الخامس والسادس



&*الجــــــــــــزء الخامــس *&



" مـــــر شهـــر كامـل .. كنت قــد تأقلمت مـع الوضـع هنا .. زالــت أيامي السابقه من مخيلــتي وكأنها لم تكــن ..

كنت أراه دائماً في منزل عمـي حيث ان زياراتنا إليهم اسبوعية.. حمــد .. آآهـ كم أحببتك .. لا أعلم من أين خلق حبك ولكنه أتى ليغزو قلبي وأحتله دون أي مقاومة منــي ..

كــانت حياتي تعج بالفــرح والسعـادة وأحــلامي الورديه التـي لم تجـد حدوداً لجموحـها .. إلــى ان أتى ذاك اليوم الأسود الذي تحطّم فيه كـل شيء .. وبدأت المصائب تأتيني واحدةً تلو الأخرى والتــي سأتحدث عنها في الأجزاء القـادمة .. ولـكنني الآن سأبدأ بالمشــاكـل الصغيرة ومن ثــم سأبــدأ بالمصـــائب ..


إليـــكم مشــكلتي الصغيـــرهـ :



وعيت على اذان الظهر كالعاااده .. قمت وصليت .. كنت برد ارقد بس رنة التيلفون منعتنيه .. نغمة نوكيا الراااقده ..

رديت بدون ما اشوف منو متصل ..

قلت وبصوت كله رقاد: ألوووووه ..

حمد: حلفي انتي بس ؟ اقول سيري رقدي خلاف رمسينيه ..

طار الرقاد من عيونيه يوم سمعت صووته طالعت الشاشه .. كان مكتوب "الغلا" ..

حمده: حمـــــــد ؟؟

حمد: لا بن عروه ..

حمده: من وين يبت رقميه حشا سااااااااااحر ؟

حمد: لا ساحر ولا شي اليوم عمتيه وشويخ ين عندنا البيت وخذت رقمج من عند شويـــخ .. وقالتلي شي بعد ..

حمده: سوووووووووودا الويه شقايل تعطيك رقميه .. ماعليه براويها وشو قالتلك بعد ؟

حمد: قالتليه عنج يوم قلتي "مالج خص في بوشهابيه" .. بس ..


ييييييييييييييييييه يالقفـــــــــــــطه .. الله يقطعج يا شويخ ماعليه والله لراويج .. ماشي بيسلمج من بين ايديّه اليوم سووودا الويه قليلة الادب اللي ماتستحين على ويهج .. آآآآآآآآآآآآآآآآآآآآآآآآآآآآآآآآآآآآآآآآخ شو برد شو بقول الحين انا ؟ قررت اني اتبع أسلوب "الهجوم افضل وسيله للدفاع" بس بشكل ثاني ..


حمده: ماعليها مضيعة المذهب زوالها على ايديه اليوم .. وين بتشرد عنيه ..

حمد: لا تغيرين الساااااااااالفه ..

حمده: جـــب .. بعدين انته ماتحشّم داقليه نص النهار لا وماخذ رقميه بعد .. منو سمح لك ابا اعرف ؟ يالله اجلب ويــــــــــهك ..

حمد: لحظه لحظه لاتشخطين في ويهيه .. هدّي اعصابج .. ريــلاكس ريــلااااكس .. خذي نفس عميـــق ..

حمده: منو قاص عليك وقايللك انك دكتور نفسي .. ؟ ابا اعرف انا ..

حمد: فال الله ولا فالج انا دكتور نفسي؟ .. لو الموت ما اشتغلت صوب الميانين ..

حمده: انته بكبــــــــــرك مينوووون أصلاً ..

حمد: مينوون بحبج ..

حموده: جـــب .. اصطلب ياخي !

حمد بجديه : ليش كل شي تردين عليه بـ رد خايس جذيه .. اذا تحبينيه قولي بس لاتعقين عليّه رمسه جذيه جني عدوج ..

انته عدويّه ؟ فال الله ولا فالك .. انته قلبيه اللي ينبض بين ضلوعيه ..

مارمت استحمل وقلت : لا ما احبك لا انا قلبي ملكته .. لا ولايخفاك حب القلب لالا .. لا تسال ولا تغار ان ماعرفته .. لا غلا يعلا على حبك ولا ..

وخلاف بندت فويهه ..

رد دق عقب شوي .. خليته يصيح وااايد وخلاف يوم قرّب يبند رديت ..

حمد: يا صباح النور من بعد العتيمه .. وياصباح النرجسي من بين ثمره .. ويا صباح الخير والورد ونسيمه .. ويا صباح العود الازرق فوق جمره .. ويا صباح العز جعل الله يديمه .. من بعد ليلن خذينا فيه سمره .. اعظم الاحساس للناس العظيمه .. وللعقل زمره و للخفاق زمره .. والوصل يا صاحبي مثل الغنيمه .. ليه تنسى واحدن معطيك عمره ؟

حموده: قصدك ظهر النور هب صباح النور ..

حمد: تبين الصدق انا ما اصبحت صدق الا يوم سمعت صوتج .. آآآخ تذكرين ايام امريكا ؟

حموده: شقايل انساها ..؟ احلى ثلاث ايام فحياتيه ..

حمد: ثلاث ايام مرّن في حياتي غير .. ثلاث ايام عشت الحب واغليتك ..

حموده: شفيك انته ما خليت اغنيه ماقلتها ..

حمد: والله اللي سمعته منج خلاني اغيّب الذهن .. آآآخ بس لو تدرين بغلاتج ..

حموده: احم ادري ادري ما يحتاي تقووووووول ..

حمد: يالله يالخــــــــقه .. اقول تذكرين يوم المطار .. ياليته يرد .. ماكنت ابا الطابور يخلص عشان ما اوعيج ..

حموده: جب بتخبرك انته ماتستحي على ويهك ..

حمد: بتخبرج انتي تتعمدين اسلوبج الدفش ولا جذيه من الله ..

حموده: لا حشا عليّه .. (قلت وانا اسوي عمريه حزينه ) هاي خلقة ربك بعد شسوي صابره على بلوايه ..

حمد: هههههه .. سيري عند يدتيه وقولي لها جذيه والله يا تيج العصا ..

حموده: والله مابتينيه العصا الا ان رمستك اكثر عن جذيه .. اقووول باااي ..

حمد: لحظه لحظه .. بعدني ماشبعت منج .. انتي ليش ما ادلعينيه وتقوليليه كلاااام حلو .. دوم صادتنيه حشـــا ..

حموده: اذا اتحسبنيه من هالبنات قوم بو "حبيبي و فديت روحك ويعلني ماخلا " فـ انته غلطان .. جان تبانيه ع الطبيعه كان بها .. ما تبا .. الباب يوووسع لو جمل ع قولة راشد المااجد ..

حمد: افــــــــــــا انا تقوليليه الباب يووسع لو جمل مادري بعير ؟ ماهقيتها منج .. انا زعلاااااااااااان ..

حموده: ازعل ولا تفكر براضيك محد جبرك تصير زعلان وقتي ذهب ماضيّعه فيك وانته الذي يا فلان خسرااان ..

حمد: حموده تصدقين انا فهمت اسلووووبج عـــدل .. انتي تمشين ع المثل اللي يقول "اللي يسبك يحبك "

حموده: أهو كدا هو .. دا انته طلعت بتفهم ..

حمد: ماشــالله ماحيد ....... شو اسم امج ؟

حموده: مارثا ويتني ..

حمد: ماحيد مارثا ويتني مخلفه مصريااااات ..

حموده: لا خلفتنيه انا وراها وفرتنيه فالشارع عشان احصل فارس احلاميه ..

سكت يوم انتبهت عاللي قلته ..

حمد: انا فاااارس احلاااامج ؟

حمده: يوووووهـ بس عااااد خلاص.. مطولك يا ليل .. ببند انا ..

حمد: حشا يبوووكم ماعرف انتي على شو عايشه 6 سنين في امريكا .. لسانج بدوي اكثر عن لسانيه ..

حمده: البداوه متأصله فيّه وانا بنت ابويه ..

حمد: اسميج انج صدق بنت ابوج هب بنت امــج ..

حمده: على طاري البداوه بو شهااااب طالبتنك طلبه ولا تردنيه ..

حمد: تـــم بنت علي .. بس شو فخاطرج ؟

حمده: أبا اسـيـــــــر البــــر .. متصوّعه للعراقيب ..

حمد: تـــم امره بـسير ارمس الكونغرس ومجلس الوزراء وبرد لج خبر ..

حمده: هههههههه لا تنسى تقردن اوباما وياك ..

حمد: افا عليج جان الا ع يدتيه حاظريـــــــــــــن ..

حمده: ههههههه ماشالله طلعت فاهمنيه عدل !!

حمد: شقايل مابفهمج وانا حبيتج حتى قبل ما اعرف منو انتي ..

حمده: ييييييه بس عاد .. اقول والله اني طولت ومصارينيه بتتقطع من اليووووع بسيــر اتغدا ..

حمد: يهبي اليوع يعله فالعدو ولا فيج .. يالله اخليج عيل فدااعة الله ..

حمده: فدااعة الله ..

بندت عنه عقب هالمكالمه اللي كان نصها كلام فاضي واغاني .. بصرااااحه انا مب مصدقه كل اللي يستوي .. كل شي جنه حلم واخاف اني اقووم منه ..

ظهرت من الحجره ونزلت تحت .. حصلتهم حاطين الغدا ويلست اتغدا وانا اطالع شويخ بنظره واتوعد .. آآآآخ ماعليه بطيحين في ايديه وماشي بيفجج ..

خلصت أكل و سرت اغسل ايديه .. وشويخ بعد خلصت وغسلت ايديها .. سحبتها لين حجرتيه .. وانا ناويه نيّه شيـــنه ..

أول مادخلنا هي كانت عارفه انا شو ابا منها بالضبط .. كانت تترجانيه وتعتذر .. بس انا قبضتها من كشتها .. بس مب بـ قو يعني ع الخفيف ابا أأدبها وما تعيدها مره ثانيه .. ابا اراويها الويه الثاني اللي تركته هنيه يوم سافرت امريكا لكنه بيرد مره ثانيه .. أحس اني أخيراً رديت "أنا" .. عقب ما ضيعت نفسي ..

شويخ: أيــه حموووده والله شعريه مايتحمل .. والله آآآســــفه آآسفه خلاص والله بتأدب ..

حموده: بأي حق يا شويــخ تخبريـــنه ؟؟؟ صدق ظهرتي ماتستحين على ويــهج .. انا يوم ابا بخبره اروحيه ليش تتدخلين وتحرجينيه يعني ؟ انتي ترضين اني أسويها فيــج ؟

شويخ: أوووووه يا حموده .. خلاص انا بخبرج بالسالفه الصدقيه هذا شي المفروض انتي ماتعرفينه لين ايي وقته اللي يحددونه الشواب لكن انا بخبرج وانتي سوي اللي تقدرينه عشان تمنعينه وصدقينيه لو عرفتي بتعذرينيه ع اللي سويته ..

فجيت شعرها وتميت اطالعها واترياها ترمس ..

شويخ: افف بخبرج السالفه وامري لله مع اني ادري انه فيها قطع رقاب .. ترا خـــالد يبااااج من عرف انه ابوج كتب كل فلووسه بأسمج عقب مووته .. وهو طمعااان فيج والعايله كلها تدري .. وحمد اللي هو المغرم العاشق كان دوم ضرابه ويا هالخاااالد .. وخالد متوعد لـ حمد انه ان خذج بيسوي فيكم البلاوي وبيخرب حيااتكم .. هالخالد متقبض فيج بضروسه ومستحيل يفج عنج حتى لو خذتي حمد .. لكن اذا كنتي صدق تحبين حمد .. هالوحش مابيروم يفرق بينكم ..


انصدمت بـ كل اللي قالته .. حسيت الصقف بيطيح فوق راسيه والارض بتنهار تحتيه .. هالشيـــــــــــن بو صوت غليــظ اللي عنده فتحه بين ضروووسه .. واللي مستخف على فلووسيه .. بياخذنيه ؟ لا والله ماكان .. حتى لو ارد امريكا مره ثانيه ..


شويخ: انتي لاتطرين الموضوع الحين لأنهم مقررين يخلونها هدنه لمدة سنه .. وخلاف عاد بتبدا المعركه .. حمووده انتي تحبين حمــــد ؟؟ جاوبي ع هالسؤال وبكـل صراااحه وصدق لاتزيدين شي ولاتنقصين شي ..

حموده: حياتي دونه مستحيله .. هاي الدنيا كلها ماباها دونه .. أحبه يا شويخ أحبه ..

تذكرت ايامنا في امريكا .. لويت ع شويخ وصحت .. ماواحيت أكمل شهر هنيه الا انجلب كل شي فوق راسيه ؟ الظاهر اني كنت اتوهم السعاده .. دوم سعادتيه تنسلب منيه بدون وجه حق .. ! اللهم لا اعتراااض !

شويخ: حموده خلاص اهدي .. انتي وحمد بحبكم لـ بعض تقدرون توقفون فويه كل شي ..

حموده: بس كيف هالخالد يتجرأ ويتكلم فيّه وهو مايعرفنيه ؟ كيف يتجرأ ويفكر مجرد تفكير انه يتزوجنيه عشان ورث ابويه .. شو من منطق هذا ؟

شويخ: هذا ماحد يروم يقولّه شي لأنه عادي يرتكب جريمه .. كلهم يعرفون طبايعه .. هذا انسان متوحش اعوذ بالله منه ..

حموده: خبرينيه شو اسوي اخافه يسوي في حمد شي ..

شويخ: الحين مابيسوي شي .. مسويين هدنه هو وخالد ما يتضاربون هالايام .. بس الخوف من الياي ..

حموده: انزين انا بس ابا افهم يوم هم كانوا مايعرفون اذا كنت حيّه ولا ميته كيف يتضاربون عليّه جذيه .. ؟

شويخ: محد يا في باله ذاك الوقت انج ميته .. حموده انتي انسي السالفه ع الاقل هالفتره واللي الله كاتبنه بيستوي ... عيشي حياتج ولا تخلين هالشي يكدرج انزين ؟


هزيت راسي بـ هيه مع اني ماكنت مستوعبه اللي تقوله من كثر اللي يدور في باليه ومن حجم الصدمه .. كنت اتريا حياة هاديه هنيه لكن شكلها بتكون متروسه مشاااكــل مثل باقي حياتيه .. طلعت شويخ من الحجره .. وانا انهرت بالصيااح .. مادري كم مر عليّه من الوقت لكنّي انتبهت على صوت رنة الموبايــل .. كان حمد متصل .. حسيت قلبيه تقطّع تقطيــــع مارمت ارد ..


رديت آخر شي يوم قرّب يبند ..

حموده: ألووووه ..

حمد: حي ذا الصوت شحاااالج ؟

آآآآخ بس .. حاليه مايسر حد !

حموده: بخيــر ..

حمد: بسم الله عليج ليش صوتج جذيه صايـــحه ؟

حموده: حمد انته تدري باللي يبا يسويه خالد ..

حمد: شووووووووووووووهـ ؟ انتي منو خبرج ؟

حموده: مب مهم .. تصدق لو ادري انه هاي نيّتكم ماكنت رديت صوبكم ولا عرفتكم ..

حمد: حمووووده انتي شو تقوليــن ؟

حموده: ليش يبتنيه هنيه وانته تدري بـ كل هذا ؟ العيشه في امريكا وحيده أهون عليّه من كل هذا ..

حمد: بس انا ما أقدر أحرمج من أهلج لمجرد اني احبج وماباج تكونين لغيريه .. ماكنت ابا اكون أناني .. مع اني ادري انه هالخالد مستحيل يخلينا فـ حالنا وأكبر دليل اختيه مريم ..

حموده: شو سوابها ؟

حمد: كان يباها من قبل .. خطبها بس مابغته .. و خلاف خطبها مطر اللي هو ريلها الحين .. وعقب ماعرست تم يقول حق ريلها انها كانت ترمسه وكانوا يحبون بعض .. وسوا امبينهم مشاكل لدرجة انها وصلت للطلاق لكنه مطــر عقب فتره عرف الحقيقه و رد مريم .. في وايد اشياء هذا كان ابسطها وما خفي كان اعظم .. ما اقدر اقولج غير هالشي .. لكن حمووده لا تخافين انا قلت لج مابيفرق امبينا غير الموت ..

حموده: حمد انا احبك .. لاتتركنيه بين ايدين هالمتوحش ..

حمد: لاتخافين .. انا آخـــر واحد فالدنيا ممكن انه يتخلى عنج .. انتي تثقين فيّه ؟

حموده: أكيـد ..

حمد: عيل خلاص لاتخافين من هالشي وانسي وجود خالد من أساسه لأنه باجر بنسيــر البـر ..

حموده: صـــــــــــدق ؟

حمد: هيــه صدق .. هاه فرحانه ؟

حموده: هيـــه ..

حمد: الحين عمتيه بتي تخبرج سوي عمرج ماتدريــن ..

حموده: ههههه انزين ..

حمد: تسلملي هالضحكه يعلها دووم .. يالله عيل مع السلامه ..

حموده: مع السلامه ..

بندت عنه وانا مرتاحه شوي .. عقب شوي يت عمتيه وخبرتني عن سيرة البر وانا طبعاً سوّيت عمري ماعرف ..


بالبـــاجر .. وعيــت الساعه 8 الصبــح على دقة الباب .. تسبحت و لبست لي وحده من الكنادير اليداد .. ولفيت شعريه ولبست شيلة مناسبه على لون الكندوره .. كحلت عويناتي شوي بما انه الجو بارد وما بيسيح .. نزلت تحت حصلتهم يالسين يزهبون القشار .. عقب نص ساعه خلصنا وركبنا السياره ويا الدريول عشان يوصلنا مكان التجمع اللي هو بيت عميه سيف ويرجع هو البيت خلاف .. وصلنا ونزلنا وانا كلي أمل وأدعي ربي انه نركب فالسياره اللي بيسوقها حمد بما انه ماعنده غير خواته .. وشوابه بيسيرون في سيارتهم رواحهم .. وبالفعل ربي استجاب دعوااتيه وركبنا انا وشويخ و عمتيه عند حمد .. عمتيه جدام وانا وشويخ وسلامه والريم ورا .. بس طبعاً ماكان الرنج .. مايهون عليه يتخيّس غبره وتراب من البر .. فـ ركبنا الستيشن ..


كان ما ينسمع فالسياره غير سوالفنا نحن البنات و اغنية ميحد "أحب البر واشد الرحايل " وعقب نص ساعه وصلنا البـــر .. نزلنا ونزّلنا قشارنا .. ونصبنا خيامنا بما انه بنتم يومين هنيه ..

طرشونا نحن البنات عشان نلم حطب ..

حموده: يالله يا شويــخ كيف اشتقت لـ هوا البـــر .. آآآآآآآآآآآآآآآآآآهـ ..

شويخ: ما جربتي تسيرين بر أمريكا .. ؟ يمدحوووووونه ترا .. هع ,,

حموده: دخيــلج لاتلوعين جبديه .. أيـــــــــــــــه شويخ سلّوم ريموه طالعن .. ضــــب !

طبعاً كلهن ترابعن بعيــد الا انا اللي كنت أطالع هالضــب الصغيروني .. ماكان عوود .. صورته بـ كيمرة الفون .. بحطه فـي فيـــس بوك .. هع ..

سلامه: أيــــــــه شو من قلب لج واقفه جدام هالضب جذيه ..

حموده: والله انه ينفخ ع الفاضي مابياكلكن .. ياكل هواااا .. اسميـــكن chickens !

سلامه: جكنز دياي صيصان حمااااام عادي بس انا مستحيل اتقرب من ضب ..

حموده: انزيــن خلاص عاد حشرتينا يالله نلقط حطب ترانا مايبنا وااايد ..

وسرنا وكملنا لقاااط حطب .. و عقب ماخلصنا شليناه صوب عمتيه وحريم عميه .. والبنات تمن عندهن يساعدنهن اما انا بما اني ما أحب شي اسمه طبخ .. فـ تميت احوط ..

شفت سيارة " فتك" يايه صوبيه وانا امشي .. نزّل اللي فيها الدريشه .. وكان حاط اغنية بالروغه ..

خالد: حمده ؟

طالعته عدل .. هيه هذا خـــالد .. يوووه هذا شو يايبنه .. يالله بصباح خير ..

حموده: هلا خالد ......... شحالك ؟

ابتسم وطلعن ضروسه والفتحه اللي بينهن .. حشا مايروم يتصدق عليهن ويركب له تقويم ؟

خالد: بخير وسهاله الحمدلله ومن صوبج ؟

حموده: الحمدلله يسرك الحال ..

وكنت بخطف بس زقرنيه بـ صوته الغليظ مره ثانيه .. فزيت من الزيغه بما اني ماكنت متوقعه انه يزقرنيه وصوته هو اللي زيّد زيغتيه ..

خالد: حمده ..

التفت صوبه وقلت بـ صوت زايغ : نعم ..

خالد: هههههه حشا شفيج زايغه ؟

حموده: هاه لا ماشي بس ماتوقعتك تزقرنيه ..

خالد: لابس بغيت اتخبرج ليش اتحوّطين هنيه بروحج أخافج تضيعين .. مع اني اشك انج الحين ماتعرفين وين وصلتي لنه هالمكان وايد بعيد ..


طالعت المكان .. انا الصراحه ماعرف وين وصلت .. شكلي كنت أمشي وماعرف انا ويـن الحيــن .. احترت شو اسوي .. مابا اركب عنده .. ومابا اتم ضايعه جذيه .. سكت فتره طويله وانا افكر شو اسوي ..

خالد: شكله كلاميه صـح .. اقول ركــبي بوصلج ..

وابتسم .. يييييه كيف أكره ابتسامته .. فكرت وفكرت وخلاف قررت اني اركب عنده .. شكلي تورطت من الخاطــر ..

فجيت الباب اللي ورا وييت بركب .. بس ياني صوت خالد بـ عصبيه كان صوته فلم رعب اهتزت كل ذرّه في جسميه ..

خالد: شو دريــــــول انا عــندج تركبيــن ورا ؟ تعالي ركبي جدام اشوف ..

من كثـــر الزيغه مارمت اجادل وركبــت جدام وانا لاصقه فالدريشه .. اما هو تحولت عصبيته لـ ابتسامه ..

تفاجأت بـ جمله منه صعقتنيه بالقــو ..

خالد: والله وظهرتي حشيــم يا بنت العم ونحن ماندري !..

التفت صوبه وكل علامات التعجب والاستفهام والاستنكار في ويهيه: شووووووووووووووووووووه ؟؟؟؟؟

خالد: ههههههههههه شفيـــــج انصدمتي ! .. لا بس انا قلت بما انج عشتي 6 سنين في امريكا فـ يمكن هالشي غيّرج ..

حموده: والله لو عشت مليوون سنه في امريكا ما بتأثر فيّه ولا بتنسينيه حشمتيه وعادات اهليه اللي تربيت عليهن من صغريه .. فـ حشّم عمرك لو سمحت وثمّن رمستك يوم بتعقها مره ثانيه ..

تم يطالعنيه بذهووووول وخلاف سكت .. وحط ايده ع لحيته .. وطوّل ع الاغنيه ..

وعقب شوي وصلنا ونزلت من عنده .. المصيـــبه العووووده انه حمد كان في انتظاارنا .. خيــــبه .. لالالالالالالالالالا بتخبل !






&* الجــــــزء الســادس *&


حمد وبصدمه: حموووووووووووودهـ ؟؟

خالد: كانت تمشي اروحها وضاااعــت وانا يبتها صووبكم ..

فر السويج فوق ومسكه .. وخطف عنّا .. تميت انا بروحيه فهالموقف الصعب .. صدق انه نذل !!!! سحبنيه حمد من ايديه بقو ويابنيه ورا واحد من العراقيب فـ مكان ماحد يشوفنا ..

حمد بعصبية : ممكن افهم شاللي استوا توّه ؟

قلت بقلة حيله : انا كنت ضايعه .. وهو قال بيوصلنيه صوبكم .. شسوي يعني .. الذنب مب ذنبيه ..

حمد: بس انتي تعرفين زين خالد شو تفكيره من جداج ...... لا وراكبه فياه جدام .. كل شي توقعته منج يا حموده الا هذا .. تصدقين بديت احس اني غلطان بنظرتيه عنج ..

هاذي ثاني اهانه اليوم .. قدرت اسكت خالد بس انته كيف بسكتك ؟

قلت بضعف: أنا آآآســـفه .. سامحنيه ..

رفعت راسيه اطالع ردة فعله .. كانت ملامح ويهه بدت ترتخي من عقب العصبيه .. روّح عنيه وخلانيه روحيه .. يلست ع راس العرقوب وانا حاطه ايديه على خدي .. خلاف سمعت هرن سياره من ورايه .. كان حمد .. نزل الدريشه وقال بملامح ويه جامده ..

حمد: ركبي ..

قلت بحزن : لا تراك غلطان بنظرتك عنيه انا بسير عند البنات ..

تحرك بسرعه وفج الباب و قال بعصبيه: يوم اقول اركبي يعني تركبيــن لا تراددينيه .. فااهمه

ياربي شو هاليووم اللي هب طايع يعدي على خير .. شو سويت انا يعني ؟ ماحيدنيه مسويه جريمه .. الله يقطعك يا خـــالد كله من ويهك النحس ..!


ركبت وانا منزله راسيه وخايفه .. حرّك حمد السياره وهو ساكت .. ماعرف كم مضى من الوقت على سكوته .. لكن اللي انتبهت له انه ابتعدنا عن مكاننا اللي كنا فيه بوااااااايد .. شغّل اغنية وطوّل عليها ونزل من السياره .. وفج لي الباب ونزلت .. وقف وتساند على بونيت السياره .. ووقفت عداله بس بمسافه بينا ..

بدت الاغنيه ..


أسامح ميـن ولا مين .. أسامح قلبك القاسي .. ولا عيونك الحلويــن
خطا عينك خطا قلبك .. تقول الذنب مو ذنبك .. مكاني خلك بربك .. وقلي ويش اسوي الحين
أسامح مين ولا مين ؟ اسامح مين ولا مين ؟

تقول اعذار واقول اعذار .. علي يصعب انا جرحي .. واحس بوحشتي لك نار
سهل عذرك صعب جرحك .. ولا انسى عيشك وملحك .. في عيني دمعتي واضحك .. واسأل قلبي المسكين
أسامح مين ولا مين ؟ ياقلبي مين ولا مين ؟


عشان اغليك وميت فيك .. أبكسر خاطر جروحي .. واطيب خاطرك وارضيك
فدا عيونك فدا دمعك .. فدا القسوه اللي من طبعك .. انا ما اقوى على ضعفك .. لو القوه علي تبين
أسامح مين ولا مين ؟ ياربي مين ولا مين ؟


قال حمد وهو يتأملنيه وانا كل شبر في جسميه متخدر : لا خالد ولا مليون واحد مثله يروم يفرّق بيني وبينج .... لأنــه غلاج متمكّن فيّه وياليت اقدر القاله حـــل .. عشان ما انكسر واضعف لج بهالسهووله وانا اللي قبل اعرفج كنت اقول انه البنات هن أسوأ ما خلق ربي على هالكون ..


حط ايده على خديه و كان يتقرب وبسرعه خوزت ايده من ع خديّه .. ووصرخت فويهه: حمــــــــــــــــــــد !!

رد على ورا وتم يمسح ويهه بإيده ويتنهد بقو وخلاف قال: أنــا آســف حمووده والله ماكان قصديه استغلـج ونحن بروحنا ..

حموده: شو مب قصــدك انته تعرف شو اللي سويـته الحيـن يا حمـد .. ؟؟

حمد: صدقينيه أنا آســف .. بس والله اني ماسويت هالشي بإرادتيـه .. سامحينيه انا ما صدقت خلصت سالفة خالد تقوم تظهر لنا هالسالفه ..

صديت عنه و طالعت السما فوقنا كانن الغيوم مسودات .. وشكله بيصب مطر في أي لحظه .. حاولت اهدي "ضربات" قلبيه اللي مب طايعه تهدا .. تميت اتنفس وأسوي "شهيق وزفير " على قولتهم .. وخلاف يوم هديت شوي قلت ..

حموده: خلنا نرد وايد بطينا عليهم .. ترانيه آخر شي انا اللي بتبهدل وبطيح في قيل وقال وبيقولون كل شوي هايته ويا واحد !

حمد: ماعاش من يقول عنج جذيه اقطع لسانه ..

فهاللحظه بدت قطرات المطر تنزل علينا .. المطر في امريكا غير وهنيه غير .. هني له طعم وله حلاه اما هناك حاله حال الشمس عندنا هنيه ..


ماكنت ابا اركب السياره .. كنت ابا استمتع بمنظر المطر اللي كان معذبنيه لكن لازم نرد .. وبعدين انا احس اني وايد تماديت ويا حمد اليوم .. وااااااااااايــــد .. يارب سامحنيه .. اتمنى ان هالشي ما يخلي حمد يفقد ثقته فيّه .. لكن انا صديته .. اووووه المهم خلينا من هالسالفه الحين المطر أهم .. واللي كنت ابا اراويه حمد بعد ..


حموده: اقوولك صوّرت خـــاااالد ..

حمد وقف بريك في نص الرمله : شوووووووووووووه ؟

حموده: صورته فالتيلفون اندووك طـــالع ..

شفت الغيظ على ويهه .. لكن من عقب ماشاف الصوره ماسمعت الا ضحكته اللي كانت طالعه من قــلب ..

طبعاً راويته صورة الضـــــــــب !!! انا من صوبيه بعد كنت ميته ضحك ..

عقب شوي تقرّبنا من مكان العايــله .. وقف حمد السياره ..

حمد: نزلي هنيه بما انه محد يشوفج عشان لايقولون كل شوي نازله من عند واحد ..

نزلت ومشيت شوي ووصلت عند تجمّع البنات اللي كانن فارشات زوليه تحت السمره عن المطر .. وكل وحده اطّالع حبيــب القلب من بعيد ..

شويخ: يا ويلي عليك يا بو عسكووور فذمتيه انه المرايل الا من عقبك ..

طبعاً كان سعيد يالس يذبح الذبيحه .. وعلي ينزّل القدور العوووده من السياره ..

الريم: يالله مايستحون يخلّون بو حسن ينزل القدور فذمتيه انهم مافيهم شيمه !

وحمـد كان عدالهم يظهّر سيارة ابوه اللي كانت مغرزه ويحفر تحتها .. ما تم غيريه عشان أكمل المسلسل البدوي ..

حموده: يعلني ماخلا منك ولا اعدمك يا بوشهاب أنشهد انه محد قبلك ولا عقبـك ..

الحين ماتم غير خالد اللي كان يرتب الذبيحه ويقطعها .. وماحصل غير فطوم اخته تختم حلقة اليوم من مسلسل "بدويات ع الزوليه" ..

فطوم: يعــلني فداك يا شيخيه فذمتيه ما غلط من سمّاك الشـــيخ خالد ..

ابا اعرف من هاللي ماعنده سالفه وسمّاه شيــخ !

حموده: بتخبركن شو هالمسلسل البدوي اللي نحن مسوينه ؟ مب ناقص الا نبدّل اسامينا ونخليهن وضحى وعليا والمها و الهنوف !

البنات: ههههههههه ..

فهاللحظه يتنا سلّوم وهي خرسااااانه من المطر ..

سلامه: اففففففففففففف شووووو هذا !

وعقب بعمرها ع الزوليه بقو ..

الريم: شفيج حشا طايحه فالوادي ؟

سلامه: رقيت فوق اليبل وعاد لين نزلت ووصلتكن تخرست من المطر .. طالعن حالتيه هاي حاله بالله عليكن ؟

شويخ: والله محد كفخج على راسج وقالج ارقي اليبل ..

سلامه: افففففففففففففف ..

يا كثر ما تتـأفف هالبنت .. فهاللحظه زقرت حرمة عميه سالم(ام خالد) البنات .. وقامن كلهن الا انا ..

ام خالد: شعندج يالسه حمده ؟؟ انقفضي يالله ساعدينا ..

عمتيه عليا: خليــها يا ام خالد .. حموده ما ادّاني الطبــخ ..

ام خالد: هيه صح تراها بنت الامريكيه شو نتريا منها ؟

وروّحت عنيه .. انا كان خاطريه اربع وراها بالنعـــال ع الكلام اللي قالته .. الحين عرفت ليش خالد كريــــه جذيه .. ثره وراثه من عند امه !


عشان اقهرها واراويها بنت الامريكيه شو تروم تسوي .. قمت وسرت عند البنات .. بس يوم شفت الاكل وهو ينطبخ وريحة اللحم حسيت اني بزوووع خلاص ماقدرت استحمل وأصلاً انا ما احب اللحم ولا أحب ريحته ولا أحب آكله كل أكلي دياي حتى السمج مادانيه .. شردت بسرعه لأني حسيت خلاص انه جبديه بتطلع من الريحه .. ماعرف كيف هالبنات مستحملات ..


يوم اقولكم اني ابغض شي اسمه طبخ محد يصدقنيه .. انا ما انخلقت عشان اطبخ .. يمكن اسوي سلطه أو شي مافيه ريحه لكن هالاشياااء مستحـــيل !

يت عنديه عمتيه .. وقالت: ماعليــج منها هاي عيوووز شكلها بدت تخرف ..

حموده: ههههه.. بس انتوا كيف مستحملين هاللحم وريحته وكيف أصلاً ترومون تاكلونه ؟ والله اني مستغربه منكم ..

عليا: يمكن انتي ما ادانينه لكن نحن متعودين عليه .. كل حد على حسب شو هو تعوّد ..

حموده: الا اقول عمتيه هاي ام خالد دوم جذيه لسانها سـم ؟

عليا: وحليلها بس لسانها ولا هي قلبها طيب ..

حموده: أمحق قـــلب طيب من وين ضواها ماشفتيها شقايل كانت اطالعنيه ..

عليا: ههههه انتي شكلج مامنج فايده من تحطين فكره عن حد في راسج محد يروم يغيّرها ..

وروّحت عنيه وانا ردّيت يلست ع راس العرقوب اللي كنت يالسه عليه قبل .. بما انه المطر وقف شوي ..


تميت أصوّر المكان بكل مافيه .. الصراحه كان الجو غير شكل .. وخلاف شفت الشباب وهم يصلّون الظهـر .. ربعت انا صوب البنات عشان أصلي ..


وعقب الصلاه بـ ساعه يا وقت الغــدا .. انا عني ماعرفت شو باكل .. بس زين منهم يوم شووا ديايه واحترموا شعوريه واذواقيه الحساسه .. مع اني ادري انه محد بيفكّر فيّه غير عمتيه !


عقب الغدا .. الشباب والشواب كل واحد فيهم انسدح في خيمته ورقد .. والعيايز نفس الشي ..

اما نحن البنااااات فـ يت في بالنا فكره هبله .. شويخ كانت تعرف تسوق .. عمتيه معلمتنها .. فـ قررنا انا وشويخ وسلّوم >الجريئات< نركب كلوزر الشيبه بو خالد ونحوط به شوي .. وخلاف انضمن لنا الريم وفطوم لكنا ركبناهن ورا .. شوي يشمن هـــوا .. هع ..

حصلت شويخ شريط فالسده وحطته فالمسجل و شغلته .. كانت اغنية بالرووغه .. تبلاني الهوا أول شبابي ..

تبلاني الهوا أول شبابي .. ومشكلني بهواهم واتعبوني
ولا حصلت من يجبر مصابي .. يداوي علة قليب محزوني

حموده: عاشـــــــوووواااا هلا هلا هلا ..

انا كنت وايد احب هالاغنيه ..

انا بي عوق وسط اليوف غابي .. سهير الطرف ماتغضي عيوني
ثلاث سنين عايش في عذابي .. اردد ليعتي واخفي شجوني

سلامه: وحليله الريال اعتزل ومايبا حد يسمع اغانيه وانتن حاطات الشريط ومطولات ع الآخر ..

شويخ: عاد شنسوي يوم أغاني بالروغه مناسبات ع هالجو اللي نحن فيه ..؟

ودرب الحب له حسبة كتابي .. وانا المسكين من الحسبه غلبوني
شربت الصبر كاساتن عذابي .. وحتى الخيل والمره سقوني

وفهاللحظه سمعنا زعيـــق ريمووه من ورا ..

الريم: أيــــــــــــــــــه بنات رحنا فيـــها فتــك خالد ورانا ..

شويـــــخ: هييييييييييييييييييئئئئئئئئئئئئ !!!!!!!!!!!


وزادت شويخ السرعه ومن عرقوب لين عرقووب ومن سمره لين سمره وهو يلحقنا .. خيـــــبه شو بنسوي الحين .. كان الموقف مرعـــب ويفطس من الضحك بــعد .. كان احلى فلم اكشن واقعي .. الصراحه ما توقعت شويخ تعرف تسوق جذيه و لا توقعت قلبها قوي فالسواقه .. ماشالله عليـــــها .. اخ تفو عليها .. هههههه ..


وخلاف تمينا نخطف من بين اليبال .. وضيعنا خالد أخيراً .. وضعنا نحن بعد !

شويخ بخوف: أيـــه بنات شو نسوي ؟

الريم: طالعي افكارج وين ودتنا .. افففففففففف نحن وين الحين ؟..

خلاف تذكرت .. هالمكان كنا فيه انا وحمد .. على ما اظن اني اعرف طريق الردة .. لو تبعنا أثر سيارة حمد بنوصل .. بس كيف بقول حق البنات جذيه .. ؟ سحبت شويخ بعيد شوي وخبرتها بالسالفه ..

شويخ: أسميج انتي مب هيـــنه يا حمّووووده .. ماعليه خلاف بتخبرينيه بالتفاصيـــل .. يالله الحين خلينا نروّح .. والله يعينا على خالد ..


ركبنا السياره .. وشويخ اقنعت البنات انها دلت الدرب .. وتمينا نتبع اثر سيارة حمد اللي بعده ما اختفى .. وبالفعل وصلنا .. نزلنا ونحن نتنافض من الخووف .. بس اللي حمدت ربي عليه مليووون مره انه حمد هو اللي كان في استقبالنا ..


حمد: بتخبركن انتن شو سويتن ؟ حد يسوي خبااااالكن ؟ اسميــــكن ......... شو اقول بس .. منو اللي كانت تسوق ؟

كلنا اشرنا ع شويخ ..

حمد: انا اقول هالخبال ما ايي الا من عندج .. تعالن بدبر لكن جذبه .. بقول اني انا اللي كنت وياكن .. زين انهم ماشافونيه قبل ..

تجدمنا حمد ونحن وراه .. وعاد كان في استقبالنا عمومتيه وخالد وسعيد وعلي .. خبرهم حمد انه هو اللي كان ويانا .. قالوا كمن كلمه بس خالد هو اللي احتشر اكثر شي ..

خالد: شو من مذهب هذا لكن ظاهرات فـ الكلوزر لا حيا ولا مستحى اسميكن مضيعات المذهب .. لا و حضرة الشيخات الريم وفاطمه راكبات ورا .. واللي جدام الله اعلم بهن شو يسوّن ..

محد بيسكته غيريه ملعوون الصيــر ..

حموده: أسمـــع يا ولد عميه .. أشوف يوم ركبت عندك جدام ما احتشرت جذيه .. الا هزبتنيه يوم ييت بركب ورا .. ولا يعني حلال عندك وحرام عند غيـــرك ؟ وبعديــن نحن حاشمات عمارنا وهب مضيعات المذهب ع قولتك .. ان جان عندك رمسه عدله قولها لكن غيــر جذا نحن هب مستعدين نسمعك ..

ومسكت ايد شويخ وخطفنا والبنات يتبعنا .. وانا فـي داخليه مستااااااااانسه اني قدرت اسكته مرتين اليوووم ..

وخلاف يلسنا ع زوليتنا تحت السمره ..

شويــخ: حموده من وين يبتي كل هالجـــرأه .. عنبوج يا أمريكا شو تسوين ..

حموده: ههههههههههههه .. اعجبج .. والله اليوم سكّته مرتين .. انتن خايفات منه ع الفاضي هذا لايهش ولا ينش ..

شويخ: جدامج انتي بس مادري شو مسويتبه امره دوم تسكتينه لكن نحن مانروم نوقف في ويهه ونقول الرمسه اللي قلتيها له ..

سلامه: والله انج جدعه بنت جدعان والنــعم والله .. هع ..

حموده: ههههه مشكوره يا اختي دا من زوئك ..

أذن العصـــر وسرنا نصلي .. وعقب الصلاه ورّوا الضو .. وبدا الوقت يظلم .. وكل واحد خذ له فنر "فانوس" .. مال أول نحن ..


من عقب صلاة المغرب بشوي بدا الخبــال .. الشباب مورّين الضو ويالسين حولها هم وشوابهم .. وانا خاطفه من عدالهم الا اسمع صوت واحد يغني .. استغربت هالصوت الحــلو اللي سمعته .. منو هاللي مستوي بالروغة زمانه ..؟ وايقت وشفته .. كان خــــالد يغني .. يالله بالستــر .. والشباب و الشواب متربشين وياه .. كان يغني اغنية بالروغه .. بما انا فالبر فـ أكثر شي بتسمعون اغاني ميحد وبالروغه ..


طال ليلي من جفا جفني السهر .. عن نظير العين وابديت المثيل
في غزالن قَط ما مثله بشر .. نافلن بالزين له طرفن كحيل
وارتحل وياه في جيبٍ خضر .. يخبط المسحاب جنه خبط ريل
سيرنا بالدوب ونعيد النظر .. ونتنادم لين عادلنا اليبيل
والنويبي فيه وقفت ابتصر .. صاحب القهوه احيده لي عميل
عن مشينا مجدين السفر .. في ثنينه بس مانبغي دليل
ربع ساعه خذت والمركز ظهر .. فالشعيب وقابل السيح الطويل
صاحب المركز الذي عنده نمر .. قال اشوفك يالاخو سيرك عجيل
قال لي مسموح فلا تفتكر .. سير بالمظنون دام الوقت ليل
سرت به وانيال همي والكدر .. فالصدر وقفت روحي بالخليل
خذت زام وبانت نيوم الفجر .. والغضي راسه على زندي ذهيل
قلت له يا وليفي قم بنعبر .. قبل طلع الشمس بنجد الرحيل
حبل الابيض والنصيله بانمر .. عندك المفرق وفالهزع المجيل


خالد هو اللي يغني ؟؟؟؟ .. معقوووووووووله ورا هالصوت الغليظ الخشن هالصوت الحـــلو ؟ والله كل شي جايـــز ..

وخلاف عاد بدا عـد القصيــد .. وأول واحد كــان بو شهاااااب ..

حمد:
يا هبوب البر ودّي له سلام .. من فوادن مغرمن في حب خلّه
وصلّي له مني اشواق وغرام .. وان حبه ساكنن الفواد كله
وانقلي لي منه ردٍ ع الكلام .. ان وصلني اعرف انه في محلّه
بين غرس النبت وانواع الريام .. في رياض العين روحه مستحلّه

فذمتيه انك شاعر يا بو شهاب .. مب هذا اللي متخسف ويايب له عوود ويغني !..

مرّت هالليله بين الشعر والاغاني .. و نحن البنات بس نتفرّج ..

بالبـــــــــاجــــــر .. وعينا على صلاة الفير .. اليوم بنتغدا هنيه وبنروّح .. أمـــس كان أكشــن فـ اليوم اتمنى انه يكون هادي ..

اليوم شاركت في طبخ الغدا بما انه اليوم غداهم دياي .. انشغلت وما استوت بلاوي اليوم الحمدلله .. عقب الغدا كلن ركب سيارته وروّحنا ..

من دخلنا المدينه بدا المطر يخف لين وقّف .. وصلنا البيت ونزلنا .. كانت الساعه 4:30 العصر .. انا ســيده سرت صوب حجرتيه ورقدت ..







يلا عاد اتريا ردودكم القصة مستوية فاحلا مكان فالعالم [ دار الزين مب زاخر كككككك ]

في ذمتيـه انه القصـه ابداآآع

ماعليج زود الغاليه ..

نرقب الياااي الشيخه

:(




افا ليش ماشي مشاركات ما عيبتكم القصة





ان ما عيبتكم خلاص ما بنزل








يلا شاركوا تحبطون الواحد الصراحة





القصة حلوه واااايد






واحداثها ابدا ما توقعونها











اتريييياكم

وهااا نزلنالكم بارت يديد






&* الجـزء الســابع *&



"من هــنا بدأت المصائب الكـــبرى .. أجاركــم الله منهـا .. :-

" في هــــذه الليلة فقط اكتشــفت هول ما اقـتـرفـته.. يا إلــهي هـل كنت غبيـة إلى هذه الدرجـة ؟ .. لا لســت غبيـة .. ولكنــني فقط ابتليــت بـحسن نيـتي ! ..

لقـد كـان صعباً علي أن أتلقى سـهم الغـدر منـك يا أختــي .. لم تصيبيـني به في الظهــر .. بـل أطلقتيـه في وجهـي وكأنما هو شيءٌ تفخريــن به .. فـهنيئاً لـك .. وأتمنى لـك البقاء على هذا الدرب طويـــلاً و أبـــداً .. لأنني لا أظـنك تعرفيـن للوفــاء طريقاً ..

وثــقت بـك كثيراً .. كـان آخــر ما توقـعته منـك هو "الخيـانة" .. كــنت إحدى صدمات حياتي الكثيــرة التـي هزتني ولكنـها لم تحطمنـي ..

تـعز علي نفسـي أن أنكسـر لأجلك .. فأنت مـجرد "غــــــــادره" ..

فـ شكراً جزيـــلاً يا "شيخه " رغم أنـك لا تستحقين هذا الاسـم لأنك أسفـل منـه بكثيــــر ! "


اللــي ماعــندهـ كـــرآمـه لا يخاويــني .. ان كــان مابدّل الخـوّه ببدلــهآ !




كنت نازلــة الدري بما انه حريم و بنات عميه عندنا وكانن يالسات فالصــاله .. تميت أتثاوب من سـهرة البارحه .. كنا يالسين انا وشويــخ نسولف و نطالع التلفزون .. وخبرتها باللي استوالي ويا حمد الاسبوع اللي طاف فالبــر مع اني ماكنت ناويه أخبرها .. لكنها أصرّت عليّه .. شفت نظرة غريــبة في ويهها أول ماخبرتها .. بس تجاهلتها لأنه خلاف ردينا نسولف عادي ..


نزلت عندهم سلمت ويلست ..


كانــت نظرات البنات غريبه عليّه .. كــانت أقــرب لـ نظرة احتقــار .. ماعرفت شو سر هالنــظره من صوبــهن .. تجاهلتهن وتميت اسولف ويا عمتيه وحريم عميه .. اما البنات اللي كانن مخططات يسيرن الحديقه فـ ما كـلـفن عمارهن حتى يسولفن ويايه بـ كلمه .. أو حتى يعزمن عليّه بسيـرتهن للحديـقه بالعكــس تعذرن بربايعهن .. ويوم سارت شويخ تلبس عباتها لحقتها عشان أسألها عن سـر هالنظـرات الغريبه ..


في حجرة شويخ ..

حموده: شويــخ ليش البنات يطالعنّيه جذيه ..
شويخ: مادري تخبري عمرج شو مسويه ..

عقدت حيّاتيه وقلت: ما سوّيــت شي .. ليش شو مستوي ؟..

شويخ وهي واقفه عند الباب و يايه بتظهر ..

شويخ: ماشي بس عرفن بـ سالفة البــر بـ التفصيــــــــــــل .. (أشرت على عمرها ) أنــا خبرتهن ..

وظهرت ورقعت بالبــاب وراها .. امــا انا تميت في حالة صــدمه .. معقووووله يا شويــخ انتي تكونين جذيه .. ماعرف كم يلست في حجرتها عشان استوعب اللي صار .. لكني خلاف قمت وانا أحــس بـ تعب فضـيـــع في جسميه .. الانســانه اللي انا أأتمنها على أسراريه تسوّي فيّه جذيـــه ؟ انزيـــن ليــــش ؟؟؟

ســرت صوب حجرتيه وانا يالله يالله أشـل ريـوليه .. دخلت الحجره وبندت الباب وقفلته .. يلست ع الشبريه وحطيت راسيه بين ايديّه .. فهاللحظه سمعت صوت تيلفونيه .. طالعت الشاشه كان حمد .. رديت بسرعه وانا ماشي في باليه غير اني اشتكي له من اللي سوته فيّه شويخ .. وأصيــح ويواسينيه لكن اللي استوا عــكس هذا تماماً ..

حمد وهو يصاارخ : انتــي بأي حق تسويــن اللي سويتيــه ؟

انا فوق الصـدمه اللي فيّه من شوي يتني هالصدمه الثانيه ياربي ! .. بغيتك عون صرت لي فرعون يا حمد !..

قلت بتعب : شو مستوي بعد ؟

حمد: لا يعني حضرتج الشيخه ماتدريــن شو مستوي .. استهبلي عليّه وسوي عمرج طيبه ومالج ذنب .. ماقول غير يا خسارة الحـب والثقه فيــج .. هاي آخرتها .. مخليه سالفتنا ع كل لســان !!!!

صرطت ريجيه بـ صعوبه وانا أشوف نتيجة كل جمله قلتها البارحه حق شويخ ! الظاهر انها نشرت الخبـــر .. ياويلي شو بسوي ؟؟؟

حمد: رمـــسي .. أشوفج سكتّي يوم واجهتج بالحقيقه .. انتي أصلاً وحده ماتستحيــن على ويهــج انا الغلطان يوم وثقت فيـج وحبيــتج ولا حـد يحب وحده عايشه نص عمرها في أمريكا ..؟؟ نصحوني عنج بس ماصدقتهم .. والحين خليتي سالفتنا على كـل لســان لا وبــعد زدتي عليها من عــندج .. هذا اللي ذابحنيه .. انتي وحــده حقيــره ..

قلت له بكـل ضعف وحزن وانا خلاص مب قادره أستحمــل : مشكور يا حمد مشكور ..

وبندت في ويهه .. ما رمت حتى ارفع راسيه .. عقيت بعمريه ع الشبريه وتمنيت أني ارقــد وما أقــوووم .. هذي كانت أقصى أمنيااتي ..


كنــت اشــوفك شـي ثاني شي غير بهالوجود
شـــي غيـــّر لي كياني كســـّر قيــود وحــدود
شــفتك بــعيني أمـانـي فـجـر وطــيــور وورود
رحـــلة آخرهــآ مواانــي كل من ســافر يـعوود
جيـتني عكـس الثواني جيتني عكــس الوعود
قلـت لــي اني أناني جيــتني عنــاد وصــــدود
اشتكــى عذري وبكاني وجف بلساني الــردود
جيــت مع بــاقي حنـــاني مالقيت الا الجــحود
شفــت انــك ماتبــاني صـــابني منـــك جـمود
آآآآآهـ يا قســوة زمــاني ليــش نكــران العـهود
كنــت اشــوفك شـي ثاني شي غير بهالوجود
شـــي غيـــّر لي كياني كســـّر قيــود وحــدود



لـــــــــلأســــف الشــــــــــــــديـــــــــــــد أنــــي قــمت من نوميـه .. بس التعـــب اللي كــنت أحس فيــــــــه كان فظيـع لدرجه ما اتصورونها .. رديت ارقد وكل كوابيس الدنيا يتني ..


وعيـــت وأنــا أشــم ريحه غريــبه في خشميه .. كانت ريحة فــكس .. وعععععع .. فتحت عيونيــه بالغصب .. كانت عمتيــه تحاول توعينيه .. صلبت عمريه شوي وتساندت ع المخده بـ شبه يلسه .. لكني مسكت راسيه بإيديّه وتميت أصيـــح من قوة ويع راسيه .. كان أقوى من اني اروم استحمله .. كانت عمتيه ترمس بس ما انتبهت لها ولا انتبهت ع اللي كانت تسويه .. كنت فعالم ثاني .. عالم الخيانه وعالم حمد والكلام اللي سمعنيه اياه .. حسيـــت بضياع شديد .. كيف اقرب شخصين لي يصدمونيه جذيــه ! هذا شي اكبر من قدرتيه على الاحتمـــااال .. رديت غمضت عيونيه ..



دنيا غريبه مابها شي دايم . . والمصايب بها كل لحظه و حين
مشوّشه غايمه ما تبين بها العلايم . . غدرها يطعن فالحنايا طعن سكين
حتى القريب الوفي الملازم . . يصدمك في كذبه وفي لحظه يبين


.
.
.


شو هالصووت المزعــج ؟؟ شو هذا اللي ماسك ايديه ؟؟ اشياااء غريبه فهالمكان اللي انا فيه .. فتحت عيوني عدل .. تأملته وعقب فتره مب قصيره وصوت كنت اسمعه لكني ما قدرت أركز عليه اكتشفت اني فالمستشفى .. زيــن تو الناااااس !!!


طالعت فوق .. شفت هالريال اللي واقف فوقيه .. منو هــذا ؟.. غمضت عيوني مرتين وفتحتهن .. وخلاف اكتشفت انه اللي واقف عداليه وماســك ايديه ما هو الا حمد !

مطيت ايديه من ايده بسرعه وانا أصيــح و أصاارخ ..



طالعنيه بعيونه اللي كانت متروسه دمووع .. وخلاف مسكنيه من جتوفيه وهو يحاول يهدينيه .. ماعرفت شو اسوي .. بس كــل اللي كنت اباه فـ ذيج اللحظه انه يطلع من عنديه .. ماكنت ابا اشوفه لأنه شوفته تحسسنيه انه في شي في راسيه بينفجر ..!!! كلامه كله كان يتردد على مسامعيه .. انتي وحده حقيـره .. انتي وحده حقيـره .. صرخت بأعلـــى صوتيـــه لأني ماحصلت حل غير هـــذا .. طلع بسرعه ودخلن الممرضات .. وأول ما طلع انا هديــت .. بدلن الممرضات المغذي وعطني ابرة مهدي .. ورقدت ..


عقب ماوعيت ماحبيت اني أشوف حــد .. أبـــداً .. طلعت عقب 3 أيام من المستشفى .. وقطعت تذكره على أول طياره صوب أمريكا وماهمنيه على أي مطار بتنزل .. كل اللي كنت ابغيــه اني أشرد من هنيه وبــس ..


انا ما أعيـــش عند ناس هانونيه .. وأصلاً انا محتاجه أغيّر جـــو .. عشان انسى نظرات وكلمات الاحتقار لأني انا مب من الناس اللي صبرهم واحتمالهم طويــل .. ما قدرت احتمل كل شي صار .. فـ قررت أشــرد حتى لو انه السالفه بتنحل .. لكني انا ما اقدر أعيــش ويا شويخ تحت صقف واحد .. ولا اقــدر أشوف رقعة ويهها عقب اللي سوته لأنه بالنسبه ليه لا يغتــفر .. أظني دعواتي عليها وانا فالمستشفى بتعذبها طول عمرها ..


عقب معركة اقناع ويا عمتيه وعمومتيه واللي كانت نتيجتها الرفض القاطع .. زهبت عمري الساعه 5 الفير و لميـــت قشاريه وويّهت صوب مــطـار دبــي فـ تكســي "الغــزال" ع الاقل أحسن من تكاسي قوم خاااان اللي تلوّع بالجبد ولا شو راايــكم انتوا؟؟


وصــلت دبي .. بس انا طيارتيه بــاجر الساعه 7 الصبح على مطار "لوس انجلوس" .. شكلي بدوّر لي فندق .. شرايــكم أسير برج العــرب ؟؟ يمدحوونه الصراحه .. وحسابيه فالبنك مايقصّر .. الله يرحمك يابويه ورثت ليه فلوسيه ما تخلينيه أحتاج لـحد .. يالله شو ورايه خل أحجز فيه .. ترانيه رغيد ما ورايه حد .. هع .. وأصلاً انا من زمان خاطريه ادخله ..


وبالفعل توجهت صوب برج العرب وحجزت لي ذاك السويت السنع حق ليله وحده .. دخلت السويــت وبندت الباب .. عيبنيه المكان واااايــد .. يلست ع الكرسي ومغطت ريوليه .. وفجيت موبايليه اللي كنت غالقتنه .. الحين الساعه 7:30 الصبح .. والمسكولات والمسجات بالهـــــبل ..


آخر مســج واللي كان واصل من شوي كـان من حمد ..


"حمووده انــا آآســف أدري هالكـلمه ماتعني شي جدام اللي قلته لـج بــس صدقينيه انا نــدمااان .. دخيــلج لا تسافريـــن قبل ما اشووفج .. اذا بعده لي غلاه ومعزه عندج لا تسافريــن .. ترييني ع الاقـــل "


لــــــك غلاة ومعزة عنديه يا حمــد .. بس كرامتيــه ماتهون عليّه .. مب انا اللي ينداس عليّه جذيــه واسكـت !


فرّيت التيلفون وسرت اتسبح .. خاصةً اني بعدني لابسه البجامه تحت العباه .. والله اني تحفه !

عقب ماتسبحت وخلصت خليت شعريه مبطل ينشفه الهوا .. وسرت صوب تيلفونيه .. وصلنيه مسج وهو في ايديّه وكان من حمد ..

" أنــا في دبــي الحين انتي ويــــــــــــن ؟؟"

طرشــت له كلمتيــن : "برج العرب" ..


حطيت التيلفون ع الطاوله ووطيت راسيه ع مسند الكرسي وانسدحت وغمضت عيونيه بما اني مارقدت فلّيل من الخوف انه خطتيه تفشل وحد يدريبيه .. بس الحين عقب ما نجحت وخلصت قدرت ارتاااح ..


وعيت على صوت حد يفتح الباب .. فتحت عيونيه .. كــان حمــد .. وانا كنت في وضع لا احسد عليه .. ببجامه وشعري مبطل .. شردت سيده صوب الحجره وقفلت الباب ..


بدلت ثيابيه ومشطت شعريه ولفيته ولبست شيلتيه .. بس تميت فالحجره .. كيف أظهر جدام حمد ؟ خبرونيه ..

تم يدق ع الباب ..

حمد: حمووووده دخيــلج فجــي البـــااب .. اذا باقي لي خاطر عندج فجي .. وغلات عميه المرحوم عندج ..

دامك حلفت بغلات ابويه وبـ خاطرك ماروم اقول لا ..


فجيت الباب .. شفت شكل حمد المبهدل .. كندورته مب معقمه وسفرته على جتفه .. وشكله جنه توه واعي من الرقاد .. والدموع فعيونه ..


هالدموع كسرت قلبيه .. ماقويت اني اشوف فعيونه دموع رغم كل اللي قالي اياه .. يعز عليّه اشوفه بهالضعف .. !!

حمد: حمووده انا آآســـف دخيــلج سامحينيه .. سامحينيه أوعدج ما اصدق فيــج حد مره ثانيه .. انا أحقر واحد فالدنيا يوم سوّيــت فيج جذيه .. !!!


ماقدرت اشوفه بهالضعف .. كان يترجانيه .. كـان يتوسل ليه .. خلانيه اكره نفسيه اني خليته يعاني بسبتيه جذيه .. جن هالدموع اللي كانت فعيونه غسلت من قلبي ومن تفكيريه كل كلمه شينه قالها فـ حقيه ..


قلت بندفاع :..

مسمووووووووح يالغــــالي !..


تصدقون الحيــن اكتشفت أهم شي .. انا ماكنت أكره امريكا انا بس كنت ابا أشوف أهليه وأعيش بينهم .. بس الظاهر انهم مافيهم فااايــده .. الحين محد يدانينيه .. والله محد فيه خير فيهم غير يدّوه وعمتيه عليا وحمـــد !! هاذيلا هم أهليه اما الباقين ما أعترف فيهم !!! الحين أبا أرد أمريكا بأسرع وقت .. أبا أنظف مخيه شوي .. أبا ابتعد عنهم .. عقب ما يصفى تفكيريه برد .. عقب ما أكتشف طريقه أعيش بها بينهم عقب اللي سوّته شويخ !!


يانيه حمد و قطع عليّه تفكيريه .. تذكرت حمد اللي كان معصب عليّه فالبـر وحمد هذا .. فـــــــــرق واااااااااايــد ..

يلس عداليه .. وقال: بعدج ملَزمه تسيرين أمريكا ؟

هزيت راسيه بـ هيه ..

حمد: انزين بسافر وياج ..

حموده: لا مستحيـــل انا أبـا أسيـر روحيه .. أبا أتم روحيه شوي .. أبا ارتاااااااح ..

حمد: و انا بتعبج يعني ؟

حموده: لا بس انا محتايه أتم روحيه .. دخيــلك ما بطوّل بس اسبووعيــن !

حمد: يعني اسبوعين مب وايد ؟؟؟ ماروم أصبـر عنج ..

حموده: حمد لا تقول جذيه لا تضغط عليّه انته ما تدري اني ماروم أشوفك تترجانيه وارفض .. اذا صدق تحبنيه خلنيه أسير .. دخيــــلك انا اللي اترجاك ..


حمد: خــلاص برايـــج دام هذا اللي تبينه .. انا بسيــر أحجز لي سويت عدالج .. عشان أوصلـج باجر المطار .. وبدق حق عمتيه اللي بغت اطّيح علينا يوم درت انج "شردتي" من البيت .. والله انج ظهرتي جريئه يا حموده وانا مادري ..!


حموده: والله انا يوم في راسيه شي ماحد يروم يمنعنيه .. شفت الحين يوم بغيت أسافر مارمت تمنعنيه ..

حمد: تبينيه امنعج ؟ أروم امنعج .. بس ماتهونين عليّه !!! يالله انا ساير شي في خاطرج .. ؟؟

حموده: سلامــتك وبقاك فالدنيا ..

ابتسم حمد وظهر عنيه ..

مــــــر هاليوم عليّه طويــل وكئيب من عقب طلعة حمد عنيه ..

بالــبـاجــــر .. وعيت على صوت حد يدق ع باب الحجره .. أكيد هذا حمد انا اموت واعرف كيف قدر يدخل أمس والحين بعد ..

لبست شيلتيه وفجيت له الباب ..

حمـد: صبـــاح الورد .. (وعطانيه ورده لونها زهري) .. هاي قطفتها من الزراعه اللي حصلتها هنيه .. عاد اسمحيليه ماحصلت حمرا ..

خذت الورده من ايده وقلت: مقبوله منك حتى لو سودا ..

تنهد حمد وقال: بعدج معزمه تسافريـن ؟؟

حموده: ليش انته عندك مانـع ..

حمد: لا بــس الطياره طــارت عنــج .. تنيذلت فيج وماوعيتج !!

حموده: أحلــف انته بــس ..

ورديت الحجره اطالع الساعه فالتيلفون .. الحين الساعه 8:30 .. !!!!! طـــارت الطيــاره ومــن زمااااااااااااان بعد .. شــــــاطر يا حــمد شــاطر عرفت كيــف تلعبــها !!!!!

سرت صوبه وانا مادّه بوووزيه شبريــن ..

حمد: حتى لو بوزمتي وزعلتي .. أمريكا خذتج مني مره ومابتاخذج مره ثانيه !!

طالعته بـ خيبة أمل ويلست ع الكرسي وحطيت ايديه ع خديه ..

حموده: أنتـــه ليـــش نــذل جذيـــه ؟؟؟

حمد: ربي خلقنيه جذيه بعد شو اسوي ؟؟

حموده: أيـــه بــس عاد تراك والله مصختها يا حمّووووووود !!!

حمد: انا حــمّوووود ؟؟ أول مره حد يسمينيه جذيه .. ياحــلاته طالع منــج ..

قــمت عنه وانا بعدني مطنقره على سالفة السفر اللي خرب لي اياها ..

قمت عنه ووقفت عند الدريشه .. وبطلتها .. تميت اطالع البحــر .. حسيــت بالهوا البارد يقرص يلدي .. بندت الدريشه و يلست ع الكرسي اللي عدال الدريشه ..


حمد: زعـلانه ؟؟ أنـــا آســف .. أدري اني كنت أناني .. مابتفهمين موقفيه لأنج مابتحبينيه في يوم كثر ما أحبج ..

حموده: حمـــــد .. خلنا من هالسالفه الحيــن .. انا أبـا أعرف شو اللي قالته شويخ عنيه عشان الكل ينجلب عليّه جذيه !!

حمد: مايهمج اللي قالته .. هي وااايــد زادت ع السالفه من عندها .. الألعن من هـذا انه اميه وحرمة عميه يدرن ووصلتهن الاخبار وانتي بشردتج جذيه أزّمتي الموقف وايــد .. الكــل هناك معصبيــن .. ويقولون رمسه ما أظني تبين تسمعينها .. كــل شي بسبة شويــخ ملعووونة الصيـــر .. الله يقطعها ويقطع يومن يت فيه من الدنيا وحبتنيه ..!

حموده: شوووووووووووووووووووووووووووووووه ؟؟؟؟ شويـــخ تحبك ؟؟؟؟؟؟؟

حمد: هيـــه .. بس اللي قاهرنها انهم محيرينها حق سعيــد .. وتبا تفتك منه وتيب راسيه مره وحده وتخرب بينا انا وانتي .. الحين عرفتي هي ليش سوّت كل هذا ..

حموده: ماتوقعتها بهالنذااالـــــــه .. ياربي انا كيف انخدعت فيها وأمنتها ع كــل شي .. انا غبيّه .. غبيّه .. غبيّه ..

حطيت راسيه بين ايديّه وتميت أصيـــح .. خوّز حمد ايديّه عن ويهيه .. ومسح دموعيه .. وقال ..

حمد: مابا أشوف دموووعـج مادام انا وياج .. انا مالي غيرج وانتي مالج غيريه .. حتى انا ماسلمت من رمستهم هناك .. بدايتها كانت بـ "انته هب ريال اللي تسوي في بنت عمك جذيه " .. ونهايتها شي ماودج تسمعينه ..

حموده: انزين شو بنسوي ؟؟

حمد: لازم نواجههم .. ونخلي شويخ تعترف انها هي اللي ظهرت كل هالرمسه من عندها .. لأنا مانروم نتم مرتغدين هنيه وايد .. ولا شورايج انتي ؟؟

هزيت راسيه بـ هيه .. اذا على مرتغدين نحن مرتغدين بالقــوو .. لا حسيب ولا رقيب .. بس انا مالي غيرك يا حمد من عقب الله .. و أي شي تقوله بسويــه ..

قررنا انه العصر نتوجه صوب العين .. وانا من الحيــن بطنيه يعورنيه من الزيـــغه !!!


:
:
: