|
------------------------------------------------------------------------------------- مريم طلعت من عند عوشه سيف متضايق : هاه شخبارها ؟ مريم : الحين راقده سيف : يعني بخير مريم : الحمد لله حليلها غمضتني امها قالتلي خلوا صغاريه عندنا لين ايي ابوهم .. وقالت ما فيها تروعه عن ايي بسرعه من صوب دبي سيف : هيه حليله روحه فيه السكر وياخذ ابر مريم : الله يعافييه ياربييه سيف : آمين شويه وصاح تيلفون سيف متصله شيخه سيف : هلا شيخه شيخه : هاه شحالكم سيف : بخير شيخه : وشحالها البنيه ؟ سيف : الحمد لله الحين راقده خاطوا راسها والحين ينقلون لها دم شيخه شهقت : حليلها حمد : شو مستوي ؟ شيخه : سيف الولد الصغيرون يبا يرمسك سيف : عطيني اياه حمد متروع خذ التيلفون وتم ساكت سيف معصب من حمد وبصوت خشن : آلو حمد بصوت واطي : ألوه سيف : حمد ؟ حمد : سيف شو استوى على عوشه ؟ سيف معصب : انته اللي شو سويت فيها حمد : والله ما كان قصدي سيف يزاعق: انته شيطان يا حمد وانا ما بسامحك حمد : والله ما بسوي جيه مره ثانيه والله سيف: الحين لو كسرت راسها حمد : هي بعد كانت تدعي عليك واستحى وسكت سيف تفاجا ! : تدعي عليه انا ؟ حمد ساكت سيف : شو قالت ؟ حمد : ما شي سيف: حمد لازم تخبرني شو قايله حمد : لا الله يخليك ما بقولك اخاف تهزبني سيف: لا قول ما بقول لحد حمد : قالت يعلك ما تقوم ؟ سيف شهق وتم ساكت حمد : ردت الدعوه عليها سيف يزعق : لا تقول هالكلام حمد يته الغبنه : سيف تعال ودني صوبهم سيف يزعق: تم في المزرعه ولا تتحرك وان شفتك مسوي شي انا بظربك حمد صاح : انزين سيف : يالله ويبند في ويهه حمد عطى التيلفون شيخه وهو يصييح وغمضها .. ام سيف ما تحب تشوف حد من اليهال يصيح : فدييتك الغالي تعال ابويه وتنش وتحظنه .. وصاح حميد .. سلمى : ياربي كيف يصيحون .. ام سيف : تعال الغالي تعال وحظنتهم وتموا يصيحون .. سلمى : سبحان الله اذا صاح هذا يصيح الثاني .. ام سيف : ليش حبيبي سويت جيه في اختك حمد يهز راسه وما يبا يرمس ام سيف : خلاص خلاص غناتي لا ترمس .. حمد : ابا ماي ام سيف : سلامي قومي هاتي حقه ماي سلمى : ان شاء الله شيخه : وين ابوك ما خبرتوه حمد : ابويه محد سار ويا عمي بو محمد دبي وامي قالت لا تخبرونه شيخه : انزين ما عندك خوان ؟ حمد : امبلا . شيخه : انزين يود اتصل فيهم حمد : واحد في بوظبي واحد يشتغل شيخه : انزين اتصل به حمد : بيب تيلفوني شيخه : مب تسير بعيد وما ترد حمد : لا برد شيخه : اسير وياك ؟ حمد : لا بسير روحي حميد تم يالس وام سيف ترمسه وحمد طلع عشان ايب تيلفونه يوم دخل شاف سيارة سالم واقفه وام سعيد وفطيم بيركبون سار يركض صوبهم وسالم شاافه في المنظره سالم نزل متروع : شوووو مستوي شو السالفه ؟ حمد زااايغ سالم يضربه واقف وساكت فطيم نزلت : حمود شو مستوي دم منوه هذا ؟ حمد : عوشه في المستشفى فطيم ضربتها انفضه : شو بلاها عوشه ؟ سالم : شو بلاها عوشه خبرني ؟ حمد رد على ورى : انا فلعتها بحصاه كبيره سالم وفطيم منصدمين وام سعيد في الموتر بعد كذلك سالم عصب: لييييييش ويسير صوبه وايوده من كندروته حمد صاح : ما تباني اسير صوب مزرعة سيف سالم صفع حمد طراق وهو معصب : وتقوم تظربها بحصاه سالم معصب : ومنو وداهم المستشفى حمد وهو مستغبن : سيف سالم وفطيم منصدمين سالم فر اخوه تحت وشغل موتره وركبت فطيم وياه .. حمد رد صوب المزرعه ام سيف : هاه دقيتله حمد يهز راسه بلا وهو زعلان ام سيف : وشعنه حمد : كان موجود هناك ام سيف شافت خد حمد محمر : وضربك حمد يهز راسه بهيه ام سيف : لا حول ولا قوة الا بالله " الله يهدييه --------------------------------------------------------------------------------------- عوشه فاتحه عيونها وتطالع امها يوم تقرى عليها ومريم واقفه ورى امها وغامضتنها مريم تقول في خاطرها : ما شاء الله عليها ويها سمح ... يالله الحين ويها كله خياطه من اليرح لا حول ولا قوة الا بالله عوشه صدت على مريم : ومستغربه منو هذي اللي دشت ويالسه تطالعها عوشه : امايه ابا ماي ام خالد : ان شاء الله غناتي ان شاء الله عوشه نشت : آآخ راسي يعورني ام خالد : يودي فديتج مريم تبتسم لعوشه مريم : هاه شحالج الحين الغاليه ؟ عوشه : الحمد لله بخير .. مريم : اكيد مستغربه مني صح عوشه تهز راسها مريم : انا بنت يرانكم مريم اللي في المزرعه عدالكم عوشه استغربة وتمت تتفكر وتبا تعرف شو السالفه مريم : يالله مدام اتطمنت عليج انا الحين بخليج ترتاحين وبسير عنج عوشه : وين الغاليه مريم : ان شاء الله بيي في وقت ثاني عوشه : الله يخليج مريم : يالله فداعه الله ام خالد : وين سيف امايه بكلمه عوشه اتفاجأة سيف ؟ شو يسوي في المستشفى وام خالد شو تبا به مريم : سيف برع واقف عند الباب ام خالد : قوليله خالتك تبا ترمسك فديتج مريم : ان شاء الله طلعت مريم ووقفت ام خالد بتظهر وراها عوشه وعلامات التعجب في وييها : وين سايره ؟ ام خالد : بيي بيي ارقدي انتي طلعت ام خالد وسارت صوب سيف ومريم سيف كان واقف على ريله طول الوقت .. ويا صوب ام خالد سيف : مرحبا ام خالد الحمد لله على سلامتها ام خالد : الله يسلمك يا الغالي سيف : عوقها في العدو ياربي ام خالد : آمين وعدوك يارب متلومه فيك وما اعرف شقايل اشكرك سيف : لا تشكريني ولا تتلومين يا امايه انا ولدكم ام خالد يتها الغبنه : لولاك لماتت سيف نغزه قلبه : يومي قبل يومكم يا امايه ام خالد : بسم الله عليك سيف : الحمد لله يوم يت على شي بسيط ولا انه استوى شي ثاني ام خالد تتذكر الموقف : الله يهداها تعصب عليهم على ادنات شي سيف صد الصوب الثاني محطي في خاطره ليش كانت ما تباهم ايون صوبه ام خالد : اسمحلنا الغالي والله سيف قاطعها : لا تقولين شي يا امايه .. مب معتبرتني مثل واحد من عيالج ؟ ام خالد : الا غالي واغلى عنهم سيف : لا لا لا اذا ما كنت شروات غلاتهم ما لي حايه ازيد عنهم عقب بيغارون وما بيكون لي عندكم محل ام خالد : افا عليك شرواهم وشراياهم مريم : وانا ؟ ام خالد : ههههههههه انتي غاليه بعد سيف : ياااالله يا مريووم تغاريين .. الحين عندي اميين ويو ام خالد : ههههههه سيف التفت يطالع باب غرفة عوشه ويسأل نفسه كيف الحين شكلها من عقب الخياطه وهل بيتم شكلها جيه ام خالد لاحظته يطاع باب الغرفه ام خالد مبتسمه : بخير لا تحاتي سيف استحى من الخاااااطر وويه احمر سيف اتلعثم ما عرف شو يقول مريم استحت بعد : يالله امايه نحن نخليكم وان شاء الله بنيكم ما بنقطعكم .. وبنيب امايه وخواتي ام خالد : الله يحفظكم تعبتكم ويايه مريم : تعبكم راحه الغاليه سيف بعده ويهه احمر : امايه اتصلتي لحد من عيالج ولا حق عمي راشد ام خالد : يااالله اني نسيت سيف : تبين تيلفوني بتصلين ام خالد : بتصل في ولدي سالم بو خالد ما اقدر اخبره سيف : ان شاء الله عطاها التيلفون واتصلت بولدها --------------------------------------------------------------------------------------------------- مر الوقت واستوت الساعه 12 بالضبط ويا بو خالد صوب المزرعه عشان يتغدى ويا مرته وعياله .. دش المزرعه وما شاف حد كان هندي خاطف من البيداريه اللي في المزرعه بو خالد مستغرب وصد صوب الهندي : وينهم ؟ الهندي خبر بو خالد السالفه كلها وصد شاف عياله يايين صوبه وحرمه يايه وياهم بو خالد انهد على حمد وكان ياي بيضربه شيخه : وغلاتهم عندك ما تضربه بو خالد معصب : خليني اضربه شيخه : شو بيفيد الضرب الحين عوشه في المستشفى وهي بخير بو خالد وقف مكانه وحمد ورى شيخه واقف ومتضايق ويبا يصيح بو خالد كان راسه يعوره ويحس بدوار : وهم في أي مستشفى ---------------------------------------------------------------------------------------------- سالم يطالع اخته وهي مبتسمه سالم : هيه صفعته طراق ام خالد : يستاهل ملعون الصير عوشه : ليش تضربه ؟ سالم : ضاربنج وتدافعين عنه ؟ عوشه : انا عصبت به عشان جيه ضربني سالم : حتى لو ..... يعني اذا عصب من أي حد بيضرب اللي جدامه عوشه : الله ايهديهم سالم : آمين فطيم تامه ساكته وطالع عوشه عوشه ابتسمت لفطيم عوشه : فطيم بلاج ساكته فطيم : فيني غبنه عوشه : ههههههه فديتج انا تعالي حذايه ام خالد : سالم انا ما خبرت ابوك تراني سالم : ولا انا ام خالد : اخافه يسير المزرعه وحد يخبره سالم : ان شاء الله ما يسير بو خالد شويه ودش من الباب متفاجا ام خالد متفجاه بعد ..: بو خالد ..؟؟ بو خالد عينه على بنته : ليش ما خبرتوني .. ام خالد : نخااف على صحتك يالغالي بو خالد اتجدم صوب بنته .. وباسها فوق راسها : يعله فيني ولا فيج الغاليه عوشه : يعله في عدوينك بو خالد : كنت بظربه بس البنيه منعتني ام خالد : أي بنيه بو خالد : اخت سيف ام خالد : ياربي اسميني متلومه في هالناس لوم عوشه صدت : شو السالفه انا مب فاهمه شي ؟ ام خالد : اول ما ضربج حمد وطحتي ما عرفت شو اسوي .. يو يربعون يوم سمعوا الصريخ وسيف ولدهم ودانا المستشفى عوشه شهقت وبطلت عينها : سيف فطيم تهز راسه لعوشه وتغمز لها بو خالد : ونعم الرياييل والله هالريال ام خالد ما لقيت حد استنجد به .. كنت بتسلقي عندالج سالم : ههههههههه والله انكم مأساه ام خالد : بو خالد وين الصغاريه ؟ بو خالد : يايبنهم ويايه بس من نزلت ما ادري وين ساروا من كثر ما اركض ام خالد : وااابيه وين هديتهم ؟ بو خالد : ما ينخاف عليهم شياطين ام خالد : لا لا ينخاف عليهم بعدهم يهال سالم : انا بسير ادورهم طلع سالم وحصلهم واقفين عند الباب سالم : شو تسون هنه حميد يدز حمد : مب طايع يدش يخاف تضربونه سالم : ما بنظربك تعال داخل دخلهم .. حمد يطالع عوشه واللف على يبهتها .. حمد سار وسلم على اخته وهو يرتجف وهو زعلان : آسف ما كان قصدي عوشه مبتسمه وشلت ايده وباستها : لا تقول شي خلاص اللي صار صار حميد ويا حظن اخته : انا وايد صحت عشانج عوشه اتحريتج بتموتيين عوشه : ههههههه بو خالد : راسي يدور والله ام خالد : اكيد ما خذت الابره بو خالد : لا سالم : قم قم يالله بوديك البيت تاخذها بو خالد : اصبر ما شبعت من بنتي سالم : بتيها عقب هي اليوم ما بتضهر يالله بو خالد : يالله الغاليه فمان الله اخليج في حفظ الرحمن ام سعيد : ودوني وياكم انا وفطيم فطيم : لالالا انا ابا ايلس عند عوشه لين العصر ام سعيد : شاوري امها قبل ام خالد : ما اقدر اودر بنتي عوشه : يا اميه انا بخير وصحه الحمد لله الحين .. ام خالد : ما اوصيج على بنتي فطيم : بنتج في عيوني سالم : يالله نروح يالله طلعوا عنهم ويلست فطيم عدال عوشه فطيم مستانسه : الا منووووووووه قدج عوشه : في شوه فطيم : شو بعد في شووه تسوين عمرج ما تعرفين عوشه استحت وصدت الصوب الثاني : ما اعرف شو تقصدين فطيم : يالله عاد سيف بعد منووه سيف اللي تنقدينه واللي ما تدانينه يايبنج لييين المستشفى فقير عوشه مبتسمه فطيم : اكيد خاف عليج عوشه : تدرين اني كنت ما اعرف ولا ما بسير فطيم : سيريييي لالالالاه ما احيدج هالكثر وغده عوشه : انا مب وغده بس ما ادري شو يصيبني من اشوفه فطيم : تحبينه هاي يسمونها غيره عوشه : لا تقولين جيه بصفعج فطيم : الا صح والف في الميه فطيم : انتي غيرانه وبطرانه لا تتبطرين عليه زياده تراه ما بيسولج سالفه عقب عوشه : هذا طايش وانتي تعرفين الشباب فطيم : شوفي سالم اذا انتي مب فاهمه شو معنى الحب .. شوفيه كيف يغار عليه شوفيه كيف يستانس لشوفتي عوشه : انتي وسالم غير وانا غير ..............انا هذا ما اعرفه ولا يعرفني فطيم : وليش الحب يخلي حواجز بين الاثنين ؟ عوشه : لا تخليني ادخل في عالم انا ما لي طربه فيه فطيم : تفكير اهل الكهف احسن عن تفكيرج والله ما عندج سالفه عوشه ساكته فطيم : مستحيل الحين تلقينه ساكت ويفكر في شي ثاني غيرج عوشه تقول في خاطرها حرام انا وايد ضالمتنه فطيم : انتي حاطه في بالج انه الشباب كلهم لعابين وما يحترمون اللي يحبونهن يمكن هذا الشخص غير عن كل الشباب انسان طيب خلوق متواضع واذا حب يتمسك فطيم : يمكن انتي تتكلمين عنه بهالطريقه وتشوفينه جيه لانج ما تواصلتي وياه ولا عرفتيه عن جريب .. ولا تكلمتي وياه عن امور ثانيه غير الضرابه .. فطيم : حرام عليج لا تفطرين قلبه .. عوشه : شو تبيني اسوي له ؟ فطيم : لا تسوين شي بس مجرد ما تشوفينه اضحكي في ويهه استانسي لوجوده حسسيه انج انتي غير مب مثل ما يمكن هو يعتقد عصبيه وخقاقه وما تتشاهدين عوشه : يالله عاد انا ما فيني هالصفات كلها فطيم : تصرفاتج تدل على انج جيه وهذا ويهيي لو ما كان يعتقد انج جيه عوشه : لا ما اباه يعتقد فطيم : هههههههه بدى القليب يحن عوشه استحت : فطيم والله بذبحج فطيم : انتي جان تقدرين تحركين ايدج زين .. هذا الا لسانج يرمس عوشه : هي والله فطيم : بس الله يخليج الله يخليج لا تخلينه جيه يحاتي عشان خاطري عوشه : الله يصبرج يا روح فطيم : آمين ------------------------------------------------------------------------------------------- سيف كان يالس في المزرعه وخواته يطبخن الغدى .. شل تيلفونه ويلس يكتب ميهود خلي وطايح بعوق .. عوقه يعله بي ولا به ريته وقلبي طاح مطفوق .. يومي لفيته عند بابه يعله بخير ودومه يذوق .. كل السعاده تفتدابه صكر التيلفون وحطه على قلبه.. يحس انه عوشه في ايام قليله خلت قلبه كله ملك لها .. ما تخيل حبه ايي بهالسهوله كان يعتقد انه بياخذ وحده من بنات خالته او بنات عمه وبيحبها بعد الزوااج بعد اللي استواله بس الحين متشبث في عوشه لو شو كانت الضروف .. يحبها من كل قلبه .. يحبها وما يظن حب ثاني يطغى على حبه لها .. رغم تحديها له ورغم عنادها له يحبها .. الله يصبرني ويحنن قلبها لي .. --------------------------------------------------------------------------------------------- هاهو حبك يتغلغل في فوادي .. انظر كيف أرض قلبي عطشى لينابيع حبك ولغيث سحابك .. لا انكر ان قلبي تعلق في قلبك ويحاول بكل ما اوتي من قوه التمسك به وعدم نسيانه وفقدانه ارجوك ساعدني على الحصول عليك ... وساعدني على ابقاءك نبراس قلبي .. يا بساتين عشقي " احبك " وسموحه غرشوب البدو |
شكلكم ماعيبتكم خلاص انا مارح انزل الباجي وسموحه [a7la1=009999]غرشوب البدو[/a7la1] |
[overline]السلام عيكم الصراحه القصه روعه تسلم ايدك و تسلم ايد الكاتبه ونتريا الباجي[/overline] :_21.g: [overline]حرام والله ان القصه طررررررر لا تحذفها[/overline]:0088: |
يسلموو غرشووب .. نترقب البـآرتات اليـآآآيه القصه طرر مــن الخـآآآطر .. تسلم ايد من كتبهـآآآ ..! |
مرحبا اخويه بصراحه تسلم على القصه اللي اكثر من روعه ودخيلك لا تحذفها وبانتظار البارت الياي لا تتاخر علينا الشيخ |
| الساعة الآن 01:35 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir