|
????18 |
السموحه ع التاخير بس انا قلت انه محد من الاعضاء عيبته القصه بس عشان خاطركم راح انزل الباقي وسموحه مره ثاني ... الجزء الرابع ابي حب وغيرة ابي صوت ابي موقف ابي كلمه تهز اوطان ابي انسان لا طحت من طولي يفز ويسند حمولي يحس فيني قبل لا اشكــــــــــي يواســــــــــــــــيني قبل لا ابكي ومن قلبه إذا حنيت الاقي بداخله احضان دخيل الله ابي انسان أبــــــــــــــــــــــيك وأمــــــــــــــــــــــوت فيــــــــــك فطيم : شوفي شوفي هالمسج والله عذاب ينطبق عليج ههههههههههه عوشه : عيبني طرشيه لي فطيم : حاظريييييين والله ما عندي مانع لو تبين الف مسج بس بخبرج شي بعلمج على حركه يوم بتشوفينه يا صوبج فتحي البلوتوث وطرشي له هالمسج عوشه : فطييييييييم ويهد فطيم : شووووووو يهد ييهد العدو عوشه : شو هالحركات .. والله يا فطيم بستاثم عليها اذا سويتها فطيم : لا تستوين لنا مطوعه عاد عوشه : مب سالفه مطوعه وما مطوعه .. " وما يلفظ من قول الا لديه رقيب عتيد " فطيم : صدق الله العظيم .. صدقتي الله يهداني اسوقلج الافكار الهدامه عوشه : هيه الحمد لله يوم عرفتي . فطيم : بس بعدني اقولج انه الحب مب حرام عوشه : حلال لكن الافعال اللي شرات هذي السوايا حرام فطيم : هيه اعرف عوشه : تعالي الحين متى بتردين علينا ههههههههه فطيم : ماااادري استحي هههههههههههههه عوشه : اسمع انتوا ايه اميه اخويه مب لعبه في ايدج ردي بسرعه اونج عاد تحيرين الموضوع وانتي مخططه وياه لين مب لايعه جبودكم فطيم : هههههههههه يالله عاااد فديت سلوم عوشه : الليله ردي عليهم فطيم : شوه الليله ويمكن نسوي ملجه وانتي ويا يروحج ؟ عوشه بوزت : هيه والله فطيم : لا لا افا عليييج الغاليه ما اسوي الملجه الا يرحج ملتجم عوشه : فدييتج والله فطيم : يالله الحين انا بسير وبرد عقب بسير اعق ثيابي وبسبح وبيي عوشه : اوكي بس لازم تتريين لين تي امايه --------------------------------------------------------------------------------------- كانت الساعه 5 العصر والكل يالس في المزرعه .. وكانوا بنات عم سيف موجودات سيف : مريم تعالي مريم لحقت اخوها سيف وعذاري تلاحقه بنظراتها ساروا الصوب الثاني مريم : آمر سيف متردد : مريم ااااااا مريم : شو بلاك ؟ سيف : الساعه 5 وما سرتوا تتطمنون على البنت اااااااا اقصد بنت يرانا قوم بو خالد مريم حست انه سيف قلبه تعلق في عوشه مريم حست بلومه : ان شاء الله بس بنات عمي هنه ما نقدر نودرهم سيف : انزين عذاري وعفرا مب غريبات بيتمن ويا امايه مريم : لا الصراحه استحي شو بيقولون سيف تضايف ومريم حست به : انزين اوكي انا بظهر مريم ما حبيت تخليه متضايق جيه : سيف تعال لحظه سيف : نعم مريم : انا بسير وياك بس بخلي قوم عذاري هنه وبسير بس عشانك وعشان عوشه وام خالد وتبتسم سيف ابتسم : يالله اتريااج مريم : لحظه ابويه انا بسير البس ثيابي ثياب زينه عشان اطلع شويه زقرت سيف : افا عليج اكشخي آخر كشخه المهم توصلينهم وحليلهم . مريم : يالله ياييه ---------------------------------------------------------------------------------- الدكتور : لا الحمد لله الحين بخير ولله الحمد بو خالد : الحمد لله الحمد لله الدكتور : بس اللف بتقدري تيقي تشيليه بعد كم يوم بو خالد : ان شاء الله بنيبها افا عليك الدكتور : ان شاء الله ---------------------------------------------------------------------------------- مريم : يالله شيخه : وين سايرين .؟ مريم : ااااااا سايرين بنزور عوشه عذاري بكبر : عوشه منيه عوشه بعد هذي وتطالع سيف مريم : عوشه بنت يرانا لا إله الا الله يا عذاري تبين تعرفين عن القرحه وشو دواها عذاري عصبت : انزين انا سألت ويحق لي على ما اعتقد سيف يتخبل من رمست عذاري ومن نغزاتها .. يدري انه تحبه بس ماا يطيقها لانه وذى وكل شي تعلق عليه يعني لا هو من طبايعها ولا هي من طبايعه سيف يطالعها بطرف عينه ويلوع بالمفتاح : مريم انا بترياج برع عذاري فار دمها يوم سيف جفى بهم وسار بدون ما يرمس مريم : يالله اسمحولنا .. شيخه : سلموا عليهم واستسمحوا منهم بنيهم عقب مريم : ان شاء الله يالله فمان الله عذاري سيده صدت على شيخه وهي متغايضه : شو سالفة عوشه .. ابا اعرف وليش سيف مهم هالكثر ؟ شيخه : بخبرج بعدين وتطالع امها .. عذاري بتسلط : الحين مريم سمعت هالكلام .. ركبت الموتر وسيف يطالع صوب مزرعة قوم عوشه .. مريم صدت صوبه : تخيل شو قالت سيف : ما ابا اعرف مريم : بقولك " قالت اونه منو هاي عوشه وليش سيف مهتم فيها .. سيف متغاايض : شو يخصها ياربييييييي مريم : تعرفها انته سيف : قلتلج اني ما ادانيها مريم : الله يهديها سيف : يالله انسي سالفتها ما بتاخذين لهم شي ؟ مريم : يا سلام عليك يا السنافي سيف مبتسم : على منو مسماي مريم : على الغالي الله يرحمه ---------------------------------------------------------------------------------------------- عوشه : لا ما اقدر الدكتور : اه انتي عيزه تنويم .. وشك مصفر عوشه تطالع الدكتور بضيج : والحين الدكتور : لازم تنامي عندنا في المستشفى بعد يوم عوشه : لالالالا دكتوور الدكتور : لازم يا بنتي علشان تبأي كويسه عوشه : والتحاليل شو تقول الدكتور : اذا فسرت لك التحاليل حتعيطي من اللي فيهن عوشه زاغت : ليششششش دكتور شو فيني انا ؟ الدكتور : خلينا من ده كله لازم تتنومي ولازم تاخذي الكيس التاني عوشه تطالع الدكتور : ان شاء الله .. بس خلوني انش الدكتور : ايه يعني عوشه : يعني خلوني اتحرك الدكتور : تحركي زي ما انتي عايزه عوشه : ان شااااااااء الله ما آمرت بشي الدكتور : يالله انا الحين حروح وان شاء الله تبأي كويسه عوشه : ان شاء الله طلعت فطيم من الحمام .. : هااه شو قال عوشه متضايقه : قال لازم ايلس هنه لين باجر فطيم : يااالله وانزين عوشه : لاني اونه لازم يعطيوني هالكيس مره ثانيه فطيم : حسبي الله على عدو حمدووه خلص دمج عوشه : يقول انه من قبل فيه فقر دم اونه فطيم : شدراه ؟ عوشه : شدراني ليش انا يالسه وياه فطيم : يالله الا هو يوم واحد عوشه : ان شاء الله فيه الخير عاد فطيم : انزين انا بتم ويااج عوشه : ان خلتج امايه عاد هي من مساعه يالسه تقرى عليه الحين يوم بيقول بنومها بتم يالسه ما بتخوز فطيم : انزين برايييج توني اتصلت بسلوم وقال الحين يايين عوشه : انتي صدق ويهج لوح فطيم : ليش عوشه : تتصلين ويتصلج انزين هالاتصالات تكون بس وقت ضروي فطيم : انزين ها وقت ضروري .. اف منج تراه خطيبي الحين . عوشه : اذيتينا .. يا امييه فطيم : يالله سايره البس عباتي عوشه شويه وسمعت الباب يندق . فطيم تطالع عوشه : منوه ؟ عوشه : ما ادري فطيم سارت وفتحت الباب .. ومستغربه ؟؟!! فطيم : هلا مريم : اهلين الغاليه وتجدمت تسلم عليها : شحالج الغاليه فطيم : بخير ربي يعافيج مريم : وين عوشه ؟ فطيم : تفضلي الغلا هاذيه هنه مريم دشت وسارت عند عوشه عوشه ابتسمت : هلا والله الغاليه مريم : هلا فيييج شحالج غناتي عوشه : بخير ربي يعافيج انتي شحالج مريم : بخير الحمد لله بشوفتج عوشه : فطيم هذي مريم اللي مزرعتهم عدال مزرعتنا فطيم استااااااانست : حياج الله مريم : الله يحييج عوشه : مريم هذي بنت خالي فطيم مريم : هلا بج الغاليه عوشه : يا مرحبا الساع مريم : ما شاء الله في تحسن كبير بين مساعه والحين عوشه : الحمد لله بوجودكم كل الاعواق تبرى مريم : تسلمين الغاليه سيف كان يالس برع صوب الاستراحه اللي عند البوابه ومن شاف ام خالد وحمد وحميد وسالم ياين ونقز سيف : السلالام عليكم الكل استغرب : وعليكم السلام وسالم يتخاشم وياه سالم : شحالك سيف : الحمد لله بخير حمد منزل راسه ويطالع تحت : ام خالد : هلا والله بولدي سيف شحالك الغالي سيف مبتسم : الحمد لله بخير ربي يعافيج ام خالد : يعلها دايمه عليك سيف : ويااج سالم : ما ننسالك الجميل الغالي سيف : خلوا الجميل بصوب انا يايب الرضيعه داخل تسلم وانا يلست هنه عند ريال والحين ياي عنه ام خالد : حياااكم الله في كل وقت .. حمد صد صوب سيف وشافه ما سوى له سالفه : سيف انا ابا ارمس وياك سيف يطالعه جدامهم بستغراب ام خالد : سيف وتأشر له انه يرمسه سيف ابتسم : تعال ام خالد : ايلسوا انتوا هنه يالله انا بنهي عنكم سالم : ان شاء الله سيف خذ حمد من ايده ويسوا الصوب الثاني حمد يالس ويطالع الارض سيف يرمس بكل هداوه و: آمر بو شهاب شو في خاطرك حمد مستغرب ويطالع سيف سيف يضحك حمد : ليش انته جيه سيف : شو فيني حمد : انته قلبك طيب سيف : قلبي مب طيب حمد : عيل ليش تضحك وانته تقول زعلان عليه سيف : حشى ما زعلت بس شليت في خاطري .. حمد : والحين سيف : خاطري فاضي حمد : ههههه سيف : بس هذا الشي ما يمنعني ازعل عليك حمد : ليش سيف : انا كنت اتحسبك ريال يعني قد هالكلمه تقوم وتظرب اختك على شي ما يسوى ليش انته ما تحس انه هذا شي غلط وهالتصرف مول مب من شيمة الريايل حمد : امبلا بس سيف : لا بس ولا شي انته ريال ولازم تثبت انك ريال الف في الميه .. انته تدري اني اعتبرتك واحد من ربعي حمد : والحين سيف : اذا استمريت على هالحال بتخلى عنك حمد : لالالا سيف : عيل شو حمد : بغدي ريال من اليوم وساير سيف : كلمت رياييل حمد : كلمة ريايل سيف يبتسم له : فديت خشمك انا يالله نسير عندهم --------------------------------------------------------------------------------------------- مريم : يالله انا بظهر عنكم خله صغاريه ايون هنه عوشه : ايلسي الغاليه اصغاريه عقب بيوون مريم : لا لا حشى ان شاء الله يوم واحد بيي عندكم المهم اتطمنا على صحتج الغاليه عوشه : تسلمين غناتي ام خالد : وااعليه عنج سلمي على امج الغاليه مريم : يبلغ امايه عوشه : ربي يحفظج مريم : يالله فمان الله __________________________________________________ ________________ |
عذاري معصبه : وسيف شله ؟ شيخه مستغصه منها : الحين لو كنتي مكانها ؟ عذاري : بسم الله عليه ربي يحفظني شيخه : ما ترضين على نفسج وترضينها على غيرج عذاري : بس مب حلوه هذيل شكلهم استغلاليين كفايه استغلوا بو محمد وعطاهم مزرعته شيخه : استغفر الله لا تحطين في ذمتج انتي شو فيج عذاري : انا ما احط في ذمتي انا اقول الصدق شيخه : خلاص انزين انتي شو لج من الخانه فيهم عذاري : لانه اللي في السالفه ولد عمي ويهمني امره شيخه : لا والله عذاري : كيفي والله ولد عمي وانا حره فيه شيخه : وهو حر في نفسه يسوي اللي يسويه عذاري : خوفي باجر يتمسك فيها هاي عوشووه العيوز ويقول باخذها بس لو على قص ارقبتي شيخه : خيبه انتي شو من البشر عذاري : انا انسانه واحب بعد شيخه : انتي مستحيل تعرفين تحبين جان هذا كلامج .. عذاري : انتوا لو تعرفين معنى الحب والغيره جان ما قلتي هالكلام شيخه تطالعها بغياض : الله المستعان ---------------------------------------------------------------------- سيف شاف مريم يايه صوبه واستااانس .. سيف تجدم لين عند مريم مبتسم مريم : حيرتك صح سيف : وايد مريم : شو نسوي خذتنا السوالف سيف يمشي ويطالع مريم ومبتسم : عاد شو سولفتوا مريم : عجب سيف : ههههههههههههه مريم : هههههه اول مره اسمعك تظحك جيه سيف تلوم : ما ادري من وين ظهرت ضحكت استعباط مريم : لا والله ضحكت فرح سيف : انزين ما قلتيلي شخبار اااااااا البنيه اقصد شخبارها مريم : الحمد لله بخير بس بيضهرونها باجر سيف بخوف : ليش ؟ مريم : لازم يحطون لها كيس دم ثاني سيف : الله يعافيها يارب مريم : آمين -------------------------------------------------------------------- مرالاسبوع وعوشه تحسنت وسيف كان مشتاقلها شوق فضيع كل ليله يتحلم بها ويردد اسمها مرات ومرات كان وقت العصر حب سيف يسير صوب المزرعه .. اشتاق للايام اللي قضاها ويا حمد وحميد وايام الضرابه ويا عوشه .. كيف دخلت حياتي بسرعه هالبنت ؟ من عقب فاطمه ربيعه اخته شيخه ,, الحمد لله على كل حال سيف : حالي ترا يحلالي معك وأنسى الكدر... مالي غنا في مالي دونك مالي صبر.. روياك تتراوالي في عيني والفكر.. انهم بصوت عالي من يوفي والصدر وفي هالوقت كانت عوشه يالسه في المزرعه صوب خوانها .. وعدالها بنت خالها فطيم .. وويلعبون ورقه .. حمد : عقي عوشه : دور فطيم فطيم : لعبت حميد : دوري انا حمدوه لا تاخذه بو خالد : مب بسكم من اللعب ؟ حمد : لا لا مب بسنا يوم بتاخذون لنا شي يرفه عن عمارنا بنخوز عن اللعب بو خالد : مثل شو حمد : بانشيات عوشه : تهبي حمد : ادري هالكلمه كمن مره سامعنها بس يوم بشوف سيف خاطف والله لقوله اركب عوشه حست بشي تحرك في قلبها فطيم مبتسمه : احيد ايي يعلمكم ولا شو استوى ؟ حمد يأشر على عوشه : هذي النحسه من ايهدت انقطعنا عن المزرعه وهو حليله انقطع بعد عوشه : وانا شو يخصني كنتوا تقدرون تون عنده كل يوم حمد : انا استحي منه عوشه مستغربه : من متى ؟ حمد : ما يخصج ما يخصج اسكتي شويه ويسمعون باب المزرعه يدق سيف استاااااااااااااااانس يوم شاف موتر بو خالد عند الباب يا صوب الباب ودق الباب بحيل ما عنده من كثر شوقه لهم الهندي فتح سيف : السلام عليكم الهندي : عليكم السلام سيف : باباه داخل ؟ الهندي : ايواه داخل سيف : اوكي وحمد وحميد ؟ الهندي : داخل سيف : انزين ازقر حمد الهندي : ادخل داخل ما في مشكل بنيه كله مناك يجلس سيف : لا ابويه ازقر حمد انته وبس الهندي : جيين سيف مستااااانس من الخاطر حمد : سيف ؟ سيف : يا هلا والله بالغالي حمد يحظن سيف : وينك ماشفتك من زمان سيف : وانا بعد والله اشتقت لك حمد : تعال داخل سيف : ليش ما عندكم حد ؟ حمد : امبلا بيلسون بعيد سيف : لا لا ما يصير حمد : انته ادخل ابويه بعد ولهان عليك وعلى سوالفك سيف : تولهت عليكم العافيه حمد : الحين من تركت الخيل قمت ما اعرف اركب وما ادري ليش يمكن لانك انته مب ويايه تركتني روحي سيف : افا عليك الحين اكون وياك حمد : يالله تعال حمد سار يركض : هوووووود هوووود يالله سيروا مناك عوشه : منو ياي ؟ حمد : سيف ياي عوشه استااانست وتطالع فطيم فطيم ابتسمت وقالت في خاطرها : الله يهنيج باللي تحبينه يا الغاليه ---------------------------------------------------------------------- عذاري مب مرتاح بالها .. تشوف ولد عمها .. مب الاولي .. يوم تزورهم في بيتهم يظهر .. ومب مثل العاده يتكلم وياها ولو كلام بسيط .. عذاري في خاطرها .. هذي عوشوه العيوز اللي مغيبتنه شكلها ام الطبوب والسحر اكيد حاطتله شي ... عذاري انا الحين ما اخليه وراه واراه سارت وشلت تيلفونها .. وطرشت حق اخته شيخه مسج ابا اشوفج ضروري شيخه اول ما شافت المسج اتصلت بعذاري .. عذاري : هلا شيخووه شيخه : شو بلاج روعتيني ؟ عذاري : ابا اشوفج حرام يعني ؟ شيخه : عوذ بالله منج قلبي انفجر يوم شفت المسج عذاري : الله الله هالكثر تحبيني ؟ شيخه : عن هالرامسه انتي بنت عمي لازم احبج عذاري : انزين الحين انا بس وبيي صوبكم شيخه : ويا منوه عذاري : ما خبرتج ظهرت موتر شيخه : احلفي ؟ عذاري : والله ظهرته اول امس شيخه : زيين مبروكه عذاري : الله يبارك فيج . شيخه : عيل تظهرين ع هواج عذاري : اكيييد شيخه : يا سلام عذاري : بتسيرين ويايه باجر ؟ شيخه : ويينه عذاري : بنسير نتمشى في السنتر وبنتعشى في مطعم شيخه : لا الغاليه نحن عندنا دريول وما نظهر وياه نظهر ويا خوانا عذاري : انزين نحن ما بنسوي شي غلط شيخه : لا مشكوره الغاليه .. مرات ثانيه ان شاء الله عذاري : انزين انا بغيت اخبرج عن سيف ما اشوفه هالايام وياكم شيخه تأففت من عذاري : والله سيف ريال ويظهر ويسير وين ما يبا مب على هوانا نحن وهالايام عنده دواام العصر يعني مشغول مشغول عذاري : انزين عنبوه حتى على عمه ما يمر يسلم شيخه : وعمي متى تم في البيت ؟ عذاري : ونحن ما يستوي ايي يسلم علينا شيخه : انتي النهار كله في بيتنا وشله يمر هناك بعد عذاري : انتي محد يرمس وياييج لسانج سليط اكلمج جيه تردين جيه شيخه : والله ما اقول شي غلط اقول الحق عذاري : شو حق .. شيخه انا احبه لازم تقدريني .. شيخه : لا حول ولاقوة الا بالله شو تبيني اسوي لج انا يالسه في قلبه يعني ؟ عذاري : على الاقل قولي له انه يلتفت صوبي شيخه : آسفه ما يخصني عذاري عصبت : هذي عوشووه ام الطبووب هي اللي ساحرتنه والله انا براوييها شيخه : استغفر الله العظيم عذاري : قلبي متعلق فيه وانتي ما تساعديني شيخه عصبت : عذاري انا بقولج شي الصراحه سيف يستاهل انسانه تحبه ويحبها مب انسانه لسانها طويل ومتشرغه ونكديه شراتج عذاري عصبت اكثر : انا نكديه اوكي ما عليه يا بنت سعود شوفو اذا ما سويتلكم شي تندمون عليه ما اكون انا عذاري شيخه : يالله عاد فمان الله انا وايد سويت لج سالفه اف وتبند في ويها عذاري اغتااضت وحست بالحقد والغيره تاكل قلبها ------------------------------------------------------------------------------------- |
حمد : جيه اوكي سيف مبتسم ويسويله حركه اوكي بأيده سيف يقول في خاطره وينها لين الحين ما بينت بو خالد : حميد قول لاختك تسوي لنا قهوه وجاي سيف ألتفت يدور عوشه حميد : ان شاء الله وسار حميد بو خالد : حمداني بسك تعبت الريال سيف : تعبكم راحه يا الغالي بو خالد : راحك ربك في دنياك وآخرتك سيف : وياك عوشه وفطيم حبوا يركبون ع الخيول ويزامطون قوم سيف وحمد هاي فكرة فطيييم .. وكانن وايد متخوفاات بس تشجعن وقالن انه المزرعه عوده وبيخطفون بس عشان يزامطون عوشه كانت لابسه بنطلون جيشي اخضر وقمص ايده طويله من نفس اللون ولبست وقايتها على راسها وحطت النظاره والكاب وطالعه قمر فطيم كانت لابسه بنطلون جنز شارلستن وقميص وحاطه وقايتها ع راسها .. عوشه : اول مره اركب تراني فطيم : عاد انا الخياله الحين عوشه : تعالي والله براويهم مهاراتي ع الخيل . فطيم : لحظه والله لو سرعتي عني بجتلج عوشه : اذا زغتي الخيل بيهيج بج فطيم : احلفي عوشه : والله عوشه : كوني عاديه .. انا تعلمت بعض الاشياء من سيف كنت اسمعهم ذاك اليوم فطيم : ياااالله عوشه : هههههههههه يالله تعالي بنسير صوبهم فطيم : اسمع منو يرمس عوشه : هههههههههههه اخاف ابويه يحرج فطيم : لا لا ما بيحرج على خطيبه ولده عوشه : يالله انزين عوشه تجدمت وفطيم عدالها شويه ووصلوا صوبهم حمد اول ما شاف اخته ع الخيل تفاجأ لانها اول مره تركب سيف كان الصوب الثاني ع الخيل ويوم التفت تم مبهت يوم شافها .. سيف : شكلها خياله 100 100 وحركاتها على الخيل تقول انها متدربه من زماان سيف تم يطالعها وحمد وحميد بعد : حميد : عاااااااااااشوااااااااااااااااا البناااااااات حمد : شو يايبنهن هنه حميد : خلهم عاد بو خالد اول شي تفاجا وعقب ابتسم وتم يصفق لهم : عااااشن البنات ويصد صوب سيف شوفوا غلبنكم البنيات عوشه استاانست من الخاطر يوم ابوها ما قال شي ... وفطيم كانت مستحيه .. عوشه اسرعت شويه وسارت صوب بو خالد ووقفت صوبه : بو خالد : مواهب يا ام راشد مواهب عوشه : طالعه علييك يا الغالي سيف تخبل يوم شافها حس انه قلبه يدق بقووووووووو حمد زقر سيف وقاله : تعال نسير هاك الصوب بو خالد : اول مره اشوفج راكبه شو طرى ع بالج عوشه : غاظوني يبون يراونا مهاراتهم اونه بو خالد : ههههههههههه عوشه : علها دووم هالضحكه بو خالد : ويااج يالله الغاليه تعالي نبا قهوه وجاي للريال عوشه : ان شاء الله بو خالد : لا عدمتج الغاليه سيف يحس انه مب قادر يعبر عن الشي اللي شافه عوشه راكبه ع الخيل وتقوده بمهاره سيف : حمد ما مليت ؟ حمد : امبلا ومستغص سيف : ليش ؟ حمد : بس يالله خلنا نرد وردوا الخيول وفي الرده كان سيف فاتح البيب ويالس يغسل ويهه وشعره .. وحمد وحميد بعدهم عند الخيول .. عوشه مرت وفي ايدها لجام الخيلين عوشه ارتبكت يوم شافت سيف روحه سيف شل راسه من فوق البيب التفت وابتسم وتحنحن وشعره كله ماي .. عوشه تحس انه الابتسامه يتها لا ارادي سيف يبا يرمسها مشى وفق جدامها جان توقف عوشه وهي مرتبكه .. تحس انها اول مره توقف جدامه جيه وبدون عباه سيف حس انه يبا يرمس : كنتي اليوم ما شاء الله كأنج خياله عوشه استااااااااانست من رمست سيف وقالت بمستحى : شكرا سيف بند البيب وتقرب صوبها : ممكن قصده ياخذ الخيول عنها . عوشه تحس ويها محمر : لا عادي بوديهن روحي سيف : افا عليج تودينهم وانا موجود عوشه عطته اللجام .. سيف حس بفرحه كبيره يوم تكلم وياها .. عوشه ردت ورى وسارت صوب ابوها سيف : ااااااا عوشه عوشه انصدمت يوم زقر اسمها : وتمت واقفه مكانها سيف : اااااااا ممكن تيبين لي بلاستر لاني يرحت صبعي .. عوشه مبتسمه : ان شاء الله سيف : عوشه بعدني ما خلصت كلامي عوشه تفاجات وصدت صوبه سيف : شعري يقطر من الماي تبيني امرض يعني عوشه حطت ايدها على جلحها وضحكت : ههههههه ان شاء الله تبا فوطه ؟ سيف متلوم : هي عوشه : أي خدمه ثانيه ؟ سيف : سلامت رايج عوشه تمت مستحححححححححيه مشت و حطت ايدها في مخباها وسارت ميته من الفرح اول مره ترمس وياه بهالطريقه .. استانست بالقو -------------------------------------------------- عذاري يت صوب بيت عمها بموترها وما حصلت سيارة سيف وشاحت وردت صوب البيت مستغصه .. عذاري : قلبي حاس انه عندهم في المزرعه .. الله يغربلها ويغربل الساعه اللي عرفها فيها -------------------------------------------------- عوشه يبين على ويها انها مستانسه سوت القهوه من الخاااااااطر وفطيم كانت تساعدها وسوت الجاي وحطوا الفواله فطيم : والله انه وناسه ركوب الخيل عوشه مستانسه : الحمد لله انه ما عصب ابويه فطيم : بس انا شفت حميد معصب اونه عوشه : خليه هذا يولي فطيم : يالله الحين عاد هذيل الخيالات شو يلبسن جدام الرياييل غير اللي نحن لابسينه عوشه : وبعدين نحن لبسنا ستير بنطلون وسيع مب ضيج فطيم : هيه والله عوشه : ما تدرين توه دارت بيني وبينه رمسه فطيم : احلفي عوشه : والله العظيم فطيم : زااااااده اشوفج مستانسه عوشه : ههههههههه فطيم : شو قالج ؟ عوشه : ما شي مدحني اونه فطيم : يا عيني بدى القلب يدق عوشه : بذبحج ما يخصه طلب مني بلاستر لانه يرح صبعه فطيم : ما يستاهل عوشه : الا يرح انزين فطيم : لا لا واخيرا غدينا خلان عوشه : ايه بجتلج ههههههههههه تموا يضحكون ------------------------------------------------- مرت الايام وعوشه كل يوم يكبر حب سيف في قلبها .. تحس انها اول انسان تحبه وتعشقه جيه .. مع انها ما تتكلم وياه لكن نظراتها له تدل على انها تحبه وتعشقه ونظراته لها تقول كذالك سالم ملج على فطيم وسوو حفله صغيره على قدهم وما زقروا فيها حد .. وعذاري كانت ورى سيف كانت تلاحقه في البيت وساعات يشوفها في المكانات اللي هو يسير لها .. بس هو مب ماخذه باهله الا عوشه سيف : بالعين يرمس خلي الزين .. وبالعين يرميني برمسات ما شفت انا في وصفه الشين .. غير المحبه بكل نظرات أهواك خلي وطالع العين .. بتشوف ردي بالعبارات سيف : يا عوشه .. دشيتي في قلبي وخذتي المركز الاول .. في عمري ما حبيت حد شرواج .. كنت احب بس ذاك حب مراهقه .. من قال سيف بيحب اجنبيه .. وبيتكون له روحه وحياته .. وعقب تتزوج ثاني ..ومن قال سيف يتغير عقب الحاله النفسيه اللي استوت له من عقب ما ملج على ربيعه اخته فاطمه اللي تعلق فيها وحبها حب ما يتصوره لكن .. اليوووم من اليوم هذا .. بس تبدل حبي واحس اني مستانس به .. قلبي مرتاح لها.. فديتج يا عوشه وغلاتج انه محد يسواج دشت عوشه من الباب وامها وراها وخوانها وشافت المكان كله ورد استاانست .. بو خالد مبتسم ويالطعهم عوشه : اللللللللله روووووووووووعه بو خالد : افظال بو محمد علينا ام خالد : ما شاء الله ما شاء الله حمد : ياويل حالي كانه في جنيف . سالم : وليش ما خبرتنا بو خالد : قلت اخليها مفاجأه انا روحي تفاجأت يوم شفت العمال داخل واتصلت لبو محمد وشكرته سالم : وشو سبب هالزروعات الغاويه ؟ بو خالد : تدري انته بأبو محمد بسباب ولا ما شي اسباب سالم : ما قصر والله ما قصر ابويه لازم تعزمه بو خالد : ما يطيع انا كمن مره قايل له سالم : لازم لازم تعزمه ام خالد : هيه والله وازقر ام محمد ويااه عوشه : هيه والله خلونا نستانس ام خالد : بنخليها عزيمه حليوه وبنزقر يرانا حليلهم قوم سيف عوشه ابتسمت لا إرادي سالم : ياااااااااااا سلام ع افكار الوالده خلونا نتوالف ونتعارف ونعزم بعض عوشه : هيه والله فكره غاويه ام خالد : العزيمه بعد بنخليها عشان سلامة بنيتي عوشانه عوشه : جااااااان استااانس بو خالد : هيه والله ما سوينا على سلامتج شي عوشه : الله كشخه المهم تعزمونهم على شاني انا سالم : عشتوا حميد : اهم شي نحن نستانس لانه ما باجي الا اسبوع عن المدرسه عوشه : هذا عيبهم المدارس الخاصه حليلي ما درست في مدرسه خاصه ولا شي حمد : نحن برستييييج عاد انتي شلج عوشه : عاد انتوا ع راسكم ريييش طاووس حمد : خخخخخخخ وانتي ريش دياي مرابع في الزريبه الكل : هههههههههههههه بو خالد يضحك بس شاف عوشه معصبه : اسكت ما تخيل حمد : ابويه انته روحك ضحكت عوشه : يالله خلهم يعلقون عليه استاهل يوم امدحهم بو خالد : حشيييييم يا ام راشد .. محد بيسمي عليه غيرج يالغاليه عوشه استحت بو خالد : عاد قولي آمين عوشه : آمين سالم : انا اللي بسمي علييك بسسس محد بيسمي قبلي يوم خالد ما سمى عليك تبا عوشوه تسمي عوشه : غصبن عنك بسمي علي ابويه بو خالد يطالعهم ومستانس ام خالد : وييه ما تضاربوا على اسمي انا الله يسامحكم يا عيال راشد عوشه يتها الغبنه : فديييتج والله الغاليه انا بسمي علييج بو خالد حب يستفز ام خالد : عاد بتسمين ميثاء مال العيايز اخ لاه عوشه : بلاها ميثا متحدره من نسل الاشراف هالغاليه ام خالد : حافظ ع ردج غنااتي عوشه : هههههههههه طالعه عليييج سالم : انا بييب توام بسمي راشد وميثا الله كشخه بو خالد : بسكم من هالرمسه عاد .. يالله خططوا حق العزيمه ... سالم : يالله يالله انا عليه مشترى اللحم بو خالد : شووو ولالالالالالا اطشه انا عليه كل شي سالم : لا لا لا ما يصييير انا بييب اللي اباه بو خالد : انتوا هاتوا اللي تبونه بس انا بعطيكم البيزات .. ام خالد : عاد خلهم ينظفون البقعه .. ورى باجر بنسيوها العزيمه بو خالد : والله شي طيب بيكون يوم الخميس والناس يايه من الدوام تبا تستانس ام خالد : وبنعزم خالد ومرته .. اباه اييب بنتي اتولهت عليها .. بو خالد : روحج ودعتيها هنااك عوشه : والله ما احس انه عندي اخت ثانيه احسها خلاص بنت خالد بو خالد : يوم قامت تزقره باباه عباره ابوها وهو اللي مربنها سالم : اقصورها تزقركم يديه ويدتيه عوشه : تهبي عاد بو خالد : بعدها ياهل هذي لا تطرونها ام خالد : يالله يالله اطاعوا شغلكم .. امايه عوشه عندج رقم مريم بنت يرانا ؟ عوشه : لا ما خذته ذاك اليوم ام خالد : اكتبي الرقم وطرشيه ويا حمداني يودييه عند مريم عوشه : انزين يمكن مب موجودين في المزرعه ام خالد : هيه والله صدق حمد : اكيد اليوم سيف بيي هنه المزرعه وبخبره انا بو خالد : لا تخبره ولا شي انا بقوله حمد : ان شاء الله ------------------------------------------------------------------ |
مرن يومين ويا يوم العزيمه ... والعصر ام خالد : كيف تخليهم هنه شلهم وودهم هناك خالد : ان شاء الله بو خالد : الغاليه ميثاء نحن رياييل ما نبا نيلس فوق طاولات ونغصص على عمارنا خلوهم حقكم ام خالد : بو خالد ؟ ويده بتيلس بو محمد تحت بو خالد : ههههههه ما تدرين يا الغاليه انه بو محمد ما ايلس الا تحت .. ام خالد : ما شاء الله عليه متواضع بو خالد : هيه ما شاء الله عليه ام خالد : الله يحفظه ويخليه بو خالد : آمين عوشه : امايه انا نظفت الصاله ودخنتها الحين 3 مره ادخنها ام خالد : ما عليه خلها تطبن الريحه داخل . عوشه مستااااااانسه : قبل شويه مسوتلي فطيم تيلفون .. ام خالد : منوه ساير ايبها عوشه : طرشت سلوم ايبهم هو وخالتي ام خالد : بارك الله فيكم فرشوا ودخنوا المكان وكانت يلست الريايل قريبه من يلست الحريم ام خالد : ما شاء الله على بنت اولدي مغواها طالعه قمر فطيم استحت : فديت عيونج اللي ما تنظر الا الزين عوشه : اسمع انتوا ما ريت حد يمدح عمره فطيم : انا امدح عمري ام خالد : هههههههه يعلكن لي ذخر واشوفكم طول الحياه متحابات وتتناقرن وتطيبن نفسي برمساتكن عوشه فطيم : آآمين ويا بو خالد : الله الله ع البنيات .. شو هالزين شو هالمخور الغاوي عوشه تتدلع على ابوها: شرايك باباتييه بو خالد : الغوى كله يا الغاليه عوشه : تسلم عيونك فديتك .. يعلني ما خلا من شوفها بو خالد : ويااج الغاليه شويه ووصلوا مرييم وسلمى وشيخه والصوب الثاني وصل وياهم فارس وسيف بو خالد : حيالله غواليني .. يا مرحبا والله تفضلو سيف : شحالك الغالي ويبوسه ع راسه بو خالد : باحسن حال فديتك يا مرحبابكم والله سيف : هذا فارس اخويه بو خالد : هلا والله زارتنا البركه ام خالد : حيالله ام سيف يا مرحبا يا مرحبا وتسلم عليها .. ام سيف : حياج الله الغاليه شحالج ام خالد : بخير ربي يعافيج انتي شحالج فديتج ام سيف : بخير ربي يعافيج سيف : امايه شحالج ويبتسم لها ام خالد : هلا هلا بولدي الغالي انا بخير ربي يعافيج انته شحالك سيف : هلا فييج بخير بشوفكم .. ام خالد تقول لام سيف : ربي يحفظلج اياه ويخليه لج ذخر ياربي ام سيف : آمين ام خالد : متزقرت اليوم لا عدمنا هالتزقريت سيف استحى : هههههههه ربي يخليييج لي الغاليه ام سيف : دومه زقرتي فديته مشابه ابوه ام خالد : ههههههه الله يحفظهم ام سيف : هذا بعد ولدي فارس اصغر عن سيف ام خالد : حياك الله فديتك فارس : الله يحييج الوالده ام سيف : وهذيل بناتي شيخه الكبيره ومريم الوسطى وسلمى آخر العنقود ام خالد : حياااكم الله تفضلوا تفضلوا فديتكم فارس وسيف وخالد ساروا ورى بو خالد ويلسوا تحت على اليلسه اللي مسوينها .. شويه ويا سالم وخالد وحمد وحميد .. وياهم سعيد وفهد خوان فطيم ويلسوا يسولفوون ام سيف وبناتها يو صوب عوشه وفطيم وام سعيد ويلسوا يسولفوون مريم : ما شاء الله علييج غاديه غاويه اليوم .. عوشه استحت : تسلمين الغاليه .. فطيم : اكيد بتكون غاويه اليوم عوشه فتحت عينها فطيم : ااالازم اليوم ترى العزيمه على شرفها . شيخه تطالع عوشه : انتي ما كنتي ويا خلود في الكلاس ؟؟ عوشه : امبلا وتبتسم لها شيخه : وانا اقوووول وين شايفه البنت ياربي عوشه : ههههههه كنت وياها ولين الحين وياها شيخه : هيييه ما شاء الله تولهنا عليكم والله وعلى سوالف خلوده عوشه : هههه حليلها كل يوم ارمسها شيخه : ما شاء الله سلمي عليها قوليلها شيخه سعود تسلم عليج عوشه : يبلغ الغاليه افا عليج شيخه تطالعها وتتذكرها كيف كانت في الكليه كل البنات ينعجبون فيها لانه حلوه وجمالها طبيعي .. شويه ووصل بو محمد وولده محمد وام محمد ويلسوا يسولفون وتعرفوا على بعض محمد مب حاب الوضع هذا يبا يروح بس لجل ابوه يالس ... كل شويه يشل التيلفون ويسير الصوب الثاني يكلم وهو واقف خطفت عوشه تلحق ولد اخوها شال السجينه في ايده ويركض ... تم يطالعها بس هي ما انتبهت له محمد : هذي اكيد بنت بو خالد .. محمد : انزين غناتي لا تحاتين بتصل فييج مب كل شوي تتصلين اوكي يالله باي ويسكر مشى شويه يطالع المكان اللي سارت له عوشه ورد ورى .. وسار صوب يلست الرياييل سيف قلبه على عوشه ياي بكشخته هذي بس لها .. حمد : سيف ابا اصورك سيف : ههههه ليش سالم : الاخ معجب النهار كله يرمس عنك سيف : ههههههههه عشان جيه كلحين وتخرطفت حمد : احلف سيف : لا والله اسولف وياك حمد : انزين ابا اصور ويااك ممكن سيف : ما احيدني فنان ولا واحد من هاليويله تصور ويايه حمد : لا تخليني الحين اكنسل سيف : هههه يالله انزين بس نتصور يميع حمد : اوكي بس منوه يصورنا ؟ سيف : بو خالد حمد : لا ابويه ان شل الكيمره خربها سيف : انزين خله يصورنا هالقرسون حمد : اوكي وقفوا كل الشباب وصوروا صوره وآخر شي حمد خذ صوره ويا سيف روحهم وبعدين سيف وحمد وحميد بو خالد : ونحن ما نستاهل صوره .. ؟ حمد : افا علييك بو خالد : البارحه صابغ اللحيه وغادي غاوي بو محمد والكل: هههههههههههههه بو محمد : انته الا شيبه منو يباك بو خالد : افا انا شيبه ان شاء الله على امرك كله ولا نرد رمسة بو محمد بو محمد : هههههههههه فديتك انته بو الشباب وانا بو الشواب الكل : ههههههههههههه ام محمد فيها فضول على بنات ام خالد : وعلى منوه مسمين عوشه ام خالد : مسمينها على ام راشد ام محمد : هي ما شاء الله ورويه ام خالد : رويه سميتها على اختي توفت يوم يبت رويه وكانت مب معرسه نذرت اني اسمي عليها اذا يبت بنت .. وهي آخر العنقود ام محمد : الله يحفظهم ويبارج فيهم الكل : آمين عوشه : بنات قوموا نظهر برع شويه .. شيخه : يالله عوشه والبنات كلهن لابسات مخاوير .. تموا يتمشوون وروحوا صوب الخيول وراوتهم الخيل اللي تحبه شيخه : شو سميتيه عوشه تطالع الخيل وتمسح عليه بأيدها : ما سميته لين الحين شيخه : افا وشعنه عاد مريم : شكلج تبينا نسميه لج سلمى : نباه يكون اسم روعه جيه فطيم : سمووه ساري عوشه : لالالالالا شو ساري مب شي شخيه : سميه اسم حلو ويليق عليج عوشه تمت تتأمل فيه : بسيميه غرام البنات كلهن صاحن : اللللللللللللللله شو هالاسم عوشه استحت : طرى ع بالي فطيم مبتسمه : يا ويل حالي عليج يا بنت راشد شيخه : والله نااااااايس الاسم كشخه .. مريم : هي نعم ما عليه رمسه شيخه شافت خيل ظاهر من مكانه : وهذا .؟! فطيم : ههههه هذا خيل حمد اخوها الصغير شيخه : حليله تعال مريم : شو سماه ؟ عوشه تضحك : لو اقولكم ما بتصدقون ؟ سلمي : ليش ؟ عوشه : مسمنه على خيل اخوكم اللي يعلمه على الخيل مريم : مكحول ؟ عوشه : هههههههههههه هيه الكل : ههههههههه مريم : حليله والله وايد معجب في سيف شكله عوشه : يالله لو تشوفينه يوم يكون هنيه وياه ما يفارجه مريم : المهم يستانسوون فديتهم كتاكيت واخويه يحب الكتاكيت عوشه : هيه ما شاء الله شيخه : اممممممممممم شرايكم يوم الاثنين الصبح ننش جيه جميع ونطلع بالخيول برع الكل ستانس على الفكره فطيم : هي انا بيي وياكم بعد عوشه : هذا اذا طاعت الوالده فطيم : ان شاء الله بتطيع شيخه : انا بخبرها اوكي عوشه : ان شاء الله مريم : يالله نسير صوبهم اول ما دخلوا عوشه تذكرته انه لازم تذكر ابوها عشان الابره عوشه : سارت صوب امها .. امايه ابويه خذ الابره ولا ام خالد شهقت : سيري اتصلي به انشديه وقوليله بعد انه شويه العشى بيكون زاهب سارت عوشه ويلست على الغنفه .. وكانت مجابله الباب .. لكنه مسكر والدرايش عاكس اللي داخل ما يشوفون اللي برع كانت ترمس ابوها خطف سيف وقلبه على عوشه من حدر المزرعه ما شافها .. خطف عدالهم وكان يرمس مايد ربيعه وساير ايودي موتره عند مايد على الدوار لانه مايد سيارته مودنها الوكاله مايد : هاه تعشيتوا سيف : لا بعدنا مايد : ما شاء الله سايرين ايوعونكم ولا يعشونكم سيف خطف وشاف عوشه مجابله الباب وشافها من الينب عاقه وقايتها وتتضحك ويا خواته تم واقف ومبهت فيها مايد : الووه سيف : شوو مايد : شو بلاك صخيت سيف ويتنهد بشكل عجيب : شفت غر مكتسي سحر وجمال مايد : احلف سيف : شاف انه بيكون متطفل لو تم يطالعها اكثر مايد : سيفوه منو شو السالفه سيف : ما يخصك ما يخصك مايد : انا ادريبك انته منيام بعد مسوي نفس الحركه .. شكلك طحت فيها يا سواف سيف : انا ياي الحين يالله زهب عمرك مايد : يالله سيف مستااااااااانس من شوفة عوشه لانه من يو وهو يبا يشوفها ولا تخطف عداله المهم يجحل عينه بشوفتها .. سيف : ياويل حالي ع الكشخه مخور ودنيا ولا توكت الريش .. يا عيني ع الذوق ركب الموتر وتم يكتب ابيات خطرن ع باله لشوفتها طربان قلبي بشوفة عويش ... طهربان ويغني ع اوتار .. طاير ويرقص صار ربيش ... يلعب ويزفن بدقة الطار سواف خرف صار خريش .. من شاف عينه سيد الاحرار فديت خشمه وتوكة الريش .. لي ماسكه شعره م الاخطار .. حفظ الابيات وتم يرددهن وهو مستانس سار جدى ربيعه وعطاه الموتر ورد يايبه صوب المزرعه يلسوا يتعشون وعقب يلسوا يسولفون والكل بعدها روح بيته ام سيف الوقت كله كانت ترمس عن ام خالد وبنتها عوشه وسييف يتصوخ لسوالفهم .. شيخه : ما شاء الله عليها طييبه تحسين قلبها رحووم مريم : هيه ما شاء الله عليها .. فارس : يالله عاد الحين البنيه بتتكربع من كثر ما ترمسون عنها مريم : وشعنه تتكربع نحن رمسنا عنها بالطيب مب بالشر . شيخه : عطتني رقمها سيف يلس يطالع اخته في المنظره شيخه : ههههههههههه جوفي شو طرشتلي تراوي اختها مريم مريم : ههههههههههههههه اسميها سوالف سيف يبا يعرف شو مطرشه عوشه حق شيخه اخته : شو ها شيخه تطالع سيف : ياربييييه يا فضول الشباب سيف : مب فضول بس اشوفكم تظحكون قلت ظحكونا وياكم شيخه : مطرشه صورة ولد اخوها ورابطه شعره شروات البنات سيف : اهااا اشوف شيخه : سوق انته سوق احسن لك مريم : يوم واحد بعزمها بيتنا سلمى : هيه والله كشخه ربشه ما شاء الله عليها شيخه صدت صوب امها : امايه نحن قررنا يوم الاثنين نظهر بالخيول انا مريم وسلمى وعوشه وفطيم سيف نقز : شو تسون ؟ شيخه : شو نسوي بعد بنحوط شويه بناخذ كمن لفه وبني صوب المزرعه ام سيف : على هواكم شيخه : فديييييت امايه سيف : انا بعد باخذ لفه وياكم ههههههه شيخه : عجب سيف : انزين منو بيبكم هنه ؟ شيخه : الدريول سيف : لا لا انا بيي بيلس ويا قوم حمد بعلمهم شيخه : اوكي بنشوف سيف وايد تحمس للموضوع وتذكر يوم يشوف عوشه على الخيل ذاك اليوم .. ياربي كيف كانت .. جمال رباني .. وأبدع خالقي يوم صور .. تم يفكر فيها لييين وصلوا البيت دخلوا وشويه وصاح تيلفون سيف يوم شاف الرقم فار دمه وسيده زقر شيخه ودخلوا صوب الصاله شيخه : شو عندك . سيف معصب وواصل حده : قوليلي منو عاطي رقمي عذاري ؟ شيخه زايغه : والله مب انا ؟ سيف : لا تحلفين خبريني الصدق شيخه : تراني حلفت لك والله اني مب انا شو اقول اكثر من جييه سيف : لالالالالالالالاعت جبدي منها بيصيبني مرض شيخه : بسم الله عليك يعله في عدوينك سيف معصب : هي عدوتي شيخه : عوذ بالله سيف لا تقول جيه سيف : انتي ما تشوفين المسجات وما تشوفين الاتصالات خلاص مليت رمستها مره وما فاد فيها ؟ شيخه : اانا حاولت وياها كمن مره وهي مب راضيه تقول انها تحبك . سيف : حبها برص ان شاء الله , والله انا حمار لو كنت احبها شيخه : سيف بلالاك ما كنت جيه سيف : عذاري بتخليني اكون جيه خبلت بي خلاص مليت من الحياه بسببها شيخه : انا بقولك شي شل البطاقه وفرها او اغلقها . سيف : والله ما اغلقها .. انا اكون ضعيف بسبب وحده ما تستاهل شيخه : انزين شو الحل سيف: انا بقولك شو الحل والله لسير عند عمي واقوله اصلب بنتك تراها تلاحقني شيخه : انته خبله ؟ تخبلت انته يا سيف .. عذاري انسانه ينخاف منها ممكن تقول لعمي سيف متحرش فيني ويالله عاد والله عمي ما يتفكك منك بيخليك تاخذها تاخذها سيف يود راسه من كثر مب متغصص من عذاري : شيخه ليكون ترمسين وياها بهالسالفه شويه ودشت ام سيف وسكتوا سيف يطالع شيخه ام سيف : ليش سكتوا سمعت كل شي تراني مب قصدي اسمعكم بس انا ادري بالسالفه وادري انه عذاري مطفرتبك سيف التفت الصوب الثاني من الغصه وتنهد : يا اميه ما ريت بنت اقوى عن هالبنيه ام سيف : ان يت بيتنا انا بطردها .. ورقمك اغلقه ولا عطه حد من هالبيداريه سيف : خلاص مليت منها .. ما اباها غصب هو .. ام سيف : اخطب بنت اختي ساره وافتك سيف التفت على امه وتم يطالعها بنضره استغراب .. ام سيف : بعدك على ذيج الذكريات ... ؟ خلاص البنيه ولت في حال سبيلها .. وسارت وخذته هاك اللي كانت وياه وعرست ويايبت عيال منه .. انت الحين اللي يا دورك انته لازم تعرس وتاخذ وحده تحبك وتحبها . وساره هي خير البنات وجريبه منك ومب غريبه شيخه تطالع سيف : بس يا امايه ام سيف : لا بس ولا غيره جانك تباها انا بخبر امها سيف : خليني ارمس واقول رايي ام سيف : قول رايك سيف : ساره صغيره ام سيف : لا تقول صغيره انا اكبر عن ابوم بعشر سنين وما قلنا شي سيف : بس انا غير وانتوا غير .. ساره الحين مخلصه ثانويه عامه وانا الحين بدش ال28 تعرفين شو الفرق اللي من بيني وبينها .. شوفي السنين وشوفي التفكير .. ام سيف : روحك فرطت في اختها العوده يوم كنا نباها لك قلت ما ابا اعرس بكمل دراسه اول بادي سيف اختلطت الافكار في راسه : خلالالاص بس ما اقدر اتحمل راسي قام يدور ونش وطلع من البيت شيخه : امايه لا تضغطين عليه يمكن ما يبا ياخذ من العايله يمكن في نفسه حد ثاني ام سيف : على هواه انا ما لي خانه فيه .. انا الا اباه يعرس ويمزر بيته اللي يبنيه عيال شيخه : ان شاء الله بيعرس بس متى ما يبا هو متى ما نفسه تحن للي يبااها ام سيف : ان شاء الله ( الله يوفقه ويبلغني فيه يارب ) شيخه : آمييين ------------------------------------------------- حمد : عوشه طلعيلي هالصور من الكيمره عوشه : أي صور حمد : صورتهم هناك اباج تطلعينهن وتطبعينهن لي كلهن بعد عوشه : انا مب فاضيه الحين والله تعبانه حمود حمد : ما يخصني طلعيهن لي الحين بو خالد : اختك تعبانه الحين بعدين حمد : انزين عوشه غمضها حمد : تعال بظهرلك اياهن حمد ركض ايب الكيمره وحطها في واير الكميبوتر . عوشه : عاد شو مصور حمد : صورنا نحن عوشه : هيه فتحت ملف الصور وطلعت اول صوره لهم كلهم .. على طوووووول طاحت عينها على سيف . وابتسمت وقالت في خاطرها ياربي مغواه حمد : اباج تكبرينها شويه بحطها في واجهة الالبوم اللي بشتريه عوشه : ان شاء الله حمد : انزين براويج صوره ثانيه بعد انا وسيف بس عوشه : اوكي حمد : هذي صورتي انا وسيف .. هذي عاد كتبي عليها .. سيف بن سعود وحمد بن راشد عوشه يتها الضحكه : ههههههههه حق شووه ؟ حمد : بس كيفي . عوشه تمت تدقق في ملامح سيف .. ياعيني ع الكشخه والله ما ريت شراه حمد : بسير ايب لج الطابعه عشان تطبعينهن عوشه : انا باجر باخذ طابعة خاصه في الصور احسن من هالطابعه ما تضهر الصوره زين . حمد : احلفي عوشه : شحقه احلف حمد : عشان اصدق عوشه : يالله باجر باخذها لا تحاتي حمد : انزين براوييج شو صورت بعد عوشه :اوكي حمد : هذا اخو سيف اسمه فارس عوشه : اوه يشبه اخته حمد : هيه بس ما يشبه سيف عوشه : آهااا حمد : وهذا ولد بو محمد اسمه محمد عوشه : هههه اكيد بيكون اسمه محمد يوم ما عنده غيره حمد : هيه صح عوشه : بو محمد غير عنه ولده بعد طالع يشبه امه حمد : مالت علييه احس انه وغد ما يتشاهد عوشه : حمد شو هالكلام حمد : والله مب قصدي اقول جيه بس هالريال ما دش خاطري النهار كله كان يرمس في التيلفون ويطالع الناس من ورى خاطره .. عوشه : بسم الله .. حمد : هيه ما شفتيه كيف بزياان عوشه : خله يولي برايه ذنبه ع جنبه حمد : انزين شوفي صور حمده ورويه والله بتضحكين عوشه : هههههههههههه شو مسوي فيهن حمد : ربطتهن وخليتهن يتأدبن عوشه : حرااام والله ساعات احس انك مجرم حمد : اوكي شكرا عوشه : ههههه اسولف وياك حمود حمد : انزين كملي الصور .. هذي الصوره كنت يالس عند حميد وسيف صورنا اونه تموا صادين ع ينب احلى عوشه : اوه ما شاء الله مصور محترف حمد : عيبتني الصوره وايد عوشه : هيه حلوه بحتفظ فيها حمد : اوكي عوشه : وهذي حمد : هذي صورة بو محمد قالي تعال صورني انا وابوك عشان اتم ذكرى حلوه عوشه : الله يديم المحبه حمد : براويج صوره .. عوشه : شو بعد حمد : شوفي هالصوره خليت سيف شال علاوي ويبوسه عوشه : الللللله روووووووووعه الصوره والله دشت خاطري حمد : هيه عيبتني انا بعد عوشه : انته لك مستقبل في التصوير دام جيه تصويرك من الحين . حمد : على هواج .. عوشه : خلاص احتفظ فيها حمد : ليش عوشه : بس جيييه شكلها حلو ومعبره الصوره .. --------------------------------------------------------------------- يتبع الجزء الرابع ... ان شاء الله عن قريب بحطه وسموحهـــــــــ خويكم ـ غ ــرشوبــــــــ البـــدو |
| الساعة الآن 01:36 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir