|
(الجزء 54) • مايد فخاطره : هههههههه اسميها قوية ... بعدها على هالشخصية مسيطرة عليها .. الله يحفظج يا اميه نشيبة مورّثة اللسان الطويل .. • شمايل وهي مروّحة وتتحرطم : اكرم انك هب طبيعي .. (وبعد ربع ساعة .. حسن ومانع يايينه ..) • مانع : نحن كلمنا مديرة المستشفى .. وخبرناها عنك .. • مايد : تدري اني متخفي؟ • مانع: تدري .. بس طبعا الدكاترة .. والممرضات ما يدرون وهي ما بتخبرهم لين اتزخه .. • حسن : خلك بعيد عن المشاكل .. • مايد : ان شاء الله .. (وروحوا عنه وودته الممرضة غرفته .. اما هنود .. من وصلت الخياط راوته القطعه قال بيخلصها لها بعد اسبوعين .. وهي الا كم من يوم الملجة .. وخلاف راواها قطعة بنفسجية فاقعة عيناوية وفيها الاحمر الفاقع مخوّرة ومخلصة .. لوحدة من سنة ماخذتها وسيده شرتها وخذتها وياها ..وروحت البيت .. كان راشد تفكيره في المسج وهي في اختها مي .. ويوم وصلت الساعة 8:30 ) • مي : السلام عليكم ورحمة الله وبركاته .. اسعد الله مسائكم .. قام صاحب السمو رئيس الدولة بزيارة .. • نشبة : اندوج طاعن كل سنة اييبون لنا وحدة شيفة .. • غريبة اتدقق: هذي رمسة ميوه .. اندوج تشبه ميوه !! • نشبة : وعععع وايه تراب !! ميوه وين !! الا عند فضّول مسوّد الضلع .. • غريبة تولول : حسبي الله عليج يا ميوه !! فضحتينا يالمكرفونة !! طاعي لباسها طاعي !! لا وجاية ولا عباة !! لا بركتن في هالبنية !! هاي آخرة تربيتي فيج هاي؟ (وتتصل ) ألو؟ • مي : مرحبا • غريبة مشتطة : مستانسة على اللي سويتيه؟ سوّد ويه ابوج !! • مي بدلع : ليش ؟ آآآآآني شو سويت؟ • غريبة تزاعج : اكرم انج ما سويتي شي .. • مي : اييييه ليش تزاعجين؟ انا مو بنتج !! وثاني شي انتي ما يبتيني من بطنج !! • غريبة : هب هب هباج الله من بنية !! احينه انا اللي ربيت وشاب شعر راسي وآخر شي تفضحيني وتنزلين راسي هذا يزايه؟ • مي : أي يزا هذا هاه؟ الام اللي اتفر بنتها هذي يسمونها هاي ام؟ ما اتكلم عن العراقية بس اتكلم عنج .. كاني موجودة .. ييتي وخطبتي لبنتج ولا فكرتي اتقولين لي ردي معاي .. اقولج ما من بيني وبينج كلام .. والبطاقة راح اقطعها .. جانج اتريدين اتحاجين بنتج .. شريلها موبايل .. باي .. (وبندت ببرودة اعصاب وغريبة مستغربة من طريقة كلام بنتها .. وعند هنود ) • زينة : كاهي .. كاهي اتشوفينها؟ • هنود فخاطرها : ويدي غربلج الله شو هاللباس؟ قصير ؟ فقدتج وفقدت كراعينج السود وععععععع فضل عنج !! • زينة : بكرة ملجة الرياييل .. متحمسة حبيبتي؟ • هنود تكتب : اكيد .. بس اليوم مول ما سوالي سالفة .. • زينة : ليش يا عيوني؟ • هنود تكتب : مادري يمكن وايد زوّدتها وياه .. (وسارت غرفتها اتفكر شو مصير اختها وحركاتها ..وتتذكر رشود وضحكته اللي لعوّزت حالها .. وعند عواس وفطيم عالنت ) • عيسى يكتب : اوووه التمساحة تترياني .. • فطيم تكتب : ممكن اقول لك شي؟ • عيسى يكتب : قولي .. • فطيم تكتب : انا بكل صراحة اسمي فاطمة .. • عيسى يكتب : اصلا اعرف انج فطيم .. وانا عيسى • فطيم تكتب : صدق؟ (وكانت منصدمة ومب دارية بعمرها ) • عيسى يكتب : على راحتج اذا ما تصدقين .. • فطيم تكتب : افتح الميكرفون .. عشان أتأكد .. • عيسى يكتب : آسف .. • فطيم تكتب : يعني انته جذاب .. • عيسى يكتب : اوكي انا جذاب .. بس براويج شي يا بنت نشيبة .. (ويراويها صورته صوب البحيرة وكان شكله موول متغير خاف شعره عالآخر ومسوي سبايكي ومبيّض لدرجة انه ما فيه دم في ويهه وجسمه ) يالله باي • فطيم تكتب : لحظة لحظة دخيل الله عواس .. • عيسى يكتب : شو بغيتي؟ فخاطرج بشي؟ • فطيم تكتب : عواس ليش اتسوي جذي؟ • عيسى يكتب : ما يخصج .. • فطيم تكتب: ليش اتكلمني جذيه؟ (وبند الماسنجر وتم طول اليوم وهو مفوّل عليها ويسبها .. ومي على الساعة 12 ردت البيت كانت طبعا اتهوم وسمعتها هنود بس سوّت عمرها راقدة .. اما غريبة اللي مرضت بسبة كلام مي .. كانت فيها حمى وزاد عليها من التفكير وكانت حاسة بالذنب لأنها ودرت بناتها عند ابوهم ..وشمايل حالتها من اسوأ لأسوأ .. اما الصبح الساعة 9 كانت الممرضة توّعي شمايل ..) • الممرضة : هناء حبيبتي .. قومي ..قومي .. حان موعدج ويا الدكتورة وبعدج ما خذتي الدواء .. (وتهزها ) هناء ..هناء .. ليش ما اتردين؟ (ورفعت اللحاف عن ويهها ولقت شمايل ما تتحرك والدمّان عالموسدة وتربع برع ) نادوا الدكتور حالا ... بسرعة البنت انتحرت .. بسرعة !!! |
(الجزء 55) (ونقلوها على طول الطابق السابع يسعفونها ..وعلى الساعة 10 ) • شمسة : ألو؟ مرحبا .. بنتي ؟ (وتصيح ) شوه؟ عملية شو؟ يالله انا ياية ..يبالي ساعتين .. انا موافقة موافقة .. اهم شي بنتي .. (وبندت التيلفون ..وشلت عمرها .. وسيده عالمستشفى .. واما ميود كان يدوّر على شمايل في الحديقة .. وخلاف ما عرف شو يسوي .. سار عند مديرة المستشفى .. ويدق الباب ..) • مايد : مدااااام مكنيررر؟ • السكرتيرة : شو بدك؟ • مايد : مدااااام.. (ويحط ايده ع خاصرته ) • السكرتيرة : ويت هيرر.. (اصبر هني .. وسارت وخلاف طلعت ..) كوم انسايد .. (ادخل ) • مايد : تانكيو .. تانكيو .. (ومن بندت الباب ...) السلام عليكم .. (وعج النظارة ..) • امل : عليك السلام .. هههههههههههههه أيوا انته المتخفي مايد ... آمر ... • مايد : في عندكم مريضة ما شفتها اليوم .. • امل : اتعرفها ؟ • مايد : هيه اسمها شمايــــ قصدي هناء .. • امل : هناء؟ هييييييه .. حليلها هالبنية موول مب مترقعة .. • مايد زاغ : خير؟ شو استوا؟ • امل : شو تستويلك؟ • مايد : بنت عمي .. وبنت خالتي فنفس الوقت .. • امل : ايوا .. يا مايد .. بنت عمك عندها الدودة الزايدة .. ويبالها عملية مستعجلة .. ونحن نتريا امها • مايد منصدم : الدودة الزايدة والحمال؟ الله يستر بس .. • امل : أي حمال؟ • مايد : إييييه المغفية !! عاطينج دكتوراه ببلاش؟ البنية حامل .. • امل قامت من مكتبها مفزوعة : شو تقول؟ حامل؟ لالالالا غلطان .. • مايد : شو غلطان؟ انا ويا امها سايرين عند الدكتورة وفحصتها والدكتورة أكدت هالشي !! • امل قامت : انته متأكد؟ • مايد : والله العظيم ... • امل : بس تحاليلنا ما بيّنت هالشي .. • مايد : قومي سيري اتأكدي .. دخيل الله .. ممكن تسويلي تصريح اني ادخل ؟ • امل : بهالشكل؟ • مايد : أي شكل؟ هذي حبيبتي انا هب هادنها .. (وسيده ساروا غرفةالانعاش .. وهم يسوون لها التحاليل ومايد ماسك ايدها ويقرا عليها .. ) أحبج .. أحبج .. (ودس صبوعه في صبوعها ويلمح السلسلة اللي ماخذنها لها .. ) فديتج يا ربي .. ادري انه قلبج طيب .. ومستحيل تنسين حبيبج .. (ويتقرب من اذنيها ) شمايل حبيبتي قومي .. تراني اترياج .. طول عمري بترياج .. احبج .. اتعرفين شو يعني احبج؟ امووت على شمايل وروحها وقلبها وشطانتها وحتى صبرها .. حبيبتي قومي يعلني افدا روحج .. ليتني مرّقد بدالج .. (وهي راقدة مب حاسة بعمرها ..) • شمايل : هزاع .. • مايد منصدم : هزاع؟ منو هذا هزاع؟ لايكون الريال اللي كان مجابلنج؟ ايهبي ياخذج عني !! والله لأراويه .. (وبعد نص ساعة تدخل الدكتورة ..) • امل: اتعرف انك خوفتني ؟ • مايد : خير؟ • امل: البنت هب حامل .. • مايد منصدم : شو تقولين؟ • امل وتراويه الورقة : متى حصل الاغتصاب؟ • مايد : من شهر.. • امل: بالله عليك !! حالة الاغتصاب او حتى الحالة بين الريال وحرمته .. يعني مستحيل يكون اليوم الثاني الحمال.. جيه بالله عليك البنية ارنبة وانا مادري ؟ • مايد متنّح : ما فهمت !! • امل : انته ما درست علوم؟ • مايد : درست .. • امل : افتح كتاب العلوم صفحة 22 وبتعرف .. • مايد : والله ما يبته ويايه يالخبيرة !! فهميني !! كيف هب حامل؟ • امل : حصل الاغتصاب انقول مثلا يوم الاحد .. وانتوا سرتوا العيادة بعد اسبوع صح؟ • مايد : اظني جذيه .. • امل : عيل خلاص .. البنت مستحيل اتحمل بعد اسبوع .. يوم الدياي يباله 45 يوم عشان يفقس كيف الآدمي !! • مايد :هااااااااااااااااااه معناته الآدمية يبالها 9 شهور توّني فهمت !! • امل : صح .. • مايد : بس ليش جذبت علينا الدكتورة هاييجي ؟ الله يغربلها يعلها السقم .. يعلها فكل خطوة سم ان شاء الله .. • امل : يمكن خطأ طبي.. • مايد : بعد الغبية ما سألتهم .. لكن ما عليه خليني اخلص منا لمهمو وانا براويها والله ما هديتها ولا هديت هزاع .. • امل : منو هزاع؟ • مايد : واحد ما تعرفينه .. • امل : انزين نحن نخاف انه يزيد عليها الويّع .. ممكن اتوقع على هذي؟ انك موافق انه انسويلها الجراحة .. • مايد : مضمونة؟ • امل : عملية ناجحة بإذن الله .. • مايد : أوقعها وأوّقع ابوها بعد !! |
(الجزء 56) • امل وتعطيه الاوراق : كلك اتحبها .. • مايد: الا اموت على هواها .. ( امل اتأشر على ويهها ) نعم؟ • امل تضحك : ههههههه خشمك على الحافة بيطيح !! • مايد يمسك خشمه : هههههه احينه بسير اعدله .. • امل: غاوية هالاكستنشنز ..بسير اسوي منهن ..اي صالون مسوي؟ • مايد : تراج زوّدتيها .. سيري عالجي حبيبتي .. (وسارت وهو سار غرفته يعدّل خشمه وعند هندوه ) • مي : انا عندي بعد ساعة تسجيل .. بتين ويايه؟ لأني بعدها بروح الصالون .. • هنود تكتب : روحي بسير الصالون مب محتاجة لج .. • مي : ترا هناك مكياجهم يجنن • هنود تكتب : خليته لج .. • مي : براحتج يا عيوني .. (وسارت لبست تنورة وردية طويلة وفانيلة بيضاء .. كاجوال عشان هناك يلبّسونها .. وشلت شنطتها بس انفرطت وطاحت .. وطاحن الاغراض عالارض .. موبايلين اثنينه ..كلينكس .. جلوس .. جحال .. مبرد .. مشط حق الكشة .. لكن الصدمة الاكبر محصلة شيئين ما يتحصلن فشنطة بنية واللي هو علبة سجاير ومدواخ ودوخة .. ) • هنود فخاطرها : ويلي ويلاه !! مدواخ .؟ لهالدرجة توصل؟ (وحطت ايدها على راسها ومي سيده كانت تحبي وشلشلت اغراضها وهي زايغة وقامت وطلعت وهي تربع ..) هب هباج الله ..يالقوية يالمستلعنة الله يغربلج !! (وتم داير راسها وخذت بنادول اكسترا .. والصداع مب طايع يخوز عنها .. ونزلت وهي يائسة من اختها .. كل مرة تتذكر صورة اختها والمدواخ .. بس المدواخ حق الشباب .. ما كد شافت بنية اتدوخ مدواخ .. ) • زينة : يمه هنودة شفيج؟ • هنود تبتسم وفخاطرها : ليتج اتعرفين شو فداخلي يا خالوه .. • زينة : ابي اطلب منج طلب .. هنودة حبيبتي .. ابيج لما تطلع مي تروحين معها .. ريلج على ريلها .. يا يوم .. انا خايفة عليها .. وعيال الحرام اشكثر .. وهذي بنتي لو مهما يصير يا يوم .. • هنود تكتب : ان شاء الله .. • زينة : اتصلت بج الجود .. حاجتني واتقول بتمرج بعد ساعة .. • هنود مستغربة : لويش؟ • زينة : هههههه لويش؟ لأنه راح توّديج الصالون .. • هنود تكتب : وانتي؟ • زينة : آني؟ لا يا عيوني .. آني راح تمرني وحدة تعمل مكياج وشعر .. اما انتوا البنات خذوا راحتكم .. • هنود تكتب : فديتج يا عيوني .. (وزينة اتظهر لها بيزات .. يكفيها الا ويزيد .. وردت اتفكر ف أبوها اللي هي من لحمه ودمه من اتحولوا ما فكّر يعطيها درهم واحد تصرفه .. وحرمته العراقية قلبها اصفى عنه .. وعيونها تدمع .. ليش الدنيا مرات تكون قاسية .. ابا يكون ابويه شرات كل ابو .. شمعنى انا ابويه اللئيم؟ شمعنى همه هو البيزات .. ما عمره فكر بحياتنا وكم من مرة فكر انه يبيعنا .. ما همه سعادتنا او حتى ابتسامتنا .. اهم شي عنده يعاندنا ويشوف الدموع في عيوننا .. كأنه انجز انجاز .. وخذ براءة الاختراع عليه .. وعند عواس .. كان يلبس الدريس ماله وسعيد وياه ..) • عيسى : اتعرف انه البارحة كانت تترجاني رجا .. • سعيد يلبس الدلاغ : كانت فطيم صح ؟ • عيسى : كنت حاس .. واصلا روحها اعترفت .. • سعيد : وشعنه ما ترد لها ؟ • عيسى : انا ارد لها ؟ ههههههه والله ضحكتني يا سعّود !! انا ارد لها ؟ (وبجدية ) انا اقولك لو تموت 100 موتة ما رد لها .. اتعرف شو ما ارد لها ؟ يعني بعذبها شرات ما سوّت بي .. انا ادريبها تبا ريال مريّش وعنده فلوس .. لكن اتهبي تاخذ قلبي .. انا انقرصت مرة وقلت لها الله يهنيج .. لكن من سابع المستحيلات ارد لوحدة خسيسة ومنافقة شراتها !! يعني انا اترييتها وحتى بسبتها ما كملت دراستي ولا دشيت جامعة كله عشان امسك عمري وأيّمع لعرسنا بيزات .. ريال على ريال .. وهي الا لعّابة بتلعب شوية وبتفر قلبي .. ههه هذي الا ياهل بعدها ما عقلت !! • سعيد : يالله يا عواس وايد شال فخاطرك .. • عيسى : شو ما شليت ... لكن احينه هي اللي تراكض ورايه .. تراها تبا واحد لعّاب حاضرين .. • سعيد : إييييييه لا تنسى هذي من هلك وعرضك !! • عيسى : هه ومن قالك بسّوي شي؟ خلها تركض ورا حلم ما بتحصله .. • سعيد: يا ريال .. خلك من الخجة .. لا تتعلم هالطبع !! (وبطل الماسنجر ..) • عيسى : طاع !! هاكيه اونلاين !! • سعيد : لا حول ولا قوةالا بالله .. انزين رد عليها .. • عيسى : مالي مزاج .. • سعيد : خاف الله فيها .. • عيسى : ماخافت الله يوم قالتها جدام اميه نشبة .. يوم غربلتني .. انا ما كنت ادري انها وايد شالة علية !! طوف طوف خلنا نسير نتريق قبل ما يدق الجرس .. (وهو يطالع نافذة المسن وهو متألم الا منكسر .. وعند مستشفى الامل ..اليدة ميثاء وشمسة يايات مسرعات .. وكانت امل طالعة من غرفة العمليات ..) • شمسة : سامحينا عالتأخير .. شو مستوي فبنتي ؟ • امل: انا بسألج ايام الاغتصاب كانت اترجّع صح؟ • شمسة : هي اترجّع دم حتى روحي اتروعت عليها .. • امل : من يبتوها لعندنا سوينالها وايد تحاليل بس ما كان مبيّن لين طاحت علينا وعرفنا عوقها .. • ميثاء : شو عوقها واعلية عليها ؟ • امل : الدودة الزايدة .. • ميثاء منصدمة : دودة فبطنها ؟؟ طلعوها عيل !! هذا اكيد من اللوز !! • امل تضحك : خالوه مب دود دود .. قصدي انه سبب انها ترجّع دم والويّع فبطنها .. ورفضها للاكل والحمى .. هذي هي اعراضه .. بس ما تبيّن الا بعد فترة وعند هناء .. موّصل لمرحلة متقدمة .. بس نحنا اتلاحقنا عليها والحينه بإذن الله اتكون بخير .. • ميثاء : يالله الحمدلله والشكر .. (وتصيح ) يالله تشافيها .. هاي البنية مووول هب مترقعه ... • امل : وممكن تتفضلون لمكتبي ؟ (وشمسة كانت زايغة انه شمايل سقطت الحمل .. ويوم سارن وياها ) • شمسة : خير يا دكتورة .. • امل : لو سمحتي ابغي اعرف اسم الدكتورة اللي شخصت حمال هناء .. • شمسة : مادري والله شو اسمها بس احيدها اردنية .. جيه؟ • امل : لأنه هناء مش حامل .. ولا شي كما تعتقدون .. • شمسة منصدمة : شو تقولين؟ عن الخبال !! لالالا نحن متأكدين .. • ميثاء منصدمة : أي حمال؟ بنتج حامل؟ • امل : هناء لا حامل ولا شي .. وانا مسويتلها 5 مرات تحليل تبع الحمل .. • شمسة عصبت : شوه؟ تتحرانا نلعب وياها؟ جيه لا حسيب ولا رقيب عليها؟ والله لأشتكي عليها .. انزين دكتورة منو وقع عالعملية؟ • امل اتلعثمت : هاه؟ اختيه من قلتي انج موافقة خلاص .. نحن اتصرفنا .. • شمسة : مشكووورة يا بنيتي .. الحينه عادي نشوفها؟ • امل : لا ما يصير لين اتكمل ساعة بالكثير .. ويخوز عنها البنج .. • ميثاء وهن طالعات : تعالي اباج .. (واتخبرها كل شي واليدة شوية وبتتخبل من اللي تسمعه ..وعند الجود ) • الجود : بنسير صالون وحدة اعرفها من زمان .. بس توّها فاتحتنه بس شو مكياجها خبال .. • هنود تكتب : اهم شي اني وياج .. مب مهم المكياج .. • الجود : فديتج والله ما خبرتيني .. جيه ما خليتيني اسوق ؟ واصريتي انه ناخذ موتركم ..؟ (وهنود حطت صبعها على راسها معناتها مزاج ) ههههههه يا مزاجية .. (ويوم وقفوا عند الاشارة ..) • هنود تكتب : متحمسة اشوف امج نداية !! • الجود : اميه نداية ؟ ههههههههه اقولج وايد متلومة منج .. لأنها ما يت يوم الخطبة حتى ما رقدت الليل .. وهي تفكر بس والله يا هنود اميه ما تروم سيراتها ويياتها ثجيلة .. ما تحب تطلع .. ونادرا ما تي دبي .. ومن توصل المزرعة تتذكر ابويه سالم وتدعي له بالرحمة .. • هنود فخاطرها : الله يغفر له ويرحمه .. بس من القصة والله حبيته .. • هنود تكتب : وشو اخبارج ويا محمد؟ • الجود تضحك هب مصدقة : هههههههه محمد؟ الله يذكره بالخير .. انسان بصم على قلبي ومستحيل انساه .. يمكن هو نساني .. بس انا اقولج مستحيل انساه .. • هنود تكتب : وليش ما تحاولين اتدوسين على كرامتج واتردين له ؟ ما تبين عيال؟ ما تبينه هو؟ ما تحبينه؟ • الجود : حب؟ دخيلج يا هنيد .. بعدج ما جربتي الحب .. (ودمعة ورا دمعه تنزل من الجود ) اتعرفين يوم تكسرين بخاطر واحد حبّاج من كل خاطره وباع الدنيا عشانج هذا هو محمد .. وانا وايد متندمة لين يومجهذا اني ما رديت له .. والله اني اذكر يوم يطلقني في القرية كأنه توّة حاصل لي .. حسيت روحي بتظهر من ينبي .. ولا اقولج .. في آدمي يتريا حرمته سنتين لين اتخلص دراستها ومستحمل جفاها وعنادها؟ في؟ ياختيه وايد بنات مستقويات لين ايييهن شي ويعجهن مرة وحدة امممرة .. (ومن وصل الصالون سيده غيروا الموضوع لأنه حساس وايد .. لدرجة انه الجود صاحت .. وعند شمايل دش مايد ..) • امل : شوف اا دخلتك على اساس انك ممرض .. • مايد : ان شاء الله .. ان شاء الله (ولبسته الكمامة عشان ما يبين شي غير عيونه .. وبعد ربع ساعة .. شمايل تمسك ايده وهو كان سرحان بس قفز ) • شمايل : ابا جالاكسي .. • مايد بجج عيونه وفخاطره : جالاكسي .؟ من وين اييبلج جالاكسي؟ هااااااايه رديتي لي روحي .. (وهي بعدها ماسكة ايده ) • شمايل : اقولج ابا جالاكسي سيري هاتي لي .. (ونشت تتويع وهدته ) آآخ اشووو هذا؟ شو استوا ببطني؟ (مايد طلع برع لأنها بدت تقوم .. وسار يدوّر لها الجالاكسي ما حصل وعج الكمامة ..ويوم هو راد ) • ميثاء : تستاهلين السلامة يا امايا .. • شمايل تحضن ميثاء وما طاعت اتهدها : اتولهت عليج يا امايا .. (وصدت اتطالع ) انته بعد ؟ اعنبوا لاحقني فكل مكان ؟ • شمسة : جيه منو هاي؟ • مايد : مدااااااااااام مكنير؟ • شمايل : اطلع برع !! كلنا حريم شو تبا بنا؟ • ميثاء : منو هاي اميه؟ • شمايل: هذا ريال فلبيني بو المراري شو فيه فضل عنه طاعي شوية وبيتحيّس !! فضل عنه .. انا روحها جبدي اتلوع من هالاشكال .. • مايد فخاطره : حسبي الله عليك يا منوع يا ساس البلى .. (وهو واقف مصطن يسوي عمره مب فاهم ) • شمايل: انته مينون؟ اقولك اظهر .. • مايد : مداااام مكنير .. مداااام !! • شمايل: يابويه ما نبا شي !! سر عند الممرضات يمكن يبنك سر الله يهديك !! (وحاطة ايدها على بطنها ) انا ما روم اقول شي بس تعبت وياه يأست !! • ميثاء: خليه مصطن لين تي الممرضة .. بتسحبه .. (ويخبرونها بكل شي وشمايل منصدمة واتطالع بطنها ) • شمايل تصيح : انا هب حامل؟ حلفي امايا؟ • شمسة : والله العظيم انج هب حامل .. تعبوا وهم يسوون التحاليل طلعت هذيجي الدكتورة اونها مغلطة !! • شمايل: والله اتهدوني عليها الملعونة !! انا كنت اصيح دم بسبت هالشي ويننت بي في بنية بترضى تسكت عن اللي استوالها؟ • شمسة : اكيد لا .. بس انتي يوم بتقومين بالسلامة .. كل اللي تبينه بيستوي .. • شمايل وبهدوء : وميود؟ • شمسة : شو تبين فيه ؟ خليه يلتعن عنج !! هو ساس البلى !! • شمايل : بس انا احبه اميييه والله احبه !! • مايد يدقق براسه عالطوفة وبصوت واطي : يالله .. يالله يالله !! ودوني الانعاش .. انتي انعاشي يا حلات هالكلمة .. • ميثاء : وابويييه وابويييه .. الحقي طاعيها اتدقق براسها على اليدار .. اهبي !! وابوييه هاي فيها زيارين .. طلعي برع هب ناقصينج !! (وعند مانع ..) • مانع يمسك اخته العنود من شعرها : شوفي ان ما رديتي استسمحتي من ريلج وابو ريلج والله لأمسح بويهج عالارض • ام مانع: دخيلك يا مانع هدها .. • مانع : محد مخرب اخواني غيرج انتي ودلعج !! انا اختيه اتسير تشتكي عن ابو ريلها؟ هذا شرات ابوج اهبي هباج الله .. جنتج ونارج .. وهاكي الاهبل مبطل حلجه اتقول ياهل .. • العنود : اصلا ما دانيه !! هاتوا له حد يشله ويحطه انا ما اقهره !! • مانع: بتغدين شرات بشكارته اتعرفين شقايل؟ شرات البشكارة تحت ريله ... شرات ما فضحتينا .. لعنبوا دارج بيزاته كلهن عندج انتي ومحد يروم يردج وتبين تفرينه برع البيت والله وراسي يشم الهوا .. انا بعرف دواج !! (ومسكها من رقبتها ) |
(الجزء 57) (اما بعد صلاة العصر ..) • الجود : سوري أخرتج .. يالله انا بروّح وبيي وياهم .. • هنود تكتب : ما بتتغدين ويانا؟ • الجود : أي غدا فديتج؟ أذّن العصر وبيأذّن المغرب .. يالله اشوفج خلاف يا احلى عروس .. • هنود فخاطرها : الله يحفظج .. (وسارت سيده لحجرتها اتطالع عمرها في المنظرة .. اتفكر ..) هل انا عاشقة لرشود؟ ولا انا اقص على عمري؟ ومانع؟ نسيته؟ (وتتنفس بصعوبة ) أميييييه ..هل قلبي بيرضى اني اخذ واحد احبه بعد اللي صار لي؟ اخافه يوم من الايام يسألني عن الحادثة .. (تمت بجلابيتها .. اتطالع مكياجها اللي يمزج بين الناري الاحمر والاصفر الهادي .. والجحال الفحمي الاسود اللي مرسوم من اول العين لآخره بخط طويل ورفيع .. والروج الاحمر الصارخ .. واتطالع التنورة والقميص لكن مب أي كلام .. كانت شارتنه لها زينة من مصمم بس مب معروف توّة في بدايته .. تنورة حمراء حرير ضيقة لحد الركبة ومن تحتها وسيعة شرا السمكة.. وقميص اصفر ومسّوي فيه قصات للقميص مبيّن انه انيق وعند الاكمام ركّب الدانتيل الفرنسي من نفس لون ال القميص وفيه صبّة كريستال من اللون الاحمر وكله عالاكمام ..) (وعند راشد) • راشد : معرس !! معرس فديتني .. ياحظي فهالبنية .. (ويوصله مسج يقطع فرحته .. " مستانس على عمرك بهالعرس؟ الله لا سامحك " ) والخيبة !! منو هاي ؟ العثرة تعثرها !!! (ورد اتصل بالرقم .. محد يرد ) اووووف !! come on طاف طاف هاي وحدة فاصية .. ( اما شمايل .. على طول ودوها حجرتها القبلية .. وكانت وياها ميثاء وشمسة وامل ) • امل : نحنا نقلناج لغرفتج لأنج خلاص مب محتاية غير للراحة ..وغيرج يحتاج اكثر للعناية .. • شمايل : زين سويتي .. ممكن تخلوني ويا الدكتورة رواحنا ؟ • ميثاء : ليش امايا؟ شي فيج؟ شي يعوّرج ؟ • شمايل : لا ببس ابا اكلمها شوي .. • ميثاء : ان شاء الله طوفي شموس .. (ويوم طلعن ) • شمايل عجت شيلتها : أسئلة وايد اتدور في بالي يا دكتورة .. • امل يلست :وانا اقولج اعتبريني دكتورتج لأني بشرف على علاجج .. • شمايل : دكتورة انتي متأكدة اني هب حامل ؟ • امل :اتعرفين اني استغربت وخلاف اتأكدت وكله من التحاليل .. (واتخبرها بكل شي ) • شمايل : يالله هم وانزاح .. اتعرفين انه هلكني والله اني كنت حاسة انه مافي فداخلي ياهل .. • امل :انتي قوليلي شو اسمها الدكتورة وانا بتصرف .. • شمايل : انا اعرف شكلها بس ناسية اسمها .. ودّوني صوبها وانا براويها الويل على اصوله .. • امل : في اسئلة ثانية في بالج؟ • شمايل اترددت : هل ؟ هل؟ هل انا؟ (واحمر ويهها وحطت ايدها على بطنها ) يعني بنية ؟ • امل: لا يا هناء .. انتي مب بنت .. • شمايل نزلت دموعها لأنه وقع الكلمة صعب عليها : مشكورة مشكورة .. اناما ابعطلج عن شغلج ... • امل : زعلتي؟ هذي هي الحقيقة واتمنى اتعرفين حقيقة مرضج .. • شمايل بعصبية : انا هب مريضة .. • امل : هناء .. الدكتورة شخصت مرضج وانتي عندج خلط بين الواقع والخيال .. من كثر الكوابيس .. • شمايل : وسببهن الاغتصاب .. وانا فاهمة .. • امل : بإذن الله كل مرض وله علاج انتي مستعدة تستمرين في العلاج؟ • شمايل: هالحزة لا .. • امل : اتمنى اتقولين أقدر وأقدر ويكون العزوم عندج يفوق التوقعات صدقيني بتتعافين بأقصر وقت ممكن .. • شمايل : تتكلمين جد؟ • امل : اكيد ..هناء انا بعطيج دواء يرقدج عشان يخفف الالم .. • شمايل : ياريت لأنه بطني يعورني والخياطة اتزيّغني .. • امل : لاتشوفين الخياطة عشان ما تلمسينها .. (وعطتها الابرة وطلعت .. وعند عيسى فتح المسن بس ما لقاها اون لاين ..) • عيسى مستغرب : غريبة ما دخلت اليوم؟ هههههههههه شكلها يأست الحرمة .. • سعيد : عواس ما شفت طبجة نعالي؟ • عيسى : اظني فارنها في الحمام .. • سعيد : منو كنت اتكلم توّك ؟ • عيسى : ههههههههه اكلم عمري ... • سعيد يسّوي عمره منصدم : لهالدرجة وصلت السالفة؟ اتكلم عمرك ؟ • عيسى : هع هع هع لهالدرجة واكثر يا عموه .. • سعيد : اشوفك جلبت مصري يا واد .. • عيسى : أمال؟ • سعيد : بقى عاوز أسألك البت دي بتاعت اللي ما بيتسمى المسن بتدخل؟ • عيسى: لأه .. دي عاوزة تتغلى .. على مين يا راجل !! (سعيد وعيسى يضحكون .. وقابضينها على القناة المصرية ..وفي الموتر ) • نشبة اتكلم الدريول اليديد : ابويه محمد اتدل؟ • محمد: ماما انتي قول وين انا في روح مكان وين تبي !! • نشبة : لا حول ولا قوة الا بالله .. • غريبة تضحك : بلاج معتفسة عموه؟ دامنه ويانا محرم خلاص .. (وترقد راشد عشان ينش خلاف ) • حمد : شو تقولين ؟ • غريبة : ابويه خف صوتك عن ينش الياهل ... • نشبة : ما نقول شي ما نقول شي .. • غريبة : لا تحاتين انا ادل .. • شما : احينه الله يحفظها في صورة لو خليتوا زهور تي ويانا .. عشان ترفه عن عمرها بدال الحبسة .. جان زين .. • نشبة نشت لها نشة : انطبي اقولج انطبي زهور وزهور شعنه؟ روحتنا مرتصين .. (وفطيم وهناء يواويجون جدام ويطالعون نشبة ) • فطيم : رواحتنا؟ من وين يا يبتنها بعد؟ • هناء: بدينا بقاموس التخريف !! • فطيم : اميه؟ بس وينها اميه ميثاء ؟ • غريبة : سارت ويا شموس عند حرمة .. • فطيم : قصدج شمايل؟ • هناء : خالوه ؟ وينه مايد ؟ احيده لازم يكون موجود فهالمناسبة .. • غريبة : مسافر برع البلاد .. دورة مال الشغل.. • هناء: حراااااااااااااااااااااام بيفوّت ملجة اخته .. • نشبة : وانتي شو حارّنج ؟ (واتغير السالفة ) الله يستر .. يالله توصلنا بالسلامة .. روحه الدريول يديد .. • فاطمة فخاطرها : طبعا اليوم ما بدخل المسن بسبت الملجة ... اكيد ما بيحاتي اذا دخلت ولا لأ .. بعد اللي سويته فيه .. ادري انه ما يباني .. بس انا قلبي يباه .. ومب طايعة انسى صورته اللي حطاها آخر مرة .. كان مبيّن انه بخير وعافية الا طرر .. (وكانت هنوه متغشية واتطلع موبايلها من شنطتها .. وبالدسة اتطالع 3 ميسد كول .. انه هزاع لأنها اتعرف رقم المستشفى .. محد غيره يتصل .. ) • هنوه فخاطرها : ياربي شو اسوي ؟ ارد عليه؟ والله لو سمعونني اهلي جان جتلوني .. ماشي غير ارد عليه خلاف .. امبونه اهبل .. ولا بيسوي شي ادريبه جبان .. (وسيده اييها مسج ..ان ما رديتي علية لأطلع ورقة الزواج العرفي جدام اهلج وأطّرها جدامهم ..") |
قريت اول جزء بس .. لي عودهـ ~ ^^ |
| الساعة الآن 01:47 PM |
Powered by vBulletin® Copyright ©2000 - 2025, Jelsoft Enterprises Ltd.
Content Relevant URLs by vBSEO 3.5.2 TranZ By
Almuhajir