منتدى استراحات زايد - 乂آآه يا ويـــله .. قلــــبٍ صويــبٍ بانــت أقداره乂

(الجزء 93)

(ويسحبونها شرات الذبيحة هي ما تبا وهم غاصبينها على هالشي .. وركبوها الموتر بغصب .. كانت كل كلمة تلفظها تحصل طراق ع ويهها .. وميود وعواس برع الموتر ..)

مايد : يالله نسير له ..

عواس: والله ما أخليه حي !! والله !! يالله اركب ..(وعواس متوعد له بالشر .. وركبوا .. وكان الجو مشحون بس هادي ..)

هناء تصيح وفخاطرها : انا شو اللي خلاني أقوللهم؟ يالله يالله تستر علية .. والله اني زايغة .. شو يعني؟ البنت ما تخطي يعني؟ انا غلطت خلاص يوزوني هزاع وفكونا من السالفه .. ما حصل شي .. (وهي تتحرى كل شي بييها بسهولة والحلول فإيدها ..)

مايد حس شعر ينبه قف وعرف شو فخاطرها : تحلمين !! تعرفين شو يعني تحلمين ؟

هناء تصيح وتزاعج : الله يخليكم .. التوبة .. رحموني .. الله يخليكم .. رحموني ..

عواس ضرب بريك وعطاها طراق خلا أذنيها تصطم : موتي يا مالج السم موتي !!

(وعواس يفكر بالحادث اللي صار له كله بسبت هزاع .. وأحينه هالسالفه اللي زادت على اعصابه لا وشتت عايلة بكبرها بفعايله .. لو يدري يدهم بيطيح طيحه ما بيقوم منها ان سمع بالخبر .. حتى العيوز بتنشّل .. هذا شي هب سهل .. وما يمر مرور الكرام .. اصلا ولا آدمي بيقدر يتحمله .. وخصوصا نظرة الناس .. وبعد محد بيطيع اييّوز ولده لهاي الخايسة .. آآآخ يالقهر آآآآخ .. ووصلوا لبيت مانع ..)

عواس: ميود دق الجرس ..

مايد : انزين .. (ونزل يدق الجرس .. و يتهم البشكارة متلثمة ..) هزاع موجود؟

البشكارة : يس .. في هجرة مال هو ..

مايد: سيري زجريه قوليله ريال يباك ..

البشكارة : منو اسم مال انته؟

مايد يزاعج : سيري عنلات صيرج !! (وتربع زايغه حجرة هزاع ..)

البشكارة : بابا ؟ بابا !!

هزاع: خير !! خير !! (ويبطل الباب ..)

البشكارة : هذا في رجال وايد سوي جنجال يبي انته ..

هزاع: جنجال ؟ منو ها؟ الله يستر بس .. سيري .. سيري انزين..

(اما شمسة تمت تصيح ..)

شمسة : لا بارك الله فيها من بنية .. هذي تبا تذبحني انا ادري .. انا شو قصرت فحقها؟ ما اقول غير الله ياخذج فضحتينا .. يعلج بعذاب لين يوم الآخرة على اللي تسوينه فينا .. يالله شو الحل؟ غربلج الله تاخذين عدو عواس ؟ ليش عاد؟ شو اللي حادج؟ شو سوينا بج؟ لا حول ولا قوة الا بالله العلي العظيم ..

اليد يدق الباب وسيده دخل : هود هود .. اميه شميس ..

شمسة تمسح دموعها : خير .. هلا .. مرحبا .. اقرب اقرب يابويه ..

اليد : بلاج يا اميه؟ مستانسة انه بنتج بتعرس؟

شمسة : ضحكتني وانا ما ودّي أضحك..

اليد : لا إله الا الله .. شو مستوي؟

شمسة : كنسلنا ملجتها ..

اليد : وابويه .. شعنه؟

شمسة : هاااه؟ أبويه طفرت بي ما تبا اتعرس .. تقول روحها بتتخيّر ..

اليد : لا حول ولا قوة الا بالله .. قايللكم لا تغصبون بناتكم .. ما تسمعون الرمسة .. هالزمن غير عن زمننا..

شمسة : خلاص اللي صار صار الحينه ..

اليد : وهي وين الحينه؟

شمسة : فحجرتها قافلة على عمرها ..

اليد قام : بسير لها برمسها ..

شمسة : لالا يابويه ما يحتاي .. انا ادريبها راسها يابس .. خلها تهدى شوية .. لأني مكفختنها ..

اليد : حرام عليج .. خافي الله .. هذي بنتج راس مالج هالبنتين ..

شمسة فخاطرها : يعلها الموت .. يعلني أموت ولا أشوفها ..

شمسة : أبويه انته سر علّم امايه .. محتايتنها هالحزة ..

(وعند هزاع .. كان مبطل الباب .. يطالع منو )

عواس مسكه من رقبته ومثبّتنه بركبته : تباني أذبحك؟ هاااه؟ ما كفّاك قبل؟ راد الفير على بناتنا؟

هزاع ما يروم يتنفس : والله .. والله يا عواس اني خطبتها منكم امية مرة ..

عواس محمر ويهه : أصلا منو بيرضى يوافق عليك يا راعي المخدرات؟ هاااه؟ منووه؟ وتبا تكسر ظهورنا بعرسك؟ ياخي خاف الله ..

مايد: عواس اذبحه .. اذبحه !! ما يستاهل يعيش ..

عواس: صدقت ميود ..

هزاع: تبوني آخذها .. باخذها .. والله اللي تطلبونه ..

عواس: ميود نزّل الخايسة من الموتر ..

مايد : انزلي !!نزلت عليج جهنم ان شاء الله .. (ونزلت هنوه وكانت اتصيح وتطالعهم ومتوقعه انهم بيعرسون ..)

عواس: ماخذنها عرفي ولا مسيار؟

هزاع: ع .. ع.. (وكان عواس كاتم على رقبته ) عرفي ..

عواس: وين الاوراق يالمعاريس الغش؟

هناء : إ .. إ .. إ .. انا طريت الورقه ..

هزاع: الورقة عندي تبانا نملج .. بنملج .. الحينه اذا تبا ..

عواس: طلقها ..

هزاع وهناء: هاااه؟ (كلهم انصدموا ..)

عواس: كلمتي ما تستوي هنتين ..

هزاع: بس انا ماخذتها عشان اطلقها ..

عواس: والورقه؟ ما يعتبر زواج؟ ولا شكلكم زنيتوا؟ تراكم عرستوا بمزاجكم وبقانونكم وبتطلقون بنفس الطريقة ..

هزاع: انتي طالق ..

هناء تصيح : انته تبا تفضحني؟ ليش ما خليته ياخذني؟ .. يستر علية ليش؟ ليش يا عواس؟ ليش؟ بحطها فذمتك لين موتي ..

عواس: جاب يالله جاب .. انتي اصلا بنت شوارع لكن انا بعرف أربيج ..

مايد : طر الورقة اللي عندك .. وان تكلمت بالموضوع بجتلك ..

هزاع: في شي ..

عواس: طوفي اركبي السيارة .. طوفي ..

(ويدفرونها عشان تركب .. )

مايد : خير؟ مصيبة ثانية ؟

عواس: أكيد بلوى جان من عيال قوم سيف ..

هزاع: تتذكر يوم كنت أتعاطى راويتك فيديوكليب عن اختك مي .. تذكر؟

عواس حمق : جااااب !!

هزاع: هذي هنوه اللي كانت اتكلمني وكنت على علاقة بها .. (وعواس وميود يفورون من العصبية ..) اختك مي ما يخصها .. كانت حاطتنها واجهة لسوالفها الجذابة .. ولا أختك شريفة وعفيفة أبصم لك بالعشر .. جان كل المصايب اللي يتكم من وراها من ورا هنوه .. هي اللي صورت مي من ورا ظهرها .. وهي اللي قالت لي قول جدام عواس اني مي .. وهي كانت تكره شمايل ما تواطنها بعيشة الله .. كانت هاكي اليوم بتشرد ويا الباكستانية جان ما عندكم خبر .. بس من الزياغ سلطتهم على شمايل .. على فكرة لا يغركم صغر سنها .. هذي داهية .. تعرفون شو يعني داهية؟ الله تاب علية وانا أبري ذمتي جدامكم .. اللي تبونه انا حاضر .. لو بتذبحوني اقوللكم تراه رقبتي لكم فداكم .. بس انا اقولها لكم اتحملوا على خواتكم منها .. ما همها انه اختها تنفضح او حتى يغتصبونها او انها دخلت مال النفسية اهم شي عمرها .. كان اهم شي عندها تستانس وتتوّنس وتلعب بذيلها .. ولا يغركم صياحها على فكرة ترا عندها موبايل .. اذا ما حصلتوه فحجرتها اكيد خاشتنه في ثيابها وتوقعوا منها كل شي .. (وهم منصدمين وتوقعات ميود فمحاهت ..)

مايد : أعوذبالله شو اللي الله حاط فقلبها ؟

عواس: انا ذابحنها ذابحنها ..

مايد يمسكه : عيّن من الله خير .. وخلنا انروح ..

عواس: اصبر .. ( وسار جدا هزاع ..) تعرف اني ما اسامحك طول حياتي ..(ويضربه بوكس على بطنه بكل قوته ) لا انته ولا اخوك !! تفهم ؟

هزاع: آآخ !!! (وروحوا عنه .. كانوا في الموتر ساكتين ويطالعون بعض .. وساروا صوب السيح .. مكان خالي مافيه حد .. اما عند هنود )

ايفلين : فتوم ؟ فتوم ؟ ماما في روه ولا ؟ (تأشر هنود انها سارت ) انا في روه مع بوي فريند .. ازا في ييجي كولي ايفلين نايمة فيها همى

هنود فخاطرها : الله ياخذج .. يعلج المرض والسقم انتي والبوي فريند مالج ..

(اتعدلت واتزجرتت هب سهلة هالبشكارة وطلعت .. اما هني كانت فرصتها اتصلح الاشياء المنكسرة .. دخلت المطبخ .. شافت اكلها السقم .. طلعت عيش .. حطت كمية بسيطة .. طلعت سمجة من الثلاجة ملحتها وحطت الكركم .. وخلتها وظهرت نص دياية وبزرتها وسارت تسوي السلطة .. ويوم خلصت من تقطيع السلطة شاطت البصل وقلّت السمجه غدت ذهبية مقرمشة تشّهي .. وسارت ذوبت مقدار قليل من الزبدة وخلطت وياها سنّوت وسخنته ونجحت طريقة الدهنة الخنينه .. حطت الصينية .. وصحن العيش وفوقه السمجه وصبّت شوية من الدنه .. وردّت سخنته .. ورتبت السلطة والعصير والماي .. شلت الصينية .. وتمشي شوي شوي .. صدت يمين ويسار ..)

هنود فخاطرها : لا محد ياء .. لو حد ياء بسمع صريخهم ..( وسارت صوب حجرة السيبة أحمد .. كان راقد حزتها .. بطلت الباب شوي شوي .. وهو سيده بطّل عينه )

الشيبة : منوه؟ ( يوم شافها ) هاي انتي ؟ ( حطت الصينية عند الباب ..) كنت أدري اني بكسر بخاطرج .. ( قام وياي بيشل عمره عشان ييلس عالكرسي .. ربعت له .. حطت ايدها تساعده ..)

هنود فخاطرها : ليش قلبي يحّن عليك؟ ليش؟

(طلعته برع حجرته )

الشيبة يبتسم : ياحي الحياه .. مغلات شمس بلادنا .. لو تصلخ يلودنا نباها .. مالنا مفر منها ..( وصد يطالع الصينية ) يالله وين سار السقم ؟ ( هنود اتأشر انها طلعت ) عيل انتي اللي طابخه .. يزاج الله خير .. والله اني اشوف اكل نظيف ..(هنود يابت كرسي ويلست مجابلتنه .. حطت الصينية على ثبانها .. كانت اتلّقم واتأكله بإيديها حتى السلطة ..) والله اني ما آكل وايد .. بس الاكل اللوث ما ينشهى منو يشتهيه؟ انا ادريبها تسوي فية خساس .. على أيام يوم كنت شال عمري كانت خادمتني خدمة اتروّع مني .. لكن من طحت طيحتي استعبدوا المكان مرت ولدية والبشكاة .. حتى ولدية اللي هو ولدية .. ( هنود اتقاطعه ..اتعرف انه اذا اتكلم فهالموضوع بيتغصص وما بياكل .. وتحط اللقمه فحلجه .. عشان يسكت .. بس هو فهم ..) مشكورة يابنتيه .. ( ومن خلص الغدا .. خلته برع .. وسارت شلت سلة التنظيف ومكينة الخمام ..)

هنود فخاطرها : لا إله الا الله شو هالريحه اللوعه ؟

( تمت اتشل الوصخ من الارض .. وقامت اتهاوع لأنه قذارة .. وتعجهن وتسير تيب ماي وصابون وتنظف الموكيت وتحجه حج ويابت المكينه وخمّت المكان بسرعه عشان تبدا فشيء ثاني ..سارت الحمام ونظفته وعقمته ما خلّت كلوروكس .. وحطت كرسي بلاستيك في الحمام عشان يتسبح .. اما ثيابه شلتهن كلهن وفرتهن في الغسالة .. وتربع المطبخ يابت طاسه حرارة وخشتها حذال شبريته .. ودخنت الحجرة .. وسارت تيبه .. كان يالس ومجابل الشارع يطالع اللي ساير وياي .. محد حس فية .. كانت الابتسامة فويهه ..)

الشيبة : يالله يزاج الله خير .. رديت لي روحي .. ( وعيونه تدمع .. وهي تدخله وفخاطرها تصيح من كلامه )

هنود فخاطرها : والله هذيلا جلاب مب أوادم !! لو عندي أبو شراتك والله لأكون تحت ريلك ابا رضاك بس .. كم تسوى البسمة على ويهك..

الشيبة : لا إله الا الله .. مسرعج نظفتيها ؟ والله من 6 سنين ما شفتها نظيفه جذيه .. اتمنى ما تغيرين رايج .. انا ابا من فترة لفترة أشوف العرب برع ما اطلب شي زيادة ..

( هنود بندت باب الحجرة وتربع حجرتها تصيح )

هنود فخاطرها : ليش الدنيا جذيه ؟ تعطي انسان وتاخذ منه .. انا كنت دوم أسمع عن هالشيبه بكل شي زين وبشخصيته القوية .. شو اللي جلب حاله؟ كيف استوا ولده جبان ؟ وحرمة ولده الجبارة ؟ انزين مانع ما يدري بسواياها؟ الله ياخذها جان هاي معاملتها..يعلها ما تشوف يوم زين .. كم تسوى الكلمة الطيبة منه ..

( وهو يوم يلس ع شبريته يشوف ورقه )

((( ابويه الشيبه عمر الانسان ما يستسلم ..تحت هالورقه بتحصل طاسه حرارة مسوتلك فوقة دياي .. ابا من أنش الصبح ألقى الطاسه خاليه عشان خاطري ..)))

الشيبة ابتسم : كنت أدري انها مواطنه احساسي فمحله .. ما اقول غير الله يسّهل دربج ويسعدج ..

(وهنود سارت تنظف حجرة العنود .. كانت نظيفه ما يبالها غير تنظيف الحمام .. سارت اتنظفه .. وهي تفكر وتتذكر حبيبها وريلها رشود .. وتتذكر كلامه ..)

راشد : اتعرفين ان حطيتي شي ع ويهج لاذبحج .. والله لأييج لين البيت بتأكد اذا حاطة جحال ولا مكياج ..

( كانت تتذكر هالسالفه وكيف كان ياينها البيت ومتحلف ما كان مصدق انه عيونها ملونة .. يوم لقاها تصيح يلس يراضيها.. وتتذكر يوم كانوا سايرين يقدمون ع شغل كيف كانت تكفخه بالنعال وتتضحك ويوم هي شلت السلة بتظهر من الحمام شافت محمد ..)

محمد فخاطره: يت والله يابها ..

هنود فخاطرها: وابويييه الله يسلمني منه ومن نظراته بس ..

( وهي طافت عنه بتظهر بس هو حد لها .. )

محمد: على وين؟ ( هنود اتأشر انها بتظهر ..) فاطمة؟ (وكانت منزلة راسها وتنتفض ) ابا اتزوجج .. انا سوي زواج انتي .. تفهمين ؟

هنود اتطالعه منصدمه وفخاطرها : هذا مينون ولا اشوووه؟ انا معرسة شقى بعد اخذه؟

محمد: صدقيني بالحلال .. لو تعرفين كم أفكر فيج .. ياعمري ما دشت وحدة خاطري شراتج انتي وعيونج اللي عجتني .. ادري هب فاهمتني .. بس .. اباج اتفكرين .. بعطيج اللي تبينه .. فلوس .. وبيت .. وخدامة .. انتي اللي تامرين وتنهين ..

(هنود تربع حجرتها زايغه .. )

هنود فخاطرها : والله مينون والله !!

(اما عند مي ..)

مي ترد بدون ما تشوف الرقم : نعم؟

سعيد : بعدج راقدة لهالحزة ؟

مي تتأفف : ياربي .. انا كل ما اقول بفتك منه يرد يسوي .. انته شو ما تتعب؟

سعيد : لا بعدني .. احب اطفر بج ..

مي : نعم ؟ اشتريد؟

سعيد : اريد اخذج؟ ممكن؟

مي: بالتيلفون؟ ما احيد في حد ياخذ عن طريق التيلفون ..

سعيد : انا قبل شايفنج وكبرتي فعيني ..

مي: وعندك شي حق العرس؟

سعيد : اول شي انتي موافقة؟

مي: طبعا لا.. وانا ما افكر حاليا فشي اسمه زواج ..

سعيد : بطرش اهلي صوبج ..

مي: قلت انا آسفه شو ما تفهم؟ نووو يعني نووو هذا اللي ناقص بعد .. ما احيد الزواج غصب ..

سعيد : انتي بتخبرج ترمسين شليتي وانا مادري .. امايا انا..

مي تضحك : انته شو يا عيوني؟

سعيد : فديتج انا شايف كل خير لا تيلسين تستفزيني تسمعين ؟

مي: يا اخي في مليون وحدة غيري دوّر بتحصل ..

سعيد : وانا ما ابا غير مي .. صدقيني ان شفتيني .. (توة بيكمل ..)

مي: هيه ادريبها الاسطوانة المشروخة من اشوفك بطيح من طولي لاني بشوف ملك جمال ..

(سعيد ميت من الضحك على كلامها ..)

سعيد : أسميج ضربتي عالعووق ..

مي: أسميك انسان فاضي .. يالله اترخص منك ..

سعيد : اتحداج ان شفتيني ما بتطيحين من طولج؟

مي: عدال عدال .. ادريبها هالسالفه اشوفك وتشوفني تاخذ مني واخذ منك ..

(شو بيسوون بهناء؟

اما مانع شو مصيره ؟

وشو بيستوي بين مي وسعيد .؟

اما هنود شو بيكون ردها على المينون محمد ؟ .... كل هذا بيطلع يوم السبت ..)