منتدى استراحات زايد - ماينفع الحكي أذا فاتك السوم ..... طرح العراق

السلام عليكم ورحمة الله وبركاته

الموسم الماضي بتاريخ 28 / 10 / 2009 الساعه التاسعه صباحا ً
أتصل علي خوي (الي يظهر بالصوره مع الطير)
قال طرحت حر أشعل من الي يحبه قلبك وتو خلصت من تسبيقه
قلت ماشاء الله عسى الله يزيدكم من خيره
وش حلاي الطير يبو حيدر ؟؟
قال أشعل صافي قياسه 17 ونص وكل مافيه طيب
وأنت مبدى على غيرك لوردت أطرشه طرشته
ولو ردت ارببه لين تجي بعد أنا حاضر
,,,
بدا الميموري يشتغل عند أبو رداد هههههه
,,,
((كلن يمدح حلالاه))
طبيعه عند أغلب الصقاقير وطواريح الصقور يمدحون حلالالهم
ومدح الحلال حق مشروع .... لكن أغلب الاحيان
يتحول المدح الى (مبالغه)
يقول المثل (القرد بعين أمه غزال) هههههه
وياكم حر خضر شريانه بالتلفون على أساس أنه أدهم أو أسود
وياكم طير نوصف لنا أشقر ووصلنا أحمر
ويا كم وياكم ......
لكن هذا الرجال مايزود ولاينقص وأعرفه زين من 18عام
وظلت الافكار تدور في راسي
,,,
قلت يابو حيدر
ان شريت الطيرعلى غير شوف لو ظلمتك لو ظلمت نفسي
طرش لي صورالطير بالانترنت ويصير خير أن شاء الله
قال أنت تعرفني أنا مال أنترنت وهالسوالف ؟؟ هههههه
قلت صور الطير فالجوال وروح عند اي مدينه قريبه عليك
ودورعلى مقهى أنترنت وقلهم يطرشون الصور على هذا الايميل
قال زين ....
طرشت له أيميلي ...
يومين مافي خبر ولاصور ثلاث أيام لاجديد
قلت الجماعه جاهم سعر طيب وباعوا ... عسى الله يوفقهم
نسيت موضوع هالطيروصارعندي سفر ومشغول للاخر
موسم وطيور ومقناص وبيع شراء
,,,
التقيت مع ابوحيدر في مقناص المشرح شهر 1 ميلادي
اول ما تلاقينا قال ليش ماشريت طيرنا ؟؟
شوف صور الطير .......
http://www.mekshat.com/pix/upload04/...mk8675_uu1.jpg
,,,,
http://www.mekshat.com/pix/upload04/...mk8675_uu2.jpg

ياويل قلبي .......
هذه جيرة الشواهين الطبيعيه
وهذي الحرار الي تستاهل القني والدراهم
ليتك ماورتيني الصور يابو حيدر

قلت ماجتني الصور !
قال طرشناها مرتين على الايميل !
عندي بلاك بيري في حينها وجلست أدوج بين الرسائل من جديد
مامش يابو حيدر !
راجعت الرساله الي طرشتها لابوحيدر
لن الايميل ناقص حرف !!! هههههههههه (خليتها سكته)
الي مافيه نصيب مافيه نصيب
الله يوفق راعيه فيه
وسلامتكم