منتدى استراحات زايد - رّوآيه " هآيـم فيّ بحـر آلشّوق وُ لذة هيآمك "

.

.

.

البارت الـ 14

من عقب ما طلعت من بيت يدي سرت بيتنا . . وشفت بويهي ميره تكلم الشغاله وميره منصدمه . .

ميره : انتي متاكده ؟؟؟

الشغاله : ايوااااه . . انا يسمع ماما مهره يبكي يبكي صوت عالي , بعدين بااباه وليد يييجي مطباااخ قول حق انا جيبي غدا حق هوااا . . انا يقول حق هوااا يرووح داخل حجره مال باابا كبيررر في نفرات يبكي يبكي واااجد بعدين هوا يرووح . .

ابتسمت باستهزاء ف ويه ميره الي صدت لي بنظرات فششششششله . .

يتني على طول : مهوور

كانت يايه تمسك ايدي بس رجعت ع ورى عسبت ما تمسكني . .

انا : جوفي ميره . . انا ما يهمني عرفتي الصدق ولا ماعرفتي كفايا انج ماصدقتيني ف ما يهمني الحين انتي عرفتي ولا لاء انج ظلمتيني . . وهاي مش اول مره . ." ابتسمت " واذا المره الي طافت انا رحت بيت يدي وانا مش ف نيتي شي . . انا قبل شوي رحت ونيتي اشوف وليد

ميره تطالعني . .

انا : انا مش لهالدرجه حقيره عشان تظنين كنتي فيني بسوء . . ولا انا الي ابيعج عشان واحد مثل ما انتي كل ماتشوفيني معاه تبيعيني وتعقين علي كلام . . انا ما حبيت اخوج ف يوم وليله عشان بسهولة اسير وادور غيره . . ليتني من هالنوع . . الي اقدر احب حد ثاني عشان انسى الاول . . انا يوم اروح عند وليد لان مثل ما تعرفين انا وهو اكثر نااااااس تقعد ويا العيايز يدي ويدوه . . وكلامه يريحني مثل ما هم يريحوني . . تعلم منهم كيف يرمس وكيف يهدي ! لكن " ابتسم " ما بتطلعين ع غريب . . سبحان الله . . مهما سويتي تبقى صلة الدم تبين نوع الشخص . . انتو تربيتو ع ايد ابو ظالم واناني . . تعلم هالابو يسوي الي يباه ب كيفه ب مزاجه . . يجرح ويعق كلام ويسوي الي براسه ف لحظه ويبيع الكل . . وانتو كلكم كلككككككم خذتو طباعه . . من اكبركم لـ اصغركم . . تبقى هاي غريزه مزروعه فيكم . . انانييييين . .

ميره تعض ع شفايفها بقوة : مهوور . .

انا : انا اعرف اني غاليه عندج بس انا ماباها هالغلا الي وراها جرررح . . انتي وايد تجرحيني مثل اخوج . . وايد تطعنيني بظهري مثثثثل اخوج . . بلحظة من دون ما تتاكدين حتى سرتي وقعدتي مع وحده يمكن مالها ذنب لكن بس هدفج تطعنيني اناا . . " أأشر على نفسي " انااا . . بنت عمج وحسبت اختج وكاتمة اسرارج واول صدر تلجئين له . .

ميره : ماعندي كلام اقولج اياه والله . . وايد متلومة

انا : لا تتلومين . . لاني انا بعد بستوي انانية الحين . . والي اباه بسويه وما براعي مشاعر حد

ميره تطالعني : تقصدين وليد

انا : وليد او غيره . . بحط نفسي ف الاولوية من اليوم ورايح . . الحين إلي يبدي الناس ما يعيش . .

ميره تمسك جتفي : مهور دخيلج . . الا وليد

وليد دش البيت : السلام عليكم . .

الي لاحظ عليه يوم دش رد السلام . .

ميره تطالعني : هو الحلم الوحيد ف حياتي لا تاخذينه . .

انا تامه اطالعها . .

ميره تمسك جتفي بقوة : دخيلج ..

آآآآآآآه يا بنت عمي . . ليتني اقدر اقسى واخذ من طباع عيال حمد . . الشخص الي ممكن يريحني بيكون سبب ف تعاستج . . وانا مستحيل افتح لج باب يخليج تعيسه . .

وليد يي صوبنا ويطالع ميره : ليش ماسكتنها من جتفها . .طراره ؟

ميره توخر ايدها : مممممما يضحك . .

وليد يطالع ميره بجمود : حد قالج اضحكي ؟

ميرة عاقده حياتها : وليش ما اضحك ان شاء الله

وليد : اجلبي اجلبي ويهج خل يحطون لي الغدا انا ومهور . .

انا : انا قلتلك مساع " تعمدت اقول جي عشان اقرص دودة ميره " اني ما شتهي .

وليد يطالعني : وليش ان شاء الله . . تبين تنقرضين اختيه ؟

ميره : انا ماتغديت باكل وياك . ." تبتسم "

وليد : لا مجرد هالطاري لوع جبدي وسد نفسي . . جلبي ويهج " يتصدد " وين يدوه "

ميره : ويالبنات . . ازقرها ؟

وليد : لا . . " يطالع ميره بتركيز " اشوفج هاديه . . مساع لابقه وتصفعين وحالتج حاله

ميره تطالعه . .

انا اطالعته كنت ابا اغير السالفه مابا ميره تتلوم :ليش ييت ؟ انت قلت بتم في بيت يدي " متعمده انتقم من ميروه "

وليد يبتسم وحس : يييت عشان اتم بقربج . .

انا فجيت عيني .. حسبي الله عليك ياوليد مش لهالدرجه عاد . .

عقدت حياتي وروحت عنهم وسرت حجرتي . . .اول مادخلت جفت شما وشيخه وخلود . .

شما تمسح الروج : والله مااااا حط . .

انا اتنهد : وبعدين وياج شموه .

شما : جوفي شو مسوين فيني . .

انا ابتسم : شموه شو مسوين . . جحال وبلاشر وروج . .

شما : روووووووووووج احمر عاد . .

انا : هههههههههه انزين انتي عروووووووس لازم تكشخين ريلج بيشوفج اول مره

شما : لا والله ؟؟؟ خل يشوفني بطبيعتي . ." تدمع " ترا والله ما بنزل . .

وصلها مسج . .

شما تنزل دمعتها : جوفو شو مطرش . .

خلود شلت التلفون : عندج 10 دقايق لو ماييتي بخلي البنات ييبوني لين عندج

شيخه تبتسم : يعني يالله فكينا . .

خلود ترد تيب الروج . .

شما : قلتلللللللج ما بحطه . . كفااااااااايا ملبسسيني هالجلابيه

انا : خلاص خلاص . .

يبت كلينكس ومسحت المتبقي من الروج ووخرته كله . . ويبت لها قلوس لماعي شفاف

انا :هذا زين ؟

شما تطالعه : يلمع وايد؟

انا ابتسم : لا . .

شما تطالع . : مادري

انا بطلته وحطيته حق عمري : ها شرايج

شما : هيه اوكي خفيف . .

وحطيتلها . .

شما كانت لابسه جلابية مغربيه مخصرة حمرا حرير والايد كانت طويله لكن اكمام الايد شيفون وحزام فالنص . . كانت ألوان الجلابية مخلوطة بين الاحمر والاسود وديزاين القطعه لايق عليها حييل . .

شما : مهور يقولون لي اونه لا تلبسين شيله . .

انا مبتسمه من خاطري : الله يعينك يا مروان . .

شما بعيون ضيجه : بلبس سودا ع الاقل

انا : يعني شو الفايده شيله سودا " مسكت جتفها " وها الشفاف طالع . . لبسي عباه ارحم

شما : صصصصصح؟ انا قلتلهم . .

انا : شموه انا إلي بعطيج طراق الحين

خلود وشيخه : هههههههههههههههههههههههههههههههههههههههههههههههههه

شما تطالعني . .

انا : انزين مش مشكله اوكي . لبسي شيله سودا برايه . . بتطلعين شرات هالبنات المستخفات . .

شما : مهور لا تقولين جي عني

انا : عيل شسويلج . .

شما : برايه عادي بلبس . .

انا طلعت لها شيله ساري خفيفه وعطيتها : اندوج . .

شما لبستها . .

انا : صبري صبري فديتج انا بلبسج . .

وقعدت ألبسها الشيله بطريقه حلوه ويمعت لها قصتها وخليتها على ينب وطلعتها من الشيله وطلعت جد غاوية . .

شيخه تعطرها وخلود يابتلها المبخر . . وقعدنا نحط لها دهن العود وجد استانسنا عليها . . كانت اموره وايد . .

مروان طرشلها مسج . . " باقي دقيقه وحده "

شما : اوووووووووووويييييييه " ترجف " مابا مابا . .

انا سرت صوبها ومسكت ايدها . . : شماني . . انتي ما بتكونين روحج . . وانا وعدتج ما بخليج . . يعني حتى لو خونو شيخو وخلود وسارو انا ما بسير . . لكن من الحين اقولج . . بتقعدين جريب منه . .

شما تشهق

انا : مش جريب وايد وايد ّ! يعني المهم قريبه منه . . وبتقعدين معاه وبتسولفين وشوي شوي بتتعودين عليه . . مروان مش غجري وبيهجم عليج . . صدقيني حتى ايدج ما بيلمسها لين يحس انج مرتاحتله جزئيا . . مهما كان هو ولد عمج وما يبالج المضرة والشينه . . صح ؟

شما هدت وايد من عقب كلامي : صح . . " تاخذ نفس عميق " خلاص انا جاهزه

ابتسمت لها : يالله . .

طلعو قبلي شيخه وخلود وانا كنت امشي ويا شما . . سرنا صوب ميلس البنات . . كان مروان اهناك يتريا . . واول ما جافنا دخلنا وقف . .

مروان : قبيله ماشاء الله . . ولا مطارزية انتو

شيخه : ههههههههههههه شما ردي ردي . .

مروان يبتسم : سوالف بنت عمي الله يهديج . .

كان عينه صوبي . . يبا يشوفها لكنها ترجف موت ومنخشه فيني . .

انا عطيته ظهري وجابلت شما . .

انا : شما شو قلنا . .

شما ترجف من فوقها لين تحتها وماتنطق ب شي . .

انا مسكت جتفوها : اهدي حبيبتي خلاص . . والله مروان حبااب وما يزيغ . .

شما تهز راسها ب اوكي . .

انا ابتسمت و وصلتها لين عنده واتزحزحزت شوي . .

شما تطالعني وماسكه جلابيتي وترجف : و . . ووو . . وييين . . سآآ . . يررره

خلود : وابويييييييه هههههههههههههههههههههههههههههههههههه

مروان مبتسم وكان يطالعها ومذهول . . حسيت فيه ابتسامته بغت اطر ويهه طر . .

انا : سلمي ع ريلج . .

شما ترجف ومنزله راسها : السس . . السسلام عليكم

مروان يبتسم : وعليكم السلام . .

مروان مد ايده بيسلم عليها وكنا فجينا حلجنا مصدومين نبا نعرف بتمد ايدها ولا . .

لكن سوتها شما وكانت ترجف . . تحاول ترفع ايدها بس من الرجفه تنزل بروحها . .

مروان يبتسم : بنت عمي اذكري الله . .

نزل ايده : ماعليه بسلم عليج عقب . .

مروان : ايلسي . .

شما تطالعني . .

انا اطالعها : مابروح مكان . . اهني انا

مروان يطالع شيخه وخلود : انتن فارجن . .

شما : خواتي . . " تطالعهم " لا تروحون . .

خلود وشيخه قامن : اسمحيلنا اختيه " يطالعوني " يالله نشي . .

شما وقفت يوم كلموني . . : بروح وياها والله . .

انا : اهدي شما انا اهني هاا شوفيني . .مايخصني فيهن انا . . بيروحون برايهن . . انا قلتلج ما بتحرك لين تقوليلي روحي . .

مروان يطالع شما وقابض ضحكته : ايلسي ما بتروح . .

خلود وشيخه ضحكو وسارو . .

شما تطالعني . . انا كنت شوي بعيده عنهم . . هم ع نفس السيد قاعدين . . وانا ع غنفة مجابلتنهم ابعد . .

مروان صد صوبي يطالعني انا كنت ألعب بالبي بي وشوي اطالعهم . .

مروان منزل راسه : عادي ارفع راسي اشوفج ؟

شما تررجف . .

مروان يشوف ايدها : خلاص خلاص . . اهدي . . ما بشوفج والله . . بتم اطالع ايدج . .

شما تلعب باصابعها . .

مروان : شحالج . ؟

شما : ببب . . خييير . .

مروان يبتسم : دوم ان شاء الله . .

وتم سآآآآآآكت موووووووول ما يتكلم . . تقريبآ مرت عليهم 10 دقايق وهم سآكتين بس . . حتى انا اطالعهم بتركيز خفت شي صار لكن اشوفهم سااااااااكتين . .

مروان : واخيرآ . .

شمآ : . .

مروان : ماترجفين . .

شما سآكته . .

مروآن : الحين عادي اشوفج . .

شما ردت ترجف بس اخف : هيه . .

مروان يطالعها : حرام عليج . . " يحط ايده ع رقبته " ياني شد عضلي . .

شما تبتسم . .

مروان يبتسم : يا لبيه . .

شما نزلت راسها . .

مروان : ماعرف شو المفروض الواحد يقول ف هالمناسبات . . تعرفين عاد اول مره اعرس وجذه

شما : هههه . .

مروان يبتسم : انا اهم شي عندي تعرفين شي واحد . .

انا رفعت عيني اطالع . .

مروان : ترا انتي من اختياري . .

انقرص قلبببببببي بقوة . . عورتني والله

مروان : عبدالله وسيف . . ابوي اختارلهم حياتهم ورسمها مثل ما يبا . . انتي كنتي من اختياري انا . . محد رسمج ف عيني ومحد رشحج او غصبني عليج . .

شما تطالعني وانا ابتسمت لها . .

شما بارتباك : ليش اخترتني . .

مروان يبتسم : جذبتيني . . جذبني حيآج وآآيد . . جذبني ان عندي بنت عم للحين ماشفت ويهها ولاسمعت حسها مع ان مرت اكثر عن 20 سنه ع جمعآتنا . .

شما ابتسمت . ,

مروان : ع فكره انتي من زمان ف خاطري . . يعني ماقولج احبج او ارتاح لج . . لكنج كنتي بخاطري كنت اقول يارب تكون من نصيبي . . بغيتج لي . . ويوم صارت الخبببطه هاك اليوم وخبطتج . . حمدت ربي ألف مره عشان اتشجع واقولهم اني اباج . . والحمدلله " يبتسم "

رفعت راسها وتمت تطالعه وابتسمت . .

حسيت براآآحه وآيد . . حبيت كلامه لها . . حيبت صرآحته . . سيف وعبدالله وميره فيهم من طباع بعض وايد . . لو شو ماصار بيتشابهون ف الاطباع وفيهم من بعض لكن مروان غيير . . انا توقعت فالبدايه ان عيشتهم مع بعض تخليهم نفس الطبع لكن رقوي عاشت معاهم . . ترا رقوي اختهم بالرضاعه مش بس بنت عمهم . . وكانت اغلب عيشتها معاهم فالبيت . . لان يوم ربت حرمت عمي خالد ويابت رقوي مارامت ترضعها ماعرف ليش صارتلها امراض وماعرف شو وكانت مرت عمي حمد توها مربيه ف ميره ف رضعت رقوي وعآشت عندهم رقوي وآيد . . حتى لما سافر عمي خالد وحرمته علاج قبل خطبة شموه . . رقوي ما يت تبات عندنا ف البيت سارت تبات عندهم !! تحس انها منجذبه لهم وترتاحلهم ف تمت عندهم مش عندنا . .يعني باختصار عاشت معاهم وفضلتهم علينا وعلى خواتها لكن ماخذت طباعهم ؟ يعني مش العشره الي تغير الطبع . . ها شي فيهم ف دمممممهم . . اف يقهرووووووووووووووووون . . كله من عمي حمد ويه النحسسسسسسسسسسسسس . . استغفر الله بسس

مروان يمد ايده : الحين عادي اسلم عليج

شما بحيا مدت ايدها . .

وسلم عليها وتم قابض ايدينها اليمنى بايدينته الهنتين . .

شما تطالعه . .

مروان : ما بوخر ايدي لين تتعودين علي بسرعه . .

انا سويت عمري مشغوله ف الفون عشان ماحرجهم . . كنت العب بالفون بس اجوف ان مروان صد يطالعني . .

مروان : ماعليج منها مشغوله . .

شما ابتسمت . .

مروان : اقولها تروح ؟

شما : لاااااا . . " يايه توخر ايدها بس هو مسكها "

مروان : خلاص خلاص ..

شما : اذا راحت بروح . .

مروان : عيل الله يسامحج يايه تشوفين ريلج اول مره وميمعه قبيله

شما ابتسمت . .

مروان تم ييطالعها ومبتسم : ابتسامتج وايد حلوه . .

شما تبتسم اكثر . .

مروان : انزين سولفي . . خبريني عنج . . عن دراستج . . حياتج

شما : انا تخرجت من الثانوية وماكملت دراسه

مروان فاج عينه كان مركز على شي ف جتفها . .

شما رجعت شوي ورى : شو تشوف . .

مروان مسك ايدها ب قوة وتم يطالع ايدينها من فوق صوب جتوفها . .

شما ترتجف . .

مروان : شو هذا ؟ في علامة

شما عرفت شو يقصد وحطت ايدها غطته . .

مروان عاقد حياته : كيف صارلج جي ؟

شما تطالعه : هد ايدي عورتني . .

مروان حس بروحه وهد ايدها . .

شما : رشود حارقني . .

مروان بغا يقوم : الخسيسسسسسس الحيوان انا براويه . .

شما مسكت ايده : تعاااااال . .

مروان تحرك بيسير بس انصدم من حركتها وانا بطلت عيني ع وسعهن من الصدمه . .

عشان تمنعه ما يسير حظنته بقوة من ورى . . مش قصدها تحظنه بس عشان تمنعه وماتخليه يتحررك . .

شما : والله ماتروح لا تروح من زماان هالسالفه والله من زمآن . .

مروان تم متصنم مكانه لدرجه خلتني اضحك من الخاطر . .

شما يوم حست اني اضحك حست ع عمرها ومـآآآآآآآآآآآآآآآآآآآآآآآآتت وعلى طول خازت عنه . .

مروان قابض ضحكته : بروح . .

شما : انزين انا بفهمك عقب روووووووح . .

مروان تام واقف : فهميني يلا . .

انا اهز راسي يمين يسار وبصوت واطي : والله انك عيار يا مروان . .

شما بعيون ترتجي : انزين اقعددددد . .

مروان يلس وتعمد يقعد مكآنهآ عشان تنجبر تقعد وايد حذاله . .

مروان : يالله ارمسي ؟

شما : ترا محد يعرف الا مهووووور . .

مروان فاج عينه ويطالعني : هالفعصوصه تعرف وانا ماعرف ؟

شما تطالعه : ماكنت اعرفك حزتها انزين

مروان يطالعها عين بعين : يعني من اليوم بكون انا الي اعرف بس صح . .

شما تمت تطالعه . .

مروان يبتسم : يالله قولي . .

شما : سالفه جديمه والله

مروان : انزين قولي

شما : احترقت غرفه شواخ مره بالمبخر وكلنا ربعنا الحوش . . ويوم عرف رشود حرقني

مروان فاج عينه : وحرقكم كلكم ؟

شما منزله راسها : بس انا . .

مروان : وشمعننننننى

شما : ماكان يخليني اطلع كاشفه حتى الحوش كله يقولي انتي عوره عوره المفروض مول ما تطلعين من البيت . .

مروان : صدقه . .

شما تطالعه : شو

مروان : كملي

شما : بسس عشان جي حرقني . .

مروان : بعد ماله حقققق

شما : انزين خلاص السالفه جديمه يعني

مروان يبتسم : لانها جديمه بسكت .. بس والله لو سواها وانا خاطبنج ما كنت برحمه . .

شما ابتسمت . .

انا اتثاوب : شموه حبيبتي احس خلاص لازم اروح صح

شما تطالعه . .

مروان يبتسم : ع كيفج .. انتي قرري . .

شما تبلع ريجها : انزين . .

انا ابتسمت : صدق اروح ؟

شما تهز راسها ب هيه . .

انا رفعت ايدي : الحمدللله . .

مروان يبتسم : مشكوره بنت عمي . . انا مديون لج بوحده . .

انا : هيه حطها حلق ف اذنك ولا تنسى انك مديون لي بوحده . .

مروان : ماني ناسي . .

ابتسمت وطلعت . .

الحمدلله . . مروان يعرف كيف يتصرف ويعرف كيف يخلي شما تتعود عليه يعني مهمتي معاها تمت بحمد الله . .

صعدت حجرتي وصليت العصر وعقب تذكرت ان تلفوني الايفون من زمان غايب عن عيني ؟ مادريبه وين . . قعدت انبش فالغرفه وادور وادور ما حصلته . . انصدمت !! لا وبعد ما عليه قفل . . بس الحمدلله مافيه صور ولا شي لكن بعد يعني وين سار تلفوني . .

وسحبت البي بي وتميت اتصل عليه ويرن !

: الو . .

انا انصدمت : بسم الله منو . . منو شال تلفوني ؟

: توا الناس والله . . الحين افتكرتي ان عندج تلفون ثاني . .

انا : انت منو . .

: . .

انا : ألوو . .

بندو فويهي . . ! منو هالحمممممار . . !! رديت اتصل واتتتتصل واتتتتتتصل بس محد يرد . .

عنود تدق الباب : مهووور انتي اهني ؟

انا : هيه دششي . .

ودشت ودش حبيب قلبي صقر وياها . .

انا : حبيييييييييبي انا تعال . .

كان مدوووخ . .

انا : فديته مسسطل . .

عنود تبتسم : خليه عندج لين فليل . . بسير ويا عبدالله السينما . .

انا فاجه عيني : بس اليوم الجمعه . .

عنود : خلاص حبيبتي الحين يدوه تجبرنا نتم لين 5 هههههههه عقب تطلق سراحنا عادي . .

انا ابتسم : الله يرحم ايام اول ماتخلي حد يتحرك لين فليل . .

عنود : لا الحين من صارت 5 قالت مطولين ؟ فارجو هههههههههه

ابتسمت وشليت الولد حطيته ف حظني وتميت امسح ع شعره وظهره . .

عنود قفلت باب حجرتي وفجت كبتي وتمت تطلع لها بنطلون وقميص . .

عنود : عندج عباه غاوية . .

انا : اننتو ما خليتو لي شي ترى . . هالكبت سبيييييل كل ساعه حد دش خذا منه شي

عنود تبتسم : ماعليه تحمليني اختج . .

ابتسمت . . : بدشون فلم رومانسي . .

عنود تطالعني : كيف عرفتي

انا : من ويهج ههههه . .

عنود تبتسم : سخيفه . .

انا : الله يصلح حالكم يارب . .

عنود : امييييين . .

انا : يدي سار صح . .

عنود : هيه توا ويا يدوه . . الكل سار محد اهني اصلا الا مروان ويا شموه . .

انا : حبيبتي بيستلمها اليوم ما بيودرها . .

عنود : بيني وبينج احسن عشان تتعود عليه بسرعه . .

انا : يالله برايج انا بسير بيت يدي . . ماقعدت وياه اليوم مثل الناس . .

عنود : و ولدي

انا : وياي طبعا . .

وحطيته ع السرير فديته خلاص شوي وبيرقد . . لبست لي شيله وشليته مره ثانية ورديت طلعت . .

انا : استانسي . .

واول ما ييت انزل من الدري جفته معاها قبآآل البآب وآقفين . .

نوره تبتسم : ههههههه . .

سيف : يالله عاد . . " يبتسم "

نورة : مادري عادي . .

سيف : شورج عند اميه واميه راضيه " يبتسم " نروح ؟ الفلم ما يتفوت والله . .

صقور مسك رقبتي : ماااااامااااااا . .

سيف ونورة صدو صوبي . .

حطيت عيني بعينه وانا ماحرك جفني . . بس اطالعه مذهوله من الشخصيه اليديده الي طلعت ب يوم وليله . . هذا الي جدام عيني حبيبي . . قلبي . . هذا الي يحرم ع الناس كلها ويحل لي انا بس . .ها الشخص لي انا وبس مكتوب لي من 21 سنه كيف يروح من عيني بسهوله كيف . . نقطة ضعفي تحملت كل شي عشآنه . . اساءات امه وابوه وحتى عــــرآآت ميره علي . . بسهوله قدرت تعيش وتتأقلم . . ماتأثرت ولو شوي بفرآقي ؟ ماهزززززك بعدي سيف . . مااااكسر قلبك شرا ما كسر قلبي ؟

سيف : مشينا ؟

نورة تبتسم : هيه . .

عضيت شفاتي بقوة وانا اشوفه يمسكها من خصرها ويطلعون سوى . . طعنننننني . . والله العظيم طعني . . قسم بالله شل روحي من محلللللللها . .

نزلت من الدري بهدوء . . وانا احس خطواتي ثجيله صعب امشي . . احس خطواتي شرا الي يمشي ف نص البحر وصعبه يتحرك ويحرك ريوله ويرفعها . .مشلوله . . جسمي واحساسي وقلبي مشلول . .

طلعت من بيتنا وجفته وياها ف السياره يضحكون وحرك . . تمنت عيني العما ولا شوفته يضحك ويا غيري..

بلعت ريجي ب عذآآب وسرت بيت يدي وانا خانقتني العبره حيل . . احس الكل مل من شكواي وصيحي وعذابي على سيف . .الكل مل من الكآبه الي انا معيشه روحي فيها بس محد يحس . . محد يحس كيف هالانسان يعنيلي وكان بالنسبه لي شمسي وقمري إلي غابو عني فجأه بدون سابق انذار . .

يدوه ترمس بصوت واطي : وديه الحجره . .

انا قعدت ف الصاله . . : لا برايه خليه ع ايدي . .

يدوه بعصبيه : انتي اصلا الي فراسج تسوينه محد يقولج شي ., يدج سار يرقد . .

يدي بصوت عالي : بعدني ما رقدت . .

حطيت الولد ع المخدة " صالة يدوة ويدي مش غنفات "

وسرت حجرة يدي كان منسدح . .

يدي : مهره ؟

ابتسمت ومسكت ايده الكبيرة . . ايده الي لو حطيتها ع ويهي بتي ع ويهي كله . .

مسكت ايده وحطيت راسي عليه . .

انا ودمعتي تنزل : زعلت مني اليوم صح ؟

يدي : على شو ازعل ؟

انا اطالعه : يديه بعدنا ف نفس اليوم . . نسيت ؟

يدي : ليش ازعل منج ابوي . .

انا منزله راسي : لاني ماسلمت على . . . . . .

ماقدرت انطقها واقول حرمته . . .

يدي : على امنووه . .

انا ابتسم بخنقة : على حرمة سيف . .

يدي : ليش ما سلمتي عليها . .

حطيت راسي ع ايده وغمضت : انا وايد حزينه يديه . .

يدي يمسح ع راسي : يا مهره بنت عبدالله . . وش تبين بهالفال . . خلج ب ذكر الله . . انتي روحج غزآل

ابتسمت وهو يقولها بهالنبرة المرحة . . من صغيره كان يقولي اياها . .يلس يدق ع راسي ويعيدها ويعيدها لين نمت وماوعيت الا ع صوت يدوه تضربني ب مفهة ع جتفي . .

يدوه : الناس صلت المغرب وتسننت وخلصت وانتي بعدج خامده . .

انا اتثاوب : ماحسيت " تذكرت " الولد وين . .

يدوه : يلعب ويا وليد ., قووووومي يالله قومي . .

انا : ان شاء الله ان شاء الله ..

وقمت رحت توضيت وصليت وعقب تحجبت عدل وطلعت الصاله . .

الولد اول ما جافني ربع صوبي : امممممممااااااااه . .

وليد فاج عينه : اماااااااه ؟؟

انا ابتسم : مره اماااه . . مره اباه . . مره كالوه . . مره مهاالي . .

وليد : من نفسيتج الخايسه ما يعرفج حتى . .

انا : هاهاها . .

يدوه يايبه كيك وفواله حق وليد : كل ابويه يالله . .

وليد يتمييلح : مش يوعاان

يدوه : ليش ابويه . . كل . . مستوي يابس ماتاكل . .

وليد يطالعني : وكليييني ..

يدوه : يااا الله عيوني ااذا بتاكلها فداك . .

انا اسوي عمري برجع : لوعت جبدنا ويا هالدلع . .

يدوه : شووووووووو قلتتتتتتتي . .

انا اشل الولد وابوسه : ماشي . . وينه يدي ؟

يدوه : سار ويا البنقالي يمشون صوب الزرع . .

انا : انزين انا بسير بيتنا عيل . .

وليد : شحقه تسيرين ؟ انا ابا الصغيرون العب وياه . .

يدوه : هييييه خليه اهني وسيري . .

وليد : لا امايا انتي ماترومين تلاحقينه . . خليها يالسه وياه . .

يدوه : شو عندج طايره تبين تسيرين بيتكم . . ايلسسي . . " وتامه توكل وليد وهو يطالعني بخبث "

انا : ان شاء الله يدوه تامرين امر . .

يدوه : غريبه . . مش عادتج تسمعين الرمسه . .

انا : والله يدوه ماعرفنالج

يدوه : جب يلا بلا طواله لسسان . . بروحي ما نسيت سواد ويهج

وليد : ليش شو مسويه بعد . .

يدوه : ما سلمت ع حرمة ولد عمك سيف . . فشلتنا والحرمه ماده ايدها . .

انا عقدت حياتي واطالعت يدوه : كم مره بتنكدين علي يدوه ؟ تراج خبرتي امايا وضربتني ضرب اليهد وانتي كفيتي و وفيتي ب كلام الي يسم الروح شحقه تردين تيبين طاري . .

يدوه ترفع الكوب بتفره علي : بلا طواله لسسسسسااان . .

انا اتنهدت وصديت الصوب الثاني . .

يت الشغاله وقالت ل يدوه ان يديه يباها . .

يدوه : بعد هالشيبه ما يقدر يتمشا بروحه . . ما يقدر يفجج عني شويه ..

وسارت . .

وليد تم يقص له كيك بعد ويحطله مره ثانية وهو يطالعني . .

وليد : مرتاحه بلي سويتيه . . استانستي يعني . .

انا اطالعه : وليد . . .

وليد يقاطعني : شو وليد ؟ شووه شو عندج ؟ شو استفدتي خبرتيني . . عطيني شي واحد زين استفدتيه

انا اطالعه ..

وليد: بالعكس . . اثبتي حق سيف انه احسن باختياره واحسن يوم ودر وحده مثلج . .

انا اطالعه : مش ناقصه كلام جارح . . تراني احصل من كل صوب . .

وليد : وليتج تتأدبين بعد . نفس ما انتي .!!

انا : محد فيكم حب مثل ماا انا حبيت . .

وليد يطالعني : صح . . وانا اعرف هالشي عدل . . وصح كلامج محد بيفهم هالشعور وهالحب الي كنتي تكنينه لكن ماشي فايده بلي تسوينه . . راح عنج خلاص . . هو الي باعج . . بيعيه . . بيني له انج عايشه بدونه مثل ما هو عايش بدونج . .

انا : لا تتحراني انا ضعيفه . . انا محتاجه وقت اصفي فيه نفسي وشعوري وصدقني . . صدتي لـ سيف بتكون اقوى من صدته لي بألف مره . . بيندم قد شعر راسه . .

وليد : وانا عارف هالجانب فيج . . تحرركي يالله خلينا نشوف قوتج وشجاعتج

انا : مش بهالسهوله الموضوع . . كل شي محتاج وقت . . وان شاء الله بقدر اصفي حسابي مع سيف عدل . .

وليد يطالعني ويبتسم : وبتفكرين ف علاقتنا . .

الولد ساير صوبه وليد ويسحب شعره : كاااااكام . .

وليد : آآآي . .

انا : زين تسوي فيه حبيبي . .

وليد يطالعني : حبيبي . . !

انا اطالعه : اكلم الولد .!!!!!!!

وليد يبتسم : انا الولد . . !

انا : اييييه اكلم صقور بلا استهبال انزين . .

وليد : حبيبي عاد " يبتسم " احرجتيني وربي . .

انا : ههههههههههههههه ع فكره ما يركب عليك . .

وليد يبتسم : ما يركب علي شو بالضبط . . . كلمة حبيبي . .

انا شليت علبه الكلينكس وفريته عليه . .

صقور يايني : مهالي كاااااااكااااااااام . .

انا : استويلك كاكااام . .

وليد : ليتني الكاكام . .

انا اطالع وليد بنص عين . .

وليد : شوووووو . . حد كلمج . .

وسرت صوب الفواله وييت بمسك السجين بس وليد مسك ايدي . .

وليد : هدي . .

انا اطالعه : شوووو . .

وليد : هدي السجين . .

انا اطالعه : تتحراني بجتلك شو . .

وليد عاقد حياته : هدي السجين . .

هديت السجين و وخر ايده عن ايدي وشل السجين . . : شو تبين ؟

انا اطالعه : اعنبوه الززززط بقص حق الولد شووي . .

وليد : يدوه مسويه الكيكه مخصوص لـ وليد بس . .

انا : انزين شوي عن خاطر الولد . .

وليد : اسمحيلي . .

انا : ززززززززط عافان الله ززززززط . .

وليد : قول عني ما تقول . . صوبي كم صعب الوصول . .

انا سويتله مالت ..

انا : صقوري تعال حبيبي بنسير البيت . .

صقر ما يبا سار عند وليد : مااااااااابا . .

انا : يالله عاااد . .

وليد يشله ويبوسه : فديت الحلوووووين " يبوس خده " فديت هالخديدات . .

انا : قول ماشااااااء الله

وليد : ماشاء الله " ويبوسس خده ويعضضض "

صقر صاااح . .

اانا شليت علبه الكلينكس وضربته ع جتفه : تستتتتتتتتتتهبل . .

مسكني من جتفي وبخفة سحببببني . .

انا : ااااااااااااااه . . انكسسسسسسر ضللللللللللعي . .

مع اني كنت شوي بعيد عنه لكنه سحبني وخلاني ايلس حذاااله . .

مسكت جتفي : عورتني قسم بالله عورتننننني . . " تميت امسح ع ايدي "

وليد صد صوبي وتجابلنا . . انصدمت . . حسيت بالقرب فجاه من صد . . ما بين وبيهي و ويهه الا شعرتين . .

وليد : بتمين تضربين . .

انا ارتبكت موت . . انصب الدم كله بويهي . .

وليد عاقد حياته : قولي لو فيج خير . . انربط لسانج اشوف . .

انا انربط لساني من القرب حسبي الله على ابليسك ..... تميت ساكته وجان اصد ويهي الصوب الثاني

وليد يبتسم : شفتي كيف اخليج تسكتين . .

جان يي الولد يصيح ف حظني ودز وليد بعيد عني شوي

وليد : يالهررررم . .

صقر : ماااااهبببببببك . .

وليد : لا انا الي اهببببببك يعني

صقر : مااااااااهبك ماااااااااهبك

وليد : لا الله يخليك هببببببببني . .

صقر : ماااااكلااااااااااممممننننننيي

وليد : انت بعد ماكلللللااااامني وانا مااا بكلمممممممك

انا احظن الولد : بس حبييييييبي انت بس خلاص . . " تميت امسح ع ظهره "

انا : يعني ارتحت الحين يوم صيحته ارتحت . .

وليد : وايد . .

تميت اشوف صقر وامسح ع خدوده : عوور ؟؟

صقر يهز راسه : عوررررررر . .

انا اطالع وليد : خااايس . .

وليد يبتسم : طالع عليج . .

صقر يطالعني : كااااكااام . .

انا ييت بشل السجينه مره ثانية بقص كيك لكن رد شلها وليد .

انا : وليد بلا استهبال عاد . خله ياكل شوي . . شوفه يصيح خل يسكت . .

وليد : مش مشكلتي . .

انا بطلت الغطاه مالت الكيكة وشليت شوي بايدي و شهق وليد . .

وليد : يالوصصصخه

انا : بعد شسويييييلك . . اقولك الولد يصيح . .

يييت بحط الكيكه ف حلج صقر بس مسك وليد ايدي وحطا الكيكه ف حلجه وكلاها وحتى الجوكلت الي ساح ف ايدي سحب صبعي وكلام وانا شرا البقره الي شايفه حريجه . .

وليد يطالعني ويبتسم : قلتلج ان الكيكه مسوايه لي بس .. .

انا بعدني اطالعه . .

وليد : يم يم . ." يبتسم " لذيذه

بلعت ريجي وماعرفت ارد عليه . . لين طلع الولد من جيب وليد تلفون . .

انا اطالع التلفون : ايفوووني .!!!

وليد سحب التلفون عن الولد بسرعه . .

انا : تلفوني شو يسوي عندك . .

وليد عاقد حياته : تلفوني ها . .

انا مسكت تلفوني ودقيت بسرعه ورن ف ايده . .

انا عاقده حياتي : لااااااااااااااا والله . . تلفوني ليششششش عندك ؟؟

وليد : توج افتكرتي فيه . . مفرور عندي اكثر من شهر . .

انا اطالعه . .

وليد : كل يوم اجرجه اقول بتتصل بتحس ان فونها مش موجود . . لكن من شهر لا حس ولا خبر

انا : كيف شليته ؟

وليد : انتي روحج ناستنه وشليته بردلج اياه واعتزلتي العالم عقبها . . .وقلت متى ما بتحسين فيه بتشلينه يعني شو بسوي فيه انا .. احمدي ربج تام عندي ف الحفظ والصون . . وبعديين . . " عقد حيياته " ومن فوق الشيله قرص اذني . . شحقه يوم ما عرفتي الصوت تميتي اطولينها وتتميعين ولا تامه تتصلين . . شحقه ماعطيتي التلفون حق ريال ؟

انا : آآي . . ترى قلت بعرف منو . .

وليد يرص اقوى :بتعرفين منو وانتي تتميعين . .

وخرت عنه : افففففف . . شو ها ايدك تحجك انته

وليد : تعلمت منج . . جااااااوبي ؟

انا : ما اتميع حق شو اتميع ان شاء الله

وليد : مادري عنج . . " يقلد ع صوتي " انتتتتتآآه ميييييينووه . ."

انا ابتسمت : انتااه مينووه عاد هاي امك تقولها

وليد ضربني ع راسي : ياحيوانه . .

انا : ماتشوف عمرك عيل . .

وليد : خل اشوف الحركه تتكرر . . وبعدين تابعي ورا اغراضج . . لو التلفون كان فيه صورج ولاشي ؟

انا اطالعه : وانت شدراك بعد انه مافيه صوري ؟ " عقدت حياتي " انت ايدك ليش طويله تيلس تنبش ف اغراض الناس . .

وليد : مش اغراض الناس . .تلفون بنت عمي . .

انا : سسسسسسخييي

وليد يقاطعني : اشششش . . " تم يطالع حظني " رقد . .

انا تميت اطالعه وفديته وفديت قلبه . . حاط ايدينه ع شيلتي بقوة ومغمض . .

انا بصوت واطي : حرام عليك خليته يرقد وهو ف خاطره الكيك . .

وليد يبتسم : لاتذكريني بطعم الكيك . .

اانا اتلومت وقفطت ويايه بقوم . .

وليد : وين . . " مسك جتفي " قعدي خلج . .

انا اطالعه : وليد لا اتم تمسكني كل شوي . .

وليد :ليش تتحرين عمرج بنتج . امسكج وانا اتخيلج ميود ولا راشد عادي . .

انا عطيته نظرة ويايه اقوم ورد مسكني . .

انا : وليييييييد عاااااد . .

وليد : ياخي قري محلج محد بيهبشج . . قررري . .

انا : بسير بوديه البيت يرقد ع سرير . .

وليد : حظنج احلى عن سرير . .

انا صديت الصوب الثاني . .: لا حول ولا قوة الا بالله العلي العظيم . .

وليد يبتسم : مهور . . .

انا اطالعه : شوووو . .

وليد : ويا هالويييييه . . شو (شووووووو) > "يقلد نبرتي" . . عيب عيب . . بنت تقول حق ولد عمها ( شوووووووو ) . . حتى تزيغين . . ويهج كله يطيييح . . ( شووووووو ) . .

انا ابتسمت . .

وليد : قولي امر . .قولي لبيه . . قولي سسّم . . ( شوووووووووه ) سدييتي نفسي . .

ابتسمت غصب . .

وليد يبتسم . . : ترى الدنيا بخير وبعدها حلوه . . ماتستاهل انج تكدرينها وتحكرينها عشان شخص واحد . .

انا صديت الصوب الثاني . .

وليد : جبانه . .

انا اطالعه : ليش ان شاء الله

وليد : ماتقدرين تحطين عينج ف عيني وتواجهيني . .

انا بلعت ريجي : شو يخصه

وليد يبتسم : يخصه . . للحين ماقادره تحطين عينج ف عيني . .

انا اطالعه وعيني ف عينه : شعندك ..

وليد يبتسم : تتزوجيني . .

شعر ينبي وقف . . على طول صديت ورد سحب ويهي بصعبه وخلاني اجابل ويهه . .

وليد : هيه .؟

انا ضربت ايده ع خفيف ونزلتها . .

وليد : خلينا نتزوج . . " يبتسم " ونيب ولد احلى عن صقر . . ونكون شرا هالقعده يالسين . . ولا هامنا شي فالدنيا . . ألعوزج . . وتتلومين مني وتصدين . .هو صح بسوي امور اكثر لكن . .

انا اطالعه وعاقده حياتي وابتسم . .

على طول قمت . . : خلاص . . بسير . .

وليد يبتسم : والله جبانه . .

انا : جب جب . .

وليد : تعالي تعالي . .

اطالعته : شو . .

يرفع تلفوناتي : بعد بتخلينهم ؟ ولا جني توني رامس . .

انا مديت ايدي وشليت تلفوناتي . .

ومشيت عنه ورجعت بيتنا وانا مبتسمه . . شفت امي بويهي لكنها صدت عني ودخلت حجرتها وقفلت الباب . . تنهدت وصعدت حجرتي وحطيت الولد ع السرير وانسدحت حذاله وانا افكر وافكر . . . لين مادخلت علي امي . .

اميه : مهاري ؟

انا فاجه عيني بتعب : ها اميه امري . .

اميه تمسح ع راسي : قومي امي صلي العشا . . اذن . .

انا اطالعها وبست راسها : ان شاء الله . .

اميه تحظني : سامحيني . . انا اباج توعين من الي فيج يا اميه ما ابا شي ثاني . . بسج من الهم والنكد الي معيشه عمرج فيه . . حالتج جذه تتعبني وايد والله تتعبني . .

انا بست راسها وايدها : لا تحاتين . . " اطالعتها " كل شي بيعتدل ان شاء الله .. ومثل ما هو عاش حياته بسهوله انا لاني كنت صادقه محتاجة وقت . . وبعيش حياتي احسن عنه ..

اميه : اميه ترا حرمت عمج سعيد رمستني عنج . .

انا انصدمت : شقالت . .

اميه : انتي تعرفين انج فخاطر وليد . . وهو مرمس امه وعمج سعيد . . وامه خبرتني انه شارنج ويباج ليش ماتشوفين حياتج وتنسينه . . ترا هي ما رمستني رسمي . . بس خبرتني الي يقوله وليد

انا : امايا دخيلج هالموضوع مش وقته . .

اميه : متى وقته ؟ يوم بيروح عليج النصيب ؟ انا يمكن اموت اليوم ولا باجر . . ما تامتلج فالدنيا . .منو لج يا اميه منو لج . .

انا : الله لي . .

اميه : اوعديني تفكرين . .

انا اتنهد : يا اميه دخيلج

اميه : صلي استخاره ع الاقل . .

انا اطالعها . .

اميه : عشان اميمتج . .

انا : ان شاء الله . .

اميه تبتسم : حبيبتي انتي . . تعرفين ان مروان توه مروح ؟

انا شهقت : ههههههههههه والله ؟

اميه تبتسم : هيه . . لا ومن طلع بعد يقولها احين بتصل بج ردي . .

انا ابتسم : اقول ليش ماجفتها . . اثاريها ترمسه . .

اميه : هيه خلاصصص الحينه بتنشغل عنكم . .

ابتسمتلها وطلعت من حجرتي وانا قمت صليت العشا وترددت استخير او لا .! لكن لاني وعدت اميه صليت . . ومن عقبها وعيت الولد وسرت عشيته وسبحته ولبسته بجامته لان عنود طرشتلي مسج انه بيرقد عندي الليله هم مطولين وطبعا انا ماصدقت طرشتله مسج اتخليه وتنساااااااااااه . . تميت العب وياه واصصصصوره لين صارت الساعه 12 ودق علي مايد الباب . .

مايد : بنت عمي انا مايد . . تعالي الصاله شوي . .

انا استغربت .. وتغطيت وظهرت له . . كان يالس ف الصاله وحاط سبيكر . .

ميره : هاااااااااابي بيررررررررررررث دي تووووووووو يوووووووووو مهاااااااااا . . هابي بيرررررررث دي هابي بيرررررررث دي هابي بيرررررررث دي تووووووو يوووووووو . . ألوو ؟؟ ألوووو .!!!

مايد : ألوو . . .!

انا غمضت عيني بقوة : اوبس . . الله ياخذ عدوك يا ميود . .

ميرة : بسم الله . . منو معاي .. .

مايد : انا . .

ميره : منووووووو . سوري شكلي داقه بالغلط

مايد : لا ميره مش بالغلط

ميره تشهق : انت منووو . .

مايد : انا مها .

ميره : شووووووووووووووووووووووووووووووو . .

مايد يبلع ريجه : انا . . انا . . مايد ولد عمج . . !

.

.

.