الريشه والجهاز ومعاناة الصقارين كل موسم اهداء لمنتدى مكشات وأعضائه الكرام

محروم.كوم · #1 07-03-2012, 02:40 AM

بسم الله الرحمن الرحيم

اخواني اعضاء خيمة الصيد بالصقور المحترمين بسبب معاناتي مع الريش والجهاز في كل موسم وبسبب الصيفيه والفضاوه قمت بالبحث والحفر عن شركة مارشال تحديدا وعن الريش اللي كثير من الاخوان وانا منهم نجهل طريقة عمل هذه الاجهزه والمشكله اللي كانت تواجهني واتوقع مرت بذهن الكثير باكتبها على هيئة اسئله واحط الاجوبه اللي توصلت لها بعد بحثي المتواضع جدا بس حبيت اوصل لكم الفكره وعسى ربي ينفع به :

س١:ماهي فكرة عمل الجهاز بشكل مبسط بعيد عن التعقيد والمسميات الواجد ؟

ج : فكرة العمل الريشه وتسمى المرسل والجهاز يسمى المستقبل وهذا مقطع يوضح بشكل بسيط كيفية تشغيل الريشه والجهاز وكيفية التوجيه الصحيح بداية المقطع اغنيه ارجو كتم الصوت لين يبدا الشرح

س٢ : معك ريشه رقم ٩ وخويك نفس الريشه رقم ٩ وكلهن فلنفرض ام قرص وحده يقولك انه تدق ٨ كيلو والثانيه ١٥ مع الافتراض ايضا انهن كل الريشتين مضبوطه ولافيهن اعطال وكلهن بطاريتهن جديده وين المشكله ؟

ج ٢: يجب عليك اخي الصقار ان تعرف النقاط اللي تاثر في الموضوع هذا رقم واحد الجهاز والريشه تتاكد بانها سليمه وبطارياتها جديده وهذا بالفحص العادي للدقه والبطاريه والفحص الدوري لها رقم اثنين لازم ان تتاكد ان الريشه اللي معك والجهاز تقرا نفس التردد والموجود من الترددات كالتالي

١. fm . am .cdma طبعا الترددات كثيره ولايهمنا حنا الصقارين وش كثره او عدده او وش تعني لانه يحتاج الى مختصين عشان يشرحون الموضوع اللي يهمنا بالموضوع ان الريشه مثلا هاذي

لازم تعرف شي مهم فيها وهو رقم التردد اللي عليها ولنفرض انه 216.010 وبعده الجهاز اللي هو مثل هذا وهو احدث اللي موجود عندهم

لازم تعرف اهم شي فيه وهو التردد اللي يقرا الريشه اللي عندك يعني ببساطه انك تاخذ جهاز وتكون مجربه على ريشه نفس تردده وتدق دق موب صاحي تجي تشري الجهاز وتجربه على الريشه اللي عندك تلقا اما دقه ضعيف او مايدق بالمره تدري ليش حصل معك هالشي بكل بساطه تلقى الجهاز يقرا الترددات اللي ارقامها مثلا 217.218.219 او يقرا الترددات 433.444.445

بس مايقرا التردد 216 اللي هو بالغالب اكثر الريش عندنا بالسوق فتلقى اغلب الريش ماتدق معه زين يعني باختصار لاني حسيت اني كثرت شرح اذا جيت تشري جهاز وريشه تاكد ان مواصفاتهن كالتالي :

الريشه مثلا : frequencies: 216 الكلمه هذي تعني تردد

والجهاز يكون: Frequency: 216 MHz, equipped with FullSize Yagi Antenne

في هالحاله والارقام هاذي تلاحظ ان الريشه والجهاز نفس الرقم فبتشتغل معك حلاوه لاكن اذا جاك الجهاز مواصفاته مثلا يقرا frequencies: 217.218.433
كذا تصير ماسويت شي كنك تراسل خويك بالايكوم وكل واحد بمكتب ماراح تسمعون بعض وبيجي واحد ويهد على حباراكم وانتم منتب حوله هذا اللي قدرت اشرحه بالنقطه هاذي

س٣: غدا طيرك وانت الحين صرت تعرف ان جهازك وريشتك مضبوطه وعرفت الترددات لاكن الطير مامداك اخفيته وتشغل جهازك وتسمع الريشه يالله تدق او ماتسمعه بالمره وين المشكله ؟

ج٣: هنا مربط الفرس وهنا الزبده ياصقاقير المهم في الموضوع كله وقت ضياع الطير تلقى الواحد مع الربشه والعجله يشغل الجهاز على عجل وهو بالسياره ولا ينزل بسرعه اذا ماسمع دق غير موقعه وعلى هالحاله لين يمسيه الليل وهو يدور بحلقه مفرغه وعشان تتجاوز المشكله هذي لازم وقت الراحه والهدوء تكون ملم بالجهاز اللي معك وعدتك يعني جرب وافحص وتعلم عشان لاجاء وقت اللزوم تقدر تلقى طيرك باسرع وقت لانه ياغالين وغيركم المعلم ضياع الطير بالغالب يكون قل دبره وهو موب عيب بالعكس كلن طيره غالي انا بشرح لك ببساطه الارسال حق الريشه متى يضعف ومتى يقوى وهذا الشي من موقع marshal نفسه قوة الاشاره تعتمد على الريشه بشكل اكبر من الجهاز في موقعهم يقولون لك ان نظام الاشاره عندهم يقرا بطريقة تسمى line-of-sight والمقصود فيها انه الاشاره ممكن تقراها افضل شي بخط مستقيم جدا يعني اذا ابعدت الريشه عنك وحرفت الجهاز لو شي بسيط وكان الطير متقي عنك ماراح تقراه وهذا الشرح بالانقليزي بعد للاستفاده اكثر

designed to give best range while on your bird. It has been tested to over 100 miles line-of-sight. Like any transmitter, range varies greatly with terrain. Tests have shown its range in hunting situations of western US deserts to be anywhere from 3 to 50 miles, depending on height of transmitter, height of receiver, type of terrain and obstructions, and radio noise or interference

ومذكور فيه بعد انه بعض التجارب دقت معهم الريشه بشكل مستقيم في حدود ١٠٠ ميل ونزلت في بعض التجارب الى ٥٠ ميل نجي لنا حنا الناس البسيطه اللي مالها بالقلق هذا كله ابريحك بنقطه بسيطه على رسمه ممكن توضح شرحي

بالرسمه اللي فوق توضح لك طريقه ارسال الريشه بانه يبدا صغير من النصف ومن ثم يبدا يكبر بارتفاع وهي تسمى عند من يدرسون هذه التقنيات بالدونات اللي يهمنا كصقاقير ونحب الاختصار هو دايم وفي كل وقت وفي كل ارض ياصقار اذا اغديت طيرك ابحث عن اعلى مكان تقدر تاصله ويكون يكشف المكان اللي اغديت طيرك فيه بشكل كبير وهذي صوره ثانيه للتوضيح

تلاحظ بداية طلوع الاشاره من الخط صغيره ويوم ارتفعت صارت اعرض فاذا كان طيرك متقي عنك وبينك بينه شي وانت على نفس المستوى من الطير ماراح تقرا الاشاره لاكن اذا كنت ارفع من الطير باذن الله بتقرا الاشاره اتمنى الفكره وصلت

نجي اخر شي لطريقة مسكة الجهاز اللي تستخدمها وهي ثنتين

١. الطير حايم او بالسمى

2.الطير بالارض يعني نازل

وانا انصح حسب طريقتي وفهمي المتواضع بالهدوء الهدوء واذا جهازك فيه منفذ للسماعه انصح باقتنائه وهي مثل هاذي لانه وانت في مكان مرتفع وحاط السماعه بتسمع الدق لو كان ضعيف بالمره لان السماعه بتعزل عنك صوت الهوا والمواتر والجهاز فبيكون تركيزك انشاء الله اعلى

وهذا اللي قدرت اجمعه لكم يالغالين واعذروني على الاطاله حبيت اشرح شي واكيد ان اخواني اعمدة المنتدى اخبر مني في الموضوع واذا لهم تعديلات او ملاحظات اتمنى يضيفونها بهالموضوع عشان الفائده تكون اكبر وعسى ربي يرزق الجميع بالصيد والفيد ولايضيع حلال مسلم ياكريم

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
لاعضاء مكشات الصقارين	محروم.كوم	منتدى أخبار المواقع والمنتديات العربية والأجنبية	0	02-15-2012 01:40 AM
اهداء الي الصقاره ( حبيت اشوقكم) حصريا لمنتدى مكشات	محروم.كوم	منتدى أخبار المواقع والمنتديات العربية والأجنبية	0	08-05-2010 05:10 AM
إهداء إلى مكشات صور قديمة لبعض الصقارين من ليبيا	محروم.كوم	منتدى أخبار المواقع والمنتديات العربية والأجنبية	0	06-30-2010 06:50 PM
اهداء لأعضاء وزوار مكشات (وخصوصا الاخ ابو سفيان) بمناسبة قرب موسم الكرك	محروم.كوم	منتدى أخبار المواقع والمنتديات العربية والأجنبية	0	02-15-2010 12:50 AM
خريطة الصحراء 2009 بايقوناتها الجديده ( اهداء لمنتدى مكشات )	محروم.كوم	منتدى أخبار المواقع والمنتديات العربية والأجنبية	0	05-29-2009 11:40 AM