منتدى استراحات زايد - 乂آآه يا ويـــله .. قلــــبٍ صويــبٍ بانــت أقداره乂

(الجزء 106)

(وتبند فويهه وتتلثم وحاطة إيدها على اللثمة .. حتى طاح عنها التيلفون عالأرض بس ما رامت اتحرك .. وحسّت بزياغ فظيع انها تنكشف .. )

راشد : منو اللي ياء ؟ هنيد ؟ ياهنيد !! ليش بندتي ؟

(ويحاول يتصل بس يطلع رقم المستشفى ..)

مانع : هااا فطيم .. شو تحسّين عمرج الحين ؟

هنود : د .. د.. د .. د .. (وتهز راسها انها بخير ..)

مانع: الحمدلله .. عيل قومي بنروّح مالها داعي يلستج .. بترتاحينفبيتنا .. بو محمد يترياج في البيت ما رقد الليل ..

هنود فخاطرها : ابا رشود يعرف مكاني ..

مانع : أجبي عليّة !! (وتمسكه من كندورته عشان تقوم ..) يالله بسم الله .. (وقامت بقوة .. وروحت وياه .. ويوم وصلوا الموتر ..) ترييني في الموتر بيي .. (وسار يسوي اجراءات خروجها وهي تتريا في الموتر وتحاتي رشود .. اما رشود اتلبس وعلى طول المستشفى .. ومانع وقّع عالأوراق وظهر سار الصيدلية ياخذ لها الدويات .. كانت يالسة ورا .. ورد ركب الموتر ودق عليه الويّع في بطنه فجأة .. بس ما اتويّع جدامها .. حرّك الموتر .. بس كان راص بإيده على بطنه ..)

مانع: لا إله الا الله .. يارب ترحمني برحمتك ..

(اما عند مي كانت ترقد وتنش وتشوف تيلفونها يلوومض ..)

مي : ألو؟

حمد : وينج انتي؟

مي : خير ؟

حمد : اليوم عندنا تصوير الساعه 8 بعد صلاة العشا تسمعين ؟

مي: ان شاء الله ..

حمد : توصلين القناة الساعه 6 يبالج وقت لين يمكيجونج ويسوون شعرج ..

مي : زين ..

حمد : يالله حبيبي باي ..

مي بغصب : باي !! (بندت عنه ) مابا أقدّم !! مابا !! انا شو اللي ورطت عمري فيه ؟ (وتصيح ) سعيد .. (وتتصل به وتمسح دموعها ..) دخيلك رد .. والله بسوي اللي تباه .. بس رد .. (وهو عنده يشوف الرقم ويبند فويهها ويرد يغلق تيلفونه ..ويوم وصل مانع البيت )

مانع : انزلي ودشي داخل .. صبري فاطمة .. (وصدت ونزل لها الجامه ) يوّدي خذي دواج داخل مكتوب كم تاخذين ... عادة كلي شي قبل ... يالله جدامي داخل ...

هنود فخاطرها : مشكووور يا مانع ..

مانع يرد عالاتصال وكان ياينه من مركز الشرطة : هلا .. خير ؟ لقيتوا هنود ؟ يالله ياي ياي !! بلغوا أهلها بسرعه !! وين انزين ؟ أييكم الشرطة ؟ انزين ياي ياي يالله اوكي .. (ويطلع مسرع ما يدري انه اللي كانت راكبة فموتره هي هنيد .. اما راشد وصل المستشفى جلب عليها المكان ما حصلها .. يوم توّة بيتصل فعواس ..)

رشود : نعم ؟ هيه راشد بن سالم .. هيه حرمتي .. اشووووه ؟ حصلتوها ؟ يالله ياي ياي !! (ونفس الكلام وصل لعواس .. كان مقرر ما يسير الدوام بس من سمع عن أخته سيده طار وشل ميود وساروا المركز ..)

دومينكا : بابا ؟

الشيبة : هااه ؟

دومينكا : هادي فاتماا أرباب جابها ..

الشيبة تتغير ملامحه : صدق ؟ وينها ؟

دومينكا : برا !!

الشيبة : يالله حركيني !! ابا اطلع .. يالله دهديه !! (وتطلعه برع ) فطيم !!

هنود فخاطرها : وااايه واااايه فديت هالويه !!!

الشيبة : شحالج امايه ؟ (وتمسك ايده انها بخير ) شو ظهرج ؟ ما وحالهم ظهروج !! انتي بخير صح ؟ (وتدمع عينه ) صدق اني زغت عليج !! عطوج دوا ؟ (وهي تهز راسها ) أشوف شو عطوج ؟ هذيلا الا مسكنات !! عنلات صيرهم .. كلتي شي؟ (ودومينكا تطالع علاقتهم المميزة.. بعد ما اطمّن عليها ودّته الحجرة يرتاح .. وردت عند دومينكا .. كانت خيّرة وياها ودشت الحجرة لقتها شرحه ومرتبه .. وترمسها هذيجي بالاثيوبية وهنود ما فهمتها .. بعدين ..)

دومينكا : أربي مفهوم .؟ (تفهمين عربي ؟ .. وهذيجي اتهز راسها شوي ..) كلاس مافي ريال ميني (خلاص ماشي رياييل منيه ) اييجي شيلة مال انتي (عجي شيلتج .. وعجت شيلتها ..) وااااو نايس فيس ( ويهج حلو )

(اما عواس وميود ومانع ورشود .. كانوا في المركز انصدموا بجمعتهم .. واللي مبلّغ شاف مي ويحلف ألف يمين انها هي اللي ضايعه بس ما يدري انهن خوات .. واما رشود خذ ميود وعواس على ينب ولا عبروا منوع ..)

راشد : والله انها سوّت لي تيلفون ...

عواس: احلف !!

راشد : والله .. ورمستني .. وعاتبتني .. كانت فمستشفى .. وجلبت المستشفى كله ماشي فايده ..

عواس : قم !! قم ميود !! بنشخل المكان كله .. الا نحصلها .. ولا اقولك اصبر

مايد : جيه ؟

عواس : انته سر عند فاضل ورمسه يمكن تحصل من عنده شي !! قوله اللي يباه بيحصله

مايد : زين !! انا براويه ان ما رمس

(اما قريب المغرب سارت هنود ويا دومينكا ينظفون الحجر . يتساعدن وكانن دايما على عين الشيبه اللي مب رايم يستغني عنها حتى في الأكل .. كانت فنفس الوقت شاغلتنه هنيد الصغيرة )

دومينكا : انتي سوي كلين جرفه ارباب مانئ (نظفي حجرة ارباب مانع ) سوي فولد تياب مال هو اوكي ؟ بادين انا كسل همامه (ربعي ثيابه وانا بغسل حمامه خلاف .. ويوم طلعت )

هنود : حليلها واايد خيرة .. وأشوا انه قلبها طيب .. (وهي ترتب فراشه .. تشل كناديره .. يوم شافت الوزرة والفوانيل عالأرض ..) وييييه !! فضيحه !!! ما يروم يشلهن روحه !! ههههههه أسميه فوضوي (كانت تربع ثيابه وهي واقفة .. بعدين شلت الكرسي وحطته مجابل كبته ) ياويلي !! اعنبوا مب مخلي شي في مكانه !! لا إله الا الله .. برايه .. هههههههههه هذا صديقالطفولة .. (وبعد 10 دقايق من التربيع .. تشوف لها دريس ماله مفرور في الكبت ..شلته .. ويلست على قرافيصها وهذا غلط عشان ظهرها ) هذا ربعونه ولا يعلقونه ولا حق الغسيل ؟ (وتشمه ) وععععع !! اعنبوك متسبح بسماد ؟ (يوم شلته تحس البنطلون فيه شي بس مب حدايد شي ثاني ..خشت ايدها في المخبى .. طلع تيلفون ) اووه ناسي تيلفونه (بس هذا هب تيلفونه هذا تيلفون عواس اللي فيه الاعتراف ) أفتّش فتيلفونه ؟ ههههههه اهلي ما عوّدوني أدق شي مب مالي .. (واتحطه في مخباه ..) ليش ما اشوف جان عنده سوالف بنات هههههههه فضولية !! (وردت طلعته .. ماشي صور .. جان تبطل الفيديو ..) شو ها مب واضح .. (وتشوف هالمرة أوضح .. تشوف هزاع وعواس وناصر الباكستاني ) أوييييه (وتدمع عينها ) أخويه !! (ومنفعلة وااايد ) عوااس اشوووه هذا ؟ (وتمت منصدمة .. المشكلة كانت اتعرف اللي صاير بس ما اتوقعت تشوفه ) هذا الخايس !! الجلب !!! عمري ما أنساه !! (تمت تصيح مكانها وقلبها منقبض وحاسه بقهر فظيع .. هزاع بطل الباب وهي من الزياغ ما توازنت وطاحت سيده داخل الكبت ..اما عند مي .. كانت لابسه عباة وشيله ومب متمكيجه بس لايعه جبدها منعمرها .. وهي نازلة )

فاضل : إيييييييييييييييييييييييييييييه يا حافظ عالمذيعه استوت مطوعه ؟ من متى يا حظي !!

مي : مالي بارض لكلامك ...

فاضل : سمعيني !! مب اتهونين !! بجتلج !! والريال روحه متخبل !!

مي : انته انسان فاضي (وتطلع عنه ) هه ياريتك بس منعتني من الظرهة ياريت

(وتركب الموتر وتسير دوامها وبعد نص ساعه وصلت واستلمتها الكوافير )

الكوافيرة : راح أصبغ لك شعرك ... تغييرلوك ..

مي: اعنبوا من أيام صابغينه لي أسود ... حليله شعري ما ارتاح ..

الكوافيرة : لالا .. ما قلت لك راح نعملك تغيير لوك ..

مي اتأشر لها : اشتغلي اشتغلي وعن الهذربان الزايد .. (وكانت حزتها تتصل ب سعيد والكوافيرة تصبغ شعرها .. ورد عليها )

سعيد : نعم ؟

مي يفز قلبها : سعيد اسمعني ..

سعيد : انتي جذوب ..

مي : انا ما جذبت عليك .. ليشما تصدقني ؟ عطني فرصه الله يخليك ..

سعيد : أعطيج عشان تخوّنين فية؟ بعدني ما اتخبلت !!!

مي : عشان خاطري .. جربني دخيلك .. (هو أصلا من سمع حسها هلك .. وقلبه يعوره لأنه خلاها وايد تترجاه ..)

سعيد : شوفي مي .. (وهي تسمعه ) بعطيج (وصوت الماي تغسل الكوافيرة شعر مي .. بس ما ينسمع شي .. وهي تحاول تلقط كلامه ..تخاف انها تقطع فرمسته ) فرصةثانية وأخيرة .. تعتزلين وتوّدرين مذيعه ما مذيعه وتجابلين ربج .. وحتى تستسمحين من اخوانج (وكل هذا ما سمعته .. بس سمعت آخر الكلام واللي هو ) لا انتي تعرفيني ولا انا اعرفج (وبندت الكوافيرة الماي )

مي : لهالدرجة كارهني ؟ الله يسامحك .. (وهو مب عارف بلاها شو تخربط )

سعيد عصّب : على راحتج .. الله يهنيج فحياتج ياااا مي (وكان يقولها بغصة .. وهي بندت بغصة أكبر .. كانت سرحانه وتفكر فشكله .. تفكر كيف كانت تهزبه أيام قبل .. وبعد ساعه )

مي منصدمة شو هاااااا؟ شو سويتي؟ (كانت ماسكة شعرها وتصيح ) شو هاااه غادية ساحره !!

الكوافيرة : تغيير شامل لوّنت كامل شعرك أصفر على ثلجي متل مادلين مطر

مي: ياربي شو أسوي كيف بظهر للناس !! انتي شفتي مادلين !! هذيجي بيضا وانا سودة بالنسبة لها !!

الكوافيرة : يا دلييه هالوش ما يروح من ايدي .. شوية ميكآب وراح تطلعي ملكة جمال ..

(حطت لها خبيرة التجميل الدرجات النارية من المكياج .. وحطت لها روج أحمر فاقع اما شعرها سشوروه لها ولفوه رولات عالخفيف طالع خبال عليها .. بس هي مب متقبلة شكلها .. كل دقيقة دمعه تنزل .. ترد الماكييرة تمسح الدمعه وتعدل مكياجها ..)

حمد : يا سبحان اللي خلقج !! قمة والله انج قمة !! شكلي حبيتج !!

مي تتحرطم وترمس بشويش : حبتك القرادة !! انا ل سعيد بس !!

حمد : شو قلتي ؟

مي تبتسم : اقول انه خطبني واحد

حمد منصدم : اشووووووووووه ؟ وجيه ما علمتيني وماخذتي شوري ؟

مي : نعم ؟ نعم ؟ ما سمعت عدل !!

حمد : إإه قصدي ما يستوي وراج شغل الحينه .. روحي لبسي .. (وسارت تلبس )

مي : ياربي عاري .. ليش هب مرتاحه ... عطيني شال ..(وبعد ساعه.. بدت المكالمات تنهد عليهم بالهبل )

حمد : يالله بنبدا .. تبينا نطلع اعلانات ربعي ايدج ..

مي : ان شاء الله ان شاء الله ما يشوفني سعيد

(بس كل اللي مداومين شفتات يتريون هاللحظة ) يا مرحبا مليوون بمشاهدي قناة القمة .. انا ما (كانت بتقول مي ) مذيعتكم الريم (وكانت تتكلم وتعطيهم نبذة عنالبرنامج .. اما في الدوام )

.............. : أسميها طرررر

..................: واااي عجت قليبي !!

...................: خلاص بزخها بتهمة انها سارقة قلبي !!

.....................: يعلني أفداها

(وسعيد منطحن من داخله .. اصلا فخاطره صراع داخلي كلهبسبت مي ..)

سعيد فخاطره : حسبي الله عليج يا ميوه !! أسير أشلها من دوامها وأملج عليها غصب !! اخوها روحه بيوافق على طول ... يالله ضو فقلبي ما تنطفي !! يعل عيونكم الجد !! عوّرتي فوادي

(وكانت تاخذ اتصالات وكلام الغزل ينهد عليها مثل المطر هذا عمرها ما حصلته .. لدرجة انها كانت تعصب بس تردها بابتسامه .. وتبيّن لهم انه روحها مرحه يعني اللي يعرفها يقول هذي هب مي .. والقلم انكسر اللي ف إيد سعيد من كثر ما يضغط عليه ويطالعها من صوب ثاني .. اما ميود دق الباب على بيت فضول بس محد بطل الباب تم يتريا ماشي فايدة اما عواس .. طول اليوم يدورها في المستشفى نفسه غرفة غرفة .. مب مخلي مكان .. بس قال يمكن مي تسوي حركات خساس ف رشود .. بس ما يأس تميدورها فكل غرفه فكل حجرة مسكونة من قبل النواطير وحجر السيكيوريتي والحمامات عزكم الله بس ماشي فايده ..)