البارت " 11 "

.
.
.
.
اليوم : الخميس . .
المكان : بيت بو عيسى . .
الساعه : 7 المسا . .
.
( عيسى ) . .


تنهدت بضيج ، اسبوع يا شيخه لين ما تردين علي ؟ . .
شو من قلب عندج يا بنت خالي ؟ . . حرام عليج تخليني اتريا ها الكثر ،
بس دام انتي مرتاحه جذا ، ع راحتج . .
يلست عدال امايه ، اللي تترقب الاخبار عشان يبلغون متى رمضان . .
عيسى : امايه ،
امايه : هاه اميـه . .
عيسى : ما ردت عليج حرمه خالي ؟. .
طالعتني امايه : والله لين الحين ما ردوا ، غريبه . .
عيسى : انزين دقي عليهم شوفيهم بلاهم اتأخروا . .
امايه : وابوي عيسى شو ها الكلام ، عيب ندق ع العرب خلهم نحن مب مستعيلين ع شي . .
عيسى : انزين انا مستعيـل . .
امايه : مستعيل على شو ؟ . .
خذت تلفونها و دقيت ع رقم المسجل عندها ، ( ام ناصر ) . .
وحطيته ف اذنها عشان احطها امام الامر الواقع ، عطتني نظره صارمه ، بس ما اهتميت مول . .
خذت التلفون و يلست بعيد عني ، عشان تاخذ راحتها اكثر وهي ترمس بالتلفون . .
كانت ها العشر دقايق تمر علي مثل عشر ساعات ، وامايه ماخذه راحتها بالرمسه ولاجني اترياها . .
عقب ما سكرت ع طول طرت عندها و يلست عدالها . .
عيسى : ها امايه بشري ،! . .
تنهدت امايه : والله مادري شو اقولك يا ولدي . .
خوفتني تنهيدتها . .
عيسى : خير امايه ؟ . . شوفيج ؟ . .
امايه : والله يا عيسى البنت ما وافقت . .
فجيت عيوني ع وسعها . .
عيسى : امايه انتي شو تقوليــن ؟ ! . .
امايه : اللي سمعته . .
نزلت راسي وانا متحسر لاني خطبتها . . شوي و سمعت ضحكه امايه ماليه الدنيا . .
امايه : هههههه بلاك يا عيسى ! ، ( حطت ايدها ع ريولي ) البشاره ، شيـخه وافقت . .
شقيت الحلج و بدون ما احس نقزت . .
عيسى : بذمتــــــــج ؟ . .
هزت راسها بأيجااب . .
امايه : هيه . .
قمت و انا اعطيها ظهري و اركض . .
عيسى : بلغي البشاره لشموه بنتج ، و ابويه . .
وقفت و طالعتها . .
عيسى : و العــااايله كلــها . .
و ع طول سرت غرفتيه امسك التلفون ، ادق ع خالد ابـشره . .
خالد : هلا عيسى . .
عيسى : كم تعطيني ع البـشاره . .
خالد : بشاره شوه !،
عيسى : انته كم تعطيني ؟ . .
خالد : اللي تباه ؟ . .
عيسى : اللي اباه ، عيل يوم اقولك انه شيخه وافقت . . كم تعطيني ! ،
سكتت خالد ثواني ، واستغربت انه سكـت . . رديت وسألته . .
عيسى : كــم تعطيني اقــولك ، !
خالد : الحين ويا ويهك ، اخسر بيزاتي عشان بشارتك اللي مثل ويهك . .
عيسى : ههههههه غصبن عنك انزين ،
خالد : وانا قلت شي مستوي ، و اخر شي شيخه وافقت ، !
عيسى : ليش ها الخبر ما فرحك ؟ . . اخووك بيعرس لازم تفرح غربلات بليسك . .
سكتت خالد ، واستغربت انه ساكت اصلا . .
عيسى : خلود بلااك كل ساعه تسكت . .
صرخ خالد : هــااااه ياي يــاي . . ( و قال بسرعه ) عواس مبروك منك العيال ومنها المال بسكر عقب برمسك . .
وسكر عني ، وهو اصلا مب ملاحظ انه مغلط و قال ( منك العيال ومنها المال) . .
ضحكت عليه ، ههههههه اسميه خالد مسطل . . بس شكله مشغول عشان جيه غلط . .
وانا انشغلت بتفكيري ، و اخطط لمستقبليه . .
اللي ويا ، شيخه . .
.
.
اول ايام رمضان . .
.
اليوم : اليمعه . .
المكان : بيت بو عيسى . .
الساعه : 6 ونص المغرب . .
.
( عزه ) . .


طلبت مني عمتيه حصه اني اسوي الفيمتو ، يبت الماي البارد اللي حاطينه ف الثلاجه و حطيت عليه الفيمتو ، وبما انه عايلتنا يحبون شي اسمه شكر ضفت شويه شكر ، ، يزيد من الحلاوه شوي . .
عمتيه حصه : عزه اميه ، الفيمتو وديه للرياييل و التانج عند الحريم زين فديتج ! ،
عزه : ان شالله عمتيه ، . .
عمتيه حصه : خلني اتصل ع واحد من الشباب يشل الصينيه . .
عزه : لا لا عموه . . الخدامه بتشله فشيله يدخل المطبخ و جذا اشكالنا . .
و طالعت شيخه من فوق لتحت ، شعليها لابسه جلابيه يديده مفصلتنها . .
عمتيه : بلاها اشكالكن ، كل وحده احلى عن الثانيه . . بس لو ما ييتن هنيه عن الريحه . .
تنهدت بضيج ، شفت شيخه توزع القلاصات ع الصينيتين و تحط الفيمتو و التانج . . عقب يابت الخدامه كرتون ماي من الدبب الصغار ، و وبدت شيخه توزع الماي . .
شوي سمعنا دق ع الباب . .
عمتيه حصه : هاه اكيد واحد من الشباب ،
عدلنا شيلنا انا و شيخه بحرص . .
سمعنا اصوات عيسى و خالد . .
خالد : سلام عليج عمتيه . .
عمتيه حصه : هلا هلا خالد وعليكم السلام ، !
خالد : شحالج عساج الا طيبه ؟ . .
عمتيه حصه : طيبه طاب حالك انته شحالك ؟ . .
خالد : يسرج الحال ، هاه عسى الفطور يفتح النفس ؟ . .
عمتيه حصه : ما تثق بطباخ عمتك ؟ . .
عيسى : خسي والله ، قصوره بعد . .
خالد : هههههههه ، افا عليج عموه اثق و نص . .
عمتيه حصه موجهه الكلام لشيخه : شيخه اميه ، قومي خلي عيسى يشل صينيه الفيمتو . .
قامت شيخه عن طريج عيسى ، تعطيه المجال عشان يشل الصينيه . .
عيسى : شحالج شيخه ؟ . . شحالج عزوه ؟ . .
عزه : الحمدالله ، انته شحالك . .
شيخه : بخير . .
عيسى : يسركن الحال ،
شل الصينيه ، و ظهر قبل خالد . . لاحظت خالد كان يطالع شيخه ، بأعجــــاب !،
وظهر بكل برود . .
طالعت شيخه بقهر ، لأنها وافقت ع عيسى . . ولا جنه بقلبها في شي محفور بأسم ، خــالد !،
والمشكله اني قاعده اشوف برود ف شيخه ، تجاهه مشاعرها و تجاهه عيسى . .
ترخصت عموه ، عشان تسير تسبح قبل لا يأذن . .
اما انا و شيخه تمينا نوزع الاكل ف الصحون . . و يتني الشجاعه بسؤالي لها . .
عزه : شيخه انتي الحين تحبين خالد ! ،
شيخه : خـألد ! . . لا ولا عمري فكررت فيه ، !
صابتني دهشه ، صدمه ، قهر ، متنرفزه منها . .
عزه : كيف يعني ؟ . . والكلام اللي كنتي تقولينه عنه ؟ ، كله طار ؟ . .
شيخه : عزه انا مب فاهمتنج . . اي كلام ؟ ،
حلت ع ويههي تقطيبه ، منصدمه من تجاهلها لكل شي . .
عزه : ما توقعتج جذيه يا شيخه ، بسهوله تروحين توافقين لعيسى . .
تنهدت و لفت كل جسمها صوبي . .
شيخه : عيسى وافقت برضاااي ، انا لين متى بقعد اتريا اخوج لين ما يفكر يخطبني . . يفكر بس يفكر ، مب يتجدم و يطلبني من ابويه ، اطلب منه بس يفكر فيني ع الاقل كـ شريكه لحياته مب كأخته . . لين متى بتريا يا عزه ،!
عزه : بس انتي يا شيخه ، عاهدتي نفسج تتريينه لين اخر يوم ف عمرج . .
شلت صحنين و مشت عني لبرا المطبخ وانا اتبعها . .
شيخه : جذذيه بكون بقره ، بخسر كل عمري عشان انسان ما يستاهل تفكيير مني . .
فجيت عيوني ع وسعها من كلامها ، مسكت ذراعها و لفيتها صوبي امنعها انه تكمل مشيها . .
عزه : شو صاب بعقلج !، هاي مب شيخه اللي تموت ف خالد ، انا متأكده انه هاي مب شيخه . .
قالت بكل ثقه ، ما همها اي شي . .
شيخه : لا هاي شيخه بلحمها و شحمها اللي واقفه جدامج ، واللي تقول ها الكلام ، واللي وافقت على عيسى ، واللي بتنسى شي اسمه خالد . .
سكتت ثواني ، احس مب قادره استوعب شي . . شيخه مب راحمتني وكل شوي تعق علي صدمه . .
عزه : بتنسيــن خـألد ،! . .
شيخه : عيل ليش وافقت ع عيسى ،! خالد ماضي يا عزه ، تعرفين شو يعني ماضي ؟ . .
عزه : بس انتي بها الطريقه ، قاعده تستغلين عيسى بنسيانج لخالد . .
شيخه : ومنو قالج اني بستغل عيسى ؟ . . انا بنسى خالد قبل لا اكون حــرم عيسى . .
و عطتني مقفاها ، متوجهه للصاله عشان تحط الصحون . .
و خلتني مع صدمتيه . .
.
.
.

اليوم : الجمعه . .
المكان : بيت بو عيسى . .
الساعه : 7 . .
.
( خالد ) . .


قمت وانا اتمتم ، بـ ( الحمدالله ) . . وسرت المغاسل غسلت ايدي ع السريع . . و طلعت من المغاسل وانا اسأل الموجودين . .
خالد : ساير المسيد ، حد بيي ويايه ؟ . .
ابويه : كلنا يابوي بنسير ، قومو يا شباب الاكل ما بيطير . .
وفعلا كلهم قامو و تغسلو ، وسرنا مشي للمسيد قبل لا يقيمون الصلاه . . وع وصولنا اقامو الصلاه ، وبما انه اول يوم ف رمضان كان زحمه . . وبالغصب لقينا مكان ،!
بعد الصلاه ، بدو الرياييل يسلمون ع بعض و يباركون بـ ايامنا الاولى ف رمضان . .
رجعنا البيت ، و حسيت نفسي انسدت مابا اكـل . . ف يلست بعيد عنهم و الشباب وو الشياب ردوا ياكلون الفطور . .
صرت صاله الحريم ، ووايجت اذا في حد ف الصاله . . ابتسمت يوم شفتهم يالسين . . يدوه و شيخه بروحهم ،
يدوه تمسح ع راسي : هاه شواخ ، عسى بس مرتاحه ،!
شيخه : هيه الحمدالله ،
يدوه : فطرتي عدل ، !
شيخه : هيه يدوه ،!
يدوه : الحمدالله . .
و بدت شيخه تهمز ريول يدوه ، لين ما حسيت حد يسحبني من ايدي للمطبخ . .
عزه : انته شو تسوي هنيه ،!
خالد : ياي اشوف ويهج ، شو ياي اسوي بعد ، اسلم ع يدوه . .
عزه : وما تستحي توايج ع شيخه ،!
عقدت حواجبي . .
خالد : ومنو قال اني اوايج عليها ؟ ، كنت اشوف اذا في حد داخل . .
عزه : لا تخرط يا خالد . . عيوني شافتك بجذب عيوني يعني ؟ . . دخلت و انت ادور شوقك . .
خالد : اي شوق يا عزه ،! مينونه انتي تقولين ها الكلام . . لمي حلجج عن حد يسمعنا . .
عزه : شفت يا خالد ، شيخه ضاعت منك وراحت لغيرك . .
طالعتها بنرفزه ، و قلت بعصبيــه . .
خالد : ومب اول مره يضيع مني شي ، فكيني لآآآآآه ،!
ومشيت عنها ، شو قلت يا خالد ؟ ها كلام ينقال لعزه ؟ . .
الحين اخافها تشك بشي ، و تعرف ليش ما اميل لشيخه . .
وانا طالع من المطبخ انصدمت وانا اشوفها جدامي فاجه عيونها ، قلت بأسلوب استفزازي .
خالد : تسمّعيـن علينا ، يا بنت عمي ،!
حطت ايدها ع حلجها و شهقت ،
شيخه : لا والله وانا ماره بالغلط سمعت . .
ابتسمت بشماته ،
خالد : خذي راحتج يا شيـخه ،
ومشيت عنها ، وسمعتها تزقرني تحاول تفهمني شو اللي خلاها تسمع ،
بس انا ما عطيتها مجال و ع طول سرت الميلس يلست عدال عيسى ، وعيسى ما فكني من اسألته بعد . .
عيسى : بلاك وارم ،!
خالد : مافيني شي . .
عيسى : كل ها البراكين اللي طالعه فوق راسك ومافيك شي ؟ ،
خالد: اووووه عيسى فكني الله يخليك ، مب فايج لك انته الثاني . .
عيسى : مصيري بعرف ،
خالد : خيـر ان شالله ، . .
كل واحد التهـى بشي ، وعقب تعشو ، وانا ها المره كلت لاني صدق صدق يوعان . .
.
.
.
اليوم : الجمعه . .
المكان : بيت بو ناصر . .
الساعه : 9 المسا . .
.
( شيخه ) . .


اول ما وصلت البيت ، ع طول سرت غرفتيه و قفلت ع عمري و طحت ع السرير صيـاح . .
مب غلط اللي سويتيه يا شيخه ، بس الغلط الكلام اللي قلتيه لعزه . .
ترننت ف مسامعي كلمات خالد ، لعزه . .
(ومب اول مره يضيع مني شي ) ، يعني انا كنت شي بنسبه له ،!
بـس ،
بس اللي شفته بعيني ف غرفه موزه شو يكون ؟ . .
تذكرت يوم طلبت مني موزه من كم يوم ، اسير اييب لاب توبها اللي خلته عندنا و ما فتحته من ايام الجامعه . .
لبيتها ، و سرت انبش ف غرفتها و ادور عليه . . لين ما طاحت ف ايدي ، شي صدمني . .
خلاني اكرهه عمري ، واعوف حالي . . من غبائي ، وطيشي ، و حبي لخالد . .
وعرفت ليش ، خالد عمره ما فكر فيني ولا مال لي . .
خالد كانت حالته مثل حالتي انا بالضبــــط ، الحـب من طرف واحد . .
هو اللي عذبني انا ، و عذبه هو واظني لين الحين متعذب . .
قريت رسايل خالد لموزه ، مب اي نوع من الرسايل ، كانت رسايل غراميه ،!
قريت رساله رساله ، وكل رساله معذبتني اكثر من الرساله الثانيه . .
بطريقه سريعه شليت الرسايل ، وظهرت من غرفه موزه و ع طول لغرفتيه . . وانا اقراهم مره ، مرتين ، ثلاث ، عشر . .احاول افسر غير اللي مفكره فيه ، بس كــــل شي جداامي يفسر ها الشي . .
وها الشي اللي خلاني اقول اللي قلته لعزه ، و اوافق على عيـــسى ،!
مسحت دموعي ، وانا مقرره انسى كل شي صار و اريح عمري . . دخلت الحمام و تسبحت و خذت كل راحتي . .
لبست بجاما ، وحطيت كريمات ع جسمي و سويت مساج اونه . .
لين ما سمعت دق ع الباب ، و يوم دخل اللي يدق كانت امايه . .
امايه : هاه توج متسبحه ؟ . .
شيخه : هيه ، بغيتي شي ،!
تقربت مني و مسكت الفوطه و بدت تنشف شعري بحنيه . .
امايه : والله و كبرتي يا شيخه ، والحين استويتي عروس ماشالله عليج ، مب جنه تضاربين ويا ناصر امس ع لعبه . . مرت السنين والله . .
ابتسمت : حال الدنيا ، يالغاليه ،!
تنهدت بضيج . .
امايه : هيه والله ،حال الدينا ، وهاه الحين اخوج يبغي يخطب . .
التفتت صوبها بصدمه . .
شيخه : ناصر يبغي يخطب ؟ ،
يلست عدالي ع السرير وهي تتنهد و تحط ايدها ع ريلي . .
امايه : هيه ، هاه الموضوع اللي ابا ارمسج فيه . .
شقيت الحلج . .
شيخه : موضوع شوه امايه ، دوريله البنت وخلاص . .
امايه : لو ع رايي جان خطبتله احلى بنت ف البلاد ، بس المشكله انه مختار البنت من زمان بعد . .
ضحكت بخفه ،
شيخه : وهاي سوالفك يا ناصر ي خووي ، منو البنت عسى بس نعرفها ؟ . .
امايه : نعرفها و تعرفينها انتي وااايد زيين . .
متشققه ابا اعرف منو بنت الحلال اللي ما يحصلها اخويه يبا يخطبها . .
شيخه : خير امايه ، منو هي بنت الحلال ،!
تنفست بعمق . .
امايه : بييبلي الجلطه ها الولد ، مادري كيف يت ع باله . .
عقدت حواجبي ، مستغربه انه امايه مب راضيه . .
شيخه : استغفري ربج ، الله لا يقوله يا امايه ، بلاج جذا تفاولين ع عمرج ؟ . .
امايه : اخوج ، طول عمره ما يابلي مصيبه كبر ها المصيبه اللي يابلي اياها . .
شيخه : لهدرججه يعني ،! انزين منو هي عشان تسوي فيج جذا . .
امايه : بنت عمج عزه ، منو غيرها يعني . .
بدايتاَ ما استوعبت اللي قالته ، بس عقب تشققت من الفرح . .
شيخه : الساعه المباركه ، ما بنلقى احسن من عزه . . وبيني بينج كنت حاسه انه ناصر في خاطره ها البنت . .
ضربت امايه ع ريولها بقهر . .
امايه : شف الثانيه انتو بس . .
رديت شعري اللي غطى جتوفي ورا اذني ،
شيخه : بلااج امايه ، اقولج ما بنلقى احسن من عزه البنت مربايه و دارسه و يعتمد عليها ، شو نبغي اكثر من جذا . .
سكتت امايه و صدت عني ، و شفت انه دموعها بدت تنزل بهداوه ، مسحت و ابتسمت بعفويه . .
شيخه : لا لا ، ما نبغي ها الدموع ، عررفت ليش تصيحين ، خايفه الحرمه تشغل بال ناصر وما يهتم فيج هههه ، افا يا امايه ما تستاهل ها السالفه . .
قالت بصوت يعور القلب . .
امايه : ياريت ع ها السالفه بس يا شيخه ، جان دموعي ما تستاهل والله . .
شيخه : عيل شو اللي ينزل دموع الغاليه ،! . .
حسيت امايه بدت تفرغ كل اللي بقلبها . .
امايه : يبغي عــزه اللي جسمها مشوهه ، اخووج بيجابل جسم مشووهه بالله عليج ،! و كانت مخطوبه بعد ، يعني في ريال ثاني كان يفكر فيها شو تتوقعيني اوافق عليها ،!
انصدمت من كلامها ، ما توقعت جذيه تفكيرها ، حاولت افهمها انه عزه مب بايدها اللي صار . .
ف البدايه عارضت ، وعارضت ، وتمت معانده . .
لين ما لينت راسها ، و بدت تصيح وهي تقول كلام يعور القللب . . و اخيرا وافقت ع عـزه ،!


.
.
.