منتدى استراحات زايد - :: لو بغآنـي هو رقــﮯ لي ♥ ولا أنا ما أنـزل له ::

«彡๑الجــــزء الـــ { 2 } .. ㄨ●

ღ .. جواهـــر .. ღ

خلص دوامي عالساعه 2 ونص .. شليت أغراضي وتميت أتريا خوله لين تخلص ..

يا سهيل صوبي : على وين ؟؟

ادريبه يبا يطفر بي : وانت شو يخصك

سهيل : ما تطلعين لين تستوي 2 ونص بالضبط وتدقين كرتج خروج

جواهر : لا والله .. منو انت عشن تتأمر علي .. يلاا خوز عن دربي

لمحت خوله يايه صوبنا : يلاا خلينا نرووح

سهيل : بخبر عليكم خليفه

قتله بدون ما اصد صوبه : عادي خبره وبنجووف منو الي بيقفط

لبسناه وسرنا صوب السيايير..

خوله : بلاه هذا .. من كم يوم متغير علينا

جواهر : مادريبه .. خليه يولي

خوله : يلا اجوفج باجر

جواهر : مع السلامه ..

ركبت سيارتي الحلوه .. مادري ليش أحبها .. وأهتم فيها وايد .. يمكن لأنها هي الوحيده إلي غيرت أشياء وايده في حياتي ..

~>> أدارت مفتاح سيارتها .. التي كانت بالنسبة لهــآآ حلم حياتهــآآ .. الحلم الذي أنقذهــآآ من طلبهــآآ للجيران والنــاس من حولهم // ~ .*

رديت ريوَسْ شوي شوي .. مافيني أدعم سيايير الخلق .. أذكر مره يايه بركب السياره .. ما جفت ولا سياره ورا سيارتي واقفه .. عاد انا يلست فالسياره وشغلتها وحطيت اغراضي .. وشغلت المكيف ..

ويوم بتحرك حطيت (( R )) ورديت وفي بالي ان ماشي سياره ورااي .. وليش ما ادعم خخخخخخ

نزلت وهزبت الريال .. والحمدلله كان هندي .. عــآآد السبال سيارته ما استوى فيها شي .. اما سيارتي بس خطوط بسييطه ومسحتها بالكلينكس وخازن ..

عاد هو مصر الا يزقر الشرطه ....

: ماما لازم في خبر شرطه

: اففف انته جوف مافي شي .. خلاص سيير فكني

: لا ماما لازم شرطه مشان ها دا ورقه يعطي

: اوكي خبر شرطه .. عشان انا يقول انته ييجي مكان غلط وفي وقف هنيه مكان مال مدير

: هااه .. اوكي خلاص مافي مشكل انتي ما يريد شرطه خلاص ماما (( Im sorry

: حمااار ما تيي الا بالتهديد .. يلاا خلاص سيير

طلعت من الباركــات .. وطلعت من مكان دوامــي .. جفت الساعه كانت ~\\ 2:45 //~

شليت مبايلي ودقيت رقم البيت .. تم يرن محد رد عليه ..

أممممم سعاد بتكون راقده .. بس حمود أكيد يلعب ..

رديت المبايل .. وانتبهت للشـــارع .. ~>> هــــآآ قـــد بــدأأ الزحـــآآم يأخذ طريقه أمــامـــي ...

وصلت البيت ووقفت سيارتي بررع عند باب الحوي .. لأن حوينا ما يكفي ..

شليت أغراضي من السياره وبندت السيارة .. نزلت وبندت الباب ورحت صوب باب الحوي ..

سمعت صوت ياي من بيت جيرانا : جواهر .. جواهر

صديت صوب مصدر الصوت .. كانت حصه بنت ييرانا : توج يايه من الدوام

جواهر بابتسامه مرهقه : هيييه

حصه : اهاا .. خلاص بمر عليج العصر

جواهر : حيــأأج البيت بيتج

حصه : تامريني بشي ؟؟

جواهر : سلامتج .. وسلمي عالوالده

حصه : الله يسلمج .. يلا مع السلامه

جواهر : مع السلامه ..

فتحت باب الحوي ودخلت .. سكرت الباب ورايه ومشيت لين باب الصاله .. لقيته مسكر .. فتحت الباب ودخلت .. انتبهت للتلفزيون شغال على قناة MBC3 .. أكيد هذا حموود ..

تقلت أنظاري حول المكان .. لقيته منسدح عالغنفه وراقد .. سرت صوبه ..

هزيته عالخفيف : حموود .. حمووووود

سمعت حسه : هممممم

قتله : انت تغديت ؟؟

بعده منسدح : هاااااا

قتله : انته تغديييت ؟؟

حمود : هممم

خليته مكانه ورحت صوب حجرتنا .. فتحت الباب .. لقيت الحجره مظلمه وبارده .. سوالف سعاادوووه انا براويها ..

فصخت عباتي وشيلتي وعلقتهم عالعلاقي .. ورحت صوب الستاره وفتحتها مره وحده ..

سعاد : ايييييييه بندي الستاره شو هااااا

ضحكت عليها : هههههههه أحسن تستاهلين

يلست عالشبريه وويها معفووص : بلاج انتي جي حشره ما تخلين الواحد ياخذ راحته في رقاده ..

شكلها ضحكني : هاهاهاهاهاااااي .. طاعي شكلج فالمنظره ههههههههههه

حسيتها انقهرت .. جفتها تدور شي .. وما لقت : سباااله اراويييج

نشت من الشبريه وسارت صوب الحمام ..

وانا شليت فودتي وقلت بسبح وبخلص عقب بتغدى .. رحت صوب الحمام وترييت سعاد تطلع ..

تأخرت داخل .. دقيت الباب : سعااد

سمعت صوت القفل .. فتحت الباب شوي شوي ووايجت برع .. جافتني عند الباب وزاغت ..

قتلها : بلااااج نقزتي

ابتسمت : هااا .. ولا شي .. خوزي خليني أطلع

قتلها وانا حاطه ايدي على خصري : حبيبتي كل هالمجااال مفتووح لج وتبيني اخوووز بعد ليييش ؟؟

سعاد : اوكي تمي ..

طلعت .. وراحت صوب الشبريه .. تميت اطالعها ** ابا اعرف شو بلاها ..

يلست عالشبريه : يلا روحي اسبحي ريحتج امففف

ضحكتني : هههه سخييفه .. براويج بعدين ..

لفيت صوب الحمام ودخلت وسكرت الباب .. توني بقفل الباب ولا سمعت دق .. فتحت الباب وجفت سعاد واقفه برع الحجره وراسها داخل ..

قتلها : نعم ؟؟

قالت : تعالي شوي ابااج

قتلها : سعاادوووه مب متفيجه لج الحين خليني اسبح بعديييييين سولفي ..

كنت بسكر الباب بس سمعتها تقول ..

سعاد : لا لا انزين جوفييي ها مالج ..

طلعت راسي من الباب .. واول ما جفت صوبها .. ولا مـــآآي بــــأأأرد في ويهي ..

صرخت : سعاااااااااااااااادوووو يالخاااايسه .. براااااوييييييييييييج

سكرت الباب وهي تضحك وشردت ..

•

•

ღ

•

•

ღ .. أحمـــد .. ღ

انتبهت للشخص الموجود ورا حمود يالس يطالع .. اففف ماداني حد يطالعني عين بعين ..

دقني رشود على جتفي : ايييه بلاااج .. زطييي الاكل بيبرد

صديت صوبه : جب

رشود : يجبج هههههههه

حركت ايدي بطريقة ( مالت ) : مالت عويهك

حمود : ايييه بسكم ضرايب كلوو بالزين الناس تطالع

قلت : هيه وهااك السبال وراك يطالعني من متى .. اففف ماعرف آكل وحد يطالع

حمود ورشود على طوول صدوو يطالعون الولد الي ورا حمود يالس .. عاد هو ما صدق جاف حركاتنا مثل البنات ودلوعين .. نش من مكانه ويا صوبنا ..

قتلهم : وييييه حسبي الله عليكم .. فضيييحه ياي صوبنا شو يبا

رشود : اوب اوب قام حظج احمدوووه بزنس هاااه

ضربته على راسه : أي بزنس ويا ويهك .. مافيني عالمشاكل

حمود : أي مشاكل انته بعد .. عيش حياتك عيييش

وصل الريال صوبنا وقال : سلام عليكم

حمود ورشود : وعليكم السلام

صد صوبي وقال : وانت لسانك مربوط ماتتكلم .. سلام بلاش

صديت صوب رشود وقلت : عندي ببيزاااات " وعطيته نظره وصديت عنه "

قال : هيييه زين كم تباني أدفع لك

لمحت حمود ورشود يضحكوون علي .. عصبت : افففف شو تبا ليش ياي ماحيد حد فينا يعرفك

ضحك عالخفيف : واااااااال كليتني .. مب مشكله بنتعرف " وصد صوب رشود وحمود " صح يا حلوين

حمود ورشود : هييييه صح هههههههه

نشيت من مكاني .. رشود : وييين ساير

قلت : بسيير الحمام وبرد

الريال : هيه خله بيسيير بيعدل الميكب طاالع اخترب

الله يخسه اي ميكب .. انا ماحب هالسوالف ..

قتله : جب ما يخصك .. " وطفت عنهم ساير صوب الحمام "

وصلت الحمام ودخلت .. جابلت المنظره وتميت اطالع ويهي .. ملامحي وايد تشبه البنات .. حسبي الله عليه يالس يطنز .. عله الغص ..

تبطل باب الحمام فجأه .. نقزت .. وكان حمود ..

قتله : شو هالحركااات الي تسوونها جدااامه ما تستحوون انتو الناس تطالعنا وهذا العنز ياي يطنز بعد ..

حمود ضحك : ههههههه ول ول مب لساان .. كليتنا .. هههههه

قتله : كنت بضربه الجلب

جابل حمود المنظره ويلس يعدل في شعره : واااااي انته ليش مقهووور خلنا نترزق .. والله انه حلووو فدييييته

قتله : اوكي بس مب جداام الخلق .. لا ويالس يتفلسف صدق ويهه لوح .. انا ماحب الي جيييي

سحبني من ايدي : انزين يلاا خلنا نرووح اكيد رشود قردنته الحين

يريت ايدي عنه : مب على كيفك .. حمود انته تعرفني اني اتضايج من حركات رشوود الزايده .. ولا فشييله كله يقولي انتي وتعالي ومادري شو .. نحن مب بنات

حمود : هههههه اوييه عادي .. ترانا نشبههم في الحركات

قتله : اوكي مب معناته ان نحن بنات .. نحن اولاد سرنا فوق ولا نزلنا تحت بنتم اولاد

حمود : انزين يلاا عاد خلنا نستانس ونطلع .. اكيد رااح .. تعرف بعد رشود لو خذت رقمه مستحيل تخليه يتم عشان ما نخطفه منها

قتله : اوكي يلااا

طلعنا من الحمام .. الحمدلله انه ماكان موجود فكه منه .. ولا كنت صدق بضارب ويااه وبكفخه

يوم جافنا رشود نش من مكانه ويا صوبنا : هااا ارتحتي فالحمااام

قتله : جب

ضحك : هههههههههه مستواااااك هنااك يالزبااله

قتله : وانته مستوااك هالزبااله الي تعرفت عليييه

حمود : ايييه بس عيب .. خلونا نطلع ساعه اربع العصر ..

قلت حق رشود : انزيين .. ابا رقمه خخخخخخخ

رشود : لا والله .. مساعه تبا تضارب ويااه والحين تبا رقمه

ابتسمت : اممم صح هو حلوو وانا اصلا استانست يوم يا .. بس اسلوبه ما عيبني

رشود : ها ها هااا خلاص طااح في شباكي يا حلوه

طالعته بقهر : خسج الله

حموود : هههههههههه

مشينا رايحين صوب الباركات .. نحن دوم جيه ضرايب وضحك ونحط على بعض وجييه عايشين حياتنا الخــآآصــــه ..

•

•

•

•

•

نزلنا من سيارة رشود وركبنا سيارة حمود ..

بندت باب السياره : اففف حررر شغل المكيف

حمود : انزييييييين ويا هالويه تونا راكبين السياره

شليت كتابي وتميت احركه جريب من ويهي : واااااي فيني رقاااد .. تدري البارحه ما رقدت غير ساعتين يمكن

حمود وهو يشغل المكيف : حد قالك تسهر هالكثر .. لا وياريت لو تذاكر

طالعته بغرور : جب جب عالأقل فالامتحان أعرف أألف وأحل صح مب انته لو تذبح عمرك بتم غبي هههههه

طالعني بعصبيه وحرك السياره ..

وصلنا صوب بيتنا على وقت صلاة العصر .. نزلت من الموتر وعلى طول حمود راح ما صدق ..

طالعت صوب بيت الجيران .. يااااي سيفووه فدييته موجود .. أمممم اكيد بيطلع عقب شوي وبيروح الصلاه .. بس الجو حــآآر وما يساعد بعفن فالشمس ..

تحركت صوب الباب .. وقبل لا أدخل جفت سياره يت ووقفت عند بيتنا ..

تميت أطالع منو .. ما عرف السياره .. جفت حد ينزل الجامه .. أخييييج هذا عبييدو ربيع نصور أخوي العود ..

رحت صوبه ووقفت مجابلنه وربعت ايدي : خييييييييييير .. نصور محد تجوف سيارته مب موجوده

عبيد : ول كليتني .. بعدني ما تكلمت انا

قتله : ما يحتاي تتكلم .. يلا خلاص روووح نصوور محد

جفته بطل باب السياره .. رديت لورا : ايييييه شو تبا يلا روووح

بند باب سيارته وتساند عليها : كيفي بتريا اخووك الحين بيوصل

من سمعت هالجمله قتله : اهاا خلاص علك تحترق في هالشمس ..

وشردت داخل .. صرااحه ما فيني على نصوور بياكلني .. ما أدانييه أكرهه .. كرهلي عيشتي .. دوومه يضارب وياي .. ومب مخلني في حالي .. صرااحه مراات أتمنى لو يموت ونفتك كلنا الي فالبيت منه .. مأذنا كلنا ومب مخلي حد في حالـــه ..

دخلت الصاله .. وجفت حمود وسعادووه وجواهر يالسين ويطالعون تلفزيون ..

سلمت عليهم : سلااام عليكم

جواهر : وعليكم السلام

رحت ويلست وياهم : وانتي اييييه جيه ما تردين السلام ويا ويهج

سعاد : مقهوووره منك

فصخت الكاب عن راسي .. ورديت شعري لورا .. وحطيت الكتاب

حذالي : ليش ان شاء الله

سعاد : شو ليش بعد .. باقي لكم آخر امتحان وبتفتكوون ويا ويهك

تساندت عالغنفة : واااي حره يالعذاااال موتو قهر .. يلااا نشي سيري ذاكري بعد شو تتريين

طالعتني بقهر : وانت شو يخصك .. فدييت جوجو بتذاكر لي

جواهر : ايييه إنتي .. جوجو في عينج

قتلها : ماااالت

سعاد : مالت عليك طوووفه

جواهر : ايييه اصطلبوا لا أكفخكم .. عن الحشره ما تجوفوني مجابله حموود

رديت عليها : حاظرين يا أبلة

سألتني سعاد : امتحان شو باجر

قتلها : علم النفس .. أسهل امتحان عندي مع انه الماده معقده بس لو تألفين فالامتحان بيطلع صح .. طبعا تأليف عدل مب مال اي كلام

سعاد : هممم ومتى بتذاكر ؟؟

قتلها : هو ما يحتاي أني اذاكر ..

قاطعتني جواهر : لا والله على كيفك هوو

ضحكت : ههههههه خليني اكمل رمستي انزييين .. بذاكر عقب المغرب بس شوي كمراجعه لا أكثررررر

سمعت سعاد تسأل جواهر : متى حصووه بتي ؟؟

قلت : حصوووه بتي بيتنا ؟؟

مريوم : هيييه قالت بتي عقب صلاة العصر ..

على طاري صلاة العصر .. تذكرت عبيدو برررع ..

نشيت من مكاني وشليت كابي وكتابي : ترى نصوور برررع واقف ويا عبييدووه هالخايس

وركضت لحجرتي وقفلت علي الباب .. مافيني بعد على حشرة هالأخو اففف منه ..

حطيت كابي على المستواليت .. وحطيت كتابي فالسده .. رحت صوب الكبت وطلعت لي جلابيه فريتها عالشبريه .. وشليت فودتي ورحت أسبح ..

خلصت سبوح .. وبدلت ثيابي .. شليت سيادة الصلاه وصليت العصر .. خلصت صلاتي ورحت صوب سدة الكتب وطلعت كتاب علم النفس وفايل فيه أوراق حق المراجعه .. وحطيتهم عالشبريه ..

امممم شو اسوي الحين .. قلت بروح الصاله شوي وعقب برد ارقد لين المغرب ..

رتبت شعري ورديته على ورا .. ما فيني بعد ايي نصور وياكلني ..

طلعت من حجرتي ورحت الصاله ..

سمعت صوت ياي من باب الصاله : ايييييه شو هالحشره ..

لفيت صوب مصدر الصوت : خييييييير شو يايبنج بيتنا

حصوه : كييفي .. وين خواتك

سمعت صوت جواهر ياي من وراي : هاااه نحن هنيه .. حياااج تفضلي البيت بيتج

حطيت ايدي على خصري : لا والله .. انا يالس اهزبها وانتي ترحبين فيها ..

يت حصه ويلست عند مريم : وش على السحاب من نبح الكلااب .. انبح يا حبيبي يا احمدووه لين تنطر ههههههههه

جواهر تضحك وياها : حبيبي اخوويه احمدووه .. سير ازقر سعاد قوللها حصوه يت

حست بوزي : انزيين ما عليه بكون احسن عنكن ويا هالويوووه ..

ورحت صوب حجرة قوم جواهر وسعاد .. دخلت الحجره لقيت سعاد يالسه على سيادة الصلاه ورافعه ايدها وشكلها يالسه تدعي ..

يلست عالشبريه .. لقيت كتاب طايح .. شليته .. وكان كتاب الأحياء .. تميت اجلب فييه وانا اتذكر اياام يوم كنا ندرس اول ثانوي ..
لقيت صفحه فيها رسومات وقلووب .. وكلااام مكتووب .. ياني الفضوول اقرا .. وتوني بقرا اول كلمه ولا سعااد تسحبه عني ..

سعاد : يالطفس شو تسوي ؟؟

اشرت عالكتاب : ماشي يالس اطالع كتابكم واتذكر ايام اول .. ولقيت صفحه فيها رسومات ومادري شو مكتووب ..

سعاد : ما يخصك .. هااي خصوصياتي وما احب حد يدخل فيها

وقفت : لاوالله .. اي خصوصيات بعد .. يلا راويني شو مكتووب

سعاد انقهرت من ردي .. وفرت الكتاب عالشبريه : خذه وجلب فيه على كيفك ..

شليته : انزين حصوه فالصاله تترياج

سعاد : أخيرا ما بغت ..

يت صوبي ويرت الكتاب من ايدي : خلاص مب لازم تقرا هاهاها " وطلعت رايحه للصاله "

طلعت من حجرتهم .. ورحت يلست وياهم فالصاله .. وعرفت ان حصووه يايه تدرس سعاد ..

استوت الساعه 5 ونص .. جفت قوم سعاد ومريوم وحصووه يسولفون .. شكلهم خلصووا .. رحت صوبهم ويلست وياهم نسولف ونبربر ^^

ملينا .. قلنا بنلعب لعبة ( ملك * جلاد * لص * مفتش ) .. انا خذت الاوراق وقصيتهم .. وتميت اكتب الأسامي ..

لعبنا اول دور ..

جواهر : أنا الملك انا الملك .. اين المفتش ؟؟

سعاد : انا المفتش ..

جواهر : احضر لي لصــاً ..

طبعا انا كنت اللص .. وتميت اطالع فوق .. وحصووه نفس الشي ..

سعاد : امممممم احمدوووووووه اللص .. صح

طالعتها بقهر : غشششش .. حصووه غششتج أدري أنا

ضحكت حصوووه : هاهاااااي .. اخيرا ببرد جبدي الحين .. يلاا يا حبيبتي الملك احكمي .. كم جلده اجلده

جواهر تطالعني بنص عين وانا اوني عااد مخلي عمري بريء

جواهر : ما يهون علي أخووي .. أربعــه حــــآآر وخمســــه بــــآآرد

حصوه : عادي ما يهم ولو واحد حار بعد .. عطني ايدك يلاااا

سعاد تصفق : اجلدييييييه .. عندج إيـــــآآآه .. ههههههههه

قلت : اول شي الحاار عقب البارد ويا ويهج

حصووه تيود ايدي : حرااامي ويتشرط بعد .. لا ويسب .. ويا ويهي هاااه

صرخت : لا لااا خلاااص سووووري سوري .. آسف .. حرام باجر عندي امتحان

جواهر : هههههه وشو يخصه ..

سعاد : هيه اجلديييه .. وبردي جبدي .. الاخ باخر آخر يوم بيجووف المدرسه وانا سنتييين ورااي

قتلها : لا حبيبتي اربع .. احسبي حسابج فالرسوووب

جواهر : ايييه ان شاء الله عدوينها .. لا تيلس تفاول عليها ..

ما انتبهت ولا أحصل ذييج الضربه القويه بالمسطره الطويله على ايدي

صرخت : آآآآآآآآ آآآآآآآآي .. يعور يالسبااااله

حصووه : خخخخخخخخخ يلااا افتح باقي ثلاث ضربات يلااااااا ..

توها يايه بتضرب الضربه الثانيه .. ولا باب الصاله يتبطل بالقووو ..

وييييييه هذا نصووور .. اففففف لو كنت فالحجره زيين ..

ناصر : سلام عليكم

كلنا : وعليكم السلام

يا ووقف على راسي : شحالج حصه ؟؟

حصه اونها مستحيه منه : بخيييير

على فكره .. ترى حصه تحبه وتمووت فيه .. وهو نفس الشي .. بس محد يدري بحب الثاني له ..

ناصر : ايييه قوووم

ما قدرت اطالعه لانه واقف على راسي : شو تبا

ناصر : شوايه تشويك .. تعاال الحجره ابااك ..

جواهر حاولت تنقذني : لييش ؟؟

صرخ عليها : ما يخصج انتي .. اخووي واباه في سالفه لا تدخلين

جواهر انقهرت : انزيين ما قلت شي .. كلتني

هو ما يقدر يمد ايده عليها لانها اكبر عنه .. وهذا الي مريحنا كلنا ..

زخني من جتوفي ووقفني : الحقني بسرررعه

عطاني ظهره وراح لحجرته .. سويت بإيدي (( مالت )) : الله يلعنه من أخو لازم ينكد علينا وناستنا ..

جواهر : سير لا يجتلك

قلت : انزييييييييييين اففففففففففف

وصلت عند حجرته .. لقيت الباب مفتوح شويه .. تميت ادعي ربي ان يطوف هاليوم على خير ..

سمعت صوته : ادخل شو تتريا بعد ..

حسبي الله ونعم الوكيل : دخلت

ناصر : سكر الباب ورااك

قتله : لييش ؟؟

طالعني بنظرات .. خلتني ارتجف وما ارادد .. على طوول سكرت الباب وتجدمت صوبه .. بس وقفت بعيد عنه ..

جفته يتجدم صوبي .. تميت ارد بخطواتي لورا .. تجدم لين وصل عندي ..

تم يطالعني من فوق لين تحت ..

قالي : متى بتصطلب انته ؟؟

خفت .. شو مستوي بعد .. ليكون حد جافني فالستي من ربعه .. الله يستر بس ..

رديت لورا شوي وقلت بهمس : ما سويـــ...

وما حسييت الا بطرااااق قوووي لصق على ويهي .. وثانيه لقيت عمري عند الباب طايح وايدي على خدي وأصييح ...

•

•

ღ

وللحديث © بقيــــه ~ .. >>أنتظــر //~ .. رآآيكــم .. انتقــآآدكــم