&* الجــزء الثــالث عشـر *&


عقب ما خطف عنا تخبرت فطوم ..

حموده: فطووم شسالفه ؟؟

فطوم : هاه ؟؟ أي سالفه ؟؟

حموده: لا اتحسّبين هالحركات اطّوف عليّه .. أدري انه هاللي خطف انتي تعرفينه ..

فطوم: حموده لا تخبريــن حــد ..

حموده: أول شي خبرينيه شسالفه ..

فطوم: هــذا واحد انا تعرفت عليه فالنت وتميت ارمسه فالتيلفون ..

حموده: والحيــن متواعده فياه عشان يشوفــج .. صــح ؟؟

فطوم: هيـه ..

حموده: فطوم اللي تسوينه غلــط ..

فطوم: وانتي يوم ترمسيــن ربعج في أمريكا ماحد قالّج غلــط !!

حموده: انا عشت فتره مب قصيره في أمريكا وشي طبيعي بيكون عنديه ربع .. لكن انتي اللي عايشه هنيه طول عمرج تسوّيــن هالشــي !! ماتوقعتها منج .. !!

فطووم: يعني حلال عليج وحرام علينا ؟؟

حموده: هو حرام فالحالتيــن .. لكـن انا الظروف أجبرتنيه ..

فطوم: أي ظروف هاي ؟؟

حموده: انتي ماعشتي غربتيه .. ماجربتي كيــف حد يشلــج من بلادج فجأه ويوديـج بلاد ثانيه وتعيشين فيها نص عمرج .. فـلا تتخبرين عن شي لأنج عمرج مابتفهمينيه ..

فطوم: انزين انا بعد لي أسبابيه الخاصه .. انا وحيـده بين ثلاث اخوان .. والكــل يشوفنيه ياهـــل .. حتى الريم وسلامه يعاملنيـه مثل الياهل وماقدر ارتاح وياهن فالرمسه .. ماحصلت غير فهد افضفض له باللي فيّه ..

حموده: اسمــه فهــد ؟؟

فطوم: هيـــه ..

حموده: حلو اسمــه ..

فطوم: أيــه محجوز تــراااه ..

حموده: يالله عاد منو قالــج أبغيــه مالت عليكم بثنيناتكم !!

فطوم: جب جب خلينا نسيــر الدكان فخاطريه ردبول ..

حموده: انا فخاطريــه "مارغريتا" شربــته مره وحده وسكــرت وحرمت اشربه مره ثانيه بس الصراحه كان طعمه عجيـــب ..

فطوم: بذمــتج شربتي خمـــر ؟؟

حموده: مره وحده وماكنت أعرف أصلاً شو هو .. كنا انا واميه في هاواي .. وهاي المره الوحيده اللي اسافر وياها بقعه .. المهم .. كانت يالسه تشـرب منه .. وخلاف طلبت واحد ثاني بس قامت قبل لاتشربه لأنها شافت ربيعتها وسارت تسلـم عليها .. أنا عيبني لونه وشربت منه .. كان طعمه عجيــب .. بس خلاف افتّر راسيــه وتميــت أضحـــك بــلا سبب .. وآخر شي عاد تميت ازاوع ..

فطوم: أمـــا انج انتــي عجيـــبه .. كم كان عمرج ؟؟

حموده: كنت توني يايه امريكا .. تقريباً كنت اصغر عنج بشوي ..

فطوم: وحليـــلج .. ماودج تشربيــنه مره ثانيه ..

حموده: حــراااام يابنت الحــلال ..

فطوم : أدري انزيــن انه حـرااام .. خلينا نهبــط يالله ..

هبطنا الدكان .. خذت فطوم اثنين ردبول من الكبار .. انا عنــي ما أحب طعمــه .. شربته مره في أمريكا وماعيبني .. خذت فيتامين سي وجلكسي اللي فيه حب داخل .. هذا أحلى شي عنديه .. وخذت أسكريم وتميت آكـله فالدرب ..

فطوم : بالله عليــج حد ياكل اسكريم فالشارع جدام الساير والراد ؟؟

حموده: هيه أنا ..

وكملنا دربنا صوب البيــت .. بس في نص الدرب طلع لنا خالد وفطوم كانت خايفه .. مادري من شــو .. !!!

نزل خالد دريشة السياره ..

خالد: ماشالله عليــكن ظاهرات اتمّشن فالشـــارع .. (وبصوت عالي كله عصبيه) يالله ركبن أشوف ..

ركبنا السياره ونحن ميتات من الزيغه .. وصلنا البيت ونزلنا وماكنا نعرف شو اللي ينتظرنا من خالد .. شكليه بشوف ويهه "المتوحش" اليوم عقب ماشفته ويهه "الطيـب" و"الفكاهي" و"المظلوم" ..

مشا جدامنا وهبط الميلــس ونحن هبطــنا وراه ..

خالد: بأمــر منو انتن ساريات اتمشّن فالشوارع بــلا ولي ؟؟

كنت بدافع عنّا .. بس ماقدرت يوم ذكرت شو اللي سوّته فطوم .. كنت بطلّع عمريه من السالفه واخليها على راس فطوم بس انا مب نذله ..

خالد: معروف فكرة منو هاي ..

أكيــد يقصدنيه !! ..

خالد: فطوم انتي متى بتيوزيــن عن هالسوالف ؟؟ والله ان شفتج مره ثانيه تمشيـن فالشارع مابييج خيـــر .. وانتي تعرفــين زيــن شو بسوي ..

فطوم: خلاص والله ماعيــدها ..

وطلعت من الميــلس وتميت انا اروحيه وياه .. تفاجأت بضحكتــه .. رفعت راسيه صوبه .. وقلت ..

حموده: على شو تضحــك ؟؟

خالد: شكلج وانتي زايغه غيــر شكــل .. تحريــتج بتسويــن شرات يوم فالبــر .. بس وين سار لسانــج مادري !!!

حموده: هالمره صدق زغت ..

خالد: يوم اقولج انا اخوّف ..

حموده: في هاي ماجذبت ..!!

خالد: انزين ما لاحظتي شي ؟؟

حموده: شو ؟؟

خالد: طالعي عدل ..

طالعت ويهه وخلاف شهقت وقــلت ..

حموده: ركبت تقويـــم !!!!

خالد: هيــه شرايج ؟؟

حموده: زيــن زيــن .. ع الاقــل ضروسك يغدن مايزيغن شرات قبــل ..

خالد: وانا كل شي فيّه يزيغج ؟؟

حموده: انته طويـــــــــــــــــــل .. وبالنســبه لي giant .. عملااااق .. تنكسر رقبتيه يوم اطالع ويهك .. وضروسك بينها فتحه.. وصوتك خشــن وغليــظ .. كيــف ماتبانيه أخاف ؟؟

ضحك خالد ع الوصف اللي وصفته اياه ..

خالد: عنبو وحــش ؟؟

حموده: خلقة ربـك بعد شو نقول ؟؟ بــس لا تنــحبــط انته مب شيــن ..

خالد: انزيــن عطينيه شي زين فيّه ..

حموده: شو تبانيه اتغزّل فيــك يالله بــــــــالستــر !!!

تم يضحك وانا ظهرت عنه وسرت صوب فطوم ..

فطوم: هاه ليش طوّلتي ؟؟

جذبت عليها : كنت آخذ هزبتيه أنا بعد ..

فطوم: وحليــلج .. الا اقول هاذيـلا متى بيّون ؟؟

حموده: مادري لا اتخبرينيه ..

هبط عندنا خالد ويلس على واحد من الكراسي والابتسامه مافارقت ويهه ..

فطوم: وايــد فرحان اخويــه شالطااااري ؟؟

خالد: لا مـاشــي ..

فطوم: ايييييييييه متى ركبت تقويـــم ؟؟

خالد: يوم روّحت عنكن كان عنديه موعــد فالعياده ..

فطوم: مبرووووووووووك مابغيــت تعدل ضرووسك !!!! انا اقول ليش اخويه شاق الحلج ومبتسم ..

خالد: لا مب هذا السبب ..

فطوم: عيــل شالسبب ؟؟

خالد: اكتشفت اني مـب شيــن ..

يييييه هذا ماحد يقولّه شي !!!

فطوم: بالله عليــك .. ومتى اكتشتف ؟؟؟

خالد: مادري !!!!

فطوم: اسميــك تخبلت يا خويـــه !!!!

فهاللحظه دخلوا البيت عميه وحرمته وعموه ويدوه .. بدون مريم وعيالها .. الحمدلله فكــه انحلت مشكلتها ..

من عقب السلامات .. يتنا الاخبار كالتالي ..

عليا: رديناها عند ريلها غصب عشان عيالها مهما كان هم بينهم عيال ولازم يتمون فيا بعض عشانهم .. اما مطر فـ قال انه هو يحب هاي البنت اللي خطبها .. ومب مستعد يخليها .. وحلف لنا انه مابيقصر من صوب مريم وبيعدل بينهن وبيسكن هاذيج في بيت اروحها .. مريم كانت تبا تطلق منه بس ماخليناها ورديناها عنده .. لازم اتحمّل عشان عيالها ..

شفت ابتسامة نصــر على ويه خالد .. وجنه برّد حرته فيها .. مثل ما أنا بردت حرتيه في شويـــــخ ..

روّحوا خالد وفطّوم خــلاف .. وانا تميت اروحيه .. البنات في بيت خالهن .. فـ من كثر المـلل رقــدت ..


بعد يوميــن ..

اليوم الاحــد يعني بداية الاسبووع .. الويــكند كان ممل بكل ماللكلمه من معنى .. قررت اني أشتغــل .. بس قبل لازم آخــذ ليســن .. مستحيل اني اعتمد على دريول يودينيه واييبنيه .. لازم أعتمد على نفسيه ..


طبعاً أكيد بديـت بتقرديـن عموه قبــل الكــل .. هي أكثــر وحده عقلها متفتح امبيـنهم .. خاصةً انها هي عندها ليسن واكيد مابتعترض .. وبالفعل وافقــت وبدت بتقردين عميه ..

كنت يالسه فالصـاله عنـد يدوه و يت عمتيه ..

عليا: أبشــرج ..

حموده: وافــــق !!

عليا: هيـــه ..

قمت ولويت على عمووه ..

يدوه: وابويه شعندكن .. ؟؟

عليا: اميه حموده بتاخذ ليــسن ..

يدوه: شوووه ؟؟ ماعندنا بنات يسوقن نحن ..

عليا: هي بتشتغل وتبا تسد عمرها مافيها اتم على المنّه ..

يدوه: جانها الا بتشتغل برايهــا الله يوفجها .. اتحراها الا من البطره تبا تاخذ ليــسن عشان تهيــت ..

حموده: افا علـيـج يدووه انا أهيــت ؟؟

يدوه: لافديــتج ..

ولوت عليّه .. وخلاف انسدحت وحطيت راسيه ع ريولها وتمت هي تمسح على راسيـه .. حسيــت بـ شعور ماقد حسيت به من قبــل .. أول مره حد يحن عليّه لهالدرجه من عقب ابويه الله يرحمه .. فديــت يدووه والله ..

غمضت عيونيه على ريولها وانا مستمتعه.. أكثر شي أحبه اني أرقد على ريل حــد.. !!

يدوه: شو رقدتي ؟؟

حموده: لا مارقدت بس عايبتني ريلج يدوه ..

"طبّت" علينا الريــم ..

الريم: شو وانا مالي رب يعني ؟؟ ولا الحناااان كله حق حمووده ؟؟

يدوه: انتي سيري عند امج رقدي على ريلها .. خليها هاي بنتيه ..

الريم: افا وانا ؟؟

يدوه: انتي بنت امــج يالله سيري ..

الريم كان شكلها صدق زعلت من كلام يدوه ..

حموده: يدوه حرام عليـــج ..

يدوه لاحظت شكل الريــم ..

يدوه: تعالي الريـم فديتج الا أسولف فيــااااج ..

ويت الريم ولوت على يدووه .. مشهد عجيب الصراحه انا على ريلها وريموه لاويه عليها ..

وخلاف أذن الظهــر .. وسرنا نصلــي .. ومن عقب الصـلاه الغـدا ويستمر الروتيـن اليومي ..



عقــب اسبوووع .. بــدا شهـر سبعه .. وبديت انا في دروس السواقه .. كنت أسير من الساعه 9 الصبـح لين 1 الظهــر .. مرت الايــــــام .. وخذت الليسن عقب ترايين رسبت في واحد منهن !! ومريوم عرّس ريـلها وهو الحيـن في "شهر العـسل" !!!


الحيــن نحن في شهــر ثمانيــه .. وانا بعدني مافصلت حق العيــد !!!! رمضان هالسنه بيبدا تاريـخ 22-8 .. ماعندي وقـت .. أكيد الخياييط كلهم مزحوميـن الحيـن !!

لبست شيلتيه وعباتيـه وانا مقرره أتوجه صوب السوق .. شليت شنطتيه وسويج السياره اللي كانت ستيشـن لكزس فضيّه .. ماكنت أحب السيايير الصغار .. وبعدين هاي واسعه وماعرف كم سلندر أظني 8 .. شدراني انا بخرابيط السيايير بالله عليـكم ؟؟

نزلت تحت حصلت سلامه اتريانيه ..

حموده: هاه بتسيرين فيايه ؟؟

سلامه: هيه عيل شورايـج انتي ؟؟ بس فطوم تبانا نخطـف عليـها ..

حموده: اوكيـه ..

ظهرنا صوب السياره .. ركبنا وشغلتها وظهرنا من البيت صوب بيت عميه سالم .. اللي كان في الشعيـبه .. وصلنا وهبطنا البيـت عشان نسلم مايستوي بعد نوصلهم وما نسلم ..

دخلنا فالصاله حصلنا ام خالد وفطوم .. سلمنا عليـهن .. ويلسنا شوي ..

ام خالد: منو يايبنكن ؟؟

سلامه: حموده ..

ام خالد : هيـه هاي فايدة الهياته في أمريـكا ..

أغتضــــت غيــض أسمينيه عليها .. ومارمت أكتم حرتيه .. وقلت ..

حموده: والله جانيه هايته لاتخليـن بنتج تسير فيايه ..

ام خالد: ومنو قالـج اني بخليـها أصلاً .. يالله فطوم ردي حجرتج يوم ايي واحد من اخوانج بيوديــج .. مالج سيره فياهن ..

حموده: مشكوره عمّوووه ..

شليت عمريه وظهـرت وانا معصصصصصصصصبــــــــــــــــــــه !!!!!

صادفت خالد وانا طالعه خطفت عنه ولادزيت له ويه .. خلاف سمعته يزقرنيه هو وسلامه بصوت واحد ..

تموا يضحكون على بعض وانا لفيـت لهم بعصبيه ..

حموده: خيـــر ..

خالد: شفيــج ؟

حموده: تخبّر أمـــك ..

وخطفت وركبت السياره .. ترييت سلامه لين ركبت وظهرت مطيّره من البيــت .. ماعرفت اذا شليت ورايه الدروازه ولّا وحده من النخيــل .. المهم اني طلعت من ذاك البيت وانا منقـــهـــره من ام خالد ..

سلامه: شفيــج يبوج بغيتي تنفدينا .. هدي أعصااابـــج ..

حموده: وهاي خلت فيّه أعصاااب ؟؟

سلامه: مشكلتج انج تنقهرين بسررعه .. مــره ثانيه طــنشي عااااادي .. اقهريها هي هب تنقهرين انتي !!!

وشغلت سلامه الاف ام .. وطلعت لنا هالاغنيــه ..

ريّح أعصابك وقلبك واستريــح .. واذكر الله بس عقلك كبّره ..
مب انا منهو على الماضي يصيح .. ولا انا اللي تلوي ذراعه مرَه ..

سلامه: أفا عليــج يا حموده مب انتي اللي تلوي ذراعج مرَه ..

ضحكت عليــها ..

خــلاف حطيت سي دي من عنديه .. كانت أغنية rihanna .. shut up and drive

سلامه: يالله عاد لمي لغبج وسوقي ..

حموده: أونج اترجمين عاد ؟؟

سلامه: هذا اللي فهمته .. وايــد صدعه هالاغنيـه ..

حموده: انا وايد تعيبنيه ..

سلامه: انا تعيبينه أغنية جوناس برذرز ..(وتمت تغني) when you look me in the eyes………………

حموده: بــس دخيــلج بيعتزلون جوناس برذرز بيتبرون من بعض !!!!

فهاللحظه صاح تيلفون سلامه وردت وحطته سبيكر وانا قصرت ع الاغنيـه ..

فطوم: أيــه نحن وراكــم قصروا ع هالاغنيــه الحشره حشــا !!

سلامه: شسوي هاي حموده واغانيــها !!

فطوم:انزيـن حطوا شي ثانــي ..

حموده: ماعليــه بتشوفون شو بحــط .. بس لاحد يقوليّه قصري ..

خالد: شو بتحطيـن "المرحوم" مايكـل جاكسون .. هههه ..

حموده :امحق مرحووم .. مايستاهل الرحمه ..

حطيــت اغنيـة خالد عبد الرحمن "عيون كحال" ..

بدت الموسيقى وتمت سلامه ترقـص في مكانها عليها ..

أخافك يا عيون كحال .. انا ماقوى الولـع فيني
عشقت الحل والترحال .. شفات الهمس تغريني
يعانق خاطري الجوال .. نسايم ليل تسقيني
واشوف الليل مهما طال .. به الاشواق تغنيني
توّجد خافقي وماقال .. على من أكفه يسقيني
قنوع النفس انا والحال .. عديله بي موازيني
ضحت شمسك ولقيت ظلال .. وانا لي ظل من حيني
انا عمري ابتدا رحال .. سماحك لي تعذريني

حموده: هاه زيــنه هاي ؟؟

سلامه: هيــه افا عليــح وهم يرومون يقولون شـي ..

فطوم: وقفن السياره بركـب عندكـــن ..

خالد: لا انا بوصلــج وبسير فياكن مايستوي تسيـرن رواحكن ..

حموده: ترانيه نص عمريه في امريكا ساده عمريه اروحيه ما استوى عليّه شـي !!

خالد: بس انتي هنيه الحيــن كل شي تغيّر .. ومايستوي تهيتين روحج بلا ولي !!

حموده: انتوا معقديــن أصلاً .. انا يوم كنت عايشه فيا ابويه الله يرحمه ماكان يسويبيه جذيه كنت أطلع على كيفيه ومحد يتدخل فيّه .. أقول سلّوم بندي هاذيلا مامنهم فايده ..

وزدت الســرعه وتجدمت عنهم بوايـــد .. بس هم بعدهم يلحقونيه ..

قالت سلامه عقب مابندت عنهم : أيــه حموده هدي اعصابج انا ماصدقت تهديـن من عقب سالفة ام خالد ..

حموده: مالـج خص انا ماحد يعق عليّه هالرمــسه وأمشي له اياها .. بتشوفيـن الويـه الثاني الحيــن !!

شفت رادار ع الدرب فـ خفّيـت السرعه التفت عداليه شفت سيارة خالد .. كان منزّل الجامه ويطالعنيه بعصبية ..

خلاص تباها بالشــر شــر يا خالد .. انا ماحد يعاندنيـه .. زدت السرعه لين ضرب العداد 200 ..

سلامه: ياربـــي ترحمنــيه وتغفر ليه كل ذنوبــيه .. اذا مت اليوم فأنــا عبدتــك الصالحـه أرجو رحمــتك !!

نقعت من الضحــك يوم سمعت ســلامه تدعــي .. وخفّيت الســرعه .. طالعت فالمرايه ماشفت سيارة خــالد .. حسيــت إنـي أرضيـت شي في داخليـه يوم عاندته !!!

سلامه: زيـن مابغيتي تخفّين السرعه حــشا بتنفدينا يعل العدو النفاااد .. يعلج الزيــن انشالله .. ماروم ادعي عليــج اخافج تعصبين عليّه وتعقينيه من الدريــشه !!!

نقعت من الضحــك هالمــره شكلها الخايف كان يضحـــك !!

وصلــنا عنـد محلات قوم عابــد عشان نشتري قطـع حق الكناديـر وشيَـل مره وحده .. كنا داخل المحـل إلا ويهبطون عليـنا خالد وفطوم ..

طالعنيه خالد وهو رافـع حاجـب واحـد ويبتسـم .. جنه يقول شفتي غلبتـج !!

حموده: هاه الشيـخ خالد شو تبا ؟؟ حريـر ولا قـطن ايطالي ولا صفوه آمــر تدلل كل شي موجود هنيــه ؟؟

خـالد: لاوالله ؟؟

حموده: يعني ماتشوفه محـل حرماات انته شراز فيــسك ؟؟ اظهــر يالله هكوه الدرب ..

طالعنيه بنظره وظهـر .. أحلى شي يوم امشي كلاميه عليــه .. !!!!


تشريـــنا قطع وشيَل وخلصنا من هالخربطان .. وخلاف سرنا كارفور نكمل مشترانا من هناك .. وخالد يمشي جدامنا مثل البدي قارد .. بس انا ماكان صعب عليّه أشرد .. سرت صوب محل "كاريزما" شفت ساعه رجاليه تجنن .. طرا في باليه خـالد .. وحليله غايضتبه اليوم وااايــد .. ماعليـه باخذها حقـه .. بعطيه اياها في آخـر يوم من رمضان .. وبقوله البسـها يوم العيــد .. عيبتنيه الفكره .. مادري ليش انا اهتم بهـ "النفر" وايد هالايــام .. هع .. يمكـن عشان الموقـف اللي استوا ذيـج المـره ؟؟ أكيد مب الا يمكـن .. بخبركم بالموقــف ..


في واحد من دروس السواقه كنت توني مخلصه وابا حد يردنيـه البيـت .. ومحد كان موجود فالبيت لا عمتيه ولا عميه ولا الدريول .. فـ خالد تبرّع انه ايينيه ووعدنيه مايتأخـر .. لكـني تميت نص ساعه اتريا ومحد ضوانيـه .. بس آخـر شي هضل الشيـخ خالد ..


ركبت عنده فالسياره وانا أتأفف ..

خالد: شسوي بعد تأخرت فالدوام ماطاعوا يظهرونيـه ..

حموده: انزين جان دقيت وخبرتنيه بشوف ليه تكــسي !!!..

خالد: محشومه عن التكــاسي .. فـ.....

وسكت .. حسيت انه كان بيقول فديـتج أو فديت روحج المهم انه تفدي .. ويوم ما كمل الكلمه أثبت ليه هالشـي .. طالعته كان ويهه معتفس وعاض على طرف شفايفه .. وجنه متندم ع الكلمه اللي كان بيقولهـا .. وخـلاف خطفنيـه على السوق .. كنت اتحراه هو يبا شي .. وقف عند فندق روتانا وسار صوب باريس غاليري ..

ورد عقب فتره مب قصيره وهو شال كيس باريس غاليري في ايده .. ركب السيـاره .. سكر الباب .. وابتسـم .. مد ليه الكـيس .. وقال ..

خالد: لا تسأليـن ليــش بس اقبلي هديتيـه ..

طالعته باستغراب وقلت: شو المناسبه ؟؟

خالد: ماشـي .. اعتبريها اعتذار اني ييتج متأخـر اليوم ..

ابتسمت وقلت : مشكوور ما بردك بعد ..


يوم رديت البيــت حصلت انه الهديــه كانت عطــر .. كان وايد غالي .. وكنت أعرف بعد انه ورا هديته هاذي شي .. تميت كل يوم اتعطر بهالعـطر شوي شوي .. ماكنت اباه يعبّر .. كانت ريــحته تدووووووووّخ .. ذوق خالد عجيـــب فالعطوور !!!


قررت اني آخـذ السـاعه حق خالد .. وخذت لي ساعه انا بعـد .. وظهـرت من المحـل أول ماظهرت صادفت خالد في ويهيه ..

خالد: وانتي ماتنقبضيــن حشــا دوم الا شارده .. !!!


كان واقف قريب منيه .. شميت نفس ريحة العطـر اللي عنديـه .. غمضت عيونيه .. خالد مع قساوته اللي تبيّن على ويهه لكنه يعرف كيف اييب راسيه بدون مايتعب عمـره .. عكس اللي سوّاه حمــد اللي ربع ورايه خمس سنين .. أعتــرف اني بديت أميـل لخالد شوي رغم أطباعه المتناقضه .. حمد ميت الحين من 7 شهور .. وماعندي منه ولا ذكرى .. وكل ما أذكـر اللي سواه في خالد تبدا صورته الزينه في عينيه وحبي له يتلاشا .. وبعديـن ما اقدر اتعلـق في ميّت !!


&* الجــزء الــرابــع عشــر *&


وعيت من ذووبتــيه فالعـطر على صوت خالد "الخشن" اللي تعودت عليه لكنه أحياناً يجرح مسامعيــه !!

خالد: ويــن ســرتي ؟؟؟

حموده: هنيــه ..

خالد: شو تسوين فهالمحـل ..

حموده: آخـذ لي ساعه ..

خالد: انزيــن هب تشرديــن مره ثانيه .. تراج دورتيليه راسيه اليوم ..

حموده: على هالخــشم ما طلبت شي الشــيخ ..!!! بــس بشـرط ..

خالد: طاعوا تتشرط بـعد .. آمـــري شو تبيــن ؟؟

حموده: ماشـي أباك تعزمـنيه على جيليـز .. !! بـس ..

خالد: أعزمج روحج ولا وياج البنات ؟؟

حموده: انته وضميــرك ..!!!

وخطفــت عنه بقراطيسيه .. وتميت أتمشى لين حصلت البنات في محل red earth ..

تشرينا انا والبنات وظهـرنا ..

قال لنا خالد : جانكن خلصتن يالله عازمنكن على جيليز ..

فطوم: صـــدق !! والله تسوي فينا خير !!! خلـصنا نحن امره ماعندنا شي ..

انا عـني كنــت وااايـــد يوعاااانه .. سرنا صوب جيليز يلسنا على وحده من الطاولات .. اللي صدمنيه انه اللي فطوم ترمـسه "فهد" كان يالس فالطاوله اللي مجابلتنـا ..!!!

عقب ماطلبنا الاكل صاصرت فطوم في اذنها : انتي ماتستحين على ويهج يايبتنه هنيه عيني عينك جدام اخوج ؟؟

فطوم :انا شدرانيه انا بني جيليز انا قلت له تعال كارفور لني بكون هناك وعاد بالصـدفه يينا هنيه ..!!!

حموده: انا شكلي برتكب فيج وفـ خوج جريمه في يوم من الايام ..

فطوم: انتي شفيـج علينا انا واخويـه حشششــا !!!

خالد: هاه شعندكن اتصاصرن ؟؟

فطوم: لا ماشي ..

وصل الاكل وتمينا ناكـل .. و"فهد" كـل شوي يلتفت صوبنا .. انا كان خاطريه أكفخه هو وفطوم اللي حطتنا فهالموقف البايــخ .. شكلي بييبهم وبضرب روسهم في بعض .. !!!

شفت انه خالد انتبـه على فهد اللي يصد صوبنـا .. طالعـه خالد بـ نظره خلت فهد يصد وما يلتفت صوبنا مره ثانيه .. وعقب شوي ظهر من المطعم بكبره ..

ضحكت على فطوم اللي اعتفس ويهها ..

حموده: دواااكم تستاهلووون ..

فطوم: جب انتي كله منــج هادمة الملذات ..

حموده: وحليليه شو سويت هذا اخوج !!!

طالعتنيه فطوم بـ غيض وكملت أكلها ..


وخـلاف خلصنا وظهرنا من جيليز .. خطفنا على كمن محل خلاف عشان آخذ لي نعال واكسسوارات .. كنت مقرره أكشــــخ هالعيــد .. خاصةً انه أول عيد اقضيه فالامارات من 6 سنين وأكيـد بيكون لـه طعـم غيــر !!..


ظهرنا من كارفور بوااايـد أكـياس حتى الجمعيه ماسلمت منا سرنا ناخذ كسكسه ..

سوينا ضرابه عند الباركنات .. خالد يبا فطوم تركب عنده وانا اباها تركب عنديه .. آخـر شي اتفقنا على حـل وسـط .. انها تركب عنده بس اليوم اتّم عندنا فالبيـت .. ووافق ..

هالمره سيارة خالد هي اللي تجدمت سيارتيه .. وتوجهنــا صوب زاخــر ..

وصلـنا البيـت ونزلوا خالد وفطوم عندنا .. حصلنا عموه ويدوه فالصـاله .. سلمنا عليهن ويلسنا ..

عموه: هاه خلصتن مشتراكن ؟؟

حموده: باقي الخيـاط وشوية خربطان بعد ..

يدوه: شو يباله العيـد بعد غير كندوره وشيله ؟؟ أسميـكن بطرانات !!!

سلامه: يدوه هذا لوّل الحيـن غيــر ..

يدوه: يييه يالدنيا كــل شي تغيّــر .. اسمينيه أحيـد يوم تخطف علينا سنتين ماعندنا غير كندوره وحده .. والحين انتن على كل شهر تفصلن كنادير .. ماجذب الشاعر يوم قال :

لوّل الحرمه مـ المداغيـش .. وعندي لها حشمه ومقدار
ترعى الدبش وتسوي العيـش .. وتيب الروا في ظهر الحمار
وتنش غبشه مـ الدغاليش .. تنش يوم الريل ماثار
وتقص نشرتها مغابيش .. من قبل طلع الشمس نشّار
و بلّت سقاها بالترشيش .. وتشل دلتها جدا اليار
تدرا الشرف عسا انها تعيش .. ويعيش ذاك الوقت لي سار
الحين ين قوم ام الخراخيش .. ماعندهن للشمس مقدار
تقول من دار الدراويش .. ما تقول جنهن من هل الدار
فالسوق تلقاهن طواويش .. يترابعن ع يانب القار
وسوّن على الدكان تفتيش .. وتوّسطن في نص القشار
وان قالهن راعي الشغل ليش .. صدّن وغضّت عين اليسار
يديّنن مايشترن كيش .. ولا يعاملنه غير بأخسار
وحق الريل ينياب بخشيش .. فالمشترى حطن له وزار

خالد: وزار .. صــح لسانــج يدتيــه ... هههههههههههههههههه ..

الكل: هههههههههههههههههههههه ..

انا عني ضحكت لين قلت بــس .. الحين نحن قوم ام الخراخيـش ؟؟

سلامه: يدوه الحين نحن جذيــه ؟؟

يدوه: هيه عيل من متى مهيّرات انتن وهاضلات الحيـن دون صلاة المغـرب شو سايرات تسوّن ؟؟ تراكن من أصبحتن وانتن الا فالسووق ..

خالد: في هاي صدقتـي .. دوّرن راسيـه فالسووق ..

حموده: حد قالّك تتبعنا وتسير فيانا ؟؟

خالد: لايكون تبن تهومن فالاسواق رواحكن بلا ولي ؟؟ حلفي انتي بس !


طنشـته ورقيت فوق صوب حجرتيـه .. عقيت عباتيـه وشيلتيه ويلست ع الشبريه .. تميت أطالع الساعتين اللي اشتريتهن .. كلهن لونهن أبيض بما اني أحب هاللون فالساعات .. ساعة خالد حطيتـها عـلى ينب .. عشان ما تختلط فيا باقي القشار و أضيّعها خلاف لني أنا بسرعه أضيّع الاشياء .. وخاصةً الاشياء المهمه .. !!!


أذن المغرب وصلّيت ونزلت تحت .. صاح تيلفون البيت وكنت انا الاقرب له ..

حموده: ألوه ..

سمعت صوت صياح مريم ع الصوب الثاني ..

حموده: مريوم شو فيــج ؟؟

مريم: مطـر ياب حرمته وسكنها عندنا فالبيــت !!

حموده: شوووووه ؟؟

يدوه: هاتي هاتي السماعه انا برمسها ..

عطيت يدتيـه السـماعـه .. ويلست عدالهـا .. كانن الريم وسلامه عندنا بعد ويلسن عدال يدوه عشان يفهمن السالفه ..

يدوه: انزيـن انتي لاتصيحين \ لا اله الا الله رمســي عدل والله ماعرفت لج شو تقوليـن \ شووه ضربـج ؟؟ أسميـه صدق مايستحي ولا يخيّل شو يتحرا ماوراج اهل يحايزون عنـج ؟؟ الحيـن انا يايتـنج امــره \ امره انتي لاتحطينه على بالـج هذا التعبان .. انا باخذ لج الحـق منـه .. \ يالله فداعة الله ..

يدوه: يالله وحده منكن ادّق حق الدريـول .. بسيـر صوب مريوم ..

الريم: ماتبينا نخبّر اميــه ..؟؟

فهاللحظه نزلت حرمة عميـه صوبنا ..

عوشة: شو تخبرونيـه .؟؟؟

يدوه: هذا أسود الويـه مطّوور ضرب مريوم وياب عديلتها عندها فالبيـت ...

حطت حرمة عميه ايدها على قلبها وقالت: ياويـليه على بنتيـه أسمينا فريناها فرّه شينه عند هذا التعبان .. يالله عمتيه خلينا نسـيـر صوبـها ..

يدوه: يالله انقفضي انتي انا بسير اييب عباتيـه ..

كل وحده منهن سارت في صوب ونحن دقينا حق الدريول عشان يشغل السياره .. وخلاف ظهرن طايرااات من البيــت ونحن بس نتطمش !!!

وبما انه نحن نساهم في نقل الاخبار والخراريف دقينا حق عميه وخبرناه .. وسار هو الثاني يتلاحق السالفه في بيت قوم مريوم .. وخبرنا عمّوه بعد اللي لحقتهم ..!!

قالت سلامه بطريقة المسلسلات: نحن سوينا اللي علينا وننتظر الاخبار الحيــن ..

الريم: وكالة أنباء ماشالله علينا ..

حموده: بس يعني مايستوي بعد مايدرون بالسالفه صـح ؟؟

الريم: صــح فذمتيه انـج صادقه ..

يتنا فطوم اللي كانت فالمطبـخ وشاله في ايدها سندويـجه و قوطي عصير ..

فطوم: شو مستوي ؟؟

سلامه: أذّن الديــج صباااح الخيـــــــر .. أصبحنا وأصبح الملك لله ..

ضحكت عليها خلاف قـلت : قامت الدنيا هنيـه وانتي ماتدريـن !!

فطوم: بذمتكم ؟؟ شو استوا ؟؟

وخبرناها باللي استوا ..

فطوم: خيــبه كل هذا وانا فالمــطبخ ؟؟ المصايب تستوي بســرعه عندكـم !!

الريم: تراهم يقولولج عصر السـرعه ..

فطوم: أنشـهد انه عصر السـرعه ..

شغلنا التلفزون وتميـنا نبدّل القنواااات ..

سلامه: بنات شرايكم أحط لكم على طيوووور الينّه ..؟؟

الريم: شايفتنا يهااااال جدامج كل وحده بمرضعتها ؟؟

سلامه: هههههه لا .. شفتن التركـي أمــس ؟؟

الريم: هيه وحليله خليــل ماات .. شكله هذا حاقد اللي مسوي المسلسل ..

فطوم: هيـه والله صــدقج .. يييه فقته ذاك الحيوااان مصطفى .. أسمينيه تميت اصيـح ..

الريم: يالله بالستـر جانـج تصيحين الا على هـذا الاشقـر الخبــله .. أسميج ماعندج مونه !!

حموده: خلنها حساسه البــنت .. sh's very sensitive ..

سلامه: عنبوك يالانجليـزي ..

حموده: أقول حطي على mbc 4 خلينيـه أتذكـر المـاضي ..

حطت عليها وكانوا حاطيـن "House" ..

حموده: تعيبنيه هالمسلسلات اللي فالمستشفيات .. ER و grey's anatomy هاذيلا كانن أحلى شي عنديـه ..

الريم: جان استويتي دكتوره ؟؟

حموده: الحيـن شدخل هذا في هذا ؟؟ انا تعيبنيه القصه مب الامراض والعمليات !!

تميـنا نطالع خلاف سمعت صوت تيلفونيه اللي من فتره طويـله ماصاح .. شفت فتح خط مال برا .. رديـت ..

حموده: ألووه ..

جودي: Hi ..

حموده: Hi Jody how are you ?

جودي: I'm fine how are you ?

حموده: I'm so fine and happy !!

جودي: oh .. good for you .. I just called to say Hi

حموده: how is Andy and the others are they okay ??

جودي: !!they are fine .. and surprise Andy get engaged

حموده: oh really ?? who is he ??

جودي: her boy friend Rik don't you remember him ?

حموده: oh yeeh I remember .. congratulate her for me

جودي: okay I'll do .. bye

حموده: bye ..


سلامه: منووووو ترمســـين ؟؟

حموده: ربيعتيه جووودي ..

سلامه: ياحافظ على جودي جان قلتيلنا بنسـلم عليـها ..

حموده: تعرفن انجليزي ؟؟

الريم: نمشي حالنـا ..

حموده: ماعليـه مره ثانيـه .. هيه أبشركم آنـدي انخـطبـت ..

الريـم: صــدق ؟؟ مبروووك .. ربه الا ريال زيــن ومايدوخ ماريغوانا ؟؟

حموده: ههههههههه هذا ربيعها من سنيــن اسمـه ريك ..

فطوم: والنعــم والله من ريـك ..

حموده: هههههههههههههههههههه ..

خطفنا الوقت بالسـوالف ليـن هبطوا عليـنا المافيـا قصدي باقي العايله من يدوه وعميه وحرمته وعمتيه .. ومريوم وعيالهـا ..!

سلمنا على مريوم اللي الحزن والغيض كاسي ويهها .. وعيالهـا اللي بعد شكلهم مستغربين و مايدرون شسالفه ..

عوشة: يالله يابنتيـه لو انـج يالسـه عند ريلـج الحيـن مب أحسـن لـج ؟؟ بدال ماتكبرين المشاكل وتشتتين عيالـج وتخليـن هاذيـج تحوزه؟؟

مريم: هو امبونه يباها يعني وجوديه وعدمه واحد مابيغير شي ..

يدوه: ماعليـه يابنتيـه بس شو ذنـب عيـالـج تشتتينهم جذيـه ؟؟ تحمـلي عشـانهـم ..

مريم: مايستاهل اني أتم عنده هذا نكـر يميليه وسار يدوّر غيريه شو أبا بـه ؟؟

عليا: لو كـل من عرس عليها ريلها قالت جذيـه وتطلقـت ماتم حد معرس عيل !! الحيـن كلهم يعرسون على حريـمهم لا تامنين لـ حد .. كلهم الرياييل جذيـه ..

سيف: افا يا اختيـه وانا جذيـه بعد ؟؟

عوشة: مايندرابك جانك مب ماخذ وحده وخاشنها من يدريبـك ؟؟ تراكم انتوا كله تسوونه بالخـش والدس ونحن ياغافل لك الله .. وخلاف تقولولنا تحمّلي العديـله ولا قبضي الباب !!

سيف: هذا يوم الواحد ييلس فيا الحريـم ماينلام اللي قال انه عقولـكن صغار .. مع السلامـه انا سايــر ..

وظهر عميه عنا وانا فخاطريه اضحك بس سكت ..

سارت مريـم وعيالها فوق صوب حجرتـها .. أذن العشـا وسـرت أصلــي .. وعقب ماخلصـت حطيت سماعات الآي بود في اذنيّه وقبضت واحد من الكتب اللي شريتـهن اليوم .. وتميت أقرا .. مالي نفس انزل تحت ..

تميت اقرا كلمتيـن وخلاف اتم أغني ويا الاغنيـه .. و فجأه صاح تيلفونيـه .. مع اني ماعرفت الرقم الا اني رديـت ..

حموده: ألوووه ..

خالد: أهليــن .. شحالـج ؟؟

حموده: خالد ؟؟ من وين يبت رقميـه ؟؟

خالد: ماتحيدين ذاك اليوم دقيتيليه يوم تأخرت عليـج في درس السواقه ..؟؟

حموده: ماشالله عليـك وانته خزنته .. ؟؟

خالد: هيـه عيـل ؟؟

حموده: انزيـن آمـر شو بغيـت ؟؟

خالد: قولي حق فطوم تظهر ليه خاري من نص ساعه وانا واقف واصيّح هرانـه ومحد ظهر ..

حموده: انزيـن جان دقيت على تيلفونها ولا تيلفون البيت ..

خالد: تيلفونها مغلق .. وتيلفون البيت ماعرفه ..

حموده: انزين جان هبـطت ؟

خالد: شفت مريم وهي نازله من السياره وما حبيت اهبط واشوفها ..

حموده: أبشـرك الاخـت ناويه تتطلق ..

خالد: ييييه امحق بشاره ..

حموده: ليــش ؟

خالد: أخافها ترد تتلزق فيّه أو انهم يلزقونيه فيها .. بيقولون بنت عمـك وكبرك وحليلها مطلقـه وانته أولابها تاخذها وتربي عيالها ..

حموده: خيـــبه …… these people are so complicated

خالد: يا حافظ الموجه الانجليزيه ضاربه اليوم .. أقول سيري زقري فطوم يالله بسررعه ..

حموده: طلاّب ويتشرط .. انشالله حاظريــن من عيوني الشيــخ بسير ازقرها ..

وبندت في ويهه وسرت ازقـر فطوم ..

ظهرت فطوم بسـرعه من البيـت لني قصيت عليها وقلت لها انه خالد معصـــب .. وحليلها زاغـت البـنت مسولها رعب !!


وخلاف حطوا العشـا وتعشيـنا ومن عقب العـشا يلسنا شوي نسولف بس مريوم عكرت علينا الجو فـ انا سرت أرقـد ..


بالبــاجر العصــر سرنا انا وسلامه وفطوم عند الخيـاط عشان نفصـل كناديـرنا .. انا عاد تفننت في كناديريه .. كنت مخططه اني أول يوم بلبس وردي .. تميـنا ساعه وشوي عند الخيـاط .. وخلاف ردينا البيـت .. ويلسـنا ع الزوليه اللي كانت مفروشـه فالحووش ويت عندنا الريم .. وانا كنت أشرب عصيــر ومروقه بس البنات وصوت القطاو اللي واقفات عدال المـطبخ صدعن راسيه ..


الريـم: أيـه بنات حــر خلونا نهبط داخـل ..

سلامه: من وين ضوا الحــر ؟؟ بالعكـس برااااد ..

فطوم: صدقها سلّوم ماشي حــر ..

الريم: يوووه شوه انتن ماتحسـن ؟؟

سلامه: مشكـله عاد يوم انتي دمج حار .. ؟؟

الريم : انا دمي حار يا ام دم باااارد .؟؟

حموده: هــدن أعصابكـن وسمعن الشاعره حمده بنت علي بن مبارك آل مكتوم شو تقول ..

فطوم: تفضلي طويـلة العمــر ..

حموده: أحـم أحـم ..

البيت غير الحوش غير القطاو غير والكوب غير
صلوا على ذكر النبي صلوا على ذكر النبي
تبونها بالحر حر تبونها بالبرد خيــر
ولا نحكم هالقطاو فـ ما تبون ومانبي
وانا لاحكمت القطاو العذر يالجمع الغفيـر
تلوع جبدي من شكــلهن الأجـربي !!

وسلامتكــم ..

الكل: هههههههههههههههه ..

سلامه: سلـمتي سلـمتي الشــاعره صح لســانج ..

حموده: احم احم صح بدنــج هههههه ..

الريـم: أنــا بسيــر داخـل حشـا مت حـــر ..

حموده: اقول يالله سرنا سرنا لاعت جبديه من شكل هالقطاااو ..

قامــن البنات فيايه وسرنا داخــل ..


&* الجــزء الخـــامــس عشــر *&


عــدت الايـــام من عقب هاليوم متشــابهه وممله .. ليــن عقــب اسبوع يوم سرنا فيا يدتيه وعمتيه عشان نتشـرا حق رمضان .. سـرنا كارفور وعند الجمعيـه كنت يالسه أحـط ربيه فالعربانه جان تقول يدتيه ..


يدوه: وابوويه شعنـه تحطيـلهم ربيـه ؟؟

حموده: تراه لازم نحط ربيه عشان نروم ناخذ العربانه ..

يدوه: حتى على هذا يحطون فلووس ؟؟ أسميهم ماعرفوا شقايل بيّمعون الفلوس !!

ضحكت على يدتيه وشليت العربانه .. وكانن ورايه الريم وسلامه وجداميه عمتيه ويدتيه ..

الريم: يعني نحن لازم كلنا نلصق في بعض ؟؟ مايستوي كل حد يسير روحه ؟؟

سلامه: دامنج سايره فيا يدوه لازم تتبعيــنها ..

الريـم: الله يعيـن ..

أمـا أنا طــنشت وسرت روحيـه صوب مال الكتـب والافلام .. كنت أدوّر كتب طبـخ عشان أعدل في رمضان .. ابا اتعلـم الطبــخ !!

شليت سله و يمعت ليه كمن كتاب بالعربي وبالانجليزي .. وانا أطالع رفوف الكتب واسحب السله اللي شرات العربانه ورايه ماوعيـت الا وأنا أضـرب في حـد ..

يوم طالعت فوق انصـدمت .. قلت بصوت واطي : سيــف ؟؟

سيف: حمده ؟؟

حموده: هيــه شحااالــك ؟؟

سيف: بخيـر من شفــتج .. ماصدق عيونيه متأكده انج انتي اللي جداميـه .؟؟

حموده: هيه عيل منو ؟؟ سكنيتيه ؟؟

سيف: شتبين السكن تطرينـهم ؟؟ اللهم سكنهم في مساكنـهم ..

حموده: ههههه الا اقول متى رديت من أمريكا ؟؟

سيف: من شهـر تقريباً ..

حموده: هيه زين الحمدلله ع السلامه .. عن اذنك انا لازم أروّح أكيد يدورونيه الحيـن ..

سيف: حشا ماواحيتي ..!!

حموده: والله فيايه يدوه وعموه وبنات عميه عاد لازم أسير شو بيفججنيه من لسان يدوه ان تأخرت وما حصلتنيه .. عاد لازم أخليك الحين ..

سيف: منو قال بخليـج ؟؟ بلحـقج ..

حموده: لا دخـيلك مانبا فضايــح نحن مب في أمريكا ..

تنهد سيف عقب قال : انشالله ..

يرّيت سلتيه ورايــه وخطفت أدوّر باجي القوم .. حصلتـهم عند مال الصابون والكريمات .. شليت الكتب وفريتهن فالعربانه ..

يدوه: ويــن ملقتـي انتي بتخبـرج ؟؟

حموده: سـرت آخـذ كتــب ..

يدوه: كتب شو هاذيلا ؟؟

حموده: مال طبخ يدوه ..

يدوه: شو بتطبخـين ؟؟

حموده: والله مادري .. اللي بلقاه فالكتب بسويـه ..

يدوه: هيه زيــن ..

وصدت عنيه ووجهت الهزبه صوب سلامه والريم اللي كانن يتحوّطن في مال الكريمات وشكلهن مابيتفججن منه .. ين الريم وسلامه عقب مافضحتهن يدتيه بهزبتها ..

الريم: يوووه يهالعيوز امره ماعندها اسلووب حشششاااااا ..

سلامه : كله الا بمهازب ماعندها واحد اثنين ..


وكملنا دربنا وماخلينا شي ما اشتريناه .. وانترست العربانه وسرت اييب عربانه ثانيـه .. كان شي واحد يلحقنيـه .. ما انتبهت منو هو .. بس يوم وصلت عند العربانات وييت بحط الربيه سمعت صوته ..

....: لو سمحتي الشيــخه ..

التفت صوبه .. يييييييه هذا اللي كان ناقــص .. الله يرحم أيام المارينا في بوظبي تذكرتها الحيــن !!

حموده: نـــعم ..

...: ممكن تاخذيـن الرقـم ؟؟

حموده: ليـش شو شاشفنيــه ؟؟

....: غــزااال ..

حموده: انتـه واحــد هلك ماعرفوا يربونك يالـس تقـل أدبك ع البنات فالاسواق ..

....: يبـــيييييه ثرها وصلــت ليــن أهليــه ال سالفه .. والله جان حـد ماعرفوا أهله يربونه هي انتي ..

حموده: انا مابا فضايح فارج عن ويهيه أحــسن ..

أقبـل علينا سيف فهاللحـظه ..

سيف: خيـر شو مستوي ؟؟

حموده: هذا اخويه جان في خاطرك شي قوله ..

طالعنا بصدمه وخلاف يا بيشرد .. بس ماوعا غير بـ سيف وهو يمسكه من كندورته ..

سيف: شو سوابـج هالجلب ؟؟

حموده: خلـه لاتنزل مستواك حقـه ..

شله سيف ووداه صوب السكيوريتي .. ورد عنديه ..

حموده: سلــمت الشيــخ أشكرك الصرااحــه ..

سيف: لاشكـر على واااجــب ..

ابتسمت وصديت عنه حطيت الربيه فالعربانه وهبطت الجمعيـه .. وسرت صوب يدوه والبنات ..

الريم: شياج أبطيتي ؟؟

حموده: بخبركم خــلاف يوم نـرد البيـت ..

الريم: ماعليه هناك نتحاســب ..

خلصــنا مشترانا وظهرنا من الجمعيه خطفنا انا والبنات صوب ستار بكس وخذنا فربتشينو ..

وخـلآف سرنا صوب السياره وردينا البيـت ..

في البيت خبرت البنات بالســالفه ..

سلامه: حلـــفي انتــي بس .. !! جان راويتينا اياه ؟؟ مزيون هو ؟؟

تميت أتذكر شكلــه .. وقلت : هيه حليــو ..

الريـم: مره ثانيه ان شفتيه اتراوينا اياه ..

حموده: انشااااالللللله .. من عيووونـــي .. جان تبن المزايين اللي في بوظبي بعد عنديه كمن رقم مادري اذا غيروهن ..

سلامه بصدمه : ترمســينهم ؟؟

حموده: لا بسم الله عليّه ما اتنزل ارمسـهم .. بس كنت محتفظه بالارقام تذكااار كنت اطالعهن في امريكا وانقع من الضحك ..

سلامه: اما انج انتي غير شكل .. عيونج الزرق هاي اطيّح اللي ما يطيح ..

حموده: هبي هباج الله قولي ماشالله بسم الله من عيووونـــج ..

سلامه: ماشالله اخ تفو عليــج ..

حموده: ههههههههههههههه .. تفو عليــج انتي !!


من عقـــب هالاحــداث مرن اسبوعيــن .. مريم ردت عند ريلها عقب مايا وراضاها واستسمح منها .. وهل عليـنا رمـضااااان .. يا فرحتيـه .. أول مره من 6 سنين أرمّض في الامارات !!


اليـوم أول يوم فـ رمضـان .. الحيـن الساعه 12:30 الظهـر وانا توني واعيه صلّيت الظهـر ونزلت تحت .. كانت يدتيـه قابضه مسباحها وتسبّح وعمتيه وحرمة عميه يسولـفن عن "الفطـور" وشو بيسوون اليوم ..


وايهتهن ويلست عدال يدوه ..

عليا: حموده شو تبيـن فطور اليوم ؟؟

حموده: والله مادريـبكم انا مايخالف عليّه .. أي شي بستوونه باكلـه ..

عوشة: عيـل خـلاص الحين الخدامات يالسات يسوّن الهريـسه بسير اقولـهن يسوّن مجبـوس دياي وخبز وصالونه ( "ثريد" لغير الناطقين بلهجتنا هع) .. وبخليـهن يعدلن محشي وفطاير وكستر حق خلاف ..


حموده: انا والبنات بنعدل المحشـي والكسـتر ماعندنا شغلـه ..

عليا: عيل سيري وعيهن بعدهن رقوود ..

حموده: ماعليـه بسير أوعيـهن ..

قمت ورقيت فوق .. أحس راسيـه يعورنيـه وحلجيه يابس بس هذا شي طبيعي بما انه أول يوم صوم خلاف بتعوّد ..

دقيت الباب على الريم وخلاف على سلامه ..

فجن الباب مره وحده وقالن: شووه ؟؟

ضحكت عليــهن وخلاف قلت : good afternoon ..

الريم: يووه خلينا نكمل رقدتنا ..

حموده: لا بتهبطن فيايه المطبـخ وبنعدل حق الفطوور ..

سلامه: افففف انزيـن ..

وهبطن حجرهن وانا نزلت تحت ..


شغلت التلفزون فالصاله حطيت على "سما دبي" حصلتهم حاطين هذاك البرنامج مال الطبخ "هني وعافيه" وتميت اطالع .. هالمذيعه وايد ملقووفه !

عقب شوي نزلن البنات وسرت فياهن المطبـخ .. قضيـنا فتره الظهـر كلـها ونحن نطبـخ .. عقب ما أذن العصـر بـ شوي خلصـنا وسرنا نصلـي ..

من عقب الصلاه قبضـت المصـحف وتميت اقرا ليـن أذّن المغـرب ..

أول ما أذن المغـرب نزلـت ركــض تحـت .. عطشاااااااانه .. كانوا حاطيـن الفطور فالخيـمه .. وصلتهم وانا أناهي .. قبضت كوب ماي وشربته كله مره وحــده ..

عوشة: يابنتيـه مب زيـن جذيـه تشربيـن الماي مره وحده وانتي توج فاطره ..

حموده: شسوي عطشااااااانـــــــــــه ..

وطّيت الكوب ويلسـت عــدال سلامه .. قبضت صحن الشوربه اللي جداميه وتميت أشرب..

يدوه: يا بنتيـه مابتاكليلج رطبتيـن ترانا اليوم خارفيـنه ..

حموده: من عيووونـــي ..

وشليــت كمن رطبه وكلتهن لو اني مادانيه وايد ويسويليه صاهر بس ماعليـه لجل عيون يدووه كل شي يهون ..


وخلاف قمنا عشان نصلــي .. ومن عقب الصلاه الكل تيمعوا فالخيمه .. حطينا على سما دبي عشان نطالع "شعبية الكرتون" اللي انا ماعرفه شو هو بس بطالعه .. وخلاف تمن يخبرنيه عاد شسالفه .. هذا شامبيه وهذا بو مهيّر وهذا حنفـي وهذي عتووقه وهذي سبتووه الــخ .... كان حلــو ويضحـك بصرااحـه .. وخلاف تمينا نطالع خوصه بوصه .. عقب ماخلص حطينا على بوظبي وتمينا نطالع مسلسل دروب المطايا .. وخلاف أذن العشـا تمسحنا وسـرنا المسيـد عشان نصلـي بما انه المسيـد امره لاصق في بيتنـا .. ومن عقب الصلاه رديـنا البيت ..

سلامه: أيــه بنات حطن ع بوظبي خسكن الله ..

يدوه : وابويه عليكن الا مجابلات هالتلفزوون ما وحده منكن جابلت المصحف وقرت لها كمن سوره ..

سلامه: يدوه قاريين خلينا نطالع المسلسل ..

الريم: أي مسلسل ؟

سلامه: ام البــناااااات .. شكــله وايد حلو شفته فالدعايه ..

يدوه: من هي هاي ام البنات ؟ ماظني حد غيـر امكن !

ضحكنا كلنا على يدوه ..

يلست يدوه عندنا شكلها عيبها اسم المسلسل ويلست اطالع عندنا ..


الساعه 11 حطينا على قناة الامارات وتمينا نطالع برنامج " السردال" عاد يدوه حاشرتنا عليه وتبانا ندق .. بس طبعاً ماحد تجرأ يدق !

يدوه: يييييييه حد في هالدار مايعرف شو هي الناقه المفرووده ؟ اسميــهم حَضــر .. ضااااعت البــــلاد ضـــاعــت ..

عوشه: هاي وحده عنز داقه توها ماتعرف شو الصخاااام .. يالله بالســتر .. هاي على شو عاطيينها يواز (جواز) يوم هي ماتعرف شو الصخام ؟

الريم: اميه هاي يقولون من دبي .. شدراها ؟ أكيــد تلقينها عايشه طول عمرها بين المولات .. زين منها ان شافت صخامه في حياتها !

عوشه: في ذمتيه انج صادقه .. اختــربت البـلاد اختـربت !!

ومــــرت الايـام كلـها جذيـه .. ليــن قبــل العيد بأسبوع يوم بدت الربــشه .. ياناس أحلى أسبوع فالدنيـا هو الاسبوع اللي يسبق العيــد !!!


23-رمضــان .. الموافــق الاحــد .. 13-9 .. بعد صلاة التراويح ..


كنــت يالسـه أرمـس فـطوم فالتيلـفووون ..

حموده: فطــوم ويـن بنتحنــا ؟؟

فطوم: ترانيـه حجزت محنيـه بتيـنا فالبيــت ..

حموده: فكيـتينا من زحمة الصالونااات يزااج الله خيــر .. بس عاد لازم اطرشينها صوبـنا نحن مابنـي بيــتكم ..

فطوم: ليــش شو فيـه بيتنا ؟؟

حموده: تدريـن بأمـج عاد كيف ما ادانيـنيه ..

فطوم: ماعليـج منها أميــه .. وغصبن عليـكم بتون بيـتنا .. جيـه انا دوم ايي بيتكم وانتوا ماتون بيــتنا ؟؟

حموده: يوووه يا فطوم مافيّه أكدر خاطريه قبـل العيـد ..

فطوم: انزيـن انتي طــنشـــي سمعي من اذن وظهريه من الاذن الثانيـه مثل مايقولون طنش تعش !!!

حموده: هههههه ذكرتينيه بأبلة الدين في صف أول ثنوي كانت دوم تقول طنش تعش تنتعش !!

فطوم: يالله دخيــلج لاتذكرينيه بالمدرسـه عنديه ثنويه عامه السـنه وضاربنيـه حفوز من السـنه بكبرها ..

حموده: الله يعيـنج .. انزيـن بتسيرين فيانا الصالون باجـر ..

فطوم: ليـش ؟؟

حموده: تدريـن بعد خربطان الصواليـن حلاوه منكير بدكير وماسك حق الويـه وانا بقـص قصتيـه ويمكن أصبغ شعريـه ..

فطوم: الخربطان المعتاااد انزيـن بيي فياكم بس انتي لاتصبغيـن شعــرج ولاتلعبيـن فيه تراه حلو مثل ماهو .. لونه وايد عايبنيــه .. كستنااائي ..

حموده: احــم مشكوووره .. خلاص تـم مابسويبه شـي .. بس برتبــه ..

فطوم: انزيـن بتون عندنا عشان المحنيـه ؟؟

تذكرت السـاعه اللي كنت ابا اعطيها خالد .. يالله زين حيّه وحايه .!!

حموده: افا عليــج بني .. اترخص منج عيل بسيــر أخبـر البنات ..

فطوم: مرخووصــه .. يالله فداعة الله ..

حموده: فداعة الله ..


سرت داخـل بما اني كنت يالسه فالخيـمه .. خبرت البنـات وسرت حجرتيـه أفكر شقايل بوصل الهديه حق خالد .. فكرت اني احطها في حجرته بدون مايشوفنيه .. بس هالبنات الملقوفات بيتمن يتخبرن يوم بيشوفـن الكيـسه .. عادي بحطه في سدة السياره .. ويوم يغفلـن بسير وبحـط الساعه في حجــرته .. واااايه فديتنيه والله اني ذكيــه !!


رديـت عند البنــات وقضيـنا الليله ع المسلسلات ..!!


بالبـــــاجــر .. من أصبــحنا ونحن فالصــالون .. والحيـن توه مذّن العصــر ونحن تونـــا ظاهريــن من الصـالوون !!! حتى قبل العيـد بأسبوع زحــمه حششششششا !!!!


عقب ماظهـرنا من الصـالون رديــنا البيـت وخلاف أذن المغرب وفطـرنا .. كنا مقرريـن نسيـر المعـرض بس يا خالد ومارمنـا نجفي به وهو أصلاً كان ياي يشل فطوم فـ اجلناها حق باجـر ..


كنـا يالسيـن فالخيمه انا وفطوم ويدوه وخالــد .. بدا الجو يبرد وبدت الالوان الغامجه تظهر في كنادير الشباب .. كان خالد لابـس كندوره بنيـه وسفره بيضا .. ويا التقويـم كان محلو بزيـــاده ماكنت ادري انه التقويـم يخلي الواحد حلو .. أحيده في أمريكا يخلي الواحد شيــــن .. حتى انهم يوم سوو مسلسل "Ugly Betty" خلوها حاطه تقويـم !!!


ويــن راحــت كل ذيــج الشيـانه يوم شفـته أول مره ؟؟ كنت أشوفه أشين ماخلـق ربي .. بس الحيـن محلو بزياده مادري شو سوا بعمره الصراحه !! يمكن لأنه غيّر قصة لحيـته ؟؟ يمكن لأنه متن شوي واستوا ويهه مليااان من عقب ماكان غادي عظام ؟؟ والله مادري .. أكيــــــد شي مسوي بعمره أكيــد ..


سارت فطوم تيب عباتهـا وقشارها ويدوه سارت المطبـخ عشان "تهزب" الخدامات اللي زقرتهن كمن مره وماردن عليـها .. اما انا كنت اطالع خالد واحاول اكتشف شو اللي مخلنه يحلوّ جذيـه !! ..

خالـد: بســم الله شيااااج مبحلــقه فيّه .. ؟؟

حموده: هاه لاماشي ..

وصديت الصوب الثاني ..

خالد: أدري اني محلو مايحتاي تقوليــن ولا تبحلقيـن عيوونــج ..

حموده: ياخي كل شي بيتغيّر الا صوتـك الخشــن ..

خالد: بسير أسوي عمليـه حق حباليـه الصوتيـه .. بخليـهم يشدونهن أكثر عشان يغدي صوتيـه رفيــــــع ..

حموده: جيــه غيتار هن ولا عود ؟؟

خالد: ههههههه .. مادريــبج ..

حموده: صوتك زيـن يوم تغنــي ..

خالد: سمعتينيه فالبـر يعنـي ..

حموده: هيــه وانصدمــت .. قلت منو هذا اللي مستوي بالروغة زمانه آخر شي ظهرت انته ..

خالد: يعني عيبـج صوتيـه ؟؟

هزيـت راسيـه بـ هيه ..

هبطـت علينا فطوم وقالت : يالله ..

خالد: هيه عيل اترخـص انا ..

حموده: فداعة الله ..

قـام وظهــر وانا دوختنــيه ريحة العـطر اللي ماشميـتها الا يوم قام وتحــرك .. أبــا أعرف من وين يضوي هالعطــور كــل واحد يدوّخ اكثــر عن الثــاني !!

تميت فالخيـمه وانا أشـم بقايا عطـره .. ويوم حسيت انه ماتم شي منها قمت وسرت داخــل ..!


بالبــاجــر .. خــذت بريــك ورقـدت ليــن العصــر .. وليـن ما صحصحت أذن المغرب ونزلت أفطـر .. زيــن اليوم ماتعبت عمريـه !!
\\\

من عقب صــلاة التراويــح سـرنـا صوب المعـرض .. كان في قاعة الاعراس فالخبيصي .. وكان شي خيمه عدالـه بعـد فيها بتان يبيعون زوالي .. وألعاب يهال بعد .. نحن دخلنا القاعـه .. عيبنيه المكان .. كان شي مكان حق بيع العصاير "الفريش" ع اليسار وع اليمين بوفيـه فيه حلويات وانواع أكل ما انتبهت لها .. نحن دخلنا داخل وين يبيعون .. كان المكان مزحوووووم .. وعاد الشباب وين يحصلون أحسن عن هالمكان عشان يطفرون بالبنات والحريم ؟؟ المكان مترووس منهم .. !! تغشيت لو اني مابا اتغشا بس عشان اتفادا نظرات هالشباب اللي كلتنيه أكــل !!


مع انه كنا شاريين من قبل ومخلصين كل خربطانا حق العيد بس الواحد مايروم يسير المعرض وماياخذ شي .. خذنا اللي قدرنا عليـه وظهرنا ووقفنا عند مال العصيــر ..

سلامه: عاد اختاري يا حموده الكوكتيـل اللي تبيـنه ..

حموده: وايد انواع شو أختاار ؟؟

آخـر شي خذت مال الموز .. شكله حلو .. وايد يشترون منه ..


سلامه خذت واحد لونه وردي فيه فراوله ..والريم خذت واحد مال اناناس .. وفطوم خذت مكــس من هذا كله اللي عندنا أظني طعمه بيكون غريب شوي هالـ combination !


ظهرنا من المعرض وكل وحده تشـرب عصيرها .. كل وحده عقت غشوتها بما انه الشباب كلهم داخل ومحد خاري .. ركبنا السياره وبما انه مافطرنا عدل اليوم .. سرنا صوب بيتزا هت اللي عدال سوق الزعفرانه وخذنا بيتزا من هناك .. وتمن البنات ياكلــن فالسياره بيخيسن سيارته الله يبحصهن !!


حموده: أيـــه بتخيسن السياااره !!

فطوم: عاد هاي مشكله يوم تسيرين فيا حد سيارته يديده .. لازم ينغص عليــج سيارتيه وسيارتيــه !!

حموده: اففف انزين بس انتن لا تخيــسن خلاف بدخنــها وبعطــرها .. شو أروم أقول انا .!!

فطوم: هيه زين خلج مطيــعه ..

وصلـنا فطوم بيـتها وحلفت عليـنا ننزل و نزلـنا .. مع اني ماكان لي نفس أكدر مزاجيه بـ ام خالـد .. لكن ماعليـه انشااالله ماتكوون يالله ترحمنيـه برحمتك .. مافيّه يجلب المود عنديه لأنه هالانسانه تعرف كيف تستفزنيـه .. !!

هبـطنا البيـت .. والحمـدلله انه ام خالد كانت قد رقدت بما انه الساعه الحين 10:30 .. بس نحن جنه توه المغرب عندنا ..

رقينا فوق صوب حجرة فطوم ونحن شالّيـن البيتزا والبيبسي وصحون السلطه والمعكرونه عشان نكمل أكلنا في حجرة فطوم .. حلفت اني أخيّس ريحة حجرتها مثل ماخيّست ريحة سيارتيه ..


عقينا عبينا و شيلنـا وتفيزرنا جدام التلفزون والاكـل جدامنـا .. الصراحه لمتنـا جذيـه غير شكـل .. بس ياترى حجرة خــالد ويـن ؟؟ انا فكرت في كل شي الا هذا !! مادري وين حجرته !! عيل كيف بحط اي
لهديــه ؟؟ مستحيـل أعطيه اياها فيس تو فيس .. !!


طنــشت السالفه وكملت أكــل .. وخلاف سمعنـا حد يدق ع الباب ..

حطينا شيلنا على روسـنا .. وقامت فطوم تفـج الباب ..

خالد: منو عنـدج هنيـه ؟؟

فطوم: بالله عليـك منو غيـر البنات ؟؟

خالد: توكن هاضلات ماشالله ؟؟

فطوم : لا من ساعه وشوي نحن أصلاً يايين ..

خالد: انزيـن شفيـج زايغـه والله ماباكلــج عنبو أخوج تخافيـن منيه جذيــه ..؟؟

فطوم: انته تراك مسوليه رعـــب ..

خالد: وانا مسوي رعب حق الكــل ؟؟ حشا مادريت بعمريه وحـش !!

فطوم: حق منو مسوي رعـب بعد ؟؟؟

خالد: مالــج خــص .. يالله سلمي ع اللي عندج ..

وروّح عنها وبندب الباب ..

فطوم: يسلم عليكن ..

سلامه: سمعناااهـ ..

فطوم: يبوكن اخويه حالته مب طبيعيه هالايــام ..

حموده: ليش شو فيـه ؟؟

فطوم: رد يهتم بعمره شرات قبــل .. مع انه من كم سنه وهو هامـل عمـره .. وايد أشياء تغيرت فيـه .. مايزاعق عليّه وايد الحيـن مع انه قبل كان حاط دوبه من دوبيه ..

حموده: حتى على هذا حاسدتنه ؟؟ خليـه بعده شباب ماشوّب الا انتوا كبرتوه قبل الكبر .. في أمريكا هذا عز الشباب عندهم !!

فطوم: الحمدلله يعله يتم دووم جذيــه !!

وعقب تقريباً نــص ساعه يينا بنروّح وأول مانزلنا تحت تلقف لنا خالد .. اللي كان ماخذ راحته وعاق السفره ..

خالد: بتسرن الحيـن تالي الليــل ؟؟

حموده: عادي الحين رمضان لا تخاف علينا ..

خالد: لا بخاف وبوصــلكن بعد .. عطينيه السويـج ..

حموده: شو بتسوق سيارتيـه ؟؟

خالد: هيه عيل ؟؟

تنهدت وعطيته السويـج اللي كنت معلقه فيه مليون ميداليه وكلها قلوب ..

خالد: أبا اعرف هذا سويـج ولا سيارة بتّان ؟؟

حموده: مالـك خــص سويجيه هو ولا سويـجك ؟؟

خالد: انزين رحمي حال السويـج مسكين معلقه فيه كل هالميداليات ..

حموده: انزين يالله نبا نسري نحن .. ولا تبانا نبات هنيـه ..؟؟؟

خالد: يا حيكم والله ياغير ماعندنا حجر لـكم ..

وخطف عنا ونحن نتبعـه ..

ركبنا السياره ..

حموده: هالله هالله في سيارتيـه أدريــبك دفـش !!!..

خالد: ان مادعمت بها ماكون خــالد ..

وظهر من البيت مســـرع وبغا يصقع الدروازه ..

الريـم: أيـــــه دخيــلك شوي شوي .. تبا تنفـدنا ؟؟

خالد: خـلاص رحمتـكن ..

وخف السرعه ..

حموده: شكراً لـحسن تعاونكـم ..

خالد: ههه العفو ..

حموده: هيــه صـح انته شقايـل بتـرد البيــت ؟؟

خالد: بشــل كلوزر عميـه تراه ابويه يباه عشان يسير به العزبه باجر لنه كلوزره عطلان ..

حموده: اها تحريـتك بترد بسيارتيـه بعـد ..

خالد: مانروم نشلـها النصـخ والروح سيارتـج ..!!

ووصلــنا البيـت وتمينا انّزل القراطيـس .. بس خالد ما خلانا ونزلهن عنا وشلهن ووطاهن عند الباب ..

مديت ايديه وقلت: السويــج ..

حطه في ايديه وقال: تصبحين على خيـر ..

حموده: وانته من اهلـه ..

هبطنا داخـل انا والبنات ..


بالبـاجـر .. باقي 4 أيـام عن العيـد .. عقب صلاة التراويـح بدينا مشوارنـا .. الليله بنسير صوب الخياط نظهر كناديرنا وصوب محل العبايا نظهر عبايانا .. بـس قبل خطفـنا على فـطوم .. هي حالفه عليـنا مانظهـر بدونهـا .. ولازم عاد خالد يسويـلنا سـالفه ويلـصق فينا ومايخليـنا نظهـر رواحـنا .. بس هالمـره سلـمنا ماحصلـناه لاهو ولا أمـه فالبيـت وسرنا ورديـنا بدون ضرابه ! .. الحمدلله ..