منتدى استراحات زايد - ~» .. غريبه وســط أوطــاني .. «~

&* الجــزء الســادس عشـــر *&

اليـوم باقـي يوميـن عن العيـد وبتي المحنيـه عند قوم فطـوم من عقب الفطور سريـنا صوبهم .. وانا شليـت ساعة خالد وخشـيتها فالسده اللي فالسياره بدون ماحد يشوفنيـه .. ويوم وصلـنا وقفت عدال سيارة خالد وحمدت ربي انه فالبيـت .. نزلـن البنات اما انا قلت ..

حموده : سمعت صوت فالسياره بشوف شو فيـها وبلحقـكن ..

الريـم: انزيـن برايـج ..

عنبوووك يالجـذب والله اني جذووب ‍!!!

سيـده فجيت باب سيـارة خالد اللي كانت عدالـيه وحطيـت الكيـسه داخـل .. كان ويا السـاعه كـرت مكتوب فيـه ..

"مشـكور ع هديـتك ذاك اليـوم و هذي اعتبرهـا رد العطيـه من عنديـه .. البــسها يوم العيـد .. يا ويــلك ان مالبــستها !! "

"حمــــده"

ماحبيت أحط كلام وايـد واشياء مالها داعي .. أول ما حطيت الكيسه في سيارته شردت داخـل عن يشوفنيـه .. مافيّه ع المواقف المحرجه !!

يوم هبطـت حجرة فـطوم شفت محنيات هنتيـن .. وحده كانت مستلمه فطوم ووحده الريـم .. وانا وسلّوم حليلنا يالسيـن نطالع في ويوه بعـض .. لا والحبيبه ريموه تبا تحنـي ريولـها .. متفيـجه وايد الاخـت ..!!

تميـنا نسولـف ويا المحنيات اللي كانن سودانيات وخلاف يوم خلصت فطوم استلمتنيـه المحنيـه .. الصـراحه حناها كان عجيــــــب .. تحنيت لين الكوع .. وخــلاف حسـيت ريجيه يابـــس والبنات كل وحده قابضتنها محنيـه .. وحده تحني ريول ريموه ووحده تحني ايدين سلّوم .. وفطوم توها متحنيـه وحناها رطب ..

حموده: أيـه بنات انا عطشانه بسير المطبـخ ..

الريـم: وشقايل بتشربيـن يا شـاطره .؟؟

حموده: اكيد الا بلقا وحده من الخدامات .. بخليـها تشربنيـه ..

سلامه: عن لاتشرقيـن بـس ..

حموده: بسم الله عليّه ..

خليت المحنيه تحـط شيلتيـه ع راسيه وتفج ليـه الباب .. ظهرت من الحجـره وصادفـت سعيد في دربيـه ..

سعيـد: ياحــافظ ع الحنـــا ..

حموده: احم مشكوور ..

سعيـد: ويـن سايره ؟؟

حموده: بسيـر أشرب ماي ..

سعيد: وشقايـل بتشربيـن ؟؟

حموده: أكيد بحصـل وحده من الخدامات ..

سعيد: والله انتن لو ما اتحنن أحسـن شتبـنه باليـات عمــاركــن ؟؟

حموده: عاد انته ريال شو فهمك فهالسـوالف ؟؟ خلنيـه بسيـر أشرب ماي أحسـن ..

تم يضحك وخطـفت عنــه .. هبـطت المطبـخ بس ماحصلت حــد .. وأصلاً ماحصلت ثلاجة المـاي .. كان مطبـخهم عود وفيه حجره شرات الستور الصغيـروني وفيها الثلاجات .. هبـطتها وأول ماهبـطت سمعت حد يسـعل وكــان خــالد !! ليــش ياربي دوم اتحطــه في دربيـه ؟؟؟؟لــيش ؟؟

حموده: حلال حلال ..

خالد: لا حلك الله يا حســين الهايه .. من خالجك تكسـب اثم وذنوبي .. تدعي المولع وسط غيّه تايـه .. شاقي وقلبه مـ العنا متعوبي ..

سكت خلاف قلت: انا لا حلنيه الله ؟؟

خالد: شسويــبج هابـطه عليّه جذيــه بحناااج ..

غيّرت الموضوع عشان لا ندخل في سوالف ثانيـه مالها لزمه في هاللحـظه ..

حموده: انزيــن أبا ماااي ..

خالد: أصب لج يعنـي ؟؟

حموده: هيه عيل بالله عليك تبانيـه أنا أصــب ؟؟

خالد: لا ..

سار وياب كوب وصـب ليه ماي ..

حموده: عاد سر ازقـر وحده من الخدامات تشربـنيـه ..

خالد: الخدامات محد ساريات فيا اميه صوب بيت خالتيـه ..

حموده: شووه؟؟ عيل شقايــل بشـرب انا ؟؟ بمووت عطــش !!

خالد: يعنـي ماتقبليـن مساعدتيــه ؟؟

حموده: ياااااااااااااااااالله بالســـتر .. شو تبا تشربنـيه ..

خالد: انزين شسوي ماشي غير هالحــل عندج حــل ثانــي ؟؟

تنهدت بقو وطارت قصتيه اللي كانت طايحه على ويهيه وماكنت اقدر اردها داخل الشيــله ..

تجدم خالد شوي ورفع الكوب وقال: يالله ؟؟؟

حموده: يووووه لامابا خــلاص ..

وظهــرت عنــه وخـلاف تميـت أكــح من كثر ما حلجيــه يابــس .. جني من سـنه ماشـربت ماي .. انا أصلاً اليوم ماشـربت ماي ع الفطـور .. أكيـد عشان جذيــه ياليـتنيه شربت تنكـر ماي ولا هالموقـف البايــخ !!

يا عنديه يوم سمعني أسعـل ..

خالد: حلال حلال ..

حموده: حل العدو حلول فـ بطنه .. (قلت بقلة حيله) يالله عطنـيه ماي لاحيــــله !!

تم يضحـك عليّه ..

عصبت انا وقـلت : ياربـــــــــــــــــــي انا شو اللي عقنيــه عنـدك ؟؟!!

خالد: انزيـن هبطـي صوب الثلاجات لايشوفج سعّود ولاعلي ويسوولنا سالفه ..

هبطت وياه صوب الثلاجات ..

حموده: أوقف بعيـــد ..

خالد: انشالله ..

رد على ورا ومد الكوب صوبيه وتميــت أشرب .. حســيت ويهيه أحترق من هالموقف اللي يستـوي ومارمت أكمـل كوب الماي ..

حموده: الحمدلله بــس ..

وييت بظـهر عن وقال : ماشي مشكوور ؟؟

لفيت صوبه وقلت : مشكوور الشيـخ ماتقصـر الله يسقيـك من حوض الجـنه انشالله ..

خـالد: آآآميــن ويــاج انشــالله ..

وظهــرت عنه بســرعه ..

مطــااااافي ياناس حد يدق لـهم بســرعه .. ويهيه احــترق !!

هبـطت داخــل وتساندت على اليدار وخــذت نفس عميــق على قولتـهم عشان أروم أهــدا وأهدي نبضــات قلبيــه اللي مب طايــعه تهـدا !! الموقـف محرج على يضـحك على واايد أشيااء .. !!

رديـت صوب البنات وانا أحس انه ويهيه بعده ليـن الحيـن أحمــر .. !!!

عقب ساعتيــن ونـص .. كانت ريموه قد غسـلت حناها وهي اللي أخرتنـا لين هالوقـت الحيـن الساعه 12:30 .. وليــن قفضـنا عمارنـا وصلـت وحده الا عشـر .. تعرض لنـا خالـد كعادته وماخلانا نروّح ..

خالد: الحيــن بتسـرن ؟؟ عنبو قدها الساعه وحده الحيـن !!

حموده: يووووه انته بتم لنا عرضه .. ع السايره والراده بتنشـب في حلوجـنا ماصارت حاله هاي .. !!

هالمـره شـاركوه سعيـد وعـلـي بعـد .. هجوم ثلاثي ماشالله ..!!

سعيد: مايستوي تظهـرن نصايف الليـل لا سمح الله استوى فيـكن شـي ...

حموده: انزيـن نحن مب سايرين مشـي نحن سايرين فـ سياره !!

علي: حتى ولو الشباب مايحلالهم يتخبلون الا تالي الليـل .. عاد افرضـن حد لف عليـكن ودعمكـن ؟؟ تراهم الحين من يشوفون الحرمه تسوق سياره لفوا عليـها ..!

أنـا عنـي زغـت .. خاصةً اني من فتره سمعت بمثل هالحوادث .. خفت اني اكون انا The next !!

حموده: أسميــكم تعرفون شقايـل تزيغونيــه .. يالله عاد شوفوا لنا حـل الحيـن ..

فطوم: باتـــن عندنــا الليــله !!

الريـم : شووه ؟؟

فطوم: باتن عندنا جيه شو قلت انا ؟؟

سلامه: ويــن بنرقـد بالله عليـج ؟؟

فطوم: حجرتــيه تضمــكن رقدن فالدعنــه !!

حموده: لافديــتج انا ماعرف أرقد فالدعنــه ..

فطوم: اسميــج بطرااااانــــه الا بترقديـــن غصباً عنــج .. تعاااااااالن ..

وسحبتنا انا وريموه من ايدينا وسلامه ورانا وودتنا حجرتها .. فرشــت لنا في حجرتـها وغصباً عليـنا رقدنا عندها بس قبل دقيت حق عموه وخبرتـها انا بنبات عند فطوم ..

بالبـــاجــر وعيــنا ع السـحوور .. أول مره فـ رمضان أقوم حق السحور دوم يوم يوعونيه أرد أرقــد !!

كانوا الكـل ع السحوور عميه سالم وحرمته وخالد وسعيد وعلي ونحن البنات .. انا عنـي ماكلـت شـي بس شربت ماي .. حسيت فيّه لوعه وما اشتهيت العيشه ..

عميه سالم: كلـي يابنتيـه مايستوي جذيـه تصبحين بلا سحور ..

حموده: سلمت يا عميه ياغير ماشتهي دوم يوعونيه حق السحور وارد ارقـد مايانيه شي ..

عميه سالم: انتي روحج ضعيفونـه أخاف اييج شي من قل الاكــل .. ورفجتيه ياتاكليـن ..

طالعت الاكل وخلاف قلت: خــلاص تـم عشان خاطرك بـس ..

تميت آكــل وياهـم بس من دون نفس .. قمت خلاف عشان اغسل ايديّه واتمسـح مره وحده حق صلاة الفير .. أذن الفيـر وصليت وعقب الصـلاه بـ نص ساعه ردينا البيـت .. وكملت رقدتيـه ..

وعيــت قبل المغـرب بـ شوي .. أذن وفطرنا آخر فطور فهالشهر .. الليله ماشي صلاة تراويـح .. خـلاص خلص رمضان الله يعيده علينا بخير السنه اليايه ..

فلّيـل الكـل مرتبــش ينظفون ويرتبون .. That was so exciting !! .. أول مره يكون العيد عنديه جذيــه .. في أمريكا كان مثل أي يوم عادي .. ويوم كنت في بوظبي كان يقتصر على الثياب اليديده و العيديه اللي يعطينيه اياها ابويه .. وخلاف يخلينيه عند اليران ويرد العين .. وانا اتم جني في عزا مب في عيد ..!! أول مره أجرب فرحة العيـد !! بس المشكله ماكانت فالعيد .. كانت في ظروفيـه .. ولا العيد هو نفسه ماتغيّر مجرد يوم من الايـام .. لكـن فرحة الناس فيه هي اللي تخليـه "عيـد" ..

ياناس العيد ماله لون ولاله طعم ولاله فرح .. واذا قلتوا وش الاسباب قلت الله يعافينا
نلوم الوقت والقصه ماتبغي جمع ولا طرح .. لأن العيد من ربي خلقنا ساكنن فينا

تميـنا انا والبنات نرتب فالصاله .. واحتفالاً بالعيــد كنا مشغليـن التلفزون ومطوليـن ع الاغــاني .. و نرقص و نيبــــس .. كانوا حاطين أغنية فرقة المزيود "منبع غلاك" ..والخدامات ايبسن ويانا ..

سلامه: عااااااااااشت سميـــــــــرهـ عاااااشت سليــنا ياااابس يااابس ..

سميره هاي كانت الخدامه الأثيوبيه و "سليـنا" الفلبينيه .. سميره كانت تيبس وسلينا فاجه شعرها و تنعش ..

سميره: زياده هلو (حلو) هازا قنّي (غنّي = اغنيه ) ..

سلينا : سو (شو) قول كـلام داكل (داخل) قنّي هازا ؟؟

الريم: سمعو انتوا التنقيـــع بس .. بذمتـكم فهمتوا شي ؟؟

سلامه: حرام عليــج يا سليــنووه جانج من 5 سنين هنيه وبعدج ماتعرفين تيبين جمله على بعضــها ..

سميره: هازا مخ مال هي زياده خربااان ..

الريم: فذمتيــه انه خربااان ..

سليـنا : سو كلام هازا انا مك (مخ) مال انا مافي كربان (خربان) .. !!!

سلامه: ياحي سميــره تنطق الخاء والشين هاي امره رمستها مجلبّه !!!!!

حموده: وحليــلهن مغتربات عن دارهن لاتلومونهن وبعديـن لسنتهن هب ضاريه على رمستـنا ما ربن هنيـه !!

انا المدافعه الرسميه عن المغتربين عن داارهم !!

سميره: صدق كلام مال انتي همّووده انتي زياده زيـن والله ..

حموده: مشكووووورهـ ...

كملـنا ترتيب وتنظيف ويا عموه وحرمة عميه والخدامات ويدتيه كانت فالمطبخ تشرف على الهريـس والخبـز عند الخدامه الثالــثه (عايده) اللي كانت سيلانيه ..

خــلاف خلصــنا وتمينا نطالع الحلقات الاخيره من المسلسلات .. ويوم سرنا نرقد انا ماياني رقاد .. ظهــرت كندورتيه اللي كانت أشبه بـ فستان ماكنت أقدر اسميها كندوره الصـراحه !!

كانت قطعة حريـر لونها وردي ساده .. ايديها فـرنسي فتحتهن وايد عوده وطويله .. ومن عند الكوع لين آخر الايد كان شيفون وايد خفيــف .. عشان يبيّن حنايــه .. وراصـه من فوق .. ومن تحت وسيــــــعه وطويـــله تسحــــب .. وعند الخصر عليها شرات الحزام لونه أسود وعند فتحة الصدر بعد .. كانت بالنسـبه لي "غير شكل" كنت واايد فرحانه فيها !! خاصة عقب ماقايســتها و يا قياسها مضبوط .. العاده كل ما افصل شي يا يكون وسيــع واايد أو ضيّج واايد .. بس الظاهر الخياييط هنيه غيــر ..!!

تزهبت الاكسسوارات والنعال وكـل شي حتى الساعه اللي شريتها فيا ساعة خالد .. عقب ما تأكدت انه كل شي زاهـب .. ســرت اتسبــح مافيّه اتسبــح الصبـح .. عقب ماخلصت سبوح رقـدت بـ شعريه الخرسان عقب ماحطيت الفوطه ع المخده ..

السـاعه 6:30 الصبـــح .. اليــــوم العيـــد .. توهـا الشمــس بدت ترتفع فالســما .. حتى الشمس يكون شكلها أحلى يوم العيـد .. حتى أسخف وأشين الاشياء تغدي أحلى يوم العيـد .. هذا عيدي انا مادري عنكم انتوا ..!!

أول شــي سرت وغسـلت ويهيه .. رديت ووقفت جدام منظرة التواليـت .. يباليـه ع الاقل ساعه عشان أخلـص عمريـه .. استلمت شعريــه .. سحّيــته وكان مسترسل مايباله سشوار .. لفيـته على طريقه علمتني اياها "جودي" الله يذكرها بالخيـر .. كانت لفّه سريـعه بس اللي يشوفها يقول مسويتنها عند كوافيــر !! سشورت قصتيـه .. وبديت بالمكياج .. كان كلــه وردي في وردي .. خـلاف لبسـت الكندوره .. والشغاب .. والساعه .. ولبست نعاليه اللي كانت كعب .. أبا أغدي طويله لو يوم واحد في حياتيــه !! ماكنت أحب الوردي لكني حبيته استثنائياً اليوم ..!!

تعطــرت من العطـر اللي يابلي اياه خــالد .. وقفت جدام المنظره و تأملت عمـريه ..

وقلت بصوت واطي : أوكيــــه ..

ضحكت على عمريه وشليت شيلتيه الحريـر وظهرت ..

نزلت الدري بكل هدووء .. شمّيـت ريـحة الدخون ودهن العود والمخمريه اللي تحطها يدتيـه والزعفران اللي اتصنّع بـه .. والعطور اللي حاطاتنهن عموه وحرمة عميه .. اختلطت الريـحه فالصاله من كل انواع العطور .. دخلت .. توسعت ابتسامتيـه يوم وصلـت عندهم .. وايهتهم كلـهم وعايدتبـهم .. بس يدوه لصـقت فيها أكثـر .. يبت ايديه من ورا جتفها وحطيت راسيه على جتفها ..

حموده: فديــت يدوه انا والله ..

خلاف سمعنا صوت سلامه وهي نازله من فوق: لاتصدقينها يدوه تراها تتمصلـح تبا عيديه ..

حموده: خيــــبه عوووذ بالله منــج ..

ضحكت وخلاف يت صوبنا ووايهتنا وعايدتبنا .. وحطت راسها على جتف يدوه الثانـي ..

حموده: غيــراانــه !!!

سلامه: هيـه شخااصـنج انتـي ؟؟

وخلاف نزلت ريموه بعد وعقب ما اكتملنا تمينا نتريا وصول فطوم .. عقب نـص ساعه ردوا الرياييـل من الصـلاه .. يا عميه صوبنا ووايهناه ..

حموده: مباركن عيدك عميـه ..

عميه سيف: عساج من العايدين والسـالميـن .. بس لاتزقرينيه عمج حالج حال خواتـج زقريـنيه ابويــه ..

حموده: من عيووونــي يابوويــه ..

ابتسم ولوا عليـّه .. تمن البنات يطالعنيـه بنظره .. غيرااناات !!

حط عميه ورقتيـن خمسميـه يعني ألف في ايديه وقال : هاذي عيديـتج يابنتيـه ..

حموده: مايستوي يابويــه المفروض انا اعطي عيديه الحين ما انعطا ..!!

عميه سيف (ولا ابويه أحسن ؟؟ خلاص بسميـه ابويه عايبنيـه الاسم !!)

أبويـه: لا انتـي غيـر يابنتـيه ..

سلامه: ونحن ابوويه .. ؟؟

أبويه: أفا عليـكن تعالــن ..

وين صوبه ولوا عليهن بهنتـيناهن وعطاهن عيديتهن ..

الريم: يالله عطونا عيديه بنسـير الدكان ..

الكل: هههههههههههههه ..

سلامه: يالله بنات بنسيـر نشتري شلــق ..

ابويه: ياويـــلكن ان يبتن شلق فهالبيــت هاللي ناقص تراه !!

وخلاف هبطت حرمه أظني هي وحده من ياراتنا .. يلست انا شوي وخلاف ظهرت عنهم .. بدا الجو يبرد شوي .. تغشيت عن يشوفنيـه واحد من الهنود .. مب من عادتيه اتغشا بس انا حاطه فول ميكب ولازم استر ويهيه عن هالهنود اللي مايصدقون على الله يشوفون شي !!

شفـت سيارة خالـد هابطه البيـت.. نزلوا من السياره وانا تميت متغشيـه مايستوي خالد يشوفنيـه جذيـه .. !! يبت الشيله من تحت وغطيت بها ع الكندوره لأنها وايد راااصــه !!

يو خالد وفطوم صوبيــه .. خالد كان وايد كااشــخ .. وانتبهت ع الساعه في أيــده .. بس الظاهر انه هو لين الحين ماعرف اني انا الواقفه جدامــه .. !!

وايهت فطوم .. وقلت ..

حموده: مباركن عيــدج ..

فطوم: عساج من العايدين والسالميـن .. حمووده ؟؟ شعنه متغشيــه ..

حموده: يبووج ويهيه فتــنه ما ايّوز الرياييل يشوفونه خاصةً اليوم !!

فطوم :ماحيدج مطوعه شقايل تغيرتي بين يوم وليله ؟؟

حموده: فديــتج انا مب مخليــه شي مب حاطتنـه في ويهيه واخاف حد يشوفنيه ويغمى عليــه مابتحمل ذنبــه انا خــلاف !!

خالد: خقاااقــه !!

حموده: نعــم ؟؟

خالد: خقاااقه .. قلت انـج خقاقه ..

حموده: مشكوور .. شهاده أعتز بــها !!

وهبـطت داخــل .. انتبهت اني ماعايدتبـه .. برايـه هو اللي بدا هالمره مب انا !!

من عقب ماسلمت فطوم ع الكـل .. سار عميه قصدي ابويه صوب خالد فالميــلس .. وخلاف شفنا سيارة خالـد وهي تظهـر من البيـت .. أكيــد روّح .. وعميه بعد كان محد .. أكيد روحوا فيا بعـض ..

ظهرنا انا وفطوم فالحوش وعقيت غشوتيــه .. أبا استمتع بهالبراد اليــوووم .. كلهم داخل يتريقون من الهريســه والخبز والصالونه .. بس انا ماكنت أشتهي تعودت ع رمضان !!

حموده: فطوم .. الشــرده ؟؟

فطوم: صدق ؟ وين نسيــر ؟؟

حموده: ناخـذ لفــه فالحاره .. ولا نتحوط أي مكان ..

فطوم: انزيـن انا لابسـه عباتيـه بس انتي ..

حموده: ماعليــه بطرش الخدامه .. ماظني حد بينتبـه لها ..

زقرت سليــنا بما انها هي اللي أكثر شي تنظف الحجر .. يت صوبنا وهي كاااشخه .. لابسه قميص أحمر وتنوره سودا .. ومتجحله وحاطه روج احمـــــر .. وفاجتلكم ذاك الشعـر البني الفاتح اللي لين نص ظهرها .. هي طبعاً ماتتحجب لكنها دوم تلقونها لافه شعرها .. بس هالمره فاجتنه ..

حموده: أووه شهالكشـخه سليــنووه حق منو متعدله ..؟؟ لايكون حق نجيب (الدريول) ..

سلينا : لا انا مايريد هازا كشره نجيـب انا يريد واهد هلو ..

حموده: أسميــج مب هــينه .. انزيـن هاتي عباتيـه من الحجـره بتحصليـنا داخل كيـس أسود عود انزين ؟؟.. ولا تخليـن حد يشوفـج ..

سليـنا : زين هموده انا مألوم (معلوم) انتي يريد سوي شرد ..

حموده: هيــه زين يوم فهمتي يالله سيري ييبيها ..

سلينا: زين ..

فطوم: أسميها خدامتـكم هاي مب هيـنه !!

حموده: فلبينيه شو تتريـين منها ؟؟ كلهن جذيـه !!

عقب شوي يت صوبنا سلينا وفي ييدها كيسة العباه ..

حموده: هاه حد شافج ؟؟

سلينا : لا كلــش تمام ماهد (ماحد) في شوف ..

ظهرت الكرتون من القرطاسه وفجيته وظهرت العباه من الكيس البلاستيـك حشا اسميهم موثقينها هالعباه !!

تونيـه يايه بلبســها الا وأسمـع صوت فززنيـه من مكانيـه ..

خالد: وييــــن على الله ؟؟

قلت بدون ما التفت صوبه بما انه كان ورانا : بســــــــــــــم الللللله يالسكـــني من ويــن ظهــرت ؟؟

خالد: انا كنت فالميــلس اطالعــكن شو تسوّن ..

لفيت صوبه هالمره :أسميــك صدق ماتستحي على ويــهك .. !!

ما رد .. تم يطالعنيــه .. بس هالمره نظرته غير عن كل مره .. طالعنيه من فوق لين تحت حسيته بياكلنيه بعيوونه .. لفيت عنه ولبست عباتيه .. وسحبت فطوم وركبنا السياره جدامــه وماقال شي .. بدلت شيلتيـه فالسياره عن يشوفنيـه .. وظهرنا من البيت بدون أي اعتراض منه !!

تمينا نحوط فالحاره وخلاف ظهرنا منها وتمينا نتحوّط فالشوارع ..

حموده: تراني عادي الحيــن أشرد بـج صوب بوظبي واسير اسلم على يرانّا اللي ربيت عندهم 16 سنه ..!!!

فطوم: والله لولا خويــلد جان ســرنا ..

حموده: خليه ايي فيانا لأنه أكيد بوظبي تغيرت الحيــن وانا مابدل البقعه ..

فطوم: أسميه طالعج هب مطالــع .. !!

حموده: بخبرج شي بس لاتخبريــن حـد .. أروم أثــق فيـج ؟؟

فطوم :أكيــد ..

حموده: مابتسوين شرات شويـخ ؟؟

فطوم: حموده ترانيـه بزعل منج ان قلتـي هالرمـسه مره ثانيـه .. انا مب نذلـه !! وجان ماتبين تقولين لاتقوليـن جانج خايفـه .. بس اعرفي انه الناس مب كلهم شرات بعـض ..

حموده :انزيـن تدرين هالساعه اللي في ايد اخوج منو يايبنها ..

فطوم: انــتي ؟!!

والبقية بعدين

والسموحة