|
شـكــ وبارك الله فيك ـــرا لك ... لك مني أجمل تحية . عالقصه الروعه |
[B] هلاااا .. [/Bانااا قـريت القــصه منتــدى ثاانــي .. وبكــمل لكــم بــاقي البــارتــات ... >>طبعـاً بنقلهــا من صــاحبــه القصــه وبرمســاتهااا بدون تغيــر .. الجزء الرابع الفصل الثاني =-=-=-=-=-= شلها سلطان وحطها في موتره السيت الخلفي وراسها ينزف .. وناصر وفيصل تموا فالبيت الي في المزرعه مصدومين ومب قادرين للحين يستوعبون شي من الي صار يدامهم.. سلطان كان فاقد حسيته الود وده يجلب بالموتر ويسوي حادث ويموت وهي تموت وياه ويفك العايله من المشكلة الي هم فيها... يلس عالسيت وتساند وصد عالكرسي الي حذاله كانت شما ياسه فهالمكان.. تذكرها وتذكر كيف كانت تصيح وتترجاه... واليوم هو في هالوقف الي مانحسد عليه... حرك موتره ومايدري وين يروح... مب قادر يفكر في شي .. سمع فاطمه تكح صد ورى وشافها تحاول تتحرك.. سلطان: انتي مامتي؟ فاطمة كانت تحس بعوار في جسمها من الضرب وتحس براسها ثجيل ماتقدر تتحرك.. بس سمعته وضايجها هالكلام وفعلا كانت تتمنى انها تكون ميته ولا انها تسمع هالرمسه.. شل سلطان التليفون لأنه حس يحتاج لمساعدة شخص .. اتصل في جاسم.. جاسم: ألوو مرحب والله النسيب.. سلطان تضايق زود يوم سمع صوت جاسم... آه يا جاسم انا السبب في هالمشكلة الي انا فيها ... الله راواني في أول انسانه كنت افكر ارتبط فيها ومن اهلي.. ضريت ابوي وبن عمي وهلي كلهم... جاسم: الووووو سلطان ؟؟ وياي انت؟ سلطان: هيه وياك بس اسمح لي كنت اركب السماعه جاسم حس بصوت سلطان متغير: سلطان؟؟ شو فيك؟؟ ليش صوتك متغير.. سلطان: جاسم انت وين؟ جاسم: انا في ميلس محمد ال(الفلاني)... سلطان: انزين بمر عليك وتعال وياي.. جاسم: خير الأهل شي فيهم؟ سلطان: لا بس انا قريب احين ياينك جاسم: خلاص تم.. من توصل اتصل بي بظهر لك فطوم من سمعت ان جاسم اخوها بيي بغت تتخبل.. حاولت اتقاوم العوار الي حاسه به وتنش.. شافها سلطان من المرايه: انثبري مكانج احسن لج قبل لا ايي واكسر لج عظامج زود.. خافت فطوم وتيبست مكانها... سلطان غصبن عنه نزلت دمعته: تدرين حسافة اللحظة الي فكرت فيها اني اخطبج واملج عليج بها.. ثرج ماتستاهلين.. الحمد لله ان عمي مات قبل لا يشوف بنته في هالحال.. فطوم: سلطان انت فاهم الموضوع غلط انا متأكده.. سلطان ماحس بعمره إلا يلف فجأة ويوقف الموتر على ينب ويصد صوبها: نعم؟؟ ياهل انا يدامج تقولين لي فاهم الموضوع غلط؟؟ انتي خليتي شي فيه يستاهل الفهم؟ فطوم سكتت ومارامت تكمل رمستها .. ورن تليفون سلطان كان جاسم الي متصل.. : ياينك انت على شو مستعيل على سواد الويه الي نحن فيه؟؟ جاسم انصدم : انت شو قاعد تخربط.. سلطان: انا عند لفة الميلس.. تعال برع.. جاسم: انا واقف برع اصلا ماهدا لي بال من وقت مادقيت.. بند الخط سلطان من وصل عند الميلس فعلا جاسم كان يترياه برع.. ركب الموتر وقعد: خير شو صاير طيحت قلبي؟؟ اي سواد ويه الي ترمس عنه؟ سلطان تم ساكت أشر بإيدة ورى.. صد جاسم ورى وشاف فطوم بهالحاله.. هو ماعرف الموضوع ولا حتى تخيل في لحظة ان الموضوع ممكن يكون شي كبير.. جاسم: فطوووم حبيبتي شو صاير لج.. سلطان: ماتستاهل كلمه حلوة هاي.. وترا الي هيه فيه انا سويته بها ... جاسم هز جتف سلطان: انت شو قاعد تقول سلطان؟ سلطان: قاعد اقول الي قاعد تسمعه احين.. اختك فضحتنا .. فشلتنا.. سودت ويهنا يدام الي يسوى والي مايسوى.. شو تباني اسويبها اصفق لها.. بس دخيلك احين لازم نوديها المستشفى نعالجها.. جاسم كأنه بدا يستوعب شوي وبس مب راضي يقتنع .. : بس فطوم كانت فالصالون شو يابها عندك؟؟ انا نزلتها بنفسي سلطان بأعلى صوته يصرخ: قولي لأخوج .. ليش ساكته... قولي له وين كنتي ومن وين يبتج.. جاسم بعده ماكان قادر يستوعب يحس براسه بينقع من العوار.. الدموع متيمعه في عينه مب قادر يمنع نفسه: قولي باباتي وين كنتي ؟؟ دخيلج قولي؟ فطوم من سمعت كلمه باباتي تندمت على كل شي.. : والله مالي ذنب .. هو قص علي والله انه قص علي قالي فيصل مريض وبين الحيا والموت ويبا يشوفني وانا ماكنت عارفه شو اسوي مادري كيف طاوعته وتفاجئت انه يايبني هناك وقص علي.. والله عمري ماسويتها هاي اول مره.. جاسم من سمع هالكلام وبصوت فطوم.. غمض عيونه ومسك مقبض الباب كان بيفتح الباب الا بسلطان يسحب ايده: انت تخبلت السياره تتحرك وانت تبا تنزل منها.. جاسم: احس عمري شفت كابوس وابا انش منه.. سلطان صد: انا ودي انش منه قبلك.. جاسم انا كنت فالمزرعه وقالو لي عندنا وحده وانت تعرف سوالفنا.. وادش اشوف فطوم يدامي جاسم من سمع هالرمسه ماعرف كيف يعفد السيت الوراني يوصل لفطوم عشان يذبحها.. يود فطوم وصفعها وكان يحاول يخنقها الا بسلطان يوقف الموتر في الباركن الخارجي لمستشفى خاص وينزل من الموتر ويسير ورى بسرعه ويسحب جاسم بكل قوته: مينووون تذبح اختك.. جاسم وبكل عصبيه: خلها تمووووووووووت اباها تموووت .. بشرب دمها .. بذبحها.. بند سلطان باب السياره وسحبه .. فطوم كانت تكح وحاطه ايدها على رقبتها وهي حاسه انها صدق شوي وبتختنق .. وتفكر شو بيصير في مصيرها.. شل سلطان تليفونه وكان يرمس ريال فيه يداوم في نفس المستشفى الي واقفين عنده عشان يكملون اجرائات علاجها دون تدخل من الشرطه لأن يبين على جسمها كدمات ضرب... وشوي يفتح سلطان الباب.. جاسم: تعالي.. تحركت فطوم شوي شوي عشان تطلع من الموتر.. الا وتحس بجاسم ايود ايدها بالقو ويسحبها.. سلطان تم يمشي وراهم وكل مايشوف فطوم يدامه يكرهها زود .. رن تليفونه وكانت شما الي متصله فيه.. سلطان: اااااااااه يا شما دخيلج لو تقدرين اتخففين عني شرات ماخففت عنج.. حط التليفون على السايلنت ورده في مخباته و مارد عليها.. ودخلوا وكملوا الإجرائات دون تدخل الشرطه عشان تتعالج.. واتفقوا يقولون لأم جاسم ان جاسم مسوي حادث وهو راد فطوم من الصالون وانها فالمستشفى حاليا.. ونفس الشي للباقي... وبعد فتره راح يفتحون الموضوع مع امها ويقولون لها الموضوع بس بطريقه أبسط يعني كأنهم بس سمعوها تكلم واحد فالتليفون ومن هالكلام.. عشان يبررون موقفهم ليش بيمنعونها من المدرسه.. .. .. .. .. . . .. ...... جلثم: ياربي هالبنت كل ما نزقرها تختفي وين مادري.. مججججججججججججججججججججد مجد وهي نازله من على الدري وأمها وراها: هاااااااااا جلثم: طاع هالويه انتوا... وينج من ساعه ازقرج لطيفه: كانت راقده.. مجد: مايخلون الواحد يتهنى في نومه.. جلثم: خلاص عيل برايج سيري كملي رقادج.. مجد شافت جيس على الكنبه شكله من محل تليفونها.. ربعت على الدري: نعم.. لا مافيني رقاد خلاص.. (حبت راس يدتها وعينها على الجيس) .. اشحالج ؟؟ انا متولهه عليج وايد اليوم جلثم: ههههههههه لوتيه والله.. شفتي الجيس مب لله تحبيني مجد ضحكت لأنها انكشفت.. جلثم: سيري شوفي التليفون اذا بيعيبج ولا لا.. سارت وفتحت الجيس وطلعت البكس.. وكان آخر تليفون نازل فالسوق شارلها اياه أحمد.. استااااانست من الخاطر.. وردته فالجيس وربعت عند يدتها وباست راسها : الله لا يخليني منج.. وربعت عالدري ودخلت غرفتها.. واتصلت في خلود.. خلود: هاااا توج صاكه عني من شوي.. شو ولهتي علي؟ مجد: ههههههه احمدو شرالي تليفون يديد.. خلود: شووووو.. وليش انا جاسم ماياخذ لي.. مجد: طاعو هاي انتي.. ليش ياخذ لج.. تليفونج مكسور ولا خربان خلود: لا بس جديم.. مجد: يلا يلا.. كانت مجد تسولف ويا خلود وتفتح الكرتون وهي اتطلع الي فيه شافت شي رسالة .. فتحتها .. : اقووول خلود بكلمج بعدين اوكي خلود: أحسن عشان ارمس ريلي ولهت عليه.. مجد: يلا جلبي ويهج.. وبندت عنها وبسرعه فتحت الظرف وقعدت تقرا الرسالة.. كانت مكتوبه بخط إيده.. ضحكت على خطه لأنه مو وايد مرتب وحلو.. كان كاتب جالس انافي وسطهم قاعد ولا أسمع حكيهم لاتحسب اني عندهم أنا معك بس جنبهم ماغير أناظر في عيونهم وأتخيلك في وسطهم سألني واحد بينهم وش رايك بكلامهم أحرجني والله قدامهم قلت العفو ياقلبهم ناقص"الغالي"بينهم ((بتلقين اغاني في الميموري كلهن اهداء مني لج)) استانست واااااااايد وحطت التليفون على الجارج عشان يتجرج.. ويلست تقرا الكلام مره وثنتين وثلاث.. حست انها فعلا تحبه... ابتسمت ويلست تتطالع التليفون وتشم البكس.. يااااي ريحة إيديه.. هههههه هبله مجووود جنج حبيتي.. ورن تليفونها كانت حور متصله فيها.. قعدت تسولف ويا حور شوي وبعدها بندت.. سمعت حشره في بيتهم .. شافت يدته ترمس أحمد شكله كان بعده عندهم.. بسرعه تعدلت ولبست شيلتها وتوها بتطلع من الغرفه تذكرت الرساله ابتسمت بخبث وشلت الرساله والميموري .. ونزلت وهي خاشتنهم في مخباتها.. وخطفت من الباب الخلفي صوب موتر احمد وكان الباب مفتوح وحطت فيه الرسالة والميموري على السيت.. ومن سمعت حشرتهم بسرعه بندت الباب وربعت دخلت الملحق وتمت تتطالع من الجامه.. لأنه كان شايل المخفي فسهل تشوف ردة فعله.. تمت تتطالعه وهو قاعد فالموتر تساند على السيت اول شي وبعدها دخل السويج عشان يشغل الموتر صد يمه شاف رساله والميموري.. صد حوالي الموتر كأنه يدور عليها بس مالقاها وهي تضحك من الخاطر على شكله كيف معصب.. وحرك الموتر بسرعه وطلع.. ياربي من هالإنسانه متى بتحس فيه.. دومها تكابر وتكابر.. تبا تبين انها ماتهتم بي غصب.. اقسم بالله لأطفر بج يا مجوود يا بنت عمي واخليج تتحرقصين في مكانج.. وطلعت مجد من الملحق وصعدت غرفتها وهي تغني ومستانسه من الموقف.. .. خلود: جاسم شو بلاك ماترد؟؟ جاسم كان ثاير لحظتها ورمسها بطريقه لأول مره يعاملها فيها: أخبرج حلي عني انا نفسي في خشمي... مشغول ماتفهمين.. خلود: انزين ماقلت شي بس احاتيك يعني .. جاسم : لا حول ولا قوة إلا بالله .. خلودووو خلي النفس طيبه عليج وبندي بلييييييييز بندي.. خلود: اوكي مع السلامه بندت الخط وهي حاسه بضيج أول مره يعاملها بهالطريقه اتصلت في مجد .. عشان تشكي لها عن الي في خاطرها.. مجد: هلا والله احين اكيد انتي الي ولهتي علي.. خلود والغصه محبوسه فيها: مجد جاسم كرهني خلاص مجد: شوووووووووو؟؟ تستهبلين انتي.. شو كرهج خلاص؟. خلود: اقولج كرهني مايباني... مجد: لا حول ولا قوة إلا بالله من هالبنتز.. بتفهميني السالفة ولا اييج البيت احين؟؟ وقعدت خلود تشرح الموضوع لها مجد: اخبرج انتي تافهه وسخيفه وغبيه... احين حاشره الريال من كثر مادقين وهو مشغول ماتبينه يحرج.. خلود: بس من صوته احس شي جايد صاير.. مجد: شو بيكون صاير ماصاير الا كل خير.. انتي عن التشائم هذا وخل عنج خلود: ان شاء الله يارب.. مايطلع الي انا حاسه به صح مجد: مابيطلع صح اتطمني وانا متأكدة.. المهم سمعي اخر الأخبار.. خلود: متفيجة والله مجد: يلا عاااد خليني ارفه عن نفسج عشان تنسين خلود: ههههه يالهبله انتي.. يلا قولي اشوف وقعدت تخبرها سالفة أحمد.. خلود: مجد انتي اتحبينه صح.. مجد وهي تحاول تكابر.: شووو احبه.. ماشي شغله احب احمدووو خلود: اخ لو يمي جان خليتج تتطالعين في عيوني وتقولين هالرمسه عشان يبين جذبج مجد: هههههههه اشوه عيل مب يمي.. خلود: خل عنج اتحبينه وعن التكبر ها وارحمي حاله المسكينه يحبج مجد: مابا ابا اعذبه شوي زيادة لين مايطفر ويخطبني هههههه خلود: هههههههه انتي شريره نواياج مستقبلية مجد: ههههههههه انزين يلا بسج سوالف وزين يوم ضحكتي والله استانست خلود: فديتج والله صدق انج بنت ابوج مجد: خخخخخ يلا جلبي ويهج وراي كوووووليج باجر.. خلود: اوكيك يا دكتورة مجد.. مجد: هههههه باي بندت الخط عنها ويلست تفكر اذا تتصل في جاسم ولا لا.. واخر شي قررت تتريا اتصاله عن ينزعج اكثر.. ... فالمستشفى اسعفوا فطوم وخيطوا لها الجرح الي عراسها والكدمات الي عجسمها لفولها اياه.. وقالو لازم اتم تحت المراقبة ليوم واحد جاسم: شووووووووو تنام هني.. لا وألف لا.. بترد البيت وياي احين الدكتور: U CAN TAKE HER BUT THAT'S WILL BE YOUR RESPONSIBALITY IF ANYTHING HAPPEN TO HER. جاسم: No problem I'll take care of her… سلطان: جاسم تبا نصيحتي خلها يوم واحد عشان الوالده ماتشك بشي.. جاسم: انت خبله.. هاي ماتتودر روحها فمكان خلاص.. سلطان: انزين انت بات عندها. جاسم:ماشتهي اشوف رقعة ويهها تقول لي اتم عندها.. مينون انت سلطان: ماعرفنا لك.. ترا السسترات عندها.. جاسم: اسف انا ما أمن... يت في بال سلطان شما.. وفكر انه يتصل فيها ويطلب منها اذا تقدر... : انا عندي وحده ضاممنها وزينه جان تباني اطلب منها تبات عند فطوم وتراقبها.. وهاي وحده ثقة لا تحاتي ماترمس يدام حد جاسم: لا بليز خل الفضيحة شرات ماهيه لا تكبرها دخيلك سلطان: تعرف شقايل خل الوالدة اتيي.. جاسم: المفروض جي.. عيل انت تم هني انا بسير البيت اييبها وبرجع.. Ok doctor we will leave her here… الدكتور: That’s fine… please sign the papers before you leave جاسم: ok وقع الأوراق وسار البيت على طول.. ورمس امه الي انصدمت باللي سمعته كيف صار الحادث وكيف جاسم وصل.. قال لها ان سلطان كان وياه فالموتر يوم مر على فطوم وسلطان وياها فالمستشفى احين وهو ياهم البيت عشان يبلغهم ويودي امه تبات عند فطوم.. أم جاسم: واعليه يا بنتي ماتستاهلين الي ياج.. جاسم في خاطره: حليلج يمي ثرج ماتدرين بسواد الويه الي حطتنا فيه.. وصل امه المستشفى وانتشر الخبر بسرعه فالعايله ان سلطان وجاسم وفطوم مسوين حادث.. وهي تعورت لأنها انفرت برع الموتر بعكس الباقي الي كانو رابطين حزام الأمان... والكل صدق الموضوع ومشت عليه.. عاشت فطوم هاليومين من عمرها كابوس كبير مب قادرة تنش منه... ولا قادرة حتى انها تتطالع في عيون اخوها تحس به ناقمنها.. الكل يزورها ويتحمد لها بالسلامه... سلطان فهاليومين انشغل ويا هله وربشتهم.. وكان منقطع عن ناصر وفيصل الي هم كانو خايفين حتى يتصلون فيه.. لأن الموقف جدا صعب.. وشما كانت كل ماتتصل به مايرد عليها.. فوقفت عن اتصالتها حست انها ثقلت عليه.. .... .. .. .... في بيت فيصل (زوج نوره) انتشر خبر ان ولد خالد الصغير مصاب بالثلاسيميا فيصل: مايشوف شر ان شاء الله .. مايستاهل عمار... خالد: شو تبا تتشمت احين مب زين عليك ربك بيبليك.. عادل: ابا اعرف شي واحد انت ليش حاطك دوبك ودوب فيصل.. تراه اخوك من امك وابوك اذا ناسي اذكرك خالد: شو فيكم انتوا ماتتحملون الصراحة.. لازم الواحد يجامل و يجذب عشان تصدقونه .. شو هالحاله فيصل: خله على راحته يا عادل.. ولا تحاتي مب من طبعي اتشمت في حد.. ترا ولدك حسبة ولدي خالد: ههههه لازم ترا مرتك مايابت لك الولد من جي اولادنا تحسبهم اولادك عادل هز راسه ويذكر الله ويتعوذ من ابليس.. اما نوره فنشت على طول وصعدت صوب غرفتها.. صد صوبها خالد: هههههههههه ها زعلتي .. تعالي اسولف وياج.. فيصل تم منزل راسه متضايج وساكت يحترم اخوه العود... عادل: انت مابتتعلم أبد خالد: اخبرك انت حل عني مستوي لي واعض شو قلت انا احين.. ماغلطت بشي... صدق بعد شو .. ترا ماعنده غير بنتين... عادل: بعده شباب هو مرته والله كريم وبيرزقهم ان شاء الله خالد: انزين فكنا عاد.. يوم ان فيصل مب زعلان انت ليش زعلان سكت فيصل ونش من الميلس سار يشوف نوره.. ودخل غرفته شافها ترقد بنتها.. فيصل: زعلانه نوره باباتي.. ابتسمت له نوره: فديتك تعودت ماقام يزعلني هالشي.. فيصل: اشحالها بنت عمج.. طلعوها ولا لا.. نوره: هيه حليلها طلعوها احين ياسه فالبيت.. تقولي امها انها ماتبا تروح المدرسه .. مادري شو ياها فيصل: ههههه يمكن من الضربه الي عراسها.. نوره: ههههههه خس الله ابليسك.. فيصل: فديتج انتي والله اموووت فيج.. نوره: امممم بس فيصل: اعشقج اتخبل عليج.. نوره: انا خاطري اعرف شي واحد.. كيف خطبتني؟؟ شايفني ولا شي؟ فيصل: امم انتي يوم خلصتي الثانويه اتحيدين يوم ييتي الشرطه عشان فحص البصمات وهالسوالف... نوره: هيه... فيصل: منو الي كان واقف حذال الشرطيه الي تسوي لج البصمات نوره: مادري بس...... لا يكون انت؟ فيصل: ههههههههه هيه انا ومن شفتج فز قلبي... عاد حفظت اسمج من البيانات نوره: هههههه لوتي ثرك مب هين.. لو دريت جان تكشخت وتعدلت فيصل: هههههه لا دخيلج اذا كنتي مسويه جي كنت بموت وانا واقف في مكاني.. نوره: ههههههههههه فيصل: يعل ربي لا يخليني من هالضحكة... .. .. .. في بيت عبدالعزيز كانت مجد ياسه ويا امها ويدتها وخلود وياهم يسولفون.. خطف عبدالعزيز فالصاله وبكل عفويه نشت مجد ورمست.. مجد: ابوي انا في حد خاطبني.. الكل صد صوبها.. جلثم: مقوات هالعين... ماتستحين.. بنات اخر زمن.. عبدالعزيز تم مبهت يطالعها: وليش هالسؤال؟ مجد : ماشي بس ابا احس اني شرات البنات انخطب وجي ... حسسوني اني بنت بمووووووت شو ها الكل تم يضحك على هبالة مجد وعفويتها فالكلام.. جلثم: عنلاتج عيل شو انتي مب بنت؟ مجد: ههههه بلا.. بس جي غير يوم اعرف اني انخطب عبدالعزيز: خلج فدراستج وخل عنج سوالف الزواج.. تو الناس عليج مجد: هههههههه اوكي يا سيدي دنته تأمر الكل ضحك وردت قعدت مجد وياهم تسولف جلثم: ها ان شاء الله راضيه على التليفون الي خذه لج أحمد؟ مجد: هو زين يمشي الحال.. لطيفه: طاعو هاي تتشرط.. شاري لج ايدد تليفون شو تبين زود.. مجد: ههههه مابا شي غير اني اغيض بيدوتي.. هههه جلثم: يالله بالستر ليش عدوتج انا.. مجد: حشى علي انتي حبيبة قلبي.. . . .. نرجع لسلطان .. انجبر يقول السالفة لأمه عشان تعرف وتراقب فطوم... حليلها انصدمت.. بس قلب الأم حنون على عياله لو شو ماصار.. وهي طبعا ماعرفت بالموضوع الأساسي الي عرفته هو ان فطوم لها علاقة بشاب.. ومنعوها من روحة المدرسة.. حاولت فطوم ان يخلونها فالمدرسه بس جاسم معند انها ماتكمل دراستها واتم فالبيت... سلطان حالته ماكانت تسر لا عدو ولا صديق.. مايرمس حد من هله وهم مب عارفين شي بالموضوع.. ومب فاهمينه.. ويحس بهم مكبوت على صدره مايقدر يطلعه لأي شخص فهالكون... منى اخت فطوم.. ماعرفت بالموضوع بس اقنعوها ان فطوم ماتبا تروح المدرسة من نفسها.. خلود كانت متضايقة من تجاهل جاسم لها بس كانت تعذره عشان فطوم.. ومن اول يوم سمعت بالخبر وخلال هاليومين وهي تزورهم.. سلطان: نعم شو تبين؟ خلود: سلطان انت وجاسم مب طبيعيين فيكم شي؟ سلطان: يابنت الحلال شو بيكون فينا؟ خلود: مادري بس انتوا شي بلاكم سلطان: لالا ماشي لاتحاتين خلود: تدري اليوم ياني رقم غريب ماعرف منو.. سلطان: وين اشوف؟ مدت ايدها خلود بالتليفون وعطته لسلطان.. اطالع سلطان الرقم وفج عيونه: اخبرج ها اول مره اييج؟ خلود هزت راسها بمعنى هيه.. سلطان: ورديتي ؟ خلود: لا مارد على ارقام غريبه سلطان: شوفي اذا ردت اتصل ردي وشوفي منو... واذا كانت حرمه واسمها عفرا سايريها ومشيها فالكلام يمكن تسألج اذا معرسه او مرتبطه او شي من هالكلام وانتي قولي لا.. اوكي خلود: لحظه لحظه ليش اسوي هذا كله فهمني.. سلطان: بتفهمين بعدين.. بس اياني واياج ماتسوين الي قلت لج عليه.. بتكونين خربتي كل شي مخطط له فراسي.. خلود: لا انا ابا افهم بالأول سلطان : لاحووووول.. خلود انا مصدع ومالي بارض اتجادل.. خلود: قول... سلطان: اتحيدين يوم سألتج عن حريم او بنات يقولن يبنالكم ريل ومن هالكلام.. خلود: هيه سلطان: هاي وحده منهن.. وانا ناويلها نيه سودا.. هاي ماتييب للبنات رياييل... هاي اتخرب حياة البنات.. فهمتي احين فجت عيونها خلود: مواطنه؟ سلطان: الله يستر على الناس.. مابرمس.. يلا مثل ماقلت لج انا ساير عند ربيعي اخذ من عنده ورقة الإجازه الي طلبتها من الدوام.. واسير السفارة والسفريات خلود: خيبه خيبه.. ليش كل ها؟ بتهاجر شو؟ سلطان: ودي اهاجر والله ودي.. خلود: سلطان شو فيك ياخوي قولي.. سلطان: ماشي بسافر فتره ابا ابتعد احس افكاري متشتته ومب قادر اركز في شي.. خلود: اهاا .. وتوه سلطان بيظهر من الغرفه الا يرن تليفون خلود ويرجع يسحب التليفون عنها ويشوف رقم عفرا.. : ردي ردي.. وسوي الي قلت لج عليه.. خلود: اوكي.. ألووووو عفرا: مرحبا.. خلود؟ خلود: هيه نعم خلود.. منو وياي؟ عفرا: اشحالج اميه؟؟ عساج بخير.. فهاللحظة سحب التليفون سلطان وحطه على الإسبيكر عشان يسجل المكالمة بتليفونه.. خلود: هيه بخير.. بس منو معاي؟ عفرا: وياج عفرا (الفلاني) من زمان خذيت رقمج بس ماحصلت وقت ادق لج.. والله يا خلود يا بنتي عندي ولدي خليفة ادور له حرمه.. وسألت عنج وحده من معارفنا ومدحتج وايد والصراحه شفتج تبين الصدق ودخلتي خاطري واكيد بتدخلين خاطر ولدي غطت خلود على السماعه.. ايا ملعونه الصير هاي سوالفج عيل.. ضربها سلطان على ايدها عشان تكمل رمسه.. ابتسمت.. : اخبرج خالوو الي يبا يخطب مايخطب جي.. جان اتصلتي في امايه عفرا ارتبكت..: ها.. لا قلت اسألج انتي بالأول.. مافيه افتشل.. خلود: ههههههههههه.. انزين ولدج حلو؟ عفرا: هههههه قمر فديته علني افداه.. خلود: انزين ممكن تعطيني يومين افكر عفرا: ها .. ليش تفكرين؟ شو رايج اتيين بيتي اليوم واراويج صورته.. خلود: خالو شو فيج مستعيله جي.. عفرا: اعذريني اميييه ولدي وابا ايوزه بسرعه.. تدرين الأمهات كيف.. ابا افرح به.. سلطان هز راسه بمعنى هيه وافقي.. خلود:خلاص انا بستأذن من اميه وبييج.. بس وين بيتج مادله.. عفرا: مب مشكلة قبل لا تطلعين خبريني انا بدليج.. بيتي مايتوه .. خلود: ان شاء الله.. واخيرا بعرس ماصدق عفرا: ههههههههه ربي يجعلج من نصيب ولدي وافرح بكم.. وبندت الخط وسلطان كان صدق مفول.. سلطان: جلبه اثاري هاي طريقتها في سحب البنات خلود: اتيود البنات من الإيد الي تعورهم .. الزواج.. وهذا اكبر سبب مخلي بناتنا يضيعن تذكر سلطان فطوم.. اكيد الجلب فيصل قاص عليها .. بس هي لازم ماتكون بهالمستوى وتصدق.. خلود: وين سرحت سلطان: لا ولاشي.. المهم سمعي اليوم الساعه 9 بظهر وياج وبوديج بيتها.. وانا بتفق ويا شرطة الآداب وبقول لهم عن الموضوع كله.. خلود: خلاص .. الله وناسه اكشن.. سلطان: انتي وين وانا وين.. يلا مع السلامه طلع من البيت وهو معصب الود وده يهجم بيت عفرا ويخنقها ويفك الخلق منها.. ومن شرها.. اتصل فيها فالدرب.. سلطان: مرحبااا عفرا: هلا والله وين هالغيبه .. ماتقول عفرا وين ولا تسأل سلطان: هههههههه اصلا انا مالي غناة عنج كيف ماتبيني اسأل.. عفرا:ههههه انزين اسمعني زين يوم دقيت توني اليوم اتفقت ويا وحده بتتعامل وياي ماشاء الله عليها تحفـــــــــــــــــــه يا سلطان.. ومن النوع الي انت تحبه.. وانت تعرف غلاتك عندي وعشان جي اباك تكون اول واحد يلتقي بها شو رايك؟ سلطان شل السماعه بعيد وتم يرص بأسنانه من كثر ماهو ثاير.. وكان طبعا يسجل المكالمة كلها: انزين خلاص تم.. بس بشرط ماتقولين لأي واحد غيري ولا اباهم يشوفونها لغايه ماخلص شغلي معاها وعقب برايج.. عفرا: افااااا.. خلاص اذا جي تعال من وقت شوي عشان مايكون ناصر موجود.. سلطان: شوو ناصر لا.. قلت لج مابا حد يشوفها.. عفرا: تم.. وبند عنها واتصل في ناصر وسلم عليه.. ناصر: مرحبا والله بالقاطع.. سلطان ماكان وده يرمس ناصر بعد الموقف الخايس.. ناصر: سلطان سامحني والله انك ربيعي وتعز علي ماباك تنقطع عني سلطان: ماعليه المهم ممكن اشوفك ابا اتفاهم وياك .. ناصر خاف شوي لحظتها.. شو ممكن يكون الموضوع الي يباه فيه.. : خلاص مب مشكلة متى؟ سلطان: انا احين ساير اكمل اشغالي فالسفاره ومكتب السفريات وكل شي وعالغدا اذا فاضي نلتقي في مطعم بارس ناصر: ياحبك للأكلات الإيرانيه.. هههههههه انزين على وين ناوي تسافر من ورانا سلطان: تبا اتيي حياك.. ساير العمره .. من سمع ناصر طاري العمره حس بشعر يمه وقف.. صار له فتره ماشم ريحة السيادة ولا المسيد... ونسى كيف الصلاة يمكن بعد.. : خلاص اشوفك ان شاء الله فالمطعم.. سلطان: اذا تقدر تطلب من فيصل يحضر بعد تسوي خير.. ناصر: بس انت عارف ان فيصل ماله ويه يجابلك سلطان: انت وفيصل في نفس القارب.. دامك بتجابلني .. فيصل بيروم.. كلنا غلطنا في حياتنا بطريقة ولا بطريقة ثانيه .. واظني هذا هو الوقت ان كل واحد فينا يصحح غلطته.. سكت ناصر.. : خلاص برمسه وبشوف سلطان: نشوفك عيل.. وبند الخط وسار يكمل اشغاله.. .. . . . . . .. فالدوام عند حور وعبيد.. خوله: هههههههههههههههه خس الله ابليسج.. عيل مواقف هناك حور: ماكان ودنا نرد بس يالله شو نسوي.. خوله: ماعليه اليايات اكثر على شو مستعيله.. حور: ماتصورين فرحتي اشكثر يوم دريت اني حامل.. خوله: ههههه وانا بعد نفس الشي.. حموود فديته كبر ويبا اخو ولا اخت.. حور: شوفي انا بييب بنت حق حمود ولدج.. خوله: خلاص من احين محجوزه لولدي خليفه: لا حول ولا قوة الا بالله.. كنا مرتاحين من الصدعه وسوالف الحريم.. ردينا شكلنا.. وانتي (يطالع خوله) مخصوم من راتبج اسبوع.. خوله: يالظاااااالم اسبوع.. خليفه: هيه اسبوع مب عايبنج قراري؟ خولة مرت حذاله وخفت صوتها: عايبني صاحب القرار اكثر.. يود خليفه ضحكته ودزها عالخفيف من جتفها: يلا يدامي.. وكان في هالوقت المدير عنده جولة حول المكاتب.. فشاف موقف خليفه كيف يهزب مرته.. المدير: لا حوووول يا خليفه خف من عنفك هذا.. حد يعامل مرته جي.. خليفه: لا حضرة المدير.. هاي موظفه حالها حال غيرها ماتمشي الواسطات عندي كانت خولة واقفه ورا المدير وتسوي حركات بإيدها: اراويك.. خليفه: يلا عالمكتب.. حريم ماين الا بالعين الحمرا.. المدير: ههههههههه.. والعروس وينها؟ سمعت حور رمسة المدير واحمرت من الخااااطر.. واستحت.. ودخل المدير عندها المكتب: اشحالج؟ حور وهي تتطالع الأرض: بخير الحمد لله يسرك الحال.. وانت اشحالك؟ المدير: بخير.. الا وينه ريلج؟؟ انا فاتح هالوزاره للمتزوجين عشان يشتغلون ويا بعض.. هههههه خليفه: هههههه صدقت.. وفي هالوقت كان عبيد ياي مكتب حور ومعاه شوية أوراق شاف حور واقفه ورا مكتبها والمدير مجابلها ويا خليفه ويضحكون.. مات غيض.. عبيد وهو معصب: السلام عليكم المدير: هلا والله المعرس.. اشحالك؟ عبيد: بخير يسرك الحال.. (تخاشم وياه) انت اشحالك؟ المدير: الحمدلله.. انتوا الإثنين شي بينكم مضاربين ومداوين ولا شو السالفة؟ عبيد انغاض زيادة وصد صوب حور وعطاها نظرة فهمها ان الوضع مب عايبنه..: لا ماشي بس تدري وقت الدوام دوام.. المدير: زين والله .. هاييل الناس الي تفهم الشغل .. مب خليفه ومرته.. خليفه: ههههه خلنا شوي لوز .. مايستوي دوم شديدين مب هاي رمستك المدير: تاخذ الرمسه الي تعيبك والي ماتعيبك تغيرها وتخليها على مزاجك.. يالله عيل ماعطلكم.. وطلع ومعاه القروب وخليفه.. الا عبيد تم فالمكتب روحه ويا حور.. حور: ممكن اعرف شو معناة هالنظرة؟ عبيد: تبين اتفهميني ان الي صار شي عادي في نظرج حور: وشوالي صار اصلا؟ عبيد حط ايده على الطاوله وتقرب من ويهها ورفع حاجب واحد.. : يوم بتعرفين تعالي رمسيني.. حور قعدت علىالمكتب وهي حاسة بضيج: عبيد انت مب واثق فيه عبيد: فالبيت نتفاهم.. حور: اصلا الدوام خلص شوف الساعه كم... صد عبيد وراه وشاف الساعه الي على اليدار.. 2:15 الظهر.. عبيد: 5 دقايق واترياج فالسياره.. حور تمت اتلم أغراضها والأوراق ومرت على خوله وسلمت عليها ونزلت من الليفت وهي تفكر في تصرف عبيد وتذكرت تصرفاته فالسفرة الي كانو فيها .. وغيرته.. ااااااااه ربي يصبرني ركبت السياره وتنهدت وحطت الأوراق ورا.. عبيد: بلاج منتفخة؟ حور صدت صوبه تتطالعه مستغربه: عبيييييييد شو بلاك قمت على كل شي تحرطم.. شو فيك؟؟ فهمني؟ عبيد يضرب ايده على السكان بقو ويصرخ: انتي ماتفهمين (صد يطالعها وعيونه كلها غيره وحب وغضب شعور مختلط) ... اغاااااااار من اي مخلوق يجابلج ويشوف ويهج وضحكتج احبج حور.. احبج.. (مسك ايدها وحطه على قلبه) حسي بهالقلب مايتحمل والله مايتحمل سحبت حور ايدها بهدوء: يعني بتم تعاملني بهالطريقه كل يوم فالدوام؟؟ مليون مراجع ومدير وموظف وغيره وغيره يدخلون مكتبي او يخطفون يدامه.. بتزعل مني كل مره ؟ عبيد تم ساكت وحرك الموتر وهو ساكت.. حور تمت تتطالعه وغامضنها .. صح انها تضايقت من غيرته بس تحبه تحبه بكل مافيها.. ماتحب تضايق به .. . .. . ماتحب اي شي يجرح قلبه.. تمت تتطالع ايدها وهي تتذكر كيف حست بنبض قلبه في ايدها.. صدت صوبه وهي تبتسم: مابتعزمني على غدا برع اليوم؟ عبيد ابتسم لها: من عيوووووووني يا أغلى من عيوني.. حور: وفي شي ابا اتشاور فيه وياك.. عبيد: خير؟ حور: الحب... شو رايك استقيل من الدوام.. وانت ترتاح وانا ارتاح عبيد تم ساكت: خليني افكر فالموضوع شوي .. حور: بس حط شي واحد في بالك.. احبك ورضاك يهمني عبيد: لاخليت منج يا أم منصور حور: هههههههههه لا حارب عبيد: لا لا خلي حارب الثاني حور: خلاص ان شاء الله .. ربي يرزقني بالذريه الصالحة شو ماكانت.. عبيد: آمين.. .. .. .. فالمطعم.. ناصر وفيصل يالسين ينتظرون وصلول سلطان فيصل: ياخي ويهي يعورني كيف تباني اجابله.. الموقف صعب الله يهديك بس كيف طاوعتك وييت مادري ناصر: عاد الله انا الي لي ويه اجابله .. بس دام انه ربيعنا ونحن غلطنا في حقه لازم نتحمل منه اي رمسه او تصرف.. فيصل: تتوقع شو سوو فالبنت؟ ناصر: الي انت بتسويه بوحده من هلك لو كنت مكانه.. فيصل: لا لا دخيلك لا تقول هالرمسه ياني خايف الله يعاقبني شرات ماعاقب سلطان موقف ماتحمله وشوي يرن تليفون ناصر..: وصل.. فيصل: انا بطلع.. ناصر يأشر له يقعد: الو مرحب.. سلطان: وينكم؟؟ ناصر: فالمطعم وين وصلت؟ سلطان: هيه ياينكم احين.. كانوا ماخذين كابينه فالمطعم مغلقه عشان ياخذون راحتهم فالرمسه.. دخل سلطان الكابينه ومن شافه فيصل غصبن عنه حضن سلطان وبدا يصيح: سامحني ياخوي... والله اني غلطان واستـاهــ... قطع سلطان رمسته: الي صار صار.. وانا هني يمعتكم عشان موضوع ثاني مب الي صار.. ومب بس انت ولا ناصر الي غلطانين بنتنا غلطت وكلن بياخذ جزاه.. البنت بتاخذ جزاها وانتوا جزاكم من الله.. فيصل نزل راسه: دخيلك لا تدعي علينا.. سلطان: قلت خلاص انتهى الموضوع.. المهم سمعوني الموضوع يخص عفرا ناصر وفيصل: عفـــــــــــرا.. !!!!!!! سلطان: هدوا.. هيه عفرا ماغيرها.. الموضوع خطير وماينسكت عنه.. ناصر وفيصل.. الي صار لي كان عقاب من الله لي.. وربي صحاني من غفلتي واباكم تصحون .. عندكم خوات .. وبنات عم وخال .. خافوا عليهم.. (نزلوا راسهم تموا يفكرون برمسه سلطان ).. غفلنا وايد عن ربنا عن صلاتنا .. وهذا انذار من رب العالمين.. فيصل : ممكن ارجع لموضوع الي صار.. في رمسة في خاطري اقولها.. سلطان قول. فيصل: صح ان يلستنا سوى من بعد الي صار شوي غريبه.. بس كلنا في نفس القارب.. ماشين في نفس الطريق وغلطنا نفس الغلط.. يمكن الي صار لك كان ممكن يصير لي انا ولا ناصر.. لكن الله انذرنا كلنا.. ومابا هذا الي صار يبعدنا يا سلطان.. نحن ربع من ايام المدارس ونعز على بعض.. ابا الي صار يقربنا اكثر.. وعن البنت.. صدقني عمرها ماغلطت وياي ولا سوت شي غلط يمس سمعتها وهاي كانت اول مره لها ولا تدري بشي.. سلطان: انا سمعت رمستك وخلاص.. وان شاء الله مع الوقت بننسى كلنا ماضينا.. بس قبل لا ارمس عن سالفة عفرا.. انا بسافر بعد يومين العمره .. وبتم هناك طول ماعندي اجازه .. وبرجع ان شاء الله .. فاللي حاب يلحقني حياه صد ناصر صوب فيصل... وفيصل تم يطالع ناصر بنفس الطريقه.. بس فيصل كان متشجع اكثر.. : خلاص بيي وياك ليش الحقك.. وناصر برايه ناصر: لا أبويه انا مابتم فالبلاد روحي.. ريلي عريلكم.. استانس سلطان انه قدر يشجع ربعه وياه عشان تكون بداية خير لحياتهم.. وقعد يقول لهم عن سالفة عفرا مع شما .. وكيف اكتشفها عن طريق شما.. وألحين اتصالها لإخته وماحب يسمعهم التسجيل غيرة على اخته.. لكنه سمعهم تسجيل صوته هو معاها.. بالرغم من ان ناصر وفيصل عليهم حركات .. شباب تراهم فالنهايه.. لكن قلوبهم طيبه.. ولو كانو مكان سلطان وصار لهم هالموقف مع شما.. كان يمكن يتصرفون بهالطريقه ناصر: وانت على شو ناوي؟ سلطان: على الي قلت لكم عليه.. انتوا الي عليكم تتصلون فيها وتطلبون انكم تبون بنت يديدة وجي ومن هالكلام .. ولا تنسون تسجلون المكالمة.. انا كلمت ربيعي الي فالتحريات وقلت له الموضوع كله.. قالي ان هم من فتره شاكين بهالفيلا بس مخلينهم تحت الرقابة وانت يبت لنا دليل وبرهان بهالشي.. واي احد فيكم يطلب شما شخصيا.. عشان اتفق مع شما ان اذا اتصلت فيها عفرا وهددتها تسجل صوتها بعد بنفس الطريقه.. وبجي بنكون صدق قضينا عليها وعلى الشلة الفاسدة الي وياها.. ناصر: الله اكشن.. فيصل نزل راسه كان سرحان.. كأنه يتذكر الي كان يسويه بالبنات.. تذكر اخته الي عمرها 5 سنين.. يعني اذا كبرت الله بيعاقبني فيها؟؟ لا لا دخيلك يارب اختي لا.. ناصر وسلطان استغربوا من هدوئه.. سلطان: شفيك فيصل.. نش فيصل ماقدر يكمل القعدة وياهم.. حس ان دموعه بتفضحه.. وتوه بيظهر من الكابينه الا بسلطان يسحبه ويرده مكانه: قولي شو بلاك فيصل: العنود اختي.. .. .. .. .. ناصر: شو بلاها؟ شي صايبنها؟ سلطان: مب جنها الصغيره؟ فيصل: هيه.. خايف ان الله يعاقبني فيها لاكبرت.. خايفه عليها من الي اشكال عفرا.. خـ.. سلطان حط ايده على جتفه: اسمعني يا فيصل.. ربك رحوم غفور.. وبإذن الله مابيصير الا كل خير.. لو كانت نيتك مع الله صافيه .. واعتدلت.. ناصر: وانا اختي توها دشت المراهقة.. سلطان: الفرصة يدامنا يا شباب.. الله لو مايحبنا جان مانبهنا.. صح ان الفضيحة ماكانت هينه عليه .. لكن الحمد لله ماكانت كبيره وايد وانتشر الشي بين الناس.. فيصل: ارد واقول لك يا سلطان.. بنت عمك شريفة ماسوت شي.. سكت سلطان وحاول يغير الموضوع واتفاقهم مع عفرا.. وفعلا اتصل فيصل في عفرا وقال انه يبا شما شخصيا.. والمكالمات كانت مسجلة.. واتصل سلطان فشما.. وفهمها كل الموضوع.. واتفقت انها تسوي كل الي قالولها عليه... سلطان: يالله عيل اكيد بدق لج اليوم شما: تسلم يا سلطان.. ربي يوفقك ويستر عليك على الي قاعد اتسويه لأنك بتفك الدنيا من شرها سلطان: يلا عيل ردي علي خبر لا اتصلت فيج.. وبعد ساعه تقريبا اتصلت فيه شما وقالت له ان عفرا اتصلت وتمت اتهددها انها اذا مايت بتنشر الصور وهالخرابيط.. سلطان استانس لأن هذا بيكون اقوى دليل ضدها.. .. .. .. عبيد:يعني كم شهر باقي لج؟ حور: وييييييه يدامي درب ان شاء الله.. 8 شهور. عبيد: بيمرون بسرعه ماعليج.. حور: ان شاء الله .. ربي يسهل والله خايفه عبيد: لا تخافين ترا وايد حريم ربن ماشاء الله.. حور: مادري بس قلبي قابضني عبيد: شي طبيعي تراه اول ياهل.. انا وياج لا تحاتين حور: ربي لا يخليني منك عبيد: ولا منج يا ام منصور.. حور: لا غيرت رايي.. ام حارب عبيد: يالله من هالحرمه ماتستقر بقرارها.. حور: ههههههههههه.. اخبرك مو جنه لازم ننزل تحت عبيد: لا عادي نحن بعدنا معاريس حور: ههههههه لا خلاص مال اول نحن.. يلا نش.. عبيد: افففف انزين .. كان بوعبيد فهاليوم عازم اخوه عبدالعزيز ولطيفه وامه ومجد بيتهم على العشا.. متميعين وسوالف وحشره.. أحمد كان يالس على طرف الميلس حذال ابوه وعمه عشان يقدر يشوف الصاله من صوبه.. لأنه يبين من المكان الي هو فيه الصاله شوي وكان يقدر يشوف مجد .. كانت اكثر وحده مسويه حشره فالصالة بسوالفها وضحكاتها؟؟.. انتبه على تليفونها الي حذالها.. حب يجرب اذا البلوتوث شغال.. وفي لحظتها صدت مجد وشافته يتعبث فالتليفون.. بسرعه غيرت نك نيمها فالبلوتوث وفتحته عشان تغايضه شوي... وهو حصل هالنك نيم (( نعــم في شي؟)) ضحك وصد شافها مشغوله.. وطرش لها اغنيه.. وهي استقبلتها وصدت اطالعته بنص عين وفتحت الملف وهي مب عارفه شو فيه الا بصوت الإغنيه ينتشر المكان كله والكل يصد صوبها .. سود العيون اتخلي... واتشلي... الالباب للالباب هاذي وصايف خلي ..ومتجلي.. وقلبي بهواهم ذاب طرفن كحيلن مضلي... ومهلي... وناعسات اهداب فاقابجمال ودلي.. عالكلي... متميز وجذاب كلي انا له كلي.. بالحلي... مادامنااقراب وبالحب غيره من لي... يهنلي... هو فرحي والعذاب ليتك معيصافلي... امتلي ..عنك القلب ماتاب لا تل قلبي تلي... امهلي... ياعاليالانســـاب سود العيون اتخلي... واتشلي... الالباب للالباب هاذي وصايفخلي ..ومتجلي.. وقلبي بهواهم ذاب .. غيضت من الخاطر.. وصدت تمت تتطالعه بنص عين.. وردت عليه بهالإغنيه لك بعد عين نتواجه .. او تشوف عيوني فيها انت ما خليت حاجه .. اغفر ذنوبك عليها اختلف قلبك وقلبي .. من بعد ذاك الوفا صار دربك غير دربي .. وانتى عهد الصفا مهما في الدنيا يصير .. الوفي يبقى وفي واللي في حبه كبير .. ما يهزه اي شي ما بتشفع لك دموعك .. انت من قلبي انتهيت ما كسر قلبي خضوعك .. لو ترجيت وبكيت .. ورد يطرش لها شي ثاني .. الا تصك البلوتوث.. انقهر من الخاطر وطلع من البيت.. وهي تمت تضحك على شكله .. اممممم نهاية الجزء.. السموحه.. وقفت هني.. الوقت تأخر ولازم اكمل دراستي.. وعاد الجزء شوي طويل .. احسن من ولاشي.. شو تتوقعون يصير في عفرا؟؟ وفطوم شو بيصير فيها؟؟ شما بيكون لها دور ولا انتهى؟؟ العلاقة بين عبيد وحور؟؟ كيف راح تكون؟؟ أحمد ومجد بيتمون على هالحال؟؟ ولا في تطور؟؟ ملاحظة: الفواصل إهداء مني لكم.. لكم حرية أخذها.. صممتها للأجر احبكم MiSs MrMr |
الجزء الخامس الفصل الأول =-=-=-=-= .. بناء على طلب بعض المتابعين للقصه توضيح معاني بعض الكلمات العامية الي تصعب عليها فهمها.. فراح تشوفون اكتب المعنى بين قوسين بجانب الكلمة.. واذا في كلمات ثانيه ماركزت عليها وتحبون تعرفون معناها رجاء تفضلوا واسألوني اياها.. يسرني اني ارد على اي سؤال.. .. خلود: سلطان أنا وايد خايفه.. سلطان: تخافين وانا اخوج... بكون وياج لا تحاتين.. خلود: أحين هذا هو البيت.. زايغه سلطان سلطان: شوفيج قلت لج انا هني .. وخلي التليفون شغال عشان اقدر اسجل الي قاعد يصير.. خلود وهي تبلع ريجها: اوكي.. ونزلت وهي تحس بريولها ماتقدر تمشيها لغاية باب البيت.. الخوف كاسي عظامها وترتجف .. ودقت الجرس وصدت وراها شافت ان سياره اخوها مب موجوده.. شلت تليفونها : وينك؟ سلطان: ايه انتي بتفضحينا انا موجود اشوفج من المكان الي انا فيه.. وتوه ربيعي الضابظ وصل بعد واقف صوبي يراقب البيت.. لا تحاتين.. ونزلت التليفون بسرعه لأنها سمعت صوت خطوات.. كانت وحده فلبينيه الي فتحت لها الباب.. ودخلت البيت وحست بقلبها بيطيح من الخوف وكثر مايدق.. طلعت لها عفرا تستقبلها.. وكان ودها خلود تشرد .. بس ميودة عمرها عشان الخطة تنجح.. عفرا: يا حي الله هالويه.. لا خليت منه يارب.. حياج اقربي خلود وهي تضحك بالغصب: الله يحييج.. ودخلت الصالة وهي تتطالع حواليها كأنها خايفه يكون في حد موجود.. وقعدت.. عفرا: تو مانور البيت.. عاد تدرين هذا بيت المستقبل لج.. ان شاء الله خلود تظاهرت انها مستحية ونزلت راسها.. انتبهت على الدبلة الي في صبعها.. لو شافتها عفرا بتنكشف انها مالجة.. بسرعه تداركت الموضوع وطلعت الدبلة ودخلتها فالشنطة.. وعفرا راحت يابت لها عصير وضيفتها. وبعد خمس دقايق رن الجرس.. عفرا: اكيد هذا ولدي وصل.. خلود: ها.. ولدج.. عفرا: اشفييييج.. لا تخافين ههههه ولا تستحين خلج عادية.. فتحت عفرا الباب لسلطان: هلا والله بهالويه.. سلطان: ها داخل هيه؟ عفرا: هيه.. بس ها تراك ولدي اونه وياي تشوفها.. وعقب بخليكم رواحكم فالميلس وبصك الباب وبرايكم سلطان: لا لا انا بظهر وياها.. عفرا: ويكون احسن لو طاعت.. سلطان: بطيييع افا عليج انا سلطان.. دخل سلطان الميلس وشاف خلود الي كانت منزله راسها وخايفه وتقرا في قلبها ان الليله تمر على خير.. سلطان صد صوب عفرا: ممكن احين تظهرين ماقدر اخذ راحتي.. عفرا: هههه ان شاء الله.. خلود حبيبتي لا تخافين انا فالصالة .. عشان ماتستحين لازم تشوفين ريل المستقبل(غمزت لسلطان).. وطلعت سلطان: قسما بالله انج حقيره بخليج تندمين على قد شعر راسج .. خلود: طلعني الله يخليك مب قادرة اتم لحظة وحدة.. حاسه نفسي بختنق.. سلطان: لا تحاتين احين انا وانتي بنظهر عساس ضبطنا كل شي.. وفي وحده ثانيه بتيي متفقين معاها هي بتكون الضربه القاضيه للخايسه هاي.. خلود: يلا طلعني دخيلك.. وقبض سلطان ايد خلود كأنهم حبايب وطلع من الميلس.. عفرا: على وين؟ سلطان: ماشي بنحوط شوي عشان نرمس على راحتنا ونخطط لمستقبلنا عفرا: هههه الله يوفقكم وطلعوا من البيت وخلود كانت تمشي بسرعه بس سلطان يسحبها: ايه انتي هدي.. خلود: بموت ماقدر اتحمل المكان وركبوا السياره وصد شاف شما توها نازله من الموتر ابتسم لها وهي نزلت راسها مستحيه.. حست انها فعلا اشتاقت له خلود: منو هاي؟؟ لا يكون من.. سلطان: لا لا .. هاي بنت ماعليها اي غبار.. وصار لها شرات ماصار لج.. بخبرج السالفة بعدين.. بس تعالي خل اعرفج عليها.. خلود تقربت مع سلطان صوب شما.. الي كانت قافطة.. سلطان: اشحالج.؟ شما: بخير ربي يعافيك.. انت اشحالك؟ سلطان: بخير.. بغيت اعرفج هاي اختي خلود.. وهاي شما خلود: مرحبا بج .. شما: مرحبا بج زود.. علومج عساج طيبه؟ خلود: بعد ما ظهرت من البيت اطيب طيبه بعد. . شما: هي والله صدقج.. احين الله يعيني كيف بدخل سلطان صد صوب الموتر الي كان واقف على زاوية بعيدة ورمس شما وهو يأشر ذاك الصوب: شوفي ذاك الموتر.. هم الشرطة.. يراقبون المكان ومابيستوي بج اي شي.. بس مثل ماقلت لج.. اتصلي على الرقم الي عطيتج اياه عشان هم يسجلون كل شي يستوي.. شما: ان شاء الله خلود: ياي احس عمري في السينما.. شما: ههههههههه فهاللحظة انتبه سلطان لضحكة شما.. سرح فيها شوي.. وقتها استوعب انه مش وقته هالشي.. : يالله عيل ربي يحفظج عشان مانتأخر.. وراحت شما صوب البيت ودخلت.. وكانت على شبه ضرابه مع عفرا الي كانت اتهدد انها اذا ماطاوعتها الصور بتنتشر شما: حشرتيني تراج وين الصور ماشوف شي؟ عفرا: موجودين حبيبتي انا ماظهر هالسوالف.. شما: انتي ماتخافين من ربج.. الي تسوينا فينا .. تقصين علينا عفرا: اوهووووو لا تستوين لي واعضة دينية.. اونج شريفة مكة.. شما: اشرف عنج فاهمه.. عفرا: اخبرج ايدج هاي بكسرها لج ان شفتج رافعتنها بويهي.. وانطبي.. شما ماقدرت تتحمل.. انقضت على عفرا وقعدت تضربها وتير شعرها.. الضابط: لا الظاهر الوضع تأزم... بلغ جمال ان بندخل المكان.. الضابط2: بس في واحد بيدخل شكله هذا هو الثاني الي اتفقوا وياه.. الضابط: انا بدخل وياه.. وبسرعه نزل الضابط ومشى صوب فيصل وعرف عن نفسه.. وقرروا يدخلون سوا.. وفتحت الفلبينيه الباب.. ومن دخلوا شافو شما قاعدة تضرب عفرا.. يودوها وسحبوها بعيد.. عفرا: شلها من يدامي هالمتوحشه... شما خافت من شافتهم.. سحبت ايدها وراحت بعيد وهي تصيح.. : شو تبون فيه.. انا ماسويت شي هاي شلوها عاقبوها ذبحوها.. الضابط شاف ان حان الوقت يمسكونها ويسحبونها.. طلع تليفونه ورمس جمال: تعالو فتشوا المكان وانا بشل هال... ولا اسكت احسن.. عفرا: شو تفتشون؟؟ شو السالفة؟؟ انت منو؟؟ فيصل هذا منو؟ فيصل: هذا هو الي كان لازم نقول له من زمان اييج.. قسم الآداب.. عفرا من سمعت هالطاري بغى قلبها يوقف .. : ليش ؟؟ شو تبون؟؟ انا ماسويت شي.. الضابط: مبين انج ماسويتي شي.. نحن مايينا الا وكل الأدلة يدامنا وفهالوقت وصلن شلة بنات من كل الجنسيات.. وهن بعد تيودن وعفرا اولهن.. وهي تصيح.. : انا حرمة عوده شو تبون بي.. الضابط: لو كنتي محشمة عمرج ماصار لج هذا.. سلطان وخلود كانو فالموتر وشما ربعت صوب موترها وهي حاسه عمرها منهاره وركبت الموتر وهي تصيح... والشرطه كانوا متيمعين فالمكان.. الجيران ظهروا من بيوتهم مستغربين شو الي قاعد يصير.. ومن تشوف عفرا حد تحاول تتغشى.. بس ماشي فايدة .. وانتشر الخبر بين الناس.. والضابط بعد ماركبهم مواتر الشرطة.. سار صوب موتر سلطان الي نزل له سلطان: يزاكم الله ألف خير الضابط: المفروض نشكرك انت.. لن نحن يتنا بلاغات عن ان هالمكان مشكوك بس كنا نتريا دليل.. وانت ماشاء الله عليك ماقصرت يبت لنا الدليل القاطع.. سلطان: واجبنا.. كنا في يوم من الأيام مغشاية عيونا ومانشوف.. بس الحين يوم شفنا وصحينا قلنا لازم نصلح كل شي نروم عليه الضابط: يزاكم الله خير.. واحين ترومون تروحون ومشكوووورين.. والباقي علينا سلطان: بس ممكن اعرف شو الي بيصير فيها؟؟ الضابط: في هالقضايا الدعارة.. عادة اذا غير مواطنين ابعاد.. وحالة عفرا.. للآداب طبعا.. ودام انها دمرت حياة وايد بنات.. السجن والجلد.. سلطان: تستاهل دواها.. هالعيوز.. الضابط: يالله عيل توكل على الله.. وسلم على فيصل والبقيه وراحوا.. وسلطان حس كأن هم وانزاح عنه.. وركب السياره وصد صوب خلود: احين اقدر اقول ان توبتي نصوحة خلود ابتسمت له: افتخر فيك ياخوي.. سلطان: باجر بسافر العمره انا وربعي.. واحتمال انتم هناك شهر كامل.. خلود: تروحون وتردون بالسلامة.. سلطان: ممكن بس قبل لا اسافر اطلب طلب منج يختي.. خلود: خير امرني.. سلطان: شما.. اباج تكونين على تواصل وياها.. عشان اقدر اعرف اخبارها منج ضحكت خلود بخبث: لييييييش الأخ عاشق؟ سلطان ابتسم: شوفي بقول لج قصة البنت هاي.. وبدا يقول لها كل ظروف شما لغايه اليوم الي شافها فيه والموقف الي صار.. خلود وهي تمسح دموعها: حليلها والله .. ليش ما.. اوه نسيت .. سلطان: شو السالفة.. ؟ خلود ضحكت: كنت بقول لك اخطبها.. بس نسيت انت قايل لي اذا بتعرس بتاخذ بنت عمك.. سلطان من تذكر فطوم حس ان الدنيا افترت في راسه.. وحاول يبرر الموقف: لا بس غيرت رايي فطوم وايد صغيره علي اكثر من 8 سنين.. خلود: صح انا بعد كنت اقول جي.. خلاص ياخوي سافر وانت مطمن بنستوي انا وشما ربع وبعرفها على مجد بعد سلطان: ها لا دخيلك بتخليها تتخبل خلود: هههههههه .. .. مجد: أقول يدوو ابوي ماعنده أعمام ؟؟ جلثم: بلا اميييه عنده مجد: بس عمري ماسمعته يطريهم.. جلثم: ااااااه يا مجد.. شو بتقولين... من يوم ماتوفى يدج الله يرحمه.. لانشدوا عن ابوج ولا سألو عنه ولا جنهم هم المسؤولين عنه بعد وفاة أبوه.. لغايه ماخذت يدج عبيد الي خذ ابوج واعتبره ولده العود وخلاه الكل فالكل فالبيت حتى بعد ولادة عمج .. مجد: حليله يدي عبيد.. مع اني ماذكر شكله لأنه توفى وانا صغيره.. الله يرحمه جلثم: الله يرحمه ويرحم جميع موتى المسلمين يارب.. مجد: يدوووه سمعت خلود تقول لي ان سلطان بيسافر العمره ويا ربعه.. ليش ماتخاوينهم؟؟ انتي من متى خاطرج تروحين.. جلثم: إشووووووه؟؟ سلطان بيروح ومايقول لي مجد انتهزت الفرصه.. ياحبها للفتن..: اندوج التليفون يدوو رمسيه اهزبيه افا عليج جلثم: هاتي بدق عليه .. مجد: اويه انا ماعرف رقمه.. لحظه باخذه من خلودوو.. جلثم: لا لا مايحتاي انا اعرف مجد وهي عاقدة حياتها؟؟ : اتعرفين؟؟ اممم متأكدة يدوو.. جلثم: هاتي غربلاتج من بنت.. سحبت التليفون ويلست تعابل فيه.. ماعرفت له فرته على مجد: ماعرف له هالتليفون.. مالقى لج غيره . جان خذ لج شرات الي عندي.. مجد وهي تفج ثمها: هييييييييييه تبين ياخذ لي أرنوب.. ويييييييه مال أوووول مغبر اسميهن البنات بيضحكن ان شافنه عندي جلثم: بلا هالهذرة الزايدة واتصلي به خل يحجز لي وياه.. مجد: كم الرقم انزين؟؟ وقعدت اليدة تنقلها الرقم وهي تدق عليه وعقب عطت التليفون ليدتها جلثم: ألووو.. --- ---: السلام عليكم.. جلثم: مسود الويه وينك.. ؟؟ عيل هاي سواتك تسافر ولا تقول لي.. ---: نعم؟؟ خير.. جلثم: شو بلاك ماتنطق .. بالع لسانك ولا شو.. ---: أميه بغيتي منو انتي؟؟ اعتقد انج غلطانه.. جلثم: سلطان يالهرم عن هالحركات.. احين اباك عندي في بيت خالك.. ---: ههههههههه.. اميه انا مب سلطان.. جلثم: يالله بالستر.. عيل منو انت؟ هني فجت مجد ثمها.. من رقمي ومغلطه على رقم واحد لحووووووول ---: انا راشد الفلاني جلثم: والنعم ولدي.. اسمح لي الظاهر مخربطة فالرقم.. الكبر شين أميه .. راشد: محشومه أميه.. بعده صوتج شباب جلثم: وييييين ياحسره.. عالعموم اسمحلنا على المغثه .. راشد: مسموحه أمايه .. تامرين على شي جلثم: سلامتك اميه .. سلم على امك.. راشد وفي خاطره.. جي تعرفينها هههه مشكلة العيايز: الله يسلمج مع السلامه وبندت الخط.. جلثم: حلييييييله ولد عرب وطيب ماشاء الله عليه.. غثيناه المسكين مجد: يدوووه الله يهديج قلت لج بدق على خلود وبنشدها عن الرقم ماطعتي.. جلثم: عن الهذره يالله واتصلي فيها.. اتصلت مجد على تليفون خلود الي كانت فالسياره مع سلطان .. وسلمت عليها.. وعقب قالت لها ان سلطان وياها.. فعطت التليفون ليدتها.. سلطان: مرحبا مرحبا بهالصووووووت .. يا مرحبا ملاييين ولا يسدن.. لا خليييت من هالصوت يارب جلثم: انجعم يالله وتعال عندي اباك سلطان: خير يدوو شو صاير.. جلثم: سواد ويهك درينابه.. وتعال لي حساب وياك صد سلطان صوب خلود ويطالعها بنظرة اتهام.. : شو مسوي ؟؟ انا ماسويت شي؟؟ جلثم: كل هذا وماسويت شي.. قلت لك تعال احين قبل لا .. قاطعها سلطان: خلاص خلاص مسافة الدرب وانا عندج مانروم على تهديداتج دخيلج.. جلثم: عنلاتك.. يالخام.. اترياك.. وبندت الخط في ويهه .. من سمع ان الخط انقطع صد صوب خلود.. سلطان: انتي شو قايلة حق يدو.. خلود: ماقلت لها شي؟ سلطان: اعترفي.. لأن تقولي مسود الويه وعرفت بسواد ويهي.. خلود: ههههههههه ياك الموت ياتارك الصلاة.. والله اني مانطقت بكلمة لأي احد حتى مجد الي هي ربيعتي سلطان: الله يستر بنسير نشوف شو عندها.. خلود: انزين عيل وصلني بيت عمي .. ابا ازور فطوم وعمتي.. دام انهم في دربنا سلطان: ان شاء الله.. ودقايق الا وهو منزل خلود ساير صوب بيت يدته.. دخل السياره في بيت عبدالعزيز.. شاف يدته ياسه فالحوي ترقبه.. سلطان: الله يستر .. جلثم: هلا والله بسواد الويه.. سلطان تقرب منها وتوه بيبوس راسه دزته عنه: خوز .. ملعون الصير.. وانت اشعنه ماتقول لي انك ساير العمره عشان ايي وياك.. ؟؟ انا من زمان اتريا حد يروح عشان اروح وياه.. سلطان ارتاح من سمع هالرمسه.. وضحك: هههههه فديت روحج والله مادريت انج تبين جان حجزت لج.. جلثم: ومتى السفر ان شاء الله؟ سلطان: بعد يومين اذا الله راد جلثم: يعني شي وقت.. تروح تحجز لي وياك فاهم.. سلطان: بس ترا 2 من ربعي بيخاووني.. جلثم: شو علي منهم.. وتراهم حسبة عيالي.. سلطان: خلاص تم.. احين تسمحين لي ابوس هالراس الي ربي لا خلاني منه ان شااااااء الله جلثم: ههههه فديت روحك .. احين جي اباك.. هذا سلطان الغاوي.. أحمد كان توه نازل من موتره بعد مادخله البيت وسمع يدته: جني سمعت حد اخذ مني اللقب.. سلطان: روح زين فكنا.. اصلا امبوني غاوي بس عشان مانجرح مشاعرك نقول لك انت الغاوي جلثم: بس انتوا وياه.. اثنينكم نظر عييييني.. أحمد: يدوو وين عمي؟ جلثم: عمك فالميلس.. ادخل عنده سلطان: ترياني بيي وياك اسلم عليه واروح.. .. .. .. خلود: وبعدين يعني يا جاسم.. ممكن افهم شو السالفة؟؟ جاسم: رجاء لا تتدخلين هاي اختي وانا ادرى بمصلحتها. خلود: ماتبا تروح المدرسة قلنا لا.. بس اخر شي قلنا مايعيب البنت شي اذا مادرست.. لأنها يمكن ماتحتاج الدراسه فحياتها.. لكن توصل انكم تيوزونها لواحد اكبر عنها ب 17 سنة.. هاي كبيرة الصراحة.. جاسم: انتي بلاج ماتفهمين الرمسة.. اقولج نحن نعرف مصلحتها.. أخير لها.. عيل تاخذ لها من هالشباب الصيع التافهين ؟؟ خلود: جاسم.. بس البنت بعده درب الزواج يدامها مافاتها .. صغيره توها 17 تيوزونها.. جاسم: عيل تيلس فالبيت فاضيه.. اخير لها الزواج خلود: لا حول ولا قوة الا بالله.. بس شوف حالها ماتسكت من الصياح جاسم: خلود خلود لا تقهريني ارجووووووج.. الي فيه يكفيني والله يكفيني.. خلود وهي تحاول تقرب منه وتتطالع عيونه: قولي شو فيك؟؟ طلع الي في خاطرك فضفض.. جاسم: آآآآآآآه لو اقدر بس .. لكن ماقدر سكتت خلود ماحبت تضايق جاسم او تجبره على شي مايباه .. وفجأة حد فتح باب الغرفه بقوة.. كانت فطوم من دخلت الميلس وشافت جاسم ربعت صوبه وحضنته.. وهي تصيح: الله يخليك يا جاسم قول ان الي سمعته من امايه جذب.. قول دخيلك.. جاسم حاول يمسك نفسه يدام خلود عشان ماتحس بالحساسيه الي بينهم.. : فطوم انتي ماتعرفين مصلحتج كثر مانحن نعرف صدت صوب خلود: خلوووووووود انطقي الله يخليج ارمسي.. لو انتي مكاني بترضين بهالموقف 17 سنة مب شوي واااااايد... خلود صدت صوب جاسم ومب عارفه شو تقول.. نشت من الميلس وطلعت الموقف كان صعب عليها.. جاسم: فطوم نحن مانقدر نخليج جي افهمي.. الغلطه الي غلطتيها كبيره وايد علينا.. نبا نصونج ونصون سمعة هالبيت.. وهالريال ربج أرسله لنا وسيري بيته وبرايج كملي دراستج هناك بس نحن مب ان نبا الفكة منج.. بس نباج نصونج ونحفظج من اي غلطة.. والريال لو ماكان زين جان ماوافقنا عليه.. فطوم: جاسم دخيلك شو هالكلام.. نسيت فارق العمر جاسم: ليش؟ مافيها شي؟؟ فطوم: وفوق هذا متزوج .. ليش انا هالكثر منبوذة فهالبيت.. جاسم : لا حول ولا قوة إلا بالله .. خليني ماسك نفسي يا فطوم دخيلج لأني صدق متضايق .. ابا استر على هالبيت الي سمعته ماليه المكان.. الناس شاكين في موضوع روحتج للمدرسة.. خلينا نضبط كل شي مافينا على الفضايح أرجوج شافت فطوم الدموع كيف منحبسة في عيون جاسم من الضيج ماقدرت ترمس حضنته بالقو: سامحني.. سامحني ياخوي.. يابوي وهلي كلهم سامحني.. (باست راسه) فكر في مستقبلي كيف بتدمره.. احين بتزوج هالإنسان وبعيش وياه عشان اتصوني وتستر علي.. بس يوم بكبر وبعدي المراهقة كيف بتكون حياتي ويا هالإنسان؟؟ سكت جاسم لأنه عارف ان الحق وياها وهو مب قادر يرد عليها... نش عنها وطلع من الميلس ومر على الصاله متجاهل وجود خلود وأمه وصعد غرفته على طول.. خلود: جاسم.. جاسم.. ام جاسم: خليه هذا اذا قفل مخه مايسمع حد خلود تمت تحاتي .. حست ان الوضع غير طبيعي فالبيت بالمره.. فكرة زواج فطوم.. وماتروح المدرسة.. وتعامل جاسم الي تغير مع خلود واهماله لها.. أم جاسم: انزين خل اكمل لج.. سلمج الله هالحرمه شافت فطوم فالعرس وشافت مجد.. بالأول حطت عينها على مجد لأنها أكبر بس قلت لها ان ابوها مايعطي بنته لغير الأهل.. فيت صوب بنتي لأنها يتيمه وصغيره بتقدر تحمل واتييب عيال.. وهي كل الي تباه حرمه اتييب عيال لريلها وبيني وبينج.. البنت كل ماتعرس بسرعه هذي الأيام استر لها ولنا.. الزمن تغير ياخلود.. انتي قبل كم سنة كنتي في عمرها هل كان الزمن شرات ماهو احين؟ خلود هزت راسها بمعنى لا.. أم جاسم: عيل لا تلوموني يوم ابا ايوز بنتي.. اخاف عليها خلود تنهدت: الله يوفقها على كل حال.. وشوي الا تسمع صوت الجرس .. يعني سلطان وصل.. نزل جاسم عشان يسلم على سلطان من سمع هرن موتره.. وطلعوا سلموا على بعض وركبت خلود الموتر وهي سرحانه.. سلطان: شوفيج؟ خلود: فطوم.. سلطان انصدم .. يعني لا يكون عرفت شي لاحووووووول.. : شو بلاها؟ خلود: بيوزونها واحد اكبر عنها ب17 سنه.. البنت بتهلك من الصياح ماتبا حرام يغصبونها سلطان يوم سمع هالكلام عصب.. : شوووووو ميانين هاييل يبون يدمرون مستقبل البنت.. خلود: مادري حاولت ويا جاسم بس ميبس راسه.. حاسه ان في شي مب طبيعي بس مادري شو هو .. لو تشوف فطوم كيف شوي وبتبوس ريل جاسم .. سلطان تم ساكت وحاس بصداع.. صح ان بنت عمه فشلته بالي سوته .. لكنه في داخله مقتنع ان البنت مراهقة والكل يغلط فهالعمر والحلو انه يتعلم من غلطته.. بس مايجوز نعاقبها بهالطريقة.. وصل خلود وقال لها بيروح عند ربعه.. وسار صوب الممزر وقف موتره تم يطالع البحر وهو يفكر.. الا يحس بحد يدق على جامة (شباك) السياره.. صد شاف ناصر.. نزل الجامه وسلم عليه.. ناصر: شو يايبنك هني ياريال؟ سلطان: من الضيج يا ناصر.. ناصر: خير ان شاء الله؟؟ شو صاير؟؟ مو انتهى موضوع عفرا وخلاص تحولت للشرطه وهم بيتصرفون بكل شي.. سلطان: روح زين افكر في عفرا ماعندي سالفة.. ناصر بنت عمي.. بتتعاقب بس بظلم ناصر: كيف يعني بتتعاقب بظلم فهمني؟؟ سلطان: ماتوصل لدرجة انهم ينوون يزوجونها لريال عادي يكون في عمر ابوها.. ناصر : شوووووووووو.. من صدقهم هاييل؟ سلطان: مادري يا ناصر اسكت عني مب قادر احس نفسي مصدع.. بس خل اخبرك قبل لا انسى ترا يدتي محتشره الا اتي ويانا العمره ماعندكم مانع؟؟ ناصر: ههههههه لا بالعكس ياحبي للعيايز.. مب مشكلة.. حياها.. بس ها خل نحجز سويت فيه غرفتين .. وحده لنا ووحده لها عشان تاخذ راحتها سلطان: وهذا الي مفكر اسويه.. يلا عيل سلم على الشباب اذا شفتهم انا بسير البيت مالي نفس اتم.. ناصر: خلاص يبلغ ان شاء الله.. وراح عنه سلطان.. وناصر تم يفكر في موضوع فطوم.. يحس ان هو السبب في كل شي .. يحس ان هالبنت اذا تدمر مستقبلها بيكون هو السبب.. راح صوب البحر وتم ايود الحصا ويفرهم فيها.. وكل مايحس بضيج يحاول يفرها (يرميها) أبعد مسافة يقدر عليها.. كان حاس بتوتر غير طبيعي.. وصل فيصل لأنه كان متواعد وياه يتلاقون فهالمكان.. شافه فيصل من بعيد حس ان في شي مضايقنه وموترنه.. تقرب وحط ايده على جتفه.. فيصل: خير ان شاء الله شو فيك متضايق جي.. ناصر: خرعتني ياريال قول شي انطق فجأة ييت جي.. فيصل: ههههههه عدال يالحرمه.. ناصر: عنلاتك انزين فيصل: هيه جي اضحك مب من شوي شكلك تقول هموم الدنيا على صدرك.. ناصر: لو تسمع الي انا سمعته بيصير هم على صدرك بعد.. فيصل: خير خوفتني شو الي صاير؟ ناصر: فطوم دمرناها يا فيصل.. فيصل: نعــــــــــــم؟؟ كيف يعني فهمني.. ناصر: توني شفت سلطان مبركن هني تقربت منه ورمسته.. كان متضايق وطلع الكلام الي في خاطره يمكن بدون لا يحس باللي وياه.. قالي انهم ناوين ايوزون فطوم لريال كبير فالعمر.. حسب الي فهمته هو متضايق ان ليش يعاقبونها بهالطريقه؟؟ فيصل: صدق ليش يعاقبونها جي.. هم يدمرونها بزيادة.. ويحلون المشكلة بمشكلة اكبر منها ناصر: اسكت يا فيصل متلوم والله اني متلوم فهالبنت.. فيصل: يشهد الله يا ناصر ان البنت زينه عمرها ماسوت شي.. بالعكس كنت تبي الصراحه احبها.. لكن تدري الشيطان لحس مخنا وعمانا عن كل شي.. وصح اني ظهرت وياها بس كانت مع طفوليتها احسها بريئة والله ناصر: الله يعينها المسكينه .. انا وانت عايشين حياتنا محد قادر يسويلنا شي.. وهي المسكينة تاكلها بسببنا فيصل: تدري يا ناصر من عقب هالسالفة طرى على بالي فكرة اني اخطبها واستر عليها .. ودام اني اعرف البنت وواثق فيها تقريبا ليش لا.. ناصر: والله يا فيصل اتسوي خير في حياتك دنيا وآخرة.. ترا البنت زينه وايد وانت عارفنها اكثر فيصل: بس ياناصر خايف من ردة فعل سلطان.. واخو البنت مني.. ناصر: انت اتعرف سلطان انسان متفهم وايد وشوي عقليته متفتحه .. تقدر تقول له الي في خاطرك وهو يدبر الموضوع ويا ولد عمه فيصل: خل اسير العمره ويصير خير ناصر: انت مينون.. شو تتريا لغايه ماترد من العمره البنت عرست.. سير رمس سلطان الحين لو تقدر ماظني مداه يرقد .. فيصل: ناصر يالخبله انت شو فيك.. اصبر تريث علي شوي.. والصباح رباح ناصر: فيصل متلوم والله.. اتخيل حال البنت وهي فهالقرار الصعب.. كل لحظه الم تعيشها احس انا سببها . فيصل: عساه خير.. يالله عيل بسير البيت تامرني على شي ناصر: خبرني ان سويت اي شي بخصوص الموضوع فيصل: ان شاء الله مع السلامه.. ناصر: في امان الله .. عبيد: انا ماعندي اعتراض يا حور انج تشتغلين... بس شي خارج عن إرادتي مب قادر اتحكم به حور: بس حبيبي اذا تمينا على هالحال وايد مشاكل بتواجهنا في حياتنا مابقدر اتحملها.. عبيد ليش ماتتحدى نفسك وتتغلب على هالشي.. انت واثق فيه وهذا يكفي.. فلا تنسى شي واحد ان هذا الشيطان الي يبا يهدم اي علاقة بين اثنين عبيد تم ساكت ومنزل راسه.. تقربت حور وحطت ايدها على جتفه وطبطت عليه حور: غناتي عبيد... حاول ارجوك... شو رايك انشاور شيخ دين عن دعاء تردده في مثل هالمواقف عبيد ابتسم لها: خلاص يا حور لج وعد مني بإذن الله اقاوم اي احساس اييني من الغيره واسوي الي قلتي عليه حور استانست من الخاااطر ومن فرحتها لوت عليه وابتسم هو مستانس.. وسمعوا صوت ام عبيد تناديهم عشان يتعشون وطلعوا من الغرفه والبسمه والحب ماتفارق عيونهم وشفاتهم بوعبيد: حي يالله ببنتي والي في بطنها.. عبيد: وليش انا مالي ترحيب؟ بوعبيد: ههههههه... انت الترحيب قله اقرب بوفهد.. عبيد تقرب من ابوه وحبه على راسه.. : بس ترا صار اسمي بومنصور.. بوعبيد: ودي بيوم اشوفك تستقر على راي عبيد: لله الحمد استقريت على احسن راي في حياتي وهو زواجي لبنت عمي استحت حور وابتسمت ابتسامه ممزوجة بالحيا .. مجد كانت حاسه بملل فهاليوم.. صح ان الوقت متأخر بس حست ان فيها طاقة للرسم.. قعدت تخربط وترسم .. فالطاولة الموجودة فالحوي.. كانت تدري بوجود أحمد فالميلس ويا ابوها بحكم انه بدا يساعد ابوها في تجارته اليديدة... رن تليفونها شافت ان الرقم غريب ترددت انها ترد بس ردت.. مجد تمت ساكتة راشد: ألووو.. يدووو.. ألووو مجد: الو منو؟ راشد تم ساكت .. منو هالصوت الغريب .. توقع الي ترد عليه حرمه عودة ... : لو سمحتي مب جنه صاحبة هالتليفون حرمة عودة.. مجد: سلطان عن الإستهبال انا بنت خالك .. راشد: عيل انتي شكلج مخربطه شرات الحرمة العودة.. ماختلفنا تسمحين لي اختي اسألج سؤال وقتها استوعبت مجد انه مش سلطان وتذكرت موقف يدتها يوم دقت بالغلط راشد: اختي ماتبيعون هالرقم تراني شراي.. مجد وهي عاقدة حياتها: لا مب للبيع ورجاء لا تتصل مره ثانيه .. راشد: السموحه.. وبند الخط قبل لا ينسحب التليفون من مجد.. أحمد: ألووو صدت مجد مصدومه منو الي سحب عنها التليفون.. شافت أحمد وراها عصبت.. : وانت بأي حق تسحب التليفون.. أحمد: بحكم اني ولد عمج واخاف عليج.. لأني حسيت من اسلوبج ان في حد يلعوزج.. مجد: اعتقد عندي ابو يخاف علي ومسؤول عني.. أحمد فر التليفون عليها معصب: تدرين انتي مو ويه حد يسوي لج خير.. مشى عنها وعطاها ظهرها وهي مغيضه: لا والله بتذلني يعني.. ؟ وبعدين الي يسوي خير مب بهالطريقه الهمجية يسحب التليفون لا احم ولا دستور.. أحمد أشر لها بإيده وهو ماشي فدربه دون لا يصد صوبها .. ماتت قهر من الخااااطر .. مجد: سخيف تافه.. لا تيي بيتنا مره ثانيه .. أحمد: لا يكون انا ياي عشانج ولا عشانج .. مجد تفشلت ماقدرت ترد عليه .. شلت اوراقها واقلامها ومشت صوب الفيلا عشان تدخل واحمد يطالعها بنص عين وهو مقهور منها.. خقاقه.. ياربي الله شو بلشني بهالحب.. دشت مجد غرفتها وفرت كل الأغراض على السرير: ياربي يقهر هالإنسان.. افففففف ليش تستوي لي هالمواقف وياه؟؟ مابا افكر فيه مابا؟؟ .. .. مرت الليله بهدوء .. الا عند فطوم الي ماقدرت تنام الليل وهي تعض اصابعها ندم على كل ذنب اقترفته وقاعده تتعاقب عليه الحين.. في حاله ماتحسد عليها ابدا.. يودت المخدة (Pelow).. وحضنتها وقعدت تصيح على حالها.. تذكرت فيصل .. كانت تسبه بكل الكلمات لأنه له دور للي وصلت له.. كرهت الإنترنت وكل شي يتعلق به.... طبعا ماتلوم الإنترنت على الي وصلت له.. . لكنها تلوم نفسها الشيطانيه الي وصلتها لهالشي.. الإنترنت فيه الزين وفيه الشين.. حسب عقلية الفرد واستخدامه له.. وهي للأسف سائت استخدامه.. تحملي ثمن غلطتج يا فاطمة.. لكن الحلو ان يغلط الفرد منا ويتعلم من خطئه ويتجنب تكراره.. ... اليوم الثاني فالوزاره مراجع: لو سمحتي وين اودي هالأوراق؟ حور: عند واحد اسمه عماد .. بتلاقي مكتبه ثالث مكتب على اليسار وانت طالع من هني.. المراجع: مشكورة يزاج الله خير.. حور وهي منزله راسها ومندمجه بشغلها: العفو.. وعلى طلعة المراجع دخل عبيد .. انصب الغضب في راسه لكنه تذكر وعده ورفعت راسها حور من شافته .. دب الخوف قلبها.. تنتظر ردة فعل عبيد .. راح المراجع وعبيد دخل عطى حور الأوراق وابتسم لها: وهذي الأوراق اعطيها لأحلى عيون عشان تراجعها وتوقعها بإيدها الذهبيه الناعمه هاي.. ضحكت حور وهي مستانسه ان عبيد حاول ونجح هالمره وهي بشارة خير.. وعلى هالكلام كان خليفة واقف عند الباب وسمع خليفه: احم احم .. خوش والله قلنا انكم معاريس بس لا تنسون انكم في مقر عمل.. ضحك عبيد وصد صوب خليفه: ياخي خلك كووول... انت روحك مب مقصر هاي الا مره وحده سويتها خليفه: لا والله .. يالله مكتبك بسرعه عبيد: لا حووووول مشكلة يوم الربع يكونون مدراء عليك فالدوام (مقر العمل) .. حاضر سي دي.. خليفه: بوفهد لا تنسى بس تخلص معامله الي اسمه مروان الفلاني.. عبيد: اولا انا ماعندي شغل واسطات وثاني شي .. صار اسمي بومنصور.. خليفه: سبحانك يا مغير الأحوال.. وبعدين مب واسطة.. هذا نحتاج أوراقه في اجتماع باجر عشان اللجنة توقع عليه .. عبيد: هيه زين قلت لي.. هههههه يالله سيدي بسير تامرني على شي.. خليفه قبضه بصوت واطي:انتوا الشباب تعرفون فالمغازل ممكن شوية دروس .. الظاهر الحرمة ملت من استايلي حور ماقدرت تيود عمرها ضحكت وعبيد وياهم . .. عالمغرب التقى فيصل ويا سلطان بعد ماصارح أهله انه ناوي يتزوج وحاط وحده في باله .. واهله ماعندهم اي مانع وتشجعوا للموضوع لأنهم يبون فيصل يتزوج .. سلطان: خير فيصل شغلت بالي شو هالموضوع؟ لأن الصراحة احس راسي خلاص مايتحمل اي مصايب يديدة.. __________________ فيصل: لا ان شاء الله كل خير.. ولا تحاتي .. صح اني مفتشل وانا اكلمك في هالموضوع ... بس ما باليد حيلة.. (فيصل كان متفق ويا ناصر انه مايبينون لسلطان انه عرف بموضوع فرض الزواج على فطوم عشان مايتحسس ويظن ان هالشي عشان الشفقة ) سلطان: قول من الآخر وعن هالمقدمات.. فيصل: اذا من الآخر بتريحني بس ماباك تاخذ الموضوع بأي حساسيه.. لكن انا مافكرت ارمسك فالموضوع الا بعد تفكير عميق وقناعة بالي ابا اسويه.. انا مب ياهل عمري 25 سنة .. اعتقد تكفي اني اقدر اتخذ قرارتي.. سلطان انا قررت اني اخطب بنت عمك وعن قناعه صدقني.. لأنها بنت يشرف كل واحد انه يناسب اهلها. او اني بالمعنى الواضح اناسبك انت سلطان في خاطره استانس ان في حل بديل لمشكلة فطوم.. بس في شي مضايقنه يمكن احساسه ان هالشي شفقة.. او لمجرد تصحيح خطأ.. سلطان: فيصل الأمر كله بإيد اخوها وابوي.. واخوها بالأخص لأنه عارف بكل شي.. خصوصا عارف انك انت هو .. فيصل قاطعه: ارجوك يا فيصل لا تقول شي عن الي صار قبل.. بغظ النظر عن الي صار .. فطوم كانت في بالي لأن ماشفت منها اي غلط... واخوها ايوزني اياها احسن من غيري وانت فاهم قصدي.. سلطان مقتنع برمسة فيصل.. بس خايف من ردة فعل جاسم.. : شوف انا وياك بكل كلمة تقولها.. بس خلني اتفاهم ويا جاسم وارد عليك ان شاء الله... وشو رايك انأجل سفرة العمره كم يوم لغايه مانشوف هالموضوع شو بيصير فيه.. فيصل: على رايك ماعندي اي مانع.. ابتسم سلطان وحس براحه كأنه هم وانزاح عن صدره.. : على خير ان شاء الله هذا جزء صغير لخاطر عيون الي تأخرت عليهم وعتبانين علي .. وعيون الي يسألون عني ويراضوني فديتهم طبعا هاي مقبلات .. تصبيرة لغايه ما اخلص امتحاناتي ان شاء الله بتاريخ 7-6-2006 وبنبدأ رحلة الإجازه الصيفيه .. ووعد مني اكتب اجزاء اطول فالصيف ... أرد واقول هاي تصبيره J شو تتوقعون ردة فعل جاسم؟؟ بيوافق؟؟ مجد وأحمد.. الظاهر الوضع مكهرب بينهم... لوين بيوصل الحال؟؟ عفرا .. تقريبا عرفنا مصيرها.. هل هذا حل منطقي لحال وحده مثلها ام عندكم توقعات اخرى؟؟ (سؤال شبه للمناقشه في مثل هالقضيه) عبيد.. والتغيير اللي بدأ فيه.. إيجابي لحياتهم؟؟ ام انه مابيقدر وبيرجع لغيرته القاتلة؟؟ فطوم لو عرفت برغبة فيصل.. شو ردة فعلها؟؟ سلطان وشما.. شو ردة فعل الأهل لو عرفوا برغبة سلطان؟ MiSs MrMr |
الجزء الخامس الفصل الثاني =-=-=-=-=-= نش من مكانه معصب .. ومشى صوب الباب ورد صد صوب سلطان.. : بس يا.. سلطان: شوف يا جاسم.. لا تخلي غيرتك تدمر مستقبل اختك.. الحمد لله الأمور هانت وانتهى الموضوع باللي فيه.. لا تخليه يكبر.. لا تحل المشكلة بمشكلة أكبر منها.. جاسم:بس كيف تباني اناسب انسان كان السبب في تعب امي وتعبي والضيج الي نحن فيه... عمري ما مديت ايدي على خواتي.. ولكن الي صار خلاني اجتل اختي من الضرب.. سلطان: اللي سويته شي طبيعي اي اخو يسويه .. بس بعد حط في بالك ان البنت عمرها 17 سنه.. ياااهل يا جاسم مراهقه.. انا وانت كنا فهالعمر يوم من الأيام.. وتعرف كيف كانت افكارنا.. وكيف الربع يأثرون.. جاسم: بس يا سلطان.. قاطعه سلطان: شوف يا جاسم .. مثل ما انت اخوها.. انا بعد اخوها لا تنسى انها ربت وكبرت في بيتنا.. بخليك اتفكر ورد علي خبر.. واذا اقتنعت ووافقت.. كلمني عشان نفاتح ابوي بالموضوع.. ونش سلطان بيطلع من الميلس.. وتوه كان بيظهر زقره جاسم.. صد.: هلا.. جاسم: بيي وياك نسير عند عمي نفاتحه بالموضوع.. بس على شرط.. سلطان: والي هو؟؟ جاسم: مابنقول لفطوم ان هو فيصل.. بنقول لها إنه مش الريال العود .. سلطان ابتسم.. وطبطب على جتفه.. : بارك الله فيك.. والله يوفقها يارب.. ظهروا سوا من الميلس وركبوا الموتر وساروا عند بوسلطان البيت عشان يكلمونه بالموضوع.. ويشوفون رايه بالموضوع.. .. .. مجد: اااااااااه يا خلوود هالكورس صدق عوار راس.. هلكت من بروجكت للثاني خلود: مب أردى من حالي.. انا الحق على شو ولا شو.. على تحضيرات الزواج ولا الجامعه.. مجد: انتوا حجزتوا الصالة وجي ولا بعدكم؟ خلود: كان مقرر نبدأ.. بس ماشي وقت والظروف ماتسمح حاليا.. مجد: اهااا يالله الله يعين.. خل اخبرج شو صار البارحة.. خلود: شو صار؟ مجد: اااااااااه يا خلود .. كل يوم اكره هالإنسان الي اسمه احمد اكثر عن الي قبله.. ؟ خلود: بل.. ليش بعد؟؟ مجد: سمعي السالفة.. واحكمي بنفسج ويلست تقول لها السالفة وكيف ان احمد سحب تليفونها وهزبها.. خلود: ههههههههههههههههه.. مجد: جيه تضحكين؟ خلود: ويدي.. حرام؟؟ ولا منقود مجد: لا بس الموضوع مايضحك.. خلود: اضحك على هبالتكم انتوا الإثنين.. تحبون بعض.. اوه سوري اقصد معجبين في بعض وتكابرون.. مجد: لا والله احين انا طلبت رايج فينا؟؟ ولا رايج فالموضوع.. ؟ خلود: شو بعد تراني قلت لج رايي فالموضوع. مجد: عيل احتفظي برايج أحسن.. ويا هالويه انا ماعندي سالفة اقولج الموضوع خلود: ههههههههه.. والله اضحكين مجود مجد: مهرجة وانا مادري خلود: مجد نصيحة مني.. لا تسوين شي يدفعج الثمن غالي وتخسرين احمد.. سكتت مجد وسرحت بأفكارها خلود: مجد ماباج تزعلين من كلامي.. بس قلت لج الصراحة.. مجد بإنفعاال: اوووه خلاص اوكي بس لا ترمسين عنه اتنرفز.. انا مب خسرانه شي .. ألف من يتمناني.. خلود: على راحتج حبيبتي.. بس باجر بتيين وبتقولين خلود قالت.. وتفادت مجد كلام خلود وغيرت السالفة وقعدوا يسولفون عن تحضيرات العرس وغيره.. .. . . .. بوسلطان: بس يا جاسم ماتشوف ان فاطمة صغيره على الزواج بعدها؟؟ جاسم سكت حس عمره ماعنده شي يقنع فيه عمه..: والله يابوي (احتراما لأنه هو الي رباه يناديه بأبوي) الزمن تغير والأحسن البنت تعرس بسرعه.. زمن يخوف.. سلطان: صدقه جاسم يا بوي.. وبعدين تراها مب صغيره وايد.. ماشاء الله السنة بتخلص ثانويه وبتدخل الجامعه.. وغدت حرمه ماشاء الله.. بوسلطان: الي تشوفونه.. انتوا عيال هاليوم وتعرفون مصلحة خواتكم اكثر.. بس شو عن الريال؟؟ من ولده؟؟ وشو يشتغل وقعد سلطان يقول كل شي عن فيصل.. وانه ربيعه من يوم ماكان فالمدرسة.. بوسلطان: يعني انت تعرف الريال عدل.. سلطان: هيه نعم اعرفه زين مازين.. وضامننه . بوسلطان: بس المهم راي جاسم بالموضوع.. هو ولي أمرها.. جاسم: حاشى لله بوجودك مالي أمر على خواتي.. ربي يطول بعمرك.. بوسلطان استانس من رمسة جاسم.. وحس فعلا انه ربى ريال ويعتمد عليه يوم انه يوزه خلود: يسلم راسك ياولدي جاسم.. بس هذا مايمنع اني ماسألك عن رايك؟ جاسم: انا من راي سلطان.. بوسلطان: على بركة الله استانس سلطان في داخله ان الموضوع ترتب.. وكل شي بيتم على خير ان شاء الله.. وان فطوم في واحد بيستر عليها .. صح ان البداية غلط كانت وانتهى الموضوع بغلط.. بس ندم فيصل وتوبته لله يكفي هالشي انه يحس ان بنت عمه بتكون بأمان.. ووعلى طول من ظهروا من الميلس اتصل في فيصل وقال له.. الي صدق من الخاطر استانس.. وكلم هله وقالهم ان هل البنت موافقين.. وجاسم من وصل البيت فاتح أمه بالموضوع.. الي استانست.. مهما يكون قلب الأم على عيالها.. بس ماكانت قادرة تسوي شي حزة عناد جاسم.. لكن جاسم ماقال لأمه من فيصل فالحقيقه عشان ماتقول شي لفطوم.. وصعد الدري ودخل غرفه فطوم الي كانت منى ياسه فيها وتذاكر.. جاسم: منى طلعي برع ابا أرمس فطوم شوي.. منى: وليش في اسرار فهالبيت انا ماعرف عنها؟؟ جاسم: منى قلت لج اطلعي تراني مب فايج لهالرمسه.. منى: اف اف الكل معصب فالبيت.. وتوها منى بتظهر.. يودها جاسم من ظهرها وسحبها صوبه.. وباس راسها: فديتج لا تزعلين.. انا ماعصب على آخر العنقود.. منى صدت صوب فطوم ورفعت حياتها: منو قدي.. ويقولون لييييش طالعه شاعره.. ماهو لو مابستوي شاعره انتوا تخلون الوحده تستوي غصب شاعره.. ابتسم لها جاسم وسكر الباب وسار صوب فطوم الي كانت ياسه على سريرها وتلعب بطرف المخدة.. يلس حذالها... وصد حذاله على الكوميدينه شاف برواز فيه صورته مع خواته.. بس وهم صغار.. فهالصورة كان جاسم عمره تقريبا 19 سنة.. لوى بإيده حوالين جتف فطوم.. حس بداخله انه مشتاق لهالشي من زماااااان.. اخته مهما يكون ومهما صار تبقى اخته.. وفطوم من حست بحراره ايد اخوها وحنانه.. ماقدرت تيود عمرها وصاحت لوت براسها على جتفه.. : سامحني جاسم الله يخليك سامحني مالي غيرك فهالدنيا.. جاسم باس راسها : سمعي اذا بتيلسين اتصيحين بظهر.. فطوم نشت اصطلبت في قعدتها وشلت المنديل ومسحت فيه دموعها: خلاص خلاص.. جاسم: هههههه جي اباج.. اتشوفين هالصورة.. كم كان عمري فيها؟ فطوم: 19.. جاسم: يعني اكبر من العمر الي انتي فيه احين بسنتين.. صح.. فطوم: هيه.. جاسم: تدرين انا فهالعمر شكثر بلاوي سويت.. الله يستر علي بس.. سويت وايد اشيا.. بس ماكان عندي شخص يوجهني ويرشدني ويقول لي هذا غلط وهذا صح.. كنت احس عمري ريال عود من اللحظة الي شلت فيها مسؤوليتكم.. وكنت احس ان محد له الحق انه يحاسبني بأي شكل من الأشكال.. صح ان عمي ماقصر وكان مكان الأبو وزود.. ولكن بعد ماكان يقدر 24 ساعه يفرغ نفسه لي.. يوم كبرت شوي وعقلت.. عرفت ان لي خوات واخاف عليهن اكثر من روحي.. مابا شي يصيبهم.. تركت كل شي.. وتفرغت لكم.. وقلت الوداع للمراهقة.. لغايه اليوم الي كان شرات الصفعه بالنسبة لي.. لكن الحمدلله الله ستر ومضى كل شي على خير..بس اباه يكون درس.. نحن قدرنا عمرج وان عطيناج شوية حرية زايدة.. بس لازم تاخذين بعين الإعتبار مش كله مره تسلم الجرة فطوم: توووووبه مابعدها توبه ياجاسم.. بس احين صار لي جريب الشهر بكمل واحس اني بموت.. جاسم: ماعليج حصل خير.. ومن باجر تروحين المدرسة فاهمه فطوم وهي فاجة ثمها من الفرحة: صدددددق جاسم: هيه صدق.. ابا اختي تكون متعلمة وتستوي دكتورة.. ولا نسيتي حلمج وانتي صغيره فطوم فرت عمرها في حضن اخوها من الفرحة : والله فديتك .. لك وعد مني ارفع راسك واييب ذيج النسبة الي تشرف العايله كلها.. جاسم: وانا واثق من هالشي.. بس ها.. ترا نحن في شهر 3 احين.. يعني باقي 3 شهور.. شدي حيلج فيهم فطوم: من احين ببدأ جان تبا بعد جاسم: المهم انتي تبين مب انا.. فطوم: خلاص ولا يهمك.. بس المدرسة شو بيسوون على موضوع الغياب؟ جاسم: بسير ارمسهم ماعليج انتي .. اخوج انا افا عليج.. فطوم: فديتك والله.. والدروس الي فاتتني جاسم: بييج مدرس للبيت يفهمج كل شي.. لاتحاتين فطوم نزلت راسها كأن في شي في خاطرها بس مب قادرة اتطلعه.. جاسم: ليش الحلوة ساكته؟ تمت ساكته جاسم: اعرف الي يدور في بالج.. عن عدنان؟ اظني انتهينا من النقاش بهالموضوع فطوم رفعت راسها وهي تنتظر شفقة او انه يقول انه يمزح.. جاسم: الريال ماينعاب بشي.. ليش الإعتراض فطوم فجت عيونها والدموع انترسن فيها وكله ترجي.. جاسم: ياما بنات خذن رياييل اكبر عنهم ومرتاحين.. بين امي وابوي كان قريب ال10 سنين.. فطوم سكتت وحبست الغصه الي فيها ماقدرت تنطق بأي كلمة.. خافت ان تعارض والعلاقة الحلوة الي انبنت بينها وبين اخوها تنهدم مره ثانيه وهي ماتبا هالشي.. وهي منزله راسها: الي تشوفه ياخوي.. جاسم تقرب منها وباس راسها: اباج تكونين واثقه من شي واحد.. اخوج يحبج .. والي يشوف انه اخير لج يسويه.. وعمره مابيضرج.. يلا حبيبتي انا ساير تامريني على شي فطوم: لا سلامتك.. وطلع جاسم وهو قلبه معورنه على اخته بس قابض روحه مايباها تعرف انه فيصل عن تعارض من ظهر جاسم .. فرت عمرها فطوم على الفراش وقعدت تصيح.. آآآه ياربي شو هالغلطة الي سويتها في حياتي وياسه القى ثمنها غالي.. استاهل انا اعرف اني استاهل.. انا الي يبت هالشي لعمري.. ياما فالمدرسة وامي واخوي نفسه حذرونا من عواقب هالأمور بس كنت اعارض نفسي والكل.. اااااه يارب سامحني دشت منى فهالوقت وشافت حالة فطوم هي تعرف بموضوع الريال العود بس ماتدري بالتطورات الي صارت.. سكتت وماحبت تزعج فطوم عن تضايق زود.. جاسم من طلع مافهم هو ليش سوى هالشي.. ليش ماقال لفطوم ان الريال غير واصغر شرات ماكان ناوي يقول لها قبل لا يدخل.. نزل وفهم امه انه ماقال شي لفطوم وانها بترد المدرسة من اليوم الثاني ام جاسم: بس لازم تعرف هي بتاخذ منو مايستوي جي جاسم: اميييه رمستي واضحة.. ماباها تعرف شي.. هي تعرف ان عدنان الي ياينها.. وخلاص خلها بهالشي.. وهي رضت .. ام جاسم: بس.. جاسم يقاطع امه: لا بس ولا شياته.. دخيلج امييه انا راسي عورني.. دخييييييييلج لا تناقشيني فهالموضوع.. ودي تملج اليوم قبل باجر.. ام جاسم : لا حول ولا قوة الا بالله.. يااااارب وفج بنتي.. وهدي سر ولد.. جاسم: كثري من دعواتج ترا احتاج لها والله ام جاسم: من لي غيركم فهالدنيا.. اكيد بدعي لكم دوم .. . . .. فيصل: أميه الله يخليج احين دقي ام فيصل: ياولد اثجل شو هالحركات.. بتصل بها باجر ان شاء الله فيصل: لا احين ريم: امي اتصلي تدرين به ولدج حنان فيصل: انتي جب.. ريم: انا ريم مب جب.. فيصل: اوهوووووو .. اميييه عاد دقي ريم: دقي تراه مابيبات الليل فيصل صد صوب ريم محرج: اقسم بالله ان نشيت من مكاني بييج وبضربج بخليج تندمين ريم: بل شرير.. هذا وبعدك ماعرست.. لو تعرس السجين بمخباك 24 ساعه ام فيصل: لا ولدي مايسويها.. ولدي ريال ذرب.. ريم: عاشوووو مدحوووه المعرس فيصل: ترومين اصلا.. احسن من خطيبج الدعلة ريم: اه لو سمحت.. لا تقول عن خطيبي دعله.. رياااااال ونعم الرياييل فيصل: هيه صح انا اشهد ريم: امييييييه شوفي فيصل شو يقول عن عادل ام فيصل: اوهووو انتوا الواحد لا قعد وياكم مايقدر يركز في شي.. كل واحد يحن من صوب.. عطني رقمهم بتصل وعن الحشره وانتي لمي ثمج قبل لا اييج ريم: هههههه اوكي ياحلوج وانتي معصبه فيصل: هاج امي .. ام فيصل: لا حوووول اقولك الرقم اتييب لي التليفون فيصل: اميييييه تراني دقيت من رقمي يلا عاد.. ام فيصل هزت راسها وشلت التليفون.. سمعت صوت وحده: الوووو ام فيصل: الو السلام عليكم منى: وعليكم السلام... منو الحلوة الأمورة الي على ال خط .. ام فيصل ضحكت .. حست بها ياهل صدق.. غطت السماعه: انت ناوي تاخذ ياهل شكلك؟؟ عيل انا تقول لي الحلوة الأمورة.. ريم: اتدلع ام ريلها من احين .. بنات اخر زمن يعرفن يتمصلحن فيصل: لوسمحتي عن الغلط على حرمتي.. ريم: توك غلط على بعلي العزيز.. فيصل: بعلج حاله خاصه ام فيصل: هلا بنتي اشحالج؟ منى: انا بخير الحمدلله.. انتي اشحالج؟؟ انتي اكيد خالو شريفة ام فيصل: انا بخير يسرج حالي.. لا غناتي انا ام فيصل.. منى: بس امي ماتعرف وحده بإسم ام فيصل.. غطت السماعه..: هب هينه تعرف ربع امها بعد.. صدق بنات اخر زمن..: انزين امي عطيني امج برمسها منى: شو بتقووووولين لهااااااااا هني بدت ام فيصل اتحرج ماعيبها الوضع..: بنتي عطيني امج ولا ببند منى: انزين انا اسولف لا تزعلين مني.. هاي امي.. مع السلامه ريم: عاشت الوالدة عطتها العين الحمرا من احين.. فيصل: اميه خلج رقيقه ويا مرتي ام جاسم: السلام عليكم.. ام فيصل: وعليج السلام.. هلا ومرحبا.. منو ام فاطمه؟ ام جاسم: هي نعم ام فاطمة وياج.. ام فيصل: ماشاء الله.. اشحالج.. ؟؟ شخبارج عساج طيبه ان شاء الله ام جاسم: طيبه الحمد لله يسرج حالي.. منو وياي؟ ام فيصل: وياج عزّة.. أم فيصل.. ام ربيع ولدج .. الي ناوين نخطب بنتج فاطمه لولدنا.. ام جاسم: هييييييه تذكرت.. يا حي الله اختي عزّة.. اشحالج شخبارج.. عساج بخير ان شاء الله ام فيصل: بخير الحمد لله ربي يعافيج.. منو الي كلمتني توه فاطمه ماشاء الله؟ ام جاسم: لا هاي بنتي الصغيره منى.. لعوزتج هاي.. مسوده الويه دوم هاي سواتها ام فيصل ارتاحت نفسيا..: لا حليلها حبوبه تدش القلب الله يخليها.. ام جاسم: ويخليج يارب.. وقعدوا يرمسون ويتفقون على يوم يزورونهم فيه.. فيصل ماخلا امه ترمس عدل كل شوي يهمس بإذنها.. يوم الخميس هذا الي هو ورا باجر.. ام فيصل: الصراحه يا ام جاسم ولدي وايد مستعيل .. يعني اسمحي لي حتى اني داقة لج هالحزة بس من حنته.. قلت له عيب وهو عيا الا اني ادق احين ويبا لو يستوي بالخميس هذا ام جاسم ضحكت: هههه.. دوم جي الأولاد.. الله يحفظه يارب.. وافا عليكم حياكم الله في أي وقت.. البيت بيتكم.. ام فيصل: خلاص عيل ان شاء الله بالخميس انا وبنتي العودة وفيصل وابوه بنييكم ان شاء الله.. ام جاسم: بإذن الله .. حياكم الله .. بتنورون المكان.. أم فيصل: منور بهله. وبندت عنها.. وصدت صوب فيصل: ارتحت احين فيصل وهو منسدح على الكنبه يبدل فالقنوات هيه.. ريم: هيه لازم يرتاح والدليل خذ الريموت عني واستولاه.. هات فيصل: انا معرس لازم اتدلعوني مب تهزبوني.. ريم: الحمد لله والشكر.. ام فيصل: بس تدري ارتحت لها وايد ماشاء الله عليها حرمه ذربه وطيبه مبين عليها.. فيصل: هيه ادريبها عمتي فديتها.. ام فيصل: اشوف نسيت امك وبديت تتفدى عمتك فيصل: افا والله افااااااا.. انتي امي وتاااااج راسي .. ام فيصل: فديتك والله.. ريم: انزين وشو عن العروس تقولين ياهل.. ام فيصل: لا حليلها ظلمناها.. طلعت اختها الصغيره الي تلعوزني.. ريم: ههه اقول انا بعد.. شو يبا فيها دام انها ياهل.. فيصل: كيفي يمكن ابا اربيها ريم: افااااا وانا اختك حبيبتك اولى بالتربيه.. فيصل: طاعو هاي انتو.. العيوز.. ظروسها شوي وبطيح تقول تربيه.. ريم: اصلا القعدة وياكم ماتنفع.. كله تحطون علي انا الفقيره المسكينة.. لازم ارمس ريلي الوحيد الي يدلعني فديته فيصل: عشتو اتدلعه وتتفداه يدامنا مسودة الويه ام فيصل: مايخصك في بنتي فاهم.. كيفها تتفدى ريلها.. ترا حرمتك بعد بتتفداك باجر.. فيصل: ويييييييه الله يسمع منج جان زين لو باجر.. ريم: هههههههه مستعيل على رزقه فيصل: لا وانتي الصادقة.. مستعيل على فطومتي.. ريم: ههههههههههههههه تعالي سمعيه يا فطوووم قام يتفداج من احين وهو مايعرفج اطالعها فيصل بصمت وهو يضحك.. حليلج ماتدرين .. .. .. نوره وفيصل *تذكير: نوره إخت خلود وسلطان* كانو طالعين ويا اهل فيصل سايرين الحديقة يقضون يومهم فيه ومنها تغيير جو.. لأن يومها الجو كان حلو ومعتدل.. كانت اللمة والقعده واااايد حلوة.. كل اخوان فيصل وابوه وامه واليهال ... خالد: اقول فيصل كم باقي على بيتك وتخلص من بنيانه؟ فيصل: والله المقاول يقول بعد شهرين ان شاء الله ولين مانفرشه بياخذ وقت.. عادل: عشو مستعيل ياريال بتودرني فالبيت روحي اسمني بتوله على توته وفروته.. خالد: ومنو هاييل؟ عادل : هالعسولات الي يدامك.. فيصل: يطري بناتي مهره والعنود.. خالد: ههههه.. حليلهم والله.. نوره: فيصل شوف شوف صورهم انا ناسيه تليفوني. فيصل: اوكي.. ويود فيصل تليفونه وصورهم.. عسل والله http://up.w6wup.com/up2/2006/06/11/w...5522e6a921.gif .. عادل: يوم اقولك توته وفروته ماصدقتني.. خالد: عاد انا مرتي حامل وقالولها الجنين ولد.. صد فيصل واطالع نوره ونوره ابتسمت له بهدوء كأنها تقول له صبرك وهدي ماعليك منه.. فيصل: بالبركه ان شاء الله.. يتربى في عزك.. خالد: ها ابوي شو رايك بييك حفيد يشيل اسمك. بوفيصل: كل احفادي شايلين اسمي.. الله يخليهم لي ويطول بأعمارهم.. خالد عنده زوجتين ام الولد الي فيه ثلاسيميا. طيبه وحبوبه وايد.. ومايعيبها تصرفات زوجها لكن ماتروم عليه.. اما هاي الي حامل احين .. فيها وغادة... زوجة خالد (حنان) الثانيه: هيه والله يوم قلت لخالد اني حامل بولد تينن تخبل .. تدرين ترا من عرس للحين وهو في خاطره ولد.. والله مارزقه غير بإثنين من بعد 3 بنات.. واحين بييه الولد الثالث... نوره وهي تبتسم لها بكل طيبه: ان شاء الله ربي يسهل عليج وتربين بالسلامه ويتربى الولد في عزج وفي عزه حنان: ان شاااااااااااااء الله يارب .. .. .. . . . في بيت بوعبيد الكل كان متيمع.. اليدة وحور وعبيد ومجد وامها وابوها .. وبوعبيد وام عبيد.. جلثم: هيه ان شاء الله سلطان بيوديني العمره وياه.. عبدالعزيز: افا اميييه تبين تروحين العمره وماتقولين لنا؟ جلثم: لا بس سمعت ان سلطان بيروح قلت اروح وياه .. عبيد: يدووه انا الي سمعته انه بيسير ويا ربعه وانتي بتروحين وياهم؟ جلثم: وليش فيها شي.. تراهن حسبة عيالي عبيد بصوت واطي لحور: الله يعينهم عيل المساكين.. جلثم: اشووو قلت؟ عبيد: ها اقول اصلا لو يحلمون مابيستانسون من دونج.. بوعبيد: الا ياعبدالعزيز بغيت اخذ شورك.. شو رايك نسافر لنا سفرة جماعية فالصيف بعد عرس خلود وجاسم.. مجد: شوووووووووو نسافر.. ياي اكيد موافقين مايبالها كلام يودت اليدة الخيزرانه وخزت فيها مجد: عنبوج من بنت حشمي.. الرمسة يت لأبوج هب لج.. مجد: ماعليه انا وابوي واحد ولا شو رايك؟؟ عبدالعزيز: هاي اخر العنقود مانقدر نقول لها لا.. بس خل اشوف الميزانيه اذا اقدر ان شاء الله بوعبيد: افااا والله ماهقيتها منك ياخوي.. هاي رمسة تنقال واخوك موجود عقد عبدالعزيز حياته كأنه يباا يفهم بوعبيد انه مايحب هالشي.. : خيرك واصل يا بوعبيد.. حور: بس انا حامل اخاف.. عبيد: انتي ماشي سفر قري مكانج.. لطيفة: ياما سافرنا ورحنا وردينا ونحن حوامل ماصابنا شي.. وبعدين بتكونين لوقتها فشهرج السادس تقريبا اذا الله راد.. يعني ماشي خوف ان شاء الله عبيد: لا لا لا انا اخاف خلنا فالبلاد وايد احلى مجد: عيل انا مابا اسافر من دون اختي.. متعودة اذا سافرنا تكون موجودة.. ميثا: عبيد الله يهديك يا ولدي مابيصيبها الا كل خير بلاك متشائم.. وبعدين شرات ماقالت عمتك بتكون فالسادس يعني ماشي بيأثر ان شاء الله.. عبيد: ماعليه بسأل الدكتورة وبنشاورها اذا عطتنا التصريح وقالت انه عادي بنخاويكم.. مجد: بس ويييييين انزين؟؟ بوعبيد: انا فكرت في لبنان .. وفكرت في شمال إيران.. بوسالم ربيعي ودى مرته وعياله السنه الي طافت.. ويقول الجو حلو وبرد ومنطقة حلوة ..حتى انه ياب كذا صورة وشفتها والمنطقة رووعه.. مجد: هيه انا بعد ربيعتي ميثاني سارت تقول وايد حلو.. واستانست بس المشكلة الوحيدة اللغة.. بوعبيد: هههههه لا ماعليج من كثر ماتعاملت مع الإيرانيه هني فالبلاد تعلمت منهم شوي.. مجد: خلاص عيل خل نسير شمال ايران.. مابا لبنان سرنا لها الصيف الماضي حور: وانا بعد من راي حور.. بوعبيد: ماسمعنا راي عبدالعزيز.. عبدالعزيز: والله السفر للعيال اكثر مما هو لنا نحن.. فالمكان الي يحبونه بنروح له ان شاء الله.. مجد: يااااااااااي بنسافر.. والمعاريس بيسيرون اروبا عبيد: برايهم معاريس ماينلامون.. كنا شراتهم ترا.. حور ضحكت بحيا جلثم: انا جني طمه هني.. الكل صد صوبها وشافها محرجة وعاقدة حياتها .. مجد يتها ضحكة يودت عمرها عن تنفلع بشي. بوعبيد: افا يا أمي.. انتي الكل بالكل.. وتاج راسنا.. جلثم: اشوفكم تشاورتوا وقررتوا وخلصتوا وانا ولا سويتولي اي اعتبار.. عبدالعزيز: محشومه يا ام عبدالعزيز..والراي الأول والأخير لج.. جلثم: بعد شو.. بعد مابديتو راي مجوود علي. مجد تقربت من يدتها وهي تدعي في قلبها يارب سترك.. : افاااااا واصلا انا اروم اسوي شي بدون شورج.. احساس داخلي فالقلب (لوت عليها) قالي انج موافقه صح.. جلثم وهي تضحك وتيود ايد مجد الي حوالي رقبتها.. : فديت هالإيد انا.. اسولف بغيت اغير الجو.. اسوي سوالف شرات ماتقولون.. الكل ضحك.. وفهاللحظة دخل أحمد كان شكله هلكان وتعبان.. احمد: السلام عليكم.. الكل: وعليكم السلام أحمد: ماشاء الله وانا اقول البيت ليش منور.. أثاري النور كله هني.. (مشى صوب يدته ونشت مجد وسارت عند حور قعدت وهي تتطالعه بطرف عينها.. تقرب احمد من يدته وحب راسها).. لاخليت منج يارب.. جلثم: فدييييييييت ولدي.. شكلك ميهود وتعبان.. أحمد بعد ماباس راس ابوه وامه وعمه.. يلس عند يدته ولوى عليها: شو اقول ولا شو .. اااااااااه خلي الي فالقلب فالقلب.. صد بطرف عينه صوب مجد وهي نزلت راسها مستحيه بس محد لاحظ هالشي جلثم: واعلييييييييييه ولديييي.. يالله بالستر ومنو الي خلاك جي.. قول طلع الي في خاطرك.. أحمد: الي في خاطري كلام كثير ماتكفيه السطور عشان اكتب عليه احساسي.. الكل ضحك على رمسة احمد وشكل يدته الي صدق مندمجة.. ميثا: خل عنك هالرمسه وهالسوالف وسير بدل ثيابك عشان تتعشا.. أحمد: هو تم فيها عشا ولا غدا.. وانا اقدر ابلع اللقمة.. جلثم: ميثوو ويهد شو ياج على الولد خليه فديييييته يقول الي في خاطره.. ماباه يستهم فديت روحه.. أحمد: خلوووووني يا جماعه خلوووني اشكي الحال..آه لو كان للحب قاضي. جلثم: واخزياااااااه ولدي يحب.. ومنو هاي الي ماتستحي مسويه فيك جي.. قولي عنها احين اييها بهالعصا أحمد خز مجد بنظرة سريعه فهاللحظة الي تحركت وخشت عمرها ورا حور ببطء.. والكل يطالع احمد وينتظرونه يرمس.. وعبيد كل شوي يهمس في اذن حور وحور تضحك.. أحمد: اسمعك تراني لا تحش عيب.. جلثم: منو الي يحش فيك.. أحمد: هذا عبيد.. مايستحي.. الا وين مروه انا احس القعدة ناقصه شخص فيها ميثا وهي تحاول ترقع الموضوع عن اليدة تعرف ان مروه سايره تحتفل بيوم زواجها مع ريلها وتحتشر.. : ماشي مشغوله ويا عيالها شوي.. أحمد: هيييييه.. جلثم: ماعليك من حد قولي انت شو الي في خاطرك.. أحمد: الحب عذبني يا جلثم.. عذبني.. يودت العصا وضربته على ريله وهو من كثر ما عوره نقز من مكانه ونش.. : شوي شوي.. هذا وانا متعذب تضربيني.. جلثم: عشان تأدب.. عيل تزقرني بإسمي ياللي ماتستحي.. أحمد: شو اسوي ترا هاي الي معذبتني اسمها جي على اسمج انا شو ذنبي.. الكل ضحك يوم شاف اليدة كيف احمرت.. أحمد وهو يسوي عمره يصيح ومضايج: يعني يكفي هي ماتحس فيه ولا في حبي .. وانتي يايه تكملين علي همي.. ااااااه اروح لمنو ولا منو عشان يفهمني.. عبيد ماقدر يود عمره يلس يضحك من الخاطر: اخبرك تنفع ممثل لمسلسل في رمضان.. أحمد: هههههه هو الصراحة يتني عروض وايد بس انا مشغول ما وافقت.. نشت اليدة ورا احمد .. حس احمد من نظرات حور وعبيد ان في شي وراه.. يوم صد الا شاف يدته وراه .. توه بيشرد يته ضربة بالعصا على ظهره.. وشرد صعد الدري: الله يسامحج.. ماحبج خلاص.. جلثم: مانبا حبك خله حق جلثم.. عيل كل ها تمثيل وانا يحليلي مصدقة ان ولدي مستهم ومتضايق.. أحمد تم يضحك وصعد الدري.. وهو كل تفكيره في مجد.. حس انه قدر يفهمها حبه لو بطريقة مب مباشرة.. استانس في داخله.. ومجد تمت سرحانه وهي تتذكر كلام خلود.. بتخسرينه... .. .. .. ومرن هاليومين على خير.. وكل شي بهدوء وروتين.. العلاقة بين خلود وجاسم بدت تتحسن يوم عن يوم.. وهالشي كان مبشر بالخير.. سلطان وابوه كانو متفقين انهم يروحون بيت جاسم بعد صلاة المغرب لأن فيصل وابوه بيوصلون فذاك الوقت عشان يرمسون في موضوع الخطبة ويتفقون على يوم الملجة .. والقص وغيره.. فهالوقت كان سلطان يالس ويا امه فالصاله يسولف وياها.. شيخه: وانت ياسلطان متى الله بيهديك وتعرس.. ودي اشوفك معرس والله.. سلطان: جريب ان شاء الله جريب.. علي: ولييش ماتقولين عن انا.. شيخه: انت تو الناس عليك.. يدامك دراسه تخلصها .. شرات سلطان ماشاء الله خلص واشتغل احين دوره للزواج.. علي: مايخصني انا اذا حبيت وحده لازم اتيوزوني اياها من اخلص الثانويه شيخه: هههههه .. مانروم عليك انت .. سلطان: حليله بعده صغير مايعرف الدنيا كيف.. علي: شوووو انا صغير.. انا صف خامس مب صغير.. شيخه: لا تقول عنه صغير ولدي ريال كبير بعد.. شيخه: الا وينه خالد مابيي وياكم؟؟ سلطان: بلا كلمته قال بيظهر من بيته على طول بيسير بيت عمي الله يرحمه.. شيخه: الله يرحمه ان شاء الله.. سكتوا شوي.. ودخلت خلود وهي ترمس تليفون: ههههه حليلج والله يا زين سوالفج.. خلاص عيل الغاليه بخليج احين لأني بيلس ويا الأهل خلاف بدق لج وبنكمل سوالفنا.. شما: على خير ان شاء الله مع السلامه.. خلود: مع السلامه.. هههههه حليلها والله طيبه وايد هالبنت.. شيخه: كنتي ترمسين منو اميييه؟ خلود وهي تتطالع سلطان وتضحك: وحده من رباعتي اسمها شما.. شيخه: حليلها الله يخليها يارب.. سلطان اختبص من سمع طاري شما.. حس ان صدق قلبه ويا هالإنسانه.. وحبها ويتمناها له.. شيخه: انزين ياسلطان من شوي قلت لي ناوي على العرس جريب.. سلطان: ههههه اميه مستحيل تنسى شي.. خلود: هيه امي يبا يعرس والبنت الصراحه فناااانه شيخة وهي تفتح عيونها: ماشاء الله مخططين ومخلصين عيل.. لا شو رايك جان ملجت عليها بعد.. سلطان يطالع خلود بطرف عينه ويخزها بنظراته... : اراويج شيخه: خلك منها وجابلني.. قولي من بنته؟؟ وكيف شكلها؟؟ ومن وين عرفتها؟؟ سلطان: حبه حبه امييييييه.. وبعدين انا مستحيل اسوي شي من غير شورج.. وقبل لا حتى اقرر اني اباها او لا.. قلت بشوف هل ابوي وانتي بترضون اخذ وحده برع الأهل.. شيخه: شوف لا تظن افكاري وافكار خوالك نفس الشي.. انا وابوك ماعنا هالسوالف زواج أهل ومادري شو.. هذي سوالف أول.. واذا تبا من الأهل فخير وبركة ماعندنا مانع.. واذا من برع ترا نفس الشي.. سلطان: هيه زين ريحتيني.. لأني كنت ابا فطوم بس ياها نصيبها والبنت الله يوفقها.. ومنى صغيره علي وايد.. وهذيل الي من الأهل اعرفهم.. شيخه: افا ومجد بنت اخوي.. سلطان اختبص وخلود تيبست واعتدلت في قعدتها.. : ها لا هاي عندها ولد عم اولابها.. شيخة: خلاص وعن البنت من بنته وشو اسمها ؟ سلطان: الصراحة ماعرف التفاصيل هذي.. بس خلود تعرف.. انا يادوب سامع بهم وشايف البنت شيخه: خبرني عنها قعد سلطان يشرح حالتهم الإجتماعيه من وفاة ابوها.. وكيف ان اعمامها مالهم شغل فيها ولا ينشدون عنها.. شيخه: حسبي الله ونعم الوكيل.. وشو يعني ان امها هنديه.. عيب ولا حرام.. قاطعتها خلود: امييه انا رمست امها .. والله ماحسيت انها هنديه ماشاء الله عليها ترمس شراتنا ويمكن احسن بعد.. وطيبه ماشاء الله عليها.. شيخه: هيه ادري ترا الهنديات الي مال قبل جي يعرفن يرمسن.. شرات يارتنا ام مروان.. تراها هنديه بعد.. لا شكلها يبين انها هنديه ولا رمستها.. وطيبه وحنونه على عيالها ومربتنهم احسن تربيه.. سلطان: هاي سالفتها.. والي عيبني فالموضوع يميي.. ان البنت عمرها مافكرت تسوي شي غلط حتى وهم بهالحاله.. راضيه ومقتنعه... وبعدين هم مب فقارى .. عندهم معاش الشؤون وراتب التقاعد الي ينزل لأبوهم الله يرحمه.. لكن اعتقد مبلغ بسيط وايد مايكفيهم.. وعندهم بيت الحمد لله.. خلود تشارك وياه: وهيه امه تسوي دهن عود كمبودي من الهند اييبونه .. وبخور وعطور.. شيخه: ماشاء الله.. عيل اتكد خير.. لأن هالسوالف اتربح وايد هالأيام.. سلطان: فمادري شو رايج فيها اميه؟ شيخه: خاطري اشوف هالبنت.. احسها طيبه خلود: واااااايد امي تعاملت وياها.. ماشاء الله عليها.. بنت والنعم فيها صدق مؤدبه وخلوقه.. ودارسه بعد.. شيخه: شو ترين؟ اعزميها عندنا وخل نشوفها .. خلود: خلاص ان شاااااء الله في اقرب فرصه.. سلطان: يالله عيل انا بنش اتزهب عشان الحق اوصل بيت عمي.. خلود: الله يوفقج يا فطووووووم .. ويهنيج يااااااارب سلطان وشيخه: يارب آمين علي: اصصصصصصص بدأ سلام دانج.. سلطان: هههه ويقول ابا اعرس من اخلص الثانويه .. علي: كيفي.. ريال شيخه: كيفه كيفه.. هههه لا تفج لسانه دخيلك.. .. .. خلود كانت قايله عن شما لمجد وان سلطان يباها وجي.. وعرفت شوي عن شما وسالفتها واهلها كيف.. وان امها هنديه.. ومن وقتها وهي حاطه في بالها ترسم شما بس طبعا من وحي خيالها حسب تصويرها.. دشت عليها يدتها شافتها ياسه على المكتب وترسم ومندمجه جلثم: شو تسوين؟ مجد: ويه بسم الله .. روعتيني.. جلثم: بسم الله عليج.. شو تسوين؟ مجد: أرسم جلثم: وانتي ماتملين من مجابل هالرسومات؟ مجد: هوايتي هاي يدو شو اسوي بعد.. جلثم: الله يعطيج العافيه.. بس خفي على عيونج مب زين صدت مجد صوب يدتها وهي تبتسم لها: من عيوووووني يا عيوني.. جلثم: انتوا ماناخذ منكم غير الرمسه وياريت لو نروم عليكم.. لا اله إلا الله.. مجد ابتسمت وردت تكمل لمساتها الأخير على الصورة.. وطلعت النتيجة رووووووووعه مجد: ههههه هو اكيد البنت احلى.. بس يالله هذا الي قدر عليه خيالي.. .. .. .. كالعادة.. هاي الرسمة الي تشوفونها مأخوذة من عند هالإسبيس.. وماشاء الله عليها فنااااااااانه بالفعل.. لإلقاء نظرة.. حياكم http://spaces.msn.com/silentsplendor/ .. .. .. .. أم عمّار (أم شما): شما روحي فتحي الباب انا مشغولة.. شما وهي تمشي صوب الباب: ان شاء الله.. وطلعت من باب الصالة وسارت تفتح باب الحوي.. تشوف منو الي ياهم ومن فتحت الباب انصدمت.. خافت.. حست ان راسها انشل من التفكير والإستيعاب.. هزاع: انتي اييييه .. ماتعرفين ترمسين ولا تسلمين.. شما وهي ترفع حياتها: اعرف بس انت الي ياي وانت الي لازم تسلم الي داخل هو الي يسلم مب الي طالع.. هزاع: اخبرج.. انتي ايه بنت الهنديه يايه اونج تعلميني الأدب.. تهبييييييين الا انتي.. عمّار كان فالميلس الخارجي وسمع حشره.. طلع من الميلس يطالع شو الي صاير.. : منو هذا شما؟؟ هزاع: عم من اعمامك يالخايس.. من سمع عمار هالرمسه ربع بسرعه عشان يسير يضربه.. بس شما بندت باب البيت في ويه هزاع.. وسارت تهدي اخوها.. هزاع تم يزاعج ويحتشر.. هزاع: انتي ايييييييه .. تحسبين عمرج قدها يوم انج تسكرين الباب في ويهي.. جليلة الحيا الي ما تستحي.. اخبرج ايه انتي.. هذا بييييييت عمي فاهمه مب بيتج يا بنت الهنديه عشان تروغيني.. عمّار: شمووو هديني عليه قاهرني.. منو ها.. شما: يزول.. ها ولد عمك.. عمّار: شو يبا؟ شما: هاي حالته يوم يسكر ساعات ايينا البيت ويحتشر.. وعلى حظك انت كنت موجود هالمره وسمعته.. عمّار: ياربي يعني لازم يأذونا .. مايكفيهم الي نحن فيه.. شما: مب محتاجين لهم برايهم.. يزول الا هو .. ينبح لين مايتعب.. عمّار: بس مب حاله هاي ايينا البيت ويسبنا وهو سكران بعد.. شما: هدي اعصابك عمار.. مايسوى عليك تحرق اعصابك جي.. عمّار: بس اذا يانا مره ثانيه ورد سوى هالحركة والله ماسكت عنه ولا تحاولين اتيوديني لأني مابسكت.. شما: ماعليه بس انت سير احين وهد اعصابك وانا بدور لي صرفة وياه.. دش عمار وتمت شما ياسه فالحوي متضايقه.. تذكرت اليوم المشؤوم.. فاللحظة الي شافت فيها هزاع خافت.. انه درى انها كانت هناك عن عفرا اذا فضحتها.. لكنها عقب ارتاحت يوم شافته على عادته سكران ويحتشر ويروح.. أذيه هالإنسان مكره الفريج فيه.. جيران شما كلهم عرفوا بموضوعه وحركاته.. فاضحنهم.. والمشكلة مايرومون عليه.. مره شما تجرأت وسارت عند عمها وكلمته .. هزبها وطردها.. زين ماضربها ولا مد ايده عليها.. ومن يومها قرروا مايسوون شي لأنه مامنه فايدة.. مابيرومون عليه دلوع امه وابوه.. .. طينته زينه.. لما كان بيصحح غلطته.. لكن خصلته طيبه رغم كل مساوئه وهذا اكثر شي خلا جاسم يوافق عليه طبعا مش كل من يمرس بنت ينوي يخطبها حتى وان صار هناك مشكلة وخطأ شرات ماصار لفطوم.. ولا كل علاقة بهالطريقة تمر على خير.. عادي تستوي جريمة قتل في مثل هالمواقف. ولكن عقلية جاسم وسلطان خلتهم يفكرون بالموضوع كمشكلة لازم ينوجد لها حل منطقي وليس القتل والضرابه لأنها مابتفيد في شي.. يبون البنت تندم على الي سوته وقدروا عمرها وسنها.. والي ساعد اكثر ان فيصل طلع ريال زين وقدر حجم المشكلة الي تسببها... ياما مشاكل صارت ويكون الريال تخلا من البنت وخلاها تعاني من مشاكلها يمكن طووول عمرها.. وهو ولا على باله.. يمكن طلعت من نطاق القصه شوي.. لكن احب اوضح هالنقطة لأنها وايد مهمه.. يمكن وايد بنات يتابعون القصه ويعتقدون ان كل الشباب شرات فيصل.. وينجرفون فالخطأ على امل ان الرجل هذا مثل فيصل.. لا تنسون نقطة.. فيصل شخصيه من الخيال.. يمكن تكون مثاليه جدا.. لكنها بعيدة عن الواقع.. الخيال والحلم شي سلس يصعب تطبيقه على واقع الحياة الخشنة التي نعيشها.. الغلط يبقى غلط.. ولكن يجب تصحيحه.. والصح يكثر منه.. هذا الموقف ارجع اقوله.. لا يمد بأي صلة بالواقع الي نعيش فيه.. يمكن حدوثه لكن اقل من نادر ايضا.. وكل الشكر لكم.. توقعاتكم.. فطوم بتعرف ولا بتظل على عماها ؟؟ حليله أحمد متعذب.. وهو شبه اعترف لمجد.. هل مجد بتلين وبتعترف؟؟ سلطان وحبه لشما.. توقعاتكم لحياتهم المستقبليه؟ يوم الملجة.. شو بيسوي؟ عبيد وحور... حليييييلهم منسايين فهالأجزاء.. شو تتوقعون لهم؟؟ **راح انـزل لكـم كـل مـ أدش بارتيـن ولا بـارت كــامــل .. هالمره نزلت لكــم بارت ونــص ..تعويــض ع الأيــام اللي طـافــت ... وخل تسمحـلنــا صــاحبه المــوضوع لأن احتلينــاهــ .. تحياتي MiSs MrMr |
يسلموووووووووووووووووووووووووووووووووووووو ويعطيكم الف الف العافية ..^^بالتوفيج ان شاء الله ^^....~ |
| الساعة الآن 04:06 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir