|
الجزء الثامن ها هي أمواجاً من ذكرياتك تدافعت لمخيلتي .. لمجرد النظر إليك أحساس كان خامد تفجر لرأيتك .. كبركان فار من شدة الحمم لحقتك عيني .. الى إين تذهب وتتركني الى اين,, الى السراب الى الضباب؟؟ .. ارجوك لا تًكرر الغياب .. قلبي لم يتبقى منه سوى آثار ,, جفت الانهار ومات الازهار .. وبكى عليه الاقارب والجار .. اريد اللحاق بك والاعتراف بجرمي .. وهو حبي لك ... الذي أتلف فوادي منذ ان عرفتك .. تعودت على الغرام الذي ينبع من عينيك الجذابه .. وتعودت على صوتك العذب بأنغامه ... الى ان تم التفجير .. بألغام رصت ما بين قلبي وأحشائي .. لتعلن أنتهاء .. عالم ساده الحب لمدةٍ قصيره اول ما طلعت عوشه كانت مب منتبهه وتطالع الجبس .. وويها محمر من كثر ما صاحت .. وبقايا دموع على عينها خليفه انتبه لها ودفر سيف يقوله طالع لكن سيف اول ما شافها اختنق .. مرت تمشي بسرعه ومحمد وراها يرمس ويا سبستيان .. خليفه : حلييلها بلاها شكلها مواطنه . سيف صابه مثل الجنوووون .: انا في حقيقه ولا خيال .. هذي عوشه ووراها ريلها .. عوشه تصيح .. متغير حالها .. عوشه مب هي الاوليه .. مب هي راعيه الابيتسامه الجذابه .. شو فيها ... شو صابها .. وليش الجبس على ايدها ... يا دور خليفه .. وسيف مب منتبه سرحااااان يفكر لو لحقتها جان عرفت وين سايره على الاقل اخليها تنتبه لوجودي خليفه يطالع سيف فوقه : سيييف سيف انتبه : هلا خليفه : دوري يالله سيف : اوكي دخلوا ع الدكتور ويلس يكشف عليه .. وسيف سرحااااااااان .. كان ياس على الكرسي اللي مجابل الدكتور وكان يحاول يشوف شو مكتوب في الاوراق اللي جدامه .. يمكن يشوف اسم عوشه --------------------------------------------------------------------------- محمد : تبين ريوق عوشه تهز راسها بلا محمد : عوشه شو تبين بالضبط خلينا نظهر عوشه زعقت عليه : ما ابا شي خلني بحالي طلع سر وين ما تبا محمد يود على ضروسه : بخليج تمي هنيه روحج انا طالع وطلع محمد عن عوشه وخلاها روحها عوشه حلفت انها ما تصييح ومسكت عمرها وتمت يالسه .. في هالوقت سيف كان مثل المينون .. : يبا يعرف مكان عوشه على الاقل يعرف اخبارها وليش هي تصيح .. وليش الجبس في ايدها .. خلص من عند الدكتور وقال حق مايد انه يبا يطلع روحه شوي يتمشى .. طلع من المستشفى وتم يدور يصد يمين ويسار في الشارع .. ركب تكسي ومشابه لين مكان معين ونزل تم يمشي ويطالع يمين ويسار وقف مره وحده وقال لنفسه : انا خبله ادورها في هالمكانات ؟؟ ! وين بحصلها في هالعالم .؟؟!!! رد سيف يمشي ودخل المحل عشان يشتري له شي يشربه .. اول ما دخل كان طالع ودفره بدون ما يدري وانجبت قهوت محمد سيف انصدم وتجمد مكانه .. محمد : Im sorry سيف يطالعه منصدم وقال : لا عادي محمد ضحك : ههههههه اعربي ما شاء الله سيف يحس انه متبلم وبعدها تكلم : هيه إماراتي محمد : يا مرحبا والله ومغط ايده سيف سلم عليه وخلى عمره كأنه ما شافه في العرس محمد : اسمحلي والله ما شفتك سيف كان يطالع وراه يمكن يشوف عوشه : مسموح محمد : شو تسوي في البلاد دراسه ولا ..؟؟! سيف مب عارف يتكلم ويا محمد حس بضيييجه فضييييعه جاست قلبه : يايين ويا ربيعنا سوى حادث وياين نعالجه محمد : هييه الله يعافيه سيف في هاللحظه قال ليش ما يسأله وين عايش يمكن في نفس الفندق اللي هو موجود فيه وكان يستهبل : وانته محمد : انا والله معرس ويايب الحرمه هنيه مبتسم وباينه عليه علامات الفرح سيف حس بضيق زياده : مبرووك محمد مبتسم : الله يبارك فييك سيف : الحين اسمحلي باخذلي شي وبسير عند الشباب محمد : مسموح بس خلنا نشوفك سيف : ان شاء الله بس وين ساكن ؟ محمد : والله حاليا ساكن ويا ربيعي مستضيفنا في بيته سيف حس بصدمه : في بيييته ؟؟؟! وعوشه ؟ كيف يالسه هناك محمد : في هالشارع وانته ؟ سيف : في هالفندق اللي مجابل هنيه محمد : اها , يالله عيل ما بأخرك تشرفت بك الغالي سيف متغايض : وانا اكثر محمد طلع من المكان وتم يطالعه سيف ليييين مشى شويه بعيد تم يلحقه ويلحقه لييين شافه دخل البيت سيف تقرب من البيت ويلس يطالعه هنييه يالسه عوشه حس بقبله يدق بسرعه .. تم يالس تحت يطالع يمكن تظهر عوشه من البيت ويا محمد استوت الساعه 12 الضهر وهو يالس قال خلني اسير وارد في وقت ثاني ورد صوب الفندق ----------------------------------------------------------------------- محمد : يالله ننزل نتغدى اليوم سبستيان طابخ غدى رهييييب طبخه ايطاليه بالربيان عوشه تطالعه : ما ابا غدى محمد : ليش عوشه ما حبت تكبر الموضوع : احس بويع في ايدي ما اقدر آكل محمد : انزين انا بأكلج عوشه : لا ما عليه بس ما ابا اكل محمد : انزين بييب لج الاكل هنييه المهم تاكلين مب زين ويهج مصفر عوشه : اوكي محمد نزل تحت وحط حق عوشه الاكل في صينيه ويابه فوق .. محمد : تبيني آكل وياج ولا عوشه : تفضل محمد : احم احم .. والله استانست عوشه تنهدت محمد : انزين ممكن ااكلج عوشه : لا عادي باكل بأيدي محمد : ايدج تعورج عوشه : انزين اليمين ما فيها شي محمد : لا لا انا ابا أأكلج مب انتي حرمتي ؟! عوشه : اوكي بس لقمه وحده محمد مبتسم عوشه مستغربه من محمد شو فيه ؟! --------------------------------------------------------------- سيف رد صوب الفندق متضاااااايق وحالته يعلم بها رب العالمين دش على مايد الحجره مايد : ويينك انته ؟ سيف متضايق : سرت اتمشى شويه مايد : وين تتمشى اتصل فيك كله مغلق .. سيف طلع تيلفونه من مخباه : فضى عني مايد استغرب : شو بلاك سيفوه ؟ سيف : ما شي ويتنهد مايد : والله لتقولي سيف : متضايق يا مايد مايد نش ويلس عداله : شو منه متضايق ؟ سيف : ميود قم عن ويهي ما ادري شو اسوي بعمري مايد : اوكي شكرا وانا اللي احاتيك سيف : مشكور ع المحاتاه مايد : تغديت سيف : ما لي نفس بطيح ارقد شويه اوكي مايد : خذ راحتك طاح سيف يرقد ومايد تم يطالع التيلفزيون ------------------------------------------------------------------------ محمد : انا ما اباج تتظايقين ولا تصيحين يا عوشه عوشه حست بضيج : ما اصيح من شي يا محمد من الهم محمد : اذا شفتي شي من صوبي طنشي يا عوشه لا تباليين عوشه وقفت : شو لا ابالي يا محمد انته تدرك شو تسوي انته تدمر حياته بنفسك .. لا دختر نفعك ولا شيات .. تركت المخدرات وطحت على الخمر .. من دماار لين دمااار .. صدري اصطك من الجقاره اللي ما تجلعها عن ثمك .. شو تباني اسوي يا محمد .. انته ريلي انته شي مني الحين .. كيف ما تباني ابالي .. وصاحت محمد تم يطالعه : عوشه انتي تدرين اني انسان مدمن وانا من اسبوعين من قطعت المخدرات وهالحبوب يالله تخليني ارتااح .. وهذا انا من زماااان اشربه قبل لا اخذج عوشه حست بنغزه في قلبها: يعترف ياربي وين الاحساس اللي فييك انته تدري بكل كلمه تقولها انا اتعذب .. محمد انته ماخذني عشان اتعذب ؟ خبرنني ..؟! محمد : لا تقولين جيه يا عويش انا ماخذنج اسعدج واحاول اسعدج بس انا ما ادري شو فيني ويلس عوشه : أي سعاده هذي وسكتت محمد : يعني من كلامج افهم انج مووول ما مريتي بلحظه حلوه ويااي قوليلي يا عوشه ؟ عوشه ساكته وتصيح بصمت محمد صد صوبها : خبريني وبعدها ساكته سحب ايدها اللي تعورها .. ويود عليها : قولي عوشه صرخت : محمد شو فيييييييييييك محمد هدها بسرعه .. وطلع من الحجره .. عوشه تمت تصيييح صياح من الالم ومن الهم |
------------------------------------------------------------------------ مر الوقت وسيف رقد ليييين العصر الساعه 5 مايد : سيف قم نش فاتتك صلاتيين سيف فتح عيونه : وليش ما وعيتني مايد : قلت اخليك ارقد عشان ترتاح سيف تنش : افففففففف مايد : انته فيك شي جايد والله ان ما قلتلي لازعل علييك سيف :انا وين وانته وين شل الفوطه ماله ودخل الحمام يسبح مايد : هذا شي في باله مب خالي الريال ------------------------------------------------------------------------ عوشه قفلت عليها الحجره ويلست .. قالت في خاطرها بدال هالصياح اللي ما له فايده ليش ما اسير اقرا لي شويه من القران .. اريح خاطري فطيم كان في خاطريها تقول لحد سالفه عوشه ... وكان قلبها يحاتي لييل نهار وتعبانه من هالسالفه .. فطيم كانت يالسه عند عمتها واهلها كلهم : تدرون قلبي على عوشه .. ما سمعت اخبارها من زماان ام سعيد : اكيد مستانسه ويا ريلها حليلها وما تحصل وقت تتصل يمكن ام خالد : خله تستاانس وييااه .. هي بعد ما شلت تلفونها وما ندري كم رقم ريلها سالم : تعالي هاك اليوم هي متصله من تيلفون ريلها على تيلفونج صح فطيم زاغت : هيه بس مسحته هاك اليوم سالم : اسمع انتوا يعني البنيه مسافره ويا ريلها بناخذ الرقم وبنتصل فيها نرمسها نسأل عن احوالها فطيم : لا ان شاء الله بتكون بخير لا تحاتون .. وتمت فطيم سكاته وتفكر ------------------------------------------------------------------------- محمد ما يا موووووليه للبيت وعوشه تمت لييين الساعه 6 تقرى قران ... بعدها نشت وفتحت الستاره وتمت توايق من الدريشه .. شافت فيها بلكون .. فتحت البلكون وكانت محطيه على راسها وقايتها .. ومتحجبه فيها .. سيف في هالوقت كان خاطره يسير صوب البيت اللي فيه عوشه يشوفها .. سيف : خليفه انا بسير شويه وبرد مايد : انا بيي ويااك ام خليفه : برايكم اظهروا الغالين نحن بنتم هنيه شويه سيف تضايق يوم قال مايد بيي وياك طلعوا وخذوا تكسي مايد :وين ساير سيف : بخبرك بعديين .. ويلس يخبر السواق بالمكان لي قاصدنه ... عوشه تمت واقفه في البلكون وتطالع الناس اللي يمشون وتطالع الاولاد اللي يلعبون في الحديقه عوشه فكرت تطلع عشان تشوف اليهال من قريب لبست عباتها .. وكان محد في البيت لا سبستيان ولا محمد ما بالت فيهم طلعت وصكت الباب وراها ... مشت ليييين الحديقه .. في هالوقت سيف كان يتمشى ويا مايد وكان مايد يسولف كعادته .. مايد : اندووك اطالع منو هنه ؟ سيف : منو ؟ مايد : هذا عمار ولد خالت امي سيف : ما اعرفه مايد : شوفه يالس هناك سيف : اوكي سرله سلم علييه مايد : وانته ؟ سيف عافس ويهه : ما لي بارض يا مايد مايد : سيف انته شو فيك ما عرفنالك سيف : هالايام احس انه فيني ضييق يمكن لانه خواني بيعرسون وانا محد مايد : بيعرسون الله يوقفهم بس انته لا تضيج بعمرك شحقه عااد ؟ هدى بالك يالغالي سيف : ان شاء الله مايد : اوكي الحين بسير اسلم علييه بتسير سيف : لا انا بتمشى شويه مايد : كيفك سيف : اسمحلي مايد مايد : بالحل مايد ساار صوب عمار وسلم علييه هو تم يطالعه وبعدها مشى ليين صوب البيت اللي فيه عوشه تم يطالع الباب ويقول في خاطره ابا ازاعق وازقرها بأعلى الصوت ألتفت صوب مايد وشافه مغزر في السوالف وصد صوب الحديقه اللي جدامه .. شاف الاولاد يلعبون بالكره .. شويه وسارت الكره صوبه .. ويودها .. الولد الصغير يأشرله بأنه ايبها صوبه .. فقام وتم يلعب فيها وينقزنها على ريوله لييين وصل صوبهم وكان مستانس .. والاولاد الصغار بعد استانسوا .. وتم يطلعب وياهم بالكره عوشه كانت يالسه بعييد شوي وتطالع الساير والمار في الحديقه .. صدت صوب الاولاد وشافت ها اللي يلعب وياهم ابتسمت تذكرت اخوها سالم عوشه : ياالله يا سالم فديتك والله وتنهدت .. وفديتكم يا حمد وحمييد .. وفديت فطيم وخالد ورويه .. دمعت عينها ونشت وتمت تتمشى وتتمشى ليين وصلت تحت الشيره كانت بعيده منهم بشوي .. يلست تحتها وتمت تطالعهم سيف شات الكره للولد بس ما صدها سييييييييييييييده يت على ويه عوشه .. وصرخت صرخه قويه سيف زااغ والاولاد وقفوا مكانهم ركض سيف صوب الشيره وكان ميت من الخوف يوم سمع صرخت الحرمه .. سيف ركض ووصل صوبها وهي كانت تتألم من الضربه تحس انه الدنيا مسوده في ويها سيف متسمر مكانه ما شاف ويه عوشه لانها كانت صاده تحت وميوده على خدها اول ما شاف العباه اختبص حاله .. سيف في خاطره : هذي اعربييه عوشه تتألم يوم شافت جوتي واقف صوبها تغشت سيف : تعورتي ؟ عوشه حست في هالوقت انه الدنيا تدوووور فيها من سمعت الصوت , هالصوت مب غريب علييه والكلمه هذي سمعتها من نفس الانسان اللي اشك في صوته الاجانب كانوا يسألونها ويقولون : انتي بخير رد عليهم سيف وقالهم انها بخير وهو بيتكفل بالموضوع عوشه ساكته وما ردت علييه وتحس انها تبا تصييح سيف زايغ بعده حط ايده على ركبه ونزل ليين عندها .. : اختي تعورتي ؟! عوشه زاغت و بعصبيه : لالالالا روح عني سيف كان وايد مرتبك سيف : انا بطلبلج الاسعاف عوشه حست انه اللي يكلمها سيف ما كانت تطالع صوبه بس تحس بوجوده تعرف صوته زييين من كل الاصواات .. سيف أول ما شاف أيدها مجبسه ضربته رعشه في قلبه وتم واقف مكانه وعوشه يالسه عوشه ميته من الخوف ليش هذا واقف عدالي ويطالعني شو يبا ؟ سيف حس كأنه يته ظربه في قلبه وقالها بصوت واطي وبويه منصدم: عوشه عوشه سمعتها بكل وضوح وحست كأنه حد يخنقها ... ظربة الكره مأثره فيها ولا هي في حقيقه سيف صد الصوب الثاني وضرب كفه ببكس قوى عوشه بعدها يالسه مكاانهااااا وسااكته وتطالع تحت وترجف سيف متضايق وما يعرف شو يقول بويه متفاجأ : مب انتي عوشه ؟ عوشه دموعها تيمعت في عينها وويع الضربه بعدها تعورها سيف نزل على ريوله وكان بعيد بخطوتين عنها وكان يزعق : خبريني مب انتي عوشه ؟ عوشه صاحت وعلى صياحها وبصوت متقطع : سيف سيف حس بخبال جاس راسه وبخوف نطق اسمها مره ثانيه : عوشه عوشه تمت تصيح وهي متغشيه سيف حس انه العبره ذابحتنه وكان يسأل عمره في خاطره ليش تصيح غمضته ؟ عوشه بطلت عن ويها وصدت وتمت تطالع سيف بعيون فيها دموع سيف ما تمالك نفسه ودمعت عينه ..: ليش تصيحييييين ليش هالدموع يا عوشه عوشه بصياح : انته شو يابك هنه .؟! سيف بعذاااااااب : عوشه قوليلي ليش تصيحيين عوشه تمسح دموعها : ولا شي سيف وهو يمسح دموعه : ليش ايدج جيه ؟ عوشه صدت الصوب الثاني : طحت وانكسرت ايدي سيف : تقصين عليه عوشه تطالع سيف : مالك خص سيف : انا ؟! ,,, مشكوره عوشه دمعت عينها : شو يايبنك هنه ؟ سيف : ربيعي سوى حادث على الدراجه ويايين نعالجه عوشه : الله يعافيه تمت ساكته وتطالعه ويطالعها حست بزيغه : انا لازم اسير سيف : عوشه تمي ابا اكلمج عوشه يايه بتنش بس ما قدرت تحس بدوار سيف تروع : شو فيج بسم الله عوشه : ما فيني شي بس اكيد محمد يا وما اباه يدورني سيف حس بغياض سيف : انا شفتج في المستشفى عوشه : شفتني ؟ متى سيف : كان خليفه عنده موعد عظام فشفتج طالعه من العياده بس ما صدقت عيني تموا ساكتيين عوشه ما تدري كيف تكلم سيف بهالطريقه يعني كانها تعرفه من زماان .,, تحس باحساس غريب في قلبها .. تحس انها موجوده في الامارات من شافت سيف وعوشه كانت تبا تغير السالفه : شحال خواتك سيف يطالعها وما شل عينه عنها : انتي اللي شحالج عوشه صدت الصوب الثاني : انا بخير سيف : حالج ما يسرني يا عوشه قلبي تقطع عليج وبصوت مغبون عوشه تمت اطالعه مبهته وبعدها حست انه لازم تقول جييه : سيف انته شو فيك اااااانا حرمه معرسه المفروض ما تيلس وياي سيف انصدم : بس يا عوشه عوشه : لا بس ولا شيات محمد ممكن يعرف بالسالفه وبعدها بيضررر وسكتت سيف تشنج مكانه يوم سمع بدايه الكلمه ونش : شووووو يضربج ؟ عوشه حست بأنه ويها بينفجر و ما كانت تعرف شو بتقول سيف معصب : انا متأكد انه هالكسر اللي في ايدج من سواياه عوشه عصبت وبعصبيه : ما يخصك سيف نفذ صبره وما قدر يتحمل ... وحس انه لازم يقول اللي في خاطره وبعصبيه : عوشه انتي شو تبين تسوين فيني انتي تعرفيين زين اني انا احبج احبج وربي الشاهد عوشه انصدمت بالكلمه اللي قالها سيف.................... قالها بصوت بعالي حست انه قلبها ارتج من الكلمه سيف بويه متضايق : متى بتفهمييين متى يا عوشه تذكرييين الورقه اللي كانت في جاكيتي خذتيها ادري انج خذتيها .. .. تذكرين مسجاتي تذكريين نظراتي تذكريين خطبتي لج اللي حددت يوم مماتي .؟! تذكرين ولا اذكرج .. كنت احبج بصمت يا عوشه وانتي مب حاسه كنت احبج كنت اموت بترابج ... في شهور بسيطه ياعوشه حبيتج نعم حبيتج من خاطري ,, وانتي الحين تقولين ما يخصج .. كيف ما يخصني وانا محتفظ في مشاعري ومتمسك فيها حتى لو انج عرستي ... قلبي ما طاوعني يا عوشه انساااج .. ما قدرت انسااج ومستحييل انسااج ... اقولج وارد اقولج اني احبج .. وليتج تذكرييين عوشه كاااانت ترتجف من الكلمات اللي سمعتها من سيف نشت بسرعه وركضت وسيف كان واقف وزعق بصوت عالي تذكرييييين ؟ سيف كانت مشاعره هاك الوقت متخالطه ما كان يعرف يتكلم وما كان يعرف عن شو يعبر .. حس انه افكاره ضاايعه , وكل اللي قاااله جدمها هو الصح ... قلبي دليلي وقلبي اللي تكلم مش انا .. عوشه ركضت لييين البييت ودخلت داخل وهي تصييح صياااح .. وما كان لا محمد ولا ربيعه داخل ركضت لين فوق وصكت على عمرها الباب ... سارت صوب الدريشه اللي كانت مجابله الحديقه وتمت تطالع وهي تصيح .. شو يابك لييي شوو كيف عرفت مكاني .. ؟ تبا تعذبني تبا تقطع فوادي اكثر من ما هو متقطع .؟! شويه وشافته هوو وربيعه تلاقوا وساروا يمشون عوشه : حسبي الله ونعم الوكييل .. حسبي الله ونعم الوكيل --------------------------------------------------------------------------------------------------------------- |
انا اول وحدة اقري البارت ها ووااااااااااااااايد حلو يسلمو غرشووووووووب واتريا البارت الياي بليييييييز نزله باسرع وقت تقدر تنزله فيه :121: |
وااااااااااااااااااااو وايد حلو البارت انا بنتظار التكمله |
تسلم غرشوووووووب وبانتظار التكمله ولو سمحت لاتتاخر علينا واااايد |
| الساعة الآن 07:06 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir