صدق من قال: ((الرجال مخابر ما هي مناظر)) من قصصي الجديدة ..

محروم.كوم · #1 07-02-2012, 01:40 PM

حياكم الله يالربع وعساكم سالمين وغانمين ...

هذا سالفة صارت لي من كم يوم بمدينة الرياض العريقة ، وحصل موقوف قلت: لزوم انكم تعرفونه وصدق من قال (الرجال مخابر ما هي مناظر) ... ما لكم في الطويلة...

هذا يا مرحومين الوالدين ... كنت بسوق الشمال بالرياض اشتري سمك
خرجت من السوق ومعي هالسمكات بهالكيس وانا بالسيارة راكب متجهه للبيت
قلت يا ولد خلني ادخل مع هالحارة اختصر الطريق واطلع على الشارع الرئيسي
ودخلت هالحارة المباركة ويقال لها حي ((المصيف)) هادئه وما فيها حس .. هالكلام بعز الظهر
وشوي ويظهر علي هاك الموتر الطائر من اليمين (كاديلاك) من الجدد وأنا أخمه من جنبه
الحمد لله على السلامة .. جت سليمة بس المواتر راحت فيها ..
نزل صاحبنا (ضابط بثلاث نجوم) وسلم وتحمد بالسلامة ((الله يجزاه خير))

اتصلت بنجم وقالوا دقائق وحنا عندك .. قلت: ما يخالف
صاحبنا الضابط اقترح بأن نقلط عنده في منزله الكائن بقرب الحادث ولزم علينا لزوم ان نقلط لحين ما يوصل نجم قلت: توكل على الله ،،
قلطنا في هاك البدروم المجهز بأحسن فرش والمسبح عن يمينك والبوفيه عن يسارك وشاشات بلازما في كل مكان .. الحقيقة شيئ يبهر القلب (ما شاء الله)
والقهوة زاهبة في لحظات والبيت اول ما دخلنا خدم وحشم وممرضات وشي فله ..
تقهوينا على خير ، وشوي ويكلمنا نجم ويقول لنا : هلموا .. هلموا ..
أتينا على مضض وحضرنا للموقع حيث كان قريب من منزل صاحبنا المعمور
طلب منا نجم الأوراق وما إلى ذلك .. قكانت المصيبة والصاعقه ان صاحبنا الضابط التأمين حقه منتهي ... يالله الخيره ...
طيب والحل ؟؟؟؟؟
قال نجم : انا ما لي دخل بالموضوع .. اما تتصالحون واكتب تنازل وتوقعه ، او تتصلون بالمرور لكي يقومون بحجز الرجال لحين استكمال باقي حقوقك ... هاه .. وش قلت ؟؟
تقدم صاحبنا الضابط بكل فخر وكح وتنحنح وقال : انا مستعد اصلح لك السيارة في احسن الورش وأجيب لك القطع من الوكالة ولا تشيل هم ... أبد ...
بيني وبينكم (بهرني كلامه الشجاع وقلت في نفسي الرجال بخير ونعمه ويسويها ما يقصر ((سيماهم في وجوههيم وبيوتهم بعد)) .. بس تبون الصراحة ((قلبي ناغزني بأن لا أثق بكلامة بالرغم على حالته المادية الممتازة والرجال من أسره معروفة ومركزه الوظيفي كذلك ...))
قال نجم .. اخلص علي وش قلت ...
قلت له : والله مسئلة انكم بتحجزون الرجال وتوني طالع من بيته وأحرمه من عياله شينه وعيب في وجهي ... نتفق احسن .. على هالكلام جري تحرير محظر مخالصة وتم التوقيع عليه ...
بعد ذلك ترجلت بهذا الكلمة العريقه قلت للأخ الفاضل .. شف يا بن الحلال .. هات 5000 ريال اصلح الموتر بهن (( اللي يتصلح نصلحه واللي يبي له تغيير نغيره)) ان كلفت فوق هالمبلغ الله يسامحك وان كلفت دون هالبلغ ارجع لك الباقي بكذا اريح لي ولك وفكيني من ورشك وخلني اصلح موتري بمعرفتي ... قفال ....!!!!!!!!!!!!!!!!!!!!!!
قال : لا ... كثير 5000 .... الصدمة ما تكلف هالقيمة ..
انصدمت يالربع بهالكلام وحسيت انه اللعب علي ورحت في خرايطها ..
قلت : يا ولد الظاهر ان الرجال بدأ يرقل .. خلني اسايسه .. العوض ولا القطيعه ..
تبسمت له وقلت : طيب وش رايك خلني أنا أودي السيارة لورشة اعرفها واجيب لك الفاتورة وفاتورة قطع الغيار ... وش رايك ؟؟؟؟؟؟؟؟؟؟؟؟
قال : ورد علي بعد لحظات كأنها عصيبه عليه .. طيب ...
تفرقنا على خير وتوجت للبيت وتوني متمدد وإذ بالهاتف يرن ..
آلو ... مين ؟؟
ولا بصاحبنا يكلمني ويعرض علي عرض مغري وهو ان هناك ورشة معروفة بالدائر سبق وان صلحت عندهم سيارتي وشغلهم 100% برسل لك رقمهم ولا تشيل هم جميع القطع من الوكالة وحط رجولك في ماء بارد ... ok
قلت : مجبر أخاك لا بطل .... قلت تم والله يجزاك خير ،،
ومن الغد توكلت على الله وتوجهت للورشة المذكورة مبتهج ومتخوف في نفس الوقت .
وشكلي اقول: أكيد يالوفاء أو أحد المراكز الضخمه ..

تعبت ... المعذرة اكمل بعدين __DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مساعدة من أجل تعبئة محابر الطابعة أكثر من مرة	محروم.كوم	منتدى أخبار المواقع والمنتديات العربية والأجنبية	0	09-09-2010 03:20 PM
الطيور مخابر ماهي مناظر	محروم.كوم	منتدى أخبار المواقع والمنتديات العربية والأجنبية	0	06-21-2010 01:10 AM
قصصي مع الهيئه .. أسود الفضيله .. منقووووول...	محروم.كوم	منتدى أخبار المواقع والمنتديات العربية والأجنبية	0	04-23-2010 11:40 PM
(صدق أو لا تصدق)مناظر خلابة فالإمارات (مناظر عيونكم ماشافتها)..حياكم	شآعرة يآلبيه	سفر وسياحة	14	09-13-2009 02:59 AM
نغمات لجابر الكاسر	العبيدي	نغمــات للهــواتف	5	05-30-2008 03:30 AM