|
حباااايبي فديتكم تسلمووون .. واستانست يوم شفت توقعاتكم وتحمسك لروايه .. بس بقول ملاحظة تنزيل البارتات بيكون يومين ف الأسبوع .. الأحد والأربعاء واحينه بنزل إن شاء الله |
الجزء الثاني حسيت بحرارة بجسمي ونشيت ..الحجره وايد حاره ..رقدت حضرتي قبل ما أشغل المكيف وليتات الغرفه مفتوحة .. أستغفر الله هذا كله من مواز .. شفت تليفوني لقيت الساعه 2 ونص بالليل .. تنهدت وشغلت المكيف ودخلت الحمام وغسلت ويههي وتوضيت عقب ظهرت ومسكت المصحف .. ما في شي ممكن يريحني غيره .. فتحت سورة البقره وبديت اقراها ..فالبداية كنت هاديه بس عقب حسيت بخشووع وتميت اصيح .. قريتها كاامله ..عقب سكرت المصحف وحضنته ..ما في أحلى من هالراحه ..تذكرت اللي صاار ..أستغفر الله العظيم .. صدمتي فأختي كسرتني وحطمت كل شي حلو فداخلي من صوبها .. مستحيل اسامحها ع اللي سوته فيني .. ومستحيل أنسى .. شفت ساعتي لقيتها 3 ونص ماشي باقي عن اذان الفجر .. بس حاسة بتعب .. برقد شوي لين ما يأذن .. ضبط المنبه ع وقت الصلاة وبندت ليتات الغرفه ورحت بساابع نومه . نشيت على صوت دق الباب ميرووه : نششششششششششي بسج نوووم وتدق الباب بقووه صرخت عليها : كسرررتي الباب ... زولي خلاص نشيت اختفى الصوت فجأة اممم شكلها خافت .. فتحت عيوني بكسل وانتبهت ع النور تارس الغرفه ..عركت عيني ومسسكت تليفوني شفت الساعة لقيتها 7 و40 دقيقه خيييييبه تخيب العدو تأخرت ع دوامي .. طرت صوب الحمام عقب تلبست ع السريع وحطيت بودرة خفيفة وروج وتعطرت وشليت شنطتي وظهرت من الغرفه ... مريت ع أمايه حصلتها يالسه تتريق مع سعود حبيبي .. بست راسها : صباح الخير امي : صبااح النور حبيبتي .. شو ياج اليوم رقدتي رديت عليها : ما اعرف شوياني حتى صلاة الفير طافتني .. ذكرت اختى ميرووه مهره : ميرووه وينها بشلها المدرسه أمي : ميرووه شلتها موزان المدرسه لأنج تأخرتي عليها وايد أعتفس ويههي لا إرادي يوم سمعت اسم موزان أمي : شو ياج عفستي ويهج ؟ مهره : ماشي بس متأخرة عـ الدواام لازم أروح الحين أمي : زين انتبهي فالدرب ولا تسرعين رديت عليها وأنا امشي : إن شاااااء الله وقفت فجأة لأني حسيت حد يسحبني .. صديت شفت سسعود ماسك عباتي ويباني اشله .. فدديته حبيبي .. أمي : هاتيه عنج وروحي سعود ماسك عباتي ويأشر ع الباب .. فديت هالبراءة كلها شليته : حبيبي أنا لازم أروح الدوام وأول ما أرجع بوديك الدكان عفس ويهه مهره : حبيبي ما يصير اشلك الحين لاني متاخرة وايد امي :هاتيه عنج وروحي هذا مستحيل يفهم دامج لابسه عباتج طالعته وعطاني نظرته اللي تذبحني.. أوونه زعلان ..قلبي عورني عليه ..بس مجبوره أخليه وتلاحق ع شغلي قبل ما يحسون أني متأخرة .. عطيته أمي وطلعت أركض من الصالة وأنا أسمع صوته وهو يصيح .. رحمته بس مب ناقصتنه صراحة اللى فيني كافيني شغلت سيارتي وقلبي مقبوض ومزاجي منجلب فوق تحت .. فتحت شنطة السيديات اللي عندي وطلعت منها سيدي سورة البقرة بصوت الشيخ احمد العجمي .. دخلت السيدي وطولت عـ المسجل وحركت السيارة .. ما أبا أفكر فشي نهائيا ..أبا أسمع القرآن وبس .. وصلت دوامي وبركنت السيارة بس ما نزلت .. أحس أني محتاجة أسمع القرآن أكثر ..شعووور حلووو وغريب ما احس فيه إلا لما أسمع ايات الله .. حطيت راسي على السكان ودموعي أطيح .. صحت من الخاااطر لين ما طلعت جزء من الغصة اللى فيني عقب حسيت بشوية راحة .. مسحت دموعي وقصرت على صوت المسجل وفتحت شنطتي ..طلعت منها علبت المكياج وعدلت عمري عشان محد يحس باللي فيني .. بندت المسجل والسيارة ونزلت .. دخلت الشركه ورحت صوب القسم اللى أشتغل فيه وبالتحديد مكتبي .. مالي نفس اسلم على حد .. وصلت مكتبي وحصلته فاضي ..غريبة نوف وينها ؟؟ .. نوف ربيعتي اللي معاي فنفس الغرفه ومكتبها مجابل مكتبي .. طيوبه وحبوبه بس عصبيه لأبعد الحدود ..حتى بعض الموظفين يخافون منها ههههه بس الحمد لله متفاهمة معاها وصح ما خبرتكم عن طبيعة شغلي .. شغلتي باختصارعبارة عن مراقبة الموظفين ..يعني أتابع إجازاتهم , آداءهم فالشغل أول بأول وأكتب تقارير عنهم .. شغله بسسسيطه وسهله بس أحيانا يغربلوووني قسم بالله ويطلعولي قرون .. والشركة اللي أشتغل فيها كبيره ومعروفه ولها سمعتها الزينه فالسوق .. عمي سلطان توسطلي والحمد لله حصلت على هذي الوظيفة ..ومرتااحه الحمدلله ..تأففت بعد ما انتبهت ع المكتب لأنه مخبوص فوق تحت .. أمس ظهرت مستعيله وما عدلته .. والعامل شكله ما دخل يرتب المكتب .. اففف .. رتبته ورجعت كل شي مكانه .. وفتحت درج المكتب وظهرت ملف .. المفروض امس أخلصه بس سويتله طاااف ورجعت البيت .. أخلصه احين أحسن عن يسأل عنه المدير و أتوهق ... فتحت الملف وأندمجت فالشغل ..وعقب فتره سمعت حس نوف ربيعتي ..رفعت راسي شفتها داخله وهي تتحرطم ..ههههه شكلها يضحك .. قعدت على مكتبها حتى بدون ما تسلم .. مهره : أنا مسلمة ليش ما تسلمين علي نوف ابتسمت : سمحيلي تراني مب مجمعه هههه السلام عليكم مهره : وعليكم السلام والرحمه .. تميت أتأمل ملامحها نوف : ليش أطالعيني بهالنظرات مهره : انتى شكلج ياي مضاربه حد كالعادة نوف بابتسامه خبث : هيه مهره : يلا خبريني شو مهببه نوف : توني غاسله شراع فهد ووصلت السالفة للمدير .. فتحت عيني ع الآخر وحطيت أيدي ع خدي وأنا أسمع هالخبلة نوف : قتله انا موظفه محترمه وفشريكه محترمه لها سمعتها فالسوق والكل يمدحها .. ترضى موظف عندك يتحرش فوحده من الموظفات .. _ بو جاسم متفاجئ : لا والله ما ارضى نوف : بو جاسم أنا سكت عنه واايد .. ودوم أوقفه عند حده بس فهد يتمادا معاي أكثر .. و بصراحة صرت أحس بضيق يوم أداوم لأني مليت منه ومن حركاته لين متى بتحمله .. وبتحمل حركاته .. إذا ما حسيت بالأمان فشغلي ما بقدر اعطي أي شي يفيد الشركة بوجاسم: الحين هذا فهد ما غيره نوف : هيه وهالحال تقريبا من 7 شهور الله يخليك تدخل فالموضوع بوجاسم : رجعي مكتبج بنتي وهالموضوع خليه علي ولا تتضايقين وأنا أعتذرلج عن اللى صار وأوعدج أنه ما بيتكرر .. نوف : مشكووور بوجاسم وسمحلي بو جاسم: انتى سمحيلي ..نوف انتى موظفه محترمه ومخلصه فشغلج وتأكدي أني بتصرف _ نوف : قتله تسلم ويزاك الله خير وظهرت من مكتبه وعلى دربي سمعت سكرتيرته تتصل بفهد ..أكيد بوجاسم طلب يشوووفه مهره : عنلاتج زاد .. ليش خبرتي بوجاسم حررام عليج نوف : خليه يستاهل لين متى بتحمل طفاسته معاي مهره : بس انتى تعرفين بوجاسم شديد وايد نوف : اعرف خليه يأدبه ..ملييييت مهاري من هالوضوع "رفعت حاجب " انتى ليش أدافعين حضرج مهره : اممممم ما اعرف يمكن لأني أحسه صدق يحبج وشاريج نوف باشمئزاز :حبته القرادة إن شاء الله مهره : هههههههههههههههههههههههه ياربي لهدرجه كارهتنه نوف : فوق فوق ما تتصورين ..تعالي صح وينج انتى اليوم متأخرة مهره : نمت وما حسيت بعمري ..في حد سأل عني ؟؟ نوف ببتسامه : اليوم بالذات ما بقى حد ما سأل عنج جنهم حاسين أنج متاخرة مهره: من نحاستي حبيبتي وقرادت حظي نوف مبتسمه : تريقتي ؟؟ مهره : لا وانتي نوف : شراتج ..شو رايج نطلب لنا ريووق مهره : مالي خاطر أكل نوف : بتاكلين غصبن عنج والريوق علي بمناسبة الفكه من فهد هالبنت أبصم أنها مب صاحية ..ابتسمت ورديت عليها : ترتوووب طلبت نوف ريوق وعقب أندمجنا فالشغل ..وايد أحب شغلي لأنه بالنسبه لي المكان اللى أقدر أجدد فيه نفسيتي من مشاكل البيت .. عاد اللى يسمع يقول خلاص هالبنت بتموت من كثر المصايب .. لا عاد ما ببالغ .. الحمدلله مشاكلنا عاديه وتصير بكل بيت .. إلا سواد ويهه أختى موزه .. معرسه وعندها ولد وتلاحق خطيب أختها .. يعني شو أقول .. بدون تعليق .. سمعت تليفوني يرن ..ظهرته من الشنطه وشفت اسم موزان .. تميت أطالع تليفوني بدون ما أرد .. أحس بآلم و وقهر ووغدر ..ااااه يا موزة .. فلحظه أنجلب مودي فوق تحت بمجرد أنها اتصلت بس نوف : بلاج مهاااري انتبهت على نفسي وخليت الفون سايلنت ..ورجعته فالشنطة ..رديت عليها : ماشي حبيبتي بس سرحت نوف : احسج متضايقة ؟ طالعتها وابتسمت : ما فيني شي ..بسج لعيان وخلينا نخلص الشغل نوف : صدق انج نذله مب منج من اللي يحاتيج مهره : هههههههههه جيه أباج.. زعلي عشان تخفين من لعيانج نوف اطالعني بنظرات يعني ما يهمها ورجعت تكمل شغلها ووانا شراتها .. تمينا نشتغل لين ما وصلت طلبيت لريوق ..دخل الهندي الأكياس .. شفت الأكل بصدمه : نووف شو هذا ووالله وايد نوف : خلينا نأكل حبيبتي الحياه حلوه والدنيا بخير مهره : أنزين خلينا نزقر باقي البنات ياكلون معانا نوف : دخيلج مهاري تعرفيني ما أطيقهن ..بعد ما ناكل ونشبع بنطرشلهن مع الهندي ابتسمت : ماروم اقولج شي وأنتى عازمتني نوف : ههههههههه يلا انزين خلينا ناكل غسلت ايدي وكليت وأنا ما حس بطعم الأكل اللي يدش بطني .. ما حس بحلاوته ولا لذته .. ونوف تسولف شوي عقب ترجع تسألني شو فيج ؟؟ وأرجع أجاوبها نفس الجواب مع ابتسامه شاقه الويهه ..مافيني شي .. بس فديتها حاسة أني مهمومة ..حسيتها تحاول تضحكني بأي طريقه عشان تظهرني من المود الخايس اللي أنا فيه وبالفعل تفاعلت معاها وتميت اضحك نوف : خاطري بعرس جريب ..أحس فيني رقصه مهره : هههه انتى تعرفين ترقصين ؟ نوف : هيه حبيبتي خبره مهره : زين عيل أباج تعلميني نوف : تعالي صح ع طاري العرس انتى متى ناوينه تعرسين ..من عرفتج وانتى محيره .. أستعيلي نبا نرقص ليش يا نوف تسأليني هالسؤال وتخربين مزاجي اللي أنتى عدلتيه .. خذيت نفس كبير ورديت عليها : اممممم شوفي انتى اول وحده بخبرها قراري اممم خلاص انا ما اباه نوف كانت تشرب عصيرها ..شرقت وتمت تكح عطيتها غرشه ماي : اسم الله عليج بعد ما شربت الماي : أنتى شو قلتي من شوي ؟ مهره : قتلج ماباه فتحت عيونها بصدمة : كيف يعني ما تبينه؟ مهره : يعني خلاص انسى أني محيره نوف : ليييش مهاري ؟؟ مهره : أكتشفت أنه ما يناسبني نوف بابتسامه هبله : كيف يعني حبيبتي فهميني تنهدت : قتلج ما يناسبني ..لا تسألين وووايد نوف وخلاص سكري الموضوع نوف مستغربه : انزين أنزين بس أهدي سفهتها وكملت أكل ووأنا أحاول قد ما أقدر أخلي عمري طبيعية وما فيني شي .. دخل فهد علينا المكتب وأحس من عيونه شرار يتطاير ..ووقف مجابل نووف وهو يطالعها من فوووق لين تحت نوف : خيررر إن شاء الله فهد : ياي أقولج كلمه ووحده بس وعقبها ما بتشوفين رقعة ويههي .. أنتى إنساااانه مغروروه وشايفه نفسج " يأشر ع قلبه " وهذا الحيوان لو فيه عقل ما حب وحده مثلج نوف : والله يا فهد الحب مب غصب فهد : تعرفين ان بو جاسم نقلني الفرع الثاني نوف : لو أنت مودر حركات اليهالوه ما كنت رمسته أساسا عنك ..بس شو أسوبيك طفرت ولاعت جبدي من الحركات اللي ما تخلص فهد : برووح بس صدقيني بتندمين ع كل كلمه قلتيها نوف تصارخ : يا عمي روووح .. أعلا ما فخيلك أركبه هذا اللي قاصر يهددني بعد ياربي الوضع حده متوتر ..فهد معصب ونوف معصبة .. وشكلي غلط فالنص .. فهد : لو ما كنتي بنت جان عرفت كيف أرد عليج وطلع من المكتب بسرعه جنووونيه ..صديت صوب نوف أطالعها كانت مفووله ع الآخر مهره : شوياج نوف كلتي الريال نوف : ما سمعتيه وهو يهددني .. وايد ماخذ مقلب بعمره .. الحمدلله بوجاسم نقله من هالشريكه .. الحين صدق برتااااح نفسيا مهره : الله يهديج ..أهو ما قال اللي قاله إلا من عصبيته نوف : مشكلته عاااد يتحمل اللي ياه ماعرفت شو أرد عليها ..احسن شي أقوم أغسل أيدي وأكمل شغل .. رحت صوب الحمام وغسلت أيدي ورجعت مكتبي .. مهره : مشكووووره حبيبتي ع الريوق نوف بدون نفس : العفووو سألتها : بلاج مبوزه ؟ نوف : ما اعرف ابتسمت بخبث : عن يكون مضايقه لأنهم نقلوه رفعت رأسي أشوف ردت فعلها .. شفت شي طااير يياي يصوبي .. مسكت ذراعي : اخخخخخخخخخ نوف : هههه تستاهلين مهره : قسم بالله انج سخيفة نوف :هههههههههههههههههههههههههه مسكت علبه الكلينكس ورجعت فريتها عليها بس للأسف طاحت تحت و ما وصلتها نوف : هههه حاول مره أخر قهرتني بس ابتسمتلها ..ورجعت أكمل شغل .. مر الوقت بسرعة وما حسيت فيه .. لميت أغراضي .. وعدلت مكتبي .. مسكت تليفوني .. حصلت 9 مكالمات ..أستغربت .. بسم الله شو مستوي .. .. لقيت موزان متصلة مرتين ووسارونة بنت خالتي حصة متصلة 7 مررات .. بل بل بل 7 مرات .. بلاها سارونة أكيد شي صاير ولا ما بتتصل هالكثر .. رجعت أتصل عليها وردت بسرعة سارونة : أنتى وووووينج ؟؟ مهره : شفيج حبيبتي ..تليفوني كان صامت سارونة تصيح مهره : ليش تصيحين شفيييج ؟؟ سارونة : أنتي بعدج فالداوم مهره : هيه والحين برجع البيت سارونة : تعالي عندي البيت مهره : انزين شو صاااير ؟؟ وقفتي قلبي رمسي عاد سارونة : يوم تين عندي بخبرج مهره : أنزين أنزين حبيبتي أهدي .. بتصل بأمي وبخبرها أني بيج سارونة : أترياج يلا بااي مهره : باااااي سكرت وأتصلت على ماماتي وخبرتها أني ما برجع البيت وبروح بيت خالتي حصة .. والحمدلله خلتني أسير وما عصبت علي .. ظهرت من الشريكة وعلى طووول بيت خالتي حصه .. الله يهديها سارونة خوفتي وايد وقمت أسرع رغم أني ما أحب السرعة بس من الخووووف ما حسيت بعمري وأنا أدووس ع البترول .. بركنت سيارتي عدالي سيارة سيفووه الخسف .. شو أسوي ما عندي خيار ثاني .. نزلت وقفلتها .. وأنا أمشي سمعت حد يرمسني سيف : وعليكم السلام والرحمة صديت وشفت سيفووه ..هذا كيف واقف أهني وما شفته رديت عليه : وعليكم السلام ورحمه الله وبركاته .. السموحة منك ما شفتك سيف : مسموحة بنت خالوه ابتسمت ابتسامه باهته عقب لفيت أبا أسير عند سارونه بس سمعته يرمسني ووقفت سيف : تراج ووايد تسرعين .. خفي شوي من السرعة صديت صوبه وطالعته بنظره حادة سيف : شكله كلامي ما عيبج مهره : بصراحة لا سيف : وليش عاد مب عايبنج ؟؟ مهره : والله كلامك ما فيه شي بس لأنك أنت قايلنه أحسه ثقييييل ع القلب ضحك بصوت عالي ..رفعت حياتي مستغربه من سخافته سيف : تصدقين بنت خالوه ما دري أحسج أحيانا تكرهيني والله زين يوم طلع عنده أحساس وحس أني ما أحبه ..عبالي هالأنسان معدوم الأحساس والمشاعر مهره : هههههه أكرهك عاد .. مب لهذي الدرجه سيفوه بس أنت لا تحشر عمرك بشي ما يخصك سيف : بس أنتى بنت خالتي ولي خص فيج مهره : تصدق .؟؟ أنا ما عندي سالفة لأني واقفة فالشمس الحارة مع واحد مثلك طبيته ودخلت بيت خالوه حصة ... وصلت الصالة وشكلي كان غلط حتى مب داقة الجرس فضيحة ..هذا كله من الخسف سيفووووه .. نرفزني .. بس الحمدلله محد فالصالة .. أتصلت على ساورنه بس ما ردت علي .. أعوذ بالله ..هاي بعد ليش ما ترد سيف : محد فالبيت غير سارة فغرفتها افففف هذا من وين يطلعلي ..ما رديت عليه ورحت الدور الثاني صوب غرفة سارونه .. دقيت الباب .. وفتحته لي على طووول .. تقربت مني وحضنتني بكل قوتها وهيه تصيييح من الخاطر .. خفت ووايد من شفتها .. شكلها يخووف .. حبيبتي سارونه .. ما رمت أرمسها وهي تصيح بهاي الطريقة كل اللي قدرت عليه أني أطبطب عليها واهديها بس .. مسحت دموعها ومشيت معاها لين ما وصلنا لسرير وقعدتها ..رجعت وقفلت باب الغرفة عن حد يدخل علينا .. وعقب قعدت حذالها وأنا متفاجئه من حالها .. شو ياها مهره : حيااااتي سارونه شفيج سارونه رجعت حضنتني وهي منهارة من الصايح .. مهره : الله يخليج رمسي ووالله قلبي وقف من الخووف سارونه مب قادرة ترمس .. كانت بس تصيح ... ياربي شو أسوي فيها .. حاولت أهديها وبعد نص ساعه تقريبا حسيتها هدت .. مسحت دموعها : بس حياتي أهدي سارونة : سيفوووه مهره : بلاه سيفوه ؟؟؟ سارونة : في وحده أتصلت على سيفووه وقالتله أني راعية شباااب فتحت عيوني على وسعهن سارونة تكمل بصوت يدوب ينسمع من كثر الصايح : سيفووه ياني وضربني ضرب ومنعني من الشغل وشل سويج سيارتي ..قالي من اليوم ما شي لا شغل ولا سيارة أنتى ما تستاهلين الثقة اللى عطيناج إياها كنت حاسة أن سيفوه الحقيرر له خص فالموضوع .. بس ما توقعت حجم الموضوع ..سارونة رجعت تصيح مره ثانيه بصوت يقطع القلب .. وأنا والله اللي فيني كافيني .. ما رمت أمسك عمري وصحت معاها .. سارونة : مهاااري والله أني مظلومة رديت عليها : عارفه حبيبتي من دون ما تقولين سارونة : ما أعرف منو البنت اللي متصلة ع سيفوه مسحت دموعي : أخوج ماله حق يتصرف معاج بهاي الطريقه .. الدنيا مب فوضه سارونه : حتى ما عطاني فرصه أرمس وأدافع عن نفسي مهره : حياتي سمعيني .. سيفوه بيرجع لج سويج السيارة وبتسوقين وهو ما يخصه فيج سارونه تصارخ : شو ما يخصه وهو أخوي وأنتي تعرفينه ما يتفاهم مهره : مشكلته هذي .. خالتي موجودة وخالي موجود ...مب ع كيفه يتحكم فيج سارونة : ساعديني شو أسوي؟؟ تراني تعباانه جسمي يعورني من الضرب مهره : إن شاء الله تنقص أيده سارونة تصيح : لا تدعين عليه مهره : والله أنج طيبة ساروونة سارونة : ساعديني مهااااري ساعديني مهره : دقيقه وبيج لبست شيلتي وعباتي ورحت صوب الباب أبا أظهر بس مسكتني سارونة : أعرفج بتروحين ترمسينه ..دخيلج لا تروحين مهرة : خليني أوقف أخوج عند حده سارونة : والله خايفة لا تروحين مهره : قتلج هديني وخليني أروح ..سيفووه لازم يعرف أن الدنيا مب ماشيه ع كيفيه سارونة : مستحيل اخليج مهره : قتلج قووووومي عني دزيتها ع الأرض وطلعت من الغرفة .. شو أسويبها جبرتني على هالشي ..نزلت الصالة ولقيته يالس يتغداء مهره : أباك فموضوع سيف : أكيد سارة خبرج عن سواد ويهها صرخت عليه :أختك محتررمه وعارفه ربها قام من قعدته : لو عارفه ربها ما سوت اللي سوته مهره : وأنت شوو دليلك عشان تضربها وتظلمها شوو دليلك ؟؟ ربك ما يحب الظلم سيف : والبنت اللى أتصلت علي هذا مب دليل رديت عليه : لا مب دليل .. تأكد من الرقم .. أكيد هذي وحده تغار منها ولا تكرهها ..المفرووض أنك تثق فخواتك ما تتصرف معاهم بهاي الطريقة .. سارونة مب صغيرة .. عمرها 25 سنه .. تعرف الصح من الغلط وأهلك لو مب واثقين فيها ما خلوها تسوق سيف : لا تصارخين علي وقصري حسج محترمنج لأنج فبيتا لا أكثر مهره : شو بتسوي يعني بتضربني مثل ما ضربتها .. ولا رديت علي بهالطريقة لأن ما عندك رد سيف يتأفف : أنتي شو تبين الحين مهره : أباك تعتذر من أختك وتعطيها سويج سيارتها سيف : ههههههههههه ضحكته نرفزتني : على شوو تضحك ويا راسك ؟؟؟ أنت أصلا ما عندك دم ولا ذرة أحساس سيف : مخلي الاحساس لج يا ملكة الإحساس رمسته برجا : اختتتتك مظلومه سيف والله مظلومة .. أنا أعرفها عدل ما تغلط هالغلط الكبير .. لا تخلي حد يخرب راسك عليها .. لا تظلمها ترى والله مالها غيرك سيف : شوفي مهره .. بتأكد من صاحبه الرقم .. إذا طلعت سارة مظلومة مثل ما تقولين ..برجعلها السويج وإذا كانت لا ..بحرمها من كل شي .. حتى بيتكم ما بطبه "يبتسم " أتفقنا أقسم بالله نذالة هالريال مب طبيعية مهره : عطني رقم البنت سيف يبتسم : أسف حبيبتي والحين لو تروحين بيتكم يكون أحسن .. أخاف أهلي يوصلون ويشوفوني معاج فالصالة بروحنا ويفهمونا غلط .. تعرفين عاد كله ولا سمعتي طالعته بنظرة اشمئزاز .. خاطري أعفد عليه وطيح فيه ضرب لين ما تبرد حرتي .. وما ظنتي لو سويتها بتبرد حرتي من كثر ما قاهرني ورافع ضغطي .. مهره : ما برد عليك ولد خالوه لأنك مثل ما قلت أنا فبيتككم ..ويا غريب كون أديب مشيت خطوتين ووقفت بدون ما أصد له : عندك ثلاث أيام بس تتأكد من الموضوع ولا أنا بتصرف كملت مشي ووطلعت ..بدون ما أسمع رده |
thnx 3 alpart raw3ah |
تسلم اناملج عالبارت سيف حسيته انسان طيب بس يبين القوه واتوقع مع الايام مهره بتحبه سارونه اكيد مظلومه واللي اتصلت فسيف اكيد وراها شي مهره غامضتني هالانسانه واحسن شي سوته قرارها برفض ناصر نوف عصبيتها مخربه عليها وايد احس حرام اللي سوته ففهد بانتضار البارت الياي ,, لج ودي |
ما حصلت تشجيع عشان أكمل ف المنتدي .. السموحه منكك اللى حابه تقراء منزلتنها فمنتدي غرام |
| الساعة الآن 01:10 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir