مــهـــــــــرة الـــدوح **قــــصه مـن الموروث الشعبي **مـــــحـــمد الــــظـــاهــري

محروم.كوم · #1 06-26-2012, 05:10 AM

السلام عليكم ورحمة الله وبركاته
حياكم الله اخواني ...
اعضاء .ومشرفين .وزوار منتديات مكشات
اولا اعتذر على الغياب بسبب خلل في الشبكه
ولله الحمد تم اصلحها
اترككم مع السالفه واتمنى تحوز على رضاكم
يقولون العرب من اول كان فيه واحد شمالي
والشمالي هاذا عنده مهره صغيره مدللها ويحبها حب اكثر من عياله
ويعطيها احسن العلف وازين الماء
والمهره تارد على الما الحالها وتشرب الحالها
وهي ماغير تتبع الرجال بكل مكان
اذا سير على ربع راحت معه وتجي حوله
والرجال هاذا مطلق طلاق من حرمت الي يمس المهره ولا يتعرضلها انه يذبحه
وهو مزودها على مايقولون ومعطيها اكبر من حجمه
مره من هاك الليالي قال الرجال انا ابي انزل للديره ابي اتقضا للبيت يجيب قهوه وسكر وطحين وهو ياخذ معه سمن بقل صوف يبيعها ويشتري الي هو يبي
قال الرجال للولد انتبه للمهره ويقوله اذا جاء الوقت الفلاني عطها كذا ووردها على الماء الوقت الفلاني
وكذا يعلمها على العاده الي يسويها
المهم
من بكره ويوم جاء حزة الماء هو يوردها على القليب
وفيه رجال عابر سبيل جاي من الشمال ورايح للجنوب
يبي يشرب هو وذلوله ولا المهره تعانده تبي تشرب الحالها
جاء يبي يسوقها منا ولا منا وهي تعاند ماتبي احد يشرب
وهو يضربها مع خشمها
والخيل والبل وغيرها الي يضرب مع الخشم يقولون توافق موته
ويوم ضرب المهره والاهي ميته
والي عنده يصارخون هاذي مهرة الدوح هاي للدوح
راعيها مطلق الي يتعرضلها انه يذبحه
والايوم الرجال اختل وخاف وهو ينحاش واخذو الرياجيل وسم ذلوله وشكله
ومن بكره الا الرجال جاي من القريه
ويعلمه الولد باسالفه وقاله جاء رجال ضرب المهره وماتت
قال الرجال وهي وينها قال عند المارد طايحه
ومن بكره ويوم اصبح راح يم كم رجال وقاله وشلون ذبح المهره قالوله هاذا ماصار وهاذا ماصار وهاذا وسمه ووصفه
وهو الي يركب ذلوله ويرح يدوره
المهم
الرجال الي ذبح المهره الي انحاش ويوافق هاك الذيدان
ويروح عندهم السلام
وعليكم السلام
ياعيال من هوله هاك الديره قالو هاذي ديار الفلاني
وقال من شيخهم قالو اشيوها اثنين
نايف وفزاع من يوم هو صغار وهو يشدون وينزلون مع بعض
الطنب بالطنب
قال طيب الله لا يهينكم ابي اخلي ذلولي عندكم كم يوم لين احصل لي شغل عند الشيوخ
وماعليمن لكم اسراحتها يعني الايجار
خلا ذلوله وراح للديره ودخل على نايف وفزاع
وقالهم انا ادور شغل عندكم
قالو الشيوخ وش تشتغل
قال اسوي القهوه ولا احطب ولا احش للخيل
وانا ودي ان اكون قهوجي
اعجب الشيوخ بالرجال وبكلامه
قالو خلاص انت تسوي قهوه والباقي يصبون قال تم
وخوينا راعي المهره على حسب الروايه يقولون اخذ له ثلاث شهور وهو يدور الرجال الي ذبح المهره
وفي هاك اليوم وهو الي يعدي راس الابرق والا يشوف هاك الذيدان وهو يروح يمهم
السلام ياعيال
وعليكم السلام
ماعندكم حليب
قالو الا عندنا ويعطونه
وقام يسئل راعي المهره من له الديره هاذي
قالو هاذا ديرةنايف وفزاع
قال من جاكم وماجاكم ويسئل
قالو ما احد جاء الا واحد قبل ثلاث اشهر
يشتغل عند الشيوخ وخلا ذلوله عندنا وهاذيك هي الذلول
ويوم شافها الا الوسم واللون الي وصفو له جماعته
راح الرجال للديره ويدخل على الشيوخ
ويسلم عليهم وقالوله حياك الله اجلس اجلس
قال طيب وهو يروح عند القهوجي وعرفه وعرف وصفه
والقهوجي عرف ان الرجال راعي المهره من شراسته
وقاله راعي المهره ,هلك وينهم يعني وين اهلك
قال القهوجي .اهلي انا
قال . ايه انت وين هلك
ويقوم القهوجي ويوقف عند نايف وفزاع
ويقول
له ابيات ما اذكرها صراحه
ولا الشيوخ انتبهو للكلام
وقالو للرجل وش السالفه
قال القهوجي السالفه انا ورد على ماهو جاي من الشمال ورايح للجنوب ورح عن المارد ابي اشرب وازي ذلولي وهو عنه مهره
والمهره عيت لا توخر عن الماء وقدر الله وضربتها مع خشمها وماتت وهو مطلق طلاق للي يتعرض للمهره انه يذبحه
وهو الحين جاي بطلبه ويبي يذبحني
ولا فيه شايب في المجلس جالس قال ,
صحيح الهرج هاذا ياولد
قال راعي المهره ,ايه صحيح
قال الشايب .الله ياخذك الله ياخذك

الحين الرجال جالي عن اهله وعياله وربعه على شان فرس
قال راعي المهره , بس انا مطلق
قال الشايب ,طلاق ماطلاق واذا كنت مطلق خذ من بنات شمر وش كثرهن
واذا على شان الفرس رح للمربط تخير لك اصيله وخذها
ويروح وياخذ له فرس اصيله
ويرج القهوجي ويكمل طريقه ويروح لربعه

اخواني....
سالفتي انتهت
واعذروني على التقصير
والقصص التي تسرد صحيحه وليست خرافيه
وانتظروني في سالفه جديده باذن لله
تحياتي وودي
محــــــــــبــــــــكم
محمـــــــــد الـــــــــظاهـــــــــــــــري

__DEFINE_LIKE_SHARE__

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الف مبروك الوسام البرونزي للاعضاء في خيمة الموروث الشعبي	محروم.كوم	منتدى أخبار المواقع والمنتديات العربية والأجنبية	0	03-25-2012 05:10 PM
فعاليات الموروث الشعبي الكويتي ( الثاني)-----مخاوي الذيب-----	محروم.كوم	منتدى أخبار المواقع والمنتديات العربية والأجنبية	0	03-01-2012 03:50 PM
قصص من الموروث الشعبي .	محروم.كوم	منتدى أخبار المواقع والمنتديات العربية والأجنبية	0	02-22-2012 12:10 PM
قصه من قصص الوصيا من الموروث الشعبي العريق*محمد الظاهري	محروم.كوم	منتدى أخبار المواقع والمنتديات العربية والأجنبية	0	01-18-2012 01:30 PM
من الموروث الشعبي	محروم.كوم	منتدى أخبار المواقع والمنتديات العربية والأجنبية	0	06-05-2009 06:00 PM