفه عناد يعني.. اخبرك البنت مابتنزل اوكي عبيد: مب بكيفج.. يوم بتكون البنت بنتج اتحكمي فيها مجد: بنتي غصبن عن الي مايرضى.. راوني شو بتسوي.. عبيد: اكسري الشر وانزلي وياج البنت.. جلثم تتطالع عبيد ومستانسه .. لأن الي قاعدين يبون يسوونه يخلون مجد من نفسها تكره عبيد وترفضه نهائيا.. وعبيد نفسه مب هاينه عليه يسوي هالشي.. بس عشان سعادة أخوه يهون عليه كل شي مجد: اقولك مب يايبه البنت يعني مب يابتنها.. دام السالفة فيها عناد.. انا محد كثري عنيد.. عبيد: سمعي انا مافي شي بيمنعني ادش الغرفه واشل بنتي واسير.. مجد: لا والله ليش تهدد.. تعال ونفذ.. عبيد بند في ويهها.. وصد صوب يدته.. عبيد: والله اميه لو سرت فوق بتتصفع هالبنت على إيدي.. لسانها طويل.. جلثم: يوم أقولكم مجد ماتليق لـ عبيد.. انتو ماشي كل شي عندكم بالعناد.. عبدالعزيز: عبيد نحن اتفقنا انك اتشد عليها بس مب جي.. عاد هاي بنتي مابتهون علي.. لطيفه: تدرون لو العرب يدرون بسواياكم هاي بيضحكون.. اسميكم مب صاحين.. شو هالأحمد الي خلا العايله كلها تنجلب.. جلثم: هاي فيها سعادة بنتج يالهبله.. لطيفه: عمتي عاد من الصبح وإنتي ماعندج غير تحطين علي.. خفي شوي علي عبدالعزيز: فديت هالعيوز انا.. جلثم: أي عيوز فينا.. عبدالعزيز: اثنينكم تاج راسي ونور هالبيت عبيد: يالله انا ساير فوق .. واسمح لي عمي انا ماقدر امثل زود.. مجد شرات اختي وماتهون علي.. برمسها وبقولها اني ماباها .. وبنهي الموضوع ليش انطول السالفة جلثم: شوفو الأيام كيف تتغير.. بين يوم وليله الحال تغير بالمره.. عبدالعزيز: والله ودنا نفرح ونستانس وننسى الهم شوي.. لطيفه: بس عمرنا ماراح ننسى حور ربي يغفر لها يارب عبيد: شي أكيد.. =-=-= مجد في هالوقت في غرفتها وتتطالع الباب تتريا في أي لحظة إن عبيد يدخل.. وفي نفس الوقت تحس ان في شي مو طبيعي قاعد يصير.. الكل غير طبيعي.. قاعدة تستوي اشيا اول مره تشوفها في حياتها.. كأنهم خلال يوم وليله نسوا كل اللي كانو متربين عليه وقوانين سنتها العايله.. وشوي تنصدم بدخول عبيد.. تمت مذهوله تتطالع مجد: قبل لا تنطق بأي كلمة.. عبيد فهمني شو اللي قاعد يصير.. أنا متأكدة ان في شي مب طبيعي.. مو معقول الي قاعد يصير.. اليوم اجتمع ويا اخوك على نفس السفرة.. ويطرش لي مسج ويقول الي يقوله.. وكلام يدتي.. والحين انت دخلت غرفتي وها اكبر منقود في العايله.. كيف ابوي سمح لك تدخل؟؟ ابوي الي دومه متشدد في كل شي.. لا في شي غير طبيعي.. ممكن تفهمني.. عبيد صد وراه وشاف عبدالعزيز واقف يهز راسه .. كأنه يقوله قولها.. ابتسم عبيد.. عبيد: انزين ممكن تطلعين الصالة.. برمسج في موضوع.. مجد مشت برع غرفتها .. كانت بتبند الغرفه بس تذكرت الريم.. خلت الباب شوي مفتوح.. وقعد عبيد ومعاه مجد.. وعبدالعزيز واقف.. ومجد مصدومه تتطالع مجد: ارمس لا تحرق أعصابي عبيد: مجد بإختصار.. أنا ماباج.. وحرام اظلمج وياي على حساب وصية .. مجد تمت تتطالع عبيد مستغربة من رمسته.. : لا والله.. وكلام حور ماله معنى عندك عبيد: حور كلامها على عيني وراسي.. بس ردي علي بصراحة.. يرضيج تتزوجين انسان هو في غرفه وانتي في غرفه.. والي يجمعكم بنت بس عشان تربيتها.. يرضيج تعيشين زوجة بإسم بس؟؟ اذا هالشي يرضيج انا ماعندي مانع.. مجد تنصدم أكثر.. وتصد صوب أبوها.. عبدالعزيز: مجد نحن تهمنا سعادتج وسعادة عبيد.. والعايله كلها اجتمعت على إنج انتي وعبيد ماتصلحون تعيشون سوى.. حور بنتنا والله يرحمها وغلاتها وغلاتج واحد عندنا.. مابنفضلها عليج ونحتم عليج حياة تنظلمين عشانها مجد نزلت دمعتها وهي تتذكر كلام اختها.. : بس .. عبيد: لا بس ولا شي.. يا بنت الناس انا نفسي ماتطاوعني آخذ اخت حرمتي خلاص عاد.. كنت قبل مهووس بالوصية وبعدني كنت في فترة صدمة من فراق حور.. لكن يوم فكرت فيها بعقل .. اصلا الزواج ماراح يكون صحيح.. لأن كل الطرفين هدفه من هالزواج إرضاء نفس ميته.. على حساب تعاسه إنسان.. مجد ماقدرت تيود عمرها ويلست تصيح.. : محد حس فيه غير يدتي.. والله يا عبيد ماتدري برمستك هاي اشكثر ريحتني.. مابات الليل وانا أفكر كيف بتكون حياتي .. كنت اقولكم انا موافقة وفي قلبي إمية طعنة وطعنة.. ربي يوفقك يا ولد عمي.. بس لي طلب واحد بس.. عبيد ابتسم لها.. ولطيفه تسمع رمسة مجد وتصيح انها كانت بتدمر بنتها بدون لا تحس.. وجلثم مستانسة.. : تامرين بنت عمي مجد: الريم تتربى عندي.. ويتم شرات ما اتفقنا البنت تكون هني اسبوع واسبوع عندكم.. عبيد: لج الي تامرين به.. بس مره ثانيه يوم اقولج نزلي البنت نزليها.. مجد تضحك.. : ان شاء الله.. عبيد: وتسمحين لي يدام عمي ويدتي وعمتي .. أخطبج لواحد يعزج ويقدرج.. ويسوي أي شي مقابل بس يفرح فيج وتفرحين به.. مجد مستغربه وتصد صوب أبوها.. عبدالعزيز: وإذا انتي تأمنين برمسة أبوج وتوافقين رايه.. هو الإنسان المناسب لج مجد ترد تصد صوب عبيد تترياه ينطق.. عبيد: احمد يا مجد.. ابا اخطبج لأخويه أحمد -------------------------------------------------------------------------------- مجد ماتعرف تضحك ولا تصيح ولا شو تسوي بالضبط لأنها صدق مصدومة من كل شي قاعد يصير.. معقولة بهالسرعه الأمور تمشي.. وألحين يمكن قدرت تحصل تفسير لرجوع أحمد من السفر.. بس كانت حاسه نفسها مب قادرة تقعد وياهم زود.. مب قادره تتطالع في عيونهم لأن عيونها فضحتها.. طلعت من المكان وردت غرفتها.. عبيد: انزين ييبي لي بنتي.. دخلت الغرفه ويابت ريم.. وشنطتها.. وكان ابوها اقرب واحد لها.. سلمته ريم وحطت الشنطة على الأرض ورجعت لغرفتها وبندت الباب.. عبدالعزيز: آخ منكن انتو البنات.. عبيد: هات بنتي ولهت عليها .. وشل عبيد بنته وكانت في هالوقت البنت راقده ولكن كانها مبتسمه.. حبها على خدها وهو مستانس اخيرا ارتاح ضميره.. جلثم: وين على الله عبيد: بسكم ماشبعتوا من بنتي خلوني اشوفها شوي تولهت عليها جلثم: الله يبلغك فيها عروس ان شاء الله عبيد يبتسم: آمين يارب.. وطلع من البيت.. لطيفه صاعدة الدري بتسير عند مجد جلثم: انتي وين سايرة؟ لطيفه: سايره عند مجد بشوف شو حالها... جلثم: تعالي هني خلي البنت تفكر شوي ع راحتها.. عيوز مخرفه لطيفه: هههههههه ردينا.. على امرج ننزل ----=----=----=---- في غرفة مجد -=-=-=-=-=- واقفه يدام المرايه تتطالع عمرها شوي تضحك.. وشوي تكون عادية.. معقولة الي قاعد يصير صدق.. لا لا أكيد أنا أحلم.. خل اسير اغسل ويهي.. من التعب مب راقدة عدل قمت احلم وايد.. سارت الحمام.. وغسلت ويهها مره.. واطالعت بالمرايه.. لا بعدني راقدة.. ردت غسلته مره ثانيه.. لا انا مب راقدة.. مب راااااااااااااقدة.. وتضحك بصوت عالي.. وعقب تحط ايدها على ثمها عنلاتج احين بيفهمون عليج وبيقولون البنت مب مصدقه انها بتعرس تذكرت خلود واتصلت فيها على طول.. مجد: هلا بهالصوووووووووت .. مرحبا ملاييييييييين.. حي من سمع هالصوت والله.. فدييييييييتج انا .. ولهت عليج يالغاليه بنت الغاليه .. بنت عمة الغالي.. اشحالج شخبارج؟؟ واشحال الي في بطنج.. وشخبار ريلج واهل ريلج.. سلمي عليهم سلام كثر وقولي لهم مجد تسلم عليكم ذاك السلام اللي من القلب للقلب.. خلود تسمع مجد وكل شوي تتطالع شاشة التليفون.. كأنها تبا تتأكد ان راعية المكالمة هيه مجد.. مجد: خلودووو بلاج ماترمسين.. خلود: لا مستحيل انتي مجد شو هالحب والحنيه الي نازله عليج مجد: من اليوم وساير مابتشوفين الا الحب والحنان وكل شي حلو من صوبي خلود: هههههههه مجووود شو بلاج.. الظاهر هالبنت خلتج تستخفين.. مجد: لا وانتي الصاجة.. ابوها الي خلاني استخف خلود: لحظة ابو منو تقصدين مجد: ابو ريم .. الظاهر انتي بعد مستخفه خلود: والله الي يسمع رمستج لازم بيستخف مجد: اسكتي اسكتي .. اسمعي الخبر التالي.. أحمدوو خطبني خلود نشت من مكانها من الصدمه.. وجاسم يطالعها مستغرب.. : حبه حبه علي الله يخليج.. قلبي بيوقف لا تصدميني بهالطريقة.. كيف ومتى وشقايل.. عطيني كل التفاصيل مجد: اصصصصص ولا كلمة بقولج.. تعالي بيتنا عقب بقولج خلود: جااااسم الحق علي بيغمى علي.. جاسم سحب التليفون من خلود: انتي اييه شو تبين من حرمتي .. ناويه عليها ولا شو السالفه؟؟ مجد: ههههههه جاسم انت وخلود معزومين على ملجتي انا وأحمد جاسم: خلود اتريي لا يغمى عليج انا بعد بيغمى علي وياج.. مجد يلست تضحك على هبالهم.. وبندت عقب.. =-=-=-=-= فطوم: شو السالفه خلود: مادري للحين مب فاهمه شي.. مجد بتاخذ أحمد فطوم: الله وناسه.. ومتى خطبها ؟ خلود: مادري.. منى: عيل بسير اكتب قصيدة فطوم اتيرها من شعرها: تعالي انتي لا اتخليني اكتب مرثيه عليج.. منى: ويه بسم الله علي ليش هالفال.. فطوم: بس .. انزين جاسم انا ومنى يايينك في سالفه نبا نرمسك فيها.. جاسم: خير قولو.. منى: شوف جاسم .. الإنسان عندما يجتهد ويتعب يحتاج من بعدها إلى فترة نقاهة أليس كذلك.. جاسم وهو يضحك .. : نعم نعم.. فطوم اتدز منى : خوزي انتي ويا مقدماتج .. بإختصار.. باقي على الدوامات اسبوعين.. ونبا منك اتودينا صلاله.. تغيير جو.. جاسم يصد صوب خلود: لا تتطالعني انا توني حامل مابقدر ايي.. وخواتك من حقهن الصراحة.. اذكر يوم خلصت الثانويه سافرنا شهر فرنسا وردينا.. جاسم: بس الإخت ناسيه شي وايد مهم فطوم: شووو جاسم: الجامعه منو بيسجل فيها .. أمي.. فطوم: ههههههه نسيت سالفتها.. خلاص باجر شو.. الأربعا.. يعني مجال التسجيل بعده.. بنسير وياك باجر وبسجل في كلية الطب.. جاسم: وبعدين في شي ثاني نسيتيه منى: لحوووووول بعد شو وراها هاي جاسم: امتحان تحديد المستوى فطوم: انزين جاسم يعني مابنسافر.. (كانت متأملة انها تسافر على الأقل تغير جو وتطلع من جو الإكتئاب الي هيه فيه.. صح ان منى مامعطتنها مجال للتفكير بالمرة.. لكن هذا مايعني ان ذهنها صافي. توها كملت 24 ساعه من طلاقها.. وهي في هالعمر صعب عليها تتقبل مثل هالأمور بالسرعة هذي).. فطوم كانت الدمعه في عينها.. طلعت من الغرفه وصعدت غرفتها.. منى: شفت عاد زين جي.. خليت اختي الوحيدة تصيح.. انت عارف نفسيتها كيف.. تحتاج انها تغير جو عشان تنسى.. وتقولها دراسه.. لاحقه عليها.. حتى لو ضيعت هالفصل .. عندها الفصل الثاني.. فالنهاية بتسير جامعه خاصه يعني عادي اي وقت.. لا تشد عليها.. خلود: جاسم صدقها منى اول مره ترمس بعقل.. منى تقاطعها: كلي عقل اصلا.. خلود: لازم تغير جو.. فطوم عمرها 17 سنه.. والي صار مب شوي على وحده بهالعمر.. جاسم: خلاص قولي لها يوم الجمعه ان شاء الله بنتحرك.. منى: وااااااااااااو ربعت حبت اخوها على راسه وسارت تبشر فطوم الي طارت من الفرحة من صوبها.. =-=-=-=-=-=-=-=-=-= بهذا تكون كل الأوضاع مستتبه في بيوت أبطالنا مجد ملجت وبدت تتجهز للعرس.. وطبعاً طلابنا وطالباتنا (خلود.. مجد.. منى.. فطوم.. عمّار ) كلهم رجعوا للمدرسة.. لحظة نسيت الزعيم .. علاوي اخو خلود.. كل دخل أمامه درب ومستقبل يكمل مسيرته فيه فطوم : صيدله في جامعه الشارجة منى: بعدها في المدرسة.. لكن عمرها مانست الشعر وهوسها فيه خلود: تكمل دراستها في جامعه زايد وهالسنة تخريج.. وغير انها متأقلمة مع وضعيتها اليديدة.. الحمل مجد: سنه تخريج.. وتستعد لزواجها في عطلة الربيع.. عمّار: شرات ما وعد أمه.. إلتحق بكلية الإمارات للطيران.. يدرس فيها طيران.. هزاع: الحبيب بعد عذاب ومذلة من الخطيبة منال.. وافقت عليه بشروط... وهزاع ماكان عنده اي مانع.. التحق بكلية خاصه يكمل فيها دراسته بتشجيع من منال.. ويستعد لتحضيرات زواجه الي تقرر في الصيف الي بعده وهذا لأن أم منال مسافره مع اخوها للعلاج برع البلاد.. شما: مستانسه مع سلطان الي مب مقصر عليها بشي.. تحسنت احوالهم المعيشيه.. وصار عندهم بدال الخدامه .. هنتين.. يساعدن أم شما في البيت.. وعمّار قام يكشخ بأحلى واحدث السيايير وكل الي في خاطره كان مايقصر فيه بوهزاع.. اممم زواجها من سلطان.. تقرر انه يكون بعد ولادة خلود.. حضرتها تبا تكشخ.. حركات حريم الدكتور محمد وطيف.. تحدد زواجهم بعد عيد الفطر خوله وخليفه حياة مستقره وطبيعيه .. أحمد: يشتغل مدير لشركة عبدالعزيز.. ومسانده في كل شي.. عبيد قرر يكمل دراسته ويشغل نفسه وسجل في احدى الجامعات يكمل فيها ماجيستير.. والزواج مشروع وارد ولكنه مؤجل نوره بواسطة ابوها .. قدرت تشتغل في احدى الشركات .. مترجمه.. لأنها تتقن الفرنسية لظروف سكنهم السابق هناك .. والإنجليزيه.. وبدت تشغل نفسها.. والعيال تمن شرات ما اتفقت شيخه مع اهل زوجها.. لحظة.. على شو مستعيلين.. ماخلص البارت.. هناك أحداث أخرى تنتظركم مرت الشهور وكلن على حاله.. وصلنا لليوم الي الكل يترياه يوم زواج أبطالنا مجد وأحمد =-=-=-=-=-= خلود وهي تمشي ببطئ.. حاسه بالثجل.. دخلت الشهر الخامس.. وبدا الحمل يبين عليها.. تمشي صوب مجد.. وتبتسم لها.. مجد: ههههههههه شكلج يضحك بهالبطن.. خلود: ماعليه بييج يوم وبضحك عليج اتريي.. الله يسامحج انتي ماعرستي الا يوم انا حامل.. الحين كنت برقص لج.. مجد: ارقصي وانتي حامل دخيلج خل نضحك شوي.. خلود: سباله .. طاعو هاي تباني ارقص عشان تضحك علي.. مهرجة يدامج انا.. مجد: ههههههههههه.. انزين قولي لي.. شكلي مرتب.. احس مكياج عيني اليمين وايد غير عن اليسار.. مب شي خلود: لا غير ولا شي.. بالعكس وايد حلو.. انتي يتهيأ لج من الربكة مجد: تتوقعين يستانس يوم يشوفني.. خلود: انتي أصلا سخيفه.. عمري ماشفت انسانه شراتج في هالدنيا... عيل شي حرمة شراتج ماترمس ريلها طول آخر 4 شهور من العرس ولا تخليه يشوفها.. بس مسجات جنكم مادري شو مجد: هههههههه هيه انا جي.. انتي شو عرفج اصلا.. عشان يشتاق لي خلود وهي تسوي لها حركة مالت.. : مادري على شو يشتاق.. مجد وهي تتطالع خلود بنص عين: لا والله.. اوكي ماعليه خل يخلص العرس براويج خلود: ههههههههه انتي اصلا من اطير طيارتكم بتنسين كل من حواليج مجد: لا فديتج ما انسى حد.. خلود: انتي من صجج بتودين الريم وياج السفر.. انتي في شهر عسل كيف تودين البنت وياج مجد: خلود.. شرط زواجي كان ان البنت تتربى عندي.. انا امها.. خلود: بس السفر احسها مصاخة منج.. ترا الياهل عندها ابو لو نسيتي.. مجد: لا مانسيت.. والبنت منو قالج انها بتسافر وياي.. بتكون عند ابوها.. بس يوم ترجع بتعيش وياي خلود: ماختلفنا يوم ترجعين شي ثاني.. دخلت عليهم مروه الي كانت لابسه فستان أصفر .. بسيط وايد.. وفاله شعرها الطويل.. : يالله العروس متى ناويه تنزلين ان شاء الله يوم يروحون المعازيم.. مجد: ههههههه بنزل بس اخلص تصوير خلود: بطرانه مرت اخوج وايد خقاقه مجد: كيييييييييفي.. مب مرت أحمد.. من حقي اخق.. مروه: ويييه سكتتنا الصراحة.. مجد: ههههه.. المصورة: خلك هيك .. بدي صورك هالصورة.. .. .. .. .. طلعت مروه وسارت تشارك الحريم في الصاله الي كانو يستقبلون الضيوف.. كان الجو في الصالة روعه.. نورة كانت يالسه على نفس الطاوله الي يالسه فيها عمتها وخوات ريلها.. والعنود ومهره عيالها.. وفطوم ومنى يرقصن ويا باقي البنات على الإستيج.. تقربت منى من فطوم وتهمس في إذنها: منى شوفي تحت.. صوب الحاجز.. عاليمين.. في حرمة ماشلت عينها من عليج وانتي تمشي وحتى ألحين ياسه تتطالع فطوم صدت الصوب الي وصفته لها منى: هيه هاي بنتها ويانا في الجامعه بس اكبر عني بسنة.. منى: اهااا.. .. .. نشت شما وشاركتهم الفرحة.. والكل تونس عليها.. مريم: بس ماشاء الله عليج صدق عرفتي تنقين حرمة لولدج ماشاء الله عليها حلوة والكل يمدح فيها.. شيخه: هيه فديتها .. وطيبه وايد بعد.. مريم: الله يهنيها ويا ولدج ان شاء الله شيخه: تسلمين عقبال ولدج طارق.. مريم: طروووق هذا عازف عن الزواج خليه.. الا صدق متى بيكون عرس سلطان ان شاء الله؟.. شيخه: تعرفين حركات البنات .. خلود متشرطة عليهم ماتعرسون الا بعد ولادتي اذا الله راد ان شاء الله.. مريم: هيه .. يالله بالبركة ان شاء الله.. وشو احوال نوره بنتج وشو نفسيتها ألحين.. شيخه: الحمد لله وايد احسن.. مشغوله ويا عيالها.. وتشتغل فديتها في شركة تقضي وقتها على الأقل وملتهية مريم: زين تسوي.. ربنا يصبرها.. جلثم قاعدة حذالهم وراسها معورنها من أسئلة هالحرمة.. كل شوي تسأل عن شي.. مريم: الا العروس متى بيدخلونها.. صدت جلثم صوب الحرمة: انتي يا حرمه ماتعرفين تسكتين.. الله يعين ريلج عليج.. خليتي حد مانشدتي عنه .. تأكدي دوري عدل فالصالة يمكن تلقين لج حد ماسألتي عنه.. قفطت مريم .. وشيخه ودها تضحك بس ميودة نفسها.. وشوي نادت ميثا عليها لأن العروس بتدخل.. والحريم يبن يساعدونها .. مجد وهي واقفه ورا باب الصالة وهو بعده مسكر.. مجد: خلود احس ريلي تتراقل (ترتجف) من الخوف.. ماعرف كيف بدخل.. خلود:عادي امشي على ريولج وادخلي مايبالها مجد: سخيفه تدرين.. افففففف مامنج فايدة خلود: ههههههه.. ماعليج انتي خلج طبيعيه.. عشنا هالتجربة قبلج.. اول شي تحسين انه يزيغ بس خلج طبيعيه .. مجد: اقول غيرت رايي مابا اعرس.. دشي بدالي وقولي لهم العروس كنسلت العرس مروه: طاعو هاي انتو.. توها تقول انا مرت احمد ومن حقي اخق.. والحين اسمعيها شو تقول.. اونه كنسلت العرس.. بكيفج.. مجد: الصوت يخوف.. احس وايد ناس داخل.. خلود: هههههههه مادري وين داخله مسرح أوبرا عشان يكون وايد ناس داخل.. الا هي صالة عرس .. مجد : انزين يلا افتحوا الباب.. مروه : قوية هالبنت.. ههههههه شديدة ماشي تفاهم كله تامر.. وفتحوا الباب على انغام موسيقى كلاسيكية.. ومشت خطوتين لين ماوصلت للمدخل.. وعقبها بدت تكمل مشيها وهي تتطالع الحضور بإبتسامة خفيفه تخفي من وراها فرحة وخوف من الموقف.. كانت طالعه جميله وااايد.. الكل لاحظ ان مجد ضعفانه.. قبل كانت غزوزها مبينه.. وألحين ماشي.. الفتره الي مرضت فيها حور.. وبعد وفاتها أثرت على الكل.. خصوصا على مجد.. اثر هالشي على تغذيتها وغير قلة النوم عشان الريم.. لكن عمرها ماشتكت ولا تعبت.. ودومها تقابل الناس بهالإبتسامه.. تبا تبين للكل انها سعيدة .. وهي فعلاً في هاللحظة تمتلك كل مقومات السعادة الي تخليها مستانسه من نفسها والي يصير حواليها.. مشت وهي سرحانه .. تحس نفسها تمشي صوب عالم يديد راح تدخله وتبدأ مشوار حياتها مع انسان طول عمرها حبته.. يارب ماتخيل عمري كنت بكون لغيره وخصوصاً أخوه.. آآآه كان بيكون اصعب شي.. كان ودي في هاليوم تحضره اختي الغاليه بس الحمد لله على كل حال.. وصلت الكرسي ونست انها لازم اتم واقفه 5 دقايق على الأقل.. يلست على طول.. يودتها مروه وقفتها.. مجد: شو بلاج؟ مروه: نسيتي لازم اتمين واقفه مجد: هي هوالله نسيت.. يختي من رهبة هالمكان والحشره قمت ماعرف كيف اتصرف مروه: حليلج.. وارتبشن الحريم.. وين رباعة مجد يسلمن عليها . مستانسين يشوفونها أحلى عروس يدامهم.. وشوي في وحده بعد يايه صوبها.. كان الويه مألوف لمجد بس ماتقدر تشوفها عدل.. مجد: هندوو منو هاي.. عنود: اويييه هاي شو يايبنها .. منو عزمها أصلا.. مجد: شو السالفه خبروني.. هند: لو تعرفين منو الي يايه يا مجود بتيرين شعرج.. مجد: لا مافيني التسريحة بتخترب انتي يري شعرج عني.. هند: سخيفه الله يعين ريلج على سخافتج.. وشوي وصلت لها هالبنت.. مدت ايدها تسلم ومجد مصدومة من وجودها. جواهر: ألف ألف مبروووك.. يوم سمعت خبر زواجج قلت لازم اييج وابارك لك لج بنفسي.. مجد بحاله صدمة: الله يبارك فيج .. تسلمين.. جواهر تقربت من اذن مجد وكل الي قالته. : مشكورة على كل شي سويتيه.. ماتعرفين حياتي اشكثر تغيرت بمساعدتج.. بس ليتني سمعت رمستج وودرت قبل لا يصير هذا كله.. اتمنى لج كل الخير يارب.. مجد ادمعت عينها يوم سمعت هالرمسه.. تقربت منها جواهر ومسحت الدمعه بصبعها : العروس عيب تصيح.. ابتسمت مجد وعنود وهند مستغربين .. مجد: شخبارج طمنيني؟ جواهر: عرست.. وابشرج.. حامل بأول شهر.. مجد: والله مبروووك.. تستاهلين كل خير .. ربي يهنيج يارب.. جواهر: ويهنيكم.. وتقربت من هند وعنود سلمت عليهم.. والدمعه متيمعه في عينها.. وعنود وهند مستغربين من تصرفاتها.. بس ماحبو يبينون للحضور الي يطالعهم ان في شي غريب هني.. ونزلن الثلاث بنات سوى.. وقعدت على طاولة وحده.. هند: جواهر وااااااايد متغير شكلج ماعرفتج عدل الا يوم قربتي.. جواهر بإبتسامه خفيفه.. : ليش عاد .. عنود: تبين الصراحة ماتعودنا نشوفج بمثل هالعبا مثلا.. وسيعه وساتره.. يعني جواهر تضحك.. : إن الله يهدي من يشاء ويضل من يشاء.. هند: الله يثبتنا على دينه.. الا خبرينا شو اخبارج وينج اختفيتي فجأة.. جواهر: ماشي من بعد وفاة امي ماكان لي خلق ارجع اكمل دراستي.. وعرست.. وإلتحقت بجمعيه نسائية.. وصرت اقدم وياهم نشاطات مختلفه.. ومحاضرات.. ونحضر ندوات دينيه وثقافيه.. يعني هالأمور الي شاغلتني عنود: عيل سمعنا ماشاء الله حامل.. جواهر : هيه توني بأول شهر هند: الله يسهل عليج يارب.. جواهر: تسلموون.. المهم انا بترخص ريلي اتصل اكيد وصل عند الباب لازم اروح.. فرصة حلوة اني شفتكم فيها.. عنود: بالعكس والله نحن الي مستانسين من اخبارج جواهر: تعالو الجمعيه مره.. عندنا انشطة حلوة.. هند: ان شاء الله جان لقينا وقت بنمر عليج.. جواهر: ان شاء الله وطلعت عنهم جواهر وركبت موتر جابر.. جابر: فديتج.. خبريني شو اخبار الياهل واخبار احلى حرمه في هالدنيا.. جواهر تفتح عينها وتنهد... جابر: حوو انتي ماتسمعيني شو.. بندي الباب عدل أقولج.. صحت جواهر من الحلم الي في لحظة حلمت به ان جابر يقولها مثل هالرمسة الحلوة.. يودت دمعتها عشان مايحس بها جابر.. جابر: عنلاتج انتي ورباعتج .. مادري من وين طالعتلي بهالفنتك.. عرس ربيعتي.. اخر مره تروحين عرس فاهمه.. __________________ جواهر ساكته ماكانت ترد عليه.. لأنها لو رمست بتنفجر من الصياح.. جابر: انتي ايييه .. هبله ولا تستهبلين.. ماتعرفين ترمسين شو.. ولا ماعلموج الرمسة.. مقيولة وحده شراتج وين بتعلم الرمسة.. لو هلج عرفوا يربونج جان ماتجرأتي وطلعتي وياي من وراهم.. جواهر يوم ان السالفه وصلت إنهم يهينون أهلها ماقدرت تيود عمرها صرخت: بـــــــــــس.. بس خلاص يكفي.. لا اتييب طاري هلي على لسانك أرجوك.. ليش مخلني يوم انك ماتباني طلقني.. جابر: تعرفين ليش مابا اطلقج.. اباج جي تعذبين.. تعيشين بحسرة طول عمرج وتعذبين.. وان ماخليتج تخبلين ماكون انا جابر.. جواهر: انت شو من البشر قولي.. انت فيك روح متأكد.. يا خسارة هالحرمة العيوز الي في البيت تكون أمك ماحست الا بإيد جابر اتيي على ثمها.. وانزفت .. ويلست تصيح.. جابر: جـــــــــب ولا كلمة اقولج.. لا اتييبين طاري هلي على لسانج قبل لا اقصه فاهمه.. اشرف منج واشرف من عشرة من اشكالج.. جواهر: بس ارجووووووك طلقني خلاص كفايه.. جابر: مابطلقج.. لو شو ماتسوين.. جواهر: دامك مابطلقني خلنا نعيش شرات اي اثنين معرسين.. خصوصاً ألحين .. جابر: كيف يعني خصوصاً ألحين .. شو الفرق الي بين الحين وقبل جواهر: لأني حامل .. ربنا بيرزقنا بياهل.. جابر وقف موتره في حوي البيت.. ونزل وسار صوب جواهر.. وفتح الباب ويودها من ايدها بالقو وسحبها ويلس يصرخ: انتي شو قلتي.. حامل؟؟ .. كيف بتحملين وانا في عمري مالمستج.. مينونه انتي.. تبين اتبلين علي.. مادري من وين حملتي وتعقين سواد ويهج علي.. يعني لأني مب راضي اطلقج تبين تفضحيني.. يلست تصيح جواهر وتصارخ.. الكل طلع من البيت.. أمه واخوه واخته ومرت اخوه يلسوا يطالعون المنظر.. ومحد قادر يقرب منهم.. لأن جابر كان في قمة عصبيته.. وكل من يقرب منه يتكفخ.. .. فرها على الأرض.. ويودها من شعرها تم ايرها: انتي ايييييييييييه انطقي ارمسي قولي شي.. فهالوقت كان توه سهيل واصل بيتهم.. ويوم شاف المنظر.. ماقدر يتحمل مهما يكون اخته.. يود جابر وسحبه بعيد سهيل: انت ايه وين تحرى عمرك ميود حرمتك وتضربها.. هاي المريلة جابر: مايخصك.. هاي مشكله بيني وبين زوجتي انت ماتتدخل.. اضربها فالشارع.. فالبيت كييييييييييفي.. سهيل: لا مب كيفك.. يوم بموت انا ولا ابوي يموت.. وقتها تصرف براحتك.. تحرا الدنيا فوضى مافيها الا غيرك.. جابر: لا والله كملت بعد.. اقول خوز عني صد جابر صوب جواهر.. ويودها وفرها على السيارة.. وداس على بطنها بقو.. يلست تصارخ جواهر بقوة.. ربع سهيل صوب جابر.. ومعاه اخو جابر.. يودوه وسحبوه بعيد.. وام جابر ومرت اخوه.. شلو جواهر الي كانت تصرخ من الألم الي فيها.. وبسرعه نقلوها لأقرب مستشفى.. وطبعاً وصلت المستشفى سوولها غسيل لأنها أجهضت.. الدكتورة: يا جماعه الآثار الي على جسم المريضة مش آثار سقوط عادي.. هذي اثار ضرب عنيف.. سهيل: هيه دكتورة.. اختي تعرضت للضرب تقربت ام جابر من سهيل تترجاه سهيل: عمتي انتي قدرج على عيني وراسي.. بس ولدج لازم يتأدب.. واللي سواه شي ماينسكت عنه.. عيل يشكك في اختي انها مب حامل منه شو هالرمسه.. وصل الشرطي الي طلبته ادارة المستشفى وبدوا بالتحقيق مع سهيل وقالهم الموضوع.. والشرطة طلبوا من المستشفى انهم يحتفظون بعينه دم الجنين لأن بعده كان عبارة عن كتله دم.. لأنه بأول شهر.. عشان يجرون أي فحوصات تتطلب انهم يتأكدون من تابعية الجنين لزوج المريضة سهيل دخل عند اخته يصيح على حالتها.. : ليتج كنتي عاقل من قبل الزواج جان ماصار هذا كله.. ياااااارب ساعدها.. وتم يالس عندها.. ومانع اي حد من طرف جابر يدخل عندها حتى لو امه... الشرطة طلبوا جابر عشان يحبسونه بذمة التحقيق عشان الي سواه شي يتعاقب عليه.. .. .. .. .. =-=-=-=-=-=-= من هالأجواء ننتقل للأجواء التاريخية لقصة الحب الصادقة بين مجد وأحمد الي تكللت بالزواج.. عند الرياييل كان الجو من أروع مايكون.. محد شاف أحمد بفرحة كثر هالفرحة الي فرحان بها اليوم.. كانت ليله من ألف ليله.. ليله فالعمر طول عمره يحلم بها.. الكل مرتبش ويرزف ومستانس على الآخر.. كانت الفرحة عايمه الكل من الصغير للكبير.. سلطان: يا ريال خله يستانس.. جاسم: صبر ونال من حقه يستانس عبيد: تدرون ماكنت مستوعب نتيجة الي كنت بسويه.. تخيلو لو صار الي كنت ناوي عليه جان شو كان حال احمد.. سلطان: الحمد لله ان الفرحة عامره الكل.. وهذا كله بمساعدة يدتي الله يحفظها عبيد: صدق انها حاسه بعيالها دوم.. وهي اول وحده حست باحمد ومجد سلطان: الله يحفظها لنا يارب.. جاسم و عبيد: آمين.. خالد: عبيد انت ماقررت شي بالنسبة للزواج؟؟ عبيد: حالياً لا.. قررت اكمل دراسة الماجستير في جامعه الشارجة.. يعني بنشغل في الدراسه.. عقب ان شاء الله يصير خير.. خالد: أهم شي انت مقتنع من سالفه الزواج وحاطنها في بالك عبيد: هيه .. بس حالياً مب متهيأ له.. خالد: الله يوفقك.. يلا هذوه خالي يزقرنا بندخل المعرس.. صد حواليه عبيد.. : الا وين المعرس؟؟ جاسم ناقع من الضحك: الحقوا يا جماعه المعرس عند باب صالة الحريم.. الكل تم يضحك على عيلة أحمد.. من حقه.. مجد بنذالتها المعتادة .. حرمت أحمد منها في فترة الملجة.. مايعرف هذا من الحب ولا عقاب ولا شو بالضبط.. بس الي يعرفه انه مشتاق لها من كل خاطره.. وده بس يسمع حسها عالأقل فكيف لو يشوفها عروسته ويدامه.. دخلو الرياييل عبيد و خالد وسلطان وجاسم وعبدالعزيز وحميد وبوخالد.. الرياييل وصلو المعرس لين الدري وخلوه يكمل طريقه مع ابوه وابو مجد واليده كانت بعد وياهم.. الباقي تموا شوي يرزفون عن خاطرهم شوي يدام الحريم.. وكل واحد حرمته تتوعد له لأنهم يرزفون والحريم يطالعن.. وطلعوا من الصاله عشان تتكشف مجد لمعرسها.. توها مروه بتساعد مجد تكشف .. ضرب احمد على ايدها.. احمد: يلا مناك.. خلصت وظيفتج.. دوري انا.. جلثم: ايا اللوتي ماشوفك اتيي صوبي.. ولا ضويت بغرشوبتك ونسيتنا.. أحمد: مو فاضي لج ألحين.. خليني اشوف عروسي.. مجد من تحت الغطا الي مغطينها فيه تضحك على رمسة يدتها وأحمد.. جلثم: ماعليه يالهرم إن ماراويتك.. حسافة ان الناس بعدهم هني ولا عرفت كيف اداويك.. أحمد شل القطعه الي كانت على مجد.. والود وده انه يحضنها بهاللحظة.. بس ميود عمره عشان الناس.. وحب راسها.. وقالها بصوت واطي: أحبج يالسبالة ضحكت مجد.. جلثم: انت اييه.. عن الحركات الماصخة هاي.. وانتي اثجلي شوي.. فاجه ثمج جنج أول مره تعرسين .. مجد: ويديه يدوووه.. أول مره اعرس بعد شو .. أحمد: واضافه مني.. آخر مره بعد الكل: آمين.. لطيفه: أحمد عاد ماوصيك في مجد ماعندي غيرها.. أحمد يطالع مجد الي كانت منزله راسها: لا توصين.. مجد في عيوني الثنتين ميثا: مجد.. ماوصيج على ولدي.. جلثم : عنبوج توصين الحرمة على ريلها.. وبعدين ولدج ذيب ماينخاف عليه.. ميثا: بسم الله ع ولدي.. جلثم: خوزو يلا خلوني أوقف فالنص عشان اتصور.. الكل ابتسم وتيمع حوالين المعاريس وتصوروا صورة عائلية حلوة .. الفرحة باينه على ويوه الكل.. قعدوا المعاريس والحريم نزلن تحت يقعدن.. أحمد: الله يسامحج يالظالمة كل هالشهور ماتخليني اشوف هالويه الحلو واسمع هالصوت .. صدق ظالمة وقلبج قوي مجد: بس بذمتك مب احلى جي.. أحمد: تبين الصدق.. شعور راااااااااائع فعلاً داش وانا كلي شوق.. مجد: عشان جي طلبت منك جي.. خصوصاً ان ظروف زواجنا صار بسرعة خلال فتره بسيطة كان لازم اجهز كل شي للعرس.. وانشغلت بالدراسه والبروجكتات.. أحمد: تعرفين شو اسعد لحظة في حياتي.. مجد: شو أحمد: اليوم وانا حاط عيني بعينج بلا خوف ولا مستحى ولا اي احساس غير الحب والشوق استحت مجد ونزلت راسها.. من عقب زقروهم عشان يقطعون كيكة العرس.. ومشوا المعاريس صوب الكيك وقطعوه وأكلو بعضهم .. كان صدق شكلهم لايقين على بعض.. حلوين .. أحمد: اقول وايد بنطول هني فالصالة؟ مجد: ليش مستعيل شو وراك.. خلنا نستانس ونشوف هالوناسه في ويه الكل.. أحمد: ابا ارمسج ع راحتي.. ايلس اطالعج بكيفي.. اما جي احس الناس كلهم يطالعون فشلة.. مجد: افا مفتشلي مني انا حرمتك.. اوكي ماعلي أحمد: لحووووول مو وقت زعل ألحين مجوووود عن الحركات مجد: لا تحاول انا زعلانه أحمد: براضيج بطريقه حمادة الخاصه مجد: الله اكبر شو هالطريقة بعد أحمد: بتعرفين عقب .. مجد: انزين لا تمشي بسرعه جي ماروم امشي بسرعه فستاني ثجيل أحمد: محد قالج سوي فستان بهالثجل مجد: انت شو عرفك بالموضه أحمد: بعرفها من وراج مجد: عيل استعد للخساير من الحين أحمد: فدواج.. وصلوا عند الكيك وقطعوه وكل واحد فيهم لقم الثاني.. كان شكلهم وااايد كيووت وابتسامتهم ماليه الدنيا من الفرحة.. وهم رادين مكانهم.. صدت مجد وراها لأن علق الفستان.. وراحت مروه صوبهم عشان تساعدها.. مجد والدمعه في عينها: أحمد.. مفتقدة اختي وايد فهاليوم.. أحمد: ترحمي عليها مجد: الله يرحمها ويغمد روحها الجنه.. (صدت صوب مروه) .. مروه هاتي الريم خل اتصور وياها.. فديتها بتوله عليها والله.. هاي اول ليله مابترقد فيها عندي أحمد: خلاص انا بستوي لج ريم.. مجد ضحكت على عبط أحمد واسلوبه.. ومروه ابتسمت لهم وصدت صوب الطاوله الي فيها نوره وخلود.. نشت نوره وتقربت من مروه نوره: خير شو بغيتي؟ مروه: هاتو ريماني الصغيرة.. مجد تبا تتصور وياها نوره: ان شاء الله وسارت نوره يابت الريم وودوها عند مجد.. الي من شافتها دمعت.. وقفوا نوره ومروه يدامها عشان الناس مايلاحظون دموع مجد.. أحمد صد وشاف دموع مجد تضايق.. لا إرادياً لف إيده على جتفها.. وطبطب على جتفها.. : ترحمي عليها مب زين جي .. واذا شافتج عمتي بتتكدر زود.. مجد مسحت دموعها ورفعت الباقه عشان تغطي ويهها.. ومن عقب يلسن نوره ومروه يسوون لها حركات ويعلقون عشان تنسى السالفه وتهدأ.. ... .. كانت فعلاً ليلة من العمر ماتنسى والكل مستانس فيها .. -=-=-=-=-=-=- =-=-=-= سلطان: بس عاد اطلعي دقيقه بس اترياج في الموتر ابا اشوفج يا بنت الناس شما: عدال الي يقول ماشفتني.. ولا جنك انت الي خذتني من الصالون ويبتني الصاله سلطان: اشتاق لج فيها شي شما: مافيها شي بس مادري كيف.. سلطان: اففف من هالحرمة لازم تعذبنا.. تعالي اخبرج ياوييييييلج لو سويتي فيني شرات ماسوت مجوود بأحمدوو.. مسكين حاله كان كل يوم يصيح عندنا .. شما: لا لا مجوود شوي قلبها قوي انا مابسوي شراتها.. هيه كانت عالأقل بالمسجات وياه.. انا حتى مسجات ماشي ههههههههه سلطان: لا انتي تكرهيني رسمياً عيل.. شما: ها الحب االزيد وانت الصاج سلطان: عنلاته من حب مابغيناه دامه بيحرمني من أعذب صوت سمعته أذوني شما: يعني سامع اصوات قبل سلطان: اويييه يالوهقة شما: هههههههههه.. خلاص يلا دقايق وانا يايتنك سلطان: لحظة خل اكشخ.. شما: ليش مب كاشخ؟ سلطان: شو نسوي من الربشة واليولة تبهدلت شوي.. شما: هههههه يعني شرات حالتي سلطان: يعني رقصتي شما: هيه عرس مجوود مو أي حد سلطان: انتي تعالي وحسابي وياج شما: هههههههههه خلاص هونت مابا ايي سلطان: بتيين وانتي تضحكين.. شما: يلا انا عند الباب وين اسير سلطان: بييج بموتري لا تظهرين اغار عليج شما : اوكي =-=--=-=-=-= ام جابر: سهيل يا ولدي خلني اشوفها.. سهيل: انتو لكم ويه اتيون بعد.. شفتوا ولدكم يضربها قعدتوا تفرجون عليها بس.. ام جابر: يا سهيل يا ولدي شو بنقدر نسوي .. سهيل: اقولج لا تيلسين تقولين شو بنقدر نسوي.. ومابا اشوفكم هني.. وبينا المحاكم.. جانه مابيطلقها بالزين.. المحاكم بتاخذ حقنا أم جابر تلومت وكانت صدق مفتشلة من فعايل جابر.. مهما كانت الأسباب مافي شي يبرر الي سواه.. ومحد يعرف الحقيقة غير جواهر الي للحين نايمة من تأثير المهدئات.. دخل سهيل عندها وكان تأوه من الألم.. تقرب زود منها سهيل: شو بلاج؟ جواهر وهي تتطالع حواليها: انا وين ؟؟ سهيل: فالمستشفى جواهر حطت ايدها على بطنها : والياهل شي صابه سهيل: الله مب كاتب ان الحمل يكتمل.. جواهر غمضت عيونها وتصيح بصمت.. تذكرت الي صار وكأنه صورة تشاهدها يدامها.. ردت فتحت عينها وصدت صوب سهيل جواهر: سهيل انت مصدق الي انقال عني؟ سهيل: انا يوم رديت ثقتي فيج رديتها وانا واثق ان عمرج مابتردين للغلط نفسه جواهر وهي تنهد: والله اني حامل منه.. بس هو مايذكر.. لأنها كانت اول مره يقرب مني وكان خارج عن وعيه يا سهيل.. كان سكران كلياً مايذكر شي.. سهيل: اششششش.. خلاص انتهى الموضوع وهالإنسان مابتعيشين وياه بعد.. الموضوع صار قضية بإيد الشرطة جواهر: سهيل دخيلك ابا اطلق من هالإنسان.. خلاص حاولت كل الي اقدر عليه .. بس مب طايع.. بعده يذلني ويحتقر وجودي في هالدنيا .. أرجووك سهيل سهيل: انتي ارقدي وارتاحي.. ودامي وياج لا تحاتين شي جواهر: ابوي خبرتوه؟ سهيل: لا ابوي راقد الحين اكيد.. باجر بقوله .. روحه صحته على قده المسكين جواهر: الله يعينك يابوي من تحت راسي ياما تعذبت سهيل: شو قلنا.. خلاص انتهى الموضوع ابتسمت له جواهر وغمضت عيونها علها ترقد.. =-=-=-= في المركز كان صوت جابر مالي المكان كله جابر: ليش حابسيني ومخلينها هيه.. انا ماسويت شي غلط.. ابا افك البلاد من شر وحده مثلها تخرب سمعة بناتنا .. هيه الي لازم تكون في هالمكان مب أنا.. الشرطي: انت ايه وين تتحرى نفسك؟؟ اسكت ولا نحن نعرف كيف نسكتك.. جابر: عاشووو .. بعد من متى الشرطة ضد الحق الشرطي: كل شي بيبين يوم الفحوصات الجنائية بتطلع عن اثبات النسب. مايحتاي هالحشرة كلها جابر: لا والله.. الشرطي: كلمة ثانيه نسمعها منك صدقني نفرك في الإنفرادي جابر سكت وصد وراه .. وتم يطالع الأشكال الي قاعدين وياه كانو صدق يخوفون.. مجرمين .. والله العالم بأسباب وجودهم في هالسجن.. قعد في زاوية يتريا مصيره وين راح يكون ====== اليوم الثاني الصبح نشت مجد ولبست لها المغربيه .. لونها كان أصفر على ذهبي.. كان وايد أنيق وحلو عليها.. ولمت شعرها على فوق.. ونزلت خصل على ويهها .. ويسلت تتعدل وتمكيج مكياج خفيف يبرز ملامحها.. وبخرت المكان ..دخلت الغرفة شافت الفراش فاضي.. يعني أحمد نش .. عدلت الفراش.. وعطرت الغرفة.. وطلعت له كندورته وعطرتها وبخرتها وعلقته له وطلعت من الغرفه.. واتصلت في يدتها.. جلثم: مرحبا العروس.. حي هالصووووت.. محلاه صوتج استوا احلى بعد الزواج مجد وهي تحاول ترقق صوتها وتدلع: تدرين بعد كبرنا خلاص جلثم: عدال لا يطيح نصج وانتي ترمسين.. شو ماتسوين بتمين مجد الصغيره في عيني.. مجد: هههههههه الله يطول بعمرج يدو ويخليج جلثم: يا عيون يدتها.. هاج امج بترمسج.. لطيفه: ألف ألف ألف مبرووووووووك حبيبتي مجد بحيا: الله يبارك فيج أمي.. لطيفه: ماتصورين كيف البيت خالي من دونج.. ماتعودنا انش الصبح ومانسمع حشرتج مجد: ماعليكم انا بييكم مالكم شردة مني.. لطيفه: انزين امي اليوم عالغدا بتكونون في بيت عمج صح مجد: هيه ان شاء الله.. دخيلكم هاتو ريماني لطيفه: اكيد بتكون هناك.. يلا امي اكشخي ابا الكل يرمس عن بنتي وحلاتها مجد: افا عليج بخلي الكل يقول طالعه حلوة شرات امها لطيفه: علني ماخلا منج يارب.. وبندوا عن بعض وتنهدت مجد صدت وراها شافته واقف يراقبها .. جان تضحك: شو بلاك تتطالعني جي أحمد: مب مصدق عيني مجد: امممم شو اسوي عشان اخليك تصدق أحمد: سوي الي تبينه .. بتم مب مصدق مجد: صدق .. وعن الرمسه الزايدة خلنا نسير هلك يتريونا أحمد: مابا ماشي طلعه من الباب فاهمه مجد وهي تحط ايدها على خصرها: لا والله أحمد: هيه والله .. أم لسان طويل.. انا بأدبج مجد حست ان مالها مفر منه .. جان تبتسم بخبث: فدييييييت روحك انا .. وانا من لي غيرك اصلا.. اسولف غناتي.. أحمد: هيه جي اباج حرمة سنعه مجد: من عيووووووني أحمد: تسلم لي عيونك يا عيوني... انزين غمضي عيونج ابا اييب لج شي مجد: الله شو .. أحمد: قلت غمضي غمضت عين وفتحت عين.. : جي ينفع أحمد: مجد بعد لل3 اذا ماغمضتي صدق مابراويج شي مجد: ها لا خلاص توبه توبه ببند.. وبندت عيونها تتريا وهي متحرقصه أحمد سار الغرفه وياب علبة الطقم وطلع منه الطقم الي كان شاريه لها.. أحمد: افتحي عينج.. مجد تمت تتطالع الطقم مذهولة.. صدق روووووووووعه .. : أحمد ذوقك وااااااايد حلو أحمد: لو ماكان حلو ذوقي جان ما اخترتج زوجة لي.. مجد: مشكووووووووور والله وايد روعه أحمد: بتلبسينه اليوم مجد: هيه ابا اتخقق فيه أحمد: هههههههههه فديتج انا =-=-=-=-= في بيت حميد العايله كلها متيمعه يتريون المعاريس يوصلون.. مروه: علي سير ييب الأوراق الملونه.. علي: عندي اياهم خلود: شيطان جاهز حق هالسوالف.. علي: لازم تراهم معاريس.. نوره: عنود ماما تعالي هالصوب لا تلعوزين خالج.. خالد: خلها شو بلاج على البنت.. خليها تستانس... سلطان: من زود خوفج مدلعتنهم.. نوره: بناتي وكيفي.. علي: ماعلي خلهم يكبرون بس انا براويهم.. ميثا: ههههههههه هيه جي اباك .. عبيد: اتصل فيه أحمد يقول انهم جريب.. خلود: الف الصلاة والسلام عليك يا حبيب الله محمد.. الحريم: كلولولولولولولوووووووش الرياييل تموا يضحكون وكل واحد يهز راسه.. وصل أحمد ودخل موتره.. ومجد يلست تتطالع الكل متيمع برع يترياهم.. والجو كان روووعه في هالوقت.. مجد: أحمد اخاف انزل.. احس عمري يايه حرب.. أحمد: هههههه شو بلاج يايين يباركون لنا.. مجد: ليش شو السالفه الا هو زواج.. أحمد: بس مو أي زواج.. زواج أحمد ومجد.. مجد: اشمعنى قلت اسمك قبل يعني.. أحمد: تراني الريال.. مجد: لا والله .. مايخصه.. ليديييز فييرست أحمد: فعينج.. انجعمي.. وشوي يسمعون دق على بونيت السياره.. فز أحمد.. شاف يدته تضرب بالعصا.. وأحمد يسوي عمره انه بيصيح.. وينزل الجامه: موتري الله يسامحج.. جلثم: انزل وبعدين يعني لين متى بنترياكم.. أحمد: هاي مب طايعه تنزل خايفه منكم.. جلثم: شووو.. ناكل نحن عشان تخاف.. نزلي قبل الا اييج بالعصا.. مجد تتطالع احمد بنص عين.. ونزلت من السياره واول شي سوته حضنت يدتها ويلست تصيح.. ماتدري شو سبب صياحها بس الي حسته ان ودها تصيح.. والكل تقرب صوبهم والي يرش عليهم من مدفع الأوراق الملونه.. والي يبب .. والي واللي.. كانت الفرحة ماليه ويوه الكل.. تقرب عبيد والريم في حضنه وياهم.. ومجد تتطالع عبيد وملهوفه على الريم .. وبسرعه شلت عنه البنت وحضنتها ويلست تبوسها وتصيح.. والكل تذكر حور الله يرحمها.. الكل وده لو كانت موجودة في هاليوم تشاركهم الفرحة.. بس قدّر الله ماشاء وفعل .. كان مقرر سفر العرسان نفس اليوم فليل لسنغافورة يقضون فيها اسبوع ويرجعون لأن راح تبدأ الكلية ومجد ماتقدر اتم زود أحمد: انتي مايستوي تأجلين الدراسه للسنه اليايه مجد: أحمد شو السنه اليايه ماصدقت بخلص هالكورس..وبفتك من الدراسه أحمد: الله يوفقج انزين لا تعصبين مجد: انزين انا مابا اركب التلفريك.. أحمد: مب ع كيفج.. انا بيودج وبفرج فيه.. عيل اركب روحي مجد: أحمد والله أخاف وايد مرتفع شوف كيف.. أحمد: ماعليج بتستانسين.. يلا عاد.. ركبت مجد التلفريك وتيودت بأحمد وميته من الخوف.. وأحمد يطالعها ويضحك.. وشوي تحرك التلفريك .. مجد: أحمد خلاص بنزل نزلوني مابا .. أحمد: ههههه حاضرين ماطلبتي افتحي عيونج.. فتحت مجد عيونها وشافت الإرتفاع الي هم فيه خافت بزود.. كان الجو وايد حلو.. وأمطار ووناسه صدق.. كان المنظر من فوق روووعه.. مجد: بس تصدق المنظر وايد حلو أحمد: يوم اقولج ماتصدقين.. مجد: هات الكيمرا خلني اصور.. وقعدت تصور مجد المنظر من على هالمرتفع.. كان فعلا المنظر وااااايد حلو.. ومن عقبها نزلوا من على التلفريك وماقدرو يروحون أي مكان غير انهم يرجعون الفندق ويبدأون جولتهم اليوم الثاني.. كانو مقررين يروحون إحدى الأماكن السياحية هناك كان في عندهم عرض للدلافين.. وراحوا حديقة الفراشات.. مجد: والله سبحان الله شوف الفراشات ألوان واشكال.. شو رايك نهرب شوي منهم البلاد أحمد: ههههههه عشان يحترقون.. امشي ورانا درب بلا نهرب بلا شي.. مجد: وين بنروح .. احمد: بنسير النفق الي مسواي تحت الماي.. مجد: كيف جي بعد أحمد: بتشوفين بنفسج.. ودخلوا النفق هذا كان مظلم تقريبا.. بس يخوف.. حواليك كله أسماك أنواع وأشكال.. ومجد ترتعد من الخوف.. مجد: انت اونك بتحط بالك علي.. واشوفك يايبني هالمكان.. تخيل ينكسر هالزجاج.. أحمد: مابينكسر جي شو.. مضاد للكسر هذا مجد: لا والله وشو يضمنك.. مافي شي مضاد للكسر.. خل نطلع بسرعه أحمد: ظلمة وناس يدامنا تبيني ادعمهم شو.. مجد: أحمد والله خايفه خل نطلع.. أحمد: شوفي فوق رفعت راسها مجد ويوم شافت هالسمجة.. قرش بو منشار.. تمت ترتجف من الخوف.. وصرخت خلت الكل يطالعها أحمد: فضحتينا عنبوووج حد يصرخ جي.. مجد: طلعني أحمد بليييييز أحمد يود ايدها ومشوا بين الناس وطلعو.. : ارتحتي مجد: هيه ارتحت.. شو ها ان ماشتكيت عند يدتي.. والله مخوفني.. أحمد: هههههههه دواج تستاهلين.. عيل انا يالهرمه تخليني طول فتره الملجة ما اسمع صوتج مجد: تستاهل زود يوم ان هاي سوالفك.. بتييب لي سكته.. أحمد: بسم الله عليج مجد: هيه هذا الي فالح فيه .. تقردني وبس.. أحمد: ههههههههههه احبج هاي مشكلتي مجد: هنف عليك وعلى حبك.. أحمد: بعد احبج ابتسمت مجد وكملوا دربهم.. كان اخر لهم اليوم.. واليوم الثاني الساعه 10 الصبح لازم يكونون في المطار عشان يرجعون البلاد.. مجد كانت مستمتعه في كل لحظة تعيشها مع أحمد.. فعلاً انسان قمة الأخلاق والرقي ف التعامل.. نفس اسلوبها وشخصيتها وخبالها.. والي يجمعهم.. حب قوي .. مافي اي قوى في العالم تفرق هالقلبين.. =-=-=-=-=-=-= في هالأيام في البلاد.. تحولت القضية للجنائيات وبهذا كانت الإجرائات سريعة عشان يثبتون نسب الجنين.. عادة مثل هذا الفحص ياخذ وقت.. لكن في الحالات الطارئة مثل هالقضية يستعيلون في النتايج.. وخذوا عينه دم من الأب والأم والجنين .. وكل النتايج طلعت لصالح جواهر.. اثبتوا ان الجنين هو فعلاً من جابر.. كان الخبر صدمة لجابر.. كانت في هالوقت جواهر واقفه مع اخوها يدامه تتطالع جابر بكل استحقار.. وجابر مفتشل .. لكنه يبا يفهم كيف صار هذا كله.. جواهر: طعنت في شرفي يدام الكل .. وحاولت تشوه سمعتي.. وفي النهاية.. محد خسر غيرك.. المحكمة طلقتني منك أول شي .. وثاني شي خسرت الطفل الي كان بيكون حلقة وصل علها كانت بتقربني منك.. حاولت وياك بكل ما اقدر.. وكنت لآخر لحظة متحملتنك.. واليوم نفذ صبري خلاص.. مابا شي منك ياجابر.. انت خذيتني غصب .. وألحين انا بكمل مشواري اتحمل ثمن كل شي سويته.. جابر: بس جواهر فهميني ارجوج .. نوريني كيف صار هذا كله جواهر: ههههههههه انورك.. وانت انسان تعرف النور اصلا.. جابر لا تفشل نفسك زود ما انت مفتشل يدام اللي قاعدين.. يكفي بس يكفي.. جابر صد صوبها وعيونه محمره من الدموع.. : يعني انا ذبحت ولدي بإيدي.. لا الله يخليكم قولو غير هالرمسة.. جواهر: أحمد الله ان الجنين ماكتمل ولا كانت فيه روح .. ولا جان انا صحت عليه أكثر منك.. والله مب رايد لهالجنين يعيش بكنف أبو شراتك.. يفشل .. ’ومايفتخر به.. احمد ربي زود ان مافي شي يربطني بإنسان مثلك.. سهيل الله يخليك طلعني من هالمكان.. سهيل: المهم حضرة الضابط.. نحن خذنا حقنا خلاص.. ومايحتاي قضية الإعتداء بالضرب هاي نتنازل عنها.. الضابط: على خير.. وقع هني للتنازل وقع سهيل وجابر مو قادر ينطق اي كلمة من فشلته... وطلع سهيل ومعاه جواهر.. ربع جابر وراهم.. ومسك ايد جواهر.. جابر: جواهر .. سامحيني الله يخليج.. جواهر بكون لج شرات ماتبين سامحيني.. سحبت جواهر ايدها: جابر.. انت ماضي مايشرفني.. ارجوك ابتعد.. مشت جواهر مع اخوها وهو مبتسم وفخور انها قدرت تسترجع ثقتها بنفسها.. وجابر كان متحطم في مكانه.. فقد كل شي.. وقتها بس حس بمعنى كلام ربيعه له .. لكن ماينفع شي ألحين غير الندم.. بهذا أنهي روايتي الرابعه روحـ(ن) عشقته وقلبـ(ن) فقدته إلي اتمنى انها تكون نالت إعجابكم.. ولقت استحسانكم حاولت اغطي كل الجوانب والشخصيات قدر الإمكان في النهاية يحزني جداً اني افارق أبطال هذه القصة وأفارقكم.. لكن اذا الله راد لنا لقاء في روايات قادمة.. الله العالم متى.. أتمنى اني اكون وصلت مغزى كل حدث دمجته في قصتي.. ووصلت لكم الفكرة.. الكثير من المذكور من واقع الحياة وتجارب حصلت حولي.. ولكن الأغلب من ذلك من وحي الخيال .. لا يسعني إلا أن أشكركم جزيل الشكر على صبركم وتفهمكم لي ولظروفي وأستميحكم عذراً لإنقطاعاتي الطويلة.. ولأي قصور مني أتمنى أن لا أكون قد أسأت لأحد ما من خلال قصتي بدون قصد مني فسامحوني.. فإن الإنسان معرض للخطأ أينما كان وحيثما كان كلمة شكر أوجهها لكل من روح الأحزان عجيد الريم الوصلاويه أم عقصين جرناسه وليد كل منهم ساهم بطريقته في مساعدتي.. سواء في بعض الأفكار.. الصور ولا أنسى طبعاً أحاسيس عاشقة على اعلامها لكم بظرفي اثناء غيابي والسموحة اذا نسيت اي اسم آخر .. لكن طبعاً يشمل الشكر الجميل.. لا هنتوا اخواني وخواتي والشكر الأكبر والأشمل يكون لكم أنتم قراء هذه الرواية المتواضعه.. وأتمنى من الله ان اكون قد اكتسبت رضاكم عن القصة وأحداثها وأشكر لكم الدعم المستمر والتشجيع الدائم لي لا هنتوا وفقكم الله دُمتم بوّد إلى الملتقى أختكم MiSs MrMr[/align] |
الصرااااحه واااايد حلوه القصه مشكوووره اختي الصراااحه اتعلمت وااايد اشياء فادتني ف الحياه |
السلام عليكم ورحمة الله وبركاته القصه انا قريتنها من زمااان وروووعه شوي ف حقها تسلمييين ختيه ع الطرح |
| الساعة الآن 12:39 PM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir