|
"20" وصلت علايه البيت .. وبعدها حتى مابركنت نزل بسرعه والسياره تمشي وسكر الباب بقوه ودش البيت وهو يرمس في التيلفون .. علايه استغربت وضعه ... وبركنت السياره في الكراج وتمت تطالع الميني كوبر وتحس انها تولهت عليها وصدت ع بيتهم الصغيرون واتنهدت بحسره ودشت داخل البيت .. حتى ماكلف عمره يفتح ليتات الصاله .. شلت السويج وتمت تلعبه في ايدها وهي ترقى الدري .. شافته نازل تحت ... علايه : سلطان وين بتسير سلطان : ماللج خص وظهر سلطان وسكر الباب ... علايه ركضت وراه هذا اتخبل .. تعبان وبيظهر .. منو بيشوفه ... ركضت وفتحت باب الصاله وشافته يرمس في التيلفون ويمشي في الحوي .. ردت سكرت الباب وهزت راسها بيأس .. وردت تركب فوق وبدلت ثيابها .. لبست البجامه اللي يحبها سلطان لونها اسود وحرير وعليها عنز صغار .. وفلت شعرها وتعطرت سارت توايج من البلكونه شافته يالس في ها الحر ع الكرسي وحاط راسه بين ايده وهي مستنكره حاله شو فيه وشو ياه مره وحده ..؟؟ قررت تنزل له .. وفعلا نزلت له علايه انتبه لها سلطان بس ماسوى لها سالفه .. علايه حست انها بتصيح .. مستحيل يخليها ... مستحيل تتخيل انه سلطان ريلها اللي تحبه وهو يموت فيها في يوم يعاملها بها الطريقه .. ماترردت لحظه انها تسير له .. ويلست ع ركبها مجابلتنه .. ويودت ايده وبعدتها عن ويه وهي تدمع .. علايه بصوت مبحوح : شو فيك ؟؟ سلطان لاتعذبني دخيلك قول سلطان يطالعها بعيون حمر : تعبان علايه تعبان .. علايه ماتحملت ونشت وحضنته .. ويلست تصيح : انا ماتخيل انه في يوم بتخليني ياسلطان او بتعاملني جي انته مالاحظت انه اليوم اول يوم تزاعج فيه عليه .. سلطان : اعذريني علايه : خبرني شو مستوي ؟ سلطان : ماشي انسي .. وانسي سلطان بعد علايه تمت يالسه ع الكرسي ومشى عنها سلطان .. وهو داش داخل ماتخيلت انه يسير عنها او تنساه في يوم قالت اكيد تعبان ولانه تعبان يقول جي .. نشت علايه وحضنته من ورا ..: لاتخليني سلطان .. ( وتصيح ) لاتخليني عقب ماتعلقت بك ... ( حطت راسها ع ظهره وتمت تصيح .. يود ايدها اللي ميودتنه ورفعها وباسها ... ) سلطان عقب مابعدها عنه تم يطالعها .. : اخليج .. !! ومشى عنها .. تمت ها المره علايه واقفه مكانها مب فاهمه شو يستوي .. تبا حد يفهمها ... سارت دشت داخل وع طول شلت تيلفونها وع طول اتصلت لنوره بس ماترد عليها حرقت تيلفونها ونوره ماترد .... وعقب اتصلت لعمها احمد تبا حد يواسيها وهي في الصاله اللي تحت سايره وراده وحاطه ايد في خاصرتها والايد الثانيه ميوده التيلفون .. لانوره ولا احمد يشلونه ... رفعت ايدها الثانيه وتطالع الساعه كانت الساعه 4 الا خمس .. يعني الناس رقود .... سارت يلست ع الغنفه وتتريا حد يتصل لها منهم وسرحانه وتترياه ياذن وبتسير تصلي ... اما سلطان فكان فوق طالع في البلكونه ويفكر .. ويفكر .. لين ما اتخذ قرار .. لا وعزم عليه بعد ..!! .. نزل سلطان ع الدري وشاف انه الصاله ظلام .. سار صوب الابجوره وشغلها شاف علايه طايحه ع الغنفه وراقده ماتردد لحظه انه يسير لها .. سار لها ونزل لمستواها وتم يطالع وييها " فديت ها الويه ياربيه ..!! ( وباسها ع راسها ودمع ) انا اخليج ... وين اروم ؟؟ بس والله محتار غناتي .. محتار .. شو اسوي ... عمري كله ماتوقعت انه في يوم بيستوي جي .. ( وحاس ثمه باستهزاء ) وانا شو بخسر ...انا مابخسر شي .. الا روح عشقتها لحد الموت ... " طاحت دمعه من عين علايه ... وبيأس من سلطان عشان يخفف على عمره سار وباسها ع خدها .. وحس بطعم مالح عرف انه دموعها ابتعد عنها ومسح دمعتها ونش عنها سار يصلي .. علايه من سمعت صوت الباب نشت تمت تدوره وماحصلته .. سارت تتمسح وتدعي ربها انه يعدي ها السالفه على خير .. سلطان من طلع مارد لين الساعه 7 الصبح وحصل علايه راقده ... سار وطالعها ولحفها عدل وسكر الباب وسار الحجره الثانيه ورقد ووقت المنبه ع الساعه 9 ... .. وعقب ساعتين ... نش سلطان وظهر برع البيت ... ع الساعه 11 نشت علايه دورت سلطان اتصلت له مايرد عليها .. اتصلت لنوره مليون مره ماترد عليها ... تمت تحاتي وايد ... ومن استوت الساعه 12 ردت تتصل لسلطان وشله سلطان متضيج : الو علايه بخوف : هلا سلطان انته وينك ماييت ترقد ؟ سلطان : امبلا رقدت طشونه في الحجره الثانيه علايه انصدمت : الحجره الثانيه ؟؟ ( وبصوت خفيف ) ليش ؟؟ سلطان بجفا : فكيني تبين شي .. علايه : هاه لا لأأ .. بتي تتغدى سلطان : تغدي بروحج باي وسكر في وييها ردت تتصل له مايرد عليها ... ويوم ضاجت من حالها سارت تتلبس وسارت المحل وهي تعبانه واول ماوصلت المحل ماحصلت حمدان وحطت راسها ع الطاوله وتمت طايحه وهي تحس بتعب .. طلعت الابره من شنطتها وضربت عمرها بالم .. رد سلطان وماحصلها واستانس انه مالقها .. يعني ماله داعي يودعها .. عرف انها في المحل .. سار وظهر شنطته وحط ثيابه .. وظهر برع وطالع البيت للمره الاخيره ... وشاف صورتها وصورته في برواز ع الطاوله شل الصوره وباسها وردها مكانها ... "اسمحيلي ماروم اودعج .. وعمري ماكنت حاط ببالي اني بفارقج .. بس ها النصيب .. " ردت علايه البيت العصر لانه تعبت وايد ... والبيت خالي استغربت .. سارت فوق تركض اتحس انه فيه شي مستوي دورت سلطان مالقته بس سيارته هني ..؟؟ فتحت الحجره شافت الكبت مفتوح وطالعت داخل ثيابه ماشي ..؟؟ والمعلايق طايحه ع الارض والحجره معفوسه شوي .. حصلت ع التواليت ورقه . (( علايه غناتي انا سافرت وماعرف متى برد انتي سيري بيت اهلج ... لانه محد بيتم وياج وماعرف كم بتم هناك بس مطول ها المره ... تحملي ع عمرج )) اطرافها ماقامت تشلها من قرت الورقه حست بعمرها خفيفه ..؟؟ شو يعني ردي بيت اهلج .. وشو يعني مطول ؟؟ ها الوضع ماينسكت عنه اتصلت لنوره .. بس بعد نوره ماترد عليها .. مالها الا عمها .. شلت تيلفونها واتصلت لعمها .. علايه شويه وبتصيح : عمييييه احمد : هلا علايه : سلطان خلاااني احمد استغرب : خلااااج علايه : هيه حاط لي ورقه ومكتوب فيها – خبرته شو في الورقه - .. امبيدو والله هو من امس مب مسولي سالفه وكله معصب ومارقد في البيت تخيل .. او يعني ( بصوت خفيف ) مارقد عندي .. احمد استغرب : انزين انتي ردي بيت اهلج اللحين كيف بتمين في البيت بروحج علايه : انزين وسلطان ؟ احمد : اممم برمس عمر علايه تمسح دمعتها : اوكي |
بندت علايه عن احمد عمها وسارت تيمع اغراضها بترد بيت اهلها .. واتصل احمد لعمور اللي اصلا مغفي ومايدري شو السالفه .. علايه من خلصت تحط اغراضها قفلت البيبان وشلت الشغاله وياها وسارت بيت اهلها ... دشت البيت وهي تعبانه وويها مصفر .. سلمت على امها وميروه اختها اللي كانو يالسين في الصاله ام محمد : خير عليا شو فيج عليا وهي سرحانه : هاه لاماشي بس سلطان مسافر وييت هني مافييني اتم بروحي ام محمد شكت : تعبانه انتي ؟ عليا تهدج صوتها : لا ... امبلا .. امبلا .. شويه بس .. ام محمد : نشي فديتج ارتاحي .. علمتني كيف اعزك ولعيونك أشتاق بس................... نسيت تعلمني الدنيا بغيابك كيف تنطاق ؟ ......................... ......................... ......................... ......................... ......................... ............. عقب شهرين ... مرن شهرين على علايه بدون ماتعرف شي عن سلطان وسلطان كان يعرف اخبارها من احمد .. وكانت بس ام سيف كل اسبوع تمر على علايه في البيت لكن نوره مول مايتها ولاحتى اتصلت لها تيلفون ... احمد في المستشفى يرمس سلطان .. احمد : اف صخ عني والله ميت من الزيغه مادري شو بيقولون لها سلطان : والله يا احمدوه ان طلع فيها شي بضربك ضرب احمد معصب : ليش مني انا ولاممنك انته اللي خليتها ببند عنك اللحين سلطان : لا حلفت عليك ماتبند خل السماعه وجنك ماترمس حد احمد باستسلام : اااه امري لله .. طلعت علايه وهي منزله راسها ... وشافت احمد بعيون تلمع بالفرحه والخيبه بعد ... تمت تمشي وهي لابسه احمد اللي يسالها شو قالو لها ... علايه وقفت برع المستشفى عند الباب وتحس انه ها المكان الوحيد اللي بعيد عن عيون الناس وتروم تخبر عمها عن اللي فيها احمد : ارمسي عليوه عليا عيونها تلمع وتطالع الشمس : انا حامل يا احمد ( وتطالع الشير اللي يتحركن في المدى البعيد ) اتخيل انا حامل ... احمد بصدمه : حاااااااااامل عليا تهز راسها بالايجاب .. وسكتت شويه وعقب قالت : لكن انا ماكنت ابا احمل .. احمد يبتسم : ماكنتي تبين!! احمدي ربج غيرج يتمنون .. عليا تقاطعه : همم لا لا .. ماقصدت جي ... ليش اعذب عيالي .. ويكونون مرضى ... مب كفايه امهم متعذبه بعيد عن ريلها .. اللي مايندرى به متى يرد .. مب كفايه انها تعاني بروحها ... واللي بيطلع ولا اللي بتطلع .. بتعاني شرات ما ابوهم يعاني .. ؟؟ احمد يبتسم ويهديها : انتي عرستي والمفروض انج كنتي تحطين ببالج انتي تييبين عيال ع الاقل واحد .. او اثنينه .. عليا اتحط ايدها ع بطنها : لو درى سلطان شو بيسوي ؟؟ بيرد ولا بيتم مخلني هني ماا عرف شي عنه احمد صد الصوب الثاني وقرب السماعه من ثمه وبصوت خفيف : حوو اخبرها سلطان ساكت ومويم في الطرف الثاني وكانت عيونه مليانه دموع : لا خلها جي .. مع السلامه وع طول قطع الاتصال سلطان تم يشوف شقته ويطالع صورها اللي ماليه المكان .. طلع كل الصور اللي في الاب توب واشترى براويز على عدد الصور وترس الحجره من صورها ... ومايخلي حد يدش شقته .. اصلا ماتعرف على حد هناك .. عايش لحاله . عازل عمره عن الناس .. عن الكل .. الكــــل .. حتى عن حبيبته !! ......................... ......................... ......................... ......................... ......................... ............. احمد في السياره يسوق وعلايه تطالع الشارع من الجامه وهي سرحانه وتفكر في سلطان ؟؟ شو يسوي اللحين ... يسال عنها ولا لا .. ايي في باله ولا لا .. ؟؟ اكيد ايي في باله ع الاقل لو دقيقه .. صح سلطون ايي ببالك .. !! عليا بصوت خفيف : لو يبت ها الياهل بيكون مريض احمد : عليا سمعي حسب معلوماتي البسيطه .. اذا كانت الام مريضه بالثلاسيميا تراه العيال مب كلهم اييون فيهم ها المرض .. لكن لو كان الابو هو اللي مريض تراه اتاكدي انه بيكون الياهل حامل للمرض .. وتراه الذكر يحمل المرض اكثر من الانثى .. بس الثلاسيميا نوعين .. نوع بيتا صغرى .. والنوع الثاني بيتا كبرى .. لو كان من النوع الاول اللي هو البيتا الصغرى تراه بيكون وايد هين .. وبس بياخذ ادويه .. ولكن لو بيتا الكبرى .. تراه الياهل بيتعب وانتي احمدي ربج في كل الحالتين انه بيكون عندج ياهل هاي نعمة ربج .. وان شالله يكون خير .. ومافيهم شي .. واذا كان فيهم يكون فيهم االنوع الاول .. عليا : ان شالله احمد غير دربه ووقف عند مكتب السفريات : عليا فديتج ثواني وبرد لج .. نزل احمد من السياره.. واتصل لخليفه ابو عليا احمد : خليفه انا وصلت مال السفريات .. هاه احجز ولا لا خليفه : هيه شو تشوفها .. احمد مايبا يخبرهم انها حامل لانه مابيخليهم يسافرون : هيه محتاجه تغير جوو وانا عندي اجازه اسبوع خليفه : على خير ان شالله احمد : خلاص بحجز خليفه يتنهد : على هواك يا احمد دام انها ضايجه خلها تسير وياك بس هاه حط بالك عليها .. احمد : ان شالله دش احمد مكتب السفريات وطول شوي لين ماحصل لهم حجز حق باجر ... لكن علايه ماحست بالوقت لانها اتعودت انها تقضي ها الوقت الطويل في التفكير ... ماتوقعت انه غياب سلطان عن عينها بيسوي بها كل ها .. ؟؟ ركب احمد السياره وهو مستهم لانه اتاخر عليها .. احمد يربط حزام الامان : اتاخرت عليج عليا : ماعرف احمد صد صوبها : ايه انتي شو ماتعرفين انا من ساعه داخل .. عليا : هيه شويه احمد : ياللللله ها كله عشان سلطان عليا صدت عليه وعيونها حمر .. : عمي ليش يخليني .. انا احبه .. قوله يرد ... مب عشاني .. عشان اللي في بطني .. احمد مارام يرد عليها .. سلطان راكب راسه .. مايبا يرد اللحين ع الاقل لين مايهدى يخاف يرتكب في حقه وفي حقها شي يندم عليه بعدين .. يبا يبتعد سنه . سنتين .. ثلاث .. المهم يبتعد ويدري انه عليا ع ذمته ... مايبا يكون في البلاد وهو مطلقنها .. !! اذا لك شف في شوفي تراني على شوفتك صحيت الاماني زرعت الشوق كله في انتضارك وخذت الانتضار وجيت عاني نسيت الناس ولكن مانسيتك عجزت انساك حتى لو ثواني مليت الكون واشغلت الجوارح نظر عيني سمع اذني . لساني عطيتك شي ماهو عند غيرك ولاقصرت ولكنك اناني انا احبك واذا ودك تاكد شف الله كيف ليدينك هداني غيابك صعب والاصعب وجودك وانا في الحالتين اتعب واعاني حبيبي ولاتواخذني ولكن ابيك اتحط نفسك في مكاني اذا جيتك وانا مشتاق تقفي .. تجاهلني وكانك ماتراني واذا صديت وقلت ابرحل وقف قلبك على الباب ودعاني ولو سويت نفسي ما اشوفك يميل القلب صوبك ويحداني انا يابن الحلا اصعب حكايه كتبني الوقت ولكن ماقراني مضى عمري وتقدر تعتبرني غريب وفي زمن ماهو زماني زماني راح مع نصفي ونصفي نسى نفسه مع الوقت ونساني اساس الحزن والصحبه ثلاثه انا والصبر وسهيل اليماني واذامريت في بلاد الطفوله فتحت الصدر للحزن وطواني هنا دمعة جرت من عين ياهل هنا لاقيت همي والتقاني هنا باعتني الديره واهلها هنا ضحيت لسلطان وجفاني ... هنا حاولت اصيح وماسمعني سوى بعض الشوارع والمباني انا ياسيدي دقه جديمه بغيت اخذ من الوقت و خذاني على الانقاض واقف دون حيله اشوفك وجهتي بين المواني تعال وطف بايدينك حنيني تملكني وانا اشعلك حناني تعال وضمني ياتاج قلبي .. دخيلك لاتخليني عشاني .. انا شاعر عيونك ياحبيبي مع التحريف في بعض المعاني ومانيل المطالب بالتمني ولكن شوفتك كل الاماني محبة صادق النيه قصايد ومحبة ساقط النيه اغاني قسم بالله لو موتي بيدك واموت الفين مره ماكفاني اذا باقي من الطلقات طلقه دخيلك حطها بين المحاني ~[~ رصاصة الــرحـــ م ــه ~]ْ~للشاعر * عبدالله * بس ماعرف شو اسم ابوه هع |
احمد بدفاشه : عليوه علايه تصد عليه : هلا احمد : باجر بنسافر علايه فجت عينها : انسافررررر ؟؟ انته تخبلت احمد : لا وحياتج عاقل حبتين .. علايه ضحكت : هههه صدق صدق بنساافر والله وناسه احمد استانس : انتي موافقه علايه : حد يقولون له بتسافر ويقول لا .. احمد : الحمدللللله علايه باستفسار : بس تعال منو بيسافر ؟ احمد يرمس بالمصري : لوحدنا .. عليا : ااه كويس اووي احمد : بوكاهانتس . بوصي .. عليا تستهبل وياه : فييين احمد : طرزان بيطير .. عليا : ههههههههههههه وياويهك احمد : دووم ان شالله الضحكه عليا ابتسمت : وياك .. ( وبصوت عالي ) انزيييين وين بنسير احمد : مفاجعه .. عليا : هههههه اوكي مب لازم اعرف المهم اني اسافر واغير جو والله ماتعرف كيف ياامبيدو محتايه اني اغير جوو بالقوو احمد : فديتج والله عليا : انزين قوم ابويه مايدرون اني حامل ؟ احمد : لا ومابنخبرهم نحن بنسير اسبوع بالكثير وبنرد عليا : اوكي مب مشكله احمد : سيري زهبي شنطتج من اللحين عليا : ان شالله احمد يدخل السياره في الحوي : يالله اترياج باجر عليا : ان شالله .. نزلت عليا وها المره اتدش البيت وهي فيها روحين ... لا تقصد 3 ارواح .. روحها وروح ولدها الصغيرون . وروح حبيبها سلطون .. !! دشت وهي مرتاحه رغم بعد سلطان عنها ولكنها دوم تقول " عسى خير ..! " دشت الصاله وماحصلت حد كالعاده بيتهم دوم متفرقين كل حد مشغول في عمره ... دشت حجرتها وهي تحس بتعب ظهرت الشنطه وقامت تحط ثياب تقريبا لاسبوع ... شويه ويرن تيلفونها وكانت روضه متصله .. روضه : الوو عليا : هلا ولله روضه : اهليين وسهلييين عليا : وينج انتي مختفيه روضه : اتعرفين الدراسه وجي ... !!انتي شحالج شو مسويه من عقب العرس عليا تتنهد : اااااه بخير روضه : فيه شي عليا ترد قصتها ع ورا وتساند ع طرف الشبريه : لا لا بس باجر مسافره ويا عمي روضه : ليش ريلج وين ؟ عليا : مسافر .. روضه : اها عليا : عيل وين غايه عنج ؟ روضه : ليش انتي ماتعرفين عليا : شو اعرف ؟ روضه بحزن : حمد .. عليا زاغت :شو فيه روضه : لا لا مافيه شي .. بس حمد طلق غايه .. عليا انصدمت صدق :لييييييييييش !! روضه : محد يعرف الا انا .. عليا حبت تتاكد : ليكون عشان اللي بالي بالج روضه : تقصدين فيصل . عليا بألم : هيه ( وبهمس ) فيصل .. روضه دمعت : هيه عليا : .................... روضه : وفيه شي بعد ؟ عليا بحزن : شو روضه : فيصل خطبني .. عليا : وافقتي .. |
روضه : شو مينونه انا . صح انه فيصل ريال ومايعيبه شي . لكن انا مب نذله اخذ واحد كانت تحبه بنت عمي واتم هي تشوفه ويايه .. شو بيكون موقفي .. وموقفها .. مب حلو جي .. عليا : الله يجدم اللي فيه الخير فديتج .. بس ( وترددت ) شو حال حمد ؟ روضه : تعبان ياعلايه تعبان .. تعبان وايد ( وتصيح ) ماتتخلين عليوه .. كيف تام اول مره اشوفه جي .. عليا : وينه ؟ روضه : مسافر يكمل دراسه .. يتغرب مره ثانيه .. قبل اتغرب عشان هاذيج خانته .. واللحين اتغرب عشان حرمته خانته .. وانتي في قلبه ياعلايه .. انتي وبس .. عليا سكتت : .................. روضه : صح انج معرسه بس وربي الشاهد ع رمستي ياعليوه امايه اتعرف انه حمد يحبج من قبل لاياخذ غايه ... ولو انتي مب معرسه اللحين جان حمد خاطبنج ... لانه يموت فيج عليا : الله كريم ياروضه ها النصيب .. وحمدان شحاله من عقب العرس سرت كم مره المحل وماريته روضه : ههه حمدان .. الخطيب النيو عليا فجت عينها بوناسه :لاتقولييييييييييييين روضه : ههههه هيه على هواج عليا استانست صدق :فدييييييييييييتج والله تستاهلون حمدان شيخ الرياييل كلهم .. وشهادتي فيه مجروحه ها الريال ينحط ع الجرح يبرى والله روضه : احم احم بس بس مدحتيه لين ماقال بس عليا : ههههه يستاهل .. روضه : اوكي الغاليه بخليج لانه امايه تتصل ع الخط الثاني عليا : خلاص فديتج سلمي عليها .. روضه :يوصل وانتي بعد سلمي .. سكرت عليا عن روضه وهي تحس باحساس غريب وين كانت هي ها الفتره كلها ؟؟ شو استوى ... لها الدرجه كانت عازله عمرها .. عشان منو .. عشان سلطان .. اللي باعها وخلاها ... صدت تطالع تيلفونها وبحركة يائسه اتصلت ع رقمه وعطاها .. " ان الهاتف الذي طلبته مغلق .. او خارج نطاق الخدمه حاليا يرجى الاتصال فيما بعد " .. فرت تيلفونها ع الشبريه وسرحت في ها الدنيا وكيف تتغير في ظرف شهرين بس ..!! ......................... ......................... ......................... ......................... ......................... ............. البارت21 اليوم الثاني – المطار .. – يرجى من الساده المتوجهين الى مطار لندن هيثرو التوجه الى البوابه 123 ... احمد : يالله عليوه النداء الاخير علايه تشرب عصير : حشىى تونا واصلين احمد : زطي في الطياره يالله اركبي .. علايه : هههههههه انزين وسار يركبون الطياره وها المره علايه مستانسه صدق ماتعرف ليش ..!! بس جي احساس .. ركبو الطياره ويلسو علايه واحمد حذال بعض وعلايه طبعا صوب الدريشه واحمد صوب الممر .. احمد يربط حزام الامان وهو في باله اشياء واشياء عشان ها السيره ؟؟ ......................... ......................... ......................... ......................... ......................... ............. سلطان كان يالس في شقته وناوي يطلع برع لبس الجاكيت الطويل وعيونه على صورتها وهي تبتسم وجنها يالسه تشوفه ... " اتولهت عليج غناتي ... ليش سويتي جي .. خبريني ليش ؟؟ .. " وبحركه سريعه رد شعره ع ورا ..وصد ع المنظره اللي في الممر ويطالع شكله وايد اتغير .. شعره طول اكثر عن قبل ولحيته غلظت .. حط ايده ع لحيته وهو يتذكرها علايه : سلطون اوقف .. سلطان : ههههه عليوه ادري شو بتسوين علايه تضحك : ههههه انزين يوم تدري عيل خلاص سلطان : هاه يالله علايه : تعال بسلم عليك سلطان تم يضحك عليها واتجدمت له علايه وسلمت عليه وحطت خدها ع خده وتمت تحرك خدها ولحيته تنغزها وهي تضحك سلطان : ههههه عليوه بس عااد عليا : هههههه كشخه سلطان : ادري يالطفسه عليا خازت عنه وفجت عينها :انا طفسه !! سلطان بخبث : هييه انتي عيل هاي حركات بنت معرسه .. اهم شي الاخلاق يعني .. عليا تطالعه بنظره : هيه صح اهم شي الاخلاق ابتسم سلطان ونزل راسه وسار فتح الباب بيتحوط برع لانه ضاج من الشقه وهو مايعرف كم بيتم هني .. طلع سلطان وتام يفرك ايده ويطالع الناس وهم يمشون الجو كان رمادي من كثر الغيوم السود ويا لون الشير الاخضرر سبحان الله كيف طبيعتهم تريح البال .. التفت للكوفي اللي مجابلنه واشر له واحد متعرف عليه هو ورباعته وكلهم اصغر عنه بس يقزر الوقت وياهم .. رد سلطان لفافة الرقبه ع ورا وابتسم بألم .. وسار يكتم ع الجرح ويسايرهم ويسولف .. ولاجنه شي مستوي ......................... ......................... ......................... ......................... ......................... ............. غايه يالسه في الصاله وتطالع التلفزيون من يوم اتطلقت ومحد يروم يقول لها شي .. امها متغمضه عليها وابوها نفس الشي .. لكن حمدان من عرف انها اتطلقت ع طول سار وخطب مايبا يعور راسه ويا اخته اكثر من جي .. صح انه حمد ماطرى لهم انها خانته !! او انه كان لها علاقه ويا واحد .. وكتم هاا لشي وخلاه بينه وبينها .. بالعكس بين لهم انه هو اللي مايستاهلها .. وهو يبا يطلقها لانه ما ارتاح وياها وخاصه امه حست انه يبا علايه لين اللحين .. لكن ماخفي هو اعظم .. السالفه الصدقيه محد كان يعرفها الا روضه .. وعلايه ... وطبعا روضه عرفتها من غايه .. غايه ماكانت حاسه بالندم بالعكس كانت تحس بانه قيد وانفج عنها .. لكن كرهها وحقدها عمنها خلنها تبا اتشوف الناس كلهم شراتها .. حزن وكآبه وهم .. استوت تكره الكل .. ماتقارب حد ... هي تدري انه عقب كل اللي استوى فيصل مستحيل يرد لها ... تمت تجلب التلفزيون بقهر وردت حرتها في الريموت وهو ماله ذنب وتفكر " كانت حياتي حلوه وايد حلوه ويا فيصل .. بس حمد الحقير خرب كل شي .. ومن غير علايه الحيوانه .. ماكنت اتوقع انه حياتي كلها بتتغير جي .. مول ماتوقعت . " ......................... ......................... ......................... ......................... ......................... ............ وصلت علايه ويا عمها المطار ... وخلصو الاجراءات وسارو صوب الفندق وع طول وطوو راسهم ورقدو عنثر التعب لانه مارامو يرقدون في الطياره .. احمد نش عقب نص ساعه واتلبس وشاف علايه وهي راقده بهدوء وتم يطالع وييها وهي راقده وشو بيسوي عشانها عشان ماتحس بالحزن ... سار فتح الصاله وحصل ع حذال التلفزيون نوته مال الفندق وقلم رصاص سار وكتب لها انه بيظهر بيقضي حايه وبيرد ومابيتحير .. طلع احمد وهو ميت من البرد كان برد فضيع وطلع تيلفونه من مخباه وتم يدق ع تيلفون سلطان بس مايشله .. احمد يطالع التيلفون : اااخ يالهيس رد .. شويه ويرد سلطان : ألوو احمد : هااه تفيجت سلطان بتعب : شو فيك احمد احمد : قم هز طولك واطلع ابا اشوفك سلطان : احمدوه لاتتمصخر احمد : ياغبي انا في لندن سلطان بصدمه : اوووووووونه احمد يقلده : اووونه هيه اوونه سلطان : اوكي بييك بس انته وين ؟؟ وتلاقوو ع المكان وفي ظرف ربع ساعه وصل سلطان .. وسلم ع احمد بحراره .. لازم فيه ريحة علايه .. يلسو في كوفي .. سلطان يطالع احمد وهو ساكت واحمد بعد .. احمد نزل عينه وتم يلعب بالمفتاح اللي في ايده احمد : انا هني ييت وياها سلطان فتح عينه وثمه : جذااااااااااااااااب احمد : اصغر عيالك جذااب سلطان : وينها ؟ احمد : خليتها راقده تونا واصلين من ساعه تقريبا |
سلطان ويم ونزل راسه : اها احمد بجديه : اسمع انا يبتها هني لسبيين الاول اباها ترتاح نفسيا والثاني انته تتخذ قرارك تباها ولا لا .. اصلا كلنا نقول هذا شو ياه ؟؟ للعلم ابوها يتحسب انك ساير بتقضي شلغه وبترد ويتحسب انك ترمسها .. يعني علايه مفهمتنهم انها ترمسك في التيلفون .. وهي اصلا في الاساس ماتعرف شي عنك .. بس لانها لين اللحين تباك . ياخي انا اللي هو انا عمها وربيعك ماعرف ليش انته سويت كل ها !! .. وانا لانه انقهرت اكثر منها .. اشوف بنت اخويه كل يوم تذبل وساكته ومويمه وبعد مقهوره لكن مابيدها شي .. حبيت اني ارمس بدالها ... يبتها هني عشان تشوفها .. ولو ماتباها .. طلقها وخلنا نرد البلاد وتنسى وهي تنسى ويا الايام وانتو مب اول ناس تتطلقون ... اتصدق ( ويرفع عينه في عين سلطان بتحدي ) اهون لي اشوف بنت اخويه مطلقه ولا هذا حالها ... سلطان كل كلمه قالها احمد تطعنه وتجرحه كيف يخليها .. محد بيفهمه .. منو بيتحمل اللي فيه .. محد .. كلهم يلومونه .. ومافكروو في كل الضغط النفسي .. اللي يعانيه والسبب هي .. سلطان بتردد : يعني نطلق .. احمد انصدم ماكان متوقع انه سلطان يطلق بسرعه جي وبدون مقاومه شرات هاك اليوم يوم ردو من المطار لكن مستحيل احمد يصبر اكثر من جي .. احمد باصرار : هيه طلق ياسلطان .. سلطان يبتسم بألم : ان شالله لكم اللي تبونه احمد ابتسم بحزن ويقول في خاطره " ماتستاهلين يا بنت اخويه .." سلطان ينش عن الكرسي وهو يحس انه دموعه بتخونه جدام احمد : اسمحلي .. بترخص عنك وعطاه ظهره ومشى عنه ....احمد دفع الحساب بسرعه ونش وراه ويدوره بين الناس ويمشي بسرعه يبا يلحق عليه .. سلطان كان متساند ع يدار بنايه وجاسف ريل ومنزل الكاب ع ويه ومربع ايده .. وشاف احمد وهو خاطف جدامه وهو متاكد انه يدوره .. ! بس ماسواله سالفه وطنشه وتم على وضعه هذا ويهدي من رجفة قلبه قبل فراقها .. سلطان كان تعبان من الخاطر .. خلاص يبونه يطلق .. بيلطق .. التفكير ذبحه .. بيموت من الوسواس .. احمد يوم يأس من كثر مايدور قرر يرد لعلايه الشقه .. وهو خلاص يأس .. كان ناوي يصلح من بينهم بس ماشي فايده .. سلطان عزم .. ولازم يفتح ويا عليا الموضوع ويفهمها وهي بييها نصيبها ان شالله سلطان تم يمشي بانكسار .. وهو يسال عمره ... " يعني هذا هو الفراق ... !! ..خلاص ببعد مادام انه عندي اراده .. صفيت لها وكنت احسب انها صافلتي .. عليوه تبغين الحقيقه .. كرهت الحب وجهاده " علايه كانت واعيه من الاساس وتشرب كوفي وتطالع الناس من الدريشه وتحس بويع في بطنها بس مطنشه .. الجو روعه احلى منه ماشي ... يالسه تطالع من الدريشه وهي تدندن علايه : وش جرى لك صرت ماتسال .. يالغلا عني وعن احوالي .. شفت حال الورد من يذبل .. هذا حالي يابعد حالي ..!! دش احمد وهو متضايج .. خلاص سلطان بيطلقها وبيردون البلاد وهي مطلقه ... بس علايه من شافت عمها دش نشت ع طوول .. وهي شاقه الحلج حان تغني له : في غيابك كل شي يزعل .. تنتهي بالكون امالي .. !! احمد ابتسم لها " حليلج ماتعرفين ياعليوه .." احمد : هاه متى نشتي علايه : ماطولت لانه احس ببطني يعورني .. احمد باهتمام : وايد ولا شويه علايه : لا عادي ويع خفيف .. احمد :اها علايه : انته وين سرت ؟ احمد : الا هني علايه بدلع : امبيدوو .. قم نطلع نحووط .. احمد بحزم : لا علايه : ياسلام ييايين نيلس داخل احمد بجفا : هيه وخطف جدامها وهو متضايج وفصخ جاكيته وفره ع الغنفه ودش الحجره وسكر الباب وراه ... علايه استغربت وويمت يعني شو مثلاا اتم في الشقه وتطالع التلفزيون .. وردت تطالع من الدريشه وفتحتها شويه ودش هوا بارد طير خصلات شعرها وهي تبتسم .. سمعت صوت فتحت باب وصدت عا لباب وشافت عمها احمد يطالعها وهي توايج وابتسم لها مايبا يزعلها ... هو يايبنها هني عشان تستانس مب عشان تكدر بعمرها وخاصه انه اللي بييها مب شويه احمد يبتسم لها : نشي عليوي بنطلع علايه ماصدقت ع طول سارت دشت الحجره وطلعت من شنطتها الثياب ولبست عباتهاا المسكره وسكارف تركوازي ولبست جاكيت طويل لونه بيج وحطت ميكب خفيف وطلعت صغيرونه .. احمد يطالعها : هههههه شكلج جنج بعدج في الثنويه مب جنج ام علايه : هههه خلنا نعيش حياتنا احمد يقلدها : الحياه حلووه علايه تتذكر : بس اهم شي الاخلاق يعني ! احمد مستغرب : الاخلاق ... شو يخصه ! علايه صدت وهي تبتسم : ههههه ماشي يالله نظهر عن تغير رايك .. طلعو علايه واحمد وتموو يمشوون واااايد .. وااااايد .. المهم انه احمد يبعد علايه عن منطقتهم ويسير بها مكان بعيد شويه عن تلتقي ويا سلطان ويصير اللي مب في الحسبان ... علايه بتعب : اااااه احمد بس والله هلكت ارحمني احمد يغمز لها : بعيشج احلى ايام حتى احلى من شهر العسل علايه وقفت من طرى شهر العسل وويمت .. احمد صد عليها . احمد يضحك : خخخخخ ليش وقفتي علايه : ماله داعي تذكرني احمد يسحبها من ايدها : انته جي ولا جي تذكرين .. وبعدين غصبا عنج بتنسين فاهمه علايه : لو بسوي عمري ناسيه ( تيود بطنها ) وهذا بعد بنساه احمد : لا مابتنسينه بس ع الاقل ها الايام علايه تبتسم : ان شالله .. تمو يمشون مسافه طويله وهم يسولفون ومايحسون بالوقت .. ماخلو شي ماتناقشو فيه .. الخليج برع في الغرب ؟ اللي يدرسون برع ...؟؟ منو الزين .. ومنو الشين ...؟؟ شو سوالف البنات هني .. وسوالف الشباب .. ؟؟ وطبعا ماخلو سالفه في البلاد ماطروها .. لين ما اظلمت الدنيا .. علايه تطالع السما : حشى يا امبيدوو تعبت مايسوى علينا احمد يصد بعد فوق ويطالع السما : هههههه انزين بنسير نتعشى في مطعم ع السريع وبنرد البيت لانه تحيرنا علايه بابتسامه : اوكي يالله مشى بها احمد ودشو المطعم كان مطعم هادي وفيه اضاءه خفيفه وايد وتقريبا اغلب الموجودين اجانب .. وواحد خليجي ويا حرمته وشكلهم في شهر العسل .. سحب احمد الكرسي لعليا ويلست وهي تضحك اللي يشوفهم بيقول ريال وحرمته مب بنت وعمها .. وطلبو لهم اللي يبونه ويابلوهم الطلبيه وتمو يزطون شويه ورن تيلفون احمد وكان سلطان اللي متصل .. ع طول احمد شل التيلفون عن علايه تلمح الاسم .. احمد : الوه سلطان بضيج : هلا احمد احمد بجفا : اهلين سلطان : انته وين احمد : اتعشى ويا الاهل ( قال جي عشان علايه ماتحس انه سلطان ) سلطان : هيه وياك احمد : هيه سلطان بحزن : اها وتمو ساكتين فتره .. احمد : تامرني بشي سلطان : واللي طلبته اليوم احمد : شي راجع لك سلطان : اوكي .. احمد بجفا : اوكي سلطان : بخليك اللحين واخلاف بتصل لك احمد بسرعه : حياك الله وع طول بند عنه وهو منقهر صدق من سلطان .. مب طايع يقول شو فيه .. وشو مستوي ... !! ع الاقل لو قاله هوو يمكن يحل المشكله وياه بس هو ساكت ..ومب طايع ينطق بشي .. رفع راسه صوب علايه وهي تاكل ومندمجه رفعت علايه راسها وشافت عمها يشوفها .. عليا : اووهوو ( وتحط الشوكه في حلجها وتاكل الباستا ) ماحب يوم اكل حد يشوفني احمد سكت ورد يكمل اكله خلصو العشا وردو البيت وماطوولو شويه وردو يرقدوون عن المشي اللي مشوه اليوم .. سلطان جفاه النوم مب رايم يرقد .. خلاص عزم ع الطلاق ... مب رايم يتحمل .. صح انه قلبه يعوره عليها .. بس هو بعد شو ذنبه ها كله يستوي .. " ااااااه ياعليوه .. بخليج تشوفين حياتج بعيد عني .. انتي حلوه وبعدج صغيره ومليون واحد يباج .. بس .. ولدي ... وولدج .. او بنتي ... وبنتج .. شو مصيرهم .. شوو ! " ع الساعه 1 فليل نشت علايه وهي حاطه ايدها ع بطنها وتمسح بطنها وتقرى على عمرها الويع كل ماياه ويزيد ويزيد .. تمت تتجلب ع الشبريه وتذكر ربها الويع فضيع تحس بالموت .. لين ماقامت اتدمع ..بس زاد الويع فجأه .. وتمت تصيح بصوت عالي شوي احمد نش وهو زايغ .. وعفد من شبريته صوبها ويلس حذالها وخلاها طايحه في حضنه وتم يقرى عليها احمد ييقرى عليها : اييه بلاج ؟ علايه تتقرب من اذنه وبهمس : بمووت ( وتيود بطنها ) احمد : شوو يعورج علايه تصيح : ااااخ بمووت والله بمووت |
| الساعة الآن 06:16 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir