البارت " 12 "

.
.
.
.

اليوم : خميس . .
المكان : بيت بو ناصر . .
الساعه : 1 ظهرا . .
.
( عيسى ) . .


نزلت من السياره ، و انا حرااااااان ، الشمس ضاربه علي حتى لو كنت مشغل المكيف . .
دقيت باب الصاله دقتين ، و شوي فتحته شيخه . .
شيخه : هلا عيسى . .
طالعتها بشووووق ، والله اني مشتاقلها موووت . . ابتسمت . .
عيسى : سلام عليج ، شحالج شيخه ؟ . .
شيخه : وعليكم السلام ، الحمدالله انته شحالك ؟ . .
عيسى : الحمدالله . .
شيخه : هاه تبغي عمتيه ؟ . .
عيسى : لا ، ابغيج انتي . .
قالت شيخه بصوت عالي شوي . .
شيخه : نعــــــــم ،!
اداركت اللي قلته ، ومن غير ما احس بعد . . بروحها هي احسها مب طايقتني . .
بسس انا متحمل ، لاني حاس انها يوم تتزوجني بتفتقد بيتها ، وها اللي يمكن يخليها تكرهني . .
عيسى : آآآ هيه لو ما عليج اماره ، زقري امايه قوليلها بنتأخر ع المطار . .
شيخه : ان شالله . .
كانت بتروح بس رديت و زقرتها . .
شيخه : هـــاه ،!
ابتسمت ع دفاشتها ، من انولدت وهي دفشه حتى ف الرمسه . .
عيسى : تبغين شي من مكه . .
شيخه : لا . .
عيسى : اكيـــــد ،!
شيخه : هيـــــه ( ومددت الكلمه عشان تراويني انها ملت من اسألتي ) . .
عيسى : لا مب عكيفج ، تبغين شي ؟ . .
طالعتني بعصبيه . .
شيخه : وانا كم مره اقولك مابا شي ، ما تفهم اوووووووف ،!
ودخلت داخل ، و خلتني مع صدمتيه . .
منصدم من اسلوبها لي ، ولا جني خطيبها . . وف يوم بنعيش ف سقف واحد . .
جذا بتعاملني جدام عيالها ،!
لا يا عيسى ، اكيد لااا ، الحين ها الفتره يمكن تعاني من ضغوطات من كل صوب ،!
عشان جيه معصبه شوي . .
طلعت امايه من باب الصاله ، يت تسلم ع خوالي قبل لا تسافر ، واخر بيت كان بيت بو ناصر . .
انا و امايه و ابويه و يدوه وعمر ، بنسافر العمره ، نكفر عن ذنوبنا شوي ونحن ف رمضان . .
بغينا كل العايله تسير ويا بعض ، بس كل واحد تحجج بشغله ،!
اللي ما عنده اجازه ، واللي متعايز يسير ، واللي حاجز لسفره عقب . . . الـخ
وانا و امايه ما عطيناهم واحد ، اثنين . . ع طول حجزنا ف حمله من الحمل . . وصاحبه يستوي ربيع ابويه . .
والحمدالله حصلنا مكان ، !
ركبنا السياره ، وسرنا البيت ، سوينا كل اللي علينا ، ومن تجهيز اغراض . . .
لين ما امايه خلصت كل شي ، وركبنا ويا الدريول عشان يوصلنا المطار . .
يدوه كانت محتشره ع امايه ، انه يمكن تفوتنا الطياره ، وانا اهديها و اقوللها الطياره ما بتفوتنا بعده في وقت . .
بس شو نسوي هاي يدوه ، و ملزوم علينا نتحملها . .
وصلنا المطار ، و خلصنا الاجراءات كلها ، وتمينا يالسين نتريا يزقرون رحلتنا . . صلينا العصر ، و عطول ركبنا الطياره . .
والـــى العمـره ،!
.
.
اول يوم العيد . .
.
اليوم : الاثنين . .
المكان : بيت بو ناصر . .
الساعه : 11 الصبح . .
.
( عزه ) . .


طلبت مني عمتيه ، اني اسير ازقر شيخه ، وقمت سرت غرفه شيخه ،!
دقيت كم دقه ، وما ترييت جوابها ع طول دخلت ، وشفتها واقفه جدام المرايه ، و حاطه مخوره جدامها تتأملها . .
عزه : شو تسوين ؟ . .
شيخه : افكر اغير ملابسي . .
مسكت مخورتها و حطيتها ع السرير . .
عزه : لا لا ، جذا انتي حلـوه ، عقب العصر بدلي لبسج . .
شيخه : احسني اوووفففر . .
حست بوزي وانا اشوف لبسها ، صح كان وايد شغل فييه بس واايد حلوو . .
عزه : لا والله انه حلو ، عقب بحقق وياج من وين شارتنه . .
غمزت لي . .
شيخه : ليش ناويه تشترينه ، و تلبسينه جدام الحـب . .
ضربتها ع ذراعها ، وانا اضحك وياها . .
عزه : اي حــب انتي الثانيه . . يلا يلا لبسي شيلتج . .
مشت عني عشان تيب شيلتها وهي تسألني . .
شيخه : خلصتي اغراضج ؟ ،
عزه : لا بعدني باقي شوي . .
شيخه : بلغج ناصر انه تأشيرج بعدها ما خلصت ،!
عزه : هيه خبرني ، بس ان شالله بتخلص بسرعه ، السفره عقب اسبوعين . .
وردت و غمزت لي . .
شيخه : والملجه ، ها الاسبوع . .
دحيتها ع ظهرها ، لدرجه انه بدت تكحح من كثر قوتها ،!
بدايتاً ، انا وناصر ملجتنا ها الخميس 
لا تسألوني كيف صار وكيف استوا ، لاني انا بروحي ماعرف . . مرت السالفه مثل البرق . .
من رمسه امايه ، لين ها الوقت ،
بتصدقون ، اذا قلت اني كنت افكر ارفض ، لاني خايفه يصيرلي مثل راشد . .
بس اللي خلاني اوافق ،!
انه ناصر صدق شاريني ، ولو بيسوي مثل راشد . . جان ما خطبني وهو يعرف عن اللي صارلي . .
وفوق كل هذا ، ولد عمي مستحييل يجرحني بأي شي . .
و على كل هاه ، ملجتنا انا وياه ها الخميس و سفرتنا الاسبوع اللي عقبه . .
لا مب شهر عسل . .
ناصر قرر انه نسافر و اسوي العمليه التجميليه . .
.
نزلنا انا و شيخه تحت ، عشان نتريق ويا الحريم . . كل وحده يايبه صحن ثريد . .
وفارشينه ع الارض عدال بعض ، يلسنا و بدينا ناكل . . وجربت من كل صحن ، اسميني اموت ع الثريد . .
بعد ما خلصنا ، وزعنا انا و شيخه الجاي ، ع يدوه و عمتيه و امايه و حرمه عمي . .
وضيفنا البنات . .
و خذتنا السوالف ، بلغتني موزه انه ناصر برا و يبا يسلم علي ، زقرت عمتيه تي ويايه لانه امايه مسلمه عليه من قبل . .
عمتيه : مباركن عيدك يا ناصر . .
ناصر : هلا عمو ، عساج من العايدين و السالمين . . ( والتفتت صوبي ) عيدج مبارك يا عزه . .
عزه : عساك من العايدين . .
ناصر : شحالج ! ، ربج بخير ؟ . .
عزه : يسرك الحال ، انته شخبارك . .
ناصر : الحمدالله ، اذا محتايه شي بلغيني وما يردج الا لسانج . .
عزه : ان شالله يا ناصر . .
ناصر : من رخصتكم . .
عمتيه : مرخوص . .
قب لا ندخل مسكتني عمتيه . .
عمتيه حصه : عزه ،! اذا ناصر بسس فكر يعايرج بجسمج المشووهه ، بلغيني وانا اشوف شغلي وياه . .
وراحت عني ، و خلتني ع صدمتيه . .
معقوله ناصر يطلع منه ها الشي ؟ . .
عقب ما خذتنا السوالف ، خذنا انا و شيخه الغسول و القلاصات عشان نغسلها ، واقرب مغاسل ف الميلس الداخلي ، فـ سرنا هناك ، طبعا ها الميلس للحريم ، بس حاليا مافي حريم فـ الرياييل يقعدون فيه ، لكن الحين مافيـه حد . .
عزه : شيخه بنسير نسلم ع عمي . .
شيخه : ابويه ،! نظهر برا يعني ؟ . .
عزه : هيه فيها شي ؟ . .
شيخه : لا ، بس مابا . .
عزه : ياربييي ، ليييييش ؟ . .
شيخه : بس جذا ، مابا اظهر . .
عزه : قومي بعد بسلم ع خالد اخويه ، ما شفته . .
طالعتني بنظره صارمه ، وقالت بحزم . .
شيخه : وهذا اللي يخليني ما با اطلع ، شوفه خالد . .
فجيت عيوني ع وسعها . .
عزه : بلاج وارمه انزين ،
شيخه : انتي تعرفين مابا طاري خالد ، مووووووووول ،!
غايضتها وتميت اكرر اسمه . .
عزه : خالد ، خالد ، خالد ، خالد ،!
قالت بصوت عالي شوي . .
شيخه : خلااااااااااااااااص ، بسس عزه حشرتيني تراج . .
قلت بنغزه . .
عزه : انا من اييب طاري خالد ، ع طول تعصبين وفوق كل هذا تبين تنسينه ،! . .
شيخه : انا بنسااااه ، بس لو تسكتين انتي ولا تيبيين طاريه . .
مشت عني و هي شاله الغسول اليديد . .
وتبعتها وانا شاله الاكواب ،
.
.
.
اليوم : الاثنين . .
المكان : بيت بو ناصر . .
الساعه : 1 ظهرا . .
.
( خالد ) . .


ظهر عيسى من الميلس وهو مسرع ف خطواته ،
خالد : يبت تلفونك ،!
طالعني بنظره و قال بعصبيه . .
عيسى : هيه ، يلا يلا اركب السياره . .
ركبت السياره ، بس اللي استغربت منه انه عيسى فج الباب بعصبيه و سكر الباب بأقوىىى شي عننده . .
شغلت السياره ، و حركتها متوجهه لربعنا نسلم عليهم . .
خالد : عيسى ، بلاك معصب ؟ . .
عيسى : ياريت بس تشوف شغلك ، و تسوق وانته ساكت . .
خالد : و جذا اسكت ، وانته معصب يعني ؟ . .
عيسى : هيه سوو خيير لو يوم واحد ، و اكرمنا بسكوتك . .
خالد : لا لا الظاهر شي جايد . .
عيسى : شوووف خالد ، تراني عايفك و عايف روحي وعايف كل حددد ، لا ترمس ولا والله لا ارد البيت و اخليلك السياره بكبرها . .
سكتت عنه ، لانه عيسى ع كل طيبه و كل بروده الا انه يوم يعصب لحد يرمسه ، لانه كل شي يقوله و كل تهديد يقوله بيسوييه ف دقيقه وحده . .
سرنا و سلمنا ع كل ربعنا ، و كل بيت نمره لازم يأكلونا شي ،
يعني وصلنا بيت عمتيه حصه ، شبعانيييييييييييييييييين ،!
دخلنا الصاله وين الحريم يالسين ، و ابويه و عمي والشباب بعد ، و ع طول يلست عدال يدوه . . وهي بس طايحه تتفداني خخخ . .
يدوه : ياللله يا خالد ، ليش ما تستوي مثل ولد عمتك و تعرس . .
طالعت عيسى ، اللي طالعني بصراااامه ، وجنه يقول لا تقلدي و تعرس . .
خالد : هههههه وين يا يدوه ، بعدني صغيرر . .
يدوه : مب حراام عليك تخلي حمد ها المسكين يترياك . .
خالد : اذا ع حمد ، انا ما مسكته وقلتله لا تعرس ، يبا يعرس يختار و امايه يتخطب . .
يدوه : لا لا ، ماشي انت الكبير ، وانته بتعرس قبله . .
تنهدت . .
خالد : يصير خير ان شالله ،!
.
.
.
اليوم : الاثنين . .
المكان : بيت بو ناصر . .
الساعه : 3 الظهر . .
.
( حمد ) . .


قالي ناصر اني بلقى جرج لتلفوني ، ف الميلس مال الحريم . . ظهرت من الصاله و سرت الميلس . .
وقبل لا ادخل ، سمعت صوت داخل فكرت انه مهره ، بس اول ما دخلت . .شفتها واقفه و عاطتني ظهرها و حاطه السماعه ف اذنها . .
نوره : يابوووي كم مره اقولك ، مهره ماتبا ترمسك . . . لاحول ولا قوه الا بالله . . . شو بعد شو تستويلي انا بنت عمها و اطلب منك تنسى رقمها ، ومن الاخر هي ما تبا ترمسك . . . .
تميت واقف ع صدمتيه ، مب مصدق اللي تقوله . .
لا لا ، اكيد في شي غلط . .
اكيد نوره قاعده تخرط او تستهبل ، و تعق كل شي ع مهره اختي ، !
هه ما استبعد ، اذا هي سوتها فيني ، ما بتسوي مع غيري . .
حسيت اني فقدت كل حواسي ، ماشوف ، ما اسمع ، ما احسس بأأأأأييي شي . .
صعععبب ها الشعور ، واللله العظيييم انه صععععببب . .
شو اسوي فييييههههها ، اذبببحححها ولا شووه ؟ . .
نااار بيووفي ماظني انها تنطفي ،! . .
يا ترى الواحد يوم يطيح مثل موقفيه شو يسوي بالظبط ،!
اقوم اذبح نوره ضرب ،!
بس ، خوفي لا حد يدري ويسألون شو اللي صاير . .
اقوم امسك كشه مهره ، فضل الله عن ها الكشه ،!
بس نفس الشي خايف حد يدري . .
ماشي غير ها الحــــل . .
تقربت من نوره ، طبعا هي كانت عاطتني ظهرها . . و مجعععت التلفوون عن ايدها بقووه . .
وهي التفتت صوبي و حطت ايدها ع حلجها و شهقت . .
نوره : حمــــــــد ،!
عقيت التلفون ع الارض بقوه ، و انكســر ،
او مادري شو صابه المهم سمعت رطمته ع الرخام بقوه . .
مسكت ذراعها و قربتها صوبي ، بس كانت في مسافه امبينا . .
حمد : ( تفلت عليها ) تفففففف علييج ، ما توقعتج جذااا حقييره ، تعقييين كل اللي تسوينه ومن بلاوي ع مهره . .
طالعتني بنظره صارمه . .
نوره : انا ماعقيييت عليها ، لاننه كل اللي يصير بسبه مهره . .
.
هزيت راسي بأسى ، وانا مب عايبني ها الحل ، خايف . .
هيه نعم خايف . .
خايف تصدمني بواااقع مرييييير قاعد يصير ،! . .
خايف تصدمنني بأختتي الصغييره ، ودلووعه ابويه . .
ودلوعتنا كلنا بعد . .
على رغم من اسلوبها ، و غرورها الا انها تبقى و تظل اختي . .
كرامتي من كرامتها . .
وسمعتيه من سمعتها ، وآآآآآآآآه من السمعه . .
يبت جرج ، التلفون . . والحمدالله انه نوره ما شافتني لين الحين . .
و ظهرت ع طول ، ماقولكم اني بسكت . .
بس والله العظيم اني جاهل بها الامور ، ماعرف شو اسوي بالضبط . .
خوفي اخبر خالد ، و يزيد الطين بله و يروح يخبر راشد ، و راشد دام انه وايد ويا ابويه ويخبره بالسالفه . .
ويطيحون فيها ضرب ، ثلاثتهم ،!
جذيه بتنذبح البنت ، و بيفتكون من الفضيحه . .
انا شو قاعد اسوي ؟ . . جذيه ما حليت الموضوع . .
جذيه زدته فوق عن حده ،!
رديت يلست ف الصاله ، وانا بس اتريا الساعه اللي امايه تطلب انه نرجع البيت . .
و اول ما قالو يالله ، ع طول قمت . .
ناصر : حمد ، وين ساير ،! مب جنه متواعدين نطلع ويا الربع . .
حمد : يا ريااال الربع ف العيد ، سير انته انا مب ساير . .
ناصر : شو مب سااير ،! جمال عازمنا ع الغدا ف بيتهم . .
حمد : سير انته ، و عايده بداله . .
ناصر : بس يا حمــد . . .
قاطعته وانا أأشر بأيدي ، عقــب ،!
وظهرت من البيت ، ركبت السياره ولحقت سياره ابويه اللي متوجهه لبيتنا . .
نزلنا ، و انا احس اني مب قاعد اصدق اللي يستوي ف بنت بريئه مثل مهره . .
كل حد توجهه لغرفته ، راشد و موزه و خالد و عزه ، و مهــره ،!
وامايه انسدحت شوي ف الصاله ، خايفه عن حد يقرب عندها وهي تغفى عنهم . . اما ابويه سار عشان يسلم ع ربعه ويبارك لهم بأول ايام العيد . .
اما انا ، ف سرت غرفتيه . . فكره ترووح و فكره تودييييينيي . .
لين ما قمت من غير حاسيه ، و سرت ع طول غرفه مهره . . وحدررت عليها و سكرت الباب ورايه . .
شفتها يالسه ع السرير و قابضه التلفون ، و تدقدق عليه . .
حمد : شو تسوين ؟ . .
طالعتني بنظره صارمه . .
مهره : اولا ما يخصك ، ثانيا داش علي الغرفه لا مستحى ولا شي ، تخيل اني كنت اتلبس ؟ . .
حمد : اظنني اذا كنتي تتلبسين ، بتقفلين الباب ما بتخلينه جذا مفتوح . .
مهره : فرضنا اني نسيت اقفله ،!
حمد : خلاص دشيت عليج ، وما تتلبسين فما له داعي كل ها المناقر . .
زمـّت شفايفها ، هي لين الحين اطالعني بنظره صارمه . .
مهره : انزييين ، شو تبا فكني . .
تقربت صوبها و مديت ايدي بهدوء ،
حمد : عطيني تلفونج شوي . .
حطت تلفونها ورا ظهرها ، وقالت بتساؤل . .
مهره : شو تبا فيه ؟ . .
عقدت حواجبي ،
حمد : بلاج خايفه ، ما بسوي شي بس ابا ادق ع ربيعي . .
مهره : واللي يدق ع ربيعه ، يدق من تلفون اخته ،!
حمد : لاحوول ، انتي بلااج انا ابا ادق من تلفونج ، ابا اسويله مقلب . .
مهره : مب ع حساب رصيدي . .
حمد : الله و الرصيد اللي عندج ، كلها درهميين . .
مهره : تخسيي قالولك حمد عنده فقر بالرصيد . .
حركت ايدي مره ثانيه ، و سويتلها حركه عطيني . .
حمد : عطيني انتي بس . .
مهره : احللف ما بتفتش . .
حمد : بفتشش شو يعني . .
مهره : الصور بعد شو ، كلها صور ربيعاتي . .
تقربت منها و بحركه سريعه ، سحبت التلفون منها ، و حمدت ربي انه ما كان مقفل . .
وقفت طبعا ، بس دزيتها و خليتها تيلس . . وانا سرت ايلس ع الكرسي . .
فتشتتت كلل شيييي ، كللل شييي ، وما لقيت غير اسامي بنات . . مافي اي اسم ريال . .
ف البدايه ، كنت بوقف و اعطيها التلفون . . بس بغيت صدق اشيك . .
و ما لقيت الا ها الحل . .
دقيت ع رقم رقم ، و من اسمع صوت بنت اسكر ع طول و ادق ع الرقم الثاني . .
لين ما يانني صوت ريال و مسجل بأسم ( عليا ) . .
الريال : ما بغيتي يا مهره ، الحين مخليه بنت عمج ادقلي عشان تبلغني انج بتقطعين علاقتج وياي ، ههه شو لقيتي حد ثاني . .
ع طول سكرت ، و طالعت مهره الخايفه ، و منزله راسها . .
شو اسوي فييها ؟؟؟؟؟؟؟ . .
شووو اسووووويييييي !!!!!!!!!!! . .
عقييت التلفون ع الارض ، عند ريولها . . وهي حطت ايدها ع حلجها و شهقت بخوف من الصوت . .
وقفت جدامها بضبط . . وهي ع يلستها ف السرير و منزله راسها . .
ضربت ريلي بقهههر ، و قلتلها وانا راص ع اسناني . .
حمد : شوو اسوووييي فييييج ، شو اسوييي فييييج . .
و من غير ما احس ، قبضت شعرها وهي شهقت بصوت اعلى مره ثانيه . .
حمد : شوووووو اسوووي فييج يا مهره ، تبييني اذبببحج ؟ ، تبينييي اخببر ابوويه واخوااانج ؟ . .
قالت وهي ترتجف و قابضه ايدي عشان افج شعرها . .
مهره : بلاااك ، شوفيييك جذاا معصبب ، شو مسوييه انا ؟ . .
زيين انه دموعي ما نزلت فـ ها الوقت ، حاااس بناار بيوفي ما انطفت . .
مااااا انطففففتتتت ، وما اظن انها بتنطفي . .
خايف ع ابويه اذا درا عن سوات بنته ، و خايف ع امايه صاحبه السكر و الضغط . .
ابويه اذا درااا والله لا يحطها تحت السياره و يدوسها ساير و راد ، لين ما تنعدم . .
قلت بعصبيه . .
حمد : شو مسووووييييه ،!! ( ابتسمت ) الحين اراويج شو مسويييه . .
طالعتني بخوف . . ودموعها سكااابه ،!
وفجت عيونها ، اول ما شافتني طايح فييها ضرب . . شوي قابض شعرها و اضرب راسها ع اليدار ، و شوي اعطيها كم كففف ، واخر شي سويته سدحتها ع الارض ورفستها كم رفسسسه . .
بغيت اكمل و اكمل ، بس شفت انه دم ظهر من خشمها ، وانا حتى لو ابا اطيح فيها ضرب ، بس بعد ف نفس الوقت مابا حد يدري . .
رديت شعري ورا ، وانا حاس انه تكشش خلاص . .
وانفاااسي ، كنتتت الههههث الهههثث من التعب . . حسيت لو قعدت ثانيه وحده ف ها البيت ، بموووت ،!
شليت تلفونها ، و ع طول ظهرت من غرفتها و من البيت كاااامل ، !
لاني صدق كنت حاس اني بختنق . .
.
.
.
يتبع ، !

البارت " 13 "

.
.
.
.
.
.
.
اليوم : الخميس . .
المكان : بيت بو راشد . .
الساعه : 9 المسا . .
.
( خالد ) . .


باركت لنااصر ، وعطيته كم نصيحه ، وكم تهديد ههههه . . وهو ما وعدنا غير انه يصونها . .
واذا بخصوص عرسهم ، فـ هم بيقررون عقب ما يرجعون من البلاد اذا يسوون عرس ولا . .
وبصراحه حاس انهم ما بيسوون ، وما يباله الصراحه كل ها التكاليف ، بس كل بنت و رغبتها ف لبس الفستان الابيض ، وهاي رغبه عزه اكيد بعد . .
ابويه رفض ، رفض قااطع انه ناصر و عزه يختلون ف الميلس بروحهم . .
و طبعا عمي ما قدر يقول شي ، ولا حد قدر يقول شي اصلا . .
كانت الملجه بين العايله بس ، مافي حد من برااا ابــد . .
يلسنا ف الميلس وتعشينا ، وسولفنا . .
وعب ما مر الوقت ، كل واحد سار بيته . . دخلت البيت و انا اتنهد واشوف العايله الكريمه يالسه ف الصاله . .
خالد : مبرووك يا عزه ، . .
قال بهمس . . ويا دوب ينسمع الصوت . .
عزه : الله يبارك فيك . .
قام ابويه و طلب امايه ف الغرفه ، وتمينا نحن العيال ف الصاله . .
راشد : عقباالك يا خالد ، وعقبال ما نفتك من اصرار الوالده يطولي بعمرها . .
ضحكت بخفه . .
خالد : الله لا يقووول ، عقبال حمد ان شالله . .
راشد : لا حمد مشواره طويل ههههه . .
خالد : يصير خير لين عقب ،!
راشد : يعني مب ناوي الحين ؟ . .
قلت بصراحه . .
خالد : الحين ، مووول مافكر اتزوج ، احس الزواج هــم وانا مب ناقص همووم الصراحه . .
راشد : ههههه هذا كلامي قبل لا اعرس ، بس هااه الحين متزوج و مبسوط . .
عقدت حواجبي . .
خالد : الا وين موزه ؟ . .
تنهد راشد ، وهو يقوم من مكانه . .
راشد : موزه بغت ترد ويا امها ، تقول حاسه بأرهاق شوي . .
وظهر من الصاله ، ساير لغرفته . .
ما كملت عشر دقايق ، الا و الصاله فضت وكل حد راح لغرفته . .
يلست ع السرير بتعب ، و فصخت كندورتي و انسدحت ع السرير ، مسكت تلفوني اشوف شو اطرشلي . .
تأففت يوم شفت مافيه جرج ، فتحت الدرج ادور جرج بس ما لقيته . .
دورت ف الغرفه كلها ، ومالقيته . . مادريبه وين اختفى . .
ظهرت من الغرفه و سرت لغرفه مهره ، دقيت الباب ،
ودشيت غرفتها ، شفتها منسدحه ع السرير و الظاهر راقده ،!
تقربت منها عشان الحفها ، لاحظت ف يبهتها ورمه ، ومب اي نووع عووووده بعد ،!
و مستويه بنفسجيه . .
استغربت ، واصلا ما شفته انا غير الحين . . شو مستولها . .
حطيت ايدي مكان الورمه ، ومن غير قصد ضغطت عليها ، وكانت النتيجه نشت مهره مفزوعه و هي ترتجف . .
ابتعدت عنها شوي . .
خالد : انا انا خالد ، بلاج جذا ناشه مفزوعه و ترتجفين . .
طالعتني بعيون خايفه . .
مهره : شو يايبنك هنيه ؟ . .
خالد : ابا جرج حق تلفوني . .
تكورت ع عمرها و حطت ايدها ع يبهتها ، و حسيتها تحاول تخفي الورمه ، بس ما تدري اني شفته اصلا .
مهره : بتلقاه ف الدرج . .
فجيت الدرج وانا اسألها . .
خالد : من شو ها الورمه ؟ . .
طالعتها ، و شفتها تبادلني النظرات . .
مهره : طايحه ف الحمام ع راسي . .
ع طول لفيت كل جسمي صوبها ، وتقربت منها . .
خالد : اشوف ، اشوف . .
صدت عني وهي ماسكه يبهتها بقوه . .
مهره : لا ، مب لازم تشوف . .
خالد : الله يهديج ، خلني اشوفها يمكن محتايه المستشفى . .
تمت معانده ، و صاده عني . . ما بغيت اصر عليها . .
تنهدت وخذت الجرج و ظهرت من الغرفه . .
.
.
بعد اسبوعين . .
.
اليوم : الاربعاء . .
المكان : بيت بو ناصر . .
الساعه : 7 ونص الصبح . .
.
( شيخه ) . .


نزلت وانا شاله الهاند باق ، و شنطه ثانيه مختصه بالكتب . . و سرت الصاله ، وين محطوط الريوق ع الارض . .
امايه : صباح الخير اميه ،
كانت عيوني ع شنطتيه و انا ادور تلفوني ، وحدي مستعيله . .
شيخه : هلا صباح النور . .
امايه : تعالي تريقي . .
شيخه : لا مابا باكل ف المعهد هناك ، امايه بشكارتج وين ابغي اروح متأخره تراني . .
امايه : البشكاره ف المطبخ ،
شيخه : ياربيييه منها ، ما تفهم هذي متأخره وايد . .
امايه : ماعليه توها 7 ونص . .
شيخه : الشوارع يا امايه تراها ما تختلي ، زحمه من صباح الله خير . .
امايه : ماعليه ، ما بيصيبج شي لو تأخرتي شوي . .
شيخه : نوره و سيف ظهرو ويا ابويه ؟ . .
امايه : هيه يامييه ، قببل كان ناصر فديت روحه يوصلهم ، بس الحيين سافر وماندرابه متى بيرجع . .
شفت الخدامه يت من المطبخ ، و لابسه و جاهزه . . بست راس امايه بسرعه . .
شيخه : بيرد ان شالله وهو سالم غانم ، ويااه عزه متحسنه حالتها . .
ضربت ايدينها ف بعض . .
امايه : ان شالله ، يلا سيري . .
طلعت ويا الخدامه ، وركبت السياره ، وطول الطريج و عيني ع الجامه . .
وافكر بعزه المسكينه ، وقفت ها الكورس وهي حلمها انها تخلص و تشتغل . .
بس شو تسوي ، يمكن خيره لها . . وناصر يعلني ماذوق حزنه طلعت ف خاطره بنت عمه ، عمري ما فكرت انه عزه ف خاطره . . لانه هو طبيعته كتوم وما يحب يفضفض لحد . .
وصلت المعهد ، ونزلت شليت اغراضي ، ودخلت المبنى . .
مر يومي عادي ، من غير لا مشاكل ولا شي . .
و اول ما وصلت البيت ، سرت غرفتيه ادور السرير ،
بدلت ثيابي ، و عقيت بعمري ع السرير ، وما حسيت بشي . .
.
نشيت ع صوت التلفون ، وكرهت الساعه اللي ما حطيته سايلنت . .
قمت بكسل ، و طلعته من الشنطه المفروره ع الارض ، وما انتبهت للرقم . .
ع طول رديت وانا احكك عيوني . .
عزه : شواااخ . .
فجيت عيوني ع وسعها ، ع طول قمت وانا اناقز . .
شيخه : عزووه ، هلااا واللله براعيه المانيا . .
عزه : اهلييين ، يعلني فدا ها الصوت . .
شيخه : وييينج ما دقيتي من سافرتي ، لا انتي ولا ناصر قطعتونا اممررره . .
عزه : لين ما طلعنا رقم عااد ، المهم شحالج انتي شخبارج شو امج شو عمي عساه الا بصحه زينه . .
شيخه : كلنا بخيرو بصحه وسلامه ، بس مشتاقين لشوفتكم انتي و ناصر . . انتي شخبارج وشخبار ناصر . .
عزه : بخير يا عيون عزه انتي ، نحن بخير . .
شيخه : هاه ان شالله مرتاحه ،
عزه : الحمدالله ع كل حال . .
شيخه : ان شالله ناصر ما يضايقج ، اذا ضايقج بكلمه ما يردج الا لسانج قوليلي وانا اشوف شغلي وياه . .
عزه : لا فديته مب مقصر موول ويايه ، والله اني احس عمري مثقله عليه . .
ادري انها طلعت منها بعفويه كلمه ، ( فديته ) . . وابتسمت ع عفويتها ،
سمعت صوته ،
ناصر : شو ها الكلام يا عزه ، لو انج مثقله علي جان اشتكيت ،! بس انتي مب مثقله علي . .
ضحكت . .
شيخه : ههههه شو ترمسين من وراه . .
عزه : سكتي عني ، سمعني شو اقولج . .
ناصر : هاي شويخ ؟ . .
عزه : هيه شواخ . .
ناصر : حطي حطي سبيكر ، خلنا نسمع صوتها الخبله . .
سكتنا كلنا ثواني ، و رديت سمعت صوت ناصر و هو ينعتني بكلمته المعروفه لي . .
ناصر : يا الهبــله . .
شيخه : حرمتتك . .
شهقت عزه ، بصوت عالي . .
عزه : شواخ ، ماعلييه ماعلييه . .
ضحك ناصر ، و فرحت لاني سمعت ضحكته اللي تفتح النفس ، وترد الروح . .
ناصر : مارضى ترا عليها ،
شيخه : ههههه انزين . .
وخذتنا السوالف ، ومن رمستهم عرفت انه ها الاسبوع كان كله سياحه و تمو يحوطون ، وباجر عندهم اول موعد ويا دكتور الماني مختصص لعمليات التجميل ،
تمنييت من قلبي انه عزه ، تفتك من همها و دعيت ربي يفرح قلبها و قلب ناصر ، و نشوف عيالهم . .
.
.
.
اليوم : الجمعه . .
المكان : بيت بو ناصر . .
الساعه : 2 الظهر . .
.
( عيسى ) . .


ابتسمت بقهر ، وانا اوايج عليها وهي ف المطبخ ، قاعده اتجهز الشاي الاحمر ،
عشان نخفف ع عمارنا عقب الغدا ، و نشربه . .
مادري شو اللي شدني اني ادش و اسلم عليها ، بدال ما تقعد تغني جذا بروحها . .
عيسى : سلام عليج ، يا شيخه . .
التفتت صوبي بعيون خايفه ، و عدلت شيلتها بسرعه . .
شيخه : انته شو مدخلنك هنيه ،!!!!
وسعت ابتسامتي ، واحاول اخفف القهر اللي بداخلي و احاول قد ماقدر انسى اللي سمعته . .
عيسى : رد السلام واجب ، يابنت خالي ،!
طالعتني بنظرات صارمه ، وردت طالعت الدله وهي تحطها ع الصينيه . .
شيخه : بس اظني يا عيسى ، المفروض ما تدخل المطبخ وانا موجوده ،!
طالعت الخدامات ، اللي يغسلون و عقب طالعتها . .
عيسى : اننا ما انفردت فيج ، اظني الخدامات موجودات . .
تحولت نظراتها لقهر ،
شيخه : بعد ، لو حد دخل المطبخ شو بيقول عنااا ، ترا نحن مخطوبين مب متزوجين . .
ابتسمت و رصيت ع ضروسي . .
عيسى : ثمني رمستج يا شيخه . .
شيخه : شو قلت انا ، شو بيقولون عنك البشاكير جيه داش و داق سوالف ويايه ،
وصلت حدي من رمستها ، و جنها تشككني بأخلاقي . . تقربت منها وانا مفووول ، وماشووف شي جدامي . .
مسكت ذراعها ، وهي اطالعني بعيوني خايفه . . رصيت ع ضروسي ،
عيسى : لا تتوقعين يا شيخه اني غافل عن مشاعرج اتجااه خالد ، بس احتراما مني لج ، ساكت وما قلت اي كلمه بشووف معاملتج هذي لين وين بتوصل . .
ونفضتها ، و ع طول ظهرت من المطبخ و ركبت سيارتي . . و تميت استرجع انفاسي ،
واسترجع اللي صار من شوي ، هل صح اللي سويته ولا غلطت ،! . .
شفت خالد يتقرب من سيارتي ، حسيت مب طايقنه شغلت سيارتي و مشيت عنه . . ومن المرايه شفته منصدم من اللي سويته . .
ومب بس جيه . .
منصدم من سرعتيه الزااااايده ،
مب عارف وين اسير بالضببط ، ومب عارف انا ويين اصلا . . كل اللي اعرفه انه سرعتيه فوق المحدود . .
وكم رادار مسكني ، بس ماهتميت . .
لين ما شفت لافته مكتوب ، ( العيـن ) . .
ويين طررت انا ، انتبهت ع التلفون اللي ما وقف ابد . .
مسكته ، وشفت اسم ( خالــد ) . .
رديت عليه و صرخت ،
عيسى : شو تبااا ،!
قال بهدوء . .
خالد : عيسى خفف السرعه ، ووقف السياره . .
قلت بطنازه . .
عيسى : ليش لهدرجه مهتـم . .
خالد : شو ها الكلاااااام ؟ ، اقولك وقف السياره و قولي انته وين انا ياينك . .
عيسى : جهننم ، بتخاويني ؟ . .
خالد بصرامه : عيــــــــسسسسى ، خل عنك الرمسه الفارطه ،
عيسى : بفضيلك الجوو يا خالد ، و بخليك تستانس وياها ع راحتك . .
خالد : منو تقصد . .
عيسى : تعرف بنفسك . .
مادري شصار عقب ، ما شفت غير سواااد يغطي عيوني . .
.
.
.

البارت " 14 " والاخيــر

.
.
.
.
اليوم : الجمعه . .
المكان : المستشفى . .
الساعه : 9 المسا . .
.
( خالد ) . .


انشلت ريلي ، احسني عاجز عن الوقوف ، حاولت اثبت عمري و اساند عمري ع اليدار ،
بس مافي فايد ماشفت عمري الا طايح ع الارض ، ع طول قبضني حمد . .
حمد : خالد قوم قوم ويايه ،
بالغصب قمت ، و يلست ع الكرسي ،
اخفيت ويههي بين كفوف ايدي ، و انا اتنفس بصعوبه . .
حمد : خالد الله يهديك اذكر ربك ، و كلنا ماشين بها الطريج . .
رفعت راسي ، و اشرت ع الدكتور الواقف ، وانا اطالع حمد . .
خالد : انت ، انت لايكون مصدق رمسه هذا ،! ( هزيت راسي بنفي ) لا ، لا يا حمد لا تصدق رمسته ، يجذب عليك صدقني . .
نزل راسه حمد ، وهو يهزه بأسى . .
حمد : لاحول ولا قوه الا بالله ، لاحول ولا قوه الا بالله . .
رديت ويههي وخشيته بين ايدي ، و دموعي سكااابه ، وشهقاتي تنسمع . .
سمعت حمد يرمس ابويه ف التلفون ، و يقوله عن الخبر . . ع طول صرخت ع حمد . .
خالد : قلتلللك جذاااااااب ، جذاااااااب ما تفهم . .
طالعني حمد بلوم ، و قال كلمتين لابويه و عقب سكر التلفون . . ويلس عدالي . .
حمد : فرضنا انه يجذب ، ليش ها الدموع اللي تنزل ،ّ
صديت عنه ، ما قدرت امسك دموعي ابببد ،
بعد ما مر الوقت ، سمعت صوت عمتيه و هي تتحسر و تصيح بصوت عالي . . و ريلها يحاول انه يهديها بس ،
ام تفقد ضناها ، شو تتوقعون تكون رده فعلها . .
عمتيه : عيسى ماااااااات ، ماااااااات يا سعيد . .
عيسى مات ،!
عيسى مات ،!
عيسى ، عيسى رفيج العمر ، وعديل الروح ، مااات ،!
يعني ، صدق اللي قاله الدكتور . .
عيسى مات ،!
حطيت ايدي ع اذوني ، عشان ما اسمع عمتيه وهي تصيح و تنعت بأسم ( عيسى ) . .
بس مب قاعد يختفي صوتها ، قمت بسرعه ، وسمعت حمد يزقرني . . بس ما عطيته مجال . .
ظهرت من المستشفى ، و ركبت سيارتي . .
وانا احول افكر بصدق كلامهم ، ولا ؟ . .
.
.
بعد مرور سته اشهر . .
.
اليوم : الاثنين . .
المكان : بيت بو ناصر . .
الساعه : 4 العصر . .
.
( شيخه ) . .


سرت المطبخ ، حسيت ها المكان يذكرني فيييه ، و يلوومني ع كلامي الجاسي . .
يلومني ع اسلوبي ، و قله ادبي ع عيسى ( ربي يرحمه ) . .
و يلومني ، ع اني سبب في وفاااته ، !
هيييه يا عيسى ، سرت و خليت الكل يذكرك بالخير ، و يصيــــحك ،!
و خليت حالت امك و اخوانك ، ما تسر مول ،
وخليت خالد ، ربيعك يلوم عمره ، ما يدري انه انا السبب ف كل شي . .
سمعت نوره تنعتني . .
نوره : شواخ ، تعالي ابويه يباج تسلمين ع خالد ، باجر الصبح بيسافر العمره . .
تنهدت بضيج ، و ظهرت من المطبخ بسرعه ، قبل لا تخوني دموعي . .
كان واقف جدام سيارته ، ويسلم ع امايه و ابويه وسيف اخويه . .
وانا و نوره انظمينا وياهم . . و ودعناه ،
خالد : نسيت تلفوني ف الميلس ، بسير ايبه . .
ابويه : لا لا خلك ، شيخه بتسير تيبه .، ( التفت ابويه صوبي و هو يأمرني ) سيري هاتيه يا شيخه . .
لبيته ، و سرت ميلس و قعدت ادوره ، ما لقيته ، دورته بين المخدات ماريييته . .
انصدمت يوم شفت ، خالد داش بسرعه و كندورته خايسه دم و يركض لين المغاسل . .
وقفت محتاره ادخل و اشوف شوفيه ، ولا اتم مكاني ؟ . .
وع وقفتيه ، دقايق وهو طالع من الحمام و يمش ويهه ب الكلينكس . .
طالعني بحزم و صرامه ، وسار لكرسي و طلع تلفونه من تحت المخده . .
تقرب مني ، و حسيت من عيونه و ملامح ويهه ، انه ما بيحصل خير . .
قال بهمس . .
خالد : ع اللي سويتيه ف عيسى ، عمري ما بسامحج يا ، شيـــخه ،!
وظهر ع طول ،
حسيت انه يوم تجدم مني ، انفاسي انقطعت وجنه قابضني من رقبتيه و يمنعني اني اتنفس . . و اول ما ظهر رجعت انفاسي . .
تنفست بعمق ، و دموعي ها المره خانتني . .
.
.
.
اليوم : الثلاثاء . .
المكان : مكه ،
الساعه : 7 ونص المسا ، بتوقيت السعوديه . .
.
( خالد ) . .


حدرنا انا ، وسالم ربيعي الغرفه ، ونحن نتسابق ، بمنو يدخل الحمام قبل . .
بما انه تونا مخلصين عمرتنا ، و عمره مقبوله بأذن الله . . لازم نريح جسمنا بسبوح محترم . .
سرنا نحن و مجموعه من الشباب للعمره ، عشان نكفر ع ذنوبنا . .
وبنفس الوقت ، ابويه اصر عليه اني اسير وياهم عشان اريح عن عمري ، وادعي لعيسى بالرحمه . .
وبالفعل ، حسيت عمري مرتاح نوعا ماا ،
تسبحنا و ريحنا عمارنا ، و عقب التمو كل الشله ف غرفتنا ، يايبين العشا . .
لانه نحن تعبانين ، ومافينا ننزل تحت و ناكل من مطاعم . . ف طلبنا من مطعم اييب لنا لغرفنا . .
كلنا ، ومع شويه سوالف عن مواقف صارت ف الطوفان و السعي ، ونزلنا الحرم يوم سمعنا آذان العشا ، صلينا و ردينا عقينا بعمارنا ،
لين اليوم الثاني ، ع آذان الفير . .
صلينا ف الحرم ، و يلسنا شوي ندعي و نقرا قرآن . . لين ما اشرقت الشمس ، صلينا الضحى ، وردينا الفندق . .
خطرت ف بال الشباب انه نسير المدينه ، و نغير الوجهه بما انه اعتمرنا الحمدالله . .
وعيبتهم الفكره ، شلينا اغراضنا و سرنا المدينه . .
وفي مسيد مرينا عليه ، كان مجموعه ملتمين ف نص ، و واحد يعطيهم محاضره دينيه . .
ومن بين الكلام اللي قاله ،
الريال : كل ما يصيب المسلم خير ، سواءاَ كان ازعجه ام لم يزعجه كل ما يصيب المسلم خير . . انته خلقت للجنه ، واضح ،! وحيانا الله يرسل عليك البلايا لتنعم بها ف الآخره ، اعطيكم مثال ، كـ مثال بسيط الكلام الذي يؤذيك ف الدنيا ، فلان قال عنك كذا ، فلانه قالت عنك كذا ، الكلام الذي يؤذيك هذا فـ الدنيا هو الذي يسعدك ف الآخره ، المصائب التي اصابتك في صحتك و آذتك هذه المصائب ستسعدك في الآخره ، لهذا الذي ينظر لآخرته لا يكترث في حياته ، مهما اصابه ، حتى الملوك تصيبهم النوايا ، ان لم يصبه فقر ، اصابه مصيبه الموت ، مصيبه المرض ، مصيبه الهم ، مصيبه الحزن ، لا احد يسلم في الدنيا اعطني رجل سلم من الدنيا ، الدنيا جاءت لك عدو ، والشيطان عدو ، و نفسك عدو ، و الان بالانس عدو يريدون انه يصدوك عن الحياه الآخره ، ولا تظن انه الدنيا ستسلم فيها ، بالعكس اكثر الناس وثوقا في الدنيا ، اكثرهم الدنيا له غدر ، لهذا الدنيا لا تغدر الا من اطمئن بها ، لهذا ما اصابك من مصيبه فـ الله عز وجل شأنه سيكافئك عليها فاصبر و احتسب . .
( وسيم يوسف ) . .
بعد المحاظره ،
سرت للريال و قلته عن اللي صارلي ، وعن وفاة عيسى . .
ابتسم ، وقالي كلام ريحننننييي . . وانه هذا قدر ومحد يروم يغير مجرى القدر . .
وتمينا ايام في المدينه ، وعقب رجعنا جده ،
عشان طيارتنا . .
.
.
بعد مرور اربع سنوات . .
.
.
.
اليوم : الاربعاء . .
المكان : في شوارع باريس . .
الساعه : 10 الصبح بتوقيت فرنسا . .
.
( عزه ) . .


نزلنا من السياره ، و تميت اشوف برج ايفل بفرحه . . اول مره اشوفه صدق جدامي . .
طالعني ناصر ، وهو فرحاان . .
ناصر : هاه تبين تروحين فوق . .
طالعته و انا اشهق . .
عزه : تباني امووت شوه ، لا خلنا جذا نطالعه وايد احسن ، شو يودينا فوق . .
اشر ناصر ع اللفت اللي ف البرج . .
ناصر : شوفي شوفي كيف الناس سايرين فوق ، يلا عزووه بنسير . .
ابتعدت عنه شوي . .
عزه :لا لا مابغي ، قوم عني تبا تسير ، سير روحك انا مب سايره وياك . .
تنهد . .
ناصر : ويا ها الراس اللي ما يليين ، قومي انزين بنتصور هناك . .
تمينا ناخذ كم صوره ، و تصورنا و جذا . .
وعقب ردينا ركبنا السياره ، و سرنا شارع شانزيليزيه ، اللي موول ما عيبني . .
كان زحممه ، وكله عررب ، وانا بصراحه يوم اسافر ماحب اشوف عرب . . و اللي ما عيبني اكثر انه كله محلات ماركات . .
بالغصصب ، لقينا مكان ف كوفي عوود . . طلبنا كوفي ويا كيك . .
وقعدت اصور ، و احط ف الانستقرام . . و اطرش حق شويخ اللي اكيد اكيد منقهره ههههه . .
نحن عرضنا عليها انها تسافر ، بس هي رفضت ، وتقول انه مافيها . . وع قولتها ما تبا تخرب علينا . .
حوطنا شوي في الشارع ، ودشينا كم محل بس ما تشرينا شي ابد . . و ركبنا السياره و رجعنا للفندق نريح شوي . .
ناصر : انا برقد شوي ، وعيني بعد نص ساعه عشان اغديج ف مطعم حلو . .
حست بوزي ، وانقهرت انه بيرقد . . قمت و نقزت عداله وانا اهزه . .
عزه : ناصر قوووم ، بسك رقااد يلاا عااد . .
حط المخده ع راسه و عطاني ظهره . .
ناصر : عزه لا تحنين ، بروحج موعتني من الصبح عشان تروحين برج ايفل . . والحين وديتج مستكثره علي ها الراحه شوي . .
هزيته اكثر و عاندت . .
عزه : انزين نحن مسافرين عشان نحووط ، مب عشان نرقد كل ما وصلنا الفندق . .
طالعني بطنازه . .
ناصر : وان شالله تبيني اتم نااش لعيونج ، قومي عني و خليني ارقد ها النص ساعه ع الاقل . .
عزه : يعني يكفي امس الفليل بطوله ، ظاهر و مخلني ف الفندق بروحي . . والحين بترقد ، ليش مسافرين نحن ؟ . .
بس سحب علي و رقد ، تأففت وسرت الصاله . . وتميت اسولف مع ربيعاتي و اقولهم عن السفره الحلوه ( وانا ف خاطري المنحوسه ) . .
حاولت اليوم اذذكره انه عيد ميلادي ، بس حسيته ابد مب متذكر ، حد ينسى عيد ميلاد زوجته ؟؟ . .
مرت يمكن ساعه ، وانا قابضه التلفون ومب منتبهه . .
لين ما ياني صوته ، وهو مليان رقاد . .
ناصر : يوم اقولج نص ساعه ، مب تخلينها دبل . .
طالعته و عقب انتبهت للساعه . .
عزه : اسفه ما انتبهت ،
ناصر : مب مشكله ، قومي يالله بنتغدا حدي يوعان . .
عزه : لحظه شوي . .
لبست شيلتي و عدلتها ، و زدت من المكياج شوي ، وشليت شنطتيه و ظهرت وياه . .
تمينا نمشي ، وايدينا بالغلط تلامس بعضها . . وانا وهو مستحين . .
لين ما وصلنا المطعم ، و استغربت اكثر انه فاضي . .
عزه : ناصر ، الظاهر المطعم مب شي . . مافيه حد فاضي . .
ناصر : اندووكم ، بوي انتي هذا المطعم احسن مطاعم ها المكان . .
عزه : وين احسن مطاعم ، ماشوف فيه حد ،
ناصر : راقدين راقدين ، تعالي نيلس . .
يلسنا و طلبنا اللي نباه ، شوي والا اسمع مجموعه عوده يغنون . .
( هابي بيرث داي تو يو ، هابي بيرث داي تو يو ) ، وغنو بالفرنسي بعد . .
وقربو الكيك ، وعقب راحو ، نفخت الشموع وانا الفرحه غامرتني . . قرب ناصر صندوق . .
ناصر: كل عام ونحن لبعض ي الغاليه . .
فتحت الصندوق ، وكان عقد راقي . .
طالعته وانا ابتسم و ادعي ربي . .
انه ما يحرمني منه . . ♥
.
.
.
اليوم : الخميس . .
المكان : بيت بو ناصر . .
الساعه : 4 الفير . .
.
( شيخه ) . .


مسكت موزه ، وتميت امشيها من الممر لين اخره ، وكم مررره . . وانا بس ادعي انه عووق و بيروح ان شالله . .
مسكت بطنها ، وهي تتويع . .
موزه : ماقدر يا شوااخ ، قاعده اقولج الالم يزيييد . .
شيخه : شو تبيني يعني اسوي ،!
موزه : شو تسوييين يعني ، تمنظري فيني بس ، دقققي ع راااشد شفييييج . .
وصرررخخت بصووت عاالي . .
شيخه : حسبي الله عليج ، الحين ابويه بينش ع صرييخ البقره هااي . .
و بالفعل ، نشو ابويه و امايه ،
ابويه : خير اللهم اجعله خير . .
شيخه : خير خير يا ابويه ، بس الظاهر بنتك ياها الطلق . .
امايه : اي طلق ، وانتي باقي عليج اسبوع ع ولادتج . .
شيخه : لا لا ، شكله اللي ف بطنها مب متحمل امه خير شر . .
وصرخت موزه مره ثانيه . .
قام ابويه ، و ياب السويج ، وامايه وانا لبسنا عبينا و ركبنا السياره ع صريخ موزه . .
وصلناها المستشفى ، و دخلوها غرفه الولاده ، و دخلت وياها امايه ، وانا و ابويه تمينا يالسين ندعي انه الله ييسر عليها ولادتها . .
دقينا ع راشد ، وبلغناه عن حرمته انه بتولد ، ربع ساعه ما كملت والا ياينا وهو يركض . .
راشد : ولدت ام احمد ؟ . .
انا و ابويه طالعنا بعض ، وعقب طالعنا راشد . .
ابويه : يعني كل ها المده ما تبون تبلغونا انه موزه بتيب ولد ؟ . .
راشد : هههههه شو نسوي عاد ، ما بغينا نخبر حد نسويها مفاجاءه . .
يلسنا نتريا . . ومر الوقت ، لين ما طلعت امايه وهي تبلغنا البشاره . .
امايه : مبروك علييك الطارش يا راشد . .
راشد : الحمدالله يارب ، الله يبارك فيج يا ام ناصر . .
ابويه : يتربى ف عزك يا ولدي . .
راشد : امين يا عمي ، خلني ابلغ الاهل بس . .
ابتسمت وانا اشوف راشد ، نسخه من خالد . .
عسى ربي يحفظ خالد ، اللي طول الغيبه ف سفره . .
طلعو موزه ، و ودوها غرفتها . .
وعقب التمو كل العايله ف الغرفه ، وهم يباركون لموزه . .
ياب راشد ، التوزيعات اللي موزه موصيه عليها و طالبتنها من وحده من الانستقرام . . و مكتوب عليها ( احمد ) . .
و قمطو احمد ، و لحفوه بلحاف مكتوب عليه بعد ( احمد ) . . وكانت غراش الماي ملصقين عليها اسم ( احمد ) . .
يعني موزه ، كانت مجهزه لمولودها الاول من كلل شييي . . ثيااب و توزيعات و كل شي . .
وعسى ربي ما يحرمها من ولدها ، ولا من راشد . . ♥
.
.
.
اليوم : الخميس ،
المكان : المستشفى . .
الساعه : 11 الصبح . .
.
( حمد ) . .


فرحت يوم سمعت بخبر المولود اليديد ، ف عشان جيه كنسلت روحه الدوام و طلبت اجازه لليوم . .
وصتني امايه ، امر ع مهره اللي قاعده روحها ف البيت . . ع طول مريت عليها ،
وحسيتها جد متوتره لانه نحن مع بعض بروحنا . .
ع اللي صار اخر مره من اربع سنين ، و الضرب اللي ضربته اياها . . صارت علاقتنا متوتره ،
مافي اي احتكاك من بينا . . حاولت قد ماقدر انه ترجع علاقتنا ببعض طبيعيه . . وننسى اللي صار ،
بس كل مره احسني عايفها ، وماطيقها ع اللي سوته . .
ها المره ، لازم صدق انسى اللي استوى . . مهره كبرت ، واظني ف هذيج الفتره كانت تمر بلحظه طيش . .
وما كانت كبيره بما يكفي عشان الومها ع اللي سوته ،
اذا ربي يسامح ، ليش ما اسامح ع اللي سوته . .
وصلنا المستشفى ، وهي كانت لاصقه ف الباب . .
قبل لا ننزل ، مسكت ذراعها و منعتها انها ما تنزل . .
حمد : يا مهره ، اللي صار ماضي و المفروض ننساه . .
بلعت ريجها بخوف ، بس انا ابتسمتلها عشان اخفف الخوف . .
حمد : انا يا مهره اثق فيج ، اكثر من قبل بعد . .
فجت عينها ع وسعها . .
حمد : ادري بتستغربين ، بس انا واثق انج ما بتعيدينها ، كان درس لج و اكيد تعلمتيه . .
حسيتها ارتاحت شوي من كلامي ، وقعدت ارمس شوي لين ما خذت علي و هي رمست وياي . .
نزلنا و نحن بعدها السوالف ماخذه وقتنا ، و كنت اعطيها نصايح و قصص صارت لبنات انا تعرفت عليهن . .
دخلنا غرفه موزه ، و شفنا العايله قاعده ، و راشد ماسك تلفونه . . و شكله مسوي سكايب ويا خالد المسافر . .
هي يا خالد ، ما فكر فينا حتى . .
سافر من سنه بسبب شغله اللي ارغمه انه يكون ف امريكا لمده محدوده ، ومحد يدري عنه ، ما نتواصل الا بـ التلفونات و السكايب و غييــره . .
محد يقدر يلومه ، او يمنعه . . لانه بالنهايه هو كبير وفاهم و عاقل . .
وشكلها امايه بدت تشل فكره زواج خالد من بالها ، و تفكر فيني و ف زواجي . .
خالد من توفى عيسى ، تغيــر 180 درجه . . علاقته و يا عيسى كانت ينضرب فيها المثل ،
علاقه قويه ، متمسكه ببعضها . . والاحلى انها اخويه ،!
عيسى توفى ، و ترك ذكرى طيبه بقلوبنا ، نقدر نذكره فيها . .
التفتت ع نوره ،
نوره بعد ف الفتره الاخيره متغيره ،
مب شخصيتها ، او اسلوبها . .
لا ، شكلها تغير . . صارت تهتم ف نفسها اكثر ، هيه بنت جامعيه ما نروم نقول شي . .
تبغون الصراحه ،
انا مسامح نوره ، صحيح اللي سوته يعور القلب ،!
بس تظل بنت عمي ، واختي . .
تعلمت من طيشي ، انه ربي يجازي كل واحد . .
انا وعلاقاتي ويا البنات ، صارت ف اختي ، وصدق لي قالو كما تدين تدان . .
ف النهايه ، الكل ربي هداه . . ♥
.
.
.
اليوم : الخميس . .
المكان : في شوارع نيويورك . .
الساعه : 12 الفليل ، بتوقيت امريكا . .
.
( خالد ) . .


ابتسمت وانا اشوف ، احمــد ولد راشد . . كيف صغير و تمنيت لو اني موجود جان شليته ،
كنت ف المطعم و اتريا اكلي ، و ف نفس الوقت شابك ويا راشد ع سكايب . .
راشد : شوف شوف ولدي ، منو يشبهه اكثر انا و لا امه ؟ . .
ابتسمت . .
خالد : وين فيه ملامح ، توه صغير يا راشد يوم يكبر ان شالله بنشوف . .
راشد : ليتك موجود يا خالد ، جان فرحنا اكثر بشوفتك . .
خالد : يكفيك ولدك افرح فيه ، وانا حتى لو خلصت شغلي بعدني بتم لين ما اريح اعصابي . .
راشد : تعال دريت انه ناصر و عزه ، مسافرين فرنسا ؟ . .
خالد : هههه شفتها حاطه صور ف الانستقرام ، و رمستها شويه . . شكلها مرتاحه ويا ناصر . .
راشد : هيه الحمدالله ،
وراواني العايله ، اللي قاعده ف غرفه موزه ف المستشفى . . و ابويه من غير قصد حط الكيمرا ع شيخه ،
فرحت يوم شفتها كبرت ، وتغيرت من اخر مره شفتها . .
يا جماعه ، انا مسامح شيخه . . وهي مالها ذنب ابد بوفااه عيسى ،
هذا قدره و هذا يومه ، ومحد يقدر يعارض اللي كاتبه ربي . .
بس لو تنسى اللي ف بالها ، و تزوج ولد الحلال اللي يسعدها . .
لا لا ، شلو من بالكم اني اخذها ، لاني عمري ما افكر اتزوج اللي كان يفكر فيها عيسى ،
حتى لو توفى . .
بيظل ذكرى بقلوبنا ،
ما اقص عليكم ، شيخه دشت خاطري ،
بغيتها ، وما كنت برفض زواجي منها ، بس عيسى استعيل و خطبها . .
هذاك الوقت ، صدق حاولت انسى شي اسمه شيخه . .
عشان عيسى ،
اخو الدنيا ، ♥
يارب اجمعني فيه ف جناتك ،
.
.
.
اليوم : الخميس . .
المكان : بيت بو ناصر . .
الساعه : 8 ونص الفليل . .
.
( شيخه ) . .


ابتسمت ، لاني اطمنت انه خالد بأتم الصحه و العافيه ، !
واهم شي انه ، مريح اعصابه . .
ما اطلب منه شي غير السماح ، وان شالله مسامحني . .
واذا ع حبي لخالد ، هذا مب حب . .
يمكن كنت اميل له ، او من كثر هوسي لطاريه خلاني اوهم نفسي انه حب . .
ولا انا الحين كبرت ، واكتشفت انه ها الشي كان طيش ، ومافي من ها الشي ابد . .
سمعت صوت تلفوني واصلنه مسج ، وشفت رقمه فوق ( راعي امريكا ) . .
فتحت المسج و وسعت ابتسامتي . .
" بعد فرقاه يطمن بعدني عايش بذكراه . .
. . . . . . نسيته من حوالي عام وهو للحين يذكرني " . .
احترت بشوه اطرشله ، لين ما لقيت كلمات مناسبه لوضعنا . .
" ليالي الحب نطويها وخلي الحب لأهل الحب . .
. . . . . . نهايه وصلنا خيره سامحتك و سامحني "
دقايق ، ووصلنا مسج ريحني ، وخلاني ارقد من بعدها مرتاحه . .
" مسامحتج بنت العم " . .
رقدت و احلامي الورديه تراودني . .
: :
مسك ايدي وهو يهمسلي . .
خالد : دعيت ربي ، انه ما ياخذج مني ، يارب لا تحرمها مني . . فهي خالده بروحي ، وآنا بها . . خــالد ،! ( خالد الباتلي من كتاب ليتها تقرأ )
: :
.
.
.
تمـتّ ،!