|
(الجزء 102 ) (اما هزاع دخل بيت العنود بدون شراع وميداف ما خلاها اتكلم كسرها من الضرب وسبها سب حتى الدمّان يظهر من حلجها .. خلاها متكسرة ما تروم تتحرك .. وعلى طول سار شركة العقارات .. هناك بعد ما سوا عاب وطاب دخل على محمد ..) محمد قام : يا مرحبا ب (وهو يايّنه منهّد يعطيه بوكس على عينه عجاه على السيت ..) آآآخ !! هزاع : والله ثم والله انك هب ريال يالجلب العود !!! محمد: بلاك يا ريال !!! هزاع: أكرم انك جلب !! اتفر ابوك تف عليك وعلى ويهك !! التربية ما نفعت وياك يالجلب .. (ومسكه من كندورته .. ) طلّع الأوراق بسرعه !!! محمد: أي ؟ أي؟ هزاع: اوراق التوكيل بتردهن لأبويه .. محمد : ما عندي والله .. هزاع: تبا تندفن صح؟ محمد: كله حوّلتهن لأختك .. والله (ويطلّع الاوراق ويراويه) شوف شوف .. (وعيونه بتنطّر من الزياغ ..)كل.. كله حق اختك .. هزاع: يالخسيس !! كلكم من طينة وحدة !!! لكن انا بعلمكم الأدب .. مافيك خير فأبوك اللي رباك وعلمك.. ووداك احسن المدارس .. (اما في المستشفى .. وكشفت عليها الحرمة . وخذت عنها تحليل الدم .. بس من التعب سيده نامت ..اما مانع كان يطالع الدكتور ساير وراد يبا يتأكد وخلاف رد ..) الدكتور : يأسفني أقولك انه أمر الله .. سرطان المعدة.. (مانع احمر ويهه كأنه حد صب ع راسه ماي حار ..) مانع مب مصدق ويطالعه : إشوووه ؟ الدكتور : انا بشرحلك في ورم خبيث ملتصق ورا معدتك ما يبيّن بالتحاليل .. بس انته زادت عليك هالأعراض وقامت تبيّن .. مانع يمسك أعصابه : انته متأكد ؟ أحس قلبي منقبض لا حول ولا قوة الا بالله الدكتور : يا أخي هوّنها وتهون .. الحمدلله انه فمراحله الأولىولا كان تعبت زيادة .. مانع: انته تتكلم عن سرطان مب مرض وله علاج يعني بموت فهمت !! بموت !! مانع فخاطره :بوّدر هالدنيا .. منو بيداري أميه وأختيه وأخويه وبنتي هند هنيد ..بنتي اللي يمكن ما اعيش عشان اشوفها متخرجة من الابتدائية او حتى الثانوية ولا حتى يوم بتعرس وبتلبس الفستان الأبيض وانا بمووت فعز شبابي اللي ما عشته ولا شفت يوم زين فحياتي .. لالا شفت يوم شفت هنيد .. (كان يصيح شرا الياهل استصعب هالشي.. كل حياته كانت فخطر وفأي لحظة كان بيموت.. لكن يموت عن طريق مرض؟ مع انه امر الله مع انه ما توقع هالشي ..طلع من عند الدكتور بليا حاسية .. والدكتور كان يناديه عشان يكمل حواره .. بس هاكي ما حس بعمره الا وهو ماخذ الموتر .. وساير ماخذ موتره صوب ليوا .. عند استراحة البنات اللي لين الحينه ما نساها .. كان يالس والشمس ضاربة عليه ويتذكر مكان الحفرة اللي دوم يطيحون فيها..وكيف كان جبان ويبتسم مايدري بعمره اذا بيحيا ولا بيموت .. كان هايم .. اماهنود تأشر للدكتورة ..) الدكتورة : بنخليج هني يومين ..الضربة كانت قوية .. يعوّرج هالمكان؟ (وتهز راسها بالايجاب) شوفي حبيبتي انا بصارحج .. انتي مواطنة ما هيك ؟ (هنود انصدمت ) هنود فخاطرها : كيف عرفت ؟ انزين ابا اتكلم ما يستوي .. (هنود تترجاها ما تعلم حد ) الدكتورة : ليش يا حياتي؟ خلاص انا ما راح اتدخل .. بس راح أقلك .. فيه أدوية كنتي بتاخديها أثرت على جهازك العصبي.. ومن الممكن مش أكيد فيكي حالة صرع .. (وهنود قلبها يدق .. وتكتب عالورقة بعصبية " فسري لي زيادة بموت؟ ") لالالا اسم الله عليج .. شوفي حالة الصرع تيجي نتيجة الوراثه .. او من الله او من الأدوية .. وانتي حالتك من الأدوية ..كتييير أثرت على خلايا جسمك .. ومن غير الضربة اللي إجتك على ظهرك .. كسرت عصعصك .. (وهنود منصدمة ) مالها علاج الا برا .. بس بعطيكي مسكنات لظهرك .. يعني اذا جلّستي وفردتي ظهرك مرات راح توقعي لازم حدا يرفعك ..لأنك ما راح تقدري تحملي حالك .. هنود تصيح وفخاطؤها : يعّلج الزوال يا عنودوه يالبلوى العودة !! الدكتورة : ما تخافي حياتي .. راح أعطيكي كمان دوا للصرع ما تخافي من الاسم .. بس لازم تعلمي أهلك .. انو لو إجتك الحالة يتركوك لحالك .. لحد ما تخلص عنك الارتعاش انا بعطيكي تعليمات مشان ما تنصدمي بس هذا بيحصل نادرا هذا ازا ما أخدتي الدوا راح يصير فيك هيك انا حطيت لك دوا مشان ما تحسي بألم فظهرك .. نامي حبيبتي .. (هنود كتبت لها " شكرا " وروحت الدكتورة ) هنود فخاطرها : حسبي الله عليج .. انا طلعن فية كل هالأمراض ؟ صرع بعد ؟ والله الكلمة تجتل !! لو درا رشود ليجتلني .. (وتيلس اتدق ظهرها ) كسّر الله ظهرج ان شاء الله يالخايسة !! الا منوع وينه ؟ (وتتلثم عن اييها ) شكله سار يأدبها الملعونة .. ياربي كيف اتغيّر منوع !! طاعوا الدنيا كيف دوارة وصغيرة .. أحينه عادة يالدنيا تعلميني كيف يعيش منوع؟ وانا معرسة؟ وانا فذمة ريال ؟ هم والله هم .. منوع ودرني عشان ربيعتي واللي سمعه عن الحادثة وحزتها اتعرفت على رشود .. (وتبتسم وتتنهد بصعوبة ) رشود !! (شافت التيلفون حذالها الا تتصل به لين الحينه حافظة رقمه .. صح ..) أمووووت ع ترابك ليش سويت بي جذيه؟ ما تباني؟ حزتها صدق بعرف اذا تحبني ولا لأ .. (وتضرب الرقم وهي زايغة ..) راشد : مرحب.... (وقلبها يفز وحطت ايدها على قلبها ..) ألو؟ ألووو؟ (من الزياغ سيده بندت فويهه تمت تشوف صورته فتفكيرها وتبتسم وتتفداه ..) (مي كانت كاشخه من الخاطر راسمه عينها بالجحال الأسود تقلد هنود .. وجلوس وردي ولابسة بنطلون بربري بس ياي على بيبي وردي ضيق من فوق ووسيع عالآخر وقميص كات من نفس الماركة عالوردي ومسوية ذيل حصان وعليها ربطة بربري حتى القصة نازلة .. حتى النعال اكرمتوا مفصل على اللي تباه بس فيه لمعه وكعب بعد .. كانت تلفت وشافوها وايد ناس اتخبلوا .. وهي الخقة متلبستنها لبس مب ياي شي في عينها ..) واحد : مب انتي اللي في الفيديوكليب ؟ ( وهي وقفت وصدت صوبه مبتسمة بغصب ) مي : هيه .. (مب عايبنها الوضع انه يوقفونها ) واحد أسميج قطعه.. عادي أتصور وياج ؟ مي : أكيد يا عيوني .. واحد : انا بس بدخل الجات مال القناة عشانج .. مي : تسلم يا عيوني ..(وكم من بنية لاحظوها واتصوروا وياها من غير اللي ياها من المغازل .. كانت ساكتة زيادة عن اللزوم .. (ووصلت صوب ستارباكس بس ما اتجدمت ..خافت وقفت ورا السنطوانة ..) مي فخاطرها : اخافه خسف !!! اخاف حد يصورنا ويا بعض .. احينه استويت معروفة .. اخافه مريض نفسي .. ياربي شكلي عجيت عمري فورطة ..(وكانت واقفة وتشوف واحد ازجرت داش .. الكندورة البيضاء والعقال والسفرة رادنها على فوق والسماعه متدلية ما تبيّن وايد من جماله مقطّع عيون البنات اللي يطوف جداهن مستحيل ما تلتفت له اي بنية..) مي : وااي ..وااي .. وااي .. وااي .. واااي .. ياهي كشخه !! ياهو جلب حالي !! ياهو غرشووووووووب وااااي يا قلبي .. حد قالك يا حلو انك طرررررر 700 مرة !! واي شليت قلبي .. (وهي تطالعه ومب رايمة تشل عيونها عنه وحاطة ايدها على قلبها ) ياربي بلاه قلبي وابوييييه ليش يدق جذه ؟ أعوذبالله .. زياغ ولا فرحة ؟ أحس ريلي ما تشلني من شفته !! (ويصيح تيلفونها وهي متأذية ) شو تبا؟ سعيد : أحينه انا شو أبا؟ اباج انتي (وهي تطالع هاكي اللي انشّل تفكيرها منه ) عواس: السلام عليكم .. سعيد : عليكم السلام ورحمة الله وبركاته (ويرمس عالخفيف ) بتصل بعد شوي من توصلين علميني .. عواس: بلاك؟ أحس شرا اللي منحرج من شي ؟ سعيد : انا؟ لا ماشي خبرني شو هو الشي الضروري اللي تبا تعلمني .. عواس :ياخي انا متلوّم منك .. بس بعد لا تلومني ولا تنصدم مني .. سعيد : خير ؟ عواس : تتذكر سالفة المذيعه اللي قلت لي عنها ؟ سعيد : هيييه زيغتني حسبي الله على ابليسك .. انا قلت شي جايد مستوي .. عيل انا عندي لك علوم .. عواس: خلني اقولك اللي فخاطري .. سعيد : خلاص قول .. عواس : مي فاضل تكون أختي من الأبو .. سعيد قام من مكانه : إشووووه ؟ (وكلهم يطالعونه .. حتى مي من بعيد ..) عواس: هيّد سعّود !! بلاك ؟ سعيد : انته اتخبلت ؟ أكيد هب صاحي !! عواس: عيّن من الله خير وايلس العرب يطالعونا .. سعيد يلس وشرب ماي وكان عرقان متوتر : مب مستوعب كيف غدت أختك بين يوم وليلة؟ عواس : من زمان أختيه بس مارمت أعلمك مالي ويه .. سعيد منصدم ومحمر ويهه : وأحينه اتعلمني حضرتك ؟ عواس : لأني انصدمت من كلامك .. انك انعجبت ومادري اشوووه .. سعيد : ليش بعد فترة اتخبرني عنها ؟ شو اللي طرا على بالك؟ عواس: انته تباها ؟ سعيد بحماس: الا بخطبها مب بس اباها .. وياحظي جانها اختك بعد !! عواس: من صدقك ؟ سعيد : انا ما يهمني في البنية جمالها .. انا من شفتها قلت هذي البنت من نصيبي !! (وحزتها كأنه هم وانزاح عن الثنينه ..) عواس: عيل ما بتمانع يوم بتدري انها استوت أغوا عن قبل.. هو الشي ما ياز لنا بس أمر الله سعيد : ما فهمت ..عواس: ردت تظهر عالتلفزيون .. سعيد : انته بس شاورها عالخطبة وخل الباجي عليّة عواس : المشكلة ابا احطك في الصورة مب قادر .. سعيد : كيف يعني ؟ عواس: أختيه سوّت عملية تجميل وغيّرت نفسها وغدت نفس اختيه الصغيرة هند .. (هذاكي انصدم وقام قلبه يدق ) سعيد : ك.. ك.. كيف يعني؟ سوّت عملية تجميل؟ وغدت أختك ؟ (وبعصبية) ياخي فهمني .. طلعت لي نخلة فراسي .. عواس: مي طول عمرها الناس يعايرونها ببنت العراقية وانها خسفة .. وما تشبهنا .. ومن حصلت البيزات فإيدها الا وتغيّر من شكلها بدون ما ندري .. خشمها غير .. ثمها غير .. عيونها غير ..عجت العباة والشيلة واستوت حاسر هذا مووول ما اييوز لنا .. هاي مب بنتنا .. بس لسانها هو نفسه ما اتغيّر.. بس نظرتها للحياة تغيرت اختلفت قامت تتعالى وتخق ظهرت في فيديوكليب بغينا نموت حزتها .. انا وميود سرنا نبا نلعن ابو خيرها وطردتنا ولسانها على ذراعها .. سعيد : يالله سترك .. جني أطالع مسلسل.. عواس: وبعدك تباها؟ سعيد: انته توكّل ويصير خير .. (ويوم قام عواس ..) عواس: اليوم ملجة ميود ما بتحضر؟ سعيد: استسمح منه انا عندي شغلة ضرورية ابا اخلصها ويا ريال .. عواس: على خير ان شاء الله .. (وروّح وهو تم مكانه يستجمع افكاره ) مي: واااابووووييييه عواس هنيييه؟ لا ويا الغرشوووب .. الله يستر ما يشوفني ومب ويايه الحراس .. ..لا شكله مروّح ..أمييييه قلبي كيف يدق .. هذا بلاه اتأخر ؟ (وسيده يصيح تيلفونها ..) اعنبوا ما بغيت انا مروّحة تراني .. سعيد : بترياج تحت في الباركينج ال في آي بي بعد 5 دقايق ........................ سعيد فخاطره : أحينه بشوف يا انا يا انتي .. انتي تلعبين بي ؟ براويج سعيد منوه .. مي : أوكي .. (وبندت فويهه ) اووووووف !! وين ساير يا غرشوووب .. طلعت ربيع عواس عيل .. أحسن بعد .. شكلي بعطي سعيد كلام مثل السم والحينه بعد .. عشان يعوفني ..(وما تدري باللي بييها ..) سعيد : هاااه؟ شفتي الموتر ؟ مي: أي؟ سعيد : الأرمادا الفضية رقم أحادي .. مي: هيييه هاكي انزين انزل .. مي فخاطرها : والخيبة أحادي بعد ؟ شيوخ لالالا شكله مطارزي .. (وتمشي صوب الموتر وهو بطل الباب بس ما نزل عج الغترة والعقال وتم بالجحفية ونازل وفإيده شي ..هو يطالعها معصب وهي سايرة جداه منزلة راسها بس فنفس الوقت من حطت عينها فعينه تمت منصدمة مكانها فنص الشارع مب رايمة تعبره وتكمل .. وهو يطالع ملامحها اللي واييد اتغيرن .. بس ما أثرت فيه .. وموتر ياي مسرع وضرب لها هرنات عشان اتحرك وهي مب حاسة غير ريولها اتخونها مب رايمة توقف ويربع لها بليا حاسية ويسحبها مسرع عن تشلها السيارة .. حسّت بإيده صاكه على ذراعها بالقو .. وسيده يلست عالارض ويفلتها .. بس هي انفضه جاستها ..) سعيد معصب : انتي !! انتي مينونة؟ مي: وانته سعيد صح؟ (وهو قلبه يدق من سمعها تنطق باسمه يطالعها عالطبيعه وااايد غير وهي مب مصدقة اللي في الكوفي شوب الغرشوب هذا .. ) سعيد غيّر العصبية لين الابتسامة : هذي انتي ؟ مي: ما اتوقعت انته ؟ انته اللي اتكلمني ؟ سعيد : وانتي صدقتي ؟ (وكانت منصدمة ) انا الا اقص عليج مثلي مثل غيري !! قصدي مثلج انتي .. مي: ما فهمت فشو قصيت عليك ؟ قول لي ..(وهي حسّت انها ما تبا تخسره ) قول ..سعيد ينزل عالارض ويوصل عند ويهها هي تمت ما تروم تتنصخ زايغه : مب انتي اللي تعلّين صوتج علية !! اقطعي !! (وسكتت ) كلمتج وقلت لج اباج وبيي لين بيتكم وباخذج صدقيني حتى ابويه اتحديته عشانج .. وآخر شي تبدلين خلقة ربج ؟ بتطيحين في النار .. يامكثرهن ذنوبج !! مي: انته ليش معصب؟ ما تباني أغدي حلوة ؟ انا كنت عبرة ولا حد يلتفت جدايه اما الحين.. سعيد : تبين الشباب يلتفتون صوبج ؟ (ويصارخ) انا مب سادّنج ؟ مي تصيح : انا شدراني حزتها انك تباني ؟ اقرا الافكار انا؟ ومن غير قلتها بنفسك تقص علية !! سعيد مسكها من فجها : قلت لج لا تعلّين صوتج !! فهمتي ؟ انا اللي عمري ما فكرت في بنية ولا صديت صوب أي بنية .. ويوم اتخيّرتج اصلا قلبي ما يبا غير مي .. (وهم يطالعون بعض .. يبون بعض ..) بس مب مي اللي أشوفها الحينه صدقيني طحتي من عيني .. تشوفين شو هذا ؟ هذا خاتم اللي كان بيربطني فيج .. (وعيونه محمرات ) كنت أباج تلبسينه وانا اللي ألبسج اياه .. لكن هااااه !! (ويفر الكيسة عالارض ويدوسها بغصة يدوسها ) هاااه !! شفتي ؟ كل شي راح !! الله لا يرّد اليوم اللي طلبت فيه اني آخذج !! مي تصيح وتمسك ايده : سعيد دخيلك .. انا احينه اترجاك .. (والجحال سال بس ما همها ) والله اني فعمري ما شفتك واحينه يوم قلبي خفق .. اتعلق فيك اول ما شفتك يالس ويا اخويه والله اتعلق .. بتهدني من اول يوم ؟ انا كنت اكلمك وانا واثقة اكيد انك شفتني بعد العملية عشان جذيه دقيت علية !! سعيد يضرب بإيده على جامة موتره : انتي شوه؟ كل شي جمال وجمال؟ شو يعني لو ما كنتي حلوة ؟ انتي ملكة جمال بنظري قبل ما تسوين العملية !! (ويصارخ ) والله اباج تعرفين شو يعني اباج؟ (ويدق على قلبه بالقو ) تشوفين هالقلب؟ والله لأجلعه لج جان تبينه بس احينه عقب اللي شفته مستحيل تردين مي اللي انا اعرفها .. مي تصيح نادمة : شو يعني الانسان ما يخطي ؟ انته صلحني برايه انا راضية يا سعيد !! سعيد :ومنو طلب شورج اصلا؟ انا الشيخ سعيد غصبن عن خشمج وخشم اللي يابوج .. كنتي تستهينين فية وتبندين فويهي أحينه اقولج كملي منكرج !! ومحد بيوّدج !! مي قامت ومسكته من ذراعه عشان ما يركب الموتر : دخيلك .. سعيد تباني ؟ برد أسوي عملية وبرد ويهي القبلي .. سعيد يضحك بغصب : ضحكتيني !! جيه هو فيلم ؟ قناع وقناع؟ عيبتج السالفه يلعبون بويهد ويقصصونه ؟ هدّيني !! الله لا يراويج يوم زين فحياتج !! ما ينلام أخوج !! صدق فارطة !! (وهو ركب الموتر موّدرنها عالارض بغا يشغّل الموتر ما قدر وهي تمت يالسة ويائسة تصيح .. وهو دق براسه عالسكّان..) مي تصيح : والله ما دري .. والله عمري ما عشقت حد واليوم يوم يدق قلبي لهالآدمي .. اللي يحبني عشان ويهي الخسف وتضرب ويهها كم من كف (شلّت الكيس اللي فيها لخاتم وسارت لموترها .. تحاول تتصل به بس هو بعده كان في الباركينج الضغط عنده مرتفع واايد وما يقدر يسوق .. والنفضة جايستنه بزيادة .. اما فبيت شمسة في الميلس كان حمد ومايد والمليج والرياييل كلهم وعواس وصلهم متأخر بعد ما اتحرطم عليه ميود لين الله ذله ..) (اما فبيت شمسة .. كان ميود كاشخ مسوية لحيته بالقفل ولابس الكندورة الكركمية و متعصم ويايبنها على ينب وراشد الصغير ملبّس العقال والسفرة جنه هو المعرس بس مصغر .. اما عند الحريم اول شي هنوه قافلين عليها فحجرة البشكارة .. اما فطيم ويا شمايل فوق اتزهبها .. اما العيايز تحت ويا شمسمة في الصالة ) شمايل تنتفض : انا زايغه .. فطيم : من شو ؟ من ميوطي ؟ الله يهديج .. شمايل: من الملجه .. فطيم : برايه يوم ما تبينه اخلعيه !! شمايل تضربها ع راسها : اييييه ريلي ما أرضى !! أصلا ماروم أخلعه ولا بروحه بيخلع راسي .. فطيم تضحك : يالمكارة قولي تبينه .. شمايل: هيه اباه ريلي ابوعيالي وحبيبي .. تغارين؟ (وحزتها روحها استحت من كلامها ..) فطيم : أبووو أبووووو!! الصراحة ؟ أغار بس لأنج لابسة أبيض .. (كانت لابسة تنورة بيضة راصه تبيّن ملامح جسمها وقميص فيه قصات من جدام وعلى الينبين زم والدانتيل المرصع بالكريستال الألوان كله عالاكمام لين كوعها .. وحلج القميص رقم 7 بس وسيع وايد .. كانت أنيقه ولابسة كعب لأول مرة ماتروم تمشي به ..وراسمين عينها بالآي شادوه الأسود والفضي اما الروج الاحمر الناري .. ناشلة شعرها على ينب وقصّتها بعد على ينب .. وشمسة تناديها عشان تنزل لانهم ملجوا .. وهي نازلة وحذالها فطيم اللي كانت لابسة تركوازي ..بس ظاهرة شمايل العروس ..) ميثاء : بسم الله عليها حصّنت عليها بالله وملائكته .. شما : الله يحفظها في صورة .. (وهي نازلة بالدري .. واتخرطفت بالنعال زين ما انجلبت بس اتلاحقت عليها فطيم ومسكتها ..) نشبة : هاااه هاااه هاااه !! وابويييه الله سلّم البنية زين ما اتكسرت !! محد غير عين شموه !! شمايل تصاصر فطيم : قلبي كان بيطيح .. (وتتنهد بصعوبة ) فطيم : برايه ميود بيشله .. فصخي نعالج عن اتخرطفين.. (وسلمت عليهم كلهم .. ويسمعون صوت نشبة وهي تيّبب ..) نشبة : ألف الصلاة والسلام عليك يا حبيب الله محمد .. شمسة تسلم على بنتها : مبروووك يا غناتي .. شمايل: الله يبارك فحياتج .. شمسه تطالع شمايل وفخاطرها : ماشي غير أخبره بعد ما يروحون .. ما يستوي البنية منخشة وحضرته ما يسوي شي بالسالفة .. لازم أحل المشكلة ... |
.................................................. .............. |
........................................... |
يسلمووووووووووو حبووووووووبه عالباااااارت |
كرهتها هاي ام شمايل........... تبا غصب ادبس هنووه فعواس المسكين!!!!!!!! و هاي مي السبالة تستاهل الي ياها من سعيد تسلمين عليا و نترياج |
تسلم يمناج الغاليه على البارت |
روووووووووووووووووووووووووووووووووووووووووعه البارت |
الصاارحه رووعه هالباارت غمضتنيييه مي والله اول مره وهنوود حليلها دووم حالها جييه ماايتعدل مبروك ع شملوووه وميووط نتريا الباارت الجااي علااياا تسلمييين فدييتج |
روووووووووووووووووووووووووووووووووووووووووعه البارت .. |
هاي ام شمايل اللي من امثالها حرام يكونن ام الا ادبس عوااس فهنوووه الجلبه ان شاء الله عوااس ما ياخذ غير فطوووم |
تسلمين ختيه ع البارت الحلو.. اختج شيوخيه بطبعي... |
مب روعه الا روعتييييييييييين |
نسلمين الشيخه على البارت بانتطار التكمله |
مرحبا علايه وينج تاخرتي علينا |
مرحبآآ علآآآيهـِ .. وينج تأخرتي علينآآ .. بليز نزليهــآآ بأسرع وكت .. ^^ والسموحهـِ .. |
روووووووووووووووعه الباااااااااااااااااااااااااااارت ^^ ف انتظار التكملة |
بـلـييييييييييييييييييييز كمـــلييييييييييييييييييي .. :( |
تسلمين الغلا ع البارت نتريا البارت الياي |
ف انتظااااارج علاااااااااااااااااااااية ^^ |
(الجزء 103 ) شمسة تدخل الميلس لأنه من تعشوا الرياييل روحوا : بالبركة بالبركة يا بويه .. (وتسلم على ميود وأبوها ..) مايد يحبها ع راسها : الله يبارك فحياتج عقبالج خالوه .. (وهي تضحك تضربه ) شمسة تشتت تفكيرها : وين عواس؟ مايد : سار المركز عنده شغله .. ويبا يخلينا ع راحتنا .. شمسة : هيه .. زين زين .. (وفاشت خطتها بإنها تكلمه لأنه طلع ) اليد حمد : بلاج؟ مب طبيعية .. شمسوه؟ شي فيج؟ شمسة : لا يابويه ما فية شي جني البخت .. مايد : عادي أدخل خالوه ؟ شمسة : هيه .. احدر احدر !! (وتزاعج ) المعرس بيحدر .. (واصلا ما ذرفت دمعه على شمايل .. ولا اهتزت شعره من ينبها ..) مايد : محمر ويهه : احم .. احم .. هود !! هود !! رشود : هدا هدا اقرب مايد رفع حيّاته مستغرب : هذا ما وحاله ذار عند العروس ؟ (ودخل .. وكانت شمايل مستحية وويهها محمر .. ما تروم ترفع راسها من الأرض ..) شمايل فخاطرها : وااااي ياا ميووود قلبي بيطلع !! قلبي بيطلع !! (ميود ما سوا كاني ولا ماني سيده جابلها وبدال ما يحبها ع راسها سحب ايدها وسلم عليها باليد .. تمّن العيايز يضحكن عليه ..) نشبة : حرمتك هاي حرمتك حلالك .. جان حبيتها ع راسك اتبارك .. مايد : محد علمني .. صبروا عيل ..(ويوم توّة بيتقرب بيحبها ع راسها ابتعدت عنه شمايل منحرجة اصلا كان هو مستحي ) نشبة : فرصة وفوّتتها .. خلها لين العرس ..ههههههههههههههه (وقامن العيايز بيسلمن على مايد ) ميثاء تصيح وتسلم عليه : مبرووووك يابويه منك المال ومنها العيال .. مايد : 22 بإذن الله (شمايل صدت صوبه بزياغ ) هيييه شو ؟ ليش تطالعيني جذه ؟ حرمتي حلالي عندج مانع؟ نشبة : مبروووك بوطبير … (ورشود يالس عالغنفة ويرافس من الضحك عالكلمة وردت نشبه تسلم على شمايل ..) مايد : بس ! بس من التحبيب !! كم من مرة تسلمين ؟ بس !!عنبوا شو خليتي حقي؟ نشبة : شعليك؟ نص العبالة على هالولد شمايل: خلها يا مايد مايد :داير لي العز اليوم يقولون لي مايد .. فديته انا .. عروس ولا ملاك؟ شمايل : عيب شو هالكلام ؟ (ويرّص على ايدها ) مايد يصاصرها : حرمتي واخيرا حرمتي .. لا تمنعيني بغازلج كيفي … أقولج شي؟ شمايل منزلة راسها ووايد مستحية منه الا طايرة من الفرحة بس ماسكنها عن اتطير عنه : آمرني .. مايد : طلّج على بعضج قلبج روحج .. عيونج .. غدن مالي ومن حقي .. شمايل تبتسم : أكيد .. مايد : ليش ما تنطقين بلاج ؟ شمايل منحرجة : ماشي .. مايد : أدريبج تستحين .. بس أقولج شي وما تزعلين ؟ شمايل تطالعه : شوه ؟ مايد : آآخ يا عيونج!! أحينه بغدي بن عدوان !! نشبة تكلم العيايز : ياختيه هالولد متطيفس .. طاعيه .. ماشل عينه من عين حرمته !! ميثاء : اعنبوا .. المدحوبة !! تراهم عرسوا خلاص !! تبينها اتغشى عنه ؟ شما : الله يحفظها في صورة .. امبونها اتوّزع الدحاب .. نشبة : خلّج عاد انتي ام القلاصات .. مايد تطالع مايد : الله يغفر لها يرحمها كان ودها تشوف ولدها معرس ..(وعيونها تدمع ) الله يرحمج يا غريبة .. رشود : منو غريبة ؟ ميثاء : أميه .. أميه غريبة .. رشود : بس أمج نشبة .. نشبة تنفض كندورتها : لالالالا حشا علية !! الله أكبر عليك اتكبرني وانا بعدني صغيرونة ؟ يابويه ميثوه اكبر عنا !! (وتتصدد ) الا فطموه وينها ؟ ميثاء : مادري وين سارت يمكن تلبس وقابتها .. (ودخلوهم الميلس عشان ياخذون راحتهم ) مايد يطالعها : غناتي ؟ شمايل: همممم؟ مايد : بقولج شي حاز فيّة لاني أخافج .. شمايل زاغت : بلاك؟ فيك شي ؟ مايد : انتي لابسة طبجه نعالج بيضا والثانية سودا.. شمايل سيده قفطت وتطالع نعالها واحمر ويهها ماتعرف وين تضرب براسها : اصلا انا متعمدة ألبس جذيه .. (وتتحرطم داخلها ) تراه الموضه هالايام طبجتين مختلفات المصمم قاللي .. مايد حمق واحمر ويهه : عنلات صيره !! عند ريال تصممين؟ تلتعن الطبجه مب قايلج ريال ما يقايس عليج!! شمايل : هد !! هد الوضع .. انا ما اسوي عند رياييل .. مايد : توّج تقولين طبجة نعالج .. شمايل : من الفشلة بدال ما أجحلها عميتها .. لابسه طبجه غلط .. (وتفصخ نعالها ) ارتحت ؟ مايد يضحك : جان قلتي عادي انزين اتفشّلين من ريلج ؟ أبو 22 من عيالج ؟ شمايل : اتكلم جد ؟ ماروم 22 منو بيربيهم ؟ مايد : شو خاننا نحن ؟ شمايل : لا يابويه مابا احمل اخافني امتن ولا يترهل جسمي وبتعرس علية !! مايد يطالعها : لو توصلين ال 200 أباج .. انا علية باللي داخل مب الشكل !! شمايل تصاصره : مايد ؟ مايد: قلبه .. شمايل: ماحبك !! مايد ضحك : بس انا احبج !! شمايل تضحك : انته افهمها العكس لأني ما بعترف .. مايد : خلاص اوكي اهم شي ما تفجين عني .. أمووووت فيج .. (رشود يبطل الباب هم نقزوا من سمعوا رضة الباب بالقو ويعج الغترة والعقال ) رشود :بس .. مايد : نجّف حمدون !! جيه عجيتها ؟ رشود : حرّيت !! (ونشبة داخلة عليها ) نشبة : يالله قوموا عشاء (وفرشوا لهم وتعشوا العيايز وياهم .. وشمايل تأكل مايد بإيدها وهاكي مستانس ) مايد : الله الله !! شو هالأكل الزين ؟ نشبة : أخيييج أخيييج يا مذهبكم الخايس !! تطعمك بعد ؟ ياهل نونو انته ؟ مايد يضحك : برايه .. شكلج تغارين !! (يعج حمدانيته ويلقّم عشان يأكل نشبة ) بطلي حلجج عموه !! نشبة : مابا غصب مابا !! (وشمايل تضحك هي وشما ) مايد قام وسار جهة نشبة : والله تبطلين حلجج نشبة نشت له نشة : هب مبطلة غصب هو !!!! مايد اتغيرت نظرته : عمووه لا تتحركين !! (وهن كلهن زاغن من هالكلمة ) نشبة زاغت : بلاك ؟ مايد : طيطار ع جتفج .. صبري خليني أنفضه (كلهن ودرن الأكل وقامن يريوسن على ورا ..) نشبة زاغت وقامت اتصارخ : آآآي !! (وسيده حط اللقمة فحلجها .. حليلها شرقت باللقمة .. وقامت تسعل وهو ميت من الضحك ..) مايد : صادووووه !! هههههههههههههههههههههه شما : دحها على ظهرها ! دحها !! (وهي تسعل بقوة ) مايد قام يدحها : عموه انتي بخير ؟ (وهي تبا تقول حسبي اللع عليك بس مب رايمة اللقمة تمت فحلجها لا انها داخلة ولا انها طالعه ..) شما : غناتي .. طيحي وارفعي ريولج فوق أجبيهن على اليدار .. انا سامعه زين جذيه .. اسدحها اسدحها ميود !! (وهي مب طايعه يدقها ميود .. كان ميّود عمره ما يبا يضحك ) مايد: شمايل ساعديها .. شمايل: انته ما اتوب عن سوالفك .. (وسدحوها ..ورفعوا رويلاتها فوق ومأجبينها على اليدار ) شما : هاااه نشيبة ؟ طاحت اللقمة ولا بعدها ؟ رشود طالع من المطبخ : ههههههه عموه نشيبة تسوي رياضه !! (وهي تأشر بصبعها متحلفتله ..وميثاء ورا راشد ..) ميثاء : ههههههههههه شو ها وقت الروبيكس (الايروبكس ) في الليل ؟ شما : هذا كله من ميود !! عج فوادنا!! (مايد سحب شمايل وبشويش ساروا الميلس.. ) (اما عند هزاع فحجرته ويا الشيبة ) هزاع يعج كندورته واييب الكرسي المتحرك : يابويه بتتأذى انا اتجلب في الليل خلني ارقد عالغنفه او اسير حجرة ثانية .. الشيبة أحمد : لا بويه انا متعوّد عالرفجة .. من وين يبت الكرسي؟ هزاع: مال أبويه الله يرحمه .. محد يستعمله .. الشيبة طايح عالشبرية : هزاع؟ أمك تدري؟ هزاع: لا ما تدري ببلاوي بنتها .. من يومين ماخذة البشكارة والدريول وتبات في العزبة .. الشيبة : شعنه ؟ هزاع : بتنظف المكان وتبا ترتاح من حشرتنا .. انا كل يوم أسير ألعوزها وأيي .. عادة اليوم هي لاهيه وراها ملجة .. الشيبة : انا مااعرف أرقد بدون هالبنية .. فطيم .. دومها تحت نظريّه هزاع سيده خفق قلبه : فطيم ؟ فطيم منو ؟ الشيبة : البنية اللي كانت ويايه .. والله تولهت عليها أصلا اتعودت عليها .. لازم جدام عيني .. راغتها اختك من حجرتها وخلتها ترقد عندي في الحجرة .. حليلها قامت بي .. وخمّت حجرتي اللي من سنين محد جاسها .. كانت وصخة وخايسة حتى الفيران والطياطير غدوا ربعي .. لين يت هالبنية وغيّرت كل شي .. واتعاقبت على اللي سوّته وهي مالها ذنب .. هزاع: شو أصلها هالبنية ؟ الشيبة زاغ : هااه.؟ اندونيسية .. هزاع: أبويه الله يطولي بعمرك انا مرمس منوع .. الدكتور مارام يظهرها لين يعالجها قبل ترا قالوا فيها الصرع .. لازم تتعالج منه .. وانا باجر بإذن الله روحي بوّديك لها .. الشيبة : انزين سوّلهم طالعهم عشّوها ولا بعدهم ؟ انزين نشّت؟ ومنو وياها يحاضيها ؟ هزاع: هاي شكلها عزيزة على قلبك .. الشيبة : هاي بنتي اللي ما يبتها .. لو يبت بنية ما كانت بتحّن علية جذه !! هزاع : عيّن من الله خير .. واسترح انته من ييت وانته تحاتي ... اوووه نسيت أراويك شي .. شوف .. (ويظّهر الاوراق من السدّة اللي حذاله ) هذا التوكيل .. والشركة والبيزات والحلال كله والأراضي والعقارات اللي فبوظبي .. كلهن ردن باسمك .. الشيبة : مشكوور يابويه بس عقب شوه ؟ عقب ما لعبوا لعبتهم ؟ انا ما اهتم أحينه .. يوم ولديّه ما اهتم فأبوه اتهقى بيهتم اذا ياب عيال ولا لأ؟ أكيد لا .. أهم شي رضا حرمته عليه .. حتى لو كانت غلطانة .. انا ما أشّوه سمعة أختك بس اللي جسناه منها ولا آدمي بيتحمله .. هزاع : هاي حيوانة !! مابتعرف غلطها لين يستوي فيها شي يهدّها !! (اما بعد ساعه كان عيسى واقف عند بيت سارة ..) عواس :أدري انج داخل فتحي الباب .. دخيلج .. انا آسف والله آسف .. (وهي تسمعه ومطنشه .. وقلبها يدق بطريقه مب طبيعيه .. واتحس بالخطر ياينها .. وتطالع عمرها بالمنظرة تلهي عمرها .. حشا حفرت ويهها هالهنوه مب تشرميخه هذي .. كان هو يدق الباب وهي مسوتله طاف .. خذ وقت وايد لين هدا الدق وبعد ربع ساعه .. جان هي تسير تبطل الباب بشويش .. على طول صد جداها .. هي زاغت .. لأنه يالس على عتبة بابها .. كان كاشخ ..عشان ملجة ميود .. وهي تطالعه منخطفه بشكله .. جان تبتسم ناسيه عمرها .. هو سيده قام .. بس انعقدن حيّاته .. حط ايده على خدها كانت اول مرة ولا اراديا ..) عواس: منو مشرمخنج؟ سارة ردت على ورا وتبتسم : قطة.. عواس ما فهم : قطة؟ شو قطة؟ سارة : قطوة !! كات كات !! عواس: هاااه !! انتي ما اتوبين يوم اقولج لا تربّين قطاو .. سارة : حصل خير .. never mind عواس : يننتي بي تراج .. سارة : سوري .. عواس: بلاج ؟ أول مرة اطالعيني؟ (كانت اتأشر عالخزام اللي لابسنه على حمدانيته ) هههههه هذا .. هذا خزام .. سارة : تعرف انك your very handsome عواس احمر ويهه ويطالع كندورته ويطالعها : اتعرفين انج خسفه سارة تبتسم : أعرف .. I'm not suitable عواس : ياحمارة بجتلج ان طريتي هالشي .. (مسك ايدها ...وغريبة انها خلته ) أشوا زين ما ياني طراق .. يعني راضية ؟ شارة : مابعرف .. بس من بطلت الباب كل اللي بنيته انهّد !! عواس: سارة ؟ سارة :نعم ؟ عواس: سامحيني والله هب قصدي مادري ليش حسيت عمري أتصرف شرا اليهال .. لا تتخيلين فيوم من الأيام بأذيج .. مستحيل أجرح شعورج.. (وهي بس تطالعه بدون كلام ) ممكن أدخل داخل ؟ (سارة سيده زاغت واتذكرت كلام هناء يوم تقوللها بيقص عليها .. تمت متحذرة ) سارة : الجو حلو برا ..(هو حس انها متوترة .. بس ما يبا يحرجها ..) عواس: ساروه !! سارة : انا اسمي سارة .. عواس: ساروه !! فهمتي ؟ (ويمارج لها ) محد ايمشي كلامه علية .. سارة : مو بكيفك .. عواس يضحك : لا بكيفي .. سيري بدلي ثيابج بظهرج .. سارة : لا ما اقدر نص الليل .. عواس: هذا وأهلج ومب وياج اتروّعين جذه .. والله لو بنية غيرج جان طلعت ديسكو ما ديسكو دوامها .. سارة : اووووه نوووووو!! You know that I don't like 2 go 2 these places عواس: لا والله أول مرة أعرف .. ما كد سرتي ؟ سارة : رحت مرة لما كان عمري 17 سنة .. عواس منصدم : ورقصتي ؟ سارة : كيف أرقص وانا ما عندي صديق ؟ اصلا ما احب الأجواء الصاخبة أحس أذوني بتنفجر منكثر الموسيقى العالية .. عواس : انتي بعد نمونه .. غير عن الباجين .. سيري .. سيري اتلبسي .. سارة : I can't this is midnight I'm tired عواس: ماشي تايرد ولا غيره انف !! سارة : خشم ؟ شوه؟ عواس يضحك : مب خشم !! هههههههههههه معناتها عيب عليج !! سيري قبل ما اخطفج !! سيري يالله ... سارة : آخر مرة .. عواس: لا والله بكيفج؟ سيري !! انا بترياج هنه !! (وهي تربع لحجرتها مستانسه .. تعج وتلبس . ) سارة فخاطرها : أحبه حيل .. أحبه .. بدا يحس فيني !! صدق حسيت صادق بكلامه .. (ومال بسرعه لبست كاجوال مستقصدة .. جينز سكيني أسود وفانيله بنفسجيه طويلة لين الركبة ومكتوب عليها بالكريستال الذهبي DARE ولابسه نعال خفيف جريب من النايلون بنفسجي فاقع .. كان يبرز بياض ريلها .. وكان غريب شكله .. ويوم طلعت ..) سارة : سوري اتأخرت عل ... (ما كملت كلامها .. لأنها اتدوره وما حصلته .. ظهرت برع دوّرته في الحديقه .. محد يلست عالزرع .. منقهره ..) I'm stupid ليش صدقته .. ليش !! I'm naïve 2 believe him (وتطيح ع الزرع وتغمض عينها ما تبا تصيح ..) عواس: لا مب سخيفه.. (صخت وصدت فوق .. انه واقف وينزل لمستواها ..) كنتي تصيحين ؟ تتحريني ودرتج ؟ وسرت عنج ؟ تراني دخلت عالمج وما أظن بطلع منه .. الا ماخذنج خطيفه !! |
تسلمين حيااتي وربي يعطيج العاافيه،،،نترياا التكملة ^^ |
يسلموو نتريا التكملة |
تسلمن ختيه ع البارت الحلو.. اختج شيوخيه بطبعي... |
{ تسلمن ختيه ع البارت الحلو .. |
تسلم يمناج على البارت الحلو |
thanx 3alya :861: ntraya eltakmela |
تسلمين الغاليه على البارت ونتريا التكمله |
بنتظار البارت |
تسلم يمناج ع الكتابهـ حبووبه.. عندي سؤال صغنوون انتي كاتبهـ الروايه..^^؟؟ |
عليووه وينج؟؟ >.< انتي كاتبهـ هالروايه؟؟ |
هيييه نعم انا كاتبة الروايه .. والسموحة منكم على الأحد ان شاء الله بينزل البارت لأني ببات في المزرعة .. عاد ادعووا لي اييني الالهام واكتب لكم بارت عدل وشامل عن كل حد منهم .. واستفتاء بسيط ترضووون انه مي تحب سعيد وشو رايكم باللي سواه سعيد بها؟ وتبونه يرد لها ولا؟ |
هلا والله خيتو الصراحه انا ما ارضى سعيد يحب مي ولا يرد لها واللي سوااه فيها تستاهله وزووود بعد واتمنى ما تجمعهم القصه مع بعض ،، عاند ابووه بسبت الوصخه مي وشي ثاني عواااس ما ياخذ هنوووه الجلبه وتظهر شمسووه على حقيقتها |
الي سواه سعيد يزا ميووه السبالة......تستاهل زيادة بعد!!!!!!!! و طبعن ما يرد لها........ليش يذل عمره عسبت ميوووه!!!!!!! نترياج الاحد |
الصاارحه انا غمضتني ميووه بس في نفس الوقت تستااهل الجلبه وحليلها انصفي هنووده مسكيييينه ان شاء الله تكتبين باارت غااوي مااشاء الله عليج ابدعتي بالباارتاات نتريااج حبووبه |
ثااااااااااااااااااااااااااااااااااانكس |
ما عليج زوود غنااتـيـ ـه تسلم يمنااج ع الكتاابه الرؤوعهـ . . . . . انا عااد ميووه غمضتنيـ ه وبعد تستااهل الي سواه فيها سعيد بس انا الصراحه ما ابي تكون ميووه احسن من هنووده وحليلهاا الي تعذب وشقت آآخر شي هاي ميووه تكون احسن منهاا.. والله انج ابداع× ابدااع >>ما شاء الله عليج.. \ / \ / لا تحرمناا من ابداعاتج ..لا هنتي ولا هان منطوقج^^ |
تسلمين الغلا ع البارت الغاوي ونتريا البارت الياي |
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟ |
وين البارت |
الغاليه وينج اليوم الاحد وما نزلتي البارت يالسين نترياج |
| الساعة الآن 12:57 AM |
Powered by vBulletin® Copyright ©2000 - 2026, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir