|
وهذا البارت بعد شهر من الأحداث السابقة.. بدت الدوامات والكل انشغل..بدواماته سارة وحصة وربعهن في الجامعة حارب وسهيل بدوا يشتغلون في احدى الشركات اللي كانت هدية من أبو علي وكتبها باسمهم .. .................................................. .............. في الجامعة سارة قاعدة مع شيما وعليا.. شيما: افففففففف عليا: بلاج شيوم تتأففين؟ شيما: والله تعبت من المشاريع والواجبات.. من أولها جذه سارة: ههههههه انتي وبعدج أول سنة وتتأففين عيل أنا شقول؟ عليا: بس أنا عادي عندي أهم شي أظهر من البيت وأغير جو شيما: لا والله عيل منو يكتب واجباتج؟ عليا: عادي take it easy وبعدين اللي يبي الصلاة ما تفوته... من صوب ثاني حصة وميسون توهن ظاهرات من الكلاس ويا بعض.. حصة + ميسون: السلام عليكن الكل: وعليكن السلام سارة: يلا استأذن.. عندي محاضرة .. وروحت عنهم أما الباجي ساروا صوب الكافيتيريا.. الساعة 1,8 الظهر.. الكل خلص محاضراته تقريبا.. حصة: سمحولي يا جماعة أحمد واقفني برع عليا: يا حظج والله حصة وهي تبتسم: يلا بااااااااي.. وروحت عنهن ميسون: علييوه منو بييج؟ عليا: نادر..ليش؟ ميسون: شكلي برد وياج لأن هزاع دق لي وقال أنه مشغول شيما وهي تعدل شيلتها وتتغشى وتوقف: أوكي بنات ..حامد وصل.. أشوفكم باجر الكل: بااااي تمن سارة وعليا وميسون.. وعسب يقضون الوقت قعدوا يسولفون ويتمصخرون حق بعض.. وشوي وصل سهيل... سارة وهي توقف: أخيرا يا سهيل عليا: يعني مليتي منا ميسون: شكلها سارة: أفاااا بس والله الشمس حرقتني.. يلا باي عليا+ميسون: بايات ركبت سارة السيارة بس انصدمت أنها هب الوحيدة اللي في السيارة... سارة وبدون نفس: السلام عليكم الكل: وعليكم السلام سارة وأونها معصبة:سهيل.. بلاك تأخرت علي؟ سهيل: والله هب شغلي كله من هذا الأخ سارة وهي للحين تتحرطم: كل ربعي روحوا قبلي ألا أنا.. ما اتخيل أقعد بروحي سهيل: يالله عاد اللي يسمعج يقول انج في الصحراء.. مو جنج وسط البلاد وكلها أمان سارة وهي تصارخ: يا سلام يعني عادي عندك سهيل وهو يطالع سارة في المنظرة الأمامية وشكله فول من حركاتها: ساروه... بس سارة: وتصارخ علي بعد سهيل: الله يطولج يا روح.. انتي شفيج اليوم لا هب طبيعية سارة: قلت لك ما أحب أقعد بروحي حارب وهو يبتسم باستهزاء: هههههههه ياحليلها يهالو تزيغ تقعد لحالها سارة وهي تصارخ حتى هي نفسها ما عرفت ليش سوت جذه: أنت آخر واحد ترمس. أصلا كل اللي صار من سبتك سهيل وهو يضرب بريك : جاااااااااااااااااب احشمي الريال على الأقل حارب وهو يفتح باب السيارة: هذي وين تعرف الحشيمة الله يخليك.. خلها على الله بس سهيل: حارب.. وين ساير؟ حارب وهو يصد صوب سارة: أصلا انتي من أول ما ركبتي السيارة وأنتي حاطة علي بس والله تراني كنت ساكت عسب سهيل وإلا لا تتحريني ما رمست عسب سواد عيونج ويسكر باب السيارة بكل قوته سهيل وهو ينزل من السيارة ويحاول يلحق حارب.. في هالوقت سارة كانت دموعها ممتزرات في عيونها..أنا ليش سويت جذه.. لييييييييييييش؟؟؟؟؟ ما ادري ليش عصبت.. أصلا السالفة ما تستاهل.. آاااااااااااااه الحين وين أودي ويهي عن سهيل.. وفرت ويها صوب سهيل وحارب ولقتهم قاعدين يرمسون ولاااااا المصيبة حارب قاعد يضحك ولا جنة سوا شي.. آااااااااخ يا القهر.. أحر ما عندي أبرد ما عندة.. وشوي ركب سهيل السيارة بس بدون حارب طبعا.. مثل ما تعرفون حارب عنيد وراسه يابس حتى سهيل ما قدر يقنعه بأنه يرجع.. في السيارة.. السكوت كان سيد الموقف حست سارة أن سهيل كان زعلان منها بس طنشت وتموا ساكتين الين ما وصوا البيت..نزلت سارة على طول ودشت حجرتها.. أخذت شور عالسريع وصلت وعقبها رقدت .................................................. ...................... في بيت أم سلطان أم سلطان وهي تنادي بصوت عالي: سعاد يما سعاد وينج؟ وشوي تنزل سعاد من فوق وهي بكامل أناقتها: ها يما أم سلطان: وينج.. عيزت وأنا ازقرج بس ما تردين سعاد وهي تقرب من أمها وتبوسها: سوري يما بس كنت داخل الحمام (تكرمون) عسب جذه ما سمعتج " طبعا عرفتوا منو هي سعاد.. اللي ترمس حارب.. والغريبة أنها أخت سلطان ربيعه بس ما يدري حارب بهاشي.. رغم أن سعاد من هالبنات اللي يرمسون شباب في التليفون لكن عمرها ما رمست حد غير حارب وهي تحبه من كل قلبها.. وطبعا مثل ما قلتلكم حارب مو مسويلها أي سااااالفة، أما عن حياتها الإجتماعية فهي بنت مطيعة تحب أمها وأخوها الوحيد سلطان اللي تعتبره شرات أبوها الله يرحمه.. يمكن تستغربون من أنها ترمس حارب مع كل هالصفات الحلوة اللي تتميز بها.. بس حارب سحرها.. ويمكن الشيطان قص عليها فكانت لحظة ضعف منها.. وهي حاطة آمال أنها تتزوج بحارب اللي ما يفكر بالزواج خير شر لا منها ولا من غيرها.. بس طبعا منها من سابع المستحيلات.." سلطان وهو توا ياي من برع: السلام عليكم أم سلطان + سعاد: وعليكم السلام أم سلطان: ها يما شو سويت اليوم في شغلك..؟ سلطان وهو يعق سفرته: والله الحمد الله.. كل شي تمام سعاد: يا حظكم أنتوا الشباب على طول تشتغلون.. هب مثل حظنا نحن البنات ياحليلنا سلطان: الله وأكبر عليج سعاد: والله صج.. يعني اللي يقول عندك شهادة يالله يالله كملت الثانوية ولا بالدز بعد سلطان:في هذي صدقتي.. الله يخلي الناس الطيبة بس..كله بفضل الله ومن ثم ربعي الله يجزاهم الخير طبعا سلطان كان يقصد حارب وسهيل اللي شغلوه عندهم في الشركة اللي عطاهم إياها عمهم .. صح أنهاصغيرة على قدهم لكنها بدت تتوسع وشوي شوي قدروا يكونون نفسهم بنفسهم وأغلب اللي يشتغلون فيها شباب أم سلطان: الله يبارك فيهم.. سعاد وهي تتمصخر: انزين ما يبون سكرتيرة شي؟ سلطان وهو يطالعها بنص عين: أقول.. استريحي سعاد: أفففففففف يا ربي أنا شسوي والله حياتي أرف سلطان: باجر بتعرسين وبتفكينا وبتفتكين خخخخخخخخخخ سعاد وعلى طول يا على بالها حارب وقعدت تدعي في خاطرها.. آمييييييييييييييييييييييييين .................................................. ............ بيت أبو علي.. حصة قاعدة على اللابتوب في الصالة عندها project شوي ويدخل علي.. علي: السلاااااااااام عليكم حصة وبدون ما ترفع راسها: وعليكم السلام علي ويقعدوهو منصدم من شكل حصة المبهدل: حشى أعتقد في اختراع اسمه مشط.. شو تسوين؟ حصة: عندي واجب.. هب فايجة حق شعري الحينة من العصر وأنا قاعدة أعابل فيه ...............لحظة هدوء .............. وفجأة.. صرخت بصوت عاااالي خلت علي ينقز من مكانه: لاااااااااااااااااااااااااااا علينقز متخرع : ويعاااااااااااااا بلاج يالدبة حصة وهي تضحك على شكل علي وفي نفس الوقت انقهرت لأن اللابتوب وقف وهي هب مخزنة المشروع.. حصة وشوي وبتصيح : كل شي انحذف علي: اكتبيه مرة ثانية حصة: تتمصخر حضرتك؟ علي: يعني شو تبيني أقولج؟ حصة: والله ما سويته مرة ثانية من 4 ساعات وظهري ناقع خله يولي وسارت وانسدحت فوق القنفة.. علي: والمشروع؟ حصة وهي مسكرة عينها: خله يولي.. الحين بدق حق علايا بقولها تسويه علي: وهاي الفقيرة شو ذنبها؟ حصة: ترى المشروع أنا وهي مشتركين فيه سارت حصة صوب التليفون واتصلت حق عليا.. عليا: هلأ حصة: هلا عليو عليا: شفيج.. بلاه صوتج؟ حصة: اسكتي .. أنا وقاعدة أسوي المشروع وقف علي اللابتوب والمصيبة اني ما خزنته عليا: والحين؟ حصة: شو بعد.. كل شي انحذف عليا: أحلفي.. بس التسليم باجر حصة: ما يخصني أنا حلفت ما بعيده عليا: شوووووووو وتضيع الدرجات يعني.. من الله درجاتي نازلة القاع حصة: ما يخصني.. سويه أنتي عليا: كم مرة أقولج هذا البرنامج ما عندي في البيت حصة: خلاص عيل.. تعالي بيتنا ونسويه ويا بعض عليا: وين ما اقدر.. يمكن أمي ما ترضى؟ حصة: الله يخليج حاولي والله تعبانة ما أقدر عليا وغمضتها حصة: خلاص بحاول بعد ما سكرت عليا عن حصة سارت صوب أمها وخبرتها أنها تبي تسير بيت قوم حصة وبعد محاولات كثيرة من الاقناع.. وافقت أم عليا عليا: اممممممواح فديت أمايا أنا أم عليا: شوفي ترى كلها ساعتين خلصتي ولا ما خلصتي عليا: ساعتين ساعتين أفا عليج انتي بس ودقت حق حصة عسب تخبرها أن أمها وافقت ............................................. كـــــــــــات شو تتوقعون يصير بين سعاد و حارب و سارة؟؟ و شو بيصير يوم عليا بتي بيت حصة؟؟ وسهيل شو بيسوي في سارة؟؟ وشو رايكم في البارت؟؟ |
ثاااانكس عالبارت القصير مافي اكشنات بسرعة نبى البارت |
حرااااااااااام عليكم كل هذا و قصير خلاص تالمرة الياية اطول تسلمين اختي على المرور ولا هنتي و خليج ويانا القصة طويييله و الاكشنات ياية :):):) |
انشاءالله بتمني متابعة |
البارت الياي باجـــــــــــــــــــــــــــــــــر...:):) |
| الساعة الآن 08:07 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir