منتدى استراحات زايد - مع غيري( إلـ ع ـب) وبين له( مهاراتك)

..الجزء الــ ث ــامــن عشــر..

(الفصــل الأول)

••.•°¯`•.•• لمحــة كذب ••.•°¯`•.••

هاذي الدنيـــا..تغرك من أولهـا لتاليهــا..
تبعد عنك الإحسااس والقوة والحشيمــة..
وكل ظـالم فيها بالذل وبالشكوى يناديهــا..
تشوف كل مصايبها في النفوس السقيمــه..

ما يعرف شو هو احساسه بالضبط..اللي يبغي ايسويه شي وااحــد مااشي غيييره..انه يود شيخوه من شعرها ويدق برااسها فالأرض لين ما يشوف دمهــا مزر البقعه..؟؟!!!اللي ما تعرفونه ان الأخ سعيد طبعــه هادي وغاامض .. ويكتم غيضه..بس اذا شاف شي وما يرضيه يجلب الدنيا فوق حدر..
بالنسبه لأم السعف والليف ع قولة"حياتي فداك"..الأخت مضيعه مذهبها..اظني عاقتنه فالشاارع..من شافت سعيد ما ياها لا خوف ولا هم يحزنون..الحياااة فريييي..
سعيد"يرمسها من طرف خشمها":جدمن جدام ..
شيخاني"تطالعه بنص عين":انزين..
من قبل كانت تستاانس من اتشوف سعيد وترتبش..بس من عرفت هزااع سوت اكبر طاااااف..المووهيم..تجدمن جدام..فالوقــت اللي تكفل سعيد بالشباب اللي كانوا يلاحقون شيخاني وميثووه..وحلوا كل شي بالتفااهــم..

:::×صوب شيخاني وميثا×:::

ميثا:شيخااانــي؟؟امنو هاااذااا؟؟
شيخاني"بعدم اهتمام":منوو؟؟
ميثا:هاللي رمسـج؟؟!!
شيخاني:هيه..هاذا سعيد ولد خــالي..
ميثا:قسم بالله انه طـر..عليه رحاااامــه..
شيخاني:جيه اصلن شباب قوم خواليه جيه اشكالهم..كل واحد ارحم من الثااني..
ميثا:أكيد هاذا احلـى وااحد..
شخاني:هع هع ..بلييز لا تضحكيني..عندج سهيل وخلوف وحمدان وحمد..وسيف بعد هاذا احلى واحد..بس لو شفتي خالي ذياب..صج هالرجوله والرحـامه كلها طااحت فيه..
ميثا:وععع على شباب قوم عمومتيه..وخوالي قهــر ما عندهم شبااب..
شيخاني:ياحبج لمطالعة أشكال الشبااااب..
ميثا:دخيييييييييلكم عاااده سمعوا من يرمس..حييييني اطالع وبس..غيري يطالع ويلعب ويرمس تيلفون..ولا يطالع ويححححب ويشوف في السوبرماركت..بس الحمدالله حاشمين عمارهم وما يرمسون تيلفون..
شيخاني"تطالع بطرف عينهــا":شو تقصدين ؟؟!!
ميثا:مااا أقصد شي..
شيخاني:عيل لمي ثمـج لا افــتح مطعــم افويهج..
ميثا"تضحك":ههههههههه..حلووة..انزين ليش مب دكان؟؟!!
شيخاني:يا غبيه المطعم أعلـى مرتبه زمستوى من الدكـان....هههههههه..
ودق تيلفونهــا..وكـانت أمهــا..بس سوت طاااف ولا ردت عليهـا..

:::×صوب سعيد×:::

سعيد كان معصب وحالته لله..فظهر من المول وحدر موتره..وربعه ما رمسوه لأنهم شكوا او بنقول عرفوا ان البنتين من هل سعيد..
المووووهيم..
كان تفكيره مشتت..مشهد اللي شافه من شوي حرق أعصاابه من الخاااطر..بنت عموته..كااشخه..ميييكب كــامل..جنها فرعووون..وهاذا من غير القصه اللي مظهرتنهــا..والعبااايه اللي ماشالله كل دانتيل وكل موديل مسوتنه..والمشيه
غيير شكل"..والسماعه اللي حاطتنها ع اذوونهــا..حس باشمئزااااز..جان يدق تيلفون لسلطــان..بس سلطــان مااارد ..فطرش له مســج..

"سلطان يااخوي خل أختــك تحشم عمرها فالأسواق..من شويه مسويه فظييحــه"

حس بالرااحه..لأن مسج احسن من مكالمه اتسبب الأحراااج لسلطــان..شغل موتره..وحرك صوب الرمــاح..بس فكره لهالمرة بعيييد عن شيخـاني..صوب صاحبة البررروود كله"موزاني"..
بس قطع تفكيره صوت تيلفونه .. وكان سيف المتصل.. وسيف عرف من صوت سعيد انه متضاايـج ..
سيف:سعيد بلاك متضاايـج...؟؟
سعيد:عادي ما فيني شي..
سيف:يا ريال ..اللي ما يعرفك بيقول انك أكبر متضاايج...
سعيد:يا ريال شو اقولك..أخر زمن وحده من بنات عايلتنا اتسويلنا فضاايح فالأسواااق..
سيف:شوووووو؟؟امنو هااي؟؟
سعيد:طولي بعمرك بنت عمتك الأخت شيخه سايرة السوق بكشخة اعرااس ..وانا شفتها..وتموا شلة شباب ايلاحقونها هي ووحده ويااها..ما عرفتها..المهم..قاعدين يلاحقونها من بقعه لبقعه ..ويعقون رمسه عليهن..
سيف:اهــا جيه السالفه..امبونها هالبنيه مضيعة مذهبها..ولا اخوها..قسم بالله ريال والنعم فيه..بس أكيد ما يدري بسواياها..ولا جان ذبحها..
سعيد:هيه والله..
المهم تموا يسولفون بس من بعد ما غيروا سالفتهم اللي كانت عن شيخاني..

. . . . . . . .

ياشــــوق بــلّغ .. صاحبي عن "حنيني "
تكفى وقلّــــه عن .. حقوق المحبــــه ..

منهو يحب .. يشتاق في كل حيــني ..
وعــلى المواصـــل دوم يجبره قلبــه ..

قلّــــه : ترااا - من قلب - مكشووت فيني ..
وودي أعـــرف لهالقطــاعات سبّــــــه ..

بيت بو سهيـل..
حيرة سلامي..
الساعه 11ونص..

ضحــك..
سوالف..
أكل..
مصخره..
مطنزة..
استهبال..
استعباط..
نظرات من طرف العين..
تصفيق..
وحالات هستيريـة..
هو طبيعــة الجو حاليــاً عند روضه وفطامي وسلامي وموزاني وشموس وغبوش وشجون..كلهن قاعدات..وكل وحده تتمصخر ع الثانيه..وتضرب الثانيه ضربه خفيفه..بس الطرف الأخر يردها بضربه قويه..شرات الحال عند روضه وسلامي..
سلامي:آآآآآآآآآي عورتيييييينييييي..انا ضربتج بشوي اشوي..وانتي دفشششه تضربيني بقوووووة..
فطامي"يابتها بصوت يهال":كيفها اماراتيه ..
الكل:هههههههههههههههههه..
موزاني:شوووراايكم كل وحده اتغمض اعيوناتها الصفر .......
شجون"تقاطعها":هب هباااج الله..شو عويناتنا صفر اتشوفينها..
روضه:وانا اشهد انج ختيه..دقي الخشم الله لا هـاتج..
ويدقن اخشومهن شجون وروضه..
سلامي:انتقلت العدوى من موزة الى شجون..
شموس:زين بعد يدقن الخشوم ولا تدق كل وحده الثانيه براسها..
غبوش"مندمجه فالااب":هع هع هع ..جيه تيووووس..
يتناااطحــن..
روضه:يلا شجون بنتناااطح..
"أكيد تعرفون شو يعني تناااطحــن..دقن بروسسسهــن شروا التيووس"
الكـل:هههههههههههههههههه..
موزاني:انتقلنا للعزب..
روضه:هع هع هع ويااا رااســج..المووهيم خلونا نرمس عن شموس وحمد..
صدن كلهن صوب شموس..
موزاني:خخخخخ..طاع ويهـج..
شموس"غدن خدودها حمر":حووه وشو بلاه ويهي؟
غبوش"باستهبال":لا بس غدى أحمر شوي..
تمن يضحك ع ويه شموس..وخلاف بدن يرمسـن عن تجهيزات العرس اللي بيكون بـعد أسبووع..ترى حمد مستعيل وااحليلـه..حتى ان استوي يشتغل..لووول..من قبل كان يشتغل فالمولات..المووهيــم..تمن البنات يتخيلن شكل شموس وهي تمشي ع الكوشه وماادري شوو؟؟وطبعاً موزاني وفطامي ..يلعبن دور شموس وحمد..وروضه اونها المسيل..مرة اتغني غنيه مال زفـه..ومرة اتون اونها موسيقى كلاسيكيـة..سلامي اتطالع فيهن بأسى على حالهن..أما غبوش اتساعد روضه وتشغل لها اغاني من الاب..وشموس ويهها أحمر وكل ساعه اتقول"سخيفات تافهات"..وشجون بس عليها تضحك من ترمس شموس بكلماتها المعتـاده..كانت يلستهن روووعــه..وخلاف غيرن الموجه..وتمن يرمسن عن العرس بجديـة..وكيف بيكون ترتيب القاعه وفستان شموس اللي باجر بتسير بتشتريـه..ووين بتحني ووين بتتعدل ووين بتاخذ الأكسسوارات..ومن هالأشيــاااء..لين ما يت السـاعه 2..وخلاف كلهن نشن وسارن لبيوتهن وكل وحده اونها مستويه طيبه وتوصل بنت عمها لووول..

. . . . . . . . .

يا قلب طيب ابد ما يعرف القسوة..
يا سنين شفت السعاده في لياليها..
من نور حسنك بدت أيامنا حلوة..
تحلي بشوفــك..ويحلى كل ما فيها..

أبوظبـي..
السـاعه 2 ونـص..
جدام بيت بوسلطـان..

سلطان يالس في موتره..الأخ يدور ع تيلفونه..من ظهر من بوظبي الساعه9..تيلفون كان مفضي جان يعقه في الموتر..واللحينه بيشحنه وخلاف بيدق على خلودي بيرمسهــا..من شحن تيلفونه..ويلس يتسمع اغاني ع الإف ام..ظهر عصير ديو وتم يشرب..وخلاف فج تيلفونه ولقى مسج من عند سعيد..من فجه انصدم من الخاااطـر ..وقراه بدل المرة عشر..أخر ما توقعه ان حد من قوم خواله يطرش له مسج عن شيخووه..وانها سوت فظيييحــه..وفالسوق بعد..ما حس بعمره الا وظاهر من موتره ويربع صوب شيخوه في حيرتهـا..اللي كـانت منسدحه ع الشبريه وميوده مجله تدور لها فستان اوكيه..عسب عرس شموس وحمد..
سلطان:شيخووووه..شيخوووه..
شيخه"اتصاارخ":الباب مبطل ..
ويحدر سلطان حيرتها وبدون تفاهم هجم عليها جنه وحش..وتم يضربها كفوف من الخاااطر...
شيخاني"اتصاارخ":اييييه انته يالسبااال شو بلاك؟؟!!
سلطان:اسواق هاه؟؟وفضايح بعد؟؟انتي اللي شو بلاج كل يوم ظاهرتلنا بساالفه وكل يوم ظاهرتلنا بفظيحه..عنلاتج انتي متى بتعلقين..اللي اكبر عنج ما سووا هالسووووااااااه...
شيخاني:أي سوق وأي خرابيط..؟؟!!
سلطان"يصفعها من الخاطر":سعيد توه مطرشلي مسج يقولي عنج يا الصايعه الضاايعه..جيه جنه ما عندج رياييييل وراااج..مسوده ويوهنا وين ما سرتي..
شيخاني"ما عليها ولا حتى نزلت دمعه وحده بس اتصاارخ":سعيد سعيد سعيد..؟؟!!هاذا شاف شباب ورانا على باله الناس شراته يغازلون..
سلطان"يشد شعرها..خلااص قطعه":وهالشباب ليش بيلاحقونج..عشانج محتشمه وما تلفتين النظر؟؟!!..
شيخاني:اناااا ما سويت شي..؟؟!!
انقهر سلطان من ردة فعلها..جان يضربها ويضربها..وهي تترادد..يابنت الحلال سكتي...بيودرج..بس هي اتم اتعاند وتراادده فالرمسه..ويهاا استوى اسود من زود الكدمات والضربات القويه..حتى شعرها قطعه..يعني صج ضربها ضرب عنييييييف..مع انه انسان طيب..وما يستعمل هالنوع من الأساليب..بس هي اللي تجبره يتبع وياها هالأسلووب..لأن لسانها طووويل..ومضيعة مذهبها..ومسوده ويه ابوها واخوها في كل مكااااااااان..يعني بس عرف ان في شباب لاحقوها وتفشل..جان يضربها هالضرب.. لو درى انها رمست سيف واعيونها زايغه ع الشباب ووين ما سارت تلفت الأنظار والشباب يتغزلون فيها شو بيسويييبهـا..هزري انه بيعلقها وبيشنقها وبيقطعها وبيعذبها لين ما تمووت..؟؟!!
من شافت ان الوضع طوووول..جان تشرد وتنزل تحت تدورلها مكان آمـن..وما حصلت الا حيرة امها جان تفج الباب بقوووه اللي كان الظلام داارج في زواياها..مع أضواااء خفييفه جداً..
وتلاقي أمها تصلي وابوها راقد..امها على طول صدت صوبها متفاجئة..اما ابوها جان يفز من نومـه..يا هالبنيه حتى الرقاد ما اتخليه يرتاااح فيه..
أم سلطان:ويديه شيخوه فديتج شو بلااااج..
شيخاني"اتسوي عمرها اتصيح":يمايه طالعي ولدج شو مسوي بويهي..
وتطيح في حضن امها..وأبوها يطالع فيها وده بنوتته اتي صوبه ..بس هي نست ان عندها أب .......؟؟!!
وصل سلطان وهو ايصارخ يبغي ايطفي النار اللي في يوفه..وهالنار ما بتنطفي الا بضرب شيخوووه..من شاف ابوه يالس ع شبريته خاف انه استوابه شي ..فربع صوبه وتم يتخبره جان يانس شي..
سلطان:أبوويه فيك شي..تانس شي ؟؟
بوسلطان كان بيرمس بس حتى الرمسه ما يروم ..أن يتعب واايد
أم سلطان:لا علني فدااك..بس فز من مكانه من شاف شيخووه..
سلطان"يطالع شيخه وتذكر سالفتها":يماايه انتي ما تعرفين بنتج شو من سواه سوتها..قسم بالله انها مضيعة المذهب ولا عندها احساااس والحشمه موول ما دلت دربها..
شيخاني:سعيد يقص عليك وانته اتصدق..امايه شوفيه شو مسويبي والله لعن خيري من زوود الضرب..جيه جني مسويه جريمه..
سلطان:واللي سويتيه اخس من الجريمه يالووااااطيــه..
ام سلطان:خلاص يا سلطان سامحها هالمرة..
سلطان:دووم دووم أسااااامحها..
أم سلطان:فديتك عشان خاطريه..
صخ سلطان وما رمس بكلمه..عشان أمه..فشل بعمره صوب حيرته وهو متضاايج خذله شور من بعد الحرب اللي كانت من شوي..وتم يرمس خلودي..يخبرها بالسالفه وما خلى شي في خاطره الا وظهره..لأنها خلودي هي الوحيده اللي اتواسيه وتخفف من همه..وتهدي أعصابه..وبعد نص ساعه رقــد..
أما بالنسبه لشيخوه ..أونها باست امها ع راسها..شاكره لدورها الفعال في تخليص شيخاني من يد سلطان..وسارت لحيرتها وبدلت ملابسهـا..وحدرت النت اتدورلها على فساتيبن كشخه...لأنها تبى اتطر"تتحدى"البنات كلهن في كشختهــن..وكانت تتمنى انها هي وروضه ما يكون لبسهن شرات بعض ..وخلاف رقدت ..ورمسة سلطان ما حركت شي من مشاعرها..لأنها بكل اختصار عديمة أحساس ومشااعر..

. . . . . . . . .

الى متى صاحبي هالحال بيتمي
على الضما لا شربت ولاني بشارب..
من كثر حبك تشابه دمك ودمي..
وتبدل الدم من موجب الى سالب..

الرمـــاح..
بيت بومحمد..
الســاعه9 ونــص..

وبعيـد عن سوايا شيخوه..وضيجة سلطان..ومعاناة أم سلطان وبو سلطان..روضه راقـده بسلللللااااااااام..ومستانسه بعد بالرقــاد..لين ما سمعت صوت ما يعيبها..صوت تيلفونها ..وهو يصيح يذكرها اتنش عسب تسير دبـي..ويا شموس ومحمد وعليا..
من زوود الربشه والوناسه بالعرس..لأول مرة ما يودت تيلفوونها وسبته ..على طوول نشت وخذتلها شور..ولبستلها كندورة اتريحها في مشاوير دبي واللف والحواطه..
وتكشخت كشخه بسييييطه..يعني جحال..لووول..وشلت عبايتها وسارت صوب شموس وكسرت الباب ..واخيرن نشت شموس وفجت الباب وشكلها غلط × غلط..
روضه:ههههههههههههههه..طاع ويهها..
شموس:شو بلاج.."فاجه عين والثانيه مبنده"..
روضه:اقووول الشيخه يلا خلصي بنسير دبي..
شموس:ليش؟؟!!
روضه:عسب عرسسسسسسسسسسج..
غمضت شموس عينها الثانيه وبندت الباب في ويه روضه وما سمعت الا صوت روضه اتقولها"يالسباله"..لوول..
نزلت رواضي تحت..ولقـت عليا ومحمد قاااعدين..سلمت عليهم وصبحت عليهم بالخير ويلست تتريـق..
روضه"تشرب عصير برتقال":جيه وين عنودي وعبودي..
عليا:بعدهم رقوود..
روضه:جيه ما بتاخذون حد ويـانا..
محمد:قلت اذا روضه بتيلس بيلسهم..بس انتي بتروحين..
روضه:هع هع..شفتني مربيـة أطفال..
محمد:لا مرية كباار..خخخخخخ..
روضه:والله ومستوي نكيت..أقول حموود..
محمد:أصغر عيالج..
روضه:لا وحياتك أكبرهم...ههههه..ما تلاحظ أسرق منك كلمـات..
محمد:يييييها..سيايير وتسرق..حلويات وتسرق..حتى الرمسه تسرقها..ياخي ماشفت حد شرواتج..أكبر سراقه فالكووون..
روضه:لا ايه ده يابوعبدالله؟؟انته كده تقرحني..
عليا:الله والجرح عاده..شو سوابج ؟؟
روضه:محاااميـة دفااااع مخلييينــج..
عليا:هيه فديتج عيل شوو؟؟؟!!
محمد"يخق":شو تتحدين؟؟
روضه:لا والله ما اتحدى..روميو وجوليت زمــانكم..طبعاً من بعد ريسه وحمدان..
وشوي الا يت شموس وتريقـت..وخلاف ظهروا صوب دبي..

(الفصل الثــاني)

••.•°¯`•.•• همزة وصــل ••.•°¯`•.••

يابروق السحـــــــــــــايب لي تزيح الظلام
زيح ذا الهم عنــي جــــــــــان تتقدر تزيح
جاثين فوق صــدري مثل جــــــــثي الركام
وانتهى بالحنايا مـثل جـــــــــــمر الاثـــــير
والله اني معافا من جميع الســـــــــــــــقام
بس حبه دعاني من صوابه طريــــــــــــح
لو كتمته عنـــــــايه بيــــــــن طول الزحام
يفضح العيــــــن دمــــــعه محتواها فصيح
كن عيني ســـــــــــحابه من سحاب الغمام
لي ذكرت الحـــــــــــــبايب هل ماها نضيح
اسهر الليل كله مــــــــــــــــــاهتني بالمنام
والخلي في منامه مهــــــــــتني ومستريح
مادرى بالتياعي بالهــــــــــــــــوا والغرام
واختلاجي ونوحي من مصــــــــابي اصيح
رااااااح كنـــــه ونســــاني دون اي اهتمام
بعد ما امكن سهــــــــامه في فوادي جريح
انتخي بالتســـــــلي وبــــــــــه اشد الحزام
يختل اني عزوبــــــي في مـــــــكان فسيح
وارجع الوم نفسي ومايفــــــــــــــيد الملام
وش تفيد الملامه يوم دمـــــي سفـــــــــيح
ياعنيد المــــــــشاعر بـــــــــعدكم لي حرام
جود بالــــــوصل مــــــــــرة رد لي يامليح
طال صبـــــــــــــري وبعدك مجعلني حطام
مثل ما غصـــــن وردن لاعبه عصف ريح

::::××××××××::::
.
.
.
مرت الأيــام بشكل سريـع على كل شخصيـــات قصتنــا..الكل مشغول ومرتبش ومستااانس..لأنه ما بقى الا يوم واااحـــــد..وتلتقـى قلوب شموس وحمــد ..

"صوب هل الرمــاح"
حمد:
الريـال يراكض من مكان لمكـان..مرة الخياط..ومرة السوق..ومرة صوب القاعه..ومرة يشوف اخر التطورات في قسمه..ومرة صوب محلات الأثااث..ومستاااانس حده..

شموس:
وهي الثانيه بعد..تراكض من بقعه لبقعه..من دبي لبوظبي للعين..ووياها عليوه كونها عندها خبره فالزهاب وهالسوالف..وضاربنها الحفووز..وكل ما تحاول تقنع امها اتيي العرس امها ما تبغي..لين ما عيزت منها..وتحس بقهر لأنها امها ما بتحضر عرسها..
وطلبت منهم ان الملجه والعرس في يوم واااحد..عشان ما تخاف مرتين..وأكيد وافقوا على طلبها..

روضه:
هالبنيه مستااانسه واايـد بعرس اخوها ووبنت عمها..وهي الثانيه ميوده شلتهم ويتحوطون في أسواق العين..عسب الفساتين والحنا والصوالين ..وطول هالفتره وهي ماخذه بنصيحة موزاني..ومطنشه سهييل..

غبوش وشجون:
وين ما سارت روضه هن وياها..واشترن فساتين نفس الشي..ومتشوقات لشوفة شموس وحمد ع الكوشه..

محمد وسعيد:
كل واحد منهم يربع في صوب..اللي يشوف الذبايح..واللي يشوف طلبات حمد..لوول..

حمدان:
مرة متنقع وياااهم..ومرة مسويلهم طـاااف ومجابل قصوده وريسوه..اللي منقهره لأنها ما بتحظر العرس..خخخخخ..

سهيل:
كـان هالفتره مشغول بالسيايير اللي يابوها من الخارج..ومعظم وقته في الشركه وويا سيف..ولو..بس كان يتابع تطورات عرس حمد..وكمن مرة جمعته الصدفه ويا روضه في كذا مكان..بس استغرب من تصرفات روضه اللي كـانت اتسويله أكبـر طاااف..

موزة:
كـانت أكثر وحده اتابع القاعه وترتيبهــا ..وكان تصميم القاعه هاللي سوته..وحاولت تجمع من بين فستان شموس والقاعه في عدة أشيااء..وكـانت تاخذ بعض الأفكار من النت..تبغي ايكون عرس أخوها وبنت عمها عرس مميز..

سلامي:
هاي بعد..كانت طول الوقت ادق ع ربيعاتها من كل بقعه تعزمهـن على العرس..ومن صوب مجابلة خلوف هالفتره...وكانت اهي اتنقي فستانها وفستان موزاني..

خلوف:
هو الثاني مستاااانس..لأنه عرسه تحدد في الصيف..لوول..وكان معظم الوقت مجابل سلامي وداق سوالف وياها..ومرات..ايحابل سعيد ومحمد وحمد..

حميد وناصر:
عايشين الأجواء ويااااهــم...

ذياب:
كان مستااانس واايد بالعرس..بس عليه يتطنز على حمد..ويحدر صوب شموس ويتطنز عليها..وكل ساعه يربع عند روضه يتخبرها عن أحوال مريوووم..لوول

عليا:
مثل ما قلت عن شموس..اربع وعشرين وياها..حليلها تعبت واايـد..بس كل شي يهون لجل عيون شموس وحمد..

عنودي وعبودي:
عبودي بس عليه ايغير كندورته ويشل عصاه ويوقف ويا الرياييل اونـه ويا راسه..
أما عنودي..مستانسه بفستانها الوردي وكل ساعه اتجربه وتشغل التي في واتم اتهز..لووول..

أمهم العوده:
كــانت واايد مستااانسه .. لأنه حمد بياخذ شموس..ولأنه المكسار بيض الويه..والكل مدح الزهبه والترتيب..

الشوااب(بومحمد وبوخليفه وبوسهيل):
كل واحد مستانس..لأن بنت أخوهم عاشت وياهم..وبتعيش وياهم وما بتكون بعيده عنهم..ومحتشرين..اللي يبغي عرس الريايييل في يوم..وعرس الحرمات في يوم..واللي يبغي عرس الرياييل والحرمات في يوم واااحد..وبعد مناقشاات كثيرة وحااده..خذوا رااي أمهم العوده..واتفقوا ان عرس الريااييل والحرمات في يوم وااااحـــد..

الحرمـات(أم محمد وأم سهيل وأم خليفه):
هن بعد مستاانسات..لوول..وكل يوم طابات العين..اللي تشتريلها تلي..لوول... والثانيه تاخذلها ذهب واللي تشتري دلال القهوه والبـاتشي..

"صوب هل أبوظبي"
أم سلطان:
كـانت تحاول اتخلص مواعيد ريلهـا..وتاخذ احتياطاتها .. وهي تتمنى ان ليلة العرس اتعدي عليها وعلى ريلها بخير..

سلطان:
كـان مستانس عشان حمود..والفال له..

شيخاني:
ترابع لدبي ووياها ميثاني عسب اتكون شيخوه بكامل كشختهــا..ويا راسها...

"صوب هل سويحــان"
سيف:خذ هله صوب الرمـاح من ليلة المكسار..وهو يتمنى ان يشوف"شيخه"..ويلعن خيرها..مايدري ليش يحس عمرها يبغي ايسبها اشوي..

أم سيف:
ما خلت حد من هل سويحـان الا وعزمتــه..لوول..مستانسه بعرس عيال خوانها..

فطامي:
البنيه من سارت للرمـاح نست درب سويحـان..ومستانسه انها حضرت كل تطورات عرس حمد وشموس..وخذت فستانها هي واختها من العين..على ذوقها..يعني ما خذت راي خلودي..لوول..وكــانت متشجعه انها اتقول لروضه عن سيف..وحلفت الا اتقولها في الفتره اللي بيلسون فالرماح من بعد العرس..

خلودي:
كانت معصبه على فطامي لأنها خذتلها فستان من دون ما تاخذ رايهـا..بس بعد كـانت مستانسه لأنها ما تعبت عمرهـا..وكـانت هالفتره مبتعده عن سلطون..بحكم الظروف..لوول..

.....
وما بقى الا أحمد..اللي كـان مستاانس من الخاطر لربيعه وخويه حمد..وويااه فكل خطوه يخطيها..ونعم الخوي والله..
.....

بجيه..عطيتكم نبذه عن الفتره اللي كـانت قبل عرس شمسه وحمد..وطبيعة أوضاعهم..

(الفصل الثـالث)

••.•°¯`•.•• قصـة حب ••.•°¯`•.••

لكل قصة حب أشواك وورد..
وليه نصرخ من ألمها وكلها تنبت بعود..
ناظري هاذا قمرنا لو تغطيه الغيوم..
ناظري هاذا شجرنا لو تحرقه السموم..
لو تجرحنا عيون الليل وحروف النميمه..
لو يعذبنا السكوت..
ان شربنا او عطشنا الدمع ديمه..
للهوى نحيا ونموت..

الخميس
(عرس حمد وشمسه)
السـاعه
10 ونــص

من طبـع البنات .. درس ملامـح كل عروس في ليلة عرسها..لوول..وبنات العايله كلهن باستثنــاااء شيخه يالسات في الصاله كلهـن..وكلهن لابسـات كنادير..ومتوسطتنهن شموس..اللي كانت تتلقى التعليقات من الكل..حتى عنودي؟؟!!
عنودي:ايووووا وبتاااااخذين حمد الخبل..وبتروحون بعيد..وبتكلمينه تيلفون شرات خلو..خلو..خلووودي..
الكل:ههههههههههه
موزاني:هههههههههه..البنيه تعقدت..كل ما شافت خلودي اتلاقيها ميوده التيلفون ..
خلودي:حراام عليكم..جيه تجرحوني..
روضه:ييها امحق جرح..قولي انج ما ترومين ع فراق سلطووون..
سلامه:تستحي البنيه..
غبوش:وانتي ما تستحين؟؟!!
سلامه:لا فديتني استحي..
روضه"اتغير سالفه":يلا بستهبل على عنودي.."تزقر عنودي اللي تتأمل فستانها"..عنوودي عنوودي..
وتصد عنودي صوب روضه..
عنودي:شو؟؟!!
روضه"تبدا استهبال":اليوم فليل بترقصين؟؟
عنودي"بثقه":هيه برقص عيل بصيح..
روضه:أأأخ ويهي احترق..الياهل استوت تقفطني..انزين عنودي كيف بترقصين..
عنودي:بسوي جيه..
ويوم كانت بتهز..وقفت..
خلودي:بلااااج..؟؟
عنودي"اتصد صوب خلودي ببراءه":لازم غنيه عسب اعرف ارقص..
وتيود روضه الريموت اللي عدالها واتم ادور لعنودي غنيه مصريه عسب تهز..ومن حظ عنودي رواضي حطت غنية يا طبطب ودلع..مال نانسي عجرم..
عنودي من سمعتها ين ينونها..جنه البنت لابسنها يني..وتمت الأخت تهز هز..بس والله هزها حلوو..يعني مب على عمرهـا..كلهن يطالعنها منصجمات..لأنه اول مرة يشوفنها اتهز..بس روضه الوحيد الي اتفق وتشجع..لوول..عنودي لها مستقبل...لأن الأخ مخاوي الزعيم ناوي يستدعيها في عرسه..هع هع هع ..
الموووهيــم..
تمن البنات يضحكن عليها..لين ما يت عليوه...ويلست عندهن..اللحينه..طاااح الأدب في عنودي من شافت أمهـا..
عليا:يالسه اتهزين هاه؟؟؟
روضه:والله بنتج هاي ما تسمع الرمسه يالسه اقولها يا ويلج من امج والهز هب زين ..الا وتبى تهز..لابسنها يني..
موزاني:صيووووووووووو طااااااااااااااخ...الصااروخ من قوته ما وصل للسمـا..بس هدم السقف..
فطامي:ههههههععععع...رواضي استهدي بالله وبلا صواريخ قويـه..
شجون:ومنو قالها شو بتسوين يا عنودي اليوم فالعرس..
خلودي:ومنو اللي يود الريموت وشغل التي في..
سلامي:ومنو اللي حطلها غنية ياطبطب ودلع..
غبوش:ومنو اللي تم يصفقلها ويشجعها ع الخراب..
عليا"اتصد صوب عنودي":عنودي منو سوا هاه كله..
تمت عنودي مبحلقه في عيون امها..وخلاف اشرت على روضه..عاد الكل تم يضحك على روضه يوم شلت شيلتها وغشت ويهها..
روضه:بعدووا عني..ما روم أظهر ويهي من زود ما افتشل واحترق..
مرت عليهن هالدقايق حلوووة..بسبة عنودي..واشوي الا محمد يهود..
محمد:هووود..هوود..
"يعرف انه محد غريب..بس عسب البنات يحطن الوقايه"
فطامي"اتقلد أمهم العوده":بنات ياكن محمد حطن الوقايه حطن الوقايه يعلكن العرس..هداااا هدااااا يا ولديه محد غريب..
محمد"يضحك ع فطامي":السلاااام عليييييهم..
الكل:وعليييك السلاااام والرحمه..
محمد"يصد صوب فطامي":هاه بلاج اتقلدين امايه بخبرها انج اتقلدينها..
فطامي:لالالا مشكور...بتربع ورايه بعيرتها..
روضه:دوااااااااااااااااااااااااااااااااااااااااااا اااج..
محمد:يلا شموس نزلي تحت..الملاااج بترياج تحت...
شموس:شوو؟؟وليش ما اتخلوني اوقع وخلاص..
محمد"يضحك عليها":ههههههه..شو خايفه؟؟
شموس:ويا راسك..
عنودي:لا اتسبين بوووويـه..
شموس:خلاص امرنا لله..
حمدت شموس ربها ان محمد اللي حدر..ولا يكون حمدان..لأنه محمد تعتبره اخوها الكبير اللي ولا مرة قصر وياها..نزلت وياه تحت..والرزة روضه وياهم..الحرمـات كانن قاعدات فالصاله الثانيه..يعني مب الصاله اللي فيها الباب العود..وعند الباب العود وقفت شموس..ووياها روضه.."تاخذ فكره قبل ما تعرس"اممرة ملصقه فيها..وظهر محمد وياب الملاج وتم الملاج يسألها كمن سؤال..وأخر شي شل محمد الكتاب وشموس وقعت..وأول واحد باركلها هو محمد..وخلاف روضه..ومن سار الملاج..حدروا عمومتها الثلاثه وباركولها..ونزلن البنات كلهن وباركلها وخلاف يأ دور الحرمــات..عنودي من قالوا لها ان شموس العروس..ملصقه في شموس ولا فجتها دقيقه..تدرون بهن البنات الصغار لو شافن العروس يتمن لصق اوهو فيها..
وبعد مرور ربع ساعه نشن موزاني ورواضي صوب المطبخ..ايشوفن أوضاع الغدا..اذا يابوه من المطعم ولا بعدهم..حدرن المطبـخ وشافن البشاكير يعابلن فالصحون والأكواب والعصير..جان يزهبن السلطات وهو السوالف..ونجبوا الغدا وبعدين سارن البشاكير وودنه صوب الميالس..ومن ظهرن شافن حمد واقف عند الباب..جان يأشرله..وياهن عاده كاشخ وشااق الحلج من زود الإبتسامه..باركن له..واستهبلن عليه وطفرن به .. بس كان مستانس بالتعليقاااات..لووول
وخلاف حدرن البيت..وبعد ما تغدن..روضه وخلودي وفطامي سارن صالون ويا حمدان ..وسلامي وغبوش وشجون وموزااني سارن صالون ثـاني ويا الدريول..عسب يخلصن وما يسيرن صالون واحد وعقب يخلصن بعد مووت..
أما عليوه وشموس..فيلسن فالبيت..شموس رقدت شوي عسب ترتاح ..وعليا دقت على الحرمه اللي بتييهن من بوظبي وبتعدلهن..
بالنسبه لأمهم العوده كـانت راقده..والحرمـات مرتبشات وتمن يتقهون فالصاله ويسولفن عن العرس ..بعده ما استوى ويسولفن عنه..يعني الترتيبات وهالسوالف..
بعد صلاة المغرب..وصلوا قوم بوسلطان..نزلوا الرياييل صوب بيت بوخليفه..لأن الرياييل اهناك..اما ام سلطان وبنتها شيخه ساروا بيت قوم بومحمد..لأن الحرمات سونلهن تيلفون وخبرنهن انهن قاعدات اهنــاك..
أم سلطان قعدت عند الحرمـات فالصـاله..فالوقت اللي شيخاني سارت فوق عند عليا وشموس..وسلمت عليهن وباركت لشموس اللي كانت الحرمـه تعدلها..
كـانت شيخاني حاطه ميكبها..في واحد من صوالين بوظبي قبل ما تيي الرمـاح..بس فستانها للحينه ما لبسته..يابته وياها في جيسه..ونسته في موتر سلطـان..
يعني لازم تنزل تحت واتييبه..دقت تيلفون لسلطان وقالتله عن السالفه..وعرفت منه ان الموتر مبطل يعني تروم تاخذ جيسها بدون السويج..
نزلت تحت..وسارت صوب الموتر..اللي كـان موقف جدام البيت..شلت جيسها ومن ظهرت شافت سيف يمشي بيحدر البيت عسب يزقر امه..
سيف..سمع صوت حد يمشي وراه..جان يصد وراه..وشاف شيخه..بس ما عرف اذا كــانت شيخه او روضه..بس عرفها من الطول..لأن شيخه أقزم من روضه ..
فستاانس من الخاطر..لأنه من قبل يفكر يسبها..
سيف:اوووه حيالله شيخه اللعااابــه..
صدت شيخه بغيض صوب سيف .. وما كانت متوقعه انه بيرمسهــا..عشان جيه صخت وما ردت عليه..
سيف"باستهزاء":لالالالا..انتي شيخه ولا؟؟!!
شيخه:هيه شيخه..عيل منو؟؟!!
سيف:شحــالج من بعد ما سرتي السوووق..وشافوج الشباب اهناااك ...
شيخه"منصدمه":..................................... ..................
سيف:هيه مالومج قليلة كرامه ولا عندج عزه..ولا اهلج رياييل والنعم فيهم..
شيخه:انزين لا اتم اتعق رمسه..وانته قصوا عليك..
سيف:قصوا عليه ...؟؟!!!أقولج ترى القلب اعتبرج عابر سبيل..
شيخه:لا تعتبرني ولا تعتبرني..يا سيف انا ولا في يوم حبيتك..
سيف: ما يهمني اذا تحبيني ولا لا..كاااافي انج قليلة أصل ورضيتي لعمرج اترمسيني...تراني ريال وما يعبني شي..بس انتي بنيه وغلطه بسيطه تهدم حياتج..ملامح كاذبه عندج واحاسيسج ترى ذبله ..حسافه ما عرفتج صح و حسافه انتي عرفتيني..

وصد سيف صوبها باشمئزاز وقالها:

انــا شـيـخ(ن) ولــد شـيـخ ؛ بـذكـره تنـعـم الانـســاب
اليا قام العرب كلاً ؛؛ يراجع دفتـر انسابـه
ولـد شيـخ(ن) وسـط ربـعـه لــه بـيـن الـرجـال حـسـاب
اليا ضاقت به الارياء ؛ يهز الارض مشعابـه
محنكـنـي عـلـى الطيـبـه مــن يـومـي صغـيـر وشــاب
وش رايج بطفل(ن) دلال القهوه العابـه
تــرى بــدري عـلـى مثـلـج تعـيـب وساسـهـا مـعـيـاب
ياليت اللي يعيبني ؛؛ يحـاول يستـر ثيابـه
انــا لاجتـنـي الـزلـه ؛ مــن الجـاهـل وهـــو كـــذاب
تركت القافله تمشي ؛؛ وراهـا تنبـح كلابـه
وانــا ليـامـن كـشـف ان الـخـوي اصـبــح لـسـانه داب
نزعت السم من عرقه وكسرت بمخلبي نابـه
خــلاص الـيـوم ياشيخه ؛ كرهـتـج والقـلـوب غـــراب
وترى كل طير(ن) بكبد السماء يشبع مخلابـه
خـسـاره مثـلـج بقـلـبـي تـضـمـه غـرفــة الاحـبــاب
وخساره غلطة العاشق ؛ يحطج اول احبابـه

وقال لها أخر شي..:

علمن يوصلج ويتعداج يالواطيه..انتي حتى ما تسوين ربع نعالي..

حست بالإهانه..وحست ان ويهها احترق يوم شافت سيف مقفي عن ويهها .. ونظراته كل وحده اتحسسها انها قليلة أصل وما عندها كرااامــه..حست انها ولا شي..

. . . . . . . . .

كل الوصوف ترجمي يادمعتي له
وأوصفي حالتي في حبه مكسور الكفوف
أظهري الخافي لعينه وأحلفي له
أن عيني غير عينه ماتحب ولا تشوف

العيــــن..
عند قوم روضه ..

فالصالون..كانت روضه اول وحده مخلصه..وتيلفونها محترق من زود المسجات اللي من عند ريسه تتخبرهن هن وين وشو سووا ومن هالسوالف..ومحترق بعد من زوود ما ادق لحمدان عسب اييي وياخذهن..لأن قوم موزاني وصلوا القاعه ومن بين الحضوور..
فطامي"تلبس عباتها":خلاص انزين بدق على سيف وبيي بياخذنا..
روضه:اوكي ..بس وين خلودي..؟؟!!
فطامي:سارت تلبس فستانها..
تمت فطامي ادق ع تيلفون سيف.بس هو الثاني ..ما يرد..شو يعني ما يسيرون العرس..؟؟!!لووول..وتمت ادق وادق..
فطامي:اقول شو الحل اللحينه..
روضه:بشوف حد من الدريوليه ولا سعيد ..محمد قال انه مشغوول..
فطامي:اوكيه عيل انا بسير الحمام.."الله يعزكم"..
سارت فطامي ..وبعد مرور دقيقه..دق تيلفون خلودي..اللي دقت منه فطامي من شوي..على سيف أخووهــا..
صدت روضه صوب التيلفون..شافته يدق ويدق ويدق.ومكتوب عليه سيف وسيف وسيف..لوووول..
ظهرت فطامي من الحمام"الله يعزكم"
فطامي:رواضي ردي عليه بسير بعدل فستاني..
وراحت فطامي وما عطت روضه أي مجال..امبونها فطامي حرككككااااااااات..تبى روضه تكلم سيف..
شلت روضه التيلفون..ع نياتها واحليلها..وردت عليه..
سيف:ألووووو..
روضه:ألــوووو..
صخ سيف لأنه سمع صوت وحده مب من خواته..وصخت روضه لأن سيف ما رمس..
سيف:منو انتي..؟؟!!
روضه:روضه ..
سيف:شو تبين؟؟
روضه:انته اللي دقيت..مب انا..
سيف:بس في حد دق عليه عسب جيه دقيت..
روضه:ادري..
سييف:منو ؟؟
روضه:فطامي..
سيف:وينهي؟؟
روضه:مادري وين سارت..
سيف:شو تبى؟
روضه:اتيينا وتاخذنـا من الصالون..
سيف:وانتي وياهن...
روضه:لا عيل بيلس اهنه اروحي..؟؟شو رايك؟
سيف:لا ما أقصد جيه..انزين لا تصحييين جنج ياهل..
روضه:انا هب ياهل..
سيف:اوكي بنيه كبيرة..
روضه:سخييف..
سيف"معصب":جب انزين انتي السخيفه..
"الحق يا مخاوي الزعيم يسبوووون حرمتــك"
روضه:انزين خلاص..
سيف:وين أي صالون..
وتمت روضه توصفله مكان الصالون..وبندت عنه وهي تسبه..لوول..بعد عشر دقايق ياهن سيف..وحدرن موتره..وعاد تم هو سـاكت وروضه ساكته..وفطامي وخلودي يالسات يتضاربن..خخخخ..ومكرة خلودي ادق ع عليا..ومرة فطامي اتصور اخوها سيافي اللي كـان كاشخ لابس كندورة كركميـة وعقال وسفره حمرا..غااادي طر مييييغا كسرتييييييييم..بس صج شكله واايد كششششششخه...
ويوم وصلوا..ظهرن من الموتر..والأخت روضه ما شلت شنطتها من زود الربشه تبي تدخل القاعه..شو فيهن البنات اليوم اللي تنسى جيسها واللي تنسى شنطتها..الموووهيم..وقبل ما تدخـل..تذكرت انها ناسية شنطتها..لأنها كانت تبى تيلفونها بدق ع شموس ولا على عليا..
روضه:فطامي فطامي روحي ييبي شنطتيه..
فطامي:سيييري مناك..اتشوفيني بشكارتج..
روضه:نذله أقولـج سيري..
فطامي:والله ما اسير..مب متفيجه..
روضه:وين خلودي..
فطامي"تسوي طاف":حدرت..باااي..
وقفت روضه ..اروحها..الموتر وراها تمشي كمن خطوه .. وبتشل اللي تبغيه..والبنات تجدمنها..كـانت محتاره شو تسوي..بس من سمعت صوت سيف صدت صوبه على طول..
سيف:شو بلاج وااقفه..؟
روضه"مرتبكه":هاه؟؟!!
سيف:شووو بلاج وااقفــه؟؟؟؟؟
روضه:أها..لا باخذ شنطتيه من الموتر..
سيف:اوكيك ..
ظهر سويج الموتر من مخباه..وفج السياره وهو واقف مكانه..جان اتسير روضه وفجت الباب الوراني وشلت شنطتها ومن بندت الباب وصدت صوب سيف..لقتها يطالع فيها..حست به ارتبك اشوي رد طرف سفرته على ورى ومشى عنها بعيد من بند الموتر وهي من صوب حدرت القاعه..وعلامة (؟) ع ويهها..
سارت عند قوم عليا..وشافت شموس..وتمت تقرى عليها..لأن شكل شمووس متغير 360 درجـه..هي امبونها حلوة..ومع الميكب زاااادت حلاااااه..
يت الساعه10 ونص..وحان وقت دخول العروس ويشوفونها النااااس..
وعلى أنغام كلاسيكيـة..تليق مع هدووء شموس المعروف..حدرت شمسه وكل ما خطفت على حد الا وذكر الرحمن عليها..لأنها كانت ملااك تمشي على الأرض..الورود اللي على تسريحتها واللي على مسكتها شرات الورود اللي في القاعه..ع الطاولات وع الكوشه..المصورة الفلبينيه تصور من صوب..وكيمرة روضه اتصور من صوب..
وصلت شموس الكوشه..وكانت في قمة الإرتباك..اتحس انها اشوي وبتطيح..وما حست بالراحه الا يوم ششافت عليا اتأشرلها تيلس ع الكرسي..ويلست ع الكرسي وحست ان الإرتباك خاز عنها..
وبدت العياييز والحرمـات يسلمن عليها..ويباركلها..وخلاف ين ربايع بنات عمها..وتمن ايسولفن وياها شوي..وبعد مرور نـص سـاعه تعشوا العرب..وبعدين اعلنوا دخول المعرس حمد ..بو شهااب عاد شاد حيله ومستانس وشااد حيله..وهب مصدق ان حلم حياته تحقق..هع هع هع ..
الموهيم انه حدر..عاد البنوتات تم يطالعنه واشوي وبياكلنه..وسار صوب الكوشه..فالوقت اللي نشت شموس من مكانها..وسار صوبها وباسها بين حياتها..وهو مستااانس..أما هي العكس..اتحس عمرها اشوي وبتصيييح من زوود المستحى..خخخ..الموهيم يلسوا ونشن حريم عمومته وحرمات العايله يعني..وع راسهن أمهـم العوده..ويلست بينه وبين شموس..شووو رااايكــم؟؟وميوده عيرتها بعد..خخخخخ..كانت بس تبغي تخوفهم..دقيقه ونشت تستهبل عليهم..ههاهايييههنياهايههههييههييهاهاهايييي..>عاد هاي ضحكه يديده<انزين..وحدروا عمومتها..وسلموا عليهم ..وعاد تم بوسهيل مرتبش وتم ييبس عند المعاريس وعند امه..ومحد مرتبش وياه الا روضه اللي قاعده تيول وياه..سارقه سلاح عبودي.خخخخ..ولا من ظهروا الرياييل..اصرت روضه الا يشغلون مصري حق عنودي اتهز جدام حمد..خخخخخخخ..وشغلوا مصري..وعنودي يالسه تتشرط..الا والغنيه اللي رقصت عليها الظهر في بيت بومحمد..وحطولها ياطبطب ودلع..وتمت تهز جدام حمد.وحمد نااقع من الضحك..وخلاف يت عليوه اللي كانت لابسه عبايتها وشيلتها ..وسحبتها من فوق الكوشه..خخخخ..وعنودي اشوي وبتصيح..وهاه كله ورواضي عاطيه كميرتها لموزاني عسب اتصور لأن روضه مشغوله باليواله ويا عمها بوسهيل..
وشو صار بعد؟؟وهيه وبعد ما ظهروا الرياييل..اعلنوا الرحييل..عرسهم كله اعلانات ..خخخ..ومن ظهروا ..حمد سار صوب الريااييل..اما شموس سارت تيلس عبايتها..ووياها عليا وموزاني..أما روضه لبست عبايتها لأن الشباب بيحدرون..وكانوا العرب اشويه..لأنه معظمهم رااحووا..الموهيم حدروا حمدان وسعيد وسهيل وخلوف وناصر...أما سيف ما حدر..الموهيم يلسن البنوتات كلهن ع طاوله..روضه وفطامي وشيخه وسلامي وغبوش وشجون..عاد روضه اتخبلت من شافت سهيل..وهو كل ساعه يطيحها بنظرة..لووول..وهي مممرة مصدقه..عاد فطامي يالسه وياهم واتشوف الوضع اللي ما عيبها..وخلوف ييول وكل ساعه ايسير اييبس عند الحرمـات..ومرة صوب سلامي..ولا عليه جدام الناس كلهم..مينوووون في محبتها..والبقيه ايصفقن له ويشجعنه..وهووو مرررررة مستتاااانس..عنودي ودرت الهز..وتم تنعش بشعرها القصير..وسعيد مرة يصفق لها ومرة يمط شعرها وهي تضربه..خخخخ...أما سهيل كان ييبس ويا ناصر..وعايشين حياتهم..لين ما اعلنوا بداية الزفـه..اللي بتكون من وسط منطقة العين لين الرمــاح..
وحدروا الشباب سيايييرهم..وكل واحد مرتبش زوود عن الثــاني..روضه وموزاني وسلامي سارن ويا حمدان..اما أم سيف وبناتها سارن ويا سيف..بالنسبه لشموس أكيد ويا حمد..وسيارتهم فالنص..وسهيل وحميد وناصر على يمينهم..والشواب بسيارتين على يسارهم..ومحمد وعليا وعنودي وعبودي وراهم..محمد موطي الجامه..وعبودي مظهر يداته..وميود عصاته يلعب بها مرة يمين ومرة يسار..أما
ذياب..هاذا في عالم ثـاني..النااااس في زفه..وهو موطي جامته ومشغل غنية منصور وشال علم الإمارات ..يحي منتخبه الأبيض..لأنه هالفتره كانت أيام خليجي 18..ويغني منصور يا عشق الإمارات منصور..رايتك بيضا وانته مرفووع رااســك..ويييييعيييش الأبيض..
وكل وحده يضرب هرنات من صوووب..يعني زفه واايد كبيرة..وربششششششه من الخاطر..ومعظمهم مشغلين أف أم..ومن حظهم كانوا حاطين أغاني حربي وحمد العامري..وصوت الإ أم يتردد في المكان اللي هم فيه..البنات مستااانسااات واايد..لأنهن أول مرة يظهرن ويا الرياييل فالزفه..لأن في عرس محمد وعليا سارن للبيت بدون زفه..وكل ساعه وحده ادق ع الثانيه ويسولفن ويدقن على عمهن ذياب ويشجعن الأبيض وياه ع التلفون..لووول..
الموهيم وصلوا الرمــاح..وهناك وقفت الزفه.. ونزلوا العرب كلهم..والرياييل يلسوا فالحوي ووياهم الحرمـات والبنات..وبعدهن بعبيهن..وسارت عليا وشموس اتساعدها تفصخ فسانها وتلبس فستان خفيف اشوي وتغير عباتها..وتاخذ شنطتها لأنهم اللحينه بيسيرون دبي ومن عقبها بيسيرون ماليزيا..
ومن خلصن نزلت شموس وسلمت ع البنات والحرمات اللي تمن يدعن يوصلون بالسلامه..وتمت أمهم العوده توصي حمد بشمسه ..وهو كل ساعه ايقول في عيوني في عيوني..
وروضه والبنات يضحكن عليه..
وبجيه ساروا الحبايب دبي..

ودااااااااااااااااااااااااامت دياااااااااار بوخليفه عامرة بالأفراااح والمسراااااااات

. . . . . . . .

ألا يادنيتي شوفي جزا طيبي ومعروفي
زرعت الورد بكفوفي وبكفوفي جنيت اشواكه

"""بدون مقدمات"""

في حيرة روضه..فطامي وروضه يالسات..
فطامي:روضه والله في خاطريه رمسه ومن زمان خاطريه اقولها بس ما رمت..
روضه:شو رايج اتقولينها اللحينه..
فطامي:سمعي روضه.الرمسه تخص سهيل..واتمنى انج ما تقاطعيني..
روضه:انزين ما بقاطعج..
فطامي:من كم شهر..خبرني سيف عن مششاعر سهيل تجاهج..قالي ان سهيل موول ما يحبج بس يحب يلعب عليج ويلعب بمشاعرج..تخيلي ان سهيل اللي انتي اتحبينه وتموتين عليه اصلن ما يفكر فيج..ويوهمج بس بكلامه المعسوووول وحلات منطووقه..ولا انتي ما تسوين شي عنده...
.
.
.
.
سنييييييييييييييييييييين وقلبي ذااايب في هوااااك..
واللحينه بكل سهوله انصدم بطبيعة مشاعر قلبك..
.
.
.
انتهىىى البااااارت..
.
.
.
.
اتمنى ان عيبكــم..
الصراحه تعبت عليه وااايد..
لأني اول مرة اكتب بارت طويل في يوم وااااحد..
.
.

وتريوني فالبارت الــ(19)..

وسمحووولي على التأخير