منتدى استراحات زايد - .::!::. ذاك كرهني و هذا حبيته .::!::.

الجزء الخامس ..

اليوم : الأحد ..
الساعة : 5:00 العصر ..
المكان : فبيت بو محمد ..
مهرة كانت يالسة فالصالة هي و عواش (( عاد هاي زاخة كتابها أونها تدرس ..ثالث ثانوي )) و أمهم .. و حرمة محمد شيخة .. يتريون محمد و عيسوه و أبوهم إيون من المطار ويا سيييف ..
عواش تجلب صفحات الكتاب و ما فيها صبر ..
مهرة تحجج إيديها .. و شيخة تفكر فريلها و أم محمد ادقدق عليهم 24 ساعة ..
أم محمد : ألوووه .. بويه محمد .. وينكم ؟؟ شليتوه ولا لاء ؟؟؟
محمد : يا حبيبتي .. يا أمايه .. من اول ما انشله بدقلج و بخبرج .. إنتي أول وحدة بتعرفين .. شو تبين بعد ؟؟!! بس دخيلج لا ادقين .. هاي المرة السادسة اللي ادقين فيها .. لا اتعبين عمرج نحن بندقلج على طول ..
أم محمد : إنزين .. إنزين (( مب عايبنها بعد !! )) مع السلامة ..
و تسكر الخط فويهه قبل لا يقول مع السلامة .. أو حتى يرد عليها .. ^.^ ..
عواش : ها أمايه .. وينهم ؟؟!!
أم محمد : أونه يوم بيشلونه بيدقون .. بعده ما وصل البلاد ..
مهرة : مب حالة هاي .. أنا بتيني حالة نفسية لو تميتوا ساكتين .. ارمسوا عاده ..
شيخة : و الله إنج ..... يعني شو تبينا انقول فهالحالة ؟؟!
مهرة : إنتوا محد ايلس وياكم ..
شلت عمرها و ظهرت من الصالة ...
بعد نص ساعة تقريبا .. رن تلفون أم محمد ..
أم محمد : فديييته وليدي .. أكيد شلوه و أحينه محمد بيخبرني ..
و ترد ..
أم محمد : هلا فديتك شليتوه ؟؟!! وصل ؟؟! ........... شووووه ؟؟!! إنزين .. إنزين ..
و يوم هي يالسة ترمس .... و معصصصصصصصصبه .. رن تلفون شيخة ..
شيخة : أوه .. ها محمد ؟؟!
تربع عواش عندها و أم محمد تسكر التلفون فويه اللي كان يرمسها ..
شيخة : هلا محمد .. و .. وصل ؟؟!! الحمد لله .. شحاله ؟؟! الحمد لله .. سلم عليه واايد كلنا نسلم عليه ... عمتي ؟؟! هني ها ..
أم محمد : مسود الويه .. لبش ما دق لي ؟؟!!
شيخة : تقول أمك ليش ما دقيتلها ؟؟! ........ يقول لأن تلفونج كان مشغول ..
سكرت شيخة من عند محمد و عواش طايرة من الفرح تناقز مني و مناك ..
عواش .. : أقول أمايه .. منو كان يرمسج ؟؟!
أم محمد : ها الدختور مال الأسنان ..
شيخة : عمتي اسمه دكتور .. هب دختور ..
أم محمد : كله سوى ..
عواش : و شو يقول ؟؟!
أم محمد : ما أدري خربط علي بالعنقريزي .. (( بالإنجليزي )) ..
شيخة : إنزين يقول محمد .. هم أحينه يايين ..