منتدى استراحات زايد - 乂آآه يا ويـــله .. قلــــبٍ صويــبٍ بانــت أقداره乂

(الجزء 62)

(دخل عيسى الحجرة )

• عيسى : سعّود؟ سعّود؟ انته هنيه؟ (ويدوّر عليه .. ما حصله .. سوّاله تيلفون .. بعد ما يرد .. بطّل اللابتوب ..) هذي موول نسيناها .. خلني أبطّل أطالع آخر علومها .. (وبطّل المسن بس هي away .. تم يترياها هي ترمس .. بس بعدين التهى بالشاش اللي لافينه على جتفه ..) يا ربي كيف شكل اليرح؟ محد راواني .. انزين ليش ما يعوّرني ؟ اووووه المسّكن !! ( وبطّلاه كله )

• سعيد واقف : اتخبلت؟ لا تفجّه!!

• عيسى صد : آآآخ يعوّرني ..

• سعيد : بلاك ياخي !! ( وهو كان زايغ ) خلني أردك المستشفى !!

• عيسى : ههههههههههه اتمصخر وياك ما فية شي ... (سعيد سار غرفته ) على وين ؟ على وين؟

• سعيد : ماشي بسير ارتاح .. ( وروّح حجرته وعيسى مب فاهم شو السالفة .. وخلّا على راحته .. واما شمايل منصدمة )

• شمايل : اتعرف اني ما بجذبك فأي كلمة .. حتى لو كانت هي اختيه ..

• هزاع : شو مصلحتي اني اجذب؟ هاه؟

• شمايل : هزاع .. انته ليش مدخلينك المستشفى ؟

• هزاع : تقدرين تقولين قضية مخدرات ..

• شمايل : ما استبعدت هالشي ..

• هزاع : غريبة ما خفتي مني .. احيدج من تشوفين واحد شردتي ..

• شمايل : انا .. انا ..خلنا الحينه في سالفة اختيه ..

• هزاع : تبيني اخبرج عن سوالفها ؟

• شمايل : ماباك تخبرني زيادة .. بس دخيل الله .. استر عليها .. والله بيستر على خواتك .. انا ما با اختيه تنفضح .. من غير اميه لو درت والله لتجتلها ..

• هزاع: وهذا اللي بسوّيه !! (شمايل زاغت ) بس مب عشان حلات ويهها ..

• شمايل : معقولة ؟ وعيل ليش خذتها ؟

• هزاع : تقدرين اتقولين هي طلبت مني هالشي .. من غير انا كنت كاره فاطمة لدرجة اني بسّوي أي شي .. كنت طايش .. وأحين لازم اكون مسؤول عن افعالي ..

• شمايل : فطيم؟ شو يخصها ؟

• هزاع : لا ما شي .. انا حبيت اقولج اني من اتقدم لها وتكون تحت ايدي صدقيني بتعتدل ..

• شمايل : بإذن الله ..

• هزاع : لا تفكرين اني كنت يوم من الايام حبيتها .. انا عمري ما حبيتها .. بس هي كانت تلعب وانا كنت ألعب ..

• شمايل : اختيه وانا اعرفها ..

• هزاع : ليتها خذت من وصوفج ..

• شمايل : جان ما يابت لك الخير ..

(وميود يتمشى وتوّة بيلف .. ويشوف شمايل تضحك ويا هزاع ..)

• مايد فخاطره : الله يغربلك ان شاء الله .. انته منوه!! وشلك بحرمتيه !!

(وعند راشد .. توّة واصل البيت )

• راشد ينادي : رحيل؟ يا رحيل !!

• رحيل : يس سر ..

• راشد : وين ماما العودة؟

• رحيل : ماما سير أبوظبي ..

• راشد : ايوا عيل سارت .. وانتي ليش ما سرتي وياها؟

• رحيل : بابا هني في شغل واجد ..

• راشد : انزين سيري ..

• رحيل : بابا يريد عشا؟

• راشد : لا

• رحيل : بابا ..

• راشد : خير؟

• رحيل : بابا في درايفر جيب كيس في بوك .. انا في ودي روم مال انته ..

• راشد : درايفر مال منو؟

• رحيل : ما قال نيم ..

• راشد يفكر : اكيد هنود مطرشتلي شي فديتها .. ( وسار بسرعة لحجرته .. حصل كيس وطالع اللي داخله .. ) كتاب؟ شو مطرشين لي رواية؟ هذا وقته؟ (وكان لون الكتاب وردي وأزرق .. بس مبيّن عليه مستعمل .. بطّل اول صفحة .. " سالفة الغرام " استغرب زيادة..) سالفة الغرام؟ أي غرام هذا؟ (وفتح الصفحة الثانية .. " أول يوم شفته فيه .. قلبي تعلّق فيه .. مشيت وراه وما حسيت بعمري ..وهو ما يعطي ويه لأي حد .. طوله وغواه .. وضحكته اللي ما تطلع الا من فترة لفترة ..والابتسامة اللي فيها كبرياء .. كنت اتمنى بس اوقف مجابلتنه وما اقول غير يا ويلي من نظرتك .." خلصت الصفحة الثانية .. مع انه مب مكتوب وايد فيها .. ) ميرة !! والله انها ميرة ..اعرف خطها .. وحتى رومانسيتها ... والله انها هي .. (ويلس يشم الكتاب .. كأنه ريحتها فيه ..فتح الصفحة الثالثة .. " اليوم الثاني دوّرت عليه بنفس المكان ما حصلته وتميت شرا المينونة اللي اتدوّر على حبيبها اللي شافته يوم واحد واتخبلت ..ولين الحينه اذكر شوفته كان يوم الاربعاء اتأخرت على شغلي الصبح .. كنت اشوفه في المحطة ياخذ له كوفي ويحاسب .. يا حظها الفلوس يوم انك لمستها .. لحقته .. لين وصل مكان شغله .. وأخيرا والله اخيرا .. نزلت وهو سبقني ..سألت عن وظيفة هناكي بأي طريقة .. من درجة اليأس اللي فية محد درا اني كنت أشتغل فتنظيف الحمامات وانا اللي مؤهلي جامعي .. بس الحاية بنت حرام يا ريتها حاية فلوس .. حاية الحب سوّت بي جذيه .. وكنت اشتغل فكافيتيريا كانوا ما يخلون رياييل يطبخون او يسوون حتى العصاير او القهوة والجاهي .. كنت اشوف طلباتهم .. وأبغي اشوف هالشخص وين يشتغل .. سرنا المحاسبة وعند المدراء ..وهذا كله عشان اشوف هالانسان .. اللي عيوني ما شافت النوم " وهو تم يصيح من الكلام اللي يعوّر القلب .. ) معقولة تنظفين حمامات؟ وها كله عشاني؟ (وخذ الكتاب وحطاه في الكيس وفرّاه وصل صوب الحمام .. وطرش مسج ل ميرة .. تبين تعذبيني وتعذبين اختج .. الله لا سامحج " وميرة بعد 5 دقايق تتصل به وسيده رد ) نعم؟ تبين تعذبين؟ هذي شغلتج؟ دخيل الله ابتعدي عني وعن حرمتي انا ببدا حياة يديدة..

• ميرة وتقلد شرات صوت اختها مريم : افا حبيبي .. ليش كل هذا؟ (وهو قلبه يدق بطريقة خطيرة لأنها تقلد صوت اختها وهذا هوالخطر بعينه .. لأنها تضرب عالوتر الحساس ..) ههههههههه عرفت انك اتحب مريم ..

• راشد عصّب :ميرة !! حشمي !!!

• ميرة : كنت اتحبها ؟

• راشد : هيه احبها .. فيها شي؟

• ميرة : لا !! (وتقلد صوت مريم ) اتصدق وانا بعد احبك ..

• راشد وهب حاس بعمره : صدق غناتي؟

• ميرة فخاطرها : اسميني بتمّلكه .. ما بستريح لين ألّعوزه ..

• ميرة : انا ميرة هب مريم ..

• راشد : ادري ..

(كانت ميرة تسولف وياه ومستغلة خفة الصوت والتقليد عشان تستحوذ على قلب راشد .. وهو كان يدري ومستوعب انها ميرة .. واختها اللي حباها .. بس بعد مب رايم يهّدها لأنها من ريحة الغالين ..ويوم يتذكر صورتها ..الخالق الناطق حبيبته مريم .. تموا على هالحال .. حتى هنود قام يسويلها طاف .. وكله بأمر من ميرة وحنكتها .. اللي كل ما ياها تستحوذ عليه يوم عن يوم .. ميرة تختلف اختلاف كلي عن اختها .. انسانة واقعية وتاخذ حقها بإيدها .. اما مريم كانت رومانسية ومعطاءة .. لدرجة ما تتخيلونها .. بس مشكلتها انها عيّشت حبيبها على جذبة انه اسمها ميرة .. يعني استغلت اسم اختها لمصلحتها .. يوم عن يوم لين وصل اليوم المحتوم .. وهي ملجة الحريم ..كانوا مستعدين من الخاطر .. طلعت هنود الصبح بفرحتها .. وردت الظهر من الصالون .. وياها مسج من راشد " الساعة 5 بييج اباج ضروري ")

• هنود فخاطرها : شو السالفة؟ هو من كم من يوم ما يرد علية وهذي ميوه تصرفاتها هب طبيعية .. شو خاشّين عني؟ لالالا ليش أظن فيهم ظن السوء؟ هو يمكن يتجهز للملجة .. اعنبوا يوم انا الحرمة خلصت اشغالي كيف الريال؟ اكيد شي شاغل باله .. حتى المصخرة ما يتمصخر ... هو مب راشد اللي انا اعرفه..

(كانوا اممكيجين عيونها البنفسجي الفاقع المسيطر على عيونها والاسود الفحمي ..وكانت اتطالع حناّها ..لين ياها المسج " انا برع تعالي " تلثمت وطلعت)

• فاضل: على وين العزم؟ مب اليوم الملجة ول انا غلطان؟

(هنود اتأشر له )

• زينة :ريلها يبيها برع

• فاضل: هييه دامنه حذيه طلعي

(مي كانت داخلة ..وتشوف موتر راشد .. وقفت ونزلت ..وسارت صوبه ونزل لها ..)

• راشد: شحالج المي؟

• مي : والله ما بيسّرك حالي يا بوسنيدة ..

• راشد :افا !!

• مي : ابتعد عن اختي وهذا آخر كلامي ..

• راشد : نعم؟ شو قصدج؟

• مي : قصدي واضح ..

• راشد: فهميني!!

• مي : سالفة آب تاون وكل شي مصوّر يا راعي البنات..

• راشد : انتي فاهمة السالفة غلط..

• مي : شوف عندك من الحّلين يا انك اتوّدر البنية وترد لأختيه او توّدر اختيه وهذا آخر كلامي ..

• راشد : استريحي انا بالاصل ياي عشان انهي هالشي ..

• مي منصدمة : ما تباها ؟ انته ياللي كنت تربع وراها .. والحيه ما تباها؟ زين تسوي .. بيي شيخ وبياخذها ..

(هو بعده .. ما وصلت له المعلومة انه اللي يسّويه هو الخيانة .. انه خان هنود .. ضميره كان معذبنه خصوصا لأنه اعترف لهنود انه يحبها هو بالاصل يحب مريم .. ورد يجدد حبه ويا اختها ....وبطلت هنود الباب ..)

• مي : انا مروّحة فمان الله (واتطالعه باحتقار .. )

• راشد كان مجابلنها واحمر ويهه : هنيد !!

• هنود فخاطرها : بلاهم هذيلا الثنينة ؟

• راشد : طلبتج بالسموحة والعفو ..

(اما عايلة بومحمد .. مويز لو تذكرون البنت اللي كانت مقدمة على وظيفة يوم تدعم موترهم مي ..)

• موزة تتصل ل مريوم اختها : ألو؟ ها مريوم؟ شو تسوين؟

• مريم : ماشي بتغدا .. خير في شي؟

• موزة : والله حاسة عمري بنطّر بنفجر !! سناتر ومولات ممنوع .. كل شي ممنوع ..

• مريم : ههههه هدي هدي يا اختيه .. ههههه افا عليج وخويتج النومة وين سارت؟

• موزة: سارت اتغدي ريلها وولدها ..

• مريم : غلاسة !!

• موزة : شواسوي؟ وقلت حق عبود يوّديني السينما .. ياختيه عمري ما شفتها الا في التلفزيون ..

• مريم : إششششش !! قصورج !!

• موزة : جيه؟ شو بيستوي؟ ماحيد حرام !!

• مريم: نحن ما اتعوذدنا نسير هالاماكن .. مويز !! منو معلمنج هالسوالف؟ اكيد هالتلفزيون !!

• مويز بلهفة : مريوم؟ سيري غدي ريلج وولدج انا مشغولة اخويه يعلني افداه وصل !! (وتبند عنها ) ياهلا ويا مرحبا ويا مسهلا !!

• عبدالله يتصدد: منو تكلمين؟ تكلميني انا؟

• مويز : منو غيرك ياخويه !! يالله ماتدري من زمان ما شفتك !! (وتاخذه بالاحضان ) هات راسك بحبك !!

• عبدالله يضحك : مويز !! عن الغلاسة وارمسي شو تبين ؟

• موزة تسوي عمرها فقيّرة : لا عاد الله يهديك .. انته فاهمني غلط ..

(وهو ضحك زيادة ..لأنه عارفنها )

• عبدالله: انزين .. كيفج !! انا ساير !!

• مويز : على وين العزم؟

• عبدالله : وانتي وشلج؟ حطوج رقيبة؟

• موزة بكل براءة : لا عادة اباك تمر بي المول..باخذ لي غريض محتايينه ضروري !!

• عبدالله متعجب : أوّديج المول عشان غريض؟ شو هالغريض؟

• مويز : شي حريمي ..

• عبدالله : حريمي؟ جاسني الفضول .. انزين سيري لبسي عباتج .. (هو ذابحنه الفضول ولا لو مب الفضول جان انثبرت مكانها ..البنية عندها حس الحماس هههههه)

• مويز وهي تناقز وتحولف : والله ما تسير عني !! والله ان سرت عني لأعفد من الدريشة !! بعمرك يا عبود!!

• عبدالله : هههههههههه والخيبة !!انزين سيري سيري .. (وهو يتوّعد) حرام ان حطيتي مكياج بتجرّين مكانج !!

• مويز : حتى جحال؟

• عبدالله : انتي سايرة تاخذين غريض؟ ولا عشان يشوفونج؟

• مويز : هاه؟ لا خلاص !! التوبة التوبة !! (وتربع فوق وآثار الرياح وراها .. وهي نازلة ..وتوّها بتبطل الباب .. سبقها وبطل الباب من جهته ..) ويييه بسم الله زين ما شليت لي خشمي !! (وهي تركب )

• عبدالله : هذا يزايه مبطل لج الباب .. (وهم في الطريج ) يعني ما بتخبريني؟

• مويز : ماشي بس شلوه (=شلوه اسم بشكارتهم ) تباني آخذ لها ليفة وفازلين حق ريولها ..

• عبدالله عصب : شلها طهف ان شاء الله عنلات صيرها وصيرج فوقها !!!

(ومويز تضحك)

• مويز : وبغيتك توّديني السينما ع طريجك ..

• عبدالله : اهبي هباج الله .. انا براويج مسوّدة الويه .. (ووداها الجمعية) يالله انزلي ..

• مويز : إيييييييييييه !! والله مافيك خير !! يعلك بحرمة شلقى وبلقى !!

• عبدالله : هههههههههههههه انزين نزلي نزلي .. انا بترياج .. قالت شلوه قالت !! حريم آخر زمن !!

• احمد: لا امايا ساير المدني آخذ كناديري وأفصل بعد هنتين زيادة .. (وهو لف يمين وهي سارت سيده وما لاحظوا بعض وهي تمشي واتحرطم على عبود ..وبعد ربع ساعة ) انزين شو بعد؟ امممم؟ الدهن العود موّصني رشود !! (ويرد على اتصال ياينه ) مرحبا .. هلا عواد .. بخبركم شو السالفة؟ من طريت اني بسير المدني وانتوا كلكم علية !! هههههههه انزين خلاف خلاف الشاعر بيقولي .. شو بغيت ؟ مرضعة ميلوبا؟ إشووه هذا؟ هيييه الاصفر قول اورنامين سي .. اهب !! ياللي بييبه لك عنلات صيرك !! (وبند عنه وهو يضحك وغلق التيلفون عشان يلعوّز بعواد .. وسار يدوّر مرضعة الميلوبا .. دوّر قسم الاطفال ما حصل شي .. وكل مرة يسأل اللي يشتغلون او الحريم يقولن له مناك .. بس هو ما يعرف شكله ..) اختيه؟

• مويز : نعم؟ (وصدت له )

• احمد : اختيه اتعرفين وين مرضعة ميلوبا؟ (ورفعت ححاجبها متعجبة منه .. وفخاطرها بعد تضحك )

• مويز : مرضعة؟

• احمد : هيه !!

• مويز : اخويه انته تستهبل؟ لو سمحت فارج انا مب راعية هالسوالف !!

• احمد: بس انا والله ماعرف .. شو هوه؟ والله حق ولد اخويه !!

(ومويز قامت بغياظ وسارت قسم اليهال ودوّرت عالميلوبا وهو مصطن مكانه يترياها ..)

• مويز : اتفضل ..

(وروحت بعيد)

• احمد: مشكورة .. ههههههههه مادري على شو مشتطة ..بس غريبة ما عرفتني ما قالت انته احمد ههههههههههه احسن !! بس عليها غوا بنت الذين .. (ويطالعها تسير بعيد ..ويوم هي مروّحة وهو طالع من عند المدني كانت موّخية بتيب بوكها اللي طاح .. وما شافها ودعم جتفها ..خخخخ شكله اتوّحاها ..وطاحت عالأرض ..) هووووه هوووووه هيّدي !!

• مويز تتويع : آآآي!!! يالله اعنبوا جلعت جتفي ما تشوف جدامك؟ (واتغير لون ويهها واستوا احمر لأنها عالارض وفضيحة الناس يطالعونها ..)

• احمد : انتي؟ اوووه .. آسف .. آسف .. انتي بخير؟ ماعرفتيني؟

• مويز: لا ماعرفتك انته منو؟

• احمد: انا احمد ..

(ونزل لين مستواها بيساعدها ..بس رفضت ..وتضحك عليه من الخاطر وقامت مع انه الضحك مبهدلنها )

• مويز قامت وهي تتنهد بغيظ :لا والله ما عرفتك .. (وعرف حزتها انه مب كل اللي في البلاد يعرفونه وانعجب فيها ..وف جرئتها وروّح) يالله تصبرني بلاه هالريال علية؟ (وأحمد روّح طلع برع صوب المواتر وهي توّها نازلة من الدري وترمس ويا عمرها وتتحرطم عليه ..واتبرّيدت مكانها منصدمة ) ربيع عبود؟ ياربي يا فضيحتيه .. احينه بيخبر علية عبود ..ياربي انا مب ناقصة مهازب !!