***...(( شعل الاحرار ))...***

محروم.كوم · #1 07-22-2012, 10:30 PM

بسم الله الرحمن الرحيم

السلام عليكم ورحمة الله وبركاته

اقدم لكم هذه القصيده والتي تعبر عن نفسها

لاخوي الشاعر / رياض بن عبدالله الضويان

اتمنى ان تنال على اعجابكم

يقول فيها :

يازين شوفة جرة الخرب لاصار .. بارض كساها الله خضر النباتي
*
والزين لاصارت قديمه ولاطار .. باطراف نفدٍ للنظر حاجباتي
*
والجو غيم وفي رجا خير وامطار .. وبروق مزنٍ مردمه مقبلاتي
*
والجيب لا لكسز ولا بآخره آر .. جيبٍ يتل جيوبٍ مربضاتي
*
ربعٍ حمر شيخ النياسين لاسار .. وسط النفود يقودهن للقداتي
*
سقته على المشراف كشاف الانظار .. والطير جنبك مكثرٍ بإلتفاتي
*
له عاتقٍ لاتاق يوصف بالاشبار .. شبرين شبر اهل الكفوف الوفاتي
*
تاق ونتل سيره كما الطلق لاثار .. و اعطيته المطلوب مامن خشاتي
*
الطير جزل وله مهداتٍ كثار .. مجربٍ فعله و طلعه ثباتي
*
افجح قصير كراع من شعل الاحرار .. جزل المناكب نادرٍ بالصفاتي
*
حرشاً مضاريبه عطيبات وكبار .. يشبع بهن لاجاع قبل المباتي
*
واقفى وكنه مقفيٍ يطلب الثار .. من كرب جنحانه يثير غبراتي
*
واقبل على خربه كما طلقة النار .. ثاير ولامن ثار يلقى الغناتي
*
والخرب جثل وزادها بالتكبار .. قصده يروع الطير لاجل الفلاتي
*
مايدري انه شره صامل وجسار .. بعيونه الحبرو بحجم القطاتي
*
ماهمه ان كابر ولاهمه ان طار .. سهمٍ تحدر من علا للوطاتي
*
طقه ولايحتاج نشٍ وتكرار .. من قو ضربه مخطرٍ بالحفاتي
*
والريش من فوقه مثل دوم الاعصار .. لارَكد وطاحن خمامه شتاتي
*
والدم من حوله مثل نقع الامطار .. وكفوفه بدم النحر ناقعاتي
*
فعله ينومس بالهدد كل صقار .. وش عاد لاصار الهدد بلحظاتي
*
مامداك لاتسبر ولا تتبع اثار .. تل وعطيته مسرعٍ بالعطاتي
*
وشوفة طويل العنق يدبس بالانحار .. ينسا بها المديون نقد المياتي
*
تنسيه همٍ ملتهب من لهب نار .. يكويه لاغطوا العرب في سباتي
*
يبلاه في فكره و فكره به افكار .. وافكار راع الدين كيف القضاتي
*
وشوفة وسيع العين من بعد الانسار .. ترخي حبالٍ بالشتا مشدداتي
*
تاصف لك اللي مستوي فوق مليار .. ماله من المليار كود عشراتي
*
خيره من الله جاريٍ مثل الانهار .. كريم سبلا مارجا الا حسناتي
*
والكيف و القرناس وجزلات الاشعار .. وآثار ولفٍ بالضحى محبرياتي
*
والبندق بـ نيشان موزونة عيار .. وجول القطا في روضهن وامناتي
*
والسابع التوفيق من عند غفار .. ربٍ كريم يغفر السيئاتي
*
هذي غناة اللي على الجيب دوار .. اللي فرق بين الولع والصلاتي
*

اللي دروبه ماحسبها بالامتار .. لاجل الحرار يهون الكايداتي
*
قايم بفرضه حافظ كل الاذكار .. عز الله اني اياه وافخر بذاتي

تابعوه عبر التويتر https://twitter.com/Abu_Ms3d

ونشكر لكم حسن المتابعه
__DEFINE_LIKE_SHARE__

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
نسيج \| اصابة احد الاحرار في سترة	محروم.كوم	منتدى أخبار المواقع والمنتديات العربية والأجنبية	0	01-01-2012 06:10 PM
××××((هجرة الاحرار))××××	محروم.كوم	منتدى أخبار المواقع والمنتديات العربية والأجنبية	0	11-07-2011 11:30 AM
حر الاحرار طير ابيض للبيع	محروم.كوم	منتدى أخبار المواقع والمنتديات العربية والأجنبية	0	09-30-2011 03:20 PM
سؤال عن الاحرار	محروم.كوم	منتدى أخبار المواقع والمنتديات العربية والأجنبية	0	07-06-2010 05:50 PM
الاحرار: ما ثمن البضاعة التي اشتريتها؟	محروم.كوم	منتدى أخبار المواقع والمنتديات العربية والأجنبية	0	04-16-2010 05:50 AM