منتدى استراحات زايد - سكر عيونك حبيبي وشوف كيف دنياي بدونك

البارت الخامس

((( أجمل أحساس بهالكون ..أنكـ تكون متأكد اللى تحبه يحبك )))
\
\

منصور صارله ثلاث ساعات يدور فالشارع مب عارف وين يروح ..متوتر ع الأخر
"تحبني ..تحبني آآآآآآآآآآه يا قلبي أركد أشوي أركد " وفجئه رن تليفونه
منصور يشوف المتصل ويرد : هلا امايه
أم منصور : هلا أبوي شحالك ؟
منصور :يسرج حالي ..علومج أنتى ؟
أم منصور :الحمد لله بخير فديتك
منصور مبتسم
أم منصور :لا تروح تيب أختك ..خالك بو سعود برجعها البيت
منصور يتنهد براحه : هيه زين
أم منصور : بطول برع البيت؟
منصور : هيه يبالي ساعتين جيه وبرجع
أم منصور : أنتبه ع الدرب ولا تسرع
منصور : ان شاء امايه لا تحاتين
أم منصور : مع السلامة
منصور يريد يرد لكنه سمع ..تووووتوووتووو
ضحك : سكت التليفون فويهي كالعاده ..بس أحسن ما أرجع هندوه البيت لأني متوتر وما أقدر أدش بيتهم وجيه حالتي ..حرك سيارته صوب البحر ونزل وقعد مجابلنه
.
.
دقيت باب غرفة هند : حاطين عشا تعالي ننتظرج
هند تفج الباب : برايكم تعشوا ..أنا كليت فبيت خالوه
غادة :حلووو .. عيل درستوا زين
هند : هيه ما تشوفيني كيف هلكانه ..أبا بس ارقد وأرتاح
غادة : تمااام ريحي عيل .. وأنا برووح آكل يوعانه
هند تبتسم : بالعافية ..
سكرت الباب ودشت الحمام وخذتلها شور ع السريع ونسدحت ع السرير وراحت فسابع نومه
.
مشاعل تتجلب ع السرير تحاول ترقد بس ماشي فايدة ..نشت ويلست وهي تتذكر كل اللى صار بينها وبين منصور وقلبها ابدا مب راضي يهدا .. تحس بشعور مخلوط فرح ع خوف ع راحه ..مشاعر غريبة أمتلكتها ,,مب قادره تحدد شعورها شو بالضبط .. : ياربي أنا اللى سويته صح لما أعترفتله بحبي ولا غلط !!.. تسكت شوي وتكمل : بس كنت لازم أرمس ولا بخسره ..بخسر الأنسان اللى حبيته بجنون .." تحط إيدها ع قلبها " الحمد لله أن إحساسي أنا بعد كان صح وطلع يبادلني المشاعر ..امم ياليتني أقدر أعرف بشو يالس يفكر الحين ..يفكر فيني مثل ما أنا أفكر فيه ؟؟ آآآآه يا منصور أحبك ..نزلت دمعه من عينها ..:الحمد لله رب العالمين ..ربي أستجاب لدعوتي .. دموعها تنزل أكثر .. لازم أنش اصلي ركعتين شكر .. مسحت دموعها وخذت نفس كبير عقب نشت من على الشبريه وراحت الحمام تتوضا
.
.
منصور فالمطعم مع محمد ربيعه يخبره اللى صار
محمد يبتسم بخبث : وله طلعت تحبك ..ويغمزله
منصور بفرحه : هيه تخيل تحبني
محمد : أنزين وبعدين ؟؟
يطالعه بأستغراب : أقولك تحبني تقولي وبعدين ؟
محمد : أقصد عرفنا أنك تحبها وهي تحبك ..شو تتريا بعد تقدملها
منصور :أنت مينون شو ؟ الزواج لعبه ..أنا مب مستعد حاليا
محمد : لا والله .خل البنت أطير منك ..هذا أنت بس فالح تفرفر نصايح علي ..
منصور: أنا غير وأنت غير
محمد : فشو غير؟
منصور : أنا ما ألعب ع البنات وأنت عارفني ما عندي هالخاربيط
محمد : خلاص عيل أخطبها وأثبتلي هالشي
منصور : أنت ما تفهم ..قتلك مب مستعد
محمد :شو مب مستعد ؟ ما شاء الله عندكم خير ودوم تقولي أمك تباك تعرس ..حق شو بتستعد بعد
منصور : ماعرف أحس اني للحين مب مستوعب اللى صار
محمد يضحك : هههههههههههههههه ..هذا الحب مخلنك جيه
منصور : خلاص حمود أنا بسمع رمستك وباجر برمس امايه فالموضوع
محمد يخزة : توك تقول مب مستعد والحين باجر بترمس أمك
يهز راسه : ما أعرف شو فيني ..يننتني هالبنت ..ما خلت فيني عقل
محمد يبتسم : أنا أعرف شو فيك يا صديقي العاشق ويضحك بصوت عالي
منصور أنحرج ونش :قم يلا قم
محمد ناقع من الضحك وياشرله وووين
منصور : يلا قم بوديك البيت مسهرني للحين باجر ورانا دوام
محمد بعده يضحك : والله زين يوم ذكرت ان عدنا دوام ..مسهرني ع قصصك الرمنسيه
منصور خزة ورفعله ايده بيعطيه بوكس بس سبقه محمد وقال : خلاص خلاص والله بسكت
منصور ياشرله ياله نروح ومحمد طلع معاه من دون مجادله ولا كان بيوصله بكس محترم لان منصور فول ع الآخر
.
.

In canteen
مريم : ذليتيني غادوه شو صار بينج وبين منصور ؟
حركت راسي يمين ويسار :ما برمس ..أول شي عزميني على غداء محترم عقب بخبرج
مريم : ياربي شو هالذل ؟
غاده : تستاهلين أنا أمس مب دراسه عشان حظرت جنابج .. وبذلت مجهود ورمست منصور بعد وانتى مستخسره فيني غدا
مريم : الامتحان كان سهل الحمد لله وأنتى حليتي والغداء الحين بطلبلج أحلى غداء ..بس يلا عاد رمسي
أشرت ع الطاولة : مآبا أول شي أشوف الغداء جدامي عقب برمس
مريم تتأفف : بالوعه مب بنت ..دقايق بطلبلج
وقفت وراحت تطلبلي وجبه محترمه ونا قاعده فمكاني أبتسم ابتسامه أنتصار
.
.
مشاعل يالسه ع المكتب وسرحانه ..طار سرحانها لما سمعت البنت ترمس
سلامة ببرآه : أبله أنتى علينا الحين
مشاعل تشوف ساعتها : ياربي فات نص الوقت وما حسيت .. ترد تشوف البنت : هيه حبيبتي روحي الفصل الحين بيكم
سلامة مبتسمه : أن شاء الله أبله
طلعت البنت من غرفة المعلمات ومشاعل رتبت كتبها وشلت أقلام الصبورة متوجه ع الفصل .. تفتح باب الفصل
مشاعل : السلام عليكم ورحمة الله وبركاته
البنات بلحن : وعليكم السلام ورحمة الله وبركاته
مشاعل تأشر ع الكراسي : تفضلن حبيباتي
بدت تشرح للبنات الدرس وتحس عمرها مب ع بعضها اليوم ..ربع ساعة ودق الجرس
مشاعل : خلاص بنات نكمل باجر
البنات مبتسمات
سلامة :أبله بتعطينا واجب
مشاعل تبتسم : لا حبيبتي اليوم ماشي واجب
شلت أغراضها و طلعت من الفصل وبالها مشغول ودشت غرفة المعلمات حصلت ربيعتها إيمان يالسه ع مكتبها
مشاعل تبتسم : من متى وأنتى يالسة ؟
إيمان : من عشر دقايق .. تشوف مشاعل بنظرة : أنتى فيج شي اليوم ؟
مشاعل تقعد حذالها : هيه والله أحسني مب على بعضي
إيمان : شو فيج ؟
مشاعل محتارة تخبرها ولا تسكت :اممممـ ما فيني شي بس مب راقدة عدل أمس
إيمان متشككه : هيه ..أول ما توصلين رقدي وريحي عمرج عيل
مشاعل تبتسم : هذا اللى بيصير حبيبتي
.
.
غادة : وهذا كل اللى صار أمس
مريم عاقده حياتها : معقوله علاقتهم قويه لهذي الدرجه
هزيت راسي : هيه مريوم ..أنا بروحي ما تصورت لهدرجه منصور متعلق فيه
مريم : والحين شو الترتيب ؟
غادة : والله ماعرف ..
مريم بيأس : لازم أصارحه
غادة : أنتى مينونه شو ؟؟!! قتلج خلينا نصبر كل شي بيبين صدقيني بس السالفه وما فيها محتاجة وقت لا اأكثر
مريم : والله تعبني هالموضوع
ابتسمت : وانا تعبانه معاج ... صح ما خبرتيني اي يوم بيتقدملج ؟
مريم : قالي الشهر الياي
سألتها : تحسينه صادق فكلامه
مريم تفكر : هيه أحسه صادق
ابتسمتلها : أن شاء الله خير
شاركتني الأبتسامه : الله يسمع منج
.
.
.
محمد ع مكتبه مندمج فالأوراق
منصور بتعب : تصدق البارحه ما نمت ؟
محمد يرفع عيونه ويشوفه : أصدق يا العاشق ..يبتسم ويرمس بطنازه .. ما تنلام أول مره تنحب فحياتك ..مب شايف خير يا ريال
منصور يخزة : شوة تتحسبني شراتك ؟
محمد يحط إيده ع راسه : أستغفر الله .. أستغفر الله ياربي انا شو سويت عشان تبلشني فهذا المخلوق "يأشر بصبعة على منصور ويرجع يهز راسة " : قسم بالله ذليت أم يابتني ..ما يسوى علي رمست بنات
يطالعه بنظره حاده : أشوفك الحين تعرف ربك بس يوم تبا تلعب ع البنات تنساه
محمد يقوم من مكتبه ويقعد حذال منصور ويرمسة بلوم :تصدق منصور أني متندم
منصور فج عيونه : بذمتك حمود
محمد متأثر : هيه قسم بالله متندم ومن قلب بعد
منصور مسك أيده بقو ومحمد يكمل : متندم قد شعر رأسي
محمد : متندم أني كلمت واحد شراتك عن علاقاتي الغراميه ..منصور فج عينه ..ومحمد تقرب منه أكثر وكمل : تدري ليش ؟ لآنك واحد نحيس ..بغيض ..غثيث ..تلوع الجبد..كريهه .. واقفلي مثل العظم فالبلعوم .. يأشر على حنجرته ويكمل .. شربت عليك ماي.. عصير ..ردبول ..لكن ما تنزل أبدا... للأسف كل محاولاتي بأت بالفشل .. منصور بعده فاج عينه ويشوفه كيف يرمس بحرقه ..وفجئه وبدون سابق أنذار نقع من الضحك بصوت عالي ..محمد شل عمره بقهر ورجع وقعد على مكتبه وهو يتحرطم ويتأفف

البارت السادس

((( ما يغيرني عليك المستحيل ..لا الظروف ..ولا الزمان ..ولا سفر..وكّل الله ! لا يضيع أبك الجميل ..دامك أجمل من عرفته بالعمر )))
\
\

دقيت باب غرفة أمايه
أمايه : الباب مفتوح
فجيت الباب وروحت صوبها وحبيت رآسها
غادة : شو هباتج أمايه ؟
أمايه : بخير ما اشكي باس ..وانتى كيف كان أمتحانج ؟بشري
ابتسمت :وايد سهل
أمايه : زين الحمد لله
سألتها : عيل أبوي وينه ؟
أمايه : راح أيب أختج من المدرسة لأن أخوج بيتغداء برع مع ربعه
غادة : ايوا ..خلاص عيل أنا بخليج تعبانه بروح أرقد
أمايه : جيه ما تبين غداء
غادة : لا أمايه مآكله مع ربيعتي
أمايه حرجت : ما تشبعن من اكل المطاعم انتي
أبتسمت ونا طالعه من الغرفة ..دوم تهزبني لما اتغدا فالجامعه وبعدني ما أتوب ..تذكرت شي ورجعتلها : أماية خاطري أروح بيت خالوه ..من زماان ما شفتهم
أمايه : أمس أختج كانت عندهم
غادة : أدريبها بس ما رمت أروح معاها بسبت الأمتحان
أمايه : انزين ما يخالف بس منو بيوديكم ؟ منصور بيتغدا برع مع ربعه يمكن يتاخر
أنفتح باب الغرفة
منصور : أسمعكم تطروني خير
أنا وامايه التفتنا شفنا منصور يدخل الغرفة
بغيت أتاكد : أمايه قالت أنك بتتغداء مع ربعك
منصور : كنسلنا الروحه ..بنخليها وقت ثاني
رجعت أشوف أمايه : وهذا منصور موجود ..خلاص عيل بروح
منصور : وين ؟
أمايه :أختك متوله على بنات خالتك ..وتباك توديها عندهم
أرتبك : هيه ..ان شاء الله بوديها
شفته كيف ارتبك وستغربت ردت فعله ورجعت أشوف أمايه: بروح اخمد
طلعت من الغرفة.. تبعني منصور وسكر الباب ..انتبهت حق الحركه بس طنشت ونا أقول فخاطري " مب صاحي اليوم اكيد وراه شي " ..
أم منصور : بلاك فيك شي
منصور قعد حذالي أمه : أباج فموضوع
أم منصور بخوف :خير ان شاء الله ..شو فيك .؟
منصور : ما فيني شي
أم منصور تحط ايدها ع قلبها : عيل أكيد أبوك
منصور يشوف أمه كيف خايفة : امايه بلاج ؟ أنا بخير وأبوي بخير .. ماشي صاير لا تخافين .."يبتسم " خبر حلو
أم منصور هدت أعصابها : أرمس مصعتلي فوادي
منصور متردد : أمايه أنا قررت وسكت
أم منصور : قررت شو وو؟
منصور بهدوء : أتزوج
أم منصور فتحت عيونها وبفرحه كبيره :تتزوج .هاي الساعه لمباركه يا ولدي
يشوف الفرحه فعين أمه : ما سئلتيني منو البنت ؟
أم منصور : ليش في حد فبالك ؟
أنحرج من رمسه امه : هيه ... نزل راسه وكمل : امممم مشاعل بنت خالتي
أم منصور فرحت أكثر : زين ما أخترت ياولدي ونعم النسب..ما شاء الله عليها مشاعل كاملة والكامل الله
منصور فرحته ردت فعل أمه نش وباس رآسها : الله يخليج لي
أم منصور فرحانه :ويخليك لي يالغالي
منصور : دامج انتى تقبلتي الموضوع عيل أكيد أبوي بيتقبله
أم منصور : وليش ما بيتقبله ..أنت لو أدور بين البنات ما بتحصل وحده أحسن من مشاعل
منصور اكتفي انه يبتسم ويشوف فرحت أمه
أم منصور : رمس أبوك اليوم ..خله يفرح مثلي
منصور بفرحه : أن شاء الله برمسه
أم منصور : ربي يوفقك يا رب
منصور : آمييييييييييييييييييييين
.
.
.

محمد يفتر فالبوادي مول ..يدور له صيدات .. يبا يسمع أصوات يديده على التليفون .. .وهو يمشي انتبه على وحده لابسه عبايه شفافه أمبينه ملابسها اللى داخل وحاطه فول ميكب ومطلعه قذلتها ..كانت جميله من الخاطر ..محمد من شافها ذااااب مكانه وعلى طول لحقها ..من محل لمحل وهي تشوفه وأنتبهت عليه وكانت تسويله حركات من بعيد وهو وراها مثل الثور لين ما راحت حمام النساء وهو الله يعزكم ووقف يترياها عند الباب برع ..تمت 5 دقايق عقب طلعت وهو وراها
البنت تلتفت صوبه : خير أخوي بغيت شي
محمد يتأمل جمالها : بغيتج
البنت تبتسم : خير ؟؟
محمد يأشرلها على التليفون :ممكن
البنت تبتسم وتنزل راسها : اممـ أكيد
محمد : الرقم******
خزنت الرقم جدامه
البنت : انتظرني الساعه 12
محمد ذايب : اكيد حبيبي
البنت : خلاص لا تلاحقني فاهم ..بنترامس فالليل ..باي
وكملت مشيها تتسوق فالمحلات
ومحمد واقف مكانه جنه أول مره يرقم فحياته
فجئه رن تليفونه ومن دون ما يشوف منو المتصل
محمد : الووووو
مريم : هلا حبيبي
عرف الصوت : أهلين
مريم : أخبارك حبيبي ؟
محمد فخاطره مب متفيجلج انا : زين حياتي بخير ..انتى اخبارج ؟
مريم : بخير دامك أنت بخير
محمد : هيه زين
مريم : بلاك فيك شي .؟
محمد : هيه حياتي ..يايب خواتي المول والحين نحن فالمحل ..أخاف حد يسمعني أرمسج
مريم : هيه ..معاك حق حبيبي ..ببند الحين وبرمسك فالليل
يذكر البنت : لا حبيبي ربيعي عازمني على العشاء وانتي تعرفين سوالف الشباب اكيد بتاخر وما أباج تتريني وانتى عندج دوام ..اخااف عليج عمري
مريم بفرحه : حياتي والله ..هالكثر تحبني
محمد : واكثر مما تتصورين ياعيوني أنتى
مريم : ببند حبيبي عن خواتك يحسون فيك
محمد : اوكيه قلبي .ديري بالج ع نفسج وتغطي عدل قبل ما ترقدين
ابتسمت مريم : ياااااربي أشكثر أحبك انا ...أموووووت فيك
محمد : وانا وانا
مريم : ياله حبي مع السلامه
محمد : باااااي
.
.

فاطمة يالسه تشوف التلفزيون وتأكل حب فالصالة ومعاها مشاعل وأمها
مشاعل : فطوم عطيني شوي
فاطمة تفر الكيس فذبان مشاعل : يودي .. هذي حالتي من تشوفوني آكل شي لازم يحلا فعيونكم
مشاعل تبتسم : شو نسوي ..تشهينا
تدخل عليهم ريم تركض
أم سعود : شوي شوي ..
فاطمة : خليها أمايه تتحسب عمرها ياهل
تأخذ نفس وترمس : بنات خالتي نوره بيون عدنا
مشاعل عفويا وبفرحه : صدق
ريم تصد صوبها : هيه صدق ..توها هندوه مرمستني على الفون وقالتلي أهي وغادة بيون عدنا وبيبهم منصور
مشاعل حزتها حست بشعور غريب وما رامتت تتحمل تسمع أكثر وقفت على طول : أنا بروح غرفتي اريح
أم سعود : وبنات خالتج ؟
مشاعل : بعدهم ما وصلوا ..انا بريح شوي وبرجع .. وطلعت من الصاله
فاطمه : ريموه شرايج نروح نسوي فواله
ريم تبتسم : حلووو ..ياله نروح المطبخ
فاطمة تلم كيس الحب اللى يمها : ياله
أم سعود تشوف بناتها وهي مستانسه
.