يالله كشخه القصه

كملي يالغلاا لا تبطين عليناااا

كشخة ^^

يلا ننتظر الباقي . لا تطولين علينا :)
ربي يعطيج العافية ~

يعافيج الغالية

بحطلكم الثالث والرابع


&* الجـــزء الثـــالث *&


بوحمد: انا سيف عمج ياحمده عمج .. !

حسيت بالدنيا دارت عليّه يوم سمعت هالكلمه .. عميه ؟؟؟؟؟؟؟؟؟


فج عني .. وانا تميت مبحلقه عيونيه .. هب مصدقه هاللي جداميه .. بس اللي خلاني اصدق الشبه الكبير بينه وبين ابويه .. !


بو حمد: شفيج يابنتيه ؟ حمد البنت ماتعرف عربي زين ولا شو السالفه ؟

حمده: انا هب مصدقه هب مصدقه !


وتميت اصيــح .. مادري فرح ولا حزن ولا لأني تذكرت ابويه .. مادري شو السبب المهم اني كنت اصيح ومن الخاطر بعد ..


يلس عداليه بو حمد وتم يهدينيه .. عقب ماسكت شوي تميت اطالعهم اتريا تفسير منهم ..


بوحمد: ابوج خبرنا ووصانا عليج قبل لايموت بس انا من شدة عصبيتيه تميت اسبه واشاتمه وماخليت شي عنه .. مع انه كان خلاص روحه بتطلع .. ! عقب موته بفتره تندمت و تمينا ندورج انا وحمد .. سألنا عنج في كل مكان .. ومن 5 سنين ونحن ع هالحال لين يا هاليوم المبروك اللي حصلج فيه ولديه حمد .. يالله يافرحة يدتج فيج !

حمد: بس لازم نسوي لج فحص DNA عشان نتأكد ..

حمده: انزين ..

مادري شو كان شعوريه .. بس كل اللي كنت اتمناه انهم صدق يكونون اهليه لأني تعبت من الغربه ومن كل شي .. مابا غير اهل اعيش بينهم واحس بحنانهم !


توجهنا صوب المستشفى .. سوينا الفحص .. وطلب بوحمد انه النتايج تظهر بسرعه ..

قضيت الليله في بيت عميه بما اني اقتنعت بالسالفه .. تسبحت وبدلت ثيابيه .. ولبست لي بجااامه ورقدت ..

بالباجــر .. وعيت ع صوت دق ع الباب ..

حمده: منوووه ؟

حمد: انا حمد ..

حمده: شو تبا ؟

حمد: فجي الباب انزين !

قمت ولبست شيلتيه العوده اللي كنت البسها يوم اصلي عشان تغطي ع البجامه .. وفجيت الباب ..

حمده: نعم خير .. ياخي يالسه احلم لا تقطع عليّه الحــلم !

حمد: ياخي اخاف تلوين على ذراعيه الحين خلاص بروّح عنج ..

حمده: مسوّد الويــــــــــــــــــه ! ياللي ماتستحي على ويهك .. انقلع اقول ..

وبندت الباب فويهه .. دق الباب مره ثانيه بس مافجيت .. خلاف قال ..

حمد: ترا ظهرت نتايج الفحص ..

بطلت الباب بسرعه ..

حمده: شوووه ؟؟ هاه قووول شالنتيجه ؟

حمد: للأسف ..........

انصدمت وتغيّر ويهيه .. شوي وكنت بصيح .. حسيت ابواب الدنيا كلها تسكرت فويهيه .. وخلاف كمّل حمد رمسته ..

حمد: انتي بنت عميه ..!!

والله انه يباله صقعه بـ نعال ع راسه عقب مالعب بأعصابيه .. سرت وشليت نعاليه مالت الحجره وصقعته ع راسه ..

حمد: ايه هذا يزايه الحين ياي ابشرج !

حمده: حد يبشّر جذيه ويا هالويه !!!

حمد: الحين ظهر ويهج الثاني يوم دريتي اني ولد عمج .. ياخساره خاب الظن فيج !

حمده: الحين انته صدق ترمس ولا تسولف موحاها النتيجه ظهرت !

حمد: والله اني ما اسولف .. صدق والله العظيم ..

ابتسمت وتميت اضحك وماعرفت شو اسوي من الفرحه ..

حمد: هاه عاد شو بتعطينيه ع البشاره ؟

حمده: امممم اللي تباه ..

حمد: ماعليه اللي اباه صدق بتعرفينه خلاف .. اما اللي ابه الحين انج تبدلين ثيابج بدال هالبجامه وشيلة الصلاه اللي جنج سكنيه .. وتلبسين شي عدل وتنزلين تسلمين على عمج تحت واتغدين ويانا ..

حمده: افا عليك حاظرين بدون ماتقول .. غيره ؟

حمد: طيارتنا باجر الساعه 12 الظهر صوب الامارات .. فلا تلوين على ذراعيه ترا ابويه هنيه ..

حمده: اففففففففففففف منك ..

وصرخت ورقعت بالباب وهو كالعاده يضحك ..


وقفت جدام الكبت هب عارفه شو البس .. كل ثيابي بديات وجنزات وجاكيتات .. بس حصلت كمن تنوره في آخر الشنطه كنت شالتنهن بين لمة الثياب وما انتبهت .. وزين اني شليتهن .. خذت لي تنوره سوودا وبدي أحمـر .. سرت وتسبحت وتلبست .. مشطت شعريه ولفيته ولبست شيله سودا وجحلت عويناتي ع الخفيف وحطيت مسكرا ونزلت تحت .. تذكرت أيام زماااان !


كانوا حمد وعميه يالسين ع طاولة الطعام وجدامهم انواع الاكل .. سلمت عليهم وحبيت عميه ع راسه .. ويلست ..

بدوا ياكلون اما انا استغربت الوضع شوي وتميت آكل لقمه وخلاف اتم اطالع الصحن .. رفعت راسيه شوي شفت حمد يطالعنيه وهو رافع حاجب واحد .. شكله مستغرب من وين نزل عليّه هالادب مره وحده .. !


خلصوا اكل وقاموا من ع الطاوله وانا قمت وياهم ويلسنا فالصاله .. وعميه لوا عليّه وخلا راسيه ع صدره .. و تموا يسولفون خلاف قال عميه ..

سيف: هيه ترا عندج عم وعمة غيريه .. عمج سالم وعمتج عليا .. ويدتج اللي هي اميه .. وكلنا ساكنين فالعين ..

حمده: الا ماعندك عيال غير حمد يا عميه ؟

سيف: عنديه مريم و سلامه و الريم .. مريم اكبر عن حمد و معرسه والريم كبرج وسلامه عمرها 20 .. وعمج سالم عنده خالد وسعيد وعلي وفاطمه .. وعمتج عليا توأم ابوج .. ارمله و ما عندها غير بنت وحده "شيخه" .. عمرها 26 ..

ابتسمت وحسيت انه ردت فيّه الروح يوم استوا عنديه اهل .. وأخيراً وأخيراً .. الحمدلله ياربي ..

لويت على عميه اكثر .. وانا اغايض حمد اللي يطالعنيه متعيّب .. !

وخلاف قال عميه انه بيسير يرقد .. وتمينا انا وحمد ..

حمد: لا جان سرتي ترقدين وياه بعد .. ماعرف من وين نازل عليج هالحب والمستحى مره وحده !

حمده: انته ما عشت اللي انا عشته فـ دخيلك لا ترمس .. انته آخر واحد يرمس فهالموضوع .. انا اللي عشت مغتربه 6 سنين ماعرف شو بتكون نهاية غربتيه .. انا اللي عشت ويا ام مريضه نفسياً تصبحنيه بسب وشتايم وتمسيني بضرب وطرده من البيت وكل يوم سكرانه و يايبتلها واحد فالبيت .. انا اللي انحرمت من اهليه وتعاقبت بشي مالي ذنب فيه .. لاتظن انك ممكن تفهم في يوم من الايام اللي انا كنت فيه .. والحين يوم حصلت عميه وحصلت اهليه بذمتك شو تتوقع مني اسوي ؟


سكت حمد وتم يطالع تحت وهو يفرك ايديه ببعض ..

حمد: انا آسف ..

حمده: مايحتاي تتأسف عااادي .. انا أصلاً هب ناويه ازعل من حد .. عقب ماحصلتكم ماظني اقدر اسوي شي يخليني اخسركم ..

حمد: آآآهـ ياحموده وايد أشياء اترياج فالبلاد وانتي ماتدرين عنها الله يعين بس ..

حمده: ليش شو السالفه ؟

حمد: عقب ماتعيشين هناك فتره بتعرفين .. لاتستعيلين .. الله يعينّا انا وياج .. بس دخيلج حموده لا تخلينيه ..

حمده: شو قصدك ؟

حمد: قلت لج بتعرفين خلاف .. بس .. (وغيّر السالفه) الا اقول وين جنزاتج اشوفج ودرتيهن ..

حمده: لا والله وتبانيه البس جدام عميه جنز يالله بالستر ..

حمد: عنبو جنج عيووز يالله بالستر .. هههه ..

حمده: انا عيوز يالشيبه ياللي معبّر السنين .. !

حمد: افااااا انا شيبه ؟ هذا يزايه يالس ادورج 5 سنين طبيت الدراسه وماتم شبر في امريكا مادورتج فيه ؟ تعالي براويج شي ..

وسحبنيه من ايديه .. ورقانيه فوق .. وصلنا عند حجره وفجها حمد وهبطنا .. من الاغراض عرفت انها حجرة حمد ..

سار وظهّر من الدرج كمن صوره وعطانيه اياهن .. تميت اطالعهن .. هاذيلا صوريه .. يوم انا ياهل ويوم كبرت .. وحده من الصور كنت متصورتنها قبل موت ابويه بـ أسبوع ! كنت في عرس وحده من ربيعاتيه وكنت كاشخه ع الآخر .. وطبعاً بدون شيله ..

حمده: من وين يبتهن هاذيلا ؟

حمد: من بيت ابوج الله يرحمه أو بيتكم سابقاً .. دورنا فيه وحصلنا صورج وصورة جواز و صورة شهادة الميلاد بس للأسف ماحصلنا الاصليات ..!

سكت فتره وخلاف قال ..

حمد: حمده انا بعترف لج بـ شي .. بس اخافج تقولين هذا خبله ولا شي صايبنيه ..

حمده: قول عادي ماعليك ..

حمد: حمــده ............انا حبيتج طول هالسنيـن .. مادري اذا كنت متعلق بوهم بس فذمتيه انه كان احلى وهم .. ماخليت حد من عيال عميه يساعدنيه حتى ابويه ماخليته يسوي شي .. انا تكفلت بكل شي .. خفت لو حد غيريه من عيال عميه حصلج انج تكونين ملكه .. يمكن تحبينه .. حطيت في بالي كل الاحتمالات .. وما اهتميت اذا كنتي تطبعتي بطبايع الامريكان ولا بعدج على اصلج .. اللي كان يهمنيه اني احصلج .. ماعرف أي نوع من الخبال هذا كان يوم اني تعلقت بوهمج وطيفج اللي من شفتج أول مره مافارقنيه .. تدرين الحين احس اني ملكت الدنيا يوم حصلتج .. دخيلج حموده لاتقولين انج ماتبينيه .. لاتضيعين 5 سنين من حياتي ع الفاضي ..


تميــت فتــره واقفـه بدون أي حركـه .. أحتلت الصدمه كل ذرّه فيّه الحيـن .. الحين رمت افسر كلمة لا تخلينيه .. الحين عرفت شو سببها .. بس انا هب متأكده اذا كنت احبه انا ما اعرفه غير من يومين ..

حمد: رمسي دخيلج لا اتمين جذيه ..

حمد تنهد وخلاف قال بحزن : خلاص انتي هب مجبوره تحبينيه .. انا شكلي رحت بأوهاميه بعيد يوم ظنيت انج ممكن تحبينيه ..

حمده: حمد لا تضغط عليّه .. انا يمكن انعجبت فيك أول ما شفتك لكن مادري اذا كان هالشي وصل للحب .. يمكن هو مجرد اعجاب .. بس مادري مع الايام شو بيستوي ..

ظهرت من حجرته .. وسرت حجرتيه




بالباجــر ..


وعيت على صوت دق ع الباب .. طالعت الساعه اللي ع اليدار كانت الساعه 11 الضحى ! يعني الطياره عقب ساعه ! قمت بلا ذهن وغسلت ويهيه وبدلت ثيابيه .. ورتبت شعريه ولفيته .. ورتبت شنطتيه والاغراض اللي كنت مطلعتنهن منها ..


طالعت الساعه استوت 11:30 .. طلعت من الحجره بشنطتيه ونزلت تحت وشفت حمد يتريانيه وهو شكله معصصب .. شل واحد من الخدم شنطتيه وظهرت بها برع .. وظهرنا انا وحمد بعد ونحن نمشي قال حمد ..


حمد :لا جان كملتي رقدتج بعد !

حمده: اووفففف شسوي ما انتبهت ع الساعه .. الا وين عميه ؟

حمد: روّح قبلنا .. سافر اليوم الساعه 6 الصبح في طيارة خاصه ..

حمده: بس هب انتوا قلتوا انه الطياره الساعه 12 ؟

حمد: طيارتنا انا وانتي اما ابويه لازم يسافر قبلنا عشان يخبر الكل بهدووء .. عن ادّشين عليهم فجأه وخلاف حد يغمى عليه !

وفهاللحظه ركبنا السياره ..

حمده: لهالدرجه ؟

حمد: واكثر .. ماعليه بتعرفينها العايله .. لا تستعيلين !

صديت صوب الدريشه .. ياترا شو اللي يترياني هناك .. ؟ الله يستر ..

وصلنا عند المطار دخلنا نخلص الجوازات والشنط ..

عقب ماخلصنا ركبنا الطياره .. عقب مايلست ع الكرسي يت فباليه اغنيه سمعتها مره بس ما اذكر وين ..

على الامارات يالغالي جهز اغراضك ورافقني
لي رف مجد العلم عالي دقات قلبي تسابقني


انا سايره الامارات لكني بعدني بجواز امريكا .. ! بس جوازيه وين ؟

عطانيه حمد جوازيه وقال: يمكن نطوّل شوي لين نطلّع لج جواز الامارات .. يبالج تصبرين شوّيه .. أوكيه .؟

هزيت راسيه بـ هيه ..



عقب عدة ساعات طويـــله .. هبطت الطياره .. ماعرف شو كان احساسيه فـ ذيج اللحظه .. كنت بس ارقب شو اللي بيستوي ..


طلعنا من المطار عقب ماخلصنا الخربطان مال الجوازات والشنط .. شفنا عند مواقف المطار سيارة حمد .. ماشالله هالسياره متنقله فـ كل بقعه .. موحاه يابها هنيه .. !


يينا بنركب السياره بس قبل لا افج الباب .. قال حمد ..

حمد: تشوفين هالسياره اللي انا شالنها ويايه كل بقعه انتي اغلا عنها ..

ضحكت عليه .. وركبت ..


قلت له يخطفنيه على أي محل عبايا بما اني فالبلاد الحين لازم ارد البس عباه شرات ايام قبل .. وقف جدام مجموعة محلات كان واحد منهن محل عبايا .. دخلت واخترت لي عباه أي كلام مب متفيجه ايلس اتخيّر .. دفع حمد عني بما انه ماعندي فلووس ! لبست العباه فالمحل طالعت شكليه فـ منظرة غرفة القياس اللي فالمحل .. شكلي ذكرني بأيام بوظبي .. والمصرقعين اللي كانوا يرقمونيه .. منو كان يتوقع انه فحياتيه بيستوي فيّه كل اللي استوا ؟


ردينا ركبنا السياره ..

حمد: ياخي تصدقين احس اني الحين ماعرفج ..

حمده: افا بس افا طحت من عينيه .. وانا اللي قلت الحين بيقول حلوه عليج العباه ..

حمد: أحس جني واحد ظاهر ويا ربيعته !

حمده: يـــــــــــــــــــــاللله بالســـتر أسميك صـــدق ماتستحي على ويهك .. يالله وقف وقف بنزل .. وايده التكاسي فالشارع !!!!!

حمد: ههههههههههههههه .. حشا يبوج أسووووولف محد يروم يسولف ويااااج ؟

سكت عنه أوني زعلانه ..

حمد: لا يكوووون زعلتي ؟ خلاص آسف والله آسف .. صدق اني ما استحي على ويهيه ..

كنت بضحك بس سكت .. رد يزقرنيه مره ثانيه ..

حمد: حموده ..

قلت بدون ما احس: لبيه ..


سكت ماقال شي .. طالعته اترياه يرمس شفته يحط سي دي فالمسجل .. اشتغلت الاغنيه عقب لحظات .. كانت اغنية حسين الجسمي ..


لبيه ياللي وحدك ان قلت لبيه .. يذبحني لبيهك ويذبحني الصوت
و ان طاح قلبي ميتٍ فيك خليه .. يا حي قلبن طاح ويا حيه الموت
ماقلت احبك لجل وقتي اسليه .. لا والذي نجّا نبيّه من الحوت
والحب لو هو سر واقدر اخبيه .. ماقلت احبك حتى وشفاهي سكوت
لي ناظرن ماغير شخصك يمليه .. كنك دواي وشوفتك طب منعوت
وان ضاق بالي اذكر اسمك واغنيه .. واتخيلك عل وعسى طيفك يفوت
اهواك وهمي كيف قلبك اهنيه .. من كثر ما اسمك في هالقلب منحوت
حتى الخطا لو جاني منك امشيه .. وان مامشى اخلق له اعذار وثبوت
ويش الذي يخطر في بالك واسويه .. لو حتى في وسط البحر ابني بيوت
ياللي البحر لو جا في بالك تحلّيه .. مريت صوبه وامتلى سكر وتوت
لبيه ياللي لو طلبني ألبيه .. للعاصمه حافي ولو دربها خبوت
لين اندهك روضه وتردين لبيه .. واطيح من طولي ويذبحني الصوت


حمده: بس انا هب روضه ..

حمد: عاد شسوي بالشاعر .. ! انزين رضيتي علينا ولا ؟

حمده: رضيت .. اصلاً انته ماتخلي حد يزعل عليك !

ابتسم وسكت .. اما انا تميت اطالع الدرب .. استوى فلّيل .. أذن المغرب ووقفنا عند واحد من المسايد نصلي .. وخلاف كملنا دربنا .. عقب حوالي ساعه ونص .. قال حمد..

حمد: العين ترحب بكم !..

حمده: احلف انته بس .. !

التفت ع الدريشه وتميت اطالع المكان .. ماكانت مثل دبي .. المكان كله شير وماشي بنايات .. شفت جي نفس القبه .. تخبرت حمد ..

حمده: شو هذا ؟

حمد: هذا نادي العين .. هكوه اقري الاسم ..

(نادي العين الرياضي الثقافي ) هاللي كان مكتوب .. تذكرت قبل يوم كان ابويه يطالع المباريات وانا اطالع وياه كنا دوم نشجع العين ماكنت متصوره في يوم من الايام اني بيي العين وبشوف هالنادي !

حمد: نحن فالقطاره الحين وخطفنا عن هيلي ..

تميت اتلفت .. في كل مكان شي دكاكين ومخابز ومدارس وشيشات بترول .. المكان وايد مختلف هنيه .. أكثر بساطه ويهدي الاعصاب !


خلاف يانا درب طويـــــل شوي كله شير وكل شوي نخطف ع دوار .. من عند واحد من الدواوير بدا السوق .. شفت حديقه مكتوب عليها "حديقة السليمي" .. وكان شي انواع سيايير افتقدتهن من زمان .. "الستيشنات والكلوزرات" ماقد شفت وحده منهن في امريكا .. وسيارة حمد "رنج" ماحبيتها وايد .. خيبه لو يدريبيه والله يا يفرنيه من الدريشه هع ..


دخلنا في زحمة السوق .. خلاف خطفنا من جدام مكان أظن انه مستشفى .. وتأكدت يوم شفت انه مكتوب عليه "مستشفى الواحه" وقف حمد عند الاشارات اللي عداله وقال ..

حمد: هذا المستشفى اللي انولدتي فيه وانولدت فيه انا بعد ..! بس انا اموت واعرف ليش انولدتي فالعين وعشتي في بوظبي ..

حمده: يوم تخبرت ابويه الله يرحمه قال انه عقب ماربت اميه مارام يعيش فالعين اكثر وخاف ينفضح ..

حمد: اها ..

يعني انا هنيه انولدت ؟ طلعت من هالمكان قبل 22 سنه والحين رديت له مره ثانيه .. !

لفيت ع اليسار شفت بناية "الاتصالات" تنعرف من هالكوره اللي فوقها !

حمد: شرايج اخطفج ع الصناعيه ؟ بنسويلج سكراب وتبديل آيل ..

حمده: ايييييييو so disgusting !

حمد: هههههههههههههه ..


اخضرت الاشاره و تحركنا .. لف حمد يمين وكملنا دربنا .. عقب شوي بديت اشوف البيوت .. شفت لوحه مكتوب عليها المناصير .. ووحده ثانيه مكتوب عليها فلج هزاع .. لف حمد صوبها ..


تميت اطالع يمين ويسار .. بس حمد مالف بالعكس ودانا صوب دوار حديقة الحيوانات .. لف منه يمين .. وعقب مادار راسي من الدواوير والدرب .. لف حمد صوب لوحه مكتوب عليها "زاخر " يوم شفت البيوت حسيت بـ حفوز .. اكيد نحن الحين قريبين من البيت .. وبالفعل عقب كمن لفه .. وقف حمد عند واحد من البيوت .. تم يالس فالسياره ويطالعنيه لأني انا ماعرفت شو اسوي فهاللحظه .. الحين عرفت بس انا وين وصلت .. ماقدرت اتحرك .. كان وديه لو اني بعدني فالدرب وماوصلت .. أو كنت في أمريكا .. خفت .. خفت من هالناس اللي ما اعرفهم وبيكونون اهليه .. هل بيتقبلونيه ؟ ولا بكون منبوذه لأني غريبه عنهم ؟ من كثر ما انا محتاره ماعرفت شو اسوي غير اني حطيت راسيه بين ايديّه وصحت .. !


مسك حمد ايديّه وخوزهن عن ويهيه .. طالعته وعيوني حمر والدموع تهل وانا ما احس بها .. قلت بصوت متقطع ..

حمد انا خايفه !!

حمد: لاتخافين فديتج انا وياج ومابخليج .. وبعدين هاذيلا هلج ومالج بد منهم بعدين مب انتي اللي كنتي متشوقه تشوفينهم ؟

حمده: بس انا الحين خايفه ! ماعرفهم واخافهم مايتقبلونيه ! اخاف من حياتيه وياهم .. انا خايفه من اللي ياي .. دخيلك اوعدنيه انك مابتخلينيه وبتوقف ويايه .. دخيلك ..

حمد: أوعدج .. لا تظنين انه في شي بيبعدني عنج غير الموت ..

حمده: بسم الله عليك لا تفاول على عمرك ..

حمد بابتسامه: اوووه منو قديه عاد الحين .. يالله ننزل ؟

هزيت راسيه بـ هيه ..

نزل هو قبليه وفج لي الباب ..

حمد: تفضلي your majesty ..

نزلت من السياره وانا ابتسم والدموع فعيونيه .. قبل لا اسكر الباب تناولت كلنيكس ومشيت دموعيه وبندت الباب ..

مشيت ببطئ وحمد يجارينيه في مشيتيه .. وصلنا عند الباب .. شفت نعول وااايد الظاهر العايله كلها مجتمعه هنيه الله يستر .. حط حمد ايده على مقبض الباب .. وقال..

هاه أفج ؟

طالعته وخلاف نزلت راسيه وتنهدت و قلت: هيــه ..


&* الجــــــــــزء الرابــــــع *&

فج الباب

دخلنا ..

وقفت فمكانيه وانا اشوف الحريـــم والبنات والرياييل واليهال الكل التفت صوبنا ..

محد تحرك غير العيوز اللي اتجدمت صوبيه بعصاها ولوت عليّه .. وتمت تصيح !

العيوز: الله يرحمك يا علي .. الله يرحمك .. يالله يا بنتيه رديتي فيّه الرووح ..

وتمت تصيح وانا حسيت بـ نفضه قويه فـ جسميه .. وخلاف رفعت ايديه ولويت عليها بقو وتميت اصيــــــح ..


ماعرف ليش سويت جذيه .. بس اللي اعرفه انه هاي المره الاولى من 6 سنوات اللي أحس فيها بالامان .. حسيت هالعيوز اللي أظني هي يدتيه وايد قريبه منيه يكفي انها من ريحة ابويه ..


فجت عنيه عقب ماطولت وهي لاويه عليّه وانا بعد مافجيتها بسهوله ..

تميت امش دموعيه وهي حطت ايدها وتمت تمسح على راسيه وتبتسم ..

العيوز: شحالج يا بنتيه .. عساج الا بخير ؟

قلت لها وانا بعدنيه خانقتني العبره : والله ما طاب حاليه الا من عقب ماشفتكم .. انتي شحالج يدوه ؟

العيوز: بخير الحمدلله وغديت أخير من عقب ما كحلت عيونيه بشوفج ..

قبضت يدتيه ايديه ومشينا صوب الرياييل اللي كانوا واقفين اللي عرفت من اشكالهم انهم عمومتيه .. واحد منهم كان عمي سيف .. والثاني اكيد سالم بس هذا اللي عدالهم منو ؟


وايهت عمومتيه .. اما هذاك وقفت عنده بريك بما اني ماعرفته .. وكان شكله اصغر عنهم .. فالثلاثينات .. أظني بدايةالثلاثينات اذا ماكنت غلطانه ..

يدتيه: هذا خالد ولد عمج ..

ابتسم هو وطلعن ضروسه اللي ما شفت ابيض منهن في حياتيه عنبو يسوي دعاية معجون ؟مسوي ابتسامة كرست ! بس شي فتحه بين ضروسه ..

خالد: شحالج حمده ..

خيبه مغلظ صوته .. يالله فديت بوشهاب محلات صوته يريّح الاذن .. هب هذا حشا ازعاااج !

حمده: بخير وسهاله ومن صوبك ؟

خالد: الحمدلله ربي يعافيج هاه علوم امريكا ؟

لا شكله هذا ناوي يطولها ..

حمده: يسلمن عليك جودي وكرستينا و صوفي ..

خالد: هههههههههههههههههههههههه ..

كلهم ضحكوا .. وضحكت انا بعد مع انه هالخالد مب عايبنيه ..

مشيت صوب اللي عقبه فالطابور هع .. وقفت جدام اللي قالت لي يدتيه انه سعيد .. لو عطيته تقدير سن بقولكم آخر العشرينات ..

سعيد: يامرحبا الساع بـ ام عيون زرق ووسااااع ..

ضحكت عليه .. هيه ع فكره انا عيووني زرق جان ماتعرفون ..

حمده: مرحبا بك زود ..

سعيد: شحالج ربج الا فاين ؟

حمده: oh I'm fine thank you I'm so happy because I'm with every body here .. and what about you ? are you alright ?

طبعاً قلتها بـ لهجه امريكيه أصليه .. حاولت قد ما اقدر اني اطبق اللهجه اللي تعلمتها 6 سنوات وظهرت مضبووطه .. عشان يتلخبطون فالكلام بما انهم مب متعودين يسمعونه بـ لهجه امريكيه جذيه ..

سعيد: دخيل الله يالقووم حد عنده قااااااموووووس ؟.. يبوج من وين ضاويه انتي !.. ترمسين فلبيني ؟

حمده: هههههههههههههه ..

رمس اللي عداله اللي أظن انه علي ..

علي: الا بربج شو قلتي ..؟ لايكون سبيتينا ..

حمده: قلت انا بخير شكراً انا فرحانه اني وياكم هنيه .. وانته شحالك ربك بخير ؟ هذا اللي قلته !

علي: هيه زين الحمدلله .. آآخ لو سجلتها كنت حفظتها عشان اقولها جدام هالكمن انجليزي اللي عندنا فالدوام ..

حمده: ههههههههههه ..

هالشخصين سوااااالف ودشوا مزاجيه الصراحه ..

التفت صوب حمد شفته رافع حاجب واحد ومتجتف ومب عايبنه هاللي يستوي .. ابتسمت له من خاطريه وخطفت صوب الحريم عشان اسلم عليهن ..


أول وحده كانت عمتيه عليا .. كانت ملامحها اصغر من سنها كان بعده شكل ويهها شباب وحلوه .. فيها وايد شبه من ابويه .. لوت عليّه وسوّت مناحه لها أول مالها تالي .. وسلمت على حريم عميه .. عوشه حرمة عميه سيف يعني ام حمد .. وغوّيه حرمة عميه سالم ..


وخلاف عاد يا دور البنات .. اكبر وحده كانت مريم اخت حمد وكانوا عندها عيالها الصغار (روضه و راشد و شمه) .. كلهم كانوا كيوووووت .. خاصة روضه اللي ماخذه شبه امها ..


وخلاف عاد بدت المعركه .. هع .. الريم وسلامه وشيخه وفاطمه .. كلهن واقفات وكل وحده شاقه الحلج اكثر عن الثانيه.. المهم وايهتهن وحده ورا الثانيه ..


سلامه: يالله فديت عيووونج والله انهن عذاااب ..

حمده: عيوووونج الحلوه والله أول مره من 6 سنوات اشوف عيون عسلياااات ..

سلامه: حلفي انتي بس .. اقول تبادلين ؟

الريم: صدقينيه ماتباهن عيوونج انتي ونظاراتج وعدساتج ..

سلامه: جب مسودة الويه من زين عيونج ..

الريم: شو فيهن عيونيه ؟ عيون الوضيحي ماشالله ..

فاطمه: ماااااااااااالت !

وسوت لها حركة مالت ..

شيخه: خلج منهن انتي بتعيشين عنديه انا فـ هاذيلا المغرّم طبيهن يولن ..

حمده: صدق بعيش عندكم ؟

شيخه: يب .. ترانا اروحنا انا واميه فالبيت .. نهي مشكل ..

حمده: ياحافظ مادريت بعمتيه مخلفه هنديه ..

الكل: ههههههههههههه ..

فطوم: قفطوووووووووها ..

شيخه: جب جب انتي آخر من يتكلم .. يالياااااهل ..

فطوم: انا هب ياااهل عمري 17 ..

حمده: كنت اصغر عنج بـ سنه يوم عشت في امريكا ..

فطوم: اها يعني درستي الـ هاي سكوول هناااك صح ؟

حمده: هيه آخر سنه .. ياخي ماصخيـــن مايحتاي تسيرين السينما افلام مباشره امره ..

شيخه: اوب اوب ثرج شفتي بلاوي ..

حمده: بخبركن سالفتيه خلاف والله ماتقولن غير فلم .. الا اقول الحين صدق بعيش عندكم شويخ ؟

شيخه: هيه عيل ؟

تضايقت بس ماحبيت أبيّن هالشي .. ماكنت ابا ابتعد عن حمد .. مادري كيف تعلقت به جذيه .. !

ابتسمت لها .. وقلت : يامرحبابيه .. البيت بيتيه .. صح ؟

شيخه: ههههههه صح ..

حمده: انزين لو مابا اضايقكم بس انا تعبانه ..

شيخه: ابشري الحين بسير اقول حق اميه نسير البيت لأنه نحن من الساعه 10 الصبح هنيه ..

وقامت شيخه صوب امها وقالتلها ويت عمتيه تربع صوبيه ..

عليا: فديتج شعنه ماقلتي انج تعبانه والله مايلسنا دقيقه ..

حمده: مابا اضايقكم عمتيه ..

عليا: يالله ياحموده شقايل تضايقينيه وانا الدنيا هب واسعتنيه من الفرحه بشوفتج ؟ لو تدرين انا من متى اترياج .. انتي بنتيه يا حموده .. شقايل تضايقينيه ..

تذكرت عميه سيف يوم قال انها توأم ابويه .. توني تذكرت هالرمسه .. الحين بس عرفت ليش تحبنيه هالكثر ..

وادعت عمتيه الكل .. وظهرنا برع وويانا حمد عشان ينزل قشاريه من السياره ..

وقفت عداله بما انه القشار قشاريه .. وعمتيه وشيخه ركبن السياره ..

قال لي حمد عقب ما تأكد انهن بعيد: بشتاق لج .. ما اصدق اني عقب مالقيتج بخليج مره ثانيه ..

حمده: وين بسير انا يعني ترانيه في بيت عمتيه متى مابغيت تعاااال ..

حمد: ياليت السالفه بالسهوله اللي انتي متصورتنها .. بس بحااااول ..

شليت شنطتيه اللي ماكانت ثقيله وايد .. كنت بقوله اني بشتاق له مثل ماهو بيشتاق ليه بس كابرت وقلت ..

حمده: يالله مع السلامه ..

حمد: فدااعة الله .. الله يحفظج ..

ابتسمت وروحت عنه ..

ركبت عند قوم عمتيه .. وتوجهنا صوب بيتهم ..

ر مستنيه شيخه بصوت واطي : شو كنتي تقولين حق حمد ..

رديت عليها بصوت واطي بعد : ماشي .. بس أشكره ع اللي سواه ..

شيخه : اها .. لو اني احس انه السالفه وراها شي ثاني ..


سكت انا وتميت اطالع الدرب .. يت في باليه ايام امريكا أسميها كانت ايام حلوه .. ياليتنيه لين الحين راقده في بيته ولا قمت ياليت هذاك اليوم ما انتهى .. آآآآهـ ..


وصلنا عند منطقه قريت لوحتها من قبل وهي هب بعيده عن زاخر .. "فلج هزاع" أو فلي هزاع على قولتنا .. المهم وصلنا عند البيت .. كان عود وفخم وأحلى مافيه حديقته .. هالبيت وايد عود على ثلاث اشخاص أو شخصين قبل ..


نزلنا وزقروا وحده من الخدامات عشان تنزل شنطتيه ..

دخلنا داخل .. انبهرت بالبيت صدق كان حلو .. حسيت اني في قصر .. الظاهر ريل عمتيه الله يرحمه كان وايد غــــني !

عليا: تعالي حموده فوق اختاري لج حجره ..

يا كثر ما اختار حجر !


لفينا ع كل الحجر كانن 6 حجر وكلهن مفروشات بس ع الفاضي .. في وحده دشــت مزاجيه من الخاااااااااااطر .. وسيـــــــــعه .. اهم شي انه لون يدارها هادي .. بيج .. صح انه هب ذاك الزود بس الاثاث هو اللي محلنها .. شرشف الشبريه احمر والستاره حمرا وشيفونها بيج .. وفيها مكان مرتفع شوي صوب الدريشه وله دري صغير .. وعليه كراسي حمــر وطاوله صغيره .. شكلها هالحجره أصلاً كانت مجهزه حقيه .. لأني اشوف انها فيه كل شي .. تلفزون وثلاجه صغيره ولابتوب وحاطين الوايرليس عند باب الحجره ! باقي الحجر ماكان فيهن جذيه .. بس هاي .. قلت حق عمتيه ..


حموده: جنكم كنتوا مجهزين هالحجره حقيه ..؟

عليا: انا حسيت انج بتختارينها و جهزناها ولو ماعيبتج عادي كنا نقلناه في أي حجره ثانيه ......... يالله عيل نحن بنظهر بنخليج تاخذين راحتج .. بس عقب شوي نزلي للعشا ..

حموده: انشالله ..


ظهرت عمتيه وانا عقيت عباتيه .. وطحت فوق الشبريه .. احس بتعب فظيع .. قمت عشان اتسبح .. بس ماعرفت شو البس .. عادي البس عندهم بجامه ؟ اووه محد غيرهن فالبيت يعني عادي ..


شليت لي بجامه وتسبحت ونشفت شعريه ع السريع .. ربطت شعريه اللي طال هالفتره .. وسويته ذيل حصان .. بجامتيه كان لونها وردي .. برمودا وبدي ايديه وايد قصار .. ولبست هالنعال اللي مادري شو يسمونها .. بس هي جي ناعمه ويكون عليها يا دبدوب او مكتوب عليها كلمه الصراحه ماعرف شو اسمها .. المهم لبستها كانت بيضا وفيها وردي وعليها دبدوب .. عقب ماطالعت عمريه فالمنظره وشفت شكليه اللي مظهرني شوي على ياهل.. ظهرت من الحجره ..


خطفت عدال حجرة شيخه اللي كانت لاصقه فحجرتيه .. فجت الباب فجأه هي ببجامتها .. تمت شيخه اتأملنيه .. وخلاف قالت ..

شواخ : يالللللله محلاااااج مالوم حمد يوم حبج طول هالسنين .. !

وخلاف حطت ايدها ع ثمها يوم انتبهت ع اللي قالته .. ثرك مفضوووح عند العرب يا حمّوود .. ضحكت وقلتلها ..

حموده: عاااادي انا اعرف ..

شواخ: أووووه ثره وراج بلااااوي ماعليه بتخبرينيه خلاااف ..

حموده: افا عليج .. بس خلاف هب الحين لأني بس ابا آكل وارقـــــــــــــــــــد ..

شواخ: تم بس باجر بييج الاستجواااب ..

حموده: الله يعين ...!

ضحكنا ونزلنا تحت .. وسرنا صوب غرفة الطعام .. شفت انواع الاكل ع الطاوله .. الصراحه فيّه يوع مب طبيعي ..


يلسنا وتعشينا .. الصراحه طبخهم فنّااااااان .. قمت عقب ما ترست بطنيه وحسيت انيه ماشوف جداميه من الرقاد .. وسرت اتغسل وعمتيه بعد يت تتغسل .. عقب ماظهرت من المغاسل ..


حموده: عن اذنكم بسير ارقد .. تصبحون على خير ..

يت عمتيه صوبيه ولوت عليّه ..

عليا: معذووره الليله لنج تعبانه بس باجر بتخبرينيه كل اللي استوااالج ..

حشا كلهم يبون يعرفون اللي استواليه يتضاربون عليّه ..

حموده: انشالله عمووووه ..

حبيتها على راسها .. وسرت ارقد .. وصلت عند الحجره .. دخلت .. قفلت الباب .. بندت الليتات وخليت الابجوره بس .. وعقيت بعمريه فوق الشبريه .. وتلحفت ورقدت ..


بالبـــــــــــــاجر .. وعيت على أشعة الشمس اللي يايه من الدريشه بما اني مابندت الستاير .. تميت اتلفت .. شفت اني فـ نفس الحجره اللي رقدت فيها البارحه .. يعني كل هالشي ما كان حلم الحمدلله.. قمت بكل كسل وطالعت الساعه .. كانت 12:30 الظهر .. فهاللحظه سمعت اذان الظهر .. قمت وتسبحت وبدلت ثيابيه بـ جلابيه .. وسرت اصلي ..


عقب ماخلصت من الصلاه .. مشطت شعريه ولفيته ونزلت تحت .. حصلت عمتيه وشويخ .. سلمت عليهن ويلست ..

شويخ كانت تتثاوب .. شكلها حالها حاليه ..

عليا: وحليليه من اصبحت محد عنديه يالسه الا هنيه مجابله هالتلفزون واليدران ولا اتحوط فالزراعه ..

شويخ: تراج يا اميه كل يوم هذا حالج .. يعني حبكت ع اليوم ؟ ولا تبين تكسرين خاطر حموده ؟

عليا: حشا انتي دوم فاضحتنيه .. !

حموده: ههههههههههه ..

شويخ: بالله عليج من وين يبتي هالجلابيه وانتي كنتي عايشه فـ امريكا ؟

حموده: والله مادري حصلتها بين القشار فالشنطه ..

شويخ: لازم اليوم نوديج السوق نفصل لج كمن عباه وكندوره وتاخذيلج ثياب واللي تحتايينه ..

حموده: هيه والله صدقتي وايد ناقصتني اشياااء ..

مدت لي عمتيه "كردت كارد" ..

عليا: هاي حقج .. من الحساب اللي فيه ورث ابووج الله يرحمه .. كان كاتب كل فلوسه واملاكه بأسمج ..

خذت البطاقه بكل هدوء وانا تغيرت ملامح ويهيه للحزن .. تذكرت ابويه .. مابقى منه شي غير هالورث !!!! طاحت دمعتيه بس مشيتها ..

شويخ: يووووه زين جذيه يا اميه ذكرتيها بـ ابوها !

رفعت راسيه وقلت : لا عادي ..

خلاف قمنا نتغدا وعقب الغدا يلسنا انا وشويخ فحجرتيه واستلمتنيه تحقيـــق !

حموده: اقولج كنت يالسه أصلي العشا تونيه باقيليه الشفع والوتر مطتنيه من شيلتيه وتمت اتهازبنيه وماخلت مسبه ماسبتنيه اياها وتمت تسب ابويه بعد وماخلت شي امره وخلاف طردتنيه دزتنيه برا الباب ورقعت به ورايه .. الحمدلله انيه لحقت آخذ جاكيتيه !

شويخ: حشـــا شو من أم هاي ؟ هاي متوحشه !

حموده: فيها مرض نفسي .. المهم انا مشيت شوي وعقب ماتعبت يلست ع الرصيف حوالي ساعتين وخلاف وقف جداميه حمد .. انا استغربت يوم شفت رقم الامارات .. خبرته باللي استواليه وركبت وياه .. و بت عنده فالبيت .. وحليله خليته يرقد فالصاله ..

شويخ: كل هذا وانتي ماتعرفينه ؟

حموده: بالله عليج لو انتي مطروده من البيت .. وماعندج مكان تسيريله والشوارع فيها من الحراميه اللي يكفيها شو تبيني انجتل ؟

شويخ: لا يبوج بيت حمد أرحم . . انزين وبعدين ..

وتميت اخبرها السالفه ..

شويخ: حلـــــــــــــــــــــــــــــــــفي انتي بس انج رقدتي على جتفه !

حموده: شسوي كنت دهمانه ..

شويخ: ياليتنيه مكانج ....... (سكتت خلاف قالت بنبره مافهمتها ) بس بدال حمد سعّوووووووود ..

حموده: سعّوووود ؟ ولد عميه ؟

شويخ: هيـــه .. شرااايج ؟؟

حموده: الصراحه لايقين على بعض .. شو هو خاطبنج ؟

شويخ: هيــــه نحن محيرين حق بعض من زمااان ..

حموده: آهـا ..

وكملت لها السالفه ..

شويخ: ياخي هالحمد رومانسيته غير شكل .. كلهم عيال خواليه دفشيـــن .. !

حموده: لا عاد مالج خـــص في بو شهابيه .. لا تقربين صووبه ..

شويخ: ياويلي مانروم ع الحب والغيره .. يبوج يوم انتي هالكثر هو مخبلبج جان قلتيله ؟

حموده: خليه شوي يتعذب ماشي ايي بالساااهل ..

شويخ: انا بخبره ماعليه ..

حموده: يا ويـــلج انا عنديه خطه لا تخربينها ..

شويخ: انزين يا ام الخطط ..


فهاللحظه أذن العصر .. توضينا وصلينا فحجرتيه .. وعقب الصلاه ترهبنا عشان نسير السوق .. ورانا دواره فالاسواق شكلها ما بتخلص لين وقت متأخر من الليل ..


هالمره بما انا بنتأخر فالسوق فـ عمتيه هي اللي بتسوق السياره بما انها عندها ليسن لكنها مرات تتعايز وتخلي الدريول يسوق ..


ركبنا السياره بس عقب ضرابه .. كنا نتعازم انا وشويخ على الكرسي اللي جدام .. آخر شي شويخ هي اللي ركبت فيه .. اما انا ركبت ورا ومغطت رويلاتيه على راحتيه ..!


انتبهت ونحن في نص الزحمه على رنج اسود .. وايد يشبه رنج حمد تجدم شوي ورمت اشوف لوحة السياره .. شفت الرقم كان نفـــــــــس الرقم ونفس اللوحه .. حاولت اشوف شي من داخل بس مارمت بسبة المخفي .. فهاللحظه فج الدريشه .. وطلّع ايده .. أتخيّل عاد آخر شي يظهر مب هو .. اففففف انزين ليش ما يظهر راسه ؟


تمينا واقفين فتره طويله فـ نفس المكان .. لأنه شكله كان مستوي حادث ع الدوار .. وفهاللحظه من كثر ماكنت اتمنى اني اشوفه .. نزل من السياره وهو محتــشر .. وكنت اسمع الاغنية اللي كانت حاطتنها شويخ فالسياره .. وحسيتها امره تنطبق ع اللي يستوي ليه .. !


من لمحته بعيد يمشي فز قلبي وقلت اعرفه
ويوم انا قربت منه هذا خلي هذا وصفه
بعد ما طوّل غيابه التقينا دون موعد
واحلى شي ان الحكايه كلها صدفه في صدفه

ماني مصدق عيوني هذا خلي ولا غيره
فرحتي الليله بوجودك يا بعد عمري كبيره
احلى صدفه في حياتي يوم قابلتك وشفتك
ماكذب من قال ان الدنيا يا عمري صغيره



كان هو .. مع انه كان لابس كندوره و متسفّر .. لكني اقدر اميّزه من بد الخلق ..


سار صوب الشرطي يرمسه .. وخلاف وقف يوم شاف سيارتنا من بين السيايير .. هاي اللي شلتنيه البارحه من عنده ويابتنيه صوبه اليوم دون موعد ..


يا صوبنا ودق ع دريشه عمتيه .. ونزلت هي الدريشه .. اعتدلت فـ يلستيه ويلست بشكل اخليه يشوف اني موجوده فالسياره ..

عمتيه : حمد ؟ شحااالك ؟ شو يايبنك هنيه ؟

حمد: والله حالي حالكم غاص فهالزحمه .. وعنديه شغله ضروريه ابا اسويها وهاذيلا معطلينا ..

عدل وقفته وقبض فالمرايه .. طالعنيه وابتسم ..

حمد: شحالج حمده ؟ عساج مرتاحه هنيه ؟

سؤاله كان وايد رسمي مب مثل ماتعودت بس نبرة صوته هي اللي ريحتنيه ..

حمده: الحمدلله والله ماشفت الراحه الا من عقب ما ييت هنيه ..

حمد: شحالج شويخ ؟ هاه علوم الكليه بعدج تكحّين فيها ؟

شويخ: ييييه انته من يومك اتطنّز عليّه بس حـــره هذا آخر كوورس عنديه
لأنيه درست صيفي ..

حمد: هيــه زيــن مبرووووك مابغيتي ..! راسبه كوورسين ورا بعض ..

شويـخ: حيوااااااان ..

حمد: هههههههههههه ..

مادري شو اللي كان يحترق في داخليه يوم كان يرمس شويخ ويضحك وياها .. شكله يعرف عنها اكثر من ما يعرف عنيه .. أصلاً انا شو أكون مجرد غريبه دخلت هالعايله فجأهـ !

تغيّرت ملامح ويهيه ورديت انخشيت في مكانيه ورا شويخ وصديت صوب الدريشه ..

تحركن السيايير فهاللحظه وحمد رد صوب سيارته .. وكملنا نحن دربنا ..

أول شي سرنا صوب محلات القطع مال الكنادير .. خذت لي 12 قطعه بالتمام والكمال .. الصراحه كل وحده كانت احلى من الثانيه .. كنت باخذ اكثر لو انه ماعنديه اشياء ثانيه اشتريها وكنا بنتأخر ..


بعدين سرنا صوب العين مول .. توجهنا صوب محل العبايا "حناين" وفصلت لي 4 عبايا .. انا مقرره اترس الكبت .. وخلاف كملنا على باريس غاليري و عايلة سنتر بوينت يعني لايف ستايل وهوم سنتر وشو مارت .. و انواع محلات الملابس اللي ما ثبّت اساميهن . واهم شي اني خذت لي موباااايل !.. هذا احلى شي الصراحه ..


ردينا بقراطيس ترسن دبة السياره .. وخلاف خطفنا صوب الاتصالات قبل لايسكرون بـ شوي .. خذت لي رقم حلو .. كان وايد مكرر فيه رقم 7 أحلى رقم عنديه .. ظهرنا من عندهم من باب الطواري عقب مابندوا البوابه الرئيسيه .. عقب ماظهرنا شفنا انه الساعه 9 فلّيل .. قالت عمتيه ..

عليا: بتتعشن فالبيت ولا تبن من المطعم ؟

شويخ: شرااايج تودينا بوااادي بما انه درب مزيد هاذوه جدامنا ..

عليا: شرايج حموده ؟ جانج هب تعبانه بنسير ..

حموده: لا شو يتعبنيه .. عادي ..

عليا: يالله عيل بنهيت الليله شو ورانا ..

وحطت عمتيه اغنية ميحد (مدمنه روحي) وطولت عليها .. والله انه عمتيه غير شكل .. ربـــشه !

مدمنه روحي وعيني مدمنه .. ومسمعي مدمن وقلبي فيه صووع
كل مافي الكون زينن بكمنه .. وانا بي من كل نوع الشوق نوع

قبل لا أسافر كنت متخبله ع أغاني ميحد والحين رد فيّه الخباال ..

وصلنا بوادي .. ونزلنا .. كان اكبر واوسع من العين مول .. تحوطنا شوي .. من تحت كان حلو .. خاصةً اني دخلت محل Marks & Spenser أو مارك سبنسر ع قولتهم هنيه .. كل شي يختصرونه ماشالله .. هذا كان محليه المفضل في امريكا .. ودخلته الحين .. بس هنيه كان "مصغّر" .. لكن ماعليه ..


وخلاف رقينا فوق .. مكان المطاعم ماعيبني وايد .. كان كئيب .. بس ماعليه .. طلبنا ويلسنا نتعشا .. بس أكيد ماسلمنا من الشباب ومصاختهم .. انفرن علينا كمن رقم ويتنا كمن دعوه ع العشا و كمن توصيله .. بس ماحصلوا غير الهزاب والشتايم من عمتيه ..


عقب ما خلصنا عشانا قمنا .. كانت الساعه 10:30 .. وايد تأخرنا .. لين نوصل فلي هزاع بتوصل 11 .. ظهرنا بسرعه من بوادي .. وركبنا سيارتنا وصوب البيـــت ..


ومثل ماتوقعت وصلنا ع الساعه 11 .. هبطنا البيت وكلن صوب حجرته .. حجرتيه غدت متروسه قراطيس .. بعدنيه باجر بسير الخياط عشان افصّل هالقطع .. سرت وتسبحت ولبست لي بجامه لونها أخضر فاتح .. ولفيت شعريه .. ويبت كرتون التيلفون ويلست ع الشبريه ..


ظهرت الموبايل وحطيت فيه البطاقه وشغلته .. بس ابا ارقام عشان ادق عليهن .. ولا جذيه بكون ماخذتنه ع الفاضي ..!


ظهرت من الحجره ونزلت تحت حصلت عمتيه يالسه عند التلفزون وممغطه ريولها ع الكرسي ..


يلست عدالها ع طرف الكرسي .. وخلاف انسدحت وحطت راسها على ريوليه .. جني انا امها وهي بنتيه .. الصراحه كان شكلنا تووحفه ..

حموده: عمووه ابا تيلفوونج ..

عليا: ليش ؟

حموده: ابا اخزن ارقاام العايله ماعرف رقم حد ..

عليا: هيه صدقج شليه ..

شليته وتميت ادوّر الرقم اللي كان فباليه .. رقم حمد .. وبالفعل حصلته .. سجلته وسيفته بأسم "الغلا" .. وخلاف عاد خذت ارقام باقي العايله الا رقم خالد لأنه هالانسان انا كارهتنه الصراحه ومادري ليش .. بس جي من الله !


عقب ماخلصت طالعت عمتيه حصلتها رقدت .. أول شي تميت امسح على راسها وخلاف ضربتها على خدها بالخفيف عشان اوعيها ..

حموده: عموه عموه ..

عليا: همممممم ..

وقامت وهي كلها كسل ..

حموده: عموه سيري رقدي في حجرتج بتعورج رقبتج على ريليه ..

عليا: هههه الا قولي انتي ريلج عورتج ..

حموده: يالله يعلها الكسر جانها بتعورنيه منج ..

عليا: بسم الله عليج فديتج ..


ولوت عليّه .. وخلاف قامت وسارت صوب حجرتها عشان ترقد .. أحس انها أصغر من سنها بوايد .. شكلها وتفكيرها وايد طفولي واصغر من اللي في سنها .. بس هي وايد حنونه ومحد يقدر يكرهها .. انا عني حبيــتها وايد خلال هاليومين ..


بندت التلفزون ورقيت صوب حجرتيه .. دخلت وقفلت الباب .. خذت لي سفن اب من الثلاجه .. ويلست جدام اللابتوب .. وانا ناويه أحوس فالنت وما أخلي شي .. واخليها سهره صبااااحي ع النت الليله ..


نزلت أغاني بالهبل .. أعوّض اللي فات .. وعرفت كل الفنانين اللي كنت ماعرفهم .. واشتركت في منتديات .. ودخلت موقع القصص اللي كنت ادخله قبل ما اسير امريكا .. ألم الامارت .. ونزلت لي كمن قصه عشان اقراهن خلاف .. طالعت الساعه كانت 4:30 الفير .. أذن الفير وقمت أصلي .. من عقب الصلاه حسيت اني نعساااانه وابا ارقد .. بندت اللابتوب وانخمدت ..

يالله كشخه كملي كملي

البارت روعه

يلا كملي ^^