|
في بيت أم سهيل.. أم سهيل قاعدة في الصالة ترمس أم ثاني.. أم سهيل: والحمد الله.. بعد كل هذا وافقت أم ثاني: ما ادري والله.. صح أن حارب ريال وما ينعاب.. بس دام أن سارة كانت رافضته في البداية..يعني.. أم سهيل: ما عليج منها.. سارة ياهل وما تعرف مصلحتها..وإن شاء الله حارب بصونها وبحطها في عيونه أم ثاني: الله يوفقهم يارب ويسعدهم أم سهيل: آمين..المهم مثل ما خبرتج.. يوم السبت لازم تكونين موجودة وخبري ثاني عسب يكون ويا الرياييل عسب بحددون يوم الخطبة والعرس وهالسوالف أم ثاني: على خير إن شاء الله.. مع السلامة .............................................. في هالوقت سارة قاعدة فوق ويا ربعها عليا وميسون طبعا عليا وميسون ما يدرون أن سارة هب مستانسة بهالزواج عليا: والله وطلعتي أشطر عنا يا سارة وبتعرسين قبلنا سارة تبتسم ابتسامة باهتة ميسون: أصلا أنا كنت متوقعة أن مارح ياخذ سارة غير حارب عليا: بصراحة.. أحلى ثنائي شفته بحياتي ميسون: سارة؟ شفيج ما ترمسين؟ سارة: ها؟ لا بس.. عليا:بس شو؟ سارة وتحاول تكون كـــــــــول: هههههههه بلاكم ما فيني شي عليا: وهذا المفروض.. اللي يكون ريلها شرات حارب المفروض تحب ايدها من ورى وجدام ميسون: أصلا هو المفروض اللي يحب ايده من ورى وجدام ويشكر ربه ويحمده على هالدانة اللي رزقه الله بها.. سارة وتبتسم برقة: عاد مو لهدرجة عليا: أنا إن شاء الله بكشخ من الخاطـــــــــــــــــر هي عيل كيف.. هذا عرس حبيبتي سارونة في هالوقت سارة كانت في عالم ثاني.. كانت تفكر بربيعاتها المستانسات لها من الخاطر.. وكانت تتمنى تكون حالتها أحسن من هالحالة اللي تمر فيها الحينة.. كانت طول عمرها تفكر وتخطط لهذا اليوم.. لكن كل أحلامها تبخرت وتلاشت من أول ما دخل حارب حياتها.. ميسون: ساروه..؟ سارة: هلأ.. ميسون: وين الجارج؟..تليفوني مفضي.. أكيد الحين أمايا بتحتشر علي.. قامت سارة تدور الجارج بس ما لقته.. سارة: الظاهر تحت في الصالة..بسير اييبه ميسون وحست أن سارة تعبانة ومالها نفس فما حبت تزيدها.. ميسون: ما عليج سارة أنا بسير اييبه سارة: خلاص .. بتلاقينه فوق التلفزيون على ما اعتقد ونزلت ميسون تحت عسب تييب الجارج وفي ويهها قابلت شهد وشمة.. ميسون وقعدت تبوسهم: هــــــــــــــــــــــلا واللــــــــــــــــــه شمة: منو انتي؟ ميسون: أفاااااااا مسرع ما نسيتوني.. أنا خالوه ميسون شهد: هي سح ميسون ( هي صح ميسون ) ميسون: ههههههههههههههه وشوي يطب عليهم ثاني اللي ما انتبه لميسون لأنه كان يلعب بموبايله.. وأول ما سمع صوت ميسون تيبس.. وعلى طول وقف يعدل سفرته.. " حركــــــــــــــــــــــــــــــــــــــــــــــا ت" |
ثاني: هــود هــود ميسون وتوها تنتبه لثاني وقفت وهي مرتبكة.. ثاني: السلام عليكم ميسون: وعليكم السلام.. ثاني: شحالكم؟ ميسون وهي مرتبكة وميته على ثاني خاصة أنها أول مرة تشوفه متسفر: تمام الحمد الله ثاني: عسى دوم..هب يوم ميسون وهي تبتسم.. شمة: تااني.. ثاني ولا في النيا قاعد يتأمل ميسون الحبيب شمة وتعلي صوتها وتصارخ: تــــــــــــــــــــــــــــــــــــااااااااااني ثاني وتوه ينتبه: ها..ها ميسون ضحكت من حركاته شمة: وين سالة؟ وين سارة؟ ميسون: تعالي أنا بوديج حق سارة..قاعدة فوق ثاني وشوي بذبح شمة.. ثاني: خلاص عيل.. بعد شوي بمر آخذكم شمة: بس لا تتأخل.. " بس لا تتأخر" ثاني وينزل بمستوى شمة: إن شـــــــــــــــــــــــــــــاء اللــــــــــــــــــــــــــــــــه عمتي شمة أي أوامر ثانية؟ شمة: امممممممممم ابي بيبشي. شهد: وأنا ابي ديو ثاني: مو جني عطيتكم ويه؟ ميسون: هههههههه ما علي خلهم علي أنا بسويلهم عصير أحسن عن هالغازات والخرابيط ثاني: لا تعبين روحج ما يحتاي أصلا ما رح يشربونه هذا بس دلع ميسون: أفا عليك.. تعبكم راحة ثاني: تسلمين وطلع على أساس يرجع وياخذ شهد وشمة أما ميسون فخذت شهد وشمة المطبخ وسوت لهن عصير برتقال fresh شهد: اممممممم لزيز ميسون:ههههههههه.. انتي اللي لزيزة والله شمة: هدا أحلى من بيبشي ميسون: شفتي عاد.. من اليوم وساير ما أبيكم تشربون هذي الخرابيط.. تراها هب زينة تعور المعدة صح أن شمة وشهد شكلهن ما فهموا شي بس قاعدين ويهزون براسهم أونهم يسمعون الرمسة.. شوي نزلوا سارة وعليا تحت.. سارة وهي تزقر ميسون: ميســــــــــــــــون؟ وينج؟ ميسون وتوها تنتبه لسارة: تعالي سارة.. أنا في المطبخ أول ما دخلت سارة المطبخ قامن شهد وشمة يركضن صوبها سارة: عدال عدال.. شو هالحب اللي نزل عليكم فجأة |
عليا: فديتهن والله سارة: منو يابكن؟ شهد: تاني سارة: ثاني؟ وينه عيل؟ ميسون: ظهر.. وقال أنه برد عقب وبياخذ شهد وشمة وشوي يسمعون صوت سيارة برع.. عليا: هذا نادر.. ميسون: خليه يصبر شوي بسير اييب جنطتي وبييج سارة: قعدوا لا توا الناس عليا: شو توا الناس.. على العموم لا تخافين وايد بنكون وياج هالأيام.. وغمزت حقها..ولا نسيتي سالفة العرس سارة وترد لكآبتها وتتصنع الابتسامة: على خير إن شاء الله بعد ما روحوا ميسون وعليا قعدت سارة ويا شهد وشمة.. سارة: شرايكن نسير نلعب في الحديقة..؟ شمة + شهد تشققوا عالآخر سارة: عاد أنتوا اللي بتقولون لأ.. كل شي هي..بس اصبروا بسير ببدل وبنزل أخاف توصخون بدلتي.. وراحت سارة عسب تبدل ولبست برمودا جينز وقميص أصفر قصير ورافعه شعرها تحت منديل لافته على راسها.. سارة وهي نازلة على الدري: شهودة..شميم يلا في الحديقة.. قعدت سارة تلعب ويا شمة وشهد وجنها ياهل.. حاولت تتناسى ولو لفترة بأنها الحين وحدة مخطوبة.. بس ياليت اللي خطبها ما كان حارب.. كانت دايما تحلم في هذا اليوم.. بس ما تدري شو نهاية هالزواج..؟؟؟؟؟؟؟؟؟ قعدوا يرشون بعض ماي النافورة..وعقبها ركبوا شهد وشمة المراجيح وقعدت سارة تلاعبهم وكانن مستانسين عالآخر.. عاد ثياب شمة وشهد حدث ولا حرج.. وفجأة.. ما حست سارة بعمرها ألا وهي في الهوا.. ما حست بريلها لأن في أحد شالها من عالأرض قعدت سارة تصارخ وهي ما تعرف منو اللي شايلنها.. وشهد وشمة ميتين من الضحك عليها.. قعدت سارة تصارخ وما حست بعمرها ألا وهي في ماي النافورة .. ياحليلها تخرست كله ماي..أصلا هي ما كانت ناقصة .. وشوي ترفع سارة راسها عسب تشوف منو اللي سوا بها جذه.. سارة وهي تصـــــــــــــــــــــــــــــــــــارخ:سهيــــــ ــــــــــــــــــــــــــــــــــــــــــــــــــ ـــل سهيل وهو ناقع من الضحك.. وشرد عنها بس سارة ما خلته وقعدت تركض وراه وهي متخرسة ماي.. شهد وشمة ناقعين من الضحك سارة تحاول تمسك بسهيل اللي كان يدور حول شمة وشهد وسارة تدور وراه وهي مفولة.. واللي زادها أن سهيل قاعد يسويلها حركات ويقهرها ويطلع لسانه حقها.. سارة وهي تصارخ: والله ما أخليك يالخــــام.. وشوي قدرت سارة أنها تمسك سهيل لأنه كان لابس كندورة وهاشي ما ساعده عسب يهرب منها.. وقعدت تضربه..وترشه ماي..وسهيل ناقع من الضحك... حتى شهد وشمة قعدوا فوقه ورشوه ماي.. ياحليله 3 ضد 1 وبعد ما حسوا أنهم انتصروا عليه.. فجوا عنه.. سهيل: حشـــــــــــــى هب بنات.. ديناصــــــــــــــورات سارة نقعت على هذا التشبيه: ههههههههههههههههااااااااااااااااااااااييييييييي ديناصورات فعينك سهيل وهو يضرب شهد وشمة: وأنتوا يالمفعوصات بلاكم قلبتوا ضدي... الحين خل يدي يوديكم الدكان |
شهد: آدي.. سالة بتودينا " عادي سارة بتودينا" شمة: لا لا كلاص..ما بتربك "لا لا خلاص ما بضربك" سهيل وهو يبوسها على خدها: امممواح فديت شمومتي والله سارة: ما علي شميم.. يالمنافقة شمة: لأ أنا مو منافكة..أنا هلوة " لأ أنا مو منافقة..أنا حلوة" سارة+ سهيل: ههههههههههههه سهيل: سارة؟ سارة: هلأ سهيل: أنا آسف سارة: على..... سهيل: يمكن ضغطت عليج شوي بسالفة الزواج سارة وهي تبتسم:لا ما عليك.. يمكن أنا المفروض اعتذر..ودام كلكم موافقين عليه خلاص يعني الريال أوكي سهيل: أفا عليج.. اصلا حارب ريال ولو تلفين العالم ما تلاقين شراته..وخذيها مني.. تراني أضمنه لج سارة وهي تبتسم: أتمنى.. سهيل ويبوسها على راسها: والله وكبرتي وصرتي عروس احمرن خدود سارة: الفال لك إن شاء الله ................................................ في هالوقت حارب كان في بوظبي كان زهقان وما حس بعمره ألا ووهو عند كاسر الأمواج ما كان يدري وين يروح ؟؟؟ بركن السيارة ونزل عقب ما طلع زيجارة وقعد يدخنها.. راح يفكر في حياته.. كيف بتصير ويا سارة؟ ياربـــــــــــي.. ما أبي أظلمها.. بس خالتي؟؟ أففففففففففففففففففف ودي أصرخ ودي الكل يسمعني.. يا ناس ياعالم.. والله تعبــــــــــــــــــــــــــــــان؟ المشكلة أن حتى سارة رافضة الزواج.. يعني كيف بنعيش ويا بعض إذا الواحد فينا ما يطيق الثاني؟؟؟؟؟؟؟؟ الله يعين بس... ................................ كـــــــاااااات اعتقد انه البارت طويل و سامحوني اذا قصرت وياكم ولا تاخرت ولا تحرموني من توقعاتكم ساره الي ما كانت تطيق حارب بعد كمن يوم بيصير ريلها كيف بتكوون حياتهم؟؟ و سعاد بعد ما تركها حارب كيف بيكوون مصيرها؟؟ وهل بتترك حارب في حاله ولا بتخرب عليه عيشتة؟؟ و ثاني يحب ميسوون ولا بس يلعب عليها؟؟ وشو رايكم في البارت؟؟ |
في انتظااركم...:):) |
| الساعة الآن 06:31 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir