|
يسلموووو ع الـمروووووور .. وسووري ع التـآخيــر .. الفصل التاسع عشـر .. يلست ع الشبريه مستغربه شو سالفته و ليش محرج و اصلا ليش يطالعني بهاي النظرات ...انسدحت ع الشبريه يلست اطالع السقف و اتامل ..جفته وايد تأخر ..فكرت اطلع برع بس اكيد بحشرني . . بس وايد طول شو يسوي بعده زعلان مني هو قال ما نبى نضيع وقت و نعيش ع الاقل يومين حلوين و متفاهمين مع بعض بس الظاهر هو غير كلامه و اتفاقنا .. خلااص انا بطلع له برع و اذكره بكلامه..لبست شيلتي و ظهرت من الحجره ..صعدت فوق .. يلست ادوره حسيت راسي يدور بسبب البحر .يودت روحي ..لمحت الشمس تغرب لفتني غروبها .. روعه خبال . . تجدمت اكثر اتامل ها المنظر تمنيت اتكون عندي كاميرا اصور هالمنظر .. صديت ابسرعه الصوب الثاني يوم سمعت ضحكت مطر بصوت عالي .. وقفت ابمكاني اطالعه و مستغربه بنفس اللحظه منو هاي الي معاه!!!!!!! معقوله وحده من اهله ..شكله يعرفها من زمان ولا كيف جي يضحك وياها ولاصق فيها ...حطيت ايدي ع خصري اراقبه هاي الظاهر ما عندها اهل ولا كيف هادينها جي .. مدري شسوي لها مطر فدزته ع شكل غشمر فضحك مره ثانيه بصوت عالي عيل انا ما يضحك معاي جي ..حسيت قلبي يعورني ..كيف يسوي جي يهدني و يقعد مع غيري ...الله يسامحك .. رحت الصوب الثاني اراقب الشمس يوم تغرب و تختفى اخر خيوطها ضحكات مطر ترن باذوني ..انا مدري ليش يعاملني جي .. بس موقفه الحينه ذكرني يوم كان يتعرض علي قبل ما يخطبني شهقت لا يكون طبعه جي يغازل البنات .. يا حظي ..ويا قردي جان جي طبعه الله يعيني و يصبرني .. سمعت صوت رجولي يقول : السلام عليكم ما صديت صوب الصوت بس يوم تكرر مره ثانيه السلام حسيت انه يسلم علي فعدلت بوقفتي و طالعته ..بطلت اعيني متروعه يوم جفت نفس الشاب الي كان برمسني من ساعه ..التفت يمين و شمال عرفت انه يقصدني .. ابتسم : شحالج اختيه .. بلعت ريجي متروعه .. و ابتعدت عنه بس قال : لحظه طنشته و تفاجات بـ مطر واقف عند باب الحجره .. طالعني خطفته و دشيت ابا احسن بالامان ..لحقني و صكر الباب يلست ع الشبريه ابا احس بالامان .. سالني بحده : وين كنتي .. طالعته بغيض يرمسني بهاي النبره عيل يضحك مع هذيج البنيه ..تجرب مني و يلس جريب مني كرهت قربه مدري ليش حسيت بالشعو رالي نفسه كنت احس فيه يوم يتعرض علي قبل زواجي .. وقفت ابا ابتعد عنه بس زخ ايدي و يلسني بدفاشه فطالعته بنظرات عتب و لوم سالني : شو فيج ..وين طلعتي ؟؟ قلته : ما يخصك .. مطر: شو وووووووووو قلته انغزه : عيل اتعرف ترمس بهدوء و رزانه مع غيري و معاي ..ما اتعرف الا انك تجرحني و تعاملني بجفاف تغيرت ملامح ويهه بس تم يطالعني ..عقب قال : شو قصدج قلته : انا اروم ارمس أي حد يتعرض علي مثل ما كنت تتعرض علي قبل بس اخلااقي شهقت يوم عفد علي و زخني من لحيتي : رمسته صح كنتي معاه من ساعه طالعته بخوف تميت صاخه هز ويهي : كنتي معاه صححححح قولي قولي قلته بخوف: انته اتقول خلينا نستانس ها اليوم و رحت ادورك ابا اذكرك بها الكلاام .. خفت لمساته و تم يطالعني توقعت انه يعتذر لي و انه غلط بحقي بس قال : زين شو تبين مني طالعته مب فاهمه قصده فكمل : انتي ما تبين تعيش معاي مثل باجي الازواج . قلته : مب قبل نعرف بعض زين ما زين طالعني بنظرات و قال : شو تخافين تتوهقين و اتيبين عيال صديت عني ما كان ها قصدي ... تجرب مني و قال : زين انا موافق .. تفاجات من ردت فعله السريعه و قلته : و ما بتخليينني ابروحي بحجره هز راسه بمعنى لا قلته : و ما بتجرحني و بتزاعج علي هز راسه بمعنى لا ابتسمت له راضيه بس هو طالعني بنظرات تهديد و قال : بس ياويلج ان طريتي لي مره ثانيه الرمسه الي قلتيها توج طالعته و قلته : أي رمسه قال بنفاذ صبر : يوم قلتتي اتروم ترمسين غيري خفت من نظراته بس ابتسمت اطمنه و هزيت راسه بمعنى لا و قلته : وعد .. تفاجات يوم تجدم مني قال و نظراته علي : لا تستفزيني بهاي الابتسامه تميت واقفه اطالعه مب فاهمه قصده قال : ابتسامتج هاي تنرفزني وايد بطلت حلجي ارد عليه فسبقني : انتي شو تتحرين عمرج يعني ؟؟ شو فاكره عمرج قلته ابسرعه : ولا شي ؟؟ بس ولا جني تكلمت : حطي في بالج شي واحد .. رفعت راسي و طالعته اتريا يكمل كلامه بس جنه غير رايه لانه قال : يلا تعالي نظهر نتعشى برع .. تميت اطالعه مستغربه من هالانسان الي جدام اعيوني ..شو فيه منجلب علي ...مدري ليش التفت الصوب الثاني جنه ما يبى يطالعني ... سمعته يتنفس بصوت عالي .. حبيت الطف الجو فقلته : مطر .. طالعني بطرف اعيونه بلعت ريجي و قلته : ابا الطف الجو و ابتسم بس اخاف اتحرج علي .. سالني بجديه: انتي هبله ؟؟ قلته بكل ابصراحه: انته تضايج يوم اتجوفني ابتسم .. يبست ابمكاني يوم تجدم مني و قال : بديت اشك انج ياهل اتصدقين .. ابتسمت و قلته : مشكور .. دز يبهتي ع الخفيف و قالي من غير ما يبتسم : يلا بدلي بنطلع فوق نتعشى .. غمضت اعيوني و ضحكت بصوت خفيف : ان شاء الله وقف ابمكانه بس انا رحت صوب الكبت و قلته : زين بنروح نتعشى و نستانس .. "طالعته " اتصدق جفت عايله اماراتيه ..و عندهم بنت و توم و شكل الام بعد حامل ..ما شاء الله يخبلون ظهرت لي بدله و كملت كلامي مستانسه : الام طفرانه من عيالها و الاب يخفف عنها " سرت صوب الحمام و قبل ما ادش قلته " امبين يحبون بعض و متفاهمين وايد .. صكرت باب الحمام كان يطالعني و يسمع رمستي ما علق ع أي شي .. حسيت من نظراته مستغرب او ما اعرف شو كانت معنى نظراته بس بديت احس صار يقدرني ..اتمنى فهم قصدي و ان يمر علينا يوم انككون تفاهمنا و نكون اسره حلوه .. ظهرت من الحمام جفته يطالع من الدريشه .. و كانه يدوخ .. رحت صوب التسريحه التفت لي جفته من المنظره و قلته : مب ناوي تودرها .. كنت بصكر السحاب بس تفاجات يتجرب مني و يصككر عني حسيت ببروده بكل جسمي هالانسان يتحكم بمشاعري .. و ها الي بديت استوعبه ..مشاعري تكون غريبه و جنها اطاوعه وتوقف بصوبه ..رفعت نظراتي اطالعه من المنظره جفته يطالعني حسيتت شكله صار رايق .. الظاهر يوم يدوخ تتحسن نفسيه و تهدأ اعصابه هو اصلا يعصب ع أي شي حتتى لو اضحك يعصب عفانا الله .. ساسرني باذوني : لا اتطالعيني بهاي النظرات ..اعيونج تعذبني يا ام اعيون .. بلعت ريجي بصعوبه ..حسيت بقشعريره بغيت ابتعد عنه .. بس زخني فهمس بارتباك: مطر انا ما ابا .. كمل عني : اذا ما تبين لا اتطالعيني بهاي النظرات ... غمضت اعيوني و انا كارهه مشاعري بغيته يتم بقربي بغيته و بغيته بس ابتعد عني بنفس اللحظه و قال : يلا لبسي شيلتج .. رحت صوب شيلتي و عبايتي ..لفيت شعري و لبست شيلتي و عبايتي و ظهرنا من الحجره .. ضربني الهواء بويهي خذت نفس طويل .. عايبني الجو و ورعه المنظر .. قلته : صار ظلام الدنيا ليل .. طالعني و قال : حلاته .. قلته : هي و الله روعه .. وصلنا صوب المطاعم كنت بقعد بس زخني و قال : تعالي يلسي هالصوب .. استغربت من طلبه صديت لورا جفت الشاب الي حاول يكلمني قاعد بالطاوله الي ورانا .. عرفت ليش ما بغاني اقعد بها المكان حتى ما اجابله زين بعد ما فيني يسوي لنا مشاكل ويا مطر ...انا ما صدقت يرمسني عدل .. طلبنا اكلنا و قعدنا ناكل ما تكلمنا استغربت من هدوءه .. يلست اطالع الناس الموجودين قالي: شو ادورين ؟؟ قلته : عايله التوم علشان تجوفهم كيف يخبلون قال لي بحده : شو تبين فيهم خل الناس بحالهم .. تجربت منه و قلته بصوت واطي: خلنا نتعرف عليهم ..مطر طالعني بنظرات عرفت مب عايبنه فسكت عنه و كملت اكلي .. سالني: شوتبين تشربين . قلته : عصير اناناس .. نش من مكانه و راح ايب لي عصير احس الجو حلو هادي ووسط البحر بس مطر ما يعرف شي اسمه رومانسيه عفاني الله .. رفعت راسي يوم حسيت بواحد واقف عدالي : اختي لو سمحتي شهقت يوم جفت نفس الشاب : قلته انته ما تستحي ع ويهك "وطالعت مكان مطر وين واقف و قلته " ريلي هناك ..كيف اترمسني قال معتذر : اسف اسف ما كنت عارف انه ريلج ..اسف مره ثانيه و رجع مكانه يالله ها ناوي يسوي لي مشاكل .. رفعت راسي يوم جفت العصير ينحط جدامي بقوه حتى انجب منه و خيس الطاوله جفت مطر .. امرني: قومي يلاا .. وقفت ابسرعه و قلته : يلا انروح انا تعبانه .. زين حس فيني مطر زخني من ذراعي و قادني صوب حجرتنا .. ما كنت اعرف انه محرج اصلا .. ولالا كنت اعرف انه جاف ها الشاب الي وقف عدالي .. الا يوم دزني بدفاشه داخل الحجره .. يلست ع الشبريه و طالعته قلته : شوه انا ما يخصني .. جفت نظراته اتخوف الا تروع بلعت ريجي بخوف و قلته : انا ما اعرفه قال بخشونه: اتعرفينه و يعرفج منوه ها ؟؟ قلته بخوف: شعرفني فيه انا ما اعرفه ..و انا اول مره سكت و شهقت يوم تجرب مني .. دزني و انسدحت ع الشبريه عفد فوقي طالعته بخوف صرخ علي : لا اتطالعيني بها النظرات قلته بصوت واطي: ما اعرفه .. مطر بدفاشه: جذابه اتعرفينه .و الحينه بتقولين منو هاه .. قلته : انت تعرف اني ما اعرفه و تاخذها حجه علشان تجرب مني مطر يعلي صوته: نعم ؟؟؟؟؟.. حجه ..و ليش ادور حجج مب انتي حرمتي ؟؟ ذكرته: اتفجنا .... غمضت اعيوني يوم زاعج علي : بلا اتفاق بلا خرابيط اخر عمري وحده زطيه شراتج اتقص علي و اتحط لي اتفاقاات كرهته و كرهت اسلوبه الهمجي الي قاعد يرمسني فيه غمضت اعيوني ما بغيت اصيح جدامه يودت روحه بس ما استلمت حطيت ايدي ع صدره و حاولت ابعده عني دزيته بس تم واقف شرات الصخر ترجيته: انا ما اباك .."صرخت و انا اصيح " ما باك افهمنـي . دزيته فابتعد عني بس بعده كان جريب مني يلست و مسحت دموعي الي نزلت بعصبيه لانها خانتني و نزلت من دون اذني .. قهرني يوم قال : عيل انتي يوم كنت اتعرضلج كنتي تصديني اشمعنى ها ترمسينه طالعته بنظرات عتاب ما رديت عليه ادريبه لسانه طويل و ما بسكت صديت عنه بس هو ما يبى يسكت فقال : لانج تعرفينه صح قلته بضعف من غير ما اطالعه : محد تعرضلي غيرك و غيره التفت له و طالعته بعتب يوم قال بنبره تهديد : انتي جذابه بس يومين عشتهم وياج عرفت انج انسانه جذابه قلته من كل قلبي : انا ما احبك ..ولا اظني بيوم بحبك .. صديت يوم جرب ويه من ويهي وضحك : هههههههههههه كرهته حسيت باشمئزاز صوبه بس ما قدرت اسوي شي لانه مب فاتح لي المجال لصقني فيه اكثر بس كنت صاده عنه كارهه قربه .. اجبرني اطالعه و هو يقول لي كلامه : حتى انا ما احبج .. قلته ابسرعه : عيل ليش تزوجتني قال لي ابرود: علشان اوصل لحبيبتي .. قلته بقهر : بس انا ما احبك ضحك بصوت عالي : هههههههههههههههههههههههههههههههه و تم يضحك ..و انا اطالعه مستغربه بس سكت و قال : من زمان ما ضحكت جي و الله انج تحفه بلعت ريجي و حسيت بالاحراج يوم قال : من قال انتي حبيبتي .. ابا وحده غيرج و في بالي بتزوجها شهقت مصدومه من كلامه بس كمل ولا هامتنه مشاعري : بتزوجها اتريا اليوم الي بتكون لي و باخذها غصبن عن الكل حسيت دموعي تيمعت ابعيوني و قلته: عيل ليس تزوجتني ؟؟ رفع كتفه مب مهتم و ابتعد عني و قال : علشان اقنعهم اني ما احبها و خذتج و عقب باخخذها قلته: انته اتقول جي علشان اتغايضني ابتسم و ظهر زقاير بس ها الي فالح فيه يدوخ و طالعني و قال : و الله يا ميثه اني احبها و ما عشقت انسان كثرها و دوووم ارمسهاا باستمرار و احس اني جرحتها يوم تزوجتج و بعد ظلمتها .. قلته : اسكت "وحطيت ايدي ع اذوني " تجرب مني و شل ايديني يسمعني كلامه السم : و يوم بتزوجها اعتبري روحج انسانه مو مرتبطه ضربته ع صدره : بس اسكت اسكت . و يلست ع الشبريه متألمه من كلامه غطيت ويهي و يلست اصيح بصوت عالي بس هو طلع من الحجره و خلني باللالالاامي و احزاني ... للحظه ظنيت اني كنت احلم ..و الكلام الي قاله لي بس يبا يستفزني و يجرحني مثل ما جرحته يوم قلتله اني ما احبه اكيد حس بالاهانه امبلى علشان جي قال لي هاي الرمسه يبا يغايضني ... اصلا هو يحبني كان يلاحقني حتى انه خطبني و ما بغاني اعرف انه خاطبني لانه خاف اني ارفضه امبلى هذا الصح .... نقزت من رقادي يوم سمعت صوت عالي بالحجره بالحجره ...نقزت من مكاني .. ابسرعه ادور الصوت شهقت يوم جفت مطر منسدح عالارض شكله كان راقد ع الكنبه .. وقفت رحت صوبه جفته يالس يتحرطم مدري شو يقول و متضايج .. كتمت ضحكتي يوم جفته يتحرطم و يتحسس ع راسه مكان الطيحه .. همست : مطر ؟؟ رفع راسه يطالعني وقف ورد انسدح ع الكنبه غمضني قلته : تعال ارقد ع الشبريه قال بنبره جافه: وين ارقد حد يرقد جي ع الشبريه "اشر بيده بشكل منحني " انحرجت و قلته : ما حسيت ابروحي .."وطيت صوتي" اسفه .. قام من مكانه وراح صوب الشبريه و انسدح ..ابتسمت حسيته شرات اليهال بهاي الحركه .. رحت و انسدحت ع الطرف الثاني ...ورقدت ... فتحت اعيوني ..تجلبت ع الفراشي بكسل حسيت بانتعاش يوم شفت اشعه الشمس متسلله داخل حجرتي ..حجرتي !! انا وين ؟؟هي صح ..يلست ابمكاني ادور مطر جفته مو موجود عقدت حياتي ليش كم الساعه ..!! وقفت و رحت الحمام اتغسل و ابدل ملابسي .. يوم ظهرت جفت مطر يالس ع الكنبه و جنه يترياني .. ابتسمت له : صباح الخير.. رد من دون ابتسامه : زين قمتي ما بغيتي ..و اتقولين انا الي ارقد .. رفعت حياتي :ليش كم الساعه ؟؟ نش من مكانه و قال : 11 و شي يلا تعالي ناكل لنا شي . قلته : و الله اول مره اتاخر جي .. طالعني بنظرات و جنه يتطنز لازم عروس مرتاحه نفسيا .. رحت و مشطت شعري و قلته بصدق : الحمدلله و عسى دوم انكون مرتاحين .. نقزت يوم شات الكنبه شهقت و التفت له جفته محرج و يخزني بنظرات ابصراحه روعتني الا بسالكم هو ليش عصب الحينه !! قال بنبره جافه: اترياج برع خلصي .. تميت اراقبه الين ما طلع وصكر الباب بقوه ..شو بلااه ليش عصب ؟؟ الحينه ؟؟ خلصت و لبست شيلتي و ظهرت ..وقفت ادوره ما جفته التفت ابسرعه لوار يوم سمعت صوته من وراي : يلا ما بغيتي اتخلصين .. زخ ايدي بس حسيتت بلمسته دفاشه مب رقه ولا حنيه ..سكت و لحقته يلست تميت اطالع البحر ..روعه خبال قلت : مطر .. جفته مندمج ياكل و رد من غير ما يطالعني : هاه ترجيته: متى بنرجع البيت ؟ قال : ليش هالسؤال ترجيته: خلنا انكمل بعد يومين بليز روعه ابصراحه "وطالعت الناس الموجوده" جوف الكل مستانس نبرته حسيت فيها تهديه : ميثه لا اتنكدين عليه و الله بفرج في البحر .. بلعت ريجي بصعوبه طالعته و انا مب فاهمه ليش محرج قال : بذمتج انتي الحينه مستانسه ؟جي خفت لا اقول هي و يفرني في البحر فهزيت راسي فقال : انتي شو ما عندج دم ما اتحسين .. طالعته مب فاهمه له بس هو كمل : يعني انا الحينه ميت قهر و غيض ع الي اتسوينه فيني و انتي حضرتج مستانسه .. سالته : شو الي مغايضنك و مخلنك مقهور زين ؟!! بطلت اعيوني يوم صرخ بصوت عالي: ميييييييييييييييييييييييييييييييييييييثه .. تميت اطالعه و كل الي في الباخره يطالعونه في البدايه كان معصب مني و حسيته برتكب فيني جريمه و صج بفرني في البحر بس عقب يوم سمع صوت ياهل يصيح متروع من صوته و حس ان العالم كله اتطالعه انحرج فنزل راسه متلوم اول مره اجوف ه جي ابصراحه انا انحرجت منهم .. بس يوم جفت مطر جي متلوم و مب عارفه شو يسوي ابتسم و ضحكت بصوت خفيف ..رفع راسه يطالعني و الناس الجريبين مني يوم جافوني اضحك ضكوا بصوت عالي .. حطيت ايدي ع حلجي ابا اكتم ضحكتي بس ما قدرت فابتسم بس امبين عليه بعده محرج مني ؟؟ بس زين انجلب و ابتسم .. قال بصوت واطي : ما عليه بردها لج بتجوفين محد بأدبج غيري ضحكت: هههههههههههه انت انسان روعه رفع حياته مستغرب : لااااااااااااا عيل اتعرفين اتجاملين قلته : انا ما اجامل ها واقع .. خذ نفس و قال : قسم بالله ما عرفت لج انتي غير غير عن كل الي عرفتهم .. استانست : شهاده اعتز فيها .. حسيته مل من السالفه و قال : زين زين كملي اكلج ..انتي ما وراج الا الفضايح فضحتيني كلت لقمه و قلته : زين ما بتم هني قال بغيض: لو تميت زياده برتكب فيج جريمه خلني مشتاق لحبي .. ضحكت: زين عندك يدتك و امك و اهلك تتوله عليهم"و حبست دمعتي" بس انا مالي حد قال و كانه يتعمد يجرحني : اقصد بـ حبي حياتي الي احبها طالعته مب فاهمه كلامه عقب قال : انسانه احبها و ما برتاح الا يوم برتبط فيها .. حسيت قلبي تقطع و انا اسمع كلامه بس هو ما اهتم تم يكمل اكله .. بس انا ما قدرت ابلع ولا لقمه يعني هو من صجه عنده وحده يحبها سالته بحزن: ليش تزوجتني عيل ؟؟ قال من غير ما يطالعني : انتي السلم الي بوصلني لها .. ما تحملت كلامه كنت بوقف و بروح الحجره علشان اطلق العنان لدموعي ...بس مب حلو احطه بموقف جدام الناس و اقوم عنه و هو ياكل ..شليت عصير و يلست اشربه و انا ميته بداخلي ... حتى لو ما كانت من بينا علاقه حتى لو كانت تجمعنا ورقه بس شعور كريه انج تعرفين ها الانسان الي مرتبط فيج يحب وحده ثانيه .. طالعته يوم قال : خلصتي .. ما قدرت ارمسه فهزيت راسي بمعنى هي ابتسم و قال : شو بلاج همست بضيج: ماشي قال و جنه متعمد يضايجني : انا جي الحينه مستانس و مرتاح شراتج .. ووقف وقفت معاها لحقته دشينا الحجره ..يلست ع الشبريه .. و مب رايمه اتحمل الضيجه الي حست فيها ..مسانس لاني متضايجه قال : يلا زهبي اغراضنا تقريبا ع العصر بنكون في رااك . .بنمر الفندق انشيل اغراضنا بعد .. قلته : انت ليش اتسوي فيني جي انا بشو ضريتك "و منعت روحي من الصياح" جنه تفاجأ بكلامي سكت يطالعني عقب قال : ما سويت فيج شي ولا انتي ضريتيني بشي .. قلته : عيل شو معناته كلامه الي قلته ابتسم : هاي الصراحه انا احب وحده غيرج قلته: عيل ليش تزوجتني ؟؟ تجدم مني و قال : ليش انتي حاسه انا نحن متزوجين ؟؟ صديت عنه لاني صدق ما عرفت شو ارد من حقه يقول هاي الرمسه ..حط ايده ع ويهي و خلني التفت له : جاوبي انتي ما تبين بينا شي قلته: ابا نفهم بعض ..و نتقرب من بعض عقب ..."وسكت ما عرفت شو اقول " قال : ميثه تبين الصراحه حتى لو كانت علاقتنا غير و حلوه بس بعد باخذ الي احبها ..احبها اتعرفين شو يعني احبها .. وقفت ابسرعه و ابتعدت عنه كارهتنه و كارهه كلامه بس هو تجرب مني همس في أذوني: انا ما خذتج الا لان ما عندج حد في ها النيا اهلي لزقوني فيج غصب ..و انا ما كنت ابا نتزوج .. صحت بصمت و تميت امغمضه اعيوني متعذبه من كلامه و تجريحه و اهاناته لي ..الله يسامحك ..سمعت صوت الباب يتصكر ..يعني صدق البارحه كان يتكلم .. هو انقهر ليش جافني مستانسه علشان جي بغى يقهرني و يوم قهرني استانس احسه يكرهني و ما يحبني حرام عليه و غطيت ويهي بيدي و يلست اصيح ..و انا وحيده في وسط البحر .. سكت و ما هديت الا عقب ما اتخذت قرار اني اتصل بـ جمال اخوي اخليه يتصرف و اعيش معاه مجبور يستقبلني في بيته لاني اخته .. نار جمال وحرمته ولا نار مطر و كلامه الجارح و ما بتريا الين ما يتزوج علي .. بس كيف اتصل بجمال انا حتى موبايل ما عندي ..رحت صوب شنطتي فتحتها يلست ادور ورقه صغيره اذكر هني حطيتها فيها رقم جمال اخوي ..ما لقيتهاا بس تذكرت اني اعرف رقم وليد .. وصلنا السيف و نزلت من الباخره ما رمست مع مطر ولا هو اصلا كلمني كان باله مشغول في شي ثاني ..زخني من ايدي ورحنا صوب سيارته ركبتها ..حط اغراضنا في السياره وقال : ثواني بجوف الاداره .. راقبته الين ما اختفى .. شليت موبايله و اتصلت بـ وليد رد علي من اول رنه وليد : مرحبا قلته: هلا وليد: هلا و الله بها الصوت هلا بالغاليه .. قلته بجديه: وليد انا عمتك وليد:قولي و الله ع بالي وحده تبا تتعرف من وين لج هالرقم الغاوي هاه قلته بسرعه: وليد دخيلك قول جمال يتصل فيني ع هالرقم ضروري زين وليد :شو السالفه لحقتي تشتكي من ريلج كنت بصيح بس عضيت ع شفايفي: لا بس خله يتصل بي ضروري و صكرت و حذفت الرقم قبل ما يرد مطر ..يلست اتامل البحر هل الي سويته صح او غلط ؟؟ بس انا مقتنعه بالي اسويه .. شويه وركب مطر السياره ما شك اني تعبثت في موبايله .. كان هادي و موليه ما رمس .. مرينا الفندق شلينا باجي اغراضنا ... الحينه بروح بيته بس انا ما ابا ادشه ولا ابا اعيش معاه خلااص .. يوم عنده انسانه ثانيه شو يبا فيني و احسن شي سويته يوم خليت بيني و بينه حدود .. التفت له و دق قلبي بقوه يوم قال : - ها اخوج جمال يتصل ..؟؟ بجوفه شو يبا ؟؟ >>>>>>>> كــــــــــــــــــــــــــــت .. |
تسلم ايدج ع هالبارت النااااااااااااااااااايس و نتريا البااااااااااااااااااااااااااااااااااااااااااااااا اااااااااااقي |
طرررر القصـه وربييه نرقب البـآآآرت النـــيوو .. |
مشكووووووووووووووووووووووووره ع البارت ولا اطولييييييين بعد |
يسلموو ع المرووور .. الفصل العشرون .... أحوال العاشقين أحوال..كل يوم لها حال..فيها الدموع فيها الفرح فيها اللي ذاب واللي إنجرح..دنيا غريبة .. دنياي أنا ودنياك دنيا عجيبة .. مكتوب علي فرقاك..دنيا غريبة .. دنيا عجيبة راقبته يوم رد ع التلفون ..بلعت ريجي الحينه بعرف مطر اني اتعبثت في موبيله و كلمت وليد سمعته يسلم عليه و يسال عن اخباره و شويه عطاني الموبايل ما عرفت كيف بقول جدام مطر و بصدمه يوم بخبر جمال ايي ياخذني عنده ... جمال: مرحبا ميثه اشحالج؟؟ قلته : بخير شخبارك نته ؟؟ و اخبار اهللك جمال: الحمدلله مرتاحيين ..بغيت اسالج قلته: وليد كلمك ؟؟ جفت مطر يطالعني عقب رد يطالع الشارع بس سمعت جمال يقول: لا ليش خبرتيه يتصل فيني قلته: هي .. جمال: لا بعده اا متصل بالصدفه زين بعد اكيد تفكرين مثل ما انا افكر كنت بقوله لا انا اباك تاخذني عندك.. بداخلي كنت عارفه انه برفض و ما بتحمل مسؤليتي بس سبقني و قال : كنت ابا اسالج متى بنجسم الورث بطلت اعيوني و قلت: شو ؟؟ جمال : شو شو ..يعني ما اتعرفين لازم بنجسم التركه نزلت دموع من اعيوني متالمه ما توقعت جمال يتصل بي بـ ثالث يوم من زواجنا و يرمسني عن الورث عفانا الله عيل شو بسوي لو عرف اني ناويه اعيش وياه همست: انته اتعرف ابوي ما عنده شي غير الشؤون و الحينه اكيد بقطعونها التفت لي مطر بس جفته مركز ع الشارع بس مليون بالميه كان يسمع كلامي و فهم ليش جمال متصل صدمني يوم قال: هي ادري بس لا تنسين البيت .. عليت صوتي: بيت ابوي ! جمال شكله بدا يعصب: هي بنبيعه و كل واحد ياخذ نصيبه .. قلته : حرام عليك ما بقى لي في الدنيا غير هالبيت في ريحت ابوي "عضيت ع شفايفي امنع دموعي تتحدر" جمال: لا و الله عيل عطيني حصتي من البيت و انتي اشبعي فيه .."تميت ساكته و كمل كلامه" انا بمر عليج راس الخيممه و بنروح المحكمه بنجاسم حق البيت ..جان متعلقه فيه ببيعج حصتي من البيت قلته بغيض : من وين لي ... جمال : عيل بنبيعه "وصكر الخط بويهي " حطيت الموبايل و اتساندت ع السيت متضايجه ..غمضت اعيوني ..جمال بحياته ما سال عن ابوي ولا جافه الا باخر ايامه و الحينه مشتط يبا يبيع البيت حرام عليه و اذا باعه انا وين بروح ؟؟ وين بعيش .. غطيت ويهي بيدي وصحت مب متحمله مستحيل ما ادش بيت ابوي ما اقدر .. مطر : شو فيج ميثه ليش اتصيحين .. صحت اكثر يوم سمعت صوت مطر حتى ها انا ما ابا اعيش معاه ..قلبه متعلق بوحده غيري ..عيل وين اروح حاول يشيل ايدي من اعيوني بس انا ما طعت سالني: شو قالج جمال ..؟؟ يبا يبيع البيت هزيت راسي بمعنى هي مطر: يبا حقه هاه .. بعد هزيت راسي بمعنى هي مطر بغيض: الحيننه يبا حقه و يوم ابوه عايش ما سال عنه شلت ايدي عن ويهي و طالعت مطر و قلته: يباني اعطيه حقه من البيت و اخذ البيت لاني ما ابى ابيعه "صحت بعذاب" يعرف ان ما عندي شي بس يبا يجتلني ..و يحرمني من ريحه ابوي .. مطر: بحياتي ما جفت زطي مثل هالانسان عنبوه ..يموت ع البيزات "فاجأني يوم مسح دموعي بطرف صبعه و قال " زين لا اتصيحين .. قلته و انا ميته بداخلي: يبا ايي راس الخيمه بعد كم يوم و انروح المحكمه مطر: مستعيل ..واايد .."ابتسم" انا ع بالي متصل بج علشان يبارك لج زخيت ايد مطر الي كانت تلمس خدي و طالعته : اظن عقب ما يبيع البيت و ياخذ حقه ما بسال عني موليه بنساني رص مطر ع ايدي و قال: شو تبينه انتي اصلا مب محتاجتنه .. همست و انا متاثره بلمساته: حتى وليد بحرمني منه وليد غير عنه استغربت يوم هز ايدي بقوه: باجر وليد بكـبر و بيكون مسؤل عن نفسه و اذا صج يعزج بسال عنج .. خذت نفس مب عارفه شسوي ..رن موبايله فترك ايدي حسيت بشعور فضيع و جني خسرت شي بس ايده اتم في حضن ايدي علشان احس بالامان وياه ما بقى لي بالدنيا غيره و خاصه يوم قرر جمال يبيع بيت ابوي ..عندي بيت خالوه بس ما اقدر اعيش وياهم .. كيف ؟؟؟ ما باخذ راحتي .. كانوا المتصلين اهله يسالون متى بنوصل البيت و قالهم ع وقت العشى ..كنت اطالع برع و بالي مشغول في كلام جمال ..خلص كلامه عقب ما زخ ايدي ... التفت له قال :امايه و منور يسلمون عليج قلته : الله يسلمهم .. قل لي : .. لا تضايجين و تفكرين واايد ...ترا الحينه بجوفونج اهلي و طبعا مب حلو جي يكون شكلج بيردونها علي قلته بصدق: غصبن عني .. قال: بنزلج الصالون اتعدلي و يوم بتخلصين بمر عليج قلته ابسرعه: ما يحتاي طالعني بسرعه: لا و الله تبين اهلي جي يشوفونج ابرايج اذا انج مب حاسه عروس بس انا ابا احس و احسس اهلي اني معرس .. صديت عنه ما عرفت شو ارد عليه التفت له يوم قال : فديت راس الخيمه و اهلها .. طالعني بنظرات خبث و ابتسم صديت عنه ادري يقصد الي يحبها حبها و اشبع فيها .. قلته من غير ما اطالعه : نزلني بالاول بيت خالوه .. رد ابسرعه: لاحقه على بيت خالتج طالعته: بسلم عليهم .. سالني: منو بيت خالتج .. ذكرته: قلتلك سلمى بنت.. قاطعني و قال بسرعه: لا لا لا لا سالته: شو لالا مطر: يعني ماشي سيره هم يبونج خلهم اييون و يسالون عنج .. قلته: ما فيها شي لو سرت لهم .. بس بسأأأل عليهم قال بـ عنااد : لا "وطالعني بنظرات جديه" من نبره صوته و نظراته عرفت انه ما بغير رايه سالته مستغربه: ليش ؟؟ ما رد و تم يطالع الشارع .. اسلوبه موليه مب حلو بس انا بعد سكت عنه اصلا ما عنده رد مقنع علشان جي سكت .. وقف عند صالون و قال لي: بمر عليج عقب ساعه قلته :انته شدراك ها صالون اوكى ولا مطر: دوم اييب عزوه و منوري قلته: كيف اتصل فيك ..ما عندي موبايل .. مطر: بقضى كم شغله و بيي اترياج يوم بتخلصين اطلعي لي عقب ساعه و نص خلصت ما صدقت يوم جفت شكلي في المنظره حسيت احلى من اول يوم عرسي ..ابتسمت لنفسي مستانسه .. الحينه مطر بستانس ع شكلي ... تغشيت و ظهرت من الصالون ركبت سيارته كنت متغشيه .. جفت الدنيا ظلاام ... مسرع مر الوقت .. تفاجأ يوم جفاني جنه اول مره يجوفني حتى نظراته كانت وايد غير خلتني اتلوم منه زقرني : ميثه التفت له و طالعته قال لي : هذي انتي .. ابتسمت له : هي انا منو غيري .. مطر: تغيرتي وايد انتي صج جميله اجمل ما رات عيني ..ما شاء الله نزلت راسي منحرجه منه ... حتى ما سمعنى هاي الرمسه باول يوم لنا ..تذكرت اول ليله و هذي تتسمى ليله عرس.. سمعته يقول: اتخبيلن الحينه اهلي بتفاجأون فيج .. قلته : زين مطر قبل ما انروح بيت اهلك بمر بيت ابوي طالعني فقلته : بس بجوفه سالني: عندج غرض هناك هزيت راسي بمعنى لا : ما عندي شي بس بجوفه ابتسم و قال يتمصخر: يمكن تدهور البيت خلااص خرابه طنشته و قلته : من توفى ابوي ما دشيته مطر: عيل بتروحين تصيحين هناك و تخربين مكياجج اسف .. قلته : دخيلك لا تردني .. سمعته يقول: زين بس اذا صحتي ياو يلج ويل ضحكت ع اسلوبه مرينا صوب بيت ابوي .. طالعته اشتقت لها المكان مطر : شو عايبنج بها المتحف .. طنشته و نزلت من سيارته مطر موليه ما يراعي مشاعري ...فتحت البيت .. و دخلت .. طاحت اعيوني ع زاويه تذكرتها هني بها المكان هذاك اليوم عفد واحد في بيتنا حضني و جنه كان حلم تفاجات يوم جفت مطر وواقف وراي و يطالع نفس المكان الي كنت اطالعه ..طنشت و كملت طريجي ..فتحت باب الصاله ... التتفت صوبي يوم قال : لا تتأخرين يتريونا ولا تقعدين اتصيحين قلته : ما بدش؟؟ هز راسه بمعنى لا : اخاف يطيح فوقي السقف .. تنهدت و قلت بخاطري الله يهديك ..دشيت داخل حسيت بنار تحرقني البيت مصكر عليه فتره .. حطيت ايدي ع صدري شغلت اللمبه .. طاحت اعيوني ع حجره ابوي ..كنت بدشها بس ما قدرت اتجدم خطوه ما هانت علي نفسي ..ها المشاعر نفسها صابتني يوم توفت امايه و الحينه ابوي ..صديت الصوب الثاني و طاحت اعيوني ع باب حجرتي .. خطيت صوبها فتحت الباب كانت حجره صغيره وايد و ع قدي ..بس كنت احبها وايد لانها حضنت دموعي و احزاني و افراحي .. عضيت ع شفايفي جمال يبا يحرمني من كل ذكرى فيها البيت عضيت ع شفايفي ..امنع عبراتي اتهل ..نقزت يوم سمعت حس مطر يزقرني : ميثه ؟؟ قلته : انا هني .. وقفت عند باب حجرتي جفته واقف برع باب الصاله يوايق ..تم يطالع البيت من داخل ما عيبتني نظراته ..سكت اراقبه .. سالني : شو اتصيحين قلته : احاول امسك روحي بس نظراتك هاي بتخليني اصيح .. وطي راسه و دش الصاله ابتسمت وايد طويل جافني ابتسم له فقال : سقف بيتكم واطي ضحكت : ههه ههههه لا انت طويل حبتين .. تجدم داخل و تم يطالع الين ما وصل صوبي سالني : ميثه طالعته فكمل: كيف كنتوا عايشين هني .. طنشته و قلته : هاي غرفه بابا و هاي حجرتي .."وايق ع حجرتي بس ما علق " و ها حمام مطر : بس رفعت جتوفي : بس قال : جمال اخوج الحينه متصل طمعان بهاي الحجرتين و الحمام .. خذت نفس و صديت عنه و قلته : يبا يحرمني من كل ذكرى حلوه لي في ها البيت .. سالني : وين مطبخكم التفت له : ما عندنا مطبخ بس برع مسوي شرات ال كمل عني : هي لكراج الي هناك قلته : انت دوم جي تتطنز ع الناس ابتسم و تجدم مني تفاجات يوم حضن ويهي بيديه و قال : ما اتطنز بس صج بيتكم وايد جديم يباله صيانه من اول و تالي قلته و انا احس بحراره ايده : جمال يبا يبيعه مطر .. غصبن عني دمعت اعيوني قال بنبره حلوه : لا اتصيحين دخيلج لا اتخربين زينتج .. عضيت ع شفايفي لصق فيني اكثر يوم قلته :: ها البيت وايد غالي علي .. فاجأني مطر: زين انا بشتري بيت ابوج شهقت: لا طالعني مستغرب و قال : شو يعني لا ؟؟ سكت ما عرفت شو اقوله يعني اقوله حتى انت ما منك أمان يمكن باجر تتطلقني و ما يكون بيني و بينك أي صله .. شو بستفيد انا تراني نفس الشي خسرت البيت جنه فهم قصدي فقال : بسجله باسمج هديه مني لج .. طالعته مب مصدقه كلامه ..قلته : صعب مطر : ماشي حل غيره ..انا بعطي جمال حقه الي بيطلع له من البيت ..و بسجل البيت باسمج شو رايج .. سكت ما علقت ابصراحه ما صدق..هالانسان ينخاف منه همس: شو مب مصدقه بطلت اعيوني ها كيف يقرا افكاري ؟؟ قلته: يصير خير لي ما ايي جمال مطر : زين يلا انروح البيت .. هزيت راسي بمعنى هي و طالعت كل زاويه بها البيت .. و ظهرنا .. ظهرت من بيت ابوي ابدا حياه يديده بين اهل مطر و مطر .. الله العالم شو يترياني هناك ... وصلنا بيت مطر ... كان كبير ووسيع لازم مطر يتطز ع بيتنا دام ها بيته .. زخ ايدي طالعته كان مستانس : شو فيج قلته : ماشي قال لي : خايفه ؟؟ هزيت راسي بمعنى هي و قلته : ما اعرف شو حياتي بتكون هني مطر: بتستانسين و بترتاحين ...عزه طيبه و سعود كافي شره و خيره ما يخصه بحد في البيت .."دز ويهي برقه و قال " بس عاد غيري هالملامح .. ابتسمت له و قلته : يلا ننزل .. نزلت من سياره مطر ... سبقني بس انا لحقته و زخيت ايده مدري ليش يمكن لاني مرتبكه شويه .. بس هو ما ردني وزخ ايدي و رص عليها بس من غير ما يطالعني زين بعد علشان ما ارتبك زياده .. دشينا البيت .. شهقت يوم جفت بالونات و منورات صارت جدامي من الصدمه تروعت و لصقت بمطر ..بس عقب ..اداركت الموقف .. وضحكننا كلنا .. كان ترحيب بسيط من اهله .. مطر: هههههههههههه روعتوا عروسي .. شو ها انتوا جفت امه تحضنه و تبارك له و منوري سلمت علي و عقب سلمت ع امه ..و عزووه .. حسيت بوناسه ... مطر: وينها عيوزي .. امايه : هذيج ها داخل الحينه بتتشره عليك .. مطر : زين الله يعينا .. دشينا الصاله ..كنت احس بداخلي فرحانه و مستانسه لان صار عندي اهل ..صج ما حسيت بالغربه جفتم كلهم يضحكون و مستانسين .. جفنا يدووه واقفه و جنها كنت تبا تطلع .. حضنها مطر ..اول مره اجوف جي حنون .. يدوه: يلي ما تسحي ..نزلي ضحكنا عليها و ضحك مطر و هي تزاعج متروعه: نزلني بتطيحني ..لا بركه فيك .. مطر: بتتشرهين عليه يدوه:شوووو اباك نزلني .. نزلها مطر و باسسسسسسها دزته تبعده عنها: خوز عني ..هاذي حركاتك مب علي ..لكن شو اقول مكر امك فيك سمعت عموه اتقول: شو يخصها امه الحينه انتي موليه ما بتتغيرن منيره: ميثه فديتج اول شي في بيتنا لازم تتقبلين حشره امايه و يدوه كل ضرابه ..بس هنتينتهن طيبات و الله .. يرني مطر من ايدي و قال : يدوه هذي عروسي الغاويه يدوه اتسلم علي: ما شاء الله ما شاء الله تبارك الله ...تف تف تف مطر يلوي علي و انا كنت منحرجه من حركاته احسه يبالغ حبتين : شو رايج فيها قمر ..بسج خيستيينا .. يدوه انهدت عليه : مب المهم حلوه و قمر المهم تحترمها هذي وحيده وولا اتخلي امك تضارب وياها شرات ما اتسوي حق حررمه اخوك .. حسيت كلامها قوي بس ام مطر راحت و يلست امبين عليها مب عايبنها الكلام بس شكلها متعود مطر : ان شاء الله بس هدي لا اتعصبين . يدوه : الحينه لا تقعد تسهر طول الليل و تودرحرمتك ابروحها ... تأدب و غد ريال . طالعت مطر جفته رفع حياته و قال : خيبه جنج ما صدقتي جفتيني منيره: هههههههه دواك خلها تستلمك .. و تجلع اعيونك بعد .. مطر: انطبي انتي وينه ولدج الدب .. حسيت مطر مستانس و يسولف ويا اهله جنه انسان ثاني ... منيره: حرام عليك صل ع النبي بتاكل ولدي ... عزوه فاجأتني يوم زختني من ايدي : تعالي ميثه براويج حجرتي .. رحت معاها التفت لمطر يوم قال : رديها ابسرعه .. التفت لي مطر مبتسمه كشخه بعاملني غير ويا اهل عيل شو سالفه الي يحبها ما عرفت له يقص علي يبا يغايضني .. لحقتنا منيره: لا و الله انا بروح وياكم سمعت صوت ام مطر : ودروها عائشه الحينه تبعوا اليديده .. ما سمعت الباجي بس اعتقد عائشه حرمة اخوهم طارق ... دشينا حجره عزه كانت روعه عزه : شو رايج بحجرتي .. يلست اطالع الوانها روعه ..حلو خبال ... فخمه وايد .. منيره :ش و مب قادره اتعبرين عن رايج ضحكنا : هههههههههه قلتهن : لا و الله ورعه ..عيبني لونها ..كشخه احب الون الوردي .. يلست عزه ع الشبريه تتنقز : ها مطر سواها لي و شرا لي الاثاث بس انا كنت اختار و هو يسوي .. يلسنا انا و منيره ع الكنبه منيره : مطور مدلعنها و الله و يشتري لها كل شي .. قلتها : حظي حلو في ريلي .. منيره: هي هو صح عصبي و ما يرضى بالغلط بس بعد مدلعها هي و سعود .. سالتهم: سعود اصغر واحد فيكم ؟؟ عزه: هي .. منيره: يشبه مطر بكل شي .. شو رايج بريلج ما قلتلج طيوب و ينحب.. هزيت راسي و الله ما عرفت شو ارد عليها .. قلتها: عزه بعد فيها شبه من مطر .. عزه : ها كمبيوتر ي .. قلتها: ما اعرف استخدمه .. عزه : بعلمج.. عادي .. منيره: عيل انا كل يوم بيي بيتنا شكلكم بتترابعون و بتخلوني بحالي .. عزه: انتي عندج عائشه و انا ميثه .. منيره: تبين ميثه علشان مطور ياخذج كل مكان ..ولا تنسين حبيبتي ميثه كانت جارتي و انا الي خطبتها حق مطر بعد ما سأل عنها "وغمزت لي " عزه: خخخخخخخخخخخ سالتهم: عائشه حرمه طارق منيره : هي ..و هي حامل .الحينه .. عزه: عقبالج يا حلوه ابتسمت .. وايد يحرجوني ..و انا ما اعرف شو ارد عليهم ... صخينا يوم سمعنا صوت ياهل يصيح من برع .. شويه و انفتح باب حجره عزه جفت شاب شايل ياهل وشكله ويهه معتفس ..ابتسمت عرفت ان ها سعود .. نشت منيره: فديته ولدي متى نش من الرقاد .. سعود : تعالي يودي هالحشره .. بس صخت يوم انتبه لي فسكت .. عزه: تعال سلم ع حرمة مطر هذي ميثه .. نظرات يوم طالع عزه شرات مطر مره .. قلته: شحالك سعود ؟؟ قال : بخير "وصكر الباب " منيره: ول ..ميثه تعودي ع حركاته دفش تراه ضحكت و قلت بخاطري منوه اخوه يا ناس ..طالع ع مطر .. عزه: دفش ع مطور .. منيره عاتبتها : عزوووووووووه . ضحكنا انا و عزه: هههههههههه جنج تقرين افكاري .. يلسنا انلاعب بدر ولد منيره حسيت ان نفسيتي بترتاح في ها البيت .. و حسيت ان الله عوضني باهل .. ينحطون ع الجرح و يبرى يلست عزوه ع الكمبيوتر .. اما امنيره رقدت بدر .. منيره: تعالي انروح حجرتج .. رتبي اغراضج .. وقفنا قلتها : مطر داخل .. منيره: ما ادري .." و قبل ما نطلع قالت حق عزوه" جوفي بدر.. وظهرنا من الحجره جفت مطر يالس ويا امه و يدوه ... طالعته جفته منمدج يسولف مع امه .. طلعنا من الصاله و رحنا حجرتي .. دشينا ... فتحنا الشنطه : قلتها هاي الثياب تحتاي غسيل .. منيره: ما عليه بخبر الشغاله تعزلهم و تغسلهم .. راويتها الاطقم الذهب الي شراها لي مطر .. كانت منيره مستانسه .. حسيت بالراحه .. قلتها: منيره مشكوره احسج وايد مهتمه فيني منيره: شو هاي الرمسه لازم اهتم ..و نحن الحينه اهلج و ناسج .. و ربي يسعدج ويا مطر .. قلتها : حرممة طارق بعد ما عندها اهل صح .. منيره: عندها خالتها باستمرار اتروح لهم .. و خالتي الا هي ام عبدالرحمن ربتها ..الين ما كبرت قطعتها و تمت اتروح عند خالتها .. سالتها : ليش ؟؟ منيره: مدري يمكن لان خالتها وحيده و ما عندها حد ...سبحان الله مثلج انتي بعد عندج خالتج تذكرت مطر فقلت: ترا مطر مب مخلني اروح اسلم عليهم استغربت منيره: ليش ؟؟ هزيت اجتوفي : ما اعرف و الله يوم قلت بمر عليهم قال لا .. مدري ليش ليش ؟؟ منيره: عيل تاخرتوا ع بالي مريتي بيت خالتج .. قلتها باسف: رحت بيت ابوي ..جمال يبا يبيعه و نجاسم الورث .. منيره: اهاا .. سالتها : انتي خطبتيني حق مطر ولا هو سال عني منيره: هو يباج يحبج .. سالتها: متأكده؟ استغربت فزخت ايدي: شوو فييج مب مرتاحه وياه مطر مأذنج هزيت راسي بمعنى لا و قلتها: مب جي بس اذا هو يباني يعني يعرفني زين منيره: يشك فيج شو ؟؟ قلتها: لا بس دوم يحسسني شي فرق كبير بيني وو بينه عقدت حياتها و قالت : ما فهمت "طالعت الاطقم " اجوفه مب مقصر معاج قلتها: منيره انتي مو فاهمتني ... مطر دوم يعايرني اني فقيره "حبست دمعتي"و اني ما اعرف شي بها الدنياا منيره جنها تعاطفت معاي: علشان جي خذج الصالون و مكشخنج صح ؟ هزيت راسي و قلتها بيأس : زين ما اااعرف اتعدل .. منيره :حياتي ميثه ..باجر بتتعلمين كل شي .. و ها مطر ما عليج منه يسولف .. و صدقيني لو ما يحبج جان ما اصر يخطبج ..و خلني اسال عنج استانست من كلامها بس قلتها ابصراحه : بس قال لي انه يحب غيري انصدمت منيره و قالت: مطر تخبل شو يقولج هالرمسه باول ايام زواجكم كنت بصيح بس قلتها : مرات احس يقص علي يبا يغايضني.. منيره: هي يقص عليج ميثه ما انكر مطر من النوع الي كان يغازل البنات بس صدقيني مستحيل يحب غيرج ..و لو يحب غيرج عيل ليش تزوجج و اصر انه يخطبج تنهدت مب فاهمه شي عيل ليش مطر يقول انا السلم الي بيوصله لحبيبته شو السالفه \سمعنا عزوه اتزاعج بصوت عالي: منووووووووووووووووور منيره وقفت : يمكن بدر نش يصيح افف وحى له يرقد ؟؟ ضحكت عليها : ههههههههههههه بس سمعنا عزوه: تعالوا اتعشواا ..عزوه ميثووو .. نشينا و منيره : يلا انروح نتعشى .. طلعنا من الحجره و رحنا صوب الصاله ..دشيت تفاجأت ان مطر موجود .. و محد موجود الا ام مطر و يدوه و عزوه .. ام مطر: تعال سعود تعال اتعشى .. عزوه: يتلوم من ميثه ام مطر جنها توها انتبهت لي : تعالي يمه تعالي يلسي جريب مني منيره: يالله ما انروووم يدوه: باجر بتغسل شراعها شرات حرمة طارق يا وييلي شو قصدها لا يكون ام مطر شرات ولدها بعد اتحب اتنكد لا لا حرام اكيد يدوه اتبالغ ام مطر: لا حول ولا قوة الا بالله ............سعوووووووووووووووود سالتهم : وين مطر ؟؟ امايه: طلع اكيد راح عند ربعه يسلم عليهم تعالي تعشي .. شويه و ظهر سعود و شكله متلوم .. عزوه: هههه يستحي سعود صاخ .. منيره /: غريبه ما اترد ع عزوه مسوي روحك متلوم .. ام مطر: بس خلوو اخوكم يتعشى .. سالت: منو اكبر سعود ولا عزوه عزه: طبعا انا اكبر عنه بسنه هو صف عاشر و انا احدي عشر ,, يدوه: مستانسه حضرتج الاكبر ... لسانج و ايدج اطول عنج .. طالعت يدوه مستغربه بس قلت حق عزه : زين بالتوفيج ... تعشينا .. و عقب ما خلصنا منيره راحت بيتهم و يدوه جنها راحت ترقد اما انا سرت حجرتي صليت العشى ... من اولها ها مودرني و طلع يسرح و يمرح ويا ربعه ...بس هو ناش من وقت ما اظن يعني يسهر للفير .. حسيت بالملل حاولت اشغل التلفزيون ويا الرسيفر ما عرفت عابلت به بس ما استوى .. فكرت اروح عندهم في الصاله اتريا مطر هناك ... رحت الصاله ..جفتها فاضيه و ما فيها الا اسعود و كان يلعب بلاي ستيشن ..نفس مال وليد .. ارتبك يوم جافني ..الفرق بين سعود و مطر ان سعود يتلوم يستحي ولا لانه ما يعرفني من قبل يعني ؟؟؟ تعمدت اساله : وين عزه عيل ؟؟ قال من غير ما يطالعني : بحجرتها .. ابتسمت ع طريقة اسلوبه و رحت صوب حجره عزه دقيت الباب شويه انفتح الباب تفاجات عزوه : ميثه !! قلتها : مليت بروحي بالحجره دخلنا الحجره سالتها :شتسوين ؟؟ هزت جتوفها : يالسه ع ها الكمبيوتر ..اتسلى سالتها : شو اتسوين ؟؟ قالت لي: ماشي ادش مواقع ... دردشه جي يعني عقدت حياتي: دردشه !! عزوه طالعتني بسرعه: لا تخبرين حد بجتلوني لو عرفوا ضحكت و قلتها: ههههههه اصلا انا اعرف شو قصدج عزه: ههههههههههه احسن سالتها : بيتكم هادي .. كانت مندمجه بالكمبيوتر وقالت لي : يستوي حشره يوم يكون طارق هني و حرمته و سعودد يوم يتضارب مع عائشه ههههههه قلتها مستغربه: سعود ها الي يستحي يتضارب عزه: هي وايد يتقارضون و مره صارت مشكله عوده حرمة طارق ما تتحمل الرمسه تحملي تاخذين راحتج وياها قلتها : لا انا عادي اسولف ما يخصني بحد قلتها: انتي ما عليج مدرسه اشرت بيدها مش مهتمه: عادي لااه .. ما احب الدراسه قلتها: لازم اتذاكرين قالت لي خلصت مذاكره .. قلت : متى بيي مطر تعبت ؟؟"وقفت" بروح حجرتي انا عزه: تمي لااه قلتها: لا يمكن مطر ايي بسير اجوفه عزه: زين جان تاخر دقي لي بيي ااقعد عندج عادي قلتها: مشكوره .. طلعت من الحجره جفت سعود مندمج قاعد يلعب بلاى يستشين ..فتحت باب الصاله جفت مطر بوييهي ابتسمت له ما توقعت اجوفه ياي قلته: قلبي حاس انك ياي .. كنت يالسه عند عزه و قلتها بروح اترياك بالحجره زخي ايدي و خذني صوب حجرتنا و قال: تعالي اباج .. قلته : ع بالي بتم برع للفير ..بس زين ييت اتونسني .. دشينا الحجره و قلته : مطر علمني كيف يشغلون هالتلفزيون ترا ما عرفت.."جفته يطالعني بنظرات غريبه فسكت " تم يطالعني ما عرفت شو بلاه قلته : شو .. سالني : كم صار لنا من وصلنا هني البيت قلتها : ممدري تجدم مني و قال : تقريبا .. خذت نفس اسلوب المراوغه ماله ما يعيبني ..ابتعدت عنه و رحت يلست ع طرف الشبريه و قلته : شو مستوي التفت صوبي و نظراته ما تغيرت و قال : شو قايله حق منيره بلعت ريجي ما توقعت منور اتوصل له الرمسه ..سكت ما عرفت شو ارد عليه نقزت يوم علي صوته : شووو استهبلت عليه: سالتها كم صار عمر ولدها بدر ؟؟ وقفت ابسرعه يوم جفته ياي صوبي محرج و شكله بجتلني ..ابتعدت بس زخني من ذراعي حسيت انه بنجلع من مكانه ..طالعته بخوف وما قدرت افتح حلجي بكلمه كنت متروعه منه اول مره جي يعصب علي .. قال : كل يوم يمر عن يوم ما اتحملج ..ولا اتحمل حركاتج .. ترجيته بنظراتي ما يجلع ذراعي ولا يسمعنى كلامه السم بس كمل: هذي اول مره واخر مره وحده اتيي اترمسني عن شي صار بيني و بينج و الله لاقص لسانج ... وزخ لحيتي ورص عليها حسيت ان فكي بنكسر زخيت ايده ابعده عني بس ما قدرت موليه .. تم يهز راسي بيده و هو يقول : انا ما احب حد يرمس عني ..موليه مفهوم .. كنت اتصارع مع نفسي ان ما تنزل دموعي و قدرت اداريها بس ما قدرت اداري الالم الي بداخلي من تجريحه لي ....نظراته كانت علي ما قدرت ابطل حلجي بكلمه لاني كنت متروعه منه و خايفه اذا رمسة يعصب زياده فسكت ..فج ايده عني و ابتعد جنه مشمئز مني .. و طلع برع الحجره ..ياي عللشان يضاربني .. يلست عالارض ارتجف ..احس الي صار لي كأنه حلـم ..حسيت انه ابتعد و طلع خلااص فربعت فوق شبريتي .. اصيح يحب يهيني و يذلني بس لو يموت ما براويه دموعي ...انا موليه بحياتي ما ضريت انسان و اذا رمست عنه ما كان قصدي اضره بشيء .. و اكيد منيره عاتبته ..و ياه يطلع حرته فيني ... أشتكي لوسـادتي دنياي وأسمـعها تـنوح ..كنها بعضي وبعضي وين هو من هو معه ..مختلط في عبرتي حبر الشقى ودم الجروح فتحت اعيوني متضايجه من الصوت الي سمعته بالحجره ..رفعت راسي جفت مطر ياي من برع .. دورت الساعه جفتها ع الفير ..انتبه لي رديت حطيت راسي و تغطيت عدل ... طنشني ولا جنه جافني دش الحمام عقبها ظهر .. حسيت به انسدح ع الشبريه جريب مني .. نشيت ابسرعه و راحت الحمام اتيدد .. و صليت .. ورديت مكاني تجلب ما عرفت ارقد و هو جريب مني .. بس حسيته راقد خلااص.. تجلبت واايد ..متضايجه بس نقزت يوم سمعت صوته طفران : بس انتي ارقدي خبلتي فيني .. عضيت ع شفايفي ... تميت صاخه انجلب الصوب الثاني فنشيت اتسحب صوب الكنبه .. و انسدحت فوقها و ع طول ما دريت بالدنيا ... فتحت اعيوني ع صوت سايير برع .. حشره انا مب متعوده ع ها الجو اففف ..حسيت جسمي متكسر ..و متعايزه لاني يمكن راقده فوق الكنبه .. جفت الدنيا امنوره .. التفت صوب مطر جفته راقد .. قمت من مكاني ورحت الحمام تغسلت ..و طلعت برع ادور شي اكله يوعانه .. رحت الصاله جفت عزوه يالسه تشرب حليب و ام مطر يالسه وياها ع الصينيه سلمت عليهم .. ام مطر : تعالي تريقي عزووه: انتي شو مقومنج من الصبح ؟؟ ابتسمت: متعوده ..انش من وقت ام مطر : و الله احسن لج شرات هالبنات عيل اخ عليهن ... عزوه: احمممممممم وحده تقصدني ضحكت: هههههههههههه ام مطر : متى ياه مطر عيل .. بطلت حلجي اقولها الفير بس تذكرت شو سوا فيني البارحه فقلت : مدري رقدت و الله .. حاست بوزها و ما عيبتني حركتها نشت عزوه : يلا باي .. ام مطر : هني الباب عزوه : صبري ما سويت حركتي راقبتها مستغربه أي حركه !! جفتها رايحه صوب غرفه ..فج الباب بدفاشه و صرخت بصوت عالي وااااااااااااااااااااااااااااااااااااااااااااااااا اااااااااااااااااااااء و صكرت الباب تضحك بصوت عالي .. استغربت من حركتها التفت لام مطر يوم قالت و هي تضحك : هههههههههههه زين اتسوين ابتسمت ع حركتها بس ذبلت ابتسامتي يوم سمعت حس يدوه اتزاعج متضايجه : حسبي الله عليج من ابنيه .. ليش اتسوي جي ؟؟ حرام عليهاا ؟؟ عزوه تطالعني : احب اخبل فيها .. قلتها : بس مب جي حرام اكيد كانت راقده اشرت عزوه مب مهتمه: اتولي وطلعت برع الصاله .. تقطع قلبي يوم انفج باب يدوه و هي محتشره : لا بارك الله فيج من ابنيه .. نشت ام مطر من مكانها و راحت صوب حجرتها : بقوم اكمل رقادي قبل لا اتحشرني هاي العيوز "طالعتني" يمه كلي ولا تستحين ترا البيت بيتج .. ابتسمت لها بس كنت مصدومه : تسلمين عموه .. نشيت ابسرعه و رحت صوب يدوه زخيت ايدها : تعالي امييه تعالي هني .. يدوه: فديتج ..جفتي هاي الطفسه شو اسوي فيني جفتيها قلتها : ما عليه عزوه صغيره يدوه: لا صغيره ولاشي ... مب متربيه اتسوي فيني اكثر عني جي ..دوم اخبر لها مطر بس ما يصدقني موليه . غمضتني حيييل يلستها و صبيت لها حليب .. تريقنا قعدت اتسولف وياي بمواضيع وايد و منها تعيدها نسينا الوقت ...خليتها و رديت حجرتي ... جفت مطر بعده راقد ..رحت يلست ع الكنبه ..حسيت بملل فضيع حاولت اشغل التلفزيون ما عرفت عصبت منه فضربته بيددي بقوه ..تحرك مطر من رقاده متضايج شهقت ..خفت لا يحتشر علي فقمت ورديت طلعت ...شميت ريحة طباخ الظاهر يسون الغداا ... دشيت الصاله جفت سعود يالس يلعب بلاستيشن .. حسيت ارتبك يوم جافني ع طول صد وسوا روحه منمدج باللعب يلست جريب منه و قلته : عندج شريط مصارعه رد من غير ما يطالعني : هي .. قلته: زين حطه تراني اعرف العب طالعني مستغرب يوم انتبه لروحه رد و طالع صوب التلفزيون ابتسمت و قلته : ترا ولد اخوي مرات ايي يقعد عندنا في البيت و دوم يلعب بلاستيشن و كنت العب معاه مرات اتسلى ..جفته ع طول يغير الشريط ..و حط شريط مصارعه .. كل واحد اختار مصارعه و يلست العب معاه في البدايه حسيته منحرج بس عقب اندمج وياي .. سالته : انت دوم ترجع من المدرسه بها الوقت هز راسه .. قلته : زين عيل دوم بنلعب علشان اغلب .. ما صدق اعيونه يوم غلبته ضحكت مستانسه .. دش عزه : الله يغربل ها المدرسه .. بطلت اعيونها مستغربه و حطت ايدها بحصرها : ويوم اقولك لاعبني اتقول بخرب لعبتك سعود مطنشنها قلتها : اعرف العب انا بلعمج عقب سعود طالعني بنظرات جديه ذكرني بـ مطر وقال : لا يا ويلها اذا زخت البلاستيشن بكسر راسها صرخت عزوه: من زين لعبتك الحينه ..نشاده عنها عندي لابتوبي مكفني و سادني وراحت صوب حجرتها ضحكت بصوت عالي طالعني سعود مستغرب فقلته : كشخه احس بوناسه احس ابعمري عايشه بجو عائلي ضرابه و سوالف ما رد علي سعود حطيت الجهاز من ايدي و قلت : بس خلااص ما بلعب عقب بنكمل زيين .. سعود: اتخافين اغلبج لااه ضحكت: كم مره غلبتك قول سعود مبتسم و بعيونه تحدي: عطيتج الفوز ..تعالي و جوفي بغلبج هالمره قلته: عقب ........الحينه بروح اجوف مطر حزة الغدا الحينه .. ظهرت من الصاله تفاجأت يوم جفت شاب واقف عند باب الصاله و جنه كان بدش تلومت اظني ها طارق .. حسيته يشبه منيره ماخذ منها بياضها و كبر اعيونهها ..يشبهون عموه ..وايد ... بلعت ريجي كنت اطالعه شرات الهبله بس هو ابتسم و قال : ميثه ابتسمت و هزيت راسي قال : انا طارق اخو مطر .. ما التقينا البارحه كنا برع انا و المدام ما عرفت شو ارد عليه سكت سالني : شحالج و اخبارج ..اتصدقين حتى مطر ما جفته ولا باركت له بزواجه .. قلته : انا ابخير و الله شكله حبوب و مسولفجي يعيبني الريال جي مب شرات مطر كله ساكت و عصبي .. كملت : انت شخبارك طارق: الحمدلله ابخير ... نقزنا انا و طارق يوم سمعنا صوت مطر كان واقف عند باب حجرتنا : ميــــــــــــــــــثه !! .. حبيبي كثر ما أحبك بربك تترك الغيره ..ما دام انك في قلبي غير فصبر لو على شاني الفصل واحد وعشرين.. سرت الخطا بليل الظَّلَـم..عرفت حالك سمع وشوف ...إن كان لـي حـقٍ أبيـه....وإن كان ما لي أنسحـب ...واللـي تبينـه اتبعـيـه...قلبك يبي منهـو يحـب سبقني طارق وراح صوبه : هلا و الله بالمعرس .. هلا سلم عليه و حضنه حسيت ان مطر يسلم عليه ابرود عكس طارق الي كان يسلم بحراره ليش جي مطر عفانا الله ..؟؟ا طارق: شحالك وينك ..؟؟ يا رييال اتصل ما اترد مب زواج هاه مطر مبتسم : شنسوي ما توقعت جي الزواج "وطالعني " طارق: زين زين ما اخترت ما شاء الله ..ادب و أخلاق و نعم بحرمة اخوي ضحكت ع تعليقه : ههههههههههه سمعنا صوت عموه : طارق انت ييت ربع صوب امه و باسها ع راسها ..ابصراحه اخلاق ها الانسان عجيبه مب شرات مطر فرق السماء و الارض ..تميت اطالع طارق يقول : شحالج الغاليه امايه : وينك اليوم ما اتصلت .. طارق : مشغولين في الدواام صديت صوب مطر يوم قال : عيبج .؟ ما فهمت شو يقصد بس نظراته كانت وايد جاسيه .. دش الحجره و لحقته صكرت الباب .. وقف بوسط الحجره و حط ايده بوسط خصره وقفت ابمكاني قلته : شو ؟؟ سالني بنبره قاسيه : شو اتسوي واقفه برع مع طارق ؟؟ قلته : سلم علي اول مره نتجاوف .. مطر يتمصخر : شو رايج فيج ابتسمت : اخلاق و مسولفجي اتصدق مطر ..يعيبني الانسان يوم يكون جي.."وسكت يوم جفته يتجف و يطالعني بنظرات قاسيه" قال ابرود : كملي ؟؟ ليش سكتي .. رحت و يلست ع الكنبه و حاولت اغير الموضوع لاني حاسه ان مطر ناوي ع شيء فقلته : شغل لي التلفزيون ...اقعد ملانه طول الصبح .. طنشني ورااح الحمام ...خذت نفس شو هالادمي ما ينبلع مدري ليش جي يسوي فيني ...نشيت اعاابل بالتتلفزيون و الرسيفر .. بطلت الواير .. الي ورا .. نقزت يوم مطر كان واقف وراي : شتسوين ؟؟؟ هزيت جتوفي : احاول اشغل التلفزيون ... تجدم صوبي شهق و بطل اعيوني : شو مسويه ..شو ها ضحكت ع طريقه اسلوبه : ههههههههههه دزني ع الخفيف و ابتعدت عنه و قام يعابل فيه بثوواني اشتغل التلفزيون قلته: عيل انا احاول فيه من البارحه قال من غير ما يطالعني : انتي عايشه بالعصر الحجري ما اتعرفين شي بالدنيا تساندت ع الكنبه : بتعلم ..البارحه عزوه قالت بتعلمني ع الكمبيوتر طالعني بسرعه و قال بتهديد : يا ويلج ؟؟ قلته: ليش شو فيها رد ابسرعه : كيفي قلته بقهر : شو انت من كل شي بتمنعني رد و كأنه يقهرني : هي .. رن موبايله كان جريب مني كنت بشيله و بعطيه بس سبقني .رد ع طول و جنه المتصل امه تبانا انروح نتغدى حط الموبايل ع جنب و قال : يلا نروح نتغدى .. رحنا الصاله ....توقعت ها المره بجوف حرمة طارق بس بعد كانت مب موجوده و الغريب ان طارق موجود ...حسيت بجو عائلي ...استانست كلهم متيمعين ...صوت سعود و عزه واصل لي برع بس يوم دشينا سعود صخ من جاف مطر ..بس عزه عادي ...راح يسللم ع يدته الي قالت : وفديت ولدي طارق : ميثه لازم تتعودين الحينه لا اتغارين ..ترا يدوه وايد اتحب مطر ... يدوه : شو تتحراها حرمتك اتغار .."مدت ايدها صوبي " تعالي تعالي يمه قعدي صوبي ..الصبح ريقتني و صبت لي حليب .. جفت مطر يطالعني بنظرات ما فهمتها طارق : افا هالعيوز اتحب تحرق ويهي دوم عزوه: ههههههههههههه امبونه محترق ضحكنا عدا مطر : هههههههههههه يدوه: من عينه محترق ماخذ بياض امه ولد امه ضحكت يوم طارق قال : طاع طاع العيوز ..حتى انتي غيرانه مني مطر سال عزه : وين امايه .. تفاجأت يوم يدوه ضربته ع جتوفه : و الله ما تستحي ع ويهك ...الحينه انا متولهه علي اتروح تسال عن امك .. مطر يبوس راسها و اول مره يبتسم من دشينا الصاله : فديتج اباها اتحط الغدا يوعانيييييييييين .. نشت عزوه : بروح الحينه بجوفها .. كنت بوقف اروح مع عزه بس زختني يدوه : يلسي انتي عروس عيب تشتغلين مدري ليش طالعت مطر مبتسمه بس طبعا كالعاده ما يبتسم عفان الله ..مدري شو فيه ولا يمكن من النوع الي ينش من الرقاد و مزاجه زفت ... بس ما قد جفته جي الا اليوم ... دشت ام مطر وراها عزوه و يلسنا نتغدا ... استغربت من شي واحد علاقه ام مطر بـ ارق صج وايد تميزه لدرجه انه تلقمه ... !! جنه ياهل .. وزوجته وينها عيل يقول حامل بس ما بينت ولا في بيت خالتها ؟؟ عقب ما خلصنا يلسنا نشرب شاي ..سعود راح اييب بلاستيشن . ..و كان بشغلها .. مطر: شو اتسوي انته ؟؟ سعود طالعه منحرج فقالت عزوه : مطور دووم يلعب من الظهر الين ما يرقد امايه : خله شو تباه ؟؟ مطر : شلها و روح جابل دروسك .."وطالع عزه " و انتي بسج من الكمبيوتر .. طالعتني عزه بنظرات ..الحينه بتتحرا انا فتنت عليها .. وقف طارق فقالت امه : وين ؟؟ طارق : بروح اييب عائششه .. امايه : زين اسالها ارتاحت الحينه " وحاست بوزها " جنه علاقتها بـ عايشه مب لهنااك .. طلع طارق و يدوه راحت ترقد . و سعود شل البلاستبشن ورااح حجرته .. و حتتى عزوه جنها تضايجت ...كلهم راحوا ... داخل غرفهم ... نشيت من مكاني و لحقت مطر رايحن حجرتنا ... رفعت راسي طالعت السما ..: حلو الجـو مطر .. طنشني وراح داخل لحقته .. قللته : انت وايد جاسي ع اخوانك حرام .. انسدح ع الشبريه بكسل و طالعني : لا و الله قلته : ليش قلت عزوه بسج من الكمبيوتر الحينه بتتحرا انا الي قاطعني : انتي ما يخصج بشيء لا تدخلين بحياتي و حياه خواتي ..."يلس و قال بغيض" بس تم ضحكي يوم طارق بقعد ينكت لج عقدت حياتي مب فاهمه شو قصده و كمل : ها بو الاخلاق و المسولفجي .. ابتسم : انت اتغار من اخوك لانه امك تحبه وايد ترا لاحظت بلعت ريجي يوم حسيت بجتلني وقف و تجرب مني تميت واقفه بمكاني خايفه منه قال لي : اخوج اتصل فيني شهقت : شو يبا ؟؟ فاجأني: باجر بياخذج المحكمه ..بتسوينن لي توكيل سالته : ليش ؟ قال : ما تبين بيت ابوج قلته: و شو يخصه التوكيل ؟؟ قال لي : علشان اخوج يوم بيي تجاسمون قيمة بيت الخرابه اكون انا بدلج قلته بسرعه : ما ابى ... حسيته ماسك اعصابه : انتي ما تفهمين اقولج انا باخذ البيت و بسجله باسمج ..ما تبين جي ترددت عقب قلته : امبلى بس "سكت شويه و قلته " ما بسوي لك وكاله عقدت حياته : ليش ؟ قلته و صديت عنه الصوب الثاني : ما اثق فيك .. سكت تم يطالعني رفعت راسي اطالعه فقال لي بنبره جديه : مشكوره .. و طلع من الحجره لحقته بس صكر الباب قلبي تقطع زعل مني بس انا صج ما اثق فيه وما اباه يتدخل بيني و بين جمال ... حزة العصر .. طلعت من حجرتي كنت بروح الصاله .. بس جفت سعود يالس في الحوي صوب الزرع .. سرت له قلته : الله حماااااااام نقزت و جنه تروع مني طالعني فضحكت : ههههههه روعتك صد عني و قال : شويه .. يلست ع الطابوقه جريب منه .. و يلست اراقبه يوم ياكل الحمام ..و يعدل عشهم .. حطيت ايدي ع خدي مستانسه سالته : هاي شو نوعها ؟؟ سعود مستانس : هاي شيرازيه ..عيبتج هزيت راسي و قلت : هي احلى وحده سعود : عيل بعطيها حقج ابتسمت : مشكور بس تحمل فيها سعود : ما يهمج "ووقف" بروح برع عند الشباب وقفت معاه : زين لا اتاخر علشان مطر قاطعني بنبره جافه : ما ادانييه صخ حس انه غلط جدامي بس يوم جاف ملامح ويهي عاديه قال : مفتك منه من كم يوم .. خذيه بعد جم يوم برع تفاجات ان سعود البارحه متلوم مني يرمس عن ريلي جي و جدامي .. قلته : ترا يبا مصلحتك .. سعود خطفي : ادري بتخبرينه ..اباه يعرف اني ما اداننييه لحقته : لا ما بخبره لان هالكلام مب من قلبك .. اتصدق حتى وليد ولد اخوي جي مرات يقول لي ما يحبني لاني دوم انصحه و اباه يهتم بدروسه هو من عمرك تقريبا .. التفت لي و سالني : لا انا صج ما ادانييييييييه .. سكت غمضني سعود وايد يوم جافني صاخه قال : بتخبرينه هزيت راسي بمعنى لا و ابتسمت له ابتسم بدوره و قال : انتي كيف متحملتنه رفع حياتي : بس عاد سعود مصختها ضحك و ربع برع : بلعب كره ويا ربعي ... وصكر باب الحوي ..رحت صوب الصاله جفتها فاضيه بس نقزت يوم سمعت يدوه تزاعج ربعت صوب حجرتها فجيت الباب .. شهقت يوم جفت عزه عافده عليها اتروعها كانت لابسه قناع يروع نقزت عزوه و فسخت القناع و ضحكت : هههههههههههههه احب اخبل بهاي العيوز جفت يدوه تمسح دموعها : حسبي الله عليج من بنيه رحت صوبها و لويت عليها غمضتني و طالعت عزوه بنظرات عتب بس عزه طنشت و طلعت من حجرتها ... قلتها : هاي عزه لابسه قناع يدوه : دوم اتروعني بها القناع انا الود ودي اطلع من ها البيت اليوم قبل باجر بس مطر ما يخليني .. قلتها : ما عليه انا برمس عزه ..هي تضحك وياج يدوه محرجه : عمى بعينها تضحك وياي ... هذاك اليوم ارتحت يوم يلست عند منيره ..بس مطر ما خلني اقعد هناك .. دشت علينا منيره و معاها ولدها بدر ...سلمت عليها و شلت بدر منيره : شبلاها يدوه محتشره ؟؟ يدوه : محد فيهم الا منيره فديتج منيره باستها ع راسها : فديتج و الله ..عيل امايه محد يدوه : جهنم تاكلها طالعت منيره مستغربه ..منيره ترد علي يدتها : بسم الله عليها حرام عليج يدوه .. طلعنا انا و منيره من عندها منيره تعالي نيلس في الحوي الجو حـلو .. ظهرنا من الصاله قلتها : ليش جي عزه تعامل يدووه منيره : تحب تغايض فيها بس يدوه ما تتحمل قلتها و قلبي يتقطع : حرام مب جي عاد ..دشيت عليهم كانت اتصيح .. منيره : شسوي مب ايدي شي مطر ما يخليني اخذها قلتها : احس مب مرتاحه هني .. هزت جتوفها ..وقالت : شو اليوم معاج زين تذكرت الموقف الي صار البارحه فقلت : هي منيره تطالع السما : الجو حـلو يمكن باجر انروح انا و عبدالرحمن صوب خور فكان .. "طالعتني " تعالوا ويانا قلتها : خبري مطر .. "ابتسمت " و ناخذ يدوه ويانا منيره : هي بنروح رباعه ... بخبره شويه انفتح باب الحوي .. دش طارق ووراه حرمه ظنيت هي حرمته عايشه .. منيره : طارق ويا حرمته قلتها : جفت طارق حبوب ما شاء الله عليه يشبهج ترا منير ه تضحك : ههههههه هي وايد قالولي ..هذي عايشه هاه .... طارق: عواشي حياتي تعالي سلمي ع حرمة مطـر ... مدري ليش ارتبكت يمكن لاني اول مره اجوفها ... وقفت وايد حلوه .بس ما لمحت منها أي ابتسامها طارق : سلمي ع الحرمه لااه مدت ايدها ..مديت ايدي و تجدمت علشان ابوسها بس هي ردت لورا .. احرجتني حركتها وايد .. هاي شكلها نفسها في خشمها .. طالعتني بنظرات ..ذكرتني بنظرات ممطر .. منيره: شحالج عايشه و اخبار الحمل .. عايشه : هلا منيره "عفدت تبوسها حسيت متعمده اتسوي هي الحركه يعني ؟؟ ليش شو بيتي و بينها علشان تغايضني ؟؟ حطيت ايدها ع بطنها " الحمدلله واي\ اوكى .. تبون الصراحه موليه ما ارتحت لها ...كان طارق يلاعب بدر .. عايشه : يلا بروح حجرتي .. طارق: بتسلف ولدج "ولحق حرمته " منيره: طارق وايد يحبها قلتها بصراحه: ليش جي رحبت فيني منيره : هي جي طبعها ما اتحب تندمج ويا حد بسرعه . قلتها : بس عيب هاي الحركه .. منيره : يلا باجر بتتعود عليج و بتتغير معاملتها صدقيني .. قلتها : زين اتصلي شويه بـ مطر ..ابا ارمسه منيره مستغربه : انتي ما عندج موبايل ؟؟ هزيت راسي بمعنى لا منيره مستغربه : ليييييييش !! قلتها : مدري ..مطر ما عطاني منيره : شو ما عطاج من كل شي مانعنج ولا شو سالفته يعني .. حطيت ايدي ع جتوفها خفت بعد لا تضاربه : : لا لا انا ما ابا موبايل ما احتاج له .. منيره : اها اتصلت به و جنه رد عليها ع طول قالت له : زعلان ؟؟ الظاهر زعلان منها البارحه يوم عاتبته علشاني ... عقبت ضحكت: هههههههههههههه فديته مطور حبيبي .. "مدري شو علق وردت ضحكت هههههههه قالت : لحظه ميثه تباك .. خذت عنها الموبايل : الو مطر .. مطر: شو قلتيها شو صار بعد اليوم سكت منحرجه عقب قلت : لا .. بس انا مطر قاطعني : شو تبين ؟؟ مب رايمه ارمس منيره كانت جريبه مني فقلت : اتطمن عليك .. مطر : لا و الله... "سكت بس هو قال " عطيني منيره .. مطر وايد جاسي معاي حتى كنت بصيح من اسلوبه معاي ... بس يودت روحي انا من النوع الي ما يحب يظهرر دموعه جدام حد و ها عيبي ...خذت نفس و عطيت الموبايل حق منيره رمسته شويه وصكرت .. قلتها : ما خبرتيه اذا باجر بظهر ويانا منيره: خبله انا اخبره ادري ما بيطيع بخلي عبدالرحمن يرمسه احس .. قلتها : اخوج شخصيته صعبه منيره و هي واقفه : وايد الله يعينج عليه .."تعالي اندش داخل " رحنا صوب حجره عزه دشنا وقفت عزه ع طول : شو تبين اتجوفيني شو اسوي و عقب تخبرين علي مطور علشان يهزبني .. منيره محتجه: عزوه شو هاي الرمسه عزوه هاجمتني : و الله من دش علينا الظهر يهزب سعود و يهزبني هي مفتنه علينا ذكرتها : انتي قلتي حق مطر ان سعود الي كااان دوم يلعب و ما يذاكر دروسه عزه : لا و الله اتفتنين علي و ما تبيني افتن ع سعود ... منيره: جب عزوه سكت عنها خيبه عزه كيف انجلبت علي ..لغايه شرات اخوها . عزه : و الله ..من اولها جي .. زختني منيره من ايدي : تعالي انروح برع هاي محد يعطيها ويهه قلتها : لحظه منيره .."طالعت عزه" عزه انا و الله ما فتنت عليج ... منيره : شو تبينها هاي لسانها طويل ما عندج سالفه تاخذين ع كلامها عزه : هي محد ياخذ ع كلامي يلا ظهروا من حجرتي .. صدمتني عزه وايد ليش جي عاملتني .. عقب ما ظهرنا منيره : لا تزعلين منها قلتها : مب زعلانه بس مستغربه لي جي انجلبت علي منيره : بعدج ما فهمتيها هزيت راسي بمعنى لا قالت : لانج زخيتيها يوم اتلعوز بيدوه خافت انج تخبرين عليها مطر سكت اصلا مب فاهمه كيف حياه و تفكير هذيلا الناس .. عقب العشى .بعد ما صليت. كنت يالسه في حجرتي رحت صوب الرسيفير اغير القناه يلست اجلب من محطه لـ محطه نقزت يوم سمعت حس مطر ووقفت : انتي شو اتسوين قلته : ما سمعت صوب الباب ينفتح .. راح صوب الرموت و قال : تعالي .. هني جلبي القنوات شو اتسوين رايحه هناك ..انتي لها الدرجه غبيه ؟؟ انحرجت فقلته : يختلف عن الرموت الي عندنا في البيت علشان جي.. قاطعني و رفع حياته يتمصخر : و الله عندكم رموت في البيت .. صديت عنه و ابتعدت عنه بس زخني من ذراعي حاولت ابعد عنه بس ما رضى طالعته و قلته : شو ..؟؟ يلسني ع الكنبه و يلس جريب مني ..اربكني قربه وايد حسيت صار له فتره مبتعد عني ..علشان جي صديت عنه ما طالعته بس قال : انا ما آآكل .. بلعت ريجي كنت خايفه لا منيره قالت له شي و ياي يهزبني شرات البارحه فـ ليل ..بس تفاجأت يوم ظهر موبايله و اتصل عقب عطاني الموبايل طالعته مستغربه فقال : رمسني اخوج يباج ؟؟ خذت عنه لموبايل : هلا جمال ؟؟ جمال: شحالج اختيه قلته : بخير و انته ؟؟ جمال : انا ابخير ..اتصلت بج وايد بس مطر كان برع طالعت مطر ما تحرك من مكانه كان يراقبني بس يوم جافني اجوفه نش من مكانه و راح صوب التسريحه سالته جمال : شو مستوي ؟ جمال : باجر بمر عليج بنروح المحكمه دق قلبي : بس انا ما ابا جمال : تبين ما تبين انا حقي اباه عندج تدفعين لي نصيبي سكت جمال : عندج حسيت اني بصيح فقلت : لا قال : عيل باجر من الصبح تزهبي بمر عليج نروح المحكمه .. قلته : بس مطر جمال : ريلج قال ما يبا يتدخل و هو موضوع خاص فينا و انا أأأيد كلامه ..المهم زهبي اوراقج .. مع السلامه .. صكر بويهي حسيت افكاري تلخبطت شو جمال مصر يبيع بيت ابوي .. حرام عليه .. رحت صوب مطر و التفت لي قلته : جمال باجر يبا ياخذني المحكمه طالعني و قال : شو اسوي لج ؟؟ عرفت انه متضايج لاني قلتله اني ما اثق فييه .. عضيت ع شفايفي امنع دموعي تحدر .. قلته بنبره اترجاه : شسوي ؟؟ اانا ما ابا ابيع البيت ..ها بيت ابوي ريحة الغالي .. هز جتوفه و قال ابرود : اسـف ما اقدر اسوي لج شي ... "ظهر من الحجره يلست ع الكنبه و دفنت ويههي بالوساده ويلست اصيح ...مابيدي شي ..ما اقدر اسوي شي .. مطر كان بساعدني بس انا خربت كل شي . .بس صج انا ما اثق فيه ..مطر للحينه ما اعرفه زين .. و ما يعاملني زين و كم مره يقولي انه يحب غيري .. و انه .... و انه ....... مسحت دموعي و دشيت الحمام اتغسلت و سبحت بالمره .. تفاجات بمطر يالس ع الكنبه كان يرمس بالموبايل ... رحت صوب التسريحه نشفت شعري ..حسيت انه كان يراقبي ..بس جنه كان يرمس ريل منيره .. بس من كلامه الظاهر ما بنروح معاهم ... مدري ليش ما طااع ... عقب رمس منيره .. مشطت شعري ..و رحت صوب الكبت ادور ع اوراقي علشان المحكمه ..لفتتني عبباره مطر " و هي شدراها انها مب مرتاحه " طلعت اوراقي ..و انا قلبي يتقطع حق باجر ... شو بستوي .. حرام عليه جمال ..طول حياته ظالمني حتى بعد ما توفى ابوي ظالمني ... حسيت بمطر واقف وراي مره التفت له ع طول : بسالج انتي كم صار لج يالسه في ها البيت .. طالعته مب فاهمه قصده .. سالني: تعرفين عزه زين ولا سعود ولا امايه ولا يدوه وحى لج تعرفين طبعهم هزيت راسي بمعنى لا .. نقزت و تروعت منه يوم زاعج علي : عيل حق شو اتقولين ان يدوه مب مرتاحه في بيتنا بلعت ريجي صح انا قلت جي من الي جفته من عزه و الي اتسويهه فيها بس ما قدرت اعلق .. لاني بالي في باجر و في الي بيصير في بيت ابوي .. همست : انا .. بس شهقت يوم غطى وييه بيدي و ثاني مره يسوي لي ها الحركه حاولت ابعد ايده عن ويهي حسيت بخنقني بس لصقني في الكبت ويهز راسي بإيده الي كانت ع ويهي بقسوه و قال : و الله يا ميثه لو يدوه قالت بروح بيت منوره بموتج .. سمعتي .. شل ايده من ع ويهي و تنفست بصعوبه و طالعته بنظرات عتب و خوف و لوم ما كنت رايمه ارمس لاني لو رمست بصيح و انا ما ابا اصيح جدامه مووليه .. صرخ علي بأذوني و الله حسيت الطبله تنطر : تسمعين ..الا اهلي .. رفعت ايدي اغطي ويهي و احميه من وحشية مطر وقلته بصوت ضعيف : زين .. ابتعد عني و نظراته علي فقلته : ما يخصني باهلك .. قال بدفاشه : احسسسسسسسسسسن ..خلج بحالج ... صديت عنه فريت الاوراق داخل الكبت وصكرته بعصبيه .. اما هو طلع برع الحجره ..ربعت صوب الباب و قفلت و رديت صوب شبريتي و صحت بمراره .. ما يصير جي .. ظلم .. اشم ريحة مشاكل بتصير وايد بيني وبين مطر بسبب افكاره الغبيه ... و جمال ببييع بيت ابوي و انا وين ارووووووووووح ؟؟؟ وين اسير .. اقعد عند منوه .. تذكرت سلمى ..فديتها اكيد تسال عني ... انا بقوله يظهر لي موبايل ..وغصبن عليه بخليه ياخذني بيت خالوه ..مب كيفه يحرمني منهم ... فتحت اعيوني ع دقت باب الحجره بصوت عالي .. تروعت عقب تذكرت اني قافله علي الباب,, نشيت من مكاني : زيـن .. رحت و فتحت الباب دش مطر صكرت الباب رحت صوب الشبريه سمعته يقول : حق شو قافله الباب ؟ عدلت شعري و يلست ع طرف الشبريه و قلته و انا خانقتني ريحة الزقاير : رقدت من غير ما احس بعمري .. طنشني راح الحمام .. لمحت الساعه كانت 3 فليل ... دق قلبي يوم تذكرت المحكمه ما بقى شي الصبح ..انسدحت ع الشبريه ..بتعب و غمضت اعيوني .. حسيت اني ما برقد .. يلست اتجلب ع الشبريه فكرت اقوم و ايلس ع الكنبه اشغل روحي بشيء لاني حسيت بأأرق و تعب فضيع اتخيل المحكمه و مره جمال ومره بيت ابوي صورة ابوي ما فارجتني .. يلست بعصبيه انافخ من الضيجه ... حطيت ايدي ع صدري متروعه يوم جفت مطر يفر اللحاف منه بعصبيه و قعد مجابلني .. وقال: يعني كل يوم جي ع هالحاله ..كل يووووووووووووم طالعته مب عارفه شو ارد عليه و غير اني متضايجه منه لانه رفض يساعدني ... صديت عنه كنت بقوم من مكاني بس زخني من ايدي بعصبيه و رد يلسني بدفاشه لدرجه اني تويعت بصوت عالي .. مطر : ارمسج مسويه روحج كل شي اخلاق يعني و ما اتعرفين الادب .. قلته و انا فيني غصه : شو تبى هدني .. و حاولت ايير ايدي .. بس ما طاع يهدني .. قال ورص ع ايدي بزياده :شو فيج ؟؟ قلته : ماشي هدني .. مطر : عيل ليش ما ترقدين ..شو فيج ؟؟ حسيت انه مسيطر ع الموقف و مب راضي يهد ايدي فانسدحت ع الشبريه ما همني قربه .. كانت الحجره ظلام و ها الشيء مريححني شويه ما كنت اجوف الا اعيونه .. حتى يوم تجرب مني ...وطي راسه جريب ويهي سالني بأهتمام : شو فيج .. غضيت ع ويهي بيدي بس ما ابا اصيح ..يودت روحي ما ابا يجوف دموعي خاصه هالانسان .. قلته : باجر جمال يباني اروح المحكمه مطر: وين المشكله ؟؟ رفعت ايدي ااطالعه و قلته بغيض: صورة ابوي ما اتفارج بالي ... جمال ما فيه قلب فاجأني يوم قال : جمال عنده حق انتي جايفه بيتكم كيف حالته قلت بهدوء: مب مهم شكل البيت المهم شو يعني لي .. شو بالنسبه لي "عضيت ع شفايفي و سككت علشان ما اصيح " حسيت بأنفاسه جريبه مني فصديت قال لي : زين قلتلج بساعدج بس انتي ماتبين قلته باصرار : ما غيرت رايي.. مطر مقهور : عيل علج ما رقدتي صيحي و اتمنى اهالساعه ينباع البيت قبل باجر ..علشان قلبج يحترق شرات ما تحرقين قلبي .. كلامه آآلمني حتى يوم ابتعد عني و صد الصوب الثاني و تغطى يبا يرقد صحت بصمت ..و عذااب ..معذبني هالمطر ... صليت الفير .. و يلست ع الكنبه اجلب قنوات التلفززيون و مطر راقد .. .. اول ما جفت الشمس طلعت .. طلعت من الحجره ..جفت عزه طالعه رايحه برع... و الظاهر سعود رااح قبل ..عزه .. دشيت الصاله اتريق .. جفت يدوه يالسه .. و معاها ام مطر محتشرات .. سلمت عليهن و يلست .. صبيت لي حليب .. ام مطر : منيره و حليلها تترجى مطر يودينا وياهم صوب خور فكان مب راضي ..مدري شو بلاها يدوه: ما قالت لي منيره جان خليته ياخذنا غصبن عنه ما يرد لي طلب .. ام مطر : ليش هو ما قالج ميثه رفعت راسي و قلتها : لا ما طرا بس منيره قالت لي بظهرون "سالتهم " زين قوم طارق ؟؟ ما بروحون ام مطر : ويه فديت طارق ما يرد لي طلب جان فاضي كنا سرنا و ما ترجينا مطور .. يدوه :يمه ميثه ترا طارق ولد امه .. ما ينفع .. صخينا يوم سمعنا صوت انثوي : صباح الخير كانت عايشه يدوه: الناس اتسلم .. شكلها بتظهر من الصبح ؟؟ ام مطر: انتي وين رايحه لابسه هالعبايه من صباح الله خير ..ريلج يدري يدوه : ههههههههههههههههه و اتسمينه ريال ريلها عقدت حياتي ليش جي يرمسون عن طارق و الله هالانسان خلووق ..و شكله حبوب قلت : شحالج عائشه .. طنشتني و قالت : انا اطلع ادش ع كيفي بيني و بين ريلي بطلت اعيوني ..مب مصدقه .. كيف ترمس ويا ام مطر و يدوه جي عيب و الله .. و ظهرت ..من الصاله ام مطر شكلها حرجت و لحقتها عند باب الصاله : و الله لو مب شايله ولد ولدي جان رغتج من البيت من زمان .. يدوه: هههههههههه محد جالع اعيونج غير عوشه .. ا م مطر : و انتي ما عندج الا اتعلقين و تضحكين .. فضلت اسكت و اخذ دور المتفرج بس من دون ما اعلق .. رن تلفون الصاله ..ردت ام مطر .. عقب صكرت و قالت لي : روحي مطر يباج .. نشيت ابسرعه اكيد جمال اتصل به اكيد .. يدوه: خبريه اني زعلانه منه ... ابتسمت بس بداخلي ارتجف : ان شاء الله .. ظهرت من الصاله ..ورحت حجرتي ..جفت يالس ع الكنبه بكسل .. فتح اعيوني يوم سمعت صوت الباب و دشيت .. عاتبني : انتي ما اتعرفين تيلسين بمكانج وقفت و قلت : شو مستوي .. مطر متغصص : اخوج اتصل .يلا الحينه بمر عليج ..زهبي اوراقج كان يرمس بغيض الظاهر انه خرب رقاده علشان جي متضايج .. قلته: و انته طالعني من غير ما يرد و ورااح صوب الشبريه ..يبا يرقد قلته: ما بتيي معاي .. وقف و التفت لي : ع أي اساس ؟؟ ايي معاج ..؟؟ بلعت ريجي ..يوم جفت اسلوبه معاي عرفت انه ما منه فايده رحت صوب الكبت و ظهرت اوراقي جفته رد ابمكانه يباي يرقد .. بلعت ريجي ..بخوف اول مره اخاف من جمال .. رحت صوب مطر و يلست ع طرف الشبريه حطيت ايدي ع ظهره اهزه : مطر ما رد عليه .. هزيته مره ثانيه ترجيته : دخيلك تعال معاي ..ما ابا اروح ويا جمال ابروحي .. مطر : ما يخصني بشيء ما تحملت الموقف ..دفت ويهي بظهره و يلست اصيح بصوت عالي ما ابا ابيع بيت ابوي ما ابى جمال يبيعه .. تفاجأ مطر من حركتي يوم رفعت راسي و قعد و طالعني مستغرب عقد حياته و قال : اموت و اعرف ..انتي شو عايبنج بها المتحف .. مشيت دموعي و قلته : زين اشتريه .. بس لا يبعيه جمال لحد غريب مطر ناوي يذلني : الحينه اشتري مب جنج قلتي البارحه انج ما تثقين فيني ... تجربت منه اكثر و لصقت فيه : اثق فيك "ورديت اصيح" بس لا اتخليني ابروحي دخيلك ... "وزخيت ايدي " مطر امبطل اعيونه: ما اصدق كل ها علشان بيت ابوج ..من تزوجنا احاول اتجرب منج و انتي اتصديني و الحينه علشان بس هالخرابه .. مستعده لكل شي قلته : لا اتذلني اكثر عن جي .. حط ايده ع ويهي و خلني اجوفه و قال : انا ما اذلج بس انتي الي تبعدين عني .. قلته : بترووح معاي ... هز راسه موافق و قال : بتسوين لي توكيل علشان اتصرف انا هزيت راسي موافقه و قلته : سوي أي شي بس بيت ابوي يتم و ما ينباع فاجاني يوم قال : تر انا ما احب ارد حد ..علشان جي بروح معاج المحكمه و بسوي لج توكيل و باخذ البيت و بسجله باسمج زين جي .. صرخت مستانسه و عفدت عليه ..و انا اضحك من الوناسه اول مره مطر يخدمني .. نسيت عمري و هو تم يضحك علي .. طلعنا عقب ساعتين .. وصلنا المحكمه وصلني مطر صوب قسم الحريم .. سويت اوراقي ووقعت التوكيل حق مطر يتصرف باي شي له مطلق الحريه ... كننت مستانسه و مرتاحه من الي سويته ..ركب مطر السياره و حركها :قلتته : جمال ما يااه مطر : اتصلت به و اتفجنا يبيعني البيت قال بسوي اوراقه و بنفتك من حشرته زخيت ايده و قلته : مشكور مطر ما اعرف انا مرتاحه .. مطر : بس علشان اتعرفين ريلج طييب ابتسمت له : زين خلني انمر شويه قال بسرعه: وين ؟؟ قلته : بيت ابوي مطر: لا لا لا لا بسج عاد .. زخيته من ذرااعه : بس شويه شويه بس مطر ابتسم: و ابوي انا ع الي يدلعون نقزت مستانسه: بتاخذني .. قال : للاسف لا . مديت بوزي شبرين و دزيته براسه : انت ليش جي عنيد .. سوا عمره يبا يعض اصابعي الي دزت راسي ضحكت عليه و قلته : وناسه مطر : مب خرابه جي اتخبل فيج .. قلته: خرابه خرابه ها اغلى ما بقى لي و فيه ذكرياتي حلوها ومرها مطر : حتى انا لي فيه ذكرى حلوه .. عقدت حياتي : وين ؟ مطر: في بيت ابوج ضحكت: ههههههههههههههه اونك تطنز قلته : اتصدق اليوم الصبح حرمة اخوك طولت لسانها حق امك ..ما فيها ادب مطر"سكت شويه جنه يفكر عقب قال " عايشه ؟؟ قلته : هي ما فيها ادب اسلم عليها مما اترد علي .. حتى البارحه اول مره اتجوفني كنت ببوسها بس ردت لورا و جنها متجزز مني ..بس رحبت بمنيره عادي حسيت انها تغايضني ؟؟ مطر فاجأأأني : هههههههههه "وهز راسه بمعنى لا حول ولا قوة الا باللله حسيته استانس " قلته: انت يعيبك كل شي يغايضني هز راسه و قال :هي "وضحك" ههههههه دزيته من ذراعه : بس مططر لا تقهرني انت زياده .. مطر : ان شاء الله عموه .. كملت له السالفه : ما شاء الله طارق عكسها ادب و اخلاق رد علي بنبره عاديه بس حسيت فيها قسوة : حشرتني ترا ... طالعته و قلته : صدق زين ..هي مدري ع شو شايفه روحها مدري ليش انجلب: بس زين لا ترمسين عنها جي سكت ..يمكن بالغت و اكيد ما بيرضى بحرمة اخوه سالته: وين رايحين نحن .. مطر : براويج عزبتي نقزت و صفقه بيدي مستانسه: الله بروح عزبه رفع حياته: لا يكون بعد اول مره تدشين عزبه هزيت راسي و انا مبتسه : هي و الله صرخ مطر : واااااااااااااااااااااي ما اصدق انتي وين عايشه بسالج .. ضحكت عليه : هههههههههههههه مطر : انتي اليوم مب طبيعيه .. قلته : يمكن علشان كمل عني : بيت الخرابه بتم لج .. ابتسمت له وقلته : نسيت اخبرك يدوه و امك محتشرات عليك لانك ما طعت اتوديهم ورا منيره ..و قالوا لو طارق مب عنده شغل جان ظهرهم مطر يتذكر عايشه ما طاعت اتخليه يروح مع منيره لان طارق ما بيروح و بجذا ما تقدر اتروح هي .. فقال : مره ثانيه بنروح الدنيا ما بتطيير .. مدري كنت احس عمري طايرهه من الوناسه فبغيت اعبر عن وناسيتي عفدت عليه بشكل مفاجيء و حطيت راسي ع جتوفه و انا مرتاحه ..بس مطر تفاجأ بحركتي يوم عفدت عليه فما قدر يتحكم بالسياره و ضرب ابريك بقوه .. ماتت الفرحة وأنا بعيني أشوف...حارت أقداري وقلبي في جلد .>>>>> كــــــــــــــــــــــــــــــــــــــــــــــت ابــي رآآيكمـ ف البارت وتعليقــآآتكمـ !! |
| الساعة الآن 08:48 AM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir