|
تسلمين حبيبتي ع هالبارت النااايس و نتريا التكمله ع احر من الجمممممر |
تسلمين ونتريا الباارت الياااي |
تسلمــوون ع الــمروور .. ((الجـــــــــــــــــــــزء الثـــــامن و العشــــــــــــــــــرين ...)).. لاتنتظر مني كلمة ولا رد يرضيك ...اللي ضماه منك لاتفكر يرد يرويك ...عانقت أنا النسيان وودعت أحزاني ..حبك نسيته وصار في بحر نسياني يوم جفته يتجرب مني و اعيونه مليانه شر و غيض وقفت ابسرعه ...اطالعه و انا احس مشاعر اكثر اتجاه هالانسان ..خوف شوق الم .جرااح . بلعت ريجي و تميت ساكته قال بنبره جافه: عيل ما زاعجتي اليوم شو وين راح لسانج .. لصقت باليدار ارتجف غمضت اعيوني يوم جفته جريب جدامي حسيته انسان ثاني ..انسان متغير مب هو الي اعرفه .. قال بهدوء : ليش ساكته رفعت راسي اطالعه كلام الدنيا كله اختفى مني .. تجرب مني و همس : ارتحتي الحينه زين الي سويته ؟؟ اهو ليش يلومني ليش ما يلوم نفسه ؟؟؟؟ بس بعد ماكان عندي رد ما كان يسمع مني غير صوت انفاسي كمل بنفس النبره : عيبج يوم طيرتي طارق و رغتي عايشه من البيت ..و ظهرتي يدوه بعد ارتحتي الحينه يوم امي طاحت مريضه و كل واحد صار بدرب .. كنت برد عليه بس كتمت انفاسي يوم حط ايده ع رقبتي غمضت اعيوني حسيت انه حس بي و انا انتفض تحت ايديه كمل كلامه : تبين اتسوين حياتنا شرات حياتج ..لا اهل ولا سند و لاظهر كل واحد بدرب و طريج جبرت نفسي و قلته : ما يخصني صرخ علي و جنه يترياني ارمس : عيل منو الي له خص .. صديت الصوب الثاني خايفه من عصبيته قلته و انا صاده عنه : اذا ما تباني طلقني رص ع رقبتي تألمت شهقت ابصوت عالي ما قدرت امنع دموعي حتى يوم قال : لو تموتين ما بطلقج ..و عايشه بتزوجها ..عناد فيج صحت : انت ما تهمني روح تزوجها هذيج ها عندك ... صرخ علي و هزني بغيض : انا براويج .طوفي جدامي."دزني جدامه " طحت عالارض و قلته بألم و انا اصيح : ما بروح معاك هني بعيش .. نزل علي و قال : تحلمين مالج مكان بها البيت .. "وزخني وقفني غصبن عني " خفت من كلامه ترجيته : مطر صرخ علي : جب ..اسكتي ولا بصفعج تصفيع عمرج ما بتنسينه وييرني بعصبيه .. زخيت ايده كنت خايفه منه وايد : انا ما اباك .. ما ابا اعيش وياك جربني مني بقوه حتى لصقت بصدره و قال بكرهه : من قال اني اباج ..انتي اصلا انتي طلعتي من خاطري ما عاد اباج كلامه المني و كمل: ما اعيش مع وحده هدمت حياتي و حياه اهلي قلته بعذاب : عيل اتعيش ويا وحده شرات عايشه صرخ علي : انتي ما تسوين ظفرها .. قهرني كلامه تخبلت يوم قال لي جي ..انا الي اشرف عنك و عنها انا الي انظف عنك و عنها ..ولا انت ع شوه اباك و احبك ع زقايرك وع صلاتك الي ما تصليها ولا ع شوه..ولا ع حياتك ويا الحريم ؟؟؟ حاولت ابعد عنه نظراته الحاده كانت تروعني بس ها ما منعني اني اوقف بويهه .. قلته : زين ليش ما اتروح لها شو تبا فيني .. قال و جنه يتعمد يقهرني : و من قالج ما بسير لها ...تغيرت نبره صوته" ما تدرين شو غلاتها عواشي .. زخني من جتوفي و تجرب مني و قال : مكانها بيكون مكانج و انتي هني مالج مكان .. حسيت اني وحده غبيه يوم حطيت عيني بعينه و قلتله : انت جذاب فهد قال بتسافرون السويد اتدورن ع طارق ما توقعت ملامح ويهي جي تنجلب سكت عقب قال بنبره جافه : انتي وين جفتي فهد ؟؟ صديت عنه و سكته ..مالي خاطر ارمس زياده خلااص ..كل حبل يوصلني بـ مطر قطعته و من جذوره بعد هزه و كانه يذكرني بوجوده و قال بنفاذ صبر : وين جفتي فهد!! صكيت ع اسناني : ما يخصك .. تفهم ما يخصك.. حبست دموعي الي كانت بتنزل مني بس شهقت يوم ييرني بقوه حاولت اصده بس ما رمت عليه .. ظهرني من الحجره و عقب من الصاله قلته بضيج : انا مالي مكان بحجرتك .. طنشني ..و كمل طريجه حسيت اني ضايعه بوسط افكاره مب عارفه مطر شو في باله ع هوا الي برع حسيت برجفه و بروده .. خلني بوسط الحوي و دش الحجره .. تفاجاات يوم جفته شايل عبايتي و شليتي و فرها بويهي .. امرني : لبسيهم طالعته مستغربه : وين بنروح ولا جنه رمسته لانه قال : لبسي خلصيني ... يلست اطالعه بنظرات كلها تساؤل و هو كان يطالعني بنظرات جاسيه و كره.. كنت البس عبايتي ابرود ... طاحت الشيله من ايدي شلها بسرعه من عالارض و فرها ع راسي و زخني من ايدي حسيت انه مودني ع منصة الاعدام .. ترجيته : مطر .. فج باب الحوي .. وقف فجأه فدعمته بجتوفه رديت لورا اطالعه جفته يطالع سياره ..شهقت هاي نفس السياره الي كانت عزوه نازله منها هذيج اليوم سمعت مطر يقول: هالحيوان بعده يوقف عدال البيت .. فج ايدي وراح صوبه بعصبيه ...شغل الشيبه سيارته بسرعه و حرك .. تم مطر واقف ابمكانه وحط ايده بوسطه يراقبها حتى اختفت ..يعني مطر املاحظ بس شكله ما يعرف ان عزه ورا هاي السياره ... دق قلبي يوم جفته افتر صوبي تجدم مني بخطوات ثجيله ... بلعت ريجي و طالعته بخوف ... قال لي : تعالي ركبي السياره .. سالته للالف مره : وين بتوديني .. مطر رايح صوب سيارته : مالج مكان هني ؟؟؟ وقفت ما تحركت : بتاخذني بيت ابوي ؟؟ طالعني قبل لا يركب السياره : لا طبعا ها بيتي مب بيتج صكيت ع اسناني و قلته : يا الحرامي .. فاجاني يوم ظهر من سيارته بسرعه و ياه صوبي يعني هو يسبني يهينني عادي و انا بس اقوله كلمه بيجتلني مدري ليش قلته :هاي السياره توقف علشان عزه حسيت مطر جنه حد صفعه ع ويهه تم واقف منصدم من كلامي قال و كانه مب حاس بروحه: شوه قلتي بلعت ريجي حسيت روحي زفته و انانييه بس غصبن عني .. يمكن ينسى كرهه لي بس جني خربت الدنيا يوم تجدم مني و قال : شوه قلتي ؟؟ طالعته بخوف زخني من ذرعي وهزني بقوه : ايه ارمسج ردي قلته اعيوني اتهل : انا جفت عزه تنزل من هاي السياره رفع حياته جنه مب مصدق : سياره منو قلته بخوف : سياره الشيبه الي توه واقف سالني بشك: شدراج انه شيبه ؟؟ قلته و انا احاول ابعد ايده عن ذراعي لانه معذبني : جفته حسيت نيران الدنيا تشب بصدره : طفشتي طارق و عايشه من البيت و يدوه و الحينه تبين عزه تظهر هزيت راسي بمعنى انه غلطان .. تجرب مني و قال بحذر: شو تبين تاخذين بيت ابوي مثل ماخذت بيت ابوج قلته بسرعه : انا مب ماديه شراتك ... سكت ما رد علي تم يطالعني بنظرات روعتني ..ييرني من ذراعي بقسوه و فرني داخل سيارته .. صحت من الخوف تذكرت الحلم الي حلمته ليله عرسي .. و كيف الشباب حاولوا يعتدون علي .. خفت لا يسويها مطر و يفرني ابمكان و يخليني بروحي بوسط ها الدنيا و همها ... شغل سيارته بطلت حلجي بس سبقني و صرخ علي باعلى صوته : حسج ما ابى اسمعه ارتجفت و ابتعدت عنه خايفه انا شو ورطني بها الانسان مرات احسه مينون و مرات احس افكاره غبيه .. حرك بسيارته مدري وين كان مأخذني ..ما كان غير صوت صياحي ينسمع بالسياره مطر و كأنه بعالم ثاني .. مدري بها الليل أي طريج سرنا ولا أي مكان وصلنا ... وقفني بمكان براحه ارتجفت مكان مظلم .. طالعته بخوف .. دق قلبي بقوه .. نزل من السياره ...و نزلني بالغصب .. حاولت ابعد عنه بس يرني بالقوه ..دخلني بمكان اول مره اجوف كان ظلام و ما اسمع غير صوت الهوا .. صكر الباب من وراي ... مطر : تذكرين مره قلتي لي ودج ادشين عزبه ؟؟ طالعته و انا كلي خوف .. كمل كلامه : هاي هي العزبه .. طالعت من حولي ما كنت اجوف شي غير الظلام .. رجع خطوه لورا لصقت به بسرعه قلته اترجاه: لا اتخليني هني بروحي .. انت مب مينون جني لمحت ابتسامه ع شفايفه قال : ما عليه بتتعودين دزني بدفاشه بس انا كنت متمسكه فيه ... دزني مره ثانيه فطحت عالارض صحت بمراراه يوم ابتعد عني مطر ..حسيت ان كل شي بحياتي صار ظلاام .. سمعته يقول بنبره كلها حقد : ذوقي الي ذوقتيني اياه مسحت ادموعي ع ظهري ايدي و تلعقت فيه : ما بتخليني هني بروحي .. لمحت اسنانه يوم ابتسم و قال : بتحسين بالعذاب الي حسيته و حسوا بي اهلي ابسببج لصقت فيه و رديت اترجاه مطنشه كلامه الغبي : انا مالي علاقه ... ما اهتم بدموعي ولا رجائي لانه دزني عالارض و تجرب مني سمعته يقول بسرعه : هناك شي غرفه فيها حمام و ثلاجه .. و شي مطبخ بعد .. و عطني ظهره .. حاولت انش ربعت صووبه اصيح بصوت عالي و انا اناديه باسمه ولا كانه كان يسمعني .. صكر الباب بويهي و تصكرت ابواب الدنيا .. يلست ادق الباب و اصيح بصوت عالي مطر مطر مـــــــــــــــــــطر مطــــــــــــــــــــــــــــر اون ورياح الليالي توني ...والبرد في جوف كما الغار خاوي ما كن لي قلب ولا عقل كني ..جذع وقف في وجه الايام ذاوي يلست عالارض منهاره يوم سمعت صوت سيارته تبتعد .. خفت وايد .. حسيت بروحي يالسه بمقطعه .. خوفني الهوا وصوته خوفتني الوحده خوفتني الظلمه و السكون .. كل شي فيني خوفني .. تخيلت للحظه اني يمكن اكون بحلم .. تميت واقفه برع عند الباب فتره طويله .. ما اعرف كم من الوقت مر..كنت خايفه بس في شي بداخلي يقولي ان مطر ببيرجع و مستحيل يخليني هني بروحي .. حضنت ايدي بوسط صدري ارتجف من البرد و الخوف .. بس كل شي طار يوم سمعت صوت سياره ..وقفت و لصقت و قلبي يرقع مدري من الخوف ولا الامل و الراحه ..لاني ظني ما خاب ... همست : مطر .. سمعت باب السياره يتصكر بقوه ..بطلت اعيوني و شهقت يوم سمعت صوت واحد يديدن و يغني و مب عارف شو يقول يخربط كلمه ع كلمه ها مب صوت مطر ؟؟ منو هاه ... سمعت صوت المفتاح بالباب يحاول يفتح الباب بس مب رايم .. سمعته يقول : افتح يا سمسم عبودك شيخك وصل رديت للورا شكيت ان ها الانسان مب وعيه منو عبود ؟؟ و كيف مطر يعطيه مفتاح باب عزبته تميت واقفه ابمكاني اريولي مب رايمه احركها او اشلها ..حسيت اني تشللت .. بس جبرت نفسي و ربعت داخل الحجره .. يوم انفتح الباب خلااص .. حاولت اقفل الباب بس ما لحقت الصوت يتجرب اكثر اندسيت صوب الشبريه بالزاوية يلست عالارض ارتجف و اصيح بصمت ..شو سويت فيني يا مطر ..؟؟ تبا اتعاقبني ع زلاتك انفتح باب الحجره دفنت راسي بين ذراعي و غمضت اعيوني ...كان يغنى و ماخذ راحته شكله عارف شو المكان زين ما زين عاتبت نفسي ليش ما قفلت الباب ..طول عمري بتم غبيه و ما اعرف اتصرف .. توقفت انفاسي يوم سمعت خطواته تجرب صوبي ..للحظه شكيت انه كشفني بس جفته رايح صوب الحمام .. سمعت صوت الماي فكرت اشرد من الحجره و اطلع بس وين اروح الدنيا ليل و ظلاام ... و انا ما اعرف هاي العزبه وين مكانها اصلا ...ما كان غير اني اصيح و الحلم الي حلمت بليلة عرسي اجوفه يتحقق جدام اعيوني خفت لا اييون شلة سكرانيين غير ها الي اسمه عبود .. صخيت يوم ظهر من الحمام و قعد يتحرطم :ماشي شي اشربه مطور الثور مخلص الغرش كلهم رفعت راسي اوايق جفته يترنح و مب قادر يصلب طوله .. بس شو الغرش الي خلصها مطر ..مطر يسكر ؟! انا بعمري ما جفته سكران ...دق قلبي ..مطر كل يوم اكتشف فيه شي... يالله شو بعد اكثر عن جي ... عبود : اوووووووووووه شو اشرب انا الحينه ..؟ مدري شو طاح من اايده فنقزت وقفت ابمكان صرخت متروعه ...عبود بعد نقز يوم سمع صرختي ..حسيت الدنيا تدور فيني انا شو طلعني من مكاني .. طالعني عبود و تم يفرك اعيونه و يرد يطالعني .. تجدم مني .. صرخت ربعت فوق الشبريه اصرخ بأعلى صوتي يمكن حد ينقذني .. كنت اصرخ بهستيريه و اصيح .. حتى عبود زاغ مني و تم ابروحه يصرخ و يتناقز ابمكانه يقول : ينيــه ..ام الدويس ..ام الدويس .. ربع برع الحجره .. مدري كيف نقزت و رحت صوب باب الحجره و صكرت الباب كنت بقفلها بس تفاجات ان ماشي مفتاح ...حسيت اني اغبى انسانه عالارض ... الظاهر عبود انتبهه اني مب ينيه ..لانه رد حاول يفتح باب الحجره .. صرخت : وخر وخر شو تبا فيني عبود يدز الباب فانفج و طرت انا داخل و طاحت ع الشبريه .. مسحت ادموعي بخوف .. تم واقف و قال : انتي انس ولا جن .. صحت بصوت عالي .. عبود بغباء : ليش اتصيحين قلته و انا اصيح : اطلع برع عبود يدور : مافيه غيره مطر راعي البنات اكيد هو يابنج هني انتي ربيعته .. صحت بصوت عالي هالانسان بجتلني : اطلع برع بخبر عليك مطر .. تجدم مني و نظراته تغيرت : رابعيني انا... ترا مطر ربيعي يعني انا و مطر واحد .. رديت لورا اطالعه بنظرات خوف بس هو تجدم مني يترنح ... كنت ارتجف من الخوف ... عبود بنبره هاديه : لا اتخافين صدقيني بنسيج الخوف لا اتخافين .. نشيت من الشبريه و رديت لورا متروعه ... صحت بمراره و عذاب عبود يتجدم اكثر: لا اتصيحين ..بس حبيبي بس يلست ازاعج بصوت عالي و بيأس : مطر مطر .. عبود ابتسم و يأشر بيده جنه خبله : مطر طار طار قال بسافر مع فهد شهقت جذاب مطر ما بخليني هني ابروحي .. ما بخليني و بسافر ..مدري اذا احب هالانسان ولا اكرهه على الي سواه فيني .. عفد علي عبود فدزيته فطاح عالارض .. ربعت برع ..بس زخني من ريولي فطحت عالارض حسيت ركبتي انكسرت ..شفت الموت و انا احس بها الي اسمه عبود جريب مني يلمسني .. حاولت ازحف .. بس ركبتي خانتني .. ما قدرت حسيت انتهيت خلااص ... عبود يضحك بصوت عالي : ههههههههههههههههه "حسيتها ضحكت انتصار " زخيتج غمضت اعيوني اترجا رحمة ربي تنزل علي .. حاولت ارفسه بس ركبتي كانت مثل الجمره تحرقني.... حسيت بانفاسه جريبه مني كرهتها و كرهت مطر و بالي سواه فيني و خلني بها الموقف .. ما كان مني الا اني اعفد ع خده و اعضضه عضضضضضضضضه من الخاطر حسيت اني قاعدده امضغ جلده .. تخبل عبود و قام ييرني من شعري بقوه و عطني بكس ع ويهي حسيت اني روحي طلعت ...دارت فيني الدنيا و اسودت بعيوني .. حسيت بألم بوخز ابره في ايدي .. تألمت حاولت افتح اعيوني ما رمت ...رجعت و حاولت لمحتت خيال مطر واقف ع راسي وزخ ايدي ..كان مثل الحلم ... مثل دوم ما تمنيته نظرات حنونه ..حب ..عطف ملامح هاديه ..بس الحلم يتم حلم صوتك اذا جاني نغم ..تهادى في شراييني ...وزاد بهمسه وجداني ..ولوّن دنيتي صوتك وصرتي كل الواني.. وكل عمري تناديني همس باسمي : ميثه رديت له وهمست : مطر .؟ جفته تجرب مني و يلس ع طرف الشبريه زقرني: ميثه صاحيه .. ابتسمت له ودي اكمل حلمي بس غصبن علي .. رديت و رقدت و انا احلم اني في يوم اجوف مطر جي .. انسان حنون و لي ابروحي .. فتحت اعيوني انتبهت بالي حولي يلست ع طول .. اطالع الغرفه مدري شو صار لي .. و منو يابني هني.. حسيت بالم صوب خدي ..حطيت ايدي .. تذكرت ع طول سبب جرحي ..شهقت يوم تذكرت السكران الي في عزبة مطر .. نزلت من الشبريه .. دارت فيني الدنيا .. زخيت الطاوله الجريبه مني و يلست ع الكرسي.. خذت نفس .. انا ليش هني ؟؟ شو صار فيني .. انا لازم اعرف ..الي اسمه عبود شو سوا فيني .. وقفت مره ثانيه و رحت اترنح صوب الباب.. بس قبل لا اوصل انفج الباب .. وقفت ..حسيت اني بطيح مره ثانيه .. ربعت صوبي الممرضه : ميثه يا الله ليش قمتي من سريرج .. زختني وودتني صوب الشبريه قلتها بصعوبه : انا ليش هني ؟؟ طالعتني الممرضه و ابتسمت : شويه تعب قلتها بغيض: انا ما فيني شي .. الممرضه : زين ما عليه "حاولت ترقدني " ارتاحي الحينه .. بس انا دزيتها و رديت يلست و قلتها : انا ليش هني .... صخيت و حطيت ايدي ع خدي ...حسيت بألم .. قلت الممرضه الي جفت بعيونها الحيره : ابا اروح الحمام .. الممرضه : بساعدج .."مدت ايدها " بس انا مدري ليش تجاهلت ايدها و نزلت من ع الشبريه .. و يلست اتسحب صوب الحمام ..بس هي لحقتني .. دشيت الحمام .. و ع طول طالعت روحي في المنظره .شهقت .. كانت علامات زرقه معلمه ع خدي .. هاي ضربة الي اسمه عبود ...يلست اتحسس عليها غمضت اعيوني لانها آلمتني . الممرضه : ايام و بتختفيي هالكدمات.. طالعت الممرضه من الجامه و قلتها : انا ليش هني مب علشان الكدمه صح .. الممرضه : انا بتصل بزوجج ايي الحينه ..انتي بس تعالي ارتاحي حاولت اتزخ ايدي بس انا تجاهلتها و عصبت عليها : انا شو فيني اقولج؟؟... كان احساسي يقول شي بس انا رافضه و مب متقبله الفكره مستحيل عبود يلمسني مستحيل ... عيل شو صار عقب ما اغمي علي و منو يابني المستشفى .. الممرضه : ميثه سالتها : انا متى موجوده هني .. المرضه حسيت انها تحاول تتحملني : امس فليل قلتها : منو يابني هني .. الممرضه : زوجج .. سكت عنها ليش شو صار شو مستوي ؟؟ قلتها : كيف كانت حالتي الممرضه : انا ما كنت مناوبه ما اعرفه شي عصبت عليها : جذاابه .. ظهرت الممرضه من الحمام و لحقتها : تعالي انا شو فيني قولي "زخيتها من جتوفي " الممرضه : ميثه تعالي ارتاحي .. صحت : وين مطر .. "ماشي غيره اساله .. الممرضه : الحينه بتصل به بس انتي ارقدي شويه .. صرخت عليها بشكل هستيري : لا لا ما ابا ارقد ابا اعرف انا ليش هني .. ليش ... ضغطت الممرضه بسرعه ع الزر الاحمر يوم جافتني اصرخ عليها ...كنت احاتي و خايفه ان الي في بالي يطلع صح ..ما تحملت الفكره يلست اهز الممرضه : شو فيني انا شو فيني .. شويه دشوا علي ممرضات غصبوني و اجبروني اني ارقد ع الشبريه بس انا كنت اصارخ عليهم بصوت عالي و اصيح .. ما كنت ابا ارقد ..ما ابى ابا اعرف انا ليش في المستشفى .. بس كانوا هم الاقوى مني .. من حسيت بوخزه ابره ..ترجيتهم : ما ابا انام ما ابا .. بس ما قدرت اقاوم ... طرت بعالم ثاني ..عالم ظلام و سواد و ما حسيت بروحي ..الا الدكتور يهزني فتحت اعيوني بالغصب .. رديت غمضتها و كاني ما ابا ارجع لواقعي ..ابا اتم جي مرتاحه ولا احس بالم ولا تعب .. الدكتور : ميثه شو بتمين راقده وايد .. طنشته و تميت امغمضه اعيوني تغطيت بللحاف و صديت عنه الصوب الثاني .. سمعته يقول : زين حتى مطر ما تبين تكلمينه فتحت اعيوني يوم طرا لي اسم مطر ..بعدت اللحاف عن ويهي و افتريت صوبه جفته واقف حذال الدكتور ..كانت نظراته غريبه .. الدكتور : ما شاء الله عليج ما فيج الا العافية .. كنت اطالع مطر و اسال الدكتور : عيل انا ليش هني .. نزل مطر راسه بالاض .. الدكتور : راحه لو تبين تطلعين الحينه انا ما عندي أي مشكله .. ليش مطر نزل راسه بالارض شو مستوي ..؟؟ حسيت في شي مستوي .. فيني ؟؟ في امه ؟؟بـ طارق ؟؟ يدوه همست : هي ابا اطلع من هني انا ما اطيج المستشفيات .. الدكتور : امرك يا ست الكل...بس مطر ياليت اتسوي اجراءات الخروج مطر بنبره جاده : اوكى مب مشكله ... ظهر الدكتور من الغرفه و تميت مع مطر ابروحنا ... سالته : ليش يبتني المستشفى كنت اراقب ملامح ويهه امبين عليه التعب و السهر .. حسيت انسان ضايع و مب عارف شو يسوي تجدم مني و يلس ع طرف الشبريه .. زخ ايددي .. همس : ماشي كنت خايف عليج .. قلته بعذاب و انا اتذكر ربيعه : جفت شو سوا بويهي ... رفع راسه و طالعني حط ايده ع خدي يلمسني غمضت اعيوني احب لمساته ..احب رقته .. تجربت منه و قلته : تريتك وايد "دمعت اعيوني " قلت مستحيل تخليني بهالمكان بروحي مطر بنبره هاديه : هي بس وصلت متاخر متاخر وايد طالعته و سالته : انا شو فيني .. مطر بالم: ما فيج شي حبيبي قلته بغيض: عيل ليش انا هني .. مطر : يوم دشيت العزبه جفتج طايحه ع الارض اضطريت اييبج المستشفى .. طالعته بنظرات شك وقلته : بس انا شاكه في شي رفع راسه ع طول يطالعني كملت : انت اول مره اترمسني بها الاسلوب دوم اتحرج علي و اتعصب علي و اتمد ايدك علي .. جفته يبلع ريجه و قال : خليني اروح اسوي اجراءاتج عقب بوديج البيت قلته و انا بعدني متشككه في السالفه : مطر حسيته مب رايم يحط عينه بعيوني ..حطيت ايدي ع خده و اجبرته يطالعني ... سالته : عبود شو سوا فيني .. سكت رد علي عقب فتره : ماشي دمعت اعيوني و انا حاسه ان شكي صحيح : احلف .. نزل اعيونه بالارض قلته : كيف طاوعك قلبك اتخليني بمكان دوم ربعك يترددون له و هم سكارى .. مطر : ربعي من زمان ما دشوا العزبه مدري عبود شو يابه امس كان شرات الشيطان حسيت بالم في بطني يوم قال شرات الشيطان صحت بصمت و قلته : شو سوا فيني عبود طالعني مطر ..ما توقعت يحضني كنت ببعد راسي عن صدره بس ما قدرت اقاوم المشاعر الي حسيت فيها .. تجاه هالانسان ...و خاصة اني احس وحيده بهالعالم محد لي غيره قلته و انا احس بدفى حضنه و ريحة عطره اداعبني لصقت فيه اكثر : تذكر مره قلتلك خلنا نطلع فبيت روحنا .. رفعت راسي اطالعه يوم جفته ما علق ع كلامي سالته : انت بعدك تحب عايشه سكت بعد ما رد رديت و انسدحت ع الشبريه .. مدري أي عواطف الي احس فيها و اتخليني اميل لهالانسان عقب كل الي صار جفت يوقف عدلت بيلستي : لحظه التفت صوبي سالته : وين بتروح ؟؟ مطر: ما تبين تظهرين من المستشفى ؟؟ قلته : امبلى ..بس قبل ما اتقول لي مطر : اقولج شو سالته : انا ليش هني .. تم واقف ابمكانه ..نشيت من مكاني و رحت صوبه .. قلته : ليش ساكت .. تجرب مني و حاول يحضني بس انا ابتعدت عنه و قلته : شو سوا فيني عبووود . ما تحملت الوقفه فيلست ع طرف الشبريه .. ارتجف .. مطر : ميثه شو فيج .. قلته : راسي يدور تجرب مني حط ايده ع خدي بس انا بعدته عني صحت و قلته : شو سالفتك قول مطر بهدوء :ماشي صرخت عليه و صحت مب متحمله قلته : شو سوافيني عبود اقولك مطر بنبره خوف و تردد : سواه الي المفروض انا اسويه ريلج .. دارت الدنيا فيني يعني احساسي كان صحيح .. صرخت ع مطر اتهمه بالجذب مستحيل انا طوال حياتي احافظ ع روحي ..مستحيل واحد مثل هاه يشوه سمعتي مستحيل حاول مطر يزخني يهديني يحضني بس كنت ابعده عني و اشمخه ..كرهته و كرهت قربه .. حسيته السبب و مب بعيد يكون متعمد ..يسوي فيني جي .. تمنيت الموت ..تمنيت روحي تطلع ولا اعيش لحظه عقب الكلاام الي قاله لي مطر .. ما حسيت ان المرضات تيمعوا حولي و معاهم مطر و الدكتور كانوا يبون يهدوني بس انا كنت في عالم ثاني .. انا مستحيل اعيش عقب الي صار مستحيل ..مستحيل ... عقب معاناه و عذاب عقب صراع مع نفسي مع الي حولي ..كنت اعبر عن غيضي و انا احط اغراضي في الشنطه بكل عصبيه و مطر يراقبني بزاوية الغرفه .. ثلاث ليالي من اسوء ايام عمري مرت في حياتي ... للحينه ذكرى طيحتي بالمستشفى صحت و انهرت يوم دشت علي خالوه و سلمى .. تجاهلت سلمى مع انها كانت اتحاول اتكلمني .. مسكت اعصابي من اجرحها بس خالوه غمضتني وايد ..حسيت ان عندي اهل .. بس عقب ما اكتشفت علاقة سلمى بمطر ..كرهتها و كرهت العيشه في بيتهم ..لكن الحينه ما عندي غيرهم .. حسيت بقرب مطر مني وقفت ابمكاني .. حبست انفاسي و غمضت اعيوني يووم حط ايده ع خصري و جربني منه همس : ميثه .. ما تحملت قربه حاولت اهرب منه و اهرب من مشاعري الي كرهتها ...و خانتني .. مطر كمل : ما اتخيل البيت من دونج .. زخيت ايدينه و بعدتهم عني وواجهته قلته : انا ما انفع لك خلااص .. طالعني بنظرات فقلته : ما احتاج عطفك .. رد علي ابسرعه : انا ما اعطف عليج ولا افكر ... قلته : شو تبا مني ؟؟ تجرب مني و قال : اباج قلته و انا متعمده اجرحه : انت عمرك ما بغيتني الا يوم لمسني .............."صخيت ما قدرت اكمل " تم يطالعني نزلت نظراتي بالارض فقال : انا ما يهمني الي صار طالعته و قلته : طبعا ما يهمك ..الانه ربيعك و انته متعود اتكون شراته فاقد الوعي باللوث الي تشربه قال بغيض جنه يدافع عن روحه : انا من تزوجتج ما ذقته .. طالعته بتحدي وقلته : ما يهمني .."واجهته" خلاص انتقمت مني شو تبا ما سدك ؟ عطيته ظهري و صكرت ملاابس شنطتي ... قال لي بنبره رجاء : زين خليني اوصلج قلته من غير ما اطالعه : مشكور .. زخني من ذراعي : ميثه .. انفتح باب الحجره طالعته بنظرات اني الي بيني و بينك انتهى خلااص ..بس كانت نظراته امل و رجاء .. ياني صوت خالوه : يالله ميثه .. ابتعدت عن مطر ..يت خالوه و شلة عني الشنطه ... و لحقتها من غير ما اصد ورا اطالع مطر ..الي كانت اعيونه تراقبني .. حبي لك غلطه ... ياللي أمنتك على حالي .. كلفت عمري ثمن غالي شلون أسامح يا أسف ... جرحي بعده ما نشف ....حبي كبير اكبر من انك تجهله حبي كبير صدقني ما تستاهله ..لا تتعذر بعد اللي صار جرحي اكبر من الاعتذار ...دست على جرح صبر .. قلت اسامح ما اقدر يكفي خلاص .. خلاص >>>>>>>>>>>>كــــــــــــــــــــــــت .. |
وااااااااااااااايد حلو البارت وهذا مطر يقهر ليش يسووووي جيه وميثه غامضتني نتريا الباري الياي شوه بيستوي |
مرحبااا انا بره الاماارات دخلت بس عشاان خااطر القصه |
| الساعة الآن 07:55 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir