هااااياااات
الفصل الثاني
الجزء السادس..

راشد نش من رقاده ويلس يتذكر اللي استواله : كنت احلم ,,, ليته كان حلم بس كلمة ياليت ماتبني بيت ,,, آآآه يادنيا وش سويتي فينا ,, ليتني اقدر انسى لا بنسى وبدوس على قلبي من باعك برخيص بيعه بارخص ,, اموت واعرف لييييييش؟؟؟؟؟؟؟؟؟؟؟ !

ياخسرة وقت في حبك قضيته ضاعت احداثه هدر طول الليالي
روح انا ماني متحسر بعادك بس عزي من بيرضابك بدالي ..

نزل راشد ولقى سطان يالس بروحه في الميلس .
راشد : ويين العرب؟؟
سلطان : انت اللي وينك حشى مش رقااد عليك .
راشد : انا راقد الصبح .
سلطان : خيبه وشو يلسك لين الصبح ؟؟
راشد : ماياني رقاااد انزين وينهم؟؟
سلطان : راحوا الحديقه ..
راشد : وابوي وينه ؟؟
سلطان : مادري ,, اظني انه رقد .
راشد : ايوااا ..
سلطان : الا سيارتك وينها؟؟
رااشد: ذكرتني ,, عند حمد .
.......................

سيف يالس يدور فالمنتزه بروحه عقب يلس عكرسي ويلس يفكر : بلااني انا انخبلت بس البنت تستاهل عليها جمال عنبوه من الصبح اناظرها وهي ماعبرتني ولو بنظره ههه ضحكوني يوم صدوا اثنينتهن يشوفوني .. يالله بنشوف مهااري شو بتسوي اسميني وهقتها هههه يحليلها .. شاف اليهال يلعبون تذكر " امـــوت باليهال " ..
.........................

ام عبدالله : والله ياوخيتي هاي الدنيا وبلاويها .
العمة فاطمه (ام راشد ) : الله ياكفينا ان شاء الله ويبعدنا عن بلااويها .
ام عبدالله : اللهم آمين .
ام راشد : واخبار عبدالله ومرته ؟؟
ام عبد الله : الحمد الله كل نهاية اسبوع ييون عنا ويباتون .
ام راشد : زين مايسوون .
ام عبدالله : عيل ياخويتي انا بترخص احين .
ام راشد : ونحن بعد بنروح بس وينهن البنيات ؟؟
ام عبدالله : دقي لوحده منهن .
ام راشد : احين بدق لموزه .
...........

شجون : شو تقول عمووه ؟؟
موزه :تقول يالله بنروح .
شجون :عيل بدق لحمد .
مهره : دامكن بتروحن انا بقلب ويهي .
موزه : صبري وين مستعيله لين مايوصل حضر جنابه البش مهندس.
شجون : مش على خويه .
موزه :دقيله من زينج وزين اخوج احينه .
شجون :احلى عنج يالدبه .
موزه : انزين مهرة اللي هناك خالج صح يمكن يبغيج .
مهره :وين ؟؟
صدت تتطالعه : بشوفه وبرد لكن .
موزه : نتريااج .
شجون: يقول عند الباب .
موزه : اونه ؟؟
شجون : وينها مهره ؟؟
موزه : راحت عند خالها وبترد ,, حبووبه البنت صح ؟؟
شجون: هيه ما شاء الله عليها وترمس وكانج تعرفينها من زمان .
موزه :هالنوع اللي على قلبه على لسانه .
يت مهره .
مهره : عيل انا بترخص فديتكن ورانا درب لين العين .
موزه : ونحن بعد بروح لان المهندس عند الباب والله يعينكم ع درب العين .
شجون : تشرفنا الغاليه بمعرفتج .
مهره : وانا بعد فديتكن ,, وما بنقطع بعض لاني دوم بدقلكن لين ما تقولن مهره فكينا .
موزه تضحك : لا فديتج ما بنقولج فكينا ..
مهره : اوكيه عيل وداعة الله .
موزه وشجون : بحفظ الله .
سلمت عليهن وراحت عند سيف...
موزه : عيل يالله بنروح عند عمووه قبل لا تدق مره ثانيه .
شجون : نسيتي روضه وريم .
موزه : هييه نسيتهن يالله نخطفلهن ونروح .
.................

سيف ومهره فالسياره ..
سيف: انا قتلج سيري تعرفي عليهن ما قتلج انسي ان حد يتريااج تراج نقعتيني ..
مهره : احسن تستاهل .
سيف: وي ويهج ,, يالله قوليلي ؟؟
مهره : شو اقولك ؟
سيف : لا تستهبلين حضرتج .
مهره : اول شي وين بتعشيني ؟؟
سيف: لاتحرقين اعصابي وقولي .
مهره : انزين , اسمها موزه محمد خالد الــ .... ,, وتدرس فالتقنيه اول سنه يعني عمرها 19 سنه ,, وعندها ثنين خوان واخت ,, واللي كانت معاها بنت عمها وعندها ..
سيف: مايخصني باللي عندها ,, رمسيني عنها ؟؟
مهره : معقوله انت ؟؟ شو تسميه هذا انا واثقه انك مش نذل ..
سيف: انتي بلاااج ؟؟ قالت نذل هيه انتي لاتخاافين مابسوي فيها شي .
مهره: عيل ليش كل هذا ؟؟
سيف : دخلت بخاطري البنت ويمكن اخطبها ..
مهره : شووووووو !!!!!!!!!!!!؟
سيف :اللي سمعتيه وكملي اللي تعرفين عنها .
مهره : الصراحه صدمتني معقوله ؟؟؟
سيف: انتي كيف حسيتيها من أي نوع من البنات ؟؟
مهره : ماشاء الله عليها حبوبه و طبعها حلو وماشفت عيب فيها بس هاي اول مقابله يعني ماتعرف المخبي ؟
سيف: مادري انا ارتحت لها واايد .
مهره : وانت كلمتها او يلست معاها عسب ترتاحلها هههه والله انك غريب.
سيف: انتي خذتي رقمها ؟؟
مهره : خذته بس تحلم والله ما اعطيك اياه .
سيف: من قالج اني بغيته ؟؟ عسب تتعرفين عليها اكثر وان شفتيها تناسبني بخطبها .
مهره : سيف انت صاحي اكيد ؟؟؟!!!!!
سيف: انتي بلااج لا تخافين انا بكامل قواي العقليه .
مهره : الصراحه اشك ؟؟ وحلو هاي عيبتني " وان شفتيها تناسبني بخطبها " .
سيف : تراج عورتيلي راسي انتي يالله وين تبغيني اعشيج وبعدين بنكمل هاي السالفه .
مهره : ع كيفك أي مكان .
سيف: بس بغيت اسالج ماسالت شي عني ؟؟
مهره تضحك : للاسف ما يابت طاريك لا تزعل .
سيف: حلو هذا المطلوب ومازعلت بالعكس .
مهره : قبل كنت اشك انك مش صاحي بس احين واااثقه ..
سيف : وانتي شو دراج بشي ..
مهره سكتت وتذكرت شي : صح شرات قبيلة حمدان معقوووله تشاابه اسماء شجون وحمد وعندها اخ ثاني بيكوووون ,,,,,,,, مستحييل شجون اخت حمدان معقوله !!!؟؟؟ لا مااصدق معقوله هالصدفه بس بعد شوو بعد مااا .... لا مستحيل ليش ما انتبهت من قبل صدق اني خبله اذا سيف يبغيني اتعرف عليهن اكثر ووده البنيه صدق انا بسعى اكثر وبكمل يـــآآويلي عليك ياحمدان شوف كيف الدنيا صغيره ,, ويمكن تشابه اسماء ؟؟ شو اسوي كيف بتاكد ؟؟ اسال حمدان ,,, شو اقوله ؟؟ مادري احين تفكيري مشوش ومصدومه يوم برد بفكر عرااحتي .

سيف : وين وصلتي ؟؟؟؟؟؟؟
مهره : هااا مصدومه معقوله تشوف وحده بالصدفه وتقول بخطبها ؟؟ حب من اول نظره شوو ؟؟ انا مااصدق انه في حد يحب من اول نظره والا شو تقول؟؟؟؟؟
سيف : هو صدق كلامج واانا فكرت واايد مادري شو دفعني وخلاني اسوي اللي سويته بس يالله يمكن ربج كاتب اني اخذها وتكون من نصيبي؟؟
مهره : كل شي جاايز ليش لا ,,بس بيني وبينك البنت تستاهل واايد حلوه .
سيف : غيرتي رايج اشوف؟؟
مهره : لزوم اغير رايي ,, ع الله ماتكون مخطوبه .
سيف: مخطوبه!!!
مهره : مادري بتاكد لك .
......................

وفي سيارة حمد ...
حمد : ماشاء الله كلكن هنيه وكيف المنتزه عيبكن؟؟
العمه فاطمه : لاااباس .
حمد : انزين اوصل من اول ؟؟
العمه فاطمه : مافرقت ..
راشد يتصل بحمد ..
حمد : اهلين بالراقد .
راشد :شفتني طولت ليش ماوعيتني ؟؟
حمد : قلت خليه يرقد ويريح .
راشد : انزين وينك ؟؟
حمد : والله ياي فالدرب اوصل القوم اللي عندي .
راشد :أي قوم تقصد اللي راحوا الحديقه .
حمد : هييه ليش بغيت شي ؟؟
راشد : وصل امي اخر شي عسب نسير رباعه .
حمد : خلاص تم .
راشد :عيل برايك .
حمد : فمان الله .
العمه فاطمه : هذا راشد ؟؟
حمد : هيه عموه بغيتيه ؟؟
العمه : لا مابغيته متى نش؟؟
حمد :يقول احينه .
العمه : ايوااا..
حمد كل شوي يتطالع موزه من المنظره ..موزه ترمس مع شجون وعرفت ان حمد يشوفها من المنظره .. وتحاول انها تغيب عن مدى نظره .
....................

موزه وريم وصلوا بيتهم ...موزه رايحه حجرتها..
ام خالد : موزه تعشي عقب سيري فوق ؟
موزه : تسلمين يامايه بس مالي بارض بروح ارقد .
موزه راحت حجرتها وقفلت الباب عليها : بصلي العشا وبحط راسي باكر تقنيه اف الله يعين.
صلت ولبست بجامتها وحطت راسها تفكر : حمد ورااشد قرااب واايد من بعض واكيد حمد بيقول لراشد انه ..... ,,, يعني راشد يعرف انه ,, لااااا مستحيل اصلن حمد متى بدا يحبني ؟؟؟ متى نزل عليه الوحي ؟؟؟ انا طول عمري قدام عيونه متى !!!!! يمكن يحبني من زمان بس انا حسيت فصلاله ... اف صح ان راشد مستحيل ياخذني ,, بس حمد لا شكرا ماااا ابغيه ,, لو كانت في ذره ان راشد ياخذني قبل احينه رااااحت الا اختفت لان حمد ,,,, انا شو الله بلاني بهالسوالف لا راشد ولاحمد ولا غيره ,, آآآآه يالقهر ليش حبيتك ياااراشد يالله ياكريم ارحمني ....البارحه ماطرش مسج واليوم وان شاء الله مايطرش ما ابغي الين واذا طرش بطر اني اوقفه عند حده ... بس شو ذنبه اذا كان يحبني ؟؟؟ ماودي اجرحك واجرح مشاعرك دخييلك ياحمد ابعد عني ..
..........................

وديمه مابعدت عن حال مووزه .
وديمه : غريبه ما دق ولا طرش مسج .. ولا سوا شي ؟؟؟!!!! انا ليييش قتله لو قتله ما برد على هالسوال احسن,,,بـس رديت عليه يالقهر .. الله يالدنيا الكل يعرف اني قوية مايهزني ريح بس والله لو دروا شو بداخلي .. وخاصتا انت ياراشد لو تدري شو بداخلي بتعذرني ادري عذبتك وااايد معايه ياولد عمي ياللي عمري ما سمعت منك كلمة تزعلني وهمك رضااي ساامحني يالغالي ,, ساامحني.
......................
مهره طول الدرب تفكر: واقوله ,, لا مابدقله شوو اسوي ؟؟ مادري والله محتااره وما اعرف شو اسوي هو قالي ببعد وطرشلي مسج ... والله اني ادمنت حبك ياحمدان اكييييد بتكون شجون اخته وانا بتواصل معاها اكثر وبتاكد وبطور علاقتي معها وااايد وعقب بقوله ع كل شي بس احينه ما بدقله ولا شي .. بس ان شاء الله اقدر .
......................

راشد وصل حمد لبيتهم عسب يرجع السياره .
راشد :خلاص باكر نتلاقى .
حمد : يالله عيل فمان الله وشوي شوي فالدرب.
راشد : ان شاء الله وداعة الرحمن .
راشد فالسياره يلس يفكر باللي سوته وديمه فيه : ماعليه ياوديمه بثبتلج اني مش مهتم فيج وبسوي شي بخليج تنكسرين .
راشد رد بيتهم ولقى امه يالسه بروحها عند التلفزيون .
راشد : الحلوين يالسين بروحهم .
ام راشد : اهلين راشد تعشيت ؟؟
راشد يضحك : تسلمين الغاليه ماكل سندويشات .
ام راشد : اكل البيت احسن من هالشندوبشات البايته .
راشد : المهم انها تدخل البطن ,, عيل وين العرب؟؟
ام راشد : العرب رقوود وانت احرس البيت.
راشد يضحك : لا فدتيج يامايه انا بعد برقد بس بغيتج فالسالفه .
ام راشد : سولف اسمعك .
راشديطالع امه ويقول بكل قوة : اماية ابغيج تخطبيلي .
ام راشد : اخطبلك ؟؟؟!!!
راشد : هيه تخطبيلي.
ام راشد : انته بعدك ما اشتغلت كمل دراسك واشتغل وعقب بخطبلك اللي بغيتها.
راشد : انا ما قلت بعرس سيده ,, احينه خطبه مبدئيه لين ما اخلص دراستي واشتغل عقب العرس.
ام راشد : وين استوت هااي بعد بتنقع البنيه لين ما تشتغل وتستقر ,, لا فديتك اشتغل عقب.
راشد : مافيها شي عادي .
ام راشد : لا فيها اصلن محد بيرضى بك لين ما تشتغل ,, وبعدين شو ياب طاري العرس بعدك ياولدي ماكملت العشرين .
راشد : خلاص دام السالفه يبالها شغل بخلي الدراسه وبشتغل والسن مش مهم .
ام راشد :بلااك انته انخبلت شو بتخلي الدراسه ماشي كمل دراستك ولاااحق ع العرس وانت ماعندك سالفه خلني اروح ارقد احسنلي .
راشد : يــــــــــمه بلااااااااااج اقولج خطبيلي تقولي ما عندك سالفه !!!!
ام راشد : رووح حط راسك وارقد ورااك نشه من الصبح وخلني اروح ارقد .
راشد : احينه بخليج بس باكر ورانا رمسه وبتخطبيلي .
ام ارشد : لين باكر خير ويحلها الف حلاال.
راشد: اخاف كلام الليل يمحيه النهار ,
ام راشد تضحك : تصبح ع خير .
راشد : اونتي من هله يالغاليه .
.....................

وباليوم الثاني ...بالعصر..
مهره ياسه فحجرتها بروحها: اليوم ما بدق لهن شو بيقولن عني بس بطرشلهن مسجات اثنينتهن ..انا ابغي اتقرب لشجون اكثر عسب حمدان بس موزه مابطوفها لسيف تناااسبه واااايد بس كيف !!!؟؟؟ ,,, بروح عند امي ..
مهره : هلا امايه.
ام مهره : اهلين بلاااج واحس ورااج شي ؟؟
مهره : والله ياطويلة العمر ضاايقه ما احب ايلس فالبيت عودني اخوج الموقر ما ييلسني فالبيت.
ام مهره : كلاام يديد شو رايج اتصل به واقوله يظهرج ؟؟
مهره : والله تسوين فيه خير.
ام مهره : والله// شو رايج هالمره اقوله يوديج دبي؟؟
مهره :حلووووو.
ام مهره معصبه: حلو فعينج ماشي ظهره يالله سيري وقابلي كتبج .
مهره تضحك: كنت امزح ابغي اشو ردة فعلج لا تعصبين .
ام مهره : عاد مزاحج ثقيل وما حبيته قالت ما احب ايلس فالبيت .
مهره : عاد الواحد مايقدر يمزح يعني؟؟
ام مهره : وحد قالج لا تمزحين هاذي انتي تمزحين.
مهره : انزين يامايه شو رايج اليوم نسير عند حد من خولي؟؟
ام مهره: ماشي اليوم قعده فالبيت ,, والا تعودتي هاليومين تظهرين وانا ساكته ؟؟
مهره : خلاااااص وياكلمه ردي مكانج وبنثبر فالبيت اليوم ولاتزعلين يالغاليه.
ام مهره : عفيه ع الشاطره ويالله قلبي ويهج وسيري درسي الامتحانات قربت صح؟؟
مهره : وين قربت ؟؟ بعدها .
ام مهره : عن الخرط وسيري قابلي الكتب احسلج ومن اليوم ماشي ظهره لين عقب الامتحانات .
مهره: لااااا ما اقدر ما احب قعدة البيت .
ام مهره : لا تحاولين ماشي .
مهره: احينه بقلب ويهي وامري لله وعقب ...
ام مهره تقاطعها : لا عقب ولا احينه درسي .
مهره : ان شاء الله ,, انا شو خلاني اظهر من الحجره ؟؟
..................

اليده : وينها موزه ماقمت اشوفها ؟؟
ريم : فوق فحجرتها بروح بناديها .
اليده : لا خليها يمكن تدرس .
ريم : انزين يدووه .
ام خالد : وانتي ريم ليش ما تدرسين ؟؟
ريم : انا درست وحليت واجباتي .
اليده : ريم شاطره بتيب الاول ع البنات كلهن ,, شرات موزه .
ريم : لا انا عقب بدخل الجامعه ما بدخل الكليه .
اليده : الله يوفقكن ان شاء الله .
.......................

ام راشد : راشد البارحه انهينا السالفه .
راشد :لا ما انهينا وقلنا اليوم بنكملها .
ام راشد :لا تيلس تحن مثل البنات .
راشد : انا ما بحن ولا شي ,, قلت اخطبولي ماطلبت شي ثاني .
ام راشد : لا حــــــول ,, انت ماينفعلك غير ابوك بقوله وكيفكم .
راشد : شو بتقوليله ؟؟
ام راشد : بقوله ولدك جن ووده مستشفى المينانين.
راشد يضحك : تعرفين تنكتين // لا صدق شو بتقوليله ؟
ام راشد : بقوله ولدك يبغي يعرس وهو بعده ما كمل دراسته وما اشتغل ,, وبخليه هو يستلمك .
راشد : يااااامايه انا قلت خطبه ما ابغي اعرس احينه .
ام راشد : شو طرى ع بالك ما ادري دامك ما تبغي تعرس ليش مستعجل؟
راشد : ماشي بس بتخطبيلي؟؟
ام راشد : طبعا لا .
راشد : عيل من باكر بوقف دراسه وبدور لي شغل .
ام راشد : تهديد يعني ..؟؟؟؟!!!1
راشد : لا والله ما عاش من يهديدج يالغاليه بس انتي قلتي محد بيرضا بك وانت تدرس بشتغل عسب يرضون بيه .
ام راشد : لا صدق جنيت انته وبعدين وين بتلاقي شغل ؟؟ احينه اللي عنده شهاده جامعيه يالله يلاقون شغل انت عندك شهادة ثانويه وين بتلاقي ياولدي؟؟
راشد :ماعليج بلاقي .
ام راشد : عورتلي راسي بخلي ابوك يكلمك .
....................
نهاية الجزء الساادس
ترقبواااا