منتدى استراحات زايد - ~\\ القلــب ماهـــو لعبـــة بيدينـــك يــآآ " فــــلآآن " ~..*

(¸.•´ ( * الفصــــــل التاســــــــــع * ) `•.¸)
( `•.¸ `•.¸ )
¸.• )´
(.•´
`v

كان يطالعني .. ويطالع الاغراض والاجياس الي في ايدي ..

وقالي بنبره حاده شوي : ليش سويتي فيني جذي . . ليش لعبتي علي ؟؟!!!

وضحك باستهزاء : هه هه هه .. عبالج بخليج في حالج ويا هالحمدمالج !!!!!!!!!!

قلتله وانا مستغربه : انت شو تخربط ..انا متى لعبت عليك .. أصلا شو الي بيني وبينك عشان تقولي هالكلام !!

رد علي : اونج ما تعرفين شو الي بينا .. نسيتي ولا تستهبلين

مهره : جووف .. انا واثقه من نفسي واعتقد انك خرفت او انك مضيع حد يشبهني ..

لفيت عنه كنت بروح .. بس وقفتني مسكت ايده لايدي ولفني صوبه

قلتله : انت ما تستحي على ويهك .. هدني .. والله لا اصرخ وايمع عليك الناس واقولهم انك تتحرش فيني

هد ايدي وقال : فيج خير سويها ان ما فضحتج عند ريلج بسوالفج ويا حمدانووووه حبيب القلب سابقا ..

حطيت ايدي على حلجي .. مادري ليش خفت من هالجمله الي قالها

قلتله : عبيد .. شو تبا مني الحين وخلصني

رد علي بجديه : تطلقين .. والحين .. وانا باخذج

خيييبه خييبه خيييبه .. قويه هاااي .. اتطلق من حمد .. شو مينون هذا ولا شو ..

رديت عليه : انت تخبلت .. شو يالس تقوول .. اتطلق !!

عبيد : هيه والحين بعد .. عادي ما فيها شي .. وايدين غيرج سووها

مهره : ا مستحيل اسويها .. انا احب حمد وهو يحبني .. وانت شوفلك وحده غيري ..

سكت شوي وكملت : وانت شو الي يخليك جي واثق اني انا اباك ؟؟

قالي : تصرفاتج وكلامج وياي .. اكبر دليل انج تحبيني وتبيني .. وانا بعد حبيتج وبتم احبج طوول عمري

التفت اطالع يمين ويسار .. مافيني عالفشيله والمشاكل

قلتله : انزين مب جنه مصخناها .. الناس تطالع .. وبعدين نوره مرت اخوي هنيه ويمكن في اي لحظه تي وتجوفنا .. انا برووح وانت خلك بعيد عني لاني مستحيل انفصل عن حمد

قالي : صدقيني ما بتلقين واحد يحبج كثري .. حمد بيلعوزج تراااه انا اعرفه اكثر عنج

مهره : اممم خله يلعوزني .. المهم انا احبه وخلاص (( هالكلام مب من قلبي .. صح اني حبيت عبيد .. بس قرب حمد لي فالفتره الي طافت نستني عبيد وحبي له .. وما جفت جدامي غير حمد وبس .. حتى حمدان الجني الي كان يطلع لي في اي وقت اختفى فجأه .. فكه منه ومن بلاويه ..

حط ايده في مخباه وشل قميص لونه اسود وقال : تبين حمد .. خذيه واشبعي منه .. بس بعدين لا تين وتقولين عبيد تعال خذني منه .. بس اباج تعرفين شي واحد .ز محد في هالدنيا كلها حبج او يحبج كثري .. وراح تكون ايامج مثل هذا ... فر القميص على ويهي ..

الله يخسه فشلني .. شليت القميص من ويهي وكنت برد عليه .. بس تفاجأت انه اختفى .. بسم الله شو حتى ها جني بعد ..

نقزت يوم رن المبايل .. جفت المتصل حمد .. وييه هذا شو يبا بعد ..

فريت القميص بعيد ورديت عليه : هلا حمد

قالي : انتي وينج

مهره : السلام ببلاش >> اوني اتمصخر

حمد وهو يصارخ : لا تستهبلين علي .. وينج !!

اميييه شفيه هذا : حمد شفييك تصارخ علي .. انا في مول الامارات يالسه اتشرى لي اغراض

حمد بنفس النبره : وانتي كيفج اتالين وتطلعين رووحج

طلعت من المحل .. ويلست على الكرسي بعيد شوي عن الناس

قلتله : حمد انا قلتلك تعال ودني .ز انت قلت لي مب فايق لج .. شو اسوي يعني .. وبعدين انا مب روحي نوره وولدها وياي بعد

رد وهو يبا يجذبني الحرامي : وينهم ما اسمع صوتهم ؟؟

قتله : نوره تعبت ويلست فالكوفي ويا عبوود .. وانا قتلها بروح آخر محل بتشرى منه وخلاص برد عندها

حمد : انزين متى بتردون البيت

مهره : عقب شوي .. بس انت ليش معصب ماحيدك تعصب علي

حمد : والله كيفي .. وبعدين منو انتي عشان ما احرج عليج او اعلي صوتي عليج .. هااااه منو انتي

بسم الله شفيه جلب علي : انزين خلاص كليتني ..

حمد : يلاا بسرعه اباج قبل المغرب فالبيت .. بتصل فيج وبجووفج اذا مب فالبيت بطلع عينج فاهمه

مهره : انزين خلاص بنرد الحين (( افففف >> طبعا في خاطري مب جدامه عشان ما ياكلني ^_^

.:. طووووووووووووووووووووووووووووووووووط .:.

خيييبه تخيبه مالت عليه .. بند في ويهي صدق ما يستحي ..

آآآه .. عبيد وينك تعال خذني بايدك عالفرح .. خخخخخخ

قمت من مكاني ورحت صوب قوم نوره .. جفتها تضحك علي ..

سألتها : ليش تضحكين ويا هالبطن ؟؟

نوره : مادري شكلج يضحك وانتي شاله هالاغراض .. تصدقين تذكرت ايام يوم كنت اتشرى حق عرسي .. كشخه كل يوم محمد كان يوديني ..

قتلها : مب انا مالت علي .. يحليلي اتالي روحي ويالله يالله أحصل حد يي وياي ..

اتصلت نوره في محمد .. ويا خذانا .. وصلت البيت على الاذان ,, نزلت من السياره وزقرت البشكاره تشل وياي الاغراض ..

جفت ( الوحشه ) طالعه من الصاله ويايه صوبي .. ادريبها تبا تطنز الحين ... وبدت ..

ام محمد : هاااه .. اجوفج خامه السوق كله ويايه .. عنبو مب عرس هااااه .. خسرتي الريال وفضحتينا ..

ما رديت عليها .. مشيت لين الصاله .. وقفت عند الباب .. متردده اقولها ولا لا ..

اخاف محمد يلحقني ويزخني .. واذا زخني الله يعلم شو بيسوي فيني ..

انا شعلي .. يومين وبفتك منهم .. بسويلهم اكشن شوي .. وبراويهم الويل قبل لا افتك منهم ..

لفيت لورا .. جفت البشكاره في ويهي .. فتحت لها الباب ودخلت ويا الاغراض .. فصخت نعالي .. وحطيته فالجيس وشنطتي بعد وعطيتهم لها عشان توديهم فوق وما يخربون علي

فتحت الباب عدل عشان اقدر اشرد واركض .. جفتهم بعدهم واقفين هناك ..

رفعت عباتي وربطتها على خصري وقلت بصوت عالي : مالت عليج وعلى ولدج هالديايه .. متى بس افتك منكم ومن شيفكم .. الا نوره فديتها وولدها ....

جفت محمد ينزل ولده تحت وياي صوبي .. على طوووول ركييييييييييييض .. وصلت عند آخر الدري .. لااااااااااااااااااااا طحت

الحين بيزخني .. جفته ياي .. شو اسوي ..

لا اراديا .. فصخت العبااه وفريتها عليه .. ههههههههههههه شكله يضحك والعباه على راسه يحليله ..

قمت شوي شوي .. تميت اعري بسرعه لين الحجره .. دخلت وسكرت الباب وقفلته ..

وصلت عند الشبريه وطحت عليها .. وااااي جسمي تكسر .. الله ما يضرب بعصا .. استاهل .. ليش اسوي فيهم جذي ..

عادي المهم بردت جبدي شوي .. اكيييد الحين الوحشه تحترق من داخل عالكلام الي قلته لها ..خخخخخخخخخخخخخخ

سمعت مبايلي يرن .. طلعته من الشنطه .. وكان حمد .. رديت على طول : هلا حبيبي

اوييييه كيف قلت جي فشييييله ..

بس حسيته استانس يوم قال : حبيبي مره وحده .. لا ما نروووم ما نروم على هالكلام الحلووو ..

قتله : امممم تراني رديت البيت

حمد : هيه زين زين .. المهم بخليج عيل دامج وصلتي .. وبتصل بج بعدين اوكي

مهره : اوكي .. باي

مادري ليش ارتحت من سمعت حسه وهو مستانس .. بس مساعه كان لوعة جبد وهو محرج ..

توضيت وصليت العصر والمغرب ..

شليت الاغراض الي شريتهم وحطيتهم على صوب .. يلست اتعبث بالموبايل .. اففف ملل .. شو اسوي ....

انسدحت على الشبريه .. وتذكرت الحركه الي سويتها مساعه في محمد وامه ههههههه يستاهلون .. براويهم باجر بيكون آخر يوم وياهم بطلع عينهم من الصبح لين الفليل ..

وتذكرت عبيد .. الله يخسه شو سوابي اليوم .. فشلني جدام الناس ..

بتصل في فطوووم وبخبرها .. لا فشله .. مابي افضحه جدامها لان الحركه سخيفه

بس بتصل وبجس النبض خخخخ

توووت ..... توووت ... توو : ألووووووو

مهره : السلام عليكم ورحمة الله وبركاته

فطوووم : وييه غريبه من وين نازل هالأدب عليج .. وعليكم السلام

مهره : انتي قليلة الأدب .. انا اسلم عليكي سلاما كاملا وانتي تردين بكلمتين

فطوم : ههههههههههههه الله يخسج .. عليكي اونه خخخخخخخخخخخخخخخخ

مهره : خسفك الله يا مجنونة لماذا تضحكين ؟

فطوم : بسج عاااد مب فايقه ارمسي عدل

مهره : اقوولج العاشق الولهان وينه عيل اليوم ؟؟

فطووم : اممم مادريبه والله .. من طلع العصر ومارد لين الحين .. يتالي بررع البيت ..

صراحه خفت عليه .. ماحيده يطول بررع البيت : بس غريبه يعني هو دوومه فالبيت .. واذا طلع بالكثير ساعه ساعتين ويرد

فطووم : وانا شو يخصني فيه .. كيفه

مهره : شو شو يخصج انتي اخته .. جوفيه يمكن فيه شي

فطوم : انتي شو فيج اليوم .. عندج ريل شو تبين في اخووي يلاا بعيد بعيد .. بعدين لا تفاولين عليه ان شاء الله ما فيه شي ... هااذووه وصل

مهره : انزين اسأليه وقوليله وين كنت

سمعتها الحماره تقوله مهره تقول وين كنت .. الله يخسها فشييييله شو بيقول عني الحين

سمعت صوته : شو تبين مني ..

امييييييييييه .. بندت في ويهه على طول من سمعت رمسته

الله يغربلج يا فطووم براويج .. الحين شو بيقول عني .. فشييييييله

رن مبايلي .. وكانت فطووم .. ما رديت خلها تولي .. او يمكن يكون عبيد .. افففففف صدق وهقه ..

ما اهتميت وايد طز فيهم .. بس براويها فطووم ما بودرها على هالحركه البايخه ..

أذن العشا .. رحت أصلي .. خلصت وتميت اقرا شوي قرآن ..

جفت الساعه كانت 9 بالضبط .. ملل شو اسوي .. وااااي باجر آخر يوم لي فهالبيت .. بفتك منهم ومن حشرتهم ..

فتحت الابتوب و فتحت قصة .. أنا حر ما انهان والحر ما يرجع لشخص يهينه .. للكاتبة معاني .. هاااي آخر قصة كتبتها وبعدها ما خلصتها .. بس مادري ليش وقفت .. وصار لها فتره ما نزلت بارت يديد .. قصصها رووووعه .. المهم تميت اقرا جزء ورا الثاني ..

انتبهت للساعه جفتها كانت 2 وربع فجر .. وييييه الوقت يمر بسرعه ..

بندت كل شي .. ورحت أخمد .. وانا كلي شوق لغدا .. بطلع عين ام محمد وولدها ..خخخخخخ

&&&&&

&&&

&

نشيييت من رقادي ساعه 12 الظهر .. تسبحت وبدلت ثيابي .. ونزلت تحت

جفت ام محمد يالسه روحها .. خخخخخ هاي فرصتي براويها ..

رحت صوبها ويلست عندها : سلام عليييج

ام محمد : وعليج السلام .. روحي زهبي اغراضج .. باجر بتذلفين بيت ريلج وبتفكينا من ويهج

مهره : والله محد بيفتك منكم غيري .. والله أخيرا باخذ راحتي في بيت ريلي ..

ام محمد : والله هذا ويهي ان استانستي دقيقه وحده بس

قتلها : شو تقصدين ؟؟!!!

ام محمد : ولا شي ولا شي .. فكيني من صدعتج وروحي عني

لفيت عنها هالخبله .. عيوز مخرفه .. لمحت حذالي مسدس صغير مال العاب .. الي يترسونه ماي مال عبود اكييد

يتني فكره هع هع هع .. الحين ببرد حرتي .. صبري علي ..

شليته وخشيته وراي .. رحت صوب الحمام .. ترسته ماي ..

تميت امشي شوي شوي .. واندسيت ورا الغنفه الي هي يالسه عليها ..

رشيت رشه من فوق راسها .. خخخخخخخ سمعتها تقول : بسم الله من وين هالماي ؟؟

ضحكت بصوت خفيف .. ورشيت رشه ثانيه ... وثالثه .. لين قامت من مكانها خايفه ..

تميت اضحك واضحك .. لين حسيت بحد واقف وراي .. صديت لقيتها واقفه ومحرجه ..

ام محمد : اثاريج انتي السباله ترشين ..

كانت بتكفخني بالنعال بس انا قمت وركضت بعيد عنها .. وتميت ارشها من بعيد وهي تصارخ وتهدد

ام محمد : والله اراويج يالخايسه .. ان ما خبرت عليج محمد

ههههههههههه والله اضحك هااااي الخبله ..

ودرتها ورحت فوق حجرتي .. وتميت ارتب اغراضي .. واطالع شو بلبس حق الطياره ..

++ وبجذي انتهى هاليوم .. وطبعا محمد اونه يا يدق علي الباب عشان يحرج علي عالحركه الي سويتها بأمه .. بس انا تميت ساكته ولبسته ++

&

&&&

&&&&&

أنا الحين فالصالون .. ونوره وفطووم وياي .. طبعا ما قلت شي حق فطووم عن السالفه الي صارت ..

تحنيت .. وسويت شعري .. والحين يالسين يمكيجوني ..

نوره وفطوم خلصوو ..

سمعت دق عالباب .. فتحته نوره .. ودخلو 3بنات ماعرفتهم ..

يو ويلسو عندي .. كل وحده أحلى عن الثانيه ..

تكلمت الأولى وشكلها أكبر وحده فيهم : شحالج يا مرت أخونا .. ما شاء الله قمر طالعه ..

مرت أخونا !!! ... ويه اكييد هاييل خوات حمد .. اففف الحمدلله من اشكالهم يبينون انهم طيبااات

رديت عليها وانا ابتسم : بخيير الحمدلله ..

قالت : اظن انج ما عرفتينا .. انا حمده .. واشرت على الثانيه .. وهااي خوله وهي قدج .. واشرت على الصغيره .. هاااي موزووه ..

سلمت عليهم كلهم .. وطلعو عني .. يت نوره صوبي وقالت : يلاا الحين بتنزلين للقاعه

تصدقوون حسيت بشعور غريب .. جسمي يرتجف .. والله مادري ليش خايفه .. قلبي بيطيح ..

قتلها : نوره مابي انزل .. اخاف

نوره : لا تخافين .. وبعدين هالشعور كل وحده تحب به يوم العرس .. انا شو سويت قبل ..

زختني من ايدي ووقفتني .. جفت نفسي بالمنظره .. ما توقعت اني بهالجمااال ..

نوره : طالعه قمر .. تف تف تف ما شاء الله عن الحسد ..

ضحكت على حركتها : اييييه ههههه بسج عاااد عن الحركات .. وينها فطووم ..

نوره : الحين بتي ..

ولا تدخل فطووم علينا وهي تقول : يلاا يالعروس الحين بتنزلين ..

يت صوبي وحضنتني .. تميت اصييح .. بس نوره يت وخوزتنا عن بعض

نوره : يالخبايل بتخيسوون بعض .. طاعي مكياجج ساااح تبين يضحكون عليج .. مهرج ولا عروس انتي ..

ضحكت على تعليقها .. رتبت نفسي .. وطلعنا من الحجره .. سرنا صوب اللفت .. ونزلنا تحت ..

وااااي والله زياغه .. قتلهم : خلااص انا مابي اعرس .. فطووم تعالي بدالي

فطوم : انتي شفيج خرفتي .. شو بدالج بعد .. يلا دشي بلا حركات

وقفت مجابله الباب .. سمعت صوت موسيقى رومانسيه .. تبطل الباب .. ودزتني فطووم عشان ادخل ..

اول ما دخلت القاعه .. ولا دخااان في ويهي .. تروعت بسم الله وين داشه بيت الرعب انا ..

المهم تميت امشي شوي شوي .. والموسيقى شغاله .. عيبني اللحن ..

طبعا فطووم ونوره كل شوي يأشرون لي .. ويقولون لي سوي هالحركه ومادري شو ..مرات اسوي مثلهم .. ومرات البسهم ..

والله اضحك فطوم يوم تعصب ليش اني ما اسوي الحركات عدل خخخخخخخ

وصلت للكوشه وجابلت الحريم والناااس كلهم .. وااااي مكثرهم .. عااد انا يالسه ابتسم غصب ..

يت فطووم صوبي ويلستني عالكرسي .. وبدوو الحبايب بالرقص والحشره ..

والحريم يو سلموو علي .. خوات حمد من اول ما يلست وهم يالسين عندي ويسولفون وياي ..

بس ام حمد يت سلمت وسارت بعيد .. مادري شو فيها .. ما تهمني المهم خواته طلعو طيبات فديتهم ..

والوحشه ام محمد ما يت تسلم علي .. بلعنه ههههههه

مر الوقت .. ويت حمده غشتني لان حمد بيدخل ووياه محمد وحمدان .ز اخيج هالعله ليش ياي بعد ..

دخل حمد .. والشياطين وراااه .. وصل عندي وباسني على راسي ..

جفت محمد يسلم على حمد .. ويا صوبي اونه يمثل جدام الكل .. حضني .. انا ويا ويهي استانست اول شي .. بس كرهته وكرهت قربه لي يوم قال في اذني : واخيرا بفتك منج .. وبيكون البيت لي ولامي ..

حقييير .... نذل ..... وقح .. كرهته .. الله يلعنه .. لمحته وهو ينزل وانا اقول في قلبي يعله بتخرطف ويطيح .ز بس السبال مشى وطلع ..

حمدان التيس بعد سلم على حمد .. وقالي .. مبروووك يا حلوه بصوت خفيف طبعا .. وراااح

انتبهت لايد حمد يوم مسكني ورص على ايدي .. جفته وابتسمت له ..

المهم مر العرس على خير .. وصراااحه استانست وايد وارتحت يوم ما جفت عوووش البومه خطيبة حمدان العنز ..

تمينا نتصور انا وحمد .. ورحنا فوق للغرفه الي حجزها حمد .. عشان نتعشى ونبدل ونروح المطار ..

طلب حمد العشا وراح يتسبح .. تميت انا اجلع الي على راسي .. وفصخت الطرحه ..

سمعت دق عالباب .. خفت عنبو منو ياي الحين .. جفت حمد طالع من الحمام ويطالعني : ليش ما تبطلين الباب ؟؟

قتله : مادري .. منو ياي الحين ؟؟

قالي : بلااج خايفه .. يايبين العشا هههههههههه

بطل الباب .. صح طلع العشا .. مالت علي اوني عااد خايفه خخخخخ

شليت اغراضي ورحت اتسبح .. طبعا بدلت وخلصت كل شي في غرفة الملابس .. مابيييه يجوفني استحي منه ..

طلعت ورحت يلست حذاله .. مسك ايدي وتم يطالعني ..

قتله : اول مره تجوفني ؟؟

حمد : لا فديتج بس محلوه اليوم واااايد ..

دزيت ويهه بطرف صبعي وقلت : عن المصاخه خلنا نتعشى ..

استانس من حركتي ونش .. وياب العشا عالطاوله وتمينا ناكل ..

خلصنا عشانا .. وبدلنا ثيابنا .. وجهزنا الاغراض .. ركبت السياره وحمد حط الاغراض ورا وركب ..

قالي : جاهزه حبيبتي .. ما ناقصنج شي ؟؟

قتله وانا مستحيه من قربه لي : لا حبيبي ما ناقصني شي

قال : يلاا عيل توكلنا .. بسم الله

سندت راسي عالسيت وتميت اطالع برررع وانا كلي شوووق بحيااه سعيده ويا حمد .....

"" وانتهـــــــــىىىى البــــــــــــــارت ""

هااا شو رايكم في نهاية البارت .. اول مره نهايه سعيده :10:

الـــــــــى الملتقـــــــــــــــى

:uae: